• يا حسافة عمري اللي راح يا عمري بدونك
• يا حسافة وقتي اللي ضاع وانا ما لقيتك
• يا حسافة كل شهر وكل يوم يغيب لونك
• كل ساعة كل لحظة في رجاءْ ليتي وليتك
• يا عسى ربي من العلّة، من الزلّة يصونك
• كان تحسبني نسيتك يشهد الله ما نسيتك
• شف عيوني يا عيوني كيف تخجل من عيونك
• عَبْرتي وشلون تخنقني إذا شفتك وجيتك
• يا فنوني من فنونك يا جنوني من جنونك
• أنت تقرأ في كلامي بسّ انا كلّك قريتك
• من يعرْفك ما يبي غيرك ولا يمكن يخونك
• الهوى لك والولاء لك يا فديتك يا فديتك
• هاك صدري، مثل بيتك، لا تهون ولا يهونك
• اقلط وحوّل تفضّل مرحبا والبيت بيتك
• يا تولّى لي شجوني يا تولّيني شجونك
• يا تسلّيني بقربك يا تقلّي ما سليتك
• يا مزون الروح روحي لا تجنبّها مزونك
• أنت تأمرني وتنهاني وأنا ما قد نهيتك
• تحمل متوني هموم ولا تحمَّلها متونك
• جمرها في وسْط قلبي لا تصبّ عليه زيتك
• وين همّك عن همومي؟ هوّن وهوّن ظنونك
• انت وينك وانا ويني؟ ويني انا وانت وينك؟
• عمري اللي ضاع يا عمري وضيّعته بدونك
• ما يهون إلا بقربك، كل ما جيتك لقيتك