Vondoag läs wie en Markus 16:14-20, wua Jesus sikj von de Jinja lat seenen, un jeft an siene latste Bootschoft un roop. Dit mol jleewen de Jinja daut werkjlich, un see nämen daut aun daut Jesus es vom Doot oppjestonen. Hee jeft an de Oppgow von daut Evangelium vekjindjen, un sajcht an daut see woaren Krauft kjrieen toom groote Wunda doonen, waut daut Wuat vom Evangelium bekjraftjen woaren. Met disen Gruss, foat hee trigj no de Himmel, un sat sikj dol bie Gott siene rajchte Haunt. Dit es een Bewies, daut siene Oabeit foadich es, un daut hee rejieet äwa aules. Un daut Wuat von Gott woat wiet un breet vekjindicht, soogoa Vondoag uk noch.