- ياالله ياالله يا قسّام الارزاق(ي)
- قسّام الأرزاق تاليها مع اوّلها
- يفنى الذي عندنا، وما عندك الباقي
- تفنى التجارة ويفنى اللي يموّلها
- يشهد لك الفجر ويّا شمس الإشراق(ي)
- وغروبها والشفق ساعة تحوّلها
- والليل يسدل ستاره فوق الآفاق(ي)
- يشهد والأقدار يشهد لك تداولها
- ارزقني الصبر ويّا حسن الاخلاق(ي)
- روحي على قسوة الظالم تطوّلها
- الأصل والفصل والمنشأ والأعراق(ي)
- إذا إكتست بالعدالة فالسموّ (ا)لها
- وعدالة القول مبدايه وميثاقي
- تأمر عليًّه وأفوّضها وأخوّلها
- يا بخته اللي في الخيرات سبّاق(ي)
- إذا انهزم دونها يرجع يحاولها
- أدافع الضيقة اللي داخل أعماقي
- هوّنتها بسّ واقعها يهوّلها
- يا وجد روحي وهمّي يحرق احراق(ي)
- أقولها غصب عنّي ما اتقوّلها
- يا وجد روحي وجود المرهَق الشاقي
- اللي يدوّر على مهنة يزاولها
- العاطل اللي يشيل ملف علّاقي
- يروح لأهل المناصب ويتسوّلها
- يذرف دموعه من الحسرة والارهاقي
- والناس صدّت عنه كأنه عدوّ (ا)ل
- وجدي وجوده اذا منّ الزمن ضاق(ي)
- عاف الخلائق ويحتاج اللجوءْ (ا)لها
- بعض المخاليق ما ادري كيف تنطاق(ي)
- عالة علينا وعَلّت من يعوّلها
- والغافل اللي مع الشيطان ينساق(ي)
- نفسه متى سوّلت له لا يسوّلها