Ritim: Hibru 10:32-11:1

Pasin bilong bilip em i olsem. Yumi save gut tru olsem, olgeta gutpela samting God i promis pinis long givim yumi na yumi wet long kisim, em bai yumi kisim tru. Maski ai bilong yumi i no lukim ol dispela samting, yumi save gut tru olsem, dispela olgeta samting i stap.

—Hibru 11:1

Buk Hibru i putim ples klia olsem dispela nupela kontrak i winim stret dispela olpela kontrak. Tasol dispela nupela kontrak em i kontrak tru, na long dispela kontrak yumi ken wanbel wantaim God gen, na as bilong dispela em i tok bilong God. Na tu, yumi i mas bekim dispela kontrak long bilip.

Olsem na, long siapta 11, man i raitim dispela buk i autim ol stori long ol lain i mekim wok long bilip. Ol manmeri i mekim olsem long stat bilong dispela graun inap long taim em i raitim dispela buk. Olgeta taim God i autim tok, ol manmeri bilong em i mas bekim tok bilong em long bilip.

Tude tu yumi save olsem yumi nidim bilip, tasol sampela taim em i hat tru long bilip. Planti taim yumi i laik klia gut tru long sampela samting na bihain orait yumi bai bilip. Tasol planti taim sapos yumi no lukim sampela samting long ai bilong yumi yet, bai yumi pilim olsem em bai i hat tru long bilipim.

Tasol bilip i min olsem yumi mas bilip long God na wanem samting em i tok, na bihainim em. Long dispela siapta (11) yumi harim stori long planti ol man na meri i bilipim olgeta promis bilong God, maski ol i no lukim yet o ol i no gat we long kisim save sapos God bai inapim olgeta promis bilong em o nogat. Tasol ol i bilip, na ol i bihainim tok bilong God na wokabaut long rot bilong laip.

Yumi gat hop bikos yumi bilip. Na maski yumi no inap long lukim sampela samting long ai, long bilip bai yumi lukim long bel bilong yumi. Olsem tasol sampela man na meri i mekim narakain samting tru long bilip, na ol lain i no bilip, ol bai i paul long pasin bilong ol na ting olsem ol i longlong. Tasol ol lain i bilip, ol i save olsem pasin bilong ol i no longlong. Ol i bilipim tok bilong God na long pasin bilong ol dispela samting i kamap ples klia.

Ol lain i no bilip bai i tok, “Soim mi pastaim, na bai mi bilip.” Tasol God i tok, “Bilipim mi pastaim, na bai yu lukim.” I no olsem yumi ken skelim God - Yumi mas bilipim God tasol.

SAMPELA TINGTING

Bilong wanem yu yet i bilip long God?