Kjikj Nopp!: Recent Episodes
None
KJikj Nopp! is a Christian, Low German podcast where we look at the Bible and apply it to everyday life in order to promote growth in faith and godliness.
Vondoag läs wie en Markus 16:14-20, wua Jesus sikj von de Jinja lat seenen, un jeft an siene latste Bootschoft un roop. Dit mol jleewen de Jinja daut werkjlich, un see nämen daut aun daut Jesus es vom Doot oppjestonen. Hee jeft an de Oppgow von daut Evangelium vekjindjen, un sajcht an daut see woaren Krauft kjrieen toom groote Wunda doonen, waut daut Wuat vom Evangelium bekjraftjen woaren. Met disen Gruss, foat hee trigj no de Himmel, un sat sikj dol bie Gott siene rajchte Haunt. Dit es een Bewies, daut siene Oabeit foadich es, un daut hee rejieet äwa aules. Un daut Wuat von Gott woat wiet un breet vekjindicht, soogoa Vondoag uk noch.
Vondoag läs wie en Markus 16:9-13, un wie seenen wada woo de Jinja eene schwoare Tiet haben daut to jleewen, daut Jesus werkjlich wada läft. Ieescht hauden de Frues de Enjel jetroffen, waut an jesajcht haud, daut Jesus nich mea doot wia, oba läwd; vondoag, läsen wie von twee Jinja, dee oppem Launtwajch gonen, un Jesus lat sikj von an seenen, oba en eenen aundren Jeschekj. Aus dise beid Jinja daut ieescht enwoaren, daut et Jesus es, gonen see plazlich trigj no de aundre Jinja un sajen an, waut see jeseenen haben. Oba de Jinja jleewen an daut uk nich. Weet je, aulemaun haft daut Probleem, daut wie aundre Menschen nich wellen irjentwaut jleewen, buta wie daut selfst beläft haben; soo wia daut uk fa de Jinja. Well wie aun Jesus jleewen, soogoa wan wie am nich jeseenen haben; wiels daut es waut woara Gloowen velangt von ons.
Vondoag läs wie en Markus 16:1-8, wua eene Grupp von Frues sikj reed moaken toom no daut Grauf gonen, wua Jesus wort nennjelajcht, wäajen see wullen Jesus ensaulwen met scheenrikjende Eelj. See hauden verhäa nich Tiet jehaut, wiels daut wia meist däm Sabat, aus Jesus storf, un aum Sabat sellen de Juden kjeene Oabeit doonen. Dit wia nu aul dän dredden Dach von don, aus Jesus storf, un see jinjen tiedich Zemorjes no daut Grauf. Aus see bat doa kjeemen, sagen see daut de Steen, waut daut Grauf sull too hoolen, wajchjerolt wia. Aus see em Grauf nennjinjen, sagen see een Enjel setten, wua Jesus sien Kjarpa haud jeläajen, un hee vetald an daut Jesus wia nich mea doa; hee wia oppjestonen! Dit sull je doch an eene groote Freid jäwen, oba see wieren vewillat, un wisten nich waut see sullen doonen.
Vondoag läs wie en Markus 15:42-47, wua een Maun, dee heet Josef von Arimatäa, Pilatus no Jesus sienen Kjarpa frajcht. Aus Pilatus daut enwort, daut Jesus jestorwen wia, leet hee daut, un Josef von Arimatäa neem Jesus sienen Kjarpa, un wekjeld daut en dieret Zeich en, un läd am en een Grauf nenn, dee gaunz nie wia. Josef wia uk eena von de Rotjäwasch en Israel; dit meent daut hee wia uk eena von dee, dee opp daut Judischa Rot deend, oba hee wia nich doa met enjestemt, met woo see Jesus toom Doot veuadeelden. Hee wia soona, waut iernstlich no daut Gottesrikj luad, un hee wia uk eena von Jesus siene Nofolja, oba plietsch. Nu daut Jesus jestorwen wia, neem hee Moot, sien Gloowen to bewiesen, un deend Jesus soo aus hee kunn, met no sienem Kjarpa opp paussen. Oba dankt Gott, daut dit nich daut Enj von de Jeschicht es!
Vondoag läs wie en Markus 15:33-41, von woo Jesus stoaft, un aul de Dinja waut doabie passieeden. De Himmel wort diesta soo aus denacht, un de Gardien em Tempel reet entwei von bowen bat unjen. Un de Offizia waut woaken deed äwa dit aula, sach dise Dinja, un säd daut dis Maun wia werkjlich Gott sien Sän. Daut een Reemasche Soldot dit enseenen kunn, oba de Juden nich kunnen, wiest ons krakjt woo sea see äare ieejne Uagen toojeschmäat hauden. Oba wie sent dankboa, daut Jesus sien Doot aum Kjriez nich daut Enj es von de Jeschicht, wiels dree Doag lota, stunt hee opp, un jewonn dän Siech äwa dön Doot, un äwa de Sind.
Vondoag läs wie en Markus 15:21-32, von woo de Soldoten muaken Jesus sien ieejnen Kjriez droagen no Golgata, oba uk woo Jesus too schwak wia toom daut gaunz bat doa droagen. Doawäajen bedwungen de Soldoten eenen Maun, dee heet Simon von Kiereen, toom Jesus sien Kjriez droagen fa am. Wie läsen uk woo daut Volkj deed äwa Jesus spotten; daut wia oba fa an daut Jesus sien Läwen han jeef. Wie läsen uk woo Pilatus daut toostunt, daut Jesus de Kjennich wia von de Juden, wiels daut es waut hee opp een Tofel leet schriewen, un bowa Jesus sienen Kopp leet stonen. Soo wia daut, daut de Juden, un de Reema, toop kjeemen toom Jesus doot moaken, soogoa wan hee gaunz oschuldich wia. Un hee druach oba de Sinden von dee, waut am doot muaken. Soone groote Leew haft hee fa Menschen!
Vondoag läs wie en Markus 15:16-20, wua de Soldoten doonen Jesus wajch nämen, om am reed to moaken toom kjriezjen. See vespotten am, un trakjen am een bleiwrooden Rock om, un moaken fa am eene Stachelkroon. See nanen am de Judenkjennich, un kjneeen sikj ver am han, oba bloos aus een jespott, wiels see vepitschen am un veheiwen am met äare Fusten. Aul de Soldoten deeden dit, un aus see ieescht foadich hauden, trocken see am wada siene ieejne Kjleeda aun, un leiden am wajch, om am to kjriezjen. Hee wort vespott un vewund, oba hee wia gaunz oschuldich; un soogoa Pilatus wist daut hee haud nuscht orrajcht jedonen. Oba Jesus leet dit aula passieren, om daut wie kunnen jerat sennen, un well wie emma em Denkj hoolen waut hee jeläden haft fa ons.
Vondoag läs wie en Markus 15:6-15, un wie kjrieen hia een sea kloaret Bilt, von woo Jesus de Sinda sienen Plauz neem opp daut Kjriez, aus hee storf. Wie läsen von woo Pilatus mood haud, von een faustjenomnen opp daut Passafast loosloten, un hee jeft de Juden de Jeläajenheit toom wälen, auf see Jesus wellen loosjeloten haben, ooda een aundra, dee heet Barrabas, dee werkjlich een Merda wia. Aus Pilatus de Menschen frajcht, wäm see wellen loos haben, schrieen see aula, daut see Barrabas wellen, un daut Jesus saul jekjriezicht woaren. PIlatus weet daut, daut Jesus nuscht orrajchtet jedonen haft, oba hee deit waut de Menschen wellen haben, un jeft an Barrabas. Un doamet see wie, woo Jesus, dee gaunz Oschuldich wia, dän Plauz neem von dee, dee Mort begonen haud; de Schuldja jinkj frie, un de Oschuldja wort bestroft. Soo wort Jesus uk bestroft fa aul onse Sinden.
Vodoag läs wie en Markus 15:1-5, wua de Juden Leidasch Jesus ver Pilatus brinjen, om am ver Pilatus to veschuljen. Äa Plon es toom Pilatus kjrieen toom Jesus doot moaken, wiels de Juden wieren nich erlaupt, unja de Reema äa Jesaz, Menschen nom Jesaz no doot to moaken; bloos de Reemischa Gowernia kunn daut doonen. Un doawäajen brochten de Juden Jesus ver Pilatus. See wullen daut soo haben, daut Jesus ver de Menschen wort doot jemoakt, un fa daut musten de Reema Jesus doot moaken. Oba Pilatus wundad sikj, daut Jesus nich fa sikj selfst street, soogoa wan de Juden am met väle DInja deeden beschuljen; Jesus wia stell, un leet daut aula to am passieren, aus de Menschen daut wullen.
Vondoag läs wie en Markus 14:66-72, wua Petrus erfelt daut waut Jesus to am ea jesajcht haud, daut hee am dree mol wudd velieejen, ea de Hon kjreijd. Jesus es faustjenomen worden von de Tempel Soldoten, un see brinjen am ver de Huagepriestasch toom am utforschen, om eene Uasoak to finjen, daut see am kjennen doot moaken. Petrus jeit an hinjaraun, toom seenen waut doa woat woaren, un hee kjemt bat doa wua see Jesus doonen utforschen. Petrus steit doa em Tempelhoff, un eene Deenstmejal sitt am, un kjant am aus eena von Jesus siene Nofolja. Oba Petrus velicht daut, un jeit von doa wieda. De Mejal sitt am noch eemol, un rät to de aundre doaromm, daut hee eena von Jesus siene Nofolja es; oba Petrus velicht daut wada. De aundre, waut em Tempelhoff stonen, räden am noch eemol aun doawäajen, un hee velicht daut toom dreddet Mol. Doabie kjreit de Hon toom tweedet Mol, krakjt soo aus Jesus am daut jesajcht haud. Dan felt Petrus daut bie, waut Jesus to am säd, un hee jeit rut un fangt aun to hielen. Hia es eene Leksion bennen fa ons, daut Jesus weet waut wie woaren orrajcht doonen, un vejeft ons dan noch emma, wan wie aun am jleewen.
Vondoag läs wie en Markus 14:53-65, wua Jesus woat ver däm Huagenpriesta jebrocht, un uk ver aul de Huagepriestasch un Eltastasch un Schreftjelieede. Dise Grupp heet de Judischa Rot, un see wieren dee waut daut Jesaz von Moses enfieeden, daut de Juden daut musten horchen. See sullen de jeistliche Leida sennen von de Juden, un an en aule jeistliche Dinja Rot jäwen un äa Gloowen stoakjen; oba hia see wie, woo onopprechtich see werkjlich wieren. See wieren dolla beduat, om äare Macht äwa de Menschen, aus om äare Oppgow toom an rajcht leiden. Wie seenen vondoag woo see äare ieejne Jesazen bruaken, bloos daut see Jesus kunnen vedaumen.
Vondoag läs wie en Markus 14:43-52, wua Judas met eene Grupp Mana komen Jesus un siene aundre Jinja entjäajen. Judas verot Jesus met een Kuss, un doamet daut hee am kusst nämen de aundre Mana am faust, om am ver de Huagepriestasch to brinjen. Jesus lat sikj faustnämen, oba erkjläat daut dit passieet toom de Schreft erfellen. Doamet veloten de aundre Jinja aula un seenen daut see doa fuat komen, un soo woaren Jesus siene ieejne Wieed erfellt, waut hee to an ea haud jesajcht: daut see am aula wudden veloten noch dee Nacht. Soo woat Jesus wajch jebrocht.
Vondoag läs wie en Markus 14:32-42, wua Jesus un siene Jinja no een Goaden gonen, dee heet Getsemene. Dit es wua Jesus deit to sien Voda bäden, om dit Liedenskuffel von am wajch to nämen, wan daut mäajlich es; oba soogoa en sien Jebäd, lajcht hee sien ieejnen Wellen tosied, un deit daut waut de Voda velangt, un eenicht sikj sien Läwen opptojäwen. De Jinja komen met am, weinja Judas, dee am veroden wudd, un see vestonen nich waut doa saul passieren, un wiels see meed sent, schlopen see en. Jesus kjemt dan trigj no an, un wakjt an opp. Dit passieet dree mol, un dan kjemt Judas, Jesus to veroden. Oba daut hool wie fa näakjstet mol.
Vondoag läs wie en Markus 14:27-31, wua Jesus to siene JInja sajcht, daut see am woaren veloten noch dee Nacht. De Jinja un besondasch Petrus strieden doa jäajen, un sajen daut see woaren nich Jesus veloten ooda am aufsajen, oba Jesus sajcht to Petrus daut hee woat noch dee Nacht sikj dree mol loossajen von Jesus. Petrus un de Jinja kjennen dit nich jleewen, un see vespräakjen aula daut see woaren to Jesus tru bliewen. Wie seenen hia, woo Jesus wada en siene Weisheit wist, waut kjeem, un soogoa wan hee siene Jinja daut säd, kunnen see am nich jleewen. Woo foaken sent wie soo aus daut? Oba Jesus haft noch wada Jnod fa siene Jinja, un hee woat emma wada ons aunnämen wan wie trigj komen no am em Jebäd.
Vondoag läs wie en Markus 14:17-26, wua Jesus un siene Jinja fieren daut Passafast toop. Hia deit Jesus an noch eemol wada daut erkläaren, daut hee mott stoawen un wada oppstonen vom Grauf. Hee sajcht daut eena von an woat am veroden, un doaderch woat hee sien Läwen hanjäwen. Hee brukt daut Kuffel un daut Broot vom Passafast aus Bilda, von woo hee mott stoawen. Hee sajcht an daut sien Kjarpa woat jebroaken woaren, un sien Bloot woat vegoten woaren, fa väle Menschen; fa jieda Mensch wäa aun Jesus jleeft. Dit Bilt jeef Gott de Juden aul lang trigj, aus de Israeliten veskloft wieren en Ägipten; un Jesus brinjt nu de Meenunk doarut, daut siene Jinja daut sellen vestonen. Wie talen dit Vondoagschendach aus de ieeschta Owentmol.
Vondoag läs wie en Markus 14:10-16, un wie läsen hia von woo Judas sikj daut äwanemt, Jesus aun de Huagepriestasch to leewren. Dit es wua Judas sienen Senn opp muak, Jesus to veroden; dit wia nich bloos een Dinkj waut hee onverhofs deed. Hee docht äwa dit un muak de Entscheidunk toom Jesus veroden, winjs een Dach ea hee daut deed, un uk veleicht noch wieda em verut aus daut. Oba daut es wichtich daut wie weeten, daut Judas deed dit ut sikj selfst; hee wist krakjt waut hee deed. Dan läsen wie von woo de Jinja wellen reed moaken fa daut Passafast, un see froagen Jesus waut see sellen doonen. Jesus sajcht an krakjt waut see sellen doonen, oba nich bloos daut; hee sajcht an uk krakjt waut doa woat woaren, om daut see reed moaken kjennen; dit bewiest noch eemol, daut Jesus wist uk em verut aules waut wudd to am passieren en Jerusalem, un doaderch bewiest uk noch eemol daut hee werkjlich Gott sien Sän es.
Vondoag läs wie en Markus 14:1-9, wua Jesus un siene Jinja moaken reed fa daut Passafast, un see bliewen en Betanien, un hia setten see biem Desch, bie eenen Maun, Simon. Wie woaren uk en, daut de Huagepriestasch wellen Jesus faustnämen. Doa kjemt eene Fru, un see jitt eene diere Buddel Warteleelj opp sien Kopp. De Jinja schullen äwa ar, wiels dise Warteleelj wia sea dia, oba Jesus sajcht an daut see ar sellen tochloten, wiels dit es een wundascheenet Dinkj, waut see fa Jesus jedonen haft. Fa ons moakt daut nich emma senn, woo Menschen äare Leew fa Jesus bewiesen, oba well wie nich Menschen schullen fa äare Leew fa Jesus; well wie leewa ons Poat doonen, beides fa de Oame, un met woo wie Jesus Leew bewiesen.
Vondoag läs wie en Markus 13:32-37, wua Jesus siene Jinja sajcht, daut aules waut hee an vetald wäajen daut Enj, woat noch komen, oba kjeena weet wanea daut woat passieren. Nich de Enjel, nich irjent een Mensch, un nich emol Jesus selfst weet, oba bloos de Voda em Himmel weet, wanea dit aula saul passieren. Wäajen dit, sajcht hee siene Jinja toom waka bliewen, un woaken, wäajen daut kunn irjent een Tiet aunfangen, un Jesus siene Jinja sellen reed sennen fa dise Tieekjens un Tieden toom komen. Wie sellen drock bliewen met Gott siene Oabeit doonen, un aulemaun vetalen von daut Evangelium, un de Hopninj waut bloos en Jesus jeit to finjen.
Vondoag läs wie en Markus 13:24-31, wua Jesus wieda to siene Jinja rät von daut Enj von aules, un dit mol vetalt hee von wan hee ieescht woat trigj komen. Hee woat soo en Harlichkjeit trigj komen, daut aules ut kleift, soogoa de Himmel un de Ieed woaren utkleiwen; oba doa es noanich een Plauz wua Gott nich es, un daut es ommäajlich von Gott wajch to ranen, wiels hee es aulawäajen. De Har woat de sienje holen von aule Rechtungen oppe Welt, un aulemaun woat siene Majestät seenen. Dan sajcht Jesus, daut dise Dinja, waut hee to siene Jinja haft jesajcht, sent soo aus een Fiejenboom; hee meent daut wan wie dise Tieekjens ieescht aunfangen to seenen, dan kjenn wie weeten, daut daut Enj dicht bie es, un Jesus es boolt batem trigj komen. Well wie Moot finjen en dit, un wieda läwen to Gott siene Iea.
Vondoag läs wie en Markus 13:14-23, wua Jesus wieda rät to siene Jinja wäajen daut Enj. Hee rät dit mol besondasch von woo schrakjlich daut woat sennen en dee Doag. Oba hee rät uk von Gott siene Jnod, un woo Gott om de utjewälde äat haulwen dee Doag vekjartren deit, om daut see nich woaren vekomen. Hee rät uk von de Menschen waut woaren sajen, daut de Christus es trigj jekomen, un Menschen han un häa locken no veschiedne faulsche Profeeten un Christussen; oba, hee sajcht to siene Jinja, daut see sellen sikj nich veleiden loten, wiels hee haft an verhäa jesajcht woo daut woat sennen. Doawäajen kjenn wie ons opp am veloten, un wan hee ieescht trigj kjemt, woa wie nich twiewlen doaräwa. Daut woat gaunz kloa sennen, daut kjeena daut vemissen kaun.
Vondoag läs wie en Markus 13:9-13, un hia vetalt Jesus siene Jinja mea von daut Enj, un waut doa aules woat passieren. Hee sajcht an daut see woaren wäajen am verem Jerecht stonen, un daut aulemaun woat an steeten wäajen Jesus; un dise Wieed sent uk jemeent, fa jieda Mensch waut sikj een Kjrist nant. Jesus sajcht uk, daut Famieljes woaren sikj oneenich sennen, un daut Breeda un Sestren un Vodasch un Muttasch woaren sikj omseich veroden Doot, aula wäajen Jesus un siene Bootschoft. Dise Dinja woaren aula passieren, wäajen de Welt steit jäajen Jesus un siene Bootschoft, un dee kaun am nich lieden; doawäajen woat dee Kjristen uk nich lieden kjennen. Oba Jesus sajcht, daut mank aul dit, brucken wie ons nich sorjen. Gott es eewich, un dise Trubbels hia sent nich; Hee woat ons aules jäwen waut ons fält, om sien Wellen to doonen.
Vondoag läs wie en Markus 13:1-8, wua Jesus to de JInja rät von daut Enj, un woo daut woat komen. Siene Jinja haben Froagen fa am äwa woo dit aula woat passieren, un wie vondoagschen Dach haben uk noch krakjt de Froagen waut see hauden: Wanea saul dit passieren? Un waut sent de Tieekjens doavon? Väle Menschen haben äare Jedanken gaunz vebungen met daut Enj von de Welt, met woo daut aula saul passieren, un wie kjennen leicht gaunz vetieft woaren met dit. Oba Jesus siene ieeschte Wieed to de Jinja äwa daut Enj, sent toom opp paussen, daut kjeena an veleiden woat. Doa woaren väle faulsche Iedeeen sennen äwa daut Enj, oba mau eene Woarheit. Doa woaren väle faulsche Profeeten sennen, oba doa es mau een Christus. Well wie opp paussen, daut wie onse Uagen un Jedanken opp Jesus hoolen, un nich opp de Dinja waut enne Welt passieren. Bloos en Jesus sent wie secha.
Vondoag läs wie en Markus 12:38-44, wua Jesus de Menschen woarnt wäajen de Schreftjelieede. Hee sajcht daut Menschen sellen sikj fa an wäaren, nich wiels see utjelieed sennen enne Schreft, oba wiels see doonen aules om jeloft to woaren von Menschen. Äare Woakjen sent schlajcht, oba äare Räd es goot; see sajen een Dinkj, un doonen oba waut aundret. Dit es wuarom Menschen sikj sellen wäaren fa dee. Well wie uk opp paussen, daut wie nich stolt woaren. Jesus sajcht dan wieda wäajen eene oole Wätfru, dee twee Zent em Jelt kausten nenn lajcht, daut see haft mea jejäft aus aul de aundre waut doa jeewen, soogoa wan see groote Luschen voll Jelt deeden jäwen. See jeewen von daut waut bie an äwableef, oba de Wätfru jeef aules waut see haud. Well wie uk soo sennen, un Gott aules jäwen waut wie haben, nich bloos waut wie toom äwajen haben.
Vondoag läs wie en Markus 12:35-37, wua Jesus stalt de Menschen eene Froag väa. Veschiedne Menschen haben am aul miere Dinja jefroacht, om am en siene Räd proowen fausttokjrieen, oba Jesus haft jiedats mol eene weise Auntwuat. Nu frajcht Jesus eene Froag, un doa es kjeena waut am kaun eene Auntwuat jäwen, wiels see haben nich de Weisheit waut Jesus haft. Oba siene Froag es mea aus bloos Menschen proowen stell to moaken; dise Froag sajcht ons eene Woarheit wäajen Jesus selfst. Jesus staumd von David. Hee es David sien Sän un uk sien Har; Jesus es de Auntwuat to siene Froag.
Vondoag läs wie en Markus 12:28-34, wua een Schreftjelieeda no Jesus kjemt un frajcht am waut daut wichtichste Jeboot es. Dis Schreftjelieeda hieed woo Jesus haud eene goode Auntwuat jejäft no de Saduzäa jrod ver dit, un hee wull Jesus proowen, toom seenen waut Jesus wudd sajen. Jesus jeft am siene Auntwuat, un daut kjemt vom Oolen Testament, wua Gott derch Moses räd to de Israeliten, aus see enne Wiltnis deeden waundlen. Jesus siene Auntwuat es daut ieeschte Leew haben fa Gott, un daut näakjste Leew haben fa eenem sien Näakjsten, wäaemma daut dan es. Hee sajcht dit wiels wie bewiesen woo sea wie Gott Leew haben met woo wie Menschen behaundlen, waut en Gott sien Bilt jeschaufen sent. Dit es eene goode Auntwuat, un von hia wieda woagen de Juden Leidasch sikj nich mea Jesus Froagen to stalen.
Vondoag läs wie en Markus 12:18-27 von wua wesse Saduzäa Jesus komen eene Froag stalen, om am proowen en siene Wieed fausttokjrieen. Oba Jesus lat sikj nich fausträden, un hee jeft an eene weise Auntwuat, soo daut see nich weeten waut to sajen. Dan stalt Jesus an eene Froag väa, soo daut see nich weeten waut fa eene Auntwuat to jäwen. Dit es aul wada een kloara Bewies, daut Jesus voll von Weisheit un de Heilja Jeist wia. Kjeena kunn am soone schwoare Froag väastalen, daut hee nich wist woo toom eene Auntwuat jäwen..
Vondoag läs wie en Markus 12:13-17, wua eenje Menschen komen Jesus entjäajen, un proowen am en siene Räden fausttokjrieen. See froagen am aus daut rajcht es, däm Kjeisa Taks to tolen. Dit es eene Froag waut väle Menschen haben vondoagschen Dach uk noch, wiels eendoont woon Launt wie bennen wonen, mott wie opp irjent een Wajch Taks tolen. Väle Menschen jleewen daut et äa Jelt es; wuarom motten see waut von daut no de Rejierunk jäwen? Oba well wie no Jesus siene Auntwuat horchen. Hee frajcht an fa een Selwastekj, waut see to dee Tiet fa Jelt brukten, un hee frajcht an wäms Jlikjnis opp daut Jelt es. See sajen am daut et dän Kjeisa sien es. Dan sajcht hee to an, daut see sellen to dän Kjeisa daut jäwen waut sient es, un to Gott daut jäwen waut sient es. De Menschen kunnen am nicht faust kjrieen en siene Wieed, un hee jeef ons gooda Rot fa woo wie ons met onse Rejierunks sullen behaundlen. Well wie daut em Denkj hoolen, un nich grunzen wan wie motten Taks tolen, oba friewellich un schaftich daut doonen, waut Jesus ons säd.
Vondoag läs wie en Markus 12:1-12, wua Jesus een Jlikjnis vetalen deit. Daut Jlikjnis es von een Wiengoaden, waut eenen Maun plaunten deed, un hee pacht dän ut aun Wiengoadnasch, daut see sullen dän beoabeiden. Dan fuad hee no een aundret Launt. Aus daut ieescht de Tiet wia, toom arnten, schekjt hee eenen Deena no de Wiengoadnasch, om sien Poat von de Arnt to holen. Oba de Wiengoadnasch veheiwden am un schekjden am ladich trigj. Dit passied mieere mol, un ejentlich schekjt de Maun sienen Sän, wiels hee docht dän wudden see ieren. Oba de beese Wiengoadnasch sagen daut dit wia de Oaw, un am muaken see doot. Dan fruach Jesus de Menschen, waut dis Maun dan wudd doonen? Hee woat komen un dise Wiengoadnasch doot moaken, un dän Goaden vepachten aun aundre. Dis Jlikjnis es een Bilt von Israel un äare Leidasch. De Leidasch wieren dee, dee dän Sän, Jesus Christus, doot muaken. Israel es de Wiengoaden.
Vondoag läs wie en Markus 11:27-33, un de Huagepriestasch komen hia Jesus un siene Jinja entjäajen wiels see bie de Tempel sennen. Jesus deit doa de Menschen lieren, un uk väle Wunda doonen, un de Huagepriestasch froagen am wäa am daut rajcht jejäft haft toom doonen waut hee deit, un waut fa eene Krauft hee bruken deit. Daut jeit goot to seenen, daut see aufjenstich sennen äwa am, un see oajren sikj uk äwa am, wiels hee brinjt äare schlajchte Doten äwadäl. Oba Jesus jeft an nich eene kloare Auntwuat, ekj jleew, wiels hee weet daut see woaren daut aulemol nich jleewen, waut hee sajcht; see haben doch kjeene von siene aundre Wieed jejleeft! Jesus bewiest noch eemol siene Weisheit, un stalt an eene Froag aun, waut see nich kjennen auntwuaten. Wiels see am nich eene Auntwuat jäwen, jeft hee an uk nich eene Auntwuat. Well wie oba nich soo sennen aus dise Huagepriestasch wieren, un leewa daut jleewen waut Jesus sajcht.
Vondoag läs wie en Markus 11:20-26, wua Jesus un siene Jinja trigj no de Staut Jerusalem gonen. See gonen vebie daut Fiejenboom, opp dän Jesus een Fluch läd, un see seenen daut dee es gaunz vedrieecht. De Jinja wundren sikj doaräwa, un Jesus brukt dit dan aus eene Leksion aun waut kaun passieren wan see Gloowen haben. Dan rät Jesus uk von de Vejäwunk, wiels daut kjemt uk derch Gloowen. Krakjt soo aus see Gloowen haben aun Gott, daut hee an de Sinden woat vejäwen, sellen see dan uk aundre Menschen äare Sinden vejäwen. Well wie uk aundre vejäwen, wan see ons orrajcht doonen, wiels Gott haft ons soo rikjlich vejäft von onse Sinden.
Vondoag läsen wie en Markus 11:12-19, wua Jesus een Fiejenboom sitt, un wiels dee nich Frucht haft, sajcht hee een Spräakjwuat äwa dän Boom, un de näakjstet mol waut wie de Boom seenen, es dee gaunz vedrieejcht. Dit es een Bewies von daut Launt Israel. Daut leet soo, aus wan de Boom sull Frucht haben, oba aus Jesus socht fa Frucht, wia doa kjeent to finjen. Soo wia daut uk met Israel. Israel wia Gott sien utewäldet Volkj, un daut sull gonen to seenen met woo Israel de aundre Lenda een Väabilt wia. Oba Israel wia voll von Sind, un see säden Gott sien Sän auf, aus hee kjeem no an. Well wie nich soo sennen, un soo läwen aus Gott well haben von ons.
Vondoag läs wie en Markus 11:1-11, wua Jesus deit opp een Falm en Jerusalem nenn rieden de Wäakj ver sienen Doot aum Kjriez. Hee schekjt twee von siene Jinja veropp enne Staut nenn, un doa finjen see een Falm aunjebungen, krakjt soo aus hee an säd daut see wudden. See brinjen dän no am un hee sat sikj doa bowen dol, un see gonen dan toop enne Staut Jerusalem nenn. Doa sent väle Menschen waut am lowen doonen, un see spreeden äare Wanikjs un palm Bläda ver am opp de Wajch; see nämen am aun aus een Kjennich. See schriejen ut Freid "Hosianna!" un lowen am met vollen Haulz. Oba dit es mau fa eene korte Tiet. Jesus jeit no däm Tempel un bekjikjt sikj daut aula, un jeit dan met siene Jinja trigj ut de Staut rut no Betanien opptoo, wua see Nacht bliewen. Well wie nich soo sennen aus dise Menschen, waut mau fa eene Wäakj am deeden lowen, un dan wullen am doot jemoakt haben.
Vondoag läs wie en Markus 10:46-52, wua Jesus heelt een blinjen Maun, dee heet Bartimäus. Disen Maun wia een Pracha, un hee saut beim Wajch wiels aundre vebie jinjen, un fruach no Jelt. Aus hee en woat, daut Jesus doa vebie jeit, lat hee sikj hieren, un frajcht auf Jesus nich woat Metleet haben met am. De Menschen waut doa sennen proowen am stell to moaken, oba Jesus lat sikj roopen, un frajcht am waut hee well. Bartimäus sajcht daut hee well seenen kjennen, un Jesus heelt am. Plazlich jeit hee Jesus dan hinjaraun, un foljcht am no. Dit es een gooda Bewies fa waut wie doonen sellen. Wie motten uk soo aus daut Gloowen haben aun Jesus, un dan Jesus uk nofoljen.
Vondoag läs wie en Markus 10:35-45, wua Johanes un Jakobus Jesus froagen auf see kjennen eena bie siene rajchte Sied, un eena aun siene linkje Sied setten, wan Jesus en siene Harlichkjeit es. Jesus sajcht an daut hee kaun an daut nich vesproaken. Wan de aundre Jinja daut ieescht en woaren, waut dise beid haben Jesus jefroacht, sent see vedrislich äwa an, oba Jesus nemt an dan aula tosied un vetalt an woo daut met an saul sennen en sien Rikj. En Jesus sien Rikj doonen Menschen nich harschen, eena äwa dän aundren, oba see doonen ut Leew deenen, un aundre hecha schatzen aus an selfst. Soo sellen de Jinja daut doonen, wiels daut es uk woo Jesus daut deed. Hee kjeem toom deenen, un siene Jinja sullen dan uk soo deenen aus hee deed.
Vondoag läs wie en Markus 10:28-34, wua Jesus siene Jinja sajcht daut jieda Mensch waut waut oppjäwen woat om Jesus sien haulwen, woat noch soo väl wada trigj komen en dit läwen noch, ea see stoawen. Hee sajcht dit wiels Petrus sajcht to am daut see haben aules oppjejäft toom am no foljen. Dit es em vejlikj met de rikja junga Maun von väajetmol, waut nich wellens wia sien Rikjdom opptojäwen toom Jesus nofoljen. Jesus vetalt siene Jinja uk, daut see nu opp däm Wajch sennen no Jerusalem, wua hee woat de Menschen enne Henj nenjejäft woaren un woat stoawen, un dan om dree Doag wada oppstonen.
Vondoag läs wie von Markus 10:17-27, wua eenen jungen rikjen Maun kjemt Jesus entjäajen un stalt am de Froag, waut hee doonen mott toom daut Gottesrikj eewen? Jesus fangt aun met daut Jesaz, un dis junga Maun es oba selfst-jerajcht, un sajcht daut hee haft de Jesazen aula jehoolen. Jesus weet oba daut hee een Hoat probleem haft, un daut sien Jelt helt am trigj von sikj gaunz hanjäwen toom Gott deenen. Hee sajcht am toom aules vekjeepen waut hee haft, un daut Jelt dan no de Oame to jäwen, un dan am komen nofoljen. De junga Maun jeit truarich wajch, wiels hee kaun sikj nich brinjen toom aul sien Rikjdom loos loten. De Froag fa ons dan es, waut es doa waut ons trigj helt? Wie motten aules loos loten, waut em stich kjemt, von Jesus gaunz vom Hoaten nofoljen.
Vondoag läs wie en Markus 10:13-16, wua de Menschen äare Kjinja no Jesus brinjen, om daut hee an woat säajnen. Dit es een wundavollet Bilt von woo Gott jesonnen es äwa ons. Jesus sajcht to siene Jinja, daut daut Himmelrikj jehieet to soone waut am aunnämen aus een kjlienet Kjint. Wie kjennen väl lieren von Kjinja, un woo see sikj gaunz doonen vetruen aun äare Elren; soo sellen wie ons uk aun Gott vetruen. Wie motten ons gaunz deemootjen, onen to jleewen daut wie irjentwaut kjennen no Gott brinjen waut am woat jefaulen, krakjt soo aus een kjlienet Kjint. Daut Evangelium es eefoch jenuach, daut een Kjint daut kaun aunnämen; well wie nich stolt sennen un jleewen daut et too eefoch es fa ons! Well wie daut aunnämen, met een deemootjet Hoat, krakjt soo aus dise Kjinja met Freid no Jesus kjeemen.
Vondoag läs wie en Markus 9:42-50, wua Jesus erkjläat woo schwierich de Sind es, un hee brukt miere Bilda toom ons wiesen woo iernst wie sellen sennen met de Sind aufsajen. Hee sajcht daut et es bäta, daut wie onse Haunt, ooda ons Foot, ooda onse Uag, doonen auf haken, aus de ons loten enne Sind nenn locken. Gott kaun Sind nich lieden. Wan wie Jesus siene nofolja sent, dan sullen wie uk met aul onse Krauft aules doonen waut wie kjennen, toom de Sind aufsajen, wiels daut es wäajen onse Sinden daut Jesus must stoawen. Well wie iernstlich seenen, daut wie Sind en onse Läwes nich woaren toch loten, oba daut aufsajen, Gott to de Iea.
Vondoag läs wie en Markus 10:1-12, wua eenje von de Farisäa komen Jesus entjäajen, un stalen am eene Froag väa wäajen de Ehe. See froagen am aus een Maun sikj met rajcht kunn von siene Fru scheeden. Jesus frajcht an ieescht waut Moses doatoo haud jesajcht, un see sajen daut Moses haud daut jeloten, wan de Maun de Fru eene Scheedungsbreef jeef un dan leet ar gonen. Jesus siene Auntwuat es daut jo, Moses haud daut toojeloten, oba nich wiels daut Gott sien Wellen wia. Moses leet daut too wiels de Israeliten äare Hoaten vehoat wieren, oba vom Aunfank aun haud Gott daut nich soo jemoakt. Gott muak een Maun un eene Fru, un waut Gott toopjebrocht haft, saul Mensch nich uteneen scheeden, wiels nu sent see nich mea twee, oba eent. Well wie uk vesieekjen soo to läwen aus Jesus hia sajcht!
Vondoag läs wie en Markus 9:38-41, wua Johanes de Jinja to Jesus sajcht, daut see hauden een aundra Maun jeseenen, dee deed beese Jeista ut driewen en Jesus sienen Nomen. See hauden am daut veboden to doonen, wiels hee wia nich eena von de Jinja doa bie Jesus. Jesus säd to de Jinja daut see hauden am sult toch loten, wiels wäaemma nich jäajen an es, es fa an, un uk daut wäaemma Wunda en sienen Nomen deit kaun nich om dreien un schlajchtet räden von am. Jesus moakt daut kloa daut doa sent mau twee Sieden: Entwäda wie sent fa Jesus, ooda wie sent jäajen am; wie kjenn nich doa tweschen. Daut es eent ooda daut aundret. Well wie opp Jesus siene Sied sennen, un moot finjen von dee aundre waut uk opp siene Sied sent.
Vondoag läs wie en Markus 9:30-37, wua Jesus deit siene Jinja oppoat lieren daut hee mott stoawen. De Jinja vestonen am nich, un see ferchten sikj am to froagen waut hee meent. Dan strieden see sikj, äwa wäa de jratsta es von an aula, un Jesus mott an dan lieren woo daut sull mank an sennen. Ieescht lieet hee an met Wieed, daut see sikj sullen toom jerinjsten moaken, wan see de jratsta wellen sennen. Dan lieet hee an uk derch Doten, un hee nemt een Kjint un stalt daut doa mank an. Dan, nemt hee daut Kjint oppem Oarm, un sajcht daut see sikj sullen soo jerinj moaken, aus toom kjliiene Kjinja opp nämen. Wie motten uk emma wada lieren, ons selfst to deemootjen, daut wie aundre bäta deenen kjennen.
Vondoag läs wie en Markus 9:25-29, wua Jesus een doofstommen Jeist ut een Jung rut driewen deit, un doaderch woat de Jung jeheelt. Väajetmol lausen wie woo de Voda von disen Jung prachad fa Help met sienen Ongloowen, un vondoag läs wie woo Jesus am halpen deit. Vondoag kjrie wie uk een Bilt von woo daut met Jeista es, wiels wie woaren en daut doa veschiedne Sorten von Jeista sent. De Jinja kunnen dise Sort nich rut driewen, wiels see nich jenuach Gloowen hauden, wiels Jesus sajcht daut dee kjemt bloos derch Jebäd rut. Wie brucken ons oba niemols ferchten fa Jeista, wiels Jesus haft de Macht äwa aule Jeista. Aus siene Jinja, hab wie uk dän Siech äwa aule beese Jeista, wan wie Gloowen haben.
Vondoag läs wie en Markus 9:14-24, wua Jesus kjemt eene Grupp Menschen entjäajen. Hee woat en daut siene Jinja un de Schreftjelieede strieden sikj, un frajcht wuarom see daut doonen. Dan auntwuat eenen Voda von en de Grupp, un sajcht Jesus daut sienen Sän haft een beesen Jeist. Hee haud de Jinja jefroacht toom am heelen, oba see kunnen daut nich; nu frajcht hee auf et mäajlich es, daut Jesus am halpen kaun. Un dan sajcht Jesus, daut aules es mäajlich fa dee, dee doa Gloowen haben. De Voda sajcht fuaz, daut hee jleeft, un dan frajcht hee fa help met sienen Ongloowen. Ons fält aula Help, toom soo jleewen aus wie sellen, un dee Help kaun bloos von Jesus komen. Well wie uk aula soo aus disen Voda sennen, un no Jesus komen fa Help.
Vondoag läs wie en Markus 9:11-13, wua Jesus siene Jinja am froagen wuarom de Schreftjelieede sajen, daut Elia mott ieescht komen ea de Messias kunn komen. Jesus sajcht daut et es soo, daut hee ieescht komen mott, aules wada häatostalen, un dan frajcht hee eene Froag: Wuarom steit daut jeschräwen daut de Menschensän mott väl liedenl? Dan sajcht hee daut Elia es aul jekomen, un daut de Menschen deeden met am krakjt soo aus see wullen. Johanes de Deepa kjeem ea aus Jesus, toom Menschen äare Hoaten reed moaken fa am. Johanes de Deepa es de Elia waut doa komen sull. Jesus oba dreit siene Jinja äare Uagen no sikj, wiels hee es de Uasoak wuarom Johanes de Deepa prädjen deed, un wie sullen emma onse Uagen opp am haben.
Wie läsen vondoag en Markus 9:1-10, wua Jesus dree von siene Jinja met brinjt opp een Boajch nopp, wua see am seenen en siene Harlichkjeit. See seenen uk woo Moses un Elia rauf komen un met Jesus räden. Jrod ver dit haud Jesus jesajcht, daut wesse Menschen wudden daut Gottesrikj seenen met Krauft rauf komen. Dise beid Profeeten bewiesen Jesus siene Harlichkjeit hia, un daut see hia met Jesus räden bewiest daut Jesus es de Erfellunk von aul de Schreften waut Moses schreef un aules waut Elia säd. Jesus kjeem toom daut Gottesrikj brinjen, un hee wees siene Jinja dit, soo daut see daut uk wudden wieda vekjindjen.
Vondoag läs wie en Markus 8:31-38, un Jesus deit hia aunfangen toom siene Jinja daut kloa moaken daut hee mott stoawen, un om dree Doag wada oppstonen. Oba Petrus nemt am tosied un fangt am aun to beschwichten; Jesus dreit om un beschwicht Petrus fa dit doonen, un hee nant am Soton; waut bediet dit? Petrus es nich werkjlich Soton, un Jesus sajcht uk nich daut hee werkjlich Soton es; leewa, Jesus moakt daut gaunz kloa, daut wan Petrus jäajen am stritt, dan deit hee krakjt daut waut de Soton deit. Wie motten emma opp paussen, daut wie nich proowen jäajen Gott to schaufen. Noch emol jleew wie, daut wie weeten waut doa fält; oba Gott weet emma bäta, un wie motten ons enstalen no Gott sien Wellen no, un ons doatoo hanjäwen.
Vondoag läs wie en Markus 8:22-30, wua Jesus deit een blinjen Maun heelen, oba hee mott twee mol am aunschieren, ea siene Uagen gaunz jesunt sennen. Dit es een Bilt von woo daut met ons es, un daut jiedats mol waut wie no Jesus komen, kjenn wie veleicht een kjlienet bät mea seenen aus wie ea kunnen. De Jinja bewiesen dise Woarheit uk, wiels lota aus Jesus an frajcht, waut de Menschen sajen äwa am, sajen see daut eenje jleewen hee es een Profeet ooda Johanes de Deepa ooda Elia; oba wan hee siene Jinja ieescht frajcht, wäa hee es, sajcht Petrus gaunz kloa, daut hee es de Christus. De Jinja wieren daut lenjste met Jesus toop jewast, un see kunnen daut baste seenen wäa hee es. Wan wie mea Tiet nämen toom met Jesus sennen, lia wie am emma kloara to seenen.
Vondoag läs wie en Markus 8:11-21, wua Jesus woat oppe Proow jestalt von de Farisäa. See komen am entjäajen, un froagen am no een Wundatieekjen, oba hee deit daut nich, wiels hee kjant äare Jedanken. Lota sajcht hee to siene Jinja daut see sellen sikj heeden fa de Farisäa un Herodes äare Häw. De Jinja dochten hee räd von Broot, oba Jesus rät werkjlich von Gloowen. Herodes un de Farisäa wullen emma wada Wunda seenen, un oba niemols sikj hanjäwen toom jleewen; de Jinja, un wie uk aula, motten opp paussen daut wie nich soo sennen. Woaret Gloowen jleeft onen Wunda to seenen, un Wunda moaken Gloowen stoakj. Oba Gloowen mott ieescht sennen, aundasch halpen de Wunda nuscht. Well wie dise Woarheit woa nämen vondoag un ajchtet Gloowen haben!
Vondoag läs wie en Markus 8:1-10, von wua Jesus deit toom tweedet Mol een grootet Volkj feeden, met weinich Äten. Hee nemt een Poa Fesch un Bulkjes Broot, un met daut moakt hee jenuach toom mea aus 4000 Menschen feeden. Wie kjennen een Poa Dinja seenen hia, un uk von lieren, un dee sent dit: Daut Jesus emma wada een Jaumahoat haft äwa de Menschen, un daut Menschen haben weinich Gloowen. Wie weeten dit, wiels de Jinja hauden Jesus aul eemol ea jeseenen, krakjt soonen Wunda doonen aus dit, un see twiewelden dan noch wua see wudden jenuach toom äten kjrieen fa aul dise Menschen. Well wie nich soo sennen, un leewa Gloowen haben, daut Jesus daut kaun doonen waut hee sajcht.
Vondoag läs wie en Markus 7:31-37, wua Jesus deit een doofstomma Maun heelen. De Menschen waut am seenen aus hee dit deit wundren sikj, un Jesus deit an vebeeden von aundre daut vetalen, oba see räden bloos noch soo sea doavon. Wie seenen hia, daut et es nich bloos wichtich, Menschen de Goode Norecht to vetalen, oba uk toom vesorjen fa an, daut see daut haben waut an fält, wiels daut wieren de Menschen doa rom waut dis Maun no Jesus brochten, om daut hee kunn jeheelt woaren. Dis Maun fäld Help, un de basta Help waut Menschen kjenn kjrieen, es daut an woat no Jesus jebrocht. Well wie daut doonen.
Vondoag läs wie en Markus 7:24-30, un wie läsen de Jeschicht wua Jesus met siene Jinja toop ut daut Launt Israel jeit. See reisen auf no Tierus, un Jesus well hia nich haben, daut irjentwäa am kjanen saul, oba doa es eene Griechische Fru, dee am kjanen deit. See frajcht auf hee nich woat äare Dochta heelen, oba daut späat sikj soo aus wan Jesus nich jieren well ar halpen. Jesus erkjläat waut siene Mission es, un wuarom hee jekomen es. De Fru oba helt aun met äa Gloowen, un Jesus deit doawäajen daut waut see frajcht, un hee heelt äare Dochta. Well wie uk em Gloowen faust stonen bliewen, wiels noch mol deit Gott ons proowen, toom seenen aus ons Gloowen werkjlich woa es. Well wie lia nämen von dise Fru vondoag!
Vondoag läsen wie en Markus 7:14-23, un hia sajcht Jesus to de Menschen daut eena woat orrein derch daut waut von bennen en am rut kjemt, un nich derch daut waut en am nenn jeit. Jesus sajcht dit wiels hee well de Menschen lieren, daut soone Dinja aus Henj wauschen ooda veschiednet äten woaren een Mensch sien Hoat nich endren; bloos Jesus kaun daut doonen. Ons schlajchtet un beeset kjemt von onse Hoaten, un bloos derch Jesus siene Krauft kjenn wie doavon loos woaren. Wie motten aun am jleewen toom onse Hoaten reinjen von Sind, wiels wie sent aula orrein.
Onse Schreftstäd kjemt vondoag von Markus 7:1-13, un wie läsen vondoag wada von woo Jesus stemd nich met de Schreftjelieede un Farisäa met. Jesus kaun daut nich lieden wan de Menschen äare ieejne Jebooten hecha schatzen aus Gott siene Jebooten, un hee sajcht an gaunz kloa waut hee doavon denkjt. Wie motten uk opp paussen, daut wie daut nich doonen. Daut es gaunz leicht, emma to horchen waut Menschen sajen, un daut jehorchen, un uk jleewen daut wie dan noch doonen Gott ieren. Oba, wie motten emma secha moaken, daut wie daut doonen waut Gott jefelt, leewa aus daut waut Menschen jefelt, soogoa wan daut Menschen von onse Kjoakjen sent. Gott horchen es daut wichtichste Dinkj waut wie kjennen doonen.
Wie läsen vondoag en Markus 6:53-56, wua Jesus un siene Jinja komen en de Genezaret Jäajent aun. Aus de Menschen daut en woaren, moaken see daut wiet un breet bekaunt, un aulemaun dee doa krank es kjemt am entjäajen. Un nich bloos daut, oba aule Kranke woaren jeheelt! Daut es soone scheene Woarheit daut onse Krankheiten kjennen derch Jesus jeleest woaren. Dit es soon goodet Bilt von waut Jesus uk met onse Hoaten deit; wan wie no am komen un am bekjanen aus Har, dan reinicht hee onse Hoaten. De Sinden Krankheit woat jeheelt, un wie kjennen dan Jemeenschoft haben met am. Well wie daut emma em Denkj hoolen, un dankboa sennen fa Jesus siene besondre Heelunk!
Vondoag läs wie en Markus 6:45-52, wua Jesus deit noch een Wunda waut gaunz kloa bewiest, daut hee Gott sien Sän es. Hee haft mol jrod de 5000 Mana, met Frues un Kjinja toop, jefoodat von 5 Bulkjes Broot un 2 Fesch; dit wia aul soon besondra Wunda, un hee deit noch eent. Hee schekjt siene Jinja ver am äwa daut Mäa, un medden enne Nacht kjemt hee oppem Wota jegonen, bat doa wua siene Jinja jäajen dän Wint stänen. De Jinja grulen sikj meist doot, un ekj jleew wie wudden uk haben! Jesus siene Krauft, un aul de Wunda waut hee deed, wieren oba nich toom Menschen moaken wundren, ooda bloos toom Menschen tofräd moaken; leewa, siene Wunda wieren Tieekjens von wäa hee es. Well wie doaraun denkjen wan wie vondoag läsen un horchen.
Vondoag läs wie en Markus 6:35-44, wua Jesus deit 5000 Menschen foodren von een Poa Fesch un fief Stekja Broot. Dit es eene wundavolle Jeschicht von woo Gott deit aules vesorjen fa ons, wan wie ons opp am veloten. Dit meent nich daut wie niemols woaren derch Schwierichkjeiten gonen, ooda daut Kjristen nich woaren stoawen; leewa, dit meent daut soo lang aus wie opp dise Ieed sennen woat Gott fa siene Kjinja vesorjen, daut see aules haben waut an fält toom sien Wellen vollbrinjen. Well wie dan ons opp am veloten, un daut ieeschte no Jesus kjikjen, un am gaunz vom Hoaten no foljen.
Wie haben de latste Poa Wäakj de truaje Jeschicht jeläst von woo daut romm kjeem, daut Johanes de Deepa wort doot jemoakt. Vondoag läs wie en Markus 6:30-34, un wie lieren daut Jesus funk daut uk schwoa. Ekj jleew am drekjt daut Hoat äwa Johanes de Deepa, wiels daut wia siene Taunte äa Jung, un see schauften toop toom daut Gottesrikj buen, wan see uk nich emma toop wieren. Wie lieren uk daut Jesus wia een Mensch, krakjt soo aus wie aula, un hee wort uk noch mol meed. Hee haud uk een velangen toom sikj mol vereiwen, soo aus wie aula doonen. Oba, tolatst, see wie noch eemol Jesus sien Jaumahoat äwa de Menschen, un daut hee läd siene ieejne Trubbels tosied un halpt de Menschen romm am. Waut von scheenet Väabilt es dit nich fa ons! Well wie uk sträwen, toom soo läwen aus Jesus deed.
Wie läsen vondoag en Markus 6:21-29, wua wie finjen ut woo daut romm kjeem daut Johanes de Deepa wort doot jemoakt. Wie haben aul jeseenen woo Kjennich Herodes läwd en Sind, met sien Brooda siene Fru, oba hee wia nich wellens de Sind to bekjanen un daut opp to jäwen. Hee deed sikj uk groot, un aus hee een Fastmol haud reedjemoakt fa siene beaumpte Jast, schloot hee sikj selfst faust met siene ieejne Wieed. Wäajen aul dit leet hee Johanes de Deepa doot moaken, un wie seenen woo Sind, wan wie daut toch loten, brinjt emma dän Doot. Un nich blooss daut, daut brinjt uk schoden un Weedoag aun aundre Menschen. Wie motten opp paussen, woo wie läwen, un de Sind emma bekjanen un opp riemen, daut wie kjennen rajcht läwen ver Gott un aule Menschen.
Wie läsen vondoag en Markus 6:14-20, wua Kjennich Herodes hieet von Jesus, un hee jleeft veleicht daut Johanes de Deepa es vom Doot oppjestonen, un daut daut de Uasoak es wuarom hee dise Wunda Woakjen doonen kaun. Oba wie finjen ut, daut Kjennich Herodes haud Johanes de Deepa doot jemoakt, wiels hee stunt däm Kjennich entjäajen. Hee haud to dän Kjennich jesajcht, daut hee läwd en Sind, wiels hee haud sien Brooda siene Fru, un doawäajen haud Kjennich Herodes am loten faustnämen un uk enstoppen. Ekj jleew de Uasoak wuarom hee docht daut Johanes de Deepa wia oppjestonen vom Doot es wiels sien Jewessen ploagd am. Well wie opp paussen, daut wie nich Sind en ons läwen toch loten, wiels daut waust emma jrata bat daut de äwahaunt nemt.
Vondoag läs wie en Markus 6:7-13 von woo Jesus de Twalw Jinja rut schekjt oppe Mission. Hee jeft an Krauft, toom prädjen, un Wunda doonen, un uk toom beese Jeista ut driewen. Dit es noch een Poat von wuarom Jesus to Welt kjeem. Hee kjeem toom sikj selfst hanjäwen aus een Opfa, toom onse Sindenschult auflaschen, daut aul dee waut en Gloowen am aunbäden kjennen jerat sennen. Un nich blooss daut, hee kjeem toom siene Kjoakj buen, soo daut wan hee ieescht wajch wia, wudden siene nofolja de Goode Norecht wiede vekjindjen äwa de gaunze Welt. Dit es ne wundascheene Bootschoft! Well wie aula, dee am no foljen, dise Bootschoft wieda brinjen, wua emma wie sent.
Vondoag läs wie en Markus 6:1-6, wua Jesus met siene Jinja toop no siene Tus Staut jeit un lieed doa en de Judenschool. Wie läsen woo de Menschen doa sikj äwa am wundren, oba nich wiels an daut eene Freid es. Nä, see stieren sikj äwa am, un see sent doll äwa am daut eena von äare Tus Staut sikj soo talt aus een Liera äwa an aula. Jesus sajcht siene Jinja daut aulawäajen woat een Profeet jeieet, buta en siene Tus Staut un mank siene ieejne Famielje. Daut sajcht uk daut Jesus wundad sikj äwa dise Menschen äa Ongloowen. Well wie nich soo sennen aus see wieren! Well wie nich soone stieren wäm Gott haft beroopt von mank onse Medd toom siene Oabeit doonen, oba leewa fa an bäden un an unjastetten.
Vondoag läs wie en Markus 5:35-43, wua Jesus deit de Judenschool Leida siene Dochta wada läwendich moaken. Mana komen no am un sajen am daut siene Dochta es aul jestorwen, un daut hee Jesus nich mea sull baudren, oba Jesus sajcht am daut hee saul doawäajen noch jleewen. Noch mol späat sikj daut soo aus wan Gott too lot es. Dis Voda siene Dochta wia aul jestorwen; waut kunn noch jedonen woaren? Oba daut es niemols too lot fa Gott toom waut goodet moaken von waut schlajchtet. Jesus heelt dise Mejal un moakt de vom Doot oppstonen, soo daut see wada gaunz jesunt es soo aus ea. Well wie dan uk nich oppjäwen en onse Trubbels, oba Gloowen haben daut Gott woat noch waut goodet doavon rut brinjen.
Vondoag läs wie en Markus 5:21-34, wua Jesus es oppem Wajch toom eene kjliene Mejal heelen, oba hinjawäajes bejäajent hee eene Fru waut am aunschieet. See haud aul twalw Joa met eene Krankheit jeliet, waut muak ar bleeden, un nu daut see Jesus siene Kjleeda aunschieed hieed äa bleeden fuaz opp. Noch mol sent wie ojjeduldich un wellen haben daut Gott ons fuaz halpen deit, oba krakjt soo aus met dise Fru, noch mol mott wie lang luaren ea Gott ons auntwuaten deit. Dit meent nich daut hee onse Jebäda nich deit auntwuaten, oba leewa daut wie motten jeduldich un aunhoolent bliewen em Jebäd, un met de Tiet woat Gott ons auntwuaten, no sienem Plon no.
Vondoag läs wie wieda en Markus 5:11-20, un wie moaken de Jeschicht foadich waut wie väaje Wäakj aunfungen. Vondoag see wie woo de Gadarena Maun woat jeheelt, un woo aundasch hee es wan hee gaunz jesunt un kloa em Kopp es. Wie seenen uk fresch woo sea de beese Jeista sikj ferchten fa Jesus, un uk woo de Menschen sikj ferchten wan see dän Maun seenen waut ieescht besäten jewast wia, nu veninftich un jekleet bie Jesus setten. Wie aus Menschen enjsten ons leicht wan wie Krauft seenen, un met dise Menschen wia daut nuscht aundascht. Oba, Jesus brukt siene Krauft toom Menschen heelen, wiels daut es wuaromm hee kjeem to Welt. Wan wie no am komen, woat hee ons halpen wiels hee haft de Krauft toom daut doonen. Eendoont woo oajch daut es met ons, Jesus kaun ons halpen, wan wie blooss no am komen em Gloowen.
Vondoag läs wie en Markus 5:1-10, wua Jesus heelt eenen Maun waut met väle beese Jeista besäten es. Jesus un siene Jinja foaren no de Jäajent von de Gadarena, un doa kjemt dis Maun an entjäajen, un wie seenen woo de beese Jeista scheddren un schrieen ut Angst wan see Jesus seenen. Derch dit seenen wie noch eemol woo Majchtich Jesus es, daut met een Wuat kaun hee dise beese Jeista utdriewen. Jesus haft vondoag uk noch krakjt soone Krauft, un doa kaun kjeen beeset ver am stonen. Well wie dan mootich bliewen wan schlajchtet ons entjäajen kjemt, wiels wie haben Jesus doa met ons, un hee haft Krauft toom äwa aules jewennen; nich blooss daut, hee haft aul jewonnen!
Vondoag läs wie en Markus 4:35-41, un wie seenen vondoag noch eemol gaunz kloa, daut Jesus werkjlich Gott sien Sän es. Dit es de Jeschicht wua Jesus dän Storm stell moakt met blooss een Poa wieed. Hee bewiest siene Krauft äwa de Natua, wiels derch am wort de Natua jemoakt; krakjt soo aus hee verhäa siene Krauft beweess äwa de beese Jeista un äwa Krankheiten, bewiest hee daut vondoag uk. De Jinja haben Angst, wiels see jleewen see woaren stoawen, oba wiels see met Jesus toop sent, komen see doa derch. Daut es uk soo vondoag. Veleicht go wie derch wesse Storms, soo aus Oamoot, ooda Krankheit, oba Jesus es noch emma Har. Jesus foat met ons derch irjent een Storm, un wan hee sajcht, dan woat daut stell. Well wie onsen Gloowen opp Jesus saten, daut hee onse Storms kaun nämen un stell moaken.
Vondoag läs wie en Markus 4:26-34, wua Jesus deit een Poa Jlikjnisen met deelen von Gott sien Rikj. En beid von de Jlikjnisen vondoag woat Gott sien Rikj vejlikjt met Sot. En daut ieeschte es daut Weit Sot, un en daut tweede es daut een Sampkuarn. Gott sien Rikj fangt aun aus een gaunz kjlienet Dinkj, soo aus Sot, un hee moakt daut waussen. Doa es nuscht waut een Mensch kaun doonen, buta daut Sot enne Ieed nenn, waut et kaun moaken waussen. Wan wie daut Wuat vekjindjen, dan strei wie daut Sot. No daut es daut onse Oppgow toom Gott loten schaufen, wiels hee es dee waut daut moakt waussen un frucht brinjen. Onse Oppgow es dan em Jebäd bliewen, un wieda schaufen toom daut Wuat vekjindjen.
Vondoag läs wie en Markus 4:21-25, wua Jesus rät von daut Licht, un woo eene Laump woat niemols aun jemoakt un dan vestoaken. Nä, daut Licht woat jebrukt soo daut aulemaun seenen kaun. Dit es een Jlikjnis fa de Woarheit. De Woarheit es soo aus een Licht, un wua emma de Woarheit han dacht kjemt aules verendach. En de Woarheit bennen es Kloarheit, un aules woat openboa doaderch. Jesus jeft uk eene Woarnunk hia, daut Menschen sellen opp paussen woo see aundre Menschen toomäten, wiels doano aus wie aundre toomäten, woat ons toojemäten woaren. Leewa, wie sullen ieescht ons selfst em betracht nämen, un beharschen, ea wie aundre beharschen un beschuljen.
Vondoag läs wie en Markus 4:10-20, wua Jesus siene Jinja am Froagen aunstalen wäajen daut Jlikjnis vom seien, waut hee de Menschen haud vetalt. Jesus erkjläat to siene Jinja waut daut Jlikjnis bedied, un hee rät uk von woo daut es de Jinja jejäft worden, daut Jeheemnis vom Gottesrikj to vestonen, oba aundre Menschen es daut nich jejäft worden. Waut meent dit? Wie kjikjen vondoag no woo wie kjennen Lia nämen von Jesus, derch daut Jlikjnis, un uk derch waut hee to siene Jinja säd. Aules waut Jesus deed wia toom de Radunk vollbrinjen, daut Menschen wada kunn Jemeenschoft haben met Gott. Dit es uk de Uasoak wuarom Jesus en Jlikjnisen räd.
Vondoag läs wie en Markus 4:1-9, wua Jesus rät to de Menschen derch Jlikjnisen. Hee vetalt de Jeschicht von een Foarma, un woo wan hee deit Sot streien, felt waut von daut Sot besied opp dän Stich. Waut Sot felt opp steenaje Ieed, un waut Sot felt mank de Distlen mank. Oba blooss daut Sot waut opp de goode Ieed felt jeft eene Arnt. Dan gaunz to latst sajcht Jesus noch, "Wäa Uaren haft toom hieren, däm lot hieren." Waut meent hee met dit? Jesus rät von jeistliche Dinja, un daut meent daut wie kjennen nich blooss fiesisch doa naun kjikjen. Wie motten jeistlich jesonnen sennen toom jeistliche Dinja vestonen, un daut es von waut Jesus hia rät.
Vondoag läs wie en Markus 3:31-35 wua Jesus rät to de Menschen von siene Famielje. Siene Mutta un Breeda kjeemen no am, un wullen met am räden. Jesus brukt dise Jeläajenheit toom de Menschen een Jlikjnis vetalen, daut dee wäa am no foljcht, es Poat von siene Famielje. Wan wie Jesus no foljen, un am aunnämen, dan sent wie en siene Famielje, un wie woaren aunjenomen aus Gott siene Kjinja. Well wie dit aunnämen, waut Jesus hia sajcht, un nich daut tosied saten. Well wie am aunnämen un Poat von siene Famielje sennen.
Vondoag läs wie en Markus 3:20-30, wua de Schreftjelieede sikj jäajen Jesus stalen, un sajen daut siene Krauft kjemt von dän Beelzebul, dän bowaschten äwa de beese Jeista. Jesus oba stalt daut kloa, daut et nich schauft soo aus daut, un een Soton kaun dän aundren nich utdriewen. Dan rät Jesus von de Heilje Jeist, un woo eena mott opp paussen, nich dän Heiljen Jeist to lastren. Foaken hab wie Trubbel vestonen waut hee meend. Waut kloa es, es daut wie sellen nie nich sajen, daut de Heilje Jeist siene Krauft kjemt von dän Soton. Jesus deed derch de Heilje Jeist siene Krauft beese Jeista utdriewen, nich derch dän Soton, un well wie nich schlajchtet sajen äwa de Heilje Jeist, soo aus de Schreftjelieede hia deeden.
Vondoag läs wie en Markus 3:13-19 von woo Jesus deit siene 12 Jinja ut läsen. Hee wält sikj dise 12 oppoat, toom an lieren. Dit es de Aunfank von waut sea grootet, wiels hia met dise 12 Jinja deit Jesus siene Kjoakj aunfangen. No Jesus sien Doot aum Kriez, un no däm daut hee vom Doot opp steit, gonen siene Jinja rut äwa de gaunze Welt toom daut Evangelium vekjindjen. Daut es wundaboa woo Jesus roopt jeweenelje Menschen toom Poat von sien Plon sennen. Hee deed daut hia, met de 12 Jinja, un hee deit daut noch, met jieda Mensch waut aun am jleeft aus Heilant. Well wie Gott danken, daut hee ons jewält haft toom Poat von sien Plon sennen fa de gaunze Welt!
Vondoag läs wie en Markus 3:7-12 woo Menschen fungen aun von Jesus to hieren. See hauden jehieet waut hee deed, un nu kjeemen see von wiet un breet wiels see wieren nieschierich. Sent wie uk blooss nieschierich? Ooda sent wie werkjlich hungrich fa de Woarheit enne Schreft? Väle von de Menschen waut kjeemen wullen blooss een Wunda seenen, un wesse waut kjeemen wieren jäajen am, oba doa wieren uk wesse Menschen waut werkjlich deeden sieekjen no Gott sien Rikj, un noomen Jesus aun aus Gott sien Sän. Hee es soo voll von Leew un Jerajchtichkjeit. Well wie emma no am sieekjen, un am nofoljen, daut wie eewjet Läwen kjrieen, un Gott Iea jäwen met woo wie läwen.
Vondoag läs wie en Markus 3:1-6, woo Jesus een Maun met eene vedrieejde Haunt deed heelen aum Sabat. Wie kjennen seenen, daut de Farisäa un dän Kjennich siene Aunhenja jleichten Jesus nich, un dee sochten fa eene Uasoak jäajen Jesus, toom am äwatsied brinjen. Daut sajcht daut eenje pausten opp, auf Jesus nich wudd am heelen, soo daut see eene Uasoak hauden toom am beschuljen. Lats hieeden wie woo Jesus erkjläad daut hee Har es äwa dän Sabat, un wan hee Har es, dan sellen wie uk horchen no waut hee sajcht wäajen dän Sabat. Well wie goodet doonen, wan wie de Jeläajenheit haben, soo aus Jesus deed, aus hee dis Maun deed heelen.
Vondoag kjikj wie no Markus 2:23-28, wua Jesus un siene Jinja gonen derch de Jeträadflekja opp eenen Sabat. Doabie daut see doa derch gonen, fangen de Jinja aun Oaren to plekjen un uttorublen. De Farisäa seenen dit un an es daut nich goot, un, om eene Jeläajenheit to finjen toom Jesus en siene Wieed jriepen, stalen see Jesus opp de Proow. Jesus deit an Auntwuaten, un frajcht de Farisäa dan woont es wichtja, dän Sabat ooda dän Mensch? Hee sajcht dan daut dän Sabat es wäajen Menshen jemoakt wort, nich Menschen wäajen dän Sabat. Un uk daut hee, de Menschensän, es Har äwa dän Sabat. Well wie nich soo sennen aus de Farisäa wieren, un nich emma proowen toom aundre Menschen en Sind jriepen. Well wie nich ons loten gaunz drock woaren met aundre Menschen äare sachen, oba blooss fa ons selfst entschieden rajcht to läwen ver Gott, un am aunnämen aus Har.
En Markus 2:18-22, komen Johanes de Deepa siene Jinja un uk wesse von de Farisäa äare Jinja no Jesus, un froagen am wuarom siene Jinja nich fausten, wan aul de aundre doonen? Jesus siene Auntwuat es een bät schwoa toom vestonen, oba hee sajcht daut hee es de Briegaum, un woo kjennen dän Briegaum siene Jast fausten wäarent hee noch bie an es? Wan wie denkjen aun waut fausten soorajcht es, daut es een Tieekjen vom Gloowen, daut wie äten aufsajen toom em jeistlichen waussen, un mea Tiet nämen toom bäden. Jesus siene Jinja brukten nich fausten, wiels see kunnen perseenlich met Jesus räden, un hee es Gott.
Vondoag läs wie enne Schreft de Uasoak wuarom Jesus to Welt kjeem, en Markus 2:13-17. Jesus sajcht hia gaunz kloa to de Farisäa daut hee es jekomen de Sinda entoloden, daut see uk kjennen Poat von Gott sien Rikj sennen. Jesus bewees dit aus hee Levi, een Takskollakjta, deed roopen toom am nofoljen, un een von siene Jinja woaren. Jesus wäld sikj soone Menschen waut siene Bootschoft needich fälden, nich soone waut sikj selfst aul gaunz jerajcht talden. Well wie uk toostonen daut ons daut aun Jesus fält, un aun siene Jnod, un nich ons selfst jerajchtfoadich talen soo aus de Farisäa deeden.
Vondoag läs wie en Markus 2:1-12, wua vea Mana brinjen een Jelämden no Jesus wan hee deit prädjen. Doa sent oba soo väl Menschen en daut Hus wua Jesus es, daut doa es kjeen rum toom dän Jelämden bat am brinjen! Dise vea Mana jäwen oba nich opp, un moaken een Loch em Dak jrod bowa Jesus, un loten dän Jelämden rauf ver Jesus. Jesus sitt äaren Gloowen, un sajcht to dän Jelämden Maun daut siene Sinden sent vejäft, un daut es de Schreftjelieede jäajen aun. Jesus weet oba äare Jedanken, un bewiest to an daut hee de Krauft haft toom heelen uk toom Sinden vejäwen, un heelt dän Jelämden. Well wie Gloowen haben, un jleewen daut Jesus es wäa hee sajcht daut hee es, soo aus dise vea Mana hauden.
Vondoag komen wie bat daut latste Poat von Markus 1, en Varzhen 40-45, un wie seenen daut Jesus schauft wieda met siene Oabeit. Wua emma Menschen Help fält, jeft hee Help. Hee sajcht Menschen nich auf wan dee no am komen no Help froagen. Sent wie soo aus daut? Doo wie aules ligjen loten toom aundre halpen wan an daut needich fält? Ooda sent wie too besorjcht om onse ieejne Dinja? Well wie met ons selfst oabeiden, daut wie uk een Jaumahoat kjrieen fa dee waut Oam un Halplooss sent, soo aus de Leprakranken wia en de Schreftstäd vondoag. Jesus siene Leew fa ons es soo groot, un hee halpt ons soo jieren; well wie dan uk de Leew wieda brinjen un dee Menschen romm ons halpen wan an Help fält.
Vondoag, en Markus 1:35-39, see wie woo wichtich daut es toom Tiet nämen jieda Dach, toom Jemeenschoft haben met Gott. Jesus, Gott sien Sän, neem Tiet soo foaken aus hee kunn toom bäden, un daut saul een Väabilt sennen fa ons. Jesus wia onen Sind, un daut wia dan noch wichtich fa am daut hee Tiet funk wua hee kunn auleen sennen toom met Gott sien Voda räden; well wie dan uk soo doonen! Ekj meen nich blooss hia un doa een Poa Minuten, oba aula Dach goot Tiet nämen toom de Schreft studieren un Gott aunbäden. Wan wie dit doonen, dan woa wie waussen em Gloowen, un bätre Jemeenschoft haben met Gott ons Voda.
Jesus es Gott sien Sän. Hee kjeem rauf toom Menschen de Woarheit lieren, toom daut Rikj Gottes prädjen, un toom een Opfa sennen fa onse Sindenschult waut wie opp kjeene Wajch kjennen betolen. Jesus beweess en veschiedne Wäaj woo hee een besondra Mensch wia. Hee beweess siene Krauft met Wieed, wiels aus hee lieed, staunden Menschen sikj äwa siene besondre Lia. Hee beweess siene Krauft äwa de beese Jeista, un dreef an ut met een Wuat von sien Mul, un dee jehorchten am. En onse Schreftstäd vondoag, Markus 1:29-34, bewiest hee siene Krauft äwa Krankeit, wan hee Simon siene Schwieemutta deit heelen. Jesus läwd gaunz onen Sind, un veleet sikj gaunz opp sien Voda, derch de Krauft von de Heilje Jeist. En aul siene woakjen deed Jesus bewiesen daut hee Gott sien heilja Sän wia; well wie dan am lowen fa siene Krauft. Hee haft krakjt dee Krauft uk noch vondoag!
Jieda Joa doonen väle Menschen oppe Welt Tiet nämen toom Wienachten fieren. Menschen jäwen un kjrieen Jeschenkja, komen toop met de Familje, un äten väl scheenet. Oba wuaromm doon wie dit aula? Wie kjikjen vondoag no de Uasoak hinja Wienachten, en Lukas 2:1-14, wua Gott sienen eensjen Sän rauf schekjt vom Himmel, toom jebuaren sennen aus een Mensch. Jesus kjeem toom Fräd brinjen tweschen Menschen un Gott. Wienachten es nich blooss eene Tiet toom ons daut loten scheen gonen, oba eene Tiet toom denkjen äwa waut Gott fa ons jedonen haft. Jesus kjeem toom fa ons läwen un stoawen, daut wie kunnen Erleesunk kjrieen. Hee es de Uasoak hinja Wienachten.
Vondoag läs wie en Markus 1:21-28, wua Jesus jeit en eene Judenschool nenn un deit doa lieren von ut de Schreft. Dit es mau jrod no däm daut hee sikj de ieeschte Jinja deed roopen, un uk noch gaunz aum Aunfank von siene irdische Oabeit. Doabie daut hee deit lieren, kjemt eena met eenem orreinen Jeist, un fangt aun opp ludes to schrieejen von wäa Jesus wia. Jesus beweess siene Krauft un dreiwd am stell to sennen, un dreef dee beesa Jeist rut, un aulemaun staund sikj äwa waut jeworden wia. Jesus haud Macht toom lieren, soo daut de Menschen sikj staunden, un dan noch Macht toom groote Wunda doonen, soo daut de Menschen sikj noch dolla staunden äwa aul dit. Siene Wieed un Woakjen stemden krakjt toop. Derch aules waut hee säd un deed, weess Jesus daut hee Gott sien Sän wia. Well wie, krakjt soo aus de Jinja, am dan uk nofoljen.
Vondoag komen wie bat daut dredde Poat en de Markus Breef, en Kapitel 1:14-20. Dit es de Aunfank von Jesus siene Oabeit hia opp Ieed. Johanes de Deepa haud siene Oabeit jedonen, un haud een Wajch op jemoakt fa Jesus, krakjt soo aus steit jeschräwen en Markus 1:1-4. De Wajch wort op jemoakt, un dan kjeem Jesus toom siene Oabeit doonen von daut Rikj Gottes prädjen en daut gaunze Launt von Israel, daut Menschen sikj sullen omkjieren un aun daut Evangelium jleewen. De Bootschoft es noch emma de Woarheit vondoag; wie motten uk aun daut Evangelium jleewen, un daut es daut Jesus es jekomen fa ons, toom ons raden von onse Sinden. Well wie soo sennen aus de Jinja, un von onse Sinden wajch dreien un aun Jesus jleewen!
Wie gonen hia wieda derch de Markus Breef, en Kapitel 1:9-13. Vondoag kjikj wie no Jesus sien Doop, un woo de Heilje Jeist opp am kjeem, un bedwunk am enne Wiltnis nenn to gonen. Jesus leet sikj deepen von Johanes de Deepa, wiels daut wia Gott sien Wellen daut hee daut deed. Wie aus Kjristen sullen Lia auf nämen von Jesus. Wan wie aun Gott jleewen, un wellen am jehuarsom sennen, dan wan wie bekjanen daut Jesus es Gott sien Sän sull wie ons uk deepen loten, wiels Jesus deed daut aus een Väabilt fa ons. Jesus leet sikj uk nich blooss deepen, oba wort uk vesocht, soo aus wie aule noch mol doonen. Wiels Jesus krakjt soon Vesieekjunk es derch jegonen, kjenn wie am vetruen wan wie derch Vesieekjunk gonen.
Vondoag wellen wie aunfangen met de Markus Breef derch gonen. Wie wellen no Jesus sien Läwen kjikjen, no daut waut hee säd un deed, un woo wie kjennen doa von lieren. Jesus es Gott sien Sän, un hee kjeem rauf no Ieed toom ons Läwen derch gonen, un fa ons stoawen aum Kjriez, un dan oppstonen vom Doot, soo daut väle kunnen eewjet Läwen haben. Jesus es de gaunz basta Väabilt fa ons. Well wie dan uk Lia nämen von am.
Gott es rikj aun Jnod! Woo sea kjenn wie ons nich freien fa dee Woarheit? Hee haft ons jerat un beroopen toom een heiljet Läwen fieren, un daut aula derch siene Jnod, dee hee ons jeef derch sienen eensjen Sän, Jesus Christus. Wan wie am en Gloowen aunnämen, daut kjrie wie woaret Läwen. De Schreftstäd vondoag es Efeesa 2:1-10, wua wie seenen daut kjeen Mensch kaun seelich woaren derch Woakjen, oba blooss derch Gloowen en Jesus Christus. Wan wie dan uk de Seelichkjeit kjrieen, dan sell wie daut uk utläwen, soo daut ons Gloowen un onse Woakjen stemmen toop. Un well wie dit aula doonen en Freid, wiels Gott es goot!
Wie aus Menschen wellen haben daut aundre sellen goot denkjen äwa ons, oba de Jefoa es daut wie dan Dinja doonen blooss soo daut aundre dee seenen, un ons dan doafäa lowen. Wie sullen leewa fa Gott läwen, un Dinja doonen daut hee de Iea kjricht, aus fa ons selfst läwen. Wie kjenn blooss een goodet Läwen fieren wan wie fa Gott läwen. Wan wie nich fa Gott läwen, dan kjenn wie uk nich werklich goodet doonen, soo aus wie vondoag seenen en Rehabeam sienen Läwen, en 2 Chronik 12:13-14.
Wie aus Menschen haben aula Trubbel met sorjen. Ekj jleew nich daut doa irjent een Mensch es opp dise Welt wäa nich haft jesorcht äwa irjentwaut! Jesus vesteit woo wie daut haben, un woo schwoa wie ons daut moaken; doawäajen jeft hee ons eene Uasoak wuarom wie nich brucken sorjen. En Matäus 6:25-34 sajcht hee daut wan wie daut ieeschte no Gott sien Rikj un siene Jerajchtichkjeit sieekjen, dan woa wie daut aundre uk aula finjen, wiels Gott leeft ons soo sea un talt ons aus väl wieet. Well wie dan daut woa nämen, waut hee sajcht, un ons daut Läwen nich schwoa moaken met de Sorjen waut wie haben, oba dee dan aula no Gott jäwen, un ons gaunz opp am vetruen.
Vondoag kjikj wie no de Oabeit von een Huagenpriesta, un wie läsen en Hebräa 4:14-16 woo Jesus de Huagenpriesta es fa ons aus Kjristen. Jesus neem de Strof waut wie sullen kjrieen, un moakt daut mäajlich daut wie kjennen Jerajcht stonen ver Gott. Hee kaun krakjt met ons metfeelen, wiels am wort uk vesocht, krakjt soo aus wie aula, oba hee deed nich sindjen. Derch siene foadje Oabeit hab wie nu Jnod, un brucken ons nich mea ferchten fa Gott sienen Oaja. Well wie ons freien doaväa!
Wan du best soo aus ekj sie, dan hast du uk noch mol Trubbel diene Tung unja Kontroll hoolen. Vongoag läs wie von de Tung, un woo dee groote Macht haft, beid fa goodet un schlajchtet. Wie läsen en Spricha uk en Jakobus, toom een Bilt kjrieen von woo wie aus Kjristen ons sullen beharschen, toom de Tung beharschen un een heiljet Läwen utfieren.
Aus Kjristen hab wie foaken Trubbel en Läwen. Wie kjikjen no de Welt un fang sea boolt aun ons to vejlikjen met dee, leewa aus no Gott sien Wuat kjikjen. Jakobus 1:22-25 sajcht ons oba toom leewa no Gott sien Wuat kjikjen, un dan uk doonen waut daut sajcht. Soona waut daut Wuat blooss hieet, un nich deit waut daut sajcht, deit em orrajchten Spieejel kjikjen. Hee vejat fuaz woo am sach. Wan wie oba Gott sien Wuat läsen, un ons vejlikjen met waut daut sajcht, dan kjikj em rajchten Spieejel nenn. Well wie ons nich vejlikjen met de Welt, oba met Gott sien Wuat, un dan uk doonen waut daut sajcht.
Wie finjen noch mol daut wie woaren vetieft met auldoagsche Sachen, waut onse Hoaten wajch dreien von Gott. Wan dit woat, dan mott wie iernstlich sennen met trigj no am komen, soo aus de Israeliten deeden en de Schreftstäd fa vondoag. En 1 Samuel 7:3-10 see wie woo de Israeliten sikj deeden deemootjen ver Gott, un daut hee an uk deed raden von de Filista doawäajen. Daut es een aufbilt fa ons. Wie haben aula Tieden en onse Läwes wua wie von Gott vejäten; well wie nich doabie bliewen, oba fuaz trigj dreien no am, wiels hee jeft Jnod un Help to dee waut am aunroopen.
Vondoag kjikj wie no 1 Johanes 1:6-10, wua de Schriewa rät von Sinden bekjanen. Aus Kjristen, daut es wichtich daut wie secha moaken, daut wie enne Woarheit läwen. Wie kjennen nich volkomne Kjristen sennen wan wie met Fliet en Sind läwen; dan sent wie noch nich gaunz hanjejäft to Gott. Well wie iernstlich onse Hoaten unjasieekjen un dan uk bekjanen wan doa Sind es.
Woo dankboa sent wie? Vondoag kjikj wie no Filippa 4:4-7 toom seenen woo dankboa sennen kaun ons Läwen wiet bäta moaken, un woo daut kaun ons Freid un Fräd brinjen. Ons Hoat woat leicht jemoakt wan wie denkjen aun aules waut Gott haft fa ons jedonen, un aun aul de goode Dinja waut hee ons jeft aule Dach.
Wie läsen vondoag en Psalm 5, wua David deit Gott aunroopen toom am von sien Trubbel rut halpen. Gott es truhoatich un halpt aule dee, dee am no Help froagen. Wie kjennen ons gaunz opp am veloten. Well wie onse Freid opp Gott saten, un sien Wuat aunnämen, un hee woat ons halpen en Jerajchtichkjeit läwen.
Vondoag kjikj wie no de Hopning dee wie haben derch Christus. De Schreftstäd es Reema 15:8-13, un daut rät von woo de Velkja woaren äare Hopninj opp Jesus saten. Wan wie aun am jleewen, dan hab wie Hopninj waut stonen blift soogoa wan wie derch schwoare Tieden gonen. Ekj hop jie kjennen Moot finjen derch dit Program vondoag!
Vondoag well wie kjikjen no woo Saunftmootich Jesus es, besondasch en de Schreftstäd en Matäus 12:9-21. Wie wellen seenen waut vonne Leew Jesus haud fa Menschen un woo hee brukt siene Krauft toom de doljedrekjte halpen. Jesus wia nich blooss lang trigj Saunftmootich un Majchtich. Hee es vondoag uk noch krakjt soo aus eemol, un hee well die uk halpen, wan du am woascht aunroopen un no Help froagen. Wan wie am froagen, dan woat hee ons reinjen von Sind, un dan kjenn wie Gott siene Kjinja sennen.