Buk Song 82

God i stap namba wan long bikpela miting long heven. Ol hetman i bung na God i tokaut long tingting bilong en. – Buk Song 82:1

Ol dispela hetman i olsem ol jas na king na hetman bilong dispela graun. I gat wanpela Hetman tru i stap long bosim dispela graun – em i God bilong yumi. Olgeta man na meri i wankain long ai bilong God. I no gat bikman o rabisman long ai bilong God. Olgeta i wankain tasol. Na i no gat wanpela inap bosim narapela sapos God yet i no givim namba long em.

Olsem na ol papamama, tisa, bosman, na tu ol jas, king, kwin na ol man i raitim ol lo bilong kantri ol i gat namba bikos ol i kisim dispela namba long God. Ol i gat namba inap long bosim liklik lain, tasol God i bosim olgeta lain long dispela graun.

Na ol hetman i mas aninit long God na ol i mas redi long bekim God long olgeta samting ol i bin mekim. God yet bai kotim ol. Yumi harim tingting bilong God long dispela Buk Song: “Yupela i save kot giaman, yupela i save grisim ol man nogut. Yupela i mas helpim ol rabisman na ol manmeri i stap nogut.”

Taim ol hetman i lus tingting long God husat i givim dispela namba long ol, ol bai i mekim kranki pasin na bagarapim ol lain i no gat namba. God i givim dispela pawa long ol, long ol i ken yusim liklik taim tasol bilong mekim wok bilong em. Na ol hetman i mas tokim God long olgeta samting ol i bin mekim long namba bilong ol, dispela namba God yet i givim ol. Spirit bilong God na Tok bilong em i mas stiaim ol hetman.

Olsem na, em i wok bilong sios bilong God long givim strongpela tok long ol hetman i wok long bagarapim dispela namba God i givim ol. Olgeta kantri long dispela graun i mas aninit long God na Tok bilong em. “God, yu mas kam na bosim olgeta manmeri bilong graun. Olgeta lain manmeri i bilong yu tasol” (lain 8).

Em i wok bilong yumi Kristen long aninit long ol hetman God yet i givim yumi. Yumi mas bihainim tok bilong ol, bikos God yet i givim namba long ol. Na yumi no ken pret long tokim ol long bihainim tok bilong God taim ol i mekim wok bilong ol olsem hetman. Ol i mas helpim ol tarangu lain na ol pikinini, papa bilong ol i dai pinis. Na ol man i karim hevi na i no stap gut, ol i mas mekim gut long ol. Na ol manmeri i stap nogut, ol i mas kisim bek ol long han bilong ol man nogut.

SAMPELA TINGTING

Hau bai yumi inap strongim ol hetman bilong kantri bilong yumi long aninit long tok bilong God?