Tulait Daily Devotional: Recent Episodes
Ryan
This podcast is a daily devotional to strengthen your walk with God. All episodes are recorded in Tok Pisin. Dispela podcast i gat Tok bilong God long strongim yu long wanwan de. Olgeta tok i Tok Pisin tasol.
Ritim: Namba 13:25-33
Tasol ol pipel bilong dispela kantri i strong tumas na ol taun bilong ol i bikpela tru na i gat strongpela banis. Na tu, mipela i lukim ol lain tumbuna pikinini bilong ol Anak i stap, ol i traipela man. – Namba 13:28
Ritim: Kisim Bek 32:1-6, 15-20
Harim. Dispela em i god bilong yumi. Em i bin kisim yumi long Isip na bringim yumi i kam. – Kisim Bek 32:4
Ritim: 1 Korin 11:23-32
Dispela kap wain em i nupela kontrak mi mekim long blut bilong mi yet. Olgeta taim yupela i dring long dispela kap, yupela i mas mekim olsem bilong tingim mi. – 1 Korin 11:25
Ritim: Kisim Bek 24:1-8
“Dispela blut i strongim kontrak Bikpela i mekim wantaim yupela. Na ol dispela lo i as bilong kontrak.” – Kisim Bek 24:8
Ritim: Rom 8:1-4
... Bai stretpela pasin bilong lo i ken kamap long laip bilong yumi, long wanem, nau yumi no save wokabaut long pasin bilong olpela bel. Nogat. Yumi save wokabaut long pasin bilong Holi Spirit. – Rom 8:4
Ritim: Kisim Bek 20:1-17
“Mi yet mi Bikpela, mi God bilong yupela. Mi bin kisim yupela long Isip, dispela ples bilong wok kalabus, na mi bringim yupela i kam. Yupela i mas bihainim mi wanpela tasol. Yupela i no ken bihainim ol giaman god.” – Kisim Bek 20:1-3
Ritim: 1 Korin 10:1-11
Tasol God i no laikim pasin bilong planti bilong ol dispela lain manmeri. Olsem na ol i bin i dai long ples drai nating, na bodi bilong ol i bin slip nabaut long dispela hap. – 1 Korin 10:5
Ritim: Kamapim Tok Hait 15:1-4
Ol i singim song bilong Moses, em wokman bilong God, na song bilong Pikinini Sipsip. Dispe- la song i olsem, “Bikpela, yu God I Gat Olgeta Strong, yu save mekim ol narakain strongpela wok, na taim mipela i lukim mipela i save kirap nogut tru...” – Kamapim Tok Hait 15:3
Ritim: Kisim Bek 15:1-10
Bikpela yet i save mekim mi strong, na mi singim song bilong litimapim nem bilong en. Em i save kisim bek mi, na mi laik litimapim nem bilong en. Em i God bilong papa bilong mi, olsem na mi laik singim song long biknem bilong en. – Kisim Bek 15:2
Ritim: Kisim Bek 14:21-31
Long dispela de Bikpela i kisim bek ol Israel long han bilong ol Isip, na ol Israel i lukim ol bodi bilong ol Isip i slip i stap long nambis. Ol i lukim dispela bikpela wok Bikpela i bin mekim bi- long winim ol Isip. Na ol manmeri bilong Israel i pret na i stap aninit long Bikpela...” – Kisim Bek 14:30-31
Ritim: 1 Tesalonaika 4:13-18
Ol brata, mipela i laik bai yupela i ken save gut long wanem ol samting bai i kamap long ol manmeri i dai pinis... yumi manmeri i gat laip na i stap yet, yumi bai i no inap i go paslain long ol manmeri i dai pinis. Nogat. – 1 Tesalonaika 4:13,15
Ritim: Stat 50:22-26
Olsem na nau Moses i kisim ol bun bilong Josep na karim i go... – Kisim Bek 13:16
Ritim: 1 Korin 5:6-8
Olsem na yupela i mas rausim olgeta olpela yis, bai yupela i ken i stap olsem nupela bret i no gat yis. Mi save, yupela i stap pinis olsem bret i no gat yis, long wanem, ol i ofaim pinis Krais, na em i olsem sipsip yumi ofaim long Bikpela De Bilong Tingim De God I Larim Ol Israel I Stap Gut. – 1 Korin 5:7
Ritim: Kisim Bek 12:1-13
Dispela blut yupela i bin penim long haus bilong yupela bai i stap olsem mak. Na taim mi mekim save long ol Isip bai mi lukim dispela blut na bai mi abrusim ol haus bilong yupela na larim yupela i stap gut. – Kisim Bek 12:13
Ritim: Kamapim Tok Hait 16:1-9
Orait mipela i save pret long Bikpela na i stap aninit long em, olsem na mipela i save wok long kirapim tingting bilong ol man bai ol i bilip long em... Olsem na mipela i kisim maus bilong Krais na autim tok bilong en. I olsem God yet i singaut long olgeta man long maus bilong mipela. – 2 Korin 5:11,20
Ritim: Kisim Bek 11
Moses i belhat nogut tru na em i lusim king na i go ausait. Bikpela i tokim Moses olsem, “King bai i no inap harim tok bilong yu, olsem na bai mi ken wokim sampela mirakel moa long Isip” – Kisim Bek 11:8-9
Luk 4:16-30
Spirit bilong Bikpela i kam i stap long mi, long wanem, Bikpela yet i kapsaitim wel long het bilong mi bilong makim mi bilong i go bringim gutpela tok bilong en long ol rabisman. Na em i salim mi i kam long tokaut long ol man i stap long kalabus long ol i ken lusim kalabus na i go fri, na long tokaut long ol man i aipas long ol i ken lukluk gen. Em i salim mi i kam long pinisim hevi bilong ol man, ol arapela i wok long daunim na mekim nogut long ol. – Luk 4:18
Ritim: Kisim Bek 5:15-6:1
Na ol bosman i tokim tupela olsem, “Bikpela i lukim pinis pasin bilong yutupela, na bai em
i ken mekim save long yutupela, long wanem, yutupela i mekim king wantaim ol hetman bilong en i ting mipela i samting nogut tru. Yutupela i wokim rot long king i ken kilim mipela i dai.” – Kisim Bek 5:21
Ritim: Rom 9:14-24
Na buk bilong God i tok long God i bin tokim king bilong Isip olsem, “Mi bin mekim yu i ka- map king, bai mi ken soim bikpela strong bilong mi long yu, na bai ol manmeri i ken autim biknem bilong mi long olgeta hap bilong graun.” – Rom 9:17 (Kisim Bek 9:16)
Ritim: Kisim Bek 5:1-9
Bikpela, em God bilong mipela Israel, em i tok olsem, “Larim ol manmeri bilong mi i go.” Tasol king i tok, “Bikpela em i husat? ....Mi no save long Bikpela, olsem na mi no ken larim yupela i go.” – Kisim Bek 5:1-2
Ritim: Kisim Bek 3:13-17
Na Moses i tokim God olsem, “Taim mi go kamap long ol Israel bai mi tokim ol olsem, ‘God bilong ol tumbuna bilong yumi i salim mi na mi kam long yupela.’ Na sapos ol i askim mi, ‘Wanem nem bilong en?’ orait bai mi bekim wanem tok long ol?” Orait God i tok, “Mi Yet Mi Stap Olsem...” – Kisim Bek 3:13-14
Ritim: Kisim Bek 3:1-12
Na Bikpela i tokim em olsem, “Mi lukim pinis ol i wok long mekim nogut long ol manmeri bilong mi long Isip. Na ol manmeri bilong mi i wok long singaut long mi long kisim bek ol long han bilong ol bosman nogut. Mi harim pinis dispela singaut na mi save tru long pen na hevi ol i karim. Olsem na mi kam daun bilong kisim bek ol – Kisim Bek 3:7-8
Ritim: Matyu 2:13-18
Bikpela krai na singsing sori i kamap long taun Rama. Em Resel i krai sori long ol pikinini bilong en i dai pinis. Na em i no laik bai ol manmeri i mekim gut bel bilong en, long wanem, olgeta pikinini bilong en i no moa i stap. – Matyu 2:18
Ritim: Kisim Bek 2:1-10
Taim dispela pikinini i kamap bikpela liklik, mama i kisim em i go long pikinini meri bilong king. Na pikinini meri bilong king i mekim dispela pikinini man i kamap olsem pikinini bilong em yet. – Kisim Bek 2:10
Ritim: Matyu 2:1-12
King Herot i harim dispela tok, na em i tingting planti. Na olgeta manmeri long Jerusalem ol tu i tingting planti. – Matyu 2: 3
Ritim: Kisim Bek 1:15-22
Orait na bihain king i tokim ol manmeri bilong Isip olsem, “Kisim olgeta nupela pikinini man bilong ol Hibru na tromoi i go long wara Nail, tasol larim ol pikinini meri i stap.” – Kisim Bek 1:22
Ritim: Matyu 5:1-10
Ol manmeri i laikim tumas long bihainim stretpela pasin, long wankain pasin olsem man i hangre tru na i laikim tumas long kisim kaikai na i dai long wara, em ol i ken amamas. Bai God inapim ol tru. – Matyu 5:6
Ritim: Kisim Bek 1:8-14
...Olsem na ol Isip i pret tru long ol Israel. Na ol Isip i mekim ol Israel i wok hat nogut tru na sindaun bilong ol i kamap nogut olgeta. Ol Isip i mekim ol Israel i hatwok long wokim brik na wokim haus na mekim wok long gaden... – Kisim Bek 1:12-14
Ritim: Hibru 13: 17-25
Bikpela bilong yumi Jisas, em strongpela Wasman bilong ol sipsip, em i bin givim blut bilong em yet bilong strongim dispela kontrak bilong i stap oltaim, olsem na God i bin kirapim em bek long matmat. Na nau God, em i as bilong pasin bilong bel isi, em i ken mekim olgeta gut- pela pasin i kamap strong long laip bilong yupela, inap long yupela i ken bihainim tru laik bilong em. Long wok bilong Jisas Krais, em i ken mekim yumi olgeta i kisim olgeta pasin em yet i laikim. Na oltaim oltaim yumi olgeta i ken givim biknem long em. I tru. – Hibru 13:20-21
Ritim: Rom 4:1-8
Tasol sapos wanpela man i laik kamap stretpela man long ai bilong God, orait em i mas mekim wanem? Em i no mas wok strong long mekim ol gutpela pasin, tasol em i mas bilip olsem, God inap long kolim ol man bilong mekim sin ol stretpela man.Na bai God i kolim em stretpela man. – Rom 4:5
Ritim: Rom 3:21-31
Tasol nau pasin God i mekim bilong kolim yumi stretpela manmeri, em i kamap ples klia pinis. Em i no kamap long rot bilong bihainim lo. Nogat. Em i kamap long narapela rot. Na tok i stap long lo bilong Moses na long ol buk bilong ol profet em i autim tok bilong dispela pasin God i mekim. Dispela pasin em i olsem. Olgeta manmeri i bilip long Jisas Krais, God i save kolim ol stretpela manmeri. I no gat narapela rot. Nogat. – Rom 3:21-22
Ritim: Rom 3:9-20
Olsem na long pasin bilong bihainim lo ‘i no gat wanpela man bai i no gat asua na i stap stret long ai bilong God.’ Nogat. Lo i save soim yumi long ol sin bilong yumi, em tasol. – Rom 3:20
Ritim: Rom 2:12-24
Yupela i save litimapim nem bilong yupela yet na tok, ‘Mipela i save long lo bilong God.” Tasol ating yupela yet i save kalapim lo, na long dispela pasin yupela i bagarapim nem bilong God. – Rom 2:23
Ritim: Rom 2:1-11
Yu save sutim tok long ol man i mekim ol dispela kain pasin, tasol yu yet yu save mekim wankain pasin olsem ol. Yu ting God bai i no inap kotim yu tu, a? – Rom 2:3
Ritim: Rom 1: 18-28
Olsem na God i lusim ol...Olsem na God i lusim ol...Olsem God i larim ol... – Rom 1:24-28
Ritim: Rom 1: 8-17
Mi no save sem long autim gutnius, long wanem, strong bilong God i stap long gutnius, em strong bilong kisim bek olgeta man i bilip, ol Juda pastaim, na ol manmeri bilong ol arapela lain tu. – Rom 1:16
Ritim: Jon 15:1-11
Yupela i mas karim planti kaikai na i stap disaipel bilong mi, na long dispela pasin Papa bilong mi i kisim biknem. – Jon 15:8
Ritim: Jon 14:18-24
Na Jisas i bekim tok bilong em olsem, ‘Sapos man i laikim mi tru, em bai i bihainim gut tok bilong mi. Na Papa bilong mi bai i laikim dispela man. Na bai mitupela i kam long em na i stap wantaim em oltaim oltaim.’ – Jon 14:23
Ritim: Jon 7:37-39
Em i olsem tok i stap long buk bilong God, sapos man i bilip long mi, orait planti wara i gat laip bai i kamap long bel bilong en na i ran i go. – Jon 7:38
Ritim: Aposel 28:17-24
Em i save autim tok bilong kingdom bilong God, na em i skulim ol manmeri long tok bilong Bikpela Jisas Krais. Em i no pret long autim tok na i no gat wanpela man i tambuim em. – Aposel 28:31
Ritim: Aposel 20:28-38
Nau mi putim yupela i stap long han bilong God, na mi laik bai yupela i tingim tok bilong marimari bilong em..... Mi no bin mangal long silva na gol na laplap samting bilong wanpe- la man. – Aposel 20:32-33
Ritim: Aposel 20:17-27
Olsem na mi laik tokaut klia long yupela nau. Sapos wanpela namel long yupela em i lus, dispela em i no asua bilong mi, long wanem, mi no bin surik long autim olgeta tingting bilong God long yupela. – Aposel 20:17-27
Ritim: Aposel 9:36-43
Oltaim em i save mekim ol gutpela pasin na em i save helpim ol manmeri i sot long ol sam- ting. – Aposel 9:36
Ritim: Aposel 6:1-7
Olsem na ol brata, yupela i mas painim 7-pela man namel long yupela, ol i gat gutpela nem namel long ol manmeri, na Holi Spirit i pulap long ol, na ol i gat gutpela save. Na yumi ken putim ol dispela man bilong lukautim dispela wok. – Aposel 6:3
Ritim: Aposel 5:1-11
Na Pita i tokim em olsem, ‘Watpo yutupela i pasim tok long traim Spirit bilong Bikpela? Harim. Ol man i planim man bilong yu, ol i wokabaut i kam insait long dua. Na ol bai i karim yu tu i go.’ – Aposel 5:9
Ritim: Aposel 4:32-37
Olgeta manmeri i bilip long Jisas, ol i wanbel na ol i gat wanpela tingting tasol. I no gat wan- pela man i lukim wanpela samting bilong en na i tok olsem, ‘Dispela samting em i bilong mi stret.’ Nogat. Olgeta samting bilong ol i bilong olgeta wantaim. – Aposel 4:32
Ritim: 1 Pita 5:1-5
Na yupela olgeta i mas bihainim pasin bilong daunim yupela yet na i stap aninit long ol ar- apela manmeri bilong God. Yumi save, “God i save daunim ol man i apim nem bilong ol yet, tasol em i save marimari na mekim gut long ol man i daunim ol yet.” – 1 Pita 5:5
Ritim: 1 Pita 4:7-11
God i bin marimari long yupela olgeta wan wan na givim ol kain kain presen long yupela. Ol- sem na yupela wan wan i mas i stap gutpela wokboi bilong God, na yusim ol dispela presen bilong helpim ol arapela manmeri bilong God. – 1 Pita 4:10
Ritim: 1 Pita 3:13-17
Sapos yupela i wok strong long bihainim gutpela pasin, orait husat bai i mekim nogut long yupela? – 1 Pita 3:13
Ritim: 1 Pita 3:7-12
Yupela ol maritman, yupela i mas bihainim gutpela tingting na sindaun gut wantaim ol meri bilong yupela...Yupela i mas save olsem, ol meri tu bai i kisim laip bilong i stap oltaim. Sapos yupela i bihainim dispela pasin, orait i no gat wanpela samting bai i pasim ol prea bilong yupela. – 1 Pita 3:7
Ritim: 1 Pita 3:1-6
Yupela i no ken bilasim skin ausait tasol... Mobeta yupela i bilasim insait bilong yupela tu long olkain bilas i no inap long bagarap. Dispela kain bilas em pasin bilong i stap belgut na i stap bel isi. Dispela kain pasin em i gutpela moa yet long ai bilong God. – 1 Pita 3:3-4
Ritim: Mak 14:22-25
... na Jisas i kisim wanpela bret, na i tenkyu long God, na i brukim, na i givim long ol disa- ipel... Na em i kisim wanpela kap wain, na i tenkyu long God, na i givim long ol... – Mak 14:22-23
Ritim: Matyu 20:1-16
Dispela ol man i kamap bihain tru, ol i wok wan aua tasol, na yu givim ol wankain pe olsem pe bilong mipela. Tasol mipela i bin hatwok tru stat long moningtaim tru i kam inap nau, na san i kukim nogut mipela. – Matyu 20:12
Ritim: Matyu 7:24-29
Orait man i harim dispela tok bilong mi na i bihainim, em i olsem wanpela man i gat gutpela tingting... – Matyu 7:24
Ritim: Matyu 6:16-18
Olsem bai ol man i no ken save yu tambu long kaikai. Papa bilong yu i stap hait, em wanpela tasol i ken save. – Matyu 6:18
Ritim: Matyu 6:5-15
Tasol taim yu laik mekim prea, yu mas i go insait long rum bilong yu na pasim dua na beten long Papa bilong yu i stap long ples hait. Na Papa bilong yu i save lukim ol samting i stap hait, em bai i bekim pe long yu. – Matyu 6:6
Ritim: Matyu 6:1-4
Olsem na dispela wok marimari yu mekim bai i stap hait. Na Papa bilong yu i save lukim ol samting i stap hait, em bai i bekim pe long yu. – Matyu 6:4
Ritim: 1 Samuel 2:12-17
Hopni na Finias, dispela tupela pikinini man bilong Eli, i man nogut tru. Tupela i pris, tasol tupela i ting olsem, Bikpela i samting nating [Ol i no save tru long God], na tupela i mekim ol kain kain pasin nabaut. – 1 Samuel 2:12
Na man i laikim tru ol arapela, em i pikinini bilong God, na em i save tru long God. – 1 Jon 4:7
Ritim: Matyu 5:43-48
Tasol mi tokim yupela olsem, yupela i mas laikim ol birua bilong yupela, na yupela i mas beten bai God i marimari long ol man i save mekim pasin nogut long yupela. Olsem bai yupela i stap pikinini bilong Papa bilong yupela em i stap long heven. – Matyu 5:44-45
Ritim: Galesia 2:15-21
Mi hangamap pinis long diwai kros wantaim Krais na mi dai wantaim em na mi kisim nu- pela laip. Tasol dispela laip em i no laip bilong mi yet. Nogat. Krais em i stap laip insait long mi. – Galesia 2:19,20
Ritim: Luk 7:36-50
Tasol taim mi lukim ol i no bihainim stret tok tru bilong gutnius... – Galesia 2:14
Ritim: Luk 7:36-50
Olsem na mi tokim yu, yumi lukim dispela meri i laikim mi tru na yumi save, God i lusim pinis ol planti sin bilong en. Tasol man i mekim liklik sin tasol na God i lusim sin bilong en, orait laik bilong en bai i liklik tasol. – Luk 7:47
Ritim: Matyu 18:23-35
Mi bin sori long yu. Olsem na watpo yu no sori tu long wanwok bilong yu? – Matyu 18:33
Ritim: Galesia 5:1-6
Sapos man i stap long Krais Jisas, orait pasin bilong katim skin em i samting nating, na pasin bilong man i no katim skin, em tu i samting nating. Tasol pasin bilong man i bilip na dispela i kirapim em long laikim tru ol arapela, dispela em i samting tru. – Galesia 5:6
Ritim: Efesus 2:4-10
Long Krais Jisas God i mekim yumi i kamap ol nupela manmeri, bilong yumi ken wokabaut long rot bilong gutpela pasin bipo yet God i redim pinis bilong yumi ken wokabaut long en. – Efesus 2:10
Ritim: Efesus 2:1-7
Yes, long marimari bilong God tasol em i kisim bek yupela. – Efesus 2:5
Ritim: 1 Korin 15:20-28
Long dispela taim bai olgeta samting i pinis. Na bai Krais i pinisim olgeta gavman na olgeta strongpela spirit na olgeta samting i gat strong, na bai em i putim kingdom long han bilong God Papa. Long wanem, Krais i mas i stap king i go inap em i daunim olgeta birua bilong en. – 1 Korin 15:24-25
Ritim: Kamapim Tok Hait 1:9-18
Mi lukim em na mi pundaun klostu long lek bilong en, na mi stap olsem man i dai pinis. Tasol em i putim han sut bilong en long mi, na em i tok olsem, “Yu no ken pret. Mi man i stap nam- ba wan tru na i stap bihain tru. Na mi man bilong i stap laip. Bipo mi dai pinis, tasol lukim, nau mi stap laip oltaim oltaim. Na mi holim ol ki bilong Dai na bilong Ples bilong ol man i dai pinis. – Kamapim Tok Hait 1:17-18
Ritim: 2 Korin 10:1-6
Olgeta samting bilong pait mipela i holim, ol i no samting bilong dispela graun. Nogat. Ol
i gat strong bilong God, na ol inap brukim ol strongpela banis bilong ol birua. Mipela i save daunim olgeta kain tingting na giaman tok i save pasim rot bilong ol man i laik kisim save long God. Na mipela i save kalabusim olgeta tingting bilong ol man, bilong mekim tingting bilong ol i bihainim laik bilong Krais. – 2 Korin 10:4-5
Ritim: Kolosi 1:15-20
Taim olgeta dispela samting i no kamap yet, em i stap. Na em i save mekim olgeta samting i stap gut na i wok gut wantaim. Em i het bilong sios, na sios em i bodi bilong em. Em yet i as bilong laip bilong sios. Em i namba wan man i bin kirap bek long matmat, olsem na em yet i ken i stap het bilong olgeta samting. – Kolosi 1:17-18
Ritim: 1 Korin 13
Pasin bilong bilip, na pasin bilong wetim God i mekim gut long yumi, na pasin bilong givim bel bilong yumi long ol arapela, dispela tripela pasin bai i stap oltaim. Tasol namba wan pasin tru, em pasin bilong givim bel bilong yumi long ol arapela. – 1 Korin 13:13
Ritim: Rom 12:3-8
Yumi save, wanpela bodi i gat planti hap bilong en, na olgeta hap i no mekim wankain wok tasol. Olsem tasol yumi tu yumi planti manmeri, tasol long Krais yumi stap olsem wanpela bodi tasol... – Rom 12:4-5
Ritim: Rom 8:9-11
Tasol yupela i no wokabaut moa long pasin bilong olpela bel. Nogat. Sapos i tru Spirit bilong God i stap long yupela, orait nau yupela i save wokabaut long pasin bilong Holi Spirit. Na man i no gat Spirit bilong Krais, em i no man bilong Krais. Sin i kilim bodi bilong yupela i dai pinis. Tasol sapos Krais i stap insait long yupela, orait yupela i kamap stretpela man pinis, na spirit bilong yupela i stap laip. – Rom 8:9-10
Ritim: Taitus 2
Yumi save, marimari bilong God em i kamap ples klia pinis...Dispela marimari bilong God em i save skulim yumi long lusim pasin bilong givim baksait long God na long lusim olgeta laik nogut bilong dispela graun, na em i skulim yumi long tingting gut na wokabaut stret. ... na bilip strong na wetim dispela gutpela samting yumi bai amamas tru long lukim. – Taitus 2:11-13
Ritim: 2 Korin 5:1-5
God yet i bin redim yumi bilong kisim dispela laip, na em i bin givim Holi Spirit long yumi. Holi Spirit em i olsem namba wan hap bilong ol gutpela samting God i laik givim long yumi. Na yumi kisim Holi Spirit pinis, olsem na yumi ken save, tru tumas bai yumi kisim olgeta arapela samting tu. – 2 Korin 5:5
Ritim: 2 Korin 1:18-22
Em i bin putim mak bilong em yet long yumi, na em i givim Holi Spirit bilong i stap long bel bilong yumi. – 2 Korin 1:21-22
Ritim: Efesus 4:25-32
Yupela i no ken givim bel hevi long Holi Spirit bilong God. God i givim Holi Spirit long yupela olsem mak bilong yupela i stap ol manmeri bilong em stret, na bilong soim yupela olsem em i makim taim bilong kisim bek yupela na mekim yupela i kamap fri tru. – Efesus 4:30
Ritim: Aposel 5:1-11
Ananaias i harim dispela tok na em i pundaun na wantu em i dai.... Orait wantu dispela meri i pundaun klostu long lek bilong Pita na em i dai. – Aposel 5:5,10
Ritim: Aposel 3:1-2
Pita na Jon i lukluk strong long em, na Pita i tok, “Yu lukluk long mitupela”...“Yupela man bilong Israel, bilong wanem yupela i kirap nogut long dispela samting i bin kamap? Bilong wanem yupela i lukluk strong long mitupela? Ating yupela i ting, mitupela yet i gat bikpela strong o mitupela i stap gut tru long ai bilong God na mitupela i mekim dispela man i woka- baut, a? Nogat tru.” – Aposel 3:4,12
Ritim: Aposel 2:41-47
Ol i save larim ol man i baim ol hap graun na ol samting bilong ol, na ol i kisim mani long dispela, na ol i tilim dispela mani long olgeta man i sot long kaikai samting. – Aposel 2:45
Ritim: Aposel 2:37-42
Na ol i askim Pita wantaim ol arapela aposel olsem, ‘Ol brata, bai mipela i mekim wanem nau?’ Na Pita i tokim ol olsem, ‘Yupela olgeta wan wan i mas tanim bel na kisim baptais long nem bilong Jisas Krais, na God bai i lusim ol sin bilong yupela. Yupela i mekim olsem, na bai God i givim Holi Spirit long yupela.’ – Aposel 2:37-38
Ritim: Aposel 2:25-36
Olsem na yupela olgeta lain Israel, yupela i mas save gut olsem, dispela Jisas yupela i nilim em long diwai kros, God i makim em i stap Bikpela, na man bilong kisim bek ol manmeri bilong en. – Aposel 2:36
Ritim: Aposel 2:14-24
Klostu long las de bai mi kapsaitim Spirit bilong mi long olgeta manmeri. – Aposel 2:17
Ritim: Aposel 2:1-13
Na Holi Spirit i pulap long olgeta dispela manmeri, na ol i stat long mekim tok long ol kain kain tok ples.... ‘Yumi Juda wantaim ol arapela man i bihainim lotu bilong yumi, na yumi ol lain bilong ailan Krit na distrik Arebia, yumi olgeta i harim ol i autim tok bilong ol strongpela wok bilong God long ol tok ples bilong yumi.’ – Aposel 2:4,11
Ritim: Luk 11:5-13
Yupela i mas i stap long dispela taun inap long taim yupela i kisim dispela strong bilong God. – Luk 24:49
Ritim: Jon 1:29-34
Jon i bin baptaisim ol manmeri long wara. Tasol i no planti de nau na bai yupela i kisim baptais long Holi Spirit. – Aposel 1:5
Ritim: Kamapim Tok Hait 21:9-14
Orait na ol i tromoi ston bilong makim husat i mas kisim dispela wok, na ston bilong Matias i kamap. Olsem na ol i putim em wantaim ol 11-pela aposel. – Aposel 1:26
Ritim: 1 Korin 15:1-11
Bikpela tok tru mi bin givim long yupela, em dispela tok mi yet mi bin kisim bipo. Em i olsem. Krais i bin i dai bilong rausim olgeta sin bilong yumi, olsem tok i stap long buk bilong God. Na ol i putim em long matmat, na long de namba 3 em i kirap bek, olsem tok i stap long buk bilong God... Tasol maski mi mekim o ol arapela aposel i mekim, mipela olgeta i save autim dispela tok bilong Jisas i dai na i kirap bek. Na yupela i harim na bilipim. – 1 Korin 15:3,4,11
Ritim: Aposel 1:15-26
Olsem na nau yumi mas makim wanpela man namel long ol man i bin wokabaut wantaim yumi long olgeta taim Bikpela Jisas i bin i go i kam wantaim yumi, stat long taim Jon i wok long baptaisim ol manmeri, na Jisas i kirapim wok bilong en na i kam inap long dispela de God i kisim Jisas na em i lusim yumi na i go antap. Yumi mas makim wanpela man i bin lukim dispela olgeta samting, na em i mas kisim wok wantaim mipela bilong autim tok long Jisas i kirap bek. – Aposel 1:21-22
Ritim: Hibru 6:13-20
Samting God i tokim yumi long wetim, dispela i stap olsem gutpela strongpela anka bilong laip bilong yumi. Dispela anka i go insait olgeta long Rum Tambu Tru, baksait long bikpela laplap ol i bin hangamapim long tempel. Jisas i go paslain long yumi insait long dispela rum, bilong helpim yumi, long wanem, em i kamap hetpris wankain olsem Melkisedek, na em bai i stap hetpris oltaim oltaim. – Hibru 6:19-20
Ritim: Aposel 1:6-14
Tiofilus, long dispela buk bipo mi raitim, mi raitim tok long olgeta samting Jisas i bin mekim na long olgeta skul em i bin givim long ol manmeri, long pastaim tru na i kam inap long dispela de God i kisim em i go antap... – Aposel 1:1-2
Ritim: Luk 24:44-53
Na ol i brukim skru na lotu long em. Na ol i amamas tru na ol i go bek long Jerusalem. – Luk 24:52
Ritim: Jon 20:11-18
Na Jisas i tokim em olsem, “Yu no ken holim mi, long wanem, mi no i go antap yet long Papa bilong mi. Tasol yu mas i go long ol brata bilong mi na tokim ol olsem, mi bai go antap, na mi go long Papa bilong mi na Papa bilong yupela. Na mi go long God bilong mi na God bilong yupela.” – Jon 20:17
Ritim: Jon 6:1-11
Tasol mi tok tru long yupela, mi lusim yupela na mi go, em i bilong helpim yupela. – Jon 16:7
Ritim: Luk 24:36-48
Na em i helpim ol long tingting gut long as bilong ol tok i stap long buk bilong God. – Luk 24:45
Ritim: Aposel 1:1-5
Pastaim em (Jisas) i bin karim pen na i dai, na bihain em i kisim laip gen na i kamap long ol aposel. Na em i mekim planti samting, bilong ol i ken save tru, em i stap laip. Inap long 40 de ol i lukim em, na em i tokim ol long kingdom bilong God. – Aposel 1:3
Buk Song 103:19-22
Yupela olgeta samting Bikpela i bin wokim na i stap long olgeta hap, na em yet i stap king bilong yupela, litimapim nem bilong Bikpela. Na mi tu mi mas litimapim nem bilong em. – Buk Song 103:22
Buk Song 103:6-18
Laip bilong yumi manmeri i sotpela tru olsem gras... Tasol Bikpela i save marimari oltaim oltaim long ol manmeri i aninit long en... sapos ol i bihainim kontrak bilong Bikpela. – Buk Song 103:15, 17-18
Buk Song 103:1-5
Mi mas litimapim nem bilong Bikpela. Yes, bodi na tingting na olgeta samting i stap insait long mi i mas litimapim gutpela nem bilong Bikpela. – Buk Song 103:1
Buk Song 87
Bai mi tok long Jerusalem olsem, ‘Em i ples bilong olgeta lain manmeri.’ – Buk Song 87:5
Buk Song 82
God i stap namba wan long bikpela miting long heven. Ol hetman i bung na God i tokaut long tingting bilong en. – Buk Song 82:1
Buk Song 72:1-11
Na taim em i stap yet ol manmeri i ken bihainim stretpela pasin tasol. Taim mun i lait yet, planti gutpela samting i ken kamap. – Buk Song 72:7
Buk Song 68:15-20
God i bin i go antap long maunten i antap moa, na em i kisim bikpela lain kalabus i go wan- taim em. Em i bin kisim ol presen bilong ol bikhetman i bin pait long em. – Buk Song 68:18
God i go antap tru, na em i kisim bikpela lain kalabus i go wantaim em. Na em i givim ol presen long ol man. – Efesus 4:8
Buk Song 67
God, yu ken marimari long mipela na mekim gut long mipela...Olsem na olgeta manmeri i ken save long pasin bilong yu. – Buk Song 67:1-2
Buk Song 62
Mi save bilip strong long God wanpela tasol. Em wanpela tasol i save kisim bek mi na mi stap laip. – Buk Song 62:1
Buk Song 46
God em i ples hait bilong yumi, na em i save strongim yumi oltaim. Em i stap klostu na i redi long helpim yumi long taim bilong bikpela hevi. – Buk Song 46:1
Buk Song 44:17-26
Mipela i stap manmeri bilong yu, olsem na long olgeta taim ol i save kilim mipela i dai. Ol i lukim mipela i olsem sipsip bilong kilim i dai tasol. – Buk Song 44:22; Rom 8:36
Ol lain bilong God i mas karim diwai kros bilong ol inap long taim ol i kamap nupela long nupela graun. Long Olpela Kontrak ol i save mekim olsem tu. Na ol i bel hevi stret bikos i luk olsem ol man nogut i winim ol, na ol yet i karim bikpela hevi tasol.
I gat sampela pasto bai i tok olsem:“Yu kisim ol hevi bikos yu yet yu mekim sin.”Tasol taim ol poroman bilong Job i mekim dispela kain tok long em, Job i agensim tok bilong ol. Na man i raitim dispela Buk Song i no bilipim dispela tok tru: “God, mipela i no lus tingting long yu na mipela i no sakim tok bilong kontak bilong yu.”
“Nogat.” ol i tok, “Mipela i no bin mekim sin. God i slip i stap! Bikpela, yu kirap. Bilong wanem yu slip? Yu kirap. Yu no ken givim baksait oltaim long mipela.”
Nau yumi stap long Nupela Kontrak, na em i narakain taim olsem taim bilong Olpela Kontrak. Taim yumi harim dispela tok long Bikpela i slip i stap, bai yumi tingim stori bilong Luk 8, we Bikpela Jisas i slip insait long sip taim wanpela bikpela win i kamap long raunwara. Na ol disaipel i pret nogut tru na ol i go kirapim Jisas na tok, “Bikman, bikman, yumi laik lus nau.” I no olsem Krais i slip bikos em i no laikim tru ol disaipel. Nogat, em i slip long strongim bilip bilong ol.
Yumi save olsem Bikpela i stap na em i no save slip. Na yumi stap aninit long diwai kros bilong Krais. Sapos yumi laik kirap bek wantaim Krais, yumi mas redi long wanbel wantaim em na poromanim em long ol hevi tu. “Ol i lukim mipela i olsem sipsip bilong kilim i dai tasol.” Planti taim yumi save pilim dispela kain hevi tu. Tasol yumi klia tu olsem, “Maski wanem kain samting i kamap long yumi, oltaim em i save mekim yumi i win tru” (Rom 8:37).
God i stap olgeta taim, na em i no save slip. Yumi mas karim diwai kros bilong yumi, tasol yumi i win pinis – long wok bilong Krais em i bin givim bel bilong en long yumi.
Yumi mas wetim Krais, kain olsem ol tumbuna long bipo i bin wetim em. Yumi mas singaut strong: “Kam Bikpela! Yu Kam!”
SAMPELA TINGTING
Yu save singaut strong, “Kam Bikpela! Yu kam!” o nogat?
Buk Song 43
Olsem na bai mi go long alta bilong yu, God. Long wanem, yu save mekim mi i belgut na amamas. – Buk Song 43:4
Buk Song 42
Bilong wanem mi bel hevi oltaim? Bilong wanem bel bilong mi i kirap nogut? Mi mas bilip long God na wetim em i helpim mi. – Buk Song 42:11
Long stap tru olsem bilip lain long dispela graun, yumi mas wok long skelim laip bilong yumi yet na stretim yumi yet tu. Yumi mas autim dispela kain tok long yumi yet: “Bilong wanem mi bel hevi oltaim? Bilong wanem bel bilong mi i kirap nogut? Mi mas bilip long God na wetim em i helpim mi.”
I no longlong pasin long toktok long bel bilong yu yet. I olsem tupela man i wok long birua insait long bel bilong yumi olgeta. Wanpela i tok, “mi laik kisim,” na narapela i tok, “mi no ken.” Wanpela i bilip, na narapela i pulap long daut. Maski yu bin i stap olsem Kristen longpela taim pinis, bai dispela tupela man i wok yet long pait insait long bel bilong yu. Olsem na yumi mas stretim yumi yet.
Yumi mas skulim bel bilong yumi long wokabaut long bilip. Sapos yu laik autim tok bilong God long ol arapela, orait pastaim yu mas askim God long givim strong long yu long bosim gut laip bilong yu yet na bilong stap belgut pastaim. Yumi no ken kotim ol lain long dispela graun bikos ol i sakim tok bilong God, sapos yumi i no kotim pinis yumi yet long ol dispela kain pasin i stap insait long bel bilong yumi .
Yumi mas mekim planti wok tru bilong stretim bel bilong yumi yet. Yumi mas wok strong long skulim bel bilong yumi yet tu long tok bilong God bikos planti taim yumi no luksave long dispela tok.
Yumi mas skulim yumi yet long bilip. God i singautim yumi long stap lain bilong em. Em yet i givim yumi planti ol gutpela samting bilong Krais. Bilong wanem yumi save lus tingting long Tok bilong En? Yu mas tokim bel bilong yu yet olsem, “Bel bilong mi, yu mas pas strong wantaim God!”
God em i save lukautim ol liklik pisin. I no gat wanpela bilong ol bai i pundaun nating. Ating em bai lukautim yumi gut tu, a? Bilong wanem yumi save wari tru na bel hevi tru?
Toktok long bel bilong yu yet!
Bilip long God! Em bai givim yumi olgeta samting yumi nidim long dispela laip na long taim bilong i dai tu. Em i save givim kaikai long yumi na, moa, em i kisim bek yumi!
SAMPELA TINGTING
Bai yu stretim bel bilong yu olsem wanem long tude?
Buk Song 40:1-8
Orait nau mi tok olsem, “God, mi kam pinis, olsem bipo ol i raitim tok long mi long buk. God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.” – Buk Song 40:7-8
Dispela em i tok bilong King Devit taim em i kamap olsem king bilong Israel. Em i namba tu king bilong Israel. God i rausim pinis namba wan king, Sol. Sol i tingting olsem, “Sapos mi mekim ofa long God, mi inap sakim tok bilong God.”Tasol God i tok olsem,“Pasin bilong bihainim tok bilong mi, em i nambawan pasin tru. Na pasin bilong ofaim ol gutpela abus long mi, em i namba 2 tasol” (1 Sam 15:22).
Tasol taim Devit i kamap king, em i tok, “Ol ofa...yu no save laikim...God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.”
I luk olsem Devit i paul liklik long tok bilong em. God i no bin tok olsem em i no laikim ol ofa. Tasol God i soim klia olsem em i les long ol ofa ol man i mekim taim ol i les long bihainim Tok bilong em. Taim man em i mekim dispela kain pasin, God em i belhat tru.
Tasol dispela tok bilong Devit i olsem tok profet. Narapela King i kamap bihain long Devit, na em inapim ol dispela tok profet. Taim dispela King – Jisas – i kam long dispela graun, em i tok, “Yu no laik bai ol i kilim abus na mekim ofa....Orait nau mi tok olsem, God, mi kam pinis... bilong bihainim laik bilong yu” (Hibru 10:6-7).
Dispela tok i putim ples klia olsem Devit i tok stret: God i les long ol ofa taim man i les long bihainim laik bilong em. Tasol moa, tok bilong Jisas i putim ples klia olsem God na man i no inap kamap wanbel long pasin bilong ol dispela kain ofa. Dai bilong Jisas tasol inap mekim olsem. Olgeta arapela ofa i no inap; dai bilong Jisas inap tru olgeta.
Krais em i man bilong bihainim laik bilong God. Long bihainim laik bilong God, Krais em i ofaim em yet long God. Ofa bilong em yet i samting bilong bihainim God. Na bikos long wok bilong Krais yumi yet i ken mekim wok bilong God long laip bilong yumi wan wan. Yumi tu i mas bihainim laik bilong God: “Lo bilong yu i stap insait long bel bilong mi.” Olsem tasol bai yumi daunim yumi yet aninit long God, na dispela em i olsem ofa bilong yumi i go long God.
SAMPELA TINGTING
Yu yet yu inap autim dispela tok tu, “Lo bilong yu i stap insait long bel bilong mi, a?”
Buk Song 32
Bikpela i tok olsem, “Mi laik skulim yu gut na soim yu long rot yu mas wokabaut long en. Bai mi skulim yu na lainim yu.” – Buk Song 32:8
Sios bilong Krais i laikim tru dispela Buk Song. Taim Devit i raitim dispela Buk Song, Krais i no bin kamap yet long dispela graun, na ol lain bilong God i no klia olgeta long pasin bilong kamap stretpela long ai bilong God long wok bilong Jisas. Tasol maski Jisas i no bin dai yet, dispela buk song i autim tok bilong pasin bilong God bilong rausim sin bilong yumi. Pol tu em i laikim tru dispela Buk Song (Rom 4:6-8).
Buk Song 32 i soim klia olsem God i save rausim sin bilong yumi long marimari tasol. Na tu i soim olsem yumi mas autim ol sin bilong yumi. Taim Jisas i no kamap yet long dispela graun, ol dispela tok tru i stap pinis.
Long laspela hap bilong dispela song, wanpela tisa i toktok. Yumi no save sapos em i wanpela papa, mama, hetman o pasto, tasol dispela man o meri i autim tok bilong God yet. God em i save yusim ol manmeri olsem mausman bilong autim tok bilong em yet. Na dispela tisa i tok olsem: “Mi laik skulim yu gut na soim yu long rot yu mas wokabaut long en. Bai mi skulim yu na lainim yu.”Yu autim ol sin bilong yu pinis, na God i rausim sin bilong yu, olsem na yu mas lainim pasin bilong bihainim Tok bilong mi long laip bilong yu: “Bai mi skulim yu na lainim yu.”
Dispela skul em i no samting bilong kisim save tasol; em i samting bilong lainim pasin bilong bihainim Bikpela long dispela graun: “Bai mi soim yu long rot yu mas wokabaut long en.”
Yumi mas redi long harim tok bilong God. Em i rausim sin bilong yumi, olsem na yumi mas harim Tok bilong em. Na God i gat laik long skulim yumi long taim yumi go long sios, long haus lotu. Em i wanpela bikpela rot we God i save skulim yumi na lainim yumi. Olsem na yumi mas strong long go long lotu, bilong harim Tok bilong em.
God i rausim sin bilong yumi, na yumi olgeta i nidim skul. Husat i tisa bilong yu yet?
SAMPELA TINGTING
Bai yu askim God long skulim yu long wanem ol samting?
Buk Song 27
Yu tokim mi olsem, ‘Yu kam long mi.’ Orait Bikpela, bai mi go long yu. Yu no ken haitim yu yet long mi. – Buk Song 27:8-9
I luk olsem dispela Buk Song i gat tupela hap. Namba wan hap i pulap long bilip, na namba tu hap i autim ol wari na hevi na daut. Sampela lain i ting olsem pastaim dispela song i olsem tupela song, na bihain ol i bungim dispela tupela song i kamap wanpela song tasol. Tasol maski; dispela tupela kain samting i save kamap long laip bilong ol Kristen. Bilip na daut i save kamap klostu klostu long laip bilong ol manmeri i bilip long God. Pasin bilong litimapim nem bilong God na pasin bilong pret tu, i save kamap klostu klostu long laip bilong ol Kristen.
Taim yumi wok long go long God long taim bilong hevi, taim yumi wok long askim God long strongim bilip long yumi, bai yumi klia olsem God yet em i helpim na lait bilong yumi. Na dispela man i raitim dispela Buk Song i bin mekim olsem. Em inap autim bilip bilong em long namba wan hap long dispela Buk Song bikos em i wok long go long God long taim em i gat ol hevi na wari. Ol lain bilong God i mas save gut long pasin bilong daunim ol yet aninit long God, bilong kisim strong bilong em na bilong sanap strong long bilip.
God i tokim dispela man, “Yu kam long mi.” Na dispela man i autim wankain tok i go bek long Bikpela, “Orait, Bikpela, bai mi go long yu.”
Prea em i samting bilong bekim tok bilong God. Prea em i no samting nating. I no olsem taim yumi prea, ol prea bilong yumi i kamap olsem win na flai i go. Nogat, long prea yumi i save bekim tok bilong God, na God i harim.
God i tok,“Yu kam long mi.”Bekim i olsem:“Orait, Bikpela, bai mi go long yu.”Tasol bihain long taim dispela man i autim dispela tok, wantu em i autim dispela narapela tok: “Yu no ken haitim yu yet long mi.” Man i raitim dispela song, em i save olsem God em i gat rait long haitim em yet long em. Em i save olsem em i man bilong mekim sin. Tasol God i strongim em taim em i autim dispela tok, “Yu kam long mi.” Na bikos God i tokim dispela man long painim em, em i wok long painim, na em i tokim God long no ken haitim em yet long em. Long go klostu long God, yumi gat wok long painim em.
“Bai mi go long yu.”Yumi no prea bilong kisim liklik samting long God. Nogat. Yumi prea bilong kisim God yet!
SAMPELA TINGTING
Yu save wok long painim God long laip bilong yu yet?
Buk Song 25:1-7
God, yu no ken tingting moa long sin na pasin nogut mi mekim taim mi yangpela yet. Yu God bilong sori na yu gutpela oltaim. Yu ken tingting long mi na marimari long mi. – Buk Song 25:7
Ol dispela Buk Song i olsem ol prea tu. Taim yumi ritim ol Buk Song, God i skulim yumi long pasin bilong lotu na prea.
Long lain 1 i go long 7 long Buk Song 25 i olsem wanpela naispela prea stret long yumi ken bihainim. Pastaim dispela man i raitim dispela song i askim God long kisim bek em long han bilong ol birua bilong em: “Yu no ken larim ol birua i daunim mi na ol i amamas.” Na bihain em i askim God long stiaim em: “God, yu mas skulim mi long gutpela pasin bilong yu, na soim mi long rot bilong yu.” Na bihain long dispela em i askim God long rausim sin bilong em: “God, yu no ken tingting moa long sin na pasin nogut mi mekim taim mi yangpela yet.”
Dispela man i raitim dispela Buk Song i save tru olsem em i pulap long sin. Em i no wok long haitim sin bilong em long God o long em yet. “Ol pasin nogut mi mekim taim mi yangpela yet” – ol dispela sin i isi tru long mekim. Taim man i yangpela yet, em i no tingting tumas taim em i mekim sampela samting. Tasol pasin bilong yumi long mekim sin em bai i go inap long taim yumi dai.
Planti lain bilong yumi no save tru long ol sin bilong yumi. Sampela taim yumi wok long haitim ol sin bilong yumi yet tu. Tasol yumi no ken mekim olsem. Yumi mas redi long tok tru long sin bilong yumi, na autim ol sin bilong yumi long God.
“No ken tingting moa long sin bilong mi,” man i raitim dispela song i tok. Na bihain em i tok, “Yu ken tingting long mi.” Em i save olsem God bai mekim olsem long em, bikos, “Bikpela i gutpela.”
“Yu God bilong sori... yu ken tingting long mi.” Dispela man nogut ol i bin hagamapim wantaim Jisas long diwai kros, em i autim tok i klostu wankain long dispela tok: “Jisas... yu ken tingting long mi.” Na Jisas i harim tok bilong em.
Na yumi tu, yumi mas bilipim God na prea strong tru long em. Yumi mas askim em long lusim sin bilong yumi na long tingting long yumi. Jisas i dai long yumi na em i kirap bek. Olsem na yumi mas askim God long lusim sin bilong yumi na marimari long yumi tu. Olsem na yumi save askim ol samting long beten “long nem bilong Jisas.”
SAMPELA TINGTING
Autim lain 1 i go long 7 bilong dispela Buk Song olsem prea bilong yu yet.
Buk Song 24
Yupela dua, yupela op. Yupela dua bilong bipo tru, yupela op bikpela, bai nambawan king i ken i go insait. – Buk Song 24:7
Long namba wan hap bilong dispela Buk Song, i olsem olgeta samting long dispela graun i stap na wetim masta bilong ol. Na long namba tu hap bilong dispela Buk Song, dispela askim i kamap: “Husat inap i go antap long maunten bilong God? Husat inap i go insait long haus bilong em yet?” Na long namba tri hap i olsem yumi harim ol manmeri i singsing strong bikos dispela “nambawan king” i go insait long haus bilong en.
Yumi no inap klia wanem taim dispela man i raitim dispela Buk Song, na yumi no inap klia bilong wanem em i raitim dispela Buk Song, na yumi no inap klia long tingting bilong ol manmeri taim ol i autim dispela song tu. Tasol yumi ol Kristen lain, taim yumi i ritim dispela Buk Song yumi bai tingting long taim Bikpela Jisas i go antap long heven.
Em i go antap long heven. Namba wan hap bilong wok bilong em i pinis. Em yet i dispela man “i no mekim pasin nogut, na bel bilong en i klin” (Buk Song 24:4). Na em yet i go insait long haus bilong God. Na em i mekim olsem bilong helpim yumi. Yumi save, na yumi bilip olsem, em yet i win. Em i winim sin, na yumi no stap wokbai bilong sin moa. Dai i no inap bagarapim yumi moa. Jisas bilong yumi em i Bikpela. Em i stap long sia king bilong God,
na God Papa i kisim em, na ol ensel i lotuim em, na ol manmeri bilong em i laikim em tru. “Yupela dua, yupela op. Yupela dua bilong bipo tru, yupela op bikpela, bai nambawan king i ken i go insait.”
Buk Song 24 em i olsem pati bilong selebretim dispela taim we Jisas i go antap long heven. Dispela Jisas em i laikim yumi tru, na em i bosim yumi tu. Jisas i stap long sia king. Marimari na strong na pawa i bung wantaim. Tasol Jisas, na laikim tru na pawa bilong em, i winim stret olgeta arapela samting.
Em i taim bilong namba tu hap bilong wok bilong Jisas nau, em i wok bilong em long heven. Heven na graun i wok long bung. Krais i stap long heven; Spirit bilong em i stap long dispela graun.
Yupela dua, yupela op! Bel bilong yumi mas op tu! Olgeta samting long dispela graun bai lukim glori bilong Bikpela.
SAMPELA TINGTING
Jisas i stap long sia king bilong em long heven. Dispela i gat wanem mining insait long laip bilong yu tude?
Buk Song 23
Bikpela em i wasman bilong mi. Olsem na mi no inap sot long wanpela samting. – Buk Song 23:1
Long planti yia i go pinis i kam inap long tude, dispela Buk Song i winim olgeta wok bilong olgeta dokta bilong rausim pen bilong ol manmeri, na i winim olgeta save bilong dispela graun long givim bel isi long ol manmeri.
Devit i raitim dispela Buk Song, na pastaim em yet i stap olsem wanpela wasman. Taim em i bin lukautim ol sipsip bilong em, Devit em i kisim save olsem em yet i gat wanpela wasman i stap tu. Olsem na em i raitim dispela lain long kirapim dispela song: “Bikpela em i wasman bilong mi.” Bikos Bikpela i nambawan wasman tru, Devit i raitim dispela samting tu: “Olsem na mi no inap sot long wanpela samting.”
Na dispela tok long wanpela wasman, em i kamap planti taim moa long Buk Baibel, na dispela tok piksa bilong wasman em i naispela tok piksa stret.
Jisas yet i yusim dispela tok piksa tu. Em i autim dispela stori long wanpela sipsip i lus, na wasman bilong sipsip i bin karim em i go bek long haus bilong en. Na moa, Jisas i tok, “Mi yet mi gutpela wasman bilong ol sipsip.” Olsem na em i soim klia olsem em yet i wasman bilong yumi olgeta.
Na dispela tok piksa long wasman bilong sipsip i kamap bikpela moa yet long Kamapim Tok Hait 7. Long hia i olsem wasman bilong sipsip i kamap olsem pikinini sipsip yet: “Pikinini Sipsip i stap namel tru long sia king, em bai i stap wasman bilong ol” (Kamapim Tok Hait 7:17). Em yet i bin wokabaut long ples nogut na bikpela tudak (Buk Song 23:4). Na dispela tok, “olsem na mi no inap sot long wanpela samting,” i gat bikpela mining moa tu: “Ol bai i no hangre moa, na nek bilong ol bai i no drai gen. San bai i no inap boinim skin bilong ol, na i no gat wanpela samting bai i mekim skin bilong ol i hat nogut tru” (Kamapim Tok Hait 7:16).
Olsem na yumi bai amamas long singim dispela Buk Song 23, na yumi bai bilipim tok insait long dispela Buk Song, inap long taim olgeta sipsip bilong God ol i tait tru, ol i stap pinis long malalo bilong Bikpela.
SAMPELA TINGTING
Yu save amamas bikos Bikpela em i wasman bilong yu? Yu bilipim tok bilong God long dispela Buk Song?
Buk Song 22:22-31
Bai mi autim tok long ol brata bilong mi long strongpela wok yu bin mekim. Taim ol i bung bilong lotu bai mi go namel long ol na litimapim nem bilong yu. – Buk Song 22:22 (Hibru 2:12)
Buk Song 22 em i olsem song bilong Jisas. Namba wan hap em i olsem krai bilong em long diwai kros, na namba tu hap i olsem singsing bilong em long Ista moning.
Long taim san i kamap long Ista moning, ol lain bilong God i krai i stap. “Pastaim mipela i bin bilip olsem, Jisas em dispela man God i makim bilong kisim bek ol manmeri bilong Israel” (Luk 24:21). Pastaim mipela i bilip... dispela em i kain tok yumi save autim taim bilip bilong yumi i bagarap. Ol disaipel i ting olsem God yet i givim baksait long Jisas. Ol i ting olsem birua bilong ol i win. Na moa, ol i ting olsem dai i win tu.
Tasol Jisas i stap laip! God i kirapim em. I luk olsem olgeta samting i lus pinis, tasol nogat, ol lain bilong God i winim planti samting pinis. Sin na dai i no win; Jisas yet i winim ol. God i senisim ol krai i kamap lap. God bai inapim olgeta promis bilong em olgeta taim. Em i tru olgeta, na yumi lukim dispela long dai bilong Jisas na long taim em i kirap bek long matmat.
Long Ista Sande, klostu long tudak, Jisas i go kamap namel long ol disaipel bilong em. Em
i skulim yumi long wanpela nupela singsing. Dispela nupela singsing inapim Buk Song
22. “Olgeta samting bipo ol i raitim long mi long....Buk Song, dispela olgeta samting i mas kamap tru” (Luk 24:44). Buk Song 22 em i naispela song stret taim yumi i singim bihain long Ista.
Long Ista Sande, Jisas i kirapim wok bilong em bilong bungim ol lain bilong God. Na long Tok na Spirit bilong em, em i wok long mekim olsem olgeta de inap i kam long tude. “Olgeta manmeri bilong graun bai ol i tingting long God, na bai ol i kam bek long em. Olgeta lain manmeri bai i lotu long em. Long wanem, Bikpela i stap king na em i bosim olgeta lain manmeri” (Buk Song 22:27-28).
Jisas i sanap strong long ol hevi em i bungim inap long dai bilong em. Long dispela pasin em inapim namba wan hap bilong Buk Song 22. Tasol nau em i wok long bungim ol lain bilong em. As bilong dispela em i kirap bek bilong em yet. Na taim em i mekim olsem, em i wok long inapim namba tu hap bilong dispela Buk Song tu.
SAMPELA TINGTING
Ritim lain 22-31 gen olsem prea bilong yu long wok bilong Jisas.
Buk Song 22:1-11
God bilong mi, God bilong mi, bilong wanem yu lusim mi? – Buk Song 22:1
Dispela em i krai bilong wanpela stretpela man. Em i bilipim God, taim mama i karim em na i kam inap long nau. Tasol nau em i pilim olsem God i lusim em. God i no harim em. Planti birua i ranim em na ol i laik bagarapim em. Ol i olsem ol bulmakau man na ol laion na ol dok na ol wel bulmakau.
Dispela em i bikpela hevi stret na i winim ol arapela hevi ol Kristen lain i save bungim. Ol i bilipim God. Ol i mekim ol stretpela pasin. Na ol i tok,“Mi bilip long God.”Tasol i luk olsem dispela God i no inap helpim ol.
Na wanpela bikpela hevi bilong ol em i dispela pasin bilong ol birua bilong tok bilas na sutim bel bilong ol. Ol birua i lap na i ol tok, “Yu save bilip long God. Bilong wanem em i no helpim yu na kisim bek yu?” Long dispela tok dispela man i krai, “God bilong mi, God bilong mi, bilong wanem yu lusim me?”
Jisas em i wanpela stretpela man olgeta. Em i bilipim God, na em i holim strong God long olgeta de. Taim em i gat 12-pela krismas tasol em i tok, “Mi mas i stap long haus bilong Papa bilong mi.” Na taim em i bikpela moa liklik em i tok, “Kaikai bilong mi, em long bihainim laik bilong God.” Jisas em i go long diwai kros bikos em i laik bihainim laik bilong God tasol.
Taim Jisas i hangamap long diwai kros em i tingim Buk Song 22. I olsem dispela Buk Song i kamap olsem song bilong em yet. God i larim ol birua i bagarapim em, na ol i tok bilas long em na sutim bel bilong em: “Em i bilip long God...Orait, sapos God i laikim em, God i ken helpim em nau” (Matyu 27:43). Taim tudak i karamapim graun, Krais i singaut strong na em i krai, “God bilong mi, God bilong mi, bilong wanem yu lusim mi?”
Tasol, taim Krais i autim dispela krai pinis, ol hevi bilong em (na bilong yumi) i klostu pinis. Long wanem, dispela krai bilong Jisas em i bekim olgeta krai bilong yumi yet. God i bekim ol krai bilong olgeta lain bilong em, long diwai kros, long dispela dai bilong Jisas.
SAMPELA TINGTING
Sampela taim yu save pilim olsem God yet i lusim yu? Wanem samting i save helpim yu long kain taim olsem?
Buk Song 16
Yu yet bai yu soim mi rot bilong kisim laip. Yu stap klostu long mi na mi save amamas moa yet. Yu save helpim mi na bel bilong mi i amamas oltaim oltaim. – Buk Song 16:11
Planti ol gutpela papamama na pasto bai i tokim ol yangpela Kristen olsem ol Kristen lain i save bungim ol hevi tu. Laip bilong ol Kristen i no samting bilong amamas olgeta taim. Yumi mas daunim yumi yet, na yumi bai kisim pen. Em i no isi long stap olsem wanpela Kristen, na yumi mas bihainim tok bilong God, na i no isi long mekim olsem.
Em i gutpela long harim dispela tok lukaut. Em i gutpela bikos planti lain i gat laik long amamasim ol yet, na ol i no tingting tumas long kisim hevi taim ol i kamap Kristen. Na nogut ol pasto i tokim ol Kristen olsem ol bai i stap amamas olgeta taim.
Tasol nogut yumi harim toktok long ol hevi yumi bai bungim bikos yumi stap olsem wanpela Kristen tasol.
Krais em i save givim amamas long yumi. Na God em i amamasim yumi tu. Devit em i save olsem, “Yu Bikpela bilong mi. Olgeta gutpela samting mi holim, i kam long han bilong yu tasol.”
Buk Song 16 em i gat ol naispela tok stret. Na taim yumi save long wok bilong Jisas long Nupela Kontrak, dispela tok em i naispela moa yet! Jisas i save givim dispela amamas long yumi. Dispela tok i stori long kirap bek bilong Jisas: “Bai yu no larim mi i go i stap long ples bilong ol man i dai pinis. Na bai yu no larim man bilong yu yet i sting long matmat” (lain 10). Jisas em i rot bilong laip – dispela rot em i go long amamas bilong God Papa (Aposel 2:25- 31).
Olsem na, Buk Song 16 i soim yumi olsem Jisas yet bai i givim amamas long yumi. Yumi mas klia long dispela. Jisas em i rot i go long laip. Em i rot bilong amamas. Dispela em i laip tru. Stap wantaim Krais i olsem laip tru. Olsem na bel bilong yumi ken amamas moa yet.
Em i tru olgeta: dispela laip i pulap long amamas, na bihain long dispela laip, dispela amamas bilong yumi bai i go antap moa yet.
SAMPELA TINGTING
Yu pilim dispela amamas bilong stap wantaim Krais long laip bilong yu?
Buk Song 14
Ol longlong man i save tok long ol yet olsem, ‘I no gat God i stap’...I no gat wanpela bilong ol i save mekim gutpela pasin. Nogat tru. – Buk Song 14:1,3
Ol longlong man ol i no save tingting long God. Ol i tok, “I no gat God i stap.” Bel bilong ol i paul olgeta. Ol i pulap long sin; ol i save mekim kain kain pasin nogut. Kain olsem bilip i gat ol gutpela kaikai bilong en, ol lain i no bilip i save kamapim ol kaikai nogut. Taim man i no pas wantaim God, em bai i mekim ol pasin nogut. Na em i tru, sampela lain i no bilip ol bai
i mekim sampela ol gutpela samting tu, tasol yumi ken tok olsem, taim ol manmeri i wok long stap longwe tru long God, pasin nogut bilong dispela lain bai i kamap bikpela moa, na ol tumbuna bilong ol bai mekim planti moa pasin nogut, ol pasin God yet i no laikim.
I luk olsem dispela Buk Song i wok long tok nogut long ol lain i no bilip. “Bikpela i stap long heven na i lukluk i go daun long ol manmeri. Em i laik painim sampela man i gat gutpela save na ol i wok long painim God. Tasol nogat.” I olsem King bilong heven na graun i lukluk i go daun long ol lain i no bilip.
Tasol yumi mas ritim sampela moa tok long dispela Buk Song. God em i lukluk long yumi tu: “Olgeta i lusim gutpela rot pinis. Olgeta i wankain tasol, ol i man nogut tru. I no gat wanpela bilong ol i save mekim gutpela pasin. Nogat tru.” Man i raitim dispela Buk Song i soim yumi olsem, long ai bilong God olgeta manmeri i pulap long sin.
Na Pol, long Rom 3, i gat dispela kain tingting tu. Em i autim dispela Buk Song long putim ples klia olsem olgeta manmeri long dispela graun i pulap long sin, na olgeta i nidim gutnius bilong Jisas Krais. Yumi olgeta i sin lain stret!
Yumi no ken amamas long belhat bilong God long ol longlong man i no bilip, bikos yumi olgeta i no save mekim gutpela pasin. Olsem na, man i raitim dispela Buk Song i tok, “Mi laikim tumas bai God i salim wanpela man bilong Saion i kam bilong kisim bek ol Israel.”
Olsem na Matyu 1:21 i tok, “Bai em i karim pikinini man, na yu mas kolim nem bilong en Jisas, long wanem, em bai i lusim sin bilong ol manmeri bilong en na kisim bek ol.” Olgeta manmeri bilong dispela graun i nidim Jisas long kisim bek ol long sin bilong ol. Olgeta!
SAMPELA TINGTING
Tingting long ol sin bilong yu yet, na tok tenkyu long God bikos em i salim Jisas long kisim bek ol manmeri bilong em.
Buk Song 13
Bikpela, wanem taim bai yu tingim mi gen? Ating yu lus tingting long mi inap oltaim, oltaim, a?...Tasol mi bilip bai yu marimari long mi oltaim. – Buk Song 13:1,5
Fopela taim Devit i autim dispela tok long God: “Wanem taim?” Em i autim dispela tok bikos em i ting olsem God yet i lus tingting long em. I olsem God i haitim pes bilong em yet long Devit. Em i no rausim pen bilong Devit, na em i larim Devit i stap aninit long ol birua bilong em. “Wanem taim, Bikpela?”
Ating yu yet yu bin autim dispela tok long God, “Wanem taim?” Sapos nogat, nogut yu no klia long ol promis bilong God. God yet i tok olsem em yet bai harim olgeta krai bilong yumi. Em i promisim yumi olsem em bai apim ol lain bilong em; taim yumi paitim dua em bai opim long yumi; taim yumi wok long painim samting, yumi bai lukim. Kingdom bilong God i kamap klostu nau. Wanem taim?
Pasin bilong wet, em i bikpela samting long laip bilong ol Kristen. Em i no wankain olsem taim yumi i wetim dokta long haus sik o taim yumi wetim bas long taun. Nogat, yumi wetim God. Yumi mekim wok long dispela graun bikos yumi wetim em, bikos yumi bilip olsem em bai inapim olgeta promis bilong em.
Taim yumi i krai, “Wanem taim?” i olsem yumi les long wet. Na nogut sampela daut i stap long bel bilong yumi tu: God em i sori yet long yumi, o nogat? God em i harim ol krai bilong yumi, o nogat? Em bai i kam, o nogat?
Dispela pasin bilong daut i bin i stap longpela taim – taim Devit i raitim dispela Buk Song, daut i stap tu. Olgeta bilip lain i bin dautim promis bilong God sampela taim.
Em i orait long yumi i autim dispela daut, tasol wantu yumi mas wok long bekim dispela daut. Wantaim bilip yumi mas bekim dispela daut. Bilip i wok long paitim daut. Bilip bai tok, “Mi trustim God olgeta taim, long taim bilong tudak tu. Sapos em i no kam hariap, em olsem em i mekim sampela gutpela samting moa long mi.”
Em i tru olsem planti ol Kristen lain i gat sampela daut, tasol pasin bilong dautim God em
i longlong tru. I gat planti ol liklik sik long dispela graun olsem liklik kus, tasol maski olsem planti lain i save kisim kus, em i wanpela sik yet. Kain olsem, pasin bilong daut em i sin, maski olgeta Kristen lain i save mekim olsem, na yumi mas wok strong long rauism dispela daut long bel bilong yumi. Dispela Buk Song tu i pinis long bilip: “Tasol mi bilip bai yu marimari long mi oltaim.”
SAMPELA TINGTING
Yu gat sampela daut long bel bilong yu? Wanem samting i save strongim yu?
Buk Song 12
Olgeta man i save giaman long ol arapela man. Ol i save tok gris long ol na trikim ol...Tok bilong God i tru olgeta. – Buk Song 12:2,6
Planti tok bilong yumi ol man em i tok nogut, na God i belhat long ol dispela tok. Dispela Buk Song i stori long kain kain tok nogut: giaman; dispela tok i no tru, na tok gris; dispela tok i wok long grisim ol arapela man, maski em i tru o nogat.
Tok giaman i wok long bosim olgeta lain long dispela graun. Tok giaman i wok long bagarapim yumi na yumi i no inap wanbel wantaim ol arapela. Yumi no inap bilipim ol arapela.
Pasin bilong bagarapim tok i bin kamapim planti hevi long taim bilong Devit. Tasol long tude, hevi bilong dispela sin i wok long kamap bikpela moa yet. Planti tok i save raunim yumi, tasol planti bilong ol dispela tok i tok giaman tasol. Long internet, long niuspepa, long radio, na long tv yumi save harim planti ol giaman tok. God i makim pasin bilong toktok olsem rot yumi ken yusim bilong helpim yumi i stori wantaim ol arapela, tasol ol man i wok long bagarapim toktok. Ol i wok long tok giaman, long grisim ol man long tok bilong ol, long apim nem bilong ol yet. Gavman i wok long mekim olsem, ol jas i wok long mekim olsem, ol sumatin i wok long mekim olsem, ol tisa i wok long mekim olsem na ol polis tu i wok long mekim olsem. Tarangu, iven sampela pasto i mekim olsem tu.
Jems 3:8 i tok, “Tasol i no gat wanpela man inap long bosim maus bilong em yet. Nogat. Oltaim maus i save kirap nabaut na mekim tok nogut. I olsem marasin bilong kilim man i dai i pulap long maus bilong yumi.” Em i hat tru long ol Kristen lain long bosim gut maus na tok bilong ol tu. Tasol yumi mas tok “yes” na “nogat” tasol. Em inap. Ol lain bilong God i mas les long tok giaman!
Maski ol lain bilong dispela graun i wok long tok giaman na tok gris, yumi yet i ken kisim gutpela save long pasin bilong God bikos tok bilong God em i tru na tru olgeta!
SAMPELA TINGTING
Em i hat long bosim gut maus bilong yu yet, o nogat? Yu save les long tok giaman o nogat?
Buk Song 9:11-20
Bikpela, yu mas mekim ol i pret nogut. Yu mas mekim ol lain manmeri i pilim olsem ol i sam- ting nating tasol. – Buk Song 9:20
Sapos ol man bilong dispela graun i laik i stap bel isi na sindaun gut, ol i mas bihainim stret ol gutpela pasin. Na bikpela samting insait long ol dispela gutpela pasin i olsem: Ol i mas save olsem God yet i bosim ol na em i antap tru, na ol yet i aninit long em. “Bikpela, yu mas mekim ol i pret nogut. Yu mas mekim ol lain manmeri i pilim olsem ol i samting nating tasol.”
Dispela tok em i olsem prea long kisim gutpela sindaun na bel isi i kam long dispela graun. Gutpela taim o bel isi i save kamap taim man i binhaimim stret ol gutpela pasin tasol. “God i save mekim stret olgeta wok bilong em. Em i no save mekim ol samting i paul nabaut” (1 Korin 14:33).
Dispela kingdom bilong dispela Mesaia em i kingdom bilong kisim gutpela taim na stap
bel isi. Tasol God i makim dispela taim olsem taim bilong lotuim God, na long laikim tru ol arapela. Na no ken lotuim ol narapela samting – ol dispela samting i stap bilong yusim tasol, na i no bilong lotuim. Dispela em i pasin bilong bihainim stret ol gutpela pasin; dispela em i pasin bilong kisim gutpela sindaun na stap bel isi.
Yumi no inap kisim dispela sindaun gut o stap bel isi tru inap long taim olgeta lain bilong dispela graun i wok long bihainim stret ol gutpela pasin God yet i makim. Olgeta manmeri long dispela graun i mas klia olsem ol i man tasol, na God em i God!
Pasin bilong litimapim nem bilong yumi yet na pasin bikhet em i save kamapim planti sin. Sapos yumi les long brukim skru long God na aninit long em, i olsem yumi i bikhet stret. Maski yu save mekim gutpela pasin, sapos yu no brukim skru long God i olsem yu bikhet na yu bai i go long hel. Yumi man, yumi i samting nating tasol.
Tasol pasin bilong daunim yumi yet na aninit long Bikpela em i narakain samting olgeta. Em i olsem dua i op i go long God. Olsem na sampela taim ol yangpela pikinini inap long painim God na lukim em, tasol ol bikman nogat.
Tasol God i wok long daunim olgeta lain bilong dispela graun bilong ol i ken aninit long em. Em i wok bilong God yet. Na em i narakain wok stret: Man i pundaun long sin bikos em i gat laik long kamap wankain olsem God. Na bihain God i kam long yumi na kisim bek yumi long wok bilong Krais – taim God yet i kamap olsem man long dispela graun. Na rot bilong kisim bel isi na gutpela taim stret, em i rot i go long wanpela bebi – dispela bebi long Betlehem
– Jisas Krais! Olgeta lain bilong dispela graun, ol i wok long litimapim nem bilong ol yet, ol i mas kam long dispela bebi na brukim skru long em na lotuim em. Long dispela rot tasol bai yumi kisim bel isi stret insait long kingdom bilong God.
SAMPELA TINGTING
Askim God long helpim yu long daunim yu yet na aninit long em tasol.
Buk Song 8
Mipela man i wanem samting na yu save tingting long mipela? Mipela i samting nating...yu putim mipela i stap aninit long yu wanpela tasol. – Buk Song 8:4-5
Wanpela man i holim kamera na em i stap antap long wanpela bikpela maunten stret. Yu yet yu wokabaut daunbilo tru long ples bilong yu, longwe tru long em. Na sapos em i kisim piksa long yu, yu bai luk olsem wanpela liklik anis tasol. Tasol sapos yu yet yu sanap klostu long em antap long dispela maunten na em i kisim piksa long yu, bai i luk olsem yu bikpela stret na bikpela moa long ol liklik samting daunbilo tru long maunten. Olsem na, long namba wan piksa i luk olsem yu liklik tru, na long namba tu piksa i luk olsem yu bikpela tru.
Na dispela em i kain olsem yumi ol man, taim Buk Baibel i stori long yumi: Ol man i liklik tru – tasol ol i bikpela tru tu. Taim yu tingting long wanem samting i stap antap long man, i olsem man em i liklik tasol. Tasol God i putim olgeta samting i stap aninit long man. Taim yumi tingting long wanem samting God i putim aninit long man, i olsem man em i bikpela stret.
Olsem na, taim yumi harim wanpela man i apim nem bilong em yet, yumi mas tingting long wanem samting i stap antap long em. Yumi mas tingting long glori bilong God o long skai em i bikpela tru, na yumi bai klia olsem dispela man em i liklik tasol. Na yumi mas les long dispela pasin. Man em i samting nating – bilong wanem na em i apim nem bilong em yet?
Tasol taim yumi lukim ol man i lotuim ol samting bilong dispela graun – olsem mani, o kago, o biknem bilong ol yet – yumi mas les long dispela pasin tu. Man em i bikpela. God yet i putim em aninit long em yet tasol. Tasol taim ol man i lotuim ol narapela samting, na ol i no lotuim God, em i olsem ol i wokboi nating long ol samting bilong dispela graun, na yumi mas sori long ol.
Olsem na yumi mas wok long bihainim rot Buk Baibel i bihainim taim yumi tingting long man em i husat. Na yumi mas wok long bihainim tok bilong God taim yumi mekim wok long dispela graun.
Yumi stap aninit long dispela God em i holi na em i gat olgeta strong. Olsem na yumi i liklik tasol. Yumi stap laip long marimari bilong em tasol, na em yet i givim olgeta samting long yumi. Yumi no gat rait long kamapim ol lo bilong yumi yet. Yumi nidim Holi Spirit bilong bihainim ol lo bilong God. Na tu, ol lain bilong Bikpela, ol i bikpela samting stret. Ol i pikinini bilong God yet, olsem na ol i no ken kamap olsem wokboi nating bilong ol samting i stap long dispela graun.
SAMPELA TINGTING
Ritim lain 4 na 5 long dispela Buk Song gen, na autim dispela tok olsem prea bilong yu i go long God.
Buk Song 6
Ol man i dai pinis, ol i no save tingim yu. Long ples ol i stap long en, ol i no save givim biknem long yu. – Buk Song 6:5
Taim dispela man i raitim Buk Song 6, em i gat bikpela hevi stret; em i pilim olsem klostu em bai dai. Tasol em i askim God long oraitim em bikos long ples bilong dai ol man i no save tingim God o givim biknem long em.
Long dispela prea bilong em, dispela man i soim klia olsem em i save long wanpela samting: yumi stap laip bilong presim God tasol. Glori bilong God em i nambawan samting long laip bilong yumi. Tasol sapos yumi i dai pinis, hau bai yumi autim tok, singsing, na presim God? Olsem na man i raitim dispela buk song, em i laik stap laip yet bilong litimapim nem bilong God.
Nogut yumi tok, “Aiyo, dispela man em i paul olgeta long taim bilong dai.” Pastaim yumi mas save olsem em i tok stret long taim bilong stap laip. Man i raitim dispela Buk Song, em i save olsem pasin bilong stap laip i bilong presim God; olsem na em i les long dai. Ol Kristen lain i no ken lus tingting olsem dai em i birua bilong yumi na birua bilong God tu. I no olsem taim bilong dai tasol i makim taim bilong kirapim ol singsing bilong presim God. Dispela tingting em i paul bikos nau em i taim bilong presim God, taim yumi stap laip yet.
Yumi mas klia, sapos dispela man i raitim Buk Song 6 i harim olsem Jisas yet i kirap bek long matmat long de namba tri, em bai i tok, “Hallelujah! Pasin bilong presim God bai i go i go nau, bikos laip bai i go i go na stap oltaim oltaim.”Tasol em i no save olsem Krais bai i kirap bek long matmat. Tasol yumi save, bikos Jisas i kam pinis na em i wok long strongim sios bilong em i stap. Na Krais i tok olsem em i winim dai, na pawa bilong hel na dai i no inap bagarapim sios bilong em.
Sios bilong God i sanap long dispela wok bilong Krais bilong kirap bek long matmat. Olsem na yumi no ken pret moa long dai, na yumi no ken ting olsem dai bai pinisim ol singsing bilong presim God. Nogat. Pastaim yumi mas save olsem yumi stap laip bilong presim God. Dispela em i nambawan samting long stap laip long dispela graun. Na taim yumi klia long dispela samting, orait yumi no ken pret long dai!
SAMPELA TINGTING
Sapos yu save olsem klostu bai yu dai, bai yu askim God long larim yu i stap laip yet? Bilong wanem?
Buk Song 2
“Nau bai mi autim tok BIkpela i bin givim mi....’Yu Pikinini bilong mi...Askim mi, na bai mi givim olgeta lain manmeri long yu, na bai yu bosim olgeta hap bilong graun.’” – Buk Song 2:7-8
Sampela taim yumi i mekim sampela samting i kranki olgeta. Tasol long taim yumi i mekim dispela samting, yumi ting em i gutpela samting long mekim. Tasol sampela yia bihain, taim yumi tingting gen long dispela samting yumi bin mekim pinis, bai yumi klia olsem yumi mekim kranki pasin.
Taim tupela marit i pait i stap, ol arapela lain bai lukim ol na tok, “Watpo na tupela i pait? Tupela i longlong pinis.”Tasol dispela tupela i pait i stap, ol i no ting olsem ol i mekim longlong pasin. Ol i belkros tasol, olsem na ol i pait. Ol arapela tasol i klia olsem dispela em
i longlong pasin. Taim yu tingting long taim bipo, o taim yu lukim pasin ol arapela i mekim, em nau olgeta samting i kamap ples klia long tingting bilong yu, na yu bai klia sapos dispela pasin i gutpela o nogat.
Orait sapos yumi man inap lukim sampela samting olsem, ating God tu i klia olgeta long wanem samting ol man na ol meri long dispela graun i wok long mekim, a? Taim em i lukluk i kam daun long ol lain bilong dispela graun, em i save olsem ol i mekim planti longlong pasin: “God i sindaun long sia king bilong en long heven, na em i lap na tok bilas long ol.”
Dispela Buk Song i putim ples klia olsem God bai salim Mesaia bilong em long stretim ol man i bikhet tru. Olsem na, God i tokim ol king bilong dispela graun long aninit long Pikinini bilong em. Sapos nogat, em bai brukim ol i go liklik liklik, olsem man i brukim sospen graun.
Jisas em i dispela Mesaia. Taim mama Maria i karim em long Betlehem, em i no luk olsem wanpela strongpela hetman. Na taim em i dai long diwai kros, em i no luk olsem em inap long bosim ol king bilong dispela graun. Tasol God i tok, “Yu Pikinini bilong mi...Askim mi, na bai mi givim olgeta lain manmeri long yu, na bai yu bosim olgeta hap bilong graun.”
Tude, pawa bilong Jisas i winim pawa bilong ol arapela. Yumi olgeta i stap aninit long em. Sapos yumi givim baksait long em o yumi les long em, i luk olsem yumi i longlong olgeta. Yupela ol lain bilong graun, yupela putim gut yau bilong yupela, na stretim pasin bilong yupela! Yupela ol hetman bilong graun, yupela harim dispela tok na yupela lukaut! Yupela i mas pret long God na aninit long em. Brukim skru long em o bai yu dai!
Olgeta nesen long dispela graun bai brukim skru long God, na God bai i yusim gutnius bilong Krais long mekim dispela samting i kamap. Gutnius em i stori bilong laikim tru bilong God. Ol lain i givim baksait long dispela laikim tru bilong God ol bai bungim belhat bilong em. Bai yumi mekim wanem?
SAMPELA TINGTING
Dispela Buk Song i givim wanem kain piksa long God long yumi?
Buk Song 1
Dispela man i olsem diwai ol man i bin planim klostu long wara....Ol man nogut i no olsem. Nogat tru. Ol i olsem skin rais win i save rausim i go. – Buk Song 1:3-4
Ol Buk Song i putim ples klia olsem ol lain i stap stretpela, em ol i ken amamas. Ol lain long dispela graun bai tok, “Ol lain i gat planti mani, em ol i ken amamas, na ol lain i gat bikpela save tru, em ol i ken amamas.” Na sampela Kristen lain bai singim, “Sapos God i kisim bek yu, orait yu yet i ken amamas.” Tasol Buk Song 1 i tok olsem, “God i amamas tru long pasin bilong ol stretpela man.”
Ol lain i bihainim tok bilong God long laip bilong ol, em ol yet bai i amamas tru! Ol i no save “bihainim tok bilong ol man nogut,” na ol i “no save wokabaut long rot bilong ol man bilong mekim sin,” na ol i “no save sindaun wantaim ol man bilong tok bilas long God.” Nogat. Ol i wok long bihainim ol stretpela pasin tasol. Long de na long nait, bel bilong ol i lukluk i go long God, kain olsem wanpela kompas i save poinim i go long not. Ol i no save bihainim ol stretpela pasin bikos God i tokim ol long mekim olsem tasol; nogat, long bel bilong ol stret, ol laikim lo bilong God.
Long stap stretpela long dispela graun, ol man i mas kamap nupela long Spirit bilong God, na blut bilong Krais i mas wasim ol tu!
Yumi inap lainim planti samting long ol tumbuna bilong Olpela Kontrak. I no olsem ol bilip lain bai kisim laip taim ol i go long heven tasol. Na i no olsem ol lain i no bilip bai bungim pe bilong dai long hel tasol. Nogat. Ol tumbuna long Olpela Kontrak i klia olsem: ol stretpela man i kisim laip long nau, taim ol i stap long dispela graun yet, na ol man nogut i stap olsem daiman long dispela graun. Tupela samting i tru tasol: Man i stap olsem diwai man i bin planim klostu long wara, o man i stap olsem skin rais win i save rausim i go. Em tasol.
“Man i no save wokabaut long rot bilong ol man bilong mekim sin, em i ken amamas tru.” Dispela man i stap laip tru! Ol i olsem diwai i gat planti kaikai tru. Tasol ol man nogut i olsem skin rais. Na win bilong God bai i rausim em i go longwe.
SAMPELA TINGTING
Yu pilim olsem yu yet i gat dispela kain amamas olsem dispela man i mekim stretpela pasin, o nogat?
1 Pita 5:6-11
God em i as bilong olgeta marimari. Em i bin singautim yupela long Krais Jisas, bai yupela i ken i stap wantaim em long gutpela lait bilong en i stap oltaim. Olsem na bai yupela i karim pen sotpela taim tasol, na bihain bai em yet i mekim yupela i orait gen, na strongim bilip bilong yupela na mekim yupela i sanap strong oltaim. – 1 Pita 5:10
God i bin singautim yumi long stap wantaim em long gutpela lait bilong en i stap oltaim; em i no singautim yumi long karim pen olgeta taim. Yumi karim pen olsem wanpela rot yumi mas wokabaut long em long kamap long gutpela ples.
Bai yumi karim pen sotpela taim tasol, na bihain bai yumi stap gut oltaim oltaim. Bilong wanem Buk Baibel i tok olsem mipela bai karim pen “sotpela taim tasol”? Namba wan samting i olsem: Laip long dispela nupela graun bai i stap oltaim oltaim, olsem na long dispela graun bilong tude, taim em i sotpela tasol. I kain olsem: taim mama i karim pikinini pinis, wantu em i lus tingting long pen em i karim pinis. Na i kain olsem taim Jekop i wok 7-pela yia bilong kisim Resel, na em i pilim olsem dispela 7-pela yia em i samting nating, olsem tripela o fopela de tasol (Stat 29:20). Na wankain olsem, ol pen yumi bai karim long dispela graun em i sotpela taim tasol, long wanem, yumi wetim dispela laip i stap gutpela tru oltaim oltaim.
Na narapela samting i olsem. Long dispela tok “sotpela taim tasol,” God i laik putim ples klia olsem em bai strongim yumi inap long taim dispela taim i pinis. God i makim pinis taim bilong pinisim dispela taim bilong pen. Wantu dispela pen bai pinis, na yumi bai klia olsem em i sotpela taim tasol.
Na yumi klia, dispela God husat i singautim yumi em i God bilong marimari. Long marimari tasol, em i singautim yumi, na tu, em i marimari long yumi bilong strongim yumi long taim bilong karim pen. Olsem na, yumi inap tok, “God em i as bilong olgeta marimari.” Marimari bilong God bai strongim yumi olgeta taim. God yet bai mekim yumi orait gen, na strongim bilip bilong yumi na mekim yumi sanap strong oltaim. Pita, husat i raitim dispela tok, i save olsem yumi nidim dispela marimari bilong God long stap strong taim yumi harim singaut bilong God long bihainim em na karim diwai kros bilong yumi.
Dispela rot i go long glori, we yumi bai i stap oltaim wantaim God long gutpela lait bilong en. Yumi no inap save gut long dispela samting. Tasol yumi inap long klia olsem dispela samting bai winim olgeta samting yumi bin lukim long dispela graun. Yumi no inap karim pen moa, na yumi bai stap gut tru wantaim God yet.
Orait, yumi mas karim pen sotpela taim tasol, na bihain bai yumi i lukim dispela glori!
SAMPELA TINGTING
Ritim dispela lain (lain 10) gen na tok tenkyu long dispela God bilong olgeta marimari, na litimapim nem bilong em.
Rom 8:18 – 25
Yumi save, olgeta samting God i bin wokim, olgeta i pilim pen olsem meri i laik karim pikinini...Na i no dispela ol samting tasol i krai. Nogat. Yumi tu i save krai. Yumi kisim Holi Spirit pinis, em olsem namba wan presen God i givim yumi. Tasol yumi tu i save pilim pen na i krai... – Rom 8:22-23
Pasin bilong karim pen em i stap long olgeta hap long dispela gruan. Olgeta haus na olgeta manmeri i save pilim pen. Tasol i no man na meri tasol i pilim dispela pen. Nogat. Olgeta samting God i wokim i pilim pen olsem meri i laik karim pikinini.
Ol lain bilong God i mas mekim wok long dispela graun, maski Buk Baibel i tok olsem ol i stap lain manmeri tru bilong dispela nupela graun bai i kamap. Yumi i stap long dispela graun, tasol yumi no lain tru bilong dispela graun.
Yumi kisim Holi Spirit pinis, em olsem namba wan presen God i givim yumi. Tasol planti moa presen bai i kam. Em i olsem liklik hap tasol long olgeta samting yumi bai kisim bihain long dispela nupela graun.
Dispela Holi Spirit yumi kisim pinis i save stap long ol lain bilong God tasol. Na em i olsem wanpela hap samting yumi kisim bilong helpim yumi long save wanem samting yumi bai kisim bihain, long dispela nupela graun.
Pasin bilong karim pen bilong yumi ol Kristen i narakain olsem pen bilong ol arapela lain long dispela graun. Ol lain i no save long dispela nupela graun bai i kamap, ol i no kisim Holi Spirit pinis, ol i no wari tumas long sin, na planti ol arapela kain samting nogut i no save givim bikpela pen long ol.
Tasol sios bilong God i kisim Spirit bilong God pinis, olsem na ol i kisim liklik hap bilong dispela nupela laip na dispela nupela graun pinis. Olsem na, ol lain bilong sios i no inap amamas tru long dispela graun na laip bilong tude. Olgeta samting i wok long krai, tasol krai bilong yumi i winim krai bilong ol arapela. Olgeta lain long dispela graun i gat laik long kisim ol gutpela samting i kam, na ol Kristen lain tasol i save long dispela gutpela samting tru bai i kamap bihain.
Sios tasol i klia long as bilong ol dispela pen olgeta samting long dispela graun i save pilim olsem mama i karim pikinini. Ol Kristen tasol i save olsem dispela pen i kamap bikos dispela nupela graun i wok long kam. Sios bilong God inap autim dispela tok: Maski dispela pen i bikpela stret, dispela nupela laip bai i kam. Dispela pen i soim yumi olsem dispela nupela de i kamap klostu nau.
SAMPELA TINGTING
Dispela teks long Buk Baibel inap helpim yu long taim bilong karim pen, o nogat?
Rom 8:12-17
Sapos nau yumi karim pen olsem em i bin karim, orait bihain bai yumi kisim biknem na gutpela sindaun tru wantaim em. – Rom 8:17
Sapos yumi no tingting long karim pen olsem Krais i bin karim, yumi mas senisim kranki tingting bilong yumi hariap. Long hia Buk Baibel i tok olsem yumi ol Kristen i mas karim pen pastaim, na bihain bai yumi kisim biknem na gutpela sindaun tru wantaim Krais.
Yumi no ken lus tingting long dispela tok, “Karim pen olsem em i bin karim.” I no olsem long wok bilong yumi yet bai yumi kisim dispela laip i stap oltaim oltaim. Nogat. Diwai kros bilong Krais tasol i kisim bek yumi. Tasol sapos yumi laik stap wantaim Krais oltaim oltaim, yumi mas karim pen wantaim Krais tu.
Em i narakain samting tru olsem dispela King bilong Israel i kam olsem wokboi nating long dispela graun na em i dai long wanpela diwai kros. Dispela Pikinini bilong God i daunim em yet aninit long ol lo bilong Papa bilong em. Em i no bihain sotkat rot Satan i soim em. Na em i no bihainim rot ol pren bilong em i makim bilong bihainim. Em i no abrusim ol pen na hevi. Nogat, em i bihainim rot Papa God yet i makim bilong em i mas bihainim.
Na olgeta man o meri i laik pas wantaim Krais i mas bihainim dispela rot tu: diwai kros pastaim na hat bilong king bihain. Na nau sios bilong Krais i stap long dispela taim bilong diwai kros.
I no olsem Spirit i kam pinis long sios olsem na ol pen na hevi i no stap moa. Nogat. Spirit i no kam bilong rausim diwai kros bilong yumi. Em i kam bilong givim strong long yumi long karim diwai kros bilong yumi.
Na i no olsem sios em i samting bilong kisim yumi i go long heven. Nogat tru. Sios em i ples we ol lain bilong Jisas Krais i save bung. Ol i stap laip wantaim Krais. Taim ol i wokim plen, ol
i mekim olsem wantaim Krais; wanem samting ol i mekim, ol i mekim olsem wantaim Krais. Sapos ol i stap laip, orait ol i stap wantaim Krais. Na sapos ol i dai, orait ol bai i kisim gutpela samting tru. Ol i karim pen wantaim Krais, na bihain ol bai i kisim biknem na gutpela sindaun tru wantaim em tu.
SAMPELA TINGTING
Yu yet save karim pen Krais yet i bin karim?
Kolosi 1:24
Nau mi amamas long karim pen bilong helpim yupela. Na mi laik helpim sios bilong Krais, em bodi bilong em yet. Pen Krais i karim bilong helpim sios, em i no pinis yet. Na long pen mi karim long bodi bilong mi yet, mi laik inapim dispela pen bilong Krais. – Kolosi 1:24
Kingdom bilong God i wok long kam. Dispela em i wanpela bikpela samting tumas, na yumi i gat hap wok long mekim bilong mekim dispela samting i kamap.
Em i tru, King tasol inap kisim dispela kingdom i kam. Tasol em bai i yusim yumi long mekim olsem tu. Na em i tru olsem Krais i karim pen long yumi. Tasol em i save yusim yumi long inapim dispela pen em i bin karim tu.
Taim yumi karim dispela pen, i no olsem yumi wok long kisim bek yumi yet. Nogat tru! Jisas i tok, “Em i pinis nau,” taim em i dai long diwai kros. Na as bilong laip bilong yumi em i dispela wok Krais yet i pinisim. Tasol Krais i givim narapela wok long yumi long mekim, wok bilong autim tok bilong Krais.
Na Krais bai helpim yumi long mekim dispela wok. Taim yumi no gat strong, em yet bai strongim yumi, na em bai bagarapim ol birua bilong yumi. Na em i save yusim ol samting bilong yumi tu, olsem maus na han na mani bilong yumi. Long han bilong yumi, em yet bai tasim ol arapela manmeri. Bel bilong em i stap insait long sios bilong em. Spirit bilong em i kapsait long sios na i go long ol arapela. Na pen bilong Krais i save pulap long bel bilong ol Kristen tu.
Wok i stap bilong bagarapim strong bilong Satan. Long pawa bilong Spirit bilong God, dispela samting bai kamap, tasol dispela wok bai givim bikpela pen long ol Kristen. Ol Kristen i mas mekim bikpela wok stret, na ai wara bilong ol bai pundaun taim ol i mekim wok long autim tok bilong God. Ol Kristen i mas karim pen na givim bel long ol arapela, bai ol arapela i ken bihainim Bikpela tu.
Na ol Kristen i mas karim dispela pen bipo long taim dispela kingdom bilong God inap long kam. I olsem ol Kristen i mas karim olgeta pen God i makim pinis bilong ol i mas karim, na taim ol inapim dispela mak pinis, orait kingdom bilong God bai i kam.
I no gat wanpela amamas i winim dispela amamas bilong inapim dispela pasin bilong karim pen bilong Krais. Na i no gat wanpela samting i winim dispela wok tu. Krais bai i yusim laip na i dai bilong ol disaipel bilong em bilong kamapim kingdom bilong en. Na bihain, em bai tok namba tu taim, “Em i pinis nau!”
SAMPELA TINGTING
“I no gat wanpela amamas i winim dispela amamas bilong inapim dispela pasin bilong karim pen bilong Krais. Na i no gat wanpela samting i winim dispela wok tu.”Dispela em i tru insait long laip bilong yu yet, a?
Filipai 3:3-11
Mi laik save tru long Krais...Krais i bin kirap bek long matmat, na em i gat bikpela strong, na mi laik save tru long dispela strong bilong em. Mi laik poromanim em long pasin bilong karim pen. – Filipai 3:10
Em i narakain samting tru, a, long save tru long Krais, na long save tru long strong bilong em, na long poromanim em long pasin bilong karim pen? Ating sapos yumi gat strong bilong Krais long laip bilong yumi, orait bai pen na hevi bilong yumi i pinis, a, na yumi bai i gat laip tru na amamas tasol, a?
Nogat tru. Taim yumi yet i kirap long matmat bai yumi i kisim laip tru na amamas tasol oltaim oltaim. Tasol, Pol i tok, dispela samting i no kamap yet long yumi.
Olgeta Kristen i mas wok strong long save tru long Krais. Yumi bai save moa long em taim yumi wanbel wantaim em long bilip. Na yumi poromanim em long dai bilong em na long kirap bek long matmat bilong em tu. Long dai bilong Jisas em i kisim bek yumi long hevi bilong sin, na long taim em i kirap bek long matmat, em i givim nupela laip long yumi long pawa bilong Holi Spirit.
Taim yumi kisim dispela nupela laip pinis, orait wantu bai yumi poromanim Krais long karim pen tu. Pen bilong em i no wankain olsem pen bilong ol lain i no bilip long em. Nogat. Em i narakain pen – ol lain bilong Krais tasol i save karim dispela pen.
Taim yumi no save tru long Krais, yumi no save wari tumas long pasin bilong ol arapela. Tasol nau yumi save olsem i gat wanpela rot i go long laip tasol, na olgeta arapela rot bai i go long hel. Taim yumi no save tru long Krais, ol narapela samting i save givim amamas long yumi. Nau, dispela ol samting i no save kirapim bel bilong yumi.
Na tu, ol lain i no save long Krais, ol i gat ol narapela kain hevi olsem yumi. Nau yumi lusim pinis planti ol hevi na wari ol arapela lain i save gat. Tasol nau yumi, ol lain husat i save tru long Krais, yumi kisim ol nupela hevi na pen pinis, na ol lain i no bilip long Krais, ol i no klia long ol dispela hevi na pen bilong yumi.
Taim yumi kisim tok bilong Bikpela, bai yumi mekim wok bilong em tu. Em i naispela samting tru long kisim strong bilong Krais long laip bilong yu. Tasol yu mas poromanim Krais long pasin bilong karim pen tu!
SAMPELA TINGTING
Wanem ol hevi i lus pinis bikos yu save tru long Krais? Na wanem ol nupela hevi i save kam long yu bikos yu pas wantaim Krais?
Rom 9:1-5
Oltaim mi save bel sori tru, na mi save wari na tingting planti. – Rom 9:2
Pol tu i autim dispela kain sori bilong God na Krais taim em i tok, “Oltaim mi save bel sori tru, na mi save wari na tingting planti.” I luk olsem Pol i no tok stret – hau na em bai i bel sori tru OLTAIM? Tasol long lain wan em i putim ples klia olsem em i tok tru long nem bilong Krais. Em i no giaman. Holi Spirit i mekim tingting bilong em i klia, na long bel bilong en, em i save olsem dispela tok bilong em em i tru. Na em i tokaut long as bilong sori na wari bilong em: ol brata na susa bilong em i givim baksait long Jisas Krais!
Yumi klia, taim Krais i singautim yumi long bihainim em, na yumi bekim, orait bai yumi bungim ol hevi na sori. Tasol tu, amamas bilong yumi bai winim olgeta arapela kain amamas long dispela graun. Long dispela nupela amamas bai yumi bungim narapela kain hevi na sori tu.
I gat planti ol as bilong sori bilong yumi. Tasol as bilong ol dispela sori em i dispela samting: Yumi kisim dispela sori bilong God taim yumi kisim dispela laikim tru bilong God.
Olgeta laikim tru i save kisim pen i kam wantaim. Ol lain i les long bungim pen, ol i mas wok long abrusim laikim tru. Sapos yu laikim tru meri bilong yu, pen bilong em yet bai kam long bel bilong yu tu. Na sapos yu kisim pinis laikim tru bilong God, orait bai yu pilim hevi na sori bilong God taim yu lukim sin o wanpela man i mekim sin.
I no olsem laikim tru bilong God i stap longwe long yumi. Sapos God yet i kam long bel na lewa bilong yumi, orait God i stap klostu tru long yumi. “God i givim pinis Holi Spirit long yumi, na pasin bilong God bilong laikim tru ol man, em Holi Spirit i bin kapsaitim long bel bilong yumi” (Rom 5:5).
Taim Bikpela i kam insait long bel bilong yumi pinis, bai yumi wanbel wantaim em: wanem samting em i les long em, bai yumi tu les long em; na wanem samting em yet i laikim tru, em bai yumi laikim tru tu.
SAMPELA TINGTING
Yu yet yu bin pilim dispela sori bilong God?
Matyu 23:37-39
Jerusalem, Jerusalem...Planti taim moa mi laik bungim ol pikinini bilong yu, olsem kakaruk meri i save bungim ol pikinini bilong en aninit long wing bilong en. Tasol yupela i no laik. – Matyu 23:37
Sori bilong God long ol pikinini i bin ranawe long en em i bikpela tru, olsem na em i kam long painim ol na long kisim ol i kam bek long em.
God i kam long yumi long Jisas Krais. Jisas em i no olsem wanpela man i bin kam bilong makim rot bilong yumi long kamap long God tasol. Nogat, Jisas i kam long God na em yet i dispela rot.
Long Jisas Krais, God i kam long painim na kisim bek wanem samting em i lus. Na pastaim God i wok long painim pikinini bilong em, Israel, bikos em i bin mekim bikpela wok long lukautim na laikim tru Israel.
God i singautim Israel, na em i wok strong tru long painim em na kisim em i kam bek. Olsem na Jisas i autim dispela tok, “Jerusalem, Jerusalem...Planti taim moa mi laik bungim ol pikinini bilong yu, olsem kakaruk meri i save bungim ol pikinini bilong en aninit long wing bilong en. Tasol yupela i no laik.”Tasol ol manmeri i paul long tok bilong Krais. Ol i no klia long tok bilong em.
Maski olgeta manmeri i paul, long tude tu, sori bilong God i klia tru long Tok bilong em. Long tok bilong Jisas na long pasin na wok bilong en, sori bilong God i kamap klia tru. Em i krai long yumi, tasol planti i no bekim.
Dispela em i sori bilong laikim tru. Ol lain i no gat laikim tru long bel bilong ol, i no gat sori tu.
Ol papamama i klia long dispela kain sori. Ol pikinini i no inap kamap klia long dispela sori bilong papamama inap long taim ol yet i gat pikinini bilong ol yet. Sori tru i kamap long laikim tru – dispela em i pasin bilong ol Kristen. Dispela kain sori i wanbel wantaim laikim tru na sori bilong God na Jisas Krais.
Ol Kristen papamama i gat wanpela hevi i winim olgeta arapela hevi: taim pikinini bilong
ol i lusim God! Maski pikinini bilong ol i kisim bikpela namba na i kamap bikman stret – papamama bai i gat bikpela pen tru sapos dispela pikinini i lusim God. Na tu, ol Kristen papamama i gat wanpela amamas i winim stret olgeta arapela amamas: taim pikinini bilong ol i wokabaut wantaim Bikpela! I no gat wanpela samting i orait sapos yumi i no wanbel wantaim God. Na olgeta samting bai kamap orait sapos yumi holim strong God.
SAMPELA TINGTING
Yu bin tingting long dispela sori bilong God na Krais bipo? Sampela taim, long laip bilong yu, yu gat dispela kain sori?
Ritim: Luk 23:44-49
Na Jisas i singaut strong moa olsem, “Papa, mi putim spirit bilong mi long han bilong yu.” – Luk 23:46
Taim ol i wok long tromoi ston long Stiven, Stiven i prea olsem, “Bikpela Jisas, yu kisim spirit bilong mi.” –Aposel 7:59
Long taim bilong slip, sampela pikinini ol i save beten, “Nau mi laik slip, mi prea long Bikpela long em i ken lukautim spirit bilong mi.”Na las tok bilong Jisas long diwai kros i klostu wankain olsem dispela prea.
Na long diwai kros, Jisas Krais i skulim yumi long gutpela pasin long taim bilong i dai. Jisas em i tisa bilong yumi long olgeta samting long wokabaut bilong yumi. Em i skulim yumi long pasin bilong laip, na em bai i skulim yumi long gutpela pasin long taim bilong i dai. Taim yumi i lainim ol gutpela pasin bilong dispela laip, yumi no ken pret long pasin bilong yumi long taim bilong i dai bilong yumi. Tisa bilong yumi bai i stap wantaim yumi.
Wanpela taim wanpela Kristen dokta em i tanim bel na em i kam bek long Bikpela long prea bilong wanpela yangpela mangi. Joni em i gat 6-pela krismas tasol, em i sik nogut tru, tasol em i no save olsem em i sik nogut tru. Na dispela dokta na wanpela nes i kam long em, na ol i laik wok strong tru long oraitim em gen. Olsem na ol i laik kisim em na operatim em, olsem na ol i slipim em long wanpela bet na ol i tokim em olsem, “Bai mi givim sampela marasin long yu, na bai yu slip.”
“Bai mi slip?” Joni i askim em.
“Yes, bai yu slip,” dokta i tok.
“Orait, sapos mi bai slip, pastaim mi laik beten.”
Na dispela liklik mangi i brukim skru, pasim ai na han bilong em. Na long yau bilong God, na dispela dokta na ol nes tu, em i beten, “Nau bai mi slip, mi askim yu Bikpela long lukatuim spirit bilong mi.”Tasol Joni em i no kirap gen taim ol i slipim em. Em i dai long taim ol i operatim em. Tasol dispela dokta em i lukim dispela na em yet i beten long Papa bilong em: “Papa, mi putim laip bilong mi long han bilong yu tasol!”
SAMPELA TINGTING
Wanem samting i save givim bel isi long yu long taim bilong laip na long taim bilong i dai?
Ritim: Aposel 7:51-60
Na em i brukim skru na i singaut strong moa, “Bikpela, yu no ken bekim dispela sin long ol.” – Aposel 7:60
I gat planti stori bilong ol man i bin bungim dai bikos ol i bihainim Jisas Krais. Planti yia bipo long tude, planti manmeri i gat laik long ritim ol stori long dispela kain man. Tasol tude planti lain i gat bikpela laik long ritim ol stori bilong ol man nogut, na maski long ritim ol stori long ol Kristen lain i dai long han bilong ol birua bilong Jisas Krais. Tasol planti ol sios i laik ritim ol dispela stori yet.
Buk Baibel i gat sampela stori tu long ol man i bungim dai bikos ol i bihainim Jisas. Tasol Buk Baibel i no autim bikpela stori tru long ol dispela kain man. Stori bilong dai bilong Jems (Aposel 12:2) em i liklik tru, na Buk Baibel i no tokim yumi long ples we Pol na Pita i bungim dai o long wanem rot ol i dai.
Tasol stori bilong dai bilong Stiven, dispela namba wan man i bungim dai bikos em i bihainim Jisas, em i no liklik. Sapos yumi ritim gut dispela stori, bai yumi luksave olsem dai bilong Stiven i kain olsem dai bilong Jisas. Olsem na yumi ken klia gut bilong wanem Holi Spirit i givim dispela stori long yumi. Dai bilong Stiven i putim ples klia olsem, “Sumatin i no winim tisa bilong en... Sapos sumatin i kamap wankain olsem tisa bilong en, em inap. Na sapos wokboi i kamap wankain olsem bikman bilong en, em tu inap” (Matyu 10:24-25). Tok bilong Jisas i tru taim em i tok, “Na man i no karim diwai kros bilong en na bihainim mi, em i no inap i stap pren bilong mi” (Matyu 10:38).
Ol i givim hevi long Stiven, kain olsem ol i givim hevi long Jisas. Na prea bilong wokboi (Stiven) i wankain olsem prea bilong masta bilong em (Jisas). Ol disaipel bilong Jisas i ken amamas long mekim wankain pasin olsem tisa (masta) bilong ol.
Ol gutpela lida i save skulim yumi long kamap ol gutpela disaipel tru. Na Jisas i makim rot bilong yumi long bihainim. Olsem na yumi mas givim olgeta glori long em, long dai bilong yumi tu.
SAMPELA TINGTING
Spirit bilong God i skulim yu long wanem samting long dispela stori?
Ritim: Luk 23:32-38
Papa, yu ken lusim sin bilong ol. Ol i no save long dispela samting ol i mekim. – Luk 23:34
Jisas i hangamap long diwai kros na em i pilim bikpela pen stret. Ol i nilim han bilong em long diwai, na bodi bilong em i guria long pen. Diwai kros em i samting bilong bagarapim, givim pen, na kilim i dai wanpela man. Taim Jisas i stap long diwai kros, em i beten.
“Papa,” em i beten bikos bilip bilong em i no pundaun. Sampela bilong yumi i save bilip long Papa God taim yumi i amamas na yumi i stap bel isi. Taim sampela samting nogut i kamap long yumi o yumi bungim sampela hevi na pen, yumi bai ting, Papa bilong mi i stap we? Tasol, namel long bikpela hevi na traim stret, Jisas i tok, “Papa...”
Jisas i askim Papa bilong em long lusim sin bilong ol man i wok long kilim em i dai. Em i no singaut long kisim sampela helpim. Yumi bai singaut long ol pen na traim, a? Jisas em i no wok long mekim save long ol birua bilong em. Yumi bai tingting long bekim nogut pasin bilong ol birua bilong yumi, a? Jisas i mekim narapela kain pasin. Em i askim Papa bilong em long lusim sin bilong ol birua bilong em i wok long kilim em i dai.
“Papa, yu ken lusim sin bilong ol. Ol i no save long dispela samting ol i mekim.” Ol i no save – i no min olsem ol i no gat asua long dispela sin ol i mekim. Na planti lain bilong tude i wankain olsem ol dispela soldia bilong Rom; ol i no save. Ol i no save olsem, em i sin bilong yumi i hangamapim Jisas long diwai kros. Yumi yet i hangamapim Jisas.
Nau yumi mas beten. Yumi mas askim God long lusim sin bilong ol man i no save wanem samting ol i bin mekim – long God, long Jisas. Na yumi mas prea strong tru na askim Papa bilong yumi long skulim yumi long helpim ol lain i no gat save long wok bilong God, long kisim save long wok bilong em – na long Jisas, na long diwai kros.
Long dispela ples bilong pen na hevi, long dispela holi ples, dispela diwai kros bilong Jisas, olgeta manmeri i mas brukim skru na kamap fri, na kisim save long wanem samting ol yet i mekim.
SAMPELA TINGTING
Beten long Papa bilong yu long helpim yu i kisim save long wanem samting yu yet yu mekim, na brukim skru long diwai kros bilong Jisas.
Ritim: 1 Pita 4:12-19
Ol brata tru, wanpela traim olsem paia i wok long kamap long yupela. Tasol yupela i no ken kirap nogut na ting em i narakain samting tru i kamap long yupela. Nogat. – 1 Pita 4:12
Yumi no ken kirap nogut na ting em i narakain samting tru taim ol traim i kam long ol lain bilong God. Nogat. Yumi mas kirap nogut taim sios i stap isi tasol na i no bungim ol traim olsem paia.
Sapos Kristen wokabaut bilong yumi i no bungim ol lain i les long yumi, yumi mas tingting gut na skelim laip na wokabaut bilong yumi. Krais i bungim planti bel kros na hevi, na yumi i lain bilong bihainim em.
Buk Baibel i tok olsem ol lain bilong God bai bungim pen na hevi. Yumi i gat laik long stap isi, tasol em bai nogat. Krais i no promisim yumi long stap isi long dispela graun. Sapos yumi stap isi, orait em i narakain samting stret. Na sapos yumi stap isi, yumi mas mekim hat wok stret long yusim dispela fridom long autim tok bilong God. Yumi i mas tingting gut na prea strong, nogut yumi i laik stap isi tasol na i no redi long pesim ol pen na hevi.
Pita i tok olsem, ol traim olsem paia bai kamap long lain bilong God. Na i gat tripela as bilong dispela. Namba wan as Pita i givim yumi i olsem: Yumi i mas skelim gut olgeta samting long painimaut em i trupela na em inap stap strong oltaim. Olsem na yumi mas skelim na traim olgeta Kristen bilip long paia.
Namba tu samting, Krais i skulim yumi olsem i gat wanpela rot tasol long kamap long
glori bilong kingdom bilong em. Dispela em i rot bilong bihainim tok bilong em na bilong daunim yu yet. Olsem na ol Kristen bai bungim ol hevi na traim long bel bilong ol yet na ol hevi na traim i kam long ol arapela.
Namba tri samting, sapos yumi laik wanbel wantaim Krais long tude, yumi mas poromanim em long hevi na pen bilong em tu. Sapos yu bungim ol hevi long nem bilong Krais, orait you ken amamas – na dispela amamas em i narakain stret na ol lain bilong dispela graun bai paul long dispela amamas.
Ol lain i bungim ol hevi na pen long nem bilong Krais long tude, ol bai i pilim wanbel wantaim Krais, em i dai long diwai kros long yumi.
SAMPELA TINGTING
Yu save bungim ol hevi na pen long nem bilong Krais, o nogat?
Ritim: 1 Pita 2:18-25
God i singautim yupela pinis bilong bihainim dispela kain pasin, long wanem, Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim. – 1 Pita 2:21
Wanpela taim bipo, Pita i bin kamap olsem mausman bilong Satan taim em i wok long pasim Jisas long go long diwai kros. Tasol long dispela namba wan pas bilong Pita, em i kamap olsem wokboi bilong Holi Spirit, na em i stori long pen na hevi bilong Jisas, na em i skulim yumi olgeta long pasin bilong wokabaut long dispela rot bilong Bikpela bilong yumi.
Ol hevi na pen bilong Jisas i gat tupela hap. Pita i stori long dispela tupela samting: Krais i bin karim pen bilong helpim yupela na em i soim yupela pinis dispela pasin bilong em, bai yupela i ken bihainim.
“Long yupela” i min olsem em i kisim ples bilong yumi na em i bungim hevi na pen. Dispela hevi na pen i pinis nau na i no inap kamap gen. Em i karim hevi na pen long sin bilong yumi olgeta, na long oltaim oltaim.
Tasol, dispela narapela hap bilong pen na hevi bilong Jisas, em i olsem: Yumi i mas pormomanim Jisas long karim pen na hevi sapos yumi laik bihainim em. Em i soim yumi pinis dispela pasin bilong em, bai yumi i ken bihainim. Em i rot yumi mas wokabaut long en. Yumi i mas bihainim wokabaut bilong Jisas.
I no gat wanpela bilong yumi inap wokabaut long rot bilong yumi yet, na stap wanpis
na mekim olsem. Yumi i lain bilong bihainim – bihainim Jisas. Yumi olgeta i gat laik long bihainim kain kain samting. Ol yangpela lain i amamas long bihainim ol man bilong pilai spot. Yumi i gat laik long amamasim ol arapela lain. O sampela taim bai yumi lukim sampela samting long TV na yumi gat laik long bihainim pasin yumi lukim.
Tasol Krais i kam long olgeta lain long olgeta kantri na em i givim yumi wanpela nupela narakain rot long bihainim. Long laikim tru, em i strong long tokim olgeta manmeri, “Bihainim mi.” Em i no laik sapos yumi bihainim ol pasin bilong ol arapela tasol long dispela graun. Em i gat laik sapos yumi tingting gut na harim tok bilong em. Na yumi mas beten: “Skulim mi, Bikpela, long bihainim laik na tingting bilong yu!”
Krais i karim pen na hevi long yumi. Na em i soim yumi pinis dispela pasin bilong em, bai yumi ken bihainim.
SAMPELA TINGTING
“Em (Krais) i no gat laik sapos yumi bihainim ol pasin bilong ol arapela tasol long dispela graun.” Olsem wanem long yu? Yu save gat laik long bihainim ol pasin bilong ol arapela tasol long dispela graun, o nogat?
Ritim: Jon 21:15-19
Na bihain em (Jisas) i tokim Pita olsem, “Yu bihainim mi.” – Jon 21:19
Taim Jisas i dai, Pita i bel hevi tru. I olsem em i lusim masta bilong em tupela taim – wanpela taim long dai bilong em, na narapela taim, taim em i tok olsem em i no save long Jisas. “Tru antap, mi no save long dispela man yupela i tok long en,” Pita i bin tok olsem.
Tasol Krais i wok long kisim Pita i kam wanbel wantaim em gen. Pastaim, ensel i tokim ol meri, “Yupela i mas i go givim dispela tok long ol disaipel bilong en, na long Pita tu...” (Mak 16:7). I min olsem: “Pita, dispela gutnius em i samting bilong yu, tu. Yu bilong mi yet!”
Namba tu samting i kamap taim Jisas i soim em yet long Pita. Yumi i no save, Jisas tupela Pita i stori long wanem samting long dispela taim. Em i samting bilong tupela yet. Tasol yumi save olsem dispela samting i bin kamap (Luk 24:34; 1 Korin 15:5).
Na namba tri samting i soim klia olsem Pita i wanbel tru wantaim Jisas gen i olsem: Em i taim bilong tudak gen, na wanpela paia i stap gen tu – kain olsem long dispela nait taim Jisas i stap long kaunsel. Tripela askim i kamap na Pita i mas bekim tripela taim – “Saimon, pikinini bilong Jon, yu laikim mi, o nogat?”
Na Pita i bekim olsem,“Yes, Bikpela, yu save, mi laikim yu.”Tasol long namba tri taim Pita i bel hevi long Jisas i askim em namba 3 taim “Yu laikim mi, o nogat.”
Na pinis bilong dispela i kamap olsem wanem? Em i pinis long dispela tok bilong bipo: “Yu bihainim mi.”Tasol nau dispela tok i gat bikpela mining moa long laip bilong Pita. Namba wan taim em i bin kisim dispela tok em i bin redi long mekim wok bilong Krais hariap. Tasol bihain em i bin givim baksait long Jisas, na nau em i wanbel gen wantaim Jisas – long pret, na bilip na long pasin bilong tanim bel. “Bikpela, yu save long olgeta samting. Yu save, mi laikim yu.”
Olgeta man o meri i bihainim Krais i bin bungim dispela kain tingting olsem Pita. Em i rot bilong lainim planti samting, bilong bilip long Krais na bilong daunim yumi yet. Dispela rot bilong bihainim Jisas i no isi, tasol marimari bilong Jisas i pulim yumi i kam bihainim em olgeta taim. Taim yumi lukluk long Jisas, na yumi i les na paul na yumi wari stret, em bai i tokim yumi, “Bihainim mi.”
SAMPELA TINGTING
Larim Spirit bilong God i ken stiaim yu long autim ol sin bilong yu long God na askim em long helpim yu i wanbel wantaim em long singaut bilong em: “Bihainim mi.”
Ritim: Mak 14:66-72
Na em i lukim Pita i hatim skin bilong en i stap. Na dispela wokmeri i lukluk stret long em, na i tok, “Yu tu yu bin i stap wantaim Jisas bilong Nasaret.” Tasol Pita i tok nogat olsem, “Mi no save tru long dispela tok yu mekim.” – Mak 14:67-68
Pita em i man bilong bihainim Jisas, tasol long wanpela taim em i no inap bihainim em moa. Em tru, em i laikim em tumas. Long gaden Getsemani, taim ol i kam na putim han long
Jisas long holimpasim em, Pita i kisim bainat bilong en na i paitim wokboi bilong hetpris, na bainat i katim yau bilong en na yau i pundaun. Yes, Pita i laikim Jisas tumas. Tasol Jisas i tokim Pita olsem em i no ken mekim olsem, na em i stretim yau bilong dispela man.
Tasol nau Pita i stap daunbilo long banis bilong haus. Em inap lukim Jisas taim em i stap long kaunsel. Blut i stap long pes bilong Jisas, em i no toktok, na ol i daunim em nogut tru. Jisas i luk olsem wanpela pikinini sipsip ol bai i kilim i dai.
Na bel bilong Pita i paul stret. Olsem wanem dispela king i stap olsem nau? Hau bai em i bihainim dispela man i karim planti hevi na pen tru, tasol em i no pait. Nogat, Jisas i daunim em yet na em i karim ol dispela pen.
Wanpela wokmeri i lukim em na i tok, “Yu tu yu bin i stap wantaim Jisas bilong Nasaret.” Tasol Pita i tok, “Mi no save tru long dispela tok yu mekim.” Na em i go ausait klostu long dua bilong haus. Na wanpela kakaruk i krai. Na dispela wokmeri i lukim em gen, na em i tokim ol man i sanap klostu long em olsem,“Dispela man hia em i man bilong lain bilong ol.”Tasol em i tok gen, “Nogat.”
Bihain liklik, ol man i sanap i stap klostu long em, ol i tok gen long Pita olsem, “Tru tumas, yu man bilong lain bilong ol. Yu man bilong Galili tasol.” Orait nau Pita i tok strong moa yet olsem, “Tru antap, mi no save long dispela man yupela i tok long en. Sapos mi no tok tru, orait God i ken bagarapim mi.”
Em i tok pinis, na wantu kakaruk i krai namba 2 taim.
Em i stat bilong Gut Fraide. Dispela King i kamap olsem pikinini sipsip. Na Pita i sanap na i krai moa yet.
Tasol long krai bilong em sampela hop i stap. Taim ol Kristen i pundaun long sin, na taim ol i lus tingting long bihainim Jisas o i pret long autim nem bilong em, ol i ken tanim bel na kam bek long God long diwai kros bilong Jisas.
SAMPELA TINGTING
Sampela taim yu yet yu pret long autim nem bilong Jisas tu?
Ritim: Mak 1:14-20
Na Jisas i tokim tupela olsem, “Yutupela kam bihainim mi, na bai mi lainim yutupela long pasin bilong kisim ol manmeri. – Mak 1:17
Long dispela de papa bilong Saimon na Andru i lusim tupela pikinini man bilong em i go long Jisas. Na tupela pikinini man bilong papa Sebedi, Jems na Jon, tupela i lusim wok bilong painim pis na tupela i go bihainim Jisas. Dispela em i naispela rot stret bilong lusim ol pikinini bilong yu!
Wanem samting i save kirapim ol man long bihainim Jisas?
Olsem wanem Abraham i lusim kantri bilong em na i go long Kenan? Dispela tok “kam bihainim mi” i bikpela samting. Tasol dispela tok i sampela samting moa yet bikos planti lain i save harim dispela tok,“kam bihainim mi.”Tasol sampela bai harim tru dispela tok na sampela arapela bai nogat.
Ol lain i bilip long Jisas tasol bai harim tru dispela tok.
Ol lain i bihainim Jisas, i bilip olsem Krais em i rot, na em i trupela rot, na i no gat narapela rot. Ol lain i bihainim em, ol i save olsem ol i mas harim singaut bilong em. Sapos nogat, ol bai i lus. Sapos yu bilip long Jisas, orait yu bai harim singaut bilong em, “kam bihainim mi.”
Em i wankain long dispela bisnisman i save salim ol naispela bis. Wanpela de em i lukim wanpela bis i gutpela tru na em i laik kisim. Olsem na em i go salim olgeta samting bilong en bilong kisim dispela gutpela bis (Matyu 13:46).
Na aposel Pol i tokim yumi olsem, “Wanem kain laip yumi bin i stap long en long taim God
i singautim yumi, orait yumi mas i stap yet long dispela kain laip”(1 Korin 7:20, 24). Na planti manmeri i paul taim God i singautim ol, na ol i ting olsem ol i mas hariap na mekim nupela kain wok olsem kamap pasto o narapela kain wok olsem. Nogat. Tasol, sapos laip bilong yu i no senis long taim Jisas i singautim yu long bihainim em, orait, i olsem yu no bin harim tok bilong em. Pasin bilong yumi mas senis olgeta; wok bilong yumi nogat! Yumi mas senisim pasin bilong yumi na mekim wok bilong em insait long dispela laip em i givim yumi pinis.
Bipo tingting bilong yumi i pulap long kain kain samting, tasol Krais i kisim bek yumi long ol dispela samting. Nau, laip bilong yumi i mas pulap long Krais. Sampela taim rot bilong yumi bai i hat tru, na yumi bai bungim ol hevi na pen. Tasol, maski, bai yumi bilip!
“Pikinini Sipsip bilong God – mi kam!”
SAMPELA TINGTING
Yumi mas bekim singaut bilong Jisas olsem: “Pikinini Sipsip bilong God – mi kam, mi kam!”
Ritim: Mak 8:27-38
Olsem tasol Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri. – Matyu 20:28
Long taim bilong bikpela pait (World War II) long England, Winston Churchill, olsem Praim Minista bilong dispela kantri i tokim ol man olsem, “Mi inap givim yu blut, na krai na hat wok stret tasol.” Em i save olsem em bai i hat wok stret long winim dispela pait; na ol lain long kantri i bilipim em na bihainim em bikos ol i save i no gat narapela rot bilong winim pait.
Taim Krais i singautim yumi long bihainim em, em i askim yumi long daunim yumi yet na karim diwai kros bilong yumi – em i“blut, na krai na hat wok stret.”Yumi i mas bilipim em na bihainim tok bilong em bikos i no gat narapela rot bilong winim pait. Ol narapela rot bai stiaim yumi i go lusim pait.
Ol man bilong bihainim Jisas i mas daunim ol yet na karim diwai kros bilong ol tu. Long klia gut long dispela, yumi mas lukluk long Krais yet, em i bihainim rot bilong laikim tru na bilong bihainim tok bilong God.
Pasin bilong daunim yumi yet na karim diwai kros bilong yumi i no samting bilong tok nogat long sampela liklik naispela samting tasol. Sampela lain i ting olsem ol i daunim ol yet taim ol i tok nogat long sampela naispela kaikai. Na sampela lain i ting olsem ol i karim diwai kros bilong ol taim ol i bungim sampela hevi planti lain long dispela graun i save bungim – na i no ol hevi ol lain bilong Krais tasol i save bungim.
Nogat. Em i hat tru long klia long mining bilong dispela tok, “pasin bilong daunim yumi yet na bilong karim diwai kros bilong yumi.”Em i samting bilong i dai na i stap laip wantaim. Yumi no inap lainim dispela samting hariap. Taim yumi stap long dispela graun, yumi i mas wok strong long lainim ol gutpela pasin bilong bihainim Jisas. Yumi no ken tok olsem yumi i save pinis long daunim yumi yet na long karim diwai kros bilong yumi!
SAMPELA TINGTING
Askim God long helpim yu long daunim yu yet na karim diwai kros bilong yu tu.
Ritim: Matyu 20:20-28
Olsem tasol Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri. – Matyu 20:28
Laip bilong Jisas i pulap long pasin bilong helpim ol arapela, na long dai bilong em i givim em yet long helpim ol arapela. Na dispela pasin, bilong givim yu yet long helpim ol arapela, em i samting yumi yet i mas bihainim. Em i dai long helpim yumi i kamap redi long mekim olsem.
Long dai bilong em yet, Jisas i baim bek yumi. Dispela tok “kisim bek” i olsem dispela tok bilong “ransom” taim wanpela man nogut i stilim (kidnapim) arapela man, na toktok long kisim sampela bikpela mani stret bipo em bai larim dispela man i go bek long famili bilong em. I olsem dispela namba tu man i kamap long kalabus bilong man nogut, na planti taim em bai dai long kalabus long dispela man. Tasol sapos narapela i baim bek (ransom) dispela man long kalabus, orait em bai i kisim laip na stap fri.
Bikos Krais i givim laip bilong em long baim bek ol lain i bilip long em, orait yumi no stap moa aninit long pawa bilong man nogut. Yumi i gat nupela Bosman bilong yumi. Nau yumi ken i stap long haus bilong Papa bilong yumi. Tasol yumi mas bihainim ol lo bilong dispela haus, na bihainim pasin bilong Krais, em i no bin kam bilong ol man i ken mekim wok bilong helpim em. Nogat. Em i kam bilong helpim ol.
Jisas i tok olsem em i givim laip bilong em bilong baim bek planti manmeri. Dispela tok “planti” i no min olgeta manmeri. Em i dai long lain bilong em yet tasol. Tasol taim Krais i tok “bilong baim bek planti manmeri,” em laik soim olsem em wanpela i bin dai long planti ol arapela manmeri. Dispela em i bikpela samting!
I gat planti ol stori bilong ol bikpela pait. Na yumi no ken ting olsem ol pait i gutpela samting, tasol i gat sampela stori insait long ol dispela stori bilong pait i naispela tru. Sampela taim yumi ken ritim stori long wanpela solidia insait long wanpela pait i bin tromoi em yet long wanpela bom o wanpela grenade samting long lukautim ol arapela soldia. Em i dai, na ol arapela i stap laip. Dispela kain stori i putim ples klia dispela tok, “wanpela i dai long planti manmeri.”
Laip bilong Jisas i soim yumi wanem kain pasin yumi mas bihainim – pasin bilong helpim ol arapela. Long dai bilong em yet, em i mekim yumi i stap fri bilong mekim olsem!
SAMPELA TINGTING
Ating sapos wanpela soldia i givim laip bilong em yet long lukautim laip bilong yu yet, yu bai amamas tru na tenk yu tru. Olsem wanem nau long wok bilong Krais bilong baim bek yu yet?
Ritim: Jon 13:12-20
Olsem tasol Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri. – Matyu 20:28
Tude, sapos yu wokboi long wanpela kampani bai yu kisim pe long wok bilong yu. Tasol long taim bilong Buk Baibel, sapos yu stap olsem wokboi, i min olsem yu no save kisim pe long wok bilong yu.
Olsem na ol lain long Juda i save paul taim ol i tok olsem wanpela king em i wanpela wokboi wantaim. Ol wokboi i save mekim wok bilong ol wokboi, tasol wanpela king em i gat bikpela namba na ol arapela lain i save brukim skru long ol king.
Olsem na, taim dispela King i tok, “mi no bin i kam bilong ol man i ken mekim wok bilong helpim mi. Nogat. Mi i kam bilong helpim ol,”ol lain Juda i paul tru. Na sapos yumi tingting gut long dispela ating yumi bai kirap nogut tu. Yumi mas wok long klia gut long Jisas em i husat, olsem Buk Baibel i skulim yumi. Nogut tingting bilong yumi paul long Jisas em i husat.
Dispela Jisas i kam long helpim ol arapela, em i singautim olgeta manmeri long kam bihainim em. Dispela pasin bilong bihainim em i no samting bilong senisim sampela tok bilong yumi o sampela pasin nogut bilong yumi tasol. Nogat. Em i samting bilong senisim tingting na laip bilong yumi olgeta.
Yumi no ken tingting long kisim pe taim yumi stap olsem wokboi bilong Bikpela. Sapos yumi les, orait yumi no bilong Jisas Krais. Tasol, taim yumi daunim yumi yet, na bihainim em tru, bai yumi klia olsem em i gutpela tru long stap lain bilong Jisas Krais.
SAMPELA TINGTING
Yu stap wokboi bilong God olsem wanem?
Ritim: Jems 1:12-21
Na yu no ken larim ol traim i kamap long mipela, tasol yu ken kisim bek mipela long ol sam- ting nogut. – Matyu 6:13
I no gat wanpela Kristen inap abrusim dispela pait. Sapos yumi bilip long Bikpela na autim nem bilong em, orait bai yumi bungim birua bilong yumi. Sapos dispela em i tru, watpo nau Bikpela i skulim yumi long prea olsem, “Na yu no ken larim ol traim i kamap long mipela”? Bikos yumi no ken go hariap long ol traim long strong bilong yumi yet. Krais yet i pret long ol traim!
Ol Kristen i mas prea na askim God long no ken larim ol traim i kamap long ol. Yumi save olsem yumi wik, na yumi no gat strong. Sampela lain i no strong tumas long bilip bilong ol, i olsem ol liklik pikinini i ting olsem ol pait i samting bilong pilai tasol. Tasol ol strongpela Kristen bai prea olsem: “Na yu no ken larim ol traim i kamap long mipela.” Na tu, ol yet i wok long abrusim ol traim. Ol Kristen i no ken wok long kamap klostu long snek nogut, long Satan. Nogat, ol i mas wok long stap longwe tru long Satan.
God i no save pulim yumi long mekim pasin nogut (Jems 2:13). Satan tasol i save mekim olsem. Tasol God i save stiaim laip bilong yumi. Olsem na long God yumi save beten, “Na yu no ken larim ol traim i kamap long mipela.” Olsem na, maski yumi no gat laik long kamap long pait, sapos God i stiaim yumi i go long pait, bai yumi pait. God i no save stiaim yumi i go long pait bilong kilim yumi; nogat, em i mekim olsem bikos dispela em i rot bilong win na kisim bel isi.
Yumi mas prea long stap longwe long ol bikpela pait, na yumi no ken wok long painim
ol pait. Tasol sapos long laik bilong God Papa em i kisim yumi go long ol hevi bilong pait, yumi mas bilip olsem dispela samting bai mekim gut long yumi. Na yumi mas harim dispela tok long Buk Baibel: “Man i save sanap strong na i karim hevi long olgeta traim, em i ken amamas. Sapos em i winim pinis olgeta traim, orait God bai i givim em laip bilong i stap gut oltaim, olsem prais bilong en. God i tok pinis long givim dispela prais long olgeta man i save laikim em tru” (Jems 1:12).
Ol Kristen i save wok long abrusim ol pait wantaim birua bilong ol (Satan): “No ken larim ol traim i kamap long mipela.”Tasol taim ol Kristen i kamap long pait, ol bai kisim strong na pawa bilong stap gut!
SAMPELA TINGTING
Yu save bungim ol traim long bilip bilong yu? Olsem wanem?
Ritim: Efesus 6:10-18
Yupela i mas pasim olgeta klos pait God i save givim long yumi, na bai yupela inap long sanap strong na sakim olgeta kain pasin bilong trik na giaman Satan i save hait na mekim. – Efesus 6:11
Sapos yumi no kisim gutpela skul pastaim, bai yumi no inap kamap olsem soldia o ofisa long ami. Na sapos ami i no gat gutpela skul, na i no gat gutpela ol trening na ol i les long lainim pasin bilong bihainim ol stretpela pasin, hau bai ol soldia i mekim gutpela wok? Na em i wankain long sios bilong God. Yumi nidim gutpela trening na skul!
Tasol planti lain bilong sios tude i save les long kisim skul na trening, na long lainim pasin bilong bihainim ol stretpela pasin.
Taim yumi tingting long skul na trening, yumi save tingting long ol pikinini na yangpela manmeri. Na em i tru, em i gutpela sapos yumi go long skul na kisim trening taim yumi yangpela. Tasol planti manmeri i lus tingting long kisim skul taim ol i kamap bikpela. Olsem na, i olsem sios em i pulap long ol pikinini i no gat gutpela save.
Tasol long sanap strong na pait long Satan, yumi mas i stap man na meri bilong God.
Sapos yu gat wanpela gutpela wok, bai yu wok long kisim trening olgeta taim yu stap insait long dispela wok. Sapos nogat, bai wok bilong yu i pundaun. Na long skul bilong God em i bikpela samting moa. Trening bilong yumi i kirap taim yumi stap wanpela bebi, na i mas i go inap long taim God i singautim yumi long go long heven.
Long ami ol soldia i save lainim pasin bilong bihainim ol stretpela pasin na lo hariap. Na yumi, long dispela pait long Satan, yumi mas lainim dispela pasin hariap tu. Sapos nogat, bai yumi no inap winim dispela pait. Yumi mas klia gut long tok na lo bilong God na hariap long bihainim. Yumi i stap long wanpela bikpela pait!
Krais i bosim yumi na em i gat namba bilong mekim olsem. Tasol planti ol Kristen i no save gut long ol lo na tok bilong Bosman bilong ol. Na taim ol i harim ol dispela lo, planti ol bai wok long abrusim ol dispela lo.
Tasol yumi mas pasim olgeta klos pait God i save givim yumi, ol samting God i givim yumi long lukautim yumi. Sapos nogat, bai yumi no inap sanap strong long “taim nogut” (lain 13). Na dispela taim nogut i kamap pinis.
SAMPELA TINGTING
Yu yet yu stap long trening long sait bilong spiritual wokabaut bilong yu? Na yu i wanpela man o meri bilong bihainim tok na lo bilong God hariap, o nogat?
Ritim: Kamapim Tok Hait 12:1-6,13-17
Dispela snek em i lukim olsem ol i tromoi em i go daun pinis long graun, na em i go ranim dispela meri i bin karim pikinini man. – Kamapim Tok Hait 12:13
Krais i winim dispela pait long Satan pinis, tasol i no min olsem olgeta pait i pinis nau. Dispela pait i stap yet na em i bikpela pait tru! Olsem na, dispela tok olsem Krais i winim pait, i gat wanem mining? Em bai helpim yumi olsem wanem? “Dispela snek (Satan) i lukim olsem ol i tromoi em i go daun pinis long graun.” I min olsem Satan i no go pas long dispela pait; em i no bosman. Tasol Jisas (dispela “pikinini man”) em i lusim graun na i go antap long heven. Em i stap long heven olsem king bilong bosim dispela graun. Em i bosman tru. “Orait kwiktaim ol i kisim pikinini i go antap, na ol i bringim em i go long God na long sia king bilong em” (lain 5).
Satan i gat rot long pait yet, na long traim yumi, na long grisim yumi; tasol em i no bosman moa. Jisas yet i bosim olgeta samting: “Long wanem, wanpela pikinini man i kamap pinis long yumi, em wanpela pikinini God i givim long yumi. Em bai i stap king bilong yumi, na em bai i gat ol dispela nem, ‘Man bilong givim gutpela tingting tru’ na ‘God i gat bikpela strong’ na ‘Papa bilong i stap oltaim oltaim’ na ‘King bilong kamapim gutpela sindaun na bel isi’ (Aisaia 9:6).
Dispela snek nogut i bel kros nogut tru long dispela meri i bin karim dispela pikinini man. Em i pikinini meri bilong Saion, na em i meri bilong krai bilong Betlehem. Em i mama bilong olgeta lain i save karim pen na hevi long nem bilong Jisas. Em i makim ol lain bilong God, dispela sios bilong God bilong oltaim oltaim.
Yumi no ken ting, orait Jisas i bungim ol traim long Satan, olsem na bai mi abrusim ol pen na hevi na traim bilong em. Jisas i no tok olsem. Long bilip yumi save olsem Jisas em i Bikpela, maski yumi no lukim dispela samting nau. Yumi i mas bilipim dispela na wokabaut long
rot bilong dispela bilip. I min olsem yumi mas bihainim tok bilong Bikpela, na yumi no ken pret, bikos “dispela man em i makim bilong kisim bek ol manmeri bilong en, em i kisim pinis bikpela namba na strong” (lain 10).
Trustim Bikpela. Hop long em. Em bai i lukautim yumi na strongim yumi. Em bai i givim tupela wing bilong tarangau long yumi long karim yumi (lain 4). Bihainim lo bilong God na autim tok bilong em (lain 17).
“Strongim mi, Bikpela, bikos mi save olsem mi mas pait sapos mi laik stap wantaim yu long heven; long strong bilong Tok bilong Yu, bai mi stap strong long ol pen na ol traim” (Isaac Watts).
SAMPELA TINGTING
Yusim dispela tok bilong Isaac Watts olsem prea bilong yu yet.
Ritim: Matyu 27:32-44
Em i bin helpim ol arapela man, tasol em i no inap helpim em yet. Em i king bilong Israel. Orait em i ken lusim diwai kros na i kam daun, na bai yumi bilip long em. – Matyu 27:42
Jisas i hangamap pinis long diwai kros. Rot bilong bihainim tok bilong God i kisim em i go long dispela rot bilong pen na hevi. Em i kamap long las hap bilong dispela pen na hevi, na em i taim nogut tru.
Satan i wari nogut tru, tasol em i no redi long lus tingting long wok long pasim rot bilong God. Nogat, em i strong long mekim wok bilong em, tasol Holi Spirit i strong moa yet na em i no inap pinis long mekim wok bilong em.
Satan i laik yusim Herot long kilim bebi Jisas. Satan yet i wok long traim Jisas long ples drai. Long Pita, Satan i wok long pasim dispela Mesaia long wokabaut long dispela rot i go long diwai kros. Na nau, taim Jisas i stap long diwai kros, Satan i wok yet long bagarapim wok bilong em.
Olgeta manmeri i krai, “Em i bin helpim ol arapela man, tasol em i no inap helpim em yet!” Dispela tok i olsem poisen bilong bagarapim em. Ol i wok long daunim em, long grisim em, kain olsem ol liklik pikinini i wok long singaut long ol arapela pikinini, “Goan; yu kam kisim mi! Yu kam kisim mi!” Na wantu ol i ranawe.
Olgeta manmeri i grisim em moa yet: “Orait em i ken lusim diwai kros na i kam daun, na bai yumi bilip long em.” Olgeta manmeri i no klia tumas wanem samting ol i autim. Tasol God i save, na Satan i klia tru. Jisas i harim tok bilong Satan insait long dispela tok.
Wanpela bikpela pait i stap namel long dispela samting. Ol ensel na ol dimon i klia tru long dispela, tasol olgeta manmeri i no save gut long dispela. Ol i no inap save tru long dispela sapos God i no opim ai na bel bilong ol.
Na Jisas i stap long diwai kros na karim bikpela pen tru.
Ol traim bilong Satan i strongpela tru; ol i hat tru. Pen bilong dispela traim i winim pen
long han bilong Jisas taim ol i nilim em long diwai kros. Tasol em i no lusim diwai kros. Em i hangamap i stap. Jisas i klia long dispela: “Sapos mi laik kisim bek ol arapela, mi no inap kisim bek mi yet. Yu go baksait long mi, Satan!”
Em i no ol dispela nil i holim Jisas i stap long diwai kros. Laikim tru bilong em yet i holim em. Litimapim nem bilong Bikpela!
SAMPELA TINGTING
Tok tenkyu long God na presim em bikos Jisas i no lusim diwai kros long wanem em i laikim yu tru!
Ritim: Matyu 16:13-23
Na Jisas i tanim na i tokim Pita olsem, “Satan, yu go baksait long mi!” – Matyu 16:23
Ol dimon na spirit nogut tasol inap luksave long Jisas olsem King bilong dispela graun. Sampela taim ol man i luksave long em bikos God yet i helpim ol i mekim ol olsem. Spirit bilong God i helpim Simeon long save olsem bebi Jisas em i King bilong promis (Luk 2:27). Na ol saveman i kam long Betlehem bikos God yet i stiaim ol long go (Matyu 2). Na Pita tu i luksave long Jisas, tasol Papa God i bin tokim em olsem.
Pita i autim dispela tok long Jisas: “Yu dispela man God i bin makim bilong kisim bek ol manmeri bilong en. Yu Pikinini bilong God i gat laip.” Na dispela tok bilong Pita i kamap olsem bikpela tok tru long sios bilong God long olgeta taim.
Na taim Pita i autim dispela tok, Jisas i stat long tokim ol disaipel olsem em i mas i go long Jerusalem, na em i mas karim planti pen long han bilong ol hetman wantaim ol bikpris na ol saveman bilong lo. Na wantu Satan i kirap na mekim wok, bikos Satan em i save olsem dispela King bai kisim bek ol lain bilong em long rot bilong pen na hevi.
Satan inap yusim ol king nogut (olsem Herot, taim em i kilim ol pikinini man i no winim 2-pela Krismas yet long Betlehem) long mekim wok nogut bilong em, tasol em inap yusim ol poro bilong Jisas tu. Long hia Pita yet, dispela man i autim dispela bikpela tok tru, em i kamap olsem wokboi bilong Satan.
Em i tok, “Bikpela, nogat tru. Dispela samting i no inap kamap long yu.” Pita i ting olsem dispela King i no inap bungim pen na hevi long kisim bek ol lain bilong em. Tasol long hia Pita i olsem mausman bilong Satan. Satan i save olsem pawa bilong em yet i wok long lus, taim Krais i redim em yet long bihainim tok bilong God inap long dai bilong em yet.
Jisas i tok, “Satan, yu go baksait long mi. Yu laik pasim rot bilong mi. Yu no bihainim tingting bilong God. Nogat. Yu bihainim tingting bilong ol man tasol.” I no gat wanpela man, maski em i poro o em i birua bilong Jisas, inap pasim em long wokabaut long dispela rot bilong bihainim tok bilong God.
SAMPELA TINGTING
Satan i save grisim yu olsem wanem long lusim dispela rot bilong bihainim tok bilong God?
Ritim: Lo 8:1-8
Tasol Jisas i bekim tok olsem, “Buk bilong God i gat tok olsem, ‘Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.’” – Matyu 4:4
Long Matyu yumi ritim stori long taim Satan i bung wantaim King bilong Israel, Jisas. Pait i kirap nau. Matyu 4:8-9 i tok olsem Satan i tok long givim olgeta strongpela kantri long dispela graun long Jisas. Husat bai bosim dispela graun - Satan o Jisas? Husat bai win?
Tasol, dispela pait i no samting bilong strong na pawa tasol. Nogat. Dispela pait em i samting long bihainim tok bilong God. Kingdom bilong God bai kam taim God inapim laik na plen bilong em. Rot bilong winim Satan em i pasin bilong bihainim tok bilong Papa God.
Satan i mekim planti wok long grisim olgeta manmeri long dispela graun. Adam i pundaun na sakim tok bilong God. Israel tu i pundaun long sin. Taim ol i stap long ples drai inap long 40 yia, God i traim ol long luksave olsem ol bai i bihainim ol lo bilong em o nogat. Em i “daunim” ol na em i givim mana olsem kaikai bilong ol bai ol i ken save olsem, “yumi man i no inap kisim laip long kaikai tasol. Nogat. Yumi mas bihainim olgeta tok bilong God tu na bai yumi kisim laip” (Lo 8:3).
Yumi olgeta i mas tingim dispela. Yumi olgeta i mas lainim olsem, yumi man i no inap kisim laip long kaikai tasol. Yumi i mas bihainim olgeta tok bilong God tu na bai yumi kisim laip.
Long dispela teks Jisas i bihainim wankain rot olsem Israel i wokabaut long en. Jisas i wokabaut 40-pela de long ples drai. Na Satan i kam long grisim em. “Pastaim,” Satan i tok, “pastaim yu mas kaikai. Sapos i tru yu Pikinini Bilong God, orait yu tok na ol dispela ston i ken tanim na i kamap bret.”
Tasol Jisas i no tingting long yusim pawa bilong em long stap laip. Em bai yusim pawa bilong em long bihainim tok bilong God inap long dai bilong em. Olsem na em i tok, “Buk bilong God i gat tok olsem, ‘Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.’” Em mobeta long bihainim tok bilong God na stap hangre, olsem long kisim bret na mekim sin.
SAMPELA TINGTING
Dispela ol tok i gat wanem mining insait long laip bilong yu yet?
Ritim: Matyu 2:7-18
Taim Herot i save olsem, ol saveman bilong hap sankamap i bin giamanim em, orait bel bi- long en i hat moa. Na em i salim sampela man i go long taun Betlehem na long ol ples i stap klostu long taun, na ol i kilim i dai olgeta pikinini man i no winim tupela krismas yet. – Matyu 2:16
I no gat wanpela i save gut long pawa tru bilong dispela nupela King – Satan tasol i save long dispela. Em i yusim Herot, olsem wokman bilong em, long inapim plen bilong em bilong kilim dispela nupela king. Tasol God i wok hariap moa.
Satan, “bipo yet i stap man bilong kilim ol man i dai” (Jon 8:44). Planti yia bipo long Herot, wanpela narapela king, king bilong Isip, olsem wokman bilong Satan, i bin kilim ol pikinini man bilong Israel. Na Moses, man bilong kisim bek Israel, i abrusim dispela wok bilong king bilong Isip na em i stap laip. Moa yet, em i kisim ol gutpela samting, olsem kaikai na skul, long haus bilong king bilong Isip yet. God i lap! Na long dispela taim, taim Herot i laik kilim ol pikinini man long Betlehem, Jisas, man bilong kisim bek yumi, em i abrusim dispela plen bilong Satan. Krais i wok long inapim olgeta samting long Olpela Testamen.
Em i no naispela samting i bin kamap long Betlehem. Planti ol mama i krai i stap na holim pikinini man bilong ol i dai pinis. Ol Papa tu i krai na belhat. Husat bai mekim save long dispela man i bin kilim i dai ol pikinini long lain bilong God?
Na long tingim yumi long ol hevi na krai bilong lain bilong God, Jon i stori long Resel, dispela mama i krai long Betlehem. Em i dai taim em i karim pikinini, na em i kolim nem bilong dispela pikinini Benoni, i min “pikinini mi karim wantaim planti pen” (Stat 35:18).
Ol lain bilong God long stat bilong dispela graun i kam inap long tude i save bungim planti pen na hevi tru. Laip bilong ol i pulap long krai. Satan i wok long bagarapim ol na God i wok long kotim ol. Mama bilong ol i krai nogut tru, na ol i les long kisim bel isi. Man bilong helpim ol na kisim bek ol i stap we?
Tasol nau tok bilong kisim bel isi i kam pinis: mekim drai ai wari i stap long ai bilong yu ol mama bilong Betlehem. Kisim strong, ol pikinini meri bilong Saion. Taun bilong Devit i karim wanpela pikinini man, em i pikinini bilong Devit. Saviour bilong yu i stap laip. God i kam pinis bilong pait long helpim ol manmeri bilong em. God inapim olgeta plen bilong em.
Aiwara i ken kam daun long nait, tasol long moningtaim amamas bai kam gen (Buk Song 30:5). Jisas bai kam long kisim bek ol lain bilong em. Na em yet bai karim na kisim ol hevi na krai bilong yumi.
SAMPELA TINGTING
Tingting long wok bilong Krais long kisim bek yu, na tok tenkyu long em.
Ritim: Buk Song 72:1-11
Nupela pikinini em king bilong ol Juda, em i stap we? – Matyu 2:2
Dispela King bilong Israel, dispela king bilong promis, em i stap olsem wanpela wokboi nating long dispela graun na em i dai olsem wanpela man nogut. Em i narakain samting tru, na sapos yumi tingting gut long dispela, bai yumi kirap nogut. Na tu, dispela gutnius long ol pen na bel hevi bilong dispela king, bai i kliaim sampela samting long laip bilong yumi
ol lain i bilip long Jisas Krais. Tude, ol dispela lain bilong dispela king i mas karim bel hevi na pen bilong dispela king tu.
Long helpim yumi klia gut long dispela bikpela samting long gutnius, em bai i gutpela sapos yumi klia gut long ol king bilong bipo tru. Tude, yumi no save gut long pawa na ona bilong ol king bilong bipo. Long bipo ol man ol i stap liklik tru long ai bilong ol king, olsem ol i samting nating tasol. Long taim bipo i olsem ol king i no man tru – ol i olsem wanpela god.
Na taim yumi klia long dispela, em bai helpim yumi long klia olsem Jisas em i King, na dispela em i bikpela samting stret. Olpela Testamen i pulap long ol promis long dispela strongpela king stret bai i kam, na Nupela Testamen i pulap stret long gutnius bilong Jisas Krais, em i dispela stretpela na gutpela king tru.
Na sapos Jisas em i dispela king olsem Buk Song 72 i mekim promis long em, bilong wanem long Nupela Testamen yumi no inap ritim stori long ol bosman na olgeta lain long olgeta kantri bilong dispela graun i brukim skru na lotuim em? Nogat – yumi klia – pastaim ol i hangamapim dispela King Jisas long diwai kros, na bihain em i go antap long heven na sindaun long sia king; na moa, pastaim Jisas i kamap wokboi nating bilong olgeta manmeri, na bihain em i kamap Bikpela bilong ol.
Long tude – long planti hap bilong dispela graun – ol Kristen lain inap lotuim King bilong ol. Yumi amamas tru olsem yumi gat dispela fridom bilong lotuim em, na yumi mas holim strong dispela fridom tu. Tasol yumi mas lotuim Jisas olsem King Tru bilong yumi. Yumi i mas brukim skru long em. Sapos nogat, orait bai yumi bungim dai bilong oltaim oltaim.
SAMPELA TINGTING
Taim yu klia olsem Jisas em i King, dispela bai senisim laip bilong yu olsem wanem?
Ritim: Matyu 6:25-33
Na sapos wanpela bilong yupela i wok long tingting planti long rot bilong i stap gut, ating dispela pasin bilong tingting planti bai i skruim liklik hap taim moa long laip bilong en? I no inap tru. – Matyu 6:27
Dispela de, Februeri 29, i save kamap wanpela taim long fopela yia tasol. Dispela yia i gat liklik hap taim moa olsem ol arapela yia.
I gat kain kain rot bilong kaunim ol de bilong yu – long kalenda, long mun. Tasol maski wanem rot yumi bihainim long kaunim ol de bilong yumi, yumi no inap abrusim plen bilong God long laip bilong yumi. Yumi no inap kisim sampela moa de long laip bilong yumi o lusim sampela de God i makim long yumi long stap laip long dispela graun.
God i kaunim olgeta de bilong yumi pinis. Tasol yumi no ken tok, “Maski long lukautim laip bilong mi. God i kaunim pinis olgeta de bilong mi, olsem na mi ken mekim kain kain samting long laip bilong mi, maski dispela samting i samting nogut na inap kilim mi i dai. God i makim de bilong dai bilong mi pinis, orait bai mi mekim wanem samting mi laik mekim.”
Ol Kristen i bilip olsem God i kaunim olgeta de bilong ol pinis. Tasol ol i bilip olsem Papa God yet i lukautim laip bilong ol. I no samting bilong sens. Na bikos ol i bilip olsem God i bosim laip bilong ol, ol i save tu, ol i gat wok bilong ol yet. God i tokim ol long mekim wok long dispela graun.
Bikos yumi save olsem God i kaunim pinis olgeta de bilong yumi long dispela graun, bai yumi klia long dispela tupela samting:
Namba wan samting, yumi no ken wari tru long laip bilong yumi. Tru, yumi mas lukautim laip bilong yumi yet, tasol yumi no ken wari tru na pret tru long wanem samting bai i kamap long laip bilong yumi, bikos yumi save olsem God yet i gat plen bilong em, na olgeta samting i stap insait long dispela plen bilong em. I no gat wanpela samting inap kamap sapos God yet i no gat laik long dispela samting i kamap.
Namba tu samting, yumi mas tingting gut long wanem samting yumi bai mekim long wan wan de. Yumi bai tok tenkyu long God long olgeta de em i givim yumi long dispela graun, na yumi bai yusim olgeta de long lotuim em, long mekim wok bilong em, bikos yumi save olsem dispela kingdom bilong God i no inap pinis long taim olgeta de bilong yumi i pinis long dispela graun.
SAMPELA TINGTING
God i kaunim pinis olgeta de bilong yu na em i laikim yu tru. Olsem na, sapos yu gat wari o hevi, go long em na beten long em, na em bai helpim yu.
Ritim: Luk 1:26-38
Yu bin bilip olsem Bikpela bai i mekim olsem em i bin tokim yu, olsem na yu ken amamas tru. – Luk 1:45
I gat tupela kain lap i kamap long taim ol lain i tingim taim Jisas Krais i kamap olsem bebi.
I gat lap bilong ol lain i no bilip long Krais – na dispela lap i olsem musik nogut. Bai God i ken marimari long ol lain i lap olsem taim ol i harim dispela stori long Mama Maria na bebi bilong em. Tasol i gat narapela kain lap i wok long go aut tu – em i lap bilong amamas bikos God i bin inapim ol promis bilong em.
Dispela kain lap i wankain olsem lap bilong Abraham na meri bilong em, taim tupela i lapun pinis na i lukim liklik bebi bilong ol, Aisak. “Aisak,” tupela i tok, “i olsem lap.” God i mekim kamap wanem samting i no inap kamap.
Na Maria tu, wankain olsem Sara, i kisim promis bilong wanpela pikinini man. Na long dispela taim tu em i narakain promis tru. God bai i mekim kamap wanpela samting i no inap kamap: “Dispela samting bai kamap olsem wanem? Mi no marit yet long wanpela man.” Tasol taim ensel i tokaut “strong bilong God Antap Tru bai i karamapim yu,” orait, Maria em i bilipim em na daunim em yet aninit long God. Maria i singim dispela singsing bilong bilip, maski em i no lukim pikinini bilong promis yet: “Bel bilong mi em i litimapim nem bilong Bikpela, na spirit bilong mi em i amamas long God.”
Na kandere bilong Maria, Elisabet, em i lapun pinis. Tasol God i soim em olsem em yet em
i God, na em yet em i God bilong kisim bek ol lain bilong em. Olsem na Maria i singsing na Elisabet i lap. Na Sekaraia? Pastaim em i no bilip olsem meri bilong em bai karim pikinini, na God i pasim maus bilong em na em i no intap toktok. Tasol taim God i opim maus bilong em na em i toktok gen, orait em tu i wok long singsing na lap na presim God, dispela God, “em i tok tru antap long tumbuna bilong yumi Abraham. Na nau em i laik mekim long yumi olsem bipo em i tok.”
Yumi mas wok yet long karim diwai kros bilong yumi long dispela rot bilong bilip. Wanpela de bai yumi lukim dispela amamas i kirap long Stat 25 na dispela lap i kamap gutpela moa yet long Luk 1 na 2. Na wanpela de “bikpela lait na strong bilong Bikpela bai i kamap ples klia, na olgeta manmeri bilong graun bai i lukim. Dispela tok i kam long maus bilong Bikpela yet” (Aisaia 40:5).
SAMPELA TINGTING
Autim dispela singsing bilong Maria (Luk 1:46-55) olsem amamas na singsing bilong yu yet.
Ritim: Stat 25:7-11
Tupela pikinini bilong en, Aisak na Ismael i planim em long dispela hul bilong ston ol i kolim Makpela ... Na Aisak wantaim Ismael i planim Abraham long dispela hul bipo Abraham i bin planim meri bilong en, Sara, long en. – Stat 25:9-10
Taim Abraham i lusim Haran em i gat 75 krismas (Stat 12:4). Na em i wokabaut wantaim Bikpela inap long 100 krismas. Na em i dai taim em i gat 175 krismas, na ol i planim em long dispela hul bilong ston ol i kolim Makpela.
Taim yumi planim wanpela man o meri husat i dai pinis, dispela i wok long traim bilip bilong yumi. I olsem dispela dai yumi lukim i no wanbel wantaim bilip bilong yumi. Hau bai yumi lukim dai, na bilip olsem Krais i king bilong olgeta samting? Tasol planti ol Kristen i save tok olsem dai bilong lain bilong ol i wok long strongim bilip bilong ol. Bilip bilong yumi i save strong moa yet long taim bilong hevi, na dispela i winim taim bilong amamas. Taim yumi sori tru long taim bilong i dai bilong wanpela man o meri yumi laikim tru, bai yumi go long Bikpela long kisim sori na bel isi.
Dai bilong Abraham i narakain traim bilong bilip. God i bin promisim em graun bilong Kenan pinis. Tasol taim em i dai, em i no gat graun bilong em yet. Nogat, em i gat wanpela hul long graun bilong planim meri bilong em na em yet. Em tasol.
Planti bilong yumi gat bikpela laik bilong baim sampela graun bilong yumi yet. Na em orait long baim sampela graun, tasol nogut yumi tingting tumas long baim graun na wokim haus bilong yumi long dispela graun. Em i no bikpela samting.
I gat wanpela samting i bikpela tru – na Abraham i lukim dispela pinis, na aiwara bilong em i pundaun – em i olgeta promis bilong God. Na dispela em i wanpela samting i tru na tru olgeta, na yumi ken holim, na yumi no inap lusim, maski yumi kamap long taim bilong dai bilong yumi.
SAMPELA TINGTING
Ol promis bilong God i gat bikpela mining insait long laip bilong yu yet, o nogat?
Ritim: Hibru 11:17-19
Abraham i tingting olsem, “Sapos Aisak i dai, maski, God em inap long kirapim em bek.” Olsem na tru tumas, yumi inap tok bokis long dispela samting i bin kamap na tok olsem, Abraham i kisim bek pikinini bilong en long matmat. – Hibru 11:19
Taim Abraham i wokabaut i go long Moria em i tingting olsem, “Sapos Aisak i dai, maski, God em inap long kirapim em bek.” Em i no wari long em yet, na tu em i no tingting long Aisak tasol. Nogat, em i tok, “God bilong mi em i husat?” Em i stap wantaim God olgeta taim, na God em i nambawan samting long laip bilong em. Long dispela traim yumi lukim bel isi stret bilong Abraham, na dispela i narakain samting olgeta. Em i dispela kain bel isi bilong wanpela man bel bilong em i bel isi long God tasol.
Nogut yumi tok, “Abraham em i klia olsem God bai stopim em long kilim Aisak i dai,” o nogut yumi tok, “Abraham i save olsem God i no amamas long pasin bilong kilim ol pikinini olsem ofa, olsem na em i save God i no tok tru long em i mas kilim Aisak i dai.” Nogat, buk Hibru i tok, “Orait Abraham i bilip long God na i givim Aisak long God.” Em i givim Aisak long God, na yumi inap tok bokis long dispela samting i bin kamap na tok olsem, bihain long dispela, Abraham i kisim bek Aisak long matmat.
Nogat, yumi mas redi long bilip olsem God bai askim yumi long givim olgeta samting long em, kain olsem em i givim planti samting long yumi. Maski yumi save olsem Buk Baibel i skulim yumi olsem, em i hat tru long bilipim. Olgeta Kristen manmeri i tok ol i laik bihainim tok bilong God, tasol planti bilong ol i no save mekim olsem. Ol i save bihainim sampela pasin bilong ol Kristen lain tasol.
Yumi mas harim tok bilong God. Yumi mas daunim yumi yet aninit long ol traim i kam long God. Yumi i mas wok long amamasim God long kisim tok orait long em. God i mas skulim yumi long wokabaut long dispela laip wantaim em tasol, na dispela bai givim yumi narakain bel isi tru namel long ol traim em i givim yumi.
SAMPELA TINGTING
Askim God long helpim yu long daunim yu yet long aninit long olgeta traim em i givim yu, na stap bel isi tru wantaim.
Ritim: Stat 22:15-19
“Mi Bikpela, mi tok tru tumas long nem bilong mi yet olsem. Yu gat dispela wanpela pikinini tasol na yu no bin pasim em. Olsem na bai mi mekim gut tru long yu.” – Stat 22:16-17
Ol sumatin i save raitim ol eksam long skul bilong painimaut sapos ol i save gut tru long ol samting ol i lainim long skul, o nogat. Na dispela traim God yet i givim Abraham i bilong painimaut sapos Abraham i lainim pinis pasin bilong laikim tru God antap long olgeta arapela samting, o nogat.
Em i hat tru long save long tingting bilong God taim em i givim dispela traim long Abraham. Em i wanpela bikpela na hatpela traim tru; kain olsem ol gutpela sumatin stret i save kisim. Na dispela traim em i las traim bilong Abraham: em i kam klostu long pinis bilong wokabaut bilong Abraham wantaim God.
Tasol, sapos yu bilipim Buk Baibel, bai yu klia olsem i gat sampela arapela manmeri i bin kisim dispela kain traim tu, maski em i bikpela na hatpela traim stret. Man i bin raitim Buk Song 73 i bin bungim planti hevi na traim, na em i tok, “Husat arapela i stap long heven na i save lukautim mi? I no gat narapela man, yu wanpela tasol. Orait God, mi laikim yu moa yet. Mi no laikim olgeta samting bilong graun olsem mi laikim yu” (lain 25). Abraham tu i mas autim dispela tok tu: Mi no laikim olgeta samting bilong graun olsem mi laikim yu.
Na moa, taim God i singautim Abraham, bilong bungim ol lain bilong kontrak bilong em, em i kain olsem taim Jisas i singautim ol disaipel long bihainim em, bilong bungim ol lain long nupela kontrak. Jisas i tok, “Bihainim mi.” Na ol i lusim umben bilong ol na bihainim em. Na tu yumi ken ritim Matyu 10:37-39 we God i tokim ol lain bilong em olsem: “Man i laikim tumas papa o mama bilong en....o pikinini man o pikinini meri... na i no laikim mi moa yet, em i no inap i stap pren bilong mi.” Kontrak bilong God wantaim yumi em i bikpela samting stret na God i tingim dispela kontrak olgeta taim, kain olsem ol gutpela man o meri i save tingim na bihainim kontrak bilong marit. Bikpela i no inap serim yumi wantaim ol arapela lain. Na yumi olgeta i mas redi long autim dispela tok: “Mi no laikim olgeta samting bilong graun olsem mi laikim yu.”
SAMPELA TINGTING
Ritim Buk Song 73, na autim lain 25 olsem prea bilong yu yet i go long God.
Ritim: Stat 22:3-14
Tupela i kamap long dispela ples God i bin tok long en, na Abraham i wokim alta na i putim paiawut antap long en. Na em i pasim pikinini bilong en Aisak long rop. Na em i putim em antap long paiawut long alta. Orait Abraham i kisim naip na i laik kilim pikinini. – Stat 22:9- 10
Long nait Abraham em i tingting i stap, na em i kamap redi long bihainim tok bilong God. Em i kirap long moningtaim tru long mekim olsem. Olsem wanem? Ating em i mas les long kirap bikos em i les long bihainim dispela tok bilong God, a? Tasol, nogat. Long moningtaim tru Abraham i kirap (lain 3).
Na long hia Buk Baibel i stori long olgeta samting Abraham i mekim taim em i kirap
pinis. Abraham i redim donki, em i kisim Aisak wantaim tupela wokboi bilong em. I kain olsem wanpela muvi we yumi inap lukim olgeta liklik samting i kamap. Na taim Abraham
i wokabaut long rot inap 3-pela de (em i longtaim stret sapos em i laik senisim tingting bilong em), orait em i kamap long ples God em i makim pinis. Na gen yumi ritim olgeta samting em i mekim: em i redim paiwut, wokim alta, pasim pikinini Aisak long rop na putim em antap long alta, na em i kisim naip bilong kilim em.
Olgeta dispela liklik hap bilong dispela stori i bikpela samting tru, na yumi mas tingting gut long olgeta dispela samting. Long olgeta dispela liklik samting Abraham i mekim, yumi ken klia olsem Abraham i wok long bihainim tru tok bilong God. Em i gat laik bilong bihainim God, olsem na em i wokabaut long dispela rot bilong bihainim God. Na yumi
tu i mas mekim wok long bihainim Bikpela. I no samting bilong toktok tasol. Nogat, em i samting long mekim wok. Sampela manmeri i laik mekim bikpela tok stret long bilip na long bihainim Bikpela, tasol ol i les long mekim olgeta liklik na bikpela wok long bihainim tok bilong God. Taim Jems, wanpela wokboi bilong God, i lukim sampela lain i save mekim olsem, em i tok, “Bipo tumbuna bilong yumi Abraham em i putim pikinini bilong en Aisak long alta na i givim em long God olsem ofa. Olsem na long dispela taim God i lukim pasin bilong en na i kolim em stretpela man” (Jems 2:21).
Abraham tupela Aisak i wokabaut i go antap long dispela maunten. Aisak i karim paiawut bilong ofaim em yet. Papa yet i karim naip.“Na tupela i wokabaut i go.”Tupela i no toktok. Em i narakain wokabaut olgeta.
SAMPELA TINGTING
God i wok long traim yu yet? Yu inap lainim wanem samting long dispela traim bilong Abraham?
Ritim: Stat 22:1-3
Orait God i tok, “Yu gat wanpela pikinini tasol, Aisak, na yu laikim em tumas. Yu mas kisim dispela pikinini na yu go long hap bilong Moria, na bai mi soim yu wanpela maunten. Na long dispela maunten yu mas givim Aisak long mi olsem ofa bilong paia i kukim olgeta.” – Stat 22:2
Taim yumi wokabaut wantaim Bikpela, i min olsem yumi mas daunim yumi yet na redi long givim yumi yet long God. Abraham i lusim as ples bilong em na papamama bilong em, na tu em i ranawe long Kenan i go long Isip, na em i lusim Lot tu. Na Abraham tupela Sara i mas lus tingting bilong bihainim plen bilong ol yet bilong kisim wanpela bebi. Ol i mas lukim hevi na krai, na ol i mas wet inap long taim Sara i no inap karim pikinini moa. Taim tupela i lapun pinis, orait God inapim promis bilong em. Pastaim tupela i lap taim tupela i no bilip, tasol God i senisim dispela lap i kamap olsem lap bilong amamas bikos tupela i lukim God inapim olgeta promis bilong em.
Orait nau Abraham i mas redim em yet bilong narapela traim, wanpela las traim. Ol man i bilip, ol i save bungim ol traim, na ol i olsem ol sumatin i mas lainim pasin bilong daunim ol yet, bilong redi long lusim olgeta samting bilong ol, olsem ol i ken hop tru long Bikpela tasol.
Aisak i sindaun i stap na pilai klostu long haus sel bilong Abraham tupela Sara. Na tupela
i lukim em i stap. Dispela pikinini i olsem wanpela mak tru bilong ol gutpela pasin bilong Bikpela – em i save bihainim olgeta tok bilong em. Tupela i klia tru long dispela taim ol i lukim dispela pikinini man bilong ol i wokabaut long san. Taim Aisak i lap, Abraham na Sara i amamas na lap wantaim bikos God em i marimari long ol. God em inapim ol promis bilong em, na ol i luksave long dispela, taim ol i lukim Aisak.
Tasol nau, Abraham i mas givim Aisak long God olsem wanpela ofa.
Em tru, yumi mas karim diwai kros bilong yumi na bihainim Bikpela, a? Na yumi mas redi long givim olgeta samting bilong yumi long em.
Dispela em i las traim bilong dispela Papa bilong ol manmeri bilong bilip. Abraham em i man i wokabaut tru wantaim God. Moa, God yet i wokabaut wantaim Abraham. Na God i tokim yumi man na meri bilong givim planti samting long em, bilong yumi bai kisim planti moa yet.
SAMPELA TINGTING
Yu yet yu “lusim” wanem samting bilong yu bikos yu i laik wokabaut wantaim God?
Ritim: Stat 18:22-23
Na Sara i pret na em i giaman na i tok, “Mi no lap.” Na Sara i tok olsem, “God i mekim gutpela pasin long mi, na mi amamas na mi lap. Na olgeta man i harim dispela bai ol i amamas wantaim mi.” – Stat 18:15; 21:6
Taim yumi ritim dispela stori, ating yumi bai i gat dispela kain askim: Bilong wanem Abram tupela Sara i mas wet longpela taim stret long kisim dispela bebi? Bilong wanem God i wet inap long taim Sara i no inap karim pikinini moa, na em i givim wanpela bebi long tupela?
God i no save givim yumi bekim long dispela kain askim. Long Jon 9 yumi ritim wanpela stori long dispela man em i aipas pinis taim mama i karim em. Taim ol disaipel i gat sampela askim long dispela, Jisas i tok olsem: “Dispela samting i bin kamap bai ol manmeri i ken lukim samting i kamap long dispela man, na wok bilong God i ken kamap ples klia long ol.”
I min olsem God em i God. Em i winim yumi; tingting bilong em i winim tingting bilong yumi. Yumi no ken wari long as bilong ol tingting bilong em. Nogat, yumi mas bilipim em tasol. Olsem na, God i no soim klia tingting bilong em long Abram na Sarah. Nogat, em i givim em yet long ol.
Taim spring i kam, Sara i lukim pinis pikinini bilong promis. Na em i autim dispela tok i putim ples klia olsem em i amamas tru long Bikpela: “God i mekim gutpela pasin long mi, na mi amamas na mi lap.”Taim em i givim susu long Aisak, em i kisim bel isi long Bikpela. Aisak! Lap! Bel hevi na wari bilong Sara i tanim i go long amamas bikos God i redim dispela amamas long em na long olgeta lain i bilip tru long ol promis bilong em.
Yumi ken i stap strong. No ken pret. Tru tumas, ol man i krai na karim pikinini kaikai i go bilong planim, bihain bai ol i singim song bilong amamas. Dispela God bilong gutpela save na bikpela strong i givim wanpela pikinini man long Sara na long Maria. God em i God bilong inapim olgeta promis bilong em! Olsem na yumi bai i lap.
SAMPELA TINGTING
Yu lukim dispela kain lap long laip bilong yu, o nogat?
Ritim: Stat 18:22-23
Na Abraham i tok gen, “Bikpela, yu no ken kros. Mi laik mekim wanpela tok moa. Sapos i gat 10-pela gutpela man tasol i stap, orait olsem wanem?” Na Bikpela i tok olsem, “Sapos i gat 10-pela gutpela man i stap, orait bai mi no ken bagarapim taun, na ol dispela gutpela man i no ken lus.” – Stat 18:32
Sampela taim God i autim ol plen bilong em long ol manmeri long dispela graun. Na tu, God i yusim pasin na wok bilong man long inapim ol plen bilong em. God i tokim ol lain bilong em long tingim dispela graun long beten.
Taim ol lain bilong kontrak bilong God i prea long ol hevi i stap long dispela graun, ol i mas strong long prea long em, tasol ol i mas daunim ol yet tu. Ol i ken strong long prea bikos
ol i klia long God em i husat. Tingting gut long ol dispela tok: “Ating yu laik bagarapim
ol gutpela man wantaim ol man nogut?” (lain 23, 25). “Jas bilong olgeta graun, em i mas bihainim stretpela pasin” (lain 25). Ol bilip lain i ken strong long prea bikos ol i save gut long stretpela pasin bilong God.
Tasol ol i mas daunim ol yet na prea tu. Yumi mas klia tru olsem yumi stap man tasol, na God em i God tru. “Mi man nating tasol. Mi no inap tok long wanpela samting,” Abraham i tok (lain 27). “Bikpela, yu no ken kros long planti toktok bilong mi” (lain 27, 30, 32). Abraham em i man bilong prea bikos em i strong long prea, na bikos em i daunim em yet taim em i prea.
God i singautim Abraham na olgeta lain bilong em long lusim dispela graun. Em i no mekim olsem bikos em i laik lus tingting long olgeta arapela manmeri long dispela graun. Nogat, em i laik yusim Abraham na ol lain bilong em bilong blesim ol arapela manmeri long dispela graun. Na nambawan rot olgeta lain bilong God i mas bihaimim bilong blesim ol arapela lain bilong dispela graun i olsem: ol i mas prea strong long ol arapela lain.
Krais i kam pinis, olsem na yumi mas strong moa yet long autim tok bilong em long olgeta manmeri long dispela graun, na yumi mas prea strong tru long God i ken salim salvesen bilong em i go aut long planti hap long dispela graun. Yumi mas prea long ol lain i no save prea. Yumi mas strong long askim God long lusim belhat bilong em. Yumi mas prea na mekim wok olsem tok bilong Jisas i ken i go aut long olgeta liklik hap long dispela graun.
SAMPELA TINGTING
Yu save long sampela lain i no save prea? Orait, yu yet yu prea strong long ol!
Ritim: Stat 18:16-21
Na Bikpela i tingting olsem, “Dispela samting mi laik mekim, em mi no ken haitim long Abraham.” – Stat 18:17
Sapos wanpela man i dai na polis o wanpela arapela man i mas i go tok save long papa o mama bilong em, ating em bai i les tru long tokaut olsem. Bel bilong em bai i hevi tru. Na taim ol lain long haus i lukluk long ai bilong em, sampela taim ol bai i klia hariap olsem em i gat hevi tru long tokim ol.
Na sampela taim tu, God yet i autim tingting na plen bilong em long ol lain bilong graun. God i bin autim gutpela nius long dispela graun, na dispela nius i wok long amamasim yumi olgeta de, na long givim yumi bikpela hop. Tasol God i autim sampela tok long yumi na dispela tok i givim bel hevi long yumi.
Long dispela graun, namel long yumi, i gat planti manmeri i no save tru long Bikpela. Ol i mekim wok na ol i wokabaut long dispela graun, tasol ol i no save olsem wanpela de ol bai i lukim pes bilong God, na ol bai sanap long kot bilong em. Ol i no bilipim tok bilong God.
Na em i no isi long stori long dispela hevi. Nogut yumi autim strongpela tok long hel tasol. Em i no isi, tasol yumi no ken pasim maus bilong yumi olgeta taim, taim dispela hevi i wok long stap strong long bel bilong yumi. Yumi yet, yumi save wanem samting bai kamap. Yumi klia long olgeta promis bilong God, tasol yumi klia tu long ol tok lukaut bilong God. Yumi mas autim ol dispela tok promis bilong God, na God bai soim yumi rot long autim ol tok lukaut bilong em tu. God bai i givim strong na marimari long yumi long mekim olsem.
SAMPELA TINGTING
Dispela teks bai karim wanem kaikai insait long laip bilong yu?
Ritim: Stat 18:9-15
Na Bikpela i askim Abraham olsem, “Bilong wanem Sara i lap na tok, ‘Mi lapun pinis na bai mi karim pikinini olsem wanem? Abraham, harim. I no gat wanpela samting Bikpela i no inap long mekim. Long dispela mun long yia bihain, em long taim mi makim pinis, bai mi kam bek, na long dispela taim Sara bai i gat pikinini man.” – Stat 18:13-14
Inap i go 25 yia Abraham na Sara i bin wokabaut long rot wantaim Bikpela. Na long olgeta dispela yia, ol i gat dispela bikpela hevi: Sara i no karim wanpela pikinini.
Buk Baibel i makim 8-pela taim we God i bin autim promis gen long tupela, olsem Sara bai karim wanpela pikinini. Pastaim God i promisim Abraham olsem em bai mekim ol lain tumbuna bilong em i kamap bikpela lain tru (Stat 12:2). Na taim Abraham i ting olsem wokman bilong em, Elieser, bai kisim ples bilong em, God i tokim em olsem pikinini tru bilong em bai i kisim ples bilong em.
Ating Abraham tupela Sara i stori planti long dispela promis bilong God long olgeta de. Ol i klia olsem Abraham bai kisim wanpela pikinini, tasol ol i wari bikos ol i ting Sara yet i no inap long karim pikinini bilong Abraham. Olsem na tupela i ting olsem Ismael bai stap dispela pikinini bilong promis. Tasol God i klia moa yet: “Meri bilong yu, Sara, bai i karim wanpela pikinini man, na yu mas kolim nem bilong en Aisak” (Stat 17:19).
Na God i Gat Olgeta Strong, bihain em i bin salim wanpela ensel i go long Maria long promisim em olsem em bai karim Jisas, em i go long Sara na tokim em olsem, “Long dispela mun long yia bihian em bai i karim pikinini man bilong promis” (Stat 18:10).
Na Sara i lap.
Yumi no ken hariap long kotim Sara long pasin bilong em, taim em i lap. Olgeta lain i bilip long God i pundaun long sin sampela taim. Sampela taim em bai krai na lap taim em i no bilip. God i ken lusim sin bilong yumi taim yumi no bilipim tok bilong em long ol hevi bilong yumi. Olgeta lain bilong bilip bai pundaun sampela taim.
I gat sampela samting na Bikpela i no inap long mekim?
SAMPELA TINGTING
Yu bilip tru olsem God em inap long mekim olgeta samting, o nogat?
Ritim: Stat 18:1-8
Mit i tan pinis, orait Abraham i kisim dispela mit wantaim susu na sis ol i bin wokim long susu bilong bulmakau, na em i givim long dispela tripela man. Ol i kaikai i stap, na Abraham i sanap klostu long ol, long as bilong wanpela diwai. – Stat 18:8
Dispela em i narakain samting olgeta. God i sindaun na kaikai long haus bilong Abraham.
God em i Gat Olgeta Strong, olsem na yumi mas brukim skru long em, tasol God yet i kam sindaun na kaikai wantaim Abraham. Na nogut yumi ting dispela em i piksa bilong God tasol, na em i no God tru i kam lukim Abraham. Nogut yumi bagarapim tok bilong God olsem. Sampela taim ol man i ting ol i mas kamap narakain long stap klostu long God. Tasol yumi mas stap olsem man tasol.
Yumi ol man i no inap wok long kamap wankain olsem God. Satan em i bin wok long mekim olsem. Tasol God bilong Buk Baibel i bin daunim em yet na kam long yumi. Planti taim ol manmeri i ting olsem ol bai i kam klostu moa long God sapos ol i kamap olsem spirit samting. Tasol God em i kam long yumi, em i kamap man olsem yumi yet. “Tok em i bin kamap man” (Jon 1:14). Dispela tok em i bikpela samting long olgeta stori long Buk Baibel.
God bilong heven na graun i wokabaut i go long haus sel bilong Abraham wantaim tupela arapela man. Taim Abraham i strong long askim ol, ol i sindaun na kaikai long as bilong wanpela diwai. God i sindaun. Abraham i stap klostu long tebel na em i kisim mit wantaim susu bilong bulmakau na em i givim long ol. Sara i stap insait long haus sel.
Bihain God i kam long yumi long Jisas Krais. Na em i go long sampela marit long amamasim ol, em i go long sampela haus krai na givim amamas long ol. Dispela i no wanpela piksa bilong God tasol. Nogat. Em i God tru i kam long yumi.
Nogut yumi ting olsem yumi mas i go long wanpela naispela haus lotu, o antap long wanpela bikpela maunten, long prea long God. Lusim dispela tingting. God i stap long haus bilong yumi, long skul na long wok bilong yumi. Sapos yumi amamas long bung wantaim em, olgeta de bilong yumi bai i kamap naispela tru.
SAMPELA TINGTING
Yu lukim God long wanem hap tude?
Ritim: Stat 17:9-14
Na yupela i mas bihainim dispela mak bilong kontrak bilong mi. Yupela i mas katim skin bilong kok bilong olgeta man long lain bilong yupela. – Stat 17:10
Namba wan samting God i mekim em i olsem: em i givim ol promis long lain bilong em. Em i mekim olsem taim em i singautim Abram (Stat 12). Na bihain, em i strongim dispela tok promis long wanpela kontrak (Stat 15). Na bihain long dispela, em i strongim dispela kontrak bilong em taim em i givim dispela mak bilong dispela kontrak long ol lain bilong em, dispela mak bilong katim skin (Stat 17).
Wanpela tok piksa long dispela kain kontrak em i kontrak bilong marit. Man bai givim wanpela promis long meri, na meri bai givim wanpela promis long man. Tupela i wokim wanpela kontrak taim ol i autim tok promis bilong ol yet. Na planti taim ol bai givim ring bilong pinga olsem wanpela mak bilong dispela kontrak. Dispela ring i putim ples klia olsem tupela bai i stap tru long ol promis tupela i mekim pinis.
Dispela mak God yet i givim long ol lain bilong em, em i putim ples klia olsem God em i gutpela stret. Long Nupela Kontrak, God i givim ol mak long lain bilong em tu – Baptais na Kaikai bilong Bikpela. Tasol em i klia olsem wanpela ring bilong pinga i no min olsem yu marit pinis. Wanpela ring i no gat mining sapos i no gat man o meri i laik marit o sapos i no gat sampela promis bilong en.
Na sampela taim, long Olpela Kontrak, mak bilong Kontrak i kamap olsem mak nating, bikos ol lain bilong God i no tingim ol promis bilong em na ol i no bihainim ol tok bilong Kontrak tu. Na tu, long Nupela Kontrak, na long ol sios long tude tu, planti lain bai kisim ol mak bilong kontrak tasol ol i no kisim tru ol promis bilong God long trupela bilip. Sampela lain bai kisim baptais, tasol ol i no save tru long Krais. Sampela lain bai kisim Kaikai bilong Bikpela, tasol ol i no stap aninit long Bikpela. Na God em i bel nogut tru taim sampela lain i no kisim ol mak bilong kontrak long trupela bilip.
Tasol taim yumi wanbel wantaim Bikpela, na yumi bilip tru long em, dispela ol mak bai i gat bikpela mining insait long laip bilong yumi: God, em i wokim dispela kontrak wantaim yumi, na em bai inapim olgeta tok bilong em tu. Na em bai i no inap lusim yumi!
SAMPELA TINGTING
Taim yu lukim wanpela bebi i kisim baptais o taim yu kaikai long Kaikai bilong Bikpela, dispela mak i gat wanem mining insait long laip bilong yu?
Ritim: Stat 17:1-7
Abram i gat 99 krismas na Bikpela i kamap long em na i tok olsem, “Mi God I Gat Olgeta Strong. Yu mas aninit long mi oltaim, na mekim ol stretpela pasin tasol long ai bilong mi.” – Stat 17:1
“Mi God i Gat Olgeta Strong.” Abram em i lapun pinis, na em i amamas long harim dispela tok bilong God. Em i no askim God planti ol askim. Em i harim tok bilong God tasol.
Taim yumi wokabaut wantaim God em i bikpela samting bikos God inap long mekim olgeta samting. Abram i mas askim em yet, “God bilong mi em i husat?” Na God i tok, “Mi God i Gat Olgeta Strong. Yu mas aninit long mi oltaim, na mekim ol stretpela pasin tasol long ai bilong mi.” I min olsem, pasin bilong ol i mas putim ples klia olsem ol i bilip tru long dispela God i Gat Olgeta Strong.
Sampela taim yumi paul na yumi wari na yumi laik givim planti askim long God. Tasol sampela taim God bai kisim ol dispela askim na tok olsem: “Mi yet mi God i Gat Olgeta Strong.” Na em i tokim yumi olsem, “Yu mas aninit long mi oltaim, na mekim ol stretpela pasin tasol long ai bilong mi.”
Na God i senisim nem bilong Abram i go long Abraham. Maski em i no kamap tumbuna bilong planti manmeri pinis, God i givim dispela nem Abraham long em olsem, “tumbuna bilong planti manmeri.” Em i promis tru bilong God bikos God em i God bilong inapim ol promis bilong em. Na dispela nem bilong Abraham i nem bilong bilip, bilong bilipim tru tok bilong dispela God i Gat Olgeta Strong.
Dispela tupela lain bilong dispela kontrak i bung. God i toktok, na Abraham i brukim skru na putim pes i go daun long graun. Taim yu bilip long God, bai yu brukim skru long em.
Na yumi stap insait long dispela lain bilong bilip; yumi kisim ol dispela promis pinis. Olsem na yumi tu mas strong long bilip long God long bel bilong yumi. Yumi mas wok long pasim maus bilong yumi na tingting long God. Apim em. Daunim yumi yet. Em i God. Em i Gat Olgeta Strong.
SAMPELA TINGTING
Stap isi, pasim maus bilong yu, na daunim yu yet long ai bilong dispela God i Gat Olgeta Strong.
Ritim: Stat 16:4-9
Tasol mi laik bai Bikpela i ken skelim tok bilong mitupela. – Stat 16:5
Taim tupela Abram na Sarai i pasim tok pinis long bihainim tingting na rot bilong ol yet,
ol i bungim kain kain hevi. Sarai i wok long mangal. Hagar i wok long bikhet bikos em i ting olsem em yet i helpim tru famili bilong Abram. Em i apim em yet long ai bilong ol lain bilong Sarai na em i bikhet tru.
Na em i isi long save wanem samting bai i kamap long dispela rot. Em i pasin bilong yumi man. Sarai em i kros nogut tru na em i bel nogut long Abram. Em i kolim nem bilong God long em i ken skelim tupela: “Tasol mi laik bai Bikpela i ken skelim tok bilong mitupela.” Na Abram em i les na em i tokim Sarai olsem, “Harim. Hagar em i wokmeri bilong yu tasol. Yu bos bilong en na yu ken mekim wanem samting yu ting i gutpela long mekim.” Na Sarai i birua long Hagar.
Em i hat tru long skelim pasin bilong Abram, Sarai na Hagar – husat i mekim pasin nogut, na husat i mekim stretpela pasin. Taim ol pasin nogut, bikhet, mangal na kros pait i wok long kam insait long laip bilong ol manmeri, husat bai inap klia long asua bilong ol dispela samting? Ol dispela hevi i gat as bilong en. Ol hevi i wok long kamap taim tupela Abram na Sarai i lusim gutpela rot bilong Bikpela na bihainim narapela liklik rot bilong ol yet. Ol i mas tanim bel, na go bek long rot bilong God.
God i ken marimari long planti manmeri i wok long lusim rot bilong God na bihainim laik bilong ol, na planti ol hevi i save kamap. Taim ol i lusim rot bilong Bikpela, laip bilong ol bai paul olgeta na hau bai ol i stretim? Ol i mas lusim ol kros pait, na prea olsem God bilong marimari i ken kisim ol i go bek long rot bilong em yet.
Na long laip bilong Abram, Sarai na Hagar, God yet i wok long stretim laip bilong ol, olsem em i bin mekim long laip bilong ol bipo. Em i no mekim save long ol. Nogat. Ol yet i sem long sin bilong ol yet.
SAMPELA TINGTING
Dispela stori i ken skulim yumi olsem wanem?
Ritim: Stat 16:1-3
Bikpela i pasim bel bilong mi na mi no inap karim pikinini. – Stat 16:2
Dispela samting Sarai na Abram i mekim i bin bihainim kastom ol manmeri bilong dispela taim i save bihainim. Taim wanpela meri i no inap kisim bel, em bai orait long em i givim wokmeri bilong em long man bilong em, long wokmeri i ken karim pikinini bilong em yet. Em olsem pasin bilong ol long adoptim ol pikinini.
Olsem na long tingting bilong man na long ai bilong lain bilong ol, Abram na Sarai i mekim gutpela pasin. Abram na Sarai i gat bikpela hevi bikos ol i no kisim pikinini yet. Olsem na Sarai i givim wokmeri bilong em long man bilong em.
Tasol God yet i bin givim narapela rot long Abram na Sarai long tupela i mas bihainim,
na em i no samting bilong bihainim ol pasin bilong ol lain bilong ol yet. Ol i stap long rot bilong promis bilong God, na ol i mas karim diwai kros bilong ol long bilip. Tupela i mas stap strong long rot bilong promis na bilipim strong ol promis bilong God. Tasol long dispela plen bilong ol yet, ol i lusim rot bilong God na bihainim rot na laik bilong ol yet.
Na yumi no ken kotim ol. Tenpela yia i go pinis na ol i no kisim pikinini yet. Yumi i klia bilong wanem Sarai i pundaun na mekim pasin bilong em yet. Na Abram tu i mekim dispela pasin. Em i lusim gutpela rot God i makim bilong em bilong wokabaut long em. Tupela wantaim i lusim dispela rot bilong God. Na planti trabel i kamap long dispela.
Bilong wanem? Bikos taim yumi laik stap wanbel wantaim God, yumi mas karim diwai kros bilong yumi long bikpela rot bilong bilip, dispela rot i bihainim ol promis bilong God.
SAMPELA TINGTING
Sampela taim, long laip bilong yu yet, yu tingting long “lusim rot bilong Bikpela,” o nogat?
Ritim: Stat 15:7-18
Long dispela de yet Bikpela i mekim kontrak wantaim Abram... – Stat 15:18
Long dispela teks yumi luksave long kontrak God i wokim wantaim tumbuna bilong dispela nesen God bai yusim long bringim salvesen long dispela graun.
Planti ol kantri nabaut long Israel i save yusim dispela pasin (katim abus long tupela hap) long wokim wanpela kontrak.
Wanpela kontrak i makim taim we wanpela i givim promis long arapela na askim dispela arapela long mekim sampela samting long inapim dispela kontrak. Taim ol lain i mekim kontrak na katim ol abus long tupela hap i olsem tok lukaut - nogut wanpela i bagarapim o brukim dispela kontrak. Ol i mas stap tru long dispela kontrak bilong ol!
Tasol dispela kontrak long dispela teks i narakain liklik. Long dispela kontrak God yet i promis long stap tru long dispela man Abram na ol pikinini bilong en tu. God em i yusim dispela kain kontrak ol man i save yusim long putim ples klia olsem em i God bilong inapim ol promis bilong en, na bilong strongim bilip bilong Abram.
Abram yet i redim ol samting, tasol God i larim em i wet liklik pastaim. Abram em i redi i stap, na taim sampela tarangau i kam na i laik kaikaim dispela abus, Abram i rausim ol. Na Abram
i slip i dai tru, na bikpela tudak i karamapim em. Na long dispela taim, God yet i toktok wantaim em, na givim ol promis long em.
Taim smok na paia i kamap dispela i soim klia olsem God yet i stap. Na God yet tasol i wokabaut namel long tupela lain abus (ol arapela taim tupela lain i wokim wanpela kontrak tupela wantaim i mas wokabaut namel long dispela tupela lain abus). Dispela i putim
ples klia olsem God yet bai i go pas long wok bilong dispela kontrak; em i kontrak bilong marimari tasol. God em i givim nating ol bikpela bikpela promis, na yumi no ken pret long askim em long inapim ol promis bilong em.
Na God i askim ol lain bilong kontrak long wokabaut wantaim em long bilip, na long bihainim em. “Bikpela i tokim yumi pinis long ol gutpela pasin, na em i laik bai yumi mekim pasin olsem tasol. Yumi mas bihainim stretpela pasin, na laikim tru ol arapela man, na daunim tingting bilong yumi yet na i stap wanbel wantaim God bilong yumi, na bihainim em wanpela tasol” (Maika 6:8).
SAMPELA TINGTING
Tingting long na tok tenkyu long ol promis God yet i givim pinis long yu.
Ritim: Stat 15:1-6
Abram i bilipim tok bilong Bikpela. Olsem na Bikpela i kolim em stretpela man. – Stat 15:6
Taim Krais i kam ol lain bilong Juda i bruk long tupela hap. Wanpela hap bilong ol dispela pikinini bilong Abraham i bilip long Jisas olsem dispela Mesaia bilong promis. Tasol, narapela hap i givim baksait long em. Na dispela tupela lain i pait i stap. Ol i laik save olsem: Husat em i pikinini tru bilong Abraham?
Pol (dispela man pastaim em i givim baksait long Jisas na bihain em i bilip long em) em i save autim dispela tok i kam long Stat 15:1-6 long putim ples klia olsem ol lain i bilip long Krais ol i pikinini tru bilong Abraham. Pol i tok: “Gutnius bilong Krais i askim yumi long
bilip, na bilip tasol. Gutnius i no samting bilong bekim ol gutpela samting yu save mekim; gutnius i putim ples klia wok bilong God yet. Na yumi mas bilipim dispela tok. Na bai yu stap stretpela long ai bilong God. God i no akseptim yu bikos yu yet yu gutpela. Nogat. Em I akseptim yu bikos em yet i gutpela. Yu no stap stretpela long ai bilong God bikos yu yet yu mekim planti wok. Nogat. Yu stap stretpela long ai bilong God bikos Krais i mekim olgeta wok. Bilip tasol!
Na taim Pol i autim dispela teks long Stat 15:6, em i putim ples klia olsem Bikpela i kolim
em stretpela man long bilip tasol. Na em i wankain long yumi olgeta. Bilip tasol. “Olsem na yupela i ken save olsem, ol man i bilip long gutnius, ol i pikinini tru bilong Abraham” (Galesia 3:7).
Olsem na pikinini bilong Abraham i kamap bikpela namba tru, olsem planti ol sta bilong skai. God inapim tru hop bilong Abraham. Long Krais yumi tu i kisim blesing bilong Abraham.
Bilip em i olsem dua bilong kam insait long famili bilong God. Na dispela famili i olgeta lain i wokabaut long bilip long God inap long taim em inapim olgeta promis bilong em pinis.
SAMPELA TINGTING
Sapos wanpela man i askim yu bilong wanem yu bilip, bai yu bekim dispela askim olsem wanem?
Ritim: Stat 14:13-24
Na Melkisedek, em king bilong Salem na em i pris bilong God Antap Tru, em i bringim bret na wain i kam long Abram. Na Melkisedek i givim blesing long Abram olsem...Na olgeta samting Abram i bin kisim em i tilim long 10-pela hap na i givim wanpela hap long Melkise- dek. – Stat 14:18-20
Taim pait i pinis, bikpela samting i kamap: Abram i kisim blesing long Melkisedek. Yumi i no save planti samting long dispela pris bilong God Antap Tru. Em i no stap insait long lain bilong God (Yumi harim tok long em long Buk Song 110, na tu long Hibru 5 na 7).
Olsem na dispela samting i narakain samting tru. Long wanem, Abram na famili bilong em
i gat bikpela namba tru long dispela taim. Tasol hia, hetman bilong nesen bilong God em i bin kisim olgeta promis bilong God, em i brukim skru long dispela man long narapela kantri na dispela man i blesim em. (Hibru 7:7 i tok: “Yumi save gut olsem, man i givim blesing em
i bikman. Na man i kisim blesing long em, em i stap aninit.”) Na moa, Abram i save olsem Melkisedek i gat namba bikos em i givim takis long em: “Na olgeta samting Abram i bin kisim em i tilim long 10-pela hap na i givim wanpela hap long Melkisedek.”
Dispela bung bilong Melkisidek na Abram i soim klia olsem Abram i save olsem em bai i kisim planti ol gutpela blesing stret–na dispela blesing i no bilong planti pikinini na gutpela graun tasol. Dispela stori i putim ples klia olsem Abram i gat narapela hop. Yumi save olsem dispela hop em i Jisas bikos yumi ritim Nupela Kontrak pinis. Long Jon 8:56 Jisas i tok, “Taim tumbuna bilong yupela Abraham em i tingting long lukim taim bilong mi, em i bin amamas. Na taim em i lukim pinis, orait bel bilong en i gutpela tru.”
Jisas em i nambawan pikinini man bilong Abram. Tasol em i Pikinini Man bilong God tu. Sapos Abram na ol tumbuna pikinini bilong em i no bin kamap long dispela graun, bai Jisas i no inap kamap tu. Tasol Jisas i kam long “narapela ples” tu, kain olsem dispela king Melkisedek. Na Abram i mas brukim skru long dispela Pris-King bilong kisim blesing bilong em.
SAMPELA TINGTING
Nambawan hop bilong yu em i husat?
Ritim: Stat 13:14-18
Lot i go pinis, na Bikpela i tokim Abram olsem, “Yu sanap hia na yu lukluk i go long olgeta hap... Na em i wokim alta bilong Bikpela long dispela ples.” – Stat 13:14,18
Abram i gat wanem kain tingting taim Lot yet i kisim nambawan gutpela hap graun, na dispela graun i bilong Abram long ol promis bilong God?
Em i hat tru long save gut long tingting bilong ol man taim ol i kisim pen na hevi long han bilong wantok bilong ol. Jisas i tok, “Na sapos wanpela man i laik kotim yu na kisim siot bilong yu, orait yu mas givim longpela klos bilong yu tu long em” (Matyu 5:40). Yumi i amamas long dispela tok na redi long harim? O yumi les long dispela tok?
Jisas i putim ples klia olsem yumi mas bungim ol gutpela samting bilong yumi long heven (Matyu 6:20). Na taim yumi mekim olsem, bai yumi stap fri tru long olgeta samting long dispela graun.
God i kam long Abram taim Lot i lusim em pinis. Na God i autim tok promis bilong em gen: “Lukluk i go long...” God i save autim tok bilong em gen long givim bel isi long yumi. God
i gat laik sapos yumi lukluk i go long promis bilong laip i stap oltaim oltaim, na yumi mas wokabaut long strong bilong bilip. Na taim God i stap nambawan samting long laip bilong yumi, yumi no inap wari tumas long kisim ol mani o kago samting.
Long las liklik hap long Stat 13 yumi lukim dispela samting. Abram i wokim alta long God. Na dispela em i samting bilong ol lain i bilip long God na bihainim em. Laip bilong yumi em i no samting bilong kisim planti mani o bilong kisim planti samting bilong yumi yet. Nogat, laip bilong yumi em i samting bilong givim glori na pres i go long God.
SAMPELA TINGTING
Askim God long helpim yu long lukluk i go long em bilong bungim ol gutpela samting long heven.
Ritim: Luk 18:24-30
Na Jisas i tokim ol olsem, “Mi tok tru long yupela, olgeta man i bin ting long kingdom bilong God na i lusim haus na meri na brata na papamama na pikinini, orait taim ol i stap yet long dispela graun God bai i givim ol planti samting tru, i winim ol samting ol i bin i gat bipo. Na long taim i laik kamap bihain, ol bai i kisim laip i stap gut oltaim oltaim.” – Luk 18:29-30
Taim dispela yangpela hetman i les long bihainim Jisas bikos em i les long harim tok bilong en, ol disaipel i laik save wanem samting ol yet bai kisim. Long wanem, ol yet i bin lusim planti samting bilong ol taim ol i bihainim Jisas.
Na bekim bilong Jisas i narakain bekim olgeta. Sampela taim yumi ritim stori long taim Jisas i tok strong long ol disaipel bilong em bikos askim bilong ol i kranki. Na long hia tu, i luk olsem askim bilong ol disaipel i kranki. Ating yumi bai ting olsem Jisas bai bekim askim bilong ol disaipel olsem:“Bihainim mi tasol; maski long pe yu bai kisim.”Tasol, nogat. Jisas i wok long skulim ol long gutpela laip stret ol bai i kisim taim ol i bihainim em.
I olsem Krais i opim ol windo bilong heven bikpela na soim klia olsem God i save givim planti samting tru long ol lain bilong en. “Yu bai win sapos yu bihainim mi,” em i tok, “Bai
yu kisim planti samting tru long dispela graun, na bai yu kisim laip i stap gut oltaim oltaim.” Sapos yu redi long lusim planti samting long dispela graun, bai yu kisim planti samting moa. Em i gutpela samting tru.
Planti taim yumi mas tingim tok lukaut bilong Jisas: “Sapos wanpela man i kisim olgeta samting bilong graun, tasol laip bilong em yet i lus, orait dispela olgeta samting bai i helpim em olsem wanem?”Tasol yumi mas tingim tok long dispela teks tu, olsem ol lain i redi long lusim planti samting long dispela graun, ol bai i kisim planti samting long kingdom bilong God.
Bikos yumi i lain bilong mekim sin, yumi save givim liklik samting long Jisas, na yumi ting olsem yumi bai kisim liklik samting tasol. Tasol yumi mas larim Spirit bilong God i skulim yumi long givim olgeta samting long Jisas, na redi long kisim planti gutpela samting long han bilong em tu, olsem Jisas yet i promisim yumi.
Jisas i skulim yumi olsem, God bilong yumi bai givim ol gutpela samting tru long yumi. Na bikos yumi bilipim dispela, orait yumi no ken pret long bihainim em.
SAMPELA TINGTING
Yu bilip olsem God em i God bilong givim planti ol gutpela samting long yu, o nogat?
Ritim: Luk 18:18-23
Na Jisas i tokim em olsem, “Bilong wanem yu kolim mi gutpela? God wanpela tasol em i gutpela.” – Luk 18:19
Taim yumi harim dispela askim bilong Jisas, “Bilong wanem yu kolim mi gutpela?” ating yumi bai i kirap nogut. Sapos yumi no inap long kolim Jisas gutpela, husat bai yumi inap long kolim gutpela?
“God wanpela tasol em i gutpela.”Tasol Jisas em i pikinini tru bilong God oltaim. Na moa, Baibel yet i tok olsem Josep (Luk 23:50) na Barnabas (Aposel 11:24) i “gutpela man.”
Tasol long dispela teks, Jisas i no min olsem em i no gutpela, tasol em i wok long stretim tingting bilong dispela yangpela man i kam lukim em. Dispela yangpela hetman i mas lukaut long hau em i save autim dispela tok “gutpela.” Dispela man i bin skelim ol pasin bilong ol man na “gutpela” pasin bilong ol tu wantaim ol pasin bilong ol arapela manmeri. Na yumi save mekim olsem tu.
Tasol Jisas i save skelim olgeta manmeri wantaim God. “God wanpela tasol em i gutpela.” Jisas i skulim yumi long askim laik bilong God long laip bilong yumi. Na taim Krais i autim laik bilong God long laip bilong dispela man (“Yu mas salim olgeta samting bilong yu, na dispela mani yu kisim yu mas tilim i go long ol rabisman...Na yu kam bihainim mi”), dispela hetman i ting olsem dispela askim em i bikpela tumas long em. Taim em i skelim em yet wantaim ol arapela lain bilong bilip, pasin bilong em i orait (“Taim mi pikinini yet na i kam inap long nau, mi save bihainim olgeta dispela lo”). Tasol dispela askim bilong Jisas em i bikpela tru.
Olgeta lain long dispela graun i stap long presens bilong God. Yumi no ken skelim yumi yet wantaim ol arapela man i bilip long God. Yumi no ken kolim ol arapela ol “gutpela” Kristen o “gutpela moa yet.” God yet bai i skelim pasin bilong yumi.
Ol lain i save long Jas bilong ol, ol i no inap larim ol arapela i grisim ol. Na tu, yumi no ken wari tumas taim ol arapela i daunim yumi.
SAMPELA TINGTING
Yu save skelim pasin bilong yu yet wantaim ol pasin bilong o arapela man i bilip long God, o yu save skelim yu yet wantaim ol pasin bilong God?
Ritim: Luk 18:9-14
God, mi no olsem ol arapela man, olsem na mi tenkyu long yu... – Luk 18:11
Ol man bilong dispela graun i save skelim ol man long ol arapela man. Na tu planti ol Kristen lain tu i save mekim olsem.
Dispela Farisi em i man bilong bilip na em i tok, “God...” Em i toktok long God, tasol em i wok long skelim em yet wantaim ol arapela man: “...mi no olsem ol arapela man, olsem na mi tenkyu long yu.” Em i save skelim pasin bilong em yet wantaim pasin bilong ol arapela. Na planti bilong yumi save mekim olsem. Na dispela Farisi, taim em i skelim pasin bilong em yet wantaim pasin bilong ol arapela man, i luk olsem em i winim ol stret. Em i winim stret man bilong kisim takis long sait bilong tambu long kaikai, na long tilim ol samting bilong em. I luk olsem em i winim stret dispela man bilong kisim takis.
Na Jisas i no tok olsem dispela man bilong kisim takis i winim dispela Farisi tu. Tasol dispela man bilong kisim takis em i save skelim laip bilong em wantaim ol gutpela pasin bilong God yet. Na em i beten. Na prea bilong em i go antap long God. Tasol prea bilong dispela Farisi
i no go antap long God; em i samting bilong skelim em yet wantaim ol arapela man. Tasol dispela man bilong kisim takis, em i paitim bros bilong em na em i singaut, “Mi man bilong mekim sin.”
Na dispela man bilong kisim takis em luksave long ol bikpela sin bilong em yet bikos em i skelim em yet long God. Na taim em – o yumi – i lukim ol stretpela pasin bilong God, bai yumi brukim skru na tok, “Mi man bilong mekim sin. Yu ken marimari long mi!”
Laip wantaim God em i narakain laip tru. Tasol em i laip tru- yumi no inap save long laip tru sapos yumi no save long God.
Sapos yu no save long God yu inap ting olsem yu naispela man o meri, taim yu skelim pasin bilong yu yet long pasin bilong ol arapela man. Tasol sapos yu no save long God, yu bai paul, na yu bai no inap klia tru long pasin bilong yu yet.
SAMPELA TINGTING
Yu save skelim yu yet long God? Na dispela i gat wanem mining insait long laip bilong yu?
Ritim: Stat 13:5-13
Orait Lot i sanap na i lukluk i go. Na em i lukim olgeta graun long ples daun bilong wara Jordan na olgeta hap i go inap long taun Soar. Dispela hap graun olgeta i gat planti wara na em i gutpela tru olsem naispela gaden bilong Bikpela na olsem graun bilong ol Isip... Orait Lot i tok long em bai i kisim olgeta graun long ples daun bilong wara Jordan...Na Lot i go sindaun namel long ol taun i stap long ples daun bilong wara Jordan, na em i wokim kem bilong en klostu long Sodom. – Stat 13:10-12
Planti taim yumi bai tingim ol skul yumi bin kisim taim yumi yangpela. Mi yet mi tingim taim wanpela tisa bilong mi i bin tok olsem: “Abram i olpela tru, na Lot em i yangpela. Em mobeta sapos Lot i bin askim Abram wanem graun em i laik kisim pastaim. Tasol Lot em i mangal, na Abram i daunim em yet. Olsem na yumi yet, yumi no ken go pas bilong kisim ol gutpela samting. Mobeta yumi daunim yumi yet.”
Na em i tru, na em i gutpela skul. Tasol dispela stori long Buk Baibel i gat planti moa skul bilong en tu.
Olgeta taim yumi save skelim pasin bilong ol man wantaim pasin bilong ol arapela man. Em i pasin tru bilong yumi. Taim yumi skelim pasin bilong ol arapela olsem, yumi bai wok long skelim pasin bilong em, olsem em i gutpela man o man nogut, o sapos em i gat liklik mani o planti mani tru, o sapos em i naispela man o em i save tingim em yet.
Tasol Buk Baibel i skulim yumi long narapela rot. Yumi i mas skelim pasin bilong yumi na ol arapela wantaim pasin bilong God! Yumi mas skelim yumi yet wantaim dispela God Antap Tru. Na taim yumi klia long dispela, bai yumi les long skelim pasin bilong ol man wantaim ol pasin bilong ol arapela man.
Buk Baibel i no save daunim pasin bilong Lot. 2 Pita 2:8 i tok olsem Lot em i “stretpela man em i stap namel long ol Sodom, na em i lukim pasin nogut bilong ol, na long olgeta de em i harim tok nogut bilong ol. Bel bilong en i stap stret, na em i kirap nogut na bel bilong en i pen tru long pasin bilong sakim lo ol i mekim.”Tasol long dispela stori long Buk Stat, Lot em i no bihainim tingting bilong God. Em i laik kisim gutpela graun na em i lus tingting long ol arapela samting.
Sapos yumi skelim pasin bilong Lot wantaim pasin bilong ol arapela, yumi bai ting olsem em i mekim gutpela pasin. Planti manmeri i save tok, “Sapos yu lukim wanpela gutpela samting, orait wantu yu go kisim em. No ken tingting tumas. Hariap na kisim tasol!” Planti lain i save bihainim dispela kain tingting. Tasol long dispela tingting planti manmeri i kisim ol hevi tu, wankain olsem Lot i bungim. Yumi i mas prea olsem, ol dispela kain man i ken kisim gutpela tingting hariap na tanim bel, bipo ol bungim kain paia olsem Sodom i kisim taim God i belhat na bagarapim em.
SAMPELA TINGTING
Askim God long helpim yu tingim em pastaim, maski wanem samting i kamap long laip bilong yu.
Ritim: Stat 12:17–13:4
Orait king i singautim Abram i kam na i tokim em olsem, “Watpo yu mekim dispela pasin long mi? Yu no bin tokim mi olsem Sarai em i meri bilong yu.” – Stat 12:18
King bilong Isip i krosim Abram. Maski king bilong Isip i no man bilong bihainim Bikpela, em i tok stret. Na em i no isi taim wanpela man husat i no save long Bikpela, i wok long krosim na stretim yumi. Yumi bai sem.
Na Abram em i no gat tok bikos em i sem.
Na Buk Baibel i no stori long sampela toktok bilong Bikpela tu. Tasol God em i mekim sampela samting. Em i helpim Abram long lusim ol dispela hevi Abram yet i kirapim long giaman tok bilong em. God i no save senis, God i stap bel tru long Abram, na king yet i kisim save olsem God i stap wantaim Abram.
Abram i lusim Isip na i go long hap bilong Negev, na bihain em i lusim hap bilong Negev na i wokabaut i go olsem long hap not, inap long Betel. Yumi no harim long sampela toktok bilong ol. Nogat. Ol i sem, olsem na ol i no gat tok. Na dispela em i gutpela. Taim yumi sem long sin bilong yumi, yumi mas lukluk long God na daunim yumi yet.
Abram i lainim olsem God i no save givim promis long yumi na bihain lusim yumi olsem yumi yet i ken bihainim rot bilong yumi yet. Nogat tru. God i no save lusim yumi, maski
em i taim bilong san o taim bilong tudak. Planti taim yumi longlong tru na yumi wok long bihainim laik bilong yumi yet, tasol God i wok long painim yumi yet, na em bai helpim yumi long stretim ol hevi, maski sapos yumi yet i as bilong ol dispela hevi.
Na Abram em i kamap gen long Betel. Em i dispela ples we Abram i bin wokim wanpela alta bilong lotu long Bikpela. Na Abram i go long dispela hap gen na em i lotuim Bikpela.
I olsem Abram i kam bek long Bikpela. Em i stap laip gen. Em i kain olsem taim yumi lukim diwai kros, dispela ples we God na man i wanbel wantaim. Long dispela ples yumi kisim laip bikos long dispela ples yumi kisim save long God.
SAMPELA TINGTING
Wanem samting long laip bilong yu i save mekim yu i kam bek gen long Bikpela?
Ritim: Stat 12:10-16
Bihain, taim bilong bikpela hangre i kamap, na i no gat kaikai tru long dispela hap. – Stat 12:10
Longpela wokabaut bilong Abram wantaim Bikpela em i kirap tasol na wantu Abram i bungim ol hevi. Bikpela hangre i kamap long graun Kenan. Abram em i wari long dispela, olsem na em i go long Isip. Tasol, taim em i kamap klostu long Isip, em i bungim sampela moa hevi. Em i save olsem sampela taim king bilong Isip bai kisim ol naispela meri. Olsem na em i pret bikos em i ting ol bai kilim em, nogut king i gat laik long kisim dispela naispela meri bilong em, Sarai. Olsem na em i tokim Sarai long giaman na tok olsem em i susa bilong em, na em i mekim olsem. Tasol planti moa hevi yet i kamap long dispela tok giaman bilong Abram na Sarai.
Bilong wanem Abram, dispela man bilong stap wantaim God, i bungim tupela hevi i kam long em long tupela sait, olsem hevi bilong Bikpela hangre long Kenan na pret bilong king bilong Isip? Yumi ken askim ol dispela kain askim, tasol dispela kain askim i no save helpim yumi. Bikpela samting i olsem: Ol lain i bilip i save mekim wanem taim ol i bungim ol hevi?
I no gutpela sapos long taim bilong ol hevi yumi sindaun na krai, “Bilong wanem na dispela hevi i bungim mi?” Mobeta yumi tok, “Bikpela, dispela God mi bilip long em, em i husat tru?”
Em tru, ol hevi i hevi tru. Tasol God em i tru tu. Long Jisas Krais, yumi ken wokabaut wantaim God. Na sapos yumi inap wokabaut wantaim God, orait yumi inap wokabaut long ol hevi long laip bilong yumi tu. Taim yumi bilip long God, yumi no ken kirap nogut tru na pret olgeta long taim bilong hevi.
Long dispela traim, Abram i pundaun. Em i giaman, long wanem, em i pret. Em i pret, long wanem, em i lus tingting long bilip tru long God. Na bihain em i bungim bikpela hevi moa yet long dispela giaman tok bilong em.
Taim yumi lukluk long laip bilong Abram, i gutpela sapos yumi harim dispela gutpela tingting i kam long tok bilong God: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim” (Buk Song 3:5-6).
SAMPELA TINGTING
Yu gat wanem ol traim long laip bilong yu long nau? Askim God long helpim yu long trustim em, na helpim yu long strong long ol dispela traim.
Ritim: Stat 12:4-9
Olsem na Abram i wokim alta bilong lotu long Bikpela long dispela hap Bikpela i bin kamap long em... Na Abram i wokim alta long dispela hap (Betel) na em i kolim nem bilong Bikpela na i lotu long em. – Stat 12:7-8
Abram i kisim meri bilong em, Sarai (dispela meri i no bin karim pikinini), na Lot (pikinini bilong brata bilong en) wantaim, na lusim Haran na wokabaut i go long graun Kenan. Em i go long hap not long Kenan inap long hap saut, long taun Betel. Em i bikpela wokabaut stret, tasol Buk Baibel i no stori planti long dispela wokabaut - em i faivpela lain tasol long dispela sapta i stori long dispela bikpela wokabut. Tasol man i raitim Stat, maski em i sotim dispela longpela stori na raitim long faivpela lain tasol, tupela taim em i stori long Abram i wokim alta bilong lotuim Bikpela.
Na dispela tupela alta i makim taim we God i bin toktok na Abram i bekim long bilip. Dispela tupela alta i makim ples we Abram i bungim God bilong em. Maski man i raitim Stat i no stori long olgeta arapela samting i kamap taim Abram i mekim dispela longpela wokabaut, em i stori long dispela tupela alta Abram i wokim, bikos em i bikpela stamting tru.
Dispela tupela alta i soim yumi pasin bilong bilip bilong Abram, olsem em i wokabaut wantaim God. Ol narapela samting i kamap long laip bilong ol lain i bilip, i no bikpela samting tumas. Nogat, dispela taim bilong makim bilip na pasin bilong wokabaut wantaim Bikpela, em i bikpela samting tru.
Ol lain i no klia long stap wantaim Bikpela, ol yet bai i paul long dispela kain tingting. Ol yet bai i makim wok bilong ol, mani bilong ol, kago bilong ol, o haus bilong ol olsem bikpela samting long laip bilong ol. Tasol ol lain i save stap wantaim God, ol yet bai i makim wanpela alta i go long narapela alta long laip bilong ol. I min olsem, ol bai makim bilip bilong ol na pasin bilong wokabaut wantaim God olsem bikpela samting tru long laip bilong ol.
Ol manmeri i gat dispela kain tingting, ol bai i kisim prais long las de taim God inapim tru olgeta promis bilong em long ol. “Olsem na bai mi go long alta bilong yu, God. Long wanem, yu save mekim mi i belgut na amamas. Yu God bilong mi, bai mi kisim gita na mekim musik, na singim song bilong litimapim nem bilong yu tasol” (Buk Song 43:4).
SAMPELA TINGTING
I gat sampela “alta” i stap long laip bilong yu? I min – yu inap tingim sampela taim long laip bilong yu we God i strongim bilip bilong yu, na yu wokabaut tru wantaim em?
Ritim: Stat 12:1-4
Orait Abram i lusim taun Haran na i go olsem Bikpela i bin tokim em. – Stat 12:4
Abram i bilip na em i bihainim tok bilong God: “Orait Abram i lusim taun Haran na i go olsem Bikpela i bin tokim em.” God em i tok, na Abram i bihainim tok bilong em.
Yumi mas lukaut taim yumi ritim dispela stori. Nogut yumi apim Abram tumas na stori long olgeta samting em i lusim taim em i bihainim Bikpela. Planti taim ol lain bai stori long pen Abram i pilim taim em i lusim haus na lain bilong em, o ol bai i stori long bikpela bilip tru bilong Abram. Tasol dispela em i no gutpela tingting.
Abram i no lusim wanpela samting. Olgeta samting em i lusim taim em i go i olsem samting nating. Wanem samting em bai i kisim taim em i bihainim Bikpela i winim tru olgeta samting em i lusim long Haran. Em i lusim ol lain bilong em, em dispela lain i save lotuim ol arapela god, ol giaman god. Abram i go bihainim nupela rot nau, dispela rot i lait tru long ol promis bilong God. Long bilip Abram i save olsem em bai i kisim ol gutpela samting, na God yet bai givim ol dispela samting long em.
Na dispela rot Abram bai i wokabaut long en, em i stat wantaim tok bilong God. Tok bilong God i save kirapim man. Tingim dispela tupela man i wok long kisim pis long raunwara Galili. Jisas i tokim tupela, “Yutupela kam bihainim mi,” na ol i lusim umben na i go bihainim em. Dispela em i pasin bilong tok bilong God. Em i dispela singaut bilong Gutnius.
Dispela tok bilong God i save helpim yumi long lusim ol samting bilong bipo. Sapos yumi gat gutpela tingting, yumi bai hariap na lusim ol dispela samting, na yumi no ken wari tumas long lusim ol dispela samting bilong bipo. Taim yumi amamas long dispela man
i singautim yumi, Jisas, yumi no ken wari tumas long lusim ol samting bilong bipo. Laip bilong yumi em i kamap nupela. God yet, na ol promis bilong em tu, bai pulim yumi nau, na yumi bai amamas long bihainim rot bilong em.
SAMPELA TINGTING
God i singautim yu long mekim wanem samting long tude? Em i singautim yu long mekim wok bilong em long nupela rot?
Ritim: Aposel 7:2-8
Abraham em i namba wan tumbuna bilong yumi olgeta... – Rom 4:16
I gat tripela kain lain i tok olsem Abraham i papa bilong ol. Ol lain Juda, ol Kristen, na ol Muslim lain i tok olsem ol i tumbuna pikinini bilong Abraham.
Maski wanem lain i tok stret olsem Abraham i Papa bilong ol, i gat wanpela samting em i tok tru. Sapos sampela long ol dispela tripela lain i ting olsem God bai amamas long ol bikos ol i stap olsem tumbuna pikinini bilong Abraham, ol i paul tru. God i no save mekim olsem.
Bilip bilong Abraham tasol em i bikpela samting. Ol lain i bihainim dispela bilip bilong Abraham tasol bai i kisim ol promis bilong God. Abraham em i man bilong wokabaut wantaim Bikpela. Planti lain long graun tude, ol i no klia long wokabaut olsem.
Sapos yu nupela marit, yu bai wok long lainim pasin bilong wokabaut gut wantaim man o meri bilong yu. Isi isi tasol bai yu kamap klia long pasin bilong stap gut wantaim man o meri bilong yu. Sapos marit bilong yu i kamap gutpela, orait sampela yia bihain yu bai save gut long man o meri bilong yu na yutupela bai i wanbel.
Tasol pasin bilong stap wantaim Bikpela em i narakain samting olgeta, na taim yu wokabaut wantaim Bikpela, tingting na tok na pasin bilong yu bai senis olgeta.
I no gat planti man o meri husat yumi inap long lukluk long ol bilong kisim save long gutpela pasin bilong wokabaut gut tru wantaim Bikpela. Ating i gat sampela lain bilong yu o pren bilong yu i stap olsem gutpela piksa long gutpela pasin bilong wokabaut wantaim Bikpela. Tasol olgeta taim yumi mas i go long Buk Baibel bilong kisim save tru long gutpela pasin bilong wokabaut wantaim God. Na laip bilong Abraham i save skulim yumi long dispela samting. Abraham em i papa tru bilong ol lain i stap aninit tru long Bikpela, na wokabaut wantaim em, na bilipim ol promis bilong em.
SAMPELA TINGTING
Laip na pasin bilong yu i soim olsem yu yet i wokabaut wantaim Bikpela, o nogat?
Ritim: Kamapim Tok Hait 21:1-8
Na dispela Man i sindaun long sia king, em i tok olsem, “Harim. Mi mekim olgeta samting i kamap nupela.” – Kamapim Tok Hait 21:5
God i wok long “stretim haus” na mekim olgeta samting em i kirapim pinis. Tasol long yumi man i luk olsem dispela wok i no pinis hariap. Tasol yumi no ken lus tingting bilong wanem God em i no pinisim wok bilong stretim haus bilong em hariap. Em i samting long save na marimari bilong em.
Planti lain i les long dispela wok bilong God bilong mekim olgeta samting i kamap nupela, tasol ol lain i bilip i amamas long lukim wok bilong em. Wankain olsem God i wokim graun na skai na olgeta samting long graun na skai long Tok bilong em, em i wokim nupela graun long gutnius long Pikinini bilong em. Man bilong tromoi pikinini wit i go pinis na mekim wok.
Yumi man, yumi save ting olsem dispela graun i no inap kamap nupela olgeta, long wanem, yumi no inap senisim man. Yumi no inap senisim yumi yet! Ol man i no inap, tasol God em inap long mekim olgeta samting. Long Stat em i givim yumi wanpela papa, Adam, na nau em i givim yumi namba tu Adam, Bikpela Jisas, na spirit bilong em i stap insait long olgeta lain bilong em. Yumi kisim nupela bel, nupela hop, na nupela pawa pinis. Na yumi bilip olsem God yet bai pinisim wok bilong em na mekim olgeta samting i kamap nupela. Yumi no ken les. Yumi no ken bel hevi. I no gat wanpela samting i nogut tru na God i no inap senisim em i kamap gutpela. I no gat wanpela samting i olpela na God i no inap senisim em i kamap nupela.
God i tokim yumi pinis olsem em bai i yusim paia. Kingdom bilong God i kam wantaim stretpela kot na wantaim salvesen. Dispela stretpela kot i kam pinis taim Jisas Krais i dai long diwai kros. Belhat bilong God i kapsait long Jisas, olsem na God i no inap mekim save long ol lain i aninit long em. Long ol dispela lain olgeta olpela samting i go pinis. Krais yet i baim kot bilong ol, na God i no inap mekim save long ol. God i putim yumi long kingdom bilong Pikinini bilong em, dispela Pikinini em i laikim tumas. Em i bosim yumi na yumi kisim nupela laip. Klostu nau God bai givim nupela nem na nupela kantri long yumi – dispela graun bilong hop na glori.
SAMPELA TINGTING
Tingting long dispela nupela kantri God bai givim yumi na tok tenkyu long em.
Ritim: Matyu 28:16-20
God i givim mi bikpela namba na strong bilong bosim olgeta samting long heven na long graun. Olsem na yupela i mas i go mekim olgeta lain manmeri i kamap disaipel bilong mi.... Harim. Mi save stap wantaim yupela olgeta de, i go inap long dispela taim i pinis. – Matyu 28:18-20
Wok Krais i mekim long dai na kirap bek gen, em i pinis. Olsem na Krais i skulim ol disaipel bilong em long mekim bikpela wok long dispela graun. Em i kisim bikpela namba na strong bilong bosim olgeta samting long heven na long graun. Ol disaipel i mas i go na mekim olgeta lain manmeri i kamap disaipel bilong em. Na em i save stap wantaim ol olgeta de. Dispela hap tok “olgeta” i min olsem i no gat sampela samting i lus. Krais i givim ol disaipel bilong em sampela wok i no gat pinis long em: “mekim olgeta lain manmeri i kamap disaipel bilong mi.” Ol disaipel i mas i go na mekim sampela moa disaipel. Na ol nupela disaipel i mas kisim baptais na lainim pasin bilong bihainim Jisas. Olgeta disaipel na olgeta misinari i gat wok long mekim olgeta lain manmeri i kamap disaipel bilong Jisas Krais.
Yumi no ken lus tingting olsem Krais i givim pawa long ol long mekim dispela wok. Sios bilong Krais i no inap mekim dispela wok long strong bilong em yet, bikos sios i no gat pawa. Tasol Krais yet i putim pawa bilong em long ol disaipel bilong em: “God i givim mi bikpela namba na strong bilong bosim olgeta samting long heven na long graun. Olsem
na yupela i mas i go mekim olgeta lain manmeri i kamap disaipel bilong mi.” Olsem na yumi no ken pret long mekim wok. Na Krais i givim yumi wanpela moa tok long strongim yumi long mekim wok: “Mi save stap wantaim yupela olgeta de, i go inap long dispela taim i pinis.” Dispela King yet i stap wantaim yumi. Em i givim pawa bilong em long ol misinari, tasol em i save wokabaut wantaim ol tu.
Yumi mas wok - long stap disaipel bilong Krais na bilong mekim ol arapela i kamap disaipel tu. Yumi mas bilip – pawa bilong Krais bai strongim yumi. Yumi mas bel isi – bikos Krais yet i stap wantaim yumi!
SAMPELA TINGTING
Yu ting wanem long dispela wok Jisas yet i givim yu? Tok bilong Krais long dispela teks i givim yu hop na strong, o nogat?
Ritim: Matyu 8:28-34
Orait tupela i singaut strong olsem, “Yu Pikinini Bilong God, yu laik mekim wanem long mipela? Taim i no yet, na yu kam hia bilong mekim nogut long mipela, a?” – Matyu 8:29
Taim yumi ritim Matyu, Mak, Luk na Jon long Nupela Kontrak, yumi bai klia olsem olgeta lain i no save gut long Jisas. Ol man na meri i no klia gut long em. Tasol ol spirit nogut i save gut long Jisas. Ol i gat narakain save olgeta long Jisas, na ol i klia bilong wanem Jisas i kam long dispela graun.
Taim ol spirit nogut i lukim dispela King, ol i pret nogut tru. Ol i klia olsem kingdom bilong God i kam long stap long dispela graun, bikos Jisas i kam pinis. I min olsem kingdom bilong Satan i bagarap.
Bikpela pait tru i stap namel long kingdom bilong God na kingdom bilong Satan. Na i no olsem yumi man i stap nating namel long dispela tupela kingdom. Nogat. Yumi stap redi
na amamas long aninit long Satan, o God i kisim yumi bek long marimari tru. Tasol i no olsem yumi yet bai winim dispela pait. Yes, long Spirit bilong God yumi bai mekim wok long dispela pait, tasol man i no inap winim dispela pait, na dispela pait i no samting bilong man.
“Taim i no yet, na yu kam hia bilong mekim nogut long mipela, a?” Ol spirit nogut i klia olsem ol bai bagarap, tasol ol i klia tu olsem kingdom bilong God i no kam pinis olgeta.
Jisas yet i oraitim dispela tupela man ol spirit nogut i stap long tupela, na em i salim ol spirit nogut long sampela lain pik. I no olsem Jisas em i sori long dispela ol spirit nogut, tasol i min olsem dispela taim God yet i makim i no kamap pinis yet. Long dispela taim God i makim, olgeta spirit nogut bai i go long hel.
Dispela stori i putim ples klia pawa bilong Jisas long bosim ol spirit nogut. Sapos ol i stap insait long man, na Jisas em i laik oraitim dispela man, ol spirit nogut i no inap pasim em. Na tu dispela stori i putim ples klia olsem dispela wok bilong winim pait i no pinis yet. Ol spirit nogut inap mekim wok yet, tasol taim bilong ol bai i kam!
SAMPELA TINGTING
Dispela stori i skulim yu long wanem samting long kingdom bilong God?
Ritim: Rom 8:18-25
God i bin kisim bek yumi, na nau yumi bilip na wetim em inapim tru ol gutpela samting em i laik mekim long yumi. Na sapos yumi tok long yumi wetim wanpela samting, orait yumi save, yumi no kisim yet. Sapos man i kisim pinis wanpela samting, orait bilong wanem em bai i wet i stap? – Rom 8:24
Salvesen em i samting bilong nau na samting bilong bihain taim tu. Yumi kisim salvesen pinis, na tu yumi wet i stap bilong kisim salvesen. Krais i lusim sin bilong yumi pinis – olsem na salvesen em i samting bilong nau.“Yu kisim salvesen pinis?”“Yes, mi kisim pinis.”Tasol yumi save bungim ol hevi na pen yet, na sin i save stap wantaim yumi tu. “Yu kisim salvesen pinis?”“Mi wet i stap bilong kisim salvesen.” Salvesen i samting bilong bihain taim tu. Tingim, “Na sapos yumi tok long yumi wetim wanpela samting, orait yumi save, yumi no kisim yet. Sapos man i kisim pinis wanpela samting, orait bilong wanem em bai i wet i stap?”
Long save gut long dispela samting i gutpela sapos yumi tok olsem Krais i lusim sin bilong yumi na dispela em i namba wan kaikai long kingdom bilong God. Bikos Jisas i kam pinis long dispela graun, ol pawa bilong kingdom i stap pinis long dispela graun. Tasol kingdom bilong God i no pulapim tru graun yet. God i no pinis yet long wokim kingdom bilong em long dispela graun. Bilong lukim dispela samting, yumi mas wetim taim Jisas i kam bek gen long dispela graun. Long dispela taim God bai inapim tru ol gutpela samting em i laik mekim long yumi – God bai inapim tru salvesen long yumi.
Wok bilong Spirit bilong Krais em i bikpela samting long nau long dispela graun. Sapos yumi bilong Krais, em i lusim ol sin bilong yumi na yumi inap long mekim ol gutpela samting. Sin i no bosim yumi moa. Krais i bosim yumi long spirit bilong yumi, na bel bilong yumi kamap nupela. Laip bilong yumi senis.
Tasol nogut yumi ting olsem Kristen laip bilong yumi long dispela graun bai stap gutpela na stretpela tru olgeta taim. Planti taim sapos yumi skelim wokabaut bilong yumi, yumi bai wari long salvesen bilong yumi: Krais i kisim bek mi, o nogat? Tasol yumi no ken lukluk long yumi yet. Nogat, yumi mas lukluk long Jisas Krais. Yumi bai klia long salvesen bilong yumi long bilip tasol. Yumi wet i stap long kisim salvesen, dispela samting bai i kam yet.
Salvesen i kam pinis, tasol em i samting bilong bihain taim tu. Bilong wanem? Bikos kingdom bilong God i kam pinis, tasol em i no pulap tru long graun na God i wok yet
long inapim kingdom bilong em long dispela graun. Olsem na yumi mas prea strong tru: “Kingdom bilong yu i mas i kam!” o “Inapim hop bilong mi, Bikpela. Mi wet i stap long kisim salvesen bilong yu.”
Taim yumi prea strong tru olsem, long bel bilong yumi, yumi stap wanpela Kristen tru!
SAMPELA TINGTING
Long laip bilong yu, yu luksave long dispela tupela samting: Salvesen i kam pinis, tasol yu wet i stap long kisim salvesen tu?
Ritim: 1 Timoti 1:12-17
Krais Jisas i bin kam long graun bilong kisim bek yumi manmeri bilong mekim sin. Dispela tok em i tru olgeta na em inap long olgeta man i harim na bilipim. – 1 Timoti 1:15
Taim Pol i raitim namba wan pas i go long Timoti, em i wari tru olsem em i mas lukautim gut olgeta tok tru. Olsem na em i tok: “Timoti, yu mas was gut long dispela wok God i bin givim long yu. Givim baksait long olkain toktok nabaut i no bihainim tingting bilong God” (1 Timoti 6:20).
Dispela trupela tok bilong ol Aposel, em Timoti i mas lukautim, em i tok long Jisas Krais. Long dispela tok long Jisas Krais sios bilong en i sanap, na long dispela tok ol lain bilong God bai
i stap laip. Pol em i lapun na em i strong moa yet long Timoti i mas lukautim dispela trupela tok na givim baksait long ol toktok nabaut i no bihainim tingting bilong God.
Long 1 Timoti 1:15, Pol em i givim wanpela sotpela tok long putim ples klia bilong wanem Jisas em i kam long dispela graun – “bilong kisim bek yumi manmeri bilong mekim sin.” Na moa, em i tok olsem dispela tok em i tru olgeta na em inap long olgeta man i harim na bilipim.
Em i naispela samting stret olsem bel tru bilong gutnius i stap insait long dispela sotpela tok: “Krais Jisas i bin kam long graun bilong kisim bek yumi manmeri bilong mekim sin.”Sampela taim yumi paul long ol tok long Jisas. I gat planti buk tru i stori long Krais, na yumi no inap ritim olgeta dispela buk. Tasol, taim yumi paul liklik, yumi mas tingim dispela sotpela tok tru. Yumi ken kisim bel isi long dispela gutpela tok tru: “Krais Jisas i bin kam long graun bilong kisim bek yumi manmeri bilong mekim sin. Dispela tok em i tru olgeta na em inap long olgeta man i harim na bilipim.”
Dispela samting bai i givim bikpela bel isi long yumi. Jisas i kam long kisim bek ol manmeri bilong mekim sin. Sampela taim yumi bai pilim olsem yumi inap long amamasim God, na sampela arapela taim yumi bai pilim doti tru long ai bilong em bikos yumi no inap. Tasol, taim yumi klia olsem yumi no inap long ai bilong em, yumi ken save gut olsem Jisas em i kam long kisim bek ol manmeri bilong mekim sin, ol manmeri i no inap long ai bilong em!
SAMPELA TINGTING
Singim dispela singsing, “Marimari tru” (John Newton em i raitim), na tingting long dispela tok tru olsem Jisas i kam long kisim bek ol manmeri bilong mekim sin.
Ritim: Jeremaia 28:1-11
...orait Hanania ... em i sanap long ai bilong ol manmeri na i tok, “Bikpela i tok olsem...” – Jeremaia 28:10-11
Ol profet i man bilong autim tok bilong God. Taim wanpela profet i opim maus bilong em, em i no autim tok bilong em yet. Nogat. Em i save tok, “Bikpela i tok olsem.” Dispela man, Hanania, em i tok olsem em i autim tok bilong God. Tasol em i giaman. Em i wanpela giaman profet.
I gat planti ol giaman profet long dispela graun long tude tu. Na i gat sampela lain i bihainim ol. Sampela taim ol bai i autim naispela tok tru na i luk olsem em i winim ol tok bilong ol trupela profet. Tasol ol i giaman.
Hau bai yumi save sapos wanpela profet em i giaman profet o trupela profet?
Yumi mas klia gut long tok bilong God. Bilip bilong ol trupela Kristen em i no wankain olsem bilip bilong ol giaman profet. Nogat. Yumi mas klia gut long as bilong ol tok long Buk Baibel. Bilong wanem planti manmeri i save givim planti mani long painim as bilong ol sik, olsem kansa, o bilong klia gut long kain kain samting olsem ol science samting, tasol ol i no save givim planti mani o taim long klia gut long tok bilong God? Ol lain olsem ol Jehovah Witness lain inap paulim planti manmeri tru, na giamanim ol, olsem wanem?
Planti ol Kristen i no wari tumas long ol giaman profet, maski God yet i tok strong olsem yumi mas lukaut long ol. Planti ol Kristen i no wari tumas long save gut tru long tok bilong God. Yumi mas wok strong tru long pasim ol giaman tok, na yumi mas prea olgeta taim bai God i ken bagarapim ol wok bilong ol giaman profet. Na yumi mas wok long sapotim ol gutpela skul i wok long skulim ol lain long Tok Tru bilong God.
Na bikpela samting stret i olsem yumi yet i mas stap klostu long Krais, na Tok bilong em i mas stap insait long bel bilong yumi.
SAMPELA TINGTING
Wanem ol giaman profet i stap long tude? Na ol i wok long giamanim ol lain bilong graun olsem wanem?
Ritim: Buk Song 130
Em bai i kisim bek ol manmeri bilong en, em yumi Israel, na rausim olgeta sin bilong yumi. – Buk Song 130
...na yu mas kolim nem bilong en Jisas, long wanem, em bai i lusim sin bilong ol manmeri bilong en na kisim bek ol. – Matyu 1:21
Ol wasman long nait i save wet i stap inap long tulait i kamap. Ai bilong ol bai slip, tasol ol
i no ken slip. Ol i mas putim was. Long ol wasman dispela taim bilong tudak em i longpela taim stret na ol bai i wet inap long tulait i kamap. Na dispela man i raitim Buk Song 130 em i tok, “Mi save wet long Bikpela, na mi laikim tumas bai em i helpim mi.”
Long Nupela Kontrak yumi kisim save long sampela wasman, na pastaim yumi kisim save long ol wasman bilong sipsip “was long ol sipsip bilong ol long nait.” Na dispela nait em i bikpela nait stret na i winim ol arapela nait, long wanem lait i kam hariap bipo long taim nait i pinis. Ol wasman i harim olsem Jisas em i kamap pinis; mama bilong em i karim em.
Dispela man bilong raitim Buk Song 130 em i wetim dispela pikinini, Jisas. Bilong wanem? Bikos Jisas tasol inap long rausim sin bilong ol na kisim bek ol.
Yumi no ken lus tingting long dispela tok tru. Dispela Olpela Kontrak i wetim Bikpela i kisim dispela De i kam na “rausim olgeta sin bilong yumi Israel.” Na dispela Nupela Kontrak i tok save olsem, taim bilong wetim dispela de i pinis nau: “Na yu mas kolim nem bilong en Jisas, long wanem, em bai i lusim sin bilong ol manmeri bilong en na kisim bek ol.”
Sapos Jisas em i no God tru, orait yumi stap yet long tudak, long nait. Tasol, bikos Jisas em
i God, em i gat pawa bilong lusim sin bilong yumi na kirapim yumi long nupela laip. Nait bilong yumi, tudak bilong yumi, i pinis nau. Dispela tulait, dispela nupela de, i kirap pinis. “Yu man nau yu slip, yu mas kirap. Yu kirap long matmat na Krais bai i givim lait long yu.” (Efesus 5:14)
Tudak em i pinis nau. Yumi no gat nid long wetim dispela tulait nau, long wanem, Jisas i kam pinis. Yumi no ken pundaun long hevi bilong sin nau bikos Jisas i kam pinis. Dispela wok bilong salvesen em i gutpela na stretpela olgeta bikos God yet i wokim.
SAMPELA TINGTING
Tingting long rot God yet i yusim bilong kisim yu long tudak i go long tulait, na givim glori long em long dispela samting em yet i wokim.
Ritim: Aisaia 63:15-64:2
Bikpela, mipela i laik yu mas brukim skai na kam daun. – Aisaia 64:1
Sampela taim i luk olsem yumi nidim wanpela bikpela mirakel. Sapos wanpela man i gat bikpela sik tru, na ol dokta i tok olsem em bai i dai, yumi bai tok, “A, yumi nidim wanpela bikpela mirakel. God yet i mas oraitim em.”
Sapos wanpela meri gat bikpela hevi – man bilong em i wok long paitim em nogut tru na bagarapim em olgeta taim. Man em i no harim tok bilong sios o bilong ol arapela, na em i bagarapim em i stap. Em i les long senisim pasin bilong em. Ating dispela meri bai brukim skru na singaut long Bikpela: “God bilong mi, yu mas kam na stretim dispela hevi bilong mi.... Mipela i laik yu mas brukim skai na kam daun.”
Hia, long dispela teks long Aisaia i gat man i brukim skru na prea long God. Em i stori long ol hevi bilong ol lain bilong God long dispela graun. Ol dispela lain i no harim tok tru; ol i lus. Ol i stap long kalabus na haus bilong Bikpela em i lus tu. “Plis, God, bai yu kam na stretim ol dispela hevi....Mipela i laik yu mas brukim skai na kam daun.”
God em i save bekim olgeta prea bilong yumi. Na em i bekim dispela prea bilong Aisaia na em i bekim long narakain rot olgeta. Long taim bilong em yet, God i salim Jisas i kam long dispela graun olsem wanpela bebi long Betlehem. Skai i bruk na ol ensel i bung long givim glori long God.
Taim Pikinini bilong God i kam daun, skai i bruk. Na God i wok long stretim ol hevi bilong yumi long dispela graun. Long laip bilong ol lain bilong God, yumi inap lukim wok bilong God bilong kirapim nupela graun. Tasol dispela kingdom i no kam olgeta nau. Em bai i kam, tasol yumi mas singaut strong na prea strong olgeta taim: “Kam, Jisas. Yu Kam. Mipela laik yu mas brukim skai na kam daun.”
SAMPELA TINGTING
Yu yet i gat bikpela laik long kingdom bilong God i mas i kam? Yu save prea long Jisas i mas kam bek long dispela graun?
Ritim: Aposel 13:44-49
Tru, mitupela i mas givim tok bilong God long yupela Juda pastaim. Tasol yupela i givim baksait long dispela tok, na i olsem yupela yet i tok, “Mipela i no inap kisim laip i stap gut oltaim.” Olsem na yupela harim. Nau mitupela i no ken autim tok moa long yupela. Mitupela bai i autim tok long ol arapela lain... – Aposel 13:46
Sapos yu givim baksait long Krais i olsem yu kilim yu yet i dai.
Wok bilong sios em i bikpela samting stret. Em i samting bilong laip na i dai. Planti taim ol sios i no save wari tumas long dispela. Planti ol sios i wari tasol long amamas, na mekim naispela tok long ol lain i save kam bung wantaim. Planti ol sios i wari tasol long kisim planti manmeri i kam insait long dua bilong sios bilong amamasim ol tasol.
I no tru olsem yumi no ken amamas long sios. Yumi mas amamas, na yumi mas opim dua bilong sios na amamas long kisim planti lain i kam insait. Yumi mas soim laikim tru long ol lain i kam long sios tu. Tasol yumi no ken lus tingting long dispela samting: ol lain i givim baksait long Krais, ol i kilim ol yet i dai. Ol lain i apim ol yet na i les long stap aninit long tok bilong God, ol i no inap kisim laip i stap oltaim oltaim. Planti lain i no klia long dispela. Planti lain i no save olsem ol i kilim ol yet i dai. Tasol Pol na Barnabas i tok olsem dispela samting em i tru.
Tok bilong God em i tok bilong God tru tru. Ol gutpela manmeri bai inapim tok promis bilong ol. Tasol God i winim ol gutpela manmeri. Em yet i no inap sakim tok bilong em yet. Em bai inapim tok bilong em long wok bilong Jisas Krais. Taim yu apim em, yu bai kisim olgeta samting God i promis long givim yu. God bai inapim tok bilong em, ol tok promis na ol strongpela tok bilong em tu.
SAMPELA TINGTING
Yu klia long ol tok promis na ol strongpela tok long Buk Baibel?
Ritim: Aisaia 66:18-24
...bai ol i lukim ol bodi bilong ol lain i bin bikhet na sakim tok bilong mi, ol i dai pinis na i slip nabaut long graun. – Aisaia 66:24
God bai i kisim bek ol lain bilong em, na em bai i mekim save long ol lain i les long em, na long dispela rot em bai i sanapim kingdom bilong em. Dispela tupela samting i save wok wantaim insait long dispela bikpela wok God i mekim. Sios bilong God i mas autim gutnius bilong wok bilong Jisas Krais bilong kisim bek yumi, tasol sios i mas stori long stretpela kot bilong God tu. Maski yumi gat liklik save tasol long pasin bilong God long mekim save long ol lain i sakim tok bilong em long las de, yumi klia olsem dispela de bai i kam. Planti taim yumi no stori tumas long wok bilong Krais long kisim bek yumi bikos yumi no wari tumas long wok bilong God bilong mekim save long ol lain i no stap aninit long Krais.
Long Olpela Kontrak, buk bilong Aisaia i winim ol arapela buk long givim ol naispela tok long plen bilong God bilong kisim bek ol lain bilong em. I gat planti ol naispela tok long dispela buk bilong givim bel isi. Aisaia i stori long bikpela laikim tru bilong God, tasol dispela buk i pinis long bikpela krai. Em i pinis long wanpela tok piksa long ol lain i lus long hel.
Yumi no save amamas long ritim dispela kain tok piksa. I no naispela. Tasol i no olsem yumi ken abrusim ol dispela kain tok, na yumi no ken les long stori long pasin bilong God bilong mekim save long ol birua bilong em long oltaim oltaim. Ol lain long heven bai sori na krai long taim ol manmeri bilong mekim sin i no tanim bel, na ol bai i amamas long taim ol manmeri bilong mekim sin i tanim bel. Olsem na yumi, ol lain bilong God long graun, i mas mekim wankain pasin. Sapos yumi no save pilim sori na hevi tumas long ol lain i stap long rot i go long hel, hau bai yumi amamas tru long salvesen bilong Bikpela?
Planti taim tru Aisaia i tok olsem, God em i“Bikpela bilong Israel.”Yumi save olsem God em i pulap long laikim tru na marimari, tasol, em i God – Bikpela! God em i holi olgeta na em i no inap lukim sin, olsem na em i mas kam long mekim save long ol lain i les long em, na long kisim bek ol lain bilong em. Jisas Krais i mas karim sin bilong yumi. Sapos nogat, yumi stap yet long sin bilong yumi na God bai i mekim save long yumi.
Bikpela God, yu ken marimari long mipela na ol lain i stap klostu long mipela tu!
SAMPELA TINGTING
Tingting gut pastaim na beten olsem: “Bikpela God, yu ken marimari long mipela na ol lain i stap klostu long mipela tu.”
Ritim: Kamapim Tok Hait 1:9-18
...Na wanpela bainat i gat tupela sap na i sap tru, em i kam ausait long maus bilong en. – Kamapim Tok Hait 1:16
Jisas inapim olgeta tok profet long Olpela Kontrak i tokaut long em. Tasol olgeta samting i kamap i narakain olgeta long olgeta tingting long olgeta manmeri.
Ol Israel i wetim wanpela man bilong pait, olsem em bai i kam olsem king na bagarapim olgeta birua bilong em. Ol Israel i ting olsem em bai i kirapim bikpela pait i holi na givim bel isi i go bek long Israel, na Israel bai i stap gut tru.
Tasol wanem samting tru i kamap long ol dispela tok profet long dispela king bilong winim pait?
Jisas em i King pinis. I gat wanpela man i bin lukim em olsem King. Na dispela man em i Jon. Jon i stap long ailan ol i kolim Patmos. Na dispela King em i lukim, em i gat bainat. Yes, em i gat bainat. Tasol em i no putim bainat long hankais bilong em, olsem ol arapela man bilong pait i save putim. Nogat. Bainat bilong em i kam ausait long maus bilong en!
Olgeta manmeri bai i kirap nogut long dispela. Gutnius bilong kingdom i narakain samting olgeta: Laion em i kamap olsem pikinini sipsip. Jas i kam wantaim marimari. Man bilong bungim kaikai i kam olsem man bilong tromoi pikinini wit. Na bainat bilong king i kam ausait long maus bilong en.
Dispela bainat i olsem Tok bilong em. Na dispela Tok bilong em bai i pait. Krais i bin givim strongpela tok long ol lain i kisim Tok bilong em pinis, olsem sapos ol i no harim Tok bilong em na bihainim dispela Tok, orait ol bai i no gat hop long las de, dispela de bilong bikpela kot bilong God. Na God em i mekim wankain tok long ol manmeri bilong kantri bilong yumi tude.
Tok bilong God em i no samting nating. I no samting bilong yumi i ken kisim o tromoi long laik bilong yumi yet. Nogat. Tok bilong God i gat pawa bilong opim na pasim dua bilong kingdom bilong heven. Dispela bainat i olsem Tok, tasol dispela Tok em i olsem bainat tu!
SAMPELA TINGTING
Tok bilong God em i bikpela samting long laip bilong yu, o nogat?
Ritim: Jon 12:23-33
...sapos pikinini wit i no pundaun long graun na i dai, orait em wanpela tasol bai i stap. Tasol sapos em i dai, orait em bai i kamap na karim planti kaikai. – Jon 12:24
Ol lain long Jerusalem i bel nogut. Sampela lain ol i toktok isi olsem Jisas em i man bilong kisim bek ol, olsem ol profet i bin promis. Na taim Jisas i go insait long Jerusalem antap long wanpela donki, ol i singaut strong, “Amamas long God. God i ken mekim gut long dispela man i kam long nem bilong Bikpela. Em i king bilong Israel.”
Na Jisas i save olsem taim bilong em i kam pinis nau. Na tu em i save olsem, “...sapos pikinini wit i no pundaun long graun na i dai, orait em wanpela tasol bai i stap. Tasol sapos em i dai, orait em bai i kamap na karim planti kaikai.”
Jisas i save olsem em i mas i dai long diwai kros pastaim, na bihain em bai i kisim kraun bilong king. Sapos Papa bai inap long bungim gutpela kaikai, Jisas i mas i stap olsem pikinini wit pastaim. Olsem na em i givim em yet. Em i givim laip bilong em yet long yumi. Olsem na yumi i ken tenkyu long em na litimapim nem bilong em oltaim oltaim.
Tasol i no Jisas tasol inapim dispela lo bilong pikinini wit. Nogat. Em i tok olsem ol disaipel bilong em, ol lain i laik bihainim em, ol i mas bihainim dispela lo tu. Planti taim yumi laik lus tingting long dispela. Tasol yu mas lainim gut na bilip tru olsem i no gat wanpela gutpela kaikai i kamap sapos em i no kisim dai bilong Jisas pastaim. Na moa, dispela dai bilong Jisas i givim yumi pawa long bihainim dispela lo bilong pikinini wit.
Sapos pikinini wit i stap long haus tasol, em bai i no inap karim kaikai. Nogat. Em bai karim kaikai sapos em i pundaun long graun na i dai pastaim.
Jisas i skulim yumi long dispela lo long lain 25. Em i tok, “Sapos wanpela man i laikim tumas laip bilong em yet, laip bilong en bai i lus. Tasol sapos wanpela man i givim baksait long
laip bilong en long dispela graun, orait em bai i holimpas laip bilong en inap oltaim oltaim.” Sapos yu no redi long lusim laip bilong yu yet, orait yu no redi long stap insait long kingdom bilong God. Taim yumi wok long givim, yumi bai kisim; sapos yumi save blesim ol arapela, bai yumi kisim blesing; na sapos yumi givim baksait long laip bilong yumi long dispela graun, bai yumi kisim dispela laip i stap oltaim oltaim.
Sapos Jisas i Bikpela bilong mi, mi mas bihainim dispela lo bilong pikinini wit.
SAMPELA TINGTING
Em i gat wanem mining long laip bilong yu olsem yu mas bihainim dispela lo bilong pikinini wit?
Ritim: 1 Korin 2:1-9
Mipela i autim tok long gutpela tingting na save bilong God... Tasol tok bilong dispela rot i bin i stap hait, na i no gat wanpela hetman bilong dispela graun i bin save long en. – 1 Korin 2:7-8
Long dispela hap, Pol i no stori long sampela tok hait olsem tok hait bilong ol samting bilong masalai o sanguma. Nogat, dispela tok hait em i gutnius, dispela gutnius bilong Krais. Dispela gutpela tingting na save bilong God em i Krais, em i bin dai long diwai kros bilong kisim bek yumi. Dispela gutpela tingting na save bilong God i stap long ples hait; i no gat wanpela man i bin save long em bipo long taim God yet i soim dispela klia tru. God yet i redim rot bilong salvesen bilong soim bikpela save na gutpela tingting bilong em, na bilong daunim olgeta ol arapela rot bilong kisim salvesen olsem ol giaman lain i stori long ol. I no gat ai i lukim o yau i harim – dispela dai na kirap bek bilong Krais.
Long diwai kros, olgeta pawa bilong sin i go pait wantaim Krais. Em i no dai long diwai
kros olsem man nating. Nogat, em i het bilong olgeta manmeri bilong dispela graun. Em
i stap olsem pesman bilong lain bilong em na em i dai. Na tu em i kirap bek. Em i no man nating na em i kirap bek. Nogat, em i kirapim dispela nupela taim bilong bungim kaikai long gaden.
Long dai bilong em, Krais i pinisim pawa bilong Satan; taim Krais i kirap bek long matmat em i soim klia dispela pawa bilong God. Dua bilong nupela taim i op long dispela taim. Pawa bilong Heven i kam daun. Holi Spirit i kam na bringim laip i no gat pinis long em long ol lain i bilip long Krais.
Dispela em i gutnius. Rot bilong salvesen long Krais i kamap ples klia. Dispela gutnius i go aut long graun, wankain olsem ol i tromoi pikinini wit long gaden. Long dispela Tok planti lain long graun bai kisim salvesen na dispela graun bai i kamap nupela gen.
Yumi mas harim dispela gutnius na kisim gutnius olsem samting bilong yumi yet. Na bikos Spirit bilong God tasol i givim yumi dispela save bilong God, yumi mas strong long askim God long givim Holi Spirit long yumi taim yumi ritim na tingting long tok bilong God.
SAMPELA TINGTING
Yu yet yu harim dispela gutnius, na yu wok long kisim dispela gutnius olsem samting bilong yu yet, o nogat? Yu yet i bin askim Spirit bilong God long helpim yu taim yu ritim na tingting long tok bilong God, o nogat?
Ritim: Matyu 13:3-14
Wanpela man i go tromoi pikinini wit long gaden. – Matyu 13:3
Taim Jisas i autim dispela tok piksa long ol, i gat planti manmeri i no save tru long as bilong dispela tok piksa. Ol lain i gat “yau long harim” na ol lain “God i larim ol i save pinis long as bilong tok hait bilong kingdom bilong heven,” ol dispela lain tasol i save gut long as tru bilong dispela tok piksa bilong Jisas. Bilong wanem ol arapela lain i no klia gut long dispela tok piksa?
Ol dispela manmeri i wet i stap long lukim taim kingdom bilong heven bai i kam. Jon bilong Baptais i bin tok olsem, kingdom bilong heven i kam klostu pinis. Em i tok olsem, man bilong holim savol long han bilong en, bilong rausim olgeta pipia i stap long wit bai kam na em bai i bungim wit long haus wit bilong en. Tasol pipia em bai i kukim long paia i no save dai.
Jisas i stori long wankain kingdom. Tasol Jisas i no stori long dispela man bilong holim savol bilong rausim olgeta pipia. Nogat, em i stori long man i tromoi pikinini wit long gaden. Dispela man i mekim olsem, na bihain em i wet i stap. Em i save olsem planti ol pikinini wit bai lus. I gat planti ol ston i stap yet long gaden. Planti ol rop i gat nil i stap tu na sampela pisin i wok long karim sampela i go. Tasol sampela pikinini wit bai karim kaikai. Long taim bilong bungim ol wit i mau, sampela gutpela kaikai bai i stap.
Na dispela em i wankain olsem dispela rot kingdom bilong God i save bihainim long kam. Em i rot God i yusim bilong kisim bek ol manmeri bilong em. Em i no salim paia i kam long heven yet, na em i no salim i kam man bilong holim savol bilong rausim olgeta pipia i stap long wit yet. Nogat, em i salim man i tromoi pikinini wit long gaden. Na sapos yu i gat yau, yu bai i harim. Sapos God i larim yu i save pinis long as bilong tok hait bilong kingdom bilong heven, yu bai save olsem bikpela wok bilong kingdom bilong God i kam long han bilong man i tromoi pikinini wit long gaden.
Yumi no bin lukim ol bikpela samting tru long nau. King i bin kam pinis long dispela graun – tasol em i kam olsem wanpela wokboi. I luk olsem i no gat senis i kamap long dispela graun. Tasol ol lain i save pinis long as bilong tok hait bilong kingdom, ol i wet i stap na ol i prea strong tru bikos, “wanpela man i go tromoi pikinini wit long gaden....”
SAMPELA TINGTING
Dispela tok piksa i soim olsem kingdom bilong God i bihainim wanem rot long kam long dispela graun?
Ritim: Matyu 6:5-15
Taim yupela i no opim maus yet long askim Papa bilong yupela long wanpela samting, em i save pinis long olgeta samting yupela i sot long en. – Matyu 6:8
Yumi mas tokim God long wanem samting yumi sot long en. Tasol, taim yumi opim maus bilong yumi yet long askim Papa bilong yumi long wanpela samting, em i save pinis long olgeta samting yumi sot long en. Em i hatwok stret long yumi yet i save gut tru long wanem samting yumi nidim.
Yumi no inap save gut tru long wanem samting yumi nidim. Planti taim yumi bai ting olsem yumi nidim sampela samting, tasol yumi no nidim tru tru. Sampela taim wanpela man i ting olsem em i nidim wanpela nupela meri, tasol nogat, em i mas lainim pasin long stap gut wantaim meri bilong em tasol. Planti taim tingting bilong yumi bai paul bikos yumi gat ol hevi, wari, sori, i go i go.
Tasol yumi ken kisim bikpela bel isi bikos yumi save olsem Bikpela yet i klia gut tru long olgeta samting yumi nidim. Taim wanpela sikman, bun bilong em i dai olgeta, i kam long Jisas, yumi bai ting olsem Bikman bilong em bai stretim namba wan hevi bilong em pastaim -“Em i gat sik. Oraitim em, Jisas!”Tasol Jisas i tokim em,“Mi lusim pinis sin bilong yu.”Krais em i save long dispela namba wan samting dispela man i nidim!
Planti taim, taim yumi tokim God long olgeta samting yumi laikim, ating em bai ting olsem ol dispela samting i no nid tru bilong yumi. Olsem na Jisas, taim em i skulim yumi long gutpela pasin bilong beten, i tokim yumi long prea olsem, nem bilong God i ken i stap holi na kingdom bilong God i mas i kam pastaim. Em i save olsem dispela samting i olsem namba wan samting yumi olgeta i nidim.
Na yumi mas askim yumi yet – yumi klia long ol dispela nid bilong yumi? Yumi no ken autim dispela tok nating taim yumi prea, bikos namba wan samting yumi nidim, nid tru tru bilong yumi, em i God!
SAMPELA TINGTING
Mekim dispela beten Jisas i skulim yumi long mekim, na tingting gut taim yu prea: “Nem bilong yu i mas i stap holi. Kingdom bilong yu i mas i kam.”
Ritim: Luk 10:38-42
Marta, Marta, yu wok long tingting planti na yu wari long planti samting. Yu mas tingting long wanpela samting tasol. Dispela samting Maria i laik kisim, em i gutpela samting tru, olsem na yumi no ken pasim em long kisim dispela gutpela samting. – Luk 10:41,42
Taim yumi harim dispela stori bilong Marta na Maria yumi no ken ting olsem pasin bilong sindaun nating na malolo em i winim pasin bilong mekim wok. 1 Tesalonaika i stori long wanpela sios we ol i save sindaun tasol na stori long taim Krais bai i kam bek. Pol i tokim ol long kirap na wok. God i no amamas long pasin bilong les long wok.
Tasol wok inap kilim man i dai - taim wok bilong yu i bikpela tumas long laip bilong yu, na yu no gat taim long harim tok bilong Jisas. Namba wan samting yumi nidim i olsem: yumi mas save gut tru long Jisas. Yumi nidim dispela long stap laip. Na yumi inap save long Krais taim yumi harim tok bilong em.
Sampela bai tok olsem, “Mi save long Jisas.” Na em i gutpela. Tasol yu no inap save long Krais sapos yu no harim tok bilong em. Olsem na yumi mas ritim tok bilong em na harim Spirit bilong em, na dispela em i namba wan samting yumi nidim long laip bilong yumi.
Masta tru bilong yumi em i save long wanem samting yumi nidim. Em i save olsem yumi nidim kaikai, yumi nidim mani. Em i save olsem yumi gat planti wok yumi mas mekim. Tasol Krais i tokim yumi wankain olsem em i tokim Marta: “Yu wok long tingting planti na yu wari long planti samting. Yu mas tingting long wanpela samting tasol...em i gutpela samting tru.” Em i namba wan samting yumi nidim.
Yumi mas tingting gut na klia gut long wanem samting yumi nidim tru tru. Yumi nidim Jisas! Sapos yumi save gut long Jisas na bilipim tok bilong em, laip bilong yumi bai stap orait.
SAMPELA TINGTING
Yu save givim planti taim long laip bilong yu long harim tok bilong Jisas, o nogat?
Ritim: Matyu 9:1-8
Pikinini, bel bilong yu i ken i stap isi. Mi lusim pinis ol sin bilong yu... Yu kirap na kisim bet bilong yu, na yu go long haus bilong yu. – Matyu 9:2,6
Ol profet long Olpela Kontrak i stori long dispela kingdom bai i kam olsem wanpela graun i gat planti gris na kaikai i stap long en. Sampela bai tok olsem dispela em i tok piksa long ol gutpela samting, olsem ol samting bilong amamas na bel isi.
God i makim Jisas bilong stap King long dispela kingdom i stap nau na long dispela kingdom bai i kam yet. Taim em i mekim ol bikpela wok bilong em long graun, Jisas i soim klia ol samting bilong kingdom bilong em.
Na ol i karim wanpela sikman, bun bilong en i dai olgeta, long Jisas. Na Jisas i tok, “Pikinini, bel bilong yu i ken i stap isi. Mi lusim pinis ol sin bilong yu.” Na bilong soim olsem em i gat olgeta pawa bilong lusim sin, Jisas i oraitim sik bilong dispela man, na em i kirap na wokabaut.
Long kingdom bilong God olgeta hevi i mas go pinis. Krais i kam long mekim dispela olgeta graun i kamap nupela. Em i gat pawa bilong mekim olsem, long wanem, em i gat pawa bilong lusim sin. Olgeta samting yumi yet i mekim long stretim sampela hevi long dispela graun, em bai i helpim liklik tasol. Em gutpela long yumi i stretim ol samting nogut long dispela graun, bilong oraitim sik, bilong stretim ol haus i bruk. Tasol yumi no inap long stretim ol bel i bruk na bagarap.
Krais i stretim as bilong ol hevi. Na as bilong ol hevi na sik em i dispela sin i stap long bel bilong man. Krais i givim yumi wanpela nupela bel na nupela hop wantaim. Tasol em i no pinisim wok bilong em olsem. Nogat. Em bai i givim nupela heven na nupela graun long yumi tu. Sapos em i lusim ol rong bilong yumi long tude, tumora bai yumi lukim ol lek nogut man i kirap, na ples drai nating bai pulap long ol naispela plaua tru!
SAMPELA TINGTING
Tingting long sampela rot God i bihainim long mekim olgeta samting i kamap nupela. Brukim skru long dispela God, Antap Tru!
Ritim: Aisaia 11:1-9
...olgeta samting long graun bai i save tru long Bikpela. Dispela save bai inapim olgeta hap graun olsem solwara inapim mak bilong en olgeta. – Aisaia 11:9
Hia, long Aisaia 11, yumi lukim narapela naispela piksa long dispela ples bilong hop na glori. Pastaim yumi ritim long dispela gutpela King husat i bosim dispela kantri. Na dispela nupela kru i kamap long Jesi, dispela as bilong diwai ol i katim pinis, em i Jisas Krais. Na Aisaia i tok olsem, taim Krais i bosim wanpela kantri dispela kantri bai i gat amamas, stretpela kot, na malolo. Dispela King i rausim ol pasin nogut, em i mekim gut long ol rabisman na animal. Bel isi tru i stap na ol lain i amamas na wanbel tasol.
Taim dispela Mesaia i bosim graun, em bai gutpela. Yumi inap tok olsem dispela kantri em i olsem graun bilong promis, long wanem “olgeta manmeri na olgeta samting long graun bai i save tru long biknem na strong bilong Bikpela.” Dispela tupela samting i save stap wantaim. Taim nem bilong God i stap Holi, na kingdom bilong em i kam pinis, olgeta manmeri na olgeta samting long graun bai i save tru long biknem na strong bilong Bikpela.
Wanpela taim wanpela man i draivim taksi long wanpela rot i bisi tru. Na em i bamim narapela ka. Na man i draivim ka i belhat na i wok long autim strong nem bilong Jisas Krais; em i kolim nating nem bilong Jisas. Na draiva bilong taksi i askim em, “Bosman, bilong wanem yu no autim nem bilong wanpela man husat yu yet yu save long em?”
Taim man o meri i wok long kolim nating nem bilong God em i bikpela rong tru, tasol i putim ples klia olsem ol dispela man o meri, ol i no klia long God em i husat. Taim wanpela man em i klia long Jisas na save tru long em, em i no inap kolim nating nem bilong em. Nogat, em bai yusim nem bilong em long prea.
Yumi inap tok olsem Krais i kam long dispela graun long wokim kingdom bilong em, o yumi inap tok olsem em i kam bilong skulim yumi long olgeta samting bilong Bikpela. Tupela i wankain tok tasol. Na Krais i salim Holi Spirit long yumi long helpim yumi long bihainim Krais olsem King bilong yumi - o bilong skulim yumi long God olsem Papa bilong yumi.
Taim Kingdom i kam pinis, olgeta manmeri na olgeta samting bilong dispela graun bai i save tru long biknem na strong bilong Bikpela.
SAMPELA TINGTING
Yu yet yu bin onaim nem bilong God, na litimapim nem bilong em long tude? Olsem wanem?
Ritim: Matyu 5:13-16
Yupela i olsem sol bilong graun...Yupela i olsem lait bilong graun... – Matyu 5:13-14
Yumi ol longlong lain bilong God i olsem sol bilong graun. Ol lain bilong graun i no bilipim dispela, na lain bilong God bai bilipim isi isi, tasol God yet, husat i kamapim dispela graun, em i soim dispela long yumi: dispela liklik lain bilong God i gat bikpela pawa long dispela graun.
Ol lain long taim bilong Krais, ol i klia tru long dispela tok piksa long sol. Ol i save yusim sol bilong lukautim kaikai olsem em i no inap bagarap hariap. Sol tasol i gat pawa long pasim ol kaikai long bagarap. Kaikai bai i stap gut long sol. Olsem na, ol lain long bipo ol i save presim God (o ol giaman god) long givim sol long ol.
Taim Krais i tok olsem lain bilong em i olsem sol bilong graun, i min olsem God i makim lain bilong em long pasim wanem samting sin i wok long bagarapim long dispela graun, na long lukautim olgeta gutpela samting.
Tasol moa, Krais i stori long dispela samting nogut tru: taim sol i lusim pait bilong en. Sapos dispela samting kamap, i no bikos olgeta manmeri bilong graun i wok long daunim na bagarapim ol lain bilong God. Nogat. Dispela samting i kamap taim bel bilong ol lain bilong God i wok long bagarap. Taim ol longlong lain bilong God i wok long kamap wankain olsem ol lain bilong graun, ol bai i lusim pawa bilong stap olsem sol. Taim sol em i no sol moa, taim ol Kristen i no stap olsem lain tru bilong kingdom bilong God, i olsem ol i samting nating
na olgeta manmeri long graun i no gat hop nau. Sios bilong God i gat pawa. Ol lain bilong dispela graun i nidim sios long helpim ol i kisim salvesen, tasol sios i mas stap olsem Sios tru.
Ol Kristen i stap olsem lait bilong graun tu. Sapos i no gat ol Kristen i stap long graun, tudak bai karamapim graun. Olgeta save long God bai i go pinis.
I tru olsem yumi i bikpela samting tru? Yes. God i givim yumi, dispela liklik lain bilong em, dispela pawa bilong salvesen. Tasol sapos yumi no stap olsem sol na lait, God em i no inap yusim yumi nau, na yumi bai i stap olsem samting nating tasol.
SAMPELA TINGTING
Dispela tok, “yupela i stap olsem sol na lait bilong graun,” i gat wanem mining long laip bilong yu?
Ritim: Matyu 5:1-12
Ol manmeri i save, ol i stap rabis tru long ol samting bilong God...Ol manmeri i krai i stap... Ol manmeri i save daunim nem bilong ol yet...Ol manmeri i laikim tumas long bihainim stretpela pasin...Ol manmeri i save marimari long ol arapela...Ol manmeri bel bilong ol i klin...Ol manmeri i save mekim dai ol kros na pait...Ol manmeri i save bihainim stretpela pasin na long dispela as ol i kisim hevi long ol arapela ol i ken amamas. Kingdom bilong heven em i bilong ol. – Matyu 5:3-10
I gat 7 bilien samting manmeri long dispela graun. 1 bilien i olsem 1 tausen milien. Em i bikpela namba tru. Na olgeta dispela manmeri i gat ol hop na ol laik bilong ol yet.
Na i gat wanpela lain namel long olgeta dispela manmeri, na ol ensel i olsem wokboi bilong ol. Ol dispela manmeri i kam long kain kain hap long dispela graun, na God i save long nem bilong olgeta wan wan.
Tasol dispela ol manmeri i narakain olgeta. Bilong wanem? Ol i save hop long God. Ol i bilipim tok bilong God na ol i bilip olsem God bai i bosim dispela graun olsem king. Olsem na ol dispela manmeri i narakain liklik long olgeta arapela manmeri long dispela graun, maski ol i luk klostu wankain olsem ol arapela.
Ol i stap rabis tru long ol samting bilong God, tasol ol arapela manmeri i amamas long ol kago samting long dispela graun na ol i ting olsem ol i gat bikpela save tru.
Ol i krai i stap, na i luk olsem ol arapela i lap i stap.
Ol i save daunim nem bilong ol yet, na ol arapela i save apim ol yet.
Ol arapela lain ol i wok long bungim bungim olgeta gutpela samting long graun, tasol ol yet i laikim tumas long bihainim stretpela pasin.
Planti lain long dispela graun i wari long ol yet, tasol ol dispela lain i save marimari long ol arapela.
Bel bilong ol i klin, maski bel bilong ol arapela lain i doti tru na ol i wok long mekim pasin pamuk. Taim pait i kirap, ol dispela lain i wok long mekim dai ol kros na pait. Na God i tokim ol: “Yupela i ken amamas. Kingdom bilong heven em i bilong yupela!”
Amamas na kisim bel isi, yupela ol manmeri bilong God. Tok nogat long olgeta samting nogut bilong dispela graun. Hop long God. Bikpela Jisas bai i givim kingdom bilong em long yu!
SAMPELA TINGTING
Yu save bihainim ol gutpela pasin olsem yumi bin stori long em long tude?
Ritim: Matyu 3:13-17
Long dispela taim Jisas i lusim Galili na i go long wara Jordan. Em i go long Jon, na i laik kisim baptais long han bilong Jon. – Matyu 3:13
Wanpela narakain samting tru i kamap taim Jisas em i wokabaut namel long planti lain na em i go long Jon bilong Baptais bilong kisim baptais long han bilong en. Jisas yet i laik kamap klin!
Jisas inap tru long kisim olgeta pres, na olgeta lain i mas brukim skru long em. Ol namba wan profet tru i no inap long givim kis long lek bilong em o long karim su bilong em. Tasol em i tok, “Mi laik kisim baptais.”
Tasol Jon em i wari long dispela na em i laik pasim em. Tasol Jisas i bekim tok olsem, “Maski, nau yu mas mekim olsem mi tok. Long dispela pasin bai yumi inapim olgeta samting God i laik bai yumi mas mekim.” Olsem na Jon i bihainim tok bilong em.
Taim Jon em i harim pinis laik bilong God, em i redi long bihainim em. Jisas em i go long wara Jordan bilong kisim baptais. Em i kisim ples bilong yumi olsem em yet i man bilong mekim sin. Na taim em i sanap long dispela ples bilong ol lain bilong mekim sin, wanpela maus i singaut long heven olsem, “Dispela em i Pikinini bilong mi.” Spirit bilong God i kam daun, na pawa bilong em wantaim, na Jisas i redi long mekim wok bilong em yet.
Em i bikpela wok stret!
Kingdom bilong God em i kam klostu pinis bikos pawa bilong heven i bin kapsait long dispela King. Em i kisim baptais long Spirit na em bai i go bilong bagarapim pawa bilong Satan. Em i narakain samting olgeta! Jisas, Bikpela bilong olgeta bikman, i kisim ples bilong ol manmeri, na em i rausim sin! Maski Jon bilong Baptais - o yu na mi - i wari olsem Jisas em i no ken kisim baptais, God i tok, “Nogat – em i pikinini bilong Mi. Na em i gutpela long em i kisim baptais.”
Pikinini bilong God i kam bilong kisim bek ol lain bilong God. Olsem na em i sanap long kisim ples bilong ol lain bilong mekim sin, olsem yu na mi!
SAMPELA TINGTING
Tingting long baptais bilong Jisas. Tingting long Jisas i sanap long wara Jordan na kisim ples bilong yu, wanpela man o meri bilong mekim sin. Na tok tenk yu long God.
Ritim: Matyu 3:1-12
Yupela tanim bel. Kingdom bilong heven em i kam klostu pinis. – Matyu 3:2
Jon bilong Baptais i tok olsem, “Em i kam.” Klostu God bai kam bilong mekim save long ol lain i no bilip long em na bilong kisim bek ol lain bilong em. Olgeta samting nogut God bai i kukim long paia, na olgeta gutpela samting God bai i bungim bilong stap gut oltaim oltaim.
Jon i ting olsem las de i kamap klostu pinis, long wanem em i las profet bilong Olpela Kontrak. Na ol lain bilong Olpela Kontrak i save ting olsem taim Jisas i kam long dispela graun em bai kam long bringim salvesen na de bilong kot wantaim. Ol i no ting olsem Jisas bai i kam long graun tupela taim. Tasol yumi yet i save long sampela moa samting olsem Jon bilong Baptais, bikos yumi stap bihain long taim bilong dai na kirap bek bilong Jisas. Yumi save olsem Jisas i winim kot bilong yumi pinis long dispela namba wan taim em i kam daun long graun, na bihain em bai i kam bek long dispela graun olsem Jas.
Tasol dispela i no min olsem Jon i paul taim em i tok, “Kingdom bilong heven em i kam klostu pinis.”Dispela kingdom em i kam klostu pinis, na dispela King i bin kam. Jon i bihainim ol wok God yet i givim long em. Em i tokim ol lain Juda, na yumi olgeta, olsem i no gat wanpela bilong yumi i ken i stap long kingdom bilong God sapos yumi no tanim bel na kamap klin.
Tanim bel em i wanem samting? Em i no samting bilong sori bilong wanpela liklik samting nogut yumi mekim tasol. Nogat. Em i samting bilong pinisim ol pasin nogut bilong yumi. Yumi mas lusim ol pasin nogut long olpela bel bilong yumi na tanim i go long God na kisim ol gutpela pasin bilong em.
Taim yumi harim tok long kingdom bilong God, yumi mas tingim dispela tok bilong Jon: Yumi no ken wok long kisim ol gutpela samting long kingdom bilong God sapos han bilong yumi doti. Yumi no inap go insait long kingdom bilong God sapos yumi wok long sanapim kingdom bilong yumi yet long dispela graun.
Planti taim yumi save ting olsem: “Maski. Bihain bai mi tanim bel.” Planti taim yumi les long stretim ol kranki pasin long laip bilong yumi. Satan bai i yusim dispela tingting bilong yumi long bagarapim yumi. Em i save wok strong long pasim yumi long kam insait long kingdom bilong God taim em i tokim yumi long tanim bel long narapela de.
Yumi mas tanim bel nau! Long wanem, kingdom bilong heven em i kam klostu pinis!
SAMPELA TINGTING
Olgeta de yumi mas tok sori long ol sin bilong yumi na tanim bel. Long nau yu mas askim God long lusim rong bilong yu gen.
Ritim: Aisaia 35
Yupela i mas sanap strong na i no ken pret. God bai i kam na kisim bek yupela na mekim save tru long ol birua bilong yupela. – Aisaia 35:4
Olgeta man na meri i gat hop. Sapos wanpela man i nogat hop i min olsem em i dai pinis. Em i wanpela nupela yia, na planti taim long stat bilong wanpela nupela yia ol manmeri bai ting olsem,“Ating long dispela yia planti samting bai i kamap orait long mi.”Tasol yumi mas askim yumi yet – yumi gat wanem kain hop, na as bilong hop bilong yumi em i husat?
Ol Kristen i save hop long Krais, na ol i wetim taim Krais bai i kam bek, na ol i wetim kingdom bilong God tu. I tru olsem olgeta lain long graun, na dispela graun yet, i wok long painim gutpela ples bilong hop na glori, em dispela gutpela ples ol lain i bilipim tok bilong God i save kolim “kingdom bilong God.”
Aisaia 35 i stori long dispela ples bilong hop na glori. Ples drai bai i amamas tru na ol naispela plaua bai i kam na karamapim ol dispela hap. Na ol lek nogut bai i kalap olsem
ol dia, na mauspas bai i singaut na amamas. Sin na pret i go pinis. Em i ples bilong bel isi olgeta. I no gat krai na sori long dispela ples. Ol bai i ranawe i go. Em i kantri long hop bilong yumi. Olgeta manmeri i gat laik long stap long dispela kain ples – em i kingdom bilong God.
Na, harim. Em bai kamap olsem: “God bai i kam.” Olsem na yumi mas hop long God na prea long em. Ol samting long dispela graun olsem ol stoa na ol mani, ol save na ol marasin, olsem ol wok tu, i no inap kisim dispela Ples bilong Hop na Glori i kam. Nogat – “God bai i kam.”
Em bai i kam na mekim save tru long ol birua bilong yumi, na kisim bek yumi. Ol lain i wok long bagarapim yumi, em bai i mekim save long ol; tasol ol lain i save kisim bagarap, em bai i kisim bek ol. Em bai i mekim save long ol lain i no laikim em, tasol em bai i kisim bek ol lain i laikim em tumas. Na long dispela rot God bai opim dispela ples bilong hop na glori.
Olgeta manmeri i gat hop. Tasol yumi mas hop long God. Ol lain i mekim olsem bai i amamas. Ol bai i amamas tru.
SAMPELA TINGTING
Bai yu soim dispela hop bilong yu olsem wanpela Kristen olsem wanem?
Ritim: Hibru 11:29-12:2
...Ol dispela manmeri bilong bipo ol i sanap na raunim yumi i stap olsem bikpela klaut, na ol i soim yumi pasin bilong bilip. Olsem na yumi mas lusim olgeta kain samting i mekim yumi
i no inap ran strong, na olgeta sin i save pas long yumi. Na yumi mas strongim bel na ran strong long dispela resis God i bin makim bilong yumi ran long en. Yumi mas lukluk i go long Jisas, em i as bilong bilip bilong yumi, na bihain em bai inapim tru bilip bilong yumi. – Hibru 12:1-2
I no olsem yumi go insait long dispela nupela yia olsem wanpela hap palang long wara
i save surik i go kam long biksi. Nogat. Dispela nupela yia i olsem wanpela resis. Na God i singautim yumi long ran long dispela resis na em i skulim yumi long pasin bilong ran gut long dispela resis tu.
“Yumi mas lusim olgeta kain samting i mekim yumi no inap ran strong, na olgeta sin i save pas long yumi.” Sapos yu pasim planti klos tru na ran, em i olsem yu lusim dispela resis pinis. Planti klos tumas bai pasim yu long ran. Na tu sapos yu patpela tru na yu sotwin olgeta, hau bai yu pinisim dispela resis?
Ol lain bilong God i no ken karim ol pasin nogut bilong ol long dispela resis. Ol i mas tromoi i go olgeta wari bilong dispela graun. Taim God i singautim yu long stap long kingdom bilong em, yu no ken pulapim han bilong yu long ol kago samting bilong dispela graun na kain kain laik bilong yu yet. Nogat. Ol bai i hevi tumas. Yu mas holim wanpela tingting tasol, na em i bilong ran strong long dispela resis bilong Bikpela.
Dispela resis em i hat tru. Sampela bai ran, tasol ol i gat bikpela sik. Sampela bai ran, tasol ol i sot long mani. Sampela bai ran na ol kisim bagarap bikos ol i bihainim Jisas. Sampela bai mekim nupela wok long dispela yia o go long wanpela nupela skul; tasol maski, ol bai i ran. Maski wanem samting yumi bai mekim o yumi bai bungim long dispela yia, yumi olgeta i mas ran. Na yumi olgeta i mas ran na lukluk long Jisas taim yumi ran.
I gat planti manmeri i raunim yumi na lukluk long yumi. Tasol ol i no olsem manmeri nating. Nogat. Ol i save pinis long pasin bilong ran long dispela resis, bikos ol yet i pinisim dispela resis pinis. Ol i soim yumi pasin bilong bilip, na ol i raunim yumi olsem wanpela bikpela klaut. Ol i save olsem yumi mas bilip long Jisas taim yumi ran long dispela resis. Ol dispela lain bilong bipo, em ol i dispela lain Hibru 11 i stori long ol, husat i raunim yumi na ol i tokim yumi long stap strong long bilip tasol, na no ken les long ran long dispela resis.
Yumi mas lukluk i go long Jisas tasol. Lukluk long em. Taim yumi lukluk i go long Jisas, yumi inap long winim ol hevi na olgeta samting i wok long pasim yumi, na yumi bai i kisim prais. Stap strong na ran!
SAMPELA TINGTING
Tingting long sampela samting i wok long pasim yu long ran strong, na askim God long helpim yu tromoi i go ol dispela samting.
Ritim: Buk Song 130
Sapos yu kaunim olgeta sin bilong mipela bai husat inap long winim kot bilong yu? Tasol yu save rausim ol sin bilong mipela olsem na mipela i mas pret long yu. – Buk Song 130:3-4
Olgeta kantri na nesen i gat rot bilong ol yet bilong makim taim bilong Niuyia. Long planti ol kantri dispela las de bilong wanpela yia em i taim bilong ol bikpela pati, taim bilong spak na mekim bikpela nois stret.
Bilong wanem ol i save mekim olsem? Nogut ol i pret.
Yumi no ken pret, tasol em i gutpela long yumi i tingting gut long laip na wokabaut bilong yumi long dispela las de long olgeta yia. Em i gutpela long yumi i toktok wantaim Bikpela.
Wanpela yia i pinis: “Sapos yu kaunim olgeta sin bilong mipela, bai husat inap long winim kot bilong yu?”
Em i gutpela sapos yumi i tingting gut long ol sin bilong yumi long dispela yia i go pinis. Makim 10-pela minit samting bilong tingting long ol samting nogut yu bin mekim long dispela yia i go pinis. Yu inap long mekim olsem? Na bai yu autim ol dispela sin long God, o nogat?
“Tasol yu save rausim ol sin bilong mipela.”
Em i olsem God i raitim dispela samting long olgeta de long kalenda long dispela yia i go pinis: Mi pogivim yu! Mi pogivim yu! Long blut bilong Jisas, God i rausim olgeta sin bilong yu. Tok tenkyu tru long God!
Taim God i rausim dispela asua bilong ol sin yumi i bin mekim long bipo, bai yumi i bel isi long tude, na bai yumi i redi long wetim wanem samting bai i kamap bihain.
Yumi no save wanem samting bai i kamap bihain long tude. Planti lain bai i wari long dispela, na sampela lain bai wok long painimaut wanem samting bai i kamap bihain long tude. Tasol yumi i no inap. Na yumi no ken pret. Yumi ken bilip long God na trustim em olgeta!
Yumi save tru long dispela: Jisas bai kam!
SAMPELA TINGTING
Sindaun long 10-pela minit samting na tingim ol sin bilong yu long dispela yia i go pinis. Na askim God long rausim ol dispela sin bilong yu, na tok tenkyu long em long em i pogivim yu!
Ritim: Luk 5:27-32
“Pikinini Bilong Man i kam bilong painim ol man i lus na kisim bek ol.” – Luk 19:10
“Olsem tasol, mi no kam bilong singautim ol stretpela man long tanim bel. Nogat. Mi kam bilong singautim ol man i save mekim sin.” – Luk 5:32
Taim olgeta manmeri i pinis long amamas long taim bilong Krismas, orait yumi ken askim ol, “Bilong wanem Jisas i bin kam long dispela graun?” O yu ken i go long wanpela haus lotu na askim ol lain long haus lotu, “Bilong wanem Jisas i bin kam long dispela graun?” Ol bai i bekim dispela askim olsem wanem? Ating sampela bai i no inap long bekim gut.
Na tu, ating sampela bai bekim gut, tasol ol dispela gutpela bekim bai i no inap wankain olgeta. Nupela Testamen i gat kain kain rot bilong autim as bilong Jisas i bin kam long dispela graun. Buk Baibel i skulim yumi olsem Jisas i kam bilong kisim kingdom bilong God i kam, bilong bagarapim Satan, bilong bihainim laik bilong Papa bilong em, na bilong givim glori long God.
Tasol em i gutpela sapos yumi olgeta i save long dispela wanpela bekim long dispela askim: Krais i kam bilong painim na kisim bek ol manmeri i lus. Em i kam bilong kisim bek ol manmeri bilong mekim sin.
Bilong wanem yumi mas save long dispela wanpela bekim?
Namba wan, em bai i givim bel isi long yumi. Bikos yumi olgeta i lus, yumi olgeta i nidim Krais long kam na kisim bek yumi. Jisas i tok, “Mi no kam bilong singautim ol stretpela man long tanim bel. Nogat. Mi kam bilong singautim ol man i save mekim sin.”Em i tokim ol Farisi, “Ol man i no gat sik ol i no save go long dokta. Nogat. Ol sikman tasol i save go long dokta.” Em i laik soim ol olsem ol i mas klia gut long sin bilong ol yet. I no gat wanpela man o meri i stap orait. Olgeta i nidim Jisas long kisim bek ol.
Namba tu, yumi i mas klia bilong wanem Jisas i kam long dispela graun bikos yumi i stap memba long sios bilong em. Sapos Masta bilong yumi em i kam bilong painim na kisim bek yumi, yumi i mas bihainim dispela pasin bilong em. Yumi i mas go na painim ol man na meri i lus, na autim dispela gutnius long ol, olsem ol tu i ken kisim salvesen long Krais.
Yumi no save wok long painim ol samting i no lus, na ol lain i no gat sin i no nidim salvesen. Krais i kam bilong painim ol lain i lus na bilong kisim bek ol man na meri bilong sin. Ol lain i save olsem ol i pulap long sin, ol bai i go long Krais bilong kisim salvesen. Tasol ol lain i ting olsem ol i orait, ol i no save olsem ol i nidim Jisas.
SAMPELA TINGTING
Yu yet save bihainim dispela pasin bilong Jisas bilong “painim na kisim bek” ol lain i lus, o nogat?
Ritim: Mak 6:1-6
Orait em i go bek wantaim tupela, na ol i kamap long Nasaret, na oltaim em i save bihainim tok bilong tupela. – Luk 2:51
Taim Jisas em i stap long dispela graun laip bilong em i wankain olsem laip bilong yumi. Long san em i kirap, na long nait em i slip. Em i kaikai na em i mekim wok. Em i gat papa na mama na brata na susa, wankain olsem yumi.
Ating Josep em i dai taim Jisas i yangpela yet. Em i stap laip yet taim Jisas i gat 12-pela krismas, tasol taim Jisas em i kirapim wok tru bilong em long taim em i gat 30 krismas, yumi no harim moa tok long Josep. Yumi harim stori long mama bilong Jisas, na ol brata na susa bilong em tasol (Mak 3:31; 6:3).
Jisas em i bikpela long famili bilong em, na dispela i min olsem em i mas mekim hat work stret long lukautim famili bilong em sapos Josep em i dai pinis taim Jisas i yangpela yet.
Buk Baibel i no stori tumas long taim Jisas em i yangpela. Yumi harim stori long taim em i wanpela bebi, na bihain long dispela yumi harim stori long taim em i gat 12-pela krismas na i stap long tempel long Jerusalem. Na inap long 18 yia samting bihain long dispela, yumi no harim stori long laip na wokabaut bilong em.
Planti manmeri i bin wok long kamapim kain kain giaman stori long ol mirakel bilong Jisas taim em i yangpela yet. Ol i giaman tasol. Jisas em i mekim hat wok stret. Em i no wokim ol mirakel bilong kisim kaikai - nogat, em i bihainim pasin bilong mekim wok bilong kisim kaikai. Long Nasaret, dispela taun we em i stap taim em i yangpela, olgeta manmeri i save tok olsem Jisas em i wanpela kamda (Mak 6:3). Dispela em soim klia olsem Jisas em i olsem wanpela man nating tasol, kain olsem yu na mi.
Pasin bilong mekim wok em i gutpela samting. Sapos nogat, ating Jisas i no inap mekim planti wok kamda. Tasol em i bin mekim bikpela wok olsem kamda. Olsem na, sapos yumi i gat wok, yumi mas kirap na mekim wok gut.
Jisas bai i kam. Na taim em i kam bek, em bai gutpela long em i lukim yumi i mekim wok bilong yumi – maski em i wok long wanpela woksap, long gaden, long opis, long skul o long haus bilong yumi. Long wanem, em yet i mekim olsem taim em i stap long dispela graun.
SAMPELA TINGTING
Jisas em i man wankain olsem yumi. Dispela tok bai i helpim yu olsem wanem long laip bilong yu yet?
Ritim: Luk 2:41-52
“Ating yupela i no save, mi mas i stap long haus bilong Papa bilong mi?” ... Na mama bilong en i putim dispela olgeta tok long bel bilong en na i holim i stap. – Luk 2:49, 51
Long wanpela taim long olgeta yia olgeta manmeri bilong Juda i bin i go long Jerusalem long lotuim Bikpela. Na ol i amamas tru long mekim olsem. Ol i save wokabaut i go tasol, na ol i save wokabaut wantaim planti ol arapela man na meri. Ating ol i save singsing taim ol i wokabaut – Buk Song i gat sampela song ol i save singim taim ol i wokabaut i go long Jerusalem: Buk Song 120-134.
Maria na Josep i save bihainim pasin bilong tingim dispela Bikpela De God i Larim Yupela Israel i Stap Gut. Olsem na ol i bin go long Jerusalem, na bihain ol i wokabaut i go bek long Nasaret. Tasol Jisas i no wokabaut wantaim ol. Bihain long tripela de, tupela papamama i painim Jisas, na tupela i lukim Jisas i sindaun i stap insait long banis bilong tempel, namel long ol tisa. Ol man i harim tok bilong en, ol i kirap nogut long save bilong en na long tok em i bekim long ol.
Taim Josep tupela Maria i lukim em, tupela i kirap nogut. Na Maria i tok, “Pikinini, bilong wanem yu mekim dispela pasin long mitupela? Bel bilong mi tupela papa bilong yu i hevi tumas na mitupela i wok long painim yu.”Tasol Jisas em i bekim tok olsem long tupela, “Ating yutupela i no save, mi mas i stap long haus bilong Papa bilong mi?”
Em i gat 12-pela krismas tasol, na em i save olsem em i gat wok long bihainim laik bilong God, Papa bilong em. Tasol yumi no klia sapos Jisas i klia olgeta long wok bilong em na laik bilong Papa bilong em long laip bilong em.
Na mama bilong em i putim dispela olgeta tok long bel bilong en na i holim i stap. Ating em i save stap namel long pret na amamas taim em i lukim laip na wokabaut na pasin bilong Pikinini na Saviour bilong em. Taim Jisas em i liklik bebi, Maria i bin singim wanpela singsing i klostu wankain olsem singsing bilong Hana. Hana i givim pikinini man bilong em, Samuel, long Bikpela. Ating Maria i tingting long dispela, na em i kisim save olsem em i mas larim Jisas i bihainim laik bilong Papa bilong em.
Jisas em i man tru. Papamama bilong em i save olsem God em i Papa tru bilong em, tasol ating ol arapela i no save olsem em i Pikinini bilong God tu. Jisas em i wanpela yangpela mangi bilong lain Juda. Em i gat gutpela save na em i gat bikpela laik long bihainim laik bilong Bikpela, tasol em i wanpela yangpela mangi long lain bilong Juda. Tasol em i orait, yumi stap olsem man na meri tu, na em i kam long mekim yumi i kamap stretpela man na meri tru.
Na long wok bilong Jisas, planti ol manmeri olsem yu na mi i amamas long bihainim laik bilong Papa bilong ol long heven. Na sampela bilong ol dispela lain i ol yangpela mangi tu, na sampela i gat 12-pela krismas tasol.
SAMPELA TINGTING
Bilong wanem Luk i raitim dispela stori long yangpela mangi Jisas long buk bilong em?
Ritim: Luk 2:25-38
“Bikpela, mi wokboi bilong yu, na nau yu ken larim mi i go, na bel bilong mi i ken i stap isi, olsem bipo yu tok. Ai bilong mi i lukim pinis samting yu mekim bilong kisim bek mipela.” – Luk 2:29-30
God i promisim Simeon olsem em bai i lukim dispela Mesaia bipo long taim em i dai. Na long dispela de, Holi Spirit i kirapim Simeon na em i go insait long tempel, na em i lukim Maria na Josep na bebi bilong tupela. Na Simeon i kisim dispela bebi na holim em. Na em i litimapim nem bilong God olsem, “Bikpela, mi wokboi bilong yu, na nau yu ken larim mi i go, na bel bilong mi i ken i stap isi, olsem bipo yu tok. Ai bilong mi i lukim pinis samting yu mekim bilong kisim bek mipela.”
Simeon i no askim God long larim em i dai nau. Nogat, em i bin i stap olsem wanpela wasman, na taim bilong was bilong em i pinis. Em i olsem pesman bilong ol trupela lain bilong Israel. Na wanpela lapun meri, Ana, em i kam na lukim dispela bebi tu.
Buk Baibel i tok olsem Simeon em i “wetim dispela man God i bin makim bilong mekim gut bel bilong ol Israel.” Na Ana em i “autim tok bilong dispela pikinini long olgeta manmeri i wet long God i kisim bek ol manmeri bilong Jerusalem.”
Buk Baibel i soim olsem i gat trupela Israel i stap, na em i ol dispela lain i wetim dispela Mesaia. Bel bilong ol i strong long wetim em na prea long God i ken kam na kisim bek ol manmeri bilong Jerusalem.
Na nau Simeon tupela Ana i amamas tru na bel isi bikos ol i lukim dispela bebi long tempel. Na taim bilong was bilong ol i pinis. Olsem tasol Simeon i bin singim dispela singsing: “Bikpela, mi wokboi bilong yu, na nau yu ken larim mi i go, na bel bilong mi i ken i stap isi, olsem bipo yu tok. Ai bilong mi i lukim pinis samting yu mekim bilong kisim bek mipela.” Na Ana, dispela meri i kam long lain bilong Aser dispela pikinini bilong Jekop i no gat namba, em i lukim dispela bebi. Na em i klia olsem dispela pikinini em i dispela Mesaia ol i wetim long kisim bek ol manmeri bilong Jerusalem. Long dispela taim i olsem Olpela Testamen i pinis tru, na Nupela Testamen i kirap tru.
Em i olsem wanpela was i pinis na nupela was i kirap. Na nau ol lain bilong dispela Mesaia, dispela trupela Israel long dispela nupela kontrak, i stap olsem lain bilong was na wet na prea. Na klostu nau dispela taim bilong bel hevi na pen bai pinis na senis i kamap taim bilong amamas oltaim oltaim!
SAMPELA TINGTING
Yu inap lainim wanem samting long pasin bilong Simeon tupela Ana?
Ritim: Luk 2:8-14
“Litimapim nem bilong God i save stap antap tru.” – Luk 2:14
Em i gutpela sapos yumi i klia gut long singsing bilong ol ensel taim Maria i karim Jisas long Betlehem. Ol i tok olsem, “Litimapim nem bilong God i save stap antap tru.” Dispela tok em i bikpela samting na em i gutpela sapos yumi i lainim dispela tok.
Namba wan lo bilong God i olsem: “Yupela i mas bihainim mi wanpela tasol. Yupela i no ken bihainim ol giaman god.” Dispela i min olsem, “Litimapim nem bilong God i save stap antap tru.” Na taim Jisas i skulim yumi long pasin bilong prea, em i tokim yumi long prea, “Nem bilong yu i mas i stap holi.” Dispela i min, “Litimapim nem bilong God i save stap antap tru.”
God i kisim salvesen i kam long dispela graun. Na i olsem ol ensel i kamap lain bilong bosim ol singsing bilong olgeta samting God i wokim long dispela graun. Olgeta samting God i wokim long dispela graun i mas lainim pasin bilong singim dispela singsing: “Litimapim nem bilong God i save stap antap tru.”
Taim Jisas i kam long bel bilong ol bilip lain, laip bilong ol i mas senis. God i mas i stap olsem namba wan samting long laip bilong ol. Laip bilong yumi mas senis, na olgeta samting long laip bilong yumi mas givim glori long em. Na dispela ol pasin i soim klia olsem yumi wok long lainim dispela gutpela singsing isi isi.
Ating ol ensel i mas bel nogut taim ol i harim dispela graun i no singim dispela singsing. Tasol ol i mas wet inap long taim Krais i pinisim olgeta wok bilong em. Taim Jisas i kam bek long dispela graun, God bai i stap nambawan long laip bilong olgeta man na meri, na olgeta arapela samting long dispela graun tu. Long dispela taim olgeta manmeri, olgeta samting God em i wokim long dispela graun, na olgeta ensel bai singim dispela singsing: “Litimapim nem bilong God i save stap antap tru.”
SAMPELA TINGTING
Yu save singim dispela singsing, “Litimapim nem bilong God i save stap antap tru,” long laip bilong yu yet?
Ritim: Luk 2:1-7
God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim. – Jon 3:16
Wantaim planti manmeri tru long dispela graun, tude yumi i tingim bikpela laikim tru bilong God. Na yumi ken bungim maus wantaim planti ol arapela lain na tok, “Tenkyu, Papa long heven, long givim Jisas Krais long mipela. Tenkyu long soim klia tru laikim tru bilong yu i kam long mipela.”
Laikim tru bilong God i go long dispela graun: “God i laikim tumas olgeta manmeri bilong graun.” Laikim tru bilong God i no samting bilong yumi, famili bilong yumi, ol pren bilong yumi o kantri bilong yumi tasol. Nogat. God i laikim tumas olgeta manmeri bilong graun!
God i laikim tru. Olsem na em i givim. Yumi inap long givim sampela samting long narapela man o meri sapos yumi i no laikim em. Tasol pasin bilong laikim tru narapela i mas kamapim pasin bilong givim long narapela.
God i givim dispela wanpela Pikinini Man bilong em. Dispela em i soim klia olsem laikim tru bilong em i bikpela tru. Yumi mas ritim dispela stori bilong Krismas klia tru. Maria i karim wanpela bebi long Betlehem. Long dispela Pikinini, God i soim klia bikpela laikim tru bilong em i kam long yumi, bikos dispela pikinini em i Pikinini Man bilong em!
Dispela wok bilong God i namba wan samting bilong soim laikim tru bilong God long yumi. I gat planti naispela samting yumi inap long mekim na kisim long taim bilong Krismas. Tasol i gat planti samting nogut i stap yet long dispela graun, olsem na yumi bai i gat dispela askim,“Em tru olsem God em i laikim tumas olgeta manmeri bilong graun?”Tasol yumi no ken tingting olsem. Lukim dispela Pikinini i stap long bokis kaikai bilong bulmakau. Dispela
i putim ples klia olsem God i laikim tumas olgeta manmeri bilong dispela graun. Em i givim olgeta samting bilong em long yumi. Long dispela liklik pikinini, yumi lukim laikim tru bilong God.
God em i “givim” dispela wanpela Pikinini bilong em. Na yumi mas kisim em. Yumi mas brukim skru na redi long kisim dispela presen. No ken tok nogat long dispela samting God i redim long yumi long laikim tru bilong em.
Dispela presen i bikpela na naispela samting tru. Em i winim ol narapela presen. Nogat man inap long save gut long dispela. “Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” Long dispela presen yumi
i kisim God husat i givim dispela presen long yumi. Long Betlehem yumi i bungim God bilong yumi. Long Jisas yumi i gat laip.
SAMPELA TINGTING
Tok tenkyu long God long dispela nambawan presen stret em i givim long yumi!
Ritim: 1 Samuel 2:1-10
Em i daunim ol strongpela king, na em i litimapim ol man i no gat nem. – Luk 1:52
Taim yumi ritim singsing Hana i bin singim taim em i karim bebi Samuel, o dispela singsing bilong Maria long buk Luk sapta 1, yumi ken klia olsem planti ol tok long dispela tupela singsing i kam long ol arapela tok long Buk Baibel.
Na bikpela samting insait long dispela tupela singsing i olsem: God em i stap antap tru na em i strong tru. Em i save daunim ol lain i apim ol yet na em i daunim ol strongpela king tu. Tasol em i litimapim ol man i no gat nem.
Em i gutpela kain singsing bilong singim long dispela nait bipo long Krismas. Long Krismas, God i daunim ol strongpela king, na em i helpim ol lain i brukim skru long em. Yumi mas daunim yumi yet long kamap long Betlehem.
Tingim, a? Long taim Adam tupela Iv i stap long gaden Iden ol i gat laik long stap olsem God yet. Yes, man i save gat laik long wokim wanpela taua i go long heven. Yumi olgeta i gat laik bilong stap olsem bosman bilong yumi yet. Yumi olgeta i gat laik long bihainim laik bilong yumi yet na kamap olsem God yet.
Tasol nau em i taim bilong Krismas. Ol man i no kamap olsem God. Nogat, God i kamap man tru. Na God i tokim yumi olsem, sapos yumi laik kamap long kingdom bilong heven, orait yumi mas i go long dispela bokis kaikai bilong bulmakau long Betlehem na brukim skru long Jisas. Jisas tasol em i rot bilong i go long heven.
Dispela singsing bilong Hana na singsing bilong Maria ol i naispela singsing stret, na dispela kain tok i stap long planti hap long Buk Baibel: “Em i daunim ol strongpela king, na em i litimapim ol man i no gat nem.” Na yumi mas lainim dispela singsing tu – na yumi mas lainim long tude!
Taim bilong Krismas em i taim bilong daunim yumi yet. Olsem Matyu 18:3 i tok, “Mi tok tru long yupela, sapos yupela i no senis na kamap olsem ol liklik pikinini, bai yupela i no inap i go insait long kingdom bilong heven.”
SAMPELA TINGTING
Autim dispela singsing bilong Maria olsem singsing bilong yu yet bilong litimapim nem bilong God.
Ritim: Matyu 1:18-25
Man bilong en, Josep, em i stretpela man. Em i harim olsem Maria i gat bel, na em i laik lusim em. Tasol em i no laik givim sem long Maria long ai bilong ol manmeri. Olsem na em i laik lusim em isi tasol. – Matyu 1:19
Yumi mas stap olsem gutpela wokman long olgeta samting God i givim yumi. Yumi mas lukautim na bosim gut olgeta samting em i givim yumi tu. Long sampela manmeri God
i tok, “Hia, dispela 1 milien kina i bilong yu nau.” Na bihain, ol dispela lain i mas tokim God long wanem samting ol i mekim long dispela mani. Wankain long pikinini. Ol papa na mama i mas tokim God long wanem samting ol i mekim long pikinini bilong ol – ol i bin lukautim dispela pikinini gut, o nogat? Yumi olgeta i mas lukautim na bosim gut olgeta samting God i givim long yumi.
God i givim Pikinini Man bilong em yet long wanpela man long em i mas lukautim gut dispela Pikinini. Dispela man em i Josep. Josep em i “stretpela man.” Dispela i min olsem
em i bilip long God na bihainim laik bilong em na ol lo bilong kantri bilong em tu. Em i no bikman, tasol em i man bilong tok tru – God i gat laik long givim planti samting long dispela kain man bilong em i ken lukautim na bosim gut ol dispela samting.
Na Josep i kisim save olsem Maria i gat bel. Taim em i kisim save long dispela nius, ating em i mas sori tru. Em i ting olsem Maria i bin slip wantaim narapela man. Tasol Josep i no kisim em i go long wanpela jas long mekim save long em (Lo 22:23-24). Nogat, em i tingting long lusim em tasol bikos em i no laik givim sem long Maria long ai bilong ol manmeri.
Tasol God i toktok wantaim em. God i kolim em “man bilong lain bilong Devit.” Dispela
tok i bikpela samting long dispela man nating long harim. Devit em i wanpela king, tasol Josep em i man nating. Na moa, God i tokim Josep olsem dispela pikinini i stap long bel bilong Maria, em Holi Spirit i bin putim long bel bilong em. Na Josep i bilipim tok bilong God. Na em i bihainim dispela gutpela rot ol lain bilong bilip i save bihainim: “Orait em i mekim olsem ensel bilong Bikpela i bin tokim em.” Dispela em i gutpela pasin bilong bilip – bihainim tok bilong God. Em i kisim meri bilong em olsem God i tokim em long mekim.
Long tupela arapela taim God i toktok long Josep long wanpela driman (Matyu 2:19-20, 22), na wantu Josep i bin kirap na bihainim tok bilong God. Em i man bilong bihainim tok bilong God stret. Em i no les. Em i bihainim tok tasol.
I luk olsem Josep em i dai bipo long taim Jisas em i mekim wok long ai bilong ol arapela. Taim wok bilong Josep i pinis, God i kisim dispela wokman bilong em i go long heven. God em i bin givim Josep, dispela man nating, namba wan presen bilong em yet long lukautim. Na Josep em i bihainim gut tok bilong God – em i stretpela man, na em i beltru.
SAMPELA TINGTING
God em i givim yu wanem samting long lukautim na bosim gut? Yu save bihainim tok bilong em, o nogat?
Ritim: Luk 1:26-38
Na Maria i askim ensel olsem, “Dispela samting bai i kamap olsem wanem? Mi no marit yet long wanpela man... Harim. Kandere bilong yu Elisabet em i lapun pinis, tasol em i gat bel na em bai i karim pikinini man.” – Luk 1:34, 36
Bilong wanem God i save inapim ol promis bilong em long ol narakain rot?
Tingim Abraham na Sara. Tupela i stap longpela taim na ol i no kisim dispela pikinini God i bin promisim ol long kisim. Tasol ol i kisim dispela pikinini long taim ol i lapun pinis na i luk olsem ol i no inap karim pikinini moa. Wanem samting man i no inap long mekim, God inap tru long mekim, na em i givim wanpela pikinini long ol. I no gat wanpela samting God i no inap long mekim.
Na taim yumi ritim stat bilong dispela Nupela Testamen, wantu yumi ritim wanpela stori long wanpela meri i lapun pinis, na em i no inap karim pikinini moa. Na tu yumi ritim wanpela stori long wanpela yangpela meri i no marit long wanpela man, na em i karim wanpela bebi. Long dispela tupela meri God i bringim tupela bebi i kam long dispela graun long helpim yumi. Na planti lain i bin wetim dispela tupela pikinini.
Dispela tupela samting i hat tru long bilipim. Planti manmeri bai tok olsem em i wanpela naispela stori, tasol i no tru olgeta.
Tasol, yumi mas klia. Yumi no inap tingim taim bilong Krismas sapos yumi no bilip long God. Krismas em i wok bilong God tasol. Dispela kingdom em i kingdom bilong God. God yet i salim Jon bilong Baptais i kam. Jisas em i Pikinini man bilong God. Olgeta samting long taim bilong Krismas em i wok bilong God tasol.
Long taim bilong Krismas planti manmeri i save tingting long dispela sta long skai, long dispela bokis kaikai bilong ol bulmakau o long Maria. Tasol yumi mas harim dispela tok bilong Aisaia: “Husat bai inap long bilip long ol samting nau yumi harim? Na husat i bin lukim Bikpela i mekim kain strongpela wok olsem nau em i mekim?” (Aisaia 53:1)
Em i gutpela long singim ol song bilong tingim Krismas, na em i gutpela long amamas long dispela taim. Tasol ol dispela samting i no inap. “Husat i bin lukim Bikpela i mekim kain strongpela wok olsem nau em i mekim?”
Long dispela pikinini bilong Sekaraia na Elisabet, na moa yet long dispela Pikinini Man bilong Maria, God em i soim yumi olsem salvesen i kam long em tasol. Krismas em i taim bilong presim ol gutpela wok bilong God! Taim yumi bilipim dispela wok bilong God, bai yumi kisim strong long tude na hop long olgeta de bai i kamap bihain.
SAMPELA TINGTING
Long dispela taim bilong Krismas, presim ol gutpela wok bilong God!
Ritim: Luk 1:13-17
“Dispela De bilong mi em i bikpela De na bai mi mekim olgeta manmeri i pret nogut tru. Tasol pastaim bai mi salim profet Elaija i kam long yupela na bihain dispela De bai kam.” – Malakai 4:5
“Em bai i kisim pasin na strong bilong Elaija na wokabaut i go pas long Bikpela” – Luk 1:17
Bihain long buk Malakai long Olpela Testamen, na bipo long stat bilong Nupela Testamen, 400 yia samting i bin go pinis. Na las tok bilong God long Malakai em i olsem, “Bai mi salim profet Elaija i kam long yupela na bihain dispela De bai kam.”Na wanpela ensel bilong Bikpela i go lukim Sekaraia long Nupela Testamen, na ensel i tokim em, “Em bai i kisim pasin na strong bilong Elaija na wokabaut i go pas long Bikpela.” Nupela Tesamen i kirap long dispela hap we Olpela Testamen i pinis. Bikpela bai i kam, na Elaija bai i go pas long em.
Dispela Elaija long Nupela Testamen em i Jon bilong Baptais. God em i salim Jon bilong Baptais long redim ol man, na ol bai i stap redi long Bikpela i kam. Na em i mekim dispela wok long wankain pasin na strong bilong Elaija. Elaija em i dispela man i bin tokim ol manmeri olsem: “Yupela manmeri bilong tupela tingting, wanem taim bai yupela i gat wanpela tingting tasol? Sapos Bikpela em i God tru, orait yupela i mas lotu long em wanpela tasol. Na sapos Bal i God tru, orait yupela i mas lotu long em wanpela tasol” (1 King 18:21).
Sapos yumi laik stap redi long bungim Bikpela, yumi mas harim tok bilong Jon bilong Baptais: no ken stap olsem manmeri bilong tupela tingting. Kisim wanpela tingting tasol! Sapos Bikpela em i God, orait lotuim em. Sapos mani bilong yu em i god, orait yu ken lotuim mani bilong yu.
Yumi mas bungim Jon bilong Baptais sapos yumi laik redi long bungim Jisas. Dispela i min olsem yumi mas harim tok bilong em: yumi mas tanim bel na bilip. Na yumi no inap bilip long Jisas sapos yumi i bilipim ol arapela samting wantaim. Sapos yumi tok yes long Jisas, orait yumi mas tok nogat long ol arapela god.
Mi no bin lukim dispela kain tok long wanpela kad o pas o piksa long taim bilong Krismas. Tasol em i gutpela tok tru, na em i gutpela tok long yumi i harim. Sapos yumi laik lukim Bikpela bilong yumi, orait yumi no ken abrusim dispela tok!
SAMPELA TINGTING
Bai yu harim dispela tok long dispela taim bilong Krismas, o nogat?
Ritim: Malakai 4
“Harim gut. Wanpela De bai i kamap na bai paia i kukim olgeta manmeri bilong bikhet na olgeta manmeri nogut, olsem paia i save kukim kunai i drai. Long dispela De bai ol i bagarap long paia na bai ol i pinis olgeta.” – Malakai 4:1
“Tru tumas, bai mi kam kwiktaim.” – Kamapim Tok Hait 22:20
“Wanpela De bai i kamap...”“Dispela De bai i kamap.”Dispela kain tok i olsem las tok bilong dispela las sapta bilong Olpela Testamen. Na long las sapta bilong Nupela Testamen, Holi Spirit wantaim meri bilong Pikinini Sipsip tupela i tok, “Yu kam,” na Bikpela Jisas i bekim tok olsem, “Tru tumas, bai mi kam kwiktaim.”
I olsem dispela tok “kam,” i raunim olgeta tok long Buk Baibel, na dispela tok i olsem wanpela prea na wanpela promis wantaim.
Olsem tasol em i gutpela long ol bilip lain long lukluk i go bek na tingim ol tok bilong God, tasol ol i mas lukluk antap na bilip tu. Na bikpela samting i olsem: yumi mas lukluk long na wetim taim Bikpela bai i kam bek. Taim yumi mekim olsem, bai yumi kisim gutpela save long God, na tu em bai i helpim yumi long bihainim tok na laik bilong God.
Em i bikpela samting long save olsem God “em i dispela wanpela bai i kam.” Planti bilong yumi i tingting long God olsem wanpela God i stap longwe tru long yumi. Na ol lain i no bilip long God, planti taim ol i save olsem wanpela God i stap. Taim ol i tingting long ol samting bilong laip, long samting bilong dai, long bel na tingting bilong man na long bodi bilong man – ol bai i save olsem God i stap.
Tasol dispela i no inap. Ol lain i bilip tru long God, ol i save olsem em i God bilong kam. Yes, em i stap antap long dispela graun, tasol em i bin wokabaut long dispela graun tu na em bai i kam bek long dispela graun tu.
Olsem tasol em i no inap long yumi i autim kain kain samting long ol pasin bilong God na wok bilong em. Bilip em i samting bilong wetim taim God bai i kam bek long dispela graun.
Sapos yu wetim sampela famili bilong yu, ol bai i kam long wanpela balus long tri kilok, ating yu bai askim yu yet planti taim: “Ol bai i kam long taim stret? Ol i kam pinis, o nogat?” Na taim yu lukim balus long skai, bai yu tok, “Yes, ol i kam nau.” Em i olsem yu bin redim yu yet na wetim ol. Ol i tok long kam, olsem na ol i kam. Na yu yet i wetim ol i stap.
Na yumi i ken bungim olgeta tok bilong God long Olpela Testamen na Nupela Testamen wantaim, long dispela sotpela tok: Em bai i kam!
SAMPELA TINGTING
Bai yu tingting long taim Bikpela bai i kam bek, long dispela taim bilong Krismas, o nogat?
Ritim: Malakai 2:13-3:4
Tasol taim Bikpela i kam, husat inap winim kot? Taim em i kamap ples klia, husat bai i no inap lus? – Malakai 3:2
Long taim bilong profet Malakai, ol manmeri i wok long prea i stap. Ol i wetim taim Bikpela bai i kam, dispela de bilong Bikpela, na ol i prea olsem: “Kam. Emanuel, yu mas kam!”
Ol i wokim wanpela nupela tempel pinis, na dispela tempel em i pulap long planti manmeri. Ol i raunim alta bilong Bikpela na i krai i stap bikos ol i ting olsem Bikpela i no sori long ol. Ol i no bilip strong long ol promis bilong em. Tasol yet ol i krai na askim Bikpela long kam.
Na profet Malakai i bekim dispela krai bilong ol na ol i kirap nogut. “Yes,” em i singaut strong, “Bikpela bai kam. Wantu em bai i kam long tempel bilong em. Tasol planti bai i no amamas long dispela. Taim em i kam, husat inap winim kot? Taim em i kamap ples klia, husat bai i no inap lus?”
Klostu nau em i taim bilong krismas. Em bai olsem wanem long yumi, sapos Malakai i stap long kantri bilong yumi nau? Na sapos em i go long wanpel bikpela stoa, dispela kain stoa ol i save putim ol Krismas singsing long redio bilong ol, na em i stopim dispela musik na em i singaut olsem: “Klostu nau Krismas bai kam – 6-pela de tasol. Tasol taim Bikpela i kam, husat inap winim kot? Taim em i kamap ples klia, husat bai i no inap lus?”
Ating sampela bai kirap nogut. Tasol sampela arapela bai ting olsem em i autim tok long Buk Baibel tasol, na ol bai i no inap wari tumas long dispela tok.
Tasol, sampela taim ol manmeri i save toktok planti tumas, na lus tingting long Tok Tru. Long taim bilong Malakai, dispela tempel i pulap long planti kain kain tok tu: “Yupela i bin mekim planti kain kain tok na Bikpela i les pinis long dispela toktok bilong yupela” (2:17). Bilip bilong ol i lus pinis: “Ol i tok, God i save mekim stretpela pasin. Tasol mipela i no lukim em i mekim dispela kain pasin” (2:17). Na tu ol i brukim promis ol i bin mekim long meri bilong ol, ol i bin maritim taim ol i yangpela yet (2:14-15).
Taim Bikpela i kam, yumi no inap abrusim belhat bilong em long ol naispela tok o singsing o autim tok. Nogat. Yumi mas bilip na bihainim Bikpela, Malakai i tok.
Yumi no stap na wetim Krismas tasol. Yumi wetim dispela taim Bikpela bai i kam bek tu. Olsem na yumi mas stap strong long bilip long em. Na sapos yumi marit, orait yumi mas i stap tru long man o meri bilong yumi, na yumi mas laikim tru ol wantok bilong yumi olsem yumi laikim yumi yet.
SAMPELA TINGTING
Taim yu wetim Krismas, yu save wetim dispela taim Bikpela bai i kam bek tu?
Ritim: Aisaia 53:1-7
Dispela man i ritim dispela tok pinis orait em i askim Filip olsem, “Mi askim yu. Profet i tok long husat na i mekim dispela tok.” – Aposel 8:34
Planti lain Juda i no bihainim Jisas bikos ol i les long kisim wanpela Mesaia i bungim planti hevi na pen. Ol i ting olsem wanpela Mesaia i mas i stap olsem wanpela bikman stret. Tasol Jisas yet i tok olsem em i dispela Mesaia olsem Olpela Testamen i bin stori long em. Em i karim pen “olsem tok i stap long buk bilong God.” Aisaia 53 em i dispela stori long Jisas i karim pen.
Tasol ol lain Juda i no bilip olsem Aisaia 53 i stori long Mesaia bilong ol. Sampela i ting olsem dispela sapta i stori long profet Aisaia yet. Na sampela i ting olsem dispela sapta i stori long dispela nesen bilong Juda i karim pen.
Em i gutpela sapos yumi olgeta i stori long dispela tok long Aisaia 53 wantaim ol arapela, na, wantaim ol lain Juda tu. Yumi i ken i askim ol, “Dispela wokman bilong God, em i husat tru? Dispela man i bin pulap long sori na ol kain kain hevi, em i husat tru? Aisaia i tok olsem dispela man i kisim bagarap long asua bilong sin bilong yumi. Em i husat tru?”
Tingim dispela man bilong Afrika i bin ritim tok long Aisaia 53 long buk Aposel sapta 8. Em i gat dispela askim long Filip: “Mi askim yu. Profet i tok long husat na i mekim dispela tok?”
Ol Kristen bilong kain kain nesen inap long autim na kliaim dispela tok long Aisaia 53 long ol wantok bilong ol. Em i klostu long taim bilong Krismas! Em i gutpela long yumi i autim dispela tok long ol lain Juda husat i no save tingim taim bilong Krismas.
Sapos yumi i stori wantaim wanpela Juda, em gutpela sapos yumi toktok long Aisaia 53. Na taim yumi ritim dispela tok, yumi ken stori long gutnius bilong Jisas tu (Aposel 8:35).
SAMPELA TINGTING
Yu inap long autim gutnius bilong Jisas long dispela sapta – Aisaia 53?
Ritim: Aisaia 52:7-10
Bai ol manmeri i amamas tru long lukim wanpela man i ran i kam long ol ples maunten, bilong bringim gutpela tok long Jerusalem. – Aisaia 52:7
Ol man i amamas tru long lukim man i kam bilong bringim gutnius. – Rom 10:15
Em i gutnius tru olsem Krais i kam long dispela graun olsem wanpela bebi. Na dispela tok “gutnius” i kam long dispela tok bilong Aisaia taim em i lukim driman long ol man i kam long ol ples maunten, bilong bringim gutpela tok long Jerusalem. Na taim dispela Nupela Testamen i kam pinis, taim yumi tokaut long Jisas, em i samting bilong autim “gutnius.”
Wanpela ensel i bringim dispela gutnius namba wan taim: “Yupela i no ken pret. Harim. Mi bringim gutnius i kam long yupela, em nius bilong mekim olgeta manmeri i amamas tru.”Na dispela i kamap long taim Maria i karim Jisas.
Planti bilong yumi i bin harim planti samting tru long Jisas, olsem na yumi no save tingting tumas long dispela “gutnius.” Dispela i no gutpela. Nogut yumi les long harim dispela gutnius, na nogut yumi ting olsem dispela gutnius em i liklik samting. Yumi mas lukaut, bikos dispela gutnius bilong Jisas em i namba wan gutpela tok na em i las gutpela tok bilong bikpela amamas tru.
Wanem samting em i gutnius? Bai mi autim wanpela liklik trupela stori olsem wanpela
tok piksa long gutnius. Long kantri The Netherlands, long yia 1945, ol i stap long wanpela bikpela pait stret. Em i long taim bilong Hitler, dispela man nogut tru. Em i hetman bilong kantri Germany, na ol Germany i wok long bagarapim planti ol arapela kantri. Long The Netherlands, planti ol man i dai long han bilong ol, ol i no gat kaikai, na ol Nazi lain (lain bilong Germany) i wok long mekim nogut tru long ol olgeta taim. Na ol i krai nogut tru long God i ken i kam na helpim ol. Ol i bung long ol sios. Na long planti ol nait ol i prea i go i go na askim God long givim fridom long ol na helpim ol.
Na long 4 Mei ol i harim gutpela tok stret: “Em i pinis! Em i pinis! Yumi stap fri nau! Bel isi bai i stap gen!” Na i no gat wanpela i sindaun nating. Olgeta man na meri na pikinini i kirap na lusim haus bilong ol. Planti bilong ol i pulapim olgeta rot long olgeta siti na taun. Na ol i singsing na amamas. Ol i singsing strong. Ol i pulap olgeta long amamas tru.
Ol dispela lain i harim gutnius stret! Tasol gutnius bilong Krismas i winim dispela kain gutnius olgeta. Taim Krais i kam long dispela graun, heven i op na bikpela krai i kam olsem: “Em i pinis! Em i pinis olgeta! Bel isi i kam pinis na olgeta lain bai i lukim dispela salvesen bilong God bilong yumi!”
SAMPELA TINGTING
Yu amamas tru long harim dispela gutnius bilong Jisas Krais, o nogat?
Ritim: Aisaia 43:1-4
Taim yupela i brukim ol wara i daun tumas, bai mi stap wantaim yupela, na wara bai i no inap bagarapim yupela . Na taim yupela i go insait long paia i hat tumas, bai paia i no inap kukim yupela. – Aisaia 43:2
God i no tok olsem yumi bai no gat nid long brukim ol wara i daun tumas o go insait long paia i hat tumas long laip bilong yumi. Tasol em i tokim yumi, “Taim yupela i brukim ol wara i daun tumas, bai mi stap wantaim yupela....na taim yupela i go insait long paia i hat tumas, bai paia i no inap kukim yupela.”
Yumi no ken ting long kisim wanem samting God i no promis long givim yumi. Nogut yumi ting olsem God bai “mekim yumi i slip long gutpela gras” tasol, na nogut yumi ting olsem em i no inap kisim yumi i go long“ples nogut na bikpela tudak.”Yumi mas kisim wanem samting God em i promis long givim yumi – olsem em bai i stap wantaim yumi long ples nogut na bikpela tudak.
Ol lain Israel i klia long mining bilong dispela tok. Ol i save olsem ol tumbuna bilong ol i bin brukim solwara Retsi na ol i no lus long wara bikos God i bin lukautim ol (Kisim Bek 14). Olsem na ol i ken bilip olsem Bikpela bai i lukautim ol taim em i kisim ol i go long wara na paia. God bai lukautim ol taim ol birua i rausim ol long ples bilong ol na ol i go i stap long narapela kantri.
Na yumi ol lain bilong nupela kontrak, yumi ken klia long dispela tu, bikos yumi stap bihain long taim Jisas i kam long dispela graun olsem wanpela bebi na i dai long yumi long diwai kros. Dispela Pikinini bilong God i bin kam na em i redim rot bilong yumi. Em i bin i go long bikpela wara stret na paia wantaim. Em i bin bungim olgeta hevi, pen na sori, na em i bungim ol bikpela traim tu.
Rot bilong yumi em i wankain olsem rot bilong lain Israel: yumi wokabaut long longpela rot stret na yumi no bin kamap long siti bilong God yet. Na tu, yumi mas wokabaut long wara na paia long kamap long dispela siti. Tasol God i promisim yumi olsem yumi no inap lus long wara, na paia i no inap kukim yumi.
Krais i stap wantaim yumi – olsem na yumi bai i stap orait na kamap long dispela siti bilong God.
SAMPELA TINGTING
I gat sampela samting i kamap olsem bikpela wara na paia long laip bilong yu? Na yu bilip olsem God bai lukautim yu na yu bai i stap orait na kamap long siti bilong em?
Ritim: Aisaia 42:1-4
Long dispela pasin, Jisas inapim wanpela tok God i bin mekim long maus bilong profet Aisaia. Em i bin tok olsem, “...Pitpit i no gat strong na i laik bruk, em bai i no brukim olgeta. Na em bai i no mekim i dai lam i no lait gut.” – Matyu 12:17,20
Olpela Testamen i stori long taim dispela Mesaia bai i kam olsem wanpela man bilong pait tasol tu, em bai i kam olsem wanpela man bilong bel isi na olsem wanpela gutpela poroman tru. “Em i save was gut long ol lain manmeri bilong en, olsem wasman bilong sipsip i save lukautim ol sipsip bilong en. Wasman i save putim ol pikinini sipsip long bros na karim i go. Na em i save wokabaut isi na soim rot long ol sipsip i gat liklik pikinini.”Long strong bilong em, Krais bai i kisim bek olgeta manmeri bilong em, na em i no inap daunim wanem ol manmeri i no gat strong: “Pitpit i no gat strong na i laik bruk, em bai i no brukim olgeta. Na em bai i no mekim i dai lam i no lait gut.”
Pitpit i no gat strong. Na lam i no lait gut em i no gat strong tu – liklik win tasol inap long rausim lait olgeta. Dispela tupela samting i olsem tok piksa bilong ol man na meri i no gat strong.
Tasol gutnius i stap. Profet Aisaia i autim tok long dispela Mesaia husat bai i kam, na em bai i wari long ol dispela man na meri i no gat strong. Em bai i lukautim ol na kisim bek ol.
Nupela Testamen i soim klia olsem Jisas inapim dispela tok profet taim em i kam na lukautim ol rabislain na ol lain i gat sik tu. Planti taim ol arapela man i no wari long ol rabislain, tasol Krais em i mekim planti wok wantaim ol.
Dispela em i narakain samting, na em i olsem gutnius long yumi olgeta! Yumi save laikim ol bikman tru, tasol yumi mas tingim – Jisas em i helpim ol rabisman.
Na sios i mas lukaut long pasin bilong em bilong lukautim ol lain i no gat strong. Sios i mas helpim ol i kam insait long sios – nogut ol i ting olsem ol i rabisman insait long sios bilong God. Yumi mas kisim ol i kam, maski dispela pasin i givim hat wok long yumi. Tingim pasin bilong Krais: “pitpit i no gat strong na i laik bruk, em bai i no brukim olgeta. Na em bai i no mekim i dai lam i no lait gut.”
SAMPELA TINGTING
Prea long ol man na meri i no gat strong, na askim God i ken strongim ol long strong bilong em.
Ritim: Aisaia 40:1-5
God bilong yupela i tok, “Strongim bel bilong ol manmeri bilong mi, na mekim bel bilong ol i stap isi.” – Aisaia 40:1
Taim mi kamap wanpela pasto na mi stap long namba wan sios bilong mi, em i wok bilong mi long autim wanpela tok long sampela elda na sampela arapela pasto. Taim mi mekim olsem, mi bin autim sampela tok long ol pasin nogut long dispela Kristen sios. Mi no mekim gutpela pasin, na bihain wanpela pasto i kam na toktok wantaim mi. Em i wanpela lapun pasto, tasol taim em i toktok wantaim mi, em i no krosim mi o tok pait wantaim mi. Nogat, em i kam long mi long taim dispela bung i pinis, na em i tok, “I gat wanpela samting yu
no ken lus tingting long em – em i wok bilong yumi ol pasto bilong autim tok long pasin bilong mekim bel i stap isi.”
Na mi tingim dispela tok i kam inap long tude.
Buk Baibel i givim yumi bikpela bel isi. I gat planti ol man long dispela graun i gat kain kain tingting long dispela tok “bel isi.” Sampela taim yumi bai i kisim bel isi taim yumi bung wantaim ol pren bilong yumi. Sampela taim bai yumi kisim bel isi taim narapela i givim naispela tok long yumi taim wanpela lain bilong yumi i dai pinis.
Tasol, long ol Kristen, dispela tok “bel isi” i gat sampela moa mining tu bikos yumi i kisim dispela bel isi i kam long God yet. God i mekim bel bilong yumi i stap isi. Na dispela bai
i strongim yumi maski yumi bungim bikpela hevi o pen. Long dispela Katekism bilong Heidelberg yumi gat dispela askim: “Wanem samting tasol i save givim yu bel isi taim yu stap laip na taim bilong i dai?” I gat wanpela samting tasol i save givim yumi bel isi: “Mi no bilong mi yet, tasol bodi wantaim spirit bilong mi i bilong Bikpela Jisas Krais.”
Olgeta lain long dispela graun i nidim dispela kain bel isi, na yumi ol Kristen i gat dispela kain bel isi. I no min olsem olgeta man i luksave olsem ol i nidim dispela bel isi long laip bilong ol. Tasol Buk Baibel na Katekism bilong Heidelberg i stori long dispela samting tasol i save givim bel isi long yumi – taim yumi bilong Bikpela Jisas Krais. Dispela bai inapim nambawan laik bilong yumi olgeta.
SAMPELA TINGTING
Wanem samting i save givim bikpela bel isi long yu?
Ritim: Aisaia 12
Hul wara i no save pinis, em i save givim wara long ol samting, na ol i stap gut. Bikpela i olsem dispela wara i no save pinis. Oltaim em i save helpim yupela na mekim yupela i stap strong. Olsem na yupela bai i amamas long i go long Bikpela na askim em long helpim yupela. – Aisaia 12:3
“Sapos wanpela man i dai long wara, orait em i ken i kam long mi na dring.” – Jon 7:37
I gat planti hap long dispela graun we graun em i drai olgeta. Ol diwai na plaua i no inap long gro long ples drai. Olgeta samting i nidim wara bilong stap laip.
Long Buk Baibel wara em i wanpela tok piksa long salvesen bilong yumi. Na God yet i olsem hul wara i no save pinis. Laip bai i bagarap na dai olgeta sapos gutpela pasin bilong God i no kam long em. Olgeta samting i nidim God bilong stap laip.
Jisas em i Pikinini bilong God. Wankain olsem wanpela riva i save karim wara long maunten i go long wanpela taun, Jisas i save kisim laip long God i go long ol manmeri i bilip long em.
Tasol maski wanpela bikpela riva i stap long ples bilong yu, dispela wara i no inap helpim yu sapos yu no sindaun na kisim sampela wara na dringim dispela wara. I no gat narapela i ken dring; yu yet mas dringim dispela wara. Na bai yu inap long singsing wantaim Aisaia, “Litimapim nem bilong God. Long wanem, em i bin kisim bek mi.”
Hau bai yu dringim dispela wara Aisaia i stori long em?
Long dring long dispela wara bilong salvesen, yumi mas i go long Jisas. Krais i tok, “Sapos wanpela man i dai long wara, orait em i ken i kam long mi na dring.”Dispela tok dring na kam long mi em i tok bilong bilip. Yumi mas bilip long Krais. Jisas yet i bin tok, “Na man i bilip long mi, em bai i no i dai moa long dring wara.”
Taim yumi kisim salvesen pinis bai yumi i amamas stret: “Olsem na yupela bai i amamas long i go long Bikpela na askim em long helpim yupela.” Salvesen em i no samting bilong amamas tasol. Tasol bikpela samting bilong salvesen em i pasin bilong amamas. Na dispela amamas i no inap pinis na em i narakain amamas tru long ol lain i no kisim marimari bilong God pinis. Salvesen i save givim amamas long yumi!
Long planti ol ples, hul wara em i ples bilong amamas – wara i save givim laip. Wankain olsem, yumi bai amamas na singsing olgeta de taim yumi dring long dispela hul wara bilong God.
SAMPELA TINGTING
Yu save pilim dispela bikpela amamas long laip bilong yu yet, o nogat?
Ritim: Aisaia 11:1-9
Lain bilong Jesi i stap olsem as bilong diwai ol i katim pinis. Tasol nupela kru bai i kamap long dispela as bilong diwai. – Aisaia 11:1
Josep em i bilong lain famili bilong King Devit. Olsem na em i lusim taun Nasaret long Galili, na em i go long Judia long taun bilong Devit, ol i kolim Betlehem. – Luk 2:4
Jesi em i papa bilong King Devit. Taim dispela profet Aisaia i toktok long Jesi i stap olsem as bilong diwai ol i katim pinis, olgeta manmeri bilong Israel i save pinis long wanem samting em i stori long em. Kingdom bilong Devit i bin bagarap na pundaun olsem wanpela diwai ol i katim pinis. Na as bilong diwai ol i katim pinis i stap nating. Glori bilong dispela diwai i go pinis.
Tasol, long dispela teks Aisaia i autim tok profet long dispela taim we haus bilong Devit bai
i kamap nupela, na dispela nupela haus bai i winim glori bilong taim bilong King Devit o King Solomon. Wankain olsem wanpela as bilong diwai i kamap nupela gen taim nupela kru i kamap long as bilong dispela diwai, wanpela pikinini bilong Devit bai i kamap, na em bai i stap olsem King bilong bel isi na glori wantaim.
Pastaim Aisaia i stori long dispela King em i husat (lain 2-5). Na bihain em i stori long dispela graun dispela King bai i bosim (lain 6-9). Dispela graun em i naispela stret: wel dok na pikinini sipsip bai i stap gut wantaim, na ol lepat bai i slip wantaim ol pikinini meme; ol pikinini bulmakau wantaim ol yangpela laion bai i raun na kaikai wantaim. Planti manmeri i ting olsem dispela kain graun i wankain olsem gaden Iden. Yumi i no save sapos dispela em i tru o nogat.
Tasol yumi i ken klia olgeta long dispela: taim Jisas i kam long dispela graun namba tu taim, na wok bilong em i pinis olsem, dispela graun bai i stap olsem Aisaia i tokaut long em. Taim Krais i kam long dispela graun olsem wanpela bebi, dispela em i kirapim nupela taim long haus bilong Devit. Tasol, tu, em i kirapim dispela taim bilong mekim dispela graun i kamap nupela gen tu. Jisas i mekim wok long bel bilong ol manmeri bilong em. Na taim dispela wok i pinis olgeta, orait bel isi na amamas tasol bai i stap long olgeta samting God yet i wokim.
Dispela tok bilong Aisaia i soim klia – bel isi bai i stap. Na dispela bel isi em i samting bilong i no gat pen, i no gat hevi, na i no gat sin.
Taim Jisas i tok olsem kingdom bilong em i kam klostu pinis, ol manmeri bai i tingting
long ol dispela bel isi. Na nau dispela kingdom bilong Krais i kam klostu pinis moa yet. Dispela Pikinini bilong Devit i kam pinis na em i bosim laip na famili na sios bilong yumi. Na kingdom bilong em i wok long kam yet – isi isi tasol wantaim bikpela strong.
SAMPELA TINGTING
Yu stap redi na wetim dispela kingdom i kam klostu pinis, o nogat?
Ritim: Aisaia 9:1-7
Em bai i stap king bilong yumi, na em bai i gat ol dispela nem, “Man bilong givim gutpela tingting tru” na “God i gat bikpela strong” na “Papa bilong i stap oltaim oltaim” na “king bilong kamapim gutpela sindaun na bel isi.” – Aisaia 9:6
Dispela teks long Aisaia i stori long kingdom bilong Mesaia. Em i wanpela strongpela na gutpela tok profet tru, na dispela tok profet i wok long amamasim planti manmeri bilong God.
Pastaim, dispela tok profet long dispela buk Aisaia i toktok long ol samting nogut i wok long kamap long taim bilong profet Aisaia. Na dispela ol samting nogut i wok long kamap long tude tu. Aisaia i tok olsem: i no gat planti manmeri i autim tok tru (8:16-18), ol man i save toktok wantaim tewel bilong ol man i dai pinis (8:19-20), na ol bai i kisim taim nogut stret (8:21-9:1). Na bihain long ol dispela tok nogut, bikpela lait i kam: “Ol manmeri i bin i stap long bikpela tudak, tasol nau ol i lukim bikpela lait” (lain 2). Ol i harim bikpela amamas “olsem ol i save amamas long taim ol i kisim ol kaikai i mau long gaden.”Na God i brukim pinis strong bilong ol birua bilong ol na ol i no inap bosim ol moa. Na moa, God i salim paia i kam kukim olgeta samting ol soldia i save putim na i go pait (lain 5).
Na bihain long dispela, Aisaia i autim as bilong ol dispela samting bai i kamap: “Long wanem, wanpela pikinini man i kamap pikinini long yumi, em wanpela pikinini God i givim long yumi.”Em i wanpela mirakel stret. Em i wanpela king, na taim em i kam, dispela i makim wanpela nupela taim i kam tu: “Strong bilong gavman bilong en bai i wok long kamap bikpela oltaim, na bai i no gat pait na ol manmeri bai i sindaun gut oltaim.”
Ol dispela nem bilong em i soim klia olsem dispela Pikinini bilong God em i husat tru. Na tu, ol dispela nem i putim ples klia olsem dispela Pikinini bilong God i gat wanem ol wok long mekim. “Man bilong givim gutpela tingting tru” i soim yumi wok bilong Jisas bilong kisim bek yumi long ol longlong pasin bilong yumi. Na em i givim save long yumi na helpim yumi i wokabaut long rot bilong God. “God i gat bikpela strong” i soim klia strong bilong God. Yumi no inap save long strong na pawa bilong em. Em bai i mekim bikpela na stretpela wok long yumi ol lain bilong bagarap na mekim sin. “Papa bilong i stap oltaim oltaim” i soim yumi olsem em i gat gutpela save na bikpela laikim tru. Na ol pikinini bilong em ol i tait tru, ol i ken i go long em bilong kisim bel isi na malolo. Na em bai i givim bel isi long yumi long taim bilong bikpela hevi na pen. “king bilong kamapim gutpela sindaun na bel isi” i tokim yumi olem em bai i kisim wanpela kingdom i kam em bai i stap oltaim oltaim. Na taim em i kam, em bai i kisim bel isi na stretpela pasin i kam wantaim. Na long dispela taim tasol, laip bilong yumi bai kamap gutpela tru olsem God i laikim.
“Bikpela i Gat Olgeta Strong i gat strongpela laik tru long mekim gut long ol manmeri bilong en, olsem na em bai i mekim ol dispela samting i kamap” (lain 7).
SAMPELA TINGTING
Ol dispela nem bilong Jisas i save givim yu bel isi, o nogat?
Ritim: Aisaia 7:10-17
Dispela olgeta samting i kamap bilong inapim wanpela tok Bikpela i bin mekim long maus bilong profet. Profet i bin tok olsem, “Harim. Wanpela meri i no bin slip wantaim man, em bai i gat bel na i karim wanpela pikinini man. Na bai ol i kolim nem bilong en Emanuel.” – Matyu 1:22-23
I gat wanpela king i bin i stap, na nem bilong em i Ahas. Em i pret bikos tupela arapela king i laik pait wantaim Ahas na kantri bilong em. Na dispela profet Aisaia i tokim Ahas long em i mas bilip na stap strong. Tasol Ahas i les long harim ol dispela tok long bilip long God.
“Askim God long soim yu wanpela mak,” dispela profet i tok. Tasol king i tok, “Nogat. Bai mi no ken askim long lukim wanpela mak.” Na bihain em i bagarapim tok bilong God taim em i tok, “Mi no laik traim strong bilong Bikpela.”
Tasol, maski, Aisaia i givim wanpela mak long em: wanpela yangpela meri i gat bel, na bai em i karim wanpela pikinini man na kolim nem bilong en Emanuel (i min olsem “God i stap wantaim yumi”) . Na dispela tupela kantri bai i bagarap na stap nating, na bai Bikpela i salim taim nogut tru i kam long yu na long ol manmeri bilong yu na long ol lain famili bilong yu.
Na yumi no klia tumas sapos i gat wanpela pikinini i kamap olsem long taim bilong Ahas. Tasol yumi ken klia tru olsem dispela tok profet i stori long taim Maria i karim Jisas. Planti yia bihain long dispela tok profet, dispela yangpela meri Maria i karim Emanuel, em i Saviour bilong yumi. Olsem tasol God inapim dispela mak bilong salvesen.
Pastaim long taim profet Aisaia i bin autim dispela mak bilong Emanuel em i autim olsem wanpela strongpela tok: God em i soim klia olsem i stap wantaim ol manmeri bilong em. Olsem na yu mas lukaut. Nogut yu les long bilipim dispela mak.
Na nau yumi kisim pinis bikpela mak tru long pawa na laikim tru bilong God. Emanuel: God i stap wantaim yumi. Yumi no ken dautim ol promis bilong God. Em bai i stap wantaim yumi oltaim oltaim.
Yumi no ken daut. Yumi no ken pret. God em i no birua long yumi; em bai i helpim yumi. Na sapos God i helpim yumi, orait husat bai i birua long yumi?
Planti manmeri long tude i save autim ol hevi na toktok tumas long ol samting i bagarap long dispela graun. Ol i no save gut long dispela mak – Emanuel, God i stap wantaim yumi. Yumi no ken wari. Emanuel i kam pinis. Yumi no ken pret.
SAMPELA TINGTING
Yu save harim ol man i autim tok long ol hevi bilong dispela graun tasol? Ol i save pretim yu, o nogat? No ken wari. No ken pret.
Ritim: Lo 18:15-22
Bipo Moses i bin tok olsem, “God, Bikpela bilong yupela, em bai i makim wanpela brata bilong yupela, na mekim em i kamap profet olsem mi yet. Na yupela i mas bihainim olgeta tok em bai i mekim long yupela.” – Aposel 3:22
Em i wok bilong profet long autim tok bilong God long ol manmeri. Sapos ol profet i no autim tok bilong God, ol manmeri i no inap long save long God na laik bilong God tu. Yu no inap kamap wanpela profet long laik bilong yu yet. Nogat, God yet i makim ol profet bilong em.
Nambawan profet long Olpela Kontrak em i Moses. God i autim tok bilong em yet long maus bilong Moses. Long Moses ol Israel i kisim pinis olgeta lo na pasin bilong lotu wantaim.
Taim Moses i autim las tok bilong em, em i stori long God bai i makim wanpela brata bilong ol lain Israel, na mekim em i kamap profet olsem em yet. Na Moses i tokim ol long bihainim olgeta tok em bai i mekim long ol. God yet bai i mekim save long ol lain i sakim tok bilong dispela profet.
Planti yia bihain long dispela tok bilong Moses, tupela man i autim dispela tok bilong Moses gen. Dispela tupela man i autim tok long hap bilong tempel, na ol lain i harim tok bilong tupela i gat bikpela laik long bihainim tok bilong Moses. Na Pita na Jon i tok olsem: sapos you laik bihainim tok bilong Moses, orait yu mas harim tok bilong Jisas bilong Nazaret, long wanem, em i dispela profet Moses yet i bin stori long em.
Dispela tupela man, Pita na Jon, i bin stap long wanpela maunten wanpela taim na ol i lukim Jisas i kamap narakain. God yet i stap long dispela maunten, na Pita tupela Jon i brukim skru na putim pes i go daun long graun, na ol i pret tumas. Na Moses wantaim Elaija tupela i kamap na ol disaipel i lukim tupela i toktok wantaim Jisas.
Ating Pita tupela Jon i gat laik long harim tok bilong Moses, o ating ol i laik harim nek bilong Elaija long yau bilong ol yet. Tasol, nogat. God i tok olsem, “Dispela em i Pikinini bilong mi, mi laikim em tumas, na mi amamas long em. Yupela harim tok bilong em!” (Matyu 17:5).
Maski long harim tok bilong ol profet nogut. Olgeta manmeri i mas bihainim tok bilong God long dispela maunten:“Yupela harim tok bilong em!”Yumi no inap save long God sapos yumi no harim tok bilong Jisas.
SAMPELA TINGTING
Yu save harim tok bilong Jisas long laip bilong yu olsem wanem?
Ritim: Namba 24:10-19
Wanpela man i gat biknem na strong bai i kamap king bilong dispela lain Israel. – Namba 24:17
I gat planti ol stori na tok profet long Olpela Kontrak i olsem ol piksa long wanem samting bai i kamap bihain. God i givim ol dispela promis na tok profet. Planti taim em i yusim maus bilong ol wokboi bilong em. Tasol long dispela teks, God i yusim maus bilong wanpela birua bilong em long autim dispela tok profet.
Dispela king bilong Moap i lukim dispela 12-pela lain bilong Israel husat i stap klostu long hap bilong em. Na em i pret na i tok, “Sotpela taim tasol na bai dispela lain i pinisim olgeta samting i stap nabaut long hap bilong yumi olsem bulmakau i kaikai gras” (Namba 22:4).
Olsem na dispela king bilong Moap i laik toknogutim ol lain bilong Israel long rausim pawa bilong ol. Olsem na em i singautim wanpela man, nem bilong em Balam, long em i kam na tok long nem bilong ol god bai ol god i mas bagarapim ol lain Israel. Maski king bilong em i mas baim Balam long planti mani, em i laik mekim olsem bikos em i laik bagarapim Israel.
Planti manmeri long dispela taim ol i pret long ol giaman god na ol spirit nogut. Na tude tu, I gat planti man i pret long ol dispela kain samting tu.
Tasol dispela God bilong Israel em i winim ol spirit nogut na pawa bilong ol. God i givim bikpela blesing long Israel, maski dispela king bilong Moap i laik toknogutim ol. I no gat wanpela samting o narapela pawa long dispela graun inap long senisim laik bilong God.
Olsem na maus bilong Balam i kamap olsem wokboi bilong God. Balam i opim maus bilong em long toknogutim Israel olsem Balak i baim em long mekim, tasol em i autim ol blesing bilong God tasol, olsem God i gat laik long em i mas mekim. Long tripela taim Balam i traim long toknogutim Israel, na long tripela taim em i givim blesing long ol. Na long namba foa taim, Balam i lukim wanpela man i gat biknem na strong bai i kamap king bilong dispela lain Israel.
I no gat wanpela pawa long dispela graun inap bagarapim ol lain i stap aninit long dispela King na ol i kisim blesing bilong em.
SAMPELA TINGTING
Yu save pret long ol spirit nogut, o nogat? Yu mas bilip long bikpela pawa stret bilong God, em bai i winim tru olgeta arapela pawa.
Ritim: Wok Pris 16:20-22
Tasol blut bilong Krais i winim dispela. Krais i no gat asua bilong wanpela rong i stap long em. Nogat tru. Na long strong bilong Spirit i stap oltaim oltaim, em i givim laip bilong em yet long God olsem ofa. Olsem na blut bilong em i no mekim bodi tasol bilong yumi i kamap klin. Nogat. Em i pinisim asua bilong yumi na yumi save olsem yumi stap klin tru long ai bilong God. Olsem na yumi no mas bihainim moa ol dispela lo i no gat laip, na yumi ken mekim wok bilong God bilong i stap oltaim. – Hibru 9:14
Dispela De Hetpris i Mekim Ofa bilong Rausim Sin bilong ol Manmeri (Day of Atonement) i kamap wanpela taim long olgeta yia tasol. Na long dispela wanpela de tasol dispela hetpris i ken i go insait long dispela Rum Tambu Tru long kisim blut na tromoi wanpela hap long pes bilong Bokis Kontrak, em i ples bilong lusim sin bilong ol manmeri.
Long kamap klia tru long dispela De Hetpris i Mekim Ofa bilong Rausim Sin bilong ol Manmeri, em i gutpela sapos yu ritim Wok Pris 16 gen. Na sapos yu laik kisim save long wok bilong Krais long inapim dispela de, em i gutpela sapos yu ritim Hibru 9. I gat tupela meme ol i save bringim i kam long dispela de. Ol i kilim i dai wanpela bilong dispela tupela meme, na hetpris i karim blut bilong dispela meme i go long dispela Rum Tambu Tru. Dispela blut
i karamapim olgeta asua bilong ol lain bilong God long ai bilong em. Dispela blut i makim dispela blut bilong Krais, em dispela blut i karamapim olgeta sin bilong yumi olsem na yumi no gat asua moa long ai bilong God. Na yumi save olsem yumi stap klin tru long ai bilong God, na yumi ken lotuim God na bihainim tok bilong em tu.
Na dispela narapela meme em i stap long dua bilong haus sel bilong God, inap long taim dispela hetpris i kam na putim tupela han bilong em long het bilong dispela meme. Na, olsem pesman bilong olgeta lain bilong Israel, dispela hetpris i autim olgeta pasin nogut na olgeta sin na olgeta bikhet pasin bilong ol manmeri bilong Israel. Na long dispela pasin em i putim dispela olgeta sin long het bilong dispela meme. Na wanpela man bai i kam kisim dispela meme i go long ples drai nating, na lusim em long dispela hap. Na dispela meme i no inap kam bek gen. Olsem tasol dispela meme i karim olgeta sin bilong ol Israel i go long wanpela hap i no gat man.
Olsem na dispela tupela meme wantaim i olsem wanpela piksa long wok bilong Jisas bilong kisim bek yumi. Blut bilong em i karamapim olgeta sin bilong yumi long ai bilong God, olsem dispela blut bilong dispela meme i mekim. Krais i kamap olsem dispela meme ol i salim i go long ples drai nating. Em i karim olgeta sin bilong yumi. Na em i karim dispela sin i go longwe tru long yumi – wankain olsem hap san i kamap i longwe stret long hap san i go daun.
Jisas i kamap olsem man bilong karim olgeta hevi bilong yumi.
SAMPELA TINGTING
Yu karim ol hevi bilong sin bilong yu yet long laip bilong yu? Bai yu putim ol dispela hevi bilong sin bilong yu long Jisas, o nogat?
Ritim: Wok Pris 3:1-5
Dispela man i mas putim han long het bilong bulmakau pastaim na bihain em i mas kilim i dai long dua bilong haus sel bilong God. – Wok Pris 3:2
Planti manmeri i no save tingting tumas long pasin holi bilong God. Tasol sapos yumi ritim buk Wok Pris, bai yumi tingting planti long pasin holi bilong God. Pasin holi bilong God
i pulapim dispela buk. Wok Pris i stori long rot olgeta sin lain long Olpela Kontrak i mas bihainim long kamap klostu long God. Ol i mas mekim bikpela wok stret long kamap long pes bilong God.
Planti lain long tude i ting olsem ol i ken i go long God long laik bilong ol yet; ol i ting olsem God bai i amamas long lukim ol i kamap klostu long em, maski long pasin bilong ol taim ol i mekim olsem. Tasol dispela i no gutpela tingting. Yumi mas klia gut long laik bilong God; sapos nogat, yumi mas lukaut. Nogut yumi i kisim bagarap.
Dispela God yumi lotuim, em i dispela God i putim kainkain liklik lo insait long buk Wok Pris long helpim ol Israel long save long rot long kam klostu long em. Ol pris na ol arapela manmeri bilong Isreal i bin bihainim ol dispela lo long kam klostu long God. God i makim ples, pasin bilong ofa, na olgeta arapela pasin bilong kam klostu long em. Na sapos ol i abrus liklik tasol long ol dispela lo, maski ol i no save olsem ol i mekim dispela pasin nogut, ol bai i lukim belhat bilong God na em bai i mekim save long ol. Na long laik bilong God, ol dispela lo i stap planti yia long taim bilong Olpela Kontrak.
Planti milien animal i bin dai, long dua stret bilong haus sel na bihain long banis bilong tempel. Planti tausen ol Israel i bin i stap na ol i putim han long het bilong ol dispela animal ol i ofaim i go long God. Na long dispela pasin ol i soim wanem samting i stap long bel bilong ol. Na taim ol i lukim blut na paia na smok, ol i daunim het bilong ol, bikos ol i save olsem ol i sanap long marimari bilong God tasol, dispela God husat em i holi.
Na yumi mas save long dispela samting: yumi no inap long go long God na stap laip sapos yumi no go long em long Jisas Krais, husat em i dai long yumi. Yumi mas putim tupela han bilong yumi long Jisas. Sapos nogat, bai yumi i bungim bagarap bilong oltaim oltaim.
SAMPELA TINGTING
Bai yu mekim wanem taim yu laik i go long God?
Ritim: Kisim Bek 40:33-38
...orait klaut bilong Bikpela i karamapim haus sel bilong bung wantaim God, na bikpela lait bilong en i pulapim haus. – Kisim Bek 40:34
Yupela i haus bilong God yet, na Spirit bilong God i stap insait long yupela. Ating yupela i no save long dispela? – 1 Korin 3:16
Taim Moses i wokim haus sel bilong Bikpela pinis, God I Gat Olgeta Strong i go i stap insait long dispela haus sel. Na bikpela lait bilong en i pulapim haus. Em i narakain samting tru!
Ating taim ol Israel i lukim dispela strong na pawa bilong God i stap klostu long ol long dispela haus sel, ol bai i bihainim tok bilong God na lotuim em olgeta taim, a? Tasol nogat. Yumi save, taim ol Israel i wokabaut long ples drai, ol i save bikhet na planti taim ol i sakim tok bilong God.
Na Jisas i kam long yumi. Em i stap God tru tasol em i kamap man:“Tok (Jisas) em i bin kamap man, na em i kam i stap namel long mipela. Mipela i lukim pinis bikpela namba na strong bilong em. Em i namba bilong dispela wanpela Pikinini tasol, Papa i salim em i kam. Marimari na pasin i tru i pulap long em” (Jon 1:14). Dispela em i wanpela bikpela mirakel tru.
Ating taim olgeta manmeri tude i lukim dispela pawa na strong bilong God i kam klostu long yumi, ol bai bilip long em na i stap laip, a? Tasol inap long tude, ol man i no bilip bai i tok olsem Jisas em i no God tru. Ol bai i tok olsem em i wanpela man tasol.
Bihain long de bilong Pentikos, ol Kristen i kamap olsem haus sel bilong Bikpela bikos Spirit bilong God i stap insait long ol. God i stap insait long dispela tempel, olsem na em i stap long olgeta hap long dispela graun na em i autim tok long kain kain tok ples.
Tasol, planti manmeri i no bilipim gutnius. Planti ol i ting olsem: sapos God i stap long dispela graun, orait ating em bai i stap long wanpela naispela haus stret, olsem wanpela tempel bilong gol.
Tasol, dispela em i tok tru: God i stap insait long olgeta man, meri, na pikinini husat i bilip long Jisas. Ol manmeri bilong graun inap lukim God insait long laip bilong ol manmeri bilong em. Em ol dispela manmeri husat i kisim marimari bilong em na Spirit bilong em pinis.
Klostu nau dispela glori bilong Bikpela bai karamapim dispela graun olgeta. Na long dispela taim i no gat wanpela inap long tok olsem God i no stap long dispela graun. Long dispela de yumi bai lukim long ai bilong yumi yet dispela samting nau yumi i bilip long em. Na ol lain i no bilip, ol bai i lukim tu.
SAMPELA TINGTING
Yu, na ol arapela bilip lain, i tempel bilong God. God i stap insait long yu. Laip bilong yu i save soim dispela? Bai yu mekim wanem? Bai yu mekim wanem long ol lain i no bilip?
Ritim: Stat 12:1-3
Bipo yet God i save olsem, bihain ol arapela lain bai i bilip long gutnius, na em i ting olsem em bai i kolim ol stretpela manmeri. Olsem na bipo tru em i autim gutnius long Abraham, olsem buk bilong God i tok, “Long yu God bai i mekim gut long olgeta lain manmeri.” – Galesia 3:8
Inap long 2000 yia samting God i gat wanpela kontrak wantaim Abraham na ol pikinini bilong em tu – tasol em i mekim dispela kontrak wantaim ol tasol. Na yumi i no inap tok olsem dispela samting i no stret long ai bilong ol manmeri bilong ol arapela kantri. Em i wok bilong yumi long kisim save long plen bilong God bilong salvesen, tasol i no wok bilong yumi long kirapim narapela plen bilong salvesen.
Tasol, yumi ken givim pres long God: God i no lus tingting long yumi maski yumi i bin lus tingting long em na yumi i no lain bilong Juda tu. Em i tingting pinis long yumi taim em i tokim Abraham, “Long yu God bai i mekim gut long olgeta lain manmeri.” Pol i soim klia olsem gutnius i stap pinis long Stat 12:3.
Taim Jisas Krais i kam long dispela graun namba wan taim, God i tanim i go long olgeta lain manmeri long olgeta kantri bilong dispela graun. Taim Jisas em i liklik bebi yet, Simeon i holim em long han bilong em na em i tok olsem: “Em i wanpela lait, na em bai i givim lait long ol man bilong ol arapela lain” (Luk 2:32) – em i ol dispela lain i no bilong Juda.
God i no senisim dispela kontrak wantaim Abraham. Dispela kontrak bilong marimari i stap yet. Tasol nau ol man bilong ol arapela lain i stap lain bilong kontrak sapos ol i bilip long Jisas. Na God yet i makim Pol, “dispela aposel bilong ol man bilong ol arapela lain,” bilong autim plen bilong em long kisim ol man bilong ol arapela lain i kam insait long kontrak bilong em.
Olsem na dispela kontrak bilong marimari i kam long yumi tu, na dispela i gat bikpela mining insait long laip bilong yumi wan wan. God i wokim dispela kontrak wantaim Abraham pastaim, na em i blesim ol lain bilong Juda. Tasol, yumi, na ol lain Juda wantaim, i ken stap insait long dispela kontrak bilong marimari long bilip long Jisas tasol. Olsem na maski yumi kam long wanem hap long dispela graun, maski wanem kantri em i as ples bilong yumi, yumi mas bilip long Krais long stap insait long kontrak bilong God!
SAMPELA TINGTING
Tok tenkyu long God bikos yumi stap insait long kontrak bilong marimari long bilip long Krais.
Ritim: Stat 9:8-15
Mi putim renbo bilong mi long klaut olsem mak bilong dispela kontrak bilong oltaim mi mekim pinis wantaim yupela na olgeta animal. Dispela renbo bai i stap olsem mak bilong kontrak mi mekim wantaim olgeta samting bilong graun. – Stat 9:13
I gat planti samting inap long bagarapim laip bilong man. Planti taim yumi i les long stori long dispela. Tasol yumi i ken klia i gat planti samting inap long bagarapim yumi na kilim yumi i dai.
Long planti hap bilong dispela graun i gat ol man nogut i gat laik long kisim wanpela bom na kilim planti manmeri. Long kantri bilong yumi i gat planti man nogut i save raun. Na yumi no klia sapos wanpela spakman bai kam kilim yumi; na tu yumi i no klia sapos wanpela bikpela pait bai kamap namel long ples bilong yumi na ol bai kam kilim yumi i dai.
Tasol ol lain i save long Buk Baibel ol i mas pret long belhat bilong God. Long taim bilong bikpela tait long buk Stat, yumi luksave long bikpela belhat bilong God. God em i belhat nogut tru long ol bikhet pasin bilong olgeta man long dispela graun. Na belhat bilong God i stap yet. Sampela taim God i bin yusim ol man long graun bilong soim belhat bilong em. Tingim ol man nogut bilong Asiria na Babilon na ol bikpela hevi nogut ol i givim long Israel. Yumi mas beten long God long em i no ken mekim wankain olsem long yumi nau.
Belhat bilong God i stap yet. Planti taim yumi no belhat tumas taim yumi lukim sin na ol man i bikhet long God Antap Tru. Tasol God i belhat tru long dispela kain pasin. Ol man i no inap klia tru long belhat bilong em; em i bikpela tumas. Na ol man i no klia olsem taim bilong God bilong mekim save long ol man em i klostu nau.
Tasol, namel long belhat bilong God i gat wanpela gutpela promis i stap – dispela renbo. God em i mekim pinis wanpela promis, olsem na bai wanpela bikpela tait tru i no ken kam na bagarapim olgeta samting i gat laip gen. Na God em i tingim dispela promis yet. Olsem na em i save salim san i kam na givim lait long ol man nogut na ol gutpela man wantaim. God i pasim belhat bilong em yet long marimari bilong em yet.
God i gat laik sapos olgeta manmeri i lukim Jisas long Betlehem olsem man bilong kisim bek ol, bipo long taim ol bai i lukim em long taim Jisas i kam bek gen olsem Jas bilong ol. Long marimari bilong God tasol, dispela graun i no pinis yet. Nau em i taim bilong ol manmeri i ken ranawe long dispela belhat bilong God em bai i kam.
Sapos Jisas i stap olsem Saviour bilong yumi na yumi stap aninit long em olsem Bikpela bilong yumi, yumi no ken pret long belhat bilong God olsem Jas bilong yumi. Nogat. Yumi bai i stap oltaim oltaim aninit long renbo bilong em, dispela renbo bilong laikim tru.
SAMPELA TINGTING
Yu save stap aninit long dispela renbo bilong laikim tru bilong God, o nogat? Dispela samting bai givim wanem kain hop na bel isi long yu?
Ritim: Stat 3:8-15
“Na bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain bilong meri. Bai ol i krungutim het bilong yu, na bai yu kaikaim lek bilong ol.” – Stat 3:15
Taim yumi ritim Stat 3, yumi luksave long as bilong ol bikpela hevi bilong yumi na yumi luksave long taim hop bilong yumi i kirap tu.
Bikpela hevi bilong yumi i kirap taim yumi brukim dispela kontrak bilong yumi wantaim God.
Na hop bilong yumi i kirap taim God i pasim Satan long stap wantaim yumi. God i no larim yumi i stap aninit long Satan. Nogat, God i mekim em i kamap birua bilong yumi.
Dispela em i samting bilong marimari bilong God. Em i laikim yumi tru. Taim yumi pundaun long sin, God i no larim yumi i pas wantaim pasin nogut. Nogat, em i mekim ol pikinini bilong Iv i kamap birua bilong ol lain bilong Satan. Taim Satan i wok long kam bung na wanbel wantaim man, wantu God i kam na brukim dispela. Na ol i no inap wanbel moa; ol bai i pait tasol: “Na bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain bilong meri.”
God i toknogutim Satan. Em i givim strongpela tok bilong daunim em: “Bai ol i krungutim het bilong yu, na bai yu kaikaim lek bilong ol.”
Na taim yumi ritim olgeta hap long Buk Baibel, yumi ken klia olsem planti ol man i no save pait strong long Satan. Dispela poisin bilong Satan i wok long bagarapim tingting na pasin bilong yumi. Tasol, long wok bilong Jisas, God i kam bilong helpim yumi. Na dispela em
i mining tru bilong Krismas. Jisas i bin kam pinis na em i krungutim het bilong Satan, em dispela birua tru bilong yumi – na Satan bai i no inap win. Na Krais i kisim yumi i kam aninit long God, long mekim wok bilong em gen.
Tasol nau yumi mas wok long pait wantaim Satan yet. Ol bikpela hevi na sori i stap wantaim yumi yet long kain kain rot.“Kisim bek mipela long ol samting nogut.”Yumi save singaut olsem taim yumi stap namel long ol pait. Tasol klostu Krais bai i kam bek, na hop bilong yumi i kamap bikpela moa: “Na long liklik taim, God bilong givim gutpela sindaun na bel
isi long yumi, em bai i larim yupela i krungutim Satan aninit long lek bilong yupela” (Rom 16:20).
God bai krungutim Satan. Tasol em i yusim lek bilong yumi long mekim olsem.
SAMPELA TINGTING
I gat sampela taim long laip bilong yu we yu save pilim olsem Satan i wok long winim yu long dispela pait? Na wanem samting i save pulim yu i go bek long God long dispela kain taim?
Ritim: 1 Tesalonaika 1:1-10
“Tasol taim Pikinini Bilong Man i kam, em bai i lukim ol manmeri i stap long graun ol i bilip, o nogat?” – Luk 18:8
Long Desemba i gat bikpela samting i save kamap long wan wan yia – em i taim bilong Krismas. Na long dispela de yumi save tingim taim Maria i karim Jisas long Betlehem, dispela liklik taun i stap 8 km samting daunbilo long Jerusalem.
Tasol i gat narapela taim Jisas bai kam long dispela graun tu. Yumi save tingim dispela namba wan taim em i kam long dispela graun long taim bilong Krismas. Tasol “klostu” Jisas bai i kam bek gen. Na sapos yu save amamas long tingim dispela namba wan taim Jisas i bin kam long dispela graun, ating yu bai amamas tru long save olsem em bai i kam bek gen.
Yumi no ken tingim namba wan taim Krais i bin kam olsem wanpela bebi, sapos yumi les long redim yumi yet long taim em bai i kam bek gen olsem Bikpela bilong yumi.
Buk Baibel i gat dispela bikpela tok: Jisas em bai i kam! Long taim bilong Olpela Testamen, ol manmeri i no wetim Jisas bikos ol i no save long nem bilong em. Ol i wetim wanpela man “bilong kisim bek ol,” dispela “pikinini bilong Devit,” dispela Mesaia. Sampela bai tok olsem ol i wetim taim Bikpela bai i kam. Ol i laik lukim taim God bai kam na stretim olgeta samting long dispela graun. Ol i save wetim sampela samting bai kamap.
Dispela Nupela Testamen i kisim Krais i kam long yumi wantaim olgeta presen bilong em. Na long dispela Nupela Testamen yumi kisim save olsem Jisas bai i kam long graun tupela taim: namba wan taim em i bin kam long marimari, na namba tu taim em bai i kam bek long glori.
Olsem na dispela tok i no senis: Jisas bai i kam! Na ol lain bilong dispela nupela kontrak i stap wankain olsem ol lain bilong dispela olpela kontrak: ol i wetim sampela samting bai kamap.
Na taim yumi harim dispela tok long Buk Baibel – olsem Jisas bai kam – yumi mas bekim dispela tok long wanpela rot tasol – yumi mas bilip, na yumi mas i stap redi!
Olsem na, taim yumi redim yumi yet long taim bilong Krismas long dispela mun, yumi no ken abrusim dispela askim bilong Jisas long Luk 18: “Tasol taim Pikinini Bilong Man i kam, em bai i lukim ol manmeri i stap long graun ol i bilip, o nogat?”
Long dispela mun yumi mas amamas, tasol yumi mas tingting gut tu. Yumi ken amamas long taim bilong Krismas sapos yumi stap redi na wetim wanem samting bai i kamap.
SAMPELA TINGTING
Long dispela taim bilong Krismas – na olgeta taim tu - hau bai yumi redim yumi yet long Bikpela bilong yumi husat bai i kam bek?
Ritim: Kamapim Tok Hait 22:18-21
Mi givim strongpela tok long olgeta man i harim dispela tok profet i stap long dispela buk. Sapos wanpela man i skruim narapela tok long dispela tok... Na sapos wanpela man i rausim sampela bilong ol dispela tok profet i stap long dispela buk... – Kamapim Tok Hait 22:18-19
Ol stongpela tok i bilong helpim yumi i stap longwe long sin na ol samting nogut.
Ol papamama i save givim planti strongplea tok long ol pikinini bilong ol. “Lukaut long ka taim yu wokabaut long rot.”“Lukaut long ol spak man ausait long banis bilong yumi.”
Taim ol pikinini i gro na kamap bikpela, ol bai i kamap klia olsem papamama bilong ol i bin mekim gutpela strongpela tok long ol, bikos ol i laik lukautim ol. Planti taim wanpela yangpela man o meri i lusim haus bilong papamama bilong em long go i stap longtaim long narapela ples, papamama bilong em bai givim wanpela las strongpela tok long em.
Na hia, long dispela las sapta bilong Buk Baibel, klostu long taim yumi i pinisim dispela buk, God i givim yumi wanpela las strongpela tok – No ken bagarapim tok bilong dispela buk.
Yumi no ken skruim sampela narapela tok long dispela tok. Tok bilong God em inap. Yumi no gat nid long skruim sampela moa tok long dispela tok. Yumi no ken bilipim ol arapela tok God yet i no givim yumi. No yumi no ken tingting long bihainim ol narapela lo God yet i no givim long yumi.
Na tu, yumi no ken rausim sampela bilong ol dispela tok profet i stap long dispela buk. Tok bilong God em i pulap. Yumi no ken wok long senisim dispela tok long laik bilong yumi yet, maski yumi ting olsem em bai i kamap isi moa long kisim gut na save gut long en.
Yumi i kisim Tok long Bikpela God bilong yumi. Em i Tok Hait God yet i kamapim. God i tokim yumi long wanem samting em i mekim pinis, na long wanem samting em i wok long mekim yet, na long wanem samting em bai i mekim bihain. Na, olsem ol tok Jon i bin raitim, ol dispela samting yumi yet i ken ritim. Na maski yumi i no inap save gut tru long olgeta liklik hap tok insait long dispela buk, ol arapela save man na Spirit bilong God bai helpim yumi long kisim sampela gutpela save long dispela buk. Tasol lukaut - no ken bagarapim dispela buk long laik bilong yu yet.
Em i las strongpela tok bilong God. God em i laikim yumi tumas, olsem na em i laik givim strongpela tok long yumi. Em i bikpela samting tru – yumi no ken bagarapim dispela buk, o laip bilong yumi yet bai i bagarap.
SAMPELA TINGTING
Sampela taim yu yet wok long “skruim narapela tok long dispela buk” o yu “rausim sampela tok long dispela buk,” o nogat?
Ritim: Kamapim Tok Hait 21:1-4
Em bai i mekim drai wara i stap long ai bilong olgeta bilong ol. – Kamapim Tok Hait 21:4
Sapos Jisas Krais em i Saviour na Bikpela bilong yumi, nau yet bai yumi pilim dispela stat bilong pinis. Gutnius, em i stap oltaim oltaim, em i bringim yumi bel isi long tude, na i no gat narapela bel isi tru i stap. I no gat wanpela narapela samting inap pinisim bel hevi bilong yumi – gutnius bilong Jisas Krais tasol inap mekim olsem. I no gat narapela samting inap givim hop long laip bilong yumi, na stiaim yumi - Krais tasol inap mekim olsem. Tasol dispela em i stat bilong pinis tasol.
Taim pinis i kam – bai yumi i bel isi olgeta. Long dispela pinis, God bai kamap ples klia olsem Man bilong givim bel isi long yumi. Yes, em i tru, em i stap tude tu, tasol bihain bai yumi amamas long wok bilong em moa yet. Tude yumi gat ol hevi na pen i stap yet. Olgeta de yumi i save mekim sin. Yumi i no pulap long amamas olgeta, na planti taim yumi i krai i stap.
Tasol klostu pinis bai i kam, na God bai i mekim drai ai wara bilong yumi. Yumi save krai planti, na God tasol inap kaunim olgeta ai wara bilong yumi. Ol haus sik i pulap yet long ol manmeri i gat sik na pen. I gat planti ol arapela kain haus sik i pulap long ol man i gat sik long tingting bilong ol. Na i gat planti ol hevi long spirit bilong yumi, na i no gat man long dispela graun inap givim bel isi long yumi long dispela.
Tasol long pinis, God yet bai mekim drai olgeta wara i stap long ai bilong yumi.
Planti lain i ting olsem bai yumi i go long wanpela ples we i no gat wanpela samting – ples bilong nating tru tasol – bihain taim, taim yumi dai. Tasol Buk Baibel i putim ples klia olsem bihain, long taim bilong pinis, yumi bai lus tingting long olgeta pen na hevi bilong yumi. Wantu tasol, olgeta ai wara bilong yumi bai pinis. Na taim yumi i go long dispela ples bilong glori na amamas tasol, orait em bai winim tru olgeta hevi na pen yumi save bungim long dispela graun, na yumi bai lus tingting long ol dispela samting, na yumi bai amamas tasol.
Long wanpela taim Krais i bin wokim tok piksa long God olsem wanpela papa i holimpasim nek bilong pikinini man bilong em, taim dispela pikinini i kam bek long haus bilong em. Tasol long hia yumi ritim tok piksa long God olsem wanpela mama i mekim drai olgeta wara long ai bilong yumi.
Em i longpela taim tru na yumi bin i stap long dispela rot i go long pinis. Yumi kamap les. Yumi gat ol bikpela pen na hevi. Tasol bihain, long pinis, bai yumi kamap long ples tru bilong yumi!
SAMPELA TINGTING
Tingting long dispela bikpela promis i kam long yumi long dispela pinis we God yet bai kisim yumi i kam long ples tru bilong yumi, na tok tenkyu long em.
Ritim: Kamapim Tok Hait 14:14-20
Orait mi lukluk gen, na mi lukim wanpela waitpela klaut, na wanpela man i wankain olsem yumi man bilong graun i sindaun i stap long dispela klaut. Em i gat hat gol long het bilong en, na long han bilong en em i holim naip i sap tru. – Kamapim Tok Hait 14:14
Taim ol i askim Jisas, long dispela nait we Judas i givim Jisas long han bilong ol birua, sapos em i Krais tru, em i bekim tok olsem: “Yu tok pinis. Tasol mi tokim yupela, bihain bai yupela i lukim Pikinini Bilong Man i sindaun long han sut bilong God i gat bikpela strong. Na em bai i stap antap long ol klaut bilong heven na i kam” (Matyu 26:6-4).
Ol Jas bilong lain Juda i klia tru long wanem samting Jisas i stori long em. Daniel 7:14 i bin tok olsem, “Dispela Man bilong bipo bipo yet i mekim em i kamap king na i givim em strong na biknem. Na em bai i stap king i gat strong oltaim oltaim, na wok king bilong en bai i no inap pinis. Na olgeta manmeri bilong olgeta kantri na olgeta lain na olgeta tok ples bai i stap aninit long en.”
Tasol ol lain Juda i no bilip tru olsem Jisas em i dispela man God bai i salim i go. Em i no luk olsem dispela man Daniel i stori long em. Na tu em i no luk olsem Jon bilong Baptais i bin stori long Matyu 3:12: “Em i kam olsem man i holim savol long han bilong en, bilong rausim olgeta pipia i stap long wit. Na em bai i bungim wit long haus wit bilong en. Tasol pipia em bai i kukim long paia i no save dai.”
Tasol dispela samting em i samting bilong kingdom na bilong dispela King, na em i stap long tok hait. Jisas i bin tok: pastaim tok bilong dispela kingdom i mas go aut, olsem ol
i tromoi pikinini wit long gaden, na bihain orait ol bai inap long kisim kaikai i mau long dispela gaden. Pastaim wanpela man bilong bosim gaden i go aut na tromoi pikinini wit
i go. Jisas yet i bin pundaun olsem pikinini wit long gaden, bilong kamapim kaikai bilong kisim taim em i mau. Long marimari na save bilong God, em i salim Jisas i kam namba wan taim bilong tromoi planti pikinini wit long gaden, tasol dispela i no min olsem taim bilong kisim kaikai i mau long gaden i no inap kam. Nogat, i min olsem bai i gat bikpela na gutpela kaikai tru bilong kisim taim em i mau.
Sapos gutnius i wok long go aut yet, orait em i taim bilong tromoi pikinini wit long gaden yet. Ol gras nogut na wit bai i gro wantaim inap long taim God i gat laik long kam na kisim kaikai i mau long gaden.
Yumi mas lukaut – yumi mas mekim gutpela wok insait long kingdom bilong God long dispela taim bilong tromoi pikinini wit long gaden, long wanem, bihain long dispela, taim bilong kisim kaikai i mau long gaden bai i kam. Yu ken bilipim tru dispela: dispela Man i gat hat gol long het bilong em, i gat bikpela laik long kisim kaikai i mau, dispela kaikai em yet i kamapim, na em i gat bikpela laik long rausim ol gras nogut long dispela graun tu.
SAMPELA TINGTING
Long laip bilong yu yet, yu soim olsem yu wetim dispela taim bilong God i kam na kisim ol kaikai i mau long dispela graun, na long tromoi ol gras nogut, o nogat?
Ritim: Jon 11:17-27
Mi harim maus bilong wanpela man i singaut long heven olsem, “Yu raitim tok olsem, ‘Nau na olgeta taim bihain, ol manmeri i bilip long Bikpela na ol i dai, ol i ken amamas.’” – Ka- mapim Tok Hait 14:13
Planti manmeri long tude i laik bilasim dai. Olsem na ol i givim kain kain naispela nem long dai, olsem “ol i slip i stap.” Na planti bai karamapim dai long planti ol naispela plaua na ol arapela bilas.
Tasol maski long ol dispela samting, dai i no naispela samting long lukim long dispela graun, na Buk Baibel tu i no bilasim dai, na em i no karamapim bel hevi bilong dai. Olsem na taim dispela man i singaut “Nau na olgeta taim bihain, ol manmeri i bilip long Bikpela na ol i dai, ol i ken amamas,” em i tok long putim sampela samting ples klia tru. Yumi lainim sampela nupela samting i kam long dispela tok profet long Nupela Testamen.
Ol Kristen long dispela taim ol i no brukim man long tupela hap – ol i no bilip olsem yumi man i gat spirit na em bai i stap oltaim na yumi i gat bodi bilong planim long graun. Ol i bilip olsem spirit na bodi bilong ol i wanpela man, na ol i bilip olsem dai em i pe bilong sin. Tasol ol i bilip tu olsem long Krais ol i abrusim dispela ples we sin na dai i bosim olgeta samting. Ol i bilip olsem dai em i samting bilong aninit long dispela birua Dai, na em i pasim yumi long testim wok God i mekim taim em i winim Dai.
Dai em i no isi. Taim yumi dai, i olsem yumi larim wanpela man, husat yumi no save long em, i kam kisim sampela samting i no bilong em yet. Tasol tok bilong God i tok, “ol manmeri i bilip long Bikpela na ol i dai, ol i ken amamas.”
“Ol i ken amamas.” Olsem wanem? Bikos “ol manmeri i bilip long Bikpela na ol i dai, ol i ken amamas.”Taim yumi i bilip long Bikpela na yumi dai, em i olsem wanpela blesing. Taim yumi planim ol lain i bilip long Bikpela taim ol i dai, yumi i ken save tru olsem wanpela de ol bai
i kirap gen. I no olsem dai i winim ol, bikos ol i bilip long Bikpela na ol i dai. Ol i stap aninit long pawa bilong Jisas.
Dai em i strongpela, tasol Jisas em i strongpela moa yet. Taim yumi i bilong Jisas, em bai i no inap lusim yumi. Olsem tasol, insait long dai yumi i ken amamas sapos yumi stap pikinini bilong God, bikos yumi i ken amamas long Jisas – na Jisas i winim Dai.
SAMPELA TINGTING
Dispela teks i givim yu bel isi olsem wanem?
Ritim: Kamapim Tok Hait 7:9-12
Orait bihain mi lukluk gen, na mi lukim planti manmeri tru ol i bung i stap, na i no inap man
i kaunim namba bilong ol. Dispela ol manmeri ol i bilong olgeta lain man na bilong olgeta kantri na bilong olgeta kain skin na bilong olgeta tok ples. Ol i sanap i stap long pes bilong sia king na long ai bilong Pikinini Sipsip. Ol i bin putim ol longpela waitpela klos, na long han bilong ol, ol i holim ol lip bilong diwai pam. – Kamapim Tok Hait 7:9
Long dispela driman, God i pulim olgeta pikinini bilong em i kam long sia king bilong God na long Pikinini Sipsip.
Taim yumi i ritim dispela tok, “planti manmeri tru,” yumi ken amamas. Jisas i bin tok, “Nau mi stap long graun, tasol bihain bai ol i litimapim mi, na long dispela taim bai mi pulim olgeta manmeri i kam long mi” (Jon 12:32). Na long dispela teks ol i kam. Bikpela bilong yumi em i no save lus tingting long ol tok bilong em; em i save inapim ol promis bilong em olgeta taim!
Ol lain bilong God i kam long kain kain kantri, maski ol dispela kantri i wok long pait wantaim na bagarapim ol arapela kantri. Tasol long hia, ol i wanbel olgeta, na ol i planti manmeri tru.
Ol i kam long olgeta kantri, ples, lain na tok ples. Tasol ol i wanbel na bung wantaim, maski kain kain samting i wok long mekim ol i kros pait long dispela graun. Ol i no stap tru olgeta long kantri bilong ol, long ples, lain o tok ples bilong ol. Jisas i Bikpela bilong ol, na ol i stap tru olgeta long em tasol, na ol i bihainim laik bilong em. Ol i holim wanpela bilip, em i holi na tru, na em i bilip ol disaipel bilong Krais i holim tu.
Ai bilong yumi lukim dispela driman, na em i strongim bel bilong yumi, bikos em i hat tru long stap wanbel long dispela graun. Yumi save bruk nabaut na pait long dispela graun. Sin bilong yumi i bagarapim yumi na yumi krai i stap. Tasol ol i bin putim ol longpela waitpela klos. Yumi save pundaun, tasol ol i holim ol lip bilong diwai pam long lukim King bilong ol husat i winim dispela pait.
I no olsem dispela 144,000 i narakain lain long dispela planti manmeri tru. Nogat. Ol i wokman bilong God. Long namba wan driman yumi lukim na harim na bilipim olsem God i makim lain bilong em na lukautim ol tu. Na long dispela driman yumi ken amamas tru long marimari bilong God i bikpela na strongpela tru, olsem na planti manmeri tru bai wanbel na bung wantaim. Maski wanem hevi, bagarap na kros pait i kamap, i no gat wanpela bai inap long kaunim dispela planti manmeri tru i singsing long marimari tru bilong God.
SAMPELA TINGTING
Yusim ol tok long lain 12 long bungim maus wantaim dispela planti manmeri tru long presim God.
Ritim: Kamapim Tok Hait 7:1-8
Em i tok olsem, “Yupela i no ken hariap long bagarapim graun na solwara na ol diwai. Mipe- la i laik putim mak bilong God bilong yumi long pes bilong ol wokman bilong en pastaim, na bihain yupela i ken bagarapim ol samting.” – Kamapim Tok Hait 7:3
Strongpela tok i go aut: “Wet pastaim!”
God i laik putim mak bilong em long ol wokman bilong en pastaim, na bihain ol i ken bagarapim ol samting long graun.
Dispela mak i putim ples klia olsem ol dispela lain i lain tru bilong God. God i putim mak bilong em long ol lain bilong em; em i raitim nem bilong em long ol.
Na long dispela teks, mak bilong God i go i kamap long 144,000 manmeri. God i tok, “Dispela em i bilong mi; no ken bagarapim dispela bikos em i bilong mi; em i mas stap orait bikos
mi laikim em tru.” God i raitim nem bilong em long ol. Ol i kisim mak bilong God long
nem bilong God Papa, Pikinini na Holi Spirit. Ol i narakain na ol i bilong God. Ol i stap long han bilong God, na i no gat wanpela samting – long wok bilong God olsem Jas tu – i ken bagarapim ol.
Dispela tok bilong sori na bel isi i go long ol lain i ritim dispela buk Kamapim Tok Hait. Ol lain i harim tok long dispela buk ol i stap lain bilong sios bilong God – ol i kisim blesing bilong God bikos ol i harim na bihainim tok bilong God (Kamapim Tok Hait 1:3). Ensel bilong God i tok olsem ol i wokman bilong God. Ol lain i kisim mak bilong God i lain tru bilong God (Israel tru), na ol i save bihainim tru dispela Pikinini Sipsip bilong God.
Dispela 144,000 i tok piksa bilong olgeta manmeri bilong God. God i save long ol dispela manmeri na long nem bilong ol tu. God i save tru long ol lain bilong em, na God i no inap larim ol i kisim bagarap long taim bilong ol bikpela hevi.
Yumi no inap sanap long strong bilong yumi yet. Salvesen bilong yumi i no samting bilong yumi yet. Tasol God i makim yumi, em i singautim yumi, em i adoptim yumi olsem pikinini bilong em yet, na han bilong em bai karim yumi i go. Aleluya!
SAMPELA TINGTING
Yu yet i bin pilim dispela “han bilong God” i karim yu long taim bilong hevi, o nogat?
Ritim: Kamapim Tok Hait 6:12-17
Na ol i singaut long olgeta maunten na ston olsem, “Yupela i mas karamapim mipela, na haitim mipela long pes bilong Man i sindaun long sia king bilong en, na bai Pikinini Sipsip i no ken kam wantaim bikpela belhat bilong en na mekim save long mipela. – Kamapim Tok Hait 6:16
Long dispela teks yumi ritim wanpela piksa bilong bikpela de bilong belhat bilong God, na em i no naispela piksa.
Dispela de bilong belhat bilong God em i no kam yet. Yumi stap laip yet long graun na planti ol lain i no klia olgeta olsem Jisas em i Bikpela. Sampela manmeri i givim ona na glori long Krais, tasol ol i kisim bagarap long dispela as. Planti ol arapela i givim baksait long Jisas, na ol i kisim ol gutpela samting. Tarangu, i luk olsem Jisas em i no Bikpela.
Tasol, bikos bikpela de bilong belhat bilong God i no kam yet, de bilong marimari i stap yet. Sapos san i stap yet, na planti manmeri i stap laip yet, na ol sios long graun i wok long opim dua bilong ol long wan wan Sande, yu stap yet long de bilong marimari bilong God. Han bilong God i go aut yet long olgeta manmeri, na God i singaut yet, “Kam long mi.”
Tasol, wanpela de, Pikinini Sipsip tu bai tok, “Em inap.” Belhat bilong God em i holi, na wanpela de dispela Man i sindaun long Sia king bai no inap pasim belhat bilong em. Graun bai guria, sta bilong skai bai pundaun long graun, skai bai i go pinis, na mun bai kamap olsem blut.
Na long dispela taim, olgeta manmeri bai i ran i go olsem ol animal i pret tru. Olsem ol anis ol bai i wok long hait long kain kain liklik hul. Em i de bilong bikpela belhat bilong Pikinini Sipsip.
Taim yumi tok, “belhat bilong Pikinini Sipsip,” nogut yumi i paul - ol pikinini sipsip i no animal bilong belhat. Tasol yumi mas klia – dispela Pikinini Sipsip em i dispela Laion bilong Juda tu. Sampela taim ol lain bilong sios tu i save lus tingting long belhat na pasin holi bilong God – em i God bilong stretpela laikim tru, tasol em i gat bikpela belhat tu.
Tude marimari bilong God i wok yet long skulim yumi long belhat bilong God. Na yumi mas pret long dispela belhat bilong God na tanim bel na bilip long em.
Yumi mas sori long ol lain i no pret long belhat bilong God.
SAMPELA TINGTING
Yu bilip olsem God em i God bilong belhat tu, o nogat?
Ritim: Kamapim Tok Hait 6:1-8
Ol dispela tewel i singaut strong olsem, “Bikpela King bilong olgeta samting, yu save mekim gutpela na stretpela pasin oltaim. Yu stap holi, na pasin bilong yu em i tru olgeta. Hamas taim bai mipela i wet, na bai yu mekim kot long ol manmeri i stap long graun, na yu bekim blut bilong mipela long ol? – Kamapim Tok Hait 6:10
Dispela driman i stori long wanem samting i stap aninit long alta. Ol tewel bilong ol lain i dai pinis i stap long alta, na ol i dai bikos ol i autim tok bilong God. I olsem ol yet i kamap ofa bilong God.
Ol i dai bikos “ol dispela manmeri i bin holim strong tok bilong God, na ol i autim dispela tok na ol birua i kilim ol i dai.”Yumi save long sampela nem bilong ol, bikos yumi ken ritim nem bilong ol long sampela histori buk. Tasol God yet i save long olgeta nem bilong ol – na blut bilong ol tu – olgeta bilong ol, maski ol arapela i no save long ol. Na ol dispela manmeri i save olsem em i mobeta long aninit long God na no ken wari long ol samting bilong dispela graun. Sampela arapela i lusim olgeta samting bilong ol bikos ol i les long bihainim tingting bilong man na ol i les long sakim tok bilong God.
Bikpela krai bilong ol dispela lain i no samting long pen long bodi bilong ol o long hevi bilong ol. Nogat, bikpela krai tru bilong ol i kamap long dispela tok: “Bikpela King bilong olgeta samting, yu save mekim gutpela na stretpela pasin oltaim. Yu stap holi, na pasin bilong yu em i tru olgeta. Hamas taim bai mipela i wet, na bai yu mekim kot long ol manmeri i stap long graun, na yu bekim blut bilong mipela long ol?”
Olgeta samting insait long dispela krai i wok long krai long dispela God bilong inapim ol promis bilong em. God em i Bikpela King bilong olgeta samting, olsem na em inap long mekim olgeta samting – olsem na, bilong wanem em i no mekim kot nau? God em i holi na stretpela na les olgeta long sin, na em i save bihainim ol promis bilong em yet – olsem na yumi gat gutpela helpim tru long taim yumi i stap laip na long taim bilong i dai.
Taim yumi bilip tru long Jisas olsem Bikpela bilong yumi, na yumi i stap aninit long em, em i hat tru taim i luk olsem Bikpela i no i stap. Planti lain i tok olsem Bikpela i no i stap. Ol i kilim ol lain i stap tru long God, ol i bagarapim ol na i luk olsem i no gat wanpela bilong mekim save long ol. Sin na Satan i wok long bosim planti lain yet. I luk olsem dispela samting nogut i no inap pinis, maski Jisas i kisim glori bilong em longpela taim i go pinis.
Hamas taim, Bikpela? Hamas taim bai glori bilong yu i stap yet long ples hait? Hamas taim bai blut bilong ol wokboi bilong yu i kapsait yet na ol i dai? Harim ol krai bilong ol tewel i stap long alta. Opim ol dua bilong heven. Kam long helpim mipela. Larim ol pikinini bilong yu husat skin bilong ol i les tru, i lukim glori bilong Bikpela bilong ol, na amamas tru.
SAMPELA TINGTING
Yu save tok wanem long Bikpela taim yu wetim em i stap?
Ritim: Kamapim Tok Hait 6:1-8
... Ol i givim strong long tupela long tilim olgeta manmeri long 4-pela lain na long kilim i dai wanpela bilong ol dispela lain. Tupela bai i kilim ol manmeri i dai long bainat, na tupela bai i mekim taim bilong bikpela hangre i kamap na kilim ol i dai, na tupela bai i mekim ol bikpela sik i kamap na kilim ol i dai, na tupela bai i salim ol wel abus bilong graun i go kilim ol i dai. – Kamapim Tok Hait 6:8
Pikinini Sipsip bilong God i rausim olgeta gris kandel i pasim dispela buk. Dispela i min olsem nau Jisas i wok long inapim plen bilong God long dispela graun.
Taim em i rausim namba wan i go foa bilong dispela ol gris kandel i pasim buk, sampela hos i lus. Dispela ol hos i wok long bagarapim dispela graun long bikpela bel hat stret. Sampela lain i tok olsem, dispela man long namba wan hos em i piksa bilong Krais o long gutnius, bikos em i waitpela na em i luk wankain olsem dispela man long wanpela hos long Kamapim Tok Hait 19:11. Tasol taim yumi ritim stori long dispela 4-pela man i sindaun long ol hos, yumi ken tingim ol karis na man i sindaun long hos Sekaraia i lukim long Sekaraia 6. Long dispela driman bilong Sekaraia ol dispela man i olsem soldia bilong God taim em i laik mekim wok olsem jas long dispela graun. Sapos dispela 4-pela hos i wankain olsem ol hos na karis long Sekaraia, i min olsem dispela waitpela hos long Kamapim Tok Hait 6 em i no piksa bilong gutnius. Taim Kamapim Tok Hait i tok long wanpela waitpela hos dispela kala i no gat bikpela mining bilong em - em i kala bilong em tasol.
Dispela ol hos i raun nabaut long graun na i belhat tru i olsem ol bikpela pait na taim bilong hangre na taim planti bagarap i save kamap long dispela graun. Planti ol man na meri i save guria long dispela, taim ol i harim ol dispela hos i ran nabaut, na sampela i bin pilim stret dispela bikpela belhat bilong ol dispela wel hos.
Yumi i no inap pasim na banisim ol bikpela pait. Taim bilong hangre i bin kamap planti taim long dispela graun, na em bai i kamap yet. Ol dispela man i sindaun long dispela 4-pela hos na mekim planti samting nogut long dispela graun, ol i bagarapim planti lain na ol i dai.
Tasol long hia, long Kamapim Tok Hait, yumi lukim narapela samting: Krais yet i bosim ol dispela samting i wok long kamap. I no min olsem em i as bilong olgeta samting nogut long dispela graun, na i no min olsem yumi ken pait na mekim nogut long ol arapela. Tasol em i samting bilong strongim yumi. Long taim bilong pen na hevi na pret, yumi ken klia tru olsem dispela Pikinini Sipsip i stap, na moa yet, em i bosim olgeta samting. Em yet i rausim olgeta gris kandel na opim dispela buk.
Yumi mas bilip olsem Jisas i gat pawa na strong bilong bosim olgeta belhat na pawa bilong olgeta samting nogut.
SAMPELA TINGTING
Taim yu lukim ol samting nogut i wok long kamap long kantri bilong yu, yu yet i bilip olsem Krais i bosim olgeta samting long dispela graun?
Ritim: Kamapim Tok Hait 5:11-14
Na mi harim toktok bilong olgeta kain samting God i bin wokim, em ol samting i stap long heven na i stap long graun na i stap aninit long graun na i stap long solwara. Yes, olgeta samting i stap long olgeta hap, mi harim ol i tok olsem,“Dispela Man i save sindaun long sia king bilong en, na Pikinini Sipsip tu, tupela i ken kisim olgeta tenkyu na biknem na amamas na strong, inap oltaim oltaim. – Kamapim Tok Hait 5:13
Dispela tok “lotuim God,” i min olsem yumi mas givim em olgeta samting em inap tru long kisim.
Dispela pasin bilong lotu i save mekim olgeta samting God yet i wokim i bung na wanbel. Bel bilong olgeta manmeri i lotu wantaim bai amamas na bel gut, na ol bai i raunim sia king bilong God. Laip em i samting bilong lotuim God na yumi mas presim em taim yumi i stap laip.
Taim yumi bihainim ol stretpela pasin bilong lotu, bai yumi stap fri olgeta.
Bai yumi go insait long wanpela tok piksa, long kliaim dispela tok bilong kamap fri long lotu. Sapos yu go insait long wanpela stedium na yu lukim wanpela bikpela gem stret long futbal o rugbi. Tasol long dispela taim yu no lukluk long dispela gem ol i pilai i stap. Nogat, yu lukluk long ol manmeri i stap long dispela stedium. Maski ol i no poro bilong wanpela narapela, na maski ol i no save long ol wanpela narapela, long dispela stedium ol bai i bungim bel na bungim maus na sapotim tim bilong ol yet! Ol i no tingting long wari bilong ol yet long dispela taim. Nogat, ol i tingim dispela gem tasol. Ol i stap fri long ol arapela samting long dispela graun.
Na em i wankain long yumi, taim yumi lotu. Olgeta samting long dispela graun i mas presim God. Na olgeta samting bai i stap fri taim bel bilong ol i bung na ol i raunim sia king bilong God na lotu long Em.
Long tude, yumi inap long lukim sampela samting long dispela fridom na pasin bilong bung wantaim long lotu. Taim yumi presim God long prea bilong yumi, bai yumi stap fri. Taim yumi prea i stap na wok long litimapim nem bilong God, bai yumi lus tingting long ol wari long mani, haus, sik, hevi na sin.
Long dispela taim bai yumi no gat nid long askim God long sampela samting; nogat, yumi givim pres long God tasol – na yumi bai klia olsem God i wokim yumi long lotuim em. Na yumi bai klia olsem God na Pikinini Sipsip inap tru long kisim olgeta pres. Na bel bilong yumi olgeta bai bung wantaim.
SAMPELA TINGTING
Yusim Kamapim Tok Hait sapta 5, lain 12, long lotuim God na tingim dispela bikpela lain i raunim sia king bilong God. Wanbel wantaim ol na lotuim God!
Ritim: Kamapim Tok Hait 5:6-10
Na mi lukim wanpela Pikinini Sipsip i sanap i stap. Em i luk olsem ol i bin kilim em i dai... – Kamapim Tok Hait 5:6
Jon i tanim na i lukluk long dispela Man inap tru long opim dispela buk i pas. Hetman i bin tok olsem em i wanpela Laion i bin kamap long lain Juda, tasol taim Jon i lukluk, i luk olsem wanpela Pikinini Sipsip.
Em i gutnius tru bilong God: taim ol Israel i wok long painim wanpela strongpela laion bilong kam na bagarapim ol birua bilong em, God i salim wanpela Pikinini Sipsip bilong rausim sin! Taim lain Israel i laik lukim wanpela i kam na kilim i dai ol birua bilong ol, orait dispela laion i kamap olsem Pikinini Sipsip, na ol i kilim em yet i dia.
Dispela gutnius i narakain samting stret, na em i hat tru long kisim, olsem na planti ol i les long kisim. Na long dispela as ol lain Israel i givim baksait long King bilong ol, na planti lain bilong tude i les long kisim dispela Saviour tu. Taim yumi lukim dispela Pikinini Sipsip, i luk olsem ol i bin kilim em i dai, i olsem yumi lukim belhat bilong God, na i no gat wanpela i ken hait long em. Sin i doti tru na yumi nidim blut bilong Jisas Krais long kisim bek yumi.
Taim Jon i lukim dispela Man i inap long opim dispela buk, em i lukim marimari bilong God; em i lukim Jisas! Dispela Laion husat i kamap olsem Pikinini Sipsip, em i wok long inapim plen bilong God long dispela graun.
Dispela Pikinini Sipsip i sanap i stap namel long sia king na dispela 4-pela samting i stap laip. I min olsem pawa bilong em i bikpela tru na i no gat pinis bilong em. Tasol em i gat bikpela laikim tru wantaim. Dispela Laion em i wanpela Pikinini Sipsip. Na em i bosim olgeta samting long dispela graun.
Pawa na laikim tru bilong Jisas i winim pinis – na em bai i winim yet – olgeta pait bilong God.
Dispela tok i kam long sia king bilong God i olsem Jisas em i Man bilong Kisim Bek yumi! Em i kisim bek yumi ol lain bilong mekim sin, na moa, em i stiaim olgeta samting long dispela graun i kamap long mak bilong em, long dispela laip bilong oltaim oltaim. Em tasol inap long kisim na opim dispela buk.
Olsem na, olgeta lain i kisim salvesen pinis long blut bilong em i ken mekim dispela tok, “Pikinini Sipsip em Inap!”
SAMPELA TINGTING
Yu ting olsem sampela lain long tude bai i les long dispela tok “Pikinini Sipsip bilong God,” o nogat? Bilong wanem?
Ritim: Kamapim Tok Hait 5:1-5
Mi lukim olsem i no gat wanpela man em inap long opim dispela buk na lukluk insait long en, na mi krai planti. – Kamapim Tok Hait 5:4
Planti man i wok long kisim save long as bilong olgeta samting i bin kamap long dispela graun. Na tu, planti i wok long kisim save long wanem samting bai i kamap bihain. Tasol ol i no inap, bikos buk bilong dispela samting em i pas pinis.
I olsem yumi stap long wanpela sip long biksi. Na yumi no klia long wanem hap yumi bai i go i kamap long em, bikos dispela save i stap long wanpela buk i pas tru. Long san na long nait yumi stap long dispela biksi, na wara i kam i go. I no gat man inap long opim dispela buk i pas. Olsem na yumi stap yet long sip, na yumi lukim biksi i go i go i go, na yumi no klia bai yumi kamap long wanem hap.
“Mi lukim olsem i no gat wanpela man em inap long opim dispela buk na lukluk insait long en, na mi krai planti.” Planti taim yumi klia olsem i no gat wanpela i save long rot bilong yumi yet.
Em i no wanpela ensel i tokim Jon long pinisim krai bilong em; nogat, em i wanpela hetman. Dispela hetman i olsem piksa long sios bilong God. Ol dispela hetman i klia long ol krai bilong man na long hevi bilong sios, na ol i klia long wok bilong God long dispela graun, bikos ol i save long Krais.
Yumi no ken ting olsem yumi klia tru long plen bilong God long dispela graun. Planti lain i wok long tok olsem ol i save long plen bilong God, na ol i klia long as bilong olgeta samting i wok long kamap. Tasol yumi no ken larim ol i paulim yumi. Ol i wok long paulim ol lain bilong God.
Ol bilip lain bilong God, ol i no save long as bilong olgeta samting i wok long kamap, na ol i no inap long bekim olgeta askim. Tasol ol inap long tok, “No ken krai. Jisas Krais bai wok long inapim plen bilong God.” Na dispela em inap.
SAMPELA TINGTING
Dispela tok “Jisas Krais bai wok long inapim plen bilong God,” inap long helpim yu olsem wanem?
Ritim: Kamapim Tok Hait 4:6-11
Dispela 4-pela samting i stap laip ... Na long san na long nait ... Ol i no save malolo long mekim dispela tok. – Kamapim Tok Hait 4:8
Jon i no inap lukim ai bilong God. Em i lukim bikpela i lait i raunim sia king bilong God – na wanpela renbo i raunim sia king.
Tingim – wanpela renbo! Yu tingim Noa, a? Dispela piksa long sia king bilong God i gat bikpela stori bilong en. God i king bilong dispela graun. Em i Jas, na em i kotim ol sin, wankain olsem em i kotim ol lain long taim bilong Noa na salim wanpela bikpela tait i kam bagarapim ol. Tasol em i gat marimari tu, na renbo em i mak bilong marimari na promis bilong em.
I gat 24 sia i raunim dispela sia king – 12pela long olgeta manmeri bilong olpela kontrak, na 12pela long olgeta manmeri bilong nupela kontrak. Dispela sios bilong olgeta taim i wok wantaim Bikpela bilong em long bosim olgeta samting.
Na dispela 4-pela samting i stap laip. Dispela tok “i stap laip” i min olgeta samting i gat laip, olgeta samting God yet i kamapim na i stap gutpela na naispela olgeta long stat bilong dispela graun.
Na olgeta samting God i wokim i singsing i stap.
Yumi no save harim dispela naispela singsing. I luk olsem olgeta samting i gat laip i no save wanbel wantaim yumi. Planti pisin i save singsing maski yumi i krai. Ol naispela plaua i save kamap long hap we yumi planim ol daiman. Na planti taim i luk olsem olgeta samting long dispela graun i wok long bagarapim yumi – tingim ol tait, bikpela solwara, na san i hat tumas.
Tasol ol dispela samting God i wokim, i singsing. Ol i singim ol song long God, em i wokim ol! Harim! Ol i singsing. Bai yumi i singsing wantaim?
Bikpela, yu mas opim ai bilong mipela na dua long mipela olsem mipela inap long lukim sia king bilong yu na save olsem yu yet stap, olsem God i kamapim dispela graun na kisim bek mipela tu. Opim yau bilong mipela na bel bilong mipela tu. Isi isi yu ken lainim mipela long singsing wantaim olgeta samting yu yet i wokim, bilong litimapim nem bilong yu na lotuim yu.
Taim yumi i lukim sia king bilong God, orait bai yumi harim dispela singsing.
SAMPELA TINGTING
Singim song bilong yu yet long presim God, o yusim tok bilong dispela 4-pela samting i stap laip, bilong lotuim God.
Ritim: Kamapim Tok Hait 4:1-5
Bihain mi lukluk gen na long heven mi lukim wanpela dua i op i stap. ... na long heven mi lukim wanpela sia king i stap, na wanpela Man i sindaun i stap long dispela sia. – Kamapim Tok Hait 4:1-2
Wanpela narakain samting olgeta long dispela buk, Kamapim Tok Hait, i olsem dispela buk i no save kolim nem bilong “God.” Nogat. Dispela buk i save tok “Man i sindaun i stap long sia king.”
Dispela tok i gat as bilong en. Em i no nupela tok. Long Olpela Testamen, long Buk Song, planti taim ol i stori long God olsem Man i sindaun long sia king na bosim yumi. Buk Song 97 i tok, “Bikpela i stap king. Graun, yu mas amamas.” Na Buk Song 99 i tok, “Bikpela i stap king. Ol manmeri i save pret na guria.” Na Kamapim Tok Hait i stori long as bilong dispela amamas na guria. Tasol dispela sapta long Kamapim Tok Hait i lukluk long wanpela dua i op i stap na i lukluk long sia king bilong God.
God i sindaun i stap long dispela sia king long heven, dispela sia king i stap antap tru long dispela graun. Antap long olgeta pait, taim bilong drai, taim bilong ol samting nogut, pret bilong man na krai bilong ol pikinini, yumi lukim wanpela sia king. Na dispela Man i sindaun i stap long dispela sia king, em i lukim olgeta pait, na em i harim olgeta krai.
Long tude yumi inap long lukim planti samting i kamap nabaut nabaut long dispela graun long pon bilong yumi o long niuspepa. Tasol, planti taim, taim yumi lukim ol nius samting, bai yumi lukim ol hevi na bagarap tasol. Na sampela taim yumi bai paul olgeta na ting olsem dispela graun em i longlong olgeta.
Em tru, planti samting long nius i soim olsem planti lain long dispela graun i paul na i longlong pinis. Tasol wanpela dua i stap op. Lukim! Wanpela sia king i stap, na wanpela Man i sindaun i stap long dispela sia king. God yet i bosim dispela graun long sia king bilong em!
SAMPELA TINGTING
Dispela stori i helpim yu long laip bilong yu olsem wanem?
Ritim: Kamapim Tok Hait 1:17-20
Yu no ken pret. Mi man i stap namba wan tru na i stap bihain tru. Na mi man bilong i stap laip. Bipo mi dai pinis, tasol lukim, nau mi stap laip oltaim oltaim. Na mi holim ol ki bilong Dai na bilong Ples bilong ol man i dai pinis. – Kamapim Tok Hait 1:17-18
God i givim yumi save bilong tingim wanem samting i bin kamap bipo. Yumi inap long tingim planti samting, wantu.
Tasol dispela God i givim yumi dispela save long tingim wanem samting i bin kamap bipo, em i no givim yumi save long wanem samting bai i kamap bihain. God em i mekim olsem long apim save bilong em, na em i gutpela long helpim yumi tu.
Yumi no ken longlong na traim long painimaut wanem samting God i pasim yumi long save long em. Planti lain long bipo wantaim planti lain long tude tu, ol i wok long painimaut wanem samting bai i kamap bihain taim ol i lukim wanpela han o ol sta, o taim ol i go long wanpela glasman. Ating God i bel hevi na sori wantaim taim planti milien manmeri samting i wok long mekim olsem.
God i laik sapos yumi i wokabaut long bilip long dispela graun. Na Kamapim Tok Hait i no brukim dispela lo bilong God. God i no givim yumi dispela buk bilong soim yumi wanem ol samting bai i kamap bihain, maski sampela i ting dispela buk i mekim olsem. God yet i kam long yumi long dispela buk.
Taim yumi lukim pinis Bikpela bilong yumi long ai bilong Jon, bai yumi inap harim Tok bilong Bikpela bilong givim bel isi long yumi; dispela tok Jon yet i bin raitim.
“Yu no ken pret,” Krais i tok, “Yu no save wanem samting bai kamap. Yu ting olsem yu bai dai. Tasol no ken pret. Mi save long yu, na yu ken save long mi. Mi winim dai pinis. Bilipim mi. Taim yu dai no ken pret; bilipim mi olgeta. Dai i no pinis bilong yu. Mi yet mi pinis bilong yu.”
Taim sios bilong God i kisim dispela tok, em i singaut long Man i stap namba wan tru na i stap bihain tru: mipela i save mipela i kam long we, na mipela i save mipela bai i go long we. Mipela i save olgeta samting i kam long we, na olgeta samting i wok long go long we. “God yet i mekim kamap olgeta samting, na em i as bilong olgeta samting. Na olgeta samting
i bilong em wanpela tasol. Yumi mas litimapim nem bilong em oltaim oltaim. I tru” (Rom 11:36).
SAMPELA TINGTING
Jisas i winim dai. Dispela i givim bel isi long yu olsem wanem?
Ritim: Kamapim Tok Hait 1:8-16
Na mi lukim wanpela man ... Het wantaim gras bilong en i waitpela tru, olsem gras bilong sipsip, na olsem waitpela klaut. Na ai bilong en i lait olsem paia i lait strong moa. Lek bilong en i lait tru, olsem bras ol i bin kukim long bikpela paia. Na mi harim nek bilong en i pairap olsem bikpela wara i pairap. ..Na wanpela bainat i gat tupela sap na i sap tru, em i kam ausait long maus bilong en. Na pes bilong en i lait tumas, olsem san i lait strong moa. – Ka- mapim Tok Hait 1:13-16
Bipo long taim God i soim yumi wanem samting i mas kamap kwiktaim, yumi inap lukim Jisas, em bai i mekim ol dispela samting i kamap. Em i stap wantaim God, na em i gat glori bilong God tu.
Tasol em i Jisas bilong yumi. Em i kamap long dispela graun olsem bebi na em i karim pen, na em i dai. Wanpela taim em i bin sanap long ai bilong Pailat – em i pen, na pes bilong
em i pulap long blut, na strong bilong em i laik pinis – na dispela Pailat i tok, “Lukim. Em hia dispela man” (Jon 19:5). Pailat i ting olsem ol manmeri bai klia olsem Jisas em i man, na em i no mekim pasin nogut. Tasol long dispela de – Gut Fraide – ol i les long sori long Jisas, na ol i nilim em long diwai kros.
Tasol nau, yumi lukim em olsem King! Pes bilong en i lait tumas, olsem san i lait strong moa, na ol poro bilong em wantaim ol birua bilong em bai i pret long lukluk long em. Tok bilong em, i olsem wanpela bainat i gat tupela sap na em bai i hapim dispela graun, em i kam ausait long maus bilong en. Na lek bilong em – yumi no ken lus tingting long lek bilong em bikos ol wokboi bilong king i save brukim skru long lek bilong king. Olgeta nesen na kantri long dispela graun bai brukim skru long lek bilong Jisas Krais. Na lek bilong em i lait tru olsem bras ol i bin kukim long bikpela paia. Em i sanap, em i fri, na em i gat pawa – em i brata na God bilong yumi.
Na long bung bilong ol, ol wokboi bilong God, ol lain bilong bihainim Jisas, i harim dispela man taim em i ritim ol tok long dispela buk. Taim ol i harim ol dispela tok, na taim ai bilong spirit bilong ol i lukim glori bilong dispela King, nek bilong ol bai i guria, na ol i amamas nogut tru: “Ol lain i ritim dispela tok na ol lain i harim dispela tok, ol i ken amamas.”
Na taim dispela bung i pinis, olgeta wokboi bilong God i ken karim dispela tok i go aut long dispela graun: King bilong yu i stap hia! Yupela kam na bung long harim dispela tok long dispela buk! Kam na harim wantaim mipela! Jisas i stap long heven, na em i King!
SAMPELA TINGTING
Tingting gut long dispela piksa bilong King bilong yu, Jisas, na brukim skru na lotuim em.
Ritim: Kamapim Tok Hait 22:6-16
God, Bikpela, em i save kirapim spirit bilong ol profet bilong autim tok bilong en, em i bin salim ensel bilong en i kam bilong soim olgeta wokman bilong en long olgeta samting i mas kamap kwiktaim. Na harim. Jisas i tok, ‘Bai mi kam long yupela kwiktaim.’ Ol manmeri i bihainim ol dispela tok profet i stap long dispela buk, ol i ken amamas. – Kamapim Tok Hait 22:6-7
Stat na pinis bilong Kamapim Tok Hait i wankain. Taim yumi ritim stat na pinis bilong dispela buk, yumi ken klia tru long as bilong ol dispela tok. Yumi bai klia husat i salim dispela toksave na yumi bai klia husat i kisim ol dispela tok tu. Bikpela God i salim dispela tok – dispela wankain God i bin autim tok long maus bilong ol profet long Olpela Testamen. Em i raitim dispela tok long olgeta manmeri husat em i toktok long ol, long stat bilong dispela buk – ol lain bilong nupela kontrak i bung wantaim. Na em i tok olsem ol dispela manmeri i wokboi bilong God. Na as bilong dispela buk i bilong soim sios bilong God olgeta samting i mas kamap kwiktaim.
Na blesing bilong God i kamap ples klia gen: “Ol manmeri i bihainim ol dispela tok profet i stap long dispela buk, ol i ken amamas.” Dispela blesing i go long ol lain i bilipim tok long dispela buk, na i bihainim tok bilong Jisas Krais. Ol dispela lain tasol i ken kisim dispela save long olgeta samting i mas kamap kwiktaim.
Olgeta dispela samting i mas kamap kwiktaim. As bilong dispela tok “mas” i wankain olsem as bilong namba wan taim Krais i kam long dispela graun. Jisas i bin tok, “Mi mas go long Jerusalem,” na, “Mi mas karim pen na dai na kirap bek.” Na wankain olsem, “olgeta samting i mas kamap kwiktaim.”
I mas kamap bikos Krais i dai, na em i mas pinisim dispela wok bilong em. Nogut sampela i lap long God na daunim em bikos em i no pinisim wok bilong em. Em i mas kamap bikos God bai i bekim olgeta prea bilong ol wokboi bilong em. Em i mas kamap bikos God em i God. Olsem na larim graun i guria long ol dispela samting bai i kamap nau.
Tasol ol lain i harim na bihainim tok bilong God, ol i ken amamas!
SAMPELA TINGTING
Dispela samting i mas kamap kwiktaim, em i wanem samting?
Ritim: Kamapim Tok Hait 1:1-17
Dispela tok em i tok profet i kam long God, na man i ritim dispela tok long ol arapela, em i ken amamas. Na ol manmeri i harim dispela tok na ol manmeri i bihainim dispela tok bilong God mi bin raitim, ol tu i ken amamas, long wanem, taim i laik kamap nau, na ol dispela samting God i tok pinis long mekim, em bai i mekim. – Kamapim Tok Hait 1:3
God tasol i gat pawa bilong givim blesing long wanpela samting o long tok nogutim em. Olgeta samting long dispela graun i nidim blesing bilong God na i pret long tok nogut bilong em. Long dispela teks yumi ritim wanpela naispela blesing stret i kam long God.
Na dispela blesing i go long ol lain i bihainim Krais, taim ol i bung wantaim ol arapela lain bilong bilip insait long sios. Wanpela man i sanap na ritim dispela “Kamapim Tok Hait” long wanpela pepa ol i bin raunim na pasim. Ol arapela i sindaun na i harim. Em i klostu long pinis bilong de – na pinis bilong dispela graun.
Sios bilong God i bung na raunim wanpela buk – Kamapim Tok Hait bilong God. Na God i tok olsem ol lain i stap long dispela sios ol i ken amamas. God i blesim ol pinis. Olgeta lain i ritim dispela tok i ken amamas bikos ol inap long ritim. Na ol lain i harim, ol tu i ken amamas, bikos ol inap long harim. “Na ol manmeri i harim dispela tok na ol manmeri i bihainim dispela tok bilong God, ol tu i ken amamas.”Tok bilong God i stap insait long ol manmeri bilong God; pasin bilong ol i bihainim wanem samting ol i harim.
Sampela lain i bin tok – na ol i tok yet – olsem yumi mas ritim olgeta buk long Buk Baibel, tasol nogat long dispela las buk. As bilong dispela em i bikos planti lain i paul tru long olgeta driman na narakain tok tru insait long Kamapim Tok Hait.
Tasol “taim i laik kamap nau.” Olsem na yumi mas ritim ol dispela tok, na yumi ken amamas taim yumi mekim olsem, bikos yumi bai kisim blesing bilong God. Man i ritim, em i ken amamas, na man i harim na bihainim, em i ken amamas. God bai i blesim em. Dispela tok profet bai putim ples klia wanem samting bai i kamap klostu nau.
Ol lain i ritim dispela i ken amamas. Blesing bilong God bai i kam long yu.
SAMPELA TINGTING
Long dispela mun bai yumi ritim na tingting long planti tok long Kamapim Tok Hait. Tok tenkyu long God long dispela buk, na askim em long blesim yu taim yu ritim dispela buk.
Ritim: Kamapim Tok Hait 22:6-13
...orait mi brukim skru klostu long lek bilong ensel i bin soim ol dispela samting long mi, na mi laik lotu long em. Tasol em i tokim mi, “Yu no ken mekim olsem! Mi tu mi wanwok bilong yu wantaim ol brata bilong yu, em ol profet. Na mi wanwok bilong olgeta man i save bihain- im tok bilong dispela buk. Yu mas lotu long God wanpela tasol.” – Kamapim Tok Hait 22:8-9
Ol ensel i winim yumi bikos ol i save bihainim stret laik bilong God olgeta taim. Jisas i skulim yumi long prea olsem: “Mipela i mas bihainim laik bilong yu long graun olsem ol i save bihainim long heven.”
Tasol ol ensel i no winim yumi tu. Save bilong yumi long God i winim save bilong ol ensel: ol ensel i save long glori bilong sia king bilong em, tasol yumi save long mining bilong diwai kros bilong em.
Sapos i gat wanpela pikinini i sik nogut tru, ating dispela pikinini bai lukim bikpela sori na laikim tru bilong papamama bilong em. Na ating wanpela pikinini i no gat sik i no inap lukim dispela kain sori long papamama bilong em. Olsem tasol yumi lukim na pilim bikpela laikim tru i kam long bel bilong Papa bilong yumi long heven, na ol ensel i no save lukim dispela kain laikim tru.
Ol ensel i save wanbel wantaim Papa bilong yumi taim em i sori tru long ol pikinini bilong em i lus. Maski ol i no inap save tru long bikpela wok bilong God long kisim bek yumi, na long pen na hevi God em i kisim long stiaim yumi, ol ensel i save tingting long yumi na wari long yumi. Taim God i kamapim yumi, ol ensel i bungim maus na singsing. Na taim God i painim pinis wanpela pikinini i lus, ol ensel i amamas tru na singsing.
Jisas Krais i kam pinis, na yumi i mas prea olsem: “Mipela i mas bihainim laik bilong yu long graun olsem ol i bihainim long heven.” Na God i givim ol wok long mekim. God i save salim ol i go bilong helpim ol man em i laik kisim bek ol (Hibru 1:14). Sapos yumi i bihainim laik bilong God long graun, planti manmeri bai wok long bagarapim yumi, tasol ol ensel bai helpim yumi. God i tokim ol long mekim olsem. Ol ensel i bin helpim pikinini bilong God, Jisas Krais, taim em i bin stap long dispela graun.
Ol ensel i wanbel long yumi long pasin bilong bihainim Bikpela na long pasin bilong lotu. Long Kamapim Tok Hait, Jon i brukim skru long wanpela ensel. Tasol dispela ensel i tokim em i no ken mekim olsem bikos ol ensel tu i mas brukim skru long God. Namba wan samting stret long dispela graun em i pasin bilong lotu. Long taim bilong lotu, yumi olgeta – ol ensel wantaim – i brukim skru long sia king bilong God.
SAMPELA TINGTING
Litimapim nem bilong God bikos wanpela de yumi bai brukim skru long Bikpela – na ol ensel bai brukim skru wantaim yumi.
Ritim: Rom 7:7-20
Yupela i no ken mangalim haus bilong narapela man. Na yupela i no ken aigris long meri bilong narapela man...o olgeta arapela samting bilong en tu. – Kisim Bek 20:17
Dispela laspela lo bilong dispela Tenpela Lo em i laik toktok long bel bilong yumi. Nupela Testamen i putim dispela ples klia, taim em i stori long dispela lo.
Long dispela lo God i tambuim dispela as bilong olgeta arapela sin – em i dispela laik nogut i stap insait long bel bilong yumi olgeta. Bel bilong yumi em i as bilong ol sin bilong yumi. Bel nogut bilong yumi em i as bilong olgeta pasin nogut i stap long dispela graun.
Planti ol save man long dispela graun i tok olsem olgeta laik i stap long bel bilong yumi i save kamapim olgeta pasin bilong yumi. Buk Baibel i tok olsem tu. Na taim yumi i bihainim ol laik nogut bilong yumi yet, orait bai pasin bilong yumi i kamap nogut tru. Tasol God i givim yumi wanpela rot bilong stretim dispela hevi long laip bilong yumi wan wan. Taim yumi lukluk long ol arapela manmeri tasol, bai yumi i mangal na aigris na bai yumi i no amamas long wanem samting yumi kisim pinis. Bai yumi gat laik long kisim sampela moa samting, tasol em bai i no inap tu. Bel bilong yumi bai i no inap i stap isi inap long taim yumi kisim bel isi tru long God.
I no olsem yumi mas pasim olgeta laik bilong yumi. Nogat. Tasol taim bel bilong yumi i hangre, yumi mas tanim i go long God, bikos em yet bai inapim bikpela laik long bel bilong yumi. Em tasol inap long inapim laik tru bilong yumi. Na taim God i pulapim yumi long laikim tru bilong em, dispela bai inap tru long yumi. Bai yumi i bel isi tru na laik bilong yumi bai i kamap gutpela na stretpela laik tru.
SAMPELA TINGTING
Bel bilong yu i save stap isi tru, o nogat? Ritim tok bilong Pol long Filipai 1:11-13 long helpim bel bilong yu i stap isi.
Ritim: Jems 3:1-12
Yupela i no ken giaman na kotim nating ol arapela manmeri. – Kisim Bek 20:16
Yumi no ken kilim i dai ol arapela manmeri, yumi no ken mekim pasin pamuk, na yumi no ken stil. Tasol yumi inap bagarapim ol wantok bilong yumi long toktok bilong yumi tu. Olsem God i tok, “Yupela i no ken giaman na kotim nating ol arapela manmeri.”
Dispela lo i stori long pasin bilong kotim ol arapela. Sapos yu sanap long kot na yu giaman, orait nogut bai wanpela man i kisim pe nogut long wanpela samting em i no mekim.
Sapos yu stap long kot na wanpela jas i askim yu, “Yu lukim dispela man i stilim dispela ka long ai bilong yu yet, o nogat?” Na sapos yu tok, “Yes, mi lukim em i stilim dispela ka,” tasol yu giaman bikos yu no lukim long ai bilong yu yet, ating jas bai putim dispela man long kalabus. Olsem tasol yumi no ken giaman long taim bilong kot bikos nogut yumi bagarapim wanpela man i no gat asua.
Tasol dispela lo i stori long planti moa samting yet. Em i tokim yumi long no ken giaman; yumi mas laikim tru olgeta samting i tru tasol, na yumi mas tok tru olgeta taim.
Wanpela kantri bai sanap strong sapos ol man na meri bilong kantri i save tok tru tasol. Tasol planti taim ol man i tok “yes” long mekim sampela samting ol i no gat laik long mekim. Na sampela taim wanpela man o meri bai tok, “Mi no save,” taim em i save tasol em i les long tokim narapela. Hau bai yumi bilipim tok bilong narapela man o meri? Em i hat tru long lukim wanpela man o wanpela meri i autim tok tru na tok tru tasol.
Na Buk Babel i tok olsem Satan em i papa bilong pasin giaman. Na em i gat planti pikinini bilong em long dispela graun long tude.
Olsem tasol buk Jems i tok, “Maus em i liklik hap tasol long bodi, tasol em i save humbak moa yet na litimapim nem bilong em yet.”Tok nogut i save bagarapim man, na hevi bilong dispela i winim hevi bilong ol naip na ol gan. Yumi mas lainim pasin bilong tok tru long laikim tru, na yumi mas amamas long tok tru tasol. Na yumi mas was gut long toktok bilong yumi, na skelim gut toktok bilong yumi tu. Em i hat tru, tasol yumi mas wok strong bilong bosim gut yumi yet.
Yumi nidim Holi Spirit long bosim yumi, na em bai stiaim yumi long laikim tru na tok tru long ol arapela i no save tok stret tasol. Dispela nupela pawa i kam long de bilong Pentekos olsem tang bilong paia long ol lain bilong God. Na dispela pawa em i dispela Spirit bilong laikim tru na tok tru.
SAMPELA TINGTING
Yu save bihainim pasin bilong autim tok i tru, o yu wanpela man o meri i save tok giaman? Askim God long helpim yu i bosim gut maus bilong yu yet.
Ritim: Jems 5:1-11
Yupela i no ken stil. – Kisim Bek 20:15
God i tokim yumi long laikim tru ol wantok bilong yumi: “Yupela i no ken kilim i dai ol arape- la manmeri. Laikim ol tru!” Na God i tokim yumi long respektim olgeta man na meri: “Yupela i no ken mekim pasin pamuk. Maski yu marit o yu no marit – stap klin long ai bilong God.”
Na long dispela lo bilong teks bilong tude, God i tokim yumi olsem, “Yupela i no ken stil. Yupela i mas lukautim gut olgeta samting mi yet mi givim yu.”
God i tambuim yumi long stil. Dispela i min yumi no ken stilim sampela samting bilong narapela. Tasol moa, dispela i min olsem yumi no ken giaman long ol samting bilong mani o takis. Yumi no ken sit long skul o long ol eksam long skul. Yumi no ken giaman long maket. Yumi no ken stilim taim long bos bilong yumi – yumi no ken les long mekim wok taim bos bilong yumi i wok long baim yumi. God i tok, “Yumi no ken stil.”
Na planti taim ol manmeri save wok long senisim lo bilong God. Taim planti manmeri i wok long mekim ol kranki pasin, orait bai yumi ting, “Em i orait. Em i no sin.” Sapos olgeta man
i wok long giaman long sait bilong mani, orait bai yumi i ting, “Em i oriat. Em i no bikpela samting. Bai mi mekim olsem tu.”
Tasol lo bilong God i no save senis. Yumi no ken wok long senisim lo bilong em. God em i belhat tru bikos em i lukim planti man na meri i save stil, mangal, les long wok, i go i go. Na yu yet save belhat long ol dispela pasin tu, o nogat? Em i mobeta long stap rabisman na i no stil na giaman, olsem stap maniman na mekim pasin bilong stil na giaman.
Yu yet yu stap pikinini bilong God, o nogat? Bai yu lotuim God o mani? Yu stap aninit long God o aninit long mani? Skelim gut laip bilong yu – sapos yu stap aninit long God, laip bilong yu bai narakain olgeta long laip bilong ol man i no bilip long God.
God i no tokim yumi olsem yumi no ken stil tasol. Long dispela lo em i laik skulim yumi olsem yumi mas lukautim gut wanem samting em i givim yumi, maskim em i bikpela samting o liklik samting. Yumi mas yusim wanem samting em i givim yumi – mani, kago, taim, gutpela save, i go, i go – long mekim gutpela wok bilong em!
SAMPELA TINGTING
Dispela lo em i hat long bihainim, o nogat?
Ritim: Stat 2:18-25
Yupela ol marit, yupela i no ken mekim pasin pamuk. – Kisim Bek 20:14
God i kamapim man na meri. God i kamapim Iv long stap olsem poroman bilong helpim Adam. Dispela i no min olsem Iv i stap olsem meri bilong mekim olgeta wok man em i laikim em long mekim. Nogat. Iv i stap olsem poroman bilong Adam. God i wokim tupela. God em i wokim man na meri bilong tupela i ken pas wantaim, na tupela i kamap wanpela bodi tasol (Stat 2:25).
God yet i kamapim marit taim em i kamapim dispela graun. Maritpasin na marit i stap bipo long taim sin i kam long dispela graun. Na olgeta samting i kam long God i gutpela – pasin bilong marit wantaim. Dispela stori bilong God i kamapim man na meri na tupela i marit, em i tru na tru olgeta. Na tupela i stap long gaden Iden.
Dispela wok bilong God bilong marit na maritpasin wantaim, em i wanpela naispela presen stret God i givim olgeta manmeri. Sapos man na meri i bihainim laik bilong God long marit bilong ol, pasin bilong marit bai givim bikpela amamas long ol. Tasol taim man na meri i no bihainim laik bilong God long marit bilong ol, orait laip bilong tupela bai pulap long sori na hevi.
God yet i givim man na meri dispela laik bilong mekim maritpasin; em i naispela presen stret i kam long God yet. Na ol dispela samting God i givim man na meri insait long marit tasol. Na God yet i tok olsem man na meri i no ken brukim marit. Tupela i mas pas wantaim na wanbel. God yet i tok olsem pasin bilong marit i samting bilong wanpela man wantaim wanpela meri. Em tasol. Na God i tokim yumi long was gut na lukautim gut marit bilong yumi.
Taim ol manmeri i wok long bagarapim olgeta gutpela samting God yet i wokim, ol bai bagarapim ol yet. Taim ol manmeri i wok long sakim laik na tingting bilong God, ol bai pilim bikpela hevi tru.
SAMPELA TINGTING
Yu save bihainim laik bilong God long dispela lo long laip bilong yu – maski yu marit o yu no marit?
Ritim: Luk 10:25-37
Yupela i no ken kilim i dai ol arapela manmeri. – Kisim Bek 20:13
Long dispela lo God i wok long lukautim olgeta manmeri. Long dispela lo God em i tam- buim yumi long kilim ol arapela man o meri, na em i tokim yumi long laikim tru ol wantok bilong yumi olsem yumi laikim yumi yet. As bilong dispela lo i kam long taim God i ka- mapim dispela graun. God i wokim olgeta manmeri, olsem na olgeta manmeri i bilong em. Na dispela em i as bilong dispela lo. Em i wokim olgeta man na meri, na ol i kamap olsem piksa bilong God yet. Olsem tasol, ol mani man o rabisman, blekskin o waitskin, bikman o man nating, olgeta i stap aninit long lukaut bilong God.
God i lukautim olgeta manmeri bikos em i wokim ol, tasol moa, em i laikim ol tu. Satan em
i man bilong hetim olgeta manmeri na kilim ol i dai, tasol God em i God bilong laikim tru. Olsem tasol Buk Baibel i tok sapos man i no laikim tru brata bilong en na i bel nogut long em, em i no pikinini bilong God, tasol em i pikinini bilong Satan. Na gutnius bilong Jisas Krais i skulim yumi long dispela lo. Gutnius i soim yumi pasin bilong laikim tru, na pasin bilong wanbel na bung wantaim ol arapela lain i bilip long God. Taim ol lain bilong God i laikim tru ol arapela, ol i kisim nupela laip pinis – na dispela i inapim dispela lo bilong God.
Taim Buk Baibel i stori long laip, em i no stori long pasin bilong pulim win tasol. Na tu pasin bilong “kilim i dai ol arapela manmeri” em i no samting bilong kilim i dai man tasol. Laip em i samting bilong wanbel wantaim God na ol arapela manmeri. Sapos yumi no wanbel olsem, orait yumi i no stap laip. Na olgeta pasin bilong hetim ol arapela o mangalim ol arapela i olsem pikinini bilong pasin bilong kilim i dai ol arapela manmeri. Dispela ol pasin i wok long bagarapim sindaun bilong yumi wantaim ol arapela na wantaim God, na Satan yet i planim ol dispela kain pasin long bel bilong yumi. Pasin bilong laikim tru i wok long kamapim
ol gutpela pasin bilong wanbel na sindaun gut; tasol pasin bilong hetim ol arapela, em
i narapela samting olgeta olsem laikim tru. Pasin bilong laikim tru i kam long God; pasin bilong hetim ol arapela manmeri i kam long Satan. Na taim Krais i kam bek na olgeta lain bilong em bai bung wantaim long taun bilong em, ol lain i kilim i dai ol arapela manmeri bai stap ausait long dispela taun bilong God (Kamapim Tok Hait 22:15).
God i kamapim man na meri bilong ol i ken bung wantaim na wanbel, i no bilong kros na bel nogut wantaim. I bilong stap olsem wantok bilong olgeta arapela man na meri. Olsem tasol God i givim dispela lo long yumi, na em i salim Pikinini bilong em long ol i ken kilim em i dai. Na God em i mekim olsem bilong putim ples klia dispela laikim tru bilong em i kam long yumi.
Long Luk 10:25-28, Jisas i stori long man bilong Samaria husat i helpim wanpela Juda. Na taim em i pinisim dispela stori em i tokim dispela saveman bilong lo olsem: “Yu mekim olsem, na bai yu kisim laip.”Yumi mas harim dispela tok tu!
SAMPELA TINGTING
Yu save bihainim dispela lo long laip bilong yu yet, o nogat?
Ritim: Efesus 6:1-9
Yupela i mas aninit long papamana bilong yupela na bihainim tok bilong ol. Sapos yupela i mekim olsem, bai yupela i no inap i dai kwik. Nogat. Bai yupela i ken i stap longtaim long dispela graun mi God, Bikpela bilong yupela mi laik givim yupela. – Kisim Bek 20:12
Namba wan hap bilong dispela Tenpela Lo i skulim yumi long pasin bilong stap gut wantaim God. Yumi ken sotim ol dispela lo long namba wan hap bilong dispela Tenpela Lo olsem: “Laikim God antap long olgeta arapela samting.” Namba tu hap bilong ol dispela Tenpela Lo i skulim yumi bilong stap gut wantaim ol arapela manmeri. Na yumi ken sotim dispela hap bilong lo olsem: “Laikim wantok bilong yu olsem yu laikim yu yet.”
Tasol dispela namba 5 lo i stap namel long dispela tupela hap bilong dispela Tenpela Lo. I no olsem em i skulim yumi long pasin bilong stap gut wantaim God, na i no olsem em i skulim yumi long pasin bilong stap gut wantaim ol arapela manmeri. Na dispela i bikos papamama bilong yumi ol i stap namel long yumi na Bikpela. Yumi mas bihainim tok bilong papamama bilong yumi bikos God yet i givim namba long ol. Yumi mas bihainim tok bilong ol bikos God yet i putim ol papamama antap long yumi. Pasin bilong bihainim papamama bilong yumi em i samting bilong bihainim Bikpela.
Yumi mas bihainim tok bilong papamama bilong yumi. Tasol moa, dispela lo i tokim yumi long onaim papamama bilong yumi taim yumi i bikpela pinis tu. Na yumi mas onaim papamama bilong yumi long olgeta de long laip bilong yumi.
God i tokim ol pikinini long bihainim papamama bilong ol, na em yet i givim namba long ol papamama. Olgeta papamama i mas tokim God long as bilong olgeta pasin ol i mekim bikos God yet i mekim ol i gat namba.
Tasol God i givim namba long kain kain man na meri. Tasol namba bilong ol papamama
i namba wan kain namba we ol manmeri i save stap aninit long em. Na namba bilong
ol papamama i karamapim planti samting. Em i hat tru long mekim gutpela pasin olsem papamama. Ol papamama i mas skulim gut pikinini bilong ol. Ol i mas lainim ol long ol pasin bilong Bikpela na skulim ol inap long taim ol i kamap bikpela. Na taim ol pikinini i bikpela pinis, bai ol i redi long bihainim tok bilong God na stap gut wantaim ol arapela manmeri tu.
Wok bilong papamama em i bikpela wok tru na em i winim ol arapela wok long dispela graun. Na pe bilong dispela gutpela wok em i bikpela samting tru: ol papamama na pikinini i ken amamas long lukim dispela pe long taim ol i stap long dispela graun tu.
SAMPELA TINGTING
Yu save onaim papamama bilong yu, o nogat?
Ritim: Luk 6:1-11
Yupela i mas tingim gut de Sabat na makim olsem de bilong mi yet. – Kisim Bek 20:8
Dispela lo i klia tru long ol Israel: i tambu tru long mekim wok long de namba 7, na ol i kolim dispela de Sabat, na em i de bilong malolo.
Buk Kisim Bek na buk Lo i givim planti as bilong dispela lo. Bihain long taim God i kamapim dispela graun long de 1 i go long 6, God i bin malolo long de namba 7. Ol animal na ol wokboi i mas malolo long dispela de tu. Na moa, dispela Sabat em i olsem wanpela mak bilong dispela kontrak God i wokim wantaim ol lain bilong em taim em i givim dispela Tenpela Lo long ol. Ol man i no malolo long de Sabat, ol i putim ol yet ausait long ol lain bilong kontrak. Olsem na ol lain i sakim dispela lo, God i tokim ol long dai.
Tasol em i hat tru liklik long klia gut long mining bilong dispela lo long laip bilong yumi ol lain bilong God i stap long nupela kontrak. Planti ol Kristen i no wanbel long pasin bilong bihainim dispela lo, na dispela Nupela Testamen i no tokaut klia long dispela. Tasol yumi
ken klia long dispela: bihain long taim Jisas i kirap bek long matmat, ol Kristen long Nupela Testamen i wok long bung long lotu long namba wan de long wan wan wik, long Sande. Na yumi ken klia gut bilong wanem ol i mekim olsem. Jisas i kirap bek long Sande na dispela i makim taim laip tru i kirap.
Na yumi olgeta i mas was gut – nogut yumi bisi long wok tasol. Nogut kantri bilong yumi tu i bihainim pasin bilong wok long olgeta de. Yumi mas makim de Sande long lotuim God na long bihainim pasin bilong lukautim ol arapela, bilong bung wantaim ol arapela Kristen, bilong malolo, na bilong lainim planti moa samting long Bikpela.
Long Sande yumi mas bung long sios bilong God long lotuim em. Em i bikpela samting
tru – na em bai i helpim yumi long wokabaut wantaim Bikpela long dispela graun. Tru, em i orait long yumi i bung long ol arapela de tu bilong lotuim em, tasol Sande em i de God yet i makim bilong bung wantaim bilong lotuim em – em i De bilong Bikpela.
SAMPELA TINGTING
Yu save bihainim wanem pasin bilong bihainim dispela lo namba 4?
Ritim: Saveman 5:1-7
Yupela i no ken kolim nating nem bilong mi God, Bikpela bilong yupela. Long wanem, bai mi mekim save long ol manmeri i kolim nating nem bilong mi. – Kisim Bek 20:7
Dispela lo i tambuim yumi long yusim nem bilong God long wokim poisin, long giaman na mekim tok tru antap wantaim, na long olgeta arapela samting i no gutpela long mekim.
Em i tambu tru long kolim nating nem bilong God. Sapos yumi i laik kolim nem bilong em, yumi mas tingting gut pastaim, na autim gut. I no ol lain i no save long God, i save kolim nating nem bilong em tasol. Em bai i gutpela sapos yumi olgeta i tingting gut long dispela lo na skelim Kristen wokabaut bilong yumi wan wan.
Nogut yumi i mekim poisin na kolim nem bilong God long mekim olsem. Na planti lain long gavman save autim nem bilong God taim ol i mekim sampela tok, tasol ol i no tingting tumas bilong wanem ol i autim nem bilong em. Sampela lain i no bilip long God, tasol ol bai autim nem bilong God long wanpela haus krai o long taim bilong marit o long taim bilong baptais tasol.
Tasol olsem wanem long yumi? Sapos yumi go long lotu na yumi autim nem bilong God, tasol yumi no tingting gut taim yumi mekim olsem, orait i olsem yumi kolim nating nem bilong God. Sapos pasto i prea, tasol yumi no harim gut o yumi no tingting gut long taim bilong prea, orait i olsem yumi kolim nating nem bilong God. Saveman 5:1 i tok, “Yu mas tingting gut long pasin bilong yu long taim yu go long haus bilong God. Nogut yu go nating.”
Tasol dispela lo i no tokim yumi long pasim maus na maski long autim nem bilong God. Nogat tru! Laik bilong God i kamap ples klia long Jisas: “Na long nem bilong em bai ol i mas autim tok long olgeta lain manmeri, bai ol i ken tanim bel, na bai God i lusim ol sin bilong ol” (Luk 24:47).
SAMPELA TINGTING
Yu save wok long stretim ol lain i wok long kolim nating nem bilong God, o nogat?
Ritim: Aisaia 40:18-26
Yupela i no ken wokim wanpela giaman god, na yupela i no ken wokim piksa bilong wanpe- la samting i stap long heven o i stap long graun o insait long wara i stap aninit long graun. Yupela i no ken brukim skru long wanpela giaman god o piksa na lotuim em... – Kisim Bek 20:4-5
Yumi no inap lukim God. Na sapos yumi no bilip long Jisas Krais, bai yumi no inap save long God tu. Pasin bilong wokim wanpela giaman god em i longlong tru, tasol planti lain i ting ol i mekim wanpela gutpela samting taim ol i mekim olsem. Tasol planti lain i no Kristen na i bin wokim ol giaman god, ol i laik mekim olsem bikos ol yet i laik bosim dispela god bilong ol. Taim ol i wokim wanpela giaman god, ol i ting olsem ol inap kisim pawa bilong dispela god na yusim dispela pawa long laik bilong ol yet.
Taim ol Kristen i kirapim dispela pasin bilong wokim sampela samting olsem ol liklik diwai kros, ol i no tingting olsem dispela liklik samting i gat sampela pawa. Ol i laik yusim ol dispela liklik samting bilong helpim ol Kristen i tingim pawa na laikim tru bilong God. Tasol bihain, dispela pasin i senis na planti lain i wok long lotuim ol dispela kain samting. Na sios bilong Rom i bin bungim planti ol “holi samting” na ol dispela samting i kamap olsem ol giaman god bilong ol, na ol i ting olsem ol dispela samting yet i gat pawa. Tasol long marimari bilong God, bikpela senis i bin kamap long sios na planti ol Kristen i kisim save olsem dispela pasin i no gutpela o stretpela long ai bilong God. Tasol dispela i no min olsem ol Kristen i no save mekim dispela sin bilong “wokim wanpela giaman god, o wanpela piksa na brukim skru long em” long tude.
Sampela taim ol pasto o hetman long sios bai i wok long larim sios bilong ol i kamap olsem “god” bilong ol, na ol bai i ofaim olgeta samting long laip bilong ol i go long sios tasol. Na planti ol arapela Kristen i gat rot na pasin bilong ol bilong lotuim Bikpela long taim bilong lotu. Dispela em i gutpela, tasol sampela taim dispela rot ol i yusim long lotuim Bikpela i kamap olsem nambawan samting bilong lotuim em, na ol i lus tingting long lotuim Bikpela long bel bilong ol. Sampela taim ol bai i putim haus lotu antap long ol arapela samting, na dispela em i kamap olsem wanpela samting bilong lotuim.
Tasol dispela God husat i putim em yet ples klia olsem Papa bilong Krais, em tasol i makim rot bilong yumi long lotuim em. God i bel hat long pasin bilong wokim ol giaman god o wanpela piksa bilong brukim skru long em – God wanpela em i God bilong yumi, na em i gat laik sapos yumi kamap nupela long Krais Jisas na lotuim em long bel na spirit na bodi na olgeta samting bilong yumi. Yumi yet i mas kamap olsem wanpela piksa bilong God bikos ol lain bilong God i bin kamap nupela long Krais Jisas, ol i olsem piksa bilong dispela God husat yumi no inap lukim.
SAMPELA TINGTING
I gat sampela giaman god i stap long laip bilong yu, o nogat?
Ritim: Aisaia 40:12-17
Yupela i mas bihainim mi wanpela tasol. Yupela i no ken bihainim ol giaman god. – Kisim Bek 20:3
God i givim dispela Tenpela Lo long ol lain Israel taim Krais i no bin kam yet long dispela graun. Dispela Tenpela Lo i olsem as bilong olgeta lo God i givim ol lain bilong em long taim em i wokim kontrak wantaim ol long Maunten Sainai.
Krais i no bin kam long rausim tok bilong lo. Em i kam bilong inapim tru dispela lo. Long laip bilong em na long tok bilong em, Krais i bin putim ples klia laik bilong God insait long dispela lo.
Dispela Tenpela Lo i no kliaim olgeta samting long laik bilong God long laip bilong yumi. Tasol ol i putim ples klia olsem yumi i mas aninit long God, laikim em tru, na laikim ol wantok bilong yumi tu.
Namba wan lo bilong dispela Tenpela Lo i olsem as bilong olgeta samting bilong laip na bilong lotuim Bikpela. God em i God, na em i mas kisim olgeta ona na pres. Na Bikpela i save olsem yumi man, yumi save gat laik long bihainim ol giaman god na yumi les tru long lotuim God. Olsem na em i givim dispela lo long yumi olsem nambawan lo.
I gat planti samting ol man i save lotuim olsem ol giaman god: san, mun, ren, wara, graun, pawa, namba, mani, save, tingting, i go i go. Tasol bikpela samting long tingim em i dispela: God em i wanpela. Olgeta arapela samting na olgeta arapela pawa i aninit long God. Na God em i belhat taim yumi les long litimapim nem bilong em bikos yumi i givim pres na ona long narapela man o meri o narapela samting.
Planti ol arapela pawa long tude i wok long pulim yumi longwe long God: pawa bilong laikim tru mani, o lotuim graun, o tumbuna, o sampela arapela samting i wok long pait long God. Ol i wok strong long kisim ples bilong God long laip bilong yumi wan wan.
Krais i kam long dispela graun long soim klia dispela God bilong yumi, dispela God yumi i mas lotuim. Na sapos yumi lotuim God, bai yumi bihainim em tu. Laip bilong yumi bai putim ples klia sapos yumi lotuim mani, o pasin bilong amamasim skin bilong yumi, o sapos yumi i lotuim dispela Papa bilong Krais Jisas. Krais i kam long krungutim olgeta arapela pawa aninit long lek bilong em, na ol bai i kamap olsem wokboi bilong em yet. Olsem na yumi mas givim yumi yet na olgeta samting bilong yumi long mekim wok bilong dispela King bilong olgeta king na Bikpela bilong olgeta bikman.
SAMPELA TINGTING
I gat sampela giaman god i stap long laip bilong yu yet, o nogat? Askim God long helpim yu long lusim ol dispela giaman god na larim em yet i stap namba wan long laip bilong yu.
Ritim: 1 Jon 5:13-21
Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi. Olsem na yumi no save pret long God. Nogat. Yumi save go klostu long em. – 1 Jon 5:14
Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi. I no min olsem yumi bai kisim olgeta samting yumi laikim sapos laik bilong yumi i wanbel wantaim laik bilong God. Tasol, i gat dispela mining: sapos ol Kristen i bin lainim pinis pasin bilong bihainm laik bilong God long beten bilong ol, orait ol i no ken pret long prea long em. Yumi i mas wok long klia gut long laik bilong God.
Ol pikinini i save long laik bilong papamama bilong ol. Sampela taim ol pikinini bai i les long askim papamama bilong ol long sampela samting bikos ol i klia pinis olsem papamama bilong ol i no gat laik long harim dispela askim bilong ol. Dispela tok “bihainim laik bilong God yet na yumi beten,” i min olsem yumi bai askim God long kisim wanem samting God yet i gat laik long givim yumi.
Jisas i autim kain tok olsem long Jon 15:7: “Sapos yupela i pas long mi, na tok bilong mi
em i stap long yupela, orait yupela i ken askim inap long laik bilong yupela, na ol samting bai i kamap olsem yupela i bin tok.” Na dispela tok “yupela i ken askim inap long laik bilong yupela,”i no samting bilong kisim planti mani o kago samting, samting bilong kisim gutpela wok o samting bilong i stap orait. Nogat, Jisas i tok, “Sapos yupela i pas long mi, na tok bilong mi em i stap long yupela.” Sapos yumi stap olsem, ol beten bilong yumi bai bihainim laik bilong God na bai yumi i kisim wanem samting yumi i askim God long kisim. Prea em i no samting bilong kisim wanem samting yumi i laik kisim. Nogat, prea em i samting bilong kamap olsem man o meri God i laikim. Na laik bilong God long laip bilong yumi bai helpim yumi i kamap stretpela tru.
Na taim yumi lainim pinis wanem samting em i gutpela long yumi long kisim, na taim yumi stap strong na aninit long nem bilong God, kingdom bilong God, na laik bilong God, bai yumi inap long “bihainim laik bilong God yet na yumi beten na askim em long wanpela samting.” Na yumi no ken pret long mekim olsem. Taim yumi gat laik long apim nem bilong God tasol, taim yumi i hop long kingdom bilong em tasol, na taim yumi gat laik long bihainim laik bilong em tasol, bai yumi no ken pret long go long God na askim em long kisim wanem samting em i promisim long givim yumi. Ol papa long dispela graun i no save givim ol ston long ol pikinini taim ol pikinini i askim ol long kisim sampela bret. Olsem na yumi i ken save tru, Papa bilong yumi husat i stap long heven, em bai i amamas long givim ol gutpela samting long ol pikinini bilong em.
God i gat laik sapos yumi i kisim olgeta samting yumi nidim bilong mekim wok long kingdom bilong em. Olsem na yumi mas askim em long kisim wanem samting yumi nidim long mekim wok long kingdom bilong em. Dispela em i laik bilong em. Askim, na bai yu kisim!
SAMPELA TINGTING
Olsem wanem bai ol dispela tok i helpim yu long taim yu beten?
Ritim: Jon 17:9-19
Bipo yu bin salim mi na mi kam mi stap namel long ol manmeri bilong graun. Olsem tasol mi bin salim ol man yu bin givim mi bai ol i go i stap namel long ol manmeri bilong graun. – Jon 17:18
Dispela tok misin i gat dispela mining:“salim i go.”Wanpela misinari em i wanpela man o meri ol i bin salim em i go long bihainim laik bilong ol. Jisas i mekim wok misin bilong Papa bilong em. Na Jisas i salim yumi i go mekim wok bilong em long dispela graun. Olsem na yumi tu i mas mekim wok misin.
Wanpela mama i bin salim pikinini man bilong em i go long stoa long baim sampela kaikai. Mama i tokim pikinini long hariap i go na i kam bek gen. Tasol taim em i wokabaut i go long stoa, em i lukim wanpela poro bilong em na tupela i stori i stap longpela taim. Em i lus tingting long wok misin bilong em!
Na dispela pikinini i olsem tok piksa long yumi ol Kristen. Masta bilong yumi i salim yumi i go. Em i givim yumi wok misin long mekim. Tasol taim yumi i laik mekim dispela wok, i gat planti samting i wok long pasim yumi. I no olsem ol samting nogut tasol i save wok long pasim yumi. Sampela taim, sampela samting i kamap olsem nogut samting, taim em i pasim yumi long tingting long wok misin bilong yumi.
Taim yumi i klia long wok misin bilong yumi, bai yumi gat laik long autim tok bilong Jisas Krais long olgeta lain i no save long em. Tasol moa, laip bilong yumi na pasin bilong yumi bai putim ples klia olsem yumi i mekim wok misin bikos Masta bilong yumi i bin salim yumi i go.
Dispela graun em i no ples tru bilong yumi. Yumi stap long dispela rot i go long narapela ples. Yumi i no bilong dispela graun; nogat, God i salim yumi long dispela graun long inapim wok misin bilong em.
Tasol planti ol samting i wok long pulim yumi i go long narapela rot. Ol liklik samting i wok long mekim yumi i lus tingting long wok misin bilong yumi. Taim yumi tingting tumas
long mani bilong yumi o kago bilong yumi o namba bilong yumi, bai yumi i lus tingting long wok misin bilong yumi. Maski ol dispela samting i no samting bilong sin, planti taim
ol dispela samting i wok long pulim yumi longwe long God. Ating yumi no save tingting tumas long dispela de yumi bai i go lukim Masta bilong yumi na em bai i askim yumi, “Yu bin mekim wok misin olsem mi bin tokim yu long mekim, o nogat?”
I gat wanpela man tasol i bin tok, “Em i pinis!” Na dispela man em i Jisas. Em i tokaut olsem long Golgota. Bikos em i dai, yumi i kisim bel isi pinis. Bikos em i stap laip, em i tokim yumi long mekim wok misin.
SAMPELA TINGTING
Wanem ol samting i save wok long pasim yu long mekim wok misin bilong yu yet?
Ritim: Jon 8:31-36
Olsem na sapos Pikinini i mekim yupela i kamap fri, orait yupela i stap fri tru. – Jon 8:36
Planti lain i les long bilip olsem olgeta man i kisim dispela As Sin i kam long Adam tupela Iv, taim tupela i pundaun long sin long gaden Idin. Tasol, maski ol i no bilipim dispela, ol i klia olsem taim mama bilong yumi i karim yumi, yumi no stap fri tru. Man i no stap fri, na taim yumi lukluk long wanem samting i save kamap long dispela graun yumi ken klia olgeta: i olsem olgeta manmeri i stap long wanpela kalabus.
Sapos tupela kalabus man i wokabaut long rot na i stap longwe long yu, i luk olsem tupela i wokabaut na ol i stap fri. Tasol, taim tupela i kamap klostu long yu bai yu lukim dispela sen i pasim han lek bilong tupela. Na em i wankain olsem long laip bilong yumi. Taim yumi lukluk gut long laip bilong yumi, bai yumi lukim olsem i gat sampela sen i wok long pasim yumi tu.
Taim yumi prea long God na tok “Mipela i mas bihainim laik bilong yu,” i olsem yumi i askim God long brukim dispela sen i wok long pasim yumi. Hau bai yumi ran, taim lek bilong yumi i pas long wanpela sen? Yumi no inap bihainim rot God i makim bilong yumi, sapos i gat sampela pawa i wok long pasim yumi.
Na, em tru, Krais i bin mekim yumi i kamap fri long kalabus bilong sin na yumi inap bihainim laik bilong Papa bilong yumi. Tasol dispela wok bilong mekim yumi i kamap fri i wok long go yet. I no pinis yet. I gat sampela bilong dispela sen i strong tru na lait bilong Krais i mas wok strong long kam insait long laip bilong yumi long brukim ol dispela sen isi isi. Sampela taim i gat sampela samting long dispela graun i wok long pulim yumi longwe long Krais, na i wok long pasim yumi long stap olsem gutpela wokman bilong God.
Olsem na yumi mas prea long Pikinini bilong God i ken mekim yumi i kamap fri, na bai laik bilong God i kamap namba wan samting long laip bilong yumi. Taim yumi inap bihainim laik bilong God long bel bilong yumi tru tru, long dispela taim tasol yumi i stap fri. Tasol planti taim ol arapela laik i wok long pasim laik bilong God long laip bilong yumi. Tru, yumi wok long bihainim laik bilong God, tasol, i gat sampela samting i wok long pasim yumi yet.
Tasol, sapos yumi stap fri long bihainim laik bilong God, bai yumi i amamas tru. Yumi bai laikim tru God na ol arapela, na i no gat wanpela samting bai inap pasim yumi. Bai yumi givim bel na tingting na spirit na bodi bilong yumi olgeta long God. Na bihain bai yumi i stap fri olgeta na bihainim laik bilong God long olgeta stretpela pasin tru tasol.
SAMPELA TINGTING
I gat sampela ‘sen’ long laip bilong yu i wok long pasim yu long stap fri na bihainim laik bilong God?
Ritim: Efesus 5:15-33
Yupela i no ken mekim ol kranki pasin. Nogat. Yupela i mas save gut long laik bilong Bikpela...Yupela meri, yupela i mas aninit long ol man bilong yupela...Yupela man, yupela i mas laikim tumas ol meri bilong yupela...Yupela pikinini, yupela i mas bihainim tok bilong papamama bilong yupela... – Efesus 5:17,22,25; 6:1
Olgeta Kristen i mas wok long painimaut laik bilong Bikpela long laip bilong ol. Yumi i no ken pasim ol lain i wok long bihainim laik bilong God long laip bilong ol. Sampela taim God bai askim yumi long mekim sampela samting i narakain o long karim bikpela hevi long bihainim laik bilong em. Na sapos God i askim yumi long mekim olsem, yumi ken amamas long bihaihim laik bilong em. Yumi mekim gutpela samting olgeta taim yumi i redi long bihainim Jisas. Yumi no inap bagarap sapos yumi i bihainim laik bilong Papa bilong yumi long heven.
Na em i tru olsem yumi mas redi long bihainim God taim em i askim yumi long karim bikpela hevi. Tasol yumi mas bihainim laik bilong em long olgeta de long olgeta hap long laip bilong yumi tu. Yumi mas bihainim em long ol bikpela samting na ol liklik samting wantaim.
God i tokim yumi long bihainim em olgeta taim. Ol man i mas laikim tru meri bilong ol, olsem God i laikim ol long mekim. Ol meri i mas laikim tru man bilong ol na aninit long ol, olsem God i laikim. Ol pikinini i mas bihainim papamama bilong ol olsem God i laikim. Ol wokman i mas mekim wok bilong ol olsem ol i mekim dispela wok long God. Ol bosman i mas bihainim laik bilong Masta bilong ol long heven.
I gat wanpela yangpela man i painim hat tru long kisim save long laik bilong God. Bai em i mas i go long mekim wok misin long narapela kantri, o nogat? Na taim em i prea i stap long askim God long putim ples klia laik bilong em, mama bilong em i askim em long kam helpim em. Bihain liklik, mama bilong em i askim em gen long kam helpim em. Tasol dispela yangpela man i no bihainim laik bilong mama bilong em. Dispela yangpela man i no save olsem maus bilong mama bilong em, em i maus bilong God yet. Em i laik bilong God long em i mas bihainim tok bilong mama bilong em.
Bikpela i laik skulim yumi long pasin bilong bihainim em long olgeta liklik samting long laip bilong yumi tu. Yumi mas bihainim laik bilong God long haus bilong yumi, long haus kuk bilong yumi, long sios bilong yumi, long bet bilong yumi, long wok bilong yumi na long taim yumi
i malolo i stap. Sapos yumi no bihainim laik bilong God long ol liklik samting long laip bilong yumi, hau bai yumi i redi long bihainim em long ol bikpela samting, sapos God i askim yumi long mekim olsem?
I gat planti ol Kristen i no redi long bihainim God long ol bikpela samting bikos ol i no save bihainim em long marit bilong ol, o long wok bilong ol. Taim yumi yangpela, yumi mas redi long harim tok bilong God long ol liklik samting. Sapos nogat, bai yumi no inap long harim God taim em i tokim yumi long bihainim laik bilong em long ol bikpela samting long dispela graun tu.
SAMPELA TINGTING
God i save skulim yu long bihainim em long ol liklik samting tu?
Ritim: Matyu 19:16-22
Na Jisas i tokim em olsem, “Sapos yu laik kamap stretpela olgeta, orait yu go salim olgeta samting bilong yu na dispela mani yu kisim yu mas givim long ol rabisman. Yu mekim olsem, na bai yu gat ol gutpela samting tru long heven. Na yu kam bihainim mi.” – Matyu 19:21
Sapos yu bin stap wanpela Kristen longpela taim pinis, ating yu bin harim dispela stori bipo, a? Ol maniman i save pilim olsem dispela stori i hat tru long harim. Long putim ples klia olsem em i laikim tru Jisas, dispela yangpela man i gat wanpela rot long bihainim tasol – em i mas lusim olgeta samting bilong dispela graun na bihainim em.
Taim ol tisa o pasto i wok long kliaim mining bilong dispela stori planti bai tok olsem, “I no min olsem yu mas lusim olgeta samting long bihainim Jisas. Bel bilong yu tasol i mas redi long lusim olgeta samting long bihainim em.” Na ol manmeri i save amamas long harim dispela bikos ol i ting olsem ol i ken bungim planti mani na kago long dispela graun na bihainim Jisas wantaim. Tasol dispela tok i giamanim yumi.
Planti ol pasto bai tokim yumi olsem yumi inap bihainim Jisas, na wokabaut klostu wankain olsem ol arapela manmeri long dispela graun. Tasol gutnius bilong God i narapela kain tok olgeta. Nogat wanpela i ken tok olsem God i no askim yumi long mekim bikpela samting long bihainim em. Na nogut wanpela i no klia long dispela bikpela samting God yet bai i givim yumi.
I gat narapela stori i kam bihain long dispela stori. Long bekim askim bilong Pita, Jisas i stori long pasin bilong God long givim planti samting long yumi: “Na olgeta manmeri i bin ting long nem bilong mi na i lusim haus o brata o susa o papa o mama o pikinini o gaden, bai ol i kisim 100 moa, na bai ol i kisim laip i stap gut oltaim oltaim” (lain 29).
Yumi mas harim tok bilong Krais. Yumi i ken bilipim em. Yumi mas mekim olsem em i tokim yumi long mekim, na bilipim olgeta promis bilong em tu. Jisas em i givim narapela kain tok olgeta long yumi.
SAMPELA TINGTING
Yu i redi long harim na bihainim dispela narapela kain tok bilong Jisas?
Ritim: Matyu 22:34-40
Na Jisas i tokim em olsem, “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.” Dispela lo em i bikpela, na em i namba wan tru. Na namba 2 lo em i wankain olsem dispela. Em i olsem, “Yu mas laikim ol wantok olsem yu laikim yu yet.” – Matyu 22:37-39
Planti taim, ol lain i tok olsem dispela namba wan lo bilong God em i wok long sotim dispela Tenpela Lo bilong God. Nogut dispela i paulim yumi. Em i sotim lo bilong God, em tru. Tasol dispela namba wan lo bilong God i bikpela moa long dispela Tenpela Lo bilong God bikos dispela namba wan lo i autim olgeta samting yumi manmeri i mas mekim.
God i tokim yumi long laikim em antap long olgeta arapela samting, na laikim ol wantok olsem yumi laikim yumi yet. Sapos long tumora olgeta manmeri bilong dispela graun i wok long laikim tru God antap long olgeta arapela samting na laikim ol wantok olsem ol i laikim ol yet, orait em bai min olsem nupela graun i kam pinis; em bai min olsem kingdom bilong God i kam pinis long dispela graun.
Yumi mas laikim God long save, long laik, na long bel bilong yumi. Yumi mas laikim em olgeta long spirit na bodi bilong yumi. Dispela em i gat wanem mining? Em i hat tru long save. Tasol, sapos yumi ritim ol stori bilong Buk Baibel long olgeta arapela man i bilip long God, dispela em bai i helpim yumi. Na yumi mas ritim olgeta stori bilong Jisas bikos em bai skulim yumi gut tru long pasin bilong laikim tru God.
God i tokim yumi long laikim ol wantok bilong yumi olsem yumi laikim yumi yet. I min olsem yumi mas tingting long, na sori long, olgeta manmeri yumi i lukim long hap bilong yumi, wankain olsem yumi i tingting na sori long yumi yet.
Dispela tupela lo i wanbel na i save wok wantaim. Namba 2 lo i “wankain olsem” namba wan lo. I min olsem, sapos yumi laikim tru God, orait bai yumi laikim tru ol wantok bilong yumi tu. Na sapos yumi les long laikim tru ol wantok bilong yumi, orait ating yumi no laikim God tu, a?
God i tokim yumi long bihainim pasin bilong laikim tru. Em i no tokim yumi long mekim ol dispela samting tasol: “Go long sios; mekim gut wok bilong yu; no ken giaman; mekim ol gutpela pasin tasol.” Nogat, em i tokim yumi long laikim tru. Em i hat tru long laikim tru God na ol arapela. Yumi inap wok strong long bihainim ol gutpela pasin; tasol, em i hat wok tru long bihainim strong pasin bilong laikim tru. Yumi inap long laikim tru God na ol arapela – taim Spirit bilong Jisas i wok long bosim laip bilong yumi olgeta.
SAMPELA TINGTING
Askim Spirit bilong Jisas long bosim laip bilong yu na helpim yu long laikim tru God na ol wantok bilong yu tu.
Ritim: Rom 12:1-2
Olsem na bai yupela inap long save tru long laik bilong God. Bai yupela i save long ol pasin i gutpela na long ol pasin God i laikim tumas na long ol pasin inap tru na i stret olgeta. – Rom 12:2
Taim yumi prea “Mipela i mas bihainim laik bilong yu,” yumi askim God long larim olgeta lain long dispela graun i ken bihainim laik bilong em olsem ol i bihainim long heven. Em i olsem: yumi olgeta, olsem pikinini bilong em, i mas bihainim olgeta laik bilong Papa bilong yumi.
Hau bai yumi klia long wanem samting yumi mas mekim? Hau bai yumi klia long laik bilong God long laip bilong yumi?
Dispela tupela askim em i ol bikpela askim bilong ol Kristen, na i hat tru long bekim. Yumi olgeta i klia long sampela samting long laik bilong God. Tasol hau bai yumi klia long laik bilong God long pasin bilong lotu, long wok bilong yumi, na long olgeta liklik hap long laip bilong yumi?
I gat tupela rot ol Kristen i save bihainim long bekim ol dispela askim. I gat sampela Kristen bai i larim ol pasto na hetman i wok long autim laik bilong God long ol. Na i gat sampela Kristen ol i ting olsem God yet i autim laik bilong em long bel bilong ol, na i no gat wanpela i ken agensim dispela tok God i givim ol.
Tasol yumi stap long dispela Nupela Kontrak. Yumi no olsem ol liklik pikinini bilong bilip nau. Em i olsem yumi i bikpela manmeri bilong bilip. God i givim Buk Baibel long yumi, na em
i askim yumi long yusim save bilong yumi long painimaut laik bilong em long laip bilong yumi. “Bai yumi inap long save tru long laik bilong God.”
Yumi no ken tok, “Em i hat tru long save gut long laik bilong God,” na em tasol. Planti manmeri i save mekim olsem.
Yes, em i hat tru! Tasol yumi inap! God i mekim tingting bilong yumi i kamap nupela. Na yumi mas soim olsem yumi i kamap nupela long laip na pasin bilong yumi. Yumi no ken wokabaut wankain olsem ol man bilong dispela graun. Nogat. Yumi i mas bihainim laik bilong God.
God em i Papa bilong yumi, olsem na yumi ken save long em, na klia long laik bilong em.
SAMPELA TINGTING
Yu save wok strong long save gut long laik bilong God, o nogat?
Ritim: 2 Samuel 12:13-23
Orait Devit i tok, “Mi krai na mi tambu long kaikai taim pikinini i no dai yet, long wanem, mi ting bai Bikpela inap marimari long mi na i no ken larim pikinini i dai.” – 2 Samuel 12:22
Dispela prea, “Mipela i mas bihainim laik bilong yu,” em i prea bilong bihainim laik bilong God. I no samting bilong askim God long helpim yumi i bilip olsem olgeta samting i kamap long dispela graun i kam long han bilong em. Na em i tru, God yet inapim laik bilong em long dispela graun olgeta taim, na i no gat wanpela samting i abrusim plen bilong God. Tasol dispela prea i samting bilong yumi i mas mekim – yumi mas bihainim laik bilong God.
Tasol, em i tru, yumi mas daunim yumi yet na aninit long laik bilong God – yumi mas redi long bihainim laik na plen bilong God. Tasol yumi ken prea long God long em i ken harim tok bilong yumi.
Tingim dispela tok bilong King Devit. God em i tok olsem, pikinini bilong em bai i dai. Tasol taim dispela bebi i stap laip yet, maski em i sik nogut tru, Devit i prea i stap. Inap long 7-pela de na 7-pela nait, em i prea strong long God i ken senisim tingting bilong en.
I no olsem laik bilong God i stap long ples hait. Na yumi no ken tok, “Maski. Wanem samting bai kamap, em bai i kamap tasol.”Nogat. God em i tokim yumi long prea strong long em. I no olsem yumi ken sindaun nating na wetim wanem samting bai i kamap.
Na yumi mas lukaut. Nogut yumi wok long pasim narapela long bihainim laik bilong God, na nogut yumi kotim narapela long wok em i laik mekim long bihainim laik bilong God. Yumi no ken pasim ol. Ol pren bilong Job, ol pren bilong Jisas, na ol pren bilong Pol, ol i paul long laik bilong God, na ol i laik pasim ol long bihainim laik bilong God.
Na yumi no klia long tingting bilong God. Sampela taim yumi bai askim em long rausim hevi long yumi, na em bai mekim olsem. Tasol sampela arapela taim em bai helpim yumi long daunim yumi yet na aninit long laik bilong em, maski em i givim bikpela hevi long yumi long karim.
Taim pikinini man bilong Devit i dai pinis, orait Devit em i kirap. Em i klia olsem dispela em
i laik bilong God – pikinini bilong em i dai pinis. Devit i klia olgeta olsem dispela em i laik bilong God. Na em i aninit long God na bilipim em. Na God em i Papa bilong yumi tu – orait ating yumi ken aninit long em na bilipim em tu, a?
SAMPELA TINGTING
Prea bilong yu i gat bikpela pawa, a? Yu bin lukim dispela pawa bilong prea long laip bilong yu yet?
Ritim: Aposel 21:7-14
Mipela i lukim olsem Pol i strong long i go, olsem na mipela i no traim moa long senisim tingting bilong en. Mipela i tok, “Samting Bikpela i laik bai i kamap, em i ken kamap.” – Apo- sel 21:14
Aposel Pol i wokabaut i go long Jerusalem. Em i save olsem em bai i bungim planti hevi long hap, tasol em i no klia olgeta long wanem samting God bai i mekim kamap long laip bilong em. “Orait harim. Nau Holi Spirit tasol i mekim na mi mas i go long Jerusalem. Wanem samting bai i kamap long mi long Jerusalem, em mi no save. Dispela tasol mi save. Long olgeta ples mi go long en, Holi Spirit i save autim tok long mi olsem, kalabus na planti hevi i wetim mi” (Aposel 20:22-23).
Ol poroman bilong Pol i wok hat tru long senisim tingting bilong em. Tasol ol i no inap. Em i strong long i go. Em i gat laik long go long Jerusalem bikos em i save olsem dispela em i laik bilong God.
Na ol pren bilong em i tok, “Samting Bikpela i laik bai i kamap, em i ken kamap.” I luk olsem taim Pol i strong moa yet long bihainim laik bilong God, ol pren bilong em i tok, “Maski, larim em i go.”
Tasol Pol i redi olgeta long bihainim laik bilong God. Spirit bilong God i autim tok long em, na strongim em. Na dispela i ken kirapim tingting bilong yumi i go long Masta bilong Pol, Jisas Krais. Ol pren bilong Jisas tu i laik pasim em long go long Jerusalem. Jisas tu em i save long wanem samting bai i kamap long em: “... na ol bai i givim Pikinini bilong Man long han bilong ol bikpris na ol saveman bilong lo. Na bai ol i mekim kot long em na pasim tok long kilim em i dai. Na bai ol i givim em long ol man bilong ol arapela lain. Na ol dispela man bai i tok bilas long em na spetim em na wipim em na kilim em i dai” (Mak 10:33-34). Na dispela wanpela Spirit i tokim Pol, i bin tokim Jisas tu long em i mas i go long Jerusalem. Maski ol pren i tambuim em long go, Jisas, “i pasim tingting strong long em i mas i go long Jerusalem” (Luk 9:52).
Pol i bihainim lek mak bilong Jisas. Em i lainim pasin bilong bihainim laik bilong God long tisa bilong em. Wankain olsem Jisas, Pol i mas redi long daunim laik bilong em yet na aninit long gutpela na stretpela laik bilong God.
Taim ol man o meri i wok long bihainim laik bilong God, ol pren bilong i no ken wok long pasim ol o tambuim ol. Taim yumi klia olsem em i samting bilong bihainim laik bilong God, orait em i taim long prea, “Mipela i mas bihainim laik bilong yu.”
SAMPELA TINGTING
Taim yu prea, “Mipela i mas bihainim laik bilong yu,” yu redi olgeta long bihainim laik bilong God?
Ritim: Matyu 26:36-46
“Papa bilong mi, sapos dispela kap i no inap abrusim mi, na mi mas dringim, orait yu ken bihainim laik bilong yu tasol.” – Matyu 26:42
Long Getsemani bel bilong Jisas i hevi, na em i pilim nogut tru bikos em i hat wok stret long bihainim laik bilong Papa bilong em. Em i karim bikpela pen tru long dispela. Tasol taim em i lusim dispela gaden Getsemani, em i redi olgeta long bihainim laik bilong God long laip bilong em. Em i redi long bihainim laik bilong God, maski em i mas dringim dispela kap God i givim em long dringim.
Long dispela pasin bilong Jisas yumi ken klia olsem em i bikpela samting long prea, “Mipela i mas bihainim laik bilong yu long graun olsem ol i save bihainim long heven.”Yumi no ken autim dispela tok nating. Yumi mas redi long bihainim olgeta laik bilong God, na em i no isi samting long prea olsem, “God, sapos yu no gat laik long bihainim laik bilong mi, orait maski, bihainim laik bilong yu yet.”
Taim yumi lukluk long Getsemani, yumi lainim sampela arapela samting tu. Taim yumi prea “Mipela i mas bihainim laik bilong yu,” yumi mas wanbel olgeta wantaim laik bilong God. Na yumi mas redi long bihainim laik bilong God maski wanem samting i kamap long laip bilong yumi.
“Mipela i mas bihainim laik bilong yu,” em i prea bilong bihainim laik bilong God olgeta taim. Sampela bai tok ‘yes’ long bihainim laik bilong God, tasol bel bilong ol i les. Sampela arapela bai bikmaus na tok nogat long bihainim laik bilong God. Tasol pasin bilong bihainim laik bilong God em i samting bilong redi olgeta long wanbel na bihainim laik bilong God, maski em i no laik bilong yumi.
Yumi mas klia gut long wanem samting yumi beten taim yumi i tok, “Mipela i mas bihainim laik bilong yu.” Planti manmeri bai autim dispela tok nating. Tasol Krais em i bel hevi nogut tru, na em i krai nogut tru taim em i autim dispela prea. Olgeta lain i laik autim dispela prea, ol i mas i stap pinis wantaim God long dispela bikpela pait i stap long dispela graun. Dispela man o meri i wanbel wantaim olgeta arapela lain bilong God, em i mas redi long givim olgeta samting bilong em na em yet tu long mekim wok bilong God. Taim yumi prea “Mipela i mas bihainim laik bilong yu,”i olsem yumi karim diwai kros bilong Bikpela .
Elaija i mekim olsem, na em i tait nogut tru na em i krai bikos em wanpela i stap long mekim wok. Na Jeremaia i karim dispela diwai kros tu, na em i hevi tru na em i givim pen long em. Na Jisas tu i pilim dispela hevi bilong bihainim laik bilong Bikpela, na klostu em i pundaun long dispela gaden Getsemani.
Sapos em i no hat tru long bihainim laik bilong God long laip bilong yumi, na yumi no save karim pen o hevi long dispela rot, orait, olsem wanem? Nogut em i no dispela diwai kros bilong Bikpela yumi wok long karim.
SAMPELA TINGTING
Yu save karim ol hevi na pen long bihaihim laik bilong God?
Ritim: Rom 5:12-21
Wanpela man i bin sakim tok, na long dispela pasin bilong em ol manmeri i kamap man- meri bilong mekim sin. Olsem tasol, wanpela man i bihainim tok, na long dispela pasin bilong em ol arapela manmeri bai i kamap stretpela manmeri. – Rom 5:19
Wanpela man i bin sakim tok bilong God na long dispela pasin yumi pundaun long sin; wanpela man i bihainim tok bilong God na long dispela pasin yumi wanbel wantaim God gen. Adam na Krais i stap olsem pesman bilong yumi man bilong dispela graun. Olsem tasol taim Adam i sakim tok, yumi pundaun long sin na kamap manmeri bilong mekim sin. Na tu, taim Krais i dai, ol lain bilong em i kamap stretpela manmeri.
Wok na ol pasin bilong yumi wan wan i no save senisim planti samting long dispela graun. Tasol sapos wanpela hetman bilong kantri i mekim sampela samting long wok bilong em, planti taim dispela samting bai senisim planti samting. Maski dispela hetman em i man tasol, bikos em i pesman bilong ol lain bilong kantri bilong em, pasin na wok bilong em bai senisim laip bilong planti arapela manmeri.
Na Adam i stap olsem papa bilong olgeta manmeri bilong dispela graun. Olsem na, taim papa Adam i sakim tok bilong God, dispela samting i senisim laip bilong olgeta lain bilong dispela graun. I no pikinini bilong em tasol i kisim dispela sin bilong em; olgeta lain long dispela graun i kamap manmeri bilong mekim ol pasin nogut. Na dispela samting i kamap bikos Adam i olsem papa, olsem pesman, bilong yumi olgeta.
Na Krais i kamap bihain long Adam, olsem namba tu Adam. Na em i kam olsem pesman bilong yumi tu, na pasin bilong em i mekim bikpela samting i kamap long ol lain bilong dispela graun. Taim em i dai, yumi i dai; taim em i kirap bek, yumi tu i kirap bek; na long pasin bilong em bilong bihainim laik bilong God, yumi i kamap stretplela manmeri.
Yumi mas klia long Krais i kisim bek yumi long pasin bilong bihainim laik bilong God. Dispela pait long Jisas na Satan wantaim i no samting bilong painimaut husat i winim narapela long strong. Nogat, em i wanpela pait bilong Krais bilong bihainim laik bilong God. Krais bai i bihainim God olgeta taim, o nogat?
Krais em i kisim hevi na em i dai long sin bilong yumi. Tasol em i mekim planti moa samting long yumi tu. Long ol hevi na dai em i wanpela hap tasol long pasin bilong em long bihainim tru olgeta tok na laik bilong God. Em i givim em yet long God, na em i bihainim laik bilong God long olgeta tingting, toktok na pasin bilong em tu. Tude i gat tupela kain man i stap: wanpela kain man i sakim tok bilong God olsem ol lain bilong Adam, na ol lain bilong Krais i kisim pasin bilong em bilong bihainim tok bilong God.
SAMPELA TINGTING
Krais em i bihainim tok bilong God long olgeta tingting, toktok na pasin bilong em, bilong kisim bek yu. Tok tenkyu long em!
Ritim: Malakai 1:6-12
Bikpela I Gat Olgeta Strong i tokim ol pris olsem, “Pikinini i save aninit long papa bilong en, na wokman tu i save bihainim tok bilong bosman bilong en. Olsem na yupela harim. Mi papa bilong yupela. Bilong wanem yupela i no save aninit long mi? Mi bos bilong yupela. Olsem wanem na yupela i no save bihainim tok bilong mi?” – Malakai 1:6
Dispela tok Papa em i bikpela tok stret. Ol lain Juda i save kolim ol tisa bilong ol Papa. Na sampela ol sios save kolim hetman bilong ol Papa tu. Papa i min olsem ol i mas givim biknem (respektim) long dispela man. Papa em i man bilong respektim na harim.
Tasol i luk olsem dispela pasin i senis nau. Planti taim ol papa long tude i no save stap olsem gutpela papa long pikinini bilong ol. Na tu, planti ol pikinini i no save respektim papa bilong ol; ol bai bikhet long papa bilong ol tasol. Na long planti ol muvi, ol i save lap tasol long ol papa.
Na planti ol papa i bin ranawe na lusim ol pikinini bilong ol. Ol i no stap olsem gutpela papa; ol i les long lukautim pikinini bilong ol. Tude dispela namba bilong ol papa nogut na bikhet pikinini wantaim i wok long kamap bikpela moa yet.
Na bikos planti ol pikinini i no save respektim papa bilong ol, na bikos planti ol papa i no save bosim gut pikinini bilong ol, nogut dispela i senisim tingting bilong yumi long Papa bilong yumi long heven. Bikos God em i Papa bilong yumi, i min olsem em i laikim yumi tru. Na moa, bikos em i Papa bilong yumi, yumi mas respektim em na lotuim em.
God em i gat planti ol nem long Buk Baibel. Na olgeta nem bilong em i putim ples klia olsem God em i husat. Na nambawan nem bilong em, em i Papa. Pikinini bilong em, Jisas Krais, i bin kamapim dispela nem ples klia! Sapos yumi i stap lain bilong Pikinini bilong God, orait yumi ken kolim God Papa bilong yumi tu. Dispela nem i putim ples klia olsem em i laikim yumi tru. Na moa, dispela nem i soim olsem yumi mas stap aninit long em, respektim em, onaim em, na lotuim em.
God, olsem Papa bilong yumi, i no save senis. Laikim tru bilong em i no inap pinis, na em i stap antap tru long yumi. Taim yumi i lukluk long ol papa bilong dispela graun, nogut yumi i paul long pasin bilong Papa bilong yumi long heven. Olgeta papa long dispela graun i mas lukluk long pasin bilong Papa God long kisim save long pasin bilong ol gutpela papa.
God em i gat laik sapos ol pikinini bilong em i laikim em tru na respektim em na bihainim laik bilong em. Sapos yumi tok olsem God em i Papa bilong yumi, tasol yumi les long bihainim laik bilong em, i olsem yumi i kolim nating nem bilong em.
SAMPELA TINGTING
Taim yu prea long Papa bilong yu long heven, dispela nem i gat wanem mining insait long laip bilong yu?
Ritim: Stat 39:1-10
Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God. – Stat 39:9
I gat planti samting i wankain long Josep tupela Jisas. Tupela wankain i bin lusim haus bilong papa bilong ol; tupela wankain i daunim ol yet na bihainim laik bilong God; tupela wankain i kisim biknem antap tru long sia king; na tupela wankain i kisim bek sampela arapela manmeri.
Dispela i putim ples klia olsem planti samting long Olpela Testamen i lukluk i go long Nupela Testamen. Planti samting long Olpela Testamen i lukluk i go long Jisas. Tasol dispela Nupela Testamen i no autim nem bilong Josep, olsem na nogut yumi mekim planti tok tumas long Josep i wankain long Jisas.
Josep em i no laik mekim sin wantaim meri bilong Potifar. Planti lain long tude bai ting olsem Josep em i longlong pinis. Bilong wanem em i no laik slip wantaim meri bilong Potifar? Planti lain i laik bihainim pasin bilong bodi, na ol i ting olsem pasin pamuk em i samting long pilai nating.
Sapos yumi no bilip olsem Bikpela em i hat tru long save long pasin bilong Josep. Tasol Josep em i klia: “Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God.” Ol lain long dispela graun i save paul bikos ol i no klia gut long God bilong Josep.
Planti bilong yumi bai redi long mekim sin sapos i no gat wanpela long dispela graun inap lukim yumi i mekim dispela sin. Na tu i gat planti ol sin yumi no save mekim bikos Satan i no grisim yumi long mekim dispela sin. Tasol, sapos em i grisim yumi, ating yumi bai pundaun hariap long dispela sin tu, a? Yumi mas save olsem yumi gat bikpela laik long mekim sin, olsem na yumi no ken daunim ol arapela lain i pundaun long sin.
Na taim Josep i bihainim laik bilong God, em i bungim bikpela hevi stret. Ating planti lain long dispela graun bai i lap long dispela – em i abrusim sin, tasol em i bungim hevi! Watpo na em i bihainim laik bilong Bikpela? Ol i kalabusim em!
Tasol yumi no ken paul. Taim yumi bihainim laik bilong God, planti taim yumi bai bungim ol hevi. Tasol yumi no ken wari. Taim yumi bungim dispela kain hevi, yumi mas klia – yumi stap long dispela gutpela rot bilong bihainim Bikpela, em dispela rot Jisas tu i bin bihainim.
SAMPELA TINGTING
Yu yet yu inap long autim dispela tok: “Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God”?
Ritim: Matyu 12:22-29, 43-45
Olsem na em bai i go kisim 7-pela arapela spirit ol i winim em long mekim pasin nogut. Na ol bai i go insait na stap long dispela haus. Pastaim dispela man i stap nogut, tasol nau em bai i stap nogut moa yet. Wankain pasin tasol bai i kamap long ol manmeri nogut bilong dispela taim. – Matyu 12:45
Jisas em i soim klia olsem em i wok bilong em long bagarapim dispela birua bilong em, Satan. Na nau em i autim wanpela tok piksa long ol. Spirit nogut i lusim wanpela man pinis. Tasol dispela spirit i save go nabaut long ples drai bilong painim wanpela hap em i ken malolo long en. Tasol em i no lukim wanpela gutpela hap, na em i go kisim 7-pela arapela spirit ol i winim em long mekim pasin nogut. Na ol i go insait na stap long dispela haus. “Pastaim dispela man i stap nogut, tasol nau em bai i stap nogut moa yet. Wankain pasin tasol bai i kamap long ol manmeri nogut bilong dispela taim,” Krais i tok.
Na tude ol dispela kain samting i wok long kamap long planti ol kantri. Longpela taim ol spirit nogut i wok long holim ol dispela kantri. Na ol spirit nogut i bin lusim sampela bilong ol dispela kantri. Tasol, taim ol i kamap fri long dispela ol spirit nogut, planti taim ol gutpela spirit i no kam na stap long ol dispela kantri. Na sapos ol gutpela spirit i no kam pulapim dispela kantri, olsem Spirit bilong God, orait planti moa spirit nogut bai i kam na pulapim dispela kantri. Na pastaim dispela kantri i stap nogut, tasol nau em bai i stap nogut moa yet.
Na dispela samting inap long kamap long ol man tu. Kain kain samting i ken wok long bosim ol man, tasol ol dispela man i no inap stap olsem wanpela haus i nogat samting i stap long en. Olgeta man i gat sampela samting i wok long bosim ol.
Krais i no kam bilong brukim na bagarapim pawa bilong Satan tasol; em i kam bilong strongim kingdom bilong God. Em i kam long kisim bek yumi long pawa bilong sin na putim yumi aninit long dispela gutpela Masta, Jisas Krais.
Sapos yumi gat laik long klinim haus bilong yumi – na planti ol man i gat laik long lusim sampela samting nogut long laip bilong ol – tasol yumi les long larim Krais i kam bosim yumi, orait yumi bai i stap nogut moa yet.
Yumi no ken klinim haus bilong yumi na larim em i stap emti. Nogat tru! Yumi i no gat strong long holim ol samting nogut i stap ausait. Yumi no inap long stap longwe long Satan sapos yumi les long stap long han bilong Bikpela. Taim yumi i wok long bihainim Bikpela, haus bilong yumi bai pulap wantaim strong bilong em, na bai yumi inap long daunim pawa bilong Satan.
SAMPELA TINGTING
Yu save larim Bikpela i bosim olgeta hap long laip bilong yu, o nogat?
Ritim: Jona 3
Tasol i gat wanpela man i stap namel long yupela, em i winim tru Jona. – Matyu 12:41
Sampela taim, Bikpela bai strong moa yet long tokim ol profet bilong em long bihainim laik bilong em. Jona i sakim tok bilong God. God em i tokim em long go long hap san i kamap, tasol em i go long hap san i go daun. God i tokim em long go long Nineve long autim tok bilong em, tasol em i les na em i kalap long wanpela sip na em i go daun insait long haus bilong sip na i slip i stap.
Jona em i sakim tok bilong God, tasol solwara na win i bihainim laik bilong God. Na ol pis tu em i bihainim laik bilong God. Na bihain, Jona tu i bihainim tok bilong God, maski em i no amamas long mekim olsem. Na em i autim tok bilong God long Nineve.
I luk olsem laik bilong God bai i lus long dispela taim. Na taim pis i kam daunim Jona, i luk olsem Jona bai i dai na em bai i no inap long bihainim laik bilong God. Tasol God i gat laik long Jona i stap laip na i go long Nineve bilong autim tok bilong em, olsem ol lain bilong Nineve i ken tanim bel na harim tok bilong en tu.
Na tu, i luk olsem wok bilong Jisas i no inap kamap orait tu. God i salim em long bihainim laik bilong God long dispela graun. Tasol em i dai na ol i planim em. I luk olsem em i dai, na em bai i no inap long bihainim laik bilong God na autim tok bilong em. Tasol em i kirap bek long matmat, na gutnius bilong em i wok long go aut long planti hap long dispela graun, na planti lain manmeri i tanim bel na harim tok bilong en tu.
God em i gat laik long kisim bek dispela siti Nineve. Olsem na, em i strong moa yet long Jona i mas bihainim tok bilong em. Em i gat laik long kisim bek ol lain long Nineve, na dispela em i olsem as bilong laik bilong em. God em i strong moa yet long Jona i mas bihainim laik bilong em bikos em i sori tru long ol lain long Nineve.
Jisas em i winim Jona. Jisas em i dai bikos em i bihainim laik bilong Papa bilong em, na em
i kirap bek bilong kisim planti lain manmeri i kam bihainim laik bilong Bikpela long bilip. Jisas em i winim Jona bikos long bel bilong em i gat bikpela laik long bihainim laik bilong God long kisim bek planti manmeri. Em i redi long dai long bihainim laik bilong God. Na bel bilong Jisas i sori tu long ol lain i no save long Bikpela. Tasol Jona em i bin les long ol lain bilong Nineve.
God em i strong long yumi i mas bihainim laik bilong em, na em i gat laik olsem olgeta lain i mas tanim bel na bihainim em. Olsem na em i gat laik long yumi olgeta i redi na amamas long mekim wok bilong em bilong kisim planti manmeri i kam bihainim em.
SAMPELA TINGTING
Dispela stori bilong Jona i soim yu wanem samting long pasin bilong God? Na yumi mas i gat wanem kain tingting long ol lain i no save long Bikpela?
Ritim: Daniel 3:8-18
Mipela i save lotu long God tru. Sapos yu mekim long mipela olsem yu tok, orait God bilong mipela em inap long helpim mipela... Tasol sapos em i no helpim mipela, maski, mipela i no inap lotu long ol god bilong yu, na tu mipela i no inap brukim skru long dispela piksa gol yu bin sanapim. – Daniel 3:17-18
Taim yumi prea “Mipela i mas bihainim laik bilong yu,” yumi prea long bihainim laik bilong God long graun olsem ol i save bihainim long heven.
Dispela tripela man i stap long ples stret ol i kolim Dura, ol i bihainim laik bilong God. Ol i save long God na laik bilong em tu. Ol i save olsem God i gat pawa bilong kisim bek ol long dispela paia. Tasol ol i no klia sapos dispela em i laik bilong God o nogat. Nogut em i laik bilong God long larim ol i kuk long paia. “Tasol sapos em i no helpim mipela, maski, mipela i no inap lotu long ol god bilong yu, na tu mipela i no inap brukim skru long dispela piksa gol yu bin sanapim.”
God em i save olsem yumi man i save gat laik long bihainim pasin bilong ol arapela tasol. Sapos olgeta arapela man i brukim skru taim ol i harim musik, em bai i hat tru long putim bilip bilong yu i go long God na sanap tasol, maski ol arapela man i brukim skru. Planti ol yangpela i les tru long stap narakain long ol poro bilong ol. Na ol bikpela man i save pilim olsem em i hat tru long mekim narapela kain pasin long ol arapela man. Yumi no klia long wanem samting bai kamap long yumi sapos yumi bai bihainim laik bilong God.
Dispela tripela man i tok olsem ol bai i bihainim laik bilong Bikpela, maski God i kisim bek ol long dispela paia o nogat.
Pasin bilong bihainim laik bilong God em i nambawan samting. Yumi i no ken bihainim God bikos yumi i gat laik long kisim ol gutpela samting tasol. Pastaim yumi i mas bihainim em. Na yumi i mas trustim em tu.
Wanpela yangpela Kristen i bin stori long taim em i stap long wanpela kalabus nogut long taim bilong bikpela pait. Wanpela lapun man, em i wanpela Kristen, em i bin helpim em planti (na dispela man em i dai long dispela kalabus nogut). Wanpela de dispela yangpela man i bin askim dispela lapun man, “Yu ting dispela pait bai stap longpela taim yet, o em bai pinis hariap?” Dispela lapun man i bin bekim tok olsem: “Yumi no save hamas taim dispela pait bai stap yet, tasol dispela em i no bikpela askim. Bikpela askim i olsem: bai yumi i stap olsem wanem long dispela pait?”
Yumi no save hamas taim yumi bai i stap long dispela pait bilong God long dispela graun. Tasol bikpela askim i olsem: bai yumi redi long sanap strong long bilip na bihainim laik bilong God, maski ol arapela i brukim skru long wanpela piksa gol?
SAMPELA TINGTING
Yu yet yu redi long sanap na bihainim laik bilong God bilong yu, o yu les?
Ritim: Mak 3:31-35
“Man o meri i save bihainim laik bilong God, em i brata na susa na mama bilong mi.” – Mak 3:35
Planti taim ol Kristen bai kolim ol arapela Kristen ol brata na susa bilong ol. Na dispela tok em i gat bikpela mining bilong em.
Krais yet i tokim yumi long tingting long dispela komuniti bilong ol bilip lain olsem wanpela famili we God em i Papa na yumi olgeta i brata susa bilong wanpela narapela. I no olsem Krais i tokim yumi long lusim famili tru bilong yumi. Em i gutpela sapos yumi lukautim ol wanblut bilong yumi. Krais yet i wari long mama bilong em taim em i hangamap long diwai kros (Jon 19). Tasol tu, Krais i skulim yumi olsem i gat narapela kain famili tu i stap, na dispela famili i no bilong blut. Nogat, dispela famili i kamap famili long Spirit bilong em, na dispela famili i winim ol arapela kain famili, na em bai i stap oltaim oltaim.
Sios bilong God, olsem famili bilong God, i no pas wantaim ol samting bilong dispela graun. Nogat, sios i stap bilong bihainim laik bilong God. Em i dispela pasin bilong bihainim laik bilong God i mekim yumi i pas wantaim ol arapela brata na susa insait long famili bilong God.
Taim Krais i kirapim wok bilong em long bungim ol lain bilong em yet, em i kamapim wanpela nupela komuniti. Na em i putim Nem bilong Papa bilong em long maus bilong ol lain bilong em, na em i lainim ol olsem Papa God em i bosman bilong dispela famili bilong em. Olsem na, dispela komuniti bilong Krais i olsem wanpela komunit i wok long bihainim laik bilong God.
Dispela famili bilong God i winim ol arapela famili. I mobeta yumi i lusim ol wanblut bilong yumi, long yumi i lusim ol brata na susa bilong yumi insait long famili bilong Krais. Yumi mas les long pasin bilong olgeta lain husat i sakim tok bilong God, maski yumi bungim hevi na pen long dispela rot.
Olsem na, sios bilong God i mas bung na wanbel long pasin bilong bihainim laik bilong God. Ol arapela samting olsem tok ples, pasin bilong ples, na olgeta arapela kain samting olsem in no inap long givim trupela wanbel long yumi.
Na taim yumi prea “Mipela i mas bihainim laik bilong yu long graun olsem ol i save bihainim long heven,” i min olsem yumi gat bikpela laik long kisim planti ol arapela lain i kam insait long sios bilong Krais olsem ol brata na susa bilong yumi.
SAMPELA TINGTING
Yu save amamas long wanbel wantaim ol arapela lain insait long famili bilong God bikos yupela olgeta i gat laik long bihainim laik bilong God, o nogat?
Ritim: Jon 4:31-38
Na Jisas i tokim ol olsem, “God i bin salim mi na mi kam, na kaikai bilong mi, em long bihain- im laik bilong em na long pinisim wok em i bin givim mi.” – Jon 4:34
Sapos wanpela ami i kamap long graun bilong birua bilong ol, ol i no kam long stap nating na malolo. Nogat! Ol i kam bilong mekim wok. Ol i kam long bihainam tok bilong opisa bilong ol. Ol i mas bihainim tok pastaim, na bihain ol bai i go bek long kem bilong ol yet.
Dispela em i wanpela tok piksa long wok bilong Jisas. Em i kam long dispela graun long bihainim tok bilong God husat i bin salim em i kam. Em i gat wok long mekim, na em no ken surik liklik long dispela wok. Na taim em i inapim laik bilong God pinis, orait em bai i go bek long em na tok, “Wok bilong mi em i pinis nau.”
Long taim Jisas em i autim dispela tok long dispela teks bilong tude, em i stap long hul wara bikos em i wokabaut longwe na strong bilong em i pinis. Ol disaipel i bin i go na kisim kaikai, na ol i tokim em long kaikai. Tasol Krais i soim klia olsem em i no inap long tingting tumas long kaikai, bikos em i tingting long planti ol arapela samting i bikpela moa olsem kaikai.
Em i tingim wok bilong bihainim laik bilong Papa bilong em. Dispela em i bikpela samting tumas.
Dispela kingdom bilong God i wok long kam long Samaria. Krais i bin givim wara bilong laip long wanpela meri nogut. Na taim em i sindaun long dispela hul wara na malolo, na em
i tingim ol lain long dispela ples, em i lukim ol olsem wanpela gaden. Dispela gaden i gat planti kaikai i stap long en, na dispela ol kaikai i ol lain bilong dispela ples husat i redi long bilip long Bikpela. Na Krais i luksave long bikpela wok ol disaipel bilong em i mas mekim long dispela gaden, bikos ol kaikai i redi pinis. Planti lain i redi long harim tok bilong em na bilip long em. Em i tingting long dispela bikpela samting, olsem na em i les long kaikai.
Taim yumi i klia gut long dispela amamas tru bilong Bikpela, yumi bai i no inap long wari tumas long olgeta arapela samting olsem olgeta lain long dispela graun i save wari long en. Bai yumi redi long tingting long Krais na wok bilong em bipo yumi tingting long ol arapela samting.
Planti taim yumi i bisi long kaikai na dring bilong yumi. Tasol yumi mas klia long wanem samting i nambawan samting long laip bilong yumi. Na taim yumi putim wok bilong Krais i go pas long olgeta arapela samting long laip bilong yumi, bai yumi i kamap klostu moa long Masta bilong yumi.
Na taim yumi no bin kaikaim dispela gutpela “kaikai” bilong Masta bilong yumi pinis, orait yumi no inap long save gut long em tu.
SAMPELA TINGTING
Wanem ol liklik samting i save pulim yu i go longwe long God?
Ritim: Hibru 10:1-7
“Orait nau mi tok olsem, ‘God, mi kam pinis. Olsem bipo ol i raitim tok long mi long buk. Nau mi kam pinis bilong bihainim laik bilong yu.’” – Hibru 10:7
Jisas i autim dispela tok i stap long Hibru 10:7 bipo long taim mama i karim em long Betlehem. Dispela Pikinini bilong God i bin tok tru antap taim em i stap long heven wantaim God triwan, na bipo long taim em i kam long dispela graun.
Dispela Pikinini bilong God husat i stap oltaim, em i lukim graun, na em i lukim yu na mi i pundaun na i gat bikpela hevi. Em i luksave olsem yumi no inap i go long em na mekim wok bilong em. Em i lukim olgeta ofa na lo bilong ofa long Olpela Kontrak na em i save olsem ol dispela samting em i tok piksa tasol long wanem samting bai i kamap bihain. Ol dispela ofa
i no inap long bringim ol manmeri i kam long God o helpim ol i stap wanbel wantaim God bilong oltaim oltaim.
Na Krais i lukim dispela na long laik bilong em, em i tok, “Nau mi kam pinis bilong bihainim laik bilong yu, God bilong mi.” Dispela tok i olsem as bilong laip na dai bilong em. Sapos yu laik klia bilong wanem God i kamap olsem man na bilong wanem Krais i bungim ol hevi na dai long dispela graun, bekim i olsem: mipela i mas bihainim laik bilong God long graun olsem ol i save bihainim long heven.
Krais i kam long bihainim laik bilong God. Na em i mekim olsem.
Long laik bilong God, Maria i karim em long Betlehem na em i stap long Nasaret, long Jerusalem, long Getsemani na long Golgota. Na em i krai, “Em i pinis nau! Nau mi bihainim pinis laik bilong Papa long graun olsem ol i save bihainim long heven. God na Papa bilong mi, mi bihainim laik bilong yu pinis, olsem bipo ol i raitim tok long mi long buk.”
Krais i kam long bihainim laik bilong God, na em i kam long skulim ol bikhet lain long dispela graun long pasin bilong bihainim laik bilong God.
Taim ol sumatin i les long kisim skul, tisa bilong ol i sori tru, na ol bai amamas sapos wanpela sumatin tasol i kam na senisim tingting bilong olgeta arapela sumatin na dispela klas bai kamap gutpela stret. Na Jisas i wankain olsem dispela kain sumatin. Em i kam long dispela graun na em i wok long senisim bel bilong planti manmeri long dispela graun.
Na nau dispela Pikinini bilong Man i stap long heven, na Spirit bilong God i stap long dispela graun. Ol lain bilong Krais, ol i pikinini bilong bihainim tok bilong God. Ol i kamap fri long Spirit bilong Krais, olsem na ol i ken bihainim laik bilong God long graun olsem ol i save bihainim long heven.
SAMPELA TINGTING
Dispela teks i soim yu wanem samting long ol pasin bilong Krais?
Ritim: Matyu 6:5-15
Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven. – Matyu 6:9-10
Ol Kristen tasol inap long beten dispela prea bilong Bikpela Jisas. Ol narapela lain inap long autim ol tok long dispela prea, tasol ol i no inap long beten dispela prea tru tru. Taim yumi beten, yumi gat sampela laik olsem na yumi i askim. Na yumi i mas mekim wok tu. Taim yumi i mekim wok, dispela i mas soim klia olsem yumi i bel klin taim yumi i beten. Ol Kristen tasol i gat laik long bihainim laik bilong Papa bilong ol. Na pasin bilong ol bai soim klia dispela laik bilong ol.
Dispela tok long Matyu 6:9-10 i gat tripela askim, tasol i olsem ol dispela tripela askim i wanpela askim tasol. Long dispela tripela askim, yumi askim Papa long heven long pinisim wok bilong em bilong kisim bek ol lain bilong em: “Nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” Namba tu askim i kliaim namba wan askim: taim kingdom bilong
God i wok long kam, orait Nem bilong em bai i kisim ona na i stap holi. Na dispela tok long kingdom bilong God i mas i kam, i gat wanem mining? Mipela i mas bihainim laik bilong God long graun olsem ol i save bihainim long heven.
God bai i kisim olgeta ona na glori taim kingdom bilong em i kam pinis. Na kingdom bilong em bai i stap pinis taim olgeta lain i stap laip i bihainim laik bilong God.
Taim ol lain i autim dispela tok nating, i olsem ol i autim nating nem bilong God, na dispela em i samting nogut tru. Taim Bikpela Jisas i tok long pasin bilong mekim prea, em i tokim ol lain bilong em long ol i no ken mekim wankain olsem ol man bilong giaman i save mekim. Ol i autim tok nating. Tasol planti lain long tude i save autim dispela prea bilong Bikpela Jisas wankain olsem ol man bilong giaman i save mekim.
Tasol God i no amamas long dispela. I no laik bilong Krais long yumi i autim dispela wanpela beten i go i go. Nogat, em i gat laik sapos yumi yusim dispela prea olsem wanpela eksampel long olgeta prea bilong yumi. Em i gat laik sapos yumi i laikim tru Papa bilong yumi, na bai yumi i bihainim olgeta laik bilong em long prea bilong yumi tu. Em i gat laik sapos yumi askim em long helpim yumi long bihainim laik bilong em long haus bilong yumi, famili bilong yumi, taun bilong yumi, kantri bilong yumi na long sios bilong yumi tu, olsem ol i save bihainim long heven.
SAMPELA TINGTING
Hau bai yumi i yusim dispela prea olsem wanpela samting long yumi i ken bihainim long olgeta prea bilong yumi yet?
Ritim: Lo 34
Olsem na Moses, wokman bilong God, i stap long dispela hap bilong graun Moap na i dai, olsem Bikpela i bin tokim em pinis. – Lo 34:5
Moses i mekim sin na dispela i pasim em long go insait long dispela graun God i promis long givim ol Israel. Dispela stori i stap long Lo 20:2-13. Moses i bel kros, na em i no bihainim tok bilong Bikpela olgeta. God i tokim em long tokim bikpela ston long mekim wara i kamap bilong dring, tasol em i belhat na em i singaut strong long ol manmeri: “Harim. Yupela ol manmeri bilong sakim tok!” Na em i paitim dispela bikpela ston.
Buk Song 106 i stori long dispela olsem: “Ol Israel i stap long wara Meriba na ol i mekim God i kros, na Moses i kisim hevi bilong asua bilong ol. Ol i mekim Moses i bel nogut tru na em i mekim tok i no stret” (lain 32-33).
Sapos Buk Baibel i givim as bilong dispela sin Moses i bin mekim, nogut yumi i daunim em long sin bilong em. Tasol Moses em i pes man bilong God, na dispela sin i pasim em long go insait long graun Kenan.
Moses em i namelman, na planti taim God i harim tok bilong em. Tasol God em i no harim krai bilong em long go insait long graun Kenan. God i tok: “Pasim maus. Yu no ken askim mi long dispela samting gen” (Lo 3:26).
Long dispela, God i soim olsem em i stretpela olgeta, na i gat wanpela stretpela namelman tasol i stap, em i Krais Jisas.
Dispela longpela wokabaut bilong Israel i pinis nau. Ol i stap long ples daun bilong Moap. Moses em i hetman, na em i lapun pinis na em i tokaut gen long kontrak bilong Israel wantaim God bilong ol (Lo 29-31). Moses i givim singsing long ol, na em i blesim olgeta lain bilong Israel (Lo 32-33). Bihain Moses i go antap long Maunten Nebo, na God i soim graun Kenan long em, klostu Israel bai i go insait long en. Na Moses i dai.
I no gat narapela man long Olpela Testamen i winim Moses, na i stap klostu moa long God olsem Moses. Na i no gat narapela man i olsem piksa bilong Jisas Krais, long soim ol tingting bilong God long ol Israel, na long stap olsem namelman bilong ol.
Dispela laip bilong dispela namelman bilong Olpela Testamen i soim yumi olsem tru tru yumi i nidim wanpela namelman. Na dai bilong em i putim ples klia olsem Jisas tasol inap long stap gutpela na trupela Namelman bilong yumi bilong oltaim oltaim.
SAMPELA TINGTING
Yumi ken lainim wanem samting long dai bilong Moses long Olpela Testamen?
Ritim: Namba 21:4-9
Bipo Moses i bin litimapim snek long ples nating, na long wankain pasin ol bai i litimapim Pikinini Bilong Man. Olsem bai olgeta man i bilip long em, ol i ken kisim laip i stap gut oltaim oltaim. – Jon 3:14-15
Taim God i mekim save long ol Israel, ol i sori long pasin bilong ol. Pastaim ol Israel i tok kros long longpela wokabaut ol i mas mekim, na long kaikai God i save givim ol. Bihain ol i tok kros long wok bilong Moses olsem hetman bilong ol, na long God yet. Na bihain ol i tromoi i go ol samting God i givim ol taim ol i belkros nogut tru. I olsem ol i sutim bel bilong God. Tasol taim ol i dai long ol snek nogut God i salim i kam long ol, long dispela taim tasol ol i krai long Moses na askim em long helpim ol na beten long Bikpela long em i ken rausim
ol dispela snek nogut long ol. “Mipela i mekim sin pinis long Bikpela taim mipela i kros long Bikpela na long yu.” God i daunim ol stret, na nau ol i singaut long Moses na God long helpim ol.
Bekim bilong God i narapela kain bekim stret. Em i tokim Moses long wokim piksa bilong wanpela snek nogut na hangamapim antap long wanpela longpela pos. Na sapos ol snek nogut i kaikaim ol manmeri, orait ol i ken lukluk long snek bras na bai ol i orait gen.
500 yia samting bihain, ol lain Israel i wok long lotuim dispela snek bras, inap long taim wanpela gutpela king i brukim dispela snek bras (2 King 18:4).
Na sios bilong God i no inap lus tingting long dispela stori long lain Israel, bikos Nupela Testamen tu i yusim dispela mak long skulim yumi. Jisas yet i yusim dispela stori long skulim Nikodemus. Pastaim em i daunim dispela hetman bilong lain Juda, na yumi tu, taim em i putim ples klia olsem man i man tasol, na em i no inap long kisim dispela laip God i givim em long strong bilong em yet. Na Jisas i yusim dispela stori long dispela snek bras bilong soim olsem em i samting bilong God long makim olsem wanem ol man bai i kamap orait gen.
“Bipo Moses i bin litimapim snek long ples nating, na long wankain pasin ol bai i litimapim Pikinini Bilong Man. Olsem bai olgeta man i bilip long em, ol i ken kisim laip i stap gut oltaim oltaim.” Dispela tingting i no hat tumas long yumi i ken kisim, tasol em i bikpela tok tru stret.
Yumi olgeta klostu i laik i dai, tasol yumi no gat marasin long oraitim yumi tasol God i givim yumi Jisas long diwai kros. Yumi i ken lukluk long em na kisim laip.
SAMPELA TINGTING
Lukluk long Jisas olgeta de, long taim yu mekim sin na no gat strong, na em bai i helpim yu.
Ritim: Hibru 13:7-17
Olsem na oltaim yumi mas givim biknem long God long nem bilong Jisas, na dispela pasin i mas i stap olsem ofa yumi save givim long God. Yes, oltaim maus bilong yumi i mas liti- mapim nem bilong en. – Hibru 13:15
I gat tupela kain ofa i stap – ofa bilong rausim sin, na ofa bilong givim pres. Ol ofa bilong rausim sin i samting bilong Olpela Testamen, na Jisas Krais i mekim las ofa long dispela. Em i dai long sin wanpela taim long olgeta lain bilong em. Yumi no nidim wanpela moa ofa bilong rausim sin gen.
Ofa bilong givim pres i samting bilong Olpela Testamen tu, tasol long bikpela wok bilong Jisas Krais yumi lainim gutpela pasin moa yet bilong presim God. Ol ofa bilong pres bilong yumi, bai i wok long go antap long God bilong oltaim oltaim.
“Olsem na oltaim yumi mas givim biknem long God long nem bilong Jisas.”Yumi i ken litimapim nem bilong God long wok bilong Jisas tasol. Long Olpela Testamen i gat planti ol lo bilong ol ofa. Dispela Nupela Kontrak i gat lo tu, na dispela lo i olsem olgeta ofa bilong pres i ken go long God long nem bilong Jisas Krais tasol.
Na maus bilong ol lain i save tru long Krais bai presim God. Sampela lain i no yusim maus bilong ol long presim God. Tasol i no olsem yumi mas presim God long maus bilong yumi tasol. Olgeta hap long laip bilong yumi mas i stap olsem ofa bilong presim God. Na sapos yumi gat laik sapos laip bilong yumi i kamap olsem ofa bilong presim God, orait maus bilong yumi tu bai presim em.
“Olsem na oltaim yumi mas givim biknem long God long nem bilong Jisas, na dispela pasin i mas i stap olsem ofa yumi save givim long God. Yes, oltaim maus bilong yumi i mas litimapim nem bilong en.” Oltaim yumi mas presim God. Pasin bilong givim biknem long God i olsem kaikai God yet i bin planim. God i bin planim planti ol kaikai, na em bai bungim planti kaikai tru. Na biknem bilong God bai kisim olgeta pres oltaim oltaim.
Bikos Krais i givim em yet olsem las ofa bilong sin, em i givim yumi Holi Spirit. Na dispela Spirit i olsem paia i kirapim ol ofa bilong pres.
SAMPELA TINGTING
Tingting long olgeta samting Jisas yet i mekim long yu, olsem yumi i lukim pinis long dispela buk Hibru. Na presim God!
Ritim: Hibru 13:1-8
“Marit em i gutpela samting tru, na yupela ol marit i mas lukautim gut marit bilong yupela, bai em i stap klin tru long ai bilong God... Yupela i no ken bihainim pasin bilong mangal long mani.” – Hibru 13:4-5
Pasin bilong marit na mani ol bai guria na bagarap bihain, na yumi no inap kisim dispela tupela samting i kam wantaim yumi long dispela siti em bai i stap oltaim oltaim. Planti lain tude i tingting tumas long mani na maritpasin. Planti lain tude i ting olsem mani na maritpasin i winim olgeta arapela samting long dispela graun. Ol lain long TV na long ol movie ol i putim mani na maritpasin antap long olgeta samting.
Na em i tru, maritpasin na mani i gutpela samting sapos yumi bihainim gutpela rot long yusim dispela tupela samting. Tasol yumi mekim sin sapos yumi yusim man o meri bilong yumi long mekim maritpasin tasol, na yumi no laikim em tru. Na em i sin long laikim mani tumas na maski long bihainim gutpela pasin long yusim mani. Marit em i gutpela samting sapos yumi i lukautim gut marit na em bai i stap klin tru long ai bilong God, na mani em i gutpela samting sapos em i olsem wokboi bilong yumi, na yumi i wokboi bilong God.
Sapos yumi gat wanpela liklik paia long haus bilong yumi long kukim kaikai em bai gutpela. Tasol sapos dispela paia i kalap i go long haus bilong yumi na kukim olgeta samting long haus, em i no gutpela na em bai i bagarapim haus olgeta. Na em i wankain long maritpasin na mani long laip bilong yumi. Sapos maritpasin na mani i gat gutpela ples bilong ol yet insait long laip bilong yumi, yumi bai amamas long dispela gutpela presen bilong God. Tasol sapos ol i stap long ples nogut, sapos ol i kamap bikpela samting tumas long laip bilong yumi, ol bai bagarapim yumi stret.
God i tok olsem maritpasin i samting bilong marit tasol, na insait long marit em bai naispela samting stret. “Marit em i gutpela samting tru, na yupela ol marit i mas lukautim gut marit bilong yupela.” God yet bai mekim save long ol lain i mekim pasin pamuk, maski ol lain long dispela graun i ting olsem dispela kain pasin i orait.
Na mani tu em i wanpela presen i kam long God, na yumi mas bihainim gutpela pasin bilong yusim dispela presen. Tasol, taim mani i kamap olsem god bilong yumi, orait yumi no inap long singsing moa: “Bikpela i save helpim mi na mi no inap pret. Ol man i no inap mekim wanpela samting long mi” (lain 6).
SAMPELA TINGTING
Wanem samting i gat namba wan ples tru long laip bilong yu?
Ritim: Hibru 12:18-29
“Dispela kingdom yumi bin kisim, em i no inap guria. Olsem na yumi mas tenkyu long God long em i bin givim dispela kingdom long yumi. Na yumi mas lotu long em long pasin em yet i laikim. Na yumi mas litimapim nem bilong em na pret long em na aninit long em, long wanem, God bilong yumi em i olsem wanpela hatpela paia i save kukim olgeta samting.” – Hibru 12:28-29
Wanpela de dispela graun na skai wantaim bai guria na bruk long ol liklik hap. Na ol samting i no inap long guria, ol dispela samting bai stap orait tasol. Dispela kingdom bilong Jisas Krais i no inap long guria, na yumi bin kisim dispela kingdom pinis. Na dispela kingdom bai i stap oltaim oltaim.
God Antap Tru bilong yumi, em yet bai bagarapim dispela graun long putim ples klia dispela siti bilong em bai i stap oltaim. Na God em i singautim yumi long kam long dispela kantri. Olsem na yumi mas tenkyu long God na lotuim em. Na taim yumi lotuim em, yumi mas klia gut olsem em i holi.
Yumi mas tenkyu long em, tasol tu yumi mas klia gut tru long God em i husat, long wanem, God i olsem wanpela hatpela paia i save kukim olgeta samting. Dispela God i bin autim tok long Maunten Sainai na em i givim las tok bilong em long Jisas Krais, em i olsem paia bilong kukim olgeta samting i no holi long ai bilong em.
God bai kukim olgeta samting i giaman, na olgeta samting bilong dispela graun. Na em bai i kukim olgeta manmeri i wanbel long olgeta giaman samting na ol samting bilong dispela graun.
Laip na wokabaut bilong yumi bai putim ples klia sapos yumi save olsem God i olsem wanpela hatpela paia. Sapos yumi klia olsem olgeta samting i doti na olgeta samting i giaman i no inap i stap long ai bilong em, yumi bai prea na wok long pulap long holi bilong God. Yumi bai askim God long stiaim yumi long dispela graun na long stap strong insait long kingdom bilong Jisas Krais.
Na tu, yumi bai lainim pasin bilong daunim yumi yet na apim God na tokaut long holi bilong em. Planti lain tude i les long stori long God em i olsem hatpela paia, tasol yumi i mas tokaut long dispela. Nogut sampela lain i givim baksait long marimari bilong God bikos ol Kristen lain i save stori long marimari na laikim tru bilong God tasol. Ating sapos ol i harim tok tru long God em i husat, ol bai harim gut na tanim bel.
SAMPELA TINGTING
Laip na wokabaut bilong yu i putim ples klia olsem yu i klia olsem God bilong yu i olsem wanpela hatpela paia i save kukim olgeta samting, o nogat?
Ritim: Hibru 12:5-11
Taim Papa i givim hevi long yumi bilong stretim yumi, yumi no save amamas. Nogat. Bel bilong yumi i pilim hevi tasol. Tasol taim em i stretim yumi pinis, yumi bai kisim gutpela pasin tru. Yumi bai mekim ol stretpela pasin, na bel bilong yumi bai i stap isi. – Hibru 12:11
Taim wanpela papa i larim ol pikinini bilong em i bihainim laik bilong ol yet, em bai i bagarapim ol pikinini bilong em stret. Planti ol pikinini tude i save mekim ol pasin nogut tru bikos ol papamama i larim ol i biahainim laik bilong ol yet. Na, ol papamama husat i no save stretim ol pikinini bilong ol, ol i no laikim tru ol pikinini bilong ol.
God i laikim tru ol pikinini bilong em. Olsem na em i save stretim ol. Taim God i mekim olsem, yumi save pilim hevi, na yumi no save amamas long dispela.
Sampela Kristen lain tude i ting olsem dispela i min, taim yumi i bungim sampela hevi long laip bilong yumi, orait yumi i mas tenkyu long God bikos em i gutpela samting long yumi. Tasol dispela i no tru. Pen em i no samting bilong amamas.
Taim hevi o pen i bungim yumi, planti taim yumi bai tingting long lusim bilip bilong yumi. Olsem na, taim yumi bungim ol hevi o pen, pastaim em bai gutpela sapos yumi pasim maus bilong yumi. Pasin bilong pasim maus em i gutpela samting bilong marimari.
Na moa, taim God i givim hevi long yumi bilong stretim yumi, dispela samting i mas skulim yumi. Em i tingting bilong God – em i gat laik long stretim yumi na long skulim yumi long laikim tru.
Taim God i skulim yumi em i no olsem dispela i kamap nating. Yumi ken i go long skul, tasol i no min olsem yumi bai lainim sampela samting. Yumi mas kisim gut dispela skul na wok long lainim planti samting. Planti ol Kristen i bungim bikpela hevi stret, tasol ol i no lainim planti samting. Tasol sampela arapela Kristen i kisim bikpela skul stret, na lainim planti samting tru taim God i stretim ol.
Em i hat long save wanem samting yumi wan wan i mas lainim taim God i stretim yumi. Tasol God em i save. Em i Papa bilong yumi na em i save wanem samting yumi i nidim na wanem samting i gutpela long yumi lainim.
Na planti ol pikinini bilong God i save tenkyu long Papa bilong ol long wanem samting ol i lainim long taim bilong pen na hevi na krai.
SAMPELA TINGTING
Taim God i stretim yumi, yumi mas mekim wanem samting?
Ritim: Hibru 12:1-4
Na yumi mas strongim bel na ran strong long dispela resis God i bin makim bilong yumi ran long en. Yumi mas lukluk i go long Jisas, em i as bilong bilip bilong yumi, na bihain em bai inapim tru bilip bilong yumi. Jisas i save, sapos em i bihainim tru tok bilong God, orait bihain em bai i stap gut na amamas moa yet. Na em i tingting long dispela na em i stap strong, na em i karim pen na i dai long diwai kros. Ol manmeri i ting, sapos man i dai long diwai kros em i man nogut tru, na em i kisim bikpela sem long dispela. Tasol Jisas i no wari long sem em bai i kisim, na em i dai. Na nau em i sindaun long han sut bilong sia king bilong God. – Hibru 12:1-2
Long wokabaut long dispela laip olsem wanpela Kristen, i kain olsem yumi ran long wanpela resis. Long ran gut long dispela resis yumi mas lusim olgeta kain samting i mekim yumi i no inap ran strong, na olgeta sin i save pas long yumi. Na tu, yumi ken kisim strong long dispela manmeri bilong bipo ol i sanap na raunim yumi olsem bikpela klaut. Tasol moa yet, yumi mas lukluk i go long Jisas.
Jisas em i “as bilong bilip bilong yumi, na bihain em bai inapim tru bilip bilong yumi.” Em yet i soim gutpela pasin bilong bilip long yumi. I tru olsem yumi inap kisim sampela liklik strong taim yumi lukim bilip bilong ol arapela (olsem ol bilip lain long sapta 11), tasol Jisas em i
as bilong bilip, na em yet i ranim dispela resis long stat i go inap long pinis bilong en. Bilip bilong em i stretpela tru na strong olgeta.
Long dispela teks dispela man i raitim Hibru em i stori long pasin bilong bilip bilong Jisas. Sapos yumi yet i laik winim dispela resis, yumi mas lainim pasin bilong bilip na long stap strong long dispela resis, long Jisas. “Jisas i save, sapos em i bihainim tru tok bilong God, orait bihain em bai i stap gut na amamas moa yet. Na em i tingting long dispela na em i stap strong, na em i karim pen na i dai long diwai kros.”Jisas em i no wari long sem em bai i kisim. Nogat, em i karim pen na em i dai. Na bihain em i kisim guptela pe long pasin bilong em – em i sindaun long han sut bilong sia king bilong God.
Laip bilong Jisas i pulap olgeta long bilip long Papa. Em i daunim em yet na em i dai long diwai kros, bikos Papa bilong em i redim dispela rot long em. Long Luk 22:42 em i prea, “Tasol yu no ken bihainim laik bilong mi. Nogat. Yu mas bihainim laik bilong yu tasol.” Na long pen na hevi em i bungim, em i kisim strong long bilip long God.
Dai bilong Jisas i no givim pen long em tasol, em i givim sem long em tu. Taim ol
i hangamapim wanpela man long diwai kros em i kisim sem tru. Ol i no inap long hangamapim man bilong Rom long diwai kros bikos em bai givim bikpela sem long ol lain bilong Rom. Tasol Jisas em i no tingim dispela sem, bikos em i tingting long bihainim Papa bilong em tasol na bilong kamap long pinis bilong dispela resis we amamas tasol i stap. Olsem na yumi mas lukluk long Jisas long kisim strong long ran long dispela resis, inap long taim yumi stap long glori wantaim em.
SAMPELA TINGTING
Wanem samting i save helpim yu long lukluk long Jisas tasol?
Ritim: Hibru 11:32-40
Dispela olgeta manmeri i bilip long God, na ol i kisim gutpela nem tru long ai bilong God. Tasol long taim ol i stap long graun ol i no kisim gutpela samting God i bin promis long givim ol, long wanem, bipo yet God i redim wanpela gutpela samting moa yet bilong yumi olgeta... – Hibru 11:39-40
Yumi bungim han wantaim ol bilip lain long olgeta hap na taim long dispela graun, ol bilip lain long Olpela Testamen tu. Yumi i wankain tasol. Olgeta bilong yumi i mas bekim tok promis bilong God long bilip. Yumi olgeta i ken kisim promis bilong God long han bilong bilip.
Tasol dispela nupela kontrak i gutpela samting moa yet long olpela kontak, long wanem, Jisas Krais inapim olpela promis. Olgeta bilip lain long Olpela Testamen, i stap olsem piksa long lain i bilip tru long God, ol i no kisim wanem samting God i promis taim ol i stap long graun. Tasol yumi i kisim, bikos yumi i save long Jisas olsem Bikpela bilong kisim bek yumi.
Olsem man i raitim dispela pas i tok, yumi i kisim “narapela rot i gutpela tru na i winim lo” (7:19), bikos “dispela kontrak Jisas i mekim, em i gutpela moa na i winim kontrak bilong bipo” (7:22), bikos “ol samting dispela nupela kontrak i promis long givim yumi, ol i winim tru ol samting olpela kontrak i bin promis long givim” (8:6) na ofa yumi i kisim “i gutpela tru na i winim ol dispela ofa bilong abus” (9:23). I tru olsem i gat planti samting i wankain long laip bilong lain bilong dispela olpela kontrak na long yumi tude, tasol olgeta samting long tude em i winim olgeta samting long olpela kontrak.
Em i gutpela tru sapos yumi tingting gut long dispela. Yumi stap aninit long promis na wok bilong nupela kontrak. Sampela samting i save wok long pulim yumi i go bek long olpela kontrak – i luk olsem sampela lain i laik stap aninit long lo na i les long stap aninit long marimari. Planti lain i save laikim ol pasin bilong lotu na ol naispela samting long ol tempel. Na tu, sampela hetman long sios i amamas long ting olsem ol lain long sios i nidim skul bilong ol bilong kisim Krais.
Olsem na yumi i mas lukaut. Yumi i mas klia long Krais na marimari bilong em. Long ol dispela las de God i kam long yumi long Pikinini bilong em. Long diwai kros bilong Krais, God i givim las tok long sin bilong yumi. Na long taim Krais i go antap long heven long glori, God i givim tok tru long wanem samting bai kamap long yumi long taim bihain.
SAMPELA TINGTING
Tok tenkyu long God bikos yu i stap aninit long nupela kontrak, em dispela kontrak i gutpela moa long olpela kontrak.
Ritim: Hibru 11:29-38
Ol man i dai pinis ol i kirap bek, na mama bilong ol i kisim ol bek gen. Ol birua i kalabusim sampela man na bagarapim tru bodi bilong ol, inap long ol i dai. Ol birua i tok, sapos ol i givim baksait long God, orait ol bai i lusim ol i go. Tasol ol i sakim tok bilong ol birua, long wanem, ol i ting sapos ol i dai, ol bai i kirap bek long matmat, na bai ol i kisim laip i gutpela moa. – Hibru 11:35
Long bilip yu inap long mekim olgeta samting, long wanem, as bilong dispela bilip em i pawa na ol promis bilong God.
Planti lain ol i paul long dispela tok, “long bilip yu inap long mekim olgeta samting.” Sampela lain bai tok, “Sapos yu bilip, bai yu inap long mekim kain kain narakain samting olsem ol mirakel.” Na sampela lain bai pilim sori tru bikos ol i ting olsem bilip bilong ol i no strong tumas, long wanem ol yet i no inap long mekim ol narakain samting tru.
Nau em i no taim long stori long ol mirakel samting. Tasol yumi i ken klia olsem long Buk Baibel dispela tok “long bilip” i gat narapela mining.
Long Buk Baibel yumi ritim ol dispela kain stori: stori long ol man i dai pinis ol i kirap bek, na mama bilong ol i kisim ol bek gen; stori long ol man i kisim bagarap long bodi bikos ol i bilip long God. Sampela lain i stap long kalabus, na sampela arapela lain i kisim bikpela bagarap stret. Ol dispela samting i save kamap long ol lain i bilip, na Buk Baibel i autim ol dispela stori bilong yumi yet i ken bilip long God. Sapos yumi bilip long em, bai yumi no inap long pret. Sapos yumi givim baksait long em, orait yumi i mas pret. Olgeta lain i stap laip long bilip, ol i stap laip tru tru.
Dispela em i stori long pawa bilong bilip: God inap long mekim olgeta samting. Long bilip yumi inap long mekim olgeta samting! Tasol nogut yumi paul na bagarapim dispela tok. Sapos yumi gat laik long bihainim laik bilong yumi yet, na tok strong long God i ken inapim ol laik bilong yumi yet, i min olsem yumi bagarapim dispela tok, “long bilip yumi inap long mekim olgeta samting.”Yumi no ken bagarapim tok bilong God.
SAMPELA TINGTING
Long laip bilong yu yet, yu save bilipim God? Olsem wanem?
Ritim: Hibru 11:8-16
Ol dispela manmeri ol i bilip long God i go inap long taim ol i dai. .... Na ol i no sem long tokaut olsem, “Mipela i stap long dispela graun olsem ol manmeri bilong narapela kantri. Mipela i kam i stap liklik taim tasol long dispela graun.” Na sapos yumi harim ol manmeri i mekim dispela kain tok, orait yumi save, ol i laik painim graun tru bilong ol. – Hibru 11:13-14
Dispela man i raitim buk Hibru i stori long ol manmeri i kisim promis bilong narapela graun. Tasol long taim ol i dai, ol i no lukim dispela graun God i bin promisim ol yet. Tasol ol i bilipim tru dispela promis na ol i putim dispela ples klia long pasin bilong ol long laip bilong ol.
Dispela ol tumbuna bilong bilip, ol i tok olsem ol i stap long dispela graun olsem ol manmeri bilong narapela kantri, na olsem ol i kam i stap liklik taim tasol long dispela graun. Abraham
i tok, “Mi man bilong narapela kantri na mi kam sindaun namel long yupela (Stat 23:4). Na sapos yumi harim ol manmeri i mekim dispela kain tok, orait yumi save, ol i laik painim graun tru bilong ol.”
Em tru, ol tumbuna bilong bilip ol i save slip long ol haus sel tasol na ol i no stap long wanpela haus; olsem na i no hat tumas long klia bilong wanem ol i tok olsem ol i man bilong narapela kantri. Tasol as bilong dispela tok i narapela samting tu. Long bilip ol i save, ol i olsem ol manmeri bilong narapela kantri.
Taim yumi stap laip long bilip, i olsem bel bilong yumi bung wantaim sampela samting i
no stap hia long dispela graun. Pasin bilong lukim sampela samting na bilipim sampela samting, tupela i no wankain. Planti taim yumi lukim ol samting i no wankain long bilip long yumi, olsem na sampela taim bilip bilong yumi bai i go daun. Tasol long bel bilong yumi, yumi mas holim strong olgeta promis bilong God. Sapos nogat, yumi bai lus.
Em i gutpela olsem planti ol sios long tude ol i klia olsem ol Kristen i no ken i stap wantaim ol Kristen lain tasol. Yumi mas wok long autim dispela gutnius long ol arapela lain tu. Tasol yumi mas wok strong na prea strong long kisim gutpela tingting long hau yumi, dispela lain i wetim nupela graun bai i kam, i mas mekim wok insait long dispela graun bilong tude.
Ol manmeri i bilip long God i olsem ol manmeri long narapela kantri. Dispela graun i no olsem ples tru bilong yumi. Long bilip yumi lukim dispela taun God yet i kirapim plen bilong wokim, na em yet i bin wokim.
SAMPELA TINGTING
“Ol manmeri i bilip long God i olsem ol manmeri bilong narapela kantri.” Dispela em i tru long laip bilong yu, o nogat?
Ritim: Hibru 11:1-6
Tasol man i no bilip long God, em i no inap bihainim laik bilong God. Long wanem, man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em. – Hibru 11:6
Tude ol man i no save pait long ol liklik samting insait long ol tok (doktrin) bilong Buk Baibel. Nau ol i pait bikos sampela i tok olsem God i no stap!
Sapos yumi tok tru, sampela taim yumi tu i gat tupela bel na tupela tingting long God. Tasol ol lain i givim baksait long God, ol bai i lusim sios, bikos sios em i ples bilong ol lain i bilip long God, dispela God i autim tok long Abraham na long Moses, na em i givim las tok long em long Jisas Krais.
God yet i tok olsem sapos yumi laik wanbel wantaim em yumi mas kamap klostu long em long bilip tasol. Sapos yumi les, bai yumi no inap kamap klostu long em. Yumi mas bilip olsem God em i stap, na em bai i mekim gut tru long ol lain i gat laik long wanbel wantaim em.
Yumi no inap givim dispela bilip long ol arapela. Yumi ken tokim ol olsem tasol: “Bilip long God na go long em, na em bai i mekim gut tru long yu.”Yumi inap tok olsem long bilip tasol, na bikos yumi tu i kisim bel isi na amamas long dispela bilip.
Sampela lain i tok olsem God i no i stap. I olsem ol i apim ol yet na ol i les long bilip long God. Tasol em i samting bilong God yet bilong tokaut wanem samting ol manmeri i mas mekim long kamap klostu long em. Em i lo bilong trupela bilip: Yumi no inap go klostu long God, na yumi no inap klia gut tru long dispela God i stap oltaim oltaim, sapos yumi no bilip olsem em i stap. Na sapos yumi laik i go klostu long em, yumi bai amamas tru long lukim em.
Ol Kristen lain i mas daunim ol yet na klia olsem em i hat wok tru long painim God. Na ol i save: ol lain i wok long painim, ol yet bai kisim. Tasol ol bai i kisim na lukim bikos ol i painim yet na ol i wok long painim olgeta taim. Taim yumi i prea na bilip, na wok long painim God na kisim em, bai yumi klia olsem, God yet i painim yumi na kisim yumi pastaim.
SAMPELA TINGTING
Em i tru olsem God yet i painim yumi na kisim yumi pastaim?
Ritim: Hibru 10:32-11:1
Pasin bilong bilip em i olsem. Yumi save gut tru olsem, olgeta gutpela samting God i promis pinis long givim yumi na yumi wet long kisim, em bai yumi kisim tru. Maski ai bilong yumi i no lukim ol dispela samting, yumi save gut tru olsem, dispela olgeta samting i stap. – Hibru 11:1
Buk Hibru i putim ples klia olsem dispela nupela kontrak i winim stret dispela olpela kontrak. Tasol dispela nupela kontrak em i kontrak tru, na long dispela kontrak yumi ken wanbel wantaim God gen, na as bilong dispela em i tok bilong God. Na tu, yumi i mas bekim dispela kontrak long bilip.
Olsem na, long sapta 11, man i raitim dispela buk i autim ol stori long ol lain i mekim wok long bilip. Ol manmeri i mekim olsem long stat bilong dispela graun inap long taim em
i raitim dispela buk. Olgeta taim God i autim tok, ol manmeri bilong em i mas bekim tok bilong em long bilip.
Tude tu yumi save olsem yumi nidim bilip, tasol sampela taim em i hat tru long bilip. Planti taim yumi i laik klia gut tru long sampela samting na bihain orait yumi bai bilip. Tasol planti taim sapos yumi no lukim sampela samting long ai bilong yumi yet, bai yumi pilim olsem em bai i hat tru long bilipim.
Tasol bilip i min olsem yumi mas bilip long God na wanem samting em i tok, na bihainim em. Long dispela sapta (11) yumi harim stori long planti ol man na meri i bilipim olgeta promis bilong God, maski ol i no lukim yet o ol i no gat we long kisim save sapos God bai inapim olgeta promis bilong em o nogat. Tasol ol i bilip, na ol i bihainim tok bilong God na wokabaut long rot bilong laip.
Yumi gat hop bikos yumi bilip. Na maski yumi no inap long lukim sampela samting long ai, long bilip bai yumi lukim long bel bilong yumi. Olsem tasol sampela man na meri i mekim narakain samting tru long bilip, na ol lain i no bilip, ol bai i paul long pasin bilong ol na ting olsem ol i longlong. Tasol ol lain i bilip, ol i save olsem pasin bilong ol i no longlong. Ol i bilipim tok bilong God na long pasin bilong ol dispela samting i kamap ples klia.
Ol lain i no bilip bai i tok,“Soim mi pastaim, na bai mi bilip.”Tasol God i tok,“Bilipim mi pastaim, na bai yu lukim.” I no olsem yumi ken skelim God - yumi mas bilipim God tasol.
SAMPELA TINGTING
Bilong wanem yu yet i bilip long God?
Ritim: Hibru 10: 23-31
Sapos God bilong i stap oltaim em i laik mekim save long wanpela man na em i holimpas em, orait dispela man i ken pret nogut tru. – Hibru 10:31
I luk olsem wanpela bikpela senis i kamap long dispela hap bilong dispela pas. Yumi ritim pinis planti tok bilong amamas long wok bilong Krais bilong lusim olgeta sin bilong yumi, tasol long hia yumi ken pret nogut tru long pasin bilong God bilong mekim save long wanpela man.
Tasol yumi no ken kirap nogut long dispela tok. Yumi harim las tok bilong God pinis. Laplap i bruk antap i go long daunbilo. Bel bilong God i op pinis. Yumi stap long graun i holi. Heven i op na yumi stap long presens bilong God Antap Tru. Yumi stap long laikim tru bilong God na yumi ken amamas tru na wanbel wantaim em. Tasol sampela bai pundaun.
Planti bilong yumi save olsem marit i ken i stap olsem ples bilong amamas o i ken i stap olsem ples bilong bikpela hevi tru. Insait long laikim tru bilong marit, tupela i ken amamas tru. Tasol, sampela taim ol lain i marit inap long bungim bikpela hevi tu.
I olsem God yet i maritim yumi long kontrak bilong em long blut na long Spirit. Olsem na yumi ken amamas tru. Yumi ken bel isi tru. Tasol sampela taim, sapos yumi mekim bikpela sin tru, olsem na yumi no stap wanbel moa wantaim Bikpela, bai yumi i lukim bikpela hevi na pen stret.
Long dispela teks, dispela man i raitim Hibru i stori long bikpela sin tru. I olsem wanpela man em i kisim laikim tru bilong God pinis, tasol bihain em i givim baksait long God na tromoi ol presen bilong em i go na bagarapim ol stret. I olsem man em i mekim tok nogut long Holi Spirit.
Ol Kristen i wik liklik ol i no ken wari olsem ol i mekim dispela sin. Pret bilong ol i soim olsem ol i no mekim dispela sin. Tasol, dispela tok i olsem tok lukaut long yumi olgeta. Yumi no ken ting olsem laikim tru bilong God em i samting nating. Yumi mas mekim wok. Tok bilong God long laikim tru yumi long wok bilong Krais i mas kirapim yumi long presim em, long lotuim em, long pret long em na long amamas na hop long em, olgeta taim.
SAMPELA TINGTING
Yu save “pret” long God?
Ritim: Hibru 10:11-22
Ol brata, blut bilong Jisas i lusim sin bilong yumi pinis, olsem na yumi inap i go insait long Rum Tambu Tru bilong haus bilong God na yumi no ken pret. Yumi ken i go insait long dispe- la rum long dispela nupela rot i gat laip. Dispela rot Jisas yet i bin opim, em i go insait long dispela bikpela laplap i hangamap i stap olsem dua bilong dispela rum. Dispela laplap em i olsem bodi bilong em yet. – Hibru 10:19-20
Yu save long stori long dispela laplap ol i hangamap i stap olsem dua long tempel, a? Dispela laplap i hevi tru na em i naispela stret. Ol i hangamapim dispela laplap long tempel bilong God olsem God i ken i stap longwe long ol lain bilong em. Em i tru olsem dispela tempel i olsem ples we God i kam na bung wantaim lain bilong em. Long tempel olgeta manmeri bilong God i save kam bilong givim ol ofa long God, na long bung na wanbel wantaim God. Long tempel, God i lusim sin bilong ol na ol i kisim nupela strong. Tasol dispela laplap i stap tu. Na dispela laplap i olsem mak bilong putim ples klia olsem God i no wanbel tru wantaim lain bilong em. I min olsem lain bilong God i no inap i go klostu long God. Nogat, ol i mas stap longwe liklik long God.
Hetpris tru tasol inap i go kostu long God – na dispela i kamap wanpela taim long wan wan yia tasol. Dispela hetpris i save kam long dispela wanpela taim, na em bai i wasim em yet na putim ol naispela, na klinpela klos tru. Na em i save karim blut wantaim, na em i tromoi dispela blut long bokis kontrak long karamapim sin bilong em yet na sin bilong olgeta manmeri bilong God. Na bihain long dispela, em bai i go aut long dispela rum, na dispela laplap i hangamap i stap bai i pasim em long go klostu long God gen.
Tasol, wanpela de, pinga bilong God yet i brukim dispela laplap i hangamap i stap insait long tempel, long antap i go inap long daunbilo bilong en, na i kamap tupela hap. Em i kamap long Gut Fraide, taim Jisas em i dai long diwai kros antap long liklik maunten klostu long Jerusalem. Taim bel bilong Jisas i bruk, dispela laplap long tempel i bruk i go long tupela hap.
Taim laplap i no bruk, em i gat dispela mining:“no ken go insait.”Tasol nau em i bruk, na em
i gat dispela mining: “olgeta lain i bilip long Jisas Krais i ken i go insait.” Olsem na nau “blut bilong Jisas i lusim sin bilong yumi pinis, olsem na yumi inap i go insait long Rum Tambu Tru bilong haus bilong God na yumi no ken pret.”Yumi olgeta, rabislain wantaim, i ken i go insait long Rum Tambu Tru – sapos yumi bilip long Jisas. Olgeta lain i bilip long em, ol i kamap klinpela na klos bilong ol i kamap waitpela tru.
Olsem na, nau yumi i no ken pret long kamap klostu long God. God em i kam long yumi long marimari bilong em. Yumi inap i go insait long Rum Tambu Tru na God i kam long yumi olsem, bikos Krais yet em i dispela laplap i bruk.
SAMPELA TINGTING
Dispela laplap em i bruk i min olsem yumi ken i go klostu long God. Brukim skru na tok tenkyu long em.
Ritim: Hibru 9:24-28
Olgeta man i mas i dai wanpela taim tasol, na bihain ol i mas kamap long kot. Olsem tasol wanpela taim tasol Krais i givim em yet long God olsem ofa, bilong karim hevi bilong ol sin bilong planti manmeri. Na bihain em bai i kamap namba 2 taim, tasol dispela taim em i no kam bilong rausim sin. Nogat. Em bai i kam bilong kisim bek tru ol man i wetim em. – Hibru 9:27-28
Long dispela teks, man i raitim buk Hibru i laik givim yumi wanpela liklik tok piksa long soim yumi olsem dai bilong Krais i kamap wanpela taim tasol. Yumi klia olsem ol mama i save karim wanpela bebi, na dispela bebi bai i stap laip wanpela taim tasol, na em bai i dai wanpela taim tasol. Na taim em i dai pinis, orait em bai i sanap long kot bilong God long las de. Yumi olgeta i bihainim dispela rot taim yumi kamap long dispela graun.
Taim Pikinini bilong God i kamap olsem man, em tu i mas bihainim dispela rot. Maria i karim em, em i stap laip, na bihain em i dai. Em i no inap i dai moa.
Taim Krais i kam bek, em i no samting long mekim sampela wok long sin. Em bai i kam bek long kisim lain bilong em i go long laip i stap oltaim oltaim. Em i lusim olgeta sin bilong yumi pinis long dai bilong em. Yumi no inap i dai tupela taim, na dai bilong Krais tu i kamap wanpela taim tasol.
Dai i olsem pinis bilong laip long dispela graun. Na em tru olsem dai em i no naispela samting. Dispela dai em i las samting i kamap long laip bilong man long dispela graun. Sapos man i laik mekim sampela samting, em i mas mekim olsem long taim em i stap laip. Sapos nogat, em bai i no inap long mekim.
Tasol, taim Buk Baibel i soim yumi olsem dai em i las samting i kamap long man long dispela graun, i no bilong pretim yumi. Nogat, em i bilong givim bel isi long yumi. Dai bilong Krais inapim olgeta promis bilong God long lusim olgeta sin bilong yumi. Yumi no ken pret nau!
Taim Krais i kam bek na yumi bai stap long kot bilong God, Krais bai i mekim wanem samting long yumi? Em bai i tokaut long olgeta sin bilong yumi long olgeta lain long dispela graun? Nogat. Na nogat tru, sapos yumi autim ol sin bilong yumi na tok sori long ol sin bilong yumi taim yumi stap laip long dispela graun. Em i lusim olgeta sin bilong yumi pinis long dai bilong em. Dispela dai i no inap long kamap gen. Em i pinis!
Presim Bikpela!
SAMPELA TINGTING
Long las de, taim yumi sanap long kot bilong God, yu ting olsem God bai i autim olgeta sin bilong yu long yau bilong olgeta arapela lain, o nogat? Bilong wanem?
Ritim: Hibru 9:15-22
Blut bilong Jisas i mekim yumi i kamap klin tru long ai bilong God, olsem na Jisas i stap namelman bilong strongim nupela kontrak. Em i dai pinis bilong baim bek ol manmeri na lu- sim ol sin ol i bin mekim long taim namba wan kontrak i stap yet. Olsem na olgeta manmeri
i harim singaut bilong God na i bihainim, ol i ken kisim dispela laip bipo God i tok long givim long ol pikinini bilong en. Na bai ol i stap gut oltaim oltaim. – Hibru 9:12
Sapos wanpela man i gat planti mani na kago samting, em bai raitim tok long wanpela pepa, long husat bai i kisim ol samting bilong em taim em i dai – na dispela i olsem wanpela kontrak. Na taim em i dai, na lain bilong em i laik tilim ol samting bilong em long laik bilong em, ol i mas klia gut pastaim olsem papa i dai pinis (lain 16).
God yet i wokim dispela kain kontrak. Na God yet i promisim dispela laip i stap oltaim oltaim long ol lain i harim singaut bilong God na bihainim. Na bikpela askim i olsem: yumi yet i stap insait long dispela kontrak? Na “olgeta manmeri i harim singaut bilong God na i bihainim,” ol i husat tru?
Yumi save olsem Abraham i stap insait long kontrak bilong God. God yet i stori long dispela long Abraham. Na Moses tu, na lain bilong Israel, long Olpela Kontrak. Tasol yumi tu i stap insait long dispela kontrak. Em i tok olsem long yumi, “Dispela em i blut bilong strongim dispela kontrak God i tokim yupela long bihainim” (lain 20). Yumi stap insait long kontrak bilong em.
Yumi ken save tru tru olsem dispela kontrak em i bilong yumi tu. Long Olpela Kontrak, Krais i no kam yet. Ol i no lukim pinis wok bilong Krais bilong inapim olgeta promis bilong God. Satan, na lain bilong em, ol i save tokim ol lain bilong God olsem ol i no stap lain tru bilong God, na olsem ol i no inap kisim ol promis bilong em. Tasol, dai bilong Krais i soim klia tru olsem yumi stap long kontrak bilong God. I no gat wanpela man i ken bagarapim dispela kontrak bilong God nau. Kontrak bilong God bai i stap.
Ol lain i harim singaut bilong God na bihainim, ol i ken kisim dispela laip God bipo i tok long givim ol, bilong stap gut oltaim oltaim, long wanem Krais i dai pinis bilong baim bek yumi!
SAMPELA TINGTING
Yu yet yu stap insait long kontrak bilong God, o nogat? Yu yet bai kisim dispela laip bilong i stap gut oltaim oltaim? Olsem wanem?
Ritim: Hibru 8:8-13
Tasol dispela nupela kontrak mi laik mekim wantaim ol manmeri bilong Israel, em i olsem. Bai mi putim olgeta lo bilong mi long tingting bilong ol, na bai mi raitim tok bilong mi long bel bilong ol... bai mi marimari long ol na lusim sin bilong ol na mi no ken tingim moa. – Hibru 8:10,12
Nupela kontrak i kam pinis olsem promis bilong God i tok (dispela tok long dispela teks i kam long Jeremaia 31:31-34). Long taim bilong Jeramaia, God i tok olsem sampela bikpela senis bai i kamap long tingting long lain bilong em. Olgeta taim ol i stap lain i strong long sakim tok bilong God na ol i les long bihainim em. Tasol God i tok, “Wanpela de, taim nupela kontrak i kam, ol lain bilong mi bai bihainim laik bilong mi bikos ol i gat laik long mekim olsem, na nogat bikos mi yet mi tokim ol long mekim olsem - bai mi putim olgeta lo bilong mi long tingting bilong ol, na bai mi raitim tok bilong mi long bel bilong ol.”
Na Holi Spirit bilong God i kam long nupela kontrak, na em i mekim dispela senis i kamap. Long nupela kontrak, Spirit bilong Krais i stap insait long bel na tingting bilong ol manmeri bilong God. Tasol olsem wanem Spirit bilong God inap i stap insait long ol lain bilong mekim sin? Em inap bikos God yet i klinim bel bilong lain bilong em: “Bai mi marimari long ol na lusim sin bilong ol na mi no ken tingim moa.” Long ofa bilong Krais yet, God i rausim olgeta sin bilong yumi. Na taim yumi kamap klin long blut bilong Krais, Spirit bilong Krais i stap insait long yumi. God i lusim sin bilong ol manmeri bilong em bilong dispela nupela kontrak, na ol i kamap nupela.
Olsem na, wanem samting em i nupela long dispela nupela kontrak? Na wanem samting em i las tok bilong God long ol dispela las de? God i lusim olgeta sin bilong yumi long blut bilong Jisas Krais na em i givim Holi Spirit long yumi. Em tasol.
God i lusim sin bilong yumi na yumi kamap nupela! Long bilip yumi ken kisim olgeta gutpela samting long dispela nupela kontrak. Olgeta tok bilong Buk Baibel em i tok long stap insait long kontrak, long wanem, yumi mas lainim pasin bilong stap wanbel wantaim God. Na Buk Baibel i skulim yumi olsem yumi wok long kamap long nupela de, dispela de we olgeta hevi bilong yumi bai pinis, na bai yumi i stap wanbel tru wantaim God olgeta taim. Long dispela taim tude long nupela kontrak yumi kamap klostu moa long dispela de. Yumi no nidim ol ofa long olpela kontrak moa na wok bilong planti pris tu. Nogat. Yumi kisim dispela ofa bilong Krais olsem namba wan pris bilong yumi, na wok bilong em inap bilong oltaim oltaim. Na God i putim olgeta lo bilong em long tingting bilong yumi, na em i raitim tok bilong em long bel bilong yumi.
SAMPELA TINGTING
God i lusim sin bilong yu na yu kamap nupela. Tingting gut long dispela bikpela samting na tok tenkyu long God!
Ritim: Hibru 8:1-7
Tingim. Sapos namba wan kontrak i gutpela olgeta, orait God bai i no inap mekim nupela kontrak. – Hibru 8:7
Sapos yumi bungim wanpela man em i laik save long God em i husat, em i gutpela long yumi givim wanpela Baibel long em bilong em i ken ritim. Na sapos em i no klia tumas long Buk Baibel, nogut em i ting olsem Buk Baibel i olsem wanpela buk i givim sampela skul long God tasol. Olsem na em bai gutpela sapos yumi kliaim tingting long em, olsem em i no dispela kain buk, na em i no wanpela buk i stori long wok bilong planti manmeri tu. Nogat, dispela buk em i stori bilong God na pasin bilong em long stap wanbel wantaim ol manmeri bilong em. Man na God i stap wanbel long Stat 1 na 2, tasol long Stat 3 man i kamap longwe long God; em i lus long em. Tasol long pinis bilong Buk Baibel ol i stap wanbel gen, na ol bai i stap olsem oltaim oltaim (Kamapim Tok Hait 21).
Na tu yumi mas tokim dispela man olsem i gat tupela hap long Buk Baibel: Olpela Testamen na Nupela Testamen. Na yumi i ken soim dispela tupela hap long em.
Dispela tok “testamen” i min olsem “kontrak,” na i samting bilong sampela promis bilong God wantaim man.
Dispela Olpela Kontrak i stori long pasin bilong God long stap wantaim lain bilong em aninit long ol lo ol i kisim long Maunten Sainai. Na dispela Nupela Kontrak i stori long pasin bilong God long stap wantaim lain bilong em long blut na Spirit bilong Jisas Krais.
Ating dispela man bai wok long paul liklik. Em i hat tru long kliaim gut tru olgeta tok long Buk Baibel. Tasol em bai gutpela sapos yumi skulim man kain olsem dispela man olsem dispela kontrak God i wokim wantaim man i save bungim olgeta hap long Buk Baibel. Long stat bilong dispela graun inap long pinis bilong en, dispela kontrak i stap, na i min olsem God yet i autim tok na ol manmeri bilong em i mas bekim. God i givim ol promis long lain bilong em, na ol yet i mas bilipim em na bihainim em. Na las tok bilong God i kam long yumi long Jisas Krais.
Na taim yumi i kamap long stori bilong Krais, yumi i ken skulim dispela man long dispela tok “Nupela Kontrak.” Na bai yumi i no inap long kliam tok long dispela Nupela Kontrak sapos yumi i no save gut long blut tudia bilong Krais, na pawa tru long Spirit bilong em.
SAMPELA TINGTING
Dispela tok “dispela kontrak God i wokim wantaim man i save bungim olgeta hap long Buk Baibel” i gat wanem mining?
Ritim: Hibru 7:26-8:1
Orait as bilong dispela tok yumi mekim, em i olsem. Yumi gat dispela kain gutpela hetpris i stap, na em i sindaun pinis long han sut bilong sia bilong Namba Wan King long heven. – Hibru 8:1
Long dispela olpela kontrak i no ol pris tasol inap i stap olsem namel man long God na ol manmeri bilong em. I gat ol profet na king tu i save mekim olsem. Long dispela tripela kain man God i bin wok long toktok long lain bilong em.
Ol profet i save autim tok bilong God long ol lain bilong em. Ol pris i save kisim tok bilong man i go long God long ol ofa na long prea. Na king i save bosim lain bilong God olsem pesman bilong God. Sapos ol profet i no stap, ol manmeri bilong God bai i no inap save long laik na tingting bilong God. Sapos ol pris i no stap, ol manmeri bilong God bai i no inap i stap wanbel wantaim God. Na sapos ol king i no stap, ol manmeri bilong God bai i no inap stap gut aninit long lukaut bilong God.
Long tude, Jisas yet inapim olgeta dispela wok long manmeri bilong God. Em i soim klia tru laik na tingting bilong God, em i kamap olsem rot bilong yumi ken i go long God, na God i lukautim na bosim yumi gut long em.
Krais em i olsem profet, bikos long ol dispela las de God yet i autim las tok bilong em long Krais. Krais i olsem pris bilong yumi bikos em i kisim yumi i go klostu long God long taim em inapim olgeta ofa taim em i dai long diwai kros. Na Krais em i king bilong yumi, bikos em i sindaun long “han sut bilong sia bilong Namba Wan King long heven.”
Jisas Krais tasol i olsem as bilong olgeta samting yumi mekim long kisim save long God, long mekim wok bilong God, na long lotuim em. Sapos yumi no bilong Krais bai yumi i no inap save long God, yumi no inap amamasim God, na yumi no inap kisim gutpela lukaut bilong God.
Long dispela teks yumi ritim tude, man i raitim dispela buk i laik sapos yumi klia olsem yumi gat hetpris i stap, em i king Jisas. Em i stap long han sut bilong sia bilong Namba Wan King tru. Na em inapim tru ol wok bilong pris long dispela olpela kontrak.
SAMPELA TINGTING
Krais i save mekim wanem ol kain samting long yu olsem profet, pris na king bilong yu?
Ritim: Hibru 7:21-25
Olsem na oltaim em inap tru long kisim bek ol manmeri i kam klostu long God long nem bilong em, long wanem, em i stap laip oltaim, na em i save beten long God long helpim ol. – Hibru 7:25
Dispela Gutnius i olsem las tok bilong God tu bikos em i autim tok long dispela las Pris i mekim dispela las ofa tu. Na dispela Pris i stap laip oltaim, long kisim bek oltaim olgeta lain i kam klostu long God long nem bilong em.
Wanpela pris em i wanpela man em i helpim ol manmeri i kam klostu long God. Kain kain kantri na kain kain manmeri i bin yusim ol pris, long kisim manmeri i kam klostu long God long ol ofa, prea na narakain pasin. Olgeta lain man i save olsem wanpela God i stap, na ol i save olsem ol i gat nid long kamap wanbel wantaim God gen.
Man i raitim Hibru i no stori long ol narapela kain lain. Nogat, em i stori long lain Israel tasol. Em i tingim planti ol pikinini man bilong Livai na bilong Aron, na em i soim olsem wok
pris bilong ol i no gutpela olgeta; em i wik tru. Tasol wok bilong Jisas Krais em i gutpela na stretpela olgeta, na em inapim tru wok pris bilong ol, na em i las ofa tu!
Ol hetpris bilong bipo ol i gat wok bilong mekim ofa long olgeta de. Smuk i go antap, na blut i kapsait. Bulmakau, meme, na pikinini sipsip. Sampela moa, na sampela moa, tasol olgeta taim ol i sot. Tasol taim Krais i kam, olsem las hetpris, em i mekim las ofa na em i tok, “Em i pinis nau.”Nogat sampela moa krai bilong ol pikinini sipsip bai i kamap olsem ofa, bikos Pikinini Sipsip bilong God i kam pinis, na em i rausim ol sin bilong dispela graun.
Jisas i kamap hetpris oltaim oltaim long yumi. Yumi no nidim narapela hetpris moa. Wok pris long ol lain bilong Livai i pinis olgeta. Krais i stap laip oltaim oltaim long holi ples bilong God long kisim bek ol manmeri i kam klostu long God long nem bilong em. Dispela las Pris i olsem pris i stap oltaim oltaim.
I min olsem, olgeta arapela lain i save yusim ol pris long tude, ol i paul. Yumi inap kamap klostu long God long wok bilong Hetpris bilong yumi, Jisas Krais, tasol!
SAMPELA TINGTING
Jisas i olsem pris i stap oltaim oltaim long yu. Dispela em i givim yu bel isi olsem wanem?
Ritim: Hibru 6:13-20
Bipo God i mekim promis long em bai i mekim gut tru long yumi ol lain bilong Abraham. Na em i laik soim yumi klia tru olsem, em i no inap senisim tingting bilong em, olsem na em i tok tru antap bilong strongim tok bilong em yet. – Hibru 6:17
Sampela ol Kristen i tok olsem yumi no ken tok tru antap taim yumi kamap long kot. Na em i tru, i nogut long tok tru antap long planti ol arapela taim (Sapos yupela i tok “yes” orait “yes” em inap), tasol insait long kot, long ai bilong Jas, em i gutpela samting.
Yumi nidim dispela pasin bilong tok tru antap bikos olgeta manmeri i no tok tru olgeta taim. Yumi i no inap bilipim olgeta tok bilong man. Yumi ol i lain bilong giaman, tasol taim yumi tok tru antap, yumi save olsem yumi sanap long ai bilong God, na em i no inap giaman, na yumi tok, “Mi promis long autim tok tru tasol, na olgeta tok tru, na God i ken helpim mi.”
Tasol long dispela teks God yet i tok tru antap. Olsem wanem? God i no inap long giaman. Olsem na, bilong wanem em i tok tru antap?
God yet i laik helpim yumi, bikos em i save olsem bilip bilong yumi i no strong tumas. Em i laik soim yumi klia tru olsem ol promis bilong em i tru tru. “Olsem na nau i gat tupela tok i stap, em promis bilong God na dispela tok tru antap em i bin mekim. Tupela i no inap senis, na long dispela tupela tok God i no inap tru long giaman” (lain 18).
Em i wok bilong sios long autim tok bilong God na long wokim ol sakramen. Sapos sios em i bihainim stretpela pasin long dispela tupela samting, em bai i strongim sios na em bai i strongim wok bilong kingdom bilong God. Tupela sakramen (baptais na Holi Kaikai) i no putim sampela samting antap long tok bilong God. Nogat, ol i strongim tok bilong God, dispela tok yumi bilipim pinis.
Tok bilong God na tupela sakramen i olsem ol promis na tok tru antap bilong God. God i banisim yumi long “yes” bilong em na long “amen.” Olsem tasol em i strongim yumi na yumi ken bilipim em tru tru.
SAMPELA TINGTING
Wanem samting i save strongim yu long bilipim tru ol promis bilong God?
Ritim: Hibru 5:8-17
Yupela i kamap Kristen longpela taim pinis, na inap yupela i wok long skulim ol arapela long ol tok bilong God. Tasol nogat. Yupela i sot long tingting, na ol arapela man i mas skulim yupela gen long ol namba wan hap tru bilong tok bilong God. Yupela i no redi yet long kisim strongpela kaikai. Nogat. Yupela i dring susu i stap yet. – Hibru 5:12
Taim man i raitim buk Hibru i laik skulim ol lain long wok bilong Krais olsem hetpris, em i wari long ol, nogut ol i no inap long kisim tok bilong em. Ol i stap Kristen longpela taim, na inap ol i wok long skulim ol arapela long tok bilong God. Tasol ol i no redi yet long kisim strongpela kaikai. Nogat. Ol i dring susa i stap yet.
Na i tru olsem bilip bilong yumi mas kamap olsem bilip bilong ol pikinini sapos yumi laik i go insait long kingdom bilong God. Tasol dispela i no min olsem yumi mas i stap olsem ol pikinini long bilip bilong yumi. Olgeta lain i mas kamap nupela, sapos ol i laik lukim kingdom bilong God. Tasol i no min olsem yumi mas i stap olsem ol bebi tasol long bilip bilong yumi.
Planti taim ol lain long kain kain sios i wok long skulim ol pikinini tasol. Planti ol bikpela manmeri i no save lainim planti samting moa long Buk Baibel, na i olsem ol i save long tok bilong God wankain olsem ol yangpela pikinini i save long en tasol. Ol i stap long mak we ol i inap long skulim ol arapela, tasol ol i dring susu i stap yet.
Yumi i gat nid long kisim skul! Sapos ol lain bilong sios i klia tru long tok bilong God, Satan bai i no inap long bagarapim ol doktrin na bilip insait long sios.
Em tru, yumi mas klia long ol nambawan tok long Buk Baibel, tasol yumi i mas wok long kisim save antap long ol dispela tok tu. Yumi mas i go dip insait long tok bilong God, na kisim bikpela save moa. Sapos nogat, yumi mas lukaut. Nogut yumi lusim ol liklik samting yumi holim pinis.
Sios bilong God, na ol lain bilong sios tu, ol i mas wok strong long skulim ol lain long sios. Em tru olsem dispela hevi bilong bilip i no strong tumas i save kamap long kain kain rot olsem sin, les long prea, sindaun wantaim ol lain nogut na i go i go. Tasol namba wan as bilong dispela hevi bilong bilip i no strong tumas, em i taim yumi no klia tru tru long olgeta tok insait long Buk Baibel.
SAMPELA TINGTING
Hau bai yu yet, long laip bilong yu, i wok long kisim sampela moa save long God na Tok bilong em?
Ritim: Hibru 5:1-10
Jisas em i Pikinini Bilong God, tasol em i karim pen, na dispela i skulim em tru long pasin bilong bihainim tok bilong God. Dispela i mekim em i kamap nambawan man tru bilong bihainim tok. Olsem na God i makim em na i tok, “Yu stap hetpris, wankain olsem Melkise- dek,” na em i kamap Man bilong helpim na kisim bek olgeta manmeri i bihainim tok bilong em, bai ol i stap gut oltaim oltaim. – Hibru 5:8-10
Taim Buk Baibel i tok olsem Krais i kisim skul “long pasin bilong bihainim tok bilong God,” i no min olsem Krais i mas lainim pasin bilong bihainim tok bilong God. Nogat. I min olsem long olgeta bikpela pen em i karim, em i lainim olsem em i hat tru long bihainim tok bilong God.
I luk olsem dispela teks long buk Hibru i tingim taim bilong bikpela pen bilong Krais long gaden Getsemani. Long Getsemani em i krai nogut tru na em i kisim save long laik bilong God long laip bilong em, na dispela laik bilong God em i hat tru! Long pen em i karim, em i kamap klia long pasin bilong bihainim tok bilong God.
Na Krais i kamap nambawan man tru bilong bihainim tok. Em i no mekim wanpela sin, tasol long bihainim olgeta tok bilong God, Krais i kamap long mak God i makim bilong en. Em i bihainim tru olgeta tok bilong God long olgeta bikpela traim tru God i givim long em, na taim em i mekim olsem em inapim tru pasin bilong bihainim tok bilong God.
Na “em i kamap Man bilong helpim na kisim bek olgeta manmeri i bihainim tok bilong em, bai ol i stap gut oltaim oltaim.”Wankain olsem Pikinini bilong God i bihainim Papa bilong em, yumi yet i mas bihainim Pikinini bilong God. Dispela salvesen Krais i kisim i kam long yumi taim em i bihainim tok bilong Papa bilong em, i samting bilong ol lain i redi long bihainim em tasol.
Olgeta taim yumi mas tingim olsem Jisas em i man bilong kisim bek yumi. Yumi kisim salvesen bikos em yet i bihainim olgeta tok bilong God, na i no olsem yumi yet i bihainim em gut tru. Tasol, nogut yumi ting yumi no gat nid long bihainim tok bilong God bikos em yet i bihainim olgeta tok bilong God. Yu no ken tok olsem yu bilip long Krais sapos yu les long bihainim em.
Sapos wanpela man i ran i kam insait long haus bilong yu na singaut strong, “Lukaut, haus bilong yu paia, ya. Yu ranawe hariap!” orait, sapos yu bilipim em, bai yu bihainim tok bilong em na ranawe na lusim haus bilong yu. Olsem tasol bilip na pasin bilong bihainim tok bilong God i save pas wantaim. I no gat narapela rot long bilip. Yumi mas bilipim God na bihainim em.
SAMPELA TINGTING
Yu yet yu lainim pasin bilong bilipim God na bihainim em?
Ritim: Hibru 4:11-16
Yumi yet i no gat strong bilong daunim sin. Tasol yumi no ken ting, dispela hetpris bilong yumi em i no inap sori long yumi. Nogat. Olgeta traim i save kamap long yumi, dispela olgeta i bin kamap pinis long em bilong traim em tu. Tasol em i no mekim sin. Olsem na yumi ken i go klostu long God, na yumi no ken pret. Em i man bilong marimari. Yumi go long em, na bai yumi lukim em i sori long yumi. Na sapos yumi gat hevi, orait marimari bilong em bai i helpim yumi. – Hibru 4:15-16
Sampela taim yumi i ting olsem ol arapela i no inap save tru long ol hevi bilong yumi. “Yu
no save tru long ol hevi mi yet mi save bungim long laip bilong mi, ya.” Sampela taim yumi bai autim dispela kain tok bikos yumi les long lusim sampela sin bilong yumi, na yumi les long ol arapela i kotim yumi long sin bilong yumi. Tasol sampela arapela taim yumi bai autim dispela kain tok bikos yumi ting tru tru i no gat wanpela i save tru long ol hevi bilong yumi.
Tasol, yumi no inap tok olsem Krais i no save sori long yumi, na em i no save long ol hevi bilong yumi. Olgeta traim i save kamap long yumi, dispela olgeta i bin kamap pinis long em bilong traim em tu. Em i save long olgeta pen na hevi bilong yumi na em i save olsem yumi i no gat strong.
Krais em i kamap man olsem yumi, tasol em i no gat sin. Olsem man, em i save long taim bodi bilong yumi i les. Ol arapela man i bin givim pen long em tu. Em i bin pilim planti pen tru, na em i bin pret long dai. Em tu i save long ol traim i wok long kam long man. Tasol em i no mekim sin.
Dispela teks i no tokim yumi olsem Krais bai lusim ol sin bilong yumi hariap bikos em yet i bin bungim ol traim long laip bilong em. Nogat, dispela teks i laik tokim yumi olsem yumi ken i go klostu long God, na yumi no ken pret, bikos em i sori long yumi; em i marimari long yumi bikos em yet i save long ol hevi bilong yumi. Em i save. Na em tasol inap long helpim yumi.
Krais i gat bikpela marimari na sori long yumi, tasol moa yet, em i gat bikpela pawa tru. Nau em i sindaun long sia king bilong God. Olsem na yumi no ken pret long go long em. Yumi mas bilip tru na go long em.
Yumi no ken askim Krais long marimari long yumi tasol, yumi ken askim em long helpim yumi tu. Yumi inap askim em long rausim ol hevi bilong yumi long marimari bilong em o long givim strong long yumi bilong wokabaut long ol hevi na traim. Tasol bikpela samting long ol prea bilong yumi i olsem: yumi mas askim Krais long helpim yumi abrusim ol sin taim yumi wokabaut long ol traim, olsem Krais yet i mekim taim em i bungim ol traim long laip bilong em.
SAMPELA TINGTING
Wanem ol hevi na traim i stap long laip bilong yu long tude? Yu save go long God, na no ken pret, long askim em long sori long yu na helpim yu?
Ritim: Hibru 4:1-10
Olsem na yumi save, ol manmeri bilong God bai i gat malolo i stap yet, em i olsem malolo bilong de Sabat. – Hibru 4:9
Yumi wok long kamap long dispela malolo bilong de Sabat. Em i las promis bilong God, na em bai inapim olgeta promis bilong em; na ol lain i harim tok bilong God long nau, ol bai i kisim.
God inapim olgeta wok bilong em long kamapim na wokim dispela graun long sapta 1 long buk Stat, long de Sabat. Long de Sabat, God na olgeta samting em i wokim i amamas long naispela na gutpela wok stret bilong God. Na wankain olsem, God bai inapim wok bilong em bilong kisim bek yumi, long malolo bilong de Sabat. Long dispela de, God na olgeta lain bilong em bai amamas long gutpela wok stret bilong God.
Malolo em i samting bilong amamas long God na wanem samting em i givim yumi. Dispela malolo bai i kamap bihain, em bai i stap bilong inapim tru olgeta malolo, na amamas long nupela graun bai i naispela olgeta na bai i no inap pinis.
Long Olpela Testamen ol lain bilong God i kisim tok piksa long malolo bilong de Sabat long taim ol i malolo long wan wan wik, na tu long dispela graun em i promis long givim ol. Nem bilong dispela man i go pas long lain Israel taim ol i lusim ples drai na wokabaut i go long dispela graun, em i Josua. Long Tok Grik dispela nem em i Jisas. Dispela Josua (Jisas bilong Olpela Kontrak) inap long kisim lain Israel i go long dispela graun God em i promis long givim ol, na dispela graun em i tok piksa tasol long dispela graun God i promis long givim yumi long wok bilong Jisas long Nupela Kontrak. Jisas inapim tru olgeta samting Moses na Josua i mekim. Jisas i wok long kisim ol lain bilong God i go long dispela graun God i promis long givim ol.
Tude God yet i singautim yumi long lainim sampela samting long ol kranki pasin bilong
ol Israel. Em i hat tru. Tasol dispela nupela Israel (yumi) i mas lainim sampela samting long olpela Israel (long Olpela Kontrak). Buk Baibel i soim yumi olsem planti bilong ol lain bilong God long Olpela Kontrak i no bin go insait long malolo bilong dispela graun em i promis long givim ol. Ol i pundaun na i dai long ples drai, bikos ol i no bilip tru.
Nau yumi wokabaut long rot long ples drai. Jisas i go pas long yumi. Yumi yet i mas i stap klostu long em na bihainim olgeta tok bilong em. Na tu yumi mas i stap klostu long ol arapela bilip lain. Na taim yumi bungim ol hevi long dispela rot, yumi mas tingting long taim bihain na tok, “Lukluk, graun bilong malolo tru i stap!”
SAMPELA TINGTING
Dispela teks inap long strongim yu taim yu bungim ol hevi long laip bilong yu, o nogat?
Ritim: Hibru 3:7-14
Olgeta de yumi save kolim “Nau” tasol. Olsem na long olgeta de yupela wan wan i mas givim gutpela tok long ol arapela manmeri bilong God, na kirapim tingting bilong ol, nogut pasin bilong sin i giamanim wanpela bilong yupela na em i pasim strong bel bilong en. – Hibru 3:13
God i givim yumi las tok long ol las de pinis. Na i no gat wanpela samting i bikpela samting moa long yumi olsem yumi harim na bihainim dispela tok. Long Olpela Testamen planti lain i harim tok bilong God, tasol ol i lus yet. Na dispela em i olsem strongpela tok long yumi tu. Yumi mas was gut: “Nogut wanpela brata namel long yupela em i gat tingting nogut long bel bilong en na em i lusim bilip na i givim baksait long God i gat laip” (lain 12).
Bikos rot bilong yumi i olsem ples nogut, na sin i wok long giamanim na grisim yumi, ol Kristen i mas pas wantaim ol lain bilong sios we ol i save was gut long ol memba bilong sios. Insait long dispela bung, ol Kristen i mas givim gutpela tok long ol arapela. Long wan wan de yumi nidim helpim bilong stap strong long bilip na gutpela pasin. Yumi nidim dispela strong, na yumi mas givim dispela strong long ol arapela tu long laikim tru.
Buk Baibel i skulim olgeta Kristen sios long mekim olsem. Tasol planti lain long kain kain sios long tude i save go long sios long Sande bilong kisim sampela gutpela tok long wanpela pasto long kisim strong. Tasol long ol arapela de insait long wan wan wik ol i bisi tumas, na ol i lus tingting long givim gutpela tok long ol arapela manmeri bilong God long ol arapela de.
Na sapos yumi les long bung insait long wanpela sios wantaim ol arapela manmeri i bilip long God, i min olsem yumi no bilipim tru las tok bilong God, na yumi no klia tumas long pawa bilong sin long giamanim na grisim yumi.
Buk Baibel i tok, “Olgeta de yumi save kolim ‘Nau’ tasol. Olsem na long olgeta de yupela wan wan i mas givim gutpela tok long ol arapela manmeri bilong God.” Nau em i taim bilong kisim marimari bilong God, dispela taim we God i autim tok long yumi long Jisas Krais. Nogut yumi pasim strong bel bilong yumi, na yumi bihainim giaman tok bilong sin. Pastaim bai yumi no wari tumas long ol sin bilong yumi, na bihain bai yumi no inap harim na bihainim wanpela samting long tok bilong God.
Yumi mas sanap strong tru, na sanap wantaim ol arapela bilip lain. Yumi nidim ol arapela bilip lain long stap strong long bilip. Sapos nogat, Satan bai i painim rot long kam long yumi.
SAMPELA TINGTING
Ol lain long sios bilong yu i save givim gutpela tok long yu, o nogat? Na yu yet yu save strongim ol arapela manmeri bilong God, o nogat?
Ritim: Hibru 3:1-6
Moses em i stap olsem wokman bilong God... Tasol Krais em i Pikinini Bilong God, na em i gat wok bilong bosim ol manmeri i stap olsem haus bilong God. Na em i bihainim tru tok bilong God na i mekim dispela wok. Na sapos oltaim yumi bilip strong na yumi amamas na wetim Bikpela i mekim gut long yumi, orait yumi tu i stap olsem haus bilong God. – Hibru 3:5-6
Dispela pas i go long lain Hibru i save skelim dispela olpela kontrak wantaim dispela nupela kontrak, long putim ples klia olsem dispela nupela i winim dispela olpela.
Dispela teks i skelim Moses, namel man bilong olpela kontrak, wantaim Krais, long em yumi kam insait long nupela kontrak. Em i klia – Moses em i gat namba, tasol Krais i winim em na em i gat namba tru!
Tupela wantaim i save bihainim tok bilong God. Moses i olsem wokman bilong God, na Krais i stap olsem Pikinini bilong God. Moses i bihainim tok bilong God insait long haus bilong God; Krais, olsem Pikinini bilong God, i bosim haus bilong God.
Buk Baibel i save kolim Israel “haus bilong God,” na long Nupela Testamen sios bilong God tu i olsem haus bilong God tu. Na em i bikpela samting moa long stap wanpela bilong dispela sios Krais yet i bosim, olsem long stap olsem haus bilong God long taim bilong Moses, dispela wokman bilong God.
Planti Kristen lain i tok olsem ol lain Juda i gat namba bikos ol i stap lain bilong God. Tasol long dispela teks God i skulim yumi olsem haus bilong God long Nupela Testamen i winim tru haus bilong God long Olpela Testamen. Bilong wanem? Bikos Jisas i winim Moses.
Ol Hibru lain i kisim dispela pas, ol i lain Juda, na ol i kamap Kristen long bihainim Jisas. Na man i raitim dispela pas i laik soim ol olsem ol i lusim haus bilong Moses na kamap long sios bilong Krais. Na dispela i gutpela samting bikos sios bilong Krais i winim haus bilong Moses. Na ol bai i stap lain bilong haus bilong God inap oltaim sapos ol i wokabaut insait long dispela fridom na hop God i givim ol long Krais.
Buk Baibel i laik soim yumi olsem em i bikpela na naispela samting tru long stap insait long sios bilong Nupela Testamen. Em i winim wanem samting ol lain bilong Olpela Testamen i bin kisim. Na tu, yumi mas klia gut olsem Krais i bung wantaim haus bilong em, na tupela i save pas wantaim.
SAMPELA TINGTING
Man i raitim buk Hibru i tokim yumi olsem yumi stap olsem haus bilong God. Dispela i gat wanem mining insait long laip bilong yu?
Ritim: Hibru 2:14-18
Ol dispela pikinini Jisas i tok long en, em ol manmeri tasol. Olsem na Jisas tu i kamap man wankain olsem ol, bai em i ken i dai, na long dispela pasin em i ken bagarapim Satan, em dispela man i gat strong bilong mekim ol manmeri i dai. Ol manmeri ol i save pret long dai, na olgeta taim ol i stap long graun, dispela pret bilong ol i mekim ol i stap olsem ol kalabus bilong Satan. Tasol Jisas em i dai bilong lusim ol long dispela kalabus. – Hibru 2:14-15
Yumi manmeri tasol. I min olsem yumi no gat strong na yumi bai i dai. Na bikpela samting long ol manmeri i olsem: Ol i laik stap laip, na namba wan pret bilong ol em i dai.
Yumi save wok strong long haitim ol pret bilong yumi, tasol yumi no inap. Dai i save stap klostu long yumi olgeta. Tasol maski em i stap klostu long yumi, yumi no save redi long bungim em. Planti taim yumi no tingting tumas long dai, bikos yumi laik i stap laip tasol.
Tasol yumi no ken wok long haitim olgeta pret bilong yumi. Laik bilong yumi long stap laip, na pret bilong yumi long dai, em i samting bilong ol man na meri tasol. I no olsem yumi mekim sin taim yumi les long dai; nogat, yumi man tasol. Na God i save olsem yumi man tasol.
Dispela pikinini bilong God i stap oltaim oltaim, em i kamap pikinini bilong man, na em i kamap wankain olsem yumi. Olsem na, olsem man tru em i gat laik long stap laip na em i no gat laik long dai.
Tasol long laip na long dai bilong Jisas, bikpela senis i kamap long laip na dai bilong yumi. Jisas i no rausim dai. Olgeta man bai i dai yet. Tasol dai i kamap olsem wokboi bilong Jisas. Long olgeta lain i bilip long em, Krais i rausim pret bilong dai.
Bikos Krais yet i bin i stap laip olsem yumi na em i bin dai wankain olsem yumi bai i dai, senis i kamap. Long dai, Krais em i bagarapim Satan, em i bin holim pawa bilong dai. Em i winim Satan, na laip bilong yumi ol man i kamap narakain. Dai i no olsem kalabus bilong Satan nau. Em i liklik hap rot yumi mas i go long em bilong kamap long Krais.
Tude, Krais i wok long helpim yumi i stap fri long pret, na pulap long bilip. Na taim las de bai i kam, em bai strongim yumi long bilip olsem yumi bai i kamap klostu long em.
SAMPELA TINGTING
Krais i kamap man wankain olsem yu. Dispela i helpim yu long taim bilong dai bilong yu yet olsem wanem?
Ritim: Hibru 2:5-13
Olsem na em (Jisas) i save kolim ol “brata,” na em i no sem long kolim ol olsem. – Hibru 2:11
Sampela taim wanpela gutpela man bai i gat brata, na dispela brata i man nogut. Na planti taim ol gutpela man bai sem long dispela kain brata.
Tasol, long dispela tok long Hibru 2:11 yumi inap kisim bikpela bel isi: Pikinini bilong God em i no sem long kolim yumi “brata” bilong em.
Dispela pikinini bilong God i bin i stap oltaim oltaim, em i lukim yumi i mekim bikhet pasin long dispela graun. Na em i lukim yu na mi, na em i daunim em yet na kisim pen na bagarap long yumi. Yumi stap long kalabus long sin bilong yumi, na yumi i manmeri nogut olgeta. Na em i tokim papa bilong em:“Papa, ol man yu yet yu wokim, ol i lus na ol i dai i stap. Mi laik i go na helpim ol. Mi laik kamap man olsem ol na stap laip wantaim ol. Na mi laik dai long ol tu. Mi laik kamap olsem brata bilong ol, olsem ol inap kamap pikinini bilong yu.”
Olsem tasol Krais i kam bilong helpim yumi. Em i go pas long yumi, long ples bilong bagarap, long sin na dai na hel, na olsem tasol em i opim rot i go long Papa. Wantaim amamas tru em i sanap long ai bilong Papa bilong em gen na em i tok, “Lukim. Mi stap wantaim ol dispela pikinini God i bin givim long mi” (lain 13).
Jisas em i no sem long yumi!
Sapos yumi tingting gut long dispela tok i tru, na sapos yumi tingim sampela taim we yumi i sem long Jisas, bai yumi klia olsem yumi i gat bikpela asua tru.
Sapos yumi tingting gut long dispela tok i tru olsem Jisas em i kolim yumi, “brata,” na em i
no sem long kolim yumi olsem, hau bai yumi i gat laik long lusim em na i stap wantaim ol maniman na man i gat namba long dispela graun? Nogat. Jisas em i no sem. Em i kisim yumi na pas wantaim yumi, olsem tasol yumi mas amamas tru long wanbel wantaim ol arapela brata na susa bilong em, maski ol i rabisman tru.
Taim yumi klia olsem yumi no mekim wanpela samting na Krais i laikim tru yumi, yumi no inap sem long ol arapela lain bilong em.
SAMPELA TINGTING
Jisas i kolim yu “brata” o “susa” bilong em. Dispela i gat wanem mining long laip bilong yu yet?
Ritim: Aposel 1:1-8
...Pastaim Bikpela yet i bin autim tok long em i laik kisim bek yumi. Na ol man i harim tok bilong em, ol i bin tokim yumi olsem, “Dispela tok em i tru tasol.” Na God i mekim ol kain kain mirakel na olkain strongpela wok, na em i tilim ol presen bilong Holi Spirit long ol manmeri, inap long laik bilong em yet, na long dispela pasin em i soim olsem dispela tok bilong Pikinini bilong en, em i tru olgeta. – Hibru 2:3-4
Ol tok long Nupela Kontrak i olsem las tok bilong God long las de. Tasol yumi i kisim dispela gutnius long Buk Baibel, olsem wanem? Dispela buk i no pundaun nating long heven. Nogat, em i gat stori bilong em yet.
Pastaim BIkpela yet i bin autim dispela tok. Wanem samting Krais i mekim na wanem samting em i tokaut long em, ol dispela em i gutnius bilong God i go long olgeta manmeri bilong em. Gutnius i kamap olsem pastaim.
Tasol Krais i no autim tok na mekim wok bilong em long dispela graun tasol. Nogat, em
i wok tu long redim sios long olgeta samting bai i kamap bihaintaim. Em i larim sampela gutpela witness i stap, olsem ol lain i harim tok bilong em na lukim wok bilong em, na ol i tok, “Dispela tok em i tru tasol.” Ol 12-pela aposel i ol dispela man, na ol i bin stap wantaim Krais taim em i mekim wok. Na Krais i bin soim em yet long ol dispela aposel taim em i kirap gen long dai.
Na ol dispela man i autim tok long ol lain long graun. Na God yet i strongim tok bilong em taim em i “mekim ol kain kain mirakel na olkain strongpela wok, na em i tilim ol presen bilong Holi Spirit long ol manmeri.”
I gat planti hap long Buk Baibel we yumi i ritim ol stori long dispela kain samting i bin kamap. Long Aposel 3 yumi ritim olsem wanpela man lek nogut i kalap na wokabaut taim aposel Pita i tokim em long mekim olsem. Na long Aposel 9 yumi i ritim stori long God i kirapim wanpela meri i dai pinis. Olsem tasol God yet i strongim tok bilong ol aposel, olsem ol lain i ken harim na bilipim.
Na bihain ol aposel i dai. Tasol ol bilip lain i wok long bihainim tru ol dispela tok ol aposel
i skulim ol long em. Ol i save olsem tok bilong ol aposel i bikpela samting stret. God yet i lukautim dispela tok. Sampela man i raitim ol dispela tok long ol aposel na yumi i kisim long Buk Baibel olsem Nupela Kontrak. Em i las tok bilong God long ol las de. Sapos yumi i holim pas dispela tok, bai yumi no inap lus. Tasol sapos yumi givim baksait long dispela tok, bai yumi bungim dai bilong oltaim oltaim.
SAMPELA TINGTING
God i lukautim gut tru dispela tok bilong yumi i ken kisim. Dispela i soim wanem samting long pasin bilong God?
Ritim: Hibru 2:1-4
Olsem na sapos yumi givim baksait long dispela wok bilong God, olsem wanem na bai yumi ranawe na abrusim pe bilong sin? – Hibru 2:3
Bipo tru, God i autim tok long Maunten Sainai long Moses. God i tokim ol lain bilong em long wanem samting ol i mas mekim; na tu em i tokaut long pe nogut bilong ol lain i sakim tok bilong em. Olgeta sin i gat pe nogut bilong em.
Nupela Kontrak i no wankain olgeta. I no olsem olgeta wan wan sin bilong yumi i gat pe nogut bilong en. Tasol dispela i no min olsem ol lain i sakim Tok Tru bilong God bai abrusim pe nogut bilong sin. Ol lain i givim baksait long Jisas, God bai i mekim save long ol - “Olsem na sapos yumi givim baksait long dispela wok bilong God, olsem wanem na bai yumi ranawe na abrusim pe bilong sin?”
Na sapos ol lain bilong bipo i bin kisim pe nogut inap long pasin nogut ol i bin mekim, olsem wanem bai yumi i ranawe na abrusim pe bilong sin? Yumi yet i stap long las de. Yumi yet i kisim las tok bilong God.
Dispela teks i tok, “sapos yumi givim baksait long dispela wok bilong God...” I gat sampela lain long tude i wok strong tru long bagarapim God na tok bilong em tu. Na ol bai i kisim pe nogut long dispela. Tasol dispela teks i stori long ol lain i givim baksait long dispela wok bilong God. I gat planti lain long tude i givim baksait long God. I no olsem ol i wok long bagarapim tok bilong em olgeta taim. Nogat. Ol i les tasol. Ol i no harim tok. Ol i bihainim laik bilong ol yet.
Buk Baibel i klia olgeta – sapos yumi i givim baksait long dispela wok bilong God, hau bai yumi i ranawe na abrusim pe bilong sin? Bai yumi no inap tru.
SAMPELA TINGTING
Sampela taim yu yet i givim baksait long wok bilong God, o nogat? Askim God long helpim yumi i bihainim tok bilong em olgeta taim.
Ritim: Hibru 1:1-4
Bipo long planti taim na long planti pasin God i bin givim tok long ol tumbuna bilong yumi long maus bilong ol profet. Tasol long dispela taim nau, em long taim bilong las de, God i bin autim tok long yumi long maus bilong Pikinini Man bilong em. – Hibru 1:1,2
Nupela Kontrak i save brukim stori bilong ol samting i bin kamap bipo (olsem histori) long tupela hap – taim bipo long Krais i kam long dispela graun, na taim bihain long Krais i kam long dispela graun.
Long dispela tupela hap wantaim, God i save stori long lain bilong em – ol lain i harim tok bilong em long maus bilong ol man. Tasol rot em i yusim long autim dispela tok bilong em i senis, na i no wankain. Long taim bipo long Krais i kam long dispela graun, God i save yusim maus bilong ol profet long autim tok bilong em long lain bilong em. Dispela tok “profet” i min olgeta lain i autim tok bilong God olsem Moses na Devit na Aisaia wantaim. Tasol nau, long las de, God i autim tok long yumi long maus bilong “Pikinini Man bilong em.”
Yu na mi i stap long las de – na God i autim tok long yumi long maus bilong Pikinini bilong em. Dispela pas i go long ol Hibru lain i soim yumi olsem ol tok God i givim yumi long Krais em i las tok bilong em. Olgeta sapta long dispela buk i soim dispela.
Na dispela tok “las tok bilong God,” i gat wanem mining?
Namba wan samting i olsem: em i las tok bilong God bikos em i olgeta tok bilong em. Em i no tok tru tasol, em i olgeta tok tru bilong God. God i opim bel bilong em olgeta long yumi na i no gat sampela samting i stap yet long ples hait. Sampela lain i pret bikos ol i ting i gat sampela samting bilong God i stap long ples hait, na ol i pret bikos ol i no klia tumas long God. Tasol nogat. God i autim tok pinis long olgeta samting yumi i gat nid long harim, long Krais, pikinini bilong em.
Namba tu samting i olsem: em i las tok bilong God bikos em i las tok tru. I min olsem yumi no ken wetim sampela narapela tok bilong God. Yumi kisim olgeta tok pinis. Sampela taim bai yumi gat laik long kisim sampela nupela tok i kam long God, sampela tok bai i winim tok yumi kisim pinis. Tasol nogat; yumi kisim las tok bilong God pinis.
Sampela lain bilong tude i laik giamanim yumi olsem ol i kisim sampela nupela tok bilong God. Tasol yumi no ken paul. Sapos yumi klia long wok na tok bilong God i kam long yumi long Krais, i min olsem yumi kisim pinis las tok bilong God bilong ol dispela las de.
SAMPELA TINGTING
Dispela tok, “las tok bilong God,” i gat wanem mining insait long laip bilong yu yet?
Ritim: Rom 16:25-26
Dispela gutnius i bin i stap hait.. tasol nau God i bin kamapim ples klia. God i save stap oltaim, em i bin tok, na mipela i autim long olgeta lain manmeri dispela tok bipo ol profet i bin raitim... God i bin mekim olsem bai ol manmeri bilong ol dispela lain i ken bilip long em na mekim ol pasin em i laikim. – Rom 16:25-26
Taim Pol i pinisim dispela pas bilong em, em i autim dispela tok long bilip gen, olsem em i bin autim long sapta 1 lain 5: taim ol manmeri i bilip bai ol i i bihainim tok bilong God. Na em i presim nem bilong God long dispela gutnius, dispela gutnius i bin i stap long ples hait inap long taim God i kamapim ples klia taim Jisas i kam. Na nau dispela gutnius i wok long go aut long olgeta lain manmeri long dispela graun. Na “God i bin mekim olsem bai ol manmeri bilong dispela lain i ken bilip long em na mekim ol pasin em i laikim.”
Olsem na, bilip tasol em i as bilong mekim ol pasin God em i laikim. Na pasin bilong autim tok bilong God em i bikpela samting bikos dispela bai kamapim bilip na bilip bai kamapim ol pasin God em i laikim. Taim ol lain i harim tok, ol bai bilip na bihainim ol pasin God em
i laikim. Bilong wanem ol i autim tok bilong God? Olsem ol lain i ken bilip na bihainim tok bilong God.
Dispela gutnius i no wanpela nupela lo. Gutnius i wok long kamapim bilip long Jisas olsem Bikpela bilong yumi. Bilip em i samting bilong harim tok bilong God na bihainim.
Dispela gutnius i no samting bilong harim long yau bilong yumi tasol. Em i samting bilong harim na bihainim wantaim. Tok bilong gutnius i tokim yumi olsem, “Yu kamap nupela long Jisas Krais.” Dispela em i tok yumi mas bilipim. Na em i tok moa: “Orait, nau yu mas wokabaut olsem wanpela nupela man long Jisas Krais.” Em i samting bilong bihainim. Sapos yumi bilipim dispela gutnius, orait yumi bai bihainim tok bilong em tu. Na taim yumi bihainim tok bilong God, em bai putim ples klia olsem yumi bilipim dispela gutnius.
God em i gat laik sapos gutnius bilong em i go aut long olgeta hap long dispela graun. Olsem na em i makim ol wokman bilong em bilong go aut na autim tok bilong em. Em i mekim olsem bikos em i gat laik long olgeta manmeri i bilipim dispela tok na bihainim ol pasin em yet i laikim. Olsem tasol God em i kamapim dispela tok ples klia na olsem tasol em i givim yumi dispela pas Pol em i raitim long Rom.
SAMPELA TINGTING
Ritim dispela las lain long dispela buk bilong tingim bikpela wok bilong God long Jisas Krais, na litimapim nem bilong God long prea bilong yu. “Dispela God, em wanpela tasol i gat save tru. Yumi mas tingting long ol samting em i bin mekim long han bilong Jisas Krais, na yumi mas litimapim nem bilong en oltaim oltaim. I tru.”
Ritim: Rom 16:17-20
Na long liklik taim, God bilong givim gutpela sindaun na bel isi long yumi, em bai i larim yupela i krungutim Satan aninit long lek bilong yupela. – Rom 16:20
Taim Pol i klostu long pinisim dispela pas bilong em, em i tingim bung bilong ol bilip lain bilong Krais – olsem planti ol man nogut na ol giaman tisa i wok long raunim ol (lain 17-18). Tasol tu, em i strongim ol bilip lain na tokim ol long lukluk long wok bilong God: “Na long liklik taim, God bilong givim gutpela sindaun na bel isi long yumi, em bai i larim yupela i krungutim Satan aninit long lek bilong yupela.”
Planti taim Buk Baibel i wok long stori long God olsem God bilong givim ol samting long yumi, olsem, “God bilong marimari” na “God bilong givim tingting long yumi” na “God bilong mekim isi bel bilong olgeta man i gat hevi.” Bilong wanem? Bilong soim yumi olsem God em i as bilong olgeta gutpela presen em i givim long yumi. Long hia Pol i kolim em “God bilong givim gutpela sindaun na bel isi long yumi.”
Taim yumi kolim God dispela “God bilong givim gutpela sindaun na bel isi long yumi,” i gat bikpela mining. Em tru, i gat dispela mining olsem yumi wanbel wantaim God long wok bilong Jisas Krais. Tasol tu i min olsem God em i God bilong bel isi - bilong shalom.
Dispela tok shalom em i tok Hibru, na em i gat dispela mining: Bel isi na gutpela sindaun, stap orait na stap gut, pasin bilong wanbel na stap isi. Em i bel isi tru bilong kingdom bilong God. Na dispela “God bilong givim gutpela sindaun na bel isi long yumi,” em i kisim dispela kingdom i kam.
God i wok long kisim dispela kingdom i kam, dispela kingdom bai i stap oltaim oltaim, long pasin bilong bagarapim wok bilong Satan. “Em bai i larim yupela i krungutim Satan aninit long lek bilong yupela.”Taim em i autim dispela tok, Pol i tingim tok long buk Stat 3:15. God inapim dispela promis long Stat.
Satan em i bikpela samting bilong bagarapim gutpela sindaun na bel isi. Taim Satan yet em i bagarap pinis, shalom (bel isi) bai i stap gen. Long wok bilong Jisas Krais.
SAMPELA TINGTING
Sios bilong yu i save wok strong long mekim bel isi i go long olgeta manmeri long dispela graun?
Ritim: Rom 15:14-21
Mi no ken tokaut long narapela samting. Nogat. Mi laik tokaut long dispela wanpela sam- ting tasol. Mi laik stori long wok Krais i bin mekim long han bilong mi. Em i bin helpim toktok bilong mi na mekim ol gutpela wok long han bilong mi. – Rom 15:18
God em i laik yusim yumi long winim ol arapela man long Krais, long kisim ol i kam bihainim em.
Taim dispela samting i kamap, yumi no ken apim nem bilong yumi yet. Sapos yumi laik stori long dispela kain samting, yumi mas toktok wankain olsem Pol: “Mi laik stori long wok Krais i bin mekim long han bilong mi.”
Wok bilong Krais i no pinis long taim em i go antap long heven. Tude Krais i mekim wok long han bilong yumi. Pol i soim olsem wok bilong Krais i go yet: “Mi laik stori long wok Krais i bin mekim long han bilong mi.”
Laip bilong ol Kristen na laip bilong Kristen sios i gat namba bikos God i save givim wok long yumi long mekim. Ol Aposel i autim gutnius, na long buk Rom yumi lukim dispela gutnius
i go aut long ol arapela. God i save yusim ol Kirsten long kisim ol arapela manmeri i kam lotuim em.
Yumi i klia – Jisas i stap laip! Yumi i klia tu – Krais em i mekim wok yet! Tasol bikpela askim i olsem: Ol Kristen i redi long kamap wokman na wokmeri bilong Krais, bilong mekim wok bilong em long salim gutnius i go aut long planti manmeri?
Yu inap stori long wok Krais i mekim long han bilong yu bilong kisim ol arapela man na meri i kam long em? Na long dispela askim yumi ken tingting long sios bilong yumi tu. Wok bilong salim gutnius i go aut (wok misin) i gat planti hap. Em i samting bilong lukautim ol rabisman, em i samting bilong mekim wok insait long gavman, em i samting bilong skulim ol Kristen tisa, em i samting long tainim tok bilong Buk Baibel long ol arapela tok ples, em
i samting long salim man i go aut long kain kain hap bilong dispela graun, na planti moa samting tu.
Krais bai i yusim olgeta memba bilong sios bilong em bilong mekim bikpela wok bilong em. “Yupela i mas prea long God i ken helpim mi,” Pol i tok (lain 30). Em i wok bilong yumi tu.
God em i wok long yusim yu long mekim wok bilong em, olsem wanem?
SAMPELA TINGTING
Askim God long helpim yu yet i redi long mekim wok bilong em.
Ritim: Rom 14:13-23
Tasol man i kaikai mit samting long taim em i gat tupela tingting long pasin em i mekim, em i gat asua, long wanem, em i no save, bilip bilong en i orait long dispela pasin, o nogat. – Rom 14:23
Taim yumi tingting long mekim sampela samting, yumi mas klia pastaim sapos dispela samting em i gutpela samting long ai bilong God o nogat. Na taim yumi gat tupela tingting long dispela pasin yumi laik mekim, orait mobeta yumi no mekim dispela samting.
Planti lain long tude ol i laik tok, “Pasin bilong mi i orait; mi no mekim sampela kranki samting, olsem na yu no ken bisi long pasin bilong mi. Mi bai mekim tasol.” Ol i les long narapela i wok long stretim pasin nogut bilong ol.
Tasol nogat. Yumi mas wokabaut stret insait long dispela fridom God i givim yumi. Jisas Krais em i kisim yumi long pawa bilong sin na pawa bilong lo. Olsem na yumi kamap wanbel wantaim God gen. Nau em i wok bilong yumi long yusim dispela fridom long mekim ol gutpela pasin long stap wanbel wantaim God olgeta taim.
Yes, bikpela lo bilong wokabaut olsem wanpela Kristen, em i samting long bilip. Maski yumi i kaikai o dring, stap laip o i dai, yumi i bilong Bikpela tasol. Na yumi i mas holim strong bilip bilong yumi olgeta taim. Bilip em i bikpela samting. Olsem na Pol i tok (lain 14), “Tasol sapos man i ting wanpela samting i doti, orait long laip bilong dispela man dispela samting i stap doti tru.” Na long lain 22 em i tok, “Bilip bilong yu i kamapim wanem tingting bilong yu yet wantaim God.” Sapos yumi i ting wanpela samting em i gutpela, na bel bilong yumi i no kotim yumi long dispela samting, em i orait. Bilip em i bikpela samting, na yumi mas stap stretpela long ai bilong God.
Buk Baibel i skulim yumi olsem ol lain i gat tupela tingting long pasin ol i mekim, ol i gat asua. Bilong wanem? “Em i no save, bilip bilong en i orait long dispela pasin, o nogat.”
Yumi mas amamas tru long stap wanbel wantaim God, na i no long wanem samting yumi lukim o kaikaim o mekim o baim. Taim relesensip bilong yumi wantaim Bikpela i bruk pinis, orait olgeta arapela samting i bruk tu. Olgeta amamas, olgeta samting yumi i kisim, olgeta de, olgeta samting yumi i no inap tok tenkyu long God long yumi i kisim, em ol i no samting bilong bilip. Em i sin; em i stap namel long yumi na God. Na em i no inap blesim yumi. Taim yumi i gat tupela tingting long pasin yumi i mekim, yumi i gat asua.
Tasol olgeta samting i givim amamas long yumi – bikpela kaikai, presen, sampela samting yumi i baim – na i “kam long bilip,” em i gutpela. Na yumi mas tok tenkyu long God na presim nem bilong em long olgeta dispela gutpela samting, bikos em yet i as bilong ol gutpela blesing yumi i save kisim.
SAMPELA TINGTING
I gat sampela samting long laip bilong yu na yu no inap tok tenkyu long God long dispela samting? Orait, yu mas lusim dispela samting!
Ritim: Rom 14:1-12
Man i save givim bel bilong em long arapela man, em i no save mekim pasin nogut long em. Olsem na man i save givim bel bilong em long ol arapela, em i save bihainim tru lo. – Rom 14:10
Taim ol pikinini i yangpela tru, papamama bilong ol i save tokim ol long wanem samting ol i ken mekim. Tasol taim ol i kamap bikpela, ol pikinini yet bai makim wanem samting ol bai mekim. Moa, em i wok bilong ol papamama bilong skulim gut ol pikinini bilong ol yet, long helpim ol i klia long wanem samting ol i ken mekim taim ol i bikpela.
Na em i klostu wankain long ol bilip lain. Long Olpela Testamen, God i mekim kain kain samting long ol Israel i mas bihainim, tasol long Nupela Testamen God i larim yumi yet i makim wanem samting yumi bai mekim. I olsem yumi i bikpela pikinini pinis. God em i mekim yumi i kamap fri, na em i wok bilong yumi long yusim dispela fridom long bihainim em.
Planti lain bilong sios i gat laik sapos ol hetman bilong sios i givim ol lo long ol long wanem samting ol i mas mekim. Na sampela taim ol hetman bai givim ol lo long ol memba long sios, maski God i no makim ol dispela lo long Buk Baibel. Ol Kristen i stap fri, na ol hetman long sios i no inap long tokim ol long mekim ol samting Buk Baibel i no tokim ol long mekim.
Tasol yumi no kamap fri bilong lus tingting long Bikpela. God em i olsem jas bilong yumi. Na yumi no ken lus tingting long dispela. Olgeta pasin bilong yumi i mas kamap gutpela, na yumi mas klia olsem God i amamas long ol pasin bilong yumi. Yumi no ken sakim tok bilong God. Yumi no stap fri long mekim olsem.
Na yumi mas bihainim lo bilong laikim tru insait long dispela fridom. Taim yumi laik kisim save long wanem samting yumi mas mekim o long wanem samting yumi no ken mekim, yumi mas tingting long laik bilong God, na tu long ol arapela manmeri tu. Yumi no ken bagarapim o givim pen long ol arapela long pasin bilong yumi.
Insait long sios bilong God yumi mas redi long strongim ol arapela. Dispela em i bikpela samting tru. Yumi mas redi long daunim yumi yet, na yumi mas redi long lusim sampela samting yumi laikim bikos yumi i laikim tru ol arapela bilip lain long sios. Bilong wanem? Bikos laikim tru ol arapela bilip lain i mas winim ol laik bilong yumi yet.
Yumi nidim gutpela save sapos yumi laik kamap gutpela na strongpela Kristen i stap gut insait long fridom God i givim yumi. Na yumi i no ken lus tingting long ol dispela samting: God tasol em i jas bilong yumi, na laik bilong em i olsem lo bilong yumi. Yumi no ken bagarapim fridom bilong ol arapela Kristen. Na laikim tru em i nambawan samting.
SAMPELA TINGTING
Yu save yusim dispela fridom God i givim bilong bihainim laik bilong God, o nogat?
Ritim: Rom 13:11-14
Yumi mas wokabaut stret, olsem man i wokabaut long san. – Rom 13:13
God yet i wokim taim bilong san na taim bilong nait. Taim bilong san em i taim bilong mekim wok na ol pilai samting. Taim bilong nait em i taim bilong slip. Ol pikinini i save lainim dispela lo hariap. Taim ol i no slip gut long nait, ol bai i no amamas tumas long moning. Na tu, taim ol bikpela man na meri i no kisim gutpela slip long nait, ol bai i painim hat tru long mekim gutpela wok long taim bilong san.
Olsem na, dispela tok long Rom 13:13 i bihainim dispela lo bilong taim bilong san na taim bilong nait. Tasol, taim Buk Baibel i tokim yumi long wokabaut stret, olsem man i wokabaut long san, em i tokim yumi long kirap na mekim wok bilong Pikinini bilong God.
God yet i makim taim bilong wok bilong Krais long kisim bek yumi. Na dispela taim i makim taim bilong yumi long kirap na mekim wok bilong em.
Ol lain i wokabaut long san, em ol i dispela lain i kisim salvesen long Jisas Krais. Ol i no stap long tudak moa. Ol lain i stap long tudak, ol i no save long Krais. Long pasin bilong ol, ol i putim ples klia olsem ol i no save long Jisas.
I gat wanpela man, nem bilong em Augustine, em i wanpela hetman long sios bilong God i stap planti yia bipo long tude, em i bin i stap long tudak. Em i man bilong mekim ol pasin nogut. Tasol God i yusim dispela teks long Buk Baibel long senisim bel bilong em, na em i kamap olsem wanpela bikpela na gutpela tisa long sios bilong God.
Na dispela teks i tokim yumi tu long stap olsem ol man i wokabaut long taim bilong san. Pasin bilong yumi mas i stap olsem lait, na olgeta lain i ken lukim bikos ol i gutpela pasin stret.
Long namba tu hap long Rom 13:13, Pol i autim tok long ol pasin bilong tudak: pasin bilong hambak nabaut na spak, pasin bilong mekim pasin pamuk na pilai nabaut long pasin doti, pasin bilong kros nabaut na bel nogut long ol arapela man. Ol Kristen i no ken bihainim ol dispela kain pasin nogut. Ol i no pasin bilong laikim tru. Nogat!
Dispela ol pasin nogut, ol lain Rom i bin mekim long taim bilong tudak. Na planti ol wankain pasin i save kamap long kantri bilong yumi tu. Tasol, olsem pikinini bilong God, olsem ol man i wokabaut long taim bilong san, yumi mas stap longwe tru long ol dispela kain pasin nogut.
SAMPELA TINGTING
Em i hat tru long stap olsem ol man i wokabaut long taim bilong san, a? Wanem samting i save pulim yu i go long ol samting bilong tudak?
Ritim: Rom 13:8-10
Man i save givim bel bilong em long arapela man, em i no save mekim pasin nogut long em. Olsem na man i save givim bel bilong em long ol arapela, em i save bihainim tru lo. – Rom 13:10
Long klia long gutpela pasin bilong laikim tru ol wantok bilong yumi, pastaim yumi mas save gut long laikim tru bilong God i kam long yumi. God em i laikim tru yumi. Dispela laikim tru i kirap long bipo tru, na long dispela laikim tru God i mekim wok long kisim bek yumi. Long Pikinini bilong em, God i putim ples klia bikpela laikim tru bilong em long ol manmeri bilong mekim sin. Na God i soim laikim tru long yumi wan wan long dispela Holi Spirit i stap long bel bilong yumi.
Nau em i wok bilong yumi long givim sampela samting. Wanem samting yumi kisim pastaim, orait dispela samting bai yumi givim long ol arapela. Yumi no inap long bihainim gut pasin bilong laikim tru olsem Buk Baibel i tokim yumi long mekim. Olsem tasol yumi no inap bihainim lo bilong God, bikos lo bilong God i tokim yumi long laikim tru ol arapela. Olsem na yumi i nidim laikim tru bilong God pastaim, na bai yumi inap long laikim tru ol arapela.
“Olsem na man i save givim bel bilong em long ol arapela, em i save bihainim tru lo.” Em i no inap long yumi i no kilim ol arapela o yumi i no hetim ol arapela. Yumi mas inapim dispela
lo bilong laikim tru. Em i no inap sapos yumi i no stilim sampela samting bilong ol arapela man. Nogat, yumi i mas lainim pasin bilong serim ol samting God i givim yumi. Na yumi mas lainim pasin bilong laikim tru long God. Taim yumi save gut long laikim tru bilong God i kam long yumi long wok bilong Krais, taim yumi kisim dispela laikim tru long wok bilong Spirit bilong God, bai yumi i stat long mekim dispela pasin bilong laikim tru ol arapela. Olsem na yumi no ken apim nem bilong yumi yet. Em i kranki pasin. Wanem samting yumi wok long givim long ol arapela man, yumi i kisim i kam long God pinis.
Sampela lain i paul long dispela skul Buk Baibel i givim yumi long pasin bilong Kristen bilong laikim tru ol arapela. Ol i ting olsem laikim tru i kisim ples bilong lo bilong God. Olsem na, ol i tok, pasin bilong laikim tru i stap pinis long bel bilong yu, na yu mas bihainim dispela bel bilong yu long mekim ol gutpela pasin.
Tasol, lo bilong God na laikim tru i save wok wantaim. Lo bilong God i askim yumi long mekim olgeta samting long laikim tru. Yumi mas kisim nupela laip na laikim tru bilong Jisas Krais pastaim, na bai yumi inap long bihainim lo bilong God.
Taim yumi bilipim gutnius bilong God, bai yumi inap long wok long inapim lo bilong God. Taim yumi save moa long laikim tru bilong God, bai yumi redi moa long bihainim lo bilong God. God yet i kamapim olgeta samting, na em i as bilong olgeta samting. Na olgeta samting i bilong em wanpela tasol – pasin bilong yumi long bihainim lo bilong em tu.
SAMPELA TINGTING
Lo bilong God na laikim tru i save wok wantaim. Yu save lukim dispela samting long laip bilong yu?
Ritim: Rom 13:1-7
Olgeta man i mas i stap aninit long ol gavman. Yumi save, i no gat wanpela gavman i kamap nating. Nogat. Olgeta wok bilong gavman i kamap long han bilong God tasol. Na olgeta gavman i stap, God yet i putim ol na ol i stap. – Rom 13:1
Planti ol sumatin i bin wok long lainim planti samting long dispela buk Rom, ol i kirap nogut taim ol i ritim dispela tok long ol gavman long dispela graun insait long dispela buk Rom.
Ol i ting olsem dispela buk i stori long dispela nupela laip na dispela nupela graun tasol. Tasol dispela hap long buk Rom i kirapim tingting bilong yumi long pawa bilong God long bosim olgeta samting long dispela graun, taim em i mekim wok bilong em long plen bilong em bilong kisim bek yumi. Na God em i wok long bosim dispela graun long han bilong ol gavman long dispela graun: “Yumi save, i no gat wanpela gavman i kamap nating. Nogat. Olgeta wok bilong gavman i kamap long han bilong God tasol.”
Tude planti lain bai kirap nogut taim ol i harim dispela tok olsem olgeta wok bilong gavman i kamap long han bilong God tasol. Hau bai olgeta wok bilong gavman i kamap long han bilong God tasol? Olsem wanem? Em tru, dispela 7-pela lain long buk Rom i no stori long olgeta samting insait long wok bilong gavman, na long olgeta samting gavman i mas mekim na long olgeta samting ol i no ken mekim.
Tasol dispela wanpela lo i tru na i tru olgeta: God em i bosim yumi long han bilong gavman bilong yumi. Ol hetman bilong gavman i olsem ol wokman bilong God long lukautim ol lain bilong kantri bilong ol. Ol Kristen i mas bihainim tok bilong gavman bilong ol bikos ol i lotuim Bikpela. Sapos man i no bihainim dispela wanpela lo, bai kantri i bagarap olgeta.
Na dispela komuniti bilong ol Kristen i no inap kamap bikpela na kamap strongpela moa long bilip sapos ol i les long onaim Bikpela taim ol i no bihainim tok bilong gavman bilong ol. Yumi i mas respektim ol lain bilong gavman taim yumi stori long ol, taim yumi bihainim ol lo bilong kantri, taim yumi i givim takis long gavman, i go i go. Sapos yumi no inap onaim God long olgeta dispela liklik samting, olsem wanem bai God inap yusim yumi long ol bikpela samting tru?
Olsem na dispela em i gutpela lo long tingim: “Olgeta wok bilong gavman i kamap long han bilong God tasol. Na olgeta gavman i stap, God yet i putim ol na ol i stap.” Long bihainim tok bilong Bikpela yumi mas bihainim tok bilong ol gavman tu.
Sapos gavman i askim yumi long mekim sampela samting i sakim o agensim Tok bilong God, orait yumi no ken bihainim dispela tok bilong gavman. Tasol long olgeta arapela samting yumi mas bihainim tok bilong gavman. Sapos yumi i sakim tok bilong gavman, i olsem yumi i sakim tok bilong God yet. Na taim yumi ol pikinini bilong God i bihainim tok bilong gavman, orait dispela i soim olsem yumi i respektim God yet na givim glori long em tu.
SAMPELA TINGTING
Yu yet yu wok long respektim gavman bilong yu, o nogat?
Ritim: Rom 12:14-21
Yu no ken larim pasin nogut i winim yu. Nogat. Yu mas mekim gutpela pasin na bai yu daun- im pasin nogut. – Rom 12:21
Gutnius i wok long senisim laip bilong yumi, na bai yumi larim God i mekim tingting bilong yumi kamap nupela na bai pasin bilong yumi i kamap nupela tu (lain 1-2). Na insait long dispela nupela komuniti – dispela sios bilong Krais – bai yumi i lainim pasin bilong bihainim Bikpela long dispela nupela laip yumi i kisim (lain 3-13). Na Buk Baibel i skulim yumi tu, long pasin bilong stap gut wantaim ol arapela lain insait long sios. Na bikpela samting em i tokim yumi long mekim i olsem: yumi mas laikim tru ol arapela. Tasol moa, long bihainim gutpela pasin bilong stap gut wantaim ol lain i laik bagarapim yumi, yumi mas yusim dispela nupela samting bilong pait, em i laikim tru.
Laip bilong stap Kristen em i kirap long laikim tru na em i pinis long laikim tru – em i samting bilong laikim tru olgeta. Dispela laikim tru i kam long God, na Krais i putim dispela laikim tru ples klia, na yumi kisim dispela laikim tru long Holi Spirit. Em i kam long yumi na i go long ol arapela, na em i putim ples klia olsem yumi stap pikinini bilong God.
Laikim tru bilong ol Kristen i wok long helpim ol arapela. Long dispela graun planti lain i nidim dispela kain laikim tru.
“Yu no ken larim pasin nogut i winim yu. Nogat.” Pasin nogut em i olsem pawa i wok long karamapim olgeta man nogut. Na taim yumi wok long mekim pasin nogut long ol lain i mekim pasin nogut long yumi, i olsem pasin nogut i win olgeta: pasin nogut i wok long daunim yumi yet na bihain yumi tu i wokim pasin nogut. Taim yumi yusim pasin nogut olsem wanpela samting bilong pait, bilong paitim ol arapela i mekim ol pasin nogut, orait pasin nogut i win stret.
“Yu mas mekim gutpela pasin na bai yu daunim pasin nogut.” Ol Kristen i mas wok long mekim gutpela pasin na daunim pasin nogut. Yumi olgeta i gat laik long bekim ol pasin nogut wantaim sampela moa pasin nogut. Tasol ol Kristen i holim wanpela nupela samting bilong pait, em i pasin laikim tru: olgeta Kristen i mas kisim dispela nupela samting bilong pait bilong daunim ol pasin nogut.
Planti lain bai ting olsem dispela em i kranki pasin. Tasol, maski, ol Kristen bai mekim olsem yet. Ol bai yusim dispela nupela samting bilong pait bikos ol i bilip long pawa bilong God.
Tasol sapos pawa bilong ol gutpela pasin i no gat strong long daunim pasin nogut, olsem wanem? Bai yumi les long mekim gutpela pasin long ol lain i mekim ol pasin nogut? Nogat tru! Nogut yumi stap aninit long pawa bilong pasin nogut. Em i mobeta long kisim hevi bikos yumi i mekim ol gutpela pasin. No ken larim pasin nogut i winim yumi!
SAMPELA TINGTING
Yu save lukim pasin nogut i kam long yu? Na yu save yusim dispela nupela samting bilong pait – pasin laikim tru - bilong bekim ol dispela pasin nogut, o nogat?
Ritim: Rom 12:3-13
Olsem tasol yumi tu yumi planti manmeri, tasol long Krais yumi stap olsem wanpela bodi tasol. Na yumi olgeta wan wan yumi stap olsem poroman bilong ol arapela. – Rom 12:5
Long hia Pol i laik stori long ol gutpela pasin insait long sios bilong God (lain 3-13).
I no olsem yumi tasol i kamap nupela. Nogat, yumi mas wokabaut long dispela nupela rot insait long dispela nupela komuniti bilong God i kam long Jisas Krais – dispela sios bilong Krais. Spirit bilong God i givim ol presen long wan wan memba bilong sios, olsem olgeta i ken helpim sios bilong God i kamap strong moa yet.
Planti ol Kristen bilong tude i les long pasin bilong bung long wanpela sios. Tasol, Pol i putim ples klia olsem dispela kain tingting em i kranki olgeta. Sios em i bodi bilong Krais. Na dispela bodi bilong ol Kristen i mas laikim tru na helpim ol arapela Kristen bikos ol i stap wanpela bodi bilong Krais. Wankain olsem ol memba bilong bodi bilong man i nidim ol arapela memba bilong stap laip, ol Kristen tu i nidim ol arapela Kristen long stap laip insait long dispela nupela komuniti – sios bilong Krais.
Nupela Kontrak i soim klia olsem olgeta Kristen i wanpela bodi insait long Krais. Olgeta Kristen i wanpela memba bilong dispela bodi, na olgeta Kristen i mas mekim wok insait long dispela bodi.
Olsem na, maski yumi gat hevi long sampela samting insait long sios, yumi no ken lusim sios. Nogat, yumi mas klia long ol sin na pasin nogut bilong yumi yet, na strong moa yet insait long sios long mekim wok bilong God, wankain long ol presen God em i givim yumi (lain 6).
Planti lain long tude i laik wari long laip bilong ol yet tasol. Tasol ol Kristen i mas klia olsem pasin bilong bung wantaim ol arapela bilip lain insait long wanpela sios em i bikpela samting long dispela nupela laip bilong ol Kristen. Nupela Kontrak i putim dispela samting ples klia. Yumi i kamap nupela long Krais, na yumi i stap insait long dispela nupela komuniti bilong ol bilip lain.
God i save olsem ol memba insait long sios bilong yumi i save mekim sin. Em i save, na save bilong em i winim save bilong yumi. Em i wok bilong yumi long prea na askim God long helpim yumi i givim yumi yet long ol arapela memba long sios – long strongim dispela komuniti, na long helpim dispela komuniti i ken kamap bikpela, em dispela komuniti i wetim dispela nupela graun bai i kamap bihain taim Krais i kam bek gen.
SAMPELA TINGTING
Em i gat bikpela mining insait long laip bilong yu, olsem yu stap memba bilong wanpela bodi, wanpela komuniti, bilong Krais, o nogat?
Ritim: Rom 12:1-2
Na yupela i no ken wokabaut wankain olsem ol man bilong dispela graun. Nogat. Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap long save tru long laik bilong God. Bai yupela i save long ol pasin i gutpela na long ol pasin God i laikim tumas na long ol pasin inap tru na i stret olgeta. – Rom 12:2
Nau yumi mas tingting long dispela nupela wokabaut God i singautim ol Kristen long bihainim. Lain 1 i skulim yumi olsem yumi mas givim bodi bilong yumi long God olsem ofa, na bai yumi mekim ol pasin God i laikim.
Taim yumi givim yumi yet long God, pasin bilong yumi i mas narakain olgeta long ol arapela manmeri. Yumi i no ken wokabaut wankain olsem ol man bilong dispela graun – ol lain i no stap aninit long Krais, na Holi Spirit i no stap insait long bel bilong ol.
Pol i no stori tumas long pasin bilong ol lain long dispela graun. Yumi save long ol dispela kain pasin. Na yumi no ken bihainim. Ol lain i bihainim dispela kain pasin, ol i laik amamas long tude tasol, na ol i no tingting long dispela laip bai i kamap bihain long dispela laip. God i no wanbel long dispela kain laip, na em i stap longwe long dispela kain laip. Em i laip bilong amamasim skin bilong man tasol, na em i no wari long ol samting bilong God.
Tasol God i singautim yumi long wanpela nupela kain wokabaut long laip bilong yumi. Wokabaut na pasin bilong yumi i mas kamap nupela. Yumi no ken bihainim wankain pasin bilong ol man bilong dispela graun. Nogat, ol Kristen i mas kamap nupela long bel bilong ol, na “yumi i mas larim God i mekim tingting bilong yumi i kamap nupela na bai pasin bilong yumi i kamap nupela tu.”
Bel na tingting bilong yumi i mas senis olgeta. Holi Spirit bai mekim dispela wok insait long bel bilong yumi. Na yumi i kamap nupela. Na bai pasin bilong yumi senis tu, na yumi bai wok long amamasim God long pasin bilong yumi yet.
Na wok bilong kamap nupela i no inap pinis. Em bai i go i go inap long taim Krais i kam bek gen. Tasol yumi mas wok. Yumi mas wok strong long bihainim ol gutpela pasin olsem God em i laikim. Sapos bel bilong yumi senis, orait laip bilong yumi mas senis na kamap nupela tu.
SAMPELA TINGTING
Yu save gat laik long wokabaut wankain olsem ol man bilong dispela graun? O yu kamap nupela pinis, na yu wok long bihainim ol pasin God yet i laikim?
Ritim: Rom 8:31-39
Sapos God i helpim yumi, orait husat bai i birua long yumi?...God i bin makim yumi bilong em yet, olsem na husat bai i kotim yumi? ...I no gat wanpela samting inap pasim dispela laik bilong en (Krais) i kamap long yumi wan wan. – Rom 8:31, 33-35
Rom 8 i save skulim yumi long wok bilong Holi Spirit long laip bilong ol pikinini bilong God. Olsem na em i givim yumi bel isi long dispela tok:“Mi save...Mi bilip tru...”Yumi inap tok olsem long Spirit bilong God tasol.
Maski yumi bilip, yumi bai klia olsem i gat planti samting bai i wok long bagarapim yumi. I gat planti samting i laik pulim yumi longwe long God. Tasol bilip i strongim yumi long dispela taim. Bilip i tok, “Sapos God i helpim yumi, orait husat bai i birua long yumi?” God i helpim yumi! Em i stap klostu long yumi, olsem na yumi no ken pret. Larim ol birua i kam! God i helpim yumi! Orait husat bai i birua long yumi?
Na, husat bai i kotim yumi? Sampela taim Satan bai kotim yumi, tasol sampela taim bel bilong yumi yet bai kotim yumi. Tasol yumi kamap stretpela pinis long ai bilong God long bilip, na long dispela bilip yumi i ken bagaraim ol birua bilong yumi. Maski mi yet, o Satan yet, i wok long kotim mi na daunim mi, mi bai singaut strong long ol: “Mi stap stretpela long ai bilong God!” God yet i save kolim yumi stretpela man! Husat bai i kotim yumi?
I no gat wanpela samting inap pasim laik bilong God, em dispela laik em i givim yumi long Krais Jisas, Bikpela bilong yumi.
Planti taim yumi save daut, na yumi save wari long wanem samting bai i kamap tumora. Yumi save olsem sampela taim yumi bai pesim ol bikpela hevi. I gat planti samting i wok long bagarapim bilip bilong yumi, na sampela taim yumi bai pret.
Tasol, nogat! Tru, Satan i gat pawa, na yumi mas pret long ol dispela kain samting. Tasol yumi save olsem i gat wanpela samting i winim stret strong bilong pawa bilong mani or pawa bilong mangal o pawa bilong pasin pamuk o pawa bilong Satan. Na dispela em i pawa bilong laikim tru bilong God. Na i no gat wanpela samting inap pasim pawa bilong laikim tru bilong God!
SAMPELA TINGTING
Wanem samting i save wok long bagarapim bilip bilong yu na wok long pasim laikim tru bilong God? Na yu bilip olsem olgeta dispela samting i no inap pasim laikim tru bilong God, em dispela laik em i givim yumi long Krais Jisas, Bikpela bilong yumi?
Ritim: Rom 8:28-30
Na dispela ol man bipo em i makim ol, em i singautim ol tu. Na dispela ol man em i sin- gautim ol, em i kolim ol stretpela man. Dispela ol man em i kolim ol stretpela man, em i givim gutpela laip na biknem bilong em yet long ol. – Rom 8:30
Bai yumi stat long dispela tok “em i singautim ol.” God em i save singautim yumi long Tok na Spirit bilong em. God i tokim yumi long tanim bel na bilip long gutnius bilong Jisas Krais.
Ating dispela singaut i bin kam long yu pinis, a? Sapos dispela singaut i kam long yu long maus bilong papamama bilong yu o wanpela pasto o wanpela tisa, yu mas save olsem em i God yet i putim han bilong em long yu na tok, “Yu bilong mi.”
Taim yumi singautim wanpela man o meri, sampela taim bai yumi singautim ol nating. Wanpela de yumi bai mekim sampela tok, na neks de bai yumi lus tingting long dispela tok. Tasol God em i no save mekim olsem. Em i stap wankain oltaim, em i holim strong ol promis bilong em, na yumi ken bilipim em. Em i no save singautim nating ol man o meri.
Dispela singaut bilong God i kam long yumi em i bikpela samting. Em i olsem wanpela hap sen long dispela sen bilong salvesen.
“Ol man bipo em i makim ol, em i singautim ol....em i kolim ol stretpela man...em i givim gutpela laip na biknem long ol yet.” Dispela em i olsem wanpela sen bilong gol. Dispela sen i stat long bipo bipo tru na i go inap oltaim oltaim. Stat bilong dispela sen i long dispela taim God i makim yumi. I min olsem, taim yumi no save long God yet, em i save long yumi. Taim yumi no inap makim God, em yet i makim yumi. Taim yumi no laikim God yet, em yet i laikim yumi. I olsem God i ankaim dispela hap long sen long oltaim oltaim.
Na dispela tupela neks hap sen i kamap long taim yumi i stap laip – God i singautim yumi na em i kolim yumi stretpela man. Em i singautim yumi pastaim, na bihain em i givim yumi laip tru wantaim Krais, na yumi poromanim em long stretpela pasin bilong em.
Na las hap bilong dispela sen em i pas wantaim ol arapela hap sen. Yumi no inap lukim dispela hap sen yet, tasol em i stap tru tru. Em bai i givim gutpela laip na biknem long yumi yet.
Olsem na, dispela singaut bilong gutnius i kam long yu pinis. Em i kam long God yet. God yet i stiaim laip bilong yu yet. I no gat wanpela samting inap bagarapim dispela sen bilong salvesen bilong yu. Em i tru olgeta - God bai kisim yumi i go long em long heven!
SAMPELA TINGTING
Tok tenkyu long God long dispela sen bilong gol long salvesen bilong yu yet!
Ritim: Rom 8:18-27
Nau olgeta samting i stap nogut na i save bagarap... God yet i mekim ol i stap olsem bai ol i wetim gutpela samting God i laik mekim long ol. Long taim God i makim, God bai i pinisim dispela kalabus bilong bagarap nau olgeta samting i stap long en, na bai olgeta samting i stap gutpela tru wantaim yumi ol pikinini bilong God. – Rom 8:20-21
God i wokim yumi bilong stap laip – na i no bilong dai. Na em tru, dai em i bikpela samting long laip bilong yumi olgeta. Tasol God em i no wokim yumi bilong dai.
Olgeta samting long dispela graun i les tru long pasin bilong dai. Olgeta manmeri na animal wantaim i wok long pait long dai, maski ol i kamap klostu long dai bilong ol. I gat wan wan man tasol i laikim pasin bilong dai, tasol dispela kain man i longlong o em i gat hevi na sik i bikpela tumas.
Olgeta lain i stap laip i gat laik long stap laip i go i go. Olgeta man na animal i no save gat laik long dai. Olsem na yumi i wok long hop i stap. Yumi save olsem olgeta lain bai dai, tasol yumi les, na yumi wok long hop i stap yet.
Maski yumi go long planti ol haus krai, yumi bai hop olsem wanpela de wanpela nupela graun bai kam. Olgeta samting long dispela graun i gat dispela kain hop. Na dispela i soim klia olsem olgeta samting long dispela graun i stap kalabus bilong bagarap.
Ol Kristen i gat hop. Yumi tu i krai nogut long dispela kalabus bilong bagarap yumi i stap long en, na krai bilong yumi i bikpela moa bikos yumi, olsem ol bilip lain, i save long dispela nupela laip, na dispela nupela graun bai i kam. Tude yumi pilim liklik hap long dispela nupela laip long bel bilong yumi tasol: em i Holi Spirit i stap long bel bilong yumi. I olsem yumi kisim sampela naispela plaua stret long nupela graun pinis, insait long sios bilong Jisas Krais long tude.
Taim ol Kristen i harim olgeta samting long dispela graun i krai olsem meri i laik karim pikinini, taim ol i harim olgeta samting i singim song long hop long God, ol bai i kisim strong long bilip olsem dispela nupela graun bai i kam. Yumi wetim God i stap. Na yumi inap tokaut klia long ol arapela lain i krai i stap, long dispela hop i stap long bel bilong yumi.
Ol Kristen i save gut olsem dispela nupela graun bai i kam. Long marimari bilong God, ol i save long wok bilong Holi Spirit, na ol i wetim olgeta gutpela samting God i laik mekim long ol.
SAMPELA TINGTING
Wanem samting i save givim hop long yu na strongim yu long dispela graun?
Ritim: Rom 8:12-17
Na long strong bilong Holi Spirit yumi save singaut long God olsem, “Aba, Papa.” Holi Spirit yet i save helpim spirit bilong yumi na yumi save tokaut ples klia olsem yumi i stap pikinini bilong God. Orait yumi stap pikinini bilong God... orait bihain bai yumi kisim biknem na gutpela sindaun tru wantaim em. – Rom 8:15-17
Yumi save long pasin bilong adoptim ol pikinini. Taim yu adoptim wanpela pikinini, i olsem dispela pikinini i kamap pikinini bilong yu yet. Na dispela em i olsem wanpela tok piksa long yumi ol pikinini bilong Bikpela.
Yumi olgeta i kamap famili bilong God long marimari tasol. I no olsem yumi gat rait long kamap pikinini bilong em. Jisas Krais tasol em i pikinini tru bilong God. Yumi kamap pikinini bilong God long Jisas tasol.
Na tu, yumi mas stap olsem pikinini bilong God long laip bilong yumi. Yumi mas les long bihainim ol pasin nogut. Em i no pasin bilong ol lain bilong famili bilong God. Yumi no ken mekim ol pasin nogut na tok olsem God em i Papa bilong yumi.
Yumi mas lainim pasin bilong bihainim tok bilong God. Yumi mas wok strong long mekim ol gutpela pasin, em i rot bilong ol lain insait long famili bilong God. Taim yumi i wok long laikim tru God moa yet, bai yumi kamap les moa long sin.
Bikpela laikim tru bilong papamama bai helpim ol pikinini ol i adoptim pinis long stap amamas insait long famili bilong ol. Na em i Spirit bilong Papa bilong yumi bai i skulim yumi long bihainim Jisas. Spirit bilong God bai karamapim laip bilong yumi long laikim tru. Na bai yumi wok long lusim sin na bihainim tok bilong God.
Sampela taim em i hat tru long bilip olsem God yet i adoptim yumi long kamap pikinini bilong em. Tasol Spirit bilong God bai strongim bilip bilong yumi, na em bai skulim yumi long tok tenkyu long God, olsem Papa bilong yumi, long olgeta samting em i givim yumi.
Spirit na Tok bilong God i tokim yumi olsem bihain yumi bai kisim biknem na gutpela sindaun tru wantaim em. Bilong wanem? Bikos yumi i stap pikinini bilong God!
SAMPELA TINGTING
God i adoptim yu olsem pikinini bilong em yet. Dispela em i gat wanem mining insait long laip bilong yu? Tingting long dispela na tok tenkyu long God, Papa bilong yu!
Ritim: Rom 8:1-11
Lo i no inap long rausim sin bilong yumi, long wanem, olpela bel bilong yumi i no gat strong bilong bihainim lo. Tasol dispela samting lo i no inap mekim, em God yet i mekim. God i salim Pikinini bilong em yet i kam na em i kamap man olsem yumi man bilong mekim sin. Em i kam bilong rausim sin bilong yumi, na long bodi bilong em yet, God i kotim sin na pini- sim strong bilong sin. God i mekim olsem bai stretpela pasin bilong lo i ken kamap long laip bilong yumi, long wanem, nau yumi no save wokabaut long pasin bilong olpela bel. Nogat. Yumi save wokabaut long pasin bilong Holi Spirit. – Rom 8:3-4
Lo bilong God i tokim yumi long laikim tru God antap long ol arapela samting, na yumi i mas laikim ol wantok bilong yumi olsem yumi laikim yumi yet. Tasol yumi i no inap mekim olsem. Maski yumi i save olsem God i tokim yumi long mekim dispela, yumi i no inap yet. Maski yumi save long ol gutpela pasin, yumi i no inap long mekim ol dispela gutpela pasin. Sapos yumi inap raitim dispela lo bilong laikim tru God na laikim ol arapela long ol sainbot na putim long planti hap bilong kantri bilong yumi, orait kantri bilong yumi bai i no inap kamap gutpela long dispela samting tasol. Yumi i no inap bihainim lo bilong God, maski yumi wok hat tru long mekim olsem.
Tasol, long ol lain i pas wantaim Krais, i gat tupela bikpela samting inap long helpim ol. Namba wan, God i no inap kotim ol moa, bikos Krais i kisim ples bilong ol long kot. Namba tu, long Krais Jisas ol i kisim pawa na strong bilong mekim wanem samting ol i no inap long mekim. Ol i wok long bihainim lo bilong God, bikos ol i wok long laikim tru God na ol arapela.
I min olsem, sapos yumi i pas wantaim Krais, orait yumi i bin dai wantaim em na kirap bek wantaim em tu. Long dai bilong Krais, God i kotim yumi. Long bodi bilong Jisas em i kotim ol sin bilong yumi. Dispela samting i kamap pinis. Lo i no inap kotim yumi moa. God i no inap mekim save long yumi gen.
Na dispela namba tu samting i bikpela samting tu. Yumi i kisim pawa bilong Holi Spirit bilong Krais. Olsem na, nau yumi no save wokabaut long pasin bilong olpela bel. Nogat. Yumi save wokabaut long pasin bilong Holi Spirit.
Long Krais yumi no stap moa olsem sinman tasol. Nau Spirit bilong God i pulapim yumi. Nau yumi i kisim strong bilong God Holi Spirit long bihainim laik bilong God.
Olsem na, em i wok bilong yumi long wokabaut long pasin bilong Spirit. Yumi mas bihainim laik bilong God. Em i samting bilong bilip. Em i samting Bikpela bai i helpim yumi long mekim.
SAMPELA TINGTING
Yu bilip olsem Bikpela inap helpim yu long bihainim em?
Ritim: Rom 7:14-25
Mi save, i no gat wanpela gutpela samting i stap insait long mi. Mi tok long olpela bel bilong mi tasol. Tru, mi laik mekim gutpela pasin, tasol mi no inap mekim. – Rom 7:18
Olgeta manmeri i laik bihainim sampela kain bilip. Tasol dispela i no wankain olsem dispela bilip long gutnius.
God wanpela tasol i save hamaspela manmeri i save wok long bihainim kain kain bilip bilong kisim salvesen. Tasol dispela pasin i no inap tru long kisim bek yumi.
I gat sampela bilip i kranki olgeta: Baha’i, wanpela bilip we ol i bihainim ol sta, bilip olsem yu mas lukautim yu yet na kamap bikman stret. Ol i rong olgeta. Tasol pasin bilong bihainim ol narapela gutpela bilip i no inap tu: sapos yu helpim ol tarangu lain o sapos yu inap autim planti lain long Buk Baibel.
Bilong wanem ol dispela samting i no inap helpim yumi? Bikos yumi i no inap mekim ol gutpela samting tru. God i givim lo long yumi, na yumi i no save bihainim. Nogat, planti taim, taim yumi lainim ol gutpela samting bilong God, bai yumi klia moa yet long ol pasin nogut na sin bilong yumi.
Em i no naispela samting, tasol em i tru. Buk Baibel i tokim yumi olsem em i tru. Planti lain i wari long hel, na ol i laik i go long heven, olsem na ol bai wok long kisim sampela kain bilip long helpim ol. Tasol dispela samting i no inap rausim pen na asua bilong ol.
God wanpela tasol inap long kisim bek wanpela man o meri. God em tasol i salvesen bilong yumi. God em i kam long yumi long Jisas Krais, na God i givim yumi pawa bilong Holi Spirit. Em tasol i givim dispela long yumi.
God – na God tasol – inap long kisim bek yumi. Maski ol lain i wok hat tru long kisim salvesen, ol i no inap. Yumi olgeta i mas klia gut long dispela samting.
SAMPELA TINGTING
Yu save wok long kisim salvesen long strong bilong yu yet? O yu save bilip long God, em wanpela tasol, inap long kisim bek yu? Tok tenkyu long God long wok bilong em long Krais.
Ritim: Rom 7:1-6
Olsem na ol brata bilong mi, yupela i bin pas wantaim bodi bilong Krais, na long dispela pasin yupela i dai pinis, na yupela i no i stap moa aninit long lo. Nau yupela i stap lain bilong narapela man, em dispela Man i bin kirap bek long matmat, bilong yumi ken kamapim ol gutpela pasin God i laikim. – Rom 7:4
Yumi stap fri long pawa bilong sin pinis, olsem Pol i skulim yumi long Rom 6. Na long sapta 7, Pol i skulim yumi olsem yumi stap fri long pawa bilong lo tu.
Long soim dispela, Pol i yusim wanpela tok piksa long ol lo. Em i laik soim yumi tupela bikpela samting: Nau yumi i no pas moa wantaim lo, olsem na yumi i stap fri long pas wantaim Krais.
Em i kliaim dispela tok olsem:
• Man i stap laip tasol inap stap aninit long lo. Taim em i dai, em i no aninit long lo moa (lain 1).
• Sapos meri i marit na man bilong em i dai, orait dispela lo i bin pasim em wantaim man, em i no pasim em moa (lain 2).
• Sapos man i stap laip yet na meri i slip wantaim narapela man, em i mekim pasin pamuk. Tasol sapos man bilong em i dai pinis, orait dispela lo i no pasim em moa (lain 3).
• Taim yumi i dai pinis wantaim Krais (bikos yumi i bin pas wantaim bodi bilong em), yumi i no stap moa aninit long lo. Nau yumi i stap lain bilong Krais (lain 4). Yumi bai pas wantaim Krais long Spirit bilong em. Em i dispela nupela kontrak.
Long hia, i no olsem Pol i laik skulim yumi long pasin bilong marit. Em i laik yusim pasin bilong marit olsem tok piksa long wanem samting God i mekim long Jisas Krais.
Pol i tokim yumi olsem, taim yumi stap aninit long lo, laip bilong yumi no inap karim kaikai. Yumi i no inap bihainim wanpela bilong ol dispela lo. Tasol taim yumi i “dai pinis long dispela lo” long Krais, yumi inap kirap long wanpela nupela laip we yumi bai karim planti kaikai long Jisas.
Planti taim yumi lukim sampela lain i stap Kristen. Ol i klia long wanem samting em i gutpela na wanem samting i no gutpela long mekim. Tasol ol i no bihainim dispela. Ol i save long lo bilong God, tasol ol i no save gut long Krais. Yumi mas wanbel wantaim Krais, long blut na Spirit bilong em yet, na long dispela taim tasol bai yumi inap long karim ol gutepla kaikai.
SAMPELA TINGTING
Yu yet i “dai pinis long lo” na kamap wanbel wantaim Krais? Na yu karim ol gutpela kaikai long Krais, o nogat?
Ritim: Rom 6:12-23
Na yupela i no ken larim sin i bosim han lek samting bilong yupela, bai yupela i mekim pasin nogut. Yupela i olsem ol manmeri i kirap bek long matmat na i stap laip, olsem na yupela i mas givim yupela yet long God... – Rom 6:13
Long lain 11, Pol i tokim yumi olsem yumi i win pinis, long Krais. I olsem em i tok, “Em i pinis. Yu bin dai na yu kirap bek pinis.”Tasol long lain 12 em i tokim yumi long pait. Bikos yumi i kirap bek, orait yumi i no ken larim sin i bosim yumi moa.
Na dispela em i pasin stret bilong kamap nupela long bilip. Gutnius bilong Krais i tokim yumi olsem salvesen bilong yumi i kam pinis. Yumi pas wantaim Krais, olsem na yumi bin dai wantaim em na yumi kirap bek wantaim em. Em i pinis. Krais i kisim pe bilong sin bilong yumi, na yumi kisim nupela laip pinis long Krais. Sin i no inap bosim yumi moa. Nau yumi mas givim yumi yet long God.
Dispela gutnius em i samting yumi i mas bilipim. Tasol, tu, God i tokim yumi long mekim sampela samting: “No ken larim sin i bosim han lek samting bilong yupela....yupela i mas givim yupela yet long God.” Olgeta hap bilong yumi – bodi, tingting, toktok, pasin – olgeta i mas aninit long nupela masta bilong yumi, na i no aninit long Satan.
Sapos yu bilipim dispela gutnius, yu mas bihainim tok bilong God tu. Na taim yu bihainim tok bilong God, em bai klia olsem yu bilipim dispela gutnius.
Taim gutnius i tokim yumi olsem yumi pas wantaim Krais, bai yumi i stap long wanpela pait. Nau yumi no ken larim Satan i yusim yumi long mekim ol pasin nogut bilong em. Nogat, yumi yet i bilong God; yumi mas givim yumi yet long God.
Dispela em i samting bilong dispela nupela laip yumi kisim pinis. Yumi stap long wanpela pait. Na dispela pait bai soim klia olsem yumi i stap long dispela nupela laip. Sapos yumi no pait, olsem wanem long bilip bilong yumi? Yumi bai winim dispela pait bikos Krais yet i win pinis. Yumi sanap na pait long pawa na strong bilong em yet.
Yumi stap fri, tasol yumi mas redi long pait olgeta taim. Yumi mas prea na lukaut, olgeta taim. Laip bilong yumi mas putim ples klia husat i bosim yumi. Yumi mas bihainim em tasol!
SAMPELA TINGTING
Yu yet yu save pilim olsem yu i stap long wanpela pait?
Ritim: Rom 6:1-11
Olsem tasol yupela tu i mas i gat dispela tingting. Yupela tu i bin i dai na yupela i no i stap moa aninit long strong bilong sin. Nogat. Yupela i bin pas wantaim Krais Jisas na yupela i stap laip wantaim God. – Rom 6:11
Sampela lain i ting olsem yumi i mas pret liklik long dispela doktrin bilong marimari bilong God. Ol i ting, sapos yumi i toktok long marimari bilong God, olsem wanem long ol wok yumi yet i mas mekim? Rom 5:20 i tok, “Taim ol man i kisim lo, na ol i kalapim lo moa yet. Ol man i mekim planti sin tumas, tasol God i marimari moa yet long ol.” Sapos dispela em i tru, bai yumi i mekim ol gutpela pasin bilong wanem? “Orait nau bai yumi mekim wanem tok? ‘Yumi ken mekim planti sin bai God i ken marimari moa yet long yumi,’ ating yumi ken tok olsem, a?” (Rom 6:1). Ating dispela tok i save mekim sampela lain i kamap les na pundaun long sin, a? (Tok i Tru, Askim 64).
Tasol nogat. Sapos sios i wok long autim tok tru long marimari bilong Krais, dispela samting i no inap kamap. Ol lain bai les na pundaun long sin sapos ol i no klia gut long marimari bilong God o sapos ol i laik kisim marimari bilong Krais tasol ol i les long kisim Krais wantaim.
Krais em i dai long planti manmeri. Tasol taim em i dai long yumi, i olsem yumi i kamap lain tru bilong em. Yumi kamap man na meri bilong Krais. Yumi kamap nupela bodi bilong em na yumi i gat nupela pawa bilong em tu – pawa bilong salvesen na bilong kamap nupela long em.
Yumi i mas poromanim Krais long wanem samting em i mekim. Em i dai, olsem na yumi i mas dai. Em i kirap bek, olsem na yumi i mas kirap bek. Pol i tok, “Yumi bin pas wantaim Krais Jisas na kisim baptais, na long dispela pasin yumi olgeta i bin pas wantaim dai bilong em... Na long bikpela strong bilong em yet, Papa i bin kirapim Krais long matmat. Olsem bai yumi tu i ken wokabaut long nupela laip.”
Olsem na, “Yupela tu i bin i dai na yupela i no i stap moa aninit long strong bilong sin. Nogat. Yupela i bin pas wantaim Krais Jisas na yupela i stap laip wantaim God.”Wokabaut long bilip!
Ol lain i bilip long Krais na i kisim baptais, ol i pas wantaim Krais. Olsem na yumi i dai long sin. Sin i no inap bosim yumi moa. Krais em i dai, a? Na mi i pas wantaim em, a? Orait, nupela laip i kam pinis. Long Krais yumi kirap long nupela laip, na dispela laip i bilong God, na Spirit bilong em i bosim yumi nau. Bilip i olsem as tru bilong dispela nupela laip.
SAMPELA TINGTING
Yu yet i pas wantaim Krais? Dispela i gat wanem mining insait long laip bilong yu?
Ritim: Rom 5:12-21
Adam em i olsem piksa bilong dispela Man i mas kamap bihain. – Rom 5:14
Olsem wanem nau yumi olgeta inap kisim salvesen long dai na kirap bek bilong wanpela man?
Yumi inap klia long dispela, taim yumi i tingting long Jisas Krais, em i kisim ples bilong yumi na mekim wok bilong yumi.
Dispela pasin bilong kisim ples bilong narapela, em i no wanpela nupela samting. Long Olpela Kontrak yumi inap ritim sampela stori long ol king i bin mekim pasin nogut na dispela i bagarapim kantri bilong ol. Adam, taim em i stap olsem pesman bilong olgeta man, em i bin mekim sin. Olsem na em wanpela i mekim sin tasol dispela sin i go long planti. Wanpela i senisim laip bilong planti. Na Krais i bihainim pasin bilong Adam taim em wanpela i senisim laip bilong planti.
Adam i stap olsem as bilong sin. Pol i tok, “Yumi save, wanpela man i bin mekim sin, na long dispela pasin sin i kamap long graun” (Rom 5:12). Adam i olsem wanpela dua na olgeta sin i kam insait long em.
Sin na dai i kam long Adam, tasol em i go long olgeta lain: “Na dai i kisim olgeta man, long wanem, olgeta man i bin mekim sin” (Rom 5:12). Taim Adam i mekim sin, olgeta man i bin mekim sin wantaim em. Bikos Adam i stap olsem pesman bilong yumi, dispela samting em i mekim, i kam long yumi olgeta. Olgeta manmeri i mekim sin na i dai long em.
Na Adam em i olsem piksa long Krais. Adam i olsem dua bilong kisim sin na dai i kam long bagarapim yumi olgeta. Tasol Krais i kam olsem dua bilong kisim marimari na laip i kam long ol lain i bilip long em.
Pol i stori long Adam long helpim yumi klia long wok bilong Jisas. Jisas i kisim ples bilong yumi, na wok bilong em i helpim ol lain bilong em. Ol pasin bilong Jisas tasol i olsem as bilong salvesen bilong yumi.
Yumi i kamap stretpela long ai bilong God, na yumi kisim laip long wok bilong Krais tasol, na i no long wok bilong yumi yet.
SAMPELA TINGTING
Adam i mekim sin, tasol sin i kam long yumi tu. Olsem wanem?
Ritim: Rom 5:6-11
Tasol yumi stap yet olsem ol manmeri bilong mekim sin, na Krais i dai bilong helpim yumi. Long dispela pasin God i bin soim yumi olsem, em i laikim yumi moa yet. – Rom 5:8
Em i gutpela tru sapos yumi klia long ol tising bilong Buk Baibel. Olsem na, em i gutpela sapos yumi klia long tok bilong God long pasin bilong kamap stretpela long ai bilong God long bilip. Na yumi mas redi long autim na kliaim dispela tok long ol pren bilong yumi tu.
Dispela em i wanpela bikpela doktrin (tising) long Buk Baibel, tasol planti lain ol i paul long dispela tok. Olsem na yumi mas redi long autim tok tru: long bilip long Krais tasol bai yumi kamap stretpela long ai bilong God. Dispela bilip i olsem as bilong laip bilong yumi!
I gat planti ol man i wok long paulim dispela tok. Olsem na, yumi mas wok long kamap klia long tok tru insait long Buk Baibel, na yumi mas redi long skelim ol kranki tok bilong ol arapela.
Na Satan bai wok long bagarapim yumi taim yumi wok long bihainim ol tok tru, ol gutpela doktrin bilong Buk Baibel. Na sampela taim em bai paulim yumi tu.
Yumi mas lukaut – nogut yumi ting olsem yumi bai kisim salvesen bikos yumi bihainim na autim ol stretpela doktrin bilong Buk Baibel. Nogut yumi ting yumi bai kisim salvesen bikos yumi no wanbel long ol kranki tok bilong ol arapela Kristen. Satan bai wok long paulim yumi olsem. Nogat. Yumi bai kisim salvesen long Krais tasol.
Na tu em i gutpela long ritim dispela teks long Rom 5. Yumi no kisim salvesen bikos yumi klia long olgeta doktrin long kamap stretpela long ai bilong God. Nogat. God i laikim tru yumi. Em tasol i as bilong salvesen bilong yumi. Bikos God em i laikim tru yumi, em i salim Krais long dai long yumi. Taim yumi stap lain bilong mekim sin yet, Krais i kam na dai long yumi, na God i laikim tru yumi.
Em i gutpela long yumi i autim sampela tok tru long diwai kros: husat i dai, bilong wanem em i dai, na husat i kisim salvesen. Tasol em i gutpela tu long pasim maus bilong yumi tu sampela taim – na lukluk long diwai kros tasol, bikos dispela diwai kros em i soim yumi olsem God i laikim yumi tru, taim yumi stap yet olsem ol manmeri bilong mekim sin.
SAMPELA TINGTING
Yu save long ol doktrin long Buk Baibel? Em i gutpela. Na yu inap long pasim maus bilong yu tu, na lukluk long diwai kros bilong Krais tasol?
Ritim: Rom 5:1-5
Orait yumi bilip pinis na God i bin kolim yumi stretpela manmeri. Olsem na Bikpela bilong yumi Jisas Krais i mekim yumi i kamap wanbel wantaim God. – Rom 5:1
Ol lain i wok long apim ol yet, ol i les long kisim dispela gutnius bilong kamap wanbel wantaim God. Ol i no pret long God bikos ol i no klia long sin bilong ol yet. Ol i apim ol yet, olsem na ol i no save pret.
Yumi mas wari stret long ol dispela kain lain i no save pret long God, ol lain i no wari long sin bilong ol bikos ol i amamas long ol yet. Tasol ol lain i pret long God ol i gat hop!
Taim ol man na meri i klia olsem ol i pulap long sin, ol i no bel isi. Ol i kamap pret long God. Ol bai klia olsem ol i gat asua long ai bilong God. Na ol i ken klia olsem ol inap kisim Krais na stretpela pasin bilong em tu.
I gat sampela lain bai i wok long daunim ol yet. Ol bai tok olsem ol i nogut stret. Tasol planti taim ol i gat laik long ol arapela i apim ol tasol.
Yumi i no ken mekim olsem. God i tokim yumi long bilip long Jisas Krais. Na sapos yumi bilip long Jisas na long wok bilong em, bai yumi i wanbel wantaim God. Na dispela pasin bilong wanbel i min olsem yumi i stap amamas wantaim God.
Taim yumi bilip long Krais, olgeta pret bilong yumi bai i go pinis. Tru, yumi i stap manmeri bilong mekim sin yet. Tasol Krais em i gutpela. Long rot bilong bilip long Krais, bai yumi i wanbel wantaim God. Taim mi wok long lukluk long Krais, bai mi amamas long laip bilong mi.
Pastaim mi mas wanbel wantaim God, na bihain bai bel bilong mi bai i stap isi tu.
Pasin bilong wanbel wantaim God na bel isi, em i samting bilong bilip long Krais tasol, bikos long wok bilong em tasol yumi kamap stretpela long ai bilong God.
SAMPELA TINGTING
Yu yet yu wanbel wantaim God? Na yu i gat bel isi long laip bilong yu yet?
Ritim: Rom 4:9-12
Taim em (Abraham) i no katim skin yet, em i bilip long God, na God i kolim em stretpela man. Na God i givim em dispela pasin bilong katim skin olsem mak bilong em i stap stretpela man. Olsem na Abraham em i stap namba wan tumbuna bilong olgeta man i no bin katim skin, tasol ol i bilip long God na God i kolim ol stretpela man. – Rom 4:11
Taim ol lain Juda i harim dispela tok Pol i autim long Abraham, ating ol i kirap nogut bikos em i narakain tok olgeta.
Abraham i no kamap stretpela taim em i katim skin. Nogat, Pol i tok, “Em i no katim skin yet na God kolim em stretpela man.” I luk olsem Pol i tok olsem Abraham em i kamap stretpela long ai bilong God taim em i no bilip long God yet. Tasol, nogat, Pol i bihainim tok long Stat 15:6: “Abram i bilipim tok bilong Bikpela. Olsem na Bikpela i kolim em stretpela man.”
Em i katim skin sampela taim bihain long dispela. Yumi ken ritim dispela long Stat 17:24-27. Dispela pasin bilong katim skin i olsem mak bilong ol promis bilong God. Abraham i kamap stretpela long ai bilong God long bilip tasol.
Taim yumi klia long dispela, bai yumi klia tu bilong wanem Abraham i stap namba wan tumbuna bilong olgeta man i no bin katim skin, tasol ol i bilip long God na God i kolim ol stretpela man.
Tasol tu, i no olsem Abraham i namba wan tumbuna bilong ol lain Juda bikos ol i katim skin pinis. Em i tumbuna bilong ol lain i bilip tasol, long wanem, yumi kamap stretpela long ai bilong God long bilip tasol, na i no bilong pasin bilong katim skin.
Dispela ol tok bilong Pol i helpim ol bilip lain husat i no stap lain bilong Juda. Long dispela rot, God inapim ol promis bilong em long Abraham. Yumi kamap stretpela long ai bilong God long bilip tasol. Bilip tasol, maski yu wanpela Juda o yu kam long narapela hap. Em tasol. Abraham na ol pikinini bilong em i stap stretpela long ai bilong God long bilip tasol. Na Abraham i papa tru bilong ol bilip lain tasol.
SAMPELA TINGTING
Yu yet yu stap wanpela pikinini bilong Abraham sapos yu bilip long God. Em i gat wanem mining long laip bilong yu yet?
Ritim: Rom 4:1-8
Tasol sapos wanpela man i laik kamap stretpela man long ai bilong God, orait em i mas mekim wanem? Em i no mas wok strong long mekim ol gutpela pasin, tasol em i mas bilip olsem, God inap long kolim ol man bilong mekim sin ol stretpela man.Na bai God i kolim em stretpela man. – Rom 4:5
Gutnius em i nupela samting. Taim Krais i kam, gutnius i kamap klia tru, na i no olsem bipo long dispela. Em i nupela samting, na dispela i min olsem em inapim olgeta olpela samting – i no olsem God i rausim olgeta olpela samting. Nogat, em inapim olgeta olpela samting. Taim God i kisim nupela kontrak i kam, o taim em i bringim nupela graun i kam, i olsem em inapim dispela olpela kontrak na em inapim dispela olpela graun. Em i kain olsem wanpela pikinini diwai i kamapim naispela diwai stret o olsem wanpela pikinini i kamap wanpela bikpela man o meri.
Olsem na, dispela gutnius i no wanpela nupela samting olgeta long Olpela Kontrak. Nogat, Pol i putim ples klia olsem dispela gutnius i kliaim rot bilong dispela salvesen God i bin autim pinis long Olpela Kontrak.
I no olsem God i bosman tasol bilong Abraham, na Abraham em i wokboi tasol bilong em. Sapos em tru em bai Abraham i gat pe bilong em na ol raits bilong em tu. Nogat, God i go long Abraham na givim promis long em, na Abraham yet i mas bekim dispela promis long bilip. Na em i wankain long yumi. Yumi tu i kisim promis bilong God pinis, na yumi tu i mas bekim dispela promis long bilip.
Long kamap stretpela long ai bilong God, yumi i mas bilip – i no samting bilong wok yumi yet i mekim. Taim God i kolim Abraham stretpela man, i no bikos Abraham i gutpela man stret, o bikos em yet i mekim gutpela wok. Nogat, Abraham i bilipim tok bilong God, olsem na God i kolim em stretpela man.
Olsem tasol yumi kamap stretpela long ai bilong God. Yumi no kamap olsem bikos yumi i gutpela. Olgeta man na meri bilong mekim sin i kamap stretpela long ai bilong God taim ol i bilip long Krais. Ol i kisim stretpela pasin bilong Krais taim ol i bilip, na God inap long kolim ol man bilong mekim sin ol stretpela man.
Em i wok bilong God. God i kolim yumi stretpela man na meri long wok bilong Krais. Em i no stretpela pasin bilong yumi yet; em i stretpela pasin bilong Kais tasol. Mi no inap lukluk long mi yet long kisim save sapos mi yet i stap stretpela long ai bilong God o nogat. Mi mas lukluk long Krais. Long em tasol bai mi kamap stretpela long ai bilong God – long bilip.
SAMPELA TINGTING
Yu yet i stap stretpela long ai bilong God? Dispela i gat wanem mining long laip bilong yu?
Ritim: Rom 3:21-31
Tasol nau pasin God i mekim bilong kolim yumi stretpela manmeri, em i kamap ples klia pinis. Em i no kamap long rot bilong bihainim lo. Nogat. Em i kamap long narapela rot. Na tok i stap long lo bilong Moses na long ol buk bilong ol profet em i autim tok bilong dispela pasin God i mekim. Dispela pasin em i olsem. Olgeta manmeri i bilip long Jisas Krais, God i save kolim ol stretpela manmeri. I no gat narapela rot. Nogat. – Rom 3:21-22
“Tasol nau...”
Long hia yumi kamap long nupela hap long dispela buk. Dispela tok “nau” i min bihain long taim God i mekim wok long Jisas Krais. Salvesen i kamap pinis na olgeta samting i senis nau.
“Pasin God i mekim bilong kolim yumi stretpela manmeri, em i kamap ples klia pinis.” Nau yumi i kamap stretpela long ai bilong God. God yet i mekim dispela samting i kamap ples klia pinis. Na em i no kamap long rot bilong bihainim lo. Em i no samting yumi mekim na bai yumi kamap stretpela long ai bilong God.
Em i gutnius stret. Taim Jisas i kam pinis long dispela graun, dispela samting i stap ples klia: Jisas inapim olgeta lo na tok profet. Dispela Olpela Kontrak i poinim i go long dispela wok bilong Krais. Tasol nau, long taim God yet i makim, pasin God i mekim bilong kolim yumi stretpela manmeri, em i kamap ples klia pinis.
Long kamap stretpela long ai bilong God, yumi mas bilip long Jisas Krais. Krais em i as bilong dispela tok. Em yet i kisim ples bilong yumi yet long kot bilong God. Yumi kisim ol stretpela pasin bilong em yet. Long bilip long em yumi stap stretpela long ai bilong God. Taim yumi bilip, bai yumi lus tingting long mekim wok bilong yumi yet bilong kisim salvesen; nogat, bai yumi kisim wok bilong Krais tasol.
Em tasol. Em i naispela samting stret na narapela samting olgeta. Em i samting bilong olgeta lain i bilip long Krais.
God em i stretpela olgeta, na dispela stretpela pasin bilong em i soim klia olsem olgeta man na meri i mekim sin (lain 23), na tu, dispela stretpela pasin bilong God inapim olgeta samting olgeta manmeri i nidim - long wok bilong Jisas Krais. Long wok Krais Jisas i mekim bilong baim bek yumi, God i save kolim yumi stretpela manmeri (lain 24). Dispela em i gutnius stret. Em i nupela laip!
Yumi olgeta mas bilip long Jisas. Long wok bilong em, God i givim yumi dispela samting bipo yumi no inap kisim. Long Krais, God i kam long yumi taim yumi i les long go long em.
SAMPELA TINGTING
Yumi olgeta i mas redi long autim gutnius long ol arapela. Yu redi?
Ritim: Rom 3:9-20
Olsem na long pasin bilong bihainim lo ‘i no gat wanpela man bai i no gat asua na i stap stret long ai bilong God.’ Nogat. Lo i save soim yumi long ol sin bilong yumi, em tasol. – Rom 3:20
Long dispela teks Pol em i pinisim ol tok bilong em i bin raitim long namba wan hap bilong buk Rom: “Lo bilong God i no inap helpim yu long kot bilong God. Yupela ol lain Juda, na yupela olgeta manmeri bilong dispela graun i stap aninit long kot bilong God. Lo bilong God bai i kotim yu tasol, bikos long dispela lo bai yu luksave long ol sin na asua bilong yu yet.”
Taim gutnius i stori long sin, em i soim klia olsem yumi olgeta i wankain long mekim sin. Yumi olgeta i stap aninit long kot bilong God. Yumi no ken daunim ol arapela long sin bilong ol, bikos yumi olgeta i pulap long sin. Tru, sampela lain i save mekim planti sin moa long ol arapela lain, tasol olgeta man i man bilong mekim sin long ai bilong God.
Maus bilong yumi i mas pas nau. Yumi olgeta i mekim sin long ai bilong God.
Nau yumi i luksave long dispela sin em i nogut olgeta. Em i no kamapim olgeta pasin nogut tasol. Nogat. Sin em i dispela strong i save holim pas yumi long kalabus: “Sin i karamapim yumi olgeta, yumi Juda na Grik wantaim” (lain 9). Na i no gat wanpela inap lusim dispela kalabus long strong bilong em yet. Na yumi no inap helpim ol arapela long mekim olsem tu.
Planti lain long tude i ting olsem man yet inap wanbel na kamapim bel isi tru long dispela graun. Ol i ting, sapos yumi olgeta i mekim ol naispela pasin tru, orait bai yumi i stap wanbel tru.
Tasol nogat. Taim yumi ritim Rom 3:20, bai yumi i klia tru olsem yumi i lain bilong mekim sin, wankain long ol stilman, pamuk lain na ol arapela man nogut. Yumi olgeta i lain stret bilong mekim sin. Maski yumi i kam long wanem lain stret, maski yumi i bikman o rabisman tru. Yumi olgeta i nidim Krais. Yumi olgeta i nidim wanpela rot bilong lusim dispela kalabus bilong sin. Go long Krais, bai em i ken wasim yu long blut bilong em!
SAMPELA TINGTING
Yu stap aninit long kalabus bilong sin yet, o nogat?
Ritim: Rom 2:12-24
Yupela i save litimapim nem bilong yupela yet na tok, ‘Mipela i save long lo bilong God.” Tasol ating yupela yet i save kalapim lo, na long dispela pasin yupela i bagarapim nem bilong God. – Rom 2:23
Yumi no ken kamap les long harim tok bilong God bilong skulim yumi long sin bilong yumi. Namba wan hap bilong buk Rom i laik soim yumi olsem dispela gutnius bilong Krais tasol inap long givim hop long yumi na long olgeta arapela manmeri tu. Ol narapela kain hop o helpim i no ken i stap long bel bilong yumi. Yumi mas pasim ol arapela dua. Na sapos yumi mekim olsem bai yumi i kisim strong long Krais, na bai yumi i go insait long dua God yet i opim long yumi.
Tude bai yumi lainim olsem ol lain Juda i stap aninit long kot bilong God.
Planti lain tude i ting olsem Israel i nambawan lain manmeri bilong God yet. Planti ol Kristen i save tok olsem tu. Olsem na em i gutpela long ritim dispela sapta gut tru, bikos em i putim ples klia olsem olgeta lain (ol Juda tu) i nidim gutnius bilong Krais bilong kisim salvesen. Long kisim salvesen, olgeta lain, na yumi olgeta, i mas bilip long Jisas Krais tasol.
Skin bilong yumi i no inap long helpim yumi. Pol yet i tok long dispela long Filipai 3:4-11. Em i kamap klia olsem skin bilong em na wok bilong em na skul bilong em na pasin bilong em long autim tok bilong God i no inap helpim em. Olgeta samting long dispela grun ol i olsem pipia nating long Pol, na em i laik bihainim Krais tasol na bilipim em!
Ol Juda i laik litimapim nem bilong ol yet na tok,“Mipela i save long tok bilong God.”Tasol Pol i tok olsem ol i kalapim lo bilong God.
Ol Juda i ting olsem ol i kisim salvesen pinis bikos ol i holim lo na tok bilong God. Na planti manmeri long tude tu i save ting olsem ol i kisim salvesen pinis bikos ol i holim tok bilong God. Tasol maski. I no samting bilong kisim tok tasol, em i samting bilong bihainim. Em i wok bilong yumi – long bihainim tok bilong God. Gutnius bilong Krais i givim strong long yumi long bihainim tok bilong God.
SAMPELA TINGTING
Olgeta samting bilong graun i olsem pipia nating long yu, na yu i laik bihainim Krais, o nogat?
Ritim: Rom 2:1-11
Yu save sutim tok long ol man i mekim ol dispela kain pasin, tasol yu yet yu save mekim wankain pasin olsem ol. Yu ting God bai i no inap kotim yu tu, a? – Rom 2:3
Long Rom 1 yumi i bin ritim tok long ol manmeri i doti tru, na ol i givim baksait long Tok bilong God, na ol i bihainim ol pasin i nogut olgeta na doti tru. Tasol i no dispela kain manmeri tasol i stap long dispela graun. I gat planti manmeri i save mekim planti ol gutpela pasin. Na dispela sapta, Rom 2, i stori long ol lain i save bihainim ol gutpela pasin, tasol ol i wok long kotim ol man nogut.
Gutnius bilong Krais i givim yumi gutpela save long sin. God em i no wari sapos yu i wanpela man i save mekim ol bikpela sin o sapos yu save mekim ol liklik sin tasol. God em i kotim yu bikos yu mekim sin, maski yu mekim ol bikpela sin o ol liklik sin tasol!
I gat sampela sin i bikpela moa long ol arapela. Sin bilong kisim gan na stilim mani long wanpela beng i bikpela moa long sin bilong tingting bilong mekim olsem tasol. Tasol maski. Tupela man i mekim dispela tupela pasin i mekim sin tasol.
I no olsem taim yumi i stil o aigris o mekim pasin pamuk, orait wantu yumi i kamap man o meri bilong mekim sin. Nogat. Yumi i save mekim ol dispela pasin nogut bikos yumi i stap man na meri bilong mekim sin pinis. As bilong ol dispela samting em i sin, dispela sin i pulap long bel bilong yumi wan wan. Na Buk Baibel i wok long soim yumi olsem yumi olgeta i pulap long sin.
Sin bilong yumi em i pasin bilong laikim ol arapela samting antap long laikim tru God, na pasin bilong laikim yumi yet antap long laikim tru ol wantok bilong yumi. Yumi no save mekim wanem samting God i tokim yumi long mekim, na dispela em i sin.
Klostu olgeta manmeri i klia olsem pasin bilong kilim ol arapela man, o pasin bilong stil, em i ol pasin nogut; em i sin. Tasol taim yumi stap wanpela Kristen, bai yumi i klia olsem pasin bilong mekim ol pasin nogut i no mekim mipela i kamap man na meri bilong mekim sin. Nogat, yumi i save mekim ol pasin nogut bikos yumi i man na meri bilong mekim sin pinis.
Olsem na, gutnius i skulim yumi long harim dispela tok: “Yu save sutim tok long ol man i mekim ol dispela kain pasin, tasol yu yet yu save mekim wankain pasin olsem ol. Yu ting God bai i no inap kotim yu tu, a?” (lain 1).
God i putim ples klia olsem yumi i pulap long sin, na bai yumi i klia olsem yumi i nidim Jisas!
SAMPELA TINGTING
Yu klia olsem yu yet i wanpela man o meri bilong mekim sin? Na yu mas klia gut long dispela samting bilong wanem?
Ritim: Rom 1: 18-28
Olsem na God i lusim ol...Olsem na God i lusim ol...Olsem God i larim ol... – Rom 1:24-28
Yumi no ken kotim ol lain i laik i stap insait long ol doti pasin bilong ol. Ol yet bai tokim yumi long no ken kotim ol bikos ol i laik bihainim laik bilong ol yet.
Tasol God em i olsem jas bilong ol, em bai kotim ol – na yumi tu. Taim ol lain long dispela graun i lukim ol sta na mun, taim ol i harim klaut i paiarap, na taim ol i lukluk i go dip insait long bel bilong ol, i olsem ol i harim nek bilong God. Yes, ol i harim nek bilong God pinis. Tasol ol i les long harim. Na i no gat man inap tok olsem “mi no gat asua, long wanem, mi no bin save long God” (lain 20), taim God i kotim ol.
Salvesen na pasin bilong stap aninit long belhat bilong God, i no samting long bihain tasol. Nogat. Ol i samting bilong tude tu, maski ol bai kamap bikpela samting moa long bihain.
I gat sampela lain i stap pinis aninit long belhat bilong God (lain 18), na sampela narapela lain i kisim pinis dispela pawa bilong gutnius bilong kisim bek ol (lain 16). Stat bilong dispela tupela samting i stap pinis long tude tu.
Taim ol manmeri i wok long pasim yau long tok bilong God insait long bel bilong ol, i olsem ol i stap pinis long dispela rot i go long hel. Taim ol i pasim yau olgeta long tok bilong God, ol bai amamas long harim tok nogut i kam long bel bilong ol, na em bai pulim ol long mekim ol pasin doti. Na bihain, taim ol i wok long lusim tok bilong God na senisim na kisim tok giaman, orait God bai i lusim ol. Na yumi inap lukim dispela kain samting long ai bilong yumi yet.
Long yia 58, taim Pol i raitim dispela pas, na long tude tu, planti manmeri i wok long i go hariap long hel. Ol i wok long pasim tok bilong God, na ol i bihainim ol lo bilong ol yet. Taim ol i bihainim laik nogut bilong ol yet, orait God bai i lusim ol na larim ol i bihainim tingting nogut bilong ol yet.
Pawa bilong gutnius tasol inap long pulim ol manmeri i kam lusim pasin doti na i go long Krais. Marimari bilong God em i bikpela tru long kisim bek ol man i doti stret. Tasol taim Krais i hangamap long diwai kros, em inapim tok bilong God: “God i no bin pasim Pikinini bilong em yet. Nogat. Em i bin salim em i kam bilong helpim yumi” (Rom 8:32).
SAMPELA TINGTING
Yumi i gat wok bilong bringim dispela gutnius i go long o lain i doti tru, o nogat? Bilong wanem?
Ritim: Rom 1: 8-17
Mi no save sem long autim gutnius, long wanem, strong bilong God i stap long gutnius, em strong bilong kisim bek olgeta man i bilip, ol Juda pastaim, na ol manmeri bilong ol arapela lain tu. – Rom 1:16
Long han bilong Pol, God i givim planti ol buk long Nupela Testamen long yumi. Na buk Rom long Buk Baibel i soim klia gutnius bilong God. Pol yet i autim dispela gutnius klia tru long buk Rom.
Pol i raitim dispela buk long yia 58, em i long taim bipo long tude. Long yia 58, dispela siti Rom em i nambawan siti long kingdom bilong Rom. King bilong dispela kingdom i save stap long Rom. Tasol dispela king, na ol arapela bikman long Rom, ol i no save long dispela likilk lain Kristen husat i kisim dispela pas long Pol na i bung long siti bilong ol. Tasol God i makim dispela pas bilong Pol bilong kamap bikpela samting long dispela graun, na dispela pas i winim olgeta wok bilong ol ami bilong Rom.
Na sios bilong Rom i ritim dispela pas na i tok, “Pol bai i kam long Rom, na long dispela pas em i autim gutnius bilong Krais.”
Tasol klostu, dispela liklik sios long Rom i bungim ol bikpela hevi. King bilong Rom na ol arapela bikman long Rom i kam na wok long bagarapim dispela sios. Ol i les bikos sios i wok long lotuim Jisas na i no lotuim king bilong Rom. Bihain ol i tromoi planti ol Kristen long ol laion, olsem ol laion i ken kaikaim ol. Tasol kingdom bilong Rom i no inap winim bilip bilong ol Kristen. Pasin bilong bihainim Krais na Kingdom bilong Krais yet i winim dispela kingdom bilong Rom - bikos pawa bilong gutnius bilong God i save kisim salvesen i kam!
Planti taim long histori bilong sios bilong God, dispela buk Rom i wok long stongim planti Kristen, na taim ol i ritim tok tru long dispela buk gen, sios i wok long kamap strongpela moa long dispela tok. Dispela pas i go long Rom i givim gutpela save long sios, na pawa long sios long autim tok bilong God long ol arapela lain long dispela graun.
Yumi no ken “sem” long ritim na autim dispela tok long buk Rom. Em i gutnius bilong Krais, em i gat strong bilong kisim bek olgeta man i bilip. Long dispela pas, pawa bilong God bilong kisim bek olgeta man bai i mekim wok long olgeta hap we bilip i stap.
SAMPELA TINGTING
Yu gat sampela askim o sampela tingting long ritim na kisim skul long dispela buk Rom long dispela mun?
Ritim: Jon 15:1-11
Yupela i mas karim planti kaikai na i stap disaipel bilong mi, na long dispela pasin Papa bilong mi i kisim biknem. – Jon 15:8
Tingting long wanpela gaden i gat ol kain kain prut samting. Papa bilong gaden i kam bilong painim prut bikos em i wok bilong em. Taim gaden i pulap long kaikai, em bai i amamas; i min olsem em i gutpela papa bilong gaden. Taim ol diwai i no karim kaikai, Papa bilong gaden bai i rausim ol lip samting bilong en i nogut. Na sapos em i no karim kaikai, orait em bai i rausim planti ol han bilong dispela diwai.
Na ol dispela prut i olsem yumi manmeri. Olsem Papa bilong gaden i save wok long gaden bilong em, God yet, olsem Papa bilong yumi i save wok long yumi. God i gat laik olsem em bai i kisim planti kaikai stret. Em i rausim ol lip samting bilong kisim planti moa kaikai yet. Na sapos em i mekim bikpela wok stret, tasol ol manmeri i no karim kaikai, orait long dispela taim God bai i rausim han bilong diwai. Na i min olsem yumi i no stap olsem lain bilong em nau.
Yumi i no inap karim kaikai sapos yumi no stap lain bilong Jisas. Sapos yumi i no pas wantaim Jisas, bai yumi i no inap mekim wanpela samting. Taim yumi i save long marimari bilong God, taim Spirit bilong God i wok long bel bilong yumi, long dispela taim tasol bai yumi inap mekim ol gutpela samting God yet i laikim. Ol dispela gutpela wok i olsem ol prut, ol kaikai samting, na God yet i amamas long ol.
Taim yumi i bungim pen na hevi tasol yumi i no bel kros long dispela, bai yumi i karim kaikai. Taim yumi i mekim ol gutpela pasin, tasol yumi i no apim yumi yet; taim yumi i bihainim Bikpela maski em i givim hevi long yumi; taim yumi i autim nem bilong Jisas maski ol lain i les long yumi; taim yumi i bihainim Krais maski yumi i mas wokabaut long rot yumi i les long wokabaut long en; orait long ol dispela taim yumi i karim ol gutpela prut, ol gutpela kaikai stret.
Sapos yumi i no pas wantaim Krais, sapos yumi i stap ausait long Krais, orait yumi i no inap karim kaikai. Tasol sapos yumi i kisim nupela laip long Krais, bai yumi i karim kaikai. Sapos ol Kristen i no karim kaikai i min olsem sampela samting i kranki tru, na ol dispela lain i mas skelim ol yet gut tru.
Wok bilong God bai i karim kaikai. Taim God i salim marimari i gat pawa long senisim laip bilong yumi, God yet bai kisim ol gutpela prut em yet i kamapim long yumi.
Olsem Katekism bilong Heidelberg i tok, “Ol man i save stap memba bilong Krais long trupela bilip, i no inap lusim pasin bilong karim gutpela kaikai bilong dispela bilip.”
SAMPELA TINGTING
God bai i lukim wanem ol prut/kaikai long laip bilong yu?
Ritim: Jon 14:18-24
Na Jisas i bekim tok bilong em olsem, ‘Sapos man i laikim mi tru, em bai i bihainim gut tok bilong mi. Na Papa bilong mi bai i laikim dispela man. Na bai mitupela i kam long em na i stap wantaim em oltaim oltaim.’ – Jon 14:23
Sapos yumi i laikim tru Jisas, i min olsem yumi i bihainim gut tok bilong em. “Sapos man i laikim mi tru, em bai i bihainim gut tok bilong mi.” Pasin bilong laikim tru Krais em i samting bilong wok. I no samting long tok bilong yumi tasol. Pasin bilong yumi i mas wankain long tok bilong yumi.
Sapos wanpela man o meri i pas wantaim Krais na i save laikim em tru na bihainim em wantaim, em bai pilim bikpela marimari tru long laip bilong em. Em bai bilip long marimari bilong God. Na moa, God i stap laip insait long em!
Yumi klia olsem God Triwan i stap: Papa, Pikinini na Holi Spirit. Yumi save tingting olsem God Papa i stap antap long yumi, olsem em i kamapim dispela graun na bosim dispela graun. Yumi save tingting olsem God Pikinini em i mekim wok long yumi olsem namel man. Yumi save tingting olsem God Holi Spirit em i stap insait long yumi.
Na ol dispela samting em i tru, tasol dispela tripela i wanpela, bikos wanpela God tasol i stap. Na em i tru olsem Buk Baibel i skulim yumi olsem God Holi Spirit i kam na stap insait long yumi taim yumi i kisim marimari bilong God. Long dispela teks Jisas i tok, “Na bai mitupela – Papa na mi yet – i kam long em na i stap wantaim em oltaim oltaim.”
Dispela God i stap oltaim oltaim, em i kam na stap wantaim yumi sapos yumi i laikim tru Jisas Krais. Em i bikpela samting tru na em inap long pretim yumi. Dispela God Antap Tru, dispela God i Gat Olgeta Strong, dispela God bipo i stap long wanpela tempel olsem ol lain inap long kam long em, dispela God i kam stap wantaim mi! Em i marimari tru. Na i min olsem yumi i gat bikpela wok. Nau ol lain i mas kam long yumi na lukim God.
Olsem na, taim yumi i bilip long Krais, marimari bilong God bai i kam long yumi na yumi i mas salim em i go long ol arapela.
SAMPELA TINGTING
Dispela God i stap oltaim oltaim, em i kam stap wantaim yumi sapos yumi i laikim tru Jisas Krais. Dispela tok i gat wanem mining long laip bilong yu?
Ritim: Jon 7:37-39
Em i olsem tok i stap long buk bilong God, sapos man i bilip long mi, orait planti wara i gat laip bai i kamap long bel bilong en na i ran i go. – Jon 7:38
Dispela em i promis bilong Jisas, na planti i kisim pinis dispela promis: taim yu bilip long Jisas bel bilong yu bai pulap, na nek bilong yu i no inap dai long wara nau.
Yumi olgeta, taim mama i karim yumi, yumi i dai long wara. Na taim yumi i wokabaut long dispela laip, yumi save wok long painim rot bilong pinisim dispela dai long wara. Planti lain ol i traim kain kain rot long kisim bel isi. Sampela bai wok long bungim planti mani, sampela i wok long kisim namba, na sampela i wok long mekim pasin pamuk long pinisim dispela dai long wara.
Tasol i no gat wanpela samting o wanpela man o meri i ken pulapim bel bilong yumi na pinisim dispela dai long wara. Ol kago samting, na mani samting i no inap. Man i no inap givim long meri, na meri i no ken helpim man bilong em long pinisim dispela dai long wara. God i kamapim yumi long kisim em. Long God tasol bai yumi kisim wanem samting yumi olgeta i painim.
Jisas i kam long dispela graun long givim yumi dispela wara i gat laip. Ol haiden lain i driman long kisim dispela kain man. Olgeta lain i driman long kisim sampela samting long amamasim ol, long pulapim ol, na long givim bel isi long ol. Ol lain Juda i wetim wanpela man bilong kisim bek ol. Jisas i kam bilong bringim wara bilong laip.
Taim yumi i dringim wanem samting Jisas i givim yumi, i olsem yumi i bilipim em. Olsem tasol yumi i mas daunim yumi yet na dringim dispela wara bilong laip.
Taim yumi mekim olsem bai nek bilong yumi i no drai nau, na yumi i no dai long wara nau, tasol moa yet i olsem yumi i gat laip insait long yumi yet. Bipo, bel bilong yumi i emti – i no gat samting – tasol nau bel bilong yumi i gat pawa. Buk Baibel i tok olsem, “wara i gat laip i kamap long bel bilong en i ran i go.”I min olsem yumi inap long soim dispela wara i gat laip long ol arapela. Ol lain i kisim pinis dispela wara bilong laip inap salim dispela wara i go long ol arapela tu.
Marimari bilong God, o Spirit bilong God, i pulapim bel bilong yumi olgeta. God tasol inap i go dip insait long bel bilong yumi na senisim dispela bel i dai long wara i kamap olsem wel i gat planti wara stret, na dispela wara i kapsait na ran i go. Na God i save yusim yumi long givim dispela wara long ol arapela lain i dai long wara tu.
SAMPELA TINGTING
Yu yet yu dai long wara? God i save inapim dispela long laip bilong yu olsem wanem?
Ritim: Aposel 28:17-24
Em i save autim tok bilong kingdom bilong God, na em i skulim ol manmeri long tok bilong Bikpela Jisas Krais. Em i no pret long autim tok na i no gat wanpela man i tambuim em. – Aposel 28:31
Long Jerusalem i go long Rom – em i stori long dispela buk Aposel. Em i kirap long Jerusalem, dispela hap we ol i laitim dispela paia bilong gutnius. Na long pinis bilong dispela buk Aposel, dispela paia i wok long kamap bikpela na go long olgeta hap long dispela bikpela taun, Rom.
Namba wan samting i olsem: dispela las tok long dispela buk i soim yumi olsem Pol i stap long Rom tupela yia, na em yet i save givim mani long Papa bilong haus. Tasol yumi ken lainim planti moa samting long ol dispela las tok long dispela buk.
Em i tok klia olsem Pol i bin autim tok bilong kingdom bilong God. Dispela em i bikpela tok save tru. Ol lain Juda i bin wetim dispela kingdom bilong God. Ol lain i daun tru, ol i wetim taim Bikpela i kam long bagarapim ol lain Rom i bosim ol, na sanapim kingdom bilong em yet long dispela graun, olsem stretpela kingdom tru. Ol profet tu i bin autim tok long dispela bikpela hop bilong ol. Na nau Pol i autim tok olsem dispela kingdom i kam pinis long taim Jisas em i kam.
Olsem na dispela teks i tok, “em i save autim tok bilong kingdom bilong God, na em i skulim ol manmeri long tok bilong Bikpela Jisas Krais.” I no olsem dispela kingdom i samting bilong bihain taim tasol. Kingdom bilong God i op pinis, na ol lain i ken i go insait long kingdom taim ol i bilip long Jisas, em i Mesaia, em i Bikpela. Taim yumi i bilip long em, yumi i go insait long kingdom pinis.
Pasin bilong autim tok long dispela kingdom na autim tok long Jisas, em i wankain samting tasol. Taim ol i autim tok long Jisas i olsem ol i stori long kingdom bilong God. Taim ol i tokaut long wok bilong Jisas, kingdom bilong God i op nau.
Namba tu samting i olsem: dispela ol liklik las tok long Buk Aposel i soim yumi olsem tok bilong God i win pinis. Pol, “i no pret long autim tok na i no gat wanpela man i tambuim em.”Tok bilong God i win. Em bai i go na i go moa yet. Em bai winim dispela graun bilong sanapim kingdom bilong God.
Olsem na, tude, namba wan samting long dispela graun i bilong autim tok long wok bilong Bikpela Jisas Krais, na kingdom bilong God.
SAMPELA TINGTING
Beten dispela prea (i kam long Sande 48, Katekisim bilong Heidelberg): Long Tok na Spirit bilong Yu, Yu ken bosim mipela, na mipela i ken wok long daunim mipela yet na stap aninit long Yu. Yu ken lukautim sios bilong Yu na mekim em i kamap bikpela.Yu ken bagarapim ol wok bilong Satan na olgeta strongpela spirit i save birua long Yu, na olgeta tingting nogut i save birua long Tok bilong Yu. Yu ken mekim olsem inap long taim Kingdom bilong Yu i pulap tru na Yu stap het tru bilong olgeta samting.
Ritim: Aposel 20:28-38
Nau mi putim yupela i stap long han bilong God, na mi laik bai yupela i tingim tok bilong marimari bilong em..... Mi no bin mangal long silva na gol na laplap samting bilong wanpe- la man. – Aposel 20:32-33
I gat planti ol pasto i bin yusim namba wan hap bilong dispela teks taim ol i lusim sios bilong ol na i go long narapela sios: “Nau mi putim yupela i stap long han bilong God, na mi laik bai yupela i tingim tok marimari bilong em.”Tasol planti ol i no save autim tok long dispela hap teks: “Mi no bin mangal long silva na gol na laplap samting bilong wanpela man. Yupela yet i save, long han bilong mi yet mi bin mekim wok bilong lukautim mi yet, na bilong helpim ol man i stap wantaim mi tu.”
Em i tru olsem sios i mas lukautim pasto bilong ol. Tasol long dispela teks God i laik soim yumi olsem ol lain i autim tok bilong God, na yumi ol Kristen lain tu, yumi i mas mekim ol gutpela pasin. Sapos yumi tokim ol lain olsem God i laikim tru ol, tasol yumi yet i les long laikim tru ol, olsem wanem long dispela tok?
Sampela ol pasto long tude, long TV tu, ol i laik autim ol bikpela tok stret, tasol planti taim pasin bilong ol i nogut, na ol i no laikim tru ol lain bilong God.
Yumi yet i kisim marimari bilong God pinis, na yumi mas serim dispela marimari wantaim ol arapela manmeri. Na em i tru, yumi i no ken singautim ol lain long kam long sios bilong yumi, na tok, “yu kam ya, bikos long dispela sios bai yu lukim ol lain i mekim gutpela pasin tasol.”Yumi no singautim ol lain i kam long sios bikos yumi yet i gutpela tru; nogat, yumi i singautim ol i kam bikos Krais yet i gutpela tru.
Tasol, yumi i mas lukaut. Nogut yumi i kamap olsem ol lain Farisi; Krais i tok olsem ol lain i no ken bihainim pasin bilong ol. Em i tru olsem yumi i man tasol, na yumi i mekim sin na i no stretpela olgeta. Tasol Spirit bilong God i gat pawa na em bai i soim Krais long ol arapela long pasin na wokabaut bilong yumi yet.
Spirit bilong God bai givim marimari tru long yumi, olsem na pasin bilong yumi i mas wanbel long tok bilong yumi.
SAMPELA TINGTING
Yu yet, yu save serim marimari bilong God wantaim ol arapela? Askim God long givim marimari long yu bilong ol arapela inap long lukim Krais namel long yumi.
Ritim: Aposel 20:17-27
Olsem na mi laik tokaut klia long yupela nau. Sapos wanpela namel long yupela em i lus, dispela em i no asua bilong mi, long wanem, mi no bin surik long autim olgeta tingting bilong God long yupela. – Aposel 20:17-27
Taim God i tokim wanpela man nogut, “Yu mas i dai,” tasol profet bilong God i no givim tok lukaut long dispela man, bai dispela profet i gat bikpela asua long ai bilong God. “Sapos yu no tokim em, orait bai sin bilong en i stap olsem tasol, na em bai i dai. Tasol long ai bilong mi em i asua bilong yu tasol na em i dai.” Dispela em i tok bilong God long Esekiel 3:18-21.
God em i gat laik olsem ol man nogut i mas tanim bel. Em i no gat laik sapos ol man nogut i dai.
Buk Baibel i soim klia olsem ol man yet i save bihainim pasin nogut na ol i putim ol yet long hel. God i salim pikinini bilong em i kam bilong kisim bek ol man i hetim God. Na God i tokim sios bilong em, lain bilong em, pasto bilong em, olsem em bai i mekim save long ol sapos ol i no tok lukaut long ol lain i lus.
Em i bikpela wok bilong sios bilong God. Sios i mas klia gut olsem God yet bai tok olsem yumi i gat asua sapos yumi no tok lukaut long ol lain i mekim sin. Tru, dispela tok long Esekiel i kam long Olpela Kontrak, tasol yumi tude i no ken lus tingting long dispela. Pol yet, em i no lus tingting long dispela.
“Sapos wanpela namel long yupela em i lus,” em i tok, “dispela em i no asua bilong mi, long wanem, mi no bin surik long autim olgeta tingting bilong God long yupela.” Dispela tok, “olgeta tingting bilong God,” i min olgeta tok God yet i givim long em. Pol em i no senisim tok bilong God, em i no bin daunim sampela tok bilong God o lus tingting long sampela tok bilong God. Em i autim olgeta tok tru long ol. Yumi i no save helpim ol manmeri taim yumi i no autim olgeta tok tru long ol bikos yumi i pret long putim sin bilong ol ples klia.
Sapos i gat sampela lain i gat bikpela sik, olsem kensa, na yu yet i gat marasin bilong oraitim dispela sik, na yu no givim long ol na ol i dai, i olsem yu yet i kilim ol i dai, long wanem,
yu yet yu no helpim ol. Maski yu lukautim ol na givim wara long ol na yu sindaun planti wantaim ol. Yu yet i no bin givim dispela namba wan samting ol i nidim long ol. Yu yet yu pasim rot bilong ol long stap laip.
Em i no isi bilong tok lukaut long sin bilong ol arapela man. Tasol yumi i mas mekim olsem. Ol lain i les long laikim tru bilong God bai bagarap.
SAMPELA TINGTING
Tingting long pasin bilong sios bilong yu bilong tokaut long dispela long ol arapela manmeri. Prea strong tru olsem God i ken helpim yumi i mekim olsem.
Ritim: Aposel 9:36-43
Oltaim em i save mekim ol gutpela pasin na em i save helpim ol manmeri i sot long ol sam- ting. – Aposel 9:36
Olgeta wok insait long sios, maski em i wok long sait bilong spirit o long sait bilong bodi, i wankain long ai bilong God, bikos tupela wantaim i kam long God na i wok long givim glori long God. Olgeta wok insait long sios em i samting bilong spirit, bikos Spirit bilong God i kirapim dispela wok. Wok bilong sios i no samting bilong ol hetman tasol. Olgeta memba bilong sios i stap aninit long marimari bilong God, i gat wok bilong mekim marimari bilong God i ran i go aut.
Ol presen na wok bilong yumi i no wankain. Dorkas em i wanpela meri em i gat presen bilong helpim ol arapela, na em i save mekim bikpela wok long dispela. “Oltaim em i save mekim ol gutpela pasin na em i save helpim ol manmeri i sot long ol samting.” I no olsem wan wan taim tasol em i save helpim ol arapela. Nogat. Em i pulap long gutpela pasin bilong helpim ol arapela.
Dispela meri em i wanpela bikpela blesing long sios bilong em. Planti lain long sios i kisim ol samting em i save samapim. Em i olsem ol ofa bilong em long tok tenkyu long God.
Tude, sios bilong God i save makim Sande olsem bikpela de bilong harim tok bilong God, bilong prea na bung wantaim. Na em i gutpela, tasol bilong wanem yumi i no save makim em olsem de bilong “mekim ol gutpela pasin na helpim ol manmeri i sot” tu? Na dispela wok i no samting bilong Sande tasol, em i samting bilong olgeta de. Tasol nogut yumi lus tingting long mekim dispela wok.
Yumi i ken tok tenkyu long God bikos em i marimari long olgeta manmeri i save daunim ol yet na mekim wok bilong laikim tru na bilong soim marimari long ol arapela. Yumi i ken tok tenkyu long God long dispela marimari yumi inap long lukim long han bilong ol. Na yumi i ken amamas olsem God yet bai kisim ol dispela lain i kam bung wantaim em oltaim oltaim.
SAMPELA TINGTING
I gat sampela lain long sios bilong yu i save mekim ol gutpela pasin na helpim ol manmeri i sot? Tok tenkyu long God long marimari bilong em yumi i lukim long han bilong ol.
Ritim: Aposel 6:1-7
Olsem na ol brata, yupela i mas painim 7-pela man namel long yupela, ol i gat gutpela nem namel long ol manmeri, na Holi Spirit i pulap long ol, na ol i gat gutpela save. Na yumi ken putim ol dispela man bilong lukautim dispela wok. – Aposel 6:3
Bikos ol Kristen i wanbel na i gat wanpela tingting tasol, ol i redi long serim ol samting bilong ol yet. Olgeta memba bilong sios i mas holim wankain bilip na ol i mas bungim maus long singsing. Ol i mas kisim kolekta tu, bikos ol i redi long givim ol samting long ol arapela bikos ol i kamap klin long Spirit bilong God.
Long sios long dispela teks ol i save bungim ol samting bilong ol lain bilong sios, na long wan wan de ol i save tilim dispela long ol lain i nidim. Na ol disaipel i makim 7-pela man long tilim kaikai olsem na i no gat wanpela i sot long en.
Em i no wankain olgeta long sios bilong yumi tude. Tasol tude tu yumi i gat ol lain i sot long sampela samting insait long sios bilong yumi. Olsem na yumi yet i mas bihainim dispela pasin dispela teks i stori long en. Long tok bilong God, kingdom bilong heven bai i op. Na long prea, na long pawa bilong God, marimari bilong God bai i kam daun. Na taim yumi givim sampela samting bilong yumi yet long helpim ol arapela, i olsem marimari bilong God i ran long wanpela man na i go long narapela.
Sios bilong God i mas lukaut olsem ol lain bilong ol i pulap long Spirit na save, ol i bisi long larim dispela marimari bilong God i ran i go long ol arapela. Nogut ol i pasim dispela marimari bilong God.
SAMPELA TINGTING
Sios long hap bilong yu yet i save yusim ol ofa na kolekta bilong lukautim ol lain i sot long sampela samting, o nogat?
Ritim: Aposel 5:1-11
Na Pita i tokim em olsem, ‘Watpo yutupela i pasim tok long traim Spirit bilong Bikpela? Harim. Ol man i planim man bilong yu, ol i wokabaut i kam insait long dua. Na ol bai i karim yu tu i go.’ – Aposel 5:9
Dispela pe nogut long giaman tok em i mas stap olsem wanpela bikpela tok lukaut long yumi ol Kristen lain long tude: sapos yumi stap laip long marimari bilong God, sapos yumi i stap olsem tempel bilong God, yumi i no ken karim i kam sampela doti samting long ai bilong God. Spirit bilong God i was long dispela tempel i bin kamap klin long marimari bilong God.
Long tingting bilong yumi yet, yumi bai tok olsem dispela sin bilong Ananaias na Safaira i no bikpela sin tumas. Ol i givim planti mani pinis (long laik bilong ol yet), tasol ol i giaman olsem ol i bin givim planti moa mani olsem ol i bin givim tru tru. Ol i giaman, na taim ol i mekim olsem, ol i stilim ona bilong God. Dispela man wantaim meri bilong em, tupela i kamapim dispela plen bilong giamanim ol lain, na God yet. Safaira tu, maski em i gat sans long tok tru, em i bihainim dispela tok giaman tu.
Yumi mas laikim tru tok i tru antap long man o meri bilong yumi, na antap long olgeta arapela manmeri. I gat sampela taim bilong tok, “Nogat. Yumi no ken mekim olsem. Yumi i mas bihainim tok i tru.”
Planti lain tumas i save bihainim tingting bilong ol wantok bilong ol, na maski long wari long tok tru. Na ol pikinini i save bihainim dispela kain pasin tu. Tasol God i laik sapos yumi i stap tru moa long tok tru olsem yumi i stap tru long ol famili o poro bilong yumi. Sapos yu laikim tru famili o poro bilong yu, yu bai helpim ol i stap longwe long sin – na long dispela sin bilong giaman tu!
Sampela lain, bikos ol i les long kirapim pait, ol bai “traim Spirit bilong Bikpela” na giaman. No ken mekim olsem! Mobeta sampela pait i kamap long famili bilong yu, olsem yu i pait long Bikpela.
SAMPELA TINGTING
Wanem samting i save kamap taim yu putim ol famili o ol poro bilong yu antap long tok tru?
Ritim: Aposel 4:32-37
Olgeta manmeri i bilip long Jisas, ol i wanbel na ol i gat wanpela tingting tasol. I no gat wan- pela man i lukim wanpela samting bilong en na i tok olsem, ‘Dispela samting em i bilong mi stret.’ Nogat. Olgeta samting bilong ol i bilong olgeta wantaim. – Aposel 4:32
God i givim Holi Spirit long yumi taim yumi i bilip long Jisas. Na olgeta gutpela samting bilong Krais – em i lusim sin bilong yumi, yumi i kamap nupela, promis bilong laip i stap oltaim, na laikim tru bilong God yet – olgeta dispela samting bilong marimari i kam long bel bilong yumi taim yumi i kisim Spirit bilong God.
Na dispela marimari i mas go long wanpela man na ran i go long narapela man. Spirit bilong God i save bungim yumi wantaim ol arapela lain bilong Krais, na yumi bai i wanbel, na dispela Spirit bai kirapim yumi long serim dispela gutnius wantaim ol lain i no bilong Krais. Spirit yet i wokim dispela long bel bilong yumi.
Ol Kristen long dispela teks, long dispela nupela sios, ol i “wanbel na ol i gat wanpela tingting tasol.”I min olsem ol i kamap nupela tru na ol i wanbel tru.
“I no gat wanpela man i lukim samting bilong en na i tok olsem, ‘Dispela samting em i bilong mi stret.’ Nogat. Olgeta samting bilong ol i bilong olgeta wantaim.” Spirit yet i senisim pasin bilong ol. Bel bilong ol i senis na ol i laik serim olgeta samting bilong ol. I no olsem sampela gavman lain i tok strong long ol i mas mekim olsem. Nogat. Dispela Spirit i stap insait long ol i mekim dispela wok, na ol i kamap nupela long pasin na tingting.
Dispela teks i no min olsem ol lain long tude i no ken holim sampela samting bilong ol yet.
I no min olsem olgeta Kristen i mas givim olgeta samting bilong ol yet long ol arapela. Laip bilong yumi i no wankain long tude, na Holi Spirit i save mekim kain kain wok long kain kain ples.
I min olsem Holi Spirit bilong God i mekim wok insait long yumi ol Kristen. Na em i gat pawa. Na taim yumi i kisim Spirit pinis yumi bai kisim nupela tingting tu long sait bilong ol samting bilong yumi long dispela graun. Bai yumi wok long wanbel wantaim ol lain bilong Krais, na dispela bai winim laik bilong yumi bilong kisim ol kago na mani samting bilong dispela graun.
SAMPELA TINGTING
Yu save stap wanbel na i gat wanpela tingting wantaim ol lain bilong Krais?
Ritim: 1 Pita 5:1-5
Na yupela olgeta i mas bihainim pasin bilong daunim yupela yet na i stap aninit long ol ar- apela manmeri bilong God. Yumi save, “God i save daunim ol man i apim nem bilong ol yet, tasol em i save marimari na mekim gut long ol man i daunim ol yet.” – 1 Pita 5:5
Kain olsem wara i save ran i go daun, marimari tu i save ran i go daun. Taim yu daunim yu yet, em bai i kam long yu, tasol sapos yu apim yu yet em i hat tru long kisim.
Planti taim long Buk Baibel yumi save ritim olsem God i tromoi i go ol lain i apim ol yet, na ol lain i bikman na maniman tru, tasol em i save givim kaikai long ol lain i hangre, na em i apim ol lain i daun tru. Yumi mas daunim yumi yet na prea, bilong larim marimari bilong God i kam.
Yumi mas daunim yumi yet long ai bilong God, tasol yumi i mas daunim yumi yet na stap aninit long ol arapela manmeri bilong God tu. “Na yupela olgeta i mas bihainim pasin bilong daunim yupela yet na i stap aninit long ol arapela manmeri bilong God.”
Yumi no ken tingting long daunim yumi yet wan wan taim tasol. Nogat. Yumi i mas daunim yumi yet na stap olsem olgeta taim yumi i stap long dispela graun.
Planti ol man long dispela graun i wok long kalap kalap long ol arapela – i min olsem ol
i wok long kisim namba na biknem, maski ol i bagarapim ol arapela man o meri taim ol i mekim olsem. Tasol ol trupela Kristen i wok long “brukim skru” long ol arapela Kristen. Ol i no mangalim samting bilong ol arapela, ol i no mangalim namba bilong ol arapela; nogat, ol i save amamas wantaim ol arapela tasol.
Na ol Kristen husat i stap hetman bilong sios, ol i no ken tingting long apim ol yet. Ol i stap aninit long Bikpela, na ol i olsem ol wasman aninit long nambawan Wasman, na ol i sipsip bilong em yet. Taim Krais bai i kam bek, ol bai i kisim namba.
Nambawan Wasman yet i kam long dispela graun, na em i dai olsem wanpela wokboi. Em i daunim em yet long bikpela sem bilong yumi yet. Em i mekim wok na daunim em yet olgeta, na orait, bihain long dispela em i kisim bikpela glori. Ol lain bilong God long dispela graun tu i mas mekim wok na bihainim em, inap long taim ol bai i kisim glori tu, taim em i kam bek.
Krais bai i apim ol lain i daun tru, na em bai i givim glori long ol lain i karim diwai kros bilong ol yet. Olsem na, long dispela graun yumi i mas daunim yumi yet, na wokabaut long dispela ples i daun tru, na bai marimari inap long ran i kam daun long yumi.
SAMPELA TINGTING
Yu save wok long “brukim skru” long ol arapela Kristen, o nogat? Olsem wanem?
Ritim: 1 Pita 4:7-11
God i bin marimari long yupela olgeta wan wan na givim ol kain kain presen long yupela. Ol- sem na yupela wan wan i mas i stap gutpela wokboi bilong God, na yusim ol dispela presen bilong helpim ol arapela manmeri bilong God. – 1 Pita 4:10
Long taim bilong Buk Baibel, ol bosboi, o ol wokboi, i stap aninit long masta bilong ol, na dispela masta i askim ol long lukautim gut haus bilong em na olgeta arapela samting bilong em tu. Planti taim ol masta bai makim wanpela bosboi bilong lukautim olgeta samting bilong em bikos em yet i save stap long rot planti taim, na em i no save stap longpela taim long haus. Na sampela taim, taim ol masta i stap long haus tu, ol bai i makim sampela bosboi bilong lukautim ol samting masta bilong ol i nidim. Ol bai i kisim kaikai i kam long haus kaikai bilong masta bilong ol na tilim long ol lain bilong haus bilong masta bilong ol tu. Josep em i bin gat dispela kain wok long haus bilong Potifar (Stat 39).
Taim Buk Baibel i tok olsem yumi i mas i stap gutpela wokboi bilong God na yusim ol dispela presen bilong helpim ol arapela manmeri bilong God, i min olsem yumi i mas tilim ol presen bilong God long ol lain long “haus” bilong God. Haus bilong God i olsem sios bilong em. Na ol lain long dispela haus i stap laip long marimari God yet i givim ol. Dispela marimari i lusim sin bilong yumi, em i kisim bek yumi, na em i strongim yumi. Dispela marimari i kam long yumi long Tok bilong God na Spirit bilong em. God i makim ol wokboi bilong em bilong givim ol dispela samting long ol lain bilong em.
Na em i olsem God i gat bikpela haus bilong putim kain kain presen bilong marimari long en - na em i givim wan wan presen bilong wan wan lain bilong haus bilong em bilong em
i mas stap wokboi bilong bosim gut ol dispela presen. I no olsem olgeta lain bilong God i kisim olgeta presen bilong dispela marimari. Nogat, yumi wan wan i mas bosim gut wanem presen God yet i givim yumi, olsem wanpela gutpela wokboi bilong God.
Yumi olgeta i kisim sampela presen long God. Tasol bikos yumi i olsem wokboi bilong God, i no olsem ol dispela presen i bilong yumi yet nau. Yumi mas bosim ol dispela presen gut, na God i laik sapos yumi yusim ol dispela presen bilong lukautim na helpim olgeta lain long haus bilong em. Ol dispela presen bilong marimari i mas go aut bilong helpim ol arapela.
SAMPELA TINGTING
Yu bai yusim ol presen God yet i givim yu bilong helpim ol arapela long haus bilong God olsem wanem?
Ritim: 1 Pita 3:13-17
Sapos yupela i wok strong long bihainim gutpela pasin, orait husat bai i mekim nogut long yupela? – 1 Pita 3:13
Marimari bilong God i save kamapim pasin bilong stap bel gut na bel isi long laip bilong yumi, tasol em i save mekim yumi i wok strong long bihainim gutpela pasin tu. Marimari bilong God i pasim yumi long apim yumi yet na long tingim strong bilong yumi i inap long yumi. Tasol Spirit bilong God i save strong long kirapim bel bilong yumi long amamas long bihainim ol gutpela pasin na long stap stretpela long ai bilong God.
Ol Kristen lain i mas klia gut long wanem samting i gutpela na wanem samting i no gutpela. Yumi i mas klia olsem dispela pasin bilong bihainim ol gutpela pasin em i bikpela samting tru. God bai i bekim dispela long laip i stap oltaim.
Sapos yu bilip long God, yu no ken pret long bihainim ol gutpela na stretpela pasin tasol. Olgeta samting i gutpela, olgeta samting i stretpela, olgeta samting i trupela, i kam long God tasol. Olsem na pasin bilong wok strong long bihainim ol gutpela na stretpela pasin i kam long God tu. God yet i wokim dispela na dispela samting bai bringim yumi i go long God. Yu pret long wanem samting nau? Yu wokabaut long rot bilong God yet!
Planti lain i no mekim kain ol bikpela pasin nogut we ol polis bai i kam na holim ol. Ol i no save stil, na ol i no save bagarapim ol arapela man. Tasol, ol i no wok strong long bihainim ol gutpela na stretpela pasin. I olsem ol i no hatpela tru na ol i no kolpela tru (Kamapim Tok Hait 3:16). Ol i wok long mekim wok bilong ol yet, na maski long bisi long ol arapela lain.
Tasol, yumi ol Kristen, i no ken wankain. Yumi i gat wok. God i wok long toktok long yumi. Em i putim han bilong em yet long yumi. Em i putim Spirit bilong em insait long yumi. Taim yumi les long wari sapos ol pasin em i gutpela o nogut, na yumi i no wari tumas sapos sampela samting em i trupela o em i giaman, em i olsem yumi i givim baksait long God.
God i gat laik sapos olgeta lain bilong em i strong long bihainim ol gutpela na stretpela pasin bikos ol i gutpela na stretpela. Na sapos yumi i kisim hevi taim yumi i mekim olsem, i no olsem ol hevi tru. Bikpela hevi bai kam long ol lain i save gat laik long bihainim ol pasin nogut, na long ol lain i les long bihainim strong ol gutpela na stretpela pasin tasol.
SAMPELA TINGTING
Long wok o long skul o long taim yu sindaun wantaim ol poro bilong yu, yu save pret long bihainim ol stretpela na gutpela pasin tasol, o nogat?
Ritim: 1 Pita 3:7-12
Yupela ol maritman, yupela i mas bihainim gutpela tingting na sindaun gut wantaim ol meri bilong yupela...Yupela i mas save olsem, ol meri tu bai i kisim laip bilong i stap oltaim. Sapos yupela i bihainim dispela pasin, orait i no gat wanpela samting bai i pasim ol prea bilong yupela. – 1 Pita 3:7
Long stat bilong dispela sapta Pita i stori long ol maritmeri, man bilong ol i no save bihainim tok bilong God. Tasol long dispela hap, em i stori long tupela i marit, na tupela wantaim i save bihainim tok bilong God. Man na meri wantaim bai i kisim laip bilong i stap oltaim. Tupela wantaim!
“...Yupela i mas bihainim gutpela tingting na sindaun gut wantaim ol meri bilong yupela.” Pita i laik soim klia olsem ol maritman i mas lukautim gut na laikim tru meri bilong ol. Pita tu i marit.
Na sapos tupela wantaim bai i kisim laip bilong i stap oltaim oltaim, orait tupela i mas beten wantaim tu. Sampela taim ol Kristen man na meri i no save sindaun na beten wantaim. Tarangu! Olgeta maritman na meri i mas sindaun wantaim na beten. Tupela wantaim i stap long dispela rot i go long heven.
Tasol, taim tupela i no sindaun gut, taim tupela i no wanbel, dispela samting bai i pasim
ol prea bilong tupela. Pita i no tingting long autim ol narapela hevi i save kamap taim ol maritman i no save sindaun gut wantaim meri bilong ol. Em i autim namba wan hevi stret – ol bai pasim marimari bilong God long beten bilong ol.
Yumi mas klia gut long tok bilong Pita. Em i no tok, “Sapos yupela i bungim hevi, orait yutupela i mas sindaun wantaim na prea.” Nogat, em i tok, “No ken kamapim ol hevi long marit laip bilong yupela, bikos sapos yu mekim olsem bai yu no inap long sindaun wantaim na prea.”
Buk Baibel i no tok olsem, prea em i samting bilong stretim ol hevi yumi yet i no inap long stretim. Nogat. Prea em i olsem wanpela dua bilong kisim marimari bilong God i kam long yumi. Na sapos yumi no kisim marimari bilong God pinis, i olsem yumi i no stap laip.
Olsem na ol maritman na maritmeri i mas sindaun gut wantaim olgeta taim, olsem tupela i ken sindaun wantaim na prea.
SAMPELA TINGTING
Dispela tingting bai afektim ol prea bilong yumi olsem wanem? Wanem em i tingting bilong yu long as bilong ol hevi bilong marit?
Ritim: 1 Pita 3:1-6
Yupela i no ken bilasim skin ausait tasol... Mobeta yupela i bilasim insait bilong yupela tu long olkain bilas i no inap long bagarap. Dispela kain bilas em pasin bilong i stap belgut na i stap bel isi. Dispela kain pasin em i gutpela moa yet long ai bilong God. – 1 Pita 3:3-4
Pita i tokim ol marit meri, man bilong ol i les long harim tok bilong God, olsem: “No ken toktok planti long ol. Nogat. Soim marimari na belgut long pasin bilong yu.” Man bilong ol i harim pinis ol tok long dispela marimari bilong God, tasol nau ol i mas lukim ol pasin bilong marimari tu.
Marimari bilong God i save mekim wok insait long yumi. Marimari bilong God i save mekim bel bilong yumi i kamap naispela stret. Long marimari bai yumi bilasim insait bilong yumi. Na taim ol lain i lukim ol gutpela pasin long laip bilong yumi bikos yumi i kisim marimari bilong God pinis, ol yet bai bilip long dispela marimari bilong God tu.
Ol lain bilong tude i laik giamanim yumi long wanem samting bai i mekim yumi i kamap naispela stret. Ol bai tokim yumi long bilasim skin bilong yumi tasol bilong kamap naispela stret. Na yumi mas prea olsem ol pikinini bilong yumi i no bilipim ol dispela tok giaman. Long marimari yumi bai klia olsem em i bikpela samting stret long yumi i bilasim insait long yumi, na maski long bilasim skin ausait long yumi tasol. Long marimari tasol bai yumi kamap naispela stret.
Long soim olsem bel bilong yumi i naispela tru, yumi no ken apim yumi yet. Yumi no ken toktok planti long ol naispela pasin bilong yumi. Tru, yumi i mas toktok long marimari bilong God na tok klia long marimari bilong em. Tasol, planti taim ol arapela bai klia long marimari bilong God taim ol i lukim ol pasin bilong yumi olsem yumi i stap belgut na i stap bel isi. Ol bai lukim dispela kain pasin, na ol bai klia olsem bel bilong yumi i naispela stret.
Tasol, sampela taim, maski bel bilong yumi naispela, na maski yumi i wok long bilasim insait bilong yumi, ol arapela manmeri bai les long gutnius bilong Krais yet. Tasol Buk Baibel i tok olsem God bai i amamas taim yumi i bilasim bel bilong yumi. Bikpela yet i lukim wok bilong marimari bilong em insait long bel bilong ol lain i bilip, na em i amamas tru. Em bai i tok, “Em i naispela tru!” Na em bai i lukautim ol dispela naispela lain bilong em.
SAMPELA TINGTING
Beten long God na askim em long helpim yu yet long bilasim insait bilong yu, na maski long bilasim skin ausait tasol.
Ritim: Mak 14:22-25
... na Jisas i kisim wanpela bret, na i tenkyu long God, na i brukim, na i givim long ol disa- ipel... Na em i kisim wanpela kap wain, na i tenkyu long God, na i givim long ol... – Mak 14:22-23
Marimari bilong God i kam long yumi long Tok bilong em. Sapos yumi bilip, bai yumi i kisim. Tok bilong God inap bringim marimari i kam long laip bilong yumi bikos pawa bilong Spirit bilong God i save kam wantaim. Spirit bilong God i save kisim dispela tok bilong God yumi i harim long yau bilong yumi i go long bel bilong yumi.
Na moa, God i save strongim bilip bilong yumi long Kaikai bilong Bikpela. Em i helpim yumi long bilipim marimari bilong em long Kaikai bilong Bikpela. Taim yumi i kisim hap bret,
Krais i tokim yumi olsem em i givim bodi bilong em long yumi. Em i laik sapos yumi i kaikai dispela pret na bilip olsem em i laikim yumi tumas na em i dai long yumi. Na yumi i dringim wain tu. Na i no olsem yumi i harim Tok bilong God tasol. Nogat, long maus yumi kisim wain, na yumi klia olsem God i lusim sin bilong yumi bikos blut bilong Jisas i kapsait long yumi.
Yumi bilip olsem God i mekim dispela long yumi long wanpela taim tasol. Yumi yet i no
ken tingting long baim sin bilong yumi yet, na yumi yet i no inap kisim pe nogut bilong sin bilong yumi. Dispela samting i kamap pinis. I no kamap long Kaikai bilong Bikpela. Nogat, dispela Kaikai bilong Bikpela i strongim bilip bilong yumi olsem Krais i baim sin bilong yumi, na God i lusim sin bilong yumi long wanpela taim, long yumi olgeta, long Golgota. Yumi i ken tingim, yumi i ken bilip, na yumi i ken amamas.
Narapela samting i save kamap long Kaikai bilong Bikpela tu. Yumi kaikai liklik hap bret na yumi dringim liklik hap wain. I olsem yumi bung na kaikai. Yumi save dring na kaikai bilong strongim bodi bilong yumi long mekim wok na stap laip. Tasol long Kaikai bilong Bikpela i olsem Jisas i givim em yet olsem kaikai na dring bilong yumi. Pawa bilong em i kam long yumi long Spirit bilong em. Em i strongim yumi olsem yumi i ken stap laip na mekim olgeta wok em i askim yumi long mekim.
Taim yumi lukim Kaikai bilong Bikpela, yumi tingim wok bilong Krais long Golgota. Na yumi lukluk antap long heven long ples bilong Bikpela, em i save givim yumi olgeta samting yumi nidim. Na yumi i lukim ol arapela sin lain husat Krais i kisim bek, na ol i stap olsem brata na susa bilong yumi. Na yumi tingting long dispela taim bai i kamap bihain: Bikpela i gat laik sapos yumi i bilip olsem yumi i pas wantaim em inap oltaim, na em i wok long redim bikpela na gutpela kaikai tru long yumi long heven.
SAMPELA TINGTING
Kaikai bilong Bikpela i save strongim bilip bilong yu olsem wanem?
Ritim: Matyu 20:1-16
Dispela ol man i kamap bihain tru, ol i wok wan aua tasol, na yu givim ol wankain pe olsem pe bilong mipela. Tasol mipela i bin hatwok tru stat long moningtaim tru i kam inap nau, na san i kukim nogut mipela. – Matyu 20:12
Sapos yu wanpela bosman na yu bihainim pasin bilong dispela bosman long dispela teks, ating ol wokboi bilong yu bai krosim yu nogut tru, na yu bai bungim sampela hevi long dispela pasin bilong yu. Dispela bosman em i givim wankain pe long ol wokboi bilong em, maski ol i wok inap long wanpela aua tasol o ol i wok inap long wanpela de.
Tasol long dispela teks, Jisas i no wok long skulim yumi long pasin bilong bosman long dispela graun; em i wok long skulim yumi long sampela samting long kingdom bilong heven (lain 1).
Krais i tokim yumi olsem: planti lain nau ol i stap las, ol bai i stap namba wan long kingdom bilong God. I olsem ol man bilong ol narapela lain i stap las, ol i kisim ples long ol lain Juda i stap namba wan.
Dispela stori bilong Jisas i skulim ol lain i bin mekim wok long kingdom bilong God longpela taim. Planti lain bilong yumi i “bin hatwok tru stat long moningtaim tru i kam inap nau, na san i kukim nogut mipela.”Yumi i bin mekim planti wok. Tru, yumi klia olsem yumi kamap long dispela kingdom long marimari tasol, tasol yumi i klia olsem yumi i mas mekim wok long bihainim tok bilong God. Olsem na yumi i mekim planti wok tru long kingdom bilong God. Ol arapela Kristen i apim yumi, na sampela taim yumi i wok long apim yumi yet tu.
Na wantu, narapela man i kam long dispela kingdom. Em i nupela Kristen na em i kamap nupela. Olsem na em i amamas long mekim wok bilong God. Na yu klia wanem pe em i kisim? Wan kina wan kina. Na yu klia wanem pe yumi, dispela lain i bin mekim planti wok, i kisim? Wan kina wan kina.
Em tru, taim yumi i kisim pinis marimari bilong God, yumi i mas mekim wok na bihainim em, na God bai bekim pe long wok bilong yumi. Tasol long dispela teks Bikpela i laik skulim yumi olsem long kingdom bilong God yumi i stap wankain. Yumi no ken mangalim sampela samting bilong narapela. Yumi no ken apim yumi yet na wok long kisim namba long kingdom bilong God. Yumi olgeta i mas klia tru tru olsem yumi i stap long dispela kingdom long marimari tasol.
Long kamap long kingdom bilong God em i samting bilong marimari tasol, na i no samting bilong wok bilong yumi yet!
SAMPELA TINGTING
Olgeta samting i kam long marimari bilong God. Em i tru long laip bilong yu? Taim yu mekim wok long kingdom bilong God, yu save tingting long gutpela wok bilong yu yet, o yu save tingting long marimari bilong God?
Ritim: Matyu 7:24-29
Orait man i harim dispela tok bilong mi na i bihainim, em i olsem wanpela man i gat gutpela tingting... – Matyu 7:24
Taim Jisas i autim ol dispela tok antap long maunten (Matyu 5-7), em i tokaut long planti samting i no isi long yumi i save gut long en. Long planti yia, sios bilong Krais i no wanbel tumas long as bilong ol dispela tok bilong Jisas. Sampela i tok olsem Jisas i autim ol dispela lo long pretim yumi liklik: long wanem, taim yumi i klia long asua bilong yumi, yumi bai lukluk long Krais na askim em long marimari bilong em bilong lusim sin bilong yumi.
Sampela arapela lain i tok olsem Jisas i givim ol dispela lo long ol lain i strongpela Kristen tru. Tasol sampela arapela lain i wok long skruim tok bilong Jisas liklik olsem olgeta Kristen inap wok long bihainim ol dispela tok.
Tasol, i luk olsem Jisas i gat narapela tingting. Em i tok olsem i gat tupela kain man i harim dispela tok. Sampela bai harim dispela tok na bihainim, tasol sampela arapela bai harim tok, tasol ol i no bihainim ol dispela tok. Ol man i bihainim dispela tok i olsem man i gat gutpela tingting, tasol ol man i no bihainim dispela tok i longlong.
God i givim marimari long yumi bilong yumi i ken bihainim tok bilong em. Marimari i no min olsem yumi olgeta i stap orait bikos God em i laikim yumi olgeta. Nogat. Marimari i min olsem God i kisim bek yumi. Yumi olgeta i ken i go long em, tasol taim yumi i pas wantaim em, em bai i senisim yumi, na em bai i skulim yumi long bihainim em.
Sampela manmeri bai i tok olsem, “God i laikim yu.” Na taim ol i tok olsem, ol bai i ting olsem ol i ken bihainim laik bilong ol yet bikos God i laikim ol tru. Tasol laikim tru bilong God i no min olsem yumi i ken amamas long stap long sin na bihainim laik bilong yumi yet. Taim yu save long laikim tru bilong God pinis, orait yu bai kamap narakain nau. Laip bilong yu bai senis, na yu bai kamap nupela.
Ol longlong lain tasol i ting olsem ol i ken harim tok bilong Jisas tasol maski long bihainim. Na ol dispela longlong lain ol i no bilip tru. Olsem na ol i no mekim wok. Tasol ol man i gat gutpela tingting, ol i save pret long God, na ol i bilip long em na bihainim tok bilong em.
SAMPELA TINGTING
Jisas i tokim yumi long harim na bihainim tok bilong em. Yu save mekim olsem long laip bilong yu, o nogat?
Ritim: Matyu 6:16-18
Olsem bai ol man i no ken save yu tambu long kaikai. Papa bilong yu i stap hait, em wanpela tasol i ken save. – Matyu 6:18
Planti lain tude ol i no save tambu long kaikai. Sampela taim sapos ol i gat bikpela hevi ol bai tingting long tambu long kaikai, tasol planti taim nogat.
Long Olpela Kontrak, God yet i makim sampela taim we ol lain bilong em i mas tambu long kaikai. Tasol long Nupela Kontrak yumi no stap moa aninit long ol dispela kain lo. Tasol Jisas yet i tambu long kaikai sampela taim, na sampela ol nupela Kristen long taim sios bilong Nupela Kontrak i nupela yet i save mekim dispela pasin bilong tambu long kaikai. Ol dispela lain i save tambu long kaikai bikos ol i save olsem pasin bilong wanbel wantaim God em i bikpela samting tru.
Pasin bilong tambu long kaikai i samting bilong tambu long sampela samting, bilong givim taim long tingting gut long wokabaut bilong yumi wantaim Bikpela. Tok bilong God i no tok olsem yumi i mas mekim dispela pasin, tasol i orait long yumi i mekim. Tasol sapos yumi apim yumi yet na tokaut long wanem samting yumi i mekim long ol arapela, i olsem dispela samting i samting nating tasol.
I no olsem yumi no ken amamas long olgeta gutpela samting God i givim yumi. Sapos olgeta taim yumi tambu long amamas long ol gutpela samting, i min olsem yumi i no klia long marimari bilong God.
Tasol yumi i mas lukaut long kamap les long mekim wok olsem Kristen. Planti taim yumi save wari long kaikai na dring na klos. Na planti taim yumi i save tingting planti long yumi yet o long ol spot samting bilong yumi o long amamasim skin bilong yumi long kain
kain rot. Olsem na yumi mas lukaut. Nogut yumi lus tingting long wokabaut bilong yumi wantaim God. Sampela taim em i gutpela long tambu long kaikai o long tambu long baim nupela klos o long tambu long amamasim skin bilong yumi yet, bilong kamap strong moa yet long bilip, long hop na long laikim tru.
SAMPELA TINGTING
Yu ting wanem long dispela pasin bilong tambu long kaikai (o long sampela arapela samting)? Bai yu tingting long mekim dispela pasin, o nogat? Bilong wanem?
Ritim: Matyu 6:5-15
Tasol taim yu laik mekim prea, yu mas i go insait long rum bilong yu na pasim dua na beten long Papa bilong yu i stap long ples hait. Na Papa bilong yu i save lukim ol samting i stap hait, em bai i bekim pe long yu. – Matyu 6:6
Jisas i tokim yumi long givim mani bilong yumi long ol arapela long ples hait, na nau em i skulim yumi long mekim olsem taim yumi i prea. Prea em i samting bilong God wantaim ol lain i beten i stap: “Go insait long rum bilong yu, pasim dua na beten long Papa bilong yu i stap long ples hait. Na em bai i lukim yu.”
Em tru, ol Kristen i save sindaun na prea wantaim ol arapela lain tu, long haus lotu o long narapela hap. Buk Baibel i skulim yumi long mekim olsem na em i gutpela long strongim wanpela narapela long beten olsem. Tasol ol manmeri i autim prea long yau bilong ol arapela, ol i mas lukaut. Sampela taim ol i wari tumas long ol lain i harim ol long graun, na ol i lus tingting long God long heven i harim ol.
Tasol tu, prea em i samting bilong yu yet, na yu tasol, wantaim God. Long prea, yumi toktok long Papa bilong yumi i stap long ples hait, em i lukim olgeta samting long laip bilong yumi. Sapos yumi i Kristen, bai yumi yet i prea long God long ples hait tu.
Tude, planti samting bilong yumi i no save stap long ples hait. Long TV yumi save harim kain kain stori long kain kain manmeri. Long Facebook tu, yu inap save long planti samting ol arapela i mekim na tingim. Na long sios tu planti manmeri i ting olsem ol i mas save long olgeta samting bilong ol arapela. Na long haus bilong yumi tu, i luk olsem planti ol arapela i gat laik long save long wanem samting yumi i mekim, na planti taim yumi i wok long kisim save long wanem samting ol arapela i mekim.
Tasol dispela i no gutpela na em bai afektim laip bilong yumi wan wan. Olsem na yumi i mas harim tok bilong Krais. Yumi mas pasim dua na beten long Papa bilong yu i stap long ples hait. Em bai i harim yu!
SAMPELA TINGTING
Yu yet yu save makim taim long wan wan de bilong yu yet, na yu tasol, i sindaun na prea long Papa bilong yu, o nogat? Sapos nogat, orait yu mas wok strong long makim dispela kain taim long wan wan de.
Ritim: Matyu 6:1-4
Olsem na dispela wok marimari yu mekim bai i stap hait. Na Papa bilong yu i save lukim ol samting i stap hait, em bai i bekim pe long yu. – Matyu 6:4
Pasin bilong givim mani long ol arapela em i bikpela samting ol gutpela manmeri i save mekim. Tasol yumi no ken mekim dispela pasin tasol, yumi i mas bihainim gutpela rot long mekim dispela pasin tu. Bikpela bilong yumi i tokim yumi long helpim ol arapela long ples hait. Pasin bilong givim ol samting long ol arapela em i samting bilong lotuim Bikpela. Yumi i mas mekim olsem bikos yumi i laikim tru God. Tasol sapos ol lain long graun i lukim dispela gutpela pasin na apim yumi, em i olsem samting bilong graun, bilong apim nem bilong man - i no samting bilong God i ken lukim. Em bai tok, “Yu yet yu mekim dispela gutpela pasin bikos yu i gat laik sapos ol lain i apim nem bilong yu, a? Orait, ol i mekim olsem na em i olsem gutpela pe bilong yu nau.”
Tasol, taim yumi i givim sampela samting na ol arapela i no inap lukim, yumi yet i no ken tingting moa long dispela samting yumi i givim. “Sapos yu helpim ol rabisman, orait han kais bilong yu i no ken save long samting han sut i mekim.”Dispela i min olsem yumi i no ken tingting moa long dispela samting yumi i givim. I min olsem, yumi no ken bihainim dispela pasin bilong givim sampela samting long ol arapela bilong kamap stretpela long ai bilong God. Ol gutpela pasin bilong yumi i no inap baim salvesen bilong yumi. Nogat, em i samting bilong marimari.
Sampela taim yumi bai baim wanpela kakaruk, na yumi no tingting tumas long baim long 30 kina samting. Tasol sapos yumi i givim 30 kina long ofa long sios bilong helpim ol arapela, yumi bai ting olsem em i bikpela samting stret. Sapos yumi givim 30 kina long ofa long
sios, yumi bai pilim olsem yumi yet i mekim gutpela samting stret. Tasol yumi mas givim mani bilong yumi bikos yumi i laikim tru God, na yumi no ken tingting tumas long dispela samting.
God yet i kirapim dispela marimari bilong givim sampela samting long ol arapela, na em yet i pinis bilong dispela samting tu. Marimari bilong God i kam long yumi, na yumi i kamap olsem paip bilong wara long salim dispela marimari i go long ol arapela taim yumi i givim sampela samting long ol arapela, olsem mani o olsem pasin bilong helpim ol. Na i olsem dispela i go bek long God, olsem ofa i go long em. Taim yumi i givim ol samting long ol arapela long laikim tru, em i naispela samting stret.
Taim yumi givim mani long ol arapela, i no olsem yumi tromoi dispela mani nating. “Papa bilong yu...em bai i bekim pe long yu.” Olsem na yumi mas bihainim stretpela rot bilong givim ol samting long marimari. Nogut ol arapela i lukim yumi na yumi apim yumi yet long dispela rot. God i no inap bekim pe long yumi taim yumi i mekim olsem. Nogat. Olgeta samting yumi givim long ol arapela i mas i stap olsem ofa i go long God.
SAMPELA TINGTING
Taim yu givim mani o ol samting long narapela, yu save givim wantaim wanem kain bel na tingting?
Ritim: 1 Samuel 2:12-17
Hopni na Finias, dispela tupela pikinini man bilong Eli, i man nogut tru. Tupela i pris, tasol tupela i ting olsem, Bikpela i samting nating [Ol i no save tru long God], na tupela i mekim ol kain kain pasin nabaut. – 1 Samuel 2:12
Na man i laikim tru ol arapela, em i pikinini bilong God, na em i save tru long God. – 1 Jon 4:7
Dispela tupela pikinini man bilong Eli, i man nogut tru. Planti taim ol manmeri i tok olsem ol man i save mekim ol pasin nogut bikos papa bilong ol i no skulim ol gut. Em i tru, Eli i no skulim pikinini bilong em gut (1 Samuel 3:13), tasol dispela i no as tru bilong pasin nogut bilong tupela. Maski olsem Samuel i skulim ol pikinini man bilong em gut, ol i no wokabaut long rot bilong Bikpela tu (1 Samuel 8:3).
Dispela tupela pikinini man bilong Eli, ol i no save tru long God. Ol i ting olsem Bikpela i samting nating. Taim yumi no save tru long God, i olsem yumi ting olsem em i samting nating. Dispela tupela man i save stilim ol ofa long God na ol i mekim pasin nogut tru long haus bilong God – tupela i no save tru long Bikpela.
Dispela tupela man i bin kisim skul long Bikpela. Tupela i pikinini bilong wanpela hetpris! Sapos tupela i stap laip tude, i olsem ol i go long lotu olgeta Sande, na ol i go long Sande skul, na ol Baibel klas tu. Tasol, ol i no save tru long Bikpela.
Long dispela yumi luksave olsem yumi no inap skulim ol arapela long save tru long Bikpela, bikos dispela “save tru long Bikpela” em i samting long wan wan man na meri yet. Sapos yumi yet i no wanbel wantaim God, yumi i no inap save long em.
Yes, em i tru, long save long Bikpela yumi i mas save long Tok bilong em. Sapos yumi i no save long Tok bilong em, yumi i no inap save tru long em. Tasol em i tru tu, olsem yu inap save pinis long olgeta hap tok bilong Buk Baibel tasol yu yet yu no save tru long Bikpela.
“Na man i laikim tru ol arapela ....em i save tru long God.” Dispela i no min olsem olgeta man i mekim sampela pasin bilong laikim tru, em i save tru long God. Nogat. I min olsem laikim tru bilong God i save stap insait long ol Kristen, na ol bai i laikim tru ol arapela. Yumi save tru long God taim yumi kisim pinis laikim tru bilong em. Na taim yumi i kisim pinis laikim tru bilong em, bai yumi yet i laikim tru ol arapela.
Taim yumi i soim dispela kain laikim tru bilong ol Kristen long laip bilong yumi yet, orait yumi i save tru long God.
SAMPELA TINGTING
Ol arapela inap save tru olsem yu yet yu save tru long Bikpela?
Ritim: Matyu 5:43-48
Tasol mi tokim yupela olsem, yupela i mas laikim ol birua bilong yupela, na yupela i mas beten bai God i marimari long ol man i save mekim pasin nogut long yupela. Olsem bai yupela i stap pikinini bilong Papa bilong yupela em i stap long heven. – Matyu 5:44-45
Taim yumi i laikim tru ol arapela i soim olsem Krais i stap insait long yumi.
Tasol, dispela kain laikim tru Buk Baibel i tok olsem “em i save bihainim tru lo” (Rom 13:10) i wanpela narakain laikim tru, na ol pikinini bilong God i save bihainim dispela laikim tru.
Matyu 5:43-48 i skulim yumi long dispela kain laikim tru. Dispela kain laikim tru i save mekim wankain pasin long olgeta manmeri.
Yumi olgeta i save laikim mama bilong yumi, bikos em i mama bilong yumi. Na yumi i save laikim ol pren bilong yumi bikos ol i pren bilong yumi. Ol dispela laikim tru i kam long God, bikos God em i as bilong ol gutpela pasin. Tasol ol Kristen, na ol lain i no Kristen wankain, ol i save laikim tru ol pren bilong ol na mama bilong ol.
Laikim tru bilong ol Kristen, i narakain samting stret. Em i go insait long yumi na bihain em i go long ol arapela tu. Em i go long ol arapela, maski ol i husat, bikos yumi i stap Kristen. Yumi i no laikim tru ol arapela bikos ol i naispela manmeri, ol i gat namba, ol i gat planti mani, o
ol i wantok bilong yumi. Nogat, yumi laikim ol tru bikos yumi yet i stap pikinini bilong Papa long heven. Olsem na yumi ken laikim tru ol birua bilong yumi tu.
God em i bihainim dispela kain pasin bilong laikim tru. I gat planti lain long dispela graun i wok long bagarapim em tru. Tasol God i no mekim ol i paia long tude. Nogat, em i givim kaikai long ol, na em i larim san bilong em i lait long ol. Em i no mekim olsem bikos ol dispela manmeri i gutpela. Nogat, em i mekim olsem bikos em yet i gutpela.
Taim yumi i stap pikinini bilong dispela Papa, orait laikim tru bilong em bai kam insait long yumi na go aut long ol arapela lain. Dispela graun i no inap kamapim dispela kain laikim tru. Nogat, dispela kain laikim tru i kam long heven tasol. Taim olgeta manmeri i lukim ol Kristen, ol i lukim liklik hap piksa long namba bilong dispela Papa bilong laikim tru i stap long heven.
Em i naispela samting stret long kisim marimari bilong God. Tasol em i naispela samting moa yet bilong kamap olsem paip bilong wara long salim dispela marimari i go aut long ol arapela. Em i tingting bilong God: marimari bilong em i mas go aut, na olgeta lain i mas lukim laikim tru bilong em.
SAMPELA TINGTING
Em i hat tru long laikim tru sampela manmeri i stap klostu long yu, o nogat? Askim God long helpim laikim tru bilong em i kam long yu na i go aut long ol arapela.
Ritim: Galesia 2:15-21
Mi hangamap pinis long diwai kros wantaim Krais na mi dai wantaim em na mi kisim nu- pela laip. Tasol dispela laip em i no laip bilong mi yet. Nogat. Krais em i stap laip insait long mi. – Galesia 2:19,20
I tru olsem Krais i kisim bek planti lain long sios bilong yu, tasol tu, yu mas tingting long dispela: salvesen em i samting bilong yu yet tu.
Yumi no inap kisim salvesen taim yumi i gat sampela liklik save long sin na marimari tasol. Yumi yet i mas klia gut long sin na salvesen bilong yumi yet. Yumi mas klia long sin bilong yumi yet na yumi mas save long salvesen bilong yumi yet.
Planti taim Pol i save tok long yumi na mipela taim em i toktok long salvesen. Tasol long dispela teks em i tok long mi na mi yet.
“Mi dai wantaim em,” Pol i tok. Pol em i stori long diwai kros bikos diwai kros em i rot bilong kisim salvesen. “Mi hangamap pinis long diwai kros wantaim Krais.” Long diwai kros olpela pawa i bruk pinis, na Pol i kamap fri long lotuim God.
Em i nupela laip – “Mi kisim nupela laip... Krais em i stap laip insait long mi.” Dispela em i nupela laip taim yumi i kisim salvesen pinis. Krais i stap insait long yumi nau. Dispela i no min olsem yumi yet i go pinis. Nogat. I min olsem laip bilong yumi i senis, na yumi i stap aninit long God, na yumi i bihainim em nau. Krais i stap insait long Pol – “Mi bilip long PIkinini Bilong God em i bin laikim mi tru na em i lusim laip bilong em yet bilong helpim mi.”
Olgeta man na meri i klia long dispela laikim tru bilong Krais, ol bai i tok, “Em i laikim tru mi!” Em tru, em i laikim yu tu, tasol mi laik tok, “Em i laikim mi!” Em i lusim laip bilong em bilong helpim ol sinman; yes, long helpim planti tausen ol sinman, tasol mi yet mi laik tok, “Em i lusim laip bilong em yet bilong helpim mi!”
Krais i bosim laip bilong mi. Em i bosim bel bilong mi. Taim man i laik helpim yu taim yu no save long rot bilong kamap long wanpela ples, em bai stiaim yu na soim rot long yu, tasol bihain em bai lusim yu bilong yu i ken bihainim dispela rot em i soim pinis long yu. Tasol em i no wankain long pasin bilong Krais. Em i kisim bek yumi, na em i mekim yumi i kamap nupela. Em i no lusim yumi. Nogat, em i stap insait long yumi, olsem yumi i ken i go long salim dispela marimari i go long ol arapela. Marimari bilong God bai i go moa yet long yumi, long wanem, Krais i stap insait long yumi.
SAMPELA TINGTING
Tingting long dispela: Krais em i laikim yu, em i dai long yu, na em i stap insait long yu. Tok tenkyu long God!
Ritim: Luk 7:36-50
Tasol taim mi lukim ol i no bihainim stret tok tru bilong gutnius... – Galesia 2:14
Tok tru bilong Buk Baibel i tok olsem, yumi olgeta i stap lain bilong mekim sin, na yumi i nidim Krais i kam bilong kisim bek yumi long marimari bilong em. Sapos nogat, yumi bai lus. Taim yumi tingting o yumi toktok olsem yumi i winim ol arapela, i min olsem yumi no klia long dispela tok tru long Buk Baibel.
Aposel Pita i sindaun na kaikai wantaim ol pren bilong em bilong Jerusalem. Ol i amamas long sindaun long tebol bilong ol yet na kaikaim kaikai bilong ol yet. Ol lain Juda i no save amamas tumas long sindaun na kaikai wantaim ol man bilong ol arapela lain. Na tu ol i no amamas tumas long kaikai ol kaikai bilong dispela ol arapela lain tu. Olsem na ol dispela lain Juda i sindaun wantaim ol lain bilong ol yet – ol i no laik mekim sampela samting bai i givim bel hevi long ol.
Tasol Pol i tok strong long Pita bikos em i mekim kranki pasin. Sapos yu bilipim dispela gutnius bilong marimari, yu no inap wok long kamap stretpela long ai bilong God long pasin bilong yu, long kaikai bilong yu, o long bihainim ol lo bilong Olpela Kontrak. Dispela gutnius i tok olsem olgeta lain manmeri i stap wankain long ai bilong God, olsem na yu no ken ting olsem yu winim ol arapela lain long ai bilong God.
Wantu dispela gutnius i putim ples klia olsem yumi olgeta i wankain; yumi olgeta i pulap long sin. Na salvesen i samting bilong marimari tasol. I no gat narapela rot.
Taim yumi stap wantaim ol arapela lain i bilip long God, yumi mas redi long kisim ol na wanbel wantaim ol, maski ol i no wankain olsem yumi long pasin na long tingting. Tasol sapos sampela man o meri i mekim pasin o tok i no wanbel long tok bilong God, long dispela taim yumi mas tokaut long dispela. Dispela ol samting i soim olsem yumi i klia olsem yumi i kisim salvesen long marimari tasol.
Yumi i no inap apim yumi yet. Pasin bilong apim yumi yet i lus pinis. Yumi olgeta i stap aninit long gutnius bilong marimari. Taim yu i wok long ting olsem sampela lain i winim narapela lain, yumi i no bihainim stret tok tru bilong gutnius.
SAMPELA TINGTING
Sampela taim yu save ting olsem wanpela lain i winim narapela lain insait long sios bilong yu yet, o nogat? Olsem wanem?
Ritim: Luk 7:36-50
Olsem na mi tokim yu, yumi lukim dispela meri i laikim mi tru na yumi save, God i lusim pinis ol planti sin bilong en. Tasol man i mekim liklik sin tasol na God i lusim sin bilong en, orait laik bilong en bai i liklik tasol. – Luk 7:47
Taim Jisas i kaikai long haus bilong Saimon, wanpela Farisi, wanpela meri bilong mekim ol kain kain pasin nogut i kam. Em i wokabaut long dispela tebol we ol i sindaun na kaikai, na em i go long Jisas. Na em i krai i stap, na wara bilong ai bilong en i kapsait long lek bilong Jisas. Na dispela meri i mekim drai long gras bilong het bilong em yet, na em i kisim botol ston em i holim, em i gat sanda, na em i welim lek bilong Jisas.
Saimon, em i no krai long Jisas. I gat tupela kain tingting long Jisas insait long dispela rum. Wanpela i krai long Jisas bikos em i amamas long em na tenkyu long em, tasol narapela i no tingting tumas long Jisas, em i no lotuim em. Long dispela graun yumi save lukim dispela tupela tingting i stap.
Jisas i givim wanpela tok piksa long skulim Saimon: “Tupela man i gat dinau long wanpela man. Wanpela i gat dinau long 100 kina, na narapela i gat dinau long 10 kina tasol. Tupela i no inap bekim dinau bilong tupela, olsem na dispela man i lusim dinau bilong tupela. Orait yu ting husat bilong tupela bai i laikim em moa?” Na Saimon em i klia olsem dispela man em i lusim bikpela dinau bilong en, em bai i laikim em moa. Na Jisas i tok, “Olsem na mi tokim yu, yumi lukim dispela meri i laikim mi tru na yumi save, God i lusim pinis ol planti sin bilong en. Tasol man i mekim liklik sin tasol na God i lusim sin bilong en, orait laik bilong en bai i liklik tasol.”
Yumi i mas klia. I no olsem Krais i lusim sin bilong em, bikos em i laikim em tru. Nogat. Dispela meri i laikim em tru bikos Krais i lusim sin bilong em. Krais i tokim dispela meri, “Mi lusim pinis ol sin bilong yu.” Em i no tok olsem, “Laikim tru bilong yu i kisim bek yu.” Nogat. Em i soim dispela bikpela laikim tru bilong Jisas bikos Krais i lusim sin bilong em pinis.
Sampela taim planti lain i no tingting tumas long Jisas, na ol i no tenkyu tru long em. Tasol, sapos yumi i klia olsem em i lusim planti sin tru bilong yumi, yumi bai redi long ofaim laip bilong yumi long em long tok tenkyu tru long em!
SAMPELA TINGTING
Yu save soim olsem yu yet yu laikim tru Jisas olsem wanem?
Ritim: Matyu 18:23-35
Mi bin sori long yu. Olsem na watpo yu no sori tu long wanwok bilong yu? – Matyu 18:33
Jisas em i givim yumi wanpela liklik stori long skulim yumi olsem: taim yumi i kisim marimari pinis, orait yumi i mas givim dispela marimari long ol arapela.
Wanpela man i kisim bikpela dinau stret. Tasol wanpela de king bilong em i tokim ol wokboi i kam stretim dinau wantaim em. Dispela man i gat dinau inap 10 milien kina. Na em i no inap bekim dispela dinau, olsem na em i brukim skru klostu long lek bilong king na askim em long sori long em. Na bikman bilong em i sori long en na i lusim dinau bilong en.
Na dispela man em i amamas tru, na em i go. Na taim em i go em i lukim wanpela wanwok bilong en, husat i gat dinau long em inap 10 kina tasol. Na em i holimpas dispela wanwok na tokim em long bekim olgeta dispela dinau em i kisim long em. Na taim em i no inap long bekim, orait em i putim em long kalabus inap em i bekim dinau.
Na bikman bilong em, em i belhat nogut tru: “Mi bin sori long yu. Olsem na watpo yu no sori tu long wanwok bilong yu?” Na em i putim em long han bilong ol man bilong givim pen long em, inap em i bekim olgeta dinau bilong en.
Sapos yumi i les long lusim rong bilong ol arapela, orait i olsem God i no lusim sin bilong yumi yet. “Harim. Sapos yupela i lusim rong bilong ol arapela manmeri, orait Papa bilong yupela long heven em bai i lusim rong bilong yupela tu. Tasol sapos yupela i no lusim rong bilong ol arapela manmeri, orait Papa bilong yupela em tu bai i no lusim ol rong bilong yupela” (Matyu 6:14-15).
Yumi i no inap kisim na holim marimari bilong God sapos yumi i les long givim long ol arapela. Laikim tru em i giaman samting olgeta sapos yumi i no lukim pasin bilong laikim tru long laip bilong yumi yet.
Dispela bikman i putim dispela man i les long lusim dinau bilong narapela long han bilong ol lain bilong givim pen long em, na Jisas i tok olsem God bai i mekim wankain pasin long yumi sapos yumi i no lusim tru olgeta rong ol brata i mekim long yumi. Em i strongpela tok tru. Tasol yumi no ken lus tingting olsem Jisas i mekim ol dispela tok long ol lain i les long lusim rong bilong ol arapela tasol.
Tok bilong Krais i no ken pretim ol lain i stap aninit long marimari bilong Papa bilong ol. Em i lusim sin bilong yumi. Yumi i no gat asua nau, yumi i no gat dinau tu, na yumi i stap fri long dai.
SAMPELA TINGTING
I gat sampela taim long laip bilong yu we yu i bin lusim rong bilong wanpela brata bilong yu?
Ritim: Galesia 5:1-6
Sapos man i stap long Krais Jisas, orait pasin bilong katim skin em i samting nating, na pasin bilong man i no katim skin, em tu i samting nating. Tasol pasin bilong man i bilip na dispela i kirapim em long laikim tru ol arapela, dispela em i samting tru. – Galesia 5:6
Ol lain bilong Galesia i toktok planti, na ol i no wanbel, long dispela askim: “Mipela i mas mekim wanem long putim ples klia olsem mipela i stap lain tru tru bilong God?”
Sampela lain i ting olsem sapos wanpela man i laik stap wanpela bilong lain bilong God, orait em i mas bihainim ol lo bilong Moses yet na em i mas bihainim pasin bilong katim skin.
Long tude tu, i gat sampela lain i save wari long dispela askim bilong ol lain Galesia tu. Tru, i no gat planti manmeri i tok olsem ol trupela Kristen i mas bihainim olgeta lo bilong Moses. Tasol planti ol bai tok olsem ol trupela Kristen i mas bihainim ol “lo” na toktok bilong ol profet, lida na ol tisa bilong tude.
Yumi i mas lukaut, nogut yumi o pikinini bilong yumi i paul na bihainim ol narapela tok antap long tok bilong God long Buk Baibel. Planti ol lida na tisa bilong tude i wok long bungim ol tok antap long tok bilong God. Olsem na yumi i mas klia gut na tokaut klia long as bilong ol Tok bilong Buk Baibel, na trupela mining long tok bilong God tu. Taim yumi i stap long Krais Jisas, pasin bilong katim skin em i samting nating, na pasin bilong man i no katim skin, em tu i samting nating. Trupela bilip i save kirapim man long laikim tru ol arapela, dispela em i samting tru tasol.
Yumi olgeta i gat sampela tingting na tok bilong ol tumbuna yumi i save bihainim. Na ol lain bilong tude i wok long kamapim sampela nupela pasin long yumi i baihainim. Tasol yumi i mas tingim olsem i gat wanpela samting tasol em i bikpela samting, na em i tru: em i bilip long Krais Jisas, na dispela i kirapim yumi long bihainim pasin bilong laikim tru.
Bilip em i olsem fanol, na yumi i kisim marimari bilong God long Krais long dispela fanol. Bilip em i olsem han bilong yumi i op na bel bilong yumi i daun na i redi. Taim yumi i kisim marimari pinis, em i save ran i go insait long yumi na yumi i bihainim ol pasin bilong laikim tru. Na long laikim tru, bai yumi i bihainim laik na tingting bilong God. Bilip i olsem fanol, na laikim tru em i wanem samting yumi i kisim na bihain yumi i givim long ol arapela.
Olsem na yumi i mas mekim wanem long putim ples klia olsem yumi i stap lain tru tru bilong God? Yumi i mas bilip long marimari bilong God na bihainim pasin bilong Spirit bilong God, long laikim tru ol arapela!
SAMPELA TINGTING
Beten long God i ken helpim yu long bilip long em na bihainim ol pasin bilong laikim tru.
Ritim: Efesus 2:4-10
Long Krais Jisas God i mekim yumi i kamap ol nupela manmeri, bilong yumi ken wokabaut long rot bilong gutpela pasin bipo yet God i redim pinis bilong yumi ken wokabaut long en. – Efesus 2:10
Namba wan plen bilong God i no bilong kisim bek yumi long dai na hel. Nogat. God i givim Jisas long yumi bikos em i gat laik sapos yumi i kisim nupela laip na kamap nupela na mekim ol gutpela pasin.
Taim wanpela man o meri laik wokim nupela gaden, em i no klinim na redim gaden bilong rausim gras nogut tasol. Nogat, em i mekim olsem bikos em i laik planim ol nupela na naispela kaikai.
Olsem na, taim yumi stori long marimari bilong God bilong kisim bek yumi, yumi no ken stori long wok bilong God long rausim ol pen na hevi tasol. Nogat, yumi i mas stori long ol nupela samting i kam pinis tu. God i no kisim bek yumi long paia tasol. Nogat, em i laik senisim yumi olsem yumi ken i stap olsem piksa bilong Krais.
Yumi mas klia olsem God i kisim bek yumi, tasol yumi i mas klia tu olsem wanem God i kisim bek yumi na bilong wanem em i kisim bek yumi.
Laikim tru bilong God i rausim olgeta pipia nating i stap nabaut. Dispela i kamap long Golgota. Tasol yumi i lukim pawa bilong marimari bilong God taim em i wokim nupela samting long Krais. Taim Krais i kirap bek long matmat, em i kirapim olgeta nupela na gutpela samting.
Marimari i kisim bek ol man nogut, na senisim ol i kamap nupela manmeri i save mekim ol gutpela pasin. Na dispela em i plen bilong God long marimari bilong em yet. Em i hatwok tru long rausim ol gras nogut long gaden, tasol em i mekim olsem bikos em i gat laik long ol gutpela kaikai i mas kamap.
“Long Krais Jisas, God i mekim yumi i kamap ol nupela manmeri, bilong yumi ken wokabaut long rot bilong gutpela pasin bipo yet God i redim pinis bilong yumi ken wokabaut long en.” God em i wokman, na em i wokim yumi! Na taim em i tingting long wokim yumi, em i klia gut tru bilong wanem em i wokim yumi na mekim yumi i kamap ol nupela manmeri. Em i mekim olsem bilong yumi i ken wokabaut long rot bilong gutpela pasin!
SAMPELA TINGTING
God i wok long senisim yu i kamap nupela? God i save helpim yu i wok long bihainim ol gutpela pasin, nau?
Ritim: Efesus 2:1-7
Yes, long marimari bilong God tasol em i kisim bek yupela. – Efesus 2:5
Yumi i mas klia olsem God i kisim bek yumi, na tu yumi mas klia em i kisim bek yumi olsem wanem.
Taim wanpela i askim yumi, “God i kisim bek yu olsem wanem?” nogut yumi tok, “Mi bungim dispela man o meri na em i skulim mi long tok bilong God,” o, “Mi harim dispela naispela autim tok na mi tanim bel.”Na em i orait long tingim ol dispela gutpela samting i bin kamap long laip bilong yumi, tasol yumi mas klia tru olsem wanem God i kisim bek yumi.
Taim wanpela i askim yumi, “God i kisim bek yu olsem wanem?” mobeta yumi olgeta i tok, “Long marimari tasol.” Em i bikpela bekim na nambawan bekim stret. Em i gutpela long tokaut long dispela long ol autim tok, long ol buk na long ol singsing.
“Long marimari” i min olsem yumi no kisim bek yumi yet. Nogat. God yet i kisim bek yumi long Jisas Krais. Mi yet mi bin dai wantaim Krais, na mi kirap bek tu wantaim em. Em i hau God i kisim bek mi, em i hau God i kisim bek yu. Sapos nogat, orait em i no kisim bek yu.
“Marimari” em i laikim tru bilong God i kam nating long yumi. I no olsem yumi yet i mekim ol gutpela samting, olsem na God i tingting long kisim bek yumi. Nogat tru. Yumi no gat wanpela gutpela samting long givim God bilong em i ken tingting long kisim bek yumi. Pe bilong olgeta sin bilong yumi em i dai tasol.
“Long marimari” i min olsem God i kisim bek yumi nating – yumi no inap baim dispela salvesen. Em i fri! Rot bilong God bilong kisim bek yumi i narakain olgeta, na em i daunim ol lain i tingting long mekim wok long kisim bek ol yet. Long marimari tasol God i kisim bek yumi, long bilip long Krais – sapos nogat, yumi i lus pinis.
Taim yumi i stori long marimari bilong God, olgeta taim yumi save toktok long wok bilong Jisas. Bilong wanem? Bikos laikim tru bilong God i kamap ples klia long wok bilong Jisas Krais bilong kisim bek yumi.
Yumi kisim salvesen pinis bikos Krais i kisim ples bilong yumi long dai na long taim em i kirap bek long matmat. Marimari i rausim sin bilong yumi long Gut Fraide, na marimari bilong God i mekim yumi i stap laip wantaim Krais long taim Krais i kirap long Sande.
SAMPELA TINGTING
Dispela tok, “long marimari God i kisim bek yumi,” i gat wanem mining long laip bilong yu yet?
Ritim: 1 Korin 15:20-28
Long dispela taim bai olgeta samting i pinis. Na bai Krais i pinisim olgeta gavman na olgeta strongpela spirit na olgeta samting i gat strong, na bai em i putim kingdom long han bilong God Papa. Long wanem, Krais i mas i stap king i go inap em i daunim olgeta birua bilong en. – 1 Korin 15:24-25
Long dispela mun yumi i bin ritim na tingting gut long wok bilong Jisas long heven. Tude yumi bai stori liklik long wok bilong Jisas long heven, olsem em i wok long kamap long pinis bilong em. Taim dispela taim i kam pinis, em i olsem wok bilong Jisas em bai i pinis tu.
Wok bilong Krais i wok long kisim kingdom bilong God i kam. Long dispela as em i kam long graun, na long dispela as em i wok yet long heven tu. Taim kingdom bilong God i sanap pinis, God Papa bai kisim olgeta glori na ona. Em bai i stap het tru bilong olgeta samting. Na long dispela taim Krais bai pinisim wok bilong em, olsem wanpela het bilong ami i pinisim wok bilong em taim pait i pinis.
Taim Jisas i givim kingdom long Papa bilong em, em i min olsem em bai i bagarapim pinis olgeta arapela kingdom, na olgeta pawa i no bihainim laik na tingting bilong God. Lain 26 i stori long wanpela birua Krais bai i pinisim, em i Dai. Krais bai pinisim pinis dispela las birua bilong em.
Yumi no klia tumas olsem wanem ol dispela pawa long dispela graun i kamap long ol han nogut. Tasol yumi i save olsem olgeta samting nogut bai i go pinis. Jisas i wok long rausim ol samting nogut long taim em i mekim wok long graun, na em i mekim olsem yet long taim em i mekim wok long heven. Krais i wok long sanapim pawa bilong God gen long dispela graun na heven. Na pinis bilong dispela bai i kamap, na Krais bai i tokim Papa bilong em olsem, “Olgeta samting i bilong yu nau. Olgeta samting i stap aninit long yu.”
Na long dispela taim bel isi na malolo bai i stap tasol, na em bai i no gat pinis bilong em. Yumi bai amamas long gutpela pasin bilong God na bai yumi i no inap lukim sin, pen na pait moa. Long dispela taim yumi bai i stap fri olgeta, na yumi bai i gat bel isi na malolo.
Krais i bosim ami inap long taim dispela pait bai i pinis. Olsem na yumi mas i wok long bihainim em na mekim wok bilong em tasol. I no long taim na dispela pait bai i pinis.
SAMPELA TINGTING
Givim pres long God bikos yu wetim dispela taim bai yu i stap fri olgeta, na yu bai bel isi tru.
Ritim: Kamapim Tok Hait 1:9-18
Mi lukim em na mi pundaun klostu long lek bilong en, na mi stap olsem man i dai pinis. Tasol em i putim han sut bilong en long mi, na em i tok olsem, “Yu no ken pret. Mi man i stap nam- ba wan tru na i stap bihain tru. Na mi man bilong i stap laip. Bipo mi dai pinis, tasol lukim, nau mi stap laip oltaim oltaim. Na mi holim ol ki bilong Dai na bilong Ples bilong ol man i dai pinis. – Kamapim Tok Hait 1:17-18
Yumi olgeta bai i dai, sapos Krais i no kam bek pastaim. Maski yumi i les long harim dispela, em i tru.
Dai i save stap wantaim yumi, tasol yumi i save les long em. Dai em i olsem birua bilong yumi (1 Korin 15:26). Tasol yumi i ken stori moa long dai.
Dai em i olsem wanpela blakpela laplap i hangamap namel long wanpela rum, no i no gat man inap long lukluk long narapela hap bilong rum, long wanem blakpela laplap i pasim ai bilong em. Taim yumi kamap lapun, orait yumi i gat planti lain i hait i stap long hapsait bilong dispela laplap, na yumi i no inap lukim ol, na ol i no inap kam bek long yumi.
I gat wanpela man i bin i go hapsait long dispela laplap, na em i kam bek. Em i Jisas. Na em i save kam bungim yumi long laip bilong yumi taim yumi i stap long dispela laip. Na em i bin putim han bilong em long het bilong Jon na tokim em, “Yu no ken pret. Mi man i stap namba wan tru na i stap bihain tru. Na mi man bilong i stap laip. Bipo mi dai pinis, tasol lukim, nau mi stap laip oltaim oltaim. Na mi holim ol ki bilong Dai na bilong Ples bilong ol man i dai pinis.”
Jisas inap tok olsem bikos em yet i winim dai. Dai i no inap kisim em gen, tasol em yet i bosim dai. Dispela em i as bilong dispela tok, “Na mi holim ol ki bilong Dai.” Em i bosim ol samting long hapsait bilong dispela blakpela laplap, long hap bilong dai tu.
Olgeta man nogut, na ol lain bilong God wankain, i go hapsait long blakpela laplap taim ol i dai. Tasol ol lain i bin harim tok bilong God na i kisim pinis Spirit bilong Jisas Krais, ol i no ken pret long taim ol bai i go. Taim ol i dai, ol bai harim nek bilong Jisas i tok, “No ken pret. Mi yet i holim ol ki bilong Dai.”
SAMPELA TINGTING
Yu yet i gat wanem tingting long dai? Yu save pret long dai, o nogat? Wanem samting i save givim bel isi long yu?
Ritim: 2 Korin 10:1-6
Olgeta samting bilong pait mipela i holim, ol i no samting bilong dispela graun. Nogat. Ol
i gat strong bilong God, na ol inap brukim ol strongpela banis bilong ol birua. Mipela i save daunim olgeta kain tingting na giaman tok i save pasim rot bilong ol man i laik kisim save long God. Na mipela i save kalabusim olgeta tingting bilong ol man, bilong mekim tingting bilong ol i bihainim laik bilong Krais. – 2 Korin 10:4-5
Dispela teks i tokaut long pawa bilong pasin bilong autim tok bilong God. Namba wan samting bilong Gutnius i long tokim olgeta lain long tanim bel, na long tokaut long salvesen long Krais. Dispela tok i gat pawa bilong bringim salvesen i kam bikos em i Tok bilong God.
Tasol gutnius i samting moa. Em i gat pawa long bagarapim save bilong man na bilong daunim ol man i wok long apim ol yet. Tok bilong God bai soim klia ol longlong tingting bilong man, na kalabusim olgeta dispela tingting na kisim ol dispela tingting i kam bihainim laik bilong Krais.
Planti taim ol Kristen i no tingting tumas long pawa bilong Gutnius. Ol i ting olsem Gutnius
i samting bilong mekim man na God i wanbel gen tasol, na long givim bel isi long man. Na dispela em i tru – Gutnius bilong God i save mekim olsem. Tasol i no samting bilong dispela tasol. Olgeta tingting na save bilong yumi i mas aninit long dispela Gutnius. Tok bilong God i gat wok long skulim ol saveman na ol yunivesiti tu. Em bai bosim tingting bilong yumi long ol samting bilong mani tu. Olgeta samting, olgeta tingting bilong yumi na olgeta lain long dispela graun, i mas stap aninit long Gutnius bilong God. Bilip bilong yumi long Jisas Krais bai senisim tingting bilong yumi, em bai senisim wok bilong yumi olsem papa o mama, na wok mani bilong yumi.
Planti taim, taim yumi tingting long olgeta samting long dispela graun yumi i save tingting long save bilong man tasol, na yumi i lus tingting long pawa bilong Gutnius. Tasol God yet i wok long mekim olgeta samting i kamap nupela, long olgeta samting long dispela graun.
God i kamapim dispela graun long Tok bilong em yet, na Tok bilong em yet i wok long mekim olgeta samting i kamap nupela. Olsem na yumi, lain bilong God, i mas wok long autim dispela Gutnius long olgeta hap long dispela graun, na long olgeta liklik hap long laip bilong yumi tu.
SAMPELA TINGTING
Dispela pawa bilong Gutnius i save mekim wanem long laip bilong yu?
Ritim: Kolosi 1:15-20
Taim olgeta dispela samting i no kamap yet, em i stap. Na em i save mekim olgeta samting i stap gut na i wok gut wantaim. Em i het bilong sios, na sios em i bodi bilong em. Em yet i as bilong laip bilong sios. Em i namba wan man i bin kirap bek long matmat, olsem na em yet i ken i stap het bilong olgeta samting. – Kolosi 1:17-18
Jisas bilong Nazaret em i gat bikpela namba tru. Na taim yumi wok long kisim save long em, yumi save lukluk pastaim long wok bilong em long dispela graun. Na bihain bai yumi klia long wok bilong em long graun na wok bilong em long heven. Dispela Jisas, ol i rausim klos bilong em na nilim em long long diwai kros, em yet i dispela man i brukim pawa bilong olgeta king bilong dispela graun. Yumi mas lainim pasin bilong save long em olsem man i bosim na stap het bilong ami bilong God. Yumi i mas bilip na klia gut olsem em inap givim yumi olgeta samting yumi nidim, na dispela bai winim olgeta samting yumi i laikim na prea long kisim.
Tasol moa yet, yumi mas klia gut tu olsem Jisas i stap bipo long taim em i kam long dispela graun olsem wanpela bebi. “Taim olgeta dispela samting i no kamap yet, em i stap.” Em i stap wantaim God, taim em i no kam long dispela graun yet. Taim Tok bilong God i kamapim dispela graun, Krais i stap na mekim wok. Sapos Krais i no stap, orait olgeta samting long dispela graun bai i bagarap na i no gat mining tu – “Na em i mekim olgeta samting i stap gut na i wok gut wantaim.” Jisas i olsem bel bilong dispela graun, tasol em i het bilong sios wantaim.
Krais, em i God yet, na em i kam long dispela graun taim graun i bagarap. Long wok bilong em long dispela graun, Krais i tok orait long olgeta hevi bilong sin na dai i kalap long em. Long dai bilong em, bikpela senis i kamap, na em i olsem stat bilong olgeta nupela samting. Krais i stiaim dispela graun i go long nupela rot. Taim em i lusim matmat na i go antap
long heven, em i olsem tok piksa long dispela nupela laip we Krais i stap het bilong olgeta samting.
Em i no isi long save gut long ol dispela wok bilong Krais, tasol em i bikpela samting stret, na yumi i mas wok long tingting long dispela na presim dispela wok bilong em olgeta taim.
SAMPELA TINGTING
Tingting gut long ol dispela wok bilong Jisas, na presim God!
Ritim: 1 Korin 13
Pasin bilong bilip, na pasin bilong wetim God i mekim gut long yumi, na pasin bilong givim bel bilong yumi long ol arapela, dispela tripela pasin bai i stap oltaim. Tasol namba wan pasin tru, em pasin bilong givim bel bilong yumi long ol arapela. – 1 Korin 13:13
Bikpela Jisas i givim planti ol presen long lain bilong em. Ol dispela presen i no wankain, na God i givim ol long yumi. Asde yumi bin stori long ol dispela presen.
Tasol, Holi Spirit i no givim dispela ol kain kain presen long ol lain bilong em nau tasol. I gat sampela presen, ol bai i stap oltaim, na olgeta wan wan Kristen i kisim ol dispela presen. Dispela ol presen i olsem pasin bilong bilip, pasin bilong wetim God i mekim gut long yumi (olsem hop), na pasin bilong givim bel bilong yumi long ol arapela. Ol dispela presen bai i stap oltaim.
Sapos yumi i no gat ol dispela presen, i min olsem yumi i no stap wanpela Kristen. Olgeta Kristen i gat dispela tripela pasin.
Bilip em i rot bilong yumi long kisim Krais na olgeta gutpela samting bilong em tu. Bilip em i wanpela presen i kam long Holi Spirit. Olsem na yumi i mas tenkyu tru na daunim yumi yet long kisim dispela bilip long Krais.
Pasin bilong wetim God i mekim gut long yumi (hop) i min olsem yumi i wetim ol dispela samting bai i kam. Yumi i wetim kingdom bilong God, pinis bilong wok bilong em, bikpela senis, na kam bek bilong Krais yet. Sapos wanpela sios i no gat dispela hop, em i no trupela sios.
“Tasol namba wan pasin tru, em pasin bilong givim bel bilong yumi long ol arapela.” Long bilip yumi i kisim Krais, long hop yumi i wetim Krais i kam, tasol long laikim tru Krais yet i stap wantaim yumi. Taim yumi i givim bel bilong yumi long ol arapela, God yet i stap wantaim yumi na yumi lukim em i stap.
Ol dispela presen i bikpela samting bilong strongim sios bilong God. Laikim tru, pasin bilong givim bel bilong yumi long ol arapela, em i namba wan pasin bikos em i mekim ol memba i kamap wanbel. Long laikim tru, dispela Spirit bilong Krais i save skulim yumi long stap olsem wokboi bilong em bilong givim glori long God na long helpim ol arapela lain long sios.
Na em i tru, i gat sampela arapela presen tu, tasol pasin bilong bilip, na pasin bilong wetim God i mekim gut long yumi, na pasin bilong givim bel bilong yumi long ol arapela, dispela tripela pasin bai i stap oltaim. Na nambawan pasin tru, em i pasin bilong givim bel bilong yumi long ol arapela.
SAMPELA TINGTING
Tingting long wanpela bilong ol dispela tripela presen, na tingting long mining bilong dispela presen long laip bilong yu olsem wanpela Kristen.
Ritim: Rom 12:3-8
Yumi save, wanpela bodi i gat planti hap bilong en, na olgeta hap i no mekim wankain wok tasol. Olsem tasol yumi tu yumi planti manmeri, tasol long Krais yumi stap olsem wanpela bodi tasol... – Rom 12:4-5
Bikpela Jisas, em i stap antap long heven pinis, em i givim kain kain presen long sios bilong em. Long sampela hap long Buk Baibel yumi i ritim sampela lista long ol dispela presen: tok profet, mekim tok long kain kain tok ples, strong bilong oraitim ol sikman, bilong stap olsem tisa, i go i go. I no olsem ol dispela lista i autim olgeta presen God yet i givim ol nupela Kristen long Nupela Kontrak.
Ol presen bilong Holi Spirit i no wankain. Taim yumi tingim dispela presen bilong mekim ol man i toktok long kain kain tok ples, yu klia olsem em i wok bilong Spirit. Tasol taim yumi tingting long wok bilong pasto o aposel long Efesus 4, yu ting olsem em i strong bilong man. Tasol, yumi mas klia olsem olgeta ol dispela presen in kam long Krais. Ol i kam long heven bikos ol i kam long Bikpela. Em i ol presen long heven na Spirit bilong Bikpela i givim yumi nating, long marimari bilong em.
Olgeta dispela presen i no wankain, tasol ol i gat wankain laik – bilong helpim bodi (sios) bilong Krais. Ol i olsem samting nating sapos ol i no wok long helpim bodi bilong Krais. Yumi i mas yusim ol presen God i givim yumi. Nogut ol i stap nating.
Yumi i no ken apim yumi yet long ol presen yumi i kisim, na tu yumi no ken mangalim ol presen bilong ol arapela. Na yumi no ken apim ol presen yumi i kisim na tok olsem, “Mi yet mi wanpela tisa, tasol yu nogat. Olsem na yu no wanpela trupela Kristen, na yu no stap hap bilong bodi bilong Krais.” God i givim ol dispela presen bilong Holi Spirit long yumi long laik bilong em yet bilong helpim yumi. Yumi no ken stori planti tumas long ol dispela presen bilong Krais. Nogat, yumi mas yusim ol dispela presen long apim nem bilong God na helpim sios bilong em.
SAMPELA TINGTING
Krais i givim yu yet wanem ol presen? Na yu save yusim ol dispela presen bilong helpim bodi bilong Krais olsem wanem?
Ritim: Rom 8:9-11
Tasol yupela i no wokabaut moa long pasin bilong olpela bel. Nogat. Sapos i tru Spirit bilong God i stap long yupela, orait nau yupela i save wokabaut long pasin bilong Holi Spirit. Na man i no gat Spirit bilong Krais, em i no man bilong Krais. Sin i kilim bodi bilong yupela i dai pinis. Tasol sapos Krais i stap insait long yupela, orait yupela i kamap stretpela man pinis, na spirit bilong yupela i stap laip. – Rom 8:9-10
Nupela Kontrak i skulim yumi olsem sapos yumi i bilong Krais, orait Spirit bilong God i stap long yumi. Ol Kristen i ting olsem ol i mas bilip pastaim na bihain ol bai i kisim Holi Spirit, ol i paul olgeta.
I tru olsem sampela Kristen i stap klostu moa long Krais olsem ol arapela manmeri, na sampela lain i aninit moa long Spirit bilong God olsem ol arapela lain. Tasol, sapos Spirit i givim laip long yumi pinis, i no min olsem yumi i klia gut long pasin bilong wokabaut long Spirit pinis.
Tasol yumi i no inap stap lain bilong Krais sapos yumi i no gat Spirit bilong God. Man i no gat Holi Spirit, em i no inap tok, “Jisas em i Bikpela” (1 Korin 12:3).
Sampela taim Buk Baibel i tok olsem “Spirit bilong God i stap insait long yupela,” na narapela taim i tok olsem“Krais i stap insait long yupela.”Tupela tok i wankain tasol. I min olsem yumi no stap long ples bilong dai. Nogat, yumi i stap laip. Em tru, bodi bilong yumi bai i dai yet, na yumi save mekim sin na yumi save bungim kain kain hevi. Tasol yumi i stap laip. Na dispela nupela laip i kam long yumi long Krais bikos em i dai na em i kirap bek. Yumi i kisim dispela nupela laip long Holi Spirit bikos em i stap insait long yumi.
Olgeta de, olpela bel bilong yumi i mas dai na nupela bel i mas kirap na stap laip, na dispela i min olsem em i hat wok tru bilong stap olsem wanpela Kristen. Tasol yumi wetim ol nupela samting bai i kamap bihain, na dispela bai i winim tru olgeta samting yumi i kisim pinis long Spirit bilong God taim yumi stap long dispela graun. I gat planti ol samting long lainim long dispela graun na yumi mas wok long lusim ol pasin nogut. Yumi mas wok long lusim olpela bel, olsem yumi i ken kisim planti moa samting long God bihain.
Yumi no ken wok long brukim (seperetim) wok bilong Krais long wok bilong Spirit. Pasin bilong stap laip wantaim Krais na pasin bilong wokabaut long Spirit i wankain samting tasol. Na em i bikpela samting tru na em i dia tumas.
SAMPELA TINGTING
“Yumi i wetim ol nupela samting bai i kamap bihain, na dispela bai i winim tru olgeta samting yumi i kisim pinis long Spirit bilong God taim yumi i stap long dispela graun,” i gat wanem mining long laip bilong yu yet?
Ritim: Taitus 2
Yumi save, marimari bilong God em i kamap ples klia pinis...Dispela marimari bilong God em i save skulim yumi long lusim pasin bilong givim baksait long God na long lusim olgeta laik nogut bilong dispela graun, na em i skulim yumi long tingting gut na wokabaut stret. ... na bilip strong na wetim dispela gutpela samting yumi bai amamas tru long lukim. – Taitus 2:11-13
Yumi i stap namel long taim Krais i kam pinis long marimari, na long taim em bai i kam bek long glori. Dispela tupela bikpela samting bai afektim wokabaut na pasin bilong yumi long dispela graun, long dispela namel taim.
Marimari bilong God long Krais i kamap pinis. Na taim Krais i go antap long heven, i no olsem dispela marimari i go pinis gen. Nogat, marimari i stap yet bilong skulim yumi long stap stretpela long dispela graun. Na glori bilong Krais, dispela glori em bai i kam yet, em i olsem dispela samting yumi i wetim, dispela gutpela samting yumi bai amamas tru long lukim.
Marimari bilong God i skulim yumi long stap long dispela taim long dispela graun. Em i skulim yumi long lusim pasin bilong givim baksait long God, na long lusim olgeta laik nogut bilong dispela graun, na long tingting gut na wokabaut stret.
Lain 2 long Taitus 2 i tok olsem yumi i no ken spak. Yumi i mas tingting stret na bihainim ol gutpela tingting tasol. Yumi i mas tingting gut. Long dispela graun i isi long tingting bilong yumi i paul. I gat planti ol naispela samting long dispela graun i wok long grisim yumi na long paulim tingting bilong yumi. Pasin pamuk, laik bilong kisim namba, laik bilong kisim planti mani na kago, i go i go, ol dispela samting inap long paulim tingting bilong yumi.
Tasol, long marimari bilong God, yumi i mas bihainim ol gutpela tingting tasol. Yumi mas klia gut long dispela rot yumi mas bihainim long taim yumi i bungim ol samting i wok long grisim yumi long dispela graun na long taim yumi i bungim ol hevi tu. Spirit bilong Krais bai tingim yumi: yumi i stap namel long namba wan taim Krais i kam long dispela graun long marimari, na long taim em bai i kam bek long glori.
SAMPELA TINGTING
Yu yet i bihainim ol gutpela tingting long laip bilong yu olsem wanem?
Ritim: 2 Korin 5:1-5
God yet i bin redim yumi bilong kisim dispela laip, na em i bin givim Holi Spirit long yumi. Holi Spirit em i olsem namba wan hap bilong ol gutpela samting God i laik givim long yumi. Na yumi kisim Holi Spirit pinis, olsem na yumi ken save, tru tumas bai yumi kisim olgeta arapela samting tu. – 2 Korin 5:5
Spirit i olsem namba wan hap bilong ol gutpela samting God i laik givim long yumi. I olsem God i givim yumi wanpela hap samting bilong wanem samting em bai i givim yumi bihain. I kain olsem yumi i go baim skul fi. Sampela skul bai i larim yu i baim hap skul fi pastaim,
na bihain yu bai baim olgeta. Taim yu putim hap mani bilong yu, i olsem yu mekim promis olsem yu bai baim olgeta bihain.
Holi Spirit bilong God i olsem namba wan mak God i givim yumi olsem em bai inapim ol promis bilong em. God bai givim yumi nupela laip na nupela bodi long nupela graun, na ol dispela samting bai i winim olgeta samting yumi i gat long tude. Dispela em i promis bilong em, na em bai i kamap bihain. Tasol em i givim yumi namba wan hap pinis: em i Holi Spirit bilong em, olsem na yumi ken save, tru tumas bai yumi kisim olgeta arapela samting tu.
Holi Spirit i olsem wanpela bris namel long dispela laip na dispela laip bai i kam. Em i wanpela presen yumi kisim i kam long taim bihain. Olsem na Spirit bilong God i no stap isi long dispela graun, bikos em i kam long narapela graun. Dispela graun i no ples bilong em. Em i save birua wantaim ol samting bilong graun. Spirit em i wok strong long kisim olgeta tingting bilong yumi na tok bilong yumi na wanem ol samting yumi i mekim, na putim ol dispela samting aninit long Bikpela bilong ol bikpela, King bilong ol king, Jisas Krais.
Long wok bilong Spirit, yumi holim stat bilong wanem samting bai kamap bihain, na Spirit bilong God i redim yumi yet long taim bihain. Taim yumi kamap long nupela graun bilong God, em bai narakain samting olgeta. Tasol wanem samting yumi i kisim pinis long Spirit bilong God, em bai i kam wantaim yumi.
Long nau yumi i mas amamas long kisim Spirit long yumi long dispela graun. Sampela
taim yumi bai bel hevi, na yumi bai paul na tok, “Kingdom bilong God bai i kam, o nogat?” Sampela taim yumi no lukim wok bilong kingdom bilong God. Tasol yumi i no ken bel hevi. Spirit yet i stap olsem namba wan hap bilong ol gutpela samting God i laik givim long yumi, olsem na yumi ken save, tru tumas bai yumi kisim olgeta arapela samting tu!
SAMPELA TINGTING
Spirit bilong God i wok long redim yu long taim bihain, taim yu kamap long nupela graun bilong God, olsem wanem?
Ritim: 2 Korin 1:18-22
Em i bin putim mak bilong em yet long yumi, na em i givim Holi Spirit bilong i stap long bel bilong yumi. – 2 Korin 1:21-22
Yumi no ken givim bel hevi long Holi Spirit, long wanem “God i givim Holi Spirit long yumi olsem mak bilong yumi i stap ol manmeri bilong God” (Efesus 4:30). God em i putim mak long yumi taim em i givim Spirit bilong em long yumi (2 Korin 1:22). Yumi i kisim Holi Spirit olsem mak bilong God.
Dispela mak i min olsem yumi i bilong God. Yumi i ken ritim ol samting bilong dispela kain mak long Kamapim Tok Hait 7. God i putim mak bilong em long dispela 144,000 manmeri. I min olsem ol i lain bilong God nau. Em i olsem God i putim nem bilong em long ol lain bilong em, olsem na ol i no inap kisim pe bilong sin long las de.
Na tu, taim yumi i kisim baptais long nem bilong God Papa, Pikinini na Holi Spirit, i olsem yumi i kisim mak bilong God, na yumi i stap lain bilong em nau.
Taim God i kisim bek wanpela man, taim em i baim em, em i baim em long dai bilong pikinini bilong em. Em i no baim yumi long gol o long silva. Nogat, em i baim bek yumi long blut bilong Krais, dispela blut em i dia tumas (1 Pita 1:18-19). Bikos God em i baim yumi long blut tudia bilong Krais, em i no gat laik sapos yumi i lus gen. Olsem na em i givim mak bilong long Holi Spirit long yumi, olsem em i ken i stap wantaim yumi. Olsem tasol “God i givim Holi Spirit long yumi olsem mak bilong yumi i stap ol manmeri bilong God.”
Planti taim ol nupela Kristen i gat bikpela hangre long bihainim Krais. Tasol sampela taim bihain, ol i save pundaun long sin, na ol bai i pilim olsem em i hat tru long bihainim Krais. Olsem na, ol i nidim pawa bilong God Holi Spirit bilong stap strong. Holi Spirit i save kisim ol lain i go long Krais, tasol em i save strongim ol tu. Spirit bilong God bai i helpim yumi long stap aninit long Krais, Bikpela bilong yumi, na long stap wanbel wantaim Papa bilong yumi long heven. Holi Spirit i no inap givim baksait long yumi. Yumi kisim mak bilong em yet olsem yumi i bilong God, nau na long las de wankain!
SAMPELA TINGTING
Yu luksave long wok bilong Holi Spirit long laip bilong yu, long helpim yu i stap strong long bihainim Bikpela Jisas Krais?
Ritim: Aposel 2:37-42
Na ol i askim Pita wantaim ol arapela aposel olsem, ‘Ol brata, bai mipela i mekim wanem nau?’ Na Pita i tokim ol olsem, ‘Yupela olgeta wan wan i mas tanim bel na kisim baptais long nem bilong Jisas Krais, na God bai i lusim ol sin bilong yupela. Yupela i mekim olsem, na bai God i givim Holi Spirit long yupela.’ – Aposel 2:37-38
Taim ol manmeri i harim gutnius bilong Jisas Krais, planti ol i tok, “Bai mipela i mekim wanem nau?”Taim singaut bilong gutnius i go dip insait long bel bilong yumi, yumi bai askim,“Mi mas mekim wanem long Krais nau?” Sapos yumi i no gat dispela kain askim, i min olsem yumi i no harim Tok gut.
“Tanim bel!” Long tanim bel yumi mas sori long ol sin bilong yumi pastim. Long tanim bel tru tru, yumi i mas givim baksait long olgeta samting long bipo na long ol samting nogut, na tanim i go long God na Krais.
“Kisim baptais!” Kristen baptais em i soim olsem yumi i stap wantaim Krais nau. Yumi i no klia sapos pikinini bilong ol manmeri long dispela teks i kisim baptais tu bikos Buk Baibel i no tok olsem ol i kisim, tasol ating ol disaipel i no inap pasim ol. Wara bilong baptais i soim olsem Krais yet i lusim olgeta sin bilong ol manmeri i tanim bel na bilip long em. Em i mak bilong putim dispela samting ples klia.
Holi Spirit em i samting bilong olgeta Kristen. Em bai givim nupela laip long ol man bilong sin i tanim bel na i go long Krais. Taim yumi i kisim baptais bilong Krais, yumi i kisim baptais bilong Spirit tu, long wanem, long wanem hap Krais i stap, Holi Spirit i stap tu.
Ol dispela samting, bilong tanim bel na kisim baptais, i samting bilong kamap wanpela memba bilong Sios, na em i wankain long tude tu.
SAMPELA TINGTING
Tingting long ol dispela samting yumi ritim tude, na askim God long helpim yu i tanim bel na bilip long em.
Ritim: Aposel 2:25-36
Olsem na yupela olgeta lain Israel, yupela i mas save gut olsem, dispela Jisas yupela i nilim em long diwai kros, God i makim em i stap Bikpela, na man bilong kisim bek ol manmeri bilong en. – Aposel 2:36
Planti taim yumi i ting olsem Aposel 2, dispela sapta i stori long namba wan Pentikos, em bai skulim yumi long Holi Spirit tasol: em i husat, wok bilong em, na olsem wanem em i mekim wok bilong em tu. Tasol dispela namba wan autim tok long Pentikos, em i stori long Jisas em i husat. Dispela em i soim yumi namba wan wok bilong Spirit: long tokim yumi long Jisas em i husat. Sapos Spirit i no skulim yumi olsem, yumi i no inap save.
Dispela liklik las hap tok bilong autim tok bilong Pita, em i sutim stret bel bilong ol Israel. Pita i singautim “olgeta lain Israel” – ol pris, ol bikman na olgeta manmeri – long apim Jisas. Long wanem, Jisas em i Bikpela, dispela man husat bai i kisim glori bilong God. Na olgeta lain i bilip long em, em bai i kisim bek ol. Jisas em i Krais. Long Tok Hibru “Krais” em i “Mesaia.” Jisas, em i dispela man ol lain tumbuna bilong em i wetim. Tasol ol Israel i agensim Bikpela bilong ol, na ol i nilim Mesaia bilong ol long diwai kros. Olsem na Pita i sutim stret bel bilong ol taim em i tok, “Yupela i nilim em long diwai Kros.”
Taim Pita i autim dispela tok em i wok long bihainim dispela tok bilong Jisas: “Olsem
na yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit” (Matyu 28:19). Em i no pret long autim tok long namba bilong Jisas, na long sutim bel bilong ol lain Israel bikos ol i nilim Jisas long diwai kros. Sampela wik bipo long dispela, Pita yet i bin pret na em i givim baksait long Krais. Tasol nau em i no pret, bikos Spirit bilong God i strongim em, na em i lukim pinis Krais i kirap bek long matmat.
Yumi tu i mas bilipim dispela pawa na wok bilong Spirit. Yumi no ken amamas tumas na tingting tumas long pawa bilong save na pawa bilong mani na pawa bilong man. Nogat. Taim yumi i beten, God yet bai i bekim na givim yumi dispela pawa bilong Spirit! Na Spirit bai strongim bilip bilong yumi long Jisas – em wanpela tasol em i Bikpela. Na taim yumi i bilip olsem, bai yumi no inap pret, na yumi bai amamas long stap aninit long God bikos em bai i bel gut long yumi long Krais Jisas.
SAMPELA TINGTING
Beten long God long kisim pawa bilong Holi Spirit i kam strongim yu.
Ritim: Aposel 2:14-24
Klostu long las de bai mi kapsaitim Spirit bilong mi long olgeta manmeri. – Aposel 2:17
Yumi i stap klostu long las de. Buk Baibel i tok olsem long taim Krais i go antap long heven i go inap long taim em i kam bek gen, em i “ol las de.”
Na Buk Baibel i skulim yumi olsem i gat tupela samting i makim dispela taim: olgeta manmeri bilong God bai i kisim bikpela blesing stret, na dispela ol blesing bai i winim ol blesing bilong bipo taim, na ol manmeri bilong God bai i bungim hevi stret, na dispela ol hevi bai i winim ol hevi bilong bipo taim.
Holi Spirit bilong God i wanpela bikpela blesing stret. Taim God i salim Holi Spirit i kam daun long dispela graun, em inapim ol promis bilong Olpela Kontrak long “ol las de.”
Taim God i tok olsem, “Klostu long las de bai mi kapsaitim Spirit bilong mi long olgeta manmeri,” yumi i mas klia gut long dispela tok “olgeta manmeri.” Dispela tok i no min olsem olgeta manmeri long dispela graun bai i kisim Holi Spirit. Na em i no min olsem God bai i salim Holi Spirit long wanpela wanpela manmeri tasol. Nogat. Em i salim Holi Spirit long lain Juda na long ol arapela lain, long man na long meri, na long pikinini man na long pikinini meri.
Bikos Holi Spirit i kam pinis, na God i stap insait long yumi nau, dispela i min olsem yumi i stap klostu tru long God, klostu moa olsem ol lain long bipo. Sapos spirit bilong yumi i no stap orait long tude, asua i stap long yumi tasol. Heven i op pinis na Saviour bilong yumi
i bin i go insait. Nau yumi i stap aninit long heven i op, bikos Spirit bilong God i kam pinis long givim yumi bel isi. Sapos yumi i no luksave long dispela, i olsem yumi i aipas. Sapos yumi i no kisim pawa bilong Holi Spirit, i min olsem yumi i no bilip. God i raunim yumi, em i karamapim yumi. Olgeta de long laip bilong yumi, yumi i stap long lait bilong marimari bilong Jisas Krais, long san bilong laikim tru bilong God, na long amamas na wanbel wantaim Holi Spirit.
Olsem na yumi mas i go insait long dispela gutpela ol “las de.” Askim God long helpim yu, na em bai i bekim. Tude, yumi ol Kristen i kisim pawa bilong God pinis.
SAMPELA TINGTING
Yu save pilim olsem God yet i raunim yu na karamapim yu? Olsem wanem? Askim God long givim yu bel isi na pawa bilong Holi Spirit.
Ritim: Aposel 2:1-13
Na Holi Spirit i pulap long olgeta dispela manmeri, na ol i stat long mekim tok long ol kain kain tok ples.... ‘Yumi Juda wantaim ol arapela man i bihainim lotu bilong yumi, na yumi ol lain bilong ailan Krit na distrik Arebia, yumi olgeta i harim ol i autim tok bilong ol strongpela wok bilong God long ol tok ples bilong yumi.’ – Aposel 2:4,11
Taim God Holi Spirit i kam na stap wantaim ol manmeri bilong em, em i larim ol lain i luksave long em bilong soim ol olsem em yet i stap. God em i save olsem yumi man tasol, olsem na em i larim Spirit bilong em i kamap ples klia bilong yumi inap bilip olsem em i stap.
Namba wan mak Holi Spirit i givim, em i wanpela samting long harim long yau – wanpela nois olsem krai bilong strongpela win. Na bihain ol i lukim sampela samting long ai – ol i lukim samting olsem paia i kamap, na i luk olsem planti tang bilong man. Tasol bikpela mak tru olsem Holi Spirit i stap, em i ol toktok bilong ol dispela manmeri. Ol wan wan man na meri i harim ol i toktok long tok ples bilong ol stret. Dispela em i stori bilong ol narakain wok bilong God. Olgeta tok ples i wok long autim biknem bilong Jisas.
Na long tude tu, Spirit i givim planti ol mak long soim olsem em i stap. Spirit yet bai makim wanem mak em i laik yusim. Em i no yusim ol dispela mak long Pentikos gen (olsem nois bilong strongpela win, paia olsem tang bilong man, na narakain toktok). Tasol i gat wanpela mak i stap olgeta taim long putim ples klia sapos Spirit i stap, o nogat: Spirit bilong God
i kirapim sios long autim tok long Krais, na long autim olgeta narakain wok bilong God. Dispela em i wanpela bikpela mak olsem Spirit i stap, na em i mak bilong laip.
Taim Holi Spirit i stap, sios bilong God bai autim tok strong tru na klia tru long Bikpela, dispela Man Bilong Kisim Bek bilong em. Tude, planti lain i save presim nem bilong Jisas long olgeta hap long dispela graun. Long olgeta hap graun, Spirit bilong God i save wok long givim laip long ol manmeri na senisim bel bilong ol. Na taim em i mekim olsem, olgeta dispela manmeri bai tokaut long ol narakain wok bilong God. Sapos yumi i kisim Spirit pinis, bai yumi i givim glori long Krais!
SAMPELA TINGTING
Yu inap luksave olsem Spirit bilong God i stap, o nogat?
Ritim: Luk 11:5-13
Yupela i mas i stap long dispela taun inap long taim yupela i kisim dispela strong bilong God. – Luk 24:49
God em i God bilong bihainim stretpela rot long wokim ol samting. Yumi inap lukluk long olgeta samting God i wokim na kamapim long dispela graun. Yumi inap lukluk long sid na bihain liklik plaua i kamap, na bihain bikpela plaua i kamap. Yumi i save olsem i gat taim bilong ren na taim bilong bikpela san long dispela graun, na taim bilong san na taim bilong nait. Long wok bilong Krais bilong kisim bek yumi, yumi inap lukim stretpela rot God i bihainim tu – Krais i kam long graun, em i bungim ol hevi, em i dai, em i kirap bek na em
i go antap long heven. Na tu i gat stretpela rot bilong bihainim long kisim ol presen Krais
i givim long yumi: pastaim yumi i mas harim, na bihain yumi mas bilip; yumi i mas kamap nupela man pastaim na bihain bai yumi inap i stap olsem wanpela Kristen i gat gutpela save na gutpela pasin. Na God i tok olsem, “Tasol yupela i mas bihainim stret ol gutpela pasin bilong lotu” (1 Korin 14:40). Na taim bilong ol daiman bilong kirap bek i gat stretpela rot long bihainim tu – “Tasol yumi olgeta bai yumi kirap bek na kisim laip long taim bilong yumi yet. Namba wan em Krais. Na bihain, taim em i kam bek, yumi olgeta lain bilong en bai yumi kirap bek” (1 Korin 15:23).
Na long stretpela rot bilong plen bilong God, em i makim 40-pela de namel long taim Krais i kirap bek na taim em i go antap long heven. Long dispela 40-pela de em i redim ol disaipel bilong em bilong mekim wok. Long dispela 40-pela de Bikpela i soim olsem em i stap laip, na em i skulim ol long kingdom bilong God. Tasol, bilong wanem God i makim 10-pela de namel long taim Krais i go antap long heven na taim Holi Spirit i kam daun long dispela graun?
Krais i tokim ol aposel bilong em long stap long Jerusalem. Aposel 1:14 i tok, “Olgeta dispela man i stap wanbel na ol i save bung na beten.” Long dispela 10-pela de ol i beten i stap. Na bihain long dispela tasol, ol i kisim pawa bilong antap.
Yumi Kristen i save lus tingting olsem God i save givim strong long yumi. Yumi i save bisi long mekim planti samting. Tasol yumi i no gat pawa. Yumi ol Kristen i nidim wanem kain pawa? Yumi i no nidim pawa bilong save o mani o kago o planti pik. Nogat, yumi i nidim pawa bilong heven. Dispela 10-pela de bilong wet i stap, i skulim yumi olsem sapos yumi les long wetim Bikpela, na sapos yumi i les long prea long kisim pawa bilong antap, bai yumi i no inap long mekim wanpela gutpela samting.
SAMPELA TINGTING
Yu save “wetim Bikpela” long laip bilong yu olsem wanem?
Ritim: Jon 1:29-34
Jon i bin baptaisim ol manmeri long wara. Tasol i no planti de nau na bai yupela i kisim baptais long Holi Spirit. – Aposel 1:5
John bilong Baptais i stap namel long tupela samting. Em i stap olsem las profet long Olpela Kontrak: “Olgeta profet, na buk bilong lotu, ol i bin autim tok bilong God inap long taim Jon i kamap” (Matyu 11:13). Olsem las profet bilong olgeta profet em tasol inap long tokaut: “Em i kam. Lukim. Em i Pikinini Sipsip Bilong God.”Em i las bilong olgeta profet husat i bin lukluk i go long Krais, na em yet i lukim taim God inapim ol tok profet.
Taim Jon i stori long ol nupela samting dispela Mesaia i kisim i kam long dispela graun, em i tok olsem Krais bai i kam na baptaisim ol long Holi Spirit. Em i soim yumi wanem wok bilong em yet i wanbel long wok bilong Krais. Baptais long wara i wanpela hap long baptais long Spirit. Yumi i mas rausim ol olpela samting sapos yumi laik kisim ol nupela samting i kam.
Tasol tu, Jon i soim olsem wok bilong em i no inap, long wanem, em inap long baptaisim olgeta lain long wara tasol, na dispela man bai i kam, em bai i baptaisim olgeta lain long Holi Spirit. Sapos yu no kisim nupela samting i kam, hau bai yu rausim olgeta olpela samting?
Na sapos God i lusim sin bilong yumi, tasol em i no givim yumi pawa bilong mekim gutpela pasin, hau bai dispela samting i helpim yumi ? Man i sik nogut tru i no inap kamap orait sapos yumi rausim sik tasol. Em i nidim nupela strong gen. Yumi i mas lusim dispela olpela, kranki rot, na moa, yumi nidim pawa bilong wokabaut long nupela rot, long nupela laip.
I no gat man o sampela samting long dispela graun inap long stiaim yumi long nupela rot. Maski yumi i gat gutpela tingting o bikpela save, yumi i no gat strong long wokabaut long nupela laip na oraitim olgeta samting sin i bagarapim pinis.
Krais tasol i gat dispela pawa. Em i kam long stiaim yumi long nupela rot. Em i lusim sin bilong yumi, na em i helpim yumi long mekim ol gutpela pasin tu. Taim em i mekim wok long dispela graun, em i karim ol sin bilong yumi long bodi bilong em. Na taim em i go antap long mekim wok long heven, Krais em i salim Holi Spirit i kam daun. Long Holi Spirit, nupela strong i kam long dispela olpela graun, dispela graun i skin les olgeta. Nau, ol ren i wok long punduan long ples drai.
SAMPELA TINGTING
I tru olsem sampela taim yumi no save tingting tumas long wok bilong Holi Spirit, o nogat? Em i gutpela samting, o nogat? Bilong wanem?
Ritim: Kamapim Tok Hait 21:9-14
Orait na ol i tromoi ston bilong makim husat i mas kisim dispela wok, na ston bilong Matias i kamap. Olsem na ol i putim em wantaim ol 11-pela aposel. – Aposel 1:26
Jisas i go antap long heven pinis na Holi Spirit i no kam daun yet, na ol disaipel i wet i stap long Jerusalem. Long dispela taim ol i makim wanpela aposel bilong kisim ples bilong Judas Iskariot.
Planti lain i tok olsem ol disaipel i mekim rong taim ol i mekim olsem. Planti ol i ting olsem dispela pasin bilong tromoi ston em i no gutpela long painimaut tingting bilong God. Sampela lain i ting olsem God em i no laik olsem Matias i kisim ples bilong Judas, na ol i laik makim Pol bilong kisim ples bilong Judas. Tasol yumi mas klia olsem, Pol yet i no tok olsem em i wanpela bilong ol dispela 12-pela aposel, maski em i stap wanpela aposel (1 Korin 15:5-9). Na Buk Baibel i no tok olsem dispela samting ol disaipel mekim i kranki.
Bikpela bilong ol i lusim ol pinis, na Spirit i no kam yet. Long dispela 10-pela de, ol disaipel i mekim tupela samting: Ol i prea planti, na ol i soim bilip bilong ol taim ol i makim Matias. Ol i bilip olsem Bikpela bai pinisim wok bilong em. Em bai “i stap king bilong ol lain bilong Jekop oltaim” (Luk 1:33). Ol Aposel i bilip olsem Jisas bai i pinisim wok bilong em, na tu ol i save long wok bilong ol yet insait long dispela wok bilong Krais. Ol i save olsem ol i nidim 12-pela aposel, bikos as bilong ol lain bilong God i dispela 12-pela lain bilong Israel. Na olgeta lain bilong God bai i sanap antap long wok bilong dispela 12-pela aposel Krais yet i makim.
Ol aposel i stap redi long kisim dispela man bai i stretim Jerusalem na inapim olgeta promis bilong em.
Long Kamapim Tok Hait 21 yumi i lukim wanpela piksa long taim wok bilong Spirit bilong Krais bai pinis: Jerusalem em i naispela tru. Na dispela 12-pela nem long ol pikinini man bilong Israel i stap long ol dua is stap long banis bilong dispela taun, na dispela banis bilong taun em i gat 12-pela ston bilong strongim as bilong en, na nem bilong ol 12-pela aposel i stap long ol dispela ston.
Yumi i mas holim wankain bilip olsem ol aposel, na yumi i mas redi long mekim wok long kingdom bilong God. Yumi i mas prea strong olsem: “Bikpela, Man bilong wokim haus, yu mas hariap long mekim wok!”
SAMPELA TINGTING
Dispela tok long 12-pela aposel, na dispela tok long 12-pela ston, na 12-pela dua, na 12-pela nem long Kamapim Tok Hait, i soim yumi wanem samting long Buk Baibel, na pasin bilong God yet?
Ritim: 1 Korin 15:1-11
Bikpela tok tru mi bin givim long yupela, em dispela tok mi yet mi bin kisim bipo. Em i olsem. Krais i bin i dai bilong rausim olgeta sin bilong yumi, olsem tok i stap long buk bilong God. Na ol i putim em long matmat, na long de namba 3 em i kirap bek, olsem tok i stap long buk bilong God... Tasol maski mi mekim o ol arapela aposel i mekim, mipela olgeta i save autim dispela tok bilong Jisas i dai na i kirap bek. Na yupela i harim na bilipim. – 1 Korin 15:3,4,11
Planti taim ol manmeri i ting olsem ol Kristen lain ol i lain bilong bihainim sampela gutpela tingting na save tasol.
Tasol yumi mas save olsem as bilong Kristen bilip em i ol samting i bin kamap bipo: Krais em i dai long sin bilong yumi. Ol i planim em. Em i kirap bek. Planti ol man i lukim em i stap laip. Sapos bilip bilong ol Kristen i samting bilong bihainim gutpela pasin tasol na bilong kisim gutpela tingting na save tasol, bilong wanem ol aposel i no stap olsem ol save man tru na ol i no wok long kisim gutpela skul tru long kain kain bikpela skul?
Nogat. Ol aposel i go long planti hap long dispela graun bilong autim wanem samting i tru, dispela samting ol i lukim: “Mipela i save olsem em i tru, bikos mipela i lukim long ai bilong mipela. Mipela i lukim em i dai long diwai kros. Mipela i lukim matmat bilong en. Mipela i save olsem em i dai, tasol bihain mipela i lukim em i stap laip gen. Mipela i tasim em, mipela i harim nek bilong em. Na mipela ol sin lain, mipela i go wantaim em antap long Maunten Oliv na lukim em i go antap long heven. Mipela i lukim long ai bilong mipela yet. Yupela i bilipim mipela o nogat?”
Em i tru, ol Kristen lain i save givim gutpela skul long pasin bilong laikim tru, na long bihainim olgeta gutpela pasin. Na em i gutpela samting. Tasol olgeta bilip bilong olgeta Kristen i sanap antap long olgeta samting i bin kamap bilong kisim bek yumi: Krais em i kam long graun, em i dai long sin bilong yumi, ol i planim em long matmat, na em i kirap bek. Dispela samting ol Kristen Sios i save autim. Dispela samting i bin kamap tru tru, na i stap olsem as bilong bilip bilong wan wan Kristen.
Sapos yu no bilip olsem ol dispela samting i bin kamap, hau bai yu i stap olsem memba bilong Kristen sios?
SAMPELA TINGTING
Sapos yu stori wantaim wanpela man i no stap wanpela Kristen, bai yu tokaut long as bilong bilip bilong yu olsem wanem?
Ritim: Aposel 1:15-26
Olsem na nau yumi mas makim wanpela man namel long ol man i bin wokabaut wantaim yumi long olgeta taim Bikpela Jisas i bin i go i kam wantaim yumi, stat long taim Jon i wok long baptaisim ol manmeri, na Jisas i kirapim wok bilong en na i kam inap long dispela de God i kisim Jisas na em i lusim yumi na i go antap. Yumi mas makim wanpela man i bin lukim dispela olgeta samting, na em i mas kisim wok wantaim mipela bilong autim tok long Jisas i kirap bek. – Aposel 1:21-22
Long dispela teks Pita i tokaut long ol mak na wok bilong ol aposel. Ol aposel i mas stap olsem wanem? Ol aposel ol i mas klia gut long wok bilong Jisas taim em i stap long dispela graun. Ol i lukim Jisas na kisim skul bilong Jisas. Sapos ol i no stap long graun taim Jisas i stap long graun, ol i no inap stap olsem aposel. Em i wok bilong ol aposel long tokaut klia olsem ol i lukim Krais em i kirap bek long ai bilong ol yet.
Planti manmeri i tok olsem sampela arapela lain inap stap olsem aposel. Tasol nogat. Ol aposel, long ai bilong ol yet, i mas luksave olsem Jisas i kirap bek na i stap laip, na tokaut long dispela. Olsem na, Bikman bilong ol, Jisas, i givim dispela wok long ol, na Nupela Kontrak i putim ples klia olsem ol aposel yet i klia olsem dispela em i wok bilong ol.
Em i tru, yumi olgeta i mas tokaut long pawa bilong God na wok bilong em long kisim bek yumi. Tasol long Buk Baibel i bikpela samting olsem: long taim bilong kot ol i mas kisim i kam sampela man i bin lukim wanem samting i kamap, long autim tok. Ol man i bin lukim long ai bilong ol tasol inap long tokaut klia long wanem samting i bin kamap, na ol i mas tokaut klia na tok tru. Ol man i bin lukim wanem samting i kamap, ol i no inap long autim tok long laik bilong ol yet. Nogat, ol i mas tok tru long wanem samting i bin kamap tasol.
Na i wankain long ol aposel. Ol yet i lukim planti samting, na ol yet i autim wanem samting ol i lukim na harim. Na taim ol i mekim olsem, i olsem ol i wokim as bilong sios, bikos ol i stori long taim Jisas i kirap bek long matmat na dispela samting ol i bin lukim long ai bilong ol yet. Na ol lain i bilipim dispela tok bilong ol aposel, ol yet i stap olsem memba long dispela Kristen Sios i bihainim ol skul bilong ol aposel.
SAMPELA TINGTING
Taim yumi klia olsem ol aposel i autim tok long wanem samting ol i lukim long ai bilong ol yet, dispela i strongim bilip bilong yumi olsem wanem?
Ritim: Hibru 6:13-20
Samting God i tokim yumi long wetim, dispela i stap olsem gutpela strongpela anka bilong laip bilong yumi. Dispela anka i go insait olgeta long Rum Tambu Tru, baksait long bikpela laplap ol i bin hangamapim long tempel. Jisas i go paslain long yumi insait long dispela rum, bilong helpim yumi, long wanem, em i kamap hetpris wankain olsem Melkisedek, na em bai i stap hetpris oltaim oltaim. – Hibru 6:19-20
Wanpela sip i bungim bikpela win long taim em i stap namel long solwara. Ol boskru bilong sip i tromoi anka bilong em i go daun. Taim dispela anka i go daun, ol man long sip i wok long prea strong tru olsem dispela anka bai strong tru daunbilo long ples hait, na holim sip gut.
Em i dispela kain tok piksa yumi kisim long buk Hibru. Tasol anka bilong yumi i no go daunbilo long ples hait. Sens bilong anka bilong yumi i go antap tru long ples hait. Ol i go insait olgeta long Rum Tambu Tru, baksait long bikpela laplap ol i bin hangamapim insait long tempel. I min olsem, sens bilong anka i go long ples God i stap long em, dispela ples Jisas i go insait long em, paslain long yumi. Anka bilong bilip bilong yumi i stap long han bilong Jisas. Bikos Jisas i stap wantaim God Papa, yumi i gat graun bilong holim anka bilong yumi. Wok bilong Jisas em i mekim pinis, na wok bilong em i go yet, dispela samting i olsem strongpela graun i stap olsem as bilong olgeta hop bilong yumi.
Yumi bai i bungim ol “strongpela win” long laip bilong yumi. Yumi bai bungim hevi na dispela win nogut bai tromoi yumi i go long kain kain hevi. Tasol, sapos wok bilong Jisas na namba bilong em tu i stap olsem as bilong hop bilong yumi, orait bai yumi i stap gut– anka bilong yumi bai stap strongpela tru. Olsem tasol bilip bilong yumi i tru – olgeta samting bai wok long mekim gut long yumi, na yumi bai win tru long las de bikos Krais i stap wantaim Papa bilong em. Em i olsem dispela graun i holim strong anka bilong yumi.
As bilong bilip bilong yu em i husat? Husat i olsem graun i holim anka bilong yu? Planti manmeri long dispela graun i no gat hop, ol i no gat strongpela anka. Tasol sapos Jisas i stap olsem anka bilong yu – wok em i mekim pinis na namba bilong em long nau – yu no inap lus!
SAMPELA TINGTING
Taim yu bungim ol “strongpela win” long laip bilong yu, dispela tingting bai helpim yu olsem wanem?
Ritim: Aposel 1:6-14
Tiofilus, long dispela buk bipo mi raitim, mi raitim tok long olgeta samting Jisas i bin mekim na long olgeta skul em i bin givim long ol manmeri, long pastaim tru na i kam inap long dispela de God i kisim em i go antap... – Aposel 1:1-2
Namba wan buk Luk i raitim yumi save kolim Gutnius bilong Luk. Long dispela namba wan buk bilong em, Luk i raitim tok long olgeta samting Jisas i bin mekim na long olgeta skul em i bin givim long ol manmeri. Long dispela buk Aposel, Luk i wok long stori sampela moa long wok Krais i mekim na long olgeta skul em i givim taim em i go antap long heven pinis.
Namba wan buk bilong em i stori long wok bilong Jisas taim em i stap long dispela graun. Dispela wok i stat long ples bulmakau long Betlehem na i pinis long taim Krais i go antap long heven. Na dispela namba tu buk bilong Luk, Aposel, i stori long wok bilong Jisas taim em i stap long heven. Dispela wok i kirap long taim em i go antap long heven na i go inap long tude taim yumi i ritim ol dispela tok. Olsem na Luk i mekim planti tok liklik long taim Krais i go antap long heven, bikos em i laik stori long wok bilong Krais long heven– na dispela wok i no pinis yet.
Sampela Kristen i ting olsem buk Matyu, Mak, Luk na Jon tasol i stori long ol wok Jisas i mekim na ol skul Jisas i givim. Tasol dispela em i no tru. Ol buk olsem Aposel na ol pas long Nupela Testamen tu i stori long wok bilong Jisas. Sapos yumi i ting olsem ol dispela buk i stori long wok bilong ol Aposel olsem Pita, Jems, Jon, na Pol tasol, i min olsem yumi i paul long wok Jisas i mekim long heven.
Nupela Kontrak i tok olsem, taim Jisas i pinisim wok bilong em long dispela graun, em i go antap long heven na sindaun long sia king. Na long disepela hap em i wok yet long kisim bek ol lain bilong em. Wok bilong em long heven i no wankain long wok bilong em long graun, tasol Krais i mekim wok yet na em i givim skul tu. Ol wok na ol tok bilong Bikpela i stap long olgeta buk bilong Nupela Kontrak. I no Matyu, Mak, Luk na Jon tasol.
Pastaim yumi mas save long Bikpela em i husat tru – wanem samting em i bin mekim na em i wok yet long mekim. Na bihain long dispela bai yumi i klia gut long Buk Baibel em i wanem samting, na long sios em i wanem samting.
SAMPELA TINGTING
Yu save ting olsem buk Aposel em i stori bilong Jisas, o nogat?
Ritim: Luk 24:44-53
Na ol i brukim skru na lotu long em. Na ol i amamas tru na ol i go bek long Jerusalem. – Luk 24:52
Planti manmeri i save long sampela samting long taim Krais i kam long dispela graun olsem bebi, na ol i save tingim dispela taim long Krismas. Tasol planti manmeri i no klia long taim Krais i go antap long heven. Planti manmeri i no makim wanpela de long tingim taim Krais i go antap long heven. I no gutpela olsem planti lain i no tingim dispela de, na insait long sios em i no gutpela sapos yumi i no tingim dispela de tu.
Bilong wanem ol Kristen i no save amamas long tingim dispela taim Krais i bin go antap long heven? Em i taim bilong amamas tru! Taim Krais i kam long dispela graun em i daunim em yet; tasol, taim em i go antap long heven, em i kisim biknem na glori long dispela. Taim Maria i karim Jisas olsem wanpela bebi, dispela samting i kirapim laip bilong em long graun, na dispela laip bilong em i pinis long dai bilong em. Tasol taim Krais i go antap long heven, em i go olsem wanpela king, na em bai i winim olgeta ol birua bilong em. Olsem na, em i gutpela sapos sios i tingim na selebretim taim Krais i go antap long heven!
Yumi man, yumi i save amamas long kirapim sampela wok samting, tasol planti taim yumi
i lus tingting long mekim wok na long pinisim wok tu. Tasol yumi i mas klia olsem taim bilong Krais long kam long dispela graun, na taim bilong em long go antap long heven,
na taim bilong em bilong kam bek gen, olgeta dispela samting i olsem wan wan hap long wok bilong em na wok bilong God long sanapim kingdom bilong em. Na sapos ol dispela samting i olsem bikpela wok bilong God husat i pulap long laikim tru na pawa na save bilong em, bilong wanem yumi i no save tingting tumas long dispela? Em i bikpela samting stret!
Krais i go antap long heven, na bilip bilong yumi ol Kristen i sanap antap long dispela samting. Em i as bilong hop bilong yumi long dispela gutpela taim bai i kamap bihain. Yu mas amamas! Bikpela em i King!
SAMPELA TINGTING
Tingting gut long dispela de Krais i bin go antap long heven. Bilong wanem dispela de i mas i stap olsem bikpela de bilong amamas?
Ritim: Jon 20:11-18
Na Jisas i tokim em olsem, “Yu no ken holim mi, long wanem, mi no i go antap yet long Papa bilong mi. Tasol yu mas i go long ol brata bilong mi na tokim ol olsem, mi bai go antap, na mi go long Papa bilong mi na Papa bilong yupela. Na mi go long God bilong mi na God bilong yupela.” – Jon 20:17
Maria bilong taun Makdala (Luk 8:2) i laikim Jisas tumas. Jisas i mekim planti samting long helpim em. Olsem na em i sanap i stap ausait klostu long matmat long lukautim bodi bilong em. Tasol em i lukim matmat i op na bodi bilong Jisas i lus pinis, na em i paul olgeta.
I olsem Maria em i aipas long bodi – em i krai i stap na ai wara i pasim ai bilong em. Na i olsem em i aipas long spirit tu – em i no bilip olsem Jisas i kirap bek long matmat. Olsem na, em i no luksave long Jisas, na em i ting Jisas em i man bilong bosim gaden. Tasol taim Jisas
i autim nem bilong em olsem, “Maria,” wantu em i luksave long em. Na em i amamas nogut tru long luksave long em, na ating em i bin tromoi em yet long nek bilong em.
Tasol Krais i tokim em, “Yu no ken holim mi.” Maria i no klia olsem sampela senis i bin kamap. Jisas i kamap klostu long namba tu hap long wok bilong em, na dispela bai winim dispela taim long bipo. Jisas em bai i go antap long Papa bilong em.
Maria i no ken holim Jisas, tasol em i mas mekim wok bilong em. Jisas i givim wok long Maria. Long namba tu hap bilong wok bilong Jisas, Krais bai yusim ol lain bilong em long kain kain wok bilong em. Na dispela wok Jisas em i givim Maria i putim ples klia wanem samting i kamap taim Jisas em i dai na kirap bek: ol disaipel i kamap olsem “brata” bilong Jisas. Dispela God bilong Jisas em i dispela God bilong ol disaipel tu, na dispela Papa bilong Jisas em i dispela Papa bilong ol disaipel tu.
Maria i no inap klia long olgeta wok bilong Jisas. Tasol em i save olsem Jisas i stap laip, olsem na em yet i mas mekim wok bilong em.
Maria i no ken wari. Ating em i mas bel hevi liklik bikos em i no inap holim em, tasol Krais i go long wanpela ples we em inap long holim Maria olgeta taim - na em inap long holim olgeta lain i laikim em tru.
SAMPELA TINGTING
Sampela taim yumi i save wok long holim Jisas, olsem Maria i laik holim em?
Ritim: Jon 6:1-11
Tasol mi tok tru long yupela, mi lusim yupela na mi go, em i bilong helpim yupela. – Jon 16:7
Taim Jisas i tok, “Tasol nau mi go long Papa, em i bin salim mi na mi kam,” ol disaipel i bel hevi. Ol i amamas long stap wantaim Bikman bilong ol, na ol i laikim em tru. Tasol ol i no klia olgeta long as bilong wok bilong em na rot em i mas bihainim long mekim wok bilong em.
Dispela i soim olsem, sapos Holi Spirit i no helpim yumi, yumi bai paul olgeta long tingting na wok bilong God. Taim Holi Spirit i stap wantaim yumi, bai yumi i bihainim tingting bilong God. Taim Pentikos i no kamap yet, ol disaipel i wok long givim hevi long Jisas. Tasol taim Pentikos i kamap pinis, ol i stat long mekim wok bilong God, olsem helpim bilong em. Yumi i no inap mekim wok bilong God sapos Holi Spirit i no stap wantaim yumi.
Olsem na Krais i mas i go long heven, na em i gutpela olsem em i go long heven – em i lusim hap bilong pait na em i go long hap bilong bosim pait. Na taim em i go na stap long han sut bilong God Papa, em inap long salim Spirit bilong em long ol lain bilong em. Sapos yumi i no kisim pawa bilong spirit, i olsem yumi bai i stap nating long dispela graun. Tasol, taim yumi i kisim Holi Spirit pinis, yumi inap mekim wok long bihainim tingting bilong Bikpela.
Krais i mekim wok long dispela graun, na em i mekim wok long heven tu. Taim em i klostu long pinisim wok bilong em long graun, em i redim ol disaipel bilong em long namba tu wok bilong em long heven. Em i save olsem klostu em bai i go na sindaun long sia king long heven. Na em i save olsem em bai i salim i kam Holi Spirit, man bilong givim bel isi, na man bilong lukautim lain bilong God. God i bin makim taim bilong Holi Spirit i kam long dispela graun, na Jisas i mas i go antap long heven pastaim.
Taim Jisas i go antap long heven dispela i makim wanpela nupela taim long wok bilong Jisas long kisim bek ol lain bilong em. Dispela ol Kristen i gat laik long Jisas i stap yet long dispela graun, ol i no klia gut long wok bilong God bilong kisim bek yumi. Laip bilong yumi i winim laip bilong ol lain i stap long graun taim Jisas i stap long graun bikos yumi i kamap klostu moa long las de. Em i gutpela olsem Jisas em i go. Tasol, sapos yumi i no kisim lait bilong Spirit, bai yumi i no inap save olsem taim Jisas em i lusim yumi em i samting bilong helpim yumi na olgeta lain bilong em.
SAMPELA TINGTING
Taim yu tingting long wok bilong Jisas, yu save amamas bikos em i stap long heven?
Ritim: Luk 24:36-48
Na em i helpim ol long tingting gut long as bilong ol tok i stap long buk bilong God. – Luk 24:45
Long dispela 40-pela de namel long taim Jisas i kirap bek long matmat na taim em i go antap long heven, em i go bungim ol disaipel bilong em. Ol disaipel i klia olgeta olsem dispela man em i Jisas, wankain olsem ol i save long em bipo long dai bilong em. Jisas i larim ol i lukim ol mak bilong ol nil long han bilong em long helpim bilip bilong ol.
Tasol i no olsem olgeta samting i wankain tasol. Nau, Jisas i no stap wantaim ol olgeta taim. Taim Jisas i kamap long ol, ol i no klia long wanem hap em i kam long em. Taim em i lusim ol, ol i no klia long wanem hap em i go long em.
Sindaun bilong Krais wantaim ol disaipel bilong em i senis. Tru, laikim tru i stap yet na ol i klia long dispela. Tingim ol tok bilong Jisas: “Bel bilong yupela i ken i stap isi.” Tasol Jisas em i senis na i kamap narakain. Em i gat bikpela strong na glori. Em i dai pinis na kirap gen, na ol disaipel bilong em i luksave long bikpela glori bilong em. Ol i brukim skru na lotu long em.
Tasol long dispela 40-pela de, ol disaipel i kisim bikpela save tru long Jisas. Long dispela
taim em i helpim “ol long tingting gut long as bilong ol tok i stap long buk bilong God.” Em
i namba wan taim bilong ol long klia gut long as bilong dai bilong em. Ol i luksave olsem dai bilong Krais i wanpela ofa i go long God, na taim Jisas i kirap bek long matmat God i mekim klia olsem em i amamas long ofa bilong Krais. Taim ol disaipel i harim ol dispela tok, ol i kamap klostu moa long Jisas, na dispela i winim taim em i no dai yet na ol i stap wantaim Jisas long san na long nait.
Yumi no gat nid long wokabaut long rot bilong Jisas long Jerusalem. Yumi i ken kamap klostu long em na wanbel wantaim em, taim em i helpim yumi long tingting gut long as bilong ol tok i stap long Buk bilong God.
SAMPELA TINGTING
Askim Spirit bilong God long helpim yu i klia gut long as bilong ol tok long Buk Baibel taim yu ritim.
Ritim: Aposel 1:1-5
Pastaim em (Jisas) i bin karim pen na i dai, na bihain em i kisim laip gen na i kamap long ol aposel. Na em i mekim planti samting, bilong ol i ken save tru, em i stap laip. Inap long 40 de ol i lukim em, na em i tokim ol long kingdom bilong God. – Aposel 1:3
Jisas Krais i stap laip. Yumi i ken save long dispela bikos ol aposel i lukim em bihain long dai bilong em. Ol i lukim em planti taim insait long dispela 40-pela de. Ol i toktok wantaim em, tasim em, na ol i kaikai wantaim em. Na moa, Krais i skulim ol long kingdom bilong God.
Yumi save lus tingting long ol man i dai pinis, tasol ol man i stap laip yet yumi inap bung wantaim ol. Na tude, yumi inap long bung wantaim Bikpela bikos Jisas i stap laip. Em i bikpela samting stret long bungim Krais, na yumi no inap lus tingting long em. Krais i stap laip na em i save givim laip. Pasin bilong bung na sindaun wantaim Krais i winim pasin bilong bung na sindaun wantaim ol arapela, na em i naispela tru na em bai i stap oltaim.
Yumi ken save olsem Jisas i stap laip, bikos em i stap laip insait long bel bilong yumi. Taim Krais i givim laip long yumi, yumi bai i klia gut long dispela tok bilong Buk Baibel: “Buk bilong God i tok olsem,‘Namba wan man, Adam, i bin kisim laip.’Tasol narapela Adam (Jisas) i kamap bihain tru, em i bin kamap spirit bilong givim laip long man” (1 Korin 15:45). Jisas em i spirit bilong givim laip!
Na yumi ken save olsem Krais i stap laip bikos Jisas em i soim em yet long ol lain i save olsem em i bin dai. Long plen bilong God, em i soim em yet inap long dispela 40-pela de long ol lain i save olsem em i bin dai, long putim ples klia olsem em i stap laip tru tru. Ol man i lukim dispela na tokaut long laip bilong em, ol i kamap olsem as bilong sios.
Yumi no ken tok olsem yumi bai bilip long Krais taim yumi lukim pawa bilong em pinis. God i tok olsem yumi mas bilip long em pastaim, na bihain bai yumi lukim em. Taim yumi bilipim dispela tok bilong ol man i lukim em i stap laip long dispela 40-pela de, orait yumi bai klia tru olsem Krais i stap laip.
SAMPELA TINGTING
Yu inap save olsem Krais i stap laip tude olsem wanem?
Buk Song 103:19-22
Yupela olgeta samting Bikpela i bin wokim na i stap long olgeta hap, na em yet i stap king bilong yupela, litimapim nem bilong Bikpela. Na mi tu mi mas litimapim nem bilong em. – Buk Song 103:22
Sapos famili bilong yu i Kristen, ating yu bin harim dispela tok bipo: Wok bilong yumi em
i bilong litimapim nem bilong God. Long wok bilong yu na long taim bilong pilai, yu mas litimapim nem bilong Bikpela. Ol abus, na ol plaua, na gras samting long dispela graun i stap bilong litimapim nem bilong God. Olgeta samting i stap bilong givim glori long God.
Na God i tokim yumi long mekim olsem bikos em i laikim yumi tru. Yumi bai amamas tru taim yumi inap tokaut, “Litimapim nem bilong Bikpela. Mi tu mi mas litimapim nem bilong em.” Bel bilong yumi i pulap long amamas long dispela taim, na yumi tok tenkyu long God.
I gat dispela lo i stap namel long laip bilong yumi ol man: Sapos yumi no kisim amamas bilong yumi i kam long God tasol, orait yumi i no inap amamas. Yumi bai i bel nogut tasol. Planti taim yumi inap lukim ol lain i wok long tok nogut long kain kain samting. Ol i wok long wari long laip bilong ol yet. Tasol taim ol i wok long helpim ol arapela , ol i no amamas tumas. Em tru, sapos yumi wok long amamasim yumi yet, bai yumi i no inap amamas tru.
Yumi stap long dispela graun bilong litimapim nem bilong God. Na taim yumi givim yumi yet long God, bai yumi wok long helpim ol arapela manmeri long dispela graun tu. Olgeta samting na olgeta manmeri long dispela graun i mas litimapim nem bilong Bikpela.
Laip bilong yumi bai pinis long sia king bilong God. Na yumi mas lainim pasin bilong singim dispela singsing bilong presim God taim yumi i wokabaut long dispela rot i go long las de.
SAMPELA TINGTING
Yu yet yu save singim ol song bilong litimapim nem bilong Bikpela taim yu wokabaut long rot i go long Nupela Graun?
Buk Song 103:6-18
Laip bilong yumi manmeri i sotpela tru olsem gras... Tasol Bikpela i save marimari oltaim oltaim long ol manmeri i aninit long en... sapos ol i bihainim kontrak bilong Bikpela. – Buk Song 103:15, 17-18
Dispela Buk Song i autim ol naispela tok stret long marimari bilong God. Em i gat bikpela laik tru long ol, olsem skai i antap tru long graun. Hap bilong sankamap em i no klostu long hap bilong san i go daun. Em i longwe tru. Olsem tasol God i save rausim sin bilong yumi na sin i stap longwe tumas. Papa i save sori long ol pikinini bilong en. Olsem tasol Bikpela i save sori long olgeta manmeri i pret long em. Na long wok bilong Jisas Krais, marimari bilong em na laikim tru bilong em i kamap ples klia tru. “Yumi ken kisim strong wantaim olgeta manmeri bilong God, inap long yumi olgeta i ken save gut long pasin bilong Krais long laikim tru ol arapela, em i bikpela tru, na i go longpela moa, na i go antap tru, na i go daun moa” (Efesus 3:18-19).
Man i raitim dispela Buk Song i stori long marimari bilong God i go long ol sin lain olsem yu na mi. Olgeta man i pulap long sin; tasol, ol i no gat strong tu. “Laip bilong yumi manmeri
i sotpela tru olsem gras. Yumi stap sotpela taim olsem plaua bilong gras na yumi dai. Win i naisim plaua na em i pundaun na ol man i no moa lukim plaua i stap” (lain 15-16). Yumi no gat strong. Laip bilong yumi i sotpela tru.
Tasol, maski laip bilong yumi i sotpela tru, yumi lukim marimari bilong kontrak bilong God pinis – “Tasol Bikpela i save marimari oltaim oltaim!” (lain 17). Olgeta sotpela laip bilong yumi lain bilong em i aninit long marimari bilong God, na dispela marimari i stap oltaim oltaim. Marimari bilong God i olsem renbo i wok long raunim yumi olgeta taim.
God i wokim wanpela kontrak wantaim yumi na ol pikinini bilong yumi tu. Na yumi i pas wantaim God, dispela God i stap oltaim oltaim, dispela God i marimari long yumi. Olsem na laip bilong yumi i gat mining bilong em. Sapos nogat, orait bai laip bilong yumi i wankain olsem laip bilong gras o plaua bilong gras. Tasol kontrak bilong God i save givim laip long yumi na bai yumi stap aninit long marimari bilong God oltaim oltaim.
Sapos yumi laik kisim laip, yumi mas bihainim kontrak bilong God!
SAMPELA TINGTING
Tok tenkyu long God long kontrak bilong em.
Buk Song 103:1-5
Mi mas litimapim nem bilong Bikpela. Yes, bodi na tingting na olgeta samting i stap insait long mi i mas litimapim gutpela nem bilong Bikpela. – Buk Song 103:1
Yumi mas tokim yumi yet long litimapim nem bilong God bikos em i gutpela samting stret long presim Bikpela. Pasin bilong litimapim Nem bilong God i winim pasin bilong prea. Bikos taim yumi dai, na God i bekim olgeta prea bilong yumi pinis, yumi bai i stap na litimapim Nem bilong God i go i go.
Taim yumi lukluk long Buk Song 103 bai yumi klia tru long pasin bilong God long lukautim yumi, long stap wantaim yumi long olgeta taim. Em i bin mekim ol gutpela samting long yumi. Yumi mas litimapim nem bilong Bikpela. I no samting bilong autim long maus tasol. Nogat. Bodi na tingting na olgeta samting i stap insait long yumi em ol i mas litimapim Nem bilong Bikpela.
Em i save lusim olgeta sin bilong yumi! Long marimari bilong em yet, God i rausim olgeta sin bilong yumi. Nau yumi i ken wanbel wantaim Bikpela gen bikos sin bilong yumi i lus pinis. Yumi kisim laip. Mi mas litimapim nem bilong Bikpela!
Na yumi mas presim God bikos em i save lukautim yumi long dispela graun. Em i save givim olgeta gutpela samting long yumi. Tok tenkyu long God bikos yu stap laip. Tok tenkyu long God taim em i oraitim sik bilong yu. Em i ol presen i kam long God. Em i save strongim yu, na yu stap strong olsem tarangau. God i save strongim yumi. Mi mas litimapim nem bilong Bikpela!
Yumi nidim God. Long strong bilong yumi yet, yumi samting nating tasol. God yet i givim olgeta samting long yumi. God yet i lusim sin bilong yumi na em i lukautim yumi long dispela graun. Em i save marimari na sori moa yet long yumi. Yumi i pulap long sin na pe nogut bilong dispela em i dai na hel, tasol God yet i kisim bek yumi na yumi stap laip. God em i God bilong inapim olgeta tok bilong em. Marimari bilong em i no inap pinis. Mi mas litimapim nem bilong Bikpela!
Em i gutpela samting long litimapim nem bilong God. Em i winim pasin bilong askim God long kain kain samting long prea. Tru, yumi mas mekim tupela wantaim. Taim yumi prea na askim God long kisim sampela samting, i olsem han bilong yumi i op na i wetim God i ken kam na pulapim han bilong yumi. Tasol taim yumi tok tenkyu long God na litimapim nem bilong em, yumi givim samting i go bek long God. Yumi givim dispela samting long God bikos em i givim yumi olgeta samting pinis.
SAMPELA TINGTING
Ritim dispela Buk Song na litimapim nem bilong Bikpela!
Buk Song 87
Bai mi tok long Jerusalem olsem, ‘Em i ples bilong olgeta lain manmeri.’ – Buk Song 87:5
Planti lain bilong yumi i ting olsem as ples bilong yumi em i bikpela samting stret. Em i nambawan samting. Yumi save laikim tru ol wantok bilong yumi tasol, na yumi stap sef wantaim ol wantok bilong yumi, maskim wanem samting i kamap. Sapos bikpela pait i kirap, wantu yumi bai bihainim ol wantok bilong yumi na helpim ol long pait, maski ol i mekim kranki pasin o nogat.
Tasol dispela Buk Song i gat sampela narapela tingting long skulim yumi. Long dispela Buk Song, God i autim nem bilong planti lain i save bihainim tok bilong em na ol i kam long kain kain kantri. Em i kaunim ol Isip na Babilon na Filistia na Tair na Itiopia. Na harim! Ol dispela lain i olsem birua tru bilong Israel. Ol i bin birua longpela taim stret long ol manmeri bilong God. Tasol ol dispela lain manmeri bai go insait long dua bilong tempel! Ol bai kamap olsem ol i lain stret bilong Jerusalem, dispela siti bilong God. I olsem Jerusalem i kamap olsem as ples stret bilong ol.
Dispela Buk Song i olsem tok piksa long sios bilong Jisas Krais, dispela sios em i stap long olgeta kantri. Lain bilong planti kantri tru i stap lain tru bilong God.
God yet i kisim yumi i kam insait long Krais, na nau laip bilong yumi i senis olgeta. As ples bilong yumi i no bikpela samting nau. Yumi no stap wanbel wantaim ol wantok bilong yumi tasol. Wantok tru bilong yumi em i ol lain bilong Krais, maski long as ples bilong ol. Maski
ol i lain long nambis, long highlands, long Enga, long Simbu, o long narapela kantri olsem Australia o Canada o China. Sapos yumi stap insait long famili bilong God, dispela em i famili tru bilong yumi na ol wantok tru bilong yumi. Yumi gat wanpela Papa tasol i stap, na yumi stap olsem brata na susa bilong wanpela narapela.
Yumi ol lain bilong God i gat wanpela as ples tasol, na yumi wokabaut i go long wanpela nupela ples tasol. Yumi wokabaut i go long Nupela Jerusalem!
SAMPELA TINGTING
Yu yet yu amamas stret long stap insait long sios bilong God, dispela famili i kam long kain kain hap bilong dispela graun?
Buk Song 82
God i stap namba wan long bikpela miting long heven. Ol hetman i bung na God i tokaut long tingting bilong en. – Buk Song 82:1
Ol dispela hetman i olsem ol jas na king na hetman bilong dispela graun. I gat wanpela Hetman tru i stap long bosim dispela graun – em i God bilong yumi. Olgeta man na meri i wankain long ai bilong God. I no gat bikman o rabisman long ai bilong God. Olgeta i wankain tasol. Na i no gat wanpela inap bosim narapela sapos God yet i no givim namba long em.
Olsem na ol papamama, tisa, bosman, na tu ol jas, king, kwin na ol man i raitim ol lo bilong kantri ol i gat namba bikos ol i kisim dispela namba long God. Ol i gat namba inap long bosim liklik lain, tasol God i bosim olgeta lain long dispela graun.
Na ol hetman i mas aninit long God na ol i mas redi long bekim God long olgeta samting ol i bin mekim. God yet bai kotim ol. Yumi harim tingting bilong God long dispela Buk Song: “Yupela i save kot giaman, yupela i save grisim ol man nogut. Yupela i mas helpim ol rabisman na ol manmeri i stap nogut.”
Taim ol hetman i lus tingting long God husat i givim dispela namba long ol, ol bai i mekim kranki pasin na bagarapim ol lain i no gat namba. God i givim dispela pawa long ol, long ol i ken yusim liklik taim tasol bilong mekim wok bilong em. Na ol hetman i mas tokim God long olgeta samting ol i bin mekim long namba bilong ol, dispela namba God yet i givim ol. Spirit bilong God na Tok bilong em i mas stiaim ol hetman.
Olsem na, em i wok bilong sios bilong God long givim strongpela tok long ol hetman i wok long bagarapim dispela namba God i givim ol. Olgeta kantri long dispela graun i mas aninit long God na Tok bilong em. “God, yu mas kam na bosim olgeta manmeri bilong graun. Olgeta lain manmeri i bilong yu tasol” (lain 8).
Em i wok bilong yumi Kristen long aninit long ol hetman God yet i givim yumi. Yumi mas bihainim tok bilong ol, bikos God yet i givim namba long ol. Na yumi no ken pret long tokim ol long bihainim tok bilong God taim ol i mekim wok bilong ol olsem hetman. Ol i mas helpim ol tarangu lain na ol pikinini, papa bilong ol i dai pinis. Na ol man i karim hevi na i no stap gut, ol i mas mekim gut long ol. Na ol manmeri i stap nogut, ol i mas kisim bek ol long han bilong ol man nogut.
SAMPELA TINGTING
Hau bai yumi inap strongim ol hetman bilong kantri bilong yumi long aninit long tok bilong God?
Buk Song 72:1-11
Na taim em i stap yet ol manmeri i ken bihainim stretpela pasin tasol. Taim mun i lait yet, planti gutpela samting i ken kamap. – Buk Song 72:7
Long dispela prea, yumi askim God long larim kingdom bilong Jisas Krais i kam. Dispela em i kingdom bilong gutpela sindaun na bel isi. Jisas yet em i king bilong kamapim gutpela sindaun na bel isi.
Dispela Buk Song i autim tok bilong “stretpela pasin” na “gutpela samting i ken kamap” wantaim. Dispela tupela samting i save kamap wantaim. Long mekim stretpela pasin long ol lain i gat ol hevi, sampela taim ol man nogut i mas kisim bagarap. Ol rabisman i nidim helpim bilong God, na bai bel isi i kamap. Ol gutpela samting i no inap kamap sapos stretpela pasin i no stap.
Sampela Kristen i ting olsem, kingdom bilong Bikpela Jisas em i samting bilong wokabaut bilong yumi long spirit tasol. Dispela em i no tru. Kingdom bilong Krais em i samting bilong dispela graun tu. Long dispela graun tu, yumi mas wok long mekim ol stretpela pasin, olsem na ol gutpela samting i ken kamap.
Yumi olgeta i mas bihainim Jisas Krais, em i king bilong yumi, dispela king bilong gutpela sindaun na bel isi. Olsem na, yumi mas wok long bihainim em long olgeta de. Dispela i min olsem yumi no ken pait wantaim meri bilong yumi sapos yumi laik stap bel isi wantaim God. Na yumi no inap poromanim God long stretpela pasin bilong em sapos yumi wok long mekim nogut long ol rabisman o yumi wok long grisim ol man nogut. Sapos yumi laik wanbel wantaim Krais, yumi mas bihainim olgeta laik bilong em.
Dispela nupela taim bai kam. Krais bai kam bek na yumi mas prea long dispela taim i ken kamap hariap. Tasol pasin bilong yumi mas soim klia olsem yumi wetim Krais.
Long Krais yumi i win pinis. Tasol yumi mas wok long pait yet long bel bilong yumi long olgeta hap bilong dispela graun. Yumi mas autim tok bilong God long haus bilong yumi na long ol taun bilong yumi tu. Jisas Kais bai i kam bek.
SAMPELA TINGTING
Askim God long helpim yu long autim tok bilong em long haus bilong yu, na long wok bilong yu, na long olgeta arapela hap yu save go long en.
Buk Song 68:15-20
God i bin i go antap long maunten i antap moa, na em i kisim bikpela lain kalabus i go wan- taim em. Em i bin kisim ol presen bilong ol bikhetman i bin pait long em. – Buk Song 68:18
God i go antap tru, na em i kisim bikpela lain kalabus i go wantaim em. Na em i givim ol presen long ol man. – Efesus 4:8
I olsem yumi i lukim wanpela bikpela man bilong pait, em i kam bek long haus bilong em taim em i winim wanpela bikpela pait pinis. Em i kisim bikpela lain kalabus i kam wantaim em, na em i soim ol presen em i kisim pinis long ol lain bilong em long kantri bilong em. Na ol lain bilong em i amamas stret.
Long dispela Buk Song yumi harim stori bilong God taim em i winim ol birua bilong em long Olpela na Nupela Kontrak wantaim. Buk Song 68 i stori long wok bilong Bikpela bilong bagarapim ol nesen i bikhet long em. God i rausim ol na kisim ol presen bilong ol bikhetman i bin pait wantaim em.
Tasol long Nupela Kontrak, yumi harim stori bilong Jisas, em i win, na em i go antap long heven. Pait i pinis nau, na em i go bek long Papa bilong em. Em i soim pawa na glori bilong em taim em i go antap long heven. Em i winim ol samting nogut; em i winim Satan. Yes,
ol spirit nogut i stap yet, tasol i olsem ol i stap long kalabus. Ol i kamap lain kalabus bilong Jisas: “God i go antap tru, na em i kisim bikpela lain kalabus i go wantaim em.”
Na dispela lain long buk Efesus i no tok olsem dispela man bilong winim pait i kisim ol presen long ol arapela; nogat, em i givim ol presen long ol man. Bikos Krais em i win pinis, em i gat pawa bilong helpim ol lain bilong em i stap namel long pait yet. “Em i givim ol presen long ol man.”
Nambawan presen Krais i givim ol lain bilong em em i Holi Spirit bilong em, taim em i winim pait pinis. Long Spirit bilong em, em i givim strong na pawa long sios bilong em.
Na ol dispela presen i wok long strongim yumi. Yumi ken bilip olsem em bai i strongim yumi inap long taim dispela pait i pinis olgeta. Taim yumi lukluk long ol arapela memba long sios bilong Krais, bai yumi wari liklik. Planti taim ol lain bilong sios i no wanbel, na planti taim yumi i sakim tok bilong God. Tasol strong bilong yumi i kam long antap, long Krais. Krais i gat olgeta klos pait bilong givim yumi. Na em bai i givim ol presen long yumi na bai yumi inap long stap strong long dispela pait. Yumi bai win!
SAMPELA TINGTING
God i givim yu wanem ol presen bilong yusim long mekim wok bilong em?
Buk Song 67
God, yu ken marimari long mipela na mekim gut long mipela...Olsem na olgeta manmeri i ken save long pasin bilong yu. – Buk Song 67:1-2
Taim yumi prea, yumi save askim God long blesim yumi o long blesim narapela man o narapela samting. Yumi askim God long blesim gaden bilong yumi, famili bilong yumi, kaikai bilong yumi, pasto bilong yumi, kantri bilong yumi, na i go i go.
Tasol yumi save gut long mining bilong dispela tok “blesim,” o nogat? Ating planti bilong yumi em bai nogat.
Em i gutpela long askim God long blesim olgeta dispela samting, bikos yumi nidim blesing bilong Bikpela. Blesing bilong God i olsem God i mekim gut long yumi. Taim God i blesim wanpela man o wanpela samting, em i marimari long dispela man o dispela samting. Na sapos God i blesim yumi, laip bilong yumi bai gutpela tru. Ol lain God i no blesim, ol bai i lus. Sapos God i no blesim graun, bai kaikai i no inap kamap long dispela graun.
Dispela Buk Song i askim God long blesim Israel: “God, yu ken marimari long mipela na mekim gut long mipela.” Na bilong wanem dispela man i askim God long blesim Israel? “Olsem na olgeta manmeri i ken save long pasin bilong yu.” Sapos Israel i kisim blesing bilong God, sapos God i marimari long Israel na mekim gut long ol, olgeta lain bilong graun bai i tok, “Litimapim nem bilong God bilong Israel.”
Glori bilong God em i nambawan samting. Dispela man i raitim dispela Buk Song, i no askim God long kisim ol blesing bikos ol i naispela samting bilong kisim tasol. Nogat, em i askim God long blesim Israel bilong nem bilong God i ken kisim olgeta glori na pres: “God, mi laik bai olgeta manmeri i ken amamas long yu na litimapim nem bilong yu.”
Bikpela, yu ken blesim olgeta manmeri bilong yu; blesim olgeta man o meri i ritim dispela buk. Blesim ol marit, blesim ol pikinini. Yu ken blesim ol lain i no marit tu. Blesim ol famili bilong mipela. Olsem na olgeta manmeri i ken save long pasin bilong God na litimapim nem bilong Yu!
SAMPELA TINGTING
Prea na askim God long blesim yu na famili bilong yu olsem na nem bilong em i ken kisim olgeta glori.
Buk Song 62
Mi save bilip strong long God wanpela tasol. Em wanpela tasol i save kisim bek mi na mi stap laip. – Buk Song 62:1
Devit i bilip tru long God. Em i wet long God wanpela tasol i helpim em (lain 5). Devit i bungim planti ol hevi, na em yet i mekim planti pasin nogut tu. Tasol em i go long God long kisim bel isi. Na em i gat laik long yumi olgeta i stap isi wantaim God.
Olsem na em i tok, “Yupela i mas autim olgeta hevi na olgeta tingting bilong yupela long em” (lain 8). Em i gat laik long yumi olgeta i prea long God. Em i no tokim yumi long prea hariap. Nogat, em i tokim yumi long “autim OLGETA hevi na OLGETA tingting bilong yumi long em,” na stap isi wantaim God. Sapos bel bilong yu i pulap long ol hevi na wari, yu mas autim olgeta dispela samting long God long kisim bel isi.
Yumi inap kisim bel isi long God, Devit i tok, bikos God wanpela tasol i save kisim bek yumi, na em wanpela tasol em i wasman bilong yumi. Yumi ken bilipim em. Taim yumi autim ol hevi bilong yumi long em, God bai i lukautim yumi. Bilipim Bikpela. No ken wok long kisim bel isi long ol manmeri bilong dispela graun, maski ol i man nating o bikman stret. Ol i man tasol. God tasol em i wasman bilong yumi, na em yet i save lukautim yumi.
Tasol planti taim yumi i bisi tru na yumi lus tingting long prea. Yumi ran long wanpela hap na hariap tru, yumi ran i go long narapela hap. Yumi stori long wanpela bikman na yumi stori long ol man nating. Yumi mekim wok i go i go. Planti taim insait long sios bilong yumi tu, pasin bilong yumi i kamap olsem Marta, dispela meri i bin tingting planti long wok, tasol em i lus tingting long harim tok bilong God. Yumi mas bihainim pasin bilong Maria, dispela meri i bin sindaun klostu long lek bilong Bikpela na harim toktok bilong em.
Pasin bilong prea na stap isi wantaim God, i mas kamap olsem bikpela samting insait long laip bilong yumi wan wan. Na dispela pasin bilong stap isi wantaim God i no tambuim yumi long mekim planti wok. Nogat, yumi mas mekim planti wok. Tasol long wok na long wokabaut bilong yumi long dispela graun, i mas kamap klia olsem yumi stap isi wantaim God.
Helpim bilong yumi i kam long wanem hap? Pasin bilong yumi mas soim ples klia olsem helpim bilong yumi i kam long God!
SAMPELA TINGTING
Yu save autim olgeta hevi na wari long yu long God? Na yu save stap isi wantaim God na harim tok bilong em long Buk Baibel?
Buk Song 46
God em i ples hait bilong yumi, na em i save strongim yumi oltaim. Em i stap klostu na i redi long helpim yumi long taim bilong bikpela hevi. – Buk Song 46:1
Dispela em i singsing bilong bilip. Man i raitim dispela song em i bilip long God, dispela God i stap bipo tru, i stap nau na bai i stap bihain taim tu. Bipo tru em i kamapim olgeta samting long dispela graun (lain 2-3). Olsem na yumi no ken pret long wanem samting i kamap; olsem graun guria, o sapos maunten i pundaun namel long solwara, o biksi i pairap strong moa, kalap nabaut na sakim ol maunten. Dispela graun i bilong God; God i wokim dispela graun.
Na dispela God i bin stap wantaim ol lain bilong em long bipo (lain 4-7). Olsem na ol taun i no inap bagarap. Maski wanem ol hevi i wok long bagarapim sios, God bai strongim dispela sios. God i save stap wantaim sios bilong em; olsem na sios i no inap bagarap.
Na dispela God bai i kam bek. Ol bikpela pait bai i kamap. “Tasol Bikpela i Gat Olgeta Strong em i stap wantaim yumi.” Ol dispela hevi i olsem lek mak bilong God, long soim olsem em bai i kam bek.
God em i strong bilong yumi! God yet em i ples hait bilong yumi! Em tasol i stap klostu long yumi, na em i redi long helpim yumi long taim bilong bikpela hevi.
Planti ol save man long tude i bilip olsem dispela graun bai bagarap bikos graun i wok long kamap hatpela tru, na ol i ting olsem bikpela tais bai i kamap bihain. Na yumi yet inap lukim ol guria na bikpela win na ol tais na ol arapela samting tu. Tasol yumi ken bilip long God. Em i stap. Em yet i bin kamapim dispela graun.
Na sios bilong God tu i gat planti hevi. Satan i laik daunim sios bilong God. Wanpela wokman bilong God, Martin Luther, i bin raitim dispela: “Sapos yumi bilip long strong bilong yumi yet, bai yumi i lus tru.”Tasol God em i strong bilong sios bilong em.
Na taim yumi tingting long wanem samting bai i kamap bihain, i luk olsem planti ol samting nogut i wok long kamap klostu klostu. Na yumi save wari liklik, tasol yumi mas bel isi tu. Maski olgeta man long dispela graun i ranawe long yumi, yumi no ken pret. God bai i kam. Klostu nau ol pait bai pinis. God yet bai rausim ol birua bilong em. “Yupela i no ken pait moa. Yupela i mas save gut long mi, mi God tru.” Stap isi. God em i God.
SAMPELA TINGTING
Yu yet yu bilipim dispela God i Gat Olgeta Strong?
Buk Song 44:17-26
Mipela i stap manmeri bilong yu, olsem na long olgeta taim ol i save kilim mipela i dai. Ol i lukim mipela i olsem sipsip bilong kilim i dai tasol. – Buk Song 44:22; Rom 8:36
Ol lain bilong God i mas karim diwai kros bilong ol inap long taim ol i kamap nupela long nupela graun. Long Olpela Kontrak ol i save mekim olsem tu. Na ol i bel hevi stret bikos i luk olsem ol man nogut i winim ol, na ol yet i karim bikpela hevi tasol.
I gat sampela pasto bai i tok olsem:“Yu kisim ol hevi bikos yu yet yu mekim sin.”Tasol taim ol poroman bilong Job i mekim dispela kain tok long em, Job i agensim tok bilong ol. Na man i raitim dispela Buk Song i no bilipim dispela tok tru: “God, mipela i no lus tingting long yu na mipela i no sakim tok bilong kontak bilong yu.”
“Nogat.” ol i tok, “Mipela i no bin mekim sin. God i slip i stap! Bikpela, yu kirap. Bilong wanem yu slip? Yu kirap. Yu no ken givim baksait oltaim long mipela.”
Nau yumi stap long Nupela Kontrak, na em i narakain taim olsem taim bilong Olpela Kontrak. Taim yumi harim dispela tok long Bikpela i slip i stap, bai yumi tingim stori bilong Luk 8, we Bikpela Jisas i slip insait long sip taim wanpela bikpela win i kamap long raunwara. Na ol disaipel i pret nogut tru na ol i go kirapim Jisas na tok, “Bikman, bikman, yumi laik lus nau.” I no olsem Krais i slip bikos em i no laikim tru ol disaipel. Nogat, em i slip long strongim bilip bilong ol.
Yumi save olsem Bikpela i stap na em i no save slip. Na yumi stap aninit long diwai kros bilong Krais. Sapos yumi laik kirap bek wantaim Krais, yumi mas redi long wanbel wantaim em na poromanim em long ol hevi tu. “Ol i lukim mipela i olsem sipsip bilong kilim i dai tasol.” Planti taim yumi save pilim dispela kain hevi tu. Tasol yumi klia tu olsem, “Maski wanem kain samting i kamap long yumi, oltaim em i save mekim yumi i win tru” (Rom 8:37).
God i stap olgeta taim, na em i no save slip. Yumi mas karim diwai kros bilong yumi, tasol yumi i win pinis – long wok bilong Krais em i bin givim bel bilong en long yumi.
Yumi mas wetim Krais, kain olsem ol tumbuna long bipo i bin wetim em. Yumi mas singaut strong: “Kam Bikpela! Yu Kam!”
SAMPELA TINGTING
Yu save singaut strong, “Kam Bikpela! Yu kam!” o nogat?
Buk Song 43
Olsem na bai mi go long alta bilong yu, God. Long wanem, yu save mekim mi i belgut na amamas. – Buk Song 43:4
I olsem Buk Song 42 na 43 i wanpela song tasol. Ating man i raitim dispela tupela song, em i stap longwe long ples bilong em yet bikos ol i rausim em long kantri bilong em. Em i stap long graun bilong birua bilong em, em i no inap bung wantaim lain bilong em, na em i no inap lotuim God long tempel.
Tasol dispela man i laikim God tru! Em i dai long wanbel wantaim God. Dispela pasin bilong bilip long God i no liklik samting long laip bilong em. Nogat. Dispela pasin bilong bilip long God i olsem as bilong olgeta arapela samting long laip bilong em; bilip em i as tru bilong laip bilong em.
Em i no isi long ritim Buk Baibel. Ol stori long Buk Baibel i kam long narapela ples na narapela taim, olsem na ol i narakain stori. Tasol tu, em i no isi long ritim Buk Baibel bikos em i pulap long ol manmeri i amamas tru long God. Ol i tingting planti long God, na bel bilong ol i pulap long amamas long God. Planti taim, taim yumi ritim ol stori long ol dispela kain man, bai yumi les liklik. Yumi les bikos yumi no save lukim dispela kain man tumas long tude.
Tasol planti manmeri long tude ol i paul stret. Ol i laik kisim God na putim em insait long laip na plen bilong ol yet. Ol i laik bosim God. Tasol i no olsem. God mas i stap olsem as bilong laip na plen bilong yumi. Em yet i mas stiaim olgeta samting long laip bilong yumi. Sapos God i no stap olsem as tru bilong laip bilong yumi, yumi mas tanim bel, na larim laip bilong yumi i kamap nupela tru.
Yumi no inap save long God na amamas tru long em sapos em i no stap namba wan long laip bilong yumi. Sapos God i no namba wan samting long laip bilong yumi, orait bihain bai yumi no gat wanpela samting.
God em i nambawan amamas stret bilong ol man i raitim ol Buk Song. Yumi mas wanbel wantaim ol na lotuim God, laikim em tru na amamas tru long em. Sapos yumi i wanbel wantaim God, bai yumi i belgut tru. Tasol sapos God i no stap insait long laip bilong yu, i olsem yu dai pinis.
Na ol lain bilong God bai i tok olsem: “Olsem na bai mi go long alta bilong yu, God. Long wanem, yu save mekim mi i belgut na amamas.”
SAMPELA TINGTING
God i stap namba wan long laip bilong yu yet?
Buk Song 42
Bilong wanem mi bel hevi oltaim? Bilong wanem bel bilong mi i kirap nogut? Mi mas bilip long God na wetim em i helpim mi. – Buk Song 42:11
Long stap tru olsem bilip lain long dispela graun, yumi mas wok long skelim laip bilong yumi yet na stretim yumi yet tu. Yumi mas autim dispela kain tok long yumi yet: “Bilong wanem mi bel hevi oltaim? Bilong wanem bel bilong mi i kirap nogut? Mi mas bilip long God na wetim em i helpim mi.”
I no longlong pasin long toktok long bel bilong yu yet. I olsem tupela man i wok long birua insait long bel bilong yumi olgeta. Wanpela i tok, “mi laik kisim,” na narapela i tok, “mi no ken.” Wanpela i bilip, na narapela i pulap long daut. Maski yu bin i stap olsem Kristen longpela taim pinis, bai dispela tupela man i wok yet long pait insait long bel bilong yu. Olsem na yumi mas stretim yumi yet.
Yumi mas skulim bel bilong yumi long wokabaut long bilip. Sapos yu laik autim tok bilong God long ol arapela, orait pastaim yu mas askim God long givim strong long yu long bosim gut laip bilong yu yet na bilong stap belgut pastaim. Yumi no ken kotim ol lain long dispela graun bikos ol i sakim tok bilong God, sapos yumi i no kotim pinis yumi yet long ol dispela kain pasin i stap insait long bel bilong yumi .
Yumi mas mekim planti wok tru bilong stretim bel bilong yumi yet. Yumi mas wok strong long skulim bel bilong yumi yet tu long tok bilong God bikos planti taim yumi no luksave long dispela tok.
Yumi mas skulim yumi yet long bilip. God i singautim yumi long stap lain bilong em. Em yet i givim yumi planti ol gutpela samting bilong Krais. Bilong wanem yumi save lus tingting long Tok bilong En? Yu mas tokim bel bilong yu yet olsem, “Bel bilong mi, yu mas pas strong wantaim God!”
God em i save lukautim ol liklik pisin. I no gat wanpela bilong ol bai i pundaun nating. Ating em bai lukautim yumi gut tu, a? Bilong wanem yumi save wari tru na bel hevi tru?
Toktok long bel bilong yu yet!
Bilip long God! Em bai givim yumi olgeta samting yumi nidim long dispela laip na long taim bilong i dai tu. Em i save givim kaikai long yumi na, moa, em i kisim bek yumi!
SAMPELA TINGTING
Bai yu stretim bel bilong yu olsem wanem long tude?
Buk Song 40:1-8
Orait nau mi tok olsem, “God, mi kam pinis, olsem bipo ol i raitim tok long mi long buk. God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.” – Buk Song 40:7-8
Dispela em i tok bilong King Devit taim em i kamap olsem king bilong Israel. Em i namba tu king bilong Israel. God i rausim pinis namba wan king, Sol. Sol i tingting olsem, “Sapos mi mekim ofa long God, mi inap sakim tok bilong God.”Tasol God i tok olsem,“Pasin bilong bihainim tok bilong mi, em i nambawan pasin tru. Na pasin bilong ofaim ol gutpela abus long mi, em i namba 2 tasol” (1 Sam 15:22).
Tasol taim Devit i kamap king, em i tok, “Ol ofa...yu no save laikim...God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.”
I luk olsem Devit i paul liklik long tok bilong em. God i no bin tok olsem em i no laikim ol ofa. Tasol God i soim klia olsem em i les long ol ofa ol man i mekim taim ol i les long bihainim Tok bilong em. Taim man em i mekim dispela kain pasin, God em i belhat tru.
Tasol dispela tok bilong Devit i olsem tok profet. Narapela King i kamap bihain long Devit, na em inapim ol dispela tok profet. Taim dispela King – Jisas – i kam long dispela graun, em i tok, “Yu no laik bai ol i kilim abus na mekim ofa....Orait nau mi tok olsem, God, mi kam pinis... bilong bihainim laik bilong yu” (Hibru 10:6-7).
Dispela tok i putim ples klia olsem Devit i tok stret: God i les long ol ofa taim man i les long bihainim laik bilong em. Tasol moa, tok bilong Jisas i putim ples klia olsem God na man i no inap kamap wanbel long pasin bilong ol dispela kain ofa. Dai bilong Jisas tasol inap mekim olsem. Olgeta arapela ofa i no inap; dai bilong Jisas inap tru olgeta.
Krais em i man bilong bihainim laik bilong God. Long bihainim laik bilong God, Krais em i ofaim em yet long God. Ofa bilong em yet i samting bilong bihainim God. Na bikos long wok bilong Krais yumi yet i ken mekim wok bilong God long laip bilong yumi wan wan. Yumi tu i mas bihainim laik bilong God: “Lo bilong yu i stap insait long bel bilong mi.” Olsem tasol bai yumi daunim yumi yet aninit long God, na dispela em i olsem ofa bilong yumi i go long God.
SAMPELA TINGTING
Yu yet yu inap autim dispela tok tu, “Lo bilong yu i stap insait long bel bilong mi, a?”
Buk Song 32
Bikpela i tok olsem, “Mi laik skulim yu gut na soim yu long rot yu mas wokabaut long en. Bai mi skulim yu na lainim yu.” – Buk Song 32:8
Sios bilong Krais i laikim tru dispela Buk Song. Taim Devit i raitim dispela Buk Song, Krais i no bin kamap yet long dispela graun, na ol lain bilong God i no klia olgeta long pasin bilong kamap stretpela long ai bilong God long wok bilong Jisas. Tasol maski Jisas i no bin dai yet, dispela buk song i autim tok bilong pasin bilong God bilong rausim sin bilong yumi. Pol tu em i laikim tru dispela Buk Song (Rom 4:6-8).
Buk Song 32 i soim klia olsem God i save rausim sin bilong yumi long marimari tasol. Na tu i soim olsem yumi mas autim ol sin bilong yumi. Taim Jisas i no kamap yet long dispela graun, ol dispela tok tru i stap pinis.
Long laspela hap bilong dispela song, wanpela tisa i toktok. Yumi no save sapos em i wanpela papa, mama, hetman o pasto, tasol dispela man o meri i autim tok bilong God yet. God em i save yusim ol manmeri olsem mausman bilong autim tok bilong em yet. Na dispela tisa i tok olsem: “Mi laik skulim yu gut na soim yu long rot yu mas wokabaut long en. Bai mi skulim yu na lainim yu.”Yu autim ol sin bilong yu pinis, na God i rausim sin bilong yu, olsem na yu mas lainim pasin bilong bihainim Tok bilong mi long laip bilong yu: “Bai mi skulim yu na lainim yu.”
Dispela skul em i no samting bilong kisim save tasol; em i samting bilong lainim pasin bilong bihainim Bikpela long dispela graun: “Bai mi soim yu long rot yu mas wokabaut long en.”
Yumi mas redi long harim tok bilong God. Em i rausim sin bilong yumi, olsem na yumi mas harim Tok bilong em. Na God i gat laik long skulim yumi long taim yumi go long sios, long haus lotu. Em i wanpela bikpela rot we God i save skulim yumi na lainim yumi. Olsem na yumi mas strong long go long lotu, bilong harim Tok bilong em.
God i rausim sin bilong yumi, na yumi olgeta i nidim skul. Husat i tisa bilong yu yet?
SAMPELA TINGTING
Bai yu askim God long skulim yu long wanem ol samting?
Buk Song 27
Yu tokim mi olsem, ‘Yu kam long mi.’ Orait Bikpela, bai mi go long yu. Yu no ken haitim yu yet long mi. – Buk Song 27:8-9
I luk olsem dispela Buk Song i gat tupela hap. Namba wan hap i pulap long bilip, na namba tu hap i autim ol wari na hevi na daut. Sampela lain i ting olsem pastaim dispela song i olsem tupela song, na bihain ol i bungim dispela tupela song i kamap wanpela song tasol. Tasol maski; dispela tupela kain samting i save kamap long laip bilong ol Kristen. Bilip na daut i save kamap klostu klostu long laip bilong ol manmeri i bilip long God. Pasin bilong litimapim nem bilong God na pasin bilong pret tu, i save kamap klostu klostu long laip bilong ol Kristen.
Taim yumi wok long go long God long taim bilong hevi, taim yumi wok long askim God long strongim bilip long yumi, bai yumi klia olsem God yet em i helpim na lait bilong yumi. Na dispela man i raitim dispela Buk Song i bin mekim olsem. Em inap autim bilip bilong em long namba wan hap long dispela Buk Song bikos em i wok long go long God long taim em i gat ol hevi na wari. Ol lain bilong God i mas save gut long pasin bilong daunim ol yet aninit long God, bilong kisim strong bilong em na bilong sanap strong long bilip.
God i tokim dispela man, “Yu kam long mi.” Na dispela man i autim wankain tok i go bek long Bikpela, “Orait, Bikpela, bai mi go long yu.”
Prea em i samting bilong bekim tok bilong God. Prea em i no samting nating. I no olsem taim yumi prea, ol prea bilong yumi i kamap olsem win na flai i go. Nogat, long prea yumi i save bekim tok bilong God, na God i harim.
God i tok,“Yu kam long mi.”Bekim i olsem:“Orait, Bikpela, bai mi go long yu.”Tasol bihain long taim dispela man i autim dispela tok, wantu em i autim dispela narapela tok: “Yu no ken haitim yu yet long mi.” Man i raitim dispela song, em i save olsem God em i gat rait long haitim em yet long em. Em i save olsem em i man bilong mekim sin. Tasol God i strongim em taim em i autim dispela tok, “Yu kam long mi.” Na bikos God i tokim dispela man long painim em, em i wok long painim, na em i tokim God long no ken haitim em yet long em. Long go klostu long God, yumi gat wok long painim em.
“Bai mi go long yu.”Yumi no prea bilong kisim liklik samting long God. Nogat. Yumi prea bilong kisim God yet!
SAMPELA TINGTING
Yu save wok long painim God long laip bilong yu yet?
Buk Song 25:1-7
God, yu no ken tingting moa long sin na pasin nogut mi mekim taim mi yangpela yet. Yu God bilong sori na yu gutpela oltaim. Yu ken tingting long mi na marimari long mi. – Buk Song 25:7
Ol dispela Buk Song i olsem ol prea tu. Taim yumi ritim ol Buk Song, God i skulim yumi long pasin bilong lotu na prea.
Long lain 1 i go long 7 long Buk Song 25 i olsem wanpela naispela prea stret long yumi ken bihainim. Pastaim dispela man i raitim dispela song i askim God long kisim bek em long han bilong ol birua bilong em: “Yu no ken larim ol birua i daunim mi na ol i amamas.” Na bihain em i askim God long stiaim em: “God, yu mas skulim mi long gutpela pasin bilong yu, na soim mi long rot bilong yu.” Na bihain long dispela em i askim God long rausim sin bilong em: “God, yu no ken tingting moa long sin na pasin nogut mi mekim taim mi yangpela yet.”
Dispela man i raitim dispela Buk Song i save tru olsem em i pulap long sin. Em i no wok long haitim sin bilong em long God o long em yet. “Ol pasin nogut mi mekim taim mi yangpela yet” – ol dispela sin i isi tru long mekim. Taim man i yangpela yet, em i no tingting tumas taim em i mekim sampela samting. Tasol pasin bilong yumi long mekim sin em bai i go inap long taim yumi dai.
Planti lain bilong yumi no save tru long ol sin bilong yumi. Sampela taim yumi wok long haitim ol sin bilong yumi yet tu. Tasol yumi no ken mekim olsem. Yumi mas redi long tok tru long sin bilong yumi, na autim ol sin bilong yumi long God.
“No ken tingting moa long sin bilong mi,” man i raitim dispela song i tok. Na bihain em i tok, “Yu ken tingting long mi.” Em i save olsem God bai mekim olsem long em, bikos, “Bikpela i gutpela.”
“Yu God bilong sori... yu ken tingting long mi.” Dispela man nogut ol i bin hagamapim wantaim Jisas long diwai kros, em i autim tok i klostu wankain long dispela tok: “Jisas... yu ken tingting long mi.” Na Jisas i harim tok bilong em.
Na yumi tu, yumi mas bilipim God na prea strong tru long em. Yumi mas askim em long lusim sin bilong yumi na long tingting long yumi. Jisas i dai long yumi na em i kirap bek. Olsem na yumi mas askim God long lusim sin bilong yumi na marimari long yumi tu. Olsem na yumi save askim ol samting long beten “long nem bilong Jisas.”
SAMPELA TINGTING
Autim lain 1 i go long 7 bilong dispela Buk Song olsem prea bilong yu yet.
Buk Song 24
Yupela dua, yupela op. Yupela dua bilong bipo tru, yupela op bikpela, bai nambawan king i ken i go insait. – Buk Song 24:7
Long namba wan hap bilong dispela Buk Song, i olsem olgeta samting long dispela graun i stap na wetim masta bilong ol. Na long namba tu hap bilong dispela Buk Song, dispela askim i kamap: “Husat inap i go antap long maunten bilong God? Husat inap i go insait long haus bilong em yet?” Na long namba tri hap i olsem yumi harim ol manmeri i singsing strong bikos dispela “nambawan king” i go insait long haus bilong en.
Yumi no inap klia wanem taim dispela man i raitim dispela Buk Song, na yumi no inap klia bilong wanem em i raitim dispela Buk Song, na yumi no inap klia long tingting bilong ol manmeri taim ol i autim dispela song tu. Tasol yumi ol Kristen lain, taim yumi i ritim dispela Buk Song yumi bai tingting long taim Bikpela Jisas i go antap long heven.
Em i go antap long heven. Namba wan hap bilong wok bilong em i pinis. Em yet i dispela man “i no mekim pasin nogut, na bel bilong en i klin” (Buk Song 24:4). Na em yet i go insait long haus bilong God. Na em i mekim olsem bilong helpim yumi. Yumi save, na yumi bilip olsem, em yet i win. Em i winim sin, na yumi no stap wokbai bilong sin moa. Dai i no inap bagarapim yumi moa. Jisas bilong yumi em i Bikpela. Em i stap long sia king bilong God,
na God Papa i kisim em, na ol ensel i lotuim em, na ol manmeri bilong em i laikim em tru. “Yupela dua, yupela op. Yupela dua bilong bipo tru, yupela op bikpela, bai nambawan king i ken i go insait.”
Buk Song 24 em i olsem pati bilong selebretim dispela taim we Jisas i go antap long heven. Dispela Jisas em i laikim yumi tru, na em i bosim yumi tu. Jisas i stap long sia king. Marimari na strong na pawa i bung wantaim. Tasol Jisas, na laikim tru na pawa bilong em, i winim stret olgeta arapela samting.
Em i taim bilong namba tu hap bilong wok bilong Jisas nau, em i wok bilong em long heven. Heven na graun i wok long bung. Krais i stap long heven; Spirit bilong em i stap long dispela graun.
Yupela dua, yupela op! Bel bilong yumi mas op tu! Olgeta samting long dispela graun bai lukim glori bilong Bikpela.
SAMPELA TINGTING
Jisas i stap long sia king bilong em long heven. Dispela i gat wanem mining insait long laip bilong yu tude?
Buk Song 23
Bikpela em i wasman bilong mi. Olsem na mi no inap sot long wanpela samting. – Buk Song 23:1
Long planti yia i go pinis i kam inap long tude, dispela Buk Song i winim olgeta wok bilong olgeta dokta bilong rausim pen bilong ol manmeri, na i winim olgeta save bilong dispela graun long givim bel isi long ol manmeri.
Devit i raitim dispela Buk Song, na pastaim em yet i stap olsem wanpela wasman. Taim em i bin lukautim ol sipsip bilong em, Devit em i kisim save olsem em yet i gat wanpela wasman i stap tu. Olsem na em i raitim dispela lain long kirapim dispela song: “Bikpela em i wasman bilong mi.” Bikos Bikpela i nambawan wasman tru, Devit i raitim dispela samting tu: “Olsem na mi no inap sot long wanpela samting.”
Na dispela tok long wanpela wasman, em i kamap planti taim moa long Buk Baibel, na dispela tok piksa bilong wasman em i naispela tok piksa stret.
Jisas yet i yusim dispela tok piksa tu. Em i autim dispela stori long wanpela sipsip i lus, na wasman bilong sipsip i bin karim em i go bek long haus bilong en. Na moa, Jisas i tok, “Mi yet mi gutpela wasman bilong ol sipsip.” Olsem na em i soim klia olsem em yet i wasman bilong yumi olgeta.
Na dispela tok piksa long wasman bilong sipsip i kamap bikpela moa yet long Kamapim Tok Hait 7. Long hia i olsem wasman bilong sipsip i kamap olsem pikinini sipsip yet: “Pikinini Sipsip i stap namel tru long sia king, em bai i stap wasman bilong ol” (Kamapim Tok Hait 7:17). Em yet i bin wokabaut long ples nogut na bikpela tudak (Buk Song 23:4). Na dispela tok, “olsem na mi no inap sot long wanpela samting,” i gat bikpela mining moa tu: “Ol bai i no hangre moa, na nek bilong ol bai i no drai gen. San bai i no inap boinim skin bilong ol, na i no gat wanpela samting bai i mekim skin bilong ol i hat nogut tru” (Kamapim Tok Hait 7:16).
Olsem na yumi bai amamas long singim dispela Buk Song 23, na yumi bai bilipim tok insait long dispela Buk Song, inap long taim olgeta sipsip bilong God ol i tait tru, ol i stap pinis long malalo bilong Bikpela.
SAMPELA TINGTING
Yu save amamas bikos Bikpela em i wasman bilong yu? Yu bilipim tok bilong God long dispela Buk Song?
Buk Song 22:22-31
Bai mi autim tok long ol brata bilong mi long strongpela wok yu bin mekim. Taim ol i bung bilong lotu bai mi go namel long ol na litimapim nem bilong yu. – Buk Song 22:22 (Hibru 2:12)
Buk Song 22 em i olsem song bilong Jisas. Namba wan hap em i olsem krai bilong em long diwai kros, na namba tu hap i olsem singsing bilong em long Ista moning.
Long taim san i kamap long Ista moning, ol lain bilong God i krai i stap. “Pastaim mipela i bin bilip olsem, Jisas em dispela man God i makim bilong kisim bek ol manmeri bilong Israel” (Luk 24:21). Pastaim mipela i bilip... dispela em i kain tok yumi save autim taim bilip bilong yumi i bagarap. Ol disaipel i ting olsem God yet i givim baksait long Jisas. Ol i ting olsem birua bilong ol i win. Na moa, ol i ting olsem dai i win tu.
Tasol Jisas i stap laip! God i kirapim em. I luk olsem olgeta samting i lus pinis, tasol nogat, ol lain bilong God i winim planti samting pinis. Sin na dai i no win; Jisas yet i winim ol. God i senisim ol krai i kamap lap. God bai inapim olgeta promis bilong em olgeta taim. Em i tru olgeta, na yumi lukim dispela long dai bilong Jisas na long taim em i kirap bek long matmat.
Long Ista Sande, klostu long tudak, Jisas i go kamap namel long ol disaipel bilong em. Em
i skulim yumi long wanpela nupela singsing. Dispela nupela singsing inapim Buk Song
22. “Olgeta samting bipo ol i raitim long mi long....Buk Song, dispela olgeta samting i mas kamap tru” (Luk 24:44). Buk Song 22 em i naispela song stret taim yumi i singim bihain long Ista.
Long Ista Sande, Jisas i kirapim wok bilong em bilong bungim ol lain bilong God. Na long Tok na Spirit bilong em, em i wok long mekim olsem olgeta de inap i kam long tude. “Olgeta manmeri bilong graun bai ol i tingting long God, na bai ol i kam bek long em. Olgeta lain manmeri bai i lotu long em. Long wanem, Bikpela i stap king na em i bosim olgeta lain manmeri” (Buk Song 22:27-28).
Jisas i sanap strong long ol hevi em i bungim inap long dai bilong em. Long dispela pasin em inapim namba wan hap bilong Buk Song 22. Tasol nau em i wok long bungim ol lain bilong em. As bilong dispela em i kirap bek bilong em yet. Na taim em i mekim olsem, em i wok long inapim namba tu hap bilong dispela Buk Song tu.
SAMPELA TINGTING
Ritim lain 22-31 gen olsem prea bilong yu long wok bilong Jisas.
Buk Song 22:1-11
God bilong mi, God bilong mi, bilong wanem yu lusim mi? – Buk Song 22:1
Dispela em i krai bilong wanpela stretpela man. Em i bilipim God, taim mama i karim em na i kam inap long nau. Tasol nau em i pilim olsem God i lusim em. God i no harim em. Planti birua i ranim em na ol i laik bagarapim em. Ol i olsem ol bulmakau man na ol laion na ol dok na ol wel bulmakau.
Dispela em i bikpela hevi stret na i winim ol arapela hevi ol Kristen lain i save bungim. Ol i bilipim God. Ol i mekim ol stretpela pasin. Na ol i tok,“Mi bilip long God.”Tasol i luk olsem dispela God i no inap helpim ol.
Na wanpela bikpela hevi bilong ol em i dispela pasin bilong ol birua bilong tok bilas na sutim bel bilong ol. Ol birua i lap na i ol tok, “Yu save bilip long God. Bilong wanem em i no helpim yu na kisim bek yu?” Long dispela tok dispela man i krai, “God bilong mi, God bilong mi, bilong wanem yu lusim me?”
Jisas em i wanpela stretpela man olgeta. Em i bilipim God, na em i holim strong God long olgeta de. Taim em i gat 12-pela krismas tasol em i tok, “Mi mas i stap long haus bilong Papa bilong mi.” Na taim em i bikpela moa liklik em i tok, “Kaikai bilong mi, em long bihainim laik bilong God.” Jisas em i go long diwai kros bikos em i laik bihainim laik bilong God tasol.
Taim Jisas i hangamap long diwai kros em i tingim Buk Song 22. I olsem dispela Buk Song i kamap olsem song bilong em yet. God i larim ol birua i bagarapim em, na ol i tok bilas long em na sutim bel bilong em: “Em i bilip long God...Orait, sapos God i laikim em, God i ken helpim em nau” (Matyu 27:43). Taim tudak i karamapim graun, Krais i singaut strong na em i krai, “God bilong mi, God bilong mi, bilong wanem yu lusim mi?”
Tasol, taim Krais i autim dispela krai pinis, ol hevi bilong em (na bilong yumi) i klostu pinis. Long wanem, dispela krai bilong Jisas em i bekim olgeta krai bilong yumi yet. God i bekim ol krai bilong olgeta lain bilong em, long diwai kros, long dispela dai bilong Jisas.
SAMPELA TINGTING
Sampela taim yu save pilim olsem God yet i lusim yu? Wanem samting i save helpim yu long kain taim olsem?
Buk Song 16
Yu yet bai yu soim mi rot bilong kisim laip. Yu stap klostu long mi na mi save amamas moa yet. Yu save helpim mi na bel bilong mi i amamas oltaim oltaim. – Buk Song 16:11
Planti ol gutpela papamama na pasto bai i tokim ol yangpela Kristen olsem ol Kristen lain i save bungim ol hevi tu. Laip bilong ol Kristen i no samting bilong amamas olgeta taim. Yumi mas daunim yumi yet, na yumi bai kisim pen. Em i no isi long stap olsem wanpela Kristen, na yumi mas bihainim tok bilong God, na i no isi long mekim olsem.
Em i gutpela long harim dispela tok lukaut. Em i gutpela bikos planti lain i gat laik long amamasim ol yet, na ol i no tingting tumas long kisim hevi taim ol i kamap Kristen. Na nogut ol pasto i tokim ol Kristen olsem ol bai i stap amamas olgeta taim.
Tasol nogut yumi harim toktok long ol hevi yumi bai bungim bikos yumi stap olsem wanpela Kristen tasol.
Krais em i save givim amamas long yumi. Na God em i amamasim yumi tu. Devit em i save olsem, “Yu Bikpela bilong mi. Olgeta gutpela samting mi holim, i kam long han bilong yu tasol.”
Buk Song 16 em i gat ol naispela tok stret. Na taim yumi save long wok bilong Jisas long Nupela Kontrak, dispela tok em i naispela moa yet! Jisas i save givim dispela amamas long yumi. Dispela tok i stori long kirap bek bilong Jisas: “Bai yu no larim mi i go i stap long ples bilong ol man i dai pinis. Na bai yu no larim man bilong yu yet i sting long matmat” (lain 10). Jisas em i rot bilong laip – dispela rot em i go long amamas bilong God Papa (Aposel 2:25- 31).
Olsem na, Buk Song 16 i soim yumi olsem Jisas yet bai i givim amamas long yumi. Yumi mas klia long dispela. Jisas em i rot i go long laip. Em i rot bilong amamas. Dispela em i laip tru. Stap wantaim Krais i olsem laip tru. Olsem na bel bilong yumi ken amamas moa yet.
Em i tru olgeta: dispela laip i pulap long amamas, na bihain long dispela laip, dispela amamas bilong yumi bai i go antap moa yet.
SAMPELA TINGTING
Yu pilim dispela amamas bilong stap wantaim Krais long laip bilong yu?
Buk Song 14
Ol longlong man i save tok long ol yet olsem, ‘I no gat God i stap’...I no gat wanpela bilong ol i save mekim gutpela pasin. Nogat tru. – Buk Song 14:1,3
Ol longlong man ol i no save tingting long God. Ol i tok, “I no gat God i stap.” Bel bilong ol i paul olgeta. Ol i pulap long sin; ol i save mekim kain kain pasin nogut. Kain olsem bilip i gat ol gutpela kaikai bilong en, ol lain i no bilip i save kamapim ol kaikai nogut. Taim man i no pas wantaim God, em bai i mekim ol pasin nogut. Na em i tru, sampela lain i no bilip ol bai
i mekim sampela ol gutpela samting tu, tasol yumi ken tok olsem, taim ol manmeri i wok long stap longwe tru long God, pasin nogut bilong dispela lain bai i kamap bikpela moa, na ol tumbuna bilong ol bai mekim planti moa pasin nogut, ol pasin God yet i no laikim.
I luk olsem dispela Buk Song i wok long tok nogut long ol lain i no bilip. “Bikpela i stap long heven na i lukluk i go daun long ol manmeri. Em i laik painim sampela man i gat gutpela save na ol i wok long painim God. Tasol nogat.” I olsem King bilong heven na graun i lukluk i go daun long ol lain i no bilip.
Tasol yumi mas ritim sampela moa tok long dispela Buk Song. God em i lukluk long yumi tu: “Olgeta i lusim gutpela rot pinis. Olgeta i wankain tasol, ol i man nogut tru. I no gat wanpela bilong ol i save mekim gutpela pasin. Nogat tru.” Man i raitim dispela Buk Song i soim yumi olsem, long ai bilong God olgeta manmeri i pulap long sin.
Na Pol, long Rom 3, i gat dispela kain tingting tu. Em i autim dispela Buk Song long putim ples klia olsem olgeta manmeri long dispela graun i pulap long sin, na olgeta i nidim gutnius bilong Jisas Krais. Yumi olgeta i sin lain stret!
Yumi no ken amamas long belhat bilong God long ol longlong man i no bilip, bikos yumi olgeta i no save mekim gutpela pasin. Olsem na, man i raitim dispela Buk Song i tok, “Mi laikim tumas bai God i salim wanpela man bilong Saion i kam bilong kisim bek ol Israel.”
Olsem na Matyu 1:21 i tok, “Bai em i karim pikinini man, na yu mas kolim nem bilong en Jisas, long wanem, em bai i lusim sin bilong ol manmeri bilong en na kisim bek ol.” Olgeta manmeri bilong dispela graun i nidim Jisas long kisim bek ol long sin bilong ol. Olgeta!
SAMPELA TINGTING
Tingting long ol sin bilong yu yet, na tok tenkyu long God bikos em i salim Jisas long kisim bek ol manmeri bilong em.
Buk Song 13
Bikpela, wanem taim bai yu tingim mi gen? Ating yu lus tingting long mi inap oltaim, oltaim, a?...Tasol mi bilip bai yu marimari long mi oltaim. – Buk Song 13:1,5
Fopela taim Devit i autim dispela tok long God: “Wanem taim?” Em i autim dispela tok bikos em i ting olsem God yet i lus tingting long em. I olsem God i haitim pes bilong em yet long Devit. Em i no rausim pen bilong Devit, na em i larim Devit i stap aninit long ol birua bilong em. “Wanem taim, Bikpela?”
Ating yu yet yu bin autim dispela tok long God, “Wanem taim?” Sapos nogat, nogut yu no klia long ol promis bilong God. God yet i tok olsem em yet bai harim olgeta krai bilong yumi. Em i promisim yumi olsem em bai apim ol lain bilong em; taim yumi paitim dua em bai opim long yumi; taim yumi wok long painim samting, yumi bai lukim. Kingdom bilong God i kamap klostu nau. Wanem taim?
Pasin bilong wet, em i bikpela samting long laip bilong ol Kristen. Em i no wankain olsem taim yumi i wetim dokta long haus sik o taim yumi wetim bas long taun. Nogat, yumi wetim God. Yumi mekim wok long dispela graun bikos yumi wetim em, bikos yumi bilip olsem em bai inapim olgeta promis bilong em.
Taim yumi i krai, “Wanem taim?” i olsem yumi les long wet. Na nogut sampela daut i stap long bel bilong yumi tu: God em i sori yet long yumi, o nogat? God em i harim ol krai bilong yumi, o nogat? Em bai i kam, o nogat?
Dispela pasin bilong daut i bin i stap longpela taim – taim Devit i raitim dispela Buk Song, daut i stap tu. Olgeta bilip lain i bin dautim promis bilong God sampela taim.
Em i orait long yumi i autim dispela daut, tasol wantu yumi mas wok long bekim dispela daut. Wantaim bilip yumi mas bekim dispela daut. Bilip i wok long paitim daut. Bilip bai tok, “Mi trustim God olgeta taim, long taim bilong tudak tu. Sapos em i no kam hariap, em olsem em i mekim sampela gutpela samting moa long mi.”
Em i tru olsem planti ol Kristen lain i gat sampela daut, tasol pasin bilong dautim God em
i longlong tru. I gat planti ol liklik sik long dispela graun olsem liklik kus, tasol maski olsem planti lain i save kisim kus, em i wanpela sik yet. Kain olsem, pasin bilong daut em i sin, maski olgeta Kristen lain i save mekim olsem, na yumi mas wok strong long rauism dispela daut long bel bilong yumi. Dispela Buk Song tu i pinis long bilip: “Tasol mi bilip bai yu marimari long mi oltaim.”
SAMPELA TINGTING
Yu gat sampela daut long bel bilong yu? Wanem samting i save strongim yu?
Buk Song 12
Olgeta man i save giaman long ol arapela man. Ol i save tok gris long ol na trikim ol...Tok bilong God i tru olgeta. – Buk Song 12:2,6
Planti tok bilong yumi ol man em i tok nogut, na God i belhat long ol dispela tok. Dispela Buk Song i stori long kain kain tok nogut: giaman; dispela tok i no tru, na tok gris; dispela tok i wok long grisim ol arapela man, maski em i tru o nogat.
Tok giaman i wok long bosim olgeta lain long dispela graun. Tok giaman i wok long bagarapim yumi na yumi i no inap wanbel wantaim ol arapela. Yumi no inap bilipim ol arapela.
Pasin bilong bagarapim tok i bin kamapim planti hevi long taim bilong Devit. Tasol long tude, hevi bilong dispela sin i wok long kamap bikpela moa yet. Planti tok i save raunim yumi, tasol planti bilong ol dispela tok i tok giaman tasol. Long internet, long niuspepa, long radio, na long tv yumi save harim planti ol giaman tok. God i makim pasin bilong toktok olsem rot yumi ken yusim bilong helpim yumi i stori wantaim ol arapela, tasol ol man i wok long bagarapim toktok. Ol i wok long tok giaman, long grisim ol man long tok bilong ol, long apim nem bilong ol yet. Gavman i wok long mekim olsem, ol jas i wok long mekim olsem, ol sumatin i wok long mekim olsem, ol tisa i wok long mekim olsem na ol polis tu i wok long mekim olsem. Tarangu, iven sampela pasto i mekim olsem tu.
Jems 3:8 i tok, “Tasol i no gat wanpela man inap long bosim maus bilong em yet. Nogat. Oltaim maus i save kirap nabaut na mekim tok nogut. I olsem marasin bilong kilim man i dai i pulap long maus bilong yumi.” Em i hat tru long ol Kristen lain long bosim gut maus na tok bilong ol tu. Tasol yumi mas tok “yes” na “nogat” tasol. Em inap. Ol lain bilong God i mas les long tok giaman!
Maski ol lain bilong dispela graun i wok long tok giaman na tok gris, yumi yet i ken kisim gutpela save long pasin bilong God bikos tok bilong God em i tru na tru olgeta!
SAMPELA TINGTING
Em i hat long bosim gut maus bilong yu yet, o nogat? Yu save les long tok giaman o nogat?
Buk Song 9:11-20
Bikpela, yu mas mekim ol i pret nogut. Yu mas mekim ol lain manmeri i pilim olsem ol i sam- ting nating tasol. – Buk Song 9:20
Sapos ol man bilong dispela graun i laik i stap bel isi na sindaun gut, ol i mas bihainim stret ol gutpela pasin. Na bikpela samting insait long ol dispela gutpela pasin i olsem: Ol i mas save olsem God yet i bosim ol na em i antap tru, na ol yet i aninit long em. “Bikpela, yu mas mekim ol i pret nogut. Yu mas mekim ol lain manmeri i pilim olsem ol i samting nating tasol.”
Dispela tok em i olsem prea long kisim gutpela sindaun na bel isi i kam long dispela graun. Gutpela taim o bel isi i save kamap taim man i binhaimim stret ol gutpela pasin tasol. “God i save mekim stret olgeta wok bilong em. Em i no save mekim ol samting i paul nabaut” (1 Korin 14:33).
Dispela kingdom bilong dispela Mesaia em i kingdom bilong kisim gutpela taim na stap
bel isi. Tasol God i makim dispela taim olsem taim bilong lotuim God, na long laikim tru ol arapela. Na no ken lotuim ol narapela samting – ol dispela samting i stap bilong yusim tasol, na i no bilong lotuim. Dispela em i pasin bilong bihainim stret ol gutpela pasin; dispela em i pasin bilong kisim gutpela sindaun na stap bel isi.
Yumi no inap kisim dispela sindaun gut o stap bel isi tru inap long taim olgeta lain bilong dispela graun i wok long bihainim stret ol gutpela pasin God yet i makim. Olgeta manmeri long dispela graun i mas klia olsem ol i man tasol, na God em i God!
Pasin bilong litimapim nem bilong yumi yet na pasin bikhet em i save kamapim planti sin. Sapos yumi les long brukim skru long God na aninit long em, i olsem yumi i bikhet stret. Maski yu save mekim gutpela pasin, sapos yu no brukim skru long God i olsem yu bikhet na yu bai i go long hel. Yumi man, yumi i samting nating tasol.
Tasol pasin bilong daunim yumi yet na aninit long Bikpela em i narakain samting olgeta. Em i olsem dua i op i go long God. Olsem na sampela taim ol yangpela pikinini inap long painim God na lukim em, tasol ol bikman nogat.
Tasol God i wok long daunim olgeta lain bilong dispela graun bilong ol i ken aninit long em. Em i wok bilong God yet. Na em i narakain wok stret: Man i pundaun long sin bikos em i gat laik long kamap wankain olsem God. Na bihain God i kam long yumi na kisim bek yumi long wok bilong Krais – taim God yet i kamap olsem man long dispela graun. Na rot bilong kisim bel isi na gutpela taim stret, em i rot i go long wanpela bebi – dispela bebi long Betlehem
– Jisas Krais! Olgeta lain bilong dispela graun, ol i wok long litimapim nem bilong ol yet, ol i mas kam long dispela bebi na brukim skru long em na lotuim em. Long dispela rot tasol bai yumi kisim bel isi stret insait long kingdom bilong God.
SAMPELA TINGTING
Askim God long helpim yu long daunim yu yet na aninit long em tasol.
Buk Song 8
Mipela man i wanem samting na yu save tingting long mipela? Mipela i samting nating...yu putim mipela i stap aninit long yu wanpela tasol. – Buk Song 8:4-5
Wanpela man i holim kamera na em i stap antap long wanpela bikpela maunten stret. Yu yet yu wokabaut daunbilo tru long ples bilong yu, longwe tru long em. Na sapos em i kisim piksa long yu, yu bai luk olsem wanpela liklik anis tasol. Tasol sapos yu yet yu sanap klostu long em antap long dispela maunten na em i kisim piksa long yu, bai i luk olsem yu bikpela stret na bikpela moa long ol liklik samting daunbilo tru long maunten. Olsem na, long namba wan piksa i luk olsem yu liklik tru, na long namba tu piksa i luk olsem yu bikpela tru.
Na dispela em i kain olsem yumi ol man, taim Buk Baibel i stori long yumi: Ol man i liklik tru – tasol ol i bikpela tru tu. Taim yu tingting long wanem samting i stap antap long man, i olsem man em i liklik tasol. Tasol God i putim olgeta samting i stap aninit long man. Taim yumi tingting long wanem samting God i putim aninit long man, i olsem man em i bikpela stret.
Olsem na, taim yumi harim wanpela man i apim nem bilong em yet, yumi mas tingting long wanem samting i stap antap long em. Yumi mas tingting long glori bilong God o long skai em i bikpela tru, na yumi bai klia olsem dispela man em i liklik tasol. Na yumi mas les long dispela pasin. Man em i samting nating – bilong wanem na em i apim nem bilong em yet?
Tasol taim yumi lukim ol man i lotuim ol samting bilong dispela graun – olsem mani, o kago, o biknem bilong ol yet – yumi mas les long dispela pasin tu. Man em i bikpela. God yet i putim em aninit long em yet tasol. Tasol taim ol man i lotuim ol narapela samting, na ol i no lotuim God, em i olsem ol i wokboi nating long ol samting bilong dispela graun, na yumi mas sori long ol.
Olsem na yumi mas wok long bihainim rot Buk Baibel i bihainim taim yumi tingting long man em i husat. Na yumi mas wok long bihainim tok bilong God taim yumi mekim wok long dispela graun.
Yumi stap aninit long dispela God em i holi na em i gat olgeta strong. Olsem na yumi i liklik tasol. Yumi stap laip long marimari bilong em tasol, na em yet i givim olgeta samting long yumi. Yumi no gat rait long kamapim ol lo bilong yumi yet. Yumi nidim Holi Spirit bilong bihainim ol lo bilong God. Na tu, ol lain bilong Bikpela, ol i bikpela samting stret. Ol i pikinini bilong God yet, olsem na ol i no ken kamap olsem wokboi nating bilong ol samting i stap long dispela graun.
SAMPELA TINGTING
Ritim lain 4 na 5 long dispela Buk Song gen, na autim dispela tok olsem prea bilong yu i go long God.
Buk Song 6
Ol man i dai pinis, ol i no save tingim yu. Long ples ol i stap long en, ol i no save givim biknem long yu. – Buk Song 6:5
Taim dispela man i raitim Buk Song 6, em i gat bikpela hevi stret; em i pilim olsem klostu em bai dai. Tasol em i askim God long oraitim em bikos long ples bilong dai ol man i no save tingim God o givim biknem long em.
Long dispela prea bilong em, dispela man i soim klia olsem em i save long wanpela samting: yumi stap laip bilong presim God tasol. Glori bilong God em i nambawan samting long laip bilong yumi. Tasol sapos yumi i dai pinis, hau bai yumi autim tok, singsing, na presim God? Olsem na man i raitim dispela buk song, em i laik stap laip yet bilong litimapim nem bilong God.
Nogut yumi tok, “Aiyo, dispela man em i paul olgeta long taim bilong dai.” Pastaim yumi mas save olsem em i tok stret long taim bilong stap laip. Man i raitim dispela Buk Song, em i save olsem pasin bilong stap laip i bilong presim God; olsem na em i les long dai. Ol Kristen lain i no ken lus tingting olsem dai em i birua bilong yumi na birua bilong God tu. I no olsem taim bilong dai tasol i makim taim bilong kirapim ol singsing bilong presim God. Dispela tingting em i paul bikos nau em i taim bilong presim God, taim yumi stap laip yet.
Yumi mas klia, sapos dispela man i raitim Buk Song 6 i harim olsem Jisas yet i kirap bek long matmat long de namba tri, em bai i tok, “Hallelujah! Pasin bilong presim God bai i go i go nau, bikos laip bai i go i go na stap oltaim oltaim.”Tasol em i no save olsem Krais bai i kirap bek long matmat. Tasol yumi save, bikos Jisas i kam pinis na em i wok long strongim sios bilong em i stap. Na Krais i tok olsem em i winim dai, na pawa bilong hel na dai i no inap bagarapim sios bilong em.
Sios bilong God i sanap long dispela wok bilong Krais bilong kirap bek long matmat. Olsem na yumi no ken pret moa long dai, na yumi no ken ting olsem dai bai pinisim ol singsing bilong presim God. Nogat. Pastaim yumi mas save olsem yumi stap laip bilong presim God. Dispela em i nambawan samting long stap laip long dispela graun. Na taim yumi klia long dispela samting, orait yumi no ken pret long dai!
SAMPELA TINGTING
Sapos yu save olsem klostu bai yu dai, bai yu askim God long larim yu i stap laip yet? Bilong wanem?
Buk Song 2
“Nau bai mi autim tok BIkpela i bin givim mi....’Yu Pikinini bilong mi...Askim mi, na bai mi givim olgeta lain manmeri long yu, na bai yu bosim olgeta hap bilong graun.’” – Buk Song 2:7-8
Sampela taim yumi i mekim sampela samting i kranki olgeta. Tasol long taim yumi i mekim dispela samting, yumi ting em i gutpela samting long mekim. Tasol sampela yia bihain, taim yumi tingting gen long dispela samting yumi bin mekim pinis, bai yumi klia olsem yumi mekim kranki pasin.
Taim tupela marit i pait i stap, ol arapela lain bai lukim ol na tok, “Watpo na tupela i pait? Tupela i longlong pinis.”Tasol dispela tupela i pait i stap, ol i no ting olsem ol i mekim longlong pasin. Ol i belkros tasol, olsem na ol i pait. Ol arapela tasol i klia olsem dispela em
i longlong pasin. Taim yu tingting long taim bipo, o taim yu lukim pasin ol arapela i mekim, em nau olgeta samting i kamap ples klia long tingting bilong yu, na yu bai klia sapos dispela pasin i gutpela o nogat.
Orait sapos yumi man inap lukim sampela samting olsem, ating God tu i klia olgeta long wanem samting ol man na ol meri long dispela graun i wok long mekim, a? Taim em i lukluk i kam daun long ol lain bilong dispela graun, em i save olsem ol i mekim planti longlong pasin: “God i sindaun long sia king bilong en long heven, na em i lap na tok bilas long ol.”
Dispela Buk Song i putim ples klia olsem God bai salim Mesaia bilong em long stretim ol man i bikhet tru. Olsem na, God i tokim ol king bilong dispela graun long aninit long Pikinini bilong em. Sapos nogat, em bai brukim ol i go liklik liklik, olsem man i brukim sospen graun.
Jisas em i dispela Mesaia. Taim mama Maria i karim em long Betlehem, em i no luk olsem wanpela strongpela hetman. Na taim em i dai long diwai kros, em i no luk olsem em inap long bosim ol king bilong dispela graun. Tasol God i tok, “Yu Pikinini bilong mi...Askim mi, na bai mi givim olgeta lain manmeri long yu, na bai yu bosim olgeta hap bilong graun.”
Tude, pawa bilong Jisas i winim pawa bilong ol arapela. Yumi olgeta i stap aninit long em. Sapos yumi givim baksait long em o yumi les long em, i luk olsem yumi i longlong olgeta. Yupela ol lain bilong graun, yupela putim gut yau bilong yupela, na stretim pasin bilong yupela! Yupela ol hetman bilong graun, yupela harim dispela tok na yupela lukaut! Yupela i mas pret long God na aninit long em. Brukim skru long em o bai yu dai!
Olgeta nesen long dispela graun bai brukim skru long God, na God bai i yusim gutnius bilong Krais long mekim dispela samting i kamap. Gutnius em i stori bilong laikim tru bilong God. Ol lain i givim baksait long dispela laikim tru bilong God ol bai bungim belhat bilong em. Bai yumi mekim wanem?
SAMPELA TINGTING
Dispela Buk Song i givim wanem kain piksa long God long yumi?
Buk Song 1
Dispela man i olsem diwai ol man i bin planim klostu long wara....Ol man nogut i no olsem. Nogat tru. Ol i olsem skin rais win i save rausim i go. – Buk Song 1:3-4
Ol Buk Song i putim ples klia olsem ol lain i stap stretpela, em ol i ken amamas. Ol lain long dispela graun bai tok, “Ol lain i gat planti mani, em ol i ken amamas, na ol lain i gat bikpela save tru, em ol i ken amamas.” Na sampela Kristen lain bai singim, “Sapos God i kisim bek yu, orait yu yet i ken amamas.” Tasol Buk Song 1 i tok olsem, “God i amamas tru long pasin bilong ol stretpela man.”
Ol lain i bihainim tok bilong God long laip bilong ol, em ol yet bai i amamas tru! Ol i no save “bihainim tok bilong ol man nogut,” na ol i “no save wokabaut long rot bilong ol man bilong mekim sin,” na ol i “no save sindaun wantaim ol man bilong tok bilas long God.” Nogat. Ol i wok long bihainim ol stretpela pasin tasol. Long de na long nait, bel bilong ol i lukluk i go long God, kain olsem wanpela kompas i save poinim i go long not. Ol i no save bihainim ol stretpela pasin bikos God i tokim ol long mekim olsem tasol; nogat, long bel bilong ol stret, ol laikim lo bilong God.
Long stap stretpela long dispela graun, ol man i mas kamap nupela long Spirit bilong God, na blut bilong Krais i mas wasim ol tu!
Yumi inap lainim planti samting long ol tumbuna bilong Olpela Kontrak. I no olsem ol bilip lain bai kisim laip taim ol i go long heven tasol. Na i no olsem ol lain i no bilip bai bungim pe bilong dai long hel tasol. Nogat. Ol tumbuna long Olpela Kontrak i klia olsem: ol stretpela man i kisim laip long nau, taim ol i stap long dispela graun yet, na ol man nogut i stap olsem daiman long dispela graun. Tupela samting i tru tasol: Man i stap olsem diwai man i bin planim klostu long wara, o man i stap olsem skin rais win i save rausim i go. Em tasol.
“Man i no save wokabaut long rot bilong ol man bilong mekim sin, em i ken amamas tru.” Dispela man i stap laip tru! Ol i olsem diwai i gat planti kaikai tru. Tasol ol man nogut i olsem skin rais. Na win bilong God bai i rausim em i go longwe.
SAMPELA TINGTING
Yu pilim olsem yu yet i gat dispela kain amamas olsem dispela man i mekim stretpela pasin, o nogat?
1 Pita 5:6-11
God em i as bilong olgeta marimari. Em i bin singautim yupela long Krais Jisas, bai yupela i ken i stap wantaim em long gutpela lait bilong en i stap oltaim. Olsem na bai yupela i karim pen sotpela taim tasol, na bihain bai em yet i mekim yupela i orait gen, na strongim bilip bilong yupela na mekim yupela i sanap strong oltaim. – 1 Pita 5:10
God i bin singautim yumi long stap wantaim em long gutpela lait bilong en i stap oltaim; em i no singautim yumi long karim pen olgeta taim. Yumi karim pen olsem wanpela rot yumi mas wokabaut long em long kamap long gutpela ples.
Bai yumi karim pen sotpela taim tasol, na bihain bai yumi stap gut oltaim oltaim. Bilong wanem Buk Baibel i tok olsem mipela bai karim pen “sotpela taim tasol”? Namba wan samting i olsem: Laip long dispela nupela graun bai i stap oltaim oltaim, olsem na long dispela graun bilong tude, taim em i sotpela tasol. I kain olsem: taim mama i karim pikinini pinis, wantu em i lus tingting long pen em i karim pinis. Na i kain olsem taim Jekop i wok 7-pela yia bilong kisim Resel, na em i pilim olsem dispela 7-pela yia em i samting nating, olsem tripela o fopela de tasol (Stat 29:20). Na wankain olsem, ol pen yumi bai karim long dispela graun em i sotpela taim tasol, long wanem, yumi wetim dispela laip i stap gutpela tru oltaim oltaim.
Na narapela samting i olsem. Long dispela tok “sotpela taim tasol,” God i laik putim ples klia olsem em bai strongim yumi inap long taim dispela taim i pinis. God i makim pinis taim bilong pinisim dispela taim bilong pen. Wantu dispela pen bai pinis, na yumi bai klia olsem em i sotpela taim tasol.
Na yumi klia, dispela God husat i singautim yumi em i God bilong marimari. Long marimari tasol, em i singautim yumi, na tu, em i marimari long yumi bilong strongim yumi long taim bilong karim pen. Olsem na, yumi inap tok, “God em i as bilong olgeta marimari.” Marimari bilong God bai strongim yumi olgeta taim. God yet bai mekim yumi orait gen, na strongim bilip bilong yumi na mekim yumi sanap strong oltaim. Pita, husat i raitim dispela tok, i save olsem yumi nidim dispela marimari bilong God long stap strong taim yumi harim singaut bilong God long bihainim em na karim diwai kros bilong yumi.
Dispela rot i go long glori, we yumi bai i stap oltaim wantaim God long gutpela lait bilong en. Yumi no inap save gut long dispela samting. Tasol yumi inap long klia olsem dispela samting bai winim olgeta samting yumi bin lukim long dispela graun. Yumi no inap karim pen moa, na yumi bai stap gut tru wantaim God yet.
Orait, yumi mas karim pen sotpela taim tasol, na bihain bai yumi i lukim dispela glori!
SAMPELA TINGTING
Ritim dispela lain (lain 10) gen na tok tenkyu long dispela God bilong olgeta marimari, na litimapim nem bilong em.
Rom 8:18 – 25
Yumi save, olgeta samting God i bin wokim, olgeta i pilim pen olsem meri i laik karim pikinini...Na i no dispela ol samting tasol i krai. Nogat. Yumi tu i save krai. Yumi kisim Holi Spirit pinis, em olsem namba wan presen God i givim yumi. Tasol yumi tu i save pilim pen na i krai... – Rom 8:22-23
Pasin bilong karim pen em i stap long olgeta hap long dispela gruan. Olgeta haus na olgeta manmeri i save pilim pen. Tasol i no man na meri tasol i pilim dispela pen. Nogat. Olgeta samting God i wokim i pilim pen olsem meri i laik karim pikinini.
Ol lain bilong God i mas mekim wok long dispela graun, maski Buk Baibel i tok olsem ol i stap lain manmeri tru bilong dispela nupela graun bai i kamap. Yumi i stap long dispela graun, tasol yumi no lain tru bilong dispela graun.
Yumi kisim Holi Spirit pinis, em olsem namba wan presen God i givim yumi. Tasol planti moa presen bai i kam. Em i olsem liklik hap tasol long olgeta samting yumi bai kisim bihain long dispela nupela graun.
Dispela Holi Spirit yumi kisim pinis i save stap long ol lain bilong God tasol. Na em i olsem wanpela hap samting yumi kisim bilong helpim yumi long save wanem samting yumi bai kisim bihain, long dispela nupela graun.
Pasin bilong karim pen bilong yumi ol Kristen i narakain olsem pen bilong ol arapela lain long dispela graun. Ol lain i no save long dispela nupela graun bai i kamap, ol i no kisim Holi Spirit pinis, ol i no wari tumas long sin, na planti ol arapela kain samting nogut i no save givim bikpela pen long ol.
Tasol sios bilong God i kisim Spirit bilong God pinis, olsem na ol i kisim liklik hap bilong dispela nupela laip na dispela nupela graun pinis. Olsem na, ol lain bilong sios i no inap amamas tru long dispela graun na laip bilong tude. Olgeta samting i wok long krai, tasol krai bilong yumi i winim krai bilong ol arapela. Olgeta lain long dispela graun i gat laik long kisim ol gutpela samting i kam, na ol Kristen lain tasol i save long dispela gutpela samting tru bai i kamap bihain.
Sios tasol i klia long as bilong ol dispela pen olgeta samting long dispela graun i save pilim olsem mama i karim pikinini. Ol Kristen tasol i save olsem dispela pen i kamap bikos dispela nupela graun i wok long kam. Sios bilong God inap autim dispela tok: Maski dispela pen i bikpela stret, dispela nupela laip bai i kam. Dispela pen i soim yumi olsem dispela nupela de i kamap klostu nau.
SAMPELA TINGTING
Dispela teks long Buk Baibel inap helpim yu long taim bilong karim pen, o nogat?
Rom 8:12-17
Sapos nau yumi karim pen olsem em i bin karim, orait bihain bai yumi kisim biknem na gutpela sindaun tru wantaim em. – Rom 8:17
Sapos yumi no tingting long karim pen olsem Krais i bin karim, yumi mas senisim kranki tingting bilong yumi hariap. Long hia Buk Baibel i tok olsem yumi ol Kristen i mas karim pen pastaim, na bihain bai yumi kisim biknem na gutpela sindaun tru wantaim Krais.
Yumi no ken lus tingting long dispela tok, “Karim pen olsem em i bin karim.” I no olsem long wok bilong yumi yet bai yumi kisim dispela laip i stap oltaim oltaim. Nogat. Diwai kros bilong Krais tasol i kisim bek yumi. Tasol sapos yumi laik stap wantaim Krais oltaim oltaim, yumi mas karim pen wantaim Krais tu.
Em i narakain samting tru olsem dispela King bilong Israel i kam olsem wokboi nating long dispela graun na em i dai long wanpela diwai kros. Dispela Pikinini bilong God i daunim em yet aninit long ol lo bilong Papa bilong em. Em i no bihain sotkat rot Satan i soim em. Na em i no bihainim rot ol pren bilong em i makim bilong bihainim. Em i no abrusim ol pen na hevi. Nogat, em i bihainim rot Papa God yet i makim bilong em i mas bihainim.
Na olgeta man o meri i laik pas wantaim Krais i mas bihainim dispela rot tu: diwai kros pastaim na hat bilong king bihain. Na nau sios bilong Krais i stap long dispela taim bilong diwai kros.
I no olsem Spirit i kam pinis long sios olsem na ol pen na hevi i no stap moa. Nogat. Spirit i no kam bilong rausim diwai kros bilong yumi. Em i kam bilong givim strong long yumi long karim diwai kros bilong yumi.
Na i no olsem sios em i samting bilong kisim yumi i go long heven. Nogat tru. Sios em i ples we ol lain bilong Jisas Krais i save bung. Ol i stap laip wantaim Krais. Taim ol i wokim plen, ol
i mekim olsem wantaim Krais; wanem samting ol i mekim, ol i mekim olsem wantaim Krais. Sapos ol i stap laip, orait ol i stap wantaim Krais. Na sapos ol i dai, orait ol bai i kisim gutpela samting tru. Ol i karim pen wantaim Krais, na bihain ol bai i kisim biknem na gutpela sindaun tru wantaim em tu.
SAMPELA TINGTING
Yu yet save karim pen Krais yet i bin karim?
Kolosi 1:24
Nau mi amamas long karim pen bilong helpim yupela. Na mi laik helpim sios bilong Krais, em bodi bilong em yet. Pen Krais i karim bilong helpim sios, em i no pinis yet. Na long pen mi karim long bodi bilong mi yet, mi laik inapim dispela pen bilong Krais. – Kolosi 1:24
Kingdom bilong God i wok long kam. Dispela em i wanpela bikpela samting tumas, na yumi i gat hap wok long mekim bilong mekim dispela samting i kamap. Em i tru, King tasol inap kisim dispela kingdom i kam. Tasol em bai i yusim yumi long mekim olsem tu. Na em i tru olsem Krais i karim pen long yumi. Tasol em i save yusim yumi long inapim dispela pen em i bin karim tu. Taim yumi karim dispela pen, i no olsem yumi wok long kisim bek yumi yet. Nogat tru! Jisas i tok, “Em i pinis nau,” taim em i dai long diwai kros. Na as bilong laip bilong yumi em i dispela wok Krais yet i pinisim. Tasol Krais i givim narapela wok long yumi long mekim, wok bilong autim tok bilong Krais. Na Krais bai helpim yumi long mekim dispela wok. Taim yumi no gat strong, em yet bai strongim yumi, na em bai bagarapim ol birua bilong yumi. Na em i save yusim ol samting bilong yumi tu, olsem maus na han na mani bilong yumi. Long han bilong yumi, em yet bai tasim ol arapela manmeri. Bel bilong em i stap insait long sios bilong em. Spirit bilong em i kapsait long sios na i go long ol arapela. Na pen bilong Krais i save pulap long bel bilong ol Kristen tu. Wok i stap bilong bagarapim strong bilong Satan. Long pawa bilong Spirit bilong God, dispela samting bai kamap, tasol dispela wok bai givim bikpela pen long ol Kristen. Ol Kristen i mas mekim bikpela wok stret, na ai wara bilong ol bai pundaun taim ol i mekim wok long autim tok bilong God. Ol Kristen i mas karim pen na givim bel long ol arapela, bai ol arapela i ken bihainim Bikpela tu. Na ol Kristen i mas karim dispela pen bipo long taim dispela kingdom bilong God inap long kam. I olsem ol Kristen i mas karim olgeta pen God i makim pinis bilong ol i mas karim, na taim ol inapim dispela mak pinis, orait kingdom bilong God bai i kam. I no gat wanpela amamas i winim dispela amamas bilong inapim dispela pasin bilong karim pen bilong Krais. Na i no gat wanpela samting i winim dispela wok tu. Krais bai i yusim laip na i dai bilong ol disaipel bilong em bilong kamapim kingdom bilong en. Na bihain, em bai tok namba tu taim, “Em i pinis nau!”
SAMPELA TINGTING
“I no gat wanpela amamas i winim dispela amamas bilong inapim dispela pasin bilong karim pen bilong Krais. Na i no gat wanpela samting i winim dispela wok tu.” Dispela em i tru insait long laip bilong yu yet, a?
Filipai 3:3-11
Mi laik save tru long Krais...Krais i bin kirap bek long matmat, na em i gat bikpela strong, na mi laik save tru long dispela strong bilong em. Mi laik poromanim em long pasin bilong karim pen. – Filipai 3:10
Em i narakain samting tru, a, long save tru long Krais, na long save tru long strong bilong em, na long poromanim em long pasin bilong karim pen? Ating sapos yumi gat strong bilong Krais long laip bilong yumi, orait bai pen na hevi bilong yumi i pinis, a, na yumi bai i gat laip tru na amamas tasol, a? Nogat tru. Taim yumi yet i kirap long matmat bai yumi i kisim laip tru na amamas tasol oltaim oltaim. Tasol, Pol i tok, dispela samting i no kamap yet long yumi. Olgeta Kristen i mas wok strong long save tru long Krais. Yumi bai save moa long em taim yumi wanbel wantaim em long bilip. Na yumi poromanim em long dai bilong em na long kirap bek long matmat bilong em tu. Long dai bilong Jisas em i kisim bek yumi long hevi bilong sin, na long taim em i kirap bek long matmat, em i givim nupela laip long yumi long pawa bilong Holi Spirit. Taim yumi kisim dispela nupela laip pinis, orait wantu bai yumi poromanim Krais long karim pen tu. Pen bilong em i no wankain olsem pen bilong ol lain i no bilip long em. Nogat. Em i narakain pen – ol lain bilong Krais tasol i save karim dispela pen. Taim yumi no save tru long Krais, yumi no save wari tumas long pasin bilong ol arapela. Tasol nau yumi save olsem i gat wanpela rot i go long laip tasol, na olgeta arapela rot bai i go long hel. Taim yumi no save tru long Krais, ol narapela samting i save givim amamas long yumi. Nau, dispela ol samting i no save kirapim bel bilong yumi. Na tu, ol lain i no save long Krais, ol i gat ol narapela kain hevi olsem yumi. Nau yumi lusim pinis planti ol hevi na wari ol arapela lain i save gat. Tasol nau yumi, ol lain husat i save tru long Krais, yumi kisim ol nupela hevi na pen pinis, na ol lain i no bilip long Krais, ol i no klia long ol dispela hevi na pen bilong yumi. Taim yumi kisim tok bilong Bikpela, bai yumi mekim wok bilong em tu. Em i naispela samting tru long kisim strong bilong Krais long laip bilong yu. Tasol yu mas poromanim Krais long pasin bilong karim pen tu!
SAMPELA TINGTING
Wanem ol hevi i lus pinis bikos yu save tru long Krais? Na wanem ol nupela hevi i save kam long yu bikos yu pas wantaim Krais?
Rom 9:1-5
Oltaim mi save bel sori tru, na mi save wari na tingting planti. – Rom 9:2
Pol tu i autim dispela kain sori bilong God na Krais taim em i tok, “Oltaim mi save bel sori tru, na mi save wari na tingting planti.” I luk olsem Pol i no tok stret – hau na em bai i bel sori tru OLTAIM? Tasol long lain wan em i putim ples klia olsem em i tok tru long nem bilong Krais. Em i no giaman. Holi Spirit i mekim tingting bilong em i klia, na long bel bilong en, em i save olsem dispela tok bilong em em i tru. Na em i tokaut long as bilong sori na wari bilong em: ol brata na susa bilong em i givim baksait long Jisas Krais! Yumi klia, taim Krais i singautim yumi long bihainim em, na yumi bekim, orait bai yumi bungim ol hevi na sori. Tasol tu, amamas bilong yumi bai winim olgeta arapela kain amamas long dispela graun. Long dispela nupela amamas bai yumi bungim narapela kain hevi na sori tu. I gat planti ol as bilong sori bilong yumi. Tasol as bilong ol dispela sori em i dispela samting: Yumi kisim dispela sori bilong God taim yumi kisim dispela laikim tru bilong God. Olgeta laikim tru i save kisim pen i kam wantaim. Ol lain i les long bungim pen, ol i mas wok long abrusim laikim tru. Sapos yu laikim tru meri bilong yu, pen bilong em yet bai kam long bel bilong yu tu. Na sapos yu kisim pinis laikim tru bilong God, orait bai yu pilim hevi na sori bilong God taim yu lukim sin o wanpela man i mekim sin. I no olsem laikim tru bilong God i stap longwe long yumi. Sapos God yet i kam long bel na lewa bilong yumi, orait God i stap klostu tru long yumi. “God i givim pinis Holi Spirit long yumi, na pasin bilong God bilong laikim tru ol man, em Holi Spirit i bin kapsaitim long bel bilong yumi” (Rom 5:5). Taim Bikpela i kam insait long bel bilong yumi pinis, bai yumi wanbel wantaim em: wanem samting em i les long em, bai yumi tu les long em; na wanem samting em yet i laikim tru, em bai yumi laikim tru tu.
SAMPELA TINGTING
Yu yet yu bin pilim dispela sori bilong God?
Matyu 23:37-39
Jerusalem, Jerusalem...Planti taim moa mi laik bungim ol pikinini bilong yu, olsem kakaruk meri i save bungim ol pikinini bilong en aninit long wing bilong en. Tasol yupela i no laik. – Matyu 23:37
Sori bilong God long ol pikinini i bin ranawe long en em i bikpela tru, olsem na em i kam long painim ol na long kisim ol i kam bek long em. God i kam long yumi long Jisas Krais. Jisas em i no olsem wanpela man i bin kam bilong makim rot bilong yumi long kamap long God tasol. Nogat, Jisas i kam long God na em yet i dispela rot. Long Jisas Krais, God i kam long painim na kisim bek wanem samting em i lus. Na pastaim God i wok long painim pikinini bilong em, Israel, bikos em i bin mekim bikpela wok long lukautim na laikim tru Israel. God i singautim Israel, na em i wok strong tru long painim em na kisim em i kam bek. Olsem na Jisas i autim dispela tok, “Jerusalem, Jerusalem...Planti taim moa mi laik bungim ol pikinini bilong yu, olsem kakaruk meri i save bungim ol pikinini bilong en aninit long wing bilong en. Tasol yupela i no laik.” Tasol ol manmeri i paul long tok bilong Krais. Ol i no klia long tok bilong em. Maski olgeta manmeri i paul, long tude tu, sori bilong God i klia tru long Tok bilong em. Long tok bilong Jisas na long pasin na wok bilong en, sori bilong God i kamap klia tru. Em i krai long yumi, tasol planti i no bekim. Dispela em i sori bilong laikim tru. Ol lain i no gat laikim tru long bel bilong ol, i no gat sori tu. Ol papamama i klia long dispela kain sori. Ol pikinini i no inap kamap klia long dispela sori bilong papamama inap long taim ol yet i gat pikinini bilong ol yet. Sori tru i kamap long laikim tru – dispela em i pasin bilong ol Kristen. Dispela kain sori i wanbel wantaim laikim tru na sori bilong God na Jisas Krais. Ol Kristen papamama i gat wanpela hevi i winim olgeta arapela hevi: taim pikinini bilong ol i lusim God! Maski pikinini bilong ol i kisim bikpela namba na i kamap bikman stret – papamama bai i gat bikpela pen tru sapos dispela pikinini i lusim God. Na tu, ol Kristen papamama i gat wanpela amamas i winim stret olgeta arapela amamas: taim pikinini bilong ol i wokabaut wantaim Bikpela! I no gat wanpela samting i orait sapos yumi i no wanbel wantaim God. Na olgeta samting bai kamap orait sapos yumi holim strong God.
SAMPELA TINGTING
Yu bin tingting long dispela sori bilong God na Krais bipo? Sampela taim, long laip bilong yu, yu gat dispela kain sori?
Buksong 81:6-16
Na mi laik bai ol Israel i bihainim laik bilong mi oltaim. – Buk Song 81:13
Long dispela graun i gat planti pen, hevi na traim. Ol hevi i stap long olgeta hap na i go long olgeta man. I gat hevi na pen bilong bodi na bilong spirit tu. I gat sampela hevi yumi inap long rausim, na i gat sampela ol hevi yumi no inap long rausim bikos em i samting bilong yumi man bilong dispela graun. I gat sampela hevi yumi i givim long yumi yet bikos long pasin nogut bilong yumi. Sampela taim yumi no tingting gut taim yumi mekim sampela samting o yumi i mekim sin na hevi i kamap long dispela. Na i gat sampela bikpela hevi i kamap long dispela graun na yumi no inap abrusim o stopim dispela ol hevi. Yumi klia: maski wanem kain hevi i save kamap long dispela graun na long yumi, dispela graun i pulap long hevi, na olgeta manmeri i krai long dispela ol hevi. Bipo long taim yumi i kamap long dispela graun, ol hevi na sori i stap pinis. Buk Baibel i stori long wanpela sori, tasol planti taim yumi no tingting long dispela sori bikos yumi wari long hevi na sori bilong yumi yet. Na dispela em i sori bilong God. God em i sori na em i krai, “na mi laik bai ol Israel i bihainim laik bilong mi oltaim.” Buk Baibel i stori bilong God em i wok long painim yumi, tasol yumi wok long hait long em. God em i tok, “Adam, yu stap we?” Tasol Adam i hait namel long ol diwai. I olsem stori bilong wanpela Papa em i lukluk long rot na wetim pikinini bilong em i kam bek, na em i krai, “Pikinini bilong mi, wanem taim bai yu kam bek long haus bilong mi?” Na dispela sori bilong God i soim klia bilong wanem yumi yet i gat hevi. As bilong ol dispela pen na hevi i bikos yumi lusim God pinis. Yumi no gat strong long stap gut sapos yumi i no go bek long God. Taim yumi lusim God pinis, i olsem yumi i lusim pinis as ples tru bilong yumi. Wanpela hop tasol bilong yumi i stap – yumi mas wanbel wantaim God gen. Taim heven na graun i wanbel gen, orait as bilong ol hevi na sori bilong yumi bai pinis tu. Na yumi bai stap gut tru na bel isi tru. Na God bai mekim drai wara i stap long ai bilong olgeta manmeri bilong em.
SAMPELA TINGTING
Yu yet yu save tingting long dispela sori bilong God?
Aposel 14:19-23
Yumi laik i go insait long kingdom bilong God, tasol pastaim yumi mas wokabaut long rot i gat planti hevi i stap long en. – Aposel 14:22
Taim ol misinari long bipo i wok long mekim ol disaipel long ol taun, ol i bin tokim ol yangpela Kristen olsem: “Yumi laik i go insait long kingdom bilong God, tasol pastaim yumi mas wokabaut long rot i gat planti hevi i stap long en.” Dispela em i save kamap. I no gat wanpela rot i go long heven i isi long wokabaut long em. I gat planti manmeri long kain kain hap olsem China na long ol kantri we Islam i stap, na ol i bungim bikpela hevi tru taim ol i kamap disaipel bilong Jisas. Tasol yumi no ken tingting long ol dispela lain tasol taim yumi harim dispela tok long ol hevi ol Kristen lain bai bungim. Yumi tu bai bungim hevi – dispela em i rot bilong salvesen. Yumi no inap abrusim ol dispela hevi, na yumi no ken wok long mekim olsem. Bilong wanem yumi no inap abrusim ol dispela hevi? 1.Satan em i makim yumi long bagarapim yumi. Em bai wok strong tru long pulim yumi i go longwe long Krais. 2.Yumi mas sanap na autim nem bilong Jisas. Olsem na ol arapela bai lap long yumi na tok bilas long yumi – planti taim ol pren na famili bilong yumi bai mekim olsem. 3.Yumi mas daunim yumi yet. Olpela bel bilong yumi i no inap i dai hariap. Tasol em bai i dai, na dispela bai givim pen long yumi. 4.Yumi mas lainim pasin bilong laikim tru ol arapela olsem Jisas yet i save mekim. Na pasin bilong laikim tru bai bringim pen na hevi long yumi tu. Taim yumi klia olsem yumi bai bungim pen na hevi sapos yumi laik kamap long kingdom bilong God, yumi mas lukaut. Nogut yumi wok long senisim tok bilong God bikos yumi i les long harim dispela tok. Na tu, nogut yumi i wok long mekim trabel bikos yumi gat laik long bungim ol bikpela hevi. Nogat! Dispela tasol em i wok bilong yumi long mekim: Yumi mas skelim gut laip bilong yumi yet. Yu yet yu bihainim Krais long laip bilong yu o nogat? Yu yet yu wok long daunim yu yet na apim nem bilong em olgeta taim o nogat?
SAMPELA TINGTING
Yu save bungim sampela hevi bikos yu yet i gat laik long bihainim Jisas?
Aposel 16:25-34
Long biknait Pol tupela Sailas i wok long beten na mekim song long God. Na ol arapela kalabus i harim i stap. – Aposel 16:25
Taim ol i putim Pol tupela Sailas long kalabus i luk olsem ol i wankain olsem ol arapela kalabusman tasol. Klos bilong ol i bruk pinis, na ol i doti tru. Woda em i “pasim strong lek bilong tupela long plang.” Tasol, long biknait, i kamap klia tru olsem Pol tupela Sailas i mausman bilong Jisas Krais. Ol man long kalabus i save tok nogut na autim kain kain tok nating. Na ol arapela man i no save kirap nogut long dispela, bikos ol kalabusman i save mekim olsem. Tasol Pol tupela Sailas i mekim narakain samting olgeta: Tupela i wok long beten na mekim song long God. Em i narakain samting tru! Long dispela taim, Pol tupela Sailas i no autim tok bilong God; tupela i no wok long stori long pasin bilong tanim bel na pasin bilong bilip. Nogat. Long dispela taim, tupela i autim bilip na amamas bilong ol long beten na long ol singsing. I gat taim bilong autim tok, na i gat taim bilong autim bilip long beten na singsing. “Na ol arapela kalabus i harim i stap.” Olgeta dispela kalabusman i kirap na harim i stap. I olsem sampela lait i kam insait long dispela ples tudak. Ating ol ensel i bin singsing wantaim. Long taim bilong lotuim God, heven na graun i wanbel tru. Na wantu God i mekim bikpela samting i kamap: graun i guria, na i sakim olgeta pos bilong haus kalabus. Ol sens bilong olgeta kalabus i lus na olgeta dua bilong haus kalabus i op. Tudak i no pinis yet, na woda wantaim famili bilong em i beten long God na singim ol singsing bilong litimapim nem bilong God tu. Ating ol ensel bilong God i singsing bikpela tru long dispela nait. Hau bai ol Kristen inap amamas na singsing long ol dispela kain hevi? Bikos ol i save long Jisas Krais!
SAMPELA TINGTING
Yu save long wanpela Kristen i bin singsing long taim bilong ol hevi?
Aposel 9:10-20
Bai mi soim em (Sol) olkain pen na hevi em i mas karim long taim em i autim nem bilong mi. – Aposel 9:16
Sol em i orait long dai bilong Stiven bikos em i gat laik long bagarapim ol Kristen lain. Na em i redi long go long Damaskus long kalabusim ol man na meri i bihainim rot bilong Jisas. Em i gat laik long go, na em i askim hetpris long larim em i go na mekim olsem. Ol Kristen i ranawe na ol i prea, “Bikpela, lukautim mipela long han bilong dispela man nogut, Sol.” Na bihain, Bikpela i stap laip i bungim Sol long dispela rot i go long Damaskus. Sol em i no kalabusim wanpela man. Nogat, em yet i go long Damaskus olsem kalabusman bilong Krais! Em i wok bilong Ananaias bilong autim gutnius bilong marimari bilong God long Sol. Long dispela tok bilong God, Sol i kisim salvesen, na em yet bai i go aut bilong bringim dispela salvesen long planti arapela manmeri tu. God yet i gat plen long laip bilong Sol: “Bai mi soim em olkain pen na hevi em i mas karim long taim em i autim nem bilong mi.” I luk olsem Bikpela i gat laik long mekim save long Sol: Sol yet i givim planti pen na hevi long ol Kristen manmeri, olsem na, Sol yet bai kisim pen na hevi long Krais nau. Tasol i no olsem. Nogut yumi lus tingting long pasin bilong God long singautim yumi olgeta (“bihainim mi”) na bilong askim yumi long karim diwai kros bilong yumi yet. Em tru, God i no makim wankain wok long olgeta lain bilong em. Em i givim bikpela wok stret long Pol, olsem na Pol i bungim planti hevi na pen tru. Sapos yumi stap lain bilong Krais, yumi bai bungim hevi; hevi em i samting bilong olgeta manmeri i bilip long God. Sapos yumi mekim wok bilong Krais, bai yumi bungim hevi. Taim dispela wok yumi mekim long Krais i kamap bikpela moa yet, orait hevi tu bai i kamap bikpela moa yet. Tasol tu, taim yumi kisim ol dispela hevi, amamas bilong yumi bai i kamap bikpela moa yet tu, na yumi bai kamap klostu moa long Jisas tu. Wok bilong yumi wan wan i no wankain, tasol pasin bilong bihainim Krais em i wankain tasol. Taim yumi stap aninit long Jisas, hevi na glori bilong yumi bai kamap bikpela moa yet.
SAMPELA TINGTING
Yu gat laik long mekim sampela moa wok bilong Bikpela olsem wanem?
Ritim: Matyu 28:16-20
...long nem bilong Papa na bilong Pikinini na bilong Holi Spirit. – Matyu 28:19
Dai bilong Jisas na dai bilong Stiven i klostu wankain liklik. Holi Spirit i stori long dai bilong Stiven long soim pasin bilong ol disaipel bilong bihainim pasin bilong tisa bilong ol. Stiven em i lainim pinis pasin bilong prea, “Bikpela, yu no ken bekim dispela sin long ol.” Na tu, Stiven i lainim pinis gutpela pasin bilong dai: “Bikpela Jisas, yu kisim spirit bilong mi.” Tasol i gat wanpela bikpela samting i no wankain long las tok bilong Jisas na las tok bilong Stiven. Jisas em i prea long God Papa, “Papa, mi putim spirit bilong mi long han bilong yu.” Tasol Stiven i prea long Krais, “Bikpela Jisas, yu kisim spirit bilong mi.” Jisas i prea long God Papa, tasol Stiven i prea long God Pikinini. Long hia yumi i lukim bikpela tok hait i stap long Buk Baibel – God em i husat tru? Long Olpela na Nupela Kontrak, yumi kisim save olsem i gat wanpela God tasol bilong heven na graun. Sampela taim Buk Baibel i autim nem bilong Jisas taim Buk Baibel i stori long dispela wanpela God. Tasol Buk Baibel i klia olgeta: i gat wanpela God tasol i stap! Yumi no inap save gut long God. Yumi i mas bilip tasol: dispela God Jisas yet i prea long em, na dispela God Stiven yet i prea long em i wanpela – wanpela God tasol i stap! Na Jisas em i God tru na man tru wantaim. Olgeta manmeri long olgeta taim i no inap save gut tru long dispela tok hait. Planti manmeri i bilip long God i bin wok long autim dispela tok hait long kain kain tok. Na maski i hat tru, na i no gat wanpela tok inap kliaim dispela tok hait olgeta, sios i bin yusim dispela tok long autim dispela tok hait: God Triwan. Wanpela God, tasol tripela: Papa, Pikinini na Holi Spirit. Na God em i wanpela. Buk Baibel i skulim yumi long dispela; em i no samting man yet i kamapim. Dispela prea bilong Jisas na Stiven i wok long kirapim tingting bilong yumi long God Triwan.
SAMPELA TINGTING
Em i hat tru long save gut tru long dispela bilip: God Triwan. Askim God long helpim yu long bilipim dispela tok bilong Buk Baibel.
Ritim: Luk 23:44-49
Na Jisas i singaut strong moa olsem, “Papa, mi putim spirit bilong mi long han bilong yu.” – Luk 23:46
Taim ol i wok long tromoi ston long Stiven, Stiven i prea olsem, “Bikpela Jisas, yu kisim spirit bilong mi.” –Aposel 7:59 Long taim bilong slip, sampela pikinini ol i save beten, “Nau mi laik slip, mi prea long Bikpela long em i ken lukautim spirit bilong mi.” Na las tok bilong Jisas long diwai kros i klostu wankain olsem dispela prea. Na long diwai kros, Jisas Krais i skulim yumi long gutpela pasin long taim bilong i dai. Jisas em i tisa bilong yumi long olgeta samting long wokabaut bilong yumi. Em i skulim yumi long pasin bilong laip, na em bai i skulim yumi long gutpela pasin long taim bilong i dai. Taim yumi i lainim ol gutpela pasin bilong dispela laip, yumi no ken pret long pasin bilong yumi long taim bilong i dai bilong yumi. Tisa bilong yumi bai i stap wantaim yumi. Wanpela taim wanpela Kristen dokta em i tanim bel na em i kam bek long Bikpela long prea bilong wanpela yangpela mangi. Joni em i gat 6-pela krismas tasol, em i sik nogut tru, tasol em i no save olsem em i sik nogut tru. Na dispela dokta na wanpela nes i kam long em, na ol i laik wok strong tru long oraitim em gen. Olsem na ol i laik kisim em na operatim em, olsem na ol i slipim em long wanpela bet na ol i tokim em olsem, “Bai mi givim sampela marasin long yu, na bai yu slip.” “Bai mi slip?” Joni i askim em. “Yes, bai yu slip,” dokta i tok. “Orait, sapos mi bai slip, pastaim mi laik beten.” Na dispela liklik mangi i brukim skru, pasim ai na han bilong em. Na long yau bilong God, na dispela dokta na ol nes tu, em i beten, “Nau bai mi slip, mi askim yu Bikpela long lukatuim spirit bilong mi.” Tasol Joni em i no kirap gen taim ol i slipim em. Em i dai long taim ol i operatim em. Tasol dispela dokta em i lukim dispela na em yet i beten long Papa bilong em: “Papa, mi putim laip bilong mi long han bilong yu tasol!”
SAMPELA TINGTING
Wanem samting i save givim bel isi long yu long taim bilong laip na long taim bilong i dai?
Ritim: Aposel 7:51-60
Na em i brukim skru na i singaut strong moa, “Bikpela, yu no ken bekim dispela sin long ol.” – Aposel 7:60
I gat planti stori bilong ol man i bin bungim dai bikos ol i bihainim Jisas Krais. Planti yia bipo long tude, planti manmeri i gat laik long ritim ol stori long dispela kain man. Tasol tude planti lain i gat bikpela laik long ritim ol stori bilong ol man nogut, na maski long ritim ol stori long ol Kristen lain i dai long han bilong ol birua bilong Jisas Krais. Tasol planti ol sios i laik ritim ol dispela stori yet. Buk Baibel i gat sampela stori tu long ol man i bungim dai bikos ol i bihainim Jisas. Tasol Buk Baibel i no autim bikpela stori tru long ol dispela kain man. Stori bilong dai bilong Jems (Aposel 12:2) em i liklik tru, na Buk Baibel i no tokim yumi long ples we Pol na Pita i bungim dai o long wanem rot ol i dai. Tasol stori bilong dai bilong Stiven, dispela namba wan man i bungim dai bikos em i bihainim Jisas, em i no liklik. Sapos yumi ritim gut dispela stori, bai yumi luksave olsem dai bilong Stiven i kain olsem dai bilong Jisas. Olsem na yumi ken klia gut bilong wanem Holi Spirit i givim dispela stori long yumi. Dai bilong Stiven i putim ples klia olsem, “Sumatin i no winim tisa bilong en… Sapos sumatin i kamap wankain olsem tisa bilong en, em inap. Na sapos wokboi i kamap wankain olsem bikman bilong en, em tu inap” (Matyu 10:24-25). Tok bilong Jisas i tru taim em i tok, “Na man i no karim diwai kros bilong en na bihainim mi, em i no inap i stap pren bilong mi” (Matyu 10:38). Ol i givim hevi long Stiven, kain olsem ol i givim hevi long Jisas. Na prea bilong wokboi (Stiven) i wankain olsem prea bilong masta bilong em (Jisas). Ol disaipel bilong Jisas i ken amamas long mekim wankain pasin olsem tisa (masta) bilong ol. Ol gutpela lida i save skulim yumi long kamap ol gutpela disaipel tru. Na Jisas i makim rot bilong yumi long bihainim. Olsem na yumi mas givim olgeta glori long em, long dai bilong yumi tu.
SAMPELA TINGTING
Spirit bilong God i skulim yu long wanem samting long dispela stori?
Ritim: Luk 23:32-38
Papa, yu ken lusim sin bilong ol. Ol i no save long dispela samting ol i mekim. – Luk 23:34
Jisas i hangamap long diwai kros na em i pilim bikpela pen stret. Ol i nilim han bilong em long diwai, na bodi bilong em i guria long pen. Diwai kros em i samting bilong bagarapim, givim pen, na kilim i dai wanpela man. Taim Jisas i stap long diwai kros, em i beten. “Papa,” em i beten bikos bilip bilong em i no pundaun. Sampela bilong yumi i save bilip long Papa God taim yumi i amamas na yumi i stap bel isi. Taim sampela samting nogut i kamap long yumi o yumi bungim sampela hevi na pen, yumi bai ting, Papa bilong mi i stap we? Tasol, namel long bikpela hevi na traim stret, Jisas i tok, “Papa…” Jisas i askim Papa bilong em long lusim sin bilong ol man i wok long kilim em i dai. Em i no singaut long kisim sampela helpim. Yumi bai singaut long ol pen na traim, a? Jisas em i no wok long mekim save long ol birua bilong em. Yumi bai tingting long bekim nogut pasin bilong ol birua bilong yumi, a? Jisas i mekim narapela kain pasin. Em i askim Papa bilong em long lusim sin bilong ol birua bilong em i wok long kilim em i dai. “Papa, yu ken lusim sin bilong ol. Ol i no save long dispela samting ol i mekim.” Ol i no save – i no min olsem ol i no gat asua long dispela sin ol i mekim. Na planti lain bilong tude i wankain olsem ol dispela soldia bilong Rom; ol i no save. Ol i no save olsem, em i sin bilong yumi i hangamapim Jisas long diwai kros. Yumi yet i hangamapim Jisas. Nau yumi mas beten. Yumi mas askim God long lusim sin bilong ol man i no save wanem samting ol i bin mekim – long God, long Jisas. Na yumi mas prea strong tru na askim Papa bilong yumi long skulim yumi long helpim ol lain i no gat save long wok bilong God, long kisim save long wok bilong em – na long Jisas, na long diwai kros. Long dispela ples bilong pen na hevi, long dispela holi ples, dispela diwai kros bilong Jisas, olgeta manmeri i mas brukim skru na kamap fri, na kisim save long wanem samting ol yet i mekim.
SAMPELA TINGTING
Beten long Papa bilong yu long helpim yu i kisim save long wanem samting yu yet yu mekim, na brukim skru long diwai kros bilong Jisas.
Ritim: 1 Pita 4:12-19
Ol brata tru, wanpela traim olsem paia i wok long kamap long yupela. Tasol yupela i no ken kirap nogut na ting em i narakain samting tru i kamap long yupela. Nogat. – 1 Pita 4:12
Yumi no ken kirap nogut na ting em i narakain samting tru taim ol traim i kam long ol lain bilong God. Nogat. Yumi mas kirap nogut taim sios i stap isi tasol na i no bungim ol traim olsem paia. Sapos Kristen wokabaut bilong yumi i no bungim ol lain i les long yumi, yumi mas tingting gut na skelim laip na wokabaut bilong yumi. Krais i bungim planti bel kros na hevi, na yumi i lain bilong bihainim em. Buk Baibel i tok olsem ol lain bilong God bai bungim pen na hevi. Yumi i gat laik long stap isi, tasol em bai nogat. Krais i no promisim yumi long stap isi long dispela graun. Sapos yumi stap isi, orait em i narakain samting stret. Na sapos yumi stap isi, yumi mas mekim hat wok stret long yusim dispela fridom long autim tok bilong God. Yumi i mas tingting gut na prea strong, nogut yumi i laik stap isi tasol na i no redi long pesim ol pen na hevi. Pita i tok olsem, ol traim olsem paia bai kamap long lain bilong God. Na i gat tripela as bilong dispela. Namba wan as Pita i givim yumi i olsem: Yumi i mas skelim gut olgeta samting long painimaut em i trupela na em inap stap strong oltaim. Olsem na yumi mas skelim na traim olgeta Kristen bilip long paia. Namba tu samting, Krais i skulim yumi olsem i gat wanpela rot tasol long kamap long glori bilong kingdom bilong em. Dispela em i rot bilong bihainim tok bilong em na bilong daunim yu yet. Olsem na ol Kristen bai bungim ol hevi na traim long bel bilong ol yet na ol hevi na traim i kam long ol arapela. Namba tri samting, sapos yumi laik wanbel wantaim Krais long tude, yumi mas poromanim em long hevi na pen bilong em tu. Sapos yu bungim ol hevi long nem bilong Krais, orait you ken amamas – na dispela amamas em i narakain stret na ol lain bilong dispela graun bai paul long dispela amamas. Ol lain i bungim ol hevi na pen long nem bilong Krais long tude, ol bai i pilim wanbel wantaim Krais, em i dai long diwai kros long yumi.
SAMPELA TINGTING
Yu save bungim ol hevi na pen long nem bilong Krais, o nogat?
Ritim: 1 Pita 2:18-25
God i singautim yupela pinis bilong bihainim dispela kain pasin, long wanem, Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim. – 1 Pita 2:21
Wanpela taim bipo, Pita i bin kamap olsem mausman bilong Satan taim em i wok long pasim Jisas long go long diwai kros. Tasol long dispela namba wan pas bilong Pita, em i kamap olsem wokboi bilong Holi Spirit, na em i stori long pen na hevi bilong Jisas, na em i skulim yumi olgeta long pasin bilong wokabaut long dispela rot bilong Bikpela bilong yumi. Ol hevi na pen bilong Jisas i gat tupela hap. Pita i stori long dispela tupela samting: Krais i bin karim pen bilong helpim yupela na em i soim yupela pinis dispela pasin bilong em, bai yupela i ken bihainim. “Long yupela” i min olsem em i kisim ples bilong yumi na em i bungim hevi na pen. Dispela hevi na pen i pinis nau na i no inap kamap gen. Em i karim hevi na pen long sin bilong yumi olgeta, na long oltaim oltaim. Tasol, dispela narapela hap bilong pen na hevi bilong Jisas, em i olsem: Yumi i mas pormomanim Jisas long karim pen na hevi sapos yumi laik bihainim em. Em i soim yumi pinis dispela pasin bilong em, bai yumi i ken bihainim. Em i rot yumi mas wokabaut long en. Yumi i mas bihainim wokabaut bilong Jisas. I no gat wanpela bilong yumi inap wokabaut long rot bilong yumi yet, na stap wanpis na mekim olsem. Yumi i lain bilong bihainim – bihainim Jisas. Yumi olgeta i gat laik long bihainim kain kain samting. Ol yangpela lain i amamas long bihainim ol man bilong pilai spot. Yumi i gat laik long amamasim ol arapela lain. O sampela taim bai yumi lukim sampela samting long TV na yumi gat laik long bihainim pasin yumi lukim. Tasol Krais i kam long olgeta lain long olgeta kantri na em i givim yumi wanpela nupela narakain rot long bihainim. Long laikim tru, em i strong long tokim olgeta manmeri, “Bihainim mi.” Em i no laik sapos yumi bihainim ol pasin bilong ol arapela tasol long dispela graun. Em i gat laik sapos yumi tingting gut na harim tok bilong em. Na yumi mas beten: “Skulim mi, Bikpela, long bihainim laik na tingting bilong yu!” Krais i karim pen na hevi long yumi. Na em i soim yumi pinis dispela pasin bilong em, bai yumi ken bihainim.
SAMPELA TINGTING
“Em (Krais) i no gat laik sapos yumi bihainim ol pasin bilong ol arapela tasol long dispela graun.” Olsem wanem long yu? Yu save gat laik long bihainim ol pasin bilong ol arapela tasol long dispela graun, o nogat?
Ritim: Jon 21:15-19
Na bihain em (Jisas) i tokim Pita olsem, “Yu bihainim mi.” – Jon 21:19
Taim Jisas i dai, Pita i bel hevi tru. I olsem em i lusim masta bilong em tupela taim – wanpela taim long dai bilong em, na narapela taim, taim em i tok olsem em i no save long Jisas. “Tru antap, mi no save long dispela man yupela i tok long en,” Pita i bin tok olsem. Tasol Krais i wok long kisim Pita i kam wanbel wantaim em gen. Pastaim, ensel i tokim ol meri, “Yupela i mas i go givim dispela tok long ol disaipel bilong en, na long Pita tu…” (Mak 16:7). I min olsem: “Pita, dispela gutnius em i samting bilong yu, tu. Yu bilong mi yet!” Namba tu samting i kamap taim Jisas i soim em yet long Pita. Yumi i no save, Jisas tupela Pita i stori long wanem samting long dispela taim. Em i samting bilong tupela yet. Tasol yumi save olsem dispela samting i bin kamap (Luk 24:34; 1 Korin 15:5). Na namba tri samting i soim klia olsem Pita i wanbel tru wantaim Jisas gen i olsem: Em i taim bilong tudak gen, na wanpela paia i stap gen tu – kain olsem long dispela nait taim Jisas i stap long kaunsel. Tripela askim i kamap na Pita i mas bekim tripela taim – “Saimon, pikinini bilong Jon, yu laikim mi, o nogat?” Na Pita i bekim olsem, “Yes, Bikpela, yu save, mi laikim yu.” Tasol long namba tri taim Pita i bel hevi long Jisas i askim em namba 3 taim “Yu laikim mi, o nogat.” Na pinis bilong dispela i kamap olsem wanem? Em i pinis long dispela tok bilong bipo: “Yu bihainim mi.” Tasol nau dispela tok i gat bikpela mining moa long laip bilong Pita. Namba wan taim em i bin kisim dispela tok em i bin redi long mekim wok bilong Krais hariap. Tasol bihain em i bin givim baksait long Jisas, na nau em i wanbel gen wantaim Jisas – long pret, na bilip na long pasin bilong tanim bel. “Bikpela, yu save long olgeta samting. Yu save, mi laikim yu.” Olgeta man o meri i bihainim Krais i bin bungim dispela kain tingting olsem Pita. Em i rot bilong lainim planti samting, bilong bilip long Krais na bilong daunim yumi yet. Dispela rot bilong bihainim Jisas i no isi, tasol marimari bilong Jisas i pulim yumi i kam bihainim em olgeta taim. Taim yumi lukluk long Jisas, na yumi i les na paul na yumi wari stret, em bai i tokim yumi, “Bihainim mi.”
SAMPELA TINGTING
Larim Spirit bilong God i ken stiaim yu long autim ol sin bilong yu long God na askim em long helpim yu i wanbel wantaim em long singaut bilong em: “Bihainim mi.”
Ritim: Mak 14:66-72
Na em i lukim Pita i hatim skin bilong en i stap. Na dispela wokmeri i lukluk stret long em, na i tok, “Yu tu yu bin i stap wantaim Jisas bilong Nasaret.” Tasol Pita i tok nogat olsem, “Mi no save tru long dispela tok yu mekim.” – Mak 14:67-68
Pita em i man bilong bihainim Jisas, tasol long wanpela taim em i no inap bihainim em moa. Em tru, em i laikim em tumas. Long gaden Getsemani, taim ol i kam na putim han long Jisas long holimpasim em, Pita i kisim bainat bilong en na i paitim wokboi bilong hetpris, na bainat i katim yau bilong en na yau i pundaun. Yes, Pita i laikim Jisas tumas. Tasol Jisas i tokim Pita olsem em i no ken mekim olsem, na em i stretim yau bilong dispela man. Tasol nau Pita i stap daunbilo long banis bilong haus. Em inap lukim Jisas taim em i stap long kaunsel. Blut i stap long pes bilong Jisas, em i no toktok, na ol i daunim em nogut tru. Jisas i luk olsem wanpela pikinini sipsip ol bai i kilim i dai. Na bel bilong Pita i paul stret. Olsem wanem dispela king i stap olsem nau? Hau bai em i bihainim dispela man i karim planti hevi na pen tru, tasol em i no pait. Nogat, Jisas i daunim em yet na em i karim ol dispela pen. Wanpela wokmeri i lukim em na i tok, “Yu tu yu bin i stap wantaim Jisas bilong Nasaret.” Tasol Pita i tok, “Mi no save tru long dispela tok yu mekim.” Na em i go ausait klostu long dua bilong haus. Na wanpela kakaruk i krai. Na dispela wokmeri i lukim em gen, na em i tokim ol man i sanap klostu long em olsem, “Dispela man hia em i man bilong lain bilong ol.” Tasol em i tok gen, “Nogat.” Bihain liklik, ol man i sanap i stap klostu long em, ol i tok gen long Pita olsem, “Tru tumas, yu man bilong lain bilong ol. Yu man bilong Galili tasol.” Orait nau Pita i tok strong moa yet olsem, “Tru antap, mi no save long dispela man yupela i tok long en. Sapos mi no tok tru, orait God i ken bagarapim mi.” Em i tok pinis, na wantu kakaruk i krai namba 2 taim. Em i stat bilong Gut Fraide. Dispela King i kamap olsem pikinini sipsip. Na Pita i sanap na i krai moa yet. Tasol long krai bilong em sampela hop i stap. Taim ol Kristen i pundaun long sin, na taim ol i lus tingting long bihainim Jisas o i pret long autim nem bilong em, ol i ken tanim bel na kam bek long God long diwai kros bilong Jisas.
SAMPELA TINGTING
Sampela taim yu yet yu pret long autim nem bilong Jisas tu?
Ritim: Mak 1:14-20
Na Jisas i tokim tupela olsem, “Yutupela kam bihainim mi, na bai mi lainim yutupela long pasin bilong kisim ol manmeri. – Mak 1:17
Long dispela de papa bilong Saimon na Andru i lusim tupela pikinini man bilong em i go long Jisas. Na tupela pikinini man bilong papa Sebedi, Jems na Jon, tupela i lusim wok bilong painim pis na tupela i go bihainim Jisas. Dispela em i naispela rot stret bilong lusim ol pikinini bilong yu! Wanem samting i save kirapim ol man long bihainim Jisas? Olsem wanem Abraham i lusim kantri bilong em na i go long Kenan? Dispela tok “kam bihainim mi” i bikpela samting. Tasol dispela tok i sampela samting moa yet bikos planti lain i save harim dispela tok, “kam bihainim mi.” Tasol sampela bai harim tru dispela tok na sampela arapela bai nogat. Ol lain i bilip long Jisas tasol bai harim tru dispela tok. Ol lain i bihainim Jisas, i bilip olsem Krais em i rot, na em i trupela rot, na i no gat narapela rot. Ol lain i bihainim em, ol i save olsem ol i mas harim singaut bilong em. Sapos nogat, ol bai i lus. Sapos yu bilip long Jisas, orait yu bai harim singaut bilong em, “kam bihainim mi.” Em i wankain long dispela bisnisman i save salim ol naispela bis. Wanpela de em i lukim wanpela bis i gutpela tru na em i laik kisim. Olsem na em i go salim olgeta samting bilong en bilong kisim dispela gutpela bis (Matyu 13:46). Na aposel Pol i tokim yumi olsem, “Wanem kain laip yumi bin i stap long en long taim God i singautim yumi, orait yumi mas i stap yet long dispela kain laip”(1 Korin 7:20, 24). Na planti manmeri i paul taim God i singautim ol, na ol i ting olsem ol i mas hariap na mekim nupela kain wok olsem kamap pasto o narapela kain wok olsem. Nogat. Tasol, sapos laip bilong yu i no senis long taim Jisas i singautim yu long bihainim em, orait, i olsem yu no bin harim tok bilong em. Pasin bilong yumi mas senis olgeta; wok bilong yumi nogat! Yumi mas senisim pasin bilong yumi na mekim wok bilong em insait long dispela laip em i givim yumi pinis. Bipo tingting bilong yumi i pulap long kain kain samting, tasol Krais i kisim bek yumi long ol dispela samting. Nau, laip bilong yumi i mas pulap long Krais. Sampela taim rot bilong yumi bai i hat tru, na yumi bai bungim ol hevi na pen. Tasol, maski, bai yumi bilip! “Pikinini Sipsip bilong God – mi kam!”
SAMPELA TINGTING
Yumi mas bekim singaut bilong Jisas olsem: “Pikinini Sipsip bilong God – mi kam, mi kam!”
Ritim: Mak 8:27-38
Olsem tasol Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri. – Matyu 20:28
Long taim bilong bikpela pait (World War II) long England, Winston Churchill, olsem Praim Minista bilong dispela kantri i tokim ol man olsem, “Mi inap givim yu blut, na krai na hat wok stret tasol.” Em i save olsem em bai i hat wok stret long winim dispela pait; na ol lain long kantri i bilipim em na bihainim em bikos ol i save i no gat narapela rot bilong winim pait. Taim Krais i singautim yumi long bihainim em, em i askim yumi long daunim yumi yet na karim diwai kros bilong yumi – em i “blut, na krai na hat wok stret.” Yumi i mas bilipim em na bihainim tok bilong em bikos i no gat narapela rot bilong winim pait. Ol narapela rot bai stiaim yumi i go lusim pait. Ol man bilong bihainim Jisas i mas daunim ol yet na karim diwai kros bilong ol tu. Long klia gut long dispela, yumi mas lukluk long Krais yet, em i bihainim rot bilong laikim tru na bilong bihainim tok bilong God. Pasin bilong daunim yumi yet na karim diwai kros bilong yumi i no samting bilong tok nogat long sampela liklik naispela samting tasol. Sampela lain i ting olsem ol i daunim ol yet taim ol i tok nogat long sampela naispela kaikai. Na sampela lain i ting olsem ol i karim diwai kros bilong ol taim ol i bungim sampela hevi planti lain long dispela graun i save bungim – na i no ol hevi ol lain bilong Krais tasol i save bungim. Nogat. Em i hat tru long klia long mining bilong dispela tok, “pasin bilong daunim yumi yet na bilong karim diwai kros bilong yumi.” Em i samting bilong i dai na i stap laip wantaim. Yumi no inap lainim dispela samting hariap. Taim yumi stap long dispela graun, yumi i mas wok strong long lainim ol gutpela pasin bilong bihainim Jisas. Yumi no ken tok olsem yumi i save pinis long daunim yumi yet na long karim diwai kros bilong yumi!
SAMPELA TINGTING
Askim God long helpim yu long daunim yu yet na karim diwai kros bilong yu tu.
Ritim: Matyu 20:20-28
Olsem tasol Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri. – Matyu 20:28
Laip bilong Jisas i pulap long pasin bilong helpim ol arapela, na long dai bilong em i givim em yet long helpim ol arapela. Na dispela pasin, bilong givim yu yet long helpim ol arapela, em i samting yumi yet i mas bihainim. Em i dai long helpim yumi i kamap redi long mekim olsem. Long dai bilong em yet, Jisas i baim bek yumi. Dispela tok “kisim bek” i olsem dispela tok bilong “ransom” taim wanpela man nogut i stilim (kidnapim) arapela man, na toktok long kisim sampela bikpela mani stret bipo em bai larim dispela man i go bek long famili bilong em. I olsem dispela namba tu man i kamap long kalabus bilong man nogut, na planti taim em bai dai long kalabus long dispela man. Tasol sapos narapela i baim bek (ransom) dispela man long kalabus, orait em bai i kisim laip na stap fri. Bikos Krais i givim laip bilong em long baim bek ol lain i bilip long em, orait yumi no stap moa aninit long pawa bilong man nogut. Yumi i gat nupela Bosman bilong yumi. Nau yumi ken i stap long haus bilong Papa bilong yumi. Tasol yumi mas bihainim ol lo bilong dispela haus, na bihainim pasin bilong Krais, em i no bin kam bilong ol man i ken mekim wok bilong helpim em. Nogat. Em i kam bilong helpim ol. Jisas i tok olsem em i givim laip bilong em bilong baim bek planti manmeri. Dispela tok “planti” i no min olgeta manmeri. Em i dai long lain bilong em yet tasol. Tasol taim Krais i tok “bilong baim bek planti manmeri,” em laik soim olsem em wanpela i bin dai long planti ol arapela manmeri. Dispela em i bikpela samting! I gat planti ol stori bilong ol bikpela pait. Na yumi no ken ting olsem ol pait i gutpela samting, tasol i gat sampela stori insait long ol dispela stori bilong pait i naispela tru. Sampela taim yumi ken ritim stori long wanpela solidia insait long wanpela pait i bin tromoi em yet long wanpela bom o wanpela grenade samting long lukautim ol arapela soldia. Em i dai, na ol arapela i stap laip. Dispela kain stori i putim ples klia dispela tok, “wanpela i dai long planti manmeri.” Laip bilong Jisas i soim yumi wanem kain pasin yumi mas bihainim – pasin bilong helpim ol arapela. Long dai bilong em yet, em i mekim yumi i stap fri bilong mekim olsem!
SAMPELA TINGTING
Ating sapos wanpela soldia i givim laip bilong em yet long lukautim laip bilong yu yet, yu bai amamas tru na tenk yu tru. Olsem wanem nau long wok bilong Krais bilong baim bek yu yet?
Ritim: Jon 13:12-20
Olsem tasol Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri. – Matyu 20:28
Tude, sapos yu wokboi long wanpela kampani bai yu kisim pe long wok bilong yu. Tasol long taim bilong Buk Baibel, sapos yu stap olsem wokboi, i min olsem yu no save kisim pe long wok bilong yu. Olsem na ol lain long Juda i save paul taim ol i tok olsem wanpela king em i wanpela wokboi wantaim. Ol wokboi i save mekim wok bilong ol wokboi, tasol wanpela king em i gat bikpela namba na ol arapela lain i save brukim skru long ol king. Olsem na, taim dispela King i tok, “mi no bin i kam bilong ol man i ken mekim wok bilong helpim mi. Nogat. Mi i kam bilong helpim ol,” ol lain Juda i paul tru. Na sapos yumi tingting gut long dispela ating yumi bai kirap nogut tu. Yumi mas wok long klia gut long Jisas em i husat, olsem Buk Baibel i skulim yumi. Nogut tingting bilong yumi paul long Jisas em i husat. Dispela Jisas i kam long helpim ol arapela, em i singautim olgeta manmeri long kam bihainim em. Dispela pasin bilong bihainim em i no samting bilong senisim sampela tok bilong yumi o sampela pasin nogut bilong yumi tasol. Nogat. Em i samting bilong senisim tingting na laip bilong yumi olgeta. Yumi no ken tingting long kisim pe taim yumi stap olsem wokboi bilong Bikpela. Sapos yumi les, orait yumi no bilong Jisas Krais. Tasol, taim yumi daunim yumi yet, na bihainim em tru, bai yumi klia olsem em i gutpela tru long stap lain bilong Jisas Krais.
SAMPELA TINGTING
Yu stap wokboi bilong God olsem wanem?
Ritim: Jems 1:12-21
Na yu no ken larim ol traim i kamap long mipela, tasol yu ken kisim bek mipela long ol samting nogut. – Matyu 6:13
I no gat wanpela Kristen inap abrusim dispela pait. Sapos yumi bilip long Bikpela na autim nem bilong em, orait bai yumi bungim birua bilong yumi. Sapos dispela em i tru, watpo nau Bikpela i skulim yumi long prea olsem, “Na yu no ken larim ol traim i kamap long mipela”? Bikos yumi no ken go hariap long ol traim long strong bilong yumi yet. Krais yet i pret long ol traim! Ol Kristen i mas prea na askim God long no ken larim ol traim i kamap long ol. Yumi save olsem yumi wik, na yumi no gat strong. Sampela lain i no strong tumas long bilip bilong ol, i olsem ol liklik pikinini i ting olsem ol pait i samting bilong pilai tasol. Tasol ol strongpela Kristen bai prea olsem: “Na yu no ken larim ol traim i kamap long mipela.” Na tu, ol yet i wok long abrusim ol traim. Ol Kristen i no ken wok long kamap klostu long snek nogut, long Satan. Nogat, ol i mas wok long stap longwe tru long Satan. God i no save pulim yumi long mekim pasin nogut (Jems 2:13). Satan tasol i save mekim olsem. Tasol God i save stiaim laip bilong yumi. Olsem na long God yumi save beten, “Na yu no ken larim ol traim i kamap long mipela.” Olsem na, maski yumi no gat laik long kamap long pait, sapos God i stiaim yumi i go long pait, bai yumi pait. God i no save stiaim yumi i go long pait bilong kilim yumi; nogat, em i mekim olsem bikos dispela em i rot bilong win na kisim bel isi. Yumi mas prea long stap longwe long ol bikpela pait, na yumi no ken wok long painim ol pait. Tasol sapos long laik bilong God Papa em i kisim yumi go long ol hevi bilong pait, yumi mas bilip olsem dispela samting bai mekim gut long yumi. Na yumi mas harim dispela tok long Buk Baibel: “Man i save sanap strong na i karim hevi long olgeta traim, em i ken amamas. Sapos em i winim pinis olgeta traim, orait God bai i givim em laip bilong i stap gut oltaim, olsem prais bilong en. God i tok pinis long givim dispela prais long olgeta man i save laikim em tru” (Jems 1:12). Ol Kristen i save wok long abrusim ol pait wantaim birua bilong ol (Satan): “No ken larim ol traim i kamap long mipela.” Tasol taim ol Kristen i kamap long pait, ol bai kisim strong na pawa bilong stap gut!
SAMPELA TINGTING
Yu save bungim ol traim long bilip bilong yu? Olsem wanem?
Ritim: Efesus 6:10-18
Yupela i mas pasim olgeta klos pait God i save givim long yumi, na bai yupela inap long sanap strong na sakim olgeta kain pasin bilong trik na giaman Satan i save hait na mekim. – Efesus 6:11
Sapos yumi no kisim gutpela skul pastaim, bai yumi no inap kamap olsem soldia o ofisa long ami. Na sapos ami i no gat gutpela skul, na i no gat gutpela ol trening na ol i les long lainim pasin bilong bihainim ol stretpela pasin, hau bai ol soldia i mekim gutpela wok? Na em i wankain long sios bilong God. Yumi nidim gutpela trening na skul! Tasol planti lain bilong sios tude i save les long kisim skul na trening, na long lainim pasin bilong bihainim ol stretpela pasin. Taim yumi tingting long skul na trening, yumi save tingting long ol pikinini na yangpela manmeri. Na em i tru, em i gutpela sapos yumi go long skul na kisim trening taim yumi yangpela. Tasol planti manmeri i lus tingting long kisim skul taim ol i kamap bikpela. Olsem na, i olsem sios em i pulap long ol pikinini i no gat gutpela save. Tasol long sanap strong na pait long Satan, yumi mas i stap man na meri bilong God. Sapos yu gat wanpela gutpela wok, bai yu wok long kisim trening olgeta taim yu stap insait long dispela wok. Sapos nogat, bai wok bilong yu i pundaun. Na long skul bilong God em i bikpela samting moa. Trening bilong yumi i kirap taim yumi stap wanpela bebi, na i mas i go inap long taim God i singautim yumi long go long heven. Long ami ol soldia i save lainim pasin bilong bihainim ol stretpela pasin na lo hariap. Na yumi, long dispela pait long Satan, yumi mas lainim dispela pasin hariap tu. Sapos nogat, bai yumi no inap winim dispela pait. Yumi mas klia gut long tok na lo bilong God na hariap long bihainim. Yumi i stap long wanpela bikpela pait! Krais i bosim yumi na em i gat namba bilong mekim olsem. Tasol planti ol Kristen i no save gut long ol lo na tok bilong Bosman bilong ol. Na taim ol i harim ol dispela lo, planti ol bai wok long abrusim ol dispela lo. Tasol yumi mas pasim olgeta klos pait God i save givim yumi, ol samting God i givim yumi long lukautim yumi. Sapos nogat, bai yumi no inap sanap strong long “taim nogut” (lain 13). Na dispela taim nogut i kamap pinis.
SAMPELA TINGTING
Yu yet yu stap long trening long sait bilong spiritual wokabaut bilong yu? Na yu i wanpela man o meri bilong bihainim tok na lo bilong God hariap, o nogat?
Ritim: Kamapim Tok Hait 12:1-6,13-17
Dispela snek em i lukim olsem ol i tromoi em i go daun pinis long graun, na em i go ranim dispela meri i bin karim pikinini man. – Kamapim Tok Hait 12:13
Krais i winim dispela pait long Satan pinis, tasol i no min olsem olgeta pait i pinis nau. Dispela pait i stap yet na em i bikpela pait tru! Olsem na, dispela tok olsem Krais i winim pait, i gat wanem mining? Em bai helpim yumi olsem wanem? “Dispela snek (Satan) i lukim olsem ol i tromoi em i go daun pinis long graun.” I min olsem Satan i no go pas long dispela pait; em i no bosman. Tasol Jisas (dispela “pikinini man”) em i lusim graun na i go antap long heven. Em i stap long heven olsem king bilong bosim dispela graun. Em i bosman tru. “Orait kwiktaim ol i kisim pikinini i go antap, na ol i bringim em i go long God na long sia king bilong em” (lain 5). Satan i gat rot long pait yet, na long traim yumi, na long grisim yumi; tasol em i no bosman moa. Jisas yet i bosim olgeta samting: “Long wanem, wanpela pikinini man i kamap pinis long yumi, em wanpela pikinini God i givim long yumi. Em bai i stap king bilong yumi, na em bai i gat ol dispela nem, ‘Man bilong givim gutpela tingting tru’ na ‘God i gat bikpela strong’ na ‘Papa bilong i stap oltaim oltaim’ na ‘King bilong kamapim gutpela sindaun na bel isi’ (Aisaia 9:6). Dispela snek nogut i bel kros nogut tru long dispela meri i bin karim dispela pikinini man. Em i pikinini meri bilong Saion, na em i meri bilong krai bilong Betlehem. Em i mama bilong olgeta lain i save karim pen na hevi long nem bilong Jisas. Em i makim ol lain bilong God, dispela sios bilong God bilong oltaim oltaim. Yumi no ken ting, orait Jisas i bungim ol traim long Satan, olsem na bai mi abrusim ol pen na hevi na traim bilong em. Jisas i no tok olsem. Long bilip yumi save olsem Jisas em i Bikpela, maski yumi no lukim dispela samting nau. Yumi i mas bilipim dispela na wokabaut long rot bilong dispela bilip. I min olsem yumi mas bihainim tok bilong Bikpela, na yumi no ken pret, bikos “dispela man em i makim bilong kisim bek ol manmeri bilong en, em i kisim pinis bikpela namba na strong” (lain 10). Trustim Bikpela. Hop long em. Em bai i lukautim yumi na strongim yumi. Em bai i givim tupela wing bilong tarangau long yumi long karim yumi (lain 4). Bihainim lo bilong God na autim tok bilong em (lain 17). “Strongim mi, Bikpela, bikos mi save olsem mi mas pait sapos mi laik stap wantaim yu long heven; long strong bilong Tok bilong Yu, bai mi stap strong long ol pen na ol traim” (Isaac Watts).
SAMPELA TINGTING
Yusim dispela tok bilong Isaac Watts olsem prea bilong yu yet.
Ritim: Matyu 27:32-44
Em i bin helpim ol arapela man, tasol em i no inap helpim em yet. Em i king bilong Israel. Orait em i ken lusim diwai kros na i kam daun, na bai yumi bilip long em. – Matyu 27:42
Jisas i hangamap pinis long diwai kros. Rot bilong bihainim tok bilong God i kisim em i go long dispela rot bilong pen na hevi. Em i kamap long las hap bilong dispela pen na hevi, na em i taim nogut tru. Satan i wari nogut tru, tasol em i no redi long lus tingting long wok long pasim rot bilong God. Nogat, em i strong long mekim wok bilong em, tasol Holi Spirit i strong moa yet na em i no inap pinis long mekim wok bilong em. Satan i laik yusim Herot long kilim bebi Jisas. Satan yet i wok long traim Jisas long ples drai. Long Pita, Satan i wok long pasim dispela Mesaia long wokabaut long dispela rot i go long diwai kros. Na nau, taim Jisas i stap long diwai kros, Satan i wok yet long bagarapim wok bilong em. Olgeta manmeri i krai, “Em i bin helpim ol arapela man, tasol em i no inap helpim em yet!” Dispela tok i olsem poisen bilong bagarapim em. Ol i wok long daunim em, long grisim em, kain olsem ol liklik pikinini i wok long singaut long ol arapela pikinini, “Goan; yu kam kisim mi! Yu kam kisim mi!” Na wantu ol i ranawe. Olgeta manmeri i grisim em moa yet: “Orait em i ken lusim diwai kros na i kam daun, na bai yumi bilip long em.” Olgeta manmeri i no klia tumas wanem samting ol i autim. Tasol God i save, na Satan i klia tru. Jisas i harim tok bilong Satan insait long dispela tok. Wanpela bikpela pait i stap namel long dispela samting. Ol ensel na ol dimon i klia tru long dispela, tasol olgeta manmeri i no save gut long dispela. Ol i no inap save tru long dispela sapos God i no opim ai na bel bilong ol. Na Jisas i stap long diwai kros na karim bikpela pen tru. Ol traim bilong Satan i strongpela tru; ol i hat tru. Pen bilong dispela traim i winim pen long han bilong Jisas taim ol i nilim em long diwai kros. Tasol em i no lusim diwai kros. Em i hangamap i stap. Jisas i klia long dispela: “Sapos mi laik kisim bek ol arapela, mi no inap kisim bek mi yet. Yu go baksait long mi, Satan!” Em i no ol dispela nil i holim Jisas i stap long diwai kros. Laikim tru bilong em yet i holim em. Litimapim nem bilong Bikpela!
SAMPELA TINGTING
Tok tenkyu long God na presim em bikos Jisas i no lusim diwai kros long wanem em i laikim yu tru!
Ritim: Matyu 16:13-23
Na Jisas i tanim na i tokim Pita olsem, “Satan, yu go baksait long mi!” – Matyu 16:23
Ol dimon na spirit nogut tasol inap luksave long Jisas olsem King bilong dispela graun. Sampela taim ol man i luksave long em bikos God yet i helpim ol i mekim ol olsem. Spirit bilong God i helpim Simeon long save olsem bebi Jisas em i King bilong promis (Luk 2:27). Na ol saveman i kam long Betlehem bikos God yet i stiaim ol long go (Matyu 2). Na Pita tu i luksave long Jisas, tasol Papa God i bin tokim em olsem. Pita i autim dispela tok long Jisas: “Yu dispela man God i bin makim bilong kisim bek ol manmeri bilong en. Yu Pikinini bilong God i gat laip.” Na dispela tok bilong Pita i kamap olsem bikpela tok tru long sios bilong God long olgeta taim. Na taim Pita i autim dispela tok, Jisas i stat long tokim ol disaipel olsem em i mas i go long Jerusalem, na em i mas karim planti pen long han bilong ol hetman wantaim ol bikpris na ol saveman bilong lo. Na wantu Satan i kirap na mekim wok, bikos Satan em i save olsem dispela King bai kisim bek ol lain bilong em long rot bilong pen na hevi. Satan inap yusim ol king nogut (olsem Herot, taim em i kilim ol pikinini man i no winim 2-pela Krismas yet long Betlehem) long mekim wok nogut bilong em, tasol em inap yusim ol poro bilong Jisas tu. Long hia Pita yet, dispela man i autim dispela bikpela tok tru, em i kamap olsem wokboi bilong Satan. Em i tok, “Bikpela, nogat tru. Dispela samting i no inap kamap long yu.” Pita i ting olsem dispela King i no inap bungim pen na hevi long kisim bek ol lain bilong em. Tasol long hia Pita i olsem mausman bilong Satan. Satan i save olsem pawa bilong em yet i wok long lus, taim Krais i redim em yet long bihainim tok bilong God inap long dai bilong em yet. Jisas i tok, “Satan, yu go baksait long mi. Yu laik pasim rot bilong mi. Yu no bihainim tingting bilong God. Nogat. Yu bihainim tingting bilong ol man tasol.” I no gat wanpela man, maski em i poro o em i birua bilong Jisas, inap pasim em long wokabaut long dispela rot bilong bihainim tok bilong God.
SAMPELA TINGTING
Satan i save grisim yu olsem wanem long lusim dispela rot bilong bihainim tok bilong God?
Ritim: Lo 8:1-8
Tasol Jisas i bekim tok olsem, “Buk bilong God i gat tok olsem, ‘Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.’” – Matyu 4:4
Long Matyu yumi ritim stori long taim Satan i bung wantaim King bilong Israel, Jisas. Pait i kirap nau. Matyu 4:8-9 i tok olsem Satan i tok long givim olgeta strongpela kantri long dispela graun long Jisas. Husat bai bosim dispela graun - Satan o Jisas? Husat bai win? Tasol, dispela pait i no samting bilong strong na pawa tasol. Nogat. Dispela pait em i samting long bihainim tok bilong God. Kingdom bilong God bai kam taim God inapim laik na plen bilong em. Rot bilong winim Satan em i pasin bilong bihainim tok bilong Papa God. Satan i mekim planti wok long grisim olgeta manmeri long dispela graun. Adam i pundaun na sakim tok bilong God. Israel tu i pundaun long sin. Taim ol i stap long ples drai inap long 40 yia, God i traim ol long luksave olsem ol bai i bihainim ol lo bilong em o nogat. Em i “daunim” ol na em i givim mana olsem kaikai bilong ol bai ol i ken save olsem, “yumi man i no inap kisim laip long kaikai tasol. Nogat. Yumi mas bihainim olgeta tok bilong God tu na bai yumi kisim laip” (Lo 8:3). Yumi olgeta i mas tingim dispela. Yumi olgeta i mas lainim olsem, yumi man i no inap kisim laip long kaikai tasol. Yumi i mas bihainim olgeta tok bilong God tu na bai yumi kisim laip. Long dispela teks Jisas i bihainim wankain rot olsem Israel i wokabaut long en. Jisas i wokabaut 40-pela de long ples drai. Na Satan i kam long grisim em. “Pastaim,” Satan i tok, “pastaim yu mas kaikai. Sapos i tru yu Pikinini Bilong God, orait yu tok na ol dispela ston i ken tanim na i kamap bret.” Tasol Jisas i no tingting long yusim pawa bilong em long stap laip. Em bai yusim pawa bilong em long bihainim tok bilong God inap long dai bilong em. Olsem na em i tok, “Buk bilong God i gat tok olsem, ‘Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.’” Em mobeta long bihainim tok bilong God na stap hangre, olsem long kisim bret na mekim sin.
SAMPELA TINGTING
Dispela ol tok i gat wanem mining insait long laip bilong yu yet?
Ritim: Matyu 2:7-18
Taim Herot i save olsem, ol saveman bilong hap sankamap i bin giamanim em, orait bel bilong en i hat moa. Na em i salim sampela man i go long taun Betlehem na long ol ples i stap klostu long taun, na ol i kilim i dai olgeta pikinini man i no winim tupela krismas yet. – Matyu 2:16
I no gat wanpela i save gut long pawa tru bilong dispela nupela King – Satan tasol i save long dispela. Em i yusim Herot, olsem wokman bilong em, long inapim plen bilong em bilong kilim dispela nupela king. Tasol God i wok hariap moa. Satan, “bipo yet i stap man bilong kilim ol man i dai” (Jon 8:44). Planti yia bipo long Herot, wanpela narapela king, king bilong Isip, olsem wokman bilong Satan, i bin kilim ol pikinini man bilong Israel. Na Moses, man bilong kisim bek Israel, i abrusim dispela wok bilong king bilong Isip na em i stap laip. Moa yet, em i kisim ol gutpela samting, olsem kaikai na skul, long haus bilong king bilong Isip yet. God i lap! Na long dispela taim, taim Herot i laik kilim ol pikinini man long Betlehem, Jisas, man bilong kisim bek yumi, em i abrusim dispela plen bilong Satan. Krais i wok long inapim olgeta samting long Olpela Testamen. Em i no naispela samting i bin kamap long Betlehem. Planti ol mama i krai i stap na holim pikinini man bilong ol i dai pinis. Ol Papa tu i krai na belhat. Husat bai mekim save long dispela man i bin kilim i dai ol pikinini long lain bilong God? Na long tingim yumi long ol hevi na krai bilong lain bilong God, Jon i stori long Resel, dispela mama i krai long Betlehem. Em i dai taim em i karim pikinini, na em i kolim nem bilong dispela pikinini Benoni, i min “pikinini mi karim wantaim planti pen” (Stat 35:18). Ol lain bilong God long stat bilong dispela graun i kam inap long tude i save bungim planti pen na hevi tru. Laip bilong ol i pulap long krai. Satan i wok long bagarapim ol na God i wok long kotim ol. Mama bilong ol i krai nogut tru, na ol i les long kisim bel isi. Man bilong helpim ol na kisim bek ol i stap we? Tasol nau tok bilong kisim bel isi i kam pinis: mekim drai ai wari i stap long ai bilong yu ol mama bilong Betlehem. Kisim strong, ol pikinini meri bilong Saion. Taun bilong Devit i karim wanpela pikinini man, em i pikinini bilong Devit. Saviour bilong yu i stap laip. God i kam pinis bilong pait long helpim ol manmeri bilong em. God inapim olgeta plen bilong em. Aiwara i ken kam daun long nait, tasol long moningtaim amamas bai kam gen (Buk Song 30:5). Jisas bai kam long kisim bek ol lain bilong em. Na em yet bai karim na kisim ol hevi na krai bilong yumi.
SAMPELA TINGTING
Tingting long wok bilong Krais long kisim bek yu, na tok tenkyu long em.
Ritim: Buk Song 72:1-11
Nupela pikinini em king bilong ol Juda, em i stap we? – Matyu 2:2
Dispela King bilong Israel, dispela king bilong promis, em i stap olsem wanpela wokboi nating long dispela graun na em i dai olsem wanpela man nogut. Em i narakain samting tru, na sapos yumi tingting gut long dispela, bai yumi kirap nogut. Na tu, dispela gutnius long ol pen na bel hevi bilong dispela king, bai i kliaim sampela samting long laip bilong yumi ol lain i bilip long Jisas Krais. Tude, ol dispela lain bilong dispela king i mas karim bel hevi na pen bilong dispela king tu. Long helpim yumi klia gut long dispela bikpela samting long gutnius, em bai i gutpela sapos yumi klia gut long ol king bilong bipo tru. Tude, yumi no save gut long pawa na ona bilong ol king bilong bipo. Long bipo ol man ol i stap liklik tru long ai bilong ol king, olsem ol i samting nating tasol. Long taim bipo i olsem ol king i no man tru – ol i olsem wanpela god. Na taim yumi klia long dispela, em bai helpim yumi long klia olsem Jisas em i King, na dispela em i bikpela samting stret. Olpela Testamen i pulap long ol promis long dispela strongpela king stret bai i kam, na Nupela Testamen i pulap stret long gutnius bilong Jisas Krais, em i dispela stretpela na gutpela king tru. Na sapos Jisas em i dispela king olsem Buk Song 72 i mekim promis long em, bilong wanem long Nupela Testamen yumi no inap ritim stori long ol bosman na olgeta lain long olgeta kantri bilong dispela graun i brukim skru na lotuim em? Nogat – yumi klia – pastaim ol i hangamapim dispela King Jisas long diwai kros, na bihain em i go antap long heven na sindaun long sia king; na moa, pastaim Jisas i kamap wokboi nating bilong olgeta manmeri, na bihain em i kamap Bikpela bilong ol. Long tude – long planti hap bilong dispela graun – ol Kristen lain inap lotuim King bilong ol. Yumi amamas tru olsem yumi gat dispela fridom bilong lotuim em, na yumi mas holim strong dispela fridom tu. Tasol yumi mas lotuim Jisas olsem King Tru bilong yumi. Yumi i mas brukim skru long em. Sapos nogat, orait bai yumi bungim dai bilong oltaim oltaim.
SAMPELA TINGTING
Taim yu klia olsem Jisas em i King, dispela bai senisim laip bilong yu olsem wanem?
Ritim: Luk 1:26-38
Yu bin bilip olsem Bikpela bai i mekim olsem em i bin tokim yu, olsem na yu ken amamas tru. – Luk 1:45
I gat tupela kain lap i kamap long taim ol lain i tingim taim Jisas Krais i kamap olsem bebi. I gat lap bilong ol lain i no bilip long Krais – na dispela lap i olsem musik nogut. Bai God i ken marimari long ol lain i lap olsem taim ol i harim dispela stori long Mama Maria na bebi bilong em. Tasol i gat narapela kain lap i wok long go aut tu – em i lap bilong amamas bikos God i bin inapim ol promis bilong em. Dispela kain lap i wankain olsem lap bilong Abraham na meri bilong em, taim tupela i lapun pinis na i lukim liklik bebi bilong ol, Aisak. “Aisak,” tupela i tok, “i olsem lap.” God i mekim kamap wanem samting i no inap kamap. Na Maria tu, wankain olsem Sara, i kisim promis bilong wanpela pikinini man. Na long dispela taim tu em i narakain promis tru. God bai i mekim kamap wanpela samting i no inap kamap: “Dispela samting bai kamap olsem wanem? Mi no marit yet long wanpela man.” Tasol taim ensel i tokaut “strong bilong God Antap Tru bai i karamapim yu,” orait, Maria em i bilipim em na daunim em yet aninit long God. Maria i singim dispela singsing bilong bilip, maski em i no lukim pikinini bilong promis yet: “Bel bilong mi em i litimapim nem bilong Bikpela, na spirit bilong mi em i amamas long God.” Na kandere bilong Maria, Elisabet, em i lapun pinis. Tasol God i soim em olsem em yet em i God, na em yet em i God bilong kisim bek ol lain bilong em. Olsem na Maria i singsing na Elisabet i lap. Na Sekaraia? Pastaim em i no bilip olsem meri bilong em bai karim pikinini, na God i pasim maus bilong em na em i no intap toktok. Tasol taim God i opim maus bilong em na em i toktok gen, orait em tu i wok long singsing na lap na presim God, dispela God, “em i tok tru antap long tumbuna bilong yumi Abraham. Na nau em i laik mekim long yumi olsem bipo em i tok.” Yumi mas wok yet long karim diwai kros bilong yumi long dispela rot bilong bilip. Wanpela de bai yumi lukim dispela amamas i kirap long Stat 25 na dispela lap i kamap gutpela moa yet long Luk 1 na 2. Na wanpela de “bikpela lait na strong bilong Bikpela bai i kamap ples klia, na olgeta manmeri bilong graun bai i lukim. Dispela tok i kam long maus bilong Bikpela yet” (Aisaia 40:5).
SAMPELA TINGTING
Autim dispela singsing bilong Maria (Luk 1:46-55) olsem amamas na singsing bilong yu yet.
Ritim: Stat 25:7-11
Tupela pikinini bilong en, Aisak na Ismael i planim em long dispela hul bilong ston ol i kolim Makpela ... Na Aisak wantaim Ismael i planim Abraham long dispela hul bipo Abraham i bin planim meri bilong en, Sara, long en. – Stat 25:9-10
Taim Abraham i lusim Haran em i gat 75 krismas (Stat 12:4). Na em i wokabaut wantaim Bikpela inap long 100 krismas. Na em i dai taim em i gat 175 krismas, na ol i planim em long dispela hul bilong ston ol i kolim Makpela. Taim yumi planim wanpela man o meri husat i dai pinis, dispela i wok long traim bilip bilong yumi. I olsem dispela dai yumi lukim i no wanbel wantaim bilip bilong yumi. Hau bai yumi lukim dai, na bilip olsem Krais i king bilong olgeta samting? Tasol planti ol Kristen i save tok olsem dai bilong lain bilong ol i wok long strongim bilip bilong ol. Bilip bilong yumi i save strong moa yet long taim bilong hevi, na dispela i winim taim bilong amamas. Taim yumi sori tru long taim bilong i dai bilong wanpela man o meri yumi laikim tru, bai yumi go long Bikpela long kisim sori na bel isi. Dai bilong Abraham i narakain traim bilong bilip. God i bin promisim em graun bilong Kenan pinis. Tasol taim em i dai, em i no gat graun bilong em yet. Nogat, em i gat wanpela hul long graun bilong planim meri bilong em na em yet. Em tasol. Planti bilong yumi gat bikpela laik bilong baim sampela graun bilong yumi yet. Na em orait long baim sampela graun, tasol nogut yumi tingting tumas long baim graun na wokim haus bilong yumi long dispela graun. Em i no bikpela samting. I gat wanpela samting i bikpela tru – na Abraham i lukim dispela pinis, na aiwara bilong em i pundaun – em i olgeta promis bilong God. Na dispela em i wanpela samting i tru na tru olgeta, na yumi ken holim, na yumi no inap lusim, maski yumi kamap long taim bilong dai bilong yumi.
SAMPELA TINGTING
Ol promis bilong God i gat bikpela mining insait long laip bilong yu yet, o nogat?
Ritim: Hibru 11:17-19
Abraham i tingting olsem, “Sapos Aisak i dai, maski, God em inap long kirapim em bek.” Olsem na tru tumas, yumi inap tok bokis long dispela samting i bin kamap na tok olsem, Abraham i kisim bek pikinini bilong en long matmat. – Hibru 11:19
Taim Abraham i wokabaut i go long Moria em i tingting olsem, “Sapos Aisak i dai, maski, God em inap long kirapim em bek.” Em i no wari long em yet, na tu em i no tingting long Aisak tasol. Nogat, em i tok, “God bilong mi em i husat?” Em i stap wantaim God olgeta taim, na God em i nambawan samting long laip bilong em. Long dispela traim yumi lukim bel isi stret bilong Abraham, na dispela i narakain samting olgeta. Em i dispela kain bel isi bilong wanpela man bel bilong em i bel isi long God tasol. Nogut yumi tok, “Abraham em i klia olsem God bai stopim em long kilim Aisak i dai,” o nogut yumi tok, “Abraham i save olsem God i no amamas long pasin bilong kilim ol pikinini olsem ofa, olsem na em i save God i no tok tru long em i mas kilim Aisak i dai.” Nogat, buk Hibru i tok, “Orait Abraham i bilip long God na i givim Aisak long God.” Em i givim Aisak long God, na yumi inap tok bokis long dispela samting i bin kamap na tok olsem, bihain long dispela, Abraham i kisim bek Aisak long matmat. Nogat, yumi mas redi long bilip olsem God bai askim yumi long givim olgeta samting long em, kain olsem em i givim planti samting long yumi. Maski yumi save olsem Buk Baibel i skulim yumi olsem, em i hat tru long bilipim. Olgeta Kristen manmeri i tok ol i laik bihainim tok bilong God, tasol planti bilong ol i no save mekim olsem. Ol i save bihainim sampela pasin bilong ol Kristen lain tasol. Yumi mas harim tok bilong God. Yumi mas daunim yumi yet aninit long ol traim i kam long God. Yumi i mas wok long amamasim God long kisim tok orait long em. God i mas skulim yumi long wokabaut long dispela laip wantaim em tasol, na dispela bai givim yumi narakain bel isi tru namel long ol traim em i givim yumi.
SAMPELA TINGTING
Askim God long helpim yu long daunim yu yet long aninit long olgeta traim em i givim yu, na stap bel isi tru wantaim.
Ritim: Stat 22:15-19
“Mi Bikpela, mi tok tru tumas long nem bilong mi yet olsem. Yu gat dispela wanpela pikinini tasol na yu no bin pasim em. Olsem na bai mi mekim gut tru long yu.” – Stat 22:16-17
Ol sumatin i save raitim ol eksam long skul bilong painimaut sapos ol i save gut tru long ol samting ol i lainim long skul, o nogat. Na dispela traim God yet i givim Abraham i bilong painimaut sapos Abraham i lainim pinis pasin bilong laikim tru God antap long olgeta arapela samting, o nogat. Em i hat tru long save long tingting bilong God taim em i givim dispela traim long Abraham. Em i wanpela bikpela na hatpela traim tru; kain olsem ol gutpela sumatin stret i save kisim. Na dispela traim em i las traim bilong Abraham: em i kam klostu long pinis bilong wokabaut bilong Abraham wantaim God. Tasol, sapos yu bilipim Buk Baibel, bai yu klia olsem i gat sampela arapela manmeri i bin kisim dispela kain traim tu, maski em i bikpela na hatpela traim stret. Man i bin raitim Buk Song 73 i bin bungim planti hevi na traim, na em i tok, “Husat arapela i stap long heven na i save lukautim mi? I no gat narapela man, yu wanpela tasol. Orait God, mi laikim yu moa yet. Mi no laikim olgeta samting bilong graun olsem mi laikim yu” (lain 25). Abraham tu i mas autim dispela tok tu: Mi no laikim olgeta samting bilong graun olsem mi laikim yu. Na moa, taim God i singautim Abraham, bilong bungim ol lain bilong kontrak bilong em, em i kain olsem taim Jisas i singautim ol disaipel long bihainim em, bilong bungim ol lain long nupela kontrak. Jisas i tok, “Bihainim mi.” Na ol i lusim umben bilong ol na bihainim em. Na tu yumi ken ritim Matyu 10:37-39 we God i tokim ol lain bilong em olsem: “Man i laikim tumas papa o mama bilong en....o pikinini man o pikinini meri... na i no laikim mi moa yet, em i no inap i stap pren bilong mi.” Kontrak bilong God wantaim yumi em i bikpela samting stret na God i tingim dispela kontrak olgeta taim, kain olsem ol gutpela man o meri i save tingim na bihainim kontrak bilong marit. Bikpela i no inap serim yumi wantaim ol arapela lain. Na yumi olgeta i mas redi long autim dispela tok: “Mi no laikim olgeta samting bilong graun olsem mi laikim yu.”
SAMPELA TINGTING
Ritim Buk Song 73, na autim lain 25 olsem prea bilong yu yet i go long God.
Ritim: Stat 22:3-14
Tupela i kamap long dispela ples God i bin tok long en, na Abraham i wokim alta na i putim paiawut antap long en. Na em i pasim pikinini bilong en Aisak long rop. Na em i putim em antap long paiawut long alta. Orait Abraham i kisim naip na i laik kilim pikinini. – Stat 22:9- 10
Long nait Abraham em i tingting i stap, na em i kamap redi long bihainim tok bilong God. Em i kirap long moningtaim tru long mekim olsem. Olsem wanem? Ating em i mas les long kirap bikos em i les long bihainim dispela tok bilong God, a? Tasol, nogat. Long moningtaim tru Abraham i kirap (lain 3). Na long hia Buk Baibel i stori long olgeta samting Abraham i mekim taim em i kirap pinis. Abraham i redim donki, em i kisim Aisak wantaim tupela wokboi bilong em. I kain olsem wanpela muvi we yumi inap lukim olgeta liklik samting i kamap. Na taim Abraham i wokabaut long rot inap 3-pela de (em i longtaim stret sapos em i laik senisim tingting bilong em), orait em i kamap long ples God em i makim pinis. Na gen yumi ritim olgeta samting em i mekim: em i redim paiwut, wokim alta, pasim pikinini Aisak long rop na putim em antap long alta, na em i kisim naip bilong kilim em. Olgeta dispela liklik hap bilong dispela stori i bikpela samting tru, na yumi mas tingting gut long olgeta dispela samting. Long olgeta dispela liklik samting Abraham i mekim, yumi ken klia olsem Abraham i wok long bihainim tru tok bilong God. Em i gat laik bilong bihainim God, olsem na em i wokabaut long dispela rot bilong bihainim God. Na yumi tu i mas mekim wok long bihainim Bikpela. I no samting bilong toktok tasol. Nogat, em i samting long mekim wok. Sampela manmeri i laik mekim bikpela tok stret long bilip na long bihainim Bikpela, tasol ol i les long mekim olgeta liklik na bikpela wok long bihainim tok bilong God. Taim Jems, wanpela wokboi bilong God, i lukim sampela lain i save mekim olsem, em i tok, “Bipo tumbuna bilong yumi Abraham em i putim pikinini bilong en Aisak long alta na i givim em long God olsem ofa. Olsem na long dispela taim God i lukim pasin bilong en na i kolim em stretpela man” (Jems 2:21). Abraham tupela Aisak i wokabaut i go antap long dispela maunten. Aisak i karim paiawut bilong ofaim em yet. Papa yet i karim naip. “Na tupela i wokabaut i go.” Tupela i no toktok. Em i narakain wokabaut olgeta.
SAMPELA TINGTING
God i wok long traim yu yet? Yu inap lainim wanem samting long dispela traim bilong Abraham?
Ritim: Stat 22:1-3
Orait God i tok, “Yu gat wanpela pikinini tasol, Aisak, na yu laikim em tumas. Yu mas kisim dispela pikinini na yu go long hap bilong Moria, na bai mi soim yu wanpela maunten. Na long dispela maunten yu mas givim Aisak long mi olsem ofa bilong paia i kukim olgeta.” – Stat 22:2
Taim yumi wokabaut wantaim Bikpela, i min olsem yumi mas daunim yumi yet na redi long givim yumi yet long God. Abraham i lusim as ples bilong em na papamama bilong em, na tu em i ranawe long Kenan i go long Isip, na em i lusim Lot tu. Na Abraham tupela Sara i mas lus tingting bilong bihainim plen bilong ol yet bilong kisim wanpela bebi. Ol i mas lukim hevi na krai, na ol i mas wet inap long taim Sara i no inap karim pikinini moa. Taim tupela i lapun pinis, orait God inapim promis bilong em. Pastaim tupela i lap taim tupela i no bilip, tasol God i senisim dispela lap i kamap olsem lap bilong amamas bikos tupela i lukim God inapim olgeta promis bilong em. Orait nau Abraham i mas redim em yet bilong narapela traim, wanpela las traim. Ol man i bilip, ol i save bungim ol traim, na ol i olsem ol sumatin i mas lainim pasin bilong daunim ol yet, bilong redi long lusim olgeta samting bilong ol, olsem ol i ken hop tru long Bikpela tasol. Aisak i sindaun i stap na pilai klostu long haus sel bilong Abraham tupela Sara. Na tupela i lukim em i stap. Dispela pikinini i olsem wanpela mak tru bilong ol gutpela pasin bilong Bikpela – em i save bihainim olgeta tok bilong em. Tupela i klia tru long dispela taim ol i lukim dispela pikinini man bilong ol i wokabaut long san. Taim Aisak i lap, Abraham na Sara i amamas na lap wantaim bikos God em i marimari long ol. God em inapim ol promis bilong em, na ol i luksave long dispela, taim ol i lukim Aisak. Tasol nau, Abraham i mas givim Aisak long God olsem wanpela ofa. Em tru, yumi mas karim diwai kros bilong yumi na bihainim Bikpela, a? Na yumi mas redi long givim olgeta samting bilong yumi long em. Dispela em i las traim bilong dispela Papa bilong ol manmeri bilong bilip. Abraham em i man i wokabaut tru wantaim God. Moa, God yet i wokabaut wantaim Abraham. Na God i tokim yumi man na meri bilong givim planti samting long em, bilong yumi bai kisim planti moa yet.
SAMPELA TINGTING
Yu yet yu “lusim” wanem samting bilong yu bikos yu i laik wokabaut wantaim God?
Ritim: Stat 18:22-23
Na Sara i pret na em i giaman na i tok, “Mi no lap.” Na Sara i tok olsem, “God i mekim gutpela pasin long mi, na mi amamas na mi lap. Na olgeta man i harim dispela bai ol i amamas wantaim mi.” – Stat 18:15; 21:6
Taim yumi ritim dispela stori, ating yumi bai i gat dispela kain askim: Bilong wanem Abram tupela Sara i mas wet longpela taim stret long kisim dispela bebi? Bilong wanem God i wet inap long taim Sara i no inap karim pikinini moa, na em i givim wanpela bebi long tupela? God i no save givim yumi bekim long dispela kain askim. Long Jon 9 yumi ritim wanpela stori long dispela man em i aipas pinis taim mama i karim em. Taim ol disaipel i gat sampela askim long dispela, Jisas i tok olsem: “Dispela samting i bin kamap bai ol manmeri i ken lukim samting i kamap long dispela man, na wok bilong God i ken kamap ples klia long ol.” I min olsem God em i God. Em i winim yumi; tingting bilong em i winim tingting bilong yumi. Yumi no ken wari long as bilong ol tingting bilong em. Nogat, yumi mas bilipim em tasol. Olsem na, God i no soim klia tingting bilong em long Abram na Sarah. Nogat, em i givim em yet long ol. Taim spring i kam, Sara i lukim pinis pikinini bilong promis. Na em i autim dispela tok i putim ples klia olsem em i amamas tru long Bikpela: “God i mekim gutpela pasin long mi, na mi amamas na mi lap.” Taim em i givim susu long Aisak, em i kisim bel isi long Bikpela. Aisak! Lap! Bel hevi na wari bilong Sara i tanim i go long amamas bikos God i redim dispela amamas long em na long olgeta lain i bilip tru long ol promis bilong em. Yumi ken i stap strong. No ken pret. Tru tumas, ol man i krai na karim pikinini kaikai i go bilong planim, bihain bai ol i singim song bilong amamas. Dispela God bilong gutpela save na bikpela strong i givim wanpela pikinini man long Sara na long Maria. God em i God bilong inapim olgeta promis bilong em! Olsem na yumi bai i lap.
SAMPELA TINGTING
Yu lukim dispela kain lap long laip bilong yu, o nogat?
Ritim: Stat 18:22-23
Na Abraham i tok gen, “Bikpela, yu no ken kros. Mi laik mekim wanpela tok moa. Sapos i gat 10-pela gutpela man tasol i stap, orait olsem wanem?” Na Bikpela i tok olsem, “Sapos i gat 10-pela gutpela man i stap, orait bai mi no ken bagarapim taun, na ol dispela gutpela man i no ken lus.” – Stat 18:32
Sampela taim God i autim ol plen bilong em long ol manmeri long dispela graun. Na tu, God i yusim pasin na wok bilong man long inapim ol plen bilong em. God i tokim ol lain bilong em long tingim dispela graun long beten. Taim ol lain bilong kontrak bilong God i prea long ol hevi i stap long dispela graun, ol i mas strong long prea long em, tasol ol i mas daunim ol yet tu. Ol i ken strong long prea bikos ol i klia long God em i husat. Tingting gut long ol dispela tok: “Ating yu laik bagarapim ol gutpela man wantaim ol man nogut?” (lain 23, 25). “Jas bilong olgeta graun, em i mas bihainim stretpela pasin” (lain 25). Ol bilip lain i ken strong long prea bikos ol i save gut long stretpela pasin bilong God. Tasol ol i mas daunim ol yet na prea tu. Yumi mas klia tru olsem yumi stap man tasol, na God em i God tru. “Mi man nating tasol. Mi no inap tok long wanpela samting,” Abraham i tok (lain 27). “Bikpela, yu no ken kros long planti toktok bilong mi” (lain 27, 30, 32). Abraham em i man bilong prea bikos em i strong long prea, na bikos em i daunim em yet taim em i prea. God i singautim Abraham na olgeta lain bilong em long lusim dispela graun. Em i no mekim olsem bikos em i laik lus tingting long olgeta arapela manmeri long dispela graun. Nogat, em i laik yusim Abraham na ol lain bilong em bilong blesim ol arapela manmeri long dispela graun. Na nambawan rot olgeta lain bilong God i mas bihaimim bilong blesim ol arapela lain bilong dispela graun i olsem: ol i mas prea strong long ol arapela lain. Krais i kam pinis, olsem na yumi mas strong moa yet long autim tok bilong em long olgeta manmeri long dispela graun, na yumi mas prea strong tru long God i ken salim salvesen bilong em i go aut long planti hap long dispela graun. Yumi mas prea long ol lain i no save prea. Yumi mas strong long askim God long lusim belhat bilong em. Yumi mas prea na mekim wok olsem tok bilong Jisas i ken i go aut long olgeta liklik hap long dispela graun.
SAMPELA TINGTING
Yu save long sampela lain i no save prea? Orait, yu yet yu prea strong long ol!
Ritim: Stat 18:16-21
Na Bikpela i tingting olsem, “Dispela samting mi laik mekim, em mi no ken haitim long Abraham.” – Stat 18:17
Sapos wanpela man i dai na polis o wanpela arapela man i mas i go tok save long papa o mama bilong em, ating em bai i les tru long tokaut olsem. Bel bilong em bai i hevi tru. Na taim ol lain long haus i lukluk long ai bilong em, sampela taim ol bai i klia hariap olsem em i gat hevi tru long tokim ol. Na sampela taim tu, God yet i autim tingting na plen bilong em long ol lain bilong graun. God i bin autim gutpela nius long dispela graun, na dispela nius i wok long amamasim yumi olgeta de, na long givim yumi bikpela hop. Tasol God i autim sampela tok long yumi na dispela tok i givim bel hevi long yumi. Long dispela graun, namel long yumi, i gat planti manmeri i no save tru long Bikpela. Ol i mekim wok na ol i wokabaut long dispela graun, tasol ol i no save olsem wanpela de ol bai i lukim pes bilong God, na ol bai sanap long kot bilong em. Ol i no bilipim tok bilong God. Na em i no isi long stori long dispela hevi. Nogut yumi autim strongpela tok long hel tasol. Em i no isi, tasol yumi no ken pasim maus bilong yumi olgeta taim, taim dispela hevi i wok long stap strong long bel bilong yumi. Yumi yet, yumi save wanem samting bai kamap. Yumi klia long olgeta promis bilong God, tasol yumi klia tu long ol tok lukaut bilong God. Yumi mas autim ol dispela tok promis bilong God, na God bai soim yumi rot long autim ol tok lukaut bilong em tu. God bai i givim strong na marimari long yumi long mekim olsem.
SAMPELA TINGTING
Dispela teks bai karim wanem kaikai insait long laip bilong yu?
Ritim: Stat 18:9-15
Na Bikpela i askim Abraham olsem, “Bilong wanem Sara i lap na tok, ‘Mi lapun pinis na bai mi karim pikinini olsem wanem? Abraham, harim. I no gat wanpela samting Bikpela i no inap long mekim. Long dispela mun long yia bihain, em long taim mi makim pinis, bai mi kam bek, na long dispela taim Sara bai i gat pikinini man.” – Stat 18:13-14
Inap i go 25 yia Abraham na Sara i bin wokabaut long rot wantaim Bikpela. Na long olgeta dispela yia, ol i gat dispela bikpela hevi: Sara i no karim wanpela pikinini. Buk Baibel i makim 8-pela taim we God i bin autim promis gen long tupela, olsem Sara bai karim wanpela pikinini. Pastaim God i promisim Abraham olsem em bai mekim ol lain tumbuna bilong em i kamap bikpela lain tru (Stat 12:2). Na taim Abraham i ting olsem wokman bilong em, Elieser, bai kisim ples bilong em, God i tokim em olsem pikinini tru bilong em bai i kisim ples bilong em. Ating Abraham tupela Sara i stori planti long dispela promis bilong God long olgeta de. Ol i klia olsem Abraham bai kisim wanpela pikinini, tasol ol i wari bikos ol i ting Sara yet i no inap long karim pikinini bilong Abraham. Olsem na tupela i ting olsem Ismael bai stap dispela pikinini bilong promis. Tasol God i klia moa yet: “Meri bilong yu, Sara, bai i karim wanpela pikinini man, na yu mas kolim nem bilong en Aisak” (Stat 17:19). Na God i Gat Olgeta Strong, bihain em i bin salim wanpela ensel i go long Maria long promisim em olsem em bai karim Jisas, em i go long Sara na tokim em olsem, “Long dispela mun long yia bihian em bai i karim pikinini man bilong promis” (Stat 18:10). Na Sara i lap. Yumi no ken hariap long kotim Sara long pasin bilong em, taim em i lap. Olgeta lain i bilip long God i pundaun long sin sampela taim. Sampela taim em bai krai na lap taim em i no bilip. God i ken lusim sin bilong yumi taim yumi no bilipim tok bilong em long ol hevi bilong yumi. Olgeta lain bilong bilip bai pundaun sampela taim. I gat sampela samting na Bikpela i no inap long mekim?
SAMPELA TINGTING
Yu bilip tru olsem God em inap long mekim olgeta samting, o nogat?
Ritim: Stat 18:1-8
Mit i tan pinis, orait Abraham i kisim dispela mit wantaim susu na sis ol i bin wokim long susu bilong bulmakau, na em i givim long dispela tripela man. Ol i kaikai i stap, na Abraham i sanap klostu long ol, long as bilong wanpela diwai. – Stat 18:8
Dispela em i narakain samting olgeta. God i sindaun na kaikai long haus bilong Abraham. God em i Gat Olgeta Strong, olsem na yumi mas brukim skru long em, tasol God yet i kam sindaun na kaikai wantaim Abraham. Na nogut yumi ting dispela em i piksa bilong God tasol, na em i no God tru i kam lukim Abraham. Nogut yumi bagarapim tok bilong God olsem. Sampela taim ol man i ting ol i mas kamap narakain long stap klostu long God. Tasol yumi mas stap olsem man tasol. Yumi ol man i no inap wok long kamap wankain olsem God. Satan em i bin wok long mekim olsem. Tasol God bilong Buk Baibel i bin daunim em yet na kam long yumi. Planti taim ol manmeri i ting olsem ol bai i kam klostu moa long God sapos ol i kamap olsem spirit samting. Tasol God em i kam long yumi, em i kamap man olsem yumi yet. “Tok em i bin kamap man” (Jon 1:14). Dispela tok em i bikpela samting long olgeta stori long Buk Baibel. God bilong heven na graun i wokabaut i go long haus sel bilong Abraham wantaim tupela arapela man. Taim Abraham i strong long askim ol, ol i sindaun na kaikai long as bilong wanpela diwai. God i sindaun. Abraham i stap klostu long tebel na em i kisim mit wantaim susu bilong bulmakau na em i givim long ol. Sara i stap insait long haus sel. Bihain God i kam long yumi long Jisas Krais. Na em i go long sampela marit long amamasim ol, em i go long sampela haus krai na givim amamas long ol. Dispela i no wanpela piksa bilong God tasol. Nogat. Em i God tru i kam long yumi. Nogut yumi ting olsem yumi mas i go long wanpela naispela haus lotu, o antap long wanpela bikpela maunten, long prea long God. Lusim dispela tingting. God i stap long haus bilong yumi, long skul na long wok bilong yumi. Sapos yumi amamas long bung wantaim em, olgeta de bilong yumi bai i kamap naispela tru.
SAMPELA TINGTING
Yu lukim God long wanem hap tude?
Ritim: Stat 17:9-14
Na yupela i mas bihainim dispela mak bilong kontrak bilong mi. Yupela i mas katim skin bilong kok bilong olgeta man long lain bilong yupela. – Stat 17:10
Namba wan samting God i mekim em i olsem: em i givim ol promis long lain bilong em. Em i mekim olsem taim em i singautim Abram (Stat 12). Na bihain, em i strongim dispela tok promis long wanpela kontrak (Stat 15). Na bihain long dispela, em i strongim dispela kontrak bilong em taim em i givim dispela mak bilong dispela kontrak long ol lain bilong em, dispela mak bilong katim skin (Stat 17). Wanpela tok piksa long dispela kain kontrak em i kontrak bilong marit. Man bai givim wanpela promis long meri, na meri bai givim wanpela promis long man. Tupela i wokim wanpela kontrak taim ol i autim tok promis bilong ol yet. Na planti taim ol bai givim ring bilong pinga olsem wanpela mak bilong dispela kontrak. Dispela ring i putim ples klia olsem tupela bai i stap tru long ol promis tupela i mekim pinis. Dispela mak God yet i givim long ol lain bilong em, em i putim ples klia olsem God em i gutpela stret. Long Nupela Kontrak, God i givim ol mak long lain bilong em tu – Baptais na Kaikai bilong Bikpela. Tasol em i klia olsem wanpela ring bilong pinga i no min olsem yu marit pinis. Wanpela ring i no gat mining sapos i no gat man o meri i laik marit o sapos i no gat sampela promis bilong en. Na sampela taim, long Olpela Kontrak, mak bilong Kontrak i kamap olsem mak nating, bikos ol lain bilong God i no tingim ol promis bilong em na ol i no bihainim ol tok bilong Kontrak tu. Na tu, long Nupela Kontrak, na long ol sios long tude tu, planti lain bai kisim ol mak bilong kontrak tasol ol i no kisim tru ol promis bilong God long trupela bilip. Sampela lain bai kisim baptais, tasol ol i no save tru long Krais. Sampela lain bai kisim Kaikai bilong Bikpela, tasol ol i no stap aninit long Bikpela. Na God em i bel nogut tru taim sampela lain i no kisim ol mak bilong kontrak long trupela bilip. Tasol taim yumi wanbel wantaim Bikpela, na yumi bilip tru long em, dispela ol mak bai i gat bikpela mining insait long laip bilong yumi: God, em i wokim dispela kontrak wantaim yumi, na em bai inapim olgeta tok bilong em tu. Na em bai i no inap lusim yumi!
SAMPELA TINGTING
Taim yu lukim wanpela bebi i kisim baptais o taim yu kaikai long Kaikai bilong Bikpela, dispela mak i gat wanem mining insait long laip bilong yu?
Ritim: Stat 17:1-7
Abram i gat 99 krismas na Bikpela i kamap long em na i tok olsem, “Mi God I Gat Olgeta Strong. Yu mas aninit long mi oltaim, na mekim ol stretpela pasin tasol long ai bilong mi.” – Stat 17:1
“Mi God i Gat Olgeta Strong.” Abram em i lapun pinis, na em i amamas long harim dispela tok bilong God. Em i no askim God planti ol askim. Em i harim tok bilong God tasol. Taim yumi wokabaut wantaim God em i bikpela samting bikos God inap long mekim olgeta samting. Abram i mas askim em yet, “God bilong mi em i husat?” Na God i tok, “Mi God i Gat Olgeta Strong. Yu mas aninit long mi oltaim, na mekim ol stretpela pasin tasol long ai bilong mi.” I min olsem, pasin bilong ol i mas putim ples klia olsem ol i bilip tru long dispela God i Gat Olgeta Strong. Sampela taim yumi paul na yumi wari na yumi laik givim planti askim long God. Tasol sampela taim God bai kisim ol dispela askim na tok olsem: “Mi yet mi God i Gat Olgeta Strong.” Na em i tokim yumi olsem, “Yu mas aninit long mi oltaim, na mekim ol stretpela pasin tasol long ai bilong mi.” Na God i senisim nem bilong Abram i go long Abraham. Maski em i no kamap tumbuna bilong planti manmeri pinis, God i givim dispela nem Abraham long em olsem, “tumbuna bilong planti manmeri.” Em i promis tru bilong God bikos God em i God bilong inapim ol promis bilong em. Na dispela nem bilong Abraham i nem bilong bilip, bilong bilipim tru tok bilong dispela God i Gat Olgeta Strong. Dispela tupela lain bilong dispela kontrak i bung. God i toktok, na Abraham i brukim skru na putim pes i go daun long graun. Taim yu bilip long God, bai yu brukim skru long em. Na yumi stap insait long dispela lain bilong bilip; yumi kisim ol dispela promis pinis. Olsem na yumi tu mas strong long bilip long God long bel bilong yumi. Yumi mas wok long pasim maus bilong yumi na tingting long God. Apim em. Daunim yumi yet. Em i God. Em i Gat Olgeta Strong.
SAMPELA TINGTING
Stap isi, pasim maus bilong yu, na daunim yu yet long ai bilong dispela God i Gat Olgeta Strong.
Ritim: Stat 16:4-9
Tasol mi laik bai Bikpela i ken skelim tok bilong mitupela. – Stat 16:5
Taim tupela Abram na Sarai i pasim tok pinis long bihainim tingting na rot bilong ol yet, ol i bungim kain kain hevi. Sarai i wok long mangal. Hagar i wok long bikhet bikos em i ting olsem em yet i helpim tru famili bilong Abram. Em i apim em yet long ai bilong ol lain bilong Sarai na em i bikhet tru. Na em i isi long save wanem samting bai i kamap long dispela rot. Em i pasin bilong yumi man. Sarai em i kros nogut tru na em i bel nogut long Abram. Em i kolim nem bilong God long em i ken skelim tupela: “Tasol mi laik bai Bikpela i ken skelim tok bilong mitupela.” Na Abram em i les na em i tokim Sarai olsem, “Harim. Hagar em i wokmeri bilong yu tasol. Yu bos bilong en na yu ken mekim wanem samting yu ting i gutpela long mekim.” Na Sarai i birua long Hagar. Em i hat tru long skelim pasin bilong Abram, Sarai na Hagar – husat i mekim pasin nogut, na husat i mekim stretpela pasin. Taim ol pasin nogut, bikhet, mangal na kros pait i wok long kam insait long laip bilong ol manmeri, husat bai inap klia long asua bilong ol dispela samting? Ol dispela hevi i gat as bilong en. Ol hevi i wok long kamap taim tupela Abram na Sarai i lusim gutpela rot bilong Bikpela na bihainim narapela liklik rot bilong ol yet. Ol i mas tanim bel, na go bek long rot bilong God. God i ken marimari long planti manmeri i wok long lusim rot bilong God na bihainim laik bilong ol, na planti ol hevi i save kamap. Taim ol i lusim rot bilong Bikpela, laip bilong ol bai paul olgeta na hau bai ol i stretim? Ol i mas lusim ol kros pait, na prea olsem God bilong marimari i ken kisim ol i go bek long rot bilong em yet. Na long laip bilong Abram, Sarai na Hagar, God yet i wok long stretim laip bilong ol, olsem em i bin mekim long laip bilong ol bipo. Em i no mekim save long ol. Nogat. Ol yet i sem long sin bilong ol yet.
SAMPELA TINGTING
Dispela stori i ken skulim yumi olsem wanem?
Ritim: Stat 16:1-3
Bikpela i pasim bel bilong mi na mi no inap karim pikinini. – Stat 16:2
Dispela samting Sarai na Abram i mekim i bin bihainim kastom ol manmeri bilong dispela taim i save bihainim. Taim wanpela meri i no inap kisim bel, em bai orait long em i givim wokmeri bilong em long man bilong em, long wokmeri i ken karim pikinini bilong em yet. Em olsem pasin bilong ol long adoptim ol pikinini. Olsem na long tingting bilong man na long ai bilong lain bilong ol, Abram na Sarai i mekim gutpela pasin. Abram na Sarai i gat bikpela hevi bikos ol i no kisim pikinini yet. Olsem na Sarai i givim wokmeri bilong em long man bilong em. Tasol God yet i bin givim narapela rot long Abram na Sarai long tupela i mas bihainim, na em i no samting bilong bihainim ol pasin bilong ol lain bilong ol yet. Ol i stap long rot bilong promis bilong God, na ol i mas karim diwai kros bilong ol long bilip. Tupela i mas stap strong long rot bilong promis na bilipim strong ol promis bilong God. Tasol long dispela plen bilong ol yet, ol i lusim rot bilong God na bihainim rot na laik bilong ol yet. Na yumi no ken kotim ol. Tenpela yia i go pinis na ol i no kisim pikinini yet. Yumi i klia bilong wanem Sarai i pundaun na mekim pasin bilong em yet. Na Abram tu i mekim dispela pasin. Em i lusim gutpela rot God i makim bilong em bilong wokabaut long em. Tupela wantaim i lusim dispela rot bilong God. Na planti trabel i kamap long dispela. Bilong wanem? Bikos taim yumi laik stap wanbel wantaim God, yumi mas karim diwai kros bilong yumi long bikpela rot bilong bilip, dispela rot i bihainim ol promis bilong God.
SAMPELA TINGTING
Sampela taim, long laip bilong yu yet, yu tingting long “lusim rot bilong Bikpela,” o nogat?
Ritim: Stat 15:7-18
Long dispela de yet Bikpela i mekim kontrak wantaim Abram... – Stat 15:18
Long dispela teks yumi luksave long kontrak God i wokim wantaim tumbuna bilong dispela nesen God bai yusim long bringim salvesen long dispela graun.
Planti ol kantri nabaut long Israel i save yusim dispela pasin (katim abus long tupela hap) long wokim wanpela kontrak.
Wanpela kontrak i makim taim we wanpela i givim promis long arapela na askim dispela arapela long mekim sampela samting long inapim dispela kontrak. Taim ol lain i mekim kontrak na katim ol abus long tupela hap i olsem tok lukaut - nogut wanpela i bagarapim o brukim dispela kontrak. Ol i mas stap tru long dispela kontrak bilong ol!
Tasol dispela kontrak long dispela teks i narakain liklik. Long dispela kontrak God yet i promis long stap tru long dispela man Abram na ol pikinini bilong en tu. God em i yusim dispela kain kontrak ol man i save yusim long putim ples klia olsem em i God bilong inapim ol promis bilong en, na bilong strongim bilip bilong Abram.
Abram yet i redim ol samting, tasol God i larim em i wet liklik pastaim. Abram em i redi i stap, na taim sampela tarangau i kam na i laik kaikaim dispela abus, Abram i rausim ol. Na Abram
i slip i dai tru, na bikpela tudak i karamapim em. Na long dispela taim, God yet i toktok wantaim em, na givim ol promis long em.
Taim smok na paia i kamap dispela i soim klia olsem God yet i stap. Na God yet tasol i wokabaut namel long tupela lain abus (ol arapela taim tupela lain i wokim wanpela kontrak tupela wantaim i mas wokabaut namel long dispela tupela lain abus). Dispela i putim
ples klia olsem God yet bai i go pas long wok bilong dispela kontrak; em i kontrak bilong marimari tasol. God em i givim nating ol bikpela bikpela promis, na yumi no ken pret long askim em long inapim ol promis bilong em.
Na God i askim ol lain bilong kontrak long wokabaut wantaim em long bilip, na long bihainim em. “Bikpela i tokim yumi pinis long ol gutpela pasin, na em i laik bai yumi mekim pasin olsem tasol. Yumi mas bihainim stretpela pasin, na laikim tru ol arapela man, na daunim tingting bilong yumi yet na i stap wanbel wantaim God bilong yumi, na bihainim em wanpela tasol” (Maika 6:8).
SAMPELA TINGTING
Tingting long na tok tenkyu long ol promis God yet i givim pinis long yu.
Ritim: Stat 15:7-18
Long dispela de yet Bikpela i mekim kontrak wantaim Abram… – Stat 15:18
Long dispela teks yumi luksave long kontrak God i wokim wantaim tumbuna bilong dispela nesen God bai yusim long bringim salvesen long dispela graun. Planti ol kantri nabaut long Israel i save yusim dispela pasin (katim abus long tupela hap) long wokim wanpela kontrak. Wanpela kontrak i makim taim we wanpela i givim promis long arapela na askim dispela arapela long mekim sampela samting long inapim dispela kontrak. Taim ol lain i mekim kontrak na katim ol abus long tupela hap i olsem tok lukaut - nogut wanpela i bagarapim o brukim dispela kontrak. Ol i mas stap tru long dispela kontrak bilong ol! Tasol dispela kontrak long dispela teks i narakain liklik. Long dispela kontrak God yet i promis long stap tru long dispela man Abram na ol pikinini bilong en tu. God em i yusim dispela kain kontrak ol man i save yusim long putim ples klia olsem em i God bilong inapim ol promis bilong en, na bilong strongim bilip bilong Abram. Abram yet i redim ol samting, tasol God i larim em i wet liklik pastaim. Abram em i redi i stap, na taim sampela tarangau i kam na i laik kaikaim dispela abus, Abram i rausim ol. Na Abram i slip i dai tru, na bikpela tudak i karamapim em. Na long dispela taim, God yet i toktok wantaim em, na givim ol promis long em. Taim smok na paia i kamap dispela i soim klia olsem God yet i stap. Na God yet tasol i wokabaut namel long tupela lain abus (ol arapela taim tupela lain i wokim wanpela kontrak tupela wantaim i mas wokabaut namel long dispela tupela lain abus). Dispela i putim ples klia olsem God yet bai i go pas long wok bilong dispela kontrak; em i kontrak bilong marimari tasol. God em i givim nating ol bikpela bikpela promis, na yumi no ken pret long askim em long inapim ol promis bilong em. Na God i askim ol lain bilong kontrak long wokabaut wantaim em long bilip, na long bihainim em. “Bikpela i tokim yumi pinis long ol gutpela pasin, na em i laik bai yumi mekim pasin olsem tasol. Yumi mas bihainim stretpela pasin, na laikim tru ol arapela man, na daunim tingting bilong yumi yet na i stap wanbel wantaim God bilong yumi, na bihainim em wanpela tasol” (Maika 6:8).
SAMPELA TINGTING
Tingting long na tok tenkyu long ol promis God yet i givim pinis long yu
Ritim: Stat 15:1-6
Abram i bilipim tok bilong Bikpela. Olsem na Bikpela i kolim em stretpela man. – Stat 15:6
Taim Krais i kam ol lain bilong Juda i bruk long tupela hap. Wanpela hap bilong ol dispela pikinini bilong Abraham i bilip long Jisas olsem dispela Mesaia bilong promis. Tasol, narapela hap i givim baksait long em. Na dispela tupela lain i pait i stap. Ol i laik save olsem: Husat em i pikinini tru bilong Abraham? Pol (dispela man pastaim em i givim baksait long Jisas na bihain em i bilip long em) em i save autim dispela tok i kam long Stat 15:1-6 long putim ples klia olsem ol lain i bilip long Krais ol i pikinini tru bilong Abraham. Pol i tok: “Gutnius bilong Krais i askim yumi long bilip, na bilip tasol. Gutnius i no samting bilong bekim ol gutpela samting yu save mekim; gutnius i putim ples klia wok bilong God yet. Na yumi mas bilipim dispela tok. Na bai yu stap stretpela long ai bilong God. God i no akseptim yu bikos yu yet yu gutpela. Nogat. Em I akseptim yu bikos em yet i gutpela. Yu no stap stretpela long ai bilong God bikos yu yet yu mekim planti wok. Nogat. Yu stap stretpela long ai bilong God bikos Krais i mekim olgeta wok. Bilip tasol! Na taim Pol i autim dispela teks long Stat 15:6, em i putim ples klia olsem Bikpela i kolim em stretpela man long bilip tasol. Na em i wankain long yumi olgeta. Bilip tasol. “Olsem na yupela i ken save olsem, ol man i bilip long gutnius, ol i pikinini tru bilong Abraham” (Galesia 3:7). Olsem na pikinini bilong Abraham i kamap bikpela namba tru, olsem planti ol sta bilong skai. God inapim tru hop bilong Abraham. Long Krais yumi tu i kisim blesing bilong Abraham. Bilip em i olsem dua bilong kam insait long famili bilong God. Na dispela famili i olgeta lain i wokabaut long bilip long God inap long taim em inapim olgeta promis bilong em pinis.
SAMPELA TINGTING
Sapos wanpela man i askim yu bilong wanem yu bilip, bai yu bekim dispela askim olsem wanem?
Ritim: Stat 15:1-6
Abram i bilipim tok bilong Bikpela. Olsem na Bikpela i kolim em stretpela man. – Stat 15:6
Taim Krais i kam ol lain bilong Juda i bruk long tupela hap. Wanpela hap bilong ol dispela pikinini bilong Abraham i bilip long Jisas olsem dispela Mesaia bilong promis. Tasol, narapela hap i givim baksait long em. Na dispela tupela lain i pait i stap. Ol i laik save olsem: Husat em i pikinini tru bilong Abraham?
Pol (dispela man pastaim em i givim baksait long Jisas na bihain em i bilip long em) em i save autim dispela tok i kam long Stat 15:1-6 long putim ples klia olsem ol lain i bilip long Krais ol i pikinini tru bilong Abraham. Pol i tok: “Gutnius bilong Krais i askim yumi long
bilip, na bilip tasol. Gutnius i no samting bilong bekim ol gutpela samting yu save mekim; gutnius i putim ples klia wok bilong God yet. Na yumi mas bilipim dispela tok. Na bai yu stap stretpela long ai bilong God. God i no akseptim yu bikos yu yet yu gutpela. Nogat. Em I akseptim yu bikos em yet i gutpela. Yu no stap stretpela long ai bilong God bikos yu yet yu mekim planti wok. Nogat. Yu stap stretpela long ai bilong God bikos Krais i mekim olgeta wok. Bilip tasol!
Na taim Pol i autim dispela teks long Stat 15:6, em i putim ples klia olsem Bikpela i kolim
em stretpela man long bilip tasol. Na em i wankain long yumi olgeta. Bilip tasol. “Olsem na yupela i ken save olsem, ol man i bilip long gutnius, ol i pikinini tru bilong Abraham” (Galesia 3:7).
Olsem na pikinini bilong Abraham i kamap bikpela namba tru, olsem planti ol sta bilong skai. God inapim tru hop bilong Abraham. Long Krais yumi tu i kisim blesing bilong Abraham.
Bilip em i olsem dua bilong kam insait long famili bilong God. Na dispela famili i olgeta lain i wokabaut long bilip long God inap long taim em inapim olgeta promis bilong em pinis.
SAMPELA TINGTING
Sapos wanpela man i askim yu bilong wanem yu bilip, bai yu bekim dispela askim olsem wanem?
Ritim: Stat 14:13-24
Na Melkisedek, em king bilong Salem na em i pris bilong God Antap Tru, em i bringim bret na wain i kam long Abram. Na Melkisedek i givim blesing long Abram olsem…Na olgeta samting Abram i bin kisim em i tilim long 10-pela hap na i givim wanpela hap long Melkisedek. – Stat 14:18-20
Taim pait i pinis, bikpela samting i kamap: Abram i kisim blesing long Melkisedek. Yumi i no save planti samting long dispela pris bilong God Antap Tru. Em i no stap insait long lain bilong God (Yumi harim tok long em long Buk Song 110, na tu long Hibru 5 na 7). Olsem na dispela samting i narakain samting tru. Long wanem, Abram na famili bilong em i gat bikpela namba tru long dispela taim. Tasol hia, hetman bilong nesen bilong God em i bin kisim olgeta promis bilong God, em i brukim skru long dispela man long narapela kantri na dispela man i blesim em. (Hibru 7:7 i tok: “Yumi save gut olsem, man i givim blesing em i bikman. Na man i kisim blesing long em, em i stap aninit.”) Na moa, Abram i save olsem Melkisedek i gat namba bikos em i givim takis long em: “Na olgeta samting Abram i bin kisim em i tilim long 10-pela hap na i givim wanpela hap long Melkisedek.” Dispela bung bilong Melkisidek na Abram i soim klia olsem Abram i save olsem em bai i kisim planti ol gutpela blesing stret–na dispela blesing i no bilong planti pikinini na gutpela graun tasol. Dispela stori i putim ples klia olsem Abram i gat narapela hop. Yumi save olsem dispela hop em i Jisas bikos yumi ritim Nupela Kontrak pinis. Long Jon 8:56 Jisas i tok, “Taim tumbuna bilong yupela Abraham em i tingting long lukim taim bilong mi, em i bin amamas. Na taim em i lukim pinis, orait bel bilong en i gutpela tru.” Jisas em i nambawan pikinini man bilong Abram. Tasol em i Pikinini Man bilong God tu. Sapos Abram na ol tumbuna pikinini bilong em i no bin kamap long dispela graun, bai Jisas i no inap kamap tu. Tasol Jisas i kam long “narapela ples” tu, kain olsem dispela king Melkisedek. Na Abram i mas brukim skru long dispela Pris-King bilong kisim blesing bilong em.
SAMPELA TINGTING
Nambawan hop bilong yu em i husat?
Ritim: Stat 14:13-24
Na Melkisedek, em king bilong Salem na em i pris bilong God Antap Tru, em i bringim bret na wain i kam long Abram. Na Melkisedek i givim blesing long Abram olsem...Na olgeta samting Abram i bin kisim em i tilim long 10-pela hap na i givim wanpela hap long Melkise- dek. – Stat 14:18-20
Taim pait i pinis, bikpela samting i kamap: Abram i kisim blesing long Melkisedek. Yumi i no save planti samting long dispela pris bilong God Antap Tru. Em i no stap insait long lain bilong God (Yumi harim tok long em long Buk Song 110, na tu long Hibru 5 na 7).
Olsem na dispela samting i narakain samting tru. Long wanem, Abram na famili bilong em
i gat bikpela namba tru long dispela taim. Tasol hia, hetman bilong nesen bilong God em i bin kisim olgeta promis bilong God, em i brukim skru long dispela man long narapela kantri na dispela man i blesim em. (Hibru 7:7 i tok: “Yumi save gut olsem, man i givim blesing em
i bikman. Na man i kisim blesing long em, em i stap aninit.”) Na moa, Abram i save olsem Melkisedek i gat namba bikos em i givim takis long em: “Na olgeta samting Abram i bin kisim em i tilim long 10-pela hap na i givim wanpela hap long Melkisedek.”
Dispela bung bilong Melkisidek na Abram i soim klia olsem Abram i save olsem em bai i kisim planti ol gutpela blesing stret–na dispela blesing i no bilong planti pikinini na gutpela graun tasol. Dispela stori i putim ples klia olsem Abram i gat narapela hop. Yumi save olsem dispela hop em i Jisas bikos yumi ritim Nupela Kontrak pinis. Long Jon 8:56 Jisas i tok, “Taim tumbuna bilong yupela Abraham em i tingting long lukim taim bilong mi, em i bin amamas. Na taim em i lukim pinis, orait bel bilong en i gutpela tru.”
Jisas em i nambawan pikinini man bilong Abram. Tasol em i Pikinini Man bilong God tu. Sapos Abram na ol tumbuna pikinini bilong em i no bin kamap long dispela graun, bai Jisas i no inap kamap tu. Tasol Jisas i kam long “narapela ples” tu, kain olsem dispela king Melkisedek. Na Abram i mas brukim skru long dispela Pris-King bilong kisim blesing bilong em.
SAMPELA TINGTING
Nambawan hop bilong yu em i husat?
Ritim: Stat 13:14-18
Lot i go pinis, na Bikpela i tokim Abram olsem, “Yu sanap hia na yu lukluk i go long olgeta hap... Na em i wokim alta bilong Bikpela long dispela ples.” – Stat 13:14,18
Abram i gat wanem kain tingting taim Lot yet i kisim nambawan gutpela hap graun, na dispela graun i bilong Abram long ol promis bilong God?
Em i hat tru long save gut long tingting bilong ol man taim ol i kisim pen na hevi long han bilong wantok bilong ol. Jisas i tok, “Na sapos wanpela man i laik kotim yu na kisim siot bilong yu, orait yu mas givim longpela klos bilong yu tu long em” (Matyu 5:40). Yumi i amamas long dispela tok na redi long harim? O yumi les long dispela tok?
Jisas i putim ples klia olsem yumi mas bungim ol gutpela samting bilong yumi long heven (Matyu 6:20). Na taim yumi mekim olsem, bai yumi stap fri tru long olgeta samting long dispela graun.
God i kam long Abram taim Lot i lusim em pinis. Na God i autim tok promis bilong em gen: “Lukluk i go long...” God i save autim tok bilong em gen long givim bel isi long yumi. God
i gat laik sapos yumi lukluk i go long promis bilong laip i stap oltaim oltaim, na yumi mas wokabaut long strong bilong bilip. Na taim God i stap nambawan samting long laip bilong yumi, yumi no inap wari tumas long kisim ol mani o kago samting.
Long las liklik hap long Stat 13 yumi lukim dispela samting. Abram i wokim alta long God. Na dispela em i samting bilong ol lain i bilip long God na bihainim em. Laip bilong yumi em i no samting bilong kisim planti mani o bilong kisim planti samting bilong yumi yet. Nogat, laip bilong yumi em i samting bilong givim glori na pres i go long God.
SAMPELA TINGTING
Askim God long helpim yu long lukluk i go long em bilong bungim ol gutpela samting long heven.
Ritim: Stat 13:14-18
Lot i go pinis, na Bikpela i tokim Abram olsem, “Yu sanap hia na yu lukluk i go long olgeta hap… Na em i wokim alta bilong Bikpela long dispela ples.” – Stat 13:14,18
Abram i gat wanem kain tingting taim Lot yet i kisim nambawan gutpela hap graun, na dispela graun i bilong Abram long ol promis bilong God? Em i hat tru long save gut long tingting bilong ol man taim ol i kisim pen na hevi long han bilong wantok bilong ol. Jisas i tok, “Na sapos wanpela man i laik kotim yu na kisim siot bilong yu, orait yu mas givim longpela klos bilong yu tu long em” (Matyu 5:40). Yumi i amamas long dispela tok na redi long harim? O yumi les long dispela tok? Jisas i putim ples klia olsem yumi mas bungim ol gutpela samting bilong yumi long heven (Matyu 6:20). Na taim yumi mekim olsem, bai yumi stap fri tru long olgeta samting long dispela graun. God i kam long Abram taim Lot i lusim em pinis. Na God i autim tok promis bilong em gen: “Lukluk i go long…” God i save autim tok bilong em gen long givim bel isi long yumi. God i gat laik sapos yumi lukluk i go long promis bilong laip i stap oltaim oltaim, na yumi mas wokabaut long strong bilong bilip. Na taim God i stap nambawan samting long laip bilong yumi, yumi no inap wari tumas long kisim ol mani o kago samting. Long las liklik hap long Stat 13 yumi lukim dispela samting. Abram i wokim alta long God. Na dispela em i samting bilong ol lain i bilip long God na bihainim em. Laip bilong yumi em i no samting bilong kisim planti mani o bilong kisim planti samting bilong yumi yet. Nogat, laip bilong yumi em i samting bilong givim glori na pres i go long God.
SAMPELA TINGTING
Askim God long helpim yu long lukluk i go long em bilong bungim ol gutpela samting long heven.
Ritim: Luk 18:24-30
Na Jisas i tokim ol olsem, “Mi tok tru long yupela, olgeta man i bin ting long kingdom bilong God na i lusim haus na meri na brata na papamama na pikinini, orait taim ol i stap yet long dispela graun God bai i givim ol planti samting tru, i winim ol samting ol i bin i gat bipo. Na long taim i laik kamap bihain, ol bai i kisim laip i stap gut oltaim oltaim.” – Luk 18:29-30
Taim dispela yangpela hetman i les long bihainim Jisas bikos em i les long harim tok bilong en, ol disaipel i laik save wanem samting ol yet bai kisim. Long wanem, ol yet i bin lusim planti samting bilong ol taim ol i bihainim Jisas. Na bekim bilong Jisas i narakain bekim olgeta. Sampela taim yumi ritim stori long taim Jisas i tok strong long ol disaipel bilong em bikos askim bilong ol i kranki. Na long hia tu, i luk olsem askim bilong ol disaipel i kranki. Ating yumi bai ting olsem Jisas bai bekim askim bilong ol disaipel olsem: “Bihainim mi tasol; maski long pe yu bai kisim.” Tasol, nogat. Jisas i wok long skulim ol long gutpela laip stret ol bai i kisim taim ol i bihainim em. I olsem Krais i opim ol windo bilong heven bikpela na soim klia olsem God i save givim planti samting tru long ol lain bilong en. “Yu bai win sapos yu bihainim mi,” em i tok, “Bai yu kisim planti samting tru long dispela graun, na bai yu kisim laip i stap gut oltaim oltaim.” Sapos yu redi long lusim planti samting long dispela graun, bai yu kisim planti samting moa. Em i gutpela samting tru. Planti taim yumi mas tingim tok lukaut bilong Jisas: “Sapos wanpela man i kisim olgeta samting bilong graun, tasol laip bilong em yet i lus, orait dispela olgeta samting bai i helpim em olsem wanem?” Tasol yumi mas tingim tok long dispela teks tu, olsem ol lain i redi long lusim planti samting long dispela graun, ol bai i kisim planti samting long kingdom bilong God. Bikos yumi i lain bilong mekim sin, yumi save givim liklik samting long Jisas, na yumi ting olsem yumi bai kisim liklik samting tasol. Tasol yumi mas larim Spirit bilong God i skulim yumi long givim olgeta samting long Jisas, na redi long kisim planti gutpela samting long han bilong em tu, olsem Jisas yet i promisim yumi. Jisas i skulim yumi olsem, God bilong yumi bai givim ol gutpela samting tru long yumi. Na bikos yumi bilipim dispela, orait yumi no ken pret long bihainim em.
SAMPELA TINGTING
Yu bilip olsem God em i God bilong givim planti ol gutpela samting long yu, o nogat?
Ritim: Luk 18:24-30
Na Jisas i tokim ol olsem, “Mi tok tru long yupela, olgeta man i bin ting long kingdom bilong God na i lusim haus na meri na brata na papamama na pikinini, orait taim ol i stap yet long dispela graun God bai i givim ol planti samting tru, i winim ol samting ol i bin i gat bipo. Na long taim i laik kamap bihain, ol bai i kisim laip i stap gut oltaim oltaim.” – Luk 18:29-30
Taim dispela yangpela hetman i les long bihainim Jisas bikos em i les long harim tok bilong en, ol disaipel i laik save wanem samting ol yet bai kisim. Long wanem, ol yet i bin lusim planti samting bilong ol taim ol i bihainim Jisas.
Na bekim bilong Jisas i narakain bekim olgeta. Sampela taim yumi ritim stori long taim Jisas i tok strong long ol disaipel bilong em bikos askim bilong ol i kranki. Na long hia tu, i luk olsem askim bilong ol disaipel i kranki. Ating yumi bai ting olsem Jisas bai bekim askim bilong ol disaipel olsem:“Bihainim mi tasol; maski long pe yu bai kisim.”Tasol, nogat. Jisas i wok long skulim ol long gutpela laip stret ol bai i kisim taim ol i bihainim em.
I olsem Krais i opim ol windo bilong heven bikpela na soim klia olsem God i save givim planti samting tru long ol lain bilong en. “Yu bai win sapos yu bihainim mi,” em i tok, “Bai
yu kisim planti samting tru long dispela graun, na bai yu kisim laip i stap gut oltaim oltaim.” Sapos yu redi long lusim planti samting long dispela graun, bai yu kisim planti samting moa. Em i gutpela samting tru.
Planti taim yumi mas tingim tok lukaut bilong Jisas: “Sapos wanpela man i kisim olgeta samting bilong graun, tasol laip bilong em yet i lus, orait dispela olgeta samting bai i helpim em olsem wanem?”Tasol yumi mas tingim tok long dispela teks tu, olsem ol lain i redi long lusim planti samting long dispela graun, ol bai i kisim planti samting long kingdom bilong God.
Bikos yumi i lain bilong mekim sin, yumi save givim liklik samting long Jisas, na yumi ting olsem yumi bai kisim liklik samting tasol. Tasol yumi mas larim Spirit bilong God i skulim yumi long givim olgeta samting long Jisas, na redi long kisim planti gutpela samting long han bilong em tu, olsem Jisas yet i promisim yumi.
Jisas i skulim yumi olsem, God bilong yumi bai givim ol gutpela samting tru long yumi. Na bikos yumi bilipim dispela, orait yumi no ken pret long bihainim em.
SAMPELA TINGTING
Yu bilip olsem God em i God bilong givim planti ol gutpela samting long yu, o nogat?
Ritim: Luk 18:18-23
Na Jisas i tokim em olsem, “Bilong wanem yu kolim mi gutpela? God wanpela tasol em i gutpela.” – Luk 18:19
Taim yumi harim dispela askim bilong Jisas, “Bilong wanem yu kolim mi gutpela?” ating yumi bai i kirap nogut. Sapos yumi no inap long kolim Jisas gutpela, husat bai yumi inap long kolim gutpela?
“God wanpela tasol em i gutpela.”Tasol Jisas em i pikinini tru bilong God oltaim. Na moa, Baibel yet i tok olsem Josep (Luk 23:50) na Barnabas (Aposel 11:24) i “gutpela man.”
Tasol long dispela teks, Jisas i no min olsem em i no gutpela, tasol em i wok long stretim tingting bilong dispela yangpela man i kam lukim em. Dispela yangpela hetman i mas lukaut long hau em i save autim dispela tok “gutpela.” Dispela man i bin skelim ol pasin bilong ol man na “gutpela” pasin bilong ol tu wantaim ol pasin bilong ol arapela manmeri. Na yumi save mekim olsem tu.
Tasol Jisas i save skelim olgeta manmeri wantaim God. “God wanpela tasol em i gutpela.” Jisas i skulim yumi long askim laik bilong God long laip bilong yumi. Na taim Krais i autim laik bilong God long laip bilong dispela man (“Yu mas salim olgeta samting bilong yu, na dispela mani yu kisim yu mas tilim i go long ol rabisman...Na yu kam bihainim mi”), dispela hetman i ting olsem dispela askim em i bikpela tumas long em. Taim em i skelim em yet wantaim ol arapela lain bilong bilip, pasin bilong em i orait (“Taim mi pikinini yet na i kam inap long nau, mi save bihainim olgeta dispela lo”). Tasol dispela askim bilong Jisas em i bikpela tru.
Olgeta lain long dispela graun i stap long presens bilong God. Yumi no ken skelim yumi yet wantaim ol arapela man i bilip long God. Yumi no ken kolim ol arapela ol “gutpela” Kristen o “gutpela moa yet.” God yet bai i skelim pasin bilong yumi.
Ol lain i save long Jas bilong ol, ol i no inap larim ol arapela i grisim ol. Na tu, yumi no ken wari tumas taim ol arapela i daunim yumi.
SAMPELA TINGTING
Yu save skelim pasin bilong yu yet wantaim ol pasin bilong o arapela man i bilip long God, o yu save skelim yu yet wantaim ol pasin bilong God?
Ritim: Luk 18:18-23
Na Jisas i tokim em olsem, “Bilong wanem yu kolim mi gutpela? God wanpela tasol em i gutpela.” – Luk 18:19
Taim yumi harim dispela askim bilong Jisas, “Bilong wanem yu kolim mi gutpela?” ating yumi bai i kirap nogut. Sapos yumi no inap long kolim Jisas gutpela, husat bai yumi inap long kolim gutpela? “God wanpela tasol em i gutpela.” Tasol Jisas em i pikinini tru bilong God oltaim. Na moa, Baibel yet i tok olsem Josep (Luk 23:50) na Barnabas (Aposel 11:24) i “gutpela man.” Tasol long dispela teks, Jisas i no min olsem em i no gutpela, tasol em i wok long stretim tingting bilong dispela yangpela man i kam lukim em. Dispela yangpela hetman i mas lukaut long hau em i save autim dispela tok “gutpela.” Dispela man i bin skelim ol pasin bilong ol man na “gutpela” pasin bilong ol tu wantaim ol pasin bilong ol arapela manmeri. Na yumi save mekim olsem tu. Tasol Jisas i save skelim olgeta manmeri wantaim God. “God wanpela tasol em i gutpela.” Jisas i skulim yumi long askim laik bilong God long laip bilong yumi. Na taim Krais i autim laik bilong God long laip bilong dispela man (“Yu mas salim olgeta samting bilong yu, na dispela mani yu kisim yu mas tilim i go long ol rabisman…Na yu kam bihainim mi”), dispela hetman i ting olsem dispela askim em i bikpela tumas long em. Taim em i skelim em yet wantaim ol arapela lain bilong bilip, pasin bilong em i orait (“Taim mi pikinini yet na i kam inap long nau, mi save bihainim olgeta dispela lo”). Tasol dispela askim bilong Jisas em i bikpela tru. Olgeta lain long dispela graun i stap long presens bilong God. Yumi no ken skelim yumi yet wantaim ol arapela man i bilip long God. Yumi no ken kolim ol arapela ol “gutpela” Kristen o “gutpela moa yet.” God yet bai i skelim pasin bilong yumi. Ol lain i save long Jas bilong ol, ol i no inap larim ol arapela i grisim ol. Na tu, yumi no ken wari tumas taim ol arapela i daunim yumi.
SAMPELA TINGTING
Yu save skelim pasin bilong yu yet wantaim ol pasin bilong o arapela man i bilip long God, o yu save skelim yu yet wantaim ol pasin bilong God?
Ritim: Luk 18:9-14
God, mi no olsem ol arapela man, olsem na mi tenkyu long yu... – Luk 18:11
Ol man bilong dispela graun i save skelim ol man long ol arapela man. Na tu planti ol Kristen lain tu i save mekim olsem.
Dispela Farisi em i man bilong bilip na em i tok, “God...” Em i toktok long God, tasol em i wok long skelim em yet wantaim ol arapela man: “...mi no olsem ol arapela man, olsem na mi tenkyu long yu.” Em i save skelim pasin bilong em yet wantaim pasin bilong ol arapela. Na planti bilong yumi save mekim olsem. Na dispela Farisi, taim em i skelim pasin bilong em yet wantaim pasin bilong ol arapela man, i luk olsem em i winim ol stret. Em i winim stret man bilong kisim takis long sait bilong tambu long kaikai, na long tilim ol samting bilong em. I luk olsem em i winim stret dispela man bilong kisim takis.
Na Jisas i no tok olsem dispela man bilong kisim takis i winim dispela Farisi tu. Tasol dispela man bilong kisim takis em i save skelim laip bilong em wantaim ol gutpela pasin bilong God yet. Na em i beten. Na prea bilong em i go antap long God. Tasol prea bilong dispela Farisi
i no go antap long God; em i samting bilong skelim em yet wantaim ol arapela man. Tasol dispela man bilong kisim takis, em i paitim bros bilong em na em i singaut, “Mi man bilong mekim sin.”
Na dispela man bilong kisim takis em luksave long ol bikpela sin bilong em yet bikos em i skelim em yet long God. Na taim em – o yumi – i lukim ol stretpela pasin bilong God, bai yumi brukim skru na tok, “Mi man bilong mekim sin. Yu ken marimari long mi!”
Laip wantaim God em i narakain laip tru. Tasol em i laip tru- yumi no inap save long laip tru sapos yumi no save long God.
Sapos yu no save long God yu inap ting olsem yu naispela man o meri, taim yu skelim pasin bilong yu yet long pasin bilong ol arapela man. Tasol sapos yu no save long God, yu bai paul, na yu bai no inap klia tru long pasin bilong yu yet.
SAMPELA TINGTING
Yu save skelim yu yet long God? Na dispela i gat wanem mining insait long laip bilong yu?
Ritim: Luk 18:9-14 God, mi no olsem ol arapela man, olsem na mi tenkyu long yu… – Luk 18:11
Ol man bilong dispela graun i save skelim ol man long ol arapela man. Na tu planti ol Kristen lain tu i save mekim olsem. Dispela Farisi em i man bilong bilip na em i tok, “God…” Em i toktok long God, tasol em i wok long skelim em yet wantaim ol arapela man: “…mi no olsem ol arapela man, olsem na mi tenkyu long yu.” Em i save skelim pasin bilong em yet wantaim pasin bilong ol arapela. Na planti bilong yumi save mekim olsem. Na dispela Farisi, taim em i skelim pasin bilong em yet wantaim pasin bilong ol arapela man, i luk olsem em i winim ol stret. Em i winim stret man bilong kisim takis long sait bilong tambu long kaikai, na long tilim ol samting bilong em. I luk olsem em i winim stret dispela man bilong kisim takis. Na Jisas i no tok olsem dispela man bilong kisim takis i winim dispela Farisi tu. Tasol dispela man bilong kisim takis em i save skelim laip bilong em wantaim ol gutpela pasin bilong God yet. Na em i beten. Na prea bilong em i go antap long God. Tasol prea bilong dispela Farisi i no go antap long God; em i samting bilong skelim em yet wantaim ol arapela man. Tasol dispela man bilong kisim takis, em i paitim bros bilong em na em i singaut, “Mi man bilong mekim sin.” Na dispela man bilong kisim takis em luksave long ol bikpela sin bilong em yet bikos em i skelim em yet long God. Na taim em – o yumi – i lukim ol stretpela pasin bilong God, bai yumi brukim skru na tok, “Mi man bilong mekim sin. Yu ken marimari long mi!” Laip wantaim God em i narakain laip tru. Tasol em i laip tru- yumi no inap save long laip tru sapos yumi no save long God. Sapos yu no save long God yu inap ting olsem yu naispela man o meri, taim yu skelim pasin bilong yu yet long pasin bilong ol arapela man. Tasol sapos yu no save long God, yu bai paul, na yu bai no inap klia tru long pasin bilong yu yet.
SAMPELA TINGTING
Yu save skelim yu yet long God? Na dispela i gat wanem mining insait long laip bilong yu?
Ritim: Stat 13:5-13
Orait Lot i sanap na i lukluk i go. Na em i lukim olgeta graun long ples daun bilong wara Jordan na olgeta hap i go inap long taun Soar. Dispela hap graun olgeta i gat planti wara na em i gutpela tru olsem naispela gaden bilong Bikpela na olsem graun bilong ol Isip… Orait Lot i tok long em bai i kisim olgeta graun long ples daun bilong wara Jordan…Na Lot i go sindaun namel long ol taun i stap long ples daun bilong wara Jordan, na em i wokim kem bilong en klostu long Sodom. – Stat 13:10-12
Planti taim yumi bai tingim ol skul yumi bin kisim taim yumi yangpela. Mi yet mi tingim taim wanpela tisa bilong mi i bin tok olsem: “Abram i olpela tru, na Lot em i yangpela. Em mobeta sapos Lot i bin askim Abram wanem graun em i laik kisim pastaim. Tasol Lot em i mangal, na Abram i daunim em yet. Olsem na yumi yet, yumi no ken go pas bilong kisim ol gutpela samting. Mobeta yumi daunim yumi yet.” Na em i tru, na em i gutpela skul. Tasol dispela stori long Buk Baibel i gat planti moa skul bilong en tu. Olgeta taim yumi save skelim pasin bilong ol man wantaim pasin bilong ol arapela man. Em i pasin tru bilong yumi. Taim yumi skelim pasin bilong ol arapela olsem, yumi bai wok long skelim pasin bilong em, olsem em i gutpela man o man nogut, o sapos em i gat liklik mani o planti mani tru, o sapos em i naispela man o em i save tingim em yet. Tasol Buk Baibel i skulim yumi long narapela rot. Yumi i mas skelim pasin bilong yumi na ol arapela wantaim pasin bilong God! Yumi mas skelim yumi yet wantaim dispela God Antap Tru. Na taim yumi klia long dispela, bai yumi les long skelim pasin bilong ol man wantaim ol pasin bilong ol arapela man. Buk Baibel i no save daunim pasin bilong Lot. 2 Pita 2:8 i tok olsem Lot em i “stretpela man em i stap namel long ol Sodom, na em i lukim pasin nogut bilong ol, na long olgeta de em i harim tok nogut bilong ol. Bel bilong en i stap stret, na em i kirap nogut na bel bilong en i pen tru long pasin bilong sakim lo ol i mekim.” Tasol long dispela stori long Buk Stat, Lot em i no bihainim tingting bilong God. Em i laik kisim gutpela graun na em i lus tingting long ol arapela samting. Sapos yumi skelim pasin bilong Lot wantaim pasin bilong ol arapela, yumi bai ting olsem em i mekim gutpela pasin. Planti manmeri i save tok, “Sapos yu lukim wanpela gutpela samting, orait wantu yu go kisim em. No ken tingting tumas. Hariap na kisim tasol!” Planti lain i save bihainim dispela kain tingting. Tasol long dispela tingting planti manmeri i kisim ol hevi tu, wankain olsem Lot i bungim. Yumi i mas prea olsem, ol dispela kain man i ken kisim gutpela tingting hariap na tanim bel, bipo ol bungim kain paia olsem Sodom i kisim taim God i belhat na bagarapim em.
SAMPELA TINGTING
Askim God long helpim yu tingim em pastaim, maski wanem samting i kamap long laip bilong yu.
Ritim: Stat 13:5-13
Orait Lot i sanap na i lukluk i go. Na em i lukim olgeta graun long ples daun bilong wara Jordan na olgeta hap i go inap long taun Soar. Dispela hap graun olgeta i gat planti wara na em i gutpela tru olsem naispela gaden bilong Bikpela na olsem graun bilong ol Isip... Orait Lot i tok long em bai i kisim olgeta graun long ples daun bilong wara Jordan...Na Lot i go sindaun namel long ol taun i stap long ples daun bilong wara Jordan, na em i wokim kem bilong en klostu long Sodom. – Stat 13:10-12
Planti taim yumi bai tingim ol skul yumi bin kisim taim yumi yangpela. Mi yet mi tingim taim wanpela tisa bilong mi i bin tok olsem: “Abram i olpela tru, na Lot em i yangpela. Em mobeta sapos Lot i bin askim Abram wanem graun em i laik kisim pastaim. Tasol Lot em i mangal, na Abram i daunim em yet. Olsem na yumi yet, yumi no ken go pas bilong kisim ol gutpela samting. Mobeta yumi daunim yumi yet.”
Na em i tru, na em i gutpela skul. Tasol dispela stori long Buk Baibel i gat planti moa skul bilong en tu.
Olgeta taim yumi save skelim pasin bilong ol man wantaim pasin bilong ol arapela man. Em i pasin tru bilong yumi. Taim yumi skelim pasin bilong ol arapela olsem, yumi bai wok long skelim pasin bilong em, olsem em i gutpela man o man nogut, o sapos em i gat liklik mani o planti mani tru, o sapos em i naispela man o em i save tingim em yet.
Tasol Buk Baibel i skulim yumi long narapela rot. Yumi i mas skelim pasin bilong yumi na ol arapela wantaim pasin bilong God! Yumi mas skelim yumi yet wantaim dispela God Antap Tru. Na taim yumi klia long dispela, bai yumi les long skelim pasin bilong ol man wantaim ol pasin bilong ol arapela man.
Buk Baibel i no save daunim pasin bilong Lot. 2 Pita 2:8 i tok olsem Lot em i “stretpela man em i stap namel long ol Sodom, na em i lukim pasin nogut bilong ol, na long olgeta de em i harim tok nogut bilong ol. Bel bilong en i stap stret, na em i kirap nogut na bel bilong en i pen tru long pasin bilong sakim lo ol i mekim.”Tasol long dispela stori long Buk Stat, Lot em i no bihainim tingting bilong God. Em i laik kisim gutpela graun na em i lus tingting long ol arapela samting.
Sapos yumi skelim pasin bilong Lot wantaim pasin bilong ol arapela, yumi bai ting olsem em i mekim gutpela pasin. Planti manmeri i save tok, “Sapos yu lukim wanpela gutpela samting, orait wantu yu go kisim em. No ken tingting tumas. Hariap na kisim tasol!” Planti lain i save bihainim dispela kain tingting. Tasol long dispela tingting planti manmeri i kisim ol hevi tu, wankain olsem Lot i bungim. Yumi i mas prea olsem, ol dispela kain man i ken kisim gutpela tingting hariap na tanim bel, bipo ol bungim kain paia olsem Sodom i kisim taim God i belhat na bagarapim em.
SAMPELA TINGTING
Askim God long helpim yu tingim em pastaim, maski wanem samting i kamap long laip bilong yu.
Ritim: Stat 12:17–13:4
Orait king i singautim Abram i kam na i tokim em olsem, “Watpo yu mekim dispela pasin long mi? Yu no bin tokim mi olsem Sarai em i meri bilong yu.” – Stat 12:18
King bilong Isip i krosim Abram. Maski king bilong Isip i no man bilong bihainim Bikpela, em i tok stret. Na em i no isi taim wanpela man husat i no save long Bikpela, i wok long krosim na stretim yumi. Yumi bai sem.
Na Abram em i no gat tok bikos em i sem.
Na Buk Baibel i no stori long sampela toktok bilong Bikpela tu. Tasol God em i mekim sampela samting. Em i helpim Abram long lusim ol dispela hevi Abram yet i kirapim long giaman tok bilong em. God i no save senis, God i stap bel tru long Abram, na king yet i kisim save olsem God i stap wantaim Abram.
Abram i lusim Isip na i go long hap bilong Negev, na bihain em i lusim hap bilong Negev na i wokabaut i go olsem long hap not, inap long Betel. Yumi no harim long sampela toktok bilong ol. Nogat. Ol i sem, olsem na ol i no gat tok. Na dispela em i gutpela. Taim yumi sem long sin bilong yumi, yumi mas lukluk long God na daunim yumi yet.
Abram i lainim olsem God i no save givim promis long yumi na bihain lusim yumi olsem yumi yet i ken bihainim rot bilong yumi yet. Nogat tru. God i no save lusim yumi, maski
em i taim bilong san o taim bilong tudak. Planti taim yumi longlong tru na yumi wok long bihainim laik bilong yumi yet, tasol God i wok long painim yumi yet, na em bai helpim yumi long stretim ol hevi, maski sapos yumi yet i as bilong ol dispela hevi.
Na Abram em i kamap gen long Betel. Em i dispela ples we Abram i bin wokim wanpela alta bilong lotu long Bikpela. Na Abram i go long dispela hap gen na em i lotuim Bikpela.
I olsem Abram i kam bek long Bikpela. Em i stap laip gen. Em i kain olsem taim yumi lukim diwai kros, dispela ples we God na man i wanbel wantaim. Long dispela ples yumi kisim laip bikos long dispela ples yumi kisim save long God.
SAMPELA TINGTING
Wanem samting long laip bilong yu i save mekim yu i kam bek gen long Bikpela?
Ritim: Stat 12:10-16
Bihain, taim bilong bikpela hangre i kamap, na i no gat kaikai tru long dispela hap. – Stat 12:10
Longpela wokabaut bilong Abram wantaim Bikpela em i kirap tasol na wantu Abram i bungim ol hevi. Bikpela hangre i kamap long graun Kenan. Abram em i wari long dispela, olsem na em i go long Isip. Tasol, taim em i kamap klostu long Isip, em i bungim sampela moa hevi. Em i save olsem sampela taim king bilong Isip bai kisim ol naispela meri. Olsem na em i pret bikos em i ting ol bai kilim em, nogut king i gat laik long kisim dispela naispela meri bilong em, Sarai. Olsem na em i tokim Sarai long giaman na tok olsem em i susa bilong em, na em i mekim olsem. Tasol planti moa hevi yet i kamap long dispela tok giaman bilong Abram na Sarai.
Bilong wanem Abram, dispela man bilong stap wantaim God, i bungim tupela hevi i kam long em long tupela sait, olsem hevi bilong Bikpela hangre long Kenan na pret bilong king bilong Isip? Yumi ken askim ol dispela kain askim, tasol dispela kain askim i no save helpim yumi. Bikpela samting i olsem: Ol lain i bilip i save mekim wanem taim ol i bungim ol hevi?
I no gutpela sapos long taim bilong ol hevi yumi sindaun na krai, “Bilong wanem na dispela hevi i bungim mi?” Mobeta yumi tok, “Bikpela, dispela God mi bilip long em, em i husat tru?”
Em tru, ol hevi i hevi tru. Tasol God em i tru tu. Long Jisas Krais, yumi ken wokabaut wantaim God. Na sapos yumi inap wokabaut wantaim God, orait yumi inap wokabaut long ol hevi long laip bilong yumi tu. Taim yumi bilip long God, yumi no ken kirap nogut tru na pret olgeta long taim bilong hevi.
Long dispela traim, Abram i pundaun. Em i giaman, long wanem, em i pret. Em i pret, long wanem, em i lus tingting long bilip tru long God. Na bihain em i bungim bikpela hevi moa yet long dispela giaman tok bilong em.
Taim yumi lukluk long laip bilong Abram, i gutpela sapos yumi harim dispela gutpela tingting i kam long tok bilong God: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim” (Buk Song 3:5-6).
SAMPELA TINGTING
Yu gat wanem ol traim long laip bilong yu long nau? Askim God long helpim yu long trustim em, na helpim yu long strong long ol dispela traim.
Ritim: Stat 12:4-9
Olsem na Abram i wokim alta bilong lotu long Bikpela long dispela hap Bikpela i bin kamap long em... Na Abram i wokim alta long dispela hap (Betel) na em i kolim nem bilong Bikpela na i lotu long em. – Stat 12:7-8
Abram i kisim meri bilong em, Sarai (dispela meri i no bin karim pikinini), na Lot (pikinini bilong brata bilong en) wantaim, na lusim Haran na wokabaut i go long graun Kenan. Em i go long hap not long Kenan inap long hap saut, long taun Betel. Em i bikpela wokabaut stret, tasol Buk Baibel i no stori planti long dispela wokabaut - em i faivpela lain tasol long dispela sapta i stori long dispela bikpela wokabut. Tasol man i raitim Stat, maski em i sotim dispela longpela stori na raitim long faivpela lain tasol, tupela taim em i stori long Abram i wokim alta bilong lotuim Bikpela.
Na dispela tupela alta i makim taim we God i bin toktok na Abram i bekim long bilip. Dispela tupela alta i makim ples we Abram i bungim God bilong em. Maski man i raitim Stat i no stori long olgeta arapela samting i kamap taim Abram i mekim dispela longpela wokabaut, em i stori long dispela tupela alta Abram i wokim, bikos em i bikpela stamting tru.
Dispela tupela alta i soim yumi pasin bilong bilip bilong Abram, olsem em i wokabaut wantaim God. Ol narapela samting i kamap long laip bilong ol lain i bilip, i no bikpela samting tumas. Nogat, dispela taim bilong makim bilip na pasin bilong wokabaut wantaim Bikpela, em i bikpela samting tru.
Ol lain i no klia long stap wantaim Bikpela, ol yet bai i paul long dispela kain tingting. Ol yet bai i makim wok bilong ol, mani bilong ol, kago bilong ol, o haus bilong ol olsem bikpela samting long laip bilong ol. Tasol ol lain i save stap wantaim God, ol yet bai i makim wanpela alta i go long narapela alta long laip bilong ol. I min olsem, ol bai makim bilip bilong ol na pasin bilong wokabaut wantaim God olsem bikpela samting tru long laip bilong ol.
Ol manmeri i gat dispela kain tingting, ol bai i kisim prais long las de taim God inapim tru olgeta promis bilong em long ol. “Olsem na bai mi go long alta bilong yu, God. Long wanem, yu save mekim mi i belgut na amamas. Yu God bilong mi, bai mi kisim gita na mekim musik, na singim song bilong litimapim nem bilong yu tasol” (Buk Song 43:4).
SAMPELA TINGTING
I gat sampela “alta” i stap long laip bilong yu? I min – yu inap tingim sampela taim long laip bilong yu we God i strongim bilip bilong yu, na yu wokabaut tru wantaim em?
Ritim: Stat 12:1-4
Orait Abram i lusim taun Haran na i go olsem Bikpela i bin tokim em. – Stat 12:4
Abram i bilip na em i bihainim tok bilong God: “Orait Abram i lusim taun Haran na i go olsem Bikpela i bin tokim em.” God em i tok, na Abram i bihainim tok bilong em.
Yumi mas lukaut taim yumi ritim dispela stori. Nogut yumi apim Abram tumas na stori long olgeta samting em i lusim taim em i bihainim Bikpela. Planti taim ol lain bai stori long pen Abram i pilim taim em i lusim haus na lain bilong em, o ol bai i stori long bikpela bilip tru bilong Abram. Tasol dispela em i no gutpela tingting.
Abram i no lusim wanpela samting. Olgeta samting em i lusim taim em i go i olsem samting nating. Wanem samting em bai i kisim taim em i bihainim Bikpela i winim tru olgeta samting em i lusim long Haran. Em i lusim ol lain bilong em, em dispela lain i save lotuim ol arapela god, ol giaman god. Abram i go bihainim nupela rot nau, dispela rot i lait tru long ol promis bilong God. Long bilip Abram i save olsem em bai i kisim ol gutpela samting, na God yet bai givim ol dispela samting long em.
Na dispela rot Abram bai i wokabaut long en, em i stat wantaim tok bilong God. Tok bilong God i save kirapim man. Tingim dispela tupela man i wok long kisim pis long raunwara Galili. Jisas i tokim tupela, “Yutupela kam bihainim mi,” na ol i lusim umben na i go bihainim em. Dispela em i pasin bilong tok bilong God. Em i dispela singaut bilong Gutnius.
Dispela tok bilong God i save helpim yumi long lusim ol samting bilong bipo. Sapos yumi gat gutpela tingting, yumi bai hariap na lusim ol dispela samting, na yumi no ken wari tumas long lusim ol dispela samting bilong bipo. Taim yumi amamas long dispela man
i singautim yumi, Jisas, yumi no ken wari tumas long lusim ol samting bilong bipo. Laip bilong yumi em i kamap nupela. God yet, na ol promis bilong em tu, bai pulim yumi nau, na yumi bai amamas long bihainim rot bilong em.
SAMPELA TINGTING
God i singautim yu long mekim wanem samting long tude? Em i singautim yu long mekim wok bilong em long nupela rot?
Ritim: Aposel 7:2-8
Abraham em i namba wan tumbuna bilong yumi olgeta... – Rom 4:16
I gat tripela kain lain i tok olsem Abraham i papa bilong ol. Ol lain Juda, ol Kristen, na ol Muslim lain i tok olsem ol i tumbuna pikinini bilong Abraham.
Maski wanem lain i tok stret olsem Abraham i Papa bilong ol, i gat wanpela samting em i tok tru. Sapos sampela long ol dispela tripela lain i ting olsem God bai amamas long ol bikos ol i stap olsem tumbuna pikinini bilong Abraham, ol i paul tru. God i no save mekim olsem.
Bilip bilong Abraham tasol em i bikpela samting. Ol lain i bihainim dispela bilip bilong Abraham tasol bai i kisim ol promis bilong God. Abraham em i man bilong wokabaut wantaim Bikpela. Planti lain long graun tude, ol i no klia long wokabaut olsem.
Sapos yu nupela marit, yu bai wok long lainim pasin bilong wokabaut gut wantaim man o meri bilong yu. Isi isi tasol bai yu kamap klia long pasin bilong stap gut wantaim man o meri bilong yu. Sapos marit bilong yu i kamap gutpela, orait sampela yia bihain yu bai save gut long man o meri bilong yu na yutupela bai i wanbel.
Tasol pasin bilong stap wantaim Bikpela em i narakain samting olgeta, na taim yu wokabaut wantaim Bikpela, tingting na tok na pasin bilong yu bai senis olgeta.
I no gat planti man o meri husat yumi inap long lukluk long ol bilong kisim save long gutpela pasin bilong wokabaut gut tru wantaim Bikpela. Ating i gat sampela lain bilong yu o pren bilong yu i stap olsem gutpela piksa long gutpela pasin bilong wokabaut wantaim Bikpela. Tasol olgeta taim yumi mas i go long Buk Baibel bilong kisim save tru long gutpela pasin bilong wokabaut wantaim God. Na laip bilong Abraham i save skulim yumi long dispela samting. Abraham em i papa tru bilong ol lain i stap aninit tru long Bikpela, na wokabaut wantaim em, na bilipim ol promis bilong em.
SAMPELA TINGTING
Laip na pasin bilong yu i soim olsem yu yet i wokabaut wantaim Bikpela, o nogat?
Ritim: Kamapim Tok Hait 21:1-8
Na dispela Man i sindaun long sia king, em i tok olsem, “Harim. Mi mekim olgeta samting i kamap nupela.” – Kamapim Tok Hait 21:5
God i wok long “stretim haus” na mekim olgeta samting em i kirapim pinis. Tasol long yumi man i luk olsem dispela wok i no pinis hariap. Tasol yumi no ken lus tingting bilong wanem God em i no pinisim wok bilong stretim haus bilong em hariap. Em i samting long save na marimari bilong em.
Planti lain i les long dispela wok bilong God bilong mekim olgeta samting i kamap nupela, tasol ol lain i bilip i amamas long lukim wok bilong em. Wankain olsem God i wokim graun na skai na olgeta samting long graun na skai long Tok bilong em, em i wokim nupela graun long gutnius long Pikinini bilong em. Man bilong tromoi pikinini wit i go pinis na mekim wok.
Yumi man, yumi save ting olsem dispela graun i no inap kamap nupela olgeta, long wanem, yumi no inap senisim man. Yumi no inap senisim yumi yet! Ol man i no inap, tasol God em inap long mekim olgeta samting. Long Stat em i givim yumi wanpela papa, Adam, na nau em i givim yumi namba tu Adam, Bikpela Jisas, na spirit bilong em i stap insait long olgeta lain bilong em. Yumi kisim nupela bel, nupela hop, na nupela pawa pinis. Na yumi bilip olsem God yet bai pinisim wok bilong em na mekim olgeta samting i kamap nupela. Yumi no ken les. Yumi no ken bel hevi. I no gat wanpela samting i nogut tru na God i no inap senisim em i kamap gutpela. I no gat wanpela samting i olpela na God i no inap senisim em i kamap nupela.
God i tokim yumi pinis olsem em bai i yusim paia. Kingdom bilong God i kam wantaim stretpela kot na wantaim salvesen. Dispela stretpela kot i kam pinis taim Jisas Krais i dai long diwai kros. Belhat bilong God i kapsait long Jisas, olsem na God i no inap mekim save long ol lain i aninit long em. Long ol dispela lain olgeta olpela samting i go pinis. Krais yet i baim kot bilong ol, na God i no inap mekim save long ol. God i putim yumi long kingdom bilong Pikinini bilong em, dispela Pikinini em i laikim tumas. Em i bosim yumi na yumi kisim nupela laip. Klostu nau God bai givim nupela nem na nupela kantri long yumi – dispela graun bilong hop na glori.
SAMPELA TINGTING
Tingting long dispela nupela kantri God bai givim yumi na tok tenkyu long em.
Ritim: Matyu 28:16-20
God i givim mi bikpela namba na strong bilong bosim olgeta samting long heven na long graun. Olsem na yupela i mas i go mekim olgeta lain manmeri i kamap disaipel bilong mi.... Harim. Mi save stap wantaim yupela olgeta de, i go inap long dispela taim i pinis. – Matyu 28:18-20
Wok Krais i mekim long dai na kirap bek gen, em i pinis. Olsem na Krais i skulim ol disaipel bilong em long mekim bikpela wok long dispela graun. Em i kisim bikpela namba na strong bilong bosim olgeta samting long heven na long graun. Ol disaipel i mas i go na mekim olgeta lain manmeri i kamap disaipel bilong em. Na em i save stap wantaim ol olgeta de. Dispela hap tok “olgeta” i min olsem i no gat sampela samting i lus. Krais i givim ol disaipel bilong em sampela wok i no gat pinis long em: “mekim olgeta lain manmeri i kamap disaipel bilong mi.” Ol disaipel i mas i go na mekim sampela moa disaipel. Na ol nupela disaipel i mas kisim baptais na lainim pasin bilong bihainim Jisas. Olgeta disaipel na olgeta misinari i gat wok long mekim olgeta lain manmeri i kamap disaipel bilong Jisas Krais.
Yumi no ken lus tingting olsem Krais i givim pawa long ol long mekim dispela wok. Sios bilong Krais i no inap mekim dispela wok long strong bilong em yet, bikos sios i no gat pawa. Tasol Krais yet i putim pawa bilong em long ol disaipel bilong em: “God i givim mi bikpela namba na strong bilong bosim olgeta samting long heven na long graun. Olsem
na yupela i mas i go mekim olgeta lain manmeri i kamap disaipel bilong mi.” Olsem na yumi no ken pret long mekim wok. Na Krais i givim yumi wanpela moa tok long strongim yumi long mekim wok: “Mi save stap wantaim yupela olgeta de, i go inap long dispela taim i pinis.” Dispela King yet i stap wantaim yumi. Em i givim pawa bilong em long ol misinari, tasol em i save wokabaut wantaim ol tu.
Yumi mas wok - long stap disaipel bilong Krais na bilong mekim ol arapela i kamap disaipel tu. Yumi mas bilip – pawa bilong Krais bai strongim yumi. Yumi mas bel isi – bikos Krais yet i stap wantaim yumi!
SAMPELA TINGTING
Yu ting wanem long dispela wok Jisas yet i givim yu? Tok bilong Krais long dispela teks i givim yu hop na strong, o nogat?
Ritim: Matyu 8:28-34
Orait tupela i singaut strong olsem, “Yu Pikinini Bilong God, yu laik mekim wanem long mipela? Taim i no yet, na yu kam hia bilong mekim nogut long mipela, a?” – Matyu 8:29
Taim yumi ritim Matyu, Mak, Luk na Jon long Nupela Kontrak, yumi bai klia olsem olgeta lain i no save gut long Jisas. Ol man na meri i no klia gut long em. Tasol ol spirit nogut i save gut long Jisas. Ol i gat narakain save olgeta long Jisas, na ol i klia bilong wanem Jisas i kam long dispela graun.
Taim ol spirit nogut i lukim dispela King, ol i pret nogut tru. Ol i klia olsem kingdom bilong God i kam long stap long dispela graun, bikos Jisas i kam pinis. I min olsem kingdom bilong Satan i bagarap.
Bikpela pait tru i stap namel long kingdom bilong God na kingdom bilong Satan. Na i no olsem yumi man i stap nating namel long dispela tupela kingdom. Nogat. Yumi stap redi
na amamas long aninit long Satan, o God i kisim yumi bek long marimari tru. Tasol i no olsem yumi yet bai winim dispela pait. Yes, long Spirit bilong God yumi bai mekim wok long dispela pait, tasol man i no inap winim dispela pait, na dispela pait i no samting bilong man.
“Taim i no yet, na yu kam hia bilong mekim nogut long mipela, a?” Ol spirit nogut i klia olsem ol bai bagarap, tasol ol i klia tu olsem kingdom bilong God i no kam pinis olgeta.
Jisas yet i oraitim dispela tupela man ol spirit nogut i stap long tupela, na em i salim ol spirit nogut long sampela lain pik. I no olsem Jisas em i sori long dispela ol spirit nogut, tasol i min olsem dispela taim God yet i makim i no kamap pinis yet. Long dispela taim God i makim, olgeta spirit nogut bai i go long hel.
Dispela stori i putim ples klia pawa bilong Jisas long bosim ol spirit nogut. Sapos ol i stap insait long man, na Jisas em i laik oraitim dispela man, ol spirit nogut i no inap pasim em. Na tu dispela stori i putim ples klia olsem dispela wok bilong winim pait i no pinis yet. Ol spirit nogut inap mekim wok yet, tasol taim bilong ol bai i kam!
SAMPELA TINGTING
Dispela stori i skulim yu long wanem samting long kingdom bilong God?
Ritim: Matyu 12:22-29
Tasol sapos Spirit bilong God i helpim mi na mi rausim ol spirit nogut, orait yupela i ken save, kingdom bilong God i kam pinis long yupela. – Matyu 12:28
I gat tupela kingdom: kingdom bilong God na kingdom bilong Satan. Yumi ken i stap long kalabus bilong Satan, o yumi ken i stap fri long kingdom bilong God.
Wanpela taim i gat wanpela man i stap olgeta long kalabus bilong Satan. Satan em i bosim em tru na em i gat spirit nogut i stap long em. Em i aipas na mauspas bikos Satan em i bosim em. Dispela i no min olsem olgeta man i aipas o mauspas i stap long kalabus bilong Satan. Tasol i min olsem ol sik bilong bodi, na ol spirit nogut i stap long man, bai i go pinis taim kingdom bilong God i kam olgeta.
Jisas i oraitim dispela man. Na bihain long dispela, ol man i stori long pawa bilong Jisas. Ol i paul olgeta bikos ol i klia olsem Jisas i no inap mekim olsem long strong bilong Satan. Na moa, Jisas i tokim ol, “Tasol sapos Spirit bilong God i helpim mi na mi rausim ol spirit nogut, orait yupela i ken save, kingdom bilong God i kam pinis long yupela.”
Dispela tok bilong Jisas i bikpela samting long helpim yumi save long kingdom bilong God. Kingdom bilong God i no samting long bihaintaim tasol na yumi wetim em i stap; em i samting i stap pinis long olgeta hap we pawa bilong Satan i bagarap. Na pawa bilong Spirit bilong God tasol inap brukim pawa bilong Satan. Dispela Spirit i stap long Jisas pastaim, tasol nau em i kam long olgeta lain i bilip long em.
Tude Jisas Krais i mekim wok long Spirit bilong em long ol lain i bihainim em. Kingdom bilong Satan i no inap sanap long dispela pawa. Taim Holi Spirit i bosim laip bilong yumi, em i olsem kingdom bilong God i kam pinis long yumi.
I luk olsem Satan yet i bosim planti hap long dispela graun, long dispela kantri. Tasol Spirit bilong Jisas i stap wantaim yumi na em i wok long bel bilong yumi, na dispela pawa i winim pawa bilong Satan. Em bai i win tru!
SAMPELA TINGTING
Yu bai pait wantaim Satan long laip bilong yu, olsem wanem? Pawa bilong Jisas i save helpim yu olsem wanem?
Ritim: Luk 18:1-8
Tasol taim Pikinini Bilong Man i kam, em bai i lukim ol manmeri i stap long graun ol i bilip, o nogat? – Luk 18:8
Sapos kingdom bilong God em i dia tru long yumi na yumi hop long em, yumi mas strong moa yet long prea na long paitim dua bilong heven inap long taim yumi kisim wanem samting yumi prea long kisim.
Krais i givim yumi wanpela tok piksa long skulim yumi long dispela pasin bilong beten long olgeta taim, na no ken les. Em i stori long wanpela meri, em i gat birua i laik bagarapim
em. Na em i go long lukim wanpela jas. Na maski dispela jas i no pret long God, na em i
no tingting tumas long ol man, meri i kisim helpim long dispela jas bikos em i no les long tokaut long hevi bilong em long dispela jas. Krais i laik skulim yumi olsem, bikos yumi gat wanpela stretpela na gutpela jas tru long heven, yumi no ken les long beten long em, long em i ken inapim olgeta promis bilong em.
Sios bilong graun i no ken les long singaut olsem: “Tasol taim Pikinini Bilong Man i kam, em bai i lukim ol manmeri i stap long graun ol i bilip, o nogat?” Long dispela teks, dispela tok “bilip” i min pasin bilong prea olgeta taim, na no ken les long prea, dispela prea i wok long paitim dua bilong heven.
Taim em i askim dispela askim, “em bai i lukim ol manmeri i stap long graun ol i bilip, o nogat?” Krais i soim olsem yumi man, yumi save lus tingting long ol promis bilong em, na lus tingting bilong wetim em, na stap nating long dispela graun tasol. Yumi no save wari tumas long sin, yumi no save wari tumas taim yumi lukim wanpela man i bagarapim arapela man o meri. Yumi save olsem i gat sin long graun na ol hevi tu, tasol yumi ting olsem yumi no inap senisim wanpela samting, olsem na maski.
Dispela em i bikpela samting nogut long laip bilong ol Kristen. Dispela kain tingting olsem, “maski, mi no inap stretim sin na hevi o long mekim sampela senis,” i namba wan samting i wok long bagarapim bilip. Ol i lus tingting long kingdom bilong God. Ol i lus tingting long paitim dua bilong heven. Ol i lus tingting long beten. Ol i no bilip tru olsem Jas bilong ol i stap na em i harim ol, na Bikpela bai kam bek klostu nau.
Bai Bikpela i lukim ol manmeri bilong bilip i stap long dispela graun, o nogat? Bai sampela man na meri i wokabaut stret long Rot bilong Bikpela, o nogat?
SAMPELA TINGTING
God i laik sapos yumi strong moa long beten long wanem kain ol samting?
Ritim: Matyu 25:1-13
Olsem na yupela i mas was gut. Yupela i no save long wanem de na wanem aua Bikpela bilong yupela bai i kamap. – Matyu 25:15
Dispela 10-pela yangpela meri ol i gat wok long lukautim man na meri husat i marit nupela. Ating ol i wetim man i marit nupela long wanpela ples namel long haus bilong man tupela meri. Ol i sindaun, ol i putim ol naispela klos pinis, na ol i holim lam bilong ol, redi bilong bungim man long rot. Ol bai singim ol song bilong amamas na ol bai i go pas long man long ples we dispela marit bai kamap.
Tasol man i no kam hariap. Ol meri i laik slip, na ol i wet i stap. Tasol wantu, long biknait tru, ol i harim wanpela man i singaut olsem, “Man i marit nupela em i kam nau.” Na ol i kirap long onim gen lam bilong ol, tasol dispela 5-pela kranki meri i sot long wel. Dispela 5-pela meri
i gat gutpela save, ol i gat planti wel, na ol i go bungim man long rot. Tasol dispela 5-pela kranki meri i go hariap long stua long baim sampela moa wel, tasol taim ol i kam bek dua i pas pinis.
Dispela stori i putim ples klia olsem yumi mas redi long bungim Bikpela olgeta taim bikos yumi no save long de o aua Bikpela bai i kam bek. Taim Krais i kam bek pinis em i leit pinis long redi hariap. Yumi mas redi olgeta taim.
Nupela Kontrak i stori long dispela bikpela pret bai i bungim ol lain i no redi long Krais i kam bek. Yumi ken sori long dispela 5-pela kranki meri bikos ol i no redi. Tasol, yu save sori long ol lain long dispela graun i no redi long bungim Bikpela long las de tu, o nogat?
SAMPELA TINGTING
Olsem wanem bai yu redi long bungim Krais? Hau bai yu stap redi long laip bilong yu?
Ritim: Matyu 24:45-51
Dispela kain wokboi i ken amamas tru taim bikman bilong en i kam bek na i lukim em i stap mekim wok bilong en. – Matyu 24:46
Em i bikpela samting long Buk Baibel long stap gutpela bosboi, tasol tude yumi no klia tumas long wok bilong ol bosboi. Long taim bilong Buk Baibel, taim wanpela bikman em i go long longpela wokabaut, planti taim em bai i lusim haus bilong em inap long wanpela yia samting. Taim em i stap long rot em bai i makim wanpela bosboi bilong lukautim olgeta samting bilong em. Dispela bosboi em i gat namba bilong bosim haus bilong dispela bikman na bilong baim sampela samting, na ol kain samting olsem. Taim bikman i kam bek long haus, bosboi yet i mas tokaut long wok em yet i mekim. Na planti taim em bai i no save wanem taim bikman bai i kam bek long haus bilong en.
Na dispela i olsem wanpela gutpela tok piksa tru Bikpela i givim yumi long wok yumi mas mekim taim yumi wetim taim em bai i kam bek. I gat planti ol tok piksa long Buk Baibel long wok bilong bosboi, na long ol dispela tok piksa ol bosboi i mas redi long taim bosman bilong ol bai i kam bek, na ol i no klia long taim em bai i kam bek.
Na sapos yu yet yu wanpela bikman, na yu i gat planti mani na kago samting, wanpela naispela haus na ka, orait yu bai makim wanem kain man long bosim ol dispela samting bilong yu? Ating yu bai makim wanpela man i stretpela, i gat gutpela bel, na em i save tok tru olgeta taim. Dispela pasin i bikpela samting stret!
Wanpela bosboi i stretpela na bel tru wantaim, em bai tingim bikman bilong em pastaim long olgeta wok em bai i mekim. Em bai stretim olgeta samting gut tru long redi long taim bosman bilong em bai i kam bek, long wanem, em i no save wanem taim em bai i kam bek, na em yet i mas tokaut long wok em yet i mekim.
“Olsem na yupela tu i mas redi. Pikinini Bilong Man bai i kam long wanpela taim yupela i no ting em bai i kam.”
SAMPELA TINGTING
Sapos God i kam bek nau nait, bai yu redi? Em bai lukim yu olsem gutpela bosboi bilong em, o nogat?
Ritim: Galesia 4:1-7
Tasol long taim stret God i bin makim, em i salim Pikinini bilong en i kam... – Galesia 4:4
Planti taim i luk olsem laip bilong dispela graun i olsem wanpela lain i raun olsem wanpela bal o ring. Mama i karim bebi, bebi i kamap bikpela, em i kamap lapun na bihain long dispela em i dai. Na sapos yumi tingting long wanpela yia, wanpela Krismas - Em bai i stat long Jenueri, i go long mun Juli, i go long pinis bilong yia. Na neks yia em bai i wankain gen – olsem wanpela lain i raun olsem wanpela bal o ring.
Wanem samting yumi tromoi long skai em bai i kam daun gen, a? Olgeta samting bai raun na raun gen. Sampela taim yumi bai tok, “Olsem wanem?” Olgeta samting i wok long kamap na i go long dispela graun i gat sampela as, sampela mining? Taim bai i raun raun tasol. San bai i kirap na san bai i go daun. I gat sampela man o sampela samting i stiam olgeta samting i wok long kamap na i go long dispela graun, o nogat?
Buk Baibel i skulim yumi olsem God i makim taim bilong em yet. Long taim stret God i bin makim, em i salim Pikinini bilong en i kam. Na tu Baibel i toktok long “las de,” dispela de Jisas bai i kam bek long dispela graun. God yet i bosim na makim wanem samting bai i kamap long wan wan de. Olgeta samting i kamap long dispela graun i wok long kisim yumi kam klostu moa long dispela las de.
Laip long dispela graun em i no raun raun nating. Dispela de, Jenueri 24, em i no wanpela de nating. Nogat, em i wanpela de God i makim bilong kisim yumi kam klostu moa long dispela las de. Olgeta samting i save kamap long laip bilong yumi, God yet bai yusim long mekim wok bilong em yet. Planti ol de bilong yumi go pinis, na yumi laik lapun nau. Tasol God i makim wan wan de bilong yumi, na em i save stiaim olgeta dispela de i go inap long taim dispela las de bai kam. Na long dispela de nambawan ensel bai i singaut, na biugel bilong God bai i krai. Na God bai i tok, “Inap! Dispela de mi makim i kamap pinis nau!”
Taim i go i go, na yumi mas lainim pasin bilong yusim taim bilong yumi gut tru. No ken pret, tasol no ken stap nating long dispela graun tu. Kingdom bilong God i kamap klostu nau!
SAMPELA TINGTING
Tingting gut: Laip bilong yu, na wan wan de bilong yu i wok long kisim yu i kam klostu moa long dispela las de. Na taim yu tingting long dispela, bai yu mekim wanem long laip bilong yu?
Ritim: Kolisi 1:9-14
Yumi bin i stap aninit long strong bilong tudak, na em i bin kisim bek yumi na putim yumi insait long lain bilong Pikinini bilong en, em dispela Pikinini em i save laikim tru. – Kolosi 1:13
Buk Baibel i tok olsem yumi stap aninit long strong bilong tudak, o sapos nogat, em i bikos God i kisim bek yumi na putim yumi insait long Kingdom bilong Jisas na yumi stap aninit long em. Yumi no ken i stap aninit long tudak na God wantaim. Sampela taim yumi gat laik long stap namel long Satan na kingdom bilong God. Tasol yumi no inap. Yumi stap long tudak yet o yumi stap long kingdom bilong God. Yu bilong Satan o yu bilong Krais. Em tasol.
Olgeta Kristen i ken litimapim nem bilong God bikos em i kisim bek yumi long strong bilong tudak na putim yumi insait long lain bilong Pikinini bilong en, em dispela Pikinini em i
save laikim tru. Olsem na, nau yumi inap long bihainim, na yumi mas bihainim, ol lo bilong Bikpela bilong yumi.
Yumi ken luksave olsem i gat tupela wok insait long dispela wok bilong salvesen. Namba wan samting i olsem em i kisim bek yumi long strong bilong tudak, na namba tu samting i olsem em i putim yumi insait long lain bilong Jisas. Namba wan samting em i samting bilong kisim bek yumi long kalabus, na namba tu samting i bilong givim yumi nupela laip taim em i putim yumi insait long kingdom bilong em.
Ol Kristen i toksave long dispela tupela wok bilong Krais taim ol i kolim em Man Bilong Kisim Bek, na Bikpela bilong ol. Taim yumi kolim em Man bilong Kisim bek, i min olsem em i kisim bek yumi long strong bilong tudak. Taim yumi kolim em Bikpela, i min olsem em i putim yumi insait long kingdom bilong em. Em i Man bilong kisim bek yumi, long wanem em i kisim bek yumi long olpela ples nogut. Na em i Bikpela bilong yumi, long wanem yumi stap aninit long em, na em i bosim yumi nau.
I min olsem, sapos yumi laik Jisas i mas i stap olsem Man bilong Kisim Bek yumi, orait em i mas i stap olsem Bikpela bilong yumi tu. Yumi no ken i stap namel long olpela ples na nupela ples. Yumi no ken i stap namel long tudak na kingdom bilong God. Yumi kisim salvesen pinis sapos yumi stap aninit long Krais, na em i bosim yumi.
Olsem na, sapos yu bihainim Bikpela, em bai i klia olsem God i kisim bek yu pinis.
SAMPELA TINGTING
Givim pres long God bikos em i kisim bek yu long tudak na putim yu long kingdom bilong Krais. Askim God long helpim yu long tok tenkyu long em long dispela wok Krais i mekim long yu.
Ritim: Buk Song 110
Taim yu laik pait long ol birua ol manmeri bilong yu bai i go wantaim yu na helpim yu. – Buk Song 110:3
Dispela Buk Song i stori long Jisas Krais. Na long Nupela Kontrak planti ol hap tok bilong dispela Buk Song i stap tu. Tasol ol lain Juda, long taim bilong Jisas, ol i save paul long tupela samting long dispela Buk Song. Namba wan samting i olsem: Devit em i raitim dispela Buk Song, na Jisas em i olsem tumbuna pikinini bilong em. Tasol Devit i tok, “Bikpela i tokim Bikpela bilong mi olsem...” Na dispela “Bikpela bilong mi” em i Jisas. Ol lain Juda i paul na ol i tok, “Olsem wanem na dispela tumbuna pikinini bilong Devit (Jisas) inap i stap olsem Bikpela bilong em tu?” (Matyu 22:45 i stori long dispela)
Namba tu samting ol lain Juda i paul long em i olsem: Dispela Mesaia, dispela King bilong Buk Song 110, em i wanpela pris wantaim: “Bai yu stap pris oltaim oltaim. Yu wankain pris olsem Melkisedek.”
Taim yumi klia olsem Jisas em i husat, yumi bai klia tu long dispela tupela samting ol lain Juda i paul long em. Em tru, Jisas em i tumbuna pikinini bilong Devit, tasol em i Bikpela bilong Devit tu bikos em i Pikinini bilong God. Na Jisas em i no King tasol, em i stap pris oltaim oltaim tu bikos em i givim em yet olsem ofa. Olsem tasol em i kamap king na em i stap pris bilong oltaim oltaim.
Nau, long tude, Jisas i gat pawa, na em i bosim graun. Tude King Jisas i gat ami bilong em yet. Na ami bilong em i pulap long ol lain i amamas na redi long mekim wok. Olgeta lain i stap long ami bilong em, Krais i winim ol pinis long laikim tru. Olgeta lain i putim klos pait, Spirit bilong Krais i winim ol pinis. Tasol ol lain yet i mas amamas na redi long mekim wok long ami bilong Krais. Krais i laikim ol lain i amamas long mekim wok bilong pait.
Na ol dispela man bilong pait, ol i pris tu, bikos Bikman bilong ol em i king na pris wantaim. Na Krais i winim pinis dispela pait bikos em i no yusim ol bainat na bikpela nois samting long pait. Nogat, em i yusim pasin bilong laikim tru na marimari wantaim long pait.
Ol pris bilong ol ami bilong God bai i winim dispela pait long pasin bilong prea na long pasin bilong ofaim laip bilong ol yet long dispela pait.
SAMPELA TINGTING
Yu save mekim ol pasin bilong laikim tru na marimari, o nogat? Na yu save amamas na redi long mekim olsem, o nogat? Tok tenk yu long God long dispela wok em i givim yu long kingdom bilong em.
Ritim: Rom 8:18-25
God i bin kisim bek yumi, na nau yumi bilip na wetim em inapim tru ol gutpela samting em i laik mekim long yumi. Na sapos yumi tok long yumi wetim wanpela samting, orait yumi save, yumi no kisim yet. Sapos man i kisim pinis wanpela samting, orait bilong wanem em bai i wet i stap? – Rom 8:24
Salvesen em i samting bilong nau na samting bilong bihain taim tu. Yumi kisim salvesen pinis, na tu yumi wet i stap bilong kisim salvesen. Krais i lusim sin bilong yumi pinis – olsem na salvesen em i samting bilong nau.“Yu kisim salvesen pinis?”“Yes, mi kisim pinis.”Tasol yumi save bungim ol hevi na pen yet, na sin i save stap wantaim yumi tu. “Yu kisim salvesen pinis?”“Mi wet i stap bilong kisim salvesen.” Salvesen i samting bilong bihain taim tu. Tingim, “Na sapos yumi tok long yumi wetim wanpela samting, orait yumi save, yumi no kisim yet. Sapos man i kisim pinis wanpela samting, orait bilong wanem em bai i wet i stap?”
Long save gut long dispela samting i gutpela sapos yumi tok olsem Krais i lusim sin bilong yumi na dispela em i namba wan kaikai long kingdom bilong God. Bikos Jisas i kam pinis long dispela graun, ol pawa bilong kingdom i stap pinis long dispela graun. Tasol kingdom bilong God i no pulapim tru graun yet. God i no pinis yet long wokim kingdom bilong em long dispela graun. Bilong lukim dispela samting, yumi mas wetim taim Jisas i kam bek gen long dispela graun. Long dispela taim God bai inapim tru ol gutpela samting em i laik mekim long yumi – God bai inapim tru salvesen long yumi.
Wok bilong Spirit bilong Krais em i bikpela samting long nau long dispela graun. Sapos yumi bilong Krais, em i lusim ol sin bilong yumi na yumi inap long mekim ol gutpela samting. Sin i no bosim yumi moa. Krais i bosim yumi long spirit bilong yumi, na bel bilong yumi kamap nupela. Laip bilong yumi senis.
Tasol nogut yumi ting olsem Kristen laip bilong yumi long dispela graun bai stap gutpela na stretpela tru olgeta taim. Planti taim sapos yumi skelim wokabaut bilong yumi, yumi bai wari long salvesen bilong yumi: Krais i kisim bek mi, o nogat? Tasol yumi no ken lukluk long yumi yet. Nogat, yumi mas lukluk long Jisas Krais. Yumi bai klia long salvesen bilong yumi long bilip tasol. Yumi wet i stap long kisim salvesen, dispela samting bai i kam yet.
Salvesen i kam pinis, tasol em i samting bilong bihain taim tu. Bilong wanem? Bikos kingdom bilong God i kam pinis, tasol em i no pulap tru long graun na God i wok yet
long inapim kingdom bilong em long dispela graun. Olsem na yumi mas prea strong tru: “Kingdom bilong yu i mas i kam!” o “Inapim hop bilong mi, Bikpela. Mi wet i stap long kisim salvesen bilong yu.”
Taim yumi prea strong tru olsem, long bel bilong yumi, yumi stap wanpela Kristen tru!
SAMPELA TINGTING
Long laip bilong yu, yu luksave long dispela tupela samting: Salvesen i kam pinis, tasol yu wet i stap long kisim salvesen tu?
Ritim: 1 Timoti 1:12-17
Krais Jisas i bin kam long graun bilong kisim bek yumi manmeri bilong mekim sin. Dispela tok em i tru olgeta na em inap long olgeta man i harim na bilipim. – 1 Timoti 1:15
Taim Pol i raitim namba wan pas i go long Timoti, em i wari tru olsem em i mas lukautim gut olgeta tok tru. Olsem na em i tok: “Timoti, yu mas was gut long dispela wok God i bin givim long yu. Givim baksait long olkain toktok nabaut i no bihainim tingting bilong God” (1 Timoti 6:20).
Dispela trupela tok bilong ol Aposel, em Timoti i mas lukautim, em i tok long Jisas Krais. Long dispela tok long Jisas Krais sios bilong en i sanap, na long dispela tok ol lain bilong God bai
i stap laip. Pol em i lapun na em i strong moa yet long Timoti i mas lukautim dispela trupela tok na givim baksait long ol toktok nabaut i no bihainim tingting bilong God.
Long 1 Timoti 1:15, Pol em i givim wanpela sotpela tok long putim ples klia bilong wanem Jisas em i kam long dispela graun – “bilong kisim bek yumi manmeri bilong mekim sin.” Na moa, em i tok olsem dispela tok em i tru olgeta na em inap long olgeta man i harim na bilipim.
Em i naispela samting stret olsem bel tru bilong gutnius i stap insait long dispela sotpela tok: “Krais Jisas i bin kam long graun bilong kisim bek yumi manmeri bilong mekim sin.”Sampela taim yumi paul long ol tok long Jisas. I gat planti buk tru i stori long Krais, na yumi no inap ritim olgeta dispela buk. Tasol, taim yumi paul liklik, yumi mas tingim dispela sotpela tok tru. Yumi ken kisim bel isi long dispela gutpela tok tru: “Krais Jisas i bin kam long graun bilong kisim bek yumi manmeri bilong mekim sin. Dispela tok em i tru olgeta na em inap long olgeta man i harim na bilipim.”
Dispela samting bai i givim bikpela bel isi long yumi. Jisas i kam long kisim bek ol manmeri bilong mekim sin. Sampela taim yumi bai pilim olsem yumi inap long amamasim God, na sampela arapela taim yumi bai pilim doti tru long ai bilong em bikos yumi no inap. Tasol, taim yumi klia olsem yumi no inap long ai bilong em, yumi ken save gut olsem Jisas em i kam long kisim bek ol manmeri bilong mekim sin, ol manmeri i no inap long ai bilong em!
SAMPELA TINGTING
Singim dispela singsing, “Marimari tru” (John Newton em i raitim), na tingting long dispela tok tru olsem Jisas i kam long kisim bek ol manmeri bilong mekim sin.
Ritim: Jeremaia 28:1-11
...orait Hanania ... em i sanap long ai bilong ol manmeri na i tok, “Bikpela i tok olsem...” – Jeremaia 28:10-11
Ol profet i man bilong autim tok bilong God. Taim wanpela profet i opim maus bilong em, em i no autim tok bilong em yet. Nogat. Em i save tok, “Bikpela i tok olsem.” Dispela man, Hanania, em i tok olsem em i autim tok bilong God. Tasol em i giaman. Em i wanpela giaman profet.
I gat planti ol giaman profet long dispela graun long tude tu. Na i gat sampela lain i bihainim ol. Sampela taim ol bai i autim naispela tok tru na i luk olsem em i winim ol tok bilong ol trupela profet. Tasol ol i giaman.
Hau bai yumi save sapos wanpela profet em i giaman profet o trupela profet?
Yumi mas klia gut long tok bilong God. Bilip bilong ol trupela Kristen em i no wankain olsem bilip bilong ol giaman profet. Nogat. Yumi mas klia gut long as bilong ol tok long Buk Baibel. Bilong wanem planti manmeri i save givim planti mani long painim as bilong ol sik, olsem kansa, o bilong klia gut long kain kain samting olsem ol science samting, tasol ol i no save givim planti mani o taim long klia gut long tok bilong God? Ol lain olsem ol Jehovah Witness lain inap paulim planti manmeri tru, na giamanim ol, olsem wanem?
Planti ol Kristen i no wari tumas long ol giaman profet, maski God yet i tok strong olsem yumi mas lukaut long ol. Planti ol Kristen i no wari tumas long save gut tru long tok bilong God. Yumi mas wok strong tru long pasim ol giaman tok, na yumi mas prea olgeta taim bai God i ken bagarapim ol wok bilong ol giaman profet. Na yumi mas wok long sapotim ol gutpela skul i wok long skulim ol lain long Tok Tru bilong God.
Na bikpela samting stret i olsem yumi yet i mas stap klostu long Krais, na Tok bilong em i mas stap insait long bel bilong yumi.
SAMPELA TINGTING
Wanem ol giaman profet i stap long tude? Na ol i wok long giamanim ol lain bilong graun olsem wanem?
Ritim: Buk Song 130
Em bai i kisim bek ol manmeri bilong en, em yumi Israel, na rausim olgeta sin bilong yumi. – Buk Song 130
...na yu mas kolim nem bilong en Jisas, long wanem, em bai i lusim sin bilong ol manmeri bilong en na kisim bek ol. – Matyu 1:21
Ol wasman long nait i save wet i stap inap long tulait i kamap. Ai bilong ol bai slip, tasol ol
i no ken slip. Ol i mas putim was. Long ol wasman dispela taim bilong tudak em i longpela taim stret na ol bai i wet inap long tulait i kamap. Na dispela man i raitim Buk Song 130 em i tok, “Mi save wet long Bikpela, na mi laikim tumas bai em i helpim mi.”
Long Nupela Kontrak yumi kisim save long sampela wasman, na pastaim yumi kisim save long ol wasman bilong sipsip “was long ol sipsip bilong ol long nait.” Na dispela nait em i bikpela nait stret na i winim ol arapela nait, long wanem lait i kam hariap bipo long taim nait i pinis. Ol wasman i harim olsem Jisas em i kamap pinis; mama bilong em i karim em.
Dispela man bilong raitim Buk Song 130 em i wetim dispela pikinini, Jisas. Bilong wanem? Bikos Jisas tasol inap long rausim sin bilong ol na kisim bek ol.
Yumi no ken lus tingting long dispela tok tru. Dispela Olpela Kontrak i wetim Bikpela i kisim dispela De i kam na “rausim olgeta sin bilong yumi Israel.” Na dispela Nupela Kontrak i tok save olsem, taim bilong wetim dispela de i pinis nau: “Na yu mas kolim nem bilong en Jisas, long wanem, em bai i lusim sin bilong ol manmeri bilong en na kisim bek ol.”
Sapos Jisas em i no God tru, orait yumi stap yet long tudak, long nait. Tasol, bikos Jisas em
i God, em i gat pawa bilong lusim sin bilong yumi na kirapim yumi long nupela laip. Nait bilong yumi, tudak bilong yumi, i pinis nau. Dispela tulait, dispela nupela de, i kirap pinis. “Yu man nau yu slip, yu mas kirap. Yu kirap long matmat na Krais bai i givim lait long yu.” (Efesus 5:14)
Tudak em i pinis nau. Yumi no gat nid long wetim dispela tulait nau, long wanem, Jisas i kam pinis. Yumi no ken pundaun long hevi bilong sin nau bikos Jisas i kam pinis. Dispela wok bilong salvesen em i gutpela na stretpela olgeta bikos God yet i wokim.
SAMPELA TINGTING
Tingting long rot God yet i yusim bilong kisim yu long tudak i go long tulait, na givim glori long em long dispela samting em yet i wokim.
Ritim: Aisaia 63:15-64:2
Bikpela, mipela i laik yu mas brukim skai na kam daun. – Aisaia 64:1
Sampela taim i luk olsem yumi nidim wanpela bikpela mirakel. Sapos wanpela man i gat bikpela sik tru, na ol dokta i tok olsem em bai i dai, yumi bai tok, “A, yumi nidim wanpela bikpela mirakel. God yet i mas oraitim em.”
Sapos wanpela meri gat bikpela hevi – man bilong em i wok long paitim em nogut tru na bagarapim em olgeta taim. Man em i no harim tok bilong sios o bilong ol arapela, na em i bagarapim em i stap. Em i les long senisim pasin bilong em. Ating dispela meri bai brukim skru na singaut long Bikpela: “God bilong mi, yu mas kam na stretim dispela hevi bilong mi.... Mipela i laik yu mas brukim skai na kam daun.”
Hia, long dispela teks long Aisaia i gat man i brukim skru na prea long God. Em i stori long ol hevi bilong ol lain bilong God long dispela graun. Ol dispela lain i no harim tok tru; ol i lus. Ol i stap long kalabus na haus bilong Bikpela em i lus tu. “Plis, God, bai yu kam na stretim ol dispela hevi....Mipela i laik yu mas brukim skai na kam daun.”
God em i save bekim olgeta prea bilong yumi. Na em i bekim dispela prea bilong Aisaia na em i bekim long narakain rot olgeta. Long taim bilong em yet, God i salim Jisas i kam long dispela graun olsem wanpela bebi long Betlehem. Skai i bruk na ol ensel i bung long givim glori long God.
Taim Pikinini bilong God i kam daun, skai i bruk. Na God i wok long stretim ol hevi bilong yumi long dispela graun. Long laip bilong ol lain bilong God, yumi inap lukim wok bilong God bilong kirapim nupela graun. Tasol dispela kingdom i no kam olgeta nau. Em bai i kam, tasol yumi mas singaut strong na prea strong olgeta taim: “Kam, Jisas. Yu Kam. Mipela laik yu mas brukim skai na kam daun.”
SAMPELA TINGTING
Yu yet i gat bikpela laik long kingdom bilong God i mas i kam? Yu save prea long Jisas i mas kam bek long dispela graun?
Ritim: Aposel 13:44-49
Tru, mitupela i mas givim tok bilong God long yupela Juda pastaim. Tasol yupela i givim baksait long dispela tok, na i olsem yupela yet i tok, “Mipela i no inap kisim laip i stap gut oltaim.” Olsem na yupela harim. Nau mitupela i no ken autim tok moa long yupela. Mitupela bai i autim tok long ol arapela lain... – Aposel 13:46
Sapos yu givim baksait long Krais i olsem yu kilim yu yet i dai.
Wok bilong sios em i bikpela samting stret. Em i samting bilong laip na i dai. Planti taim ol sios i no save wari tumas long dispela. Planti ol sios i wari tasol long amamas, na mekim naispela tok long ol lain i save kam bung wantaim. Planti ol sios i wari tasol long kisim planti manmeri i kam insait long dua bilong sios bilong amamasim ol tasol.
I no tru olsem yumi no ken amamas long sios. Yumi mas amamas, na yumi mas opim dua bilong sios na amamas long kisim planti lain i kam insait. Yumi mas soim laikim tru long ol lain i kam long sios tu. Tasol yumi no ken lus tingting long dispela samting: ol lain i givim baksait long Krais, ol i kilim ol yet i dai. Ol lain i apim ol yet na i les long stap aninit long tok bilong God, ol i no inap kisim laip i stap oltaim oltaim. Planti lain i no klia long dispela. Planti lain i no save olsem ol i kilim ol yet i dai. Tasol Pol na Barnabas i tok olsem dispela samting em i tru.
Tok bilong God em i tok bilong God tru tru. Ol gutpela manmeri bai inapim tok promis bilong ol. Tasol God i winim ol gutpela manmeri. Em yet i no inap sakim tok bilong em yet. Em bai inapim tok bilong em long wok bilong Jisas Krais. Taim yu apim em, yu bai kisim olgeta samting God i promis long givim yu. God bai inapim tok bilong em, ol tok promis na ol strongpela tok bilong em tu.
SAMPELA TINGTING
Yu klia long ol tok promis na ol strongpela tok long Buk Baibel?
Ritim: Aisaia 66:18-24
...bai ol i lukim ol bodi bilong ol lain i bin bikhet na sakim tok bilong mi, ol i dai pinis na i slip nabaut long graun. – Aisaia 66:24
God bai i kisim bek ol lain bilong em, na em bai i mekim save long ol lain i les long em, na long dispela rot em bai i sanapim kingdom bilong em. Dispela tupela samting i save wok wantaim insait long dispela bikpela wok God i mekim. Sios bilong God i mas autim gutnius bilong wok bilong Jisas Krais bilong kisim bek yumi, tasol sios i mas stori long stretpela kot bilong God tu. Maski yumi gat liklik save tasol long pasin bilong God long mekim save long ol lain i sakim tok bilong em long las de, yumi klia olsem dispela de bai i kam. Planti taim yumi no stori tumas long wok bilong Krais long kisim bek yumi bikos yumi no wari tumas long wok bilong God bilong mekim save long ol lain i no stap aninit long Krais.
Long Olpela Kontrak, buk bilong Aisaia i winim ol arapela buk long givim ol naispela tok long plen bilong God bilong kisim bek ol lain bilong em. I gat planti ol naispela tok long dispela buk bilong givim bel isi. Aisaia i stori long bikpela laikim tru bilong God, tasol dispela buk i pinis long bikpela krai. Em i pinis long wanpela tok piksa long ol lain i lus long hel.
Yumi no save amamas long ritim dispela kain tok piksa. I no naispela. Tasol i no olsem yumi ken abrusim ol dispela kain tok, na yumi no ken les long stori long pasin bilong God bilong mekim save long ol birua bilong em long oltaim oltaim. Ol lain long heven bai sori na krai long taim ol manmeri bilong mekim sin i no tanim bel, na ol bai i amamas long taim ol manmeri bilong mekim sin i tanim bel. Olsem na yumi, ol lain bilong God long graun, i mas mekim wankain pasin. Sapos yumi no save pilim sori na hevi tumas long ol lain i stap long rot i go long hel, hau bai yumi amamas tru long salvesen bilong Bikpela?
Planti taim tru Aisaia i tok olsem, God em i“Bikpela bilong Israel.”Yumi save olsem God em i pulap long laikim tru na marimari, tasol, em i God – Bikpela! God em i holi olgeta na em i no inap lukim sin, olsem na em i mas kam long mekim save long ol lain i les long em, na long kisim bek ol lain bilong em. Jisas Krais i mas karim sin bilong yumi. Sapos nogat, yumi stap yet long sin bilong yumi na God bai i mekim save long yumi.
Bikpela God, yu ken marimari long mipela na ol lain i stap klostu long mipela tu!
SAMPELA TINGTING
Tingting gut pastaim na beten olsem: “Bikpela God, yu ken marimari long mipela na ol lain i stap klostu long mipela tu.”
Ritim: Kamapim Tok Hait 1:9-18
...Na wanpela bainat i gat tupela sap na i sap tru, em i kam ausait long maus bilong en. – Kamapim Tok Hait 1:16
Jisas inapim olgeta tok profet long Olpela Kontrak i tokaut long em. Tasol olgeta samting i kamap i narakain olgeta long olgeta tingting long olgeta manmeri.
Ol Israel i wetim wanpela man bilong pait, olsem em bai i kam olsem king na bagarapim olgeta birua bilong em. Ol Israel i ting olsem em bai i kirapim bikpela pait i holi na givim bel isi i go bek long Israel, na Israel bai i stap gut tru.
Tasol wanem samting tru i kamap long ol dispela tok profet long dispela king bilong winim pait?
Jisas em i King pinis. I gat wanpela man i bin lukim em olsem King. Na dispela man em i Jon. Jon i stap long ailan ol i kolim Patmos. Na dispela King em i lukim, em i gat bainat. Yes, em i gat bainat. Tasol em i no putim bainat long hankais bilong em, olsem ol arapela man bilong pait i save putim. Nogat. Bainat bilong em i kam ausait long maus bilong en!
Olgeta manmeri bai i kirap nogut long dispela. Gutnius bilong kingdom i narakain samting olgeta: Laion em i kamap olsem pikinini sipsip. Jas i kam wantaim marimari. Man bilong bungim kaikai i kam olsem man bilong tromoi pikinini wit. Na bainat bilong king i kam ausait long maus bilong en.
Dispela bainat i olsem Tok bilong em. Na dispela Tok bilong em bai i pait. Krais i bin givim strongpela tok long ol lain i kisim Tok bilong em pinis, olsem sapos ol i no harim Tok bilong em na bihainim dispela Tok, orait ol bai i no gat hop long las de, dispela de bilong bikpela kot bilong God. Na God em i mekim wankain tok long ol manmeri bilong kantri bilong yumi tude.
Tok bilong God em i no samting nating. I no samting bilong yumi i ken kisim o tromoi long laik bilong yumi yet. Nogat. Tok bilong God i gat pawa bilong opim na pasim dua bilong kingdom bilong heven. Dispela bainat i olsem Tok, tasol dispela Tok em i olsem bainat tu!
SAMPELA TINGTING
Tok bilong God em i bikpela samting long laip bilong yu, o nogat?
Ritim: Jon 12:23-33
...sapos pikinini wit i no pundaun long graun na i dai, orait em wanpela tasol bai i stap. Tasol sapos em i dai, orait em bai i kamap na karim planti kaikai. – Jon 12:24
Ol lain long Jerusalem i bel nogut. Sampela lain ol i toktok isi olsem Jisas em i man bilong kisim bek ol, olsem ol profet i bin promis. Na taim Jisas i go insait long Jerusalem antap long wanpela donki, ol i singaut strong, “Amamas long God. God i ken mekim gut long dispela man i kam long nem bilong Bikpela. Em i king bilong Israel.”
Na Jisas i save olsem taim bilong em i kam pinis nau. Na tu em i save olsem, “...sapos pikinini wit i no pundaun long graun na i dai, orait em wanpela tasol bai i stap. Tasol sapos em i dai, orait em bai i kamap na karim planti kaikai.”
Jisas i save olsem em i mas i dai long diwai kros pastaim, na bihain em bai i kisim kraun bilong king. Sapos Papa bai inap long bungim gutpela kaikai, Jisas i mas i stap olsem pikinini wit pastaim. Olsem na em i givim em yet. Em i givim laip bilong em yet long yumi. Olsem na yumi i ken tenkyu long em na litimapim nem bilong em oltaim oltaim.
Tasol i no Jisas tasol inapim dispela lo bilong pikinini wit. Nogat. Em i tok olsem ol disaipel bilong em, ol lain i laik bihainim em, ol i mas bihainim dispela lo tu. Planti taim yumi laik lus tingting long dispela. Tasol yu mas lainim gut na bilip tru olsem i no gat wanpela gutpela kaikai i kamap sapos em i no kisim dai bilong Jisas pastaim. Na moa, dispela dai bilong Jisas i givim yumi pawa long bihainim dispela lo bilong pikinini wit.
Sapos pikinini wit i stap long haus tasol, em bai i no inap karim kaikai. Nogat. Em bai karim kaikai sapos em i pundaun long graun na i dai pastaim.
Jisas i skulim yumi long dispela lo long lain 25. Em i tok, “Sapos wanpela man i laikim tumas laip bilong em yet, laip bilong en bai i lus. Tasol sapos wanpela man i givim baksait long
laip bilong en long dispela graun, orait em bai i holimpas laip bilong en inap oltaim oltaim.” Sapos yu no redi long lusim laip bilong yu yet, orait yu no redi long stap insait long kingdom bilong God. Taim yumi wok long givim, yumi bai kisim; sapos yumi save blesim ol arapela, bai yumi kisim blesing; na sapos yumi givim baksait long laip bilong yumi long dispela graun, bai yumi kisim dispela laip i stap oltaim oltaim.
Sapos Jisas i Bikpela bilong mi, mi mas bihainim dispela lo bilong pikinini wit.
SAMPELA TINGTING
Em i gat wanem mining long laip bilong yu olsem yu mas bihainim dispela lo bilong pikinini wit?
Ritim: 1 Korin 2:1-9
Mipela i autim tok long gutpela tingting na save bilong God... Tasol tok bilong dispela rot i bin i stap hait, na i no gat wanpela hetman bilong dispela graun i bin save long en. – 1 Korin 2:7-8
Long dispela hap, Pol i no stori long sampela tok hait olsem tok hait bilong ol samting bilong masalai o sanguma. Nogat, dispela tok hait em i gutnius, dispela gutnius bilong Krais. Dispela gutpela tingting na save bilong God em i Krais, em i bin dai long diwai kros bilong kisim bek yumi. Dispela gutpela tingting na save bilong God i stap long ples hait; i no gat wanpela man i bin save long em bipo long taim God yet i soim dispela klia tru. God yet i redim rot bilong salvesen bilong soim bikpela save na gutpela tingting bilong em, na bilong daunim olgeta ol arapela rot bilong kisim salvesen olsem ol giaman lain i stori long ol. I no gat ai i lukim o yau i harim – dispela dai na kirap bek bilong Krais.
Long diwai kros, olgeta pawa bilong sin i go pait wantaim Krais. Em i no dai long diwai
kros olsem man nating. Nogat, em i het bilong olgeta manmeri bilong dispela graun. Em
i stap olsem pesman bilong lain bilong em na em i dai. Na tu em i kirap bek. Em i no man nating na em i kirap bek. Nogat, em i kirapim dispela nupela taim bilong bungim kaikai long gaden.
Long dai bilong em, Krais i pinisim pawa bilong Satan; taim Krais i kirap bek long matmat em i soim klia dispela pawa bilong God. Dua bilong nupela taim i op long dispela taim. Pawa bilong Heven i kam daun. Holi Spirit i kam na bringim laip i no gat pinis long em long ol lain i bilip long Krais.
Dispela em i gutnius. Rot bilong salvesen long Krais i kamap ples klia. Dispela gutnius i go aut long graun, wankain olsem ol i tromoi pikinini wit long gaden. Long dispela Tok planti lain long graun bai kisim salvesen na dispela graun bai i kamap nupela gen.
Yumi mas harim dispela gutnius na kisim gutnius olsem samting bilong yumi yet. Na bikos Spirit bilong God tasol i givim yumi dispela save bilong God, yumi mas strong long askim God long givim Holi Spirit long yumi taim yumi ritim na tingting long tok bilong God.
SAMPELA TINGTING
Yu yet yu harim dispela gutnius, na yu wok long kisim dispela gutnius olsem samting bilong yu yet, o nogat? Yu yet i bin askim Spirit bilong God long helpim yu taim yu ritim na tingting long tok bilong God, o nogat?
Ritim: Matyu 13:3-14
Wanpela man i go tromoi pikinini wit long gaden. – Matyu 13:3
Taim Jisas i autim dispela tok piksa long ol, i gat planti manmeri i no save tru long as bilong dispela tok piksa. Ol lain i gat “yau long harim” na ol lain “God i larim ol i save pinis long as bilong tok hait bilong kingdom bilong heven,” ol dispela lain tasol i save gut long as tru bilong dispela tok piksa bilong Jisas. Bilong wanem ol arapela lain i no klia gut long dispela tok piksa?
Ol dispela manmeri i wet i stap long lukim taim kingdom bilong heven bai i kam. Jon bilong Baptais i bin tok olsem, kingdom bilong heven i kam klostu pinis. Em i tok olsem, man bilong holim savol long han bilong en, bilong rausim olgeta pipia i stap long wit bai kam na em bai i bungim wit long haus wit bilong en. Tasol pipia em bai i kukim long paia i no save dai.
Jisas i stori long wankain kingdom. Tasol Jisas i no stori long dispela man bilong holim savol bilong rausim olgeta pipia. Nogat, em i stori long man i tromoi pikinini wit long gaden. Dispela man i mekim olsem, na bihain em i wet i stap. Em i save olsem planti ol pikinini wit bai lus. I gat planti ol ston i stap yet long gaden. Planti ol rop i gat nil i stap tu na sampela pisin i wok long karim sampela i go. Tasol sampela pikinini wit bai karim kaikai. Long taim bilong bungim ol wit i mau, sampela gutpela kaikai bai i stap.
Na dispela em i wankain olsem dispela rot kingdom bilong God i save bihainim long kam. Em i rot God i yusim bilong kisim bek ol manmeri bilong em. Em i no salim paia i kam long heven yet, na em i no salim i kam man bilong holim savol bilong rausim olgeta pipia i stap long wit yet. Nogat, em i salim man i tromoi pikinini wit long gaden. Na sapos yu i gat yau, yu bai i harim. Sapos God i larim yu i save pinis long as bilong tok hait bilong kingdom bilong heven, yu bai save olsem bikpela wok bilong kingdom bilong God i kam long han bilong man i tromoi pikinini wit long gaden.
Yumi no bin lukim ol bikpela samting tru long nau. King i bin kam pinis long dispela graun – tasol em i kam olsem wanpela wokboi. I luk olsem i no gat senis i kamap long dispela graun. Tasol ol lain i save pinis long as bilong tok hait bilong kingdom, ol i wet i stap na ol i prea strong tru bikos, “wanpela man i go tromoi pikinini wit long gaden....”
SAMPELA TINGTING
Dispela tok piksa i soim olsem kingdom bilong God i bihainim wanem rot long kam long dispela graun?
Ritim: Matyu 6:5-15
Taim yupela i no opim maus yet long askim Papa bilong yupela long wanpela samting, em i save pinis long olgeta samting yupela i sot long en. – Matyu 6:8
Yumi mas tokim God long wanem samting yumi sot long en. Tasol, taim yumi opim maus bilong yumi yet long askim Papa bilong yumi long wanpela samting, em i save pinis long olgeta samting yumi sot long en. Em i hatwok stret long yumi yet i save gut tru long wanem samting yumi nidim.
Yumi no inap save gut tru long wanem samting yumi nidim. Planti taim yumi bai ting olsem yumi nidim sampela samting, tasol yumi no nidim tru tru. Sampela taim wanpela man i ting olsem em i nidim wanpela nupela meri, tasol nogat, em i mas lainim pasin long stap gut wantaim meri bilong em tasol. Planti taim tingting bilong yumi bai paul bikos yumi gat ol hevi, wari, sori, i go i go.
Tasol yumi ken kisim bikpela bel isi bikos yumi save olsem Bikpela yet i klia gut tru long olgeta samting yumi nidim. Taim wanpela sikman, bun bilong em i dai olgeta, i kam long Jisas, yumi bai ting olsem Bikman bilong em bai stretim namba wan hevi bilong em pastaim -“Em i gat sik. Oraitim em, Jisas!”Tasol Jisas i tokim em,“Mi lusim pinis sin bilong yu.”Krais em i save long dispela namba wan samting dispela man i nidim!
Planti taim, taim yumi tokim God long olgeta samting yumi laikim, ating em bai ting olsem ol dispela samting i no nid tru bilong yumi. Olsem na Jisas, taim em i skulim yumi long gutpela pasin bilong beten, i tokim yumi long prea olsem, nem bilong God i ken i stap holi na kingdom bilong God i mas i kam pastaim. Em i save olsem dispela samting i olsem namba wan samting yumi olgeta i nidim.
Na yumi mas askim yumi yet – yumi klia long ol dispela nid bilong yumi? Yumi no ken autim dispela tok nating taim yumi prea, bikos namba wan samting yumi nidim, nid tru tru bilong yumi, em i God!
SAMPELA TINGTING
Mekim dispela beten Jisas i skulim yumi long mekim, na tingting gut taim yu prea: “Nem bilong yu i mas i stap holi. Kingdom bilong yu i mas i kam.”
Ritim: Luk 10:38-42
Marta, Marta, yu wok long tingting planti na yu wari long planti samting. Yu mas tingting long wanpela samting tasol. Dispela samting Maria i laik kisim, em i gutpela samting tru, olsem na yumi no ken pasim em long kisim dispela gutpela samting. – Luk 10:41,42
Taim yumi harim dispela stori bilong Marta na Maria yumi no ken ting olsem pasin bilong sindaun nating na malolo em i winim pasin bilong mekim wok. 1 Tesalonaika i stori long wanpela sios we ol i save sindaun tasol na stori long taim Krais bai i kam bek. Pol i tokim ol long kirap na wok. God i no amamas long pasin bilong les long wok.
Tasol wok inap kilim man i dai - taim wok bilong yu i bikpela tumas long laip bilong yu, na yu no gat taim long harim tok bilong Jisas. Namba wan samting yumi nidim i olsem: yumi mas save gut tru long Jisas. Yumi nidim dispela long stap laip. Na yumi inap save long Krais taim yumi harim tok bilong em.
Sampela bai tok olsem, “Mi save long Jisas.” Na em i gutpela. Tasol yu no inap save long Krais sapos yu no harim tok bilong em. Olsem na yumi mas ritim tok bilong em na harim Spirit bilong em, na dispela em i namba wan samting yumi nidim long laip bilong yumi.
Masta tru bilong yumi em i save long wanem samting yumi nidim. Em i save olsem yumi nidim kaikai, yumi nidim mani. Em i save olsem yumi gat planti wok yumi mas mekim. Tasol Krais i tokim yumi wankain olsem em i tokim Marta: “Yu wok long tingting planti na yu wari long planti samting. Yu mas tingting long wanpela samting tasol...em i gutpela samting tru.” Em i namba wan samting yumi nidim.
Yumi mas tingting gut na klia gut long wanem samting yumi nidim tru tru. Yumi nidim Jisas! Sapos yumi save gut long Jisas na bilipim tok bilong em, laip bilong yumi bai stap orait.
SAMPELA TINGTING
Yu save givim planti taim long laip bilong yu long harim tok bilong Jisas, o nogat?
Ritim: Matyu 9:1-8
Pikinini, bel bilong yu i ken i stap isi. Mi lusim pinis ol sin bilong yu... Yu kirap na kisim bet bilong yu, na yu go long haus bilong yu. – Matyu 9:2,6
Ol profet long Olpela Kontrak i stori long dispela kingdom bai i kam olsem wanpela graun i gat planti gris na kaikai i stap long en. Sampela bai tok olsem dispela em i tok piksa long ol gutpela samting, olsem ol samting bilong amamas na bel isi.
God i makim Jisas bilong stap King long dispela kingdom i stap nau na long dispela kingdom bai i kam yet. Taim em i mekim ol bikpela wok bilong em long graun, Jisas i soim klia ol samting bilong kingdom bilong em.
Na ol i karim wanpela sikman, bun bilong en i dai olgeta, long Jisas. Na Jisas i tok, “Pikinini, bel bilong yu i ken i stap isi. Mi lusim pinis ol sin bilong yu.” Na bilong soim olsem em i gat olgeta pawa bilong lusim sin, Jisas i oraitim sik bilong dispela man, na em i kirap na wokabaut.
Long kingdom bilong God olgeta hevi i mas go pinis. Krais i kam long mekim dispela olgeta graun i kamap nupela. Em i gat pawa bilong mekim olsem, long wanem, em i gat pawa bilong lusim sin. Olgeta samting yumi yet i mekim long stretim sampela hevi long dispela graun, em bai i helpim liklik tasol. Em gutpela long yumi i stretim ol samting nogut long dispela graun, bilong oraitim sik, bilong stretim ol haus i bruk. Tasol yumi no inap long stretim ol bel i bruk na bagarap.
Krais i stretim as bilong ol hevi. Na as bilong ol hevi na sik em i dispela sin i stap long bel bilong man. Krais i givim yumi wanpela nupela bel na nupela hop wantaim. Tasol em i no pinisim wok bilong em olsem. Nogat. Em bai i givim nupela heven na nupela graun long yumi tu. Sapos em i lusim ol rong bilong yumi long tude, tumora bai yumi lukim ol lek nogut man i kirap, na ples drai nating bai pulap long ol naispela plaua tru!
SAMPELA TINGTING
Tingting long sampela rot God i bihainim long mekim olgeta samting i kamap nupela. Brukim skru long dispela God, Antap Tru!
Ritim: Aisaia 11:1-9
...olgeta samting long graun bai i save tru long Bikpela. Dispela save bai inapim olgeta hap graun olsem solwara inapim mak bilong en olgeta. – Aisaia 11:9
Hia, long Aisaia 11, yumi lukim narapela naispela piksa long dispela ples bilong hop na glori. Pastaim yumi ritim long dispela gutpela King husat i bosim dispela kantri. Na dispela nupela kru i kamap long Jesi, dispela as bilong diwai ol i katim pinis, em i Jisas Krais. Na Aisaia i tok olsem, taim Krais i bosim wanpela kantri dispela kantri bai i gat amamas, stretpela kot, na malolo. Dispela King i rausim ol pasin nogut, em i mekim gut long ol rabisman na animal. Bel isi tru i stap na ol lain i amamas na wanbel tasol.
Taim dispela Mesaia i bosim graun, em bai gutpela. Yumi inap tok olsem dispela kantri em i olsem graun bilong promis, long wanem “olgeta manmeri na olgeta samting long graun bai i save tru long biknem na strong bilong Bikpela.” Dispela tupela samting i save stap wantaim. Taim nem bilong God i stap Holi, na kingdom bilong em i kam pinis, olgeta manmeri na olgeta samting long graun bai i save tru long biknem na strong bilong Bikpela.
Wanpela taim wanpela man i draivim taksi long wanpela rot i bisi tru. Na em i bamim narapela ka. Na man i draivim ka i belhat na i wok long autim strong nem bilong Jisas Krais; em i kolim nating nem bilong Jisas. Na draiva bilong taksi i askim em, “Bosman, bilong wanem yu no autim nem bilong wanpela man husat yu yet yu save long em?”
Taim man o meri i wok long kolim nating nem bilong God em i bikpela rong tru, tasol i putim ples klia olsem ol dispela man o meri, ol i no klia long God em i husat. Taim wanpela man em i klia long Jisas na save tru long em, em i no inap kolim nating nem bilong em. Nogat, em bai yusim nem bilong em long prea.
Yumi inap tok olsem Krais i kam long dispela graun long wokim kingdom bilong em, o yumi inap tok olsem em i kam bilong skulim yumi long olgeta samting bilong Bikpela. Tupela i wankain tok tasol. Na Krais i salim Holi Spirit long yumi long helpim yumi long bihainim Krais olsem King bilong yumi - o bilong skulim yumi long God olsem Papa bilong yumi.
Taim Kingdom i kam pinis, olgeta manmeri na olgeta samting bilong dispela graun bai i save tru long biknem na strong bilong Bikpela.
SAMPELA TINGTING
Yu yet yu bin onaim nem bilong God, na litimapim nem bilong em long tude? Olsem wanem?
Ritim: Matyu 5:13-16
Yupela i olsem sol bilong graun...Yupela i olsem lait bilong graun... – Matyu 5:13-14
Yumi ol longlong lain bilong God i olsem sol bilong graun. Ol lain bilong graun i no bilipim dispela, na lain bilong God bai bilipim isi isi, tasol God yet, husat i kamapim dispela graun, em i soim dispela long yumi: dispela liklik lain bilong God i gat bikpela pawa long dispela graun.
Ol lain long taim bilong Krais, ol i klia tru long dispela tok piksa long sol. Ol i save yusim sol bilong lukautim kaikai olsem em i no inap bagarap hariap. Sol tasol i gat pawa long pasim ol kaikai long bagarap. Kaikai bai i stap gut long sol. Olsem na, ol lain long bipo ol i save presim God (o ol giaman god) long givim sol long ol.
Taim Krais i tok olsem lain bilong em i olsem sol bilong graun, i min olsem God i makim lain bilong em long pasim wanem samting sin i wok long bagarapim long dispela graun, na long lukautim olgeta gutpela samting.
Tasol moa, Krais i stori long dispela samting nogut tru: taim sol i lusim pait bilong en. Sapos dispela samting kamap, i no bikos olgeta manmeri bilong graun i wok long daunim na bagarapim ol lain bilong God. Nogat. Dispela samting i kamap taim bel bilong ol lain bilong God i wok long bagarap. Taim ol longlong lain bilong God i wok long kamap wankain olsem ol lain bilong graun, ol bai i lusim pawa bilong stap olsem sol. Taim sol em i no sol moa, taim ol Kristen i no stap olsem lain tru bilong kingdom bilong God, i olsem ol i samting nating
na olgeta manmeri long graun i no gat hop nau. Sios bilong God i gat pawa. Ol lain bilong dispela graun i nidim sios long helpim ol i kisim salvesen, tasol sios i mas stap olsem Sios tru.
Ol Kristen i stap olsem lait bilong graun tu. Sapos i no gat ol Kristen i stap long graun, tudak bai karamapim graun. Olgeta save long God bai i go pinis.
I tru olsem yumi i bikpela samting tru? Yes. God i givim yumi, dispela liklik lain bilong em, dispela pawa bilong salvesen. Tasol sapos yumi no stap olsem sol na lait, God em i no inap yusim yumi nau, na yumi bai i stap olsem samting nating tasol.
SAMPELA TINGTING
Dispela tok, “yupela i stap olsem sol na lait bilong graun,” i gat wanem mining long laip bilong yu?
Ritim: Matyu 5:1-12
Ol manmeri i save, ol i stap rabis tru long ol samting bilong God...Ol manmeri i krai i stap... Ol manmeri i save daunim nem bilong ol yet...Ol manmeri i laikim tumas long bihainim stretpela pasin...Ol manmeri i save marimari long ol arapela...Ol manmeri bel bilong ol i klin...Ol manmeri i save mekim dai ol kros na pait...Ol manmeri i save bihainim stretpela pasin na long dispela as ol i kisim hevi long ol arapela ol i ken amamas. Kingdom bilong heven em i bilong ol. – Matyu 5:3-10
I gat 7 bilien samting manmeri long dispela graun. 1 bilien i olsem 1 tausen milien. Em i bikpela namba tru. Na olgeta dispela manmeri i gat ol hop na ol laik bilong ol yet.
Na i gat wanpela lain namel long olgeta dispela manmeri, na ol ensel i olsem wokboi bilong ol. Ol dispela manmeri i kam long kain kain hap long dispela graun, na God i save long nem bilong olgeta wan wan.
Tasol dispela ol manmeri i narakain olgeta. Bilong wanem? Ol i save hop long God. Ol i bilipim tok bilong God na ol i bilip olsem God bai i bosim dispela graun olsem king. Olsem na ol dispela manmeri i narakain liklik long olgeta arapela manmeri long dispela graun, maski ol i luk klostu wankain olsem ol arapela.
Ol i stap rabis tru long ol samting bilong God, tasol ol arapela manmeri i amamas long ol kago samting long dispela graun na ol i ting olsem ol i gat bikpela save tru.
Ol i krai i stap, na i luk olsem ol arapela i lap i stap.
Ol i save daunim nem bilong ol yet, na ol arapela i save apim ol yet.
Ol arapela lain ol i wok long bungim bungim olgeta gutpela samting long graun, tasol ol yet i laikim tumas long bihainim stretpela pasin.
Planti lain long dispela graun i wari long ol yet, tasol ol dispela lain i save marimari long ol arapela.
Bel bilong ol i klin, maski bel bilong ol arapela lain i doti tru na ol i wok long mekim pasin pamuk. Taim pait i kirap, ol dispela lain i wok long mekim dai ol kros na pait. Na God i tokim ol: “Yupela i ken amamas. Kingdom bilong heven em i bilong yupela!”
Amamas na kisim bel isi, yupela ol manmeri bilong God. Tok nogat long olgeta samting nogut bilong dispela graun. Hop long God. Bikpela Jisas bai i givim kingdom bilong em long yu!
SAMPELA TINGTING
Yu save bihainim ol gutpela pasin olsem yumi bin stori long em long tude?
Ritim: Matyu 3:13-17
Long dispela taim Jisas i lusim Galili na i go long wara Jordan. Em i go long Jon, na i laik kisim baptais long han bilong Jon. – Matyu 3:13
Wanpela narakain samting tru i kamap taim Jisas em i wokabaut namel long planti lain na em i go long Jon bilong Baptais bilong kisim baptais long han bilong en. Jisas yet i laik kamap klin!
Jisas inap tru long kisim olgeta pres, na olgeta lain i mas brukim skru long em. Ol namba wan profet tru i no inap long givim kis long lek bilong em o long karim su bilong em. Tasol em i tok, “Mi laik kisim baptais.”
Tasol Jon em i wari long dispela na em i laik pasim em. Tasol Jisas i bekim tok olsem, “Maski, nau yu mas mekim olsem mi tok. Long dispela pasin bai yumi inapim olgeta samting God i laik bai yumi mas mekim.” Olsem na Jon i bihainim tok bilong em.
Taim Jon em i harim pinis laik bilong God, em i redi long bihainim em. Jisas em i go long wara Jordan bilong kisim baptais. Em i kisim ples bilong yumi olsem em yet i man bilong mekim sin. Na taim em i sanap long dispela ples bilong ol lain bilong mekim sin, wanpela maus i singaut long heven olsem, “Dispela em i Pikinini bilong mi.” Spirit bilong God i kam daun, na pawa bilong em wantaim, na Jisas i redi long mekim wok bilong em yet.
Em i bikpela wok stret!
Kingdom bilong God em i kam klostu pinis bikos pawa bilong heven i bin kapsait long dispela King. Em i kisim baptais long Spirit na em bai i go bilong bagarapim pawa bilong Satan. Em i narakain samting olgeta! Jisas, Bikpela bilong olgeta bikman, i kisim ples bilong ol manmeri, na em i rausim sin! Maski Jon bilong Baptais - o yu na mi - i wari olsem Jisas em i no ken kisim baptais, God i tok, “Nogat – em i pikinini bilong Mi. Na em i gutpela long em i kisim baptais.”
Pikinini bilong God i kam bilong kisim bek ol lain bilong God. Olsem na em i sanap long kisim ples bilong ol lain bilong mekim sin, olsem yu na mi!
SAMPELA TINGTING
Tingting long baptais bilong Jisas. Tingting long Jisas i sanap long wara Jordan na kisim ples bilong yu, wanpela man o meri bilong mekim sin. Na tok tenk yu long God.
Ritim: Matyu 3:1-12
Yupela tanim bel. Kingdom bilong heven em i kam klostu pinis. – Matyu 3:2
Jon bilong Baptais i tok olsem, “Em i kam.” Klostu God bai kam bilong mekim save long ol lain i no bilip long em na bilong kisim bek ol lain bilong em. Olgeta samting nogut God bai i kukim long paia, na olgeta gutpela samting God bai i bungim bilong stap gut oltaim oltaim.
Jon i ting olsem las de i kamap klostu pinis, long wanem em i las profet bilong Olpela Kontrak. Na ol lain bilong Olpela Kontrak i save ting olsem taim Jisas i kam long dispela graun em bai kam long bringim salvesen na de bilong kot wantaim. Ol i no ting olsem Jisas bai i kam long graun tupela taim. Tasol yumi yet i save long sampela moa samting olsem Jon bilong Baptais, bikos yumi stap bihain long taim bilong dai na kirap bek bilong Jisas. Yumi save olsem Jisas i winim kot bilong yumi pinis long dispela namba wan taim em i kam daun long graun, na bihain em bai i kam bek long dispela graun olsem Jas.
Tasol dispela i no min olsem Jon i paul taim em i tok, “Kingdom bilong heven em i kam klostu pinis.”Dispela kingdom em i kam klostu pinis, na dispela King i bin kam. Jon i bihainim ol wok God yet i givim long em. Em i tokim ol lain Juda, na yumi olgeta, olsem i no gat wanpela bilong yumi i ken i stap long kingdom bilong God sapos yumi no tanim bel na kamap klin.
Tanim bel em i wanem samting? Em i no samting bilong sori bilong wanpela liklik samting nogut yumi mekim tasol. Nogat. Em i samting bilong pinisim ol pasin nogut bilong yumi. Yumi mas lusim ol pasin nogut long olpela bel bilong yumi na tanim i go long God na kisim ol gutpela pasin bilong em.
Taim yumi harim tok long kingdom bilong God, yumi mas tingim dispela tok bilong Jon: Yumi no ken wok long kisim ol gutpela samting long kingdom bilong God sapos han bilong yumi doti. Yumi no inap go insait long kingdom bilong God sapos yumi wok long sanapim kingdom bilong yumi yet long dispela graun.
Planti taim yumi save ting olsem: “Maski. Bihain bai mi tanim bel.” Planti taim yumi les long stretim ol kranki pasin long laip bilong yumi. Satan bai i yusim dispela tingting bilong yumi long bagarapim yumi. Em i save wok strong long pasim yumi long kam insait long kingdom bilong God taim em i tokim yumi long tanim bel long narapela de.
Yumi mas tanim bel nau! Long wanem, kingdom bilong heven em i kam klostu pinis!
SAMPELA TINGTING
Olgeta de yumi mas tok sori long ol sin bilong yumi na tanim bel. Long nau yu mas askim God long lusim rong bilong yu gen.
Ritim: Aisaia 35
Yupela i mas sanap strong na i no ken pret. God bai i kam na kisim bek yupela na mekim save tru long ol birua bilong yupela. – Aisaia 35:4
Olgeta man na meri i gat hop. Sapos wanpela man i nogat hop i min olsem em i dai pinis. Em i wanpela nupela yia, na planti taim long stat bilong wanpela nupela yia ol manmeri bai ting olsem,“Ating long dispela yia planti samting bai i kamap orait long mi.”Tasol yumi mas askim yumi yet – yumi gat wanem kain hop, na as bilong hop bilong yumi em i husat?
Ol Kristen i save hop long Krais, na ol i wetim taim Krais bai i kam bek, na ol i wetim kingdom bilong God tu. I tru olsem olgeta lain long graun, na dispela graun yet, i wok long painim gutpela ples bilong hop na glori, em dispela gutpela ples ol lain i bilipim tok bilong God i save kolim “kingdom bilong God.”
Aisaia 35 i stori long dispela ples bilong hop na glori. Ples drai bai i amamas tru na ol naispela plaua bai i kam na karamapim ol dispela hap. Na ol lek nogut bai i kalap olsem
ol dia, na mauspas bai i singaut na amamas. Sin na pret i go pinis. Em i ples bilong bel isi olgeta. I no gat krai na sori long dispela ples. Ol bai i ranawe i go. Em i kantri long hop bilong yumi. Olgeta manmeri i gat laik long stap long dispela kain ples – em i kingdom bilong God.
Na, harim. Em bai kamap olsem: “God bai i kam.” Olsem na yumi mas hop long God na prea long em. Ol samting long dispela graun olsem ol stoa na ol mani, ol save na ol marasin, olsem ol wok tu, i no inap kisim dispela Ples bilong Hop na Glori i kam. Nogat – “God bai i kam.”
Em bai i kam na mekim save tru long ol birua bilong yumi, na kisim bek yumi. Ol lain i wok long bagarapim yumi, em bai i mekim save long ol; tasol ol lain i save kisim bagarap, em bai i kisim bek ol. Em bai i mekim save long ol lain i no laikim em, tasol em bai i kisim bek ol lain i laikim em tumas. Na long dispela rot God bai opim dispela ples bilong hop na glori.
Olgeta manmeri i gat hop. Tasol yumi mas hop long God. Ol lain i mekim olsem bai i amamas. Ol bai i amamas tru.
SAMPELA TINGTING
Bai yu soim dispela hop bilong yu olsem wanpela Kristen olsem wanem?
Ritim: Hibru 11:29-12:2
...Ol dispela manmeri bilong bipo ol i sanap na raunim yumi i stap olsem bikpela klaut, na ol i soim yumi pasin bilong bilip. Olsem na yumi mas lusim olgeta kain samting i mekim yumi
i no inap ran strong, na olgeta sin i save pas long yumi. Na yumi mas strongim bel na ran strong long dispela resis God i bin makim bilong yumi ran long en. Yumi mas lukluk i go long Jisas, em i as bilong bilip bilong yumi, na bihain em bai inapim tru bilip bilong yumi. – Hibru 12:1-2
I no olsem yumi go insait long dispela nupela yia olsem wanpela hap palang long wara
i save surik i go kam long biksi. Nogat. Dispela nupela yia i olsem wanpela resis. Na God i singautim yumi long ran long dispela resis na em i skulim yumi long pasin bilong ran gut long dispela resis tu.
“Yumi mas lusim olgeta kain samting i mekim yumi no inap ran strong, na olgeta sin i save pas long yumi.” Sapos yu pasim planti klos tru na ran, em i olsem yu lusim dispela resis pinis. Planti klos tumas bai pasim yu long ran. Na tu sapos yu patpela tru na yu sotwin olgeta, hau bai yu pinisim dispela resis?
Ol lain bilong God i no ken karim ol pasin nogut bilong ol long dispela resis. Ol i mas tromoi i go olgeta wari bilong dispela graun. Taim God i singautim yu long stap long kingdom bilong em, yu no ken pulapim han bilong yu long ol kago samting bilong dispela graun na kain kain laik bilong yu yet. Nogat. Ol bai i hevi tumas. Yu mas holim wanpela tingting tasol, na em i bilong ran strong long dispela resis bilong Bikpela.
Dispela resis em i hat tru. Sampela bai ran, tasol ol i gat bikpela sik. Sampela bai ran, tasol ol i sot long mani. Sampela bai ran na ol kisim bagarap bikos ol i bihainim Jisas. Sampela bai mekim nupela wok long dispela yia o go long wanpela nupela skul; tasol maski, ol bai i ran. Maski wanem samting yumi bai mekim o yumi bai bungim long dispela yia, yumi olgeta i mas ran. Na yumi olgeta i mas ran na lukluk long Jisas taim yumi ran.
I gat planti manmeri i raunim yumi na lukluk long yumi. Tasol ol i no olsem manmeri nating. Nogat. Ol i save pinis long pasin bilong ran long dispela resis, bikos ol yet i pinisim dispela resis pinis. Ol i soim yumi pasin bilong bilip, na ol i raunim yumi olsem wanpela bikpela klaut. Ol i save olsem yumi mas bilip long Jisas taim yumi ran long dispela resis. Ol dispela lain bilong bipo, em ol i dispela lain Hibru 11 i stori long ol, husat i raunim yumi na ol i tokim yumi long stap strong long bilip tasol, na no ken les long ran long dispela resis.
Yumi mas lukluk i go long Jisas tasol. Lukluk long em. Taim yumi lukluk i go long Jisas, yumi inap long winim ol hevi na olgeta samting i wok long pasim yumi, na yumi bai i kisim prais. Stap strong na ran!
SAMPELA TINGTING
Tingting long sampela samting i wok long pasim yu long ran strong, na askim God long helpim yu tromoi i go ol dispela samting.
Ritim: Buk Song 130
Sapos yu kaunim olgeta sin bilong mipela bai husat inap long winim kot bilong yu? Tasol yu save rausim ol sin bilong mipela olsem na mipela i mas pret long yu. —Buk Song 130:3-4
Olgeta kantri na nesen i gat rot bilong ol yet bilong makim taim bilong Niu Yia. Long planti ol kantri dispela las de bilong wanpela yia em i taim bilong ol bikpela pati, taim bilong spak na mekim bikpela nois stret.
Bilong wanem ol i mekim olsem? Nogut ol i pret.
Yumi no ken pret, tasol em i gutpela long yumi i tingting gut long laip na wokabaut bilong yumi long dispela las de long olgeta yia. Em i gutpela long yumi i toktok wantaim Bikpela.
Wanpela yia i pinis: “Sapos yu kaunim olgeta sin bilong mipela, bai husat inap long winim kot bilong yu?”
Em i gutpela sapos yumi i tingting gut long ol sin bilong yumi long dispela yia i go pinis. Makim 10- pela minit samting bilong tingting long ol samting nogut yu bin mekim long dispela yia i go pinis. Yu inap long mekim olsem? Na bai yu autim ol dispela sin long God, o nogat?
“Tasol yu save rausim ol sin bilong mipela.”
Em i olsem God i raitim dispela samting long olgeta de long kalenda long dispela yia i go pinis: Mi fogivim yu! Mi fogivim yu! Long blut bilong Jisas, God i rausim olgeta sin bilong yu. Tok tenkyu tru long God!
Taim God i rausim dispela asua bilong ol sin yumi i bin mekim long bipo, bai yumi i bel isi long tude, na bai yumi i redi long wetim wanem samting bai i kamap bihain.
Yumi no save wanem samting bai i kamap bihain long tude. Planti lain bai i wari long dispela, na sampela lain bai wok long painimaut wanem samting bai i kamap bihain long tude. Tasol yumi i no inap. Na yumi no ken pret. Yumi ken bilip long God na trustim em olgeta!
Yumi save tru long dispela: Jisas bai kam!
SAMPELA TINGTING
Sindaun long 10-pela minit samting na tingim ol sin bilong dispela yia i go pinis. Na askim God long rausim ol dispela sin bilong yu, na tok tenkyu long em long em i fogivim yu!
Ritim: Luk 5:27-32
“Pikinini Bilong Man i kam bilong painim ol man i lus na kisim bek ol.” —Luk 19:10 “Olsem tasol, mi no kam bilong singautim ol stretpela man long tanim bel. Nogat. Mi kam
bilong singautim ol man i save mekim sin.” —Luk 5:32
Taim olgeta manmeri i pinis long amamas long taim bilong Krismas, orait yumi ken askim ol, “Bilong wanem Jisas i bin kam long dispela graun?” O yu ken i go long wanpela haus lotu na askim ol lain long haus lotu, “Bilong wanem Jisas i bin kam long dispela graun?” Ol bai i bekim dispela askim olsem wanem? Ating sampela bai i no inap long bekim gut.
Na tu, ating sampela bai bekim gut, tasol ol dispela gutpela bekim bai i no inap wankain olgeta. Nupela Testamen i gat kain kain rot bilong autim as bilong Jisas i bin kam long dispela graun. Buk Baibel i skulim yumi olsem Jisas i kam bilong kisim kingdom bilong God i kam, bilong bagarapim Satan, bilong bihainim laik bilong Papa bilong em, na bilong givim glori long God.
Tasol em i gutpela sapos yumi olgeta i save long dispela wanpela bekim long dispela askim: Krais i kam bilong painim na kisim bek ol manmeri i lus. Em i kam bilong kisim bek ol manmeri bilong mekim sin.
Bilong wanem yumi mas save long dispela wanpela bekim?
Namba wan, em bai i givim bel isi long yumi. Bikos yumi olgeta i lus, yumi olgeta i nidim Krais long kam na kisim bek yumi. Jisas i tok, “Mi no kam bilong singautim ol stretpela man long tanim bel. Nogat. Mi kam bilong singautim ol man i save mekim sin.” Em i tokim ol Farisi, “Ol man i no gat sik ol i no save go long dokta. Nogat. Ol sikman tasol i save go long dokta.” Em i laik soim ol olsem ol i mas klia gut long sin bilong ol yet. I no gat wanpela man o meri i stap orait. Olgeta i nidim Jisas long kisim bek ol.
Namba tu, yumi i mas klia bilong wanem Jisas i kam long dispela graun bikos yumi i stap memba long sios bilong em. Sapos Masta bilong yumi em i kam bilong painim na kisim bek yumi, yumi i mas bihainim dispela pasin bilong em. Yumi i mas go na painim ol man na meri i lus, na autim dispela gutnius long ol, olsem ol tu i ken kisim salvesen long Krais.
Yumi no save wok long painim ol samting i no lus, na ol lain i no gat sin i no nidim salvesen. Krais i kam bilong painim ol lain i lus na bilong kisim bek ol man na meri bilong sin. Ol lain i save olsem ol i pulap long sin, ol bai i go long Krais bilong kisim salvesen. Tasol ol lain i ting olsem ol i orait, ol i no save olsem ol i nidim Jisas.
SAMPELA TINGTING
Yu yet yu save bihainim dispela pasin bilong Jisas bilong “painim na kisim bek” ol lain i lus, o nogat?
Ritim: Mak 6:1-6
Orait em i go bek wantaim tupela, na ol i kamap long Nasaret, na oltaim em i save bihainim tok bilong tupela. —Luk 2:51
Taim Jisas em i stap long dispela graun laip bilong em i wankain olsem laip bilong yumi. Long san em ikirap,nalongnaitemislip. Emikaikainaemimekimwok. Emigatpapanamamanabratana susa, wankain olsem yumi.
Ating Josep em i dai taim Jisas i yangpela yet. Em i stap laip yet taim Jisas i gat 12-pela krismas, tasol taim Jisas em i kirapim wok tru bilong em long taim em i gat 30 krismas, yumi no harim moa tok long Josep. Yumi harim stori long mama bilong Jisas, na ol brata na susa bilong em tasol (Mak 3:31; 6:3).
Jisas em i bikpela long famili bilong em, na dispela i min olsem em i mas mekim hat work stret long lukautim famili bilong em sapos Josep em i dai pinis taim Jisas i yangpela yet. Buk Baibel i no stori tumas long taim Jisas em i yangpela. Yumi harim stori long taim em i wanpela bebi, na bihain long dispela yumi harim stori long taim em i gat 12-pela krismas na i stap long tempel long Jerusalem. Na inap long 18 yia samting bihain long dispela, yumi no harim stori long laip na wokabaut bilong em.
Planti manmeri i bin wok long kamapim kain kain giaman stori long ol mirakel bilong Jisas taim em i yangpela yet. Ol i giaman tasol. Jisas em i mekim hat wok stret. Em i no wokim ol mirakel bilong kisim kaikai - nogat, em i bihainim pasin bilong mekim wok bilong kisim kaikai. Long Nasaret, dispela taun we em i stap taim em i yangpela, olgeta manmeri i save tok olsem Jisas em i wanpela kamda (Mak 6:3). Dispela em soim klia olsem Jisas em i olsem wanpela man nating tasol, kain olsem yu na mi.
Pasin bilong mekim wok em i gutpela samting. Sapos nogat, ating Jisas i no inap mekim planti wok kamda. Tasol em i bin mekim bikpela wok olsem kamda. Olsem na, sapos yumi i gat wok, yumi mas kirap na mekim wok gut.
Jisas bai i kam. Na taim em i kam bek, em bai gutpela long em i lukim yumi i mekim wok bilong yumi – maski em i wok long wanpela woksap, long gaden, long ofis, long skul o long haus bilong yumi. Long wanem, em yet i mekim olsem taim em i stap long dispela graun.
SAMPELA TINGTING
Jisas em i man kain olsem yumi. Dispela tok bai i helpim yu olsem wanem long laip bilong yu yet?
Ritim: Luk 2:41-52
“Ating yupela i no save, mi mas i stap long haus bilong Papa bilong mi?” ... Na mama bilong en i putim dispela olgeta tok long bel bilong en na i holim i stap. —Luk 2:49, 51
Long wanpela taim long olgeta yia olgeta manmeri bilong Juda i bin i go long Jerusalem long lotuim Bikpela. Na ol i amamas tru long mekim olsem. Ol i save wokabaut i go tasol, na ol i save wokabaut wantaim planti ol arapela man na meri. Ating ol i save singsing taim ol i wokabaut – Buk Song i gat sampela buk song ol i save singim taim ol i wokabaut i go long Jerusalem: Buk Song 120-134.
Maria na Josep i save bihainim pasin bilong tingim dispela Bikpela De God i Larim Yupela Israel i Stap Gut. Olsem na ol i bin go long Jerusalem, na bihain ol i wokabaut i go bek long Nasaret. Tasol Jisas i no wokabaut wantaim ol. Bihain long tripela de, tupela papamama i painim Jisas, na tupela i lukim Jisas i sindaun i stap insait long banis bilong tempel, namel long ol tisa. Ol man i harim tok bilong en, ol i kirap nogut long save bilong en na long tok em i bekim long ol.
Taim Josep tupela Maria i lukim em, tupela i kirap nogut. Na Maria i tok, “Pikinini, bilong wanem yu mekim dispela pasin long mitupela? Bel bilong mi tupela papa bilong yu i hevi tumas na mitupela i wok long painim yu.” Tasol Jisas em i bekim tok olsem long tupela, “Ating yutupela i no save, mi mas i stap long haus bilong Papa bilong mi?”
Em i gat 12-pela Krismas pinis tasol, na em i save olsem em i gat wok long bihainim laik bilong God, Papa bilong em. Tasol yumi no klia sapos Jisas i klia olgeta long wok bilong em na laik bilong Papa bilong em long laip bilong em.
Na mama bilong em i putim dispela olgeta tok long bel bilong en na i holim i stap. Ating em i save stap namel long pret na amamas taim em i lukim laip na wokabaut na pasin bilong Pikinini na Saviour bilong em. Taim Jisas em i liklik bebi, Maria i bin singim wanpela singsing i klostu wankain olsem singsing bilong Hana. Hana i givim pikinini man bilong em, Samuel, long Bikpela. Ating Maria i tingting long dispela, na em i kisim save olsem em i mas larim Jisas i bihainim laik bilong Papa bilong em.
Jisas em i man tru. Papamama bilong em i save olsem God em i Papa tru bilong em, tasol ating ol arapela i no save olsem em i Pikinini bilong God tu. Jisas em i wanpela yangpela mangi bilong lain Juda. Em i gat gutpela save na em i gat bikpela laik long bihainim laik bilong Bikpela, tasol em i wanpela yangpela mangi long lain bilong Juda. Tasol em i orait, yumi stap olsem man na meri tu, na em i kam long mekim yumi i kamap stretpela man na meri tru.
Na long wok bilong Jisas, planti ol manmeri olsem yu na mi i amamas long bihainim laik bilong Papa bilong ol long heven. Na sampela bilong ol dispela lain i ol yangpela mangi tu, na sampela i gat 12- pela krismas tasol.
SAMPELA TINGTING
Bilong wanem Luk i raitim dispela stori long yangpela mangi Jisas long buk bilong em?
Ritim: Luk 2:25-38
“Bikpela, mi wokboi bilong yu, na nau yu ken larim mi i go, na bel bilong mi i ken i stap isi, olsem bipo yu tok. Ai bilong mi i lukim pinis samting yu mekim bilong kisim bek mipela.”
—Luk 2:29-30
God i promisim Simeon olsem em bai i lukim dispela Mesaia bipo long taim em i dai. Na long dispela de, Holi Spirit i kirapim Simeon na em i go insait long tempel, na em i lukim Maria na Josep na bebi bilong tupela. Na Simeon i kisim dispela bebi na holim em. Na em i litimapim nem bilong God olsem, “Bikpela, mi wokboi bilong yu, na nau yu ken larim mi i go, na bel bilong mi i ken i stap isi, olsem bipo yu tok. Ai bilong mi i lukim pinis samting yu mekim bilong kisim bek mipela.”
Simeon i no askim God long larim em i dai nau. Nogat, em i bin i stap olsem wanpela wasman, na taim bilong was bilong em i pinis. Em i olsem pesman bilong ol trupela lain bilong Israel. Na wanpela lapun meri, Ana, em i kam na lukim dispela bebi tu.
Buk Baibel i tok olsem Simeon em i “wetim dispela man God i bin makim bilong mekim gut bel bilong ol Israel.” Na Ana em i “autim tok bilong dispela pikinini long olgeta manmeri i wet long God i kisim bek ol manmeri bilong Jerusalem.”
Buk Baibel i soim olsem i gat trupela Israel i stap, na em i ol dispela lain i wetim dispela Mesaia. Bel bilong ol i strong long wetim em na prea long God i ken kam na kisim bek ol manmeri bilong Jerusalem.
Na nau Simeon tupela Ana i amamas tru na bel isi bikos ol i lukim dispela bebi long tempel. Na taim bilong was bilong ol i pinis. Olsem tasol Simeon i bin singim dispela singsing: “Bikpela, mi wokboi bilong yu, na nau yu ken larim mi i go, na bel bilong mi i ken i stap isi, olsem bipo yu tok. Ai bilong mi i lukim pinis samting yu mekim bilong kisim bek mipela.” Na Ana, dispela meri i kam long lain bilong Aser dispela pikinini bilong Jekop i no gat namba, em i lukim dispela bebi. Na em i klai olsem dispela pikinini em i dispela Mesaia ol i wetim long kisim bek ol manmeri bilong Jerusalem. Long dispela taim i olsem Olpela Testamen i pinis tru, na Nupela Testamen i kirap tru.
Em i olsem wanpela was i pinis na nupela was i kirap. Na nau ol lain bilong dispela Mesaia, dispela trupela Israel long dispela nupela kontrak, i stap olsem lain bilong was na wet na prea. Na klostu nau dispela taim bilong bel hevi na pen bai pinis na senis i kamap taim bilong amamas oltaim oltaim!
SAMPELA TINGTING
Yu inap lainim wanem samting long pasin bilong Simeon tupela Ana?
Ritim: Luk 2:8-14
“Litimapim nem bilong God i save stap antap tru.” —Luk 2:14
Em i gutpela sapos yumi i klia gut long singsing bilong ol ensel taim Maria i karim Jisas long Betlehem. Ol i tok olsem, “Litimapim nem bilong God i save stap antap tru.” Dispela tok em i bikpela samting na em i gutpela sapos yumi i lainim dispela tok.
Namba wan lo bilong God i olsem: “Yupela i mas bihainim mi wanpela tasol. Yupela i no ken bihainim ol giaman god.” Dispela i min olsem, “Litimapim nem bilong God i save stap antap tru.” Na taim Jisas i skulim yumi long pasin bilong prea, em i tokim yumi long prea, “Nem bilong yu i mas i stap holi.” Dispela i min, “Litimapim nem bilong God i save stap antap tru.”
God i kisim salvesen i kam long dispela graun. Na i olsem ol ensel i kamap lain bilong bosim ol singsing bilong olgeta samting God i wokim long dispela graun. Olgeta samting God i wokim long dispela graun i mas lainim pasin bilong singim dispela singsing: “Litimapim nem bilong God i save stap antap tru.”
Taim Jisas i kam long bel bilong ol bilip lain, laip bilong ol i mas senis. God i mas i stap olsem namba wan samting long laip bilong ol. Laip bilong yumi mas senis, na olgeta samting long laip bilong yumi mas givim glori long em. Na dispela ol pasin i soim klia olsem yumi wok long lainim dispela gutpela singsing isi isi.
Ating ol ensel i mas bel nogut taim ol i harim dispela graun i no singim dispela singsing. Tasol ol i mas wet inap long taim Krais i pinisim olgeta wok bilong em. Taim Jisas i kam bek long dispela graun, God bai i stap nambawan long laip bilong olgeta man na meri, na olgeta narapela samting long dispela graun tu. Long dispela taim olgeta manmeri, olgeta samting God em i wokim long dispela graun, na olgeta ensel bai singim dispela singsing: “Litimapim nem bilong God i save stap antap tru.”
SAMPELA TINGTING
Yu save singim dispela singsing, “Litimapim nem bilong God i save stap antap tru,” long laip bilong yu yet?
Ritim: Luk 2:1-7
God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.
—Jon 3:16
Wantaim planti manmeri tru long dispela graun, tude yumi i tingim bikpela laikim tru bilong God. Na yumi ken bungim maus wantaim planti ol narapela lain na tok, “Tenkyu, Papa long heven, long givim Jisas Krais long mipela. Tenkyu long soim klia tru laikim tru bilong yu i kam long mipela.”
Laikim tru bilong God i go long dispela graun: “God i laikim tumas olgeta manmeri bilong graun.” Laikim tru bilong God i no samting bilong yumi, famili bilong yumi, prens bilong yumi o kantri bilong yumi tasol. Nogat. God i laikim tumas olgeta manmeri bilong graun!
God i laikim tru. Olsem na em i givim. Yumi inap long givim sampela samting long narapela man o meri sapos yumi i no laikim em. Tasol pasin bilong laikim tru narapela i mas kamapim pasin bilong givim long narapela.
God i givim dispela wanpela Pikinini Man bilong em. Dispela em i soim klia olsem laikim tru bilong em i bikpela tru. Yumi mas ritim dispela stori bilong Krismas klia tru. Maria i karim wanpela bebi long Betlehem. Long dispela Pikinini, God i soim klia bikpela laikim tru bilong em i kam long yumi, bikos dispela pikinini em i Pikinini Man bilong em!
Dispela wok bilong God i namba wan samting bilong soim laikim tru bilong God long yumi. I gat planti naispela samting yumi inap long mekim na kisim long taim bilong Krismas. Tasol i gat planti samting nogut i stap yet long dispela graun, olsem na yumi bai i gat dispela askim, “Em tru olsem God em i laikim tumas olgeta manmeri bilong graun?” Tasol yumi no ken tingting olsem. Lukim dispela Pikinini i stap long bokis kaikai bilong bulmakau. Dispela i putim ples klia olsem God i laikim tumas olgeta manmeri bilong dispela graun. Em i givim olgeta samting bilong em long yumi. Long dispela liklik pikinini, yumi lukim laikim tru bilong God.
God em i “givim” dispela wanpela Pikinini bilong em. Na yumi mas kisim em. Yumi mas brukim skru na redi long kisim dispela presen. No ken tok nogat long dispela samting God i redim long yumi long laikim tru bilong em.
Dispela presen i bikpela na naispela samting tru. Em i winim ol narapela presen. Nogat man inap long save gut long dispela. “Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” Long dispela presen yumi i kisim God husat i givim dispela presen long yumi. Long Betlehem yumi i bungim God bilong yumi. Long Jisas yumi i gat laip.
SAMPELA TINGTING
Tok tenkyu long God long dispela nambawan presen stret em i givim long yumi!
Ritim: 1 Samuel 2:1-10
Em i daunim ol strongpela king, na em i litimapim ol man i no gat nem. —Luk 1:52
Taim yumi ritim singsing Hana i bin singim taim em i karim bebi Samuel, o dispela singsing bilong Maria long Buk Luk siapta 1, yumi ken klia olsem planti ol tok long dispela tupela singsing i kam long ol narapela tok long Buk Baibel.
Na bikpela samting insait long dispela tupela singsing i olsem: God em i stap antap tru na em i strong tru. Em i save daunim ol lain i apim ol yet na em i daunim ol strongpela king tu. Tasol em i litimapim ol man i no gat nem.
Em i gutpela kain singsing bilong singim long dispela nait bipo long Krismas. Long Krismas, God i daunim ol strongpela king, na em i helpim ol lain i brukim skru long em. Yumi mas daunim yumi yet long kamap long Betlehem.
Tingim, a? Long taim Adam tupela Iv i stap long Gaden Iden ol i gat laik long stap olsem God yet. Yes, man i save gat laik long wokim wanpela taua i go long heven. Yumi olgeta i gat laik bilong stap olsem bosman bilong yumi yet. Yumi olgeta i gat laik long bihainim laik bilong yumi yet na kamap olsem God yet.
Tasol nau em i taim bilong Krismas. Ol man i no kamap olsem God. Nogat, God i kamap man tru. Na God i tokim yumi olsem, sapos yumi laik kamap long kingdom bilong heven, orait yumi mas i go long dispela bokis kaikai bilong bulmakau long Betlehem na brukim skru long Jisas. Jisas tasol em i rot bilong i go long heven.
Dispela singsing bilong Hana na singsing bilong Maria ol i naispela singsing stret, na dispela kain tok i stap long planti hap long Buk Baibel: “Em i daunim ol strongpela king, na em i litimapim ol man i no gat nem.” Na yumi mas lainim dispela singsing tu – na yumi mas lainim long tude!
Taim bilong Krismas em i taim bilong daunim yumi yet. Olsem Matyu 18:3 i tok, “Mi tok tru long yupela, sapos yupela i no senis na kamap olsem ol liklik pikinini, bai yupela i no inap i go insait long kingdom bilong heven.”
SAMPELA TINGTING
Autim dispela singsing bilong Maria olsem singsing bilong yu yet bilong litimapim nem bilong God.
Ritim: Matyu 1:18-25
Man bilong en, Josep, em i stretpela man. Em i harim olsem Maria i gat bel, na em i laik lusim em. Tasol em i no laik givim sem long Maria long ai bilong ol manmeri. Olsem na em i laik lusim em isi tasol. —Matyu 1:19
Yumi mas stap olsem gutpela wokman long olgeta samting God i givim yumi. Yumi mas lukautim na bosim gut olgeta samting em i givim yumi tu. Long sampela manmeri God i tok, “Hia, dispela 1 million kina i bilong yu nau.” Na bihain, ol dispela lain i mas tokim God long wanem samting ol i mekim long dispela mani. Wankain long pikinini. Ol Papa na mama i mas tokim God long wanem samting ol i mekim long pikinini bilong ol – ol i bin lukautim dispela pikinini gut, o nogat? Yumi olgeta mas lukautim na bosim gut olgeta samting God i givim long yumi.
God i givim Pikinini Man bilong em yet long wanpela man long em i mas lukautim gut dispela Pikinini. Dispela man em i Josep. Josep em i “stretpela man.” Dispela i min olsem em i bilip long God na bihainim laik bilong em na ol lo bilong kantri bilong em tu. Em i no bikman, tasol em i man bilong tok tru – God i gat laik long givim planti samting long dispela kain man bilong em i ken lukautim na bosim gut ol dispela samting.
Na Josep i kisim save olsem Maria i gat bel. Taim em i kisim save long dispela nius, ating em i mas sori tru. Em i ting olsem Maria i bin slip wantaim narapela man. Tasol Josep i no kisim em i go long wanpela jas long mekim save long em (Lo 22:23-24). Nogat, em i tingting long lusim em tasol bikos em i no laik givim sem long Maria long ai bilong ol manmeri.
Tasol God i toktok wantaim em. God i kolim em “man bilong lain bilong Devit.” Dispela tok i bikpela samting long dispela man nating long harim. Devit em i wanpela king, tasol Josep em i man nating. Na moa, God i tokim Josep olsem dispela pikinini i stap long bel bilong Maria, em Holi Spirit i bin putim long bel bilong em. Na Josep i bilipim tok bilong God. Na em i bihainim dispela gutpela rot ol lain bilong bilip i save bihainim: “Orait em i mekim olsem ensel bilong Bikpela i bin tokim em.” Dispela em i gutpela pasin bilong bilip – bihainim tok bilong God. Em i kisim meri bilong em olsem God i tokim em long mekim.
Long tupela narapela taim God i toktok long Josep long wanpela driman (Matyu 2:19-20, 22), na wantu Josep i bin kirap na bihainim tok bilong God. Em i man bilong bihainim tok bilong God stret. Em i no les. Em i bihainim tok tasol.
I luk olsem Josep em i dai bipo long taim Jisas em i mekim wok long ai bilong ol narapela. Taim wok bilong Josep i pinis, God i kisim dispela wokman bilong em i go long heven. God em i bin givim Josep, dispela man nating, namba wan presen bilong em yet long lukautim. Na Josep em i bihainim gut tok bilong God – em i stretpela man, na em i bel tru.
SAMPELA TINGTING
God em i givim yu wanem samting long lukautim na bosim gut? Yu save bihainim tok bilong em, o nogat?
Ritim: Luk 1:26-38
Na Maria i askim ensel olsem, “Dispela samting bai i kamap olsem wanem? Mi no marit yet long wanpela man... Harim. Kandere bilong yu Elisabet em i lapun pinis, tasol em i gat bel na em bai i karim pikinini man.” —Luk 1:34, 36
Bilong wanem God i save inapim ol promis bilong em long ol narakain narakain rot?
Tingim Abraham na Sara. Tupela i stap longpela taim na ol i no kisim dispela pikinini God i bin promisim ol long kisim. Tasol ol i kisim dispela pikinini long taim ol i lapun pinis na i luk olsem ol i no inap karim pikinini moa. Wanem samting man i no inap long mekim, God inap tru long mekim, na em i givim wanpela pikinini long ol. I no gat wanpela samting God i no inap long mekim.
Na taim yumi ritim stat bilong dispela Nupela Testamen, wantu yumi ritim wanpela stori long wanpela meri i lapum pinis, na em i no inap karim pikinini moa. Na tu yumi ritim wanpela stori long wanpela yangpela meri i no marit long wanpela man, na em i karim wanpela bebi. Long dispela tupela meri God i bringim tupela bebi i kam long dispela graun long helpim yumi. Na planti lain i bin wetim dispela tupela pikinini.
Dispela tupela samting i hat tru long bilipim. Planti manmeri bai tok olsem em i wanpela naispela stori, tasol i no tru olgeta.
Tasol, yumi mas klia. Yumi no inap tingim taim bilong Krismas sapos yumi no bilip long God. Krismas em i wok bilong God tasol. Dispela kingdom em i kingdom bilong God. God yet i salim Jon bilong Baptais i kam. Jisas em i Pikinini man bilong God. Olgeta samting long taim bilong Krismas em i wok bilong God tasol.
Long taim bilong Krismas planti manmeri i save tingting long dispela sta long skai, long dispela bokis kaikai bilong ol bulmakau o long Mama Maria. Tasol yumi mas harim dispela tok bilong Aisaia: “Husat bai inap long bilip long ol samting nau yumi harim? Na husat i bin lukim Bikpela i mekim kain strongpela wok olsem nau em i mekim?” (53:1)
Em i gutpela long singim ol song bilong tingim Krismas, na em i gutpela long amamas long dispela taim. Tasol dispela ol samting i no inap. “Husat i bin lukim Bikpela i mekim kain strongpela wok olsem nau em i mekim?”
Long dispela pikinini bilong Sekaraia na Elisabet, na moa yet long dispela Pikinini Man bilong Maria, God em i soim yumi olsem salvesen i kam long em tasol. Krismas em i taim bilong presim ol gutpela wok bilong God! Taim yumi bilipim dispela wok bilong God, bai yumi kisim strong long tude na hop long olgeta de bai i kamap bihain.
SAMPELA TINGTING
Long dispela taim bilong Krismas, presim ol gutpela wok bilong God!
Ritim: Luk 1:13-17
“Dispela De bilong mi em i bikpela De na bai mi mekim olgeta manmeri i pret nogut tru. Tasol pastaim bai mi salim profet Elaija i kam long yupela na bihain dispela De bai kam.”
—Malakai 4:5 “Em bai i kisim pasin na strong bilong Elaija na wokabaut i go pas long Bikpela” —Luk 1:17
Namel long Buk Malakai long Olpela Testamen na stat bilong Nupela Testamen, 400 yia samting i stap. Na las tok bilong God long Malakai em i olsem, “Bai mi salim profet Elaija i kam long yupela na bihain dispela De bai kam.” Na wanpela ensel bilong Bikpela i go lukim Sekaraia long Nupela Testamen, na ensel i tokim em, “Em bai i kisim pasin na strong bilong Elaija na wokabaut i go pas long Bikpela.” Nupela Tesamen i kirap long dispela hap we Olpela Testamen i pinis. Bikpela bai i kam, na Elaija bai i go pas long em.
Dispela Elaija long Nupela Testamen em i Jon Bilong Baptais. God i salim Jon Bilong Baptais long redim ol man, na ol bai i stap redi long Bikpela i kam. Na em i mekim dispela wok long wankain pasin na strong bilong Elaija. Elaija em i dispela man i bin tokim ol manmeri olsem: “Yupela manmeri bilong tupela tingting, wanem taim bai yupela i gat wanpela tingting tasol? Sapos Bikpela em i God tru, orait yupela i mas lotu long em wanpela tasol. Na sapos Bal i God tru, orait yupela i mas lotu long em wanpela tasol” (1 King 18:21).
Sapos yumi laik redi long bungim Bikpela, yumi mas harim tok bilong Jon Bilong Baptais: No ken stap olsem manmeri bilong tupela tingting. Kisim wanpela tingting tasol! Sapos Bikpela em i God, orait lotuim em. Sapos mani bilong yu em i god, orait yu ken lotuim mani bilong yu.
Yumi mas bungim Jon bilong Baptais sapos yumi laik redi long bungim Jisas. Dispela i min olsem yumi mas harim tok bilong em: yumi mas tanim bel na bilip. Na yumi no inap bilip long Jisas sapos yumi i bilipim ol narapela samting wantaim. Sapos yumi tok yes long Jisas, orait yumi mas tok nogat long ol narapela god.
Mi no bin lukim dispela kain tok long wanpela kad o pas o piksa long taim bilong Krismas. Tasol em i gutpela tok tru, na em i gutpela tok long yumi i harim. Sapos yumi laik lukim Bikpela bilong yumi, orait yumi no ken abrusim dispela tok!
SAMPELA TINGTING
Bia yu harim dispela tok long dispela taim bilong Krismas, o nogat?
Ritim: Malakai 4
“Harim gut. Wanpela De bai i kamap na bai paia i kukim olgeta manmeri bilong bikhet na olgeta manmeri nogut, olsem paia i save kukim kunai i drai. Long dispela De bai ol i bagarap long paia na bai ol i pinis olgeta.” —Malakai 4:1
“Tru tumas, bai mi kam kwiktaim.” — Kamapim Tok Hait 22:20
“Wanpela De bai i kamap...” “Dispela De bai i kamap.” Dispela kain tok i olsem las tok bilong dispela las siapta bilong Olpela Testamen. Na long las siapta long Nupela Testamen, Holi Spirit wantaim meri bilong Pikinini Sipsip tupela i tok, “Yu kam,” na Bikpela Jisas i bekim tok olsem, “Tru tumas, bai mi kam kwiktaim.”
I olsem dispela tok kam i raunim olgeta tok long Buk Baibel, na dispela tok i olsem wanpela prea na wanpela promis wantaim.
Olsem tasol em i gutpela long ol bilip lain long lukluk i go bek na tingtim ol tok bilong God, tasol ol i mas lukluk antap na bilip tu. Na bikpela samting i olsem: Yumi mas lukluk long na wetim taim Bikpela bai i kam bek. Taim yumi mekim olsem, bai yumi kisim gutpela save long God, na tu em bai i helpim yumi long bihainim tok na laik bilong God.
Em i bikpela samting long save olsem God “em i dispela wanpela bai i kam.” Planti bilong yumi i tingting long God olsem wanpela God i stap longwe tru long yumi. Na ol lain in no bilip long God, planti taim ol i save olsem wanpela God i stap. Taim ol i tingting long ol samting bilong laip, long samting bilong dai, long bel na tingting bilong man na long bodi bilong man – ol bai i save olsem God i stap.
Tasol dispela i no inap. Ol lain i bilip tru long God, ol i save olsem em i God bilong kam. Yes, em i stap antap long dispela graun, tasol em i bin wokabaut long dispela graun tu na em bai i kam bek long dispela graun tu.
Olsem tasol em i no inap long yumi i autim kain kain samting long ol pasin bilong God na wok bilong em. Bilip em i samting long wetim taim God bai i kam bek long dispela graun.
Sapos yu wetim sampela famili bilong yu, ol bai i kam long wanpela balus long tri kilok, ating yu bai askim yu yet planti taim: “Ol bai i kam long taim stret? Ol i kam pinis, o nogat?” Na taim yu lukim balus long skai, bai yu tok, “Yes, ol i kam nau.” Em i olsem yu bin redim yu yet na wetim ol. Ol i tok long kam, olsem na ol i kam. Na yu yet i wetim ol i stap.
Na yumi i ken bungim olgeta tok bilong God long Olpela Testamen na Nupela Testamen wantaim, long dispela sotpela tok: Em bai i kam!
SAMPELA TINGTING
Bai yu tingting long taim Bikpela bai i kam bek, long dispela taim bilong Krismas, o nogat?
Ritim: Malakai 2:13-3:4
Tasol taim Bikpela i kam, husat inap winim kot? Taim em i kamap ples klia, husat bai i no inap lus? —Malakai 3:2
Long taim bilong profet Malakai, ol manmeri i wok long prea i stap. Ol i wetim taim Bikpela bai i kam, dispela de bilong Bikpela, na ol i prea olsem: “Kam. Emanuel, yu mas kam!”
Ol i wokim wanpela nupela tempel pinis, na dispela tempel em i pulap long planti manmeri. Ol i raunim alta bilong Bikpela na krai i stap bikos ol i ting olsem Bikpela i no sori long ol. Ol i no bilip strong long ol promis bilong em. Tasol yet ol i krai na askim Bikpela long kam.
Na profet Malakai i bekim dispela krai bilong ol na ol i kirap nogut. “Yes,” em i singaut strong, “Bikpela bai kam. Wantu em bai i kam long tempel bilong em. Tasol planti bai i no amamas long dispela. Taim em i kam, husat inap winim kot? Taim em i kamap ples klia, husat bai i no inap lus?”
Klostu nau em i taim bilong krismas. Em bai olsem wanem long yumi, sapos Malakai i stap long kantri bilong yumi nau? Na sapos em i go long wanpel bikpela stoa, dispela kain stoa ol i save putim ol Krismas singsing long redio bilong ol, na em i stopim dispela music na em i singaut olsem: “Klostu nau Krismas bai kam — 6-pela de tasol. Tasol taim Bikpela i kam, husat inap winim kot? Taim em i kamap ples klia, husat bai i no inap lus?”
Ating sampela bai kirap nogut. Tasol sampela narapela bai ting olsem em i autim tok long Buk Baibel tasol, na ol bai i no inap wari tumas long dispela tok.
Tasol, sampela taim ol manmeri i save toktok planti tumas, na lus tingting long Tok Tru. Long taim bilong Malakai, dispela tempel i pulap long planti kain kain tok tu: “Yupela i bin mekim planti kain kain tok na Bikpela i les pinis long dispela toktok bilong yupela” (2:17). Bilip bilong ol i lus pinis: “Ol i tok, God i save mekim stretpela pasin. Tasol mipela i no lukim em i mekim dispela kain pasin” (2:17). Na tu ol i brukim promis ol i bin mekim long meri bilong ol, ol i bin maritim taim ol i yangpela yet (2:14-15).
Taim Bikpela i kam, yumi no inap abrusim belhat bilong em long ol naispela tok o singsing o autim tok. Nogat. Yumi mas bilip na bihainim Bikpela, Malakai i tok.
Yumi no stap na wetim Krismas tasol. Yumi wetim dispela taim Bikpela bai i kam bek tu. Olsem na yumi mas stap strong long bilip long em. Na sapos yumi marit, orait yumi mas i stap tru long man o meri bilong yumi, na yumi mas laikim tru ol wantok bilong yumi olsem yumi laikim yumi yet.
SAMPELA TINGTING
Taim yu wetim Krismas, yu save wetim dispela taim Bikpela bai i kam bek tu?
Ritim: Aisaia 53:1-7
Dispela man i ritim dispela tok pinis orait em i askim Filip olsem, “Mi askim yu. Profet i tok long husat na i mekim dispela tok.” —Aposel 8:34
Planti lain Juda i no bihainim Jisas bikos ol i les long kisim wanpela Mesaia i bungim planti hevi na pen. Ol i ting olsem wanpela Mesaia i mas i stap olsem wanpela bikman stret. Tasol Jisas yet i tok olsem em i dispela Mesaia olsem Olpela Testamen i bin stori long em. Em i karim pen “olsem tok i stap long buk bilong God.” Aisaia 53 em i dispela stori long Jisas i karim pen.
Tasol ol lain Juda i no bilip olsem Aisaia 53 i stori long Mesaia bilong ol. Sampela i ting olsem dispela siapta i stori long profet Aisaia yet. Na sampela i ting olsem dispela siapta i stori long dispela nesen bilong Juda i karim pen.
Em i gutpela sapos yumi olgeta i stori long dispela tok long Aisaia 53 wantaim ol arapela tasol, wantaim ol lain Juda tu. Yumi i ken i askim ol, “Dispela wokman bilong God, em i husat tru? Dispela man i bin pulap long sori na ol kain kain hevi, em i husat tru? Aisaia i tok olsem dispela man i kisim bagarap long asua bilong sin bilong yumi. Em i husat tru?”
Tingim dispela man bilong Afrika i bin ritim tok long Aisaia 53 long buk Aposel siapta 8. Em i gat dispela askim long Filip: “Mi askim yu. Profet i tok long husat na i mekim dispela tok?”
Ol Kristen bilong kain kain nesen inap long autim na kliaim dispela tok long Aisaia 53 long ol wantok bilong ol. Em i klostu long taim bilong Krismas! Gutpela long yumi i autim dispela tok long ol lain Juda husat i no save tingim taim bilong Krismas.
Sapos yumi i stori wantaim wanpela Juda, em gutpela sapos yumi toktok long Aisaia 53. Na taim yumi ritim dispela tok, yumi ken stori long gutnius bilong Jisas tu (Aposel 8:35)
SAMPELA TINGTING
Yu inap long autim gutnius bilong Jisas long dispela siapta – Aisaia 53?
Ritim: Aisaia 52:7-10
Bai ol manmeri i amamas tru long lukim wanpela man i ran i kam long ol ples maunten, bilong bringim gutpela tok long Jerusalem. —Aisaia 52:7
Ol man i amamas tru long lukim man i kam bilong bringim gutnius. —Rom 10:15
Em i gutnius tru olsem Krais i kam long dispela graun olsem wanpela bebi. Na dispela tok “gutnius” i kam long dispela tok bilong Aisaia taim em i lukim driman long ol man i kam long ol ples maunten, bilong bringim gutpela tok long Jerusalem. Na taim dispela Nupela Testamen i kam pinis, taim yumi tokaut long Jisas, em i samting bilong autim “gutnius.”
Wanpela ensel i bringim dispela gutnius namba wan taim: “Yupela i no ken pret. Harim. Mi bringim gutnius i kam long yupela, em nius bilong mekim olgeta manmeri i amamas tru.” Na dispela i kamap long taim mama Maria i karim Jisas.
Planti bilong yumi i bin harim planti samting tru long Jisas, olsem na yumi no save tingting tumas long dispela “gutnius.” Dispela i no gutpela. Nogut yumi les long harim dispela gutnius, na nogut yumi ting olsem dispela gutnius em i liklik samting. Yumi mas lukaut, bikos dispela gutnius bilong Jisas em i namba wan gutpela tok na em i las gutpela tok long bikpela amamas tru.
Wanem samting em i gutnius? Bai mi autim wanpela liklik trupela stori olsem wanpela tok piksa long gutnius. Long kantri The Netherlands, long yia 1945, ol i stap long wanpela bikpela pait stret. Em i long taim bilong Hitler, dispela man nogut tru. Em i hetman bilong kantri Germany, na ol Germany i wok long bagarapim planti ol narapela kantri. Long The Netherlands, planti ol man i dai long han bilong ol, ol i no gat kaikai, na ol Nazi lain (lain bilong Germany) i wok long mekim nogut tru long ol olgeta taim. Na ol i krai nogut tru long God i ken i kam na helpim ol. Ol i bung long ol sios. Na long planti ol nait ol i prea i go i go na askim God long givim fridom long ol na helpim ol.
Na long 4 Mei ol i harim gutpela tok stret: “Em i pinis! Em i pinis! Yumi stap fri nau! Bel isi bai i stap gen!” Na i no gat wanpela i sindaun nating. Olgeta man na meri na pikinini i kirap na lusim haus bilong ol. Planti bilong ol i pulapim olgeta rot long olgeta siti na taun. Na ol i singsing long amamas. Ol i singsing strong. Ol i pulap olgeta long amamas tru.
Ol dispela lain i harim gutnius stret! Tasol gutnius bilong Krismas i winim dispela kain gutnius olgeta. Taim Krais i kam long dispela graun, heven i op na bikpela krai i kam olsem: “Em i pinis! Em i pinis olgeta! Bel isi i kam pinis na olgeta lain bai lukim dispela salvesen bilong God bilong yumi!”
SAMPELA TINGTING
Yu amamas tru long harim dispela gutnius bilong Jisas Krais, o nogat?
Ritim: Aisaia 43:1-4
Taim yupela i brukim ol wara i daun tumas, bai mi stap wantaim yupela, na wara bai i no inap bagarapim yupela . Na taim yupela i go insait long paia i hat tumas, bai paia i no inap kukim yupela. —Aisaia 43:2
God i no tok olsem yumi bai no gat nid long brukim ol wara i daun tumas o go insait long paia i hat tumas long laip bilong yumi. Tasol em i tokim yumi, “Taim yupela i brukim ol wara i daun tumas, bai mi stap wantaim yupela....na taim yupela i go insait long paia i hat tumas, bai paia i no inap kukim yupela.”
Yumi no ken ting long kisim wanem samting God i no promis long givim yumi. Nogut yumi ting olsem God bai “mekim yumi i slip long gutpela gras” tasol, na nogut yumi ting olsem em i no inap kisim yumi i go long “ples nogut na bikpela tudak.” Yumi mas kisim wanem samting God em i promis long givim yumi – olsem em bai i stap wantaim yumi long ples nogut na bikpela tudak.
Ol lain Israel i klia long mining bilong dispela tok. Ol i save olsem ol tumbuna bilong ol i bin brukim solwara Retsi na ol i no lus long wara bikos God i bin lukautim ol (Kisim Bek 14). Olsem na ol i ken bilip olsem Bikpela bai lukautim ol taim em i kisim ol i go long wara na paia. God bai lukautim ol taim ol birua i rausim ol long ples bilong ol na ol i go i stap long narapela kantri.
Na yumi ol lain bilong nupela kontrak, yumi ken klia long dispela tu, bikos yumi stap bihain long taim Jisas i kam long dispela graun olsem wanpela bebi na i dai long yumi long diwai kros. Dispela Pikinini bilong God i bin kam na em i redim rot bilong yumi. Em i bin i go long bikpela wara stret na long ol paia wantaim. Em i bin bungim olgeta hevi, pen na sori, na em i bungim ol bikpela traim tu.
Rot bilong yumi em i kain olsem rot bilong lain Israel: Yumi wokabaut long longpela rot stret na yumi no bin kamap long siti bilong God yet. Na tu, yumi mas wokabaut long wara na paia long kamap long dispela siti. Tasol God i promisim yumi olsem yumi no inap lus long wara, na paia i no inap kukim yumi.
Krais i stap wantaim yumi – olsem na yumi bai i stap orait na kamap long dispela siti bilong God.
SAMPELA TINGTING
I gat sampela samting i kamap olsem bikpela wara na paia long laip bilong yu? Na yu bilip olsem God bai lukautim yu na yu bai i stap orait na kamap long siti bilong em?
Ritim: Aisaia 42:1-4
Long dispela pasin, Jisas inapim wanpela tok God i bin mekim long maus bilong profet Aisaia. Em i bin tok olsem, “...Pitpit i no gat strong na i laik bruk, em bai i no brukim olgeta. Na em bai i no mekim i dai lam i no lait gut.” —Matyu 12:17,20
Olpela Testamen i stori long taim dispela Mesaia bai i kam olsem wanpela man bilong pait tasol tu em bai kam olsem wanpela man bilong bel isi na olsem wanpela gutpela poroman tru. "Em i save was gut long ol lain manmeri bilong en, olsem wasman bilong sipsip i save lukautim ol sipsip bilong en. Wasman i save putim ol pikinini sipsip long bros na karim i go. Na em i save wokabaut isi na soim rot long ol sipsip i gat liklik pikinini.” Long strong bilong em, Krais bai i kisim bek olgeta manmeri bilong em, na em i no inap daunim wanem ol manmeri i no gat strong: “Pitpit i no gat strong na i laik bruk, em bai i no brukim olgeta. Na em bai i no mekim i dai lam i no lait gut.”
Pitpit i no gat strong. Na lam i no lait gut em i no gat strong tu – liklik win tasol inap long rausim lait olgeta. Dispela tupela samting i olsem tok piksa bilong ol man na meri i no gat strong.
Tasol gutnius i stap. Profet Aisaia i autim tok long dispela mesaia husat bai i kam, na em bai i wari long ol dispela man na meri i no gat strong. Em bai i lukautim ol na kisim bek ol.
Nupela Testamen i soim klia olsem Jisas inapim dispela tok profet taim em i kam na lukautim ol rabislain na ol lain i gat sik tu. Planti taim ol narapela man i no wari long ol rabislain, tasol Krais em i mekim planti wok wantaim ol.
Dispela em i narakain samting, na em i olsem gutnius long yumi olgeta! Yumi save laikim ol bikman tru, tasol yumi mas tingim – Jisas em i helpim ol rabisman.
Na sios i mas lukaut long pasin bilong em bilong lukautim ol lain i no gat strong. Sios i mas helpim ol i kam insait long sios – nogut ol ting olsem ol i rabisman insait long sios bilong God. Yumi mas kisim ol i kam, maski dispela pasin i givim hat wok long yumi. Tingim pasin bilong Krais: pitpit i no gat strong na i laik bruk, em bai i no brukim olgeta. Na em bai i no mekim i dai lam i no lait gut.
SAMPELA TINGTING
Prea long ol man na meri i no gat strong, na askim God i ken strongim ol long strong bilong em.
Ritim: Aisaia 40:1-5
God bilong yupela i tok, “Strongim bel bilong ol manmeri bilong mi, na mekim bel bilong ol i stap isi.” —Aisaia 40:1
Taim mi kamap wanpela pastor na mi stap long namba wan sios bilong mi, em i wok bilong mi long autim wanpela tok long sampela elda na narapela pastor. Taim mi mekim olsem, mi bin autim sampela tok long ol pasin nogut long dispela Kristen sios. Mi no mekim gutpela pasin, na bihain wanpela pastor i kam na toktok wantaim mi. Em i wanpela lapun pastor, tasol taim em i toktok wantaim mi, em i no krosim mi o tok pait wantaim mi. Nogat, em i kam long mi long taim dispela bung i pinis, na em i tok, “I gat wanpela samting yu no ken lus tingting long em – em i wok bilong yumi ol pastor bilong autim tok long pasin bilong mekim bel i stap isi.”
Na mi tingim dispela tok i kam inap long tude.
Buk Baibel i givim yumi bikpela bel isi. I gat planti ol man long dispela graun i gat kain kain tingting long dispela tok “bel isi.” Sampela taim yumi bai i kisim bel isi taim yumi bung wantaim ol pren bilong yumi; sampela taim bai yumi kisim bel isi taim wanpela narapela i givim naispela tok long yumi taim wanpela lain bilong yumi i dai pinis.
Tasol, long ol Kristen, dispela tok “bel isi” i gat sampela moa mining tu bikos yumi i kisim dispela bel isi i kam long God yet. God i mekim bel bilong yumi i stap isi. Na dispela bai i strongim yumi maski yumi bungim bikpela hevi o pen. Long dispela Katekisim bilong Heidelberg yumi gat dispela askim: “Wanem samting tasol i save givim yu bel isi taim yu stap laip na taim bilong i dai?” I gat wanpela samting tasol i save givim yumi bel isi: “Mi no bilong mi yet, tasol bodi wantaim spirit bilong mi i bilong Bikpela Jisas Krais.”
Olgeta lain long dispela graun i nidim dispela kain bel isi, na yumi ol Kristen i gat dispela kain bel isi. I no min olsem olgeta man i luksave olsem ol i nidim dispela bel isi long laip bilong ol. Tasol Buk Baibel na Katekism bilong Heidelberg i stori long dispela samting tasol i save givim bel isi long yumi – taim yumi bilong Bikpela Jisas Krais. Dispela bai inapim nambawan laik bilong yumi olgeta.
SAMPELA TINGTING
Wanem samting i save givim bikpela bel isi long yu?
Ritim: Aisaia 12
Hul wara i no save pinis, em i save givim wara long ol samting, na ol i stap gut. Bikpela i olsem dispela wara i no save pinis. Oltaim em i save helpim yupela na mekim yupela i stap strong. Olsem na yupela bai i amamas long i go long Bikpela na askim em long helpim yupela. —Aisaia 12:3
“Sapos wanpela man i dai long wara, orait em i ken i kam long mi na dring.” —Jon 7:37 I gat planti hap long dispela graun we graun em i drai olgeta. Ol plan na plaua i no inap long gro long
ples drai. Olgeta samting i nidim wara bilong stap laip.
Long Buk Baibel wara em i wanpela tok piksa long salvesen bilong yumi. Na God yet i olsem hul wara i no save pinis. Laip bai bagarap na dai olgeta sapos gutpela pasin bilong God i no kam long em. Olgeta samting i nidim God bilong stap laip.
Jisas em i Pikinini bilong God. Wankain olsem wanpela riva i save karim wara long maunten i go long wanpela taun, Jisas i save kisim laip long God i go long ol manmeri i bilip long em.
Tasol maski wanpela bikpela riva i stap long ples bilong yu, dispela wara i no inap helpim yu sapos yu no sindaun na kisim sampela wara na dringim dispela wara. I no gat narapela i ken dring; yu yet mas dringim dispela wara. Na bai yu inap long singsing wantaim Aisaia, “Litimapim nem bilong God. Long wanem, em i bin kisim bek mi.”
Hau bai yu dringim dispela wara Aisaia i stori long em?
Long dring long dispela wara bilong salvesen, yumi mas i go long Jisas. Krais i tok, “Sapos wanpela man i dai long wara, orait em i ken i kam long mi na dring.” Dispela tok dring na kam long mi em ol i tok bilong bilip. Yumi mas bilip long Krais. Jisas yet i bin tok, “Na man i bilip long mi, em bai i no i dai moa long dring wara.”
Taim yumi kisim salvesen pinis bai yumi i amamas stret: “Olsem na yupela bai i amamas long i go long Bikpela na askim em long helpim yupela.” Salvesen em i no samting bilong amamas tasol. Tasol bikpela samting bilong salvesen em i pasin bilong amamas. Na dispela amamas i no inap pinis na em i narakain amamas tru long ol lain i no kisim marimari bilong God pinis. Salvesen i save givim amamas long yumi!
Long planti ol ples, hul wara em i ples bilong amamas – wara i save givim laip. Wankain olsem yumi bai amamas na singsing olgeta de taim yumi dring long dispela hul wara bilong God.
SAMPELA TINGTING
Yu save pilim dispela bikpela amamas long laip bilong yu yet, o nogat?
Ritim: Aisaia 11:1-9
Lain bilong Jesi i stap olsem as bilong diwai ol i katim pinis. Tasol nupela kru bai i kamap long dispela as bilong diwai. —Aisaia 11:1
Josep em i bilong lain famili bilong King Devit. Olsem na em i lusim taun Nasaret long Galili, na em i go long Judia long taun bilong Devit, ol i kolim Betlehem. —Luk 2:4
Jesi em i papa bilong King Devit. Taim dispela profet Aisaia i toktok long Jesi i stap olsem as bilong diwai ol i katim pinis, olgeta manmeri bilong Israel i save pinis long wanem samting em i stori long em. Kingdom bilong Devit i bin bagarap na pundaun olsem wanpela diwai ol i katim pinis. Na as bilong diwai ol i katim pinis i stap nating. Glori bilong dispela diwai i go pinis.
Tasol, long dispela teks Aisaia i autim tok profet long dispela taim we haus bilong Devit bai i kamap nupela, na dispela nupela haus bai winim glori bilong taim bilong King Devit o King Solomon. Wankain olsem wanpela as bilong diwai i kamap nupela gen taim nupela kru i kamap long as bilong dispela diwai, kain olsem wanpela pikinini bilong Devit bai i kamap, na em bai i stap olsem King bilong bel isi na glori wantaim.
Pastaim Aisaia i stori long dispela King em i husat (Lain 2-5). Na bihain em i stori long dispela graun dispela King bai i bosim (lain 6-9). Dispela graun em i naispela stret: Wel dok na pikinini sipsip bai i stap gut wantaim, na ol lepat bai i slip wantaim ol pikinini meme; ol liklik mangi bai i stap namel long ol laion. Planti manmeri i ting olsem dispela kain graun i kain olsem gaden Iden. Yumi i no save sapos dispela em i tru o nogat.
Tasol yumi i ken klia olgeta long dispela: taim Jisas i kam long dispela graun namba tu taim, na wok bilong em i pinis olsem, dispela graun bai i stap olsem Aisaia i tokaut long em. Taim Krais i kam long dispela graun olsem wanpela bebi, dispela em i kirapim nupela taim long haus bilong Devit. Tasol, tu, em i kirapim dispela taim bilong mekim dispela graun i kamap nupela gen tu. Jisas i mekim wok long bel bilong ol manmeri bilong em. Na taim dispela wok i pinis olgeta, orait bel isi na amamas tasol bai i stap long olgeta samting God yet i wokim.
Dispela tok bilong Aisaia i soim klia – bel isi bai i stap. Na dispela bel isi em i samting bilong i no gat pen, inogathevi,nainogatsin.
Taim Jisas i tok olsem kingdom bilong em i kam klostu pinis, ol manmeri bai i tingting long ol dispela bel isi. Na nau dispela kingdom bilong Krais i kam klostu pinis moa yet. Dispela Pikinini bilong Devit i kam pinis na em i bosim laip na famili na sios bilong yumi. Na kingdom bilong em i wok long kam yet – isi isi tasol wantaim bikpela strong.
SAMPELA TINGTING
Yu stap redi na wetim dispela kingdom i kam klostu pinis, o nogat?
Ritim: Aisaia 9:1-7
Em bai i stap king bilong yumi, na em bai i gat ol dispela nem, “Man bilong givim gutpela tingting tru” na “God i gat bikpela strong” na “Papa bilong i stap oltaim oltaim” na “king bilong kamapim gutpela sindaun na bel isi.” —Aisaia 9:6
Dispela teks long Aisaia i stori long kingdom bilong Mesaia. Em i wanpela strongpela na gutpela tok profet tru, na dispela tok profet i wok long amamasim planti manmeri bilong God.
Pastaim, dispela tok profet long dispela buk Aisaia i toktok long ol samting nogut i wok long kamap long taim bilong profet Aisaia. Na dispela ol samting nogut i wok long kamap long tude tu. Aisaia i tok olsem: i no gat planti manmeri i autim tok tru (8:16-18), ol man i save toktok wantaim tewel bilong ol man i dai pinis (8:19-20), na ol bai i kisim taim nogut stret (8:21-9:1). Na bihain long ol dispela tok nogut, bikpela lait i kam: “Ol manmeri i bin i stap long bikpela tudak, tasol nau ol i lukim bikpela lait” (lain 2). Ol i harim bikpela amamas “olsem ol i save amamas long taim ol i kisim ol kaikai i mau long gaden.” Na God i brukim pinis strong bilong ol birua bilong ol na ol i no inap bosim ol moa. Na moa, God i salim paia i kam kukim olgeta samting ol soldia i save putim na i go pait (lain 5).
Na bihain long dispela, Aisaia i autim as bilong dispela ol samting bai i kamap: “Long wanem, wanpela pikinini man i kamap pikinini long yumi, em wanpela pikinini God i givim long yumi.” Em i wanpela mirakel stret. Em i wanpela king, na taim em i kam, dispela i makim wanpela nupela taim i kam tu: “Strong bilong gavman bilong en bai i wok long kamap bikpela oltaim, na bai i no gat pait na ol manmeri bai i sindaun gut oltaim.”
Dispela ol nem bilong em i soim klia olsem dispela Pikinini bilong God em i husat tru. Na tu, dispela ol nem i putim ples klia olsem dispela Pikinini bilong God i gat wanem ol wok long mekim. “Man bilong givim gutpela tingting tru” i soim yumi wok bilong Jisas bilong kisim bek yumi long ol longlong pasin bilong yumi. Na em i givim save long yumi na helpim yumi i wokabaut long rot bilong God.”God i gat bikpela strong” i soim klia strong bilong God. Yumi no inap save long strong na pawa bilong em. Em bai i mekim bikpela na stretpela wok long yumi ol lain bilong bagarap na mekim sin. “Papa bilong i stap oltaim oltaim” i soim yumi olsem em i gat gutpela save na bikpela laikim tru. Na ol pikinini bilong em ol i tait tru, ol i ken i go long em bilong kisim bel isi na malolo. Na em bai i givim bel isi long yumi long taim bilong bikpela hevi na pen. “King bilong kamapim gutpela sindaun na bel isi” i tokim yumi olem em bai i kisim wanpela kingdom i kam em bai i stap oltaim olgatim. Na taim em i kam, em bai kisim bel isi na stretpela pasin i kam wantaim. Na long dispela taim tasol, laip bilong yumi bai kamap gutpela tru olsem God i laikim.
“Bikpela I Gat Olgeta Strong i gat strongpela laik tru long mekim gut long ol manmeri bilong en, olsem na em bai i mekim ol dispela samting i kamap” (lain 7).
SAMPELA TINGTING
Dispela ol nem bilong Jisas i save givim yu bel isi, o nogat?
Ritim: Aisaia 7:10-17
Dispela olgeta samting i kamap bilong inapim wanpela tok Bikpela i bin mekim long maus bilong profet. Profet i bin tok olsem, “Harim. Wanpela meri i no bin slip wantaim man, em bai i gat bel na i karim wanpela pikinini man. Na bai ol i kolim nem bilong en Emanuel.”
—Matyu 1:22-23
I gat wanpela king i bin i stap, na nem bilong em i Ahas. Em i pret bikos tupela narapela king i laik pait wantaim Ahas na kantri bilong em. Na dispela profet Aisai i tokim Ahas long em i mas bilip na stap strong. Tasol Ahas i les long harim ol dispela tok long bilip long God.
“Askim God long soim yu wanpela mak,” dispela profet i tok. Tasol king i tok, “Nogat. Bai mi no ken askim long lukim wanpela mak.” Na bihain em i bagarapim tok bilong God taim em i tok, “Mi no laik traim strong bilong Bikpela.”
Tasol, maski, Aisaia i givim wanpela mak long em: Wanpela yangpela meri i gat bel, na bai em i karim wanpela pikinini man na kolim nem bilong en Emanuel (i min olsem “God i stap wantaim yumi”) . Na dispela tupela kantri bai bagarap na stap nating, na bai Bikpela i salim taim nogut tru i kam long yu na long ol manmeri bilong yu na long ol lain famili bilong yu.
Na yumi no klia tumas sapos i gat wanpela pikinini i kamap olsem long taim bilong Ahaz. Tasol yumi ken klia tru olsem dispela tok profet i stori long taim Maria i karim Jisas. Planti yia bihain long dispela tok profet, dispela yangpela meri Maria i karim Emanuel, em i Saviour bilong yumi. Olsem tasol God inapim dispela mak bilong salvesen.
Pastaim long taim profet Aisaia i bin autim dispela mak bilong Emanuel em i autim olsem wanpela strongpela tok: God em i soim klia olsem i stap wantaim ol manmeri bilong em. Olsem na yu mas lukaut. Nogut yu les long bilipim dispela mak.
Na nau yumi kisim pinis bikpela mak tru long pawa na laikim tru bilong God. Emanuel: God i stap wantaim yumi. Yumi no ken dautim ol promis bilong God. Em bai i stap wantaim yumi oltaim oltaim.
Yumi no ken daut. Yumi no ken pret. God em i no birua long yumi; em bai i helpim yumi. Na sapos God i helpim yumi, orait husat bai i birua long yumi?
Planti manmeri long tude save autim ol hevi na toktok tumas long ol samting i bagarap long dispela graun. Ol i no save gut long dispela mak – Emanuel, God i stap wantaim yumi. Yumi no ken wari. Emanuel i kam pinis. Yumi no ken pret.
SAMPELA TINGTING
Yu save harim ol man i autim tok long ol hevi bilong dispela graun tasol? Ol i save pretim yu, o nogat? No ken wari. No ken pret.
Ritim: Lo 18:15-22
Bipo Moses i bin tok olsem, “God, Bikpela bilong yupela, em bai i makim wanpela brata bilong yupela, na mekim em i kamap profet olsem mi yet. Na yupela i mas bihainim olgeta tok em bai i mekim long yupela.” —Aposel 3:22
Em i wok bilong profet long autim tok bilong God long ol manmeri. Sapos ol profet i no autim tok bilong God, ol manmeri i no inap long save long God na laik bilong God tu. Yu no inap kamap wanpela profet long laik bilong yu yet. Nogat, God yet i makim ol profet bilong em.
Nambawan profet long Olpela Kontrak em i Moses. God i autim tok bilong em yet long maus bilong Moses. Long Moses ol Israel i kisim pinis olgeta lo na pasin bilong lotu wantaim.
Taim Moses i autim las tok bilong em, em i stori long God bai i makim wanpela brata bilong ol lain Israel, na mekim em i kamap profet olsem em yet. Na Moses i tokim ol long bihainim olgeta tok em bai i mekim long ol. God yet bai i mekim save long ol lain i sakim tok bilong dispela profet.
Planti yia bihain long dispela tok bilong Moses, tupela man i autim dispela tok bilong Moses gen. Dispela tupela man i autim tok long hap bilong tempel, na ol lain i harim tok bilong tupela i gat bikpela laik long bihainim tok bilong Moses. Na Pita na Jon i tok olsem: Sapos you laik bihainim tok bilong Moses, orait yu mas harim tok bilong Jisas bilong Nazaret, long wanem, em i dispela profet Moses yet i bin stori long em.
Dispela tupela man, Pita na Jon, i bin stap long wanpela maunten wanpela taim na ol i lukim Jisas i kamap narakain. God yet i stap long dispela maunten, na Pita tupela Jon i brukim skru na putim pes i go daun long graun, na ol i pret tumas. Na Moses wantaim Elaija tupela i kamap na ol disaipel i lukim tupela i toktok wantaim Jisas.
Ating Pita tupela Jon i gat laik long harim tok bilong Moses, o ating ol i laik harim nek bilong Elaija long yau bilong ol yet. Tasol, nogat. God i tok olsem, “Dispela em i Pikinini bilong mi, mi laikim em tumas, na mi amamas long em. Yupela harim tok bilong em!” (Matyu 17:5).
Maski long harim tok bilong ol profet nogut. Olgeta manmeri i mas bihainim tok bilong God long dispela maunten: “Yupela harim tok bilong em!” Yumi no inap save long God sapos yumi no harim tok bilong Jisas.
SAMPELA TINGTING
Yu save harim tok bilong Jisas long laip bilong yu olsem wanem?
Ritim: Namba 24:10-19
Wanpela man i gat biknem na strong bai i kamap king bilong dispela lain Israel. —Namba 24:17
I gat planti ol stori na tok profet long Olpela Kontrak i olsem ol piksa long wanem samting bai i kamap bihain. God i givim ol dispela promis na tok profet. Planti taim em i usim maus bilong ol wokboi bilong em. Tasol long dispela teks, God i yusim maus bilong wanpela birua bilong em long autim dispela tok profet.
Dispela king bilong Moap i lukim dispela 12-pela lain bilong Israel husat i stap klostu long hap bilong em. Na em i pret na i tok, “Sotpela taim tasol na bai dispela lain i pinisim olgeta samting i stap nabaut long hap bilong yumi olsem bulmakau i kaikai gras” Namba 22:4.
Olsem na dispela king bilong Moap i laik toknogutim ol lain bilong Israel long rausim pawa bilong ol. Olsem na em i singautim wanpela man, nem bilong em Balam, long em i kam na tok long nem bilong ol god bai ol god i mas bagarapim lain Israel. Maski king bilong em i mas baim Balam long planti mani, em i laik mekim olsem bikos em i laik bagarapim Israel.
Planti manmeri long dispela taim em ol i pret long ol giaman god na ol spirit nogut. Na tude, tu, I gat planti man i pret long ol dispela kain samting tu.
Tasol dispela God bilong Israel em i winim ol spirit nogut na pawa bilong ol. God i givim bikpela blesing long Israel, maski dispela king bilong Moap i laik toknogutim ol. I no gat wanpela samting o narapela pawa long dispela graun inap senisim laik bilong God.
Olsem na maus bilong Balam i kamap olsem wokboi bilong God. Balam i opim maus bilong em long toknogutim Israel olsem Balak i baim em long mekim, tasol em i autim ol blesing bilong God tasol, olsem God i gat laik long em i mas mekim. Long tripela taim Balam i wok long toknogutim Israel, na long tripela taim em i givim blesing long ol. Na long namba foa taim, Balam i lukim wanpela man i gat biknem na strong bai i kamap king bilong dispela lain Israel.
I no gat wanpela pawa long dispela graun inap bagarapim ol lain i stap aninit long dispela King na i kisim blesing bilong em.
SAMPELA TINGTING
Yu save pret long ol spirit nogut, o nogat? Yu mas bilip long bikpela pawa stret bilong God, em bai winim tru olgeta narapela pawa.
Ritim: Wok Pris 16:20-22
Tasol blut bilong Krais i winim dispela. Krais i no gat asua bilong wanpela rong i stap long em. Nogat tru. Na long strong bilong Spirit i stap oltaim oltaim, em i givim laip bilong em yet long God olsem ofa. Olsem na blut bilong em i no mekim bodi tasol bilong yumi i kamap klin. Nogat. Em i pinisim asua bilong yumi na yumi save olsem yumi stap klin tru long ai bilong God. Olsem na yumi no mas bihainim moa ol dispela lo i no gat laip, na yumi ken mekim wok bilong God bilong i stap oltaim.
—Hibru 9:14
Dispela De Hetpris i Mekim Ofa Bilong Rausim Sin Bilong ol Manmeri (Day of Atonement) i kamap wanpela taim long olgeta yia tasol. Na long dispela wanpela de tasol dispela hetpris i ken i go insait long dispela Rum Tambu Tru long kisim blut na tromoi wanpela hap long pes bilong Bokis Kontrak, em i ples bilong lusim sin bilong ol manmeri.
Long kamap klia tru long dispela De Hetpris i Mekim Ofa Bilong Rausim Sin Bilong ol Manmeri, em i gutpela sapos yu ritim Wok Pris 16 gen. Na sapos yu laik kisim save long wok bilong Krais long inapim dispela de, em i gutpela sapos yu ritim Hibru 9. I gat tupela meme ol i save bringim i kam long dispela de. Ol i kilim i dai wanpela bilong dispela tupela meme, na ol hetpris i karim blut bilong dispela meme i go long dispela Rum Tambu Tru. Dispela blut i karamapim olgeta asua bilong ol lain bilong God long ai bilong em. Dispela blut i makim dispela blut bilong Krais, em dispela blut i karamapim olgeta sin bilong yumi olsem na yumi no gat asua moa long ai bilong God. Na yumi save olsem yumi stap klin tru long ai bilong God, na yumi ken lotuim God na bihainim tok bilong em tu.
Na dispela narapela meme em i stap long dua bilong haus sel bilong God, inap long taim dispela hetpris i kam na putim tupela han bilong em long het bilong dispela meme. Na, olsem pesman bilong olgeta lain bilong Israel, dispela hetpris i autim olgeta pasin nogut na olgeta sin na olgeta bikhet pasin bilong ol manmeri bilong Israel. Na long dispela pasin em i putim olgeta dispela sin long het bilong dispela meme. Na wanpela man bai i kam kisim dispela meme i go long ples drai nating, na lusim em long dispela hap. Na dispela meme i no inap kam bek gen. Olsem tasol dispela meme i karim olgeta sin bilong ol Israel i go long wanpela hap i no gat man.
Olsem na dispela tupela meme wantaim i olsem wanpela piksa long wok bilong Jisas bilong kisim bek yumi. Blut bilong em i karamapim olgeta sin bilong yumi long ai bilong God, olsem dispela blut long dispela meme i mekim. Krais i kamap olsem dispela meme ol i salim i go long ples drai nating. Em i karim olgeta sin bilong yumi. Na em i karim olgeta dispela sin i go longwe tru long yumi – wankain olsem hap san i kamap i longwe stret long hap san i go daun.
Jisas i kamap olsem man bilong karim olgeta hevi bilong yumi.
SAMPELA TINGTING
Yu karim ol hevi bilong sin bilong yu yet long laip bilong yu? Bai yu putim ol dispela hevi bilong sin bilong yu long Jisas, o nogat?
Ritim: Wok Pris 3:1-5
Dispela man i mas putim han long het bilong bulmakau pastaim na bihain em i mas kilim i dai long dua bilong haus sel bilong God. —Wok Pris 3:2
Planti manmeri i no save tingting tumas long pasin holi bilong God. Tasol sapos yumi ritim buk Wok Pris, bai yumi tingting planti long pasin holi bilong God. Pasin holi bilong God i pulapim dispela buk. Wok Pris i stori long rot olgeta sin lain long olpela kontrak i mas bihainim long kamap klostu long God. Ol i mas mekim bikpela wok stret long kamap long presens bilong God.
Planti lain long tude i ting olsem ol i ken i go long God long laik bilong ol yet; ol i ting olsem God bai i amamas long lukim ol i kamap klostu long em, maski long pasin bilong ol taim ol i mekim olsem. Tasol dispela i no gutpela tingting. Yumi mas klia gut long laik bilong God; sapos nogat, yumi mas lukaut. Nogut yumi i kisim bagarap.
Dispela God yumi lotuim, em i wankain olsem dispela God i putim olgeta liklik tok tru long buk Wok Pris. Ol Israel i mas wok long kamap long God, tasol ol pris na narapela manmeri i mas bihainim ol lo bilong God long mekim olsem, na ol i no ken surik liklik long ol dispela lo. God i makim ples, pasin bilong ofa, na olgeta narapela pasin bilong kamap long em. Na sapos ol i surik liklik tasol long ol dispela lo, maski ol i save olsem ol i mekim dispela pasin nogut, ol bai i lukim belhat bilong God na em bai i mekim save long ol. Na long laik bilong God, ol dispela lo i stap planti yia long taim bilong Olpela Kontrak.
Planti million animal i bin dai, long dua stret bilong haus sel na bihain long banis bilong tempel. Planti tausen ol Israel i bin i stap na ol i putim han long het bilong ol dispela animal ol i ofaim i go long God. Na long dispela pasin ol i soim wanem samting i stap long bel bilong ol. Na taim ol i lukim blut na paia na smok, ol i daunim het bilong ol, bikos ol i save olsem ol i sanap long marimari bilong God tasol, dispela God husat em i holi.
Na yumi mas save long dispela samting: Yumi no inap i go long God na stap laip sapos yumi no go long em long Jisas Krais, husat em i dai long yumi. Yumi mas putim tupela han bilong yumi long Jisas. Sapos nogat, bai yumi i bungim bagarap bilong oltaim oltaim.
SAMPELA TINGTING
Bai yu mekim wanem taim yu laik i go long God?
Ritim: Kisim Bek 40:33-38
...orait klaut bilong Bikpela i karamapim haus sel bilong bung wantaim God, na bikpela lait bilong en i pulapim haus. —Kisim Bek 40:34
Yupela i haus bilong God yet, na Spirit bilong God i stap insait long yupela. Ating yupela i no save long dispela? —1 Korin 3:16
Taim Moses i wokim haus sel bilong Bikpela pinis, God I Gat Olgeta Strong i go i stap insait long dispela haus sel. Na bikpela lait bilong en i pulapim haus. Em i narakain samting tru!
Ating taim ol Israel i lukim dispela strong na pawa bilong God i stap klostu long ol long dispela haus sel, ol bai i bihainim tok bilong God na lotuim em olgeta taim, a? Tasol nogat. Yumi save, taim ol Israel i wokabaut long ples drai, ol i save bikhet na planti taim ol i sakim tok bilong God.
Na Jisas i kam long yumi. Em i stap God tru tasol em i kamap man: “Tok (Jisas) em i bin kamap man, na em i kam i stap namel long mipela. Mipela i lukim pinis bikpela namba na strong bilong em. Em i namba bilong dispela wanpela Pikinini tasol, Papa i salim em i kam. Marimari na pasin i tru i pulap long em” (Jon 1:14). Dispela em i wanpela bikpela mirakel tru.
Ating taim olgeta manmeri tude i lukim dispela pawa na strong bilong God i kam klostu long yumi, ol bai bilip long em na i stap laip, a? Tasol inap long tude, ol man i no bilip bai i tok olsem Jisas em i no God tru. Ol bai i tok olsem em i wanpela man tasol.
Bihain long de bilong Pentikos, ol Kristen i kamap olsem haus sel bilong Bikpela bikos Spirit bilong God i stap insait long ol. God i stap insait long dispela tempel, olsem na em i stap long olgeta hap long dispela graun na em i autim tok long kain kain tok ples.
Tasol planti manmeri i no bilipim gutnius. Planti ol i ting olsem: sapos God i stap long dispela graun, orait ating em bai i stap long wanpela naispela haus stret, olsem wanpela tempel bilong gol.
Tasol dispela em i tok tru: God i stap long planti ol man, meri, na pikinini i bilip long Jisas. Ol lain inap lukim em yet long laip bilong olgeta manmeri bilong em, em ol dispela manmeri husat i kisim marimari bilong em na Spirit bilong em pinis.
Klostu nau dispela glori bilong Bikpela bai karamapim dispela graun olgeta. Na long dispela taim i no gat wanpela inap tok olsem God i no stap long dispela graun. Long dispela de yumi bai lukim long ai bilong yumi yet dispela samting nau yumi i bilip long em. Na ol lain i no bilip, ol bai i lukim tu.
SAMPELA TINGTING
Yu – wantaim ol narapela bilip lain – i stap olsem tempel bilong God. God i stap insait long yu. Olsem wanem nau long wokabaut bilong yu? Bai yu mekim wanem? Bai yu mekim wanem long ol lain i no bilip?
Ritim: Stat 12:1-3
Bipo yet God i save olsem, bihain ol arapela lain bai i bilip long gutnius, na em i ting olsem em bai i kolim ol stretpela manmeri. Olsem na bipo tru em i autim gutnius long Abraham, olsem buk bilong God i tok, “Long yu God bai i mekim gut long olgeta lain manmeri.”
—Galesia 3:8
Inap long 2000 yia samting God i gat wanpela kontrak wantaim Abraham na ol pikinini bilong em tu —tasol em i mekim dispela kontrak wantaim ol tasol. Na yumi i no inap tok olsem dispela samting i no stret long ai bilong ol manmeri bilong ol narapela kantri. Em i wok bilong yumi long kisim save long plen bilong God bilong salvesen, tasol i no wok bilong yumi long kirapim narapela plen bilong salvesen.
Tasol, yumi ken givim pres long God: God i no lus tingting long yumi maski yumi i bin lus tingting long em na yumi i no lain bilong Juda tu. Em i tingting pinis long yumi taim em i tokim Abraham, “Long yu God bai i mekim gut long olgeta lain manmeri.” Pol i soim klia olsem gutnius i stap pinis long Stat 12:3.
Taim Jisas Krais i kam long dispela graun namba wan taim, God i tanim i go long olgeta lain manmeri long olgeta kantri bilong dispela graun. Taim Jisas em i liklik bebi yet, Simeon i holim em long han bilong em na em i tok olsem: “Em i wanpela lait, na em bai i givim lait long ol man bilong ol arapela lain” (Luk 2:32) —em ol i dispela lain i no bilong Juda.
God i no senisim dispela kontrak wantaim Abraham. Dispela kontrak bilong marimari i stap yet. Tasol nau ol man bilong ol arapela lain i stap lain bilong kontrak sapos ol i bilip long Jisas. Na God yet i makim Pol, “dispela aposel bilong ol man bilong ol arapela lain,” bilong autim plen bilong em long kisim ol man bilong ol arapela lain i kam insait long kontrak bilong em.
Olsem na dispela kontrak bilong marimari i kam long yumi tu, na dispela i gat bikpela mining insait long laip bilong yumi wan wan. God i wokim dispela kontrak with Abraham pastaim, na em i blesim ol lain bilong Juda. Tasol, yumi, na ol lain Juda wantaim, i ken stap insait long dispela kontrak bilong marimari long bilip long Jisas tasol. Olsem na maski yumi kam long wanem hap long dispela graun, maski wanem kantri em i as ples bilong yumi, yumi mas bilip long Krais long stap insait long kontrak bilong God!
SAMPELA TINGTING
Tok tenkyu long God bikos yumi stap insait long kontrak bilong marimari long bilip long Krais.
Ritim: Stat 9:8-15
Mi putim renbo bilong mi long klaut olsem mak bilong dispela kontrak bilong oltaim mi mekim pinis wantaim yupela na olgeta animal. Dispela renbo bai i stap olsem mak bilong kontrak mi mekim wantaim olgeta samting bilong graun. —Stat 9:13
I gat planti samting inap long bagarapim laip bilong man. Planti taim yumi i les long stori long dispela. Tasol yumi i ken klia i gat planti samting inap long bagarapim yumi na kilim yumi i dai.
Long planti hap bilong dispela graun i gat ol man nogut i gat laik long kisim wanpela bomb na kilim planti manmeri. Long kantri bilong yumi i gat planti man nogut i save raun. Na yumi no klia sapos wanpela spakman bai kam kilim yumi; na tu yumi i no klia sapos wanpela bikpela pait bai kamap namel long ples bilong yumi na ol bai kam kilim yumi i dai.
Tasol ol lain i save long Buk Baibel ol i mas pret long belhat bilong God. Long taim bilong bikpela tait long Buk Stat, yumi luksave long bikpela belhat bilong God. God em i belhat nogut tru long ol bikhet pasin bilong olgeta man long dispela graun. Na belhat bilong God i stap yet. Sampela taim God i bin yusim ol man long graun bilong soim belhat bilong em. Tingim ol man nogut bilong Asiria na Babilon na ol bikpela hevi nogut ol i givim long Israel. Yumi mas beten long God long em i no ken mekim wankain olsem long yumi nau.
Belhat bilong God i stap yet. Planti taim yumi no belhat tumas taim yumi lukim sin na ol man i bikhet long God Antap Tru. Tasol God i belhat tru long dispela kain pasin. Ol man i no inap klia tru long belhat bilong em; em i bikpela tumas. Na ol man i no klia olsem, taim bilong God bilong mekim save long ol man em i klostu nau.
Tasol, namel long belhat bilong God i gat wanpela gutpela promis i stap – dispela renbo. God em i mekim pinis wanpela promis, olsem na bai wanpela bikpela tait tru i no ken kam na bagarapim olgeta samting i gat laip gen. Na God em i tingim dispela promis yet. Olsem na em i save salim san i kam na givim lait long ol man nogut na ol gutpela man wantaim. God i pasim belhat bilong em yet long marimari bilong em yet.
God i gat laik sapos olgeta manmeri i lukim Jisas long Betlehem olsem man bilong kisim bek ol, bipo long taim ol bai i lukim em long taim Jisas i kam bek gen olsem Jas bilong ol. Long marimari bilong God tasol, dispela graun i no pinis yet. Nau em i taim bilong ol manmeri i ken ranawe long dispela belhat bilong God em bai i kam.
Sapos Jisas i stap olsem Saviour bilong yumi na yumi stap aninit long em olsem Bikpela bilong yumi, yumi no ken pret long belhat bilong God olsem Jas bilong yumi. Nogat. Yumi bai stap oltaim oltaim aninit long renbo bilong em, dispela renbo bilong laikim tru.
SAMPELA TINGTING
Yu save stap aninit long dispela renbo bilong laikim tru bilong God, o nogat? Dispela samting bai givim wanem kain hop na bel isi long yu?
Ritim: Stat 3:8-15
“Na bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain bilong meri. Bai ol i krungutim het bilong yu, na bai yu kaikaim lek bilong ol.” —Stat 3:15
Taim yumi ritim Stat 3, yumi luksave long as bilong ol bikpela hevi bilong yumi na tu yumi luksave long taim hop bilong yumi i kirap.
Bikpela hevi bilong yumi i kirap taim yumi brukim dispela kontrak bilong yumi wantaim God.
Na hop bilong yumi i kirap taim God i pasim Satan long stap wantaim yumi. God i no larim yumi i stap aninit long Satan. Nogat, God i mekim em i kamap birua bilong yumi.
Dispela em i samting bilong marimari bilong God. Em i laikim yumi tru. Taim yumi pundaun long sin, God i no larim yumi i pas wantaim pasin nogut. Nogat, em i mekim ol pikinini bilong Iv i kamap birua bilong ol lain bilong Satan. Taim Satan i wok long kam bung na wanbel wantaim man, wantu God i kam na brukim dispela. Na ol i no inap wanbel moa; ol bai i pait tasol: “Na bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain bilong meri.”
God i toknogutim Satan. Em i givim strongpela tok bilong daunim em: “Bai ol i krungutim het bilong yu, na bai yu kaikaim lek bilong ol.”
Na taim yumi ritim olgeta hap long Buk Baibel, yumi ken klia olsem planti ol man i no save pait strong long Satan. Dispela poisen bilong Satan i wok long bagarapim tingting na pasin bilong yumi. Tasol, long wok bilong Jisas, God i kam bilong helpim yumi. Na dispela em i mining tru bilong Krismas. Jisas i bin kam pinis na em i krungutim het bilong Satan, em dispela birua tru bilong yumi – na Satan bai i no inap win. Na Krais i kisim yumi i kam aninit long God, long mekim wok bilong em gen.
Tasol nau yumi mas wok long pait wantaim Satan yet. Ol bikpela hevi na sori i stap wantaim yumi yet long kain kain rot. “Kisim bek mipela long ol samting nogut.” Yumi save singaut olsem taim yumi stap namel long ol pait. Tasol klostu Krais bai i kam bek, na hop bilong yumi i kamap bikpela moa: “Na long liklik taim, God bilong givim gutpela sindaun na bel isi long yumi, em bai i larim yupela i krungutim Satan aninit long lek bilong yupela” (Rom 16:20).
God bai krungutim Satan. Tasol em i yusim lek bilong yumi long mekim olsem.
SAMPELA TINGTING
I gat sampela taim long laip bilong yu we yu save pilim olsem Satan i wok long winim yu long dispela pait? Na wanem samting i save pulim yu i go bek long God long dispela kain taim?
Ritim: 1 Tesalonaika 1:1-10
“Tasol taim Pikinini Bilong Man i kam, em bai i lukim ol manmeri i stap long graun ol i bilip, o nogat?” —Luk 18:8
Long Desemba i gat bikpela samting i save kamap long wan wan yia – em i taim bilong Krismas. Na long dispela de yumi save tingim taim Mama Maria i karim Jisas long Betlehem, em dispela liklik taun i stap 8 km samting daunbilo long Jerusalem.
Tasol i gat narapela taim na Jisas bai kam long dispela graun tu. Yumi save tingim dispela namba wan taim em i kam long dispela graun long taim bilong Krismas. Tasol “klostu” Jisas bai kam bek gen. Na sapos yu save amamas long tingim dispela namba wan taim Jisas i bin kam long dispela graun, ating yu bai amamas tru long save olsem em bai i kam bek gen.
Yumi no ken tingim namba wan taim Krais i bin kam olsem wanpela bebi, sapos yumi les long redim yumi yet long taim em bai i kam bek gen olsem Bikpela bilong yumi.
Buk Baibel i gat dispela bikpela tok: Jisas em bai i kam! Long taim bilong Olpela Testamen, ol manmeri i no wetim Jisas bikos ol i no save long nem bilong em. Ol i wetim wanpela man “bilong kisim bek ol,” dispela “pikinini bilong Devit,” dispela Mesaia. Sampela bai tok olsem ol i wetim taim Bikpela bai i kam. Ol i laik lukim taim God bai kam na stretim olgeta samting long dispela graun. Ol i save wetim sampela samting bai kamap.
Dispela Nupela Testamen i kisim Krais i kam long yumi wantaim olgeta presen bilong em. Na long dispela Nupela Testamen yumi kisim save olsem Jisas bai kam long graun tupela taim: Namba wan taim em i bin kam long marimari, na namba tu taim em bai i kam bek long glori.
Olsem na dispela tok i no senis: Jisas bai kam! Na ol lain bilong dispela nupela kontrak i stap wankain olsem ol lain bilong dispela olpela kontrak: Ol i wetim sampela samting bai kamap.
Na taim yumi harim dispela tok long Buk Baibel – olsem Jisas bai kam – yumi mas bekim dispela tok long wanpela rot tasol – yumi mas bilip, na yumi mas stap redi!
Olsem na taim yumi redim yumi yet long taim bilong Krismas long dispela mun, yumi no ken abrusim dispela askim bilong Jisas long Luk 18: “Tasol taim Pikinini Bilong Man i kam, em bai i lukim ol manmeri i stap long graun ol i bilip, o nogat?”
Long dispela mun yumi mas amamas, tasol yumi mas tingting gut tu. Yumi ken amamas long taim bilong Krismas sapos yumi stap redi na wetim wanem samting bai i kamap.
SAMPELA TINGTING
Long dispela taim bilong Krismas – na olgeta taim tu- hau bai yumi redim yumi yet long Bikpela bilong yumi husat bai i kam bek?
Ritim: Kamapim Tok Hait 22:18-21
Mi givim strongpela tok long olgeta man i harim dispela tok profet i stap long dispela buk. Sapos wanpela man i skruim narapela tok long dispela tok... Na sapos wanpela man i rausim sampela bilong ol dispela tok profet i stap long dispela buk... — Kamapim Tok Hait 22:18-19
Ol stongpela tok i bilong helpim yumi i stap longwe long sin na ol samting nogut.
Ol papamama i save givim planti strongplea tok long pikinini bilong ol. “Lukaut long ka taim yu wokabaut long rot.” “Lukaut long ol spak man long compound bilong yumi.”
Taim ol pikinini i gro na kamap bikpela, ol bai i kamap klia olsem papamama bilong ol i bin mekim gutpela strongpela tok long ol, bikos ol i laik lukautim ol. Planti taim wanpela yangpela man o meri i lusim haus bilong papamama bilong em long go i stap longtaim long narapela ples, papamama bilong em bai givim wanpela las strongpela tok long em.
Na hia, long dispela las siapta bilong Buk Baibel, klostu long taim yumi i pinisim dispela buk, God i givim yumi wanpela las strongpela tok – No ken bagarapim tok long dispela buk.
Yumi no ken skruim sampela narapela tok long dispela tok. Tok bilong God em inap. Yumi no gat nid long skruim sampela moa tok long dispela tok. Yumi no ken bilipim ol narapela tok God yet i no givim yumi. No yumi no ken tingting long bihainim ol narapela lo God yet i no givim long yumi.
Na tu, yumi no ken rausim sampela bilong ol dispela tok profet i stap long dispela buk. Tok bilong God em i pulap. Yumi no ken wok long senisim dispela tok long laik bilong yumi yet, maski yumi ting olsem em bai i kamap isi moa long kisim gut na save gut long en.
Yumi i kisim Tok long Bikpela God bilong yumi. Em i Tok Hait God yet i kamapim. God i tokim yumi long wanem samting em i mekim pinis, na long wanem samting em i wok long mekim yet, na long wanem samting em bai i mekim bihain. Na God i lukaut olsem Jon i raitim ol dispela samting olsem yumi yet i ken ritim. Na maski yumi i no inap save gut tru long olgeta liklik hap tok insait long dispela buk, ol narapela save man na Spirit bilong God bai helpim yumi long kisim sampela gutpela save long dispela buk. Tasol lukaut - no ken bagarapim dispela buk long laik bilong yumi yet.
Em i las strongpela tok bilong God. God em i laikim yumi tumas, olsem na em i laik givim strongpela tok long yumi. Em i bikpela samting tru – yumi no ken bagarapim dispela buk, o laip bilong yumi yet bai bagarap.
SAMPELA TINGTING
Sampela taim yu yet wok long “skruim narapela tok long dispela buk” o yu “rausim sampela tok long dispela buk,” o nogat?
Ritim: Kamapim Tok Hait 21:1-4
Em bai i mekim drai wara i stap long ai bilong olgeta bilong ol. — Kamapim Tok Hait 21:4
Sapos Jisas Krais em i Saviour na Bikpela bilong yumi, nau yet bai yumi pilim dispela stat bilong pinis. Gutnius, em i stap oltaim oltaim, em i bringim yumi bel isi long tude, na i no gat narapela bel isi tru i stap. I no gat wanpela narapela samting inap pinisim bel hevi bilong yumi – gutnius bilong Jisas Krais tasol inap mekim olsem. I no gat narapela samting inap givim hop long laip bilong yumi, na stiaim yumi - Krais tasol inap mekim olsem. Tasol dispela em i stat bilong pinis tasol.
Taim pinis i kam – bai yumi i bel isi olgeta. Long dispela pinis, God bai kamap ples klia olsem Man bilong givim bel isi long yumi. Yes, em i tru, em i stap tude tu, tasol bihain bai yumi amamas long wok bilong em moa yet. Tude yumi gat ol hevi na pen i stap yet. Olgeta de yumi i save mekim sin. Yumi i no pulap long amamas olgeta, na planti taim bai yumi krai i stap.
Tasol klostu pinis bai i kam. Na God bai i mekim drai ai wara bilong yumi. Yumi save krai planti, na God tasol inap kaunim olgeta ai wara bilong yumi. Ol haus sik i pulap yet long ol manmeri i gat sik na pen. I gat planti ol narapela kain haus sik i pulap long ol man i gat sik long tingting bilong ol. Na i gat planti ol hevi long spirit bilong yumi, na i no gat man long dispela graun inap givim bel isi long yumi long dispela.
Tasol long pinis, God yet bai mekim drai olgeta wara i stap long ai bilong yumi.
Planti lain i ting olsem bai yumi i go long wanpela ples we i no gat wanpela samting – ples bilong nating tru tasol – bihain taim, taim yumi dai. Tasol Buk Baibel i putim ples klia olsem bihain, long taim bilong pinis, yumi bai lus tingting long olgeta pen na hevi bilong yumi. Wantu tasol, olgeta ai wara bilong yumi bai pinis. Na taim yumi i go long dispela ples bilong glori na amamas tasol, orait em bai winim tru olgeta hevi na pen yumi save bungim long dispela graun, na yumi bai lus tingting long olgeta dispela samting, na yumi bai amamas tasol.
Long wanpela taim Krais i bin wokim tok piksa long God olsem wanpela papa i holimpasim nek bilong pikinini man bilong em, taim dispela pikinini i kam bek long haus bilong em. Tasol long hia yumi ritim tok piksa long God olsem wanpela mama i mekim drai olgeta wara long ai bilong yumi.
Em i longpela taim tru na yumi bin i stap long dispela rot i go long pinis. Yumi kamap les. Yumi gat ol bikpela pen na hevi. Tasol bihain, long pinis, bai yumi kamap long ples tru bilong yumi!
SAMPELA TINGTING
Tingting long dispela bikpela promis i kam long yumi long dispela pinis we God yet bai kisim yumi i kam long ples tru bilong yumi, na tenkyu long em.
Ritim: Kamapim Tok Hait 14:14-20
Orait mi lukluk gen, na mi lukim wanpela waitpela klaut, na wanpela man i wankain olsem yumi man bilong graun i sindaun i stap long dispela klaut. Em i gat hat gol long het bilong en, na long han bilong en em i holim naip i sap tru. — Kamapim Tok Hait 14:14
Taim ol i askim Jisas, long dispela nait we Judas i givim Jisas long han bilong ol birua, sapos em i Krais tru, em i bekim tok olsem: “Yu tok pinis. Tasol mi tokim yupela, bihain bai yupela i lukim Pikinini Bilong Man i sindaun long han sut bilong God i gat bikpela strong. Na em bai i stap antap long ol klaut bilong heven na i kam” (Matyu 26:6-4).
Ol Jas bilong lain Juda i klia tru long wanem samting Jisas i stori long em. Daniel 7:14 i bin tok olsem, “Dispela Man bilong bipo bipo yet i mekim em i kamap king na i givim em strong na biknem. Na em bai i stap king i gat strong oltaim oltaim, na wok king bilong en bai i no inap pinis. Na olgeta manmeri bilong olgeta kantri na olgeta lain na olgeta tok ples bai i stap aninit long en.”
Tasol ol lain Juda i no bilip tru olsem Jisas em i dispela man God bai i salim i go. Em i no luk olsem dispela man Daniel i stori long em. Na tu em i no luk olsem Jon bilong Baptais i bin stori long Matyu 3:12: “Em i kam olsem man i holim savol long han bilong en, bilong rausim olgeta pipia i stap long wit. Na em bai i bungim wit long haus wit bilong en. Tasol pipia em bai i kukim long paia i no save dai.”
Tasol dispela samting em i samting bilong kingdom na bilong dispela King, na em i stap long tok hait. Jisas i bin tok: pastaim tok bilong dispela kingdom i mas go aut, olsem ol i tromoi pikinini wit long gaden, na bihain orait ol bai inap long kisim kaikai i mau long dispela gaden. Pastaim wanpela man bilong bosim gaden i go aut na tromoi pikinini wit i go. Jisas yet i bin pundaun olsem pikinini wit long gaden, bilong kamapim kaikai bilong kisim taim em i mau. Long marimari na save bilong God, em i salim Jisas i kam namba wan taim bilong tromoi planti pikinini wit long gaden, tasol dispela i no min olsem taim bilong kisim kaikai i mau long gaden i no inap kam. Nogat, i min olsem bai i gat bikpela na gutpela kaikai tru bilong kisim taim em i mau.
Sapos gutnius i wok long go aut yet, orait em i taim bilong tromoi pikinini wit long gaden yet. Ol gras nogut na wit bai gro wantaim inap long taim God i gat laik long kam na kisim kaikai i mau long gaden.
Yumi mas lukaut – yumi mas mekim gutpela wok insait long kingdom bilong God long dispela taim bilong tromoi pikinini wit long gaden, long wanem bihain long dispela taim bilong kisim kaikai i mau long gaden bai kam. Yu ken bilipim tru dispela: Dispela Man i gat hat gol long het bilong em, i gat bikpela laik long kisim kaikai i mau, dispela kaikai em yet i kamapim, na em i gat bikpela laik long rausim ol gras nogut long dispela graun tu.
SAMPELA TINGTING
Long laip bilong yu yet, yu soim olsem yu wetim dispela taim bilong God i kam na kisim ol kaikai i mau long dispela graun, na long tromoi ol gras nogut, o nogat?
Ritim: Jon 11:17-27
Mi harim maus bilong wanpela man i singaut long heven olsem, “Yu raitim tok olsem, ‘Nau na olgeta taim bihain, ol manmeri i bilip long Bikpela na ol i dai, ol i ken amamas.’”
—Kamapim Tok Hait 14:13
Planti manmeri long tude i laik bilasim dai. Olsem na ol i givim kain kain naispela nem long dai, olsem “ol i slip i stap.” Na planti bai karamapim dai long planti ol naispela plaua na ol narapela bilas.
Tasol maski long ol dispela samting, dai i no naispela samting long lukim long dispela graun, na Buk Baibel tu i no bilasim dai, na em i no karamapim bel hevi bilong dai. Olsem na taim dispela man i singaut “Nau na olgeta taim bihain, ol manmeri i bilip long Bikpela na ol i dai, ol i ken amamas,” em i tok long putim sampela samting ples klia tru. Yumi lainim sampela nupela samting i kam long dispela tok profet long Nupela Testamen.
Ol Kristen long dispela taim ol i no brukim man long tupela hap – ol i no bilip olsem yumi man i gat spirit na em bai i stap oltaim na yumi i gat bodi bilong planim long graun. Ol i bilip olsem spirit na bodi bilong ol i wanpela man, na ol i bilip olsem dai em i pe bilong sin. Tasol ol i bilip tu olsem long Krais ol i abrusim dispela ples we sin na dai i bosim olgeta samting. Ol i bilip olsem dai em i samting bilong aninit long dispela birua Dai, na em i pasim yumi long testim wok God i mekim taim em i winim Dai.
Dai em i no isi. Taim yumi dai, i olsem yumi larim wanpela man, husat yumi no save long em, i kam kisim sampela samting i no bilong em yet. Tasol tok bilong God i tok, “ol manmeri i bilip long Bikpela na ol i dai, ol i ken amamas.”
“Ol i ken amamas.” Olsem wanem? Bikos “ol manmeri i bilip long Bikpela na ol i dai, ol i ken amamas.” Taim yumi i bilip long Bikpela na yumi dai, em i olsem wanpela blesing. Taim yumi planim ol lain i bilip long Bikpela taim ol i dai, yumi i ken save tru olsem wanpela de ol bai i kirap gen. I no olsem dai i winim ol, bikos ol i bilip long Bikpela na ol i dai. Ol i stap insait long pawa bilong Jisas.
Dai em i strongpela, tasol Jisas em i strongpela moa yet. Taim yumi i bilong Jisas, em bai i no inap lusim yumi. Olsem tasol, insait long dai yumi i ken amamas sapos yumi stap pikinini bilong God, bikos yumi i ken amamas long Jisas – na Jisas i winim Dai.
SAMPELA TINGTING
Dispela teks i givim yu bel isi olsem wanem?
Ritim: Kamapim Tok Hait 14:6-12
Orait mi lukim narapela ensel i flai i go namel long skai. Em i gat gutnius bilong i stap oltaim oltaim, na em i gat wok bilong autim dispela gutnius long ol manmeri i stap long graun. Em i autim long ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin. — Kamapim Tok Hait 14:6
Dispela taim bilong autim tok bilong God i makim stat bilong pinis. Nau ol ensel i flai i go. Olgeta lain bilong olgeta kantri na bilong olgeta tok ples na bilong olgeta kain skin i mas harim tok olsem em i stat bilong pinis, bikos dispela gutnius i stap oltaim oltaim i go aut nau.
Na dispela tok i kam pinis long olgeta manmeri i stap long dispela graun. Bipo God i autim tok long ol pikinini man bilong Abraham, Aisak, na Jekop. Na nau, long Krais, em i autim tok long olgeta manmeri long dispela graun. God i laik kisim olgeta hap graun bilong em gen, na em i laik kisim olgeta manmeri long kingdom bilong em. “Taim i kamap pinis bilong God i skelim pasin bilong olgeta man long kot. Olsem na yupela i mas pret long em na litimapim nem bilong em. Yupela i mas lotu long God, em i bin wokim heven na graun na solwara na olgeta hul wara.”
Gutnius bilong Krais i kamapim Sios, na i makim stat bilong pinis. Bihain long Pentikos yumi stap long las de. Yumi no wetim sampela nupela samting. Tru, yumi save lukim ol gutpela taim, na ol taim nogut. Tasol Krais i winim ol samting nogut long Golgata. Taim Jisas i kirap bek na gutnius i go aut, i olsem nupela graun i kirap pinis.
Stat bilong pinis i kam pinis. Yumi mas pret long God na litimapin nem bilong em.
Ol manmeri bilong God i stap long dispela graun bilong autim klia olsem klostu nau dispela pinis bai i kam, na kingdom bilong God i kam pinis na em bai i kam yet. Maski em bai planti yia moa o liklik taim yet, em i no bikpela samting bikos God yet i makim dispela taim, na em i makim dispela taim pinis.
Dispela pinis i kamap klostu nau. I no samting bilong bel hevi. Planti lain bilong tude i no save amamas long autim tok olsem pinis bai i kamap klostu nau. Tasol, taim yumi tok olsem dispela pinis i kamap klostu nau, i no olsem yumi autim tok bilong dai. Nogat, yumi autim tok long pinis bilong dai.
Yumi mas autim dispela gutnius olsem pinis i kamap klostu nau, bikos yumi i luksave olsem nupela graun i wok long kam. Pen bai i pinis. Sin bai i pinis. Tok bilong God i putim dispela samting ples klia. Yumi mas tenkyu long God! Pinis i kamap klostu nau!
SAMPELA TINGTING
Dispela tok “pinis i kamap klostu nau” bai i karim wanem kain kaikai long laip na wokabaut bilong yu yet?
Ritim: Kamapim Tok Hait 14:1-5
Dispela ol man ol i no bin slip wantaim ol meri na kamap doti. Nogat. Ol i stap klin tru. Olgeta ples Pikinini Sipsip i laik i go long en, orait ol dispela man i save bihainim em i go. God i bin baim bek ol dispela lain namel long olgeta manmeri bilong graun, na ol i stap olsem namba wan lain God i kisim bek, bai ol i stap ol lain bilong em yet na bilong Pikinini Sipsip.
—Kamapim Tok Hait 14:4
Taim yumi ritim Kamapim Tok Hait 13 i luk olsem i no gat wanpela inap abrusim tingting na toktok bilong dispela wel animal. Olsem na em i gutpela long lukluk long dispela driman long ol lain bilong God long Maunten Saion. Yumi ritim dispela namba 144,000 gen long hap, olsem na yumi i ken klia olsem God tasol em i makim lain bilong em, na lukautim ol na kisim bek ol.
Planti yia bipo long dispela taim, dispela profet Elaija i ting olsem king Ahab i bosim ol lain bilong God. Na em i tok, “Mi wanpela tasol mi stap.” Tasol God yet husat i makim na lukautim na kisim bek ol lain bilong em, i bekim tok olsem: “Tasol bai mi larim 7,000 manmeri i stap long Israel. Em ol dispela manmeri i bin bihainim mi tasol, na ol i no bin brukim skru long giaman god Bal na givim kis long ol piksa bilong en na lotu long em” (1 King 19:18).
God yet i baim bek dispela lain namel long olgeta manmeri long graun – dispela lain em i dispela sios i stap tru long God. Ol i stap klin tru; ol i no mekim pasin pamuk wantaim ol narapela manmeri. Nogat. Ol i stap tru long God bilong ol, em i man tru bilong ol. Ol i bihainim olgeta lo bilong God, maski ol giaman profet i tok olsem ol lo i longlong lo stret.
Ol i save bihainim Pikinini Sipsip olgeta taim. Ol i no bihainim em long laik bilong ol yet. Ol i no tok olsem Jisas em i poro bilong ol tasol. Nogat, ol i bihainim Krais, husat i givim ol lain bilong em wanpela diwai kros bilong ol yet mas karim.
“Ol i no bin mekim tok giaman. Nogat. Ol i no gat asua long wanpela samting.” Ol i sinlain; sapos nogat, i min olsem ol i no nidim blut bilong Pikinini Sipsip. Tasol ol i no giaman lain. Ol i no harim tok bilong ol giaman profet; ol i stap strong long trupela bilip long Jisas.
Dispela i soim klia tru olsem dispela snek, na dispela wel animal, na ol narapela samting tu, i no inap pasim laik bilong God, em dispela laik em i givim yumi long Krais Jisas, Bikpela bilong yumi.
SAMPELA TINGTING
Bilong wanem yu laik bihainim dispela Pikinini Sipsip?
Ritim: Kamapim Tok Hait 13:11-18
Orait mi lukim narapela wel animal i kirap insait long graun na i kam antap. Long het bilong en tupela kom i kamap olsem ol kom bilong pikinini sipsip, na toktok bilong en em i olsem toktok bilong wanpela bikpela snek. — Kamapim Tok Hait 13:11
Dispela namba tu wel animal i no kam long solwara. I min olsem em i no kam long ol gavman lain. Nogat, em i kam long dispela graun, dispela graun God yet i wokim long han bilong em yet. Na dispela wel animal i luk naispela moa olsem namba wan wel animal. Em i luk klostu olsem Pikinini Sipsip, tasol toktok bilong em i olsem bikpela snek.
Dispela namba tu wel animal i makim ol pawa bilong kain kain riligen (bilip), na pasin bilong kain kain kantri i wok long sapotim namba wan wel animal. Pawa bilong gavman i no inap sanap long strong bilong em yet. Wel animal i mas stap strong, na em i mas mekim pasin nogut tru, tasol em i nidim sampela moa samting tu. Em i nidim strongpela tingting bilong ol lain bilong graun, na dispela tingting i mas wok long lotuim dispela wel animal. Olgeta hetman nogut i nidim profet bilong em yet.
Dispela namba tu wel animal i kirapim ol naispela sotpela tok na planti lain bai bilipim dispela. Dispela giaman profet i kirapim kain kain tingting na singsing bilong kingdom bilong dispela wel animal. Em i wokim kain kain mirakel na planti lain i laikim ol dispela mirakel. Na dispela giaman bilip i kirapim planti manmeri long bihainim laik bilong dispela wel animal.
Yu luksave olsem kingdom bilong dispela wel animal i wok long bihainim mak bilong kingdom bilong God? Em i gat mesaia bilong em, na em i gat ol mak na kain kain mirakel tu. Em i tingting long karamapim olgeta samting bilong dispela laip. Na i gat wanpela kain baptais bilong bungim lain bilong em. Tasol em i mak bilong wel animal; i no mak bilong God.
Tasol Gutnius bilong God i no samting bilong kirapim tingting tasol, tasol em i gat tingting bilong em yet, na em i wok long senisim na bosim tingting na pasin bilong yumi insait long laip bilong yumi long dispela graun. Yumi nidim ol gutpela Kristen save na tingting insait long gavman na ol narapela samting long dispela graun tu. Yumi nidim ol gutpela tingting long helpim ol Kristen sumatin i luksave long ol giaman profet na tingting na pasin nogut bilong ol. Yumi nidim ol Kristen skul. Ol Kristen man na meri i wok long kain kain wok i mas tokaut. Ol Kristen manmeri i wok long ol niuspepa o long nius long TV ol i mas mekim ol gutpela tok namel long olgeta samting i kamap long dispela graun.
Em tru, yumi mas wari long salvesen bilong yumi, tasol yumi mas redim yumi yet long banisim ol giaman tok na stretim tok bilong ol giaman profet long dispela graun. Gutnius bilong kingdom bilong God bai i helpim yumi long mekim olsem.
SAMPELA TINGTING
Yu inap tingim sampela tingting nogut i wok long bagarapim sios bilong God long tude, o nogat? Hau bai yumi pait long ol dispela giaman profet?
Ritim: Kamapim Tok Hait 13:1-10
Ol manmeri i save olsem traipela snek i bin givim strong bilong em yet long dispela wel animal, olsem na ol i lotuim dispela snek. Na ol i lotuim wel animal tu, na ol i tok olsem, “Husat em i wankain olsem dispela wel animal? Husat inap long pait long em?
— Kamapim Tok Hait 13:4
Taim God i bosim yumi, yumi bai i stap gut tru. Yumi lainim dispela samting long buk Rom 13. Kampim Tok Hait 13 i skulim yumi olsem, taim gavman bilong yumi i laik kisim ples bilong God, gavman bai i kamap olsem wanpela wel animal.
Planti taim ol gavman long kain kain kantri i wok long bihainim dispela wel animal. Olsem na yumi ol Kristen lain i les long gavman i kisim bikpela pawa tumas. Yumi save olsem planti taim ol gavman i bihainim dispela wel animal na dispela bikpela snek i bosim dispela wel animal.
Tasol tu, yumi save olsem gavman i mas bosim yumi, na mekim wok long lukautim ol lain bilong kantri, na long mekim ol lo bilong bosim yumi. Bikos sapos nogat, olgeta manmeri bai bihanim laik bilong ol yet na ol bai i hangre long kisim planti mani na kago stret, na dispela bikpela snek i bosim dispela ol samting tu.
Olsem na, em i gutpela sapos yumi Kristen lain tu i wok long kisim gutpela save long wok bilong gavman bilong yumi long tude.
Ol Kristen long Rom, long taim Jon i raitim dispela buk, Kamapim Tok Hait, ol i klia olsem king bilong Rom i olsem dispela wel animal. Ol i save olsem planti manmeri stret i wok long lotuim dispela wel animal tu. Sampela taim ol yet i bin askim dispela askim: “Husat i wankain olsem dispela wel animal? Husat inap long pait long em?” Long dispela taim ol lain i ting olsem Rom i no inap pundaun, na em bai i stap strong olgeta taim.
Tasol bihain, Rom i pundaun. Tasol maski Rom i pundaun, dispela wel animal i stap strong yet na em i laik bosim dispela graun. Long planti yia ol Kristen lain i save long dispela wel animal. Martin Luther tu em i save long dispela wel animal. Na tude tu planti ol sios i lukim dispela wel animal taim ol i kisim ol hevi long han bilong birua bilong ol.
Inap long taim kingdom bilong God em i kam olgeta long dispela graun, dispela wel animal bai i mekim wok insait long olgeta kantri long dispela graun, na ol bai i tok nogut long nem bilong God. Inap long wanpela taim, na narapela taim na hap taim – i min olsem inap long taim belhat bilong Satan i stap na dispela meri i kisim yet ol hevi long han bilong ol birua.
SAMPELA TINGTING
Yu yet yu lukim dispela “wel animal” i wok long bagarapim, na pait long, sios bilong God tude?
Ritim: Kamapim Tok Hait 12:13-17
Dispela snek em i lukim olsem ol i tromoi em i go daun pinis long graun, na em i go ranim dispela meri i bin karim pikinini man. — Kamapim Tok Hait 12:13
Buk Baibel i no tok olsem sios bilong God bai i stap isi tasol. Ol birua bai wok long bagarapim dispela meri yet, bihain long taim Pikinini Man i go antap long heven. Bihain long taim Pikinini Man i go antap long heven, ol lain bilong God i gat dispela nem “meri” yet, na ol memba bilong dispela bodi bilong Krais i gat dispela nem “ol pikinini bilong meri” o “ol dispela manmeri i save bihainim ol lo bilong God, na ol i save autim tok bilong Jisas na bihainim em” (lain 17). Ol tok i stap long Kamapim Tok Hait i go long dispela lain. Ol i lain bilong sios bilong Jisas Krais, ol trupela Israel.
Na dispela tok i putim ples klia olsem ol manmeri bilong God, bihain long taim Jisas i go antap long Heven, ol bai i kisim hevi long han bilong birua bilong ol – sampela taim em bai bikpela hevi, na sampela taim ol liklik hevi tasol.
Tasol dispela tok i bilong givim bel isi long yumi na bilong strongim yumi. Yumi ken amamas bikos dispela snek i gat sotpela taim tasol long mekim wok nogut bilong en.
Planti lain, sapos ol i kisim tok olsem ol bai i stap laip inap wanpela yia moa tasol long dispela graun, ol i save hariap na raun na mekim kain kain samting long laik bilong ol yet. Na em i kain olsem long dispela snek. Em i save olsem em i gat sotpela taim tasol bilong i stap (lain 12). Ol i tromoi em i go daun pinis long graun. Em i save olsem em i no inap winim sia king long heven, olsem na em i strong moa yet na mekim wok nogut bilong em wantaim belhat tru.
Tasol God bai i lukautim dispela meri. Em i givim tupela wing bilong tarangau long dispela meri “bai em inap flai i go long ples bilong en long graun i no gat man, na em i ken i stap longwe long dispela snek.” Em tru, long dispela ples bai em i bungim sampela hevi, na bai em i no gat planti kago samting long helpim em, tasol em i stap klostu long God bilong em, na em i stap orait long hevi bilong dispela snek. Na graun tu i helpim em (lain 16).
Dispela meri bai i stap strong. Maski em i longpela taim stret. Dispela 3-pela yia i wanpela tok piksa na i makim taim we dispela meri bai wetim God. Na taim em i ting olsem em bai i no inap stap strong moa, wantu Krais bai i kam bek (mining bilong dispela tok “hap yia”).
SAMPELA TINGTING
Yu yet yu save long sampela hap long dispela graun we ol sios bilong God i save bungim planti bikpela hevi stret long han bilong birua bilong ol, bikos ol i laik lotuim God, a? Beten long God long lukautim na strongim tru ol dispela lain.
Ritim: Kamapim Tok Hait 12:7-12
...dispela man bilong kotim ol brata bilong yumi, em i bin kotim ol long ai bilong God bilong yumi long san na long nait, tasol nau ol ensel i tromoi em i go daun pinis. — Kamapim Tok Hait 12:10
Taim yumi autim dispela tok heven, yumi save tingting long dispela ples we ol lain bilong God i go taim ol i dai. Sapos wanpela lain bilong yumi i dai, na em i bilip long Krais, orait taim yumi harim dispela tok heven, wantu bai yumi tingting long em. Tasol taim Buk Baibel i stori long heven, i min olsem dispela ples we God i stap na bosim dispela graun. Heven i olsem wok ples tru bilong God bilong bosim olgeta samting long dispela graun.
Em tru, ol lain bilong God i save go long heven taim ol i dai. Tasol taim Buk Baibel i yusim dispela tok heven, em i save toktok long sia king bilong God, na wok bilong em bilong bosim dispela graun.
Olsem na dispela go antap long heven bilong Krais em i bikpela samting. Taim Jisas i pinisim wok bilong em long dispela graun, em i go antap long sia king bilong Papa bilong em long heven. Na nau em i mekim wok bilong king long bosim dispela graun, na Satan em i no win. Kamapim Tok Hait i tok olsem, “ol ensel i tromoi em i go daun pinis.” Ol i rausim em long heven.
Kamapim Tok Hait i stori long dispela bikpela pait long heven, na em i wankain stori long taim Krais i go antap long sia king bilong God long heven. I olsem em i tupela hap long dispela wanpela stori. Long gutnius, dispela stori i bilong Jisas: Jisas i go antap – em i lusim dispela graun na em i go long heven. Tasol long Kamapim Tok Hait, yumi lukim narapela hap long dispela stori: gutpela ensel bilong God i winim Satan na ol lain bilong em long wok bilong Jisas.
Satan i olsem “man bilong kotim ol brata bilong yumi.” I min olsem em i laik kotim ol, na em i laik autim ol sin bilong yumi long ai bilong God. Yumi gat bikpela asua long ai bilong God. Na bipo yumi i no gat rot long kamap orait.
Tasol Pikinini Sipsip i bin kam na em i dai long ol sin bilong yumi, na blut bilong em i karamapim yumi. Olsem na, nau Satan i no inap i go long sia king bilong God. Yumi no gat man bilong kotim yumi moa. Nogat, nau yumi i gat Helpim bilong yumi i stap long sia king bilong God - Jisas, Saviour bilong yumi. Nau Satan i stap long dispela graun tasol; na dispela em i gutpela samting tru, maski i luk olsem em i no gutpela samting.
SAMPELA TINGTING
Em i bikpela samting olsem ol i tromoi Satan i go daun long dispela graun, a?
Ritim: Buk Song 2
Na meri i karim pikinini man, em pikinini God i makim bilong holim stik ain na bosim strong olgeta lain manmeri. Meri i karim pikinini pinis, orait kwiktaim ol i kisim pikinini i go antap, na ol i bringim em i go long God na long sia king bilong em. —Kamapim Tok Hait 12:5
Dispela teks i givim sotpela stori long laip na wok bilong Jisas: mama bilong em i karim em, na kwiktaim ol i kisim em i go antap long God na sia king bilong em. Em i kam long dispela graun long mekim wok na long stap olsem wokman bilong God, na em i go antap long bosim olgeta lain manmeri. Dispela teks i bungim tok bilong bilip bilong yumi.
Dispela lain i putim ples klia husat i kisim sia king bilong heven. Bikpela snek i laik sindaun long dispela sia king. Tasol Pikinini Man i go kwiktaim long sia king. I min olsem em i winim dispela snek. Dispela em i gutnius stret.
Yumi save brukim ol samting i bin kamap long bipo taim inap long nau long tupela hap. Ol yia i bin kamap bipo long taim Krais i kamap long dispela graun yumi save kolim “Before Christ” (long Tok Pisin em i “Bipo long Krais”) na yumi save sotim olsem – B.C. Na long ol yia i kamap bihain long taim Krais i kamap long dispela graun yumi save raitim olsem – A.D.
Na wanem em i mining bilong dispela “A.D.”? Long Tok Latin dispela “A.D.” i makim Anno Domini, na i min “Long dispela yia bilong Bikpela.” Planti taim yumi ting olsem yumi stap bihain long taim Krais i stap laip. Planti lain i ting olsem Jisas Krais em i man bilong bipo taim. Tasol dispela em i no tru. Yumi stap laip aninit long Krais long tude! Yumi no stap bihain long taim em i stap; nogat, yumi stap namel long taim em i bosim dispela graun.
Yumi i lain bilong sin, na ai bilong yumi i no op olgeta. Olsem na, planti taim yumi lus tingting olsem Jisas i stap laip na em i bosim dispela graun olgeta. Olsem na God i kirapim tingting bilong yumi: “Na meri i karim pikinini man ... orait kwiktaim ol i kisim pikinini i go antap, na ol i bringim em i go long God na long sia king bilong em.”
Snek em i no win, na em bai i no inap win; klostu taim bilong em bai i pinis. Tasol taim bilong Bikpela olsem king bilong yumi i no inap pinis; Bikpela bai i bosim dispela graun olgeta bilong oltaim oltaim.
SAMPELA TINGTING
Jisas i stap laip na em i bosim dispela graun olgeta. Taim yu bilipim dispela, em bai helpim Kristen wokabout bilong yu yet olsem wanem?
Ritim: Kamapim Tok Hait 12:1-6
...Orait dispela snek i sanap long pes bilong meri i laik karim pikinini, na em i wetim meri i karim pikinini pinis, bai em i ken kaikai dispela pikinini. — Kamapim Tok Hait 12:4
Jon i lukim wanpela bikpela retpela snek, em i redi long pait. Em i birua tru bilong dispela Mesaia. Em i laik kisim sia king bilong dispela graun. Em i gat 7-pela het na 10-pela kom i kamap long het bilong em – i min olsem em i gat save tru na em i strong tru.
Tel bilong dispela retpela snek i brumim tru bikpela lain sta bilong skai na tromoi ol i go long graun. Yu ting dispela ol sta i tok piksa long wanem samting? Ol ensel? Ol king? Ol i tok piksa long pawa bilong dispela snek tasol, o nogat?
Dispela snek i laik bagarapim dispela meri. Em i laik bagarapim Pikinini Man bilong em bikos em i save olsem dispela Pikinini Man bai i sindaun long sia king long heven. God yet i makim dispela Pikinini Man bilong sindaun long sia king, tasol snek yet i laik sindaun long dispela sia king.
Dispela piksa i kliaim olgeta samting i bin kamap long Olpela Testemen. God em i laikim tru Israel, na em i lukautim Israel gut tru bikos Israel bai i karim Pikinini Man. Na dispela bikpela snek i wok long bagarapim Israel bikos em bai i karim Pikinini Man.
Dispela snek i bagarapim em long planti ol rot: King bilong Isip i wok long kilim ol pikinini man bilong Israel long wara Nail. Ol birua bilong Israel, olsem lain Filistia, i wok long bagarapim tru ol lain bilong God long ol bikpela pait, tasol ol i no inap.
Na moa, klostu Israel i bagarapim ol yet long sin bilong ol. Em i wok long dispela bikpela snek, olsem Satan, long grisim Israel long bagarapim ol yet. No klostu Satan em i winim ol long dispela rot. God yet i tok olsem planti taim pasin bilong ol Israel i wankain olsem ol birua bilong ol tasol.
Tasol God i laikim tru ol lain bilong em, maski ol i bikhet lain. Na em i save inapim ol promis bilong em: dispela pikinini meri bilong Saion bai karim dispela Pikinini Man. Olsem na, long apim nem bilong em yet, God i lukautim dispela meri. Olsem na dispela snek husat i pulap long belhat, em i no inap bagarapim dispela meri.
SAMPELA TINGTING
Dispela snek i wok long bagarapim yu yet long ol sin bilong yu yet, o nogat? Bai yu kisim bel isi olsem wanem taim yu tingim pasin bilong God long laikim tru Israel, maski ol i bikhet lain stret?
Ritim: Kamapim Tok Hait 12:1-2
Dispela meri i gat bel, na pen bilong karim pikinini em i kamap pinis long em. Em i laik karim pikinini, na em i pilim pen nogut tru, olsem na em i singaut strong. — Kamapim Tok Hait 12:2
Dispela piksa long dispela teks i stori long wanem samting i bin kamap 2000 yia i go pinis i kam inap long dispela taim. Ol lain bilong God, Israel, i karim dispela pikinini Jisas, dispela Mesaia. Bipo long taim Krais i kamap long dispela graun, olgeta lain Israel i pilim nogut tru, na ol i singaut strong tru taim ol i wetim taim bilong karim dispela pikinini.
Taim yumi tingting long as bilong Jisas, yumi mas tingim olsem em i lain bilong Israel. Em i samting bilong Israel bilong kisim glori, bilong stap pikinini bilong God, bilong stap insait long kontrak, bilong kisim lo, bilong lotu long tempel, na bilong kisim olgeta promis bilong God. Ol tumbuna bilong Jisas i kam long Israel (Rom 9:4-5). Tasol yumi save olsem Jisas i no man tasol na em i no wanpela bilong Israel tasol. Yumi save olsem em i Mesaia, “em i God, na em i stap het bilong olgeta samting. Na oltaim oltaim yumi mas litimapim nem bilong en” (Rom 9:5).
I tru olgeta olsem dispela Mesaia em i kam long lain Israel, na em i pikinini man, na em i stap olsem hop bilong pikinini meri bilong Saion. Olsem na yumi ken tok: i olsem ol lain bilong God long Olpela Testamen i gat bel na ol i wetim taim bilong karim dispela pikinini Jisas Krais.
God i gat dispela plen taim em i singautim Abraham long stap blesing bilong olgeta famili bilong dispela graun. Na em i gat dispela plen taim em i givim ol lo long Israel long han bilong Moses, bilong raunim ol. Olsem tasol God i stap tru long ol promis em i givim Devit, maski ol king na manmeri tu i wok long sakim tok bilong em, bilong wanem marimari bilong God i lukluk i go long taim dispela namba wan pikinini man bilong Devit husat bai i kam long dispela graun olsem wanpela bebi.
Israel i stap long Olpela Testamen bilong kisim Jisas Krais i kam long dispela graun. Na dispela tok piksa long dispela teks i stori klia tru long wanem samting i bin kamap bipo taim, long Olpela Testamen. Em i stori bilong pen bilong karim pikinini, na em i krai i stap long wetim dispela taim bilong karim pikinini.
SAMPELA TINGTING
Taim yumi ritim Olpela Testamen, na dispela stori bilong Israel, yumi mas tingim husat? Bilong wanem?
Ritim: Kamapim Tok Hait 11:15-12:1
“Wanpela meri i stap, na em i pasim san olsem klos bilong en. Na mun i stap aninit long lek bilong en, na 12-pela sta i stap olsem hat long het bilong en.” – Kamapim Tok Hait 12:1
Jon i kisim wanpela nupela driman, na dispela driman em i olsem sampela ol tok piksa long wanem samting i bin kamap bipo long dispela graun. Na em i helpim ol lain bilong God i kisim save long wanem samting i bin kamap long bipo taim.
Dispela meri em i tok piksa long ol lain bilong God i bin i stap long taim dispela graun i kamap i go inap long pinis bilong dispela graun. Na dispela meri i pulap long glori. Mun i stap aninit long lek bilong en, na san i olsem klos bilong en, na 12-pela sta i stap olsem hat long het bilong en.
Planti lain long dispela graun i bin lotuim san, mun na ol sta. Tude, tu, planti lain i lotuim ol dispela samting. Tasol God, long dispela driman, i tok olsem san na mun na ol sta i olsem bilas long dispela meri em i laikim tru.
Bipo ol save man i save pulim tok i go i kam long kisim save sapos san o graun i stap namel tru long olgeta samting. Tasol long hia God i tok, “Ol lain bilong mi i namba wan samting long dispela graun. Ol yet i stap namel long dispela graun.”
Sampela man i bin i go long mun na lukim em. Sampela Kristen lain i bin ting olsem dispela em i samting nogut, long wanem, mun em i samting bilong God tasol. Tasol long hia i olsem God i tok olsem: “Meri bilong mi, lain bilong mi, i olsem namba wan samting bilong mi. Ol lain i laik bagarapim em, ol i mas lukaut! Mun em i olsem samting bilong stap aninit long lek bilong en tasol.”
Olsem tasol ol lain bilong God i bikpela samting tru long ai bilong Papa bilong ol long heven husat i bosim olgeta samting long graun na long heven. God i tok olsem ol pikinini bilong em, ol i olsem “sol” bilong dispela graun, na sapos ol i lus, dispela graun bai bagarap olgeta; ol i “lait” tu, na sapos ol i lus, tudak tasol bai karapim dispela graun. Na moa, God i tok olsem klostu ol lain bilong em bai i save long olgeta samting i bin kamap long bipo taim.
Dispela meri em i bikpela samting tru long ai bilong God bikos Pikinini tru bilong God, Jisas Krais, em i Bikpela bilong em.
SAMPELA TINGTING
Hau bai yu save olsem yu yet i bikpela samting long ai bilong God?
Ritim: Kamapim Tok Hait 8:1-5
... na i no gat wanpela samting i mekim nois, na i no gat toktok i kamap long heven, i go inap hap aua samting. Na dispela smok i gat gutpela smel wantaim ol prea bilong ol manmeri bilong God, ol i lusim han bilong dispela ensel i sanap i stap long pes bilong God, na ol i go antap. — Kamapim Tok Hait 8:1,4
I olsem yumi wetim bikpela samting tru taim Pikinini Sipsip i rausim namba 7 gris kandel i pasim buk. Dispela em i las gris kandel. Em i namba 7. Long Buk Baibel, namba 7 i gat bikpela mining bilong em; em i namba bilong pulap. Tasol taim em i rauisim namba 7 gris kandel i no gat wanpela bikpela samting i kamap – i no gat wanpela samting i mekim nois i go inap wanpela hap aua!
I no gat toktok long heven. Ol lain i save singim pres long God olgeta taim, ol i pasim maus. Klaut i no pairap. Na long dispela taim, taim i no gat wanpela samting i mekim nois, orait ol prea bilong ol pikinini bilong God i wok long go antap long sia king bilong God.
Long dispela yumi ken klia olsem God i save harim ol prea bilong yumi. Em i bilong strongim yumi. Taim bilong prea em i taim bilong kisim strong. Taim yumi autim ol hevi bilong yumi long God, yumi i ken bel isi. Namba wan samting prea i save mekim, em i olsem: Em i save mekim bel bilong yumi i stap isi. Tasol i no dispela samting tasol.
Hau bai yumi klia olsem wanpela man i save harim ol prea bilong yumi? Baibel i tok olsem! – tasol long dispela teks em i kamap klia tru. Ol prea bilong yumi i go long yau bilong God yet! Heven i kamap olsem yau bikos olgeta pikinini bilong God i prea wantaim. “Na i no gat wanpela samting i mekim nois.” Yes, God i harim ol prea bilong olgeta pikinini bilong em – em tru, ol prea bilong yumi yet tu! – tasol, moa, ol prea bilong yumi gat wok insait long plen bilong God. God bai i bekim ol prea taim em i kam olsem Jas na kisim bek ol lain bilong em. God i mekim wok bikos em i harim ol prea bilong ol lain bilong em.
Taim ol dispela prea i lusim graun na go antap long heven, i gat wanpela bekim i kam long heven i go long graun (lain 5): “Orait ol klaut i pairap na bikpela nois i kamap, na lait bilong klaut i sut i go nabaut, na graun i guria.” Ol dispela samting i mak bilong wanpela samting: klostu God bai i kam bek. Dispela em i bekim tru! Yumi mas beten olsem kingdom bilong God i mas i kam na nem bilong God i mas i stap holi. Na heven bai i stap isi na harim dispela beten!
SAMPELA TINGTING
Dispela teks long Kamapim Tok Hait bai senisim ol beten bilong yu, olsem wanem?
Ritim: Kamapim Tok Hait 7:13-17
Olsem na ol i save sanap long pes bilong sia king bilong God. Na long san na long nait ol i save stap long haus bilong en na mekim wok bilong en. Na God i save sindaun long dispela sia king, em yet bai i stap wantaim ol na lukautim ol. — Kamapim Tok Hait 7:15
Nek bilong dispela hetman i autim stori long laip bilong ol lain bilong God. Em i stori long ol olsem ol i ol manmeri i bin wokabaut i go namel long ples drai. Na nau ol i kamap long dispela graun God i promis long givim ol. Bipo ol i no gat planti samting, tasol nau ol kisim olgeta samting. Ol i lus tingting long ol hevi ol i bin bungim bipo. Na long san na long nait ol i save stap long haus bilong God na mekim wok bilong en.
Ol manmeri bilong God i kam long olgeta kantri, ples, na kain kain tok ples. Tasol Tok bilong God i go long lain Juda pastaim, na lait bilong Tok bilong God i kamap long Israel. Olsem na sios bilong tude i olsem dispela nupela Israel.
Planti kain bilip olsem Buddhism na Hinduism i stori long wanpela naispela ples bai i kamap bihain. Ol i tok olsem taim yumi dai bai yumi i stap nating tasol. Bai yumi i no gat pen na wari, tasol bai yumi i stap nating oltaim oltaim. Tasol yumi, ol bilip lain tru, i save olsem yumi bai stap laip oltaim oltaim. Buk Baibel i no kliaim tok long olgeta samting bai i kamap bihain, tasol em i putim ples klia olsem taim yumi kamap long nupela graun, bai yumi stap laip tru. Yumi bai amamas tru na laip bilong yumi bai winim tru olgeta samting long dispela graun long tude.
“Na long san na long nait ol i save stap long haus bilong en na mekim wok bilong en.” Tude, long dispela graun, yumi wok long mekim wok bilong God. Tasol long nupela graun, bai yumi mekim olsem olgeta taim na amamas wantaim.
Nogut sampela nupela Kristen bai ting olsem ol bai kamap les long mekim olsem. Nogat. Taim yumi mekim olsem bai yumi amamas, na olgeta samting bai kamap naispela tru. Sapos yumi stap nating tasol na bihainim laik bilong yumi yet tasol, bai skin bilong yumi i kamap les olgeta.
Tasol yumi wetim dispela taim we yumi bai wanbel na bung wantaim planti manmeri tru na ol ensel wantaim long ai bilong God bilong yumi, em i God bilong amamasim yumi na givim laip long yumi.
SAMPELA TINGTING
Taim yu tingting long dispela nupela laip i wetim yu, yu i gat laik long presim God, o nogat?
Ritim: Kamapim Tok Hait 7:9-12
Orait bihain mi lukluk gen, na mi lukim planti manmeri tru ol i bung i stap, na i no inap man i kaunim namba bilong ol. Dispela ol manmeri ol i bilong olgeta lain man na bilong olgeta kantri na bilong olgeta kain skin na bilong olgeta tok ples. Ol i sanap i stap long pes bilong sia king na long ai bilong Pikinini Sipsip. Ol i bin putim ol longpela waitpela klos, na long han bilong ol, ol i holim ol lip bilong diwai pam. — Kamapim Tok Hait 7:9
Long dispela driman, God i pulim olgeta pikinini bilong em i kam long sia king bilong God na long Pikinini Sipsip.
Taim yumi i ritim dispela tok, “planti manmeri tru,” yumi ken amamas. Jisas i bin tok, “Nau mi stap long graun, tasol bihain bai ol i litimapim mi, na long dispela taim bai mi pulim olgeta manmeri i kam long mi” (Jon 12:32). Na long dispela teks ol i kam. Bikpela bilong yumi em i no save lus tingting long ol tok bilong em; em i save inapim ol promis bilong em olgeta taim!
Ol lain bilong God i kam long kain kain kantri, maski ol dispela kantri i wok long pait wantaim na bagarapim narapela narapela. Tasol long hia, ol i wanbel olgeta, na ol i planti manmeri tru.
Ol i kam long olgeta kantri, ples, lain na tok ples. Tasol ol i wanbel na bung wantaim, maski kain kain samting i wok long mekim ol i kros pait long dispela graun. Ol i no stap tru olgeta long kantri bilong ol, long ples, lain o tok ples bilong ol. Jisas i Bikpela bilong ol, na ol i stap tru olgeta long em tasol, na ol i bihainim laik bilong em. Ol i holim wanpela bilip, em i holi na tru, na em i bilip ol disaipel bilong Krais i holim tu.
Ai bilong yumi lukim dispela driman, na em i strongim bel bilong yumi, bikos em i hat tru long stap wanbel long dispela graun. Yumi save bruk nabaut na pait long dispela graun. Sin bilong yumi i bagarapim yumi na yumi krai i stap. Tasol ol i bin putim ol longpela waitpela klos. Yumi save pundaun, tasol ol i holim ol lip bilong diwai pam long lukim King bilong ol husat i winim dispela pait.
I no olsem dispela 144,000 i narakain lain long dispela planti manmeri tru. Nogat. Ol i wokman bilong God. Long namba wan driman yumi lukim na harim na bilipim olsem God i makim lain bilong em na lukautim ol tu. Na long dispela driman yumi ken amamas tru long marimari bilong God i bikpela na strongpela tru, olsem na planti manmeri tru bai wanbel na bung wantaim. Maski wanem hevi, bagarap na kros pait i kamap, i no gat wanpela bai inap long kaunim dispela planti manmeri tru bai i singsing long marimari tru bilong God.
SAMPELA TINGTING
Yusim ol tok long lain 12 long bungim maus wantaim dispela planti manmeri tru long presim God.
Ritim: Kamapim Tok Hait 7:1-8
Em i tok olsem, “Yupela i no ken hariap long bagarapim graun na solwara na ol diwai. Mipela i laik putim mak bilong God bilong yumi long pes bilong ol wokman bilong en pastaim, na bihain yupela i ken bagarapim ol samting.” — Kamapim Tok Hait 7:3
Strongpela tok i go aut: “Wet pastaim!”
God i laik putim mak bilong em long ol wokman bilong en pastaim, na bihain ol i ken bagarapim ol samting long graun.
Dispela mak i putim ples klia olsem ol dispela lain i lain tru bilong God. God i putim mak bilong em long ol lain bilong em; em i raitim nem bilong em long ol.
Na long dispela teks, mak bilong God i go i kamap long 144,000 manmeri. God i tok, “Dispela em i bilong mi; no ken bagarapim dispela bikos em i bilong mi; em i mas stap orait bikos mi laikim em tru.” God i raitim nem bilong em long ol. Ol i kisim mak bilong God long nem bilong God Papa, Pikinini na Holi Spirit. Ol i narakain na ol i bilong God. Ol i stap long han bilong God, na i no gat wanpela samting – long wok bilong God olsem Jas tu – i ken bagarapim ol.
Dispela tok bilong sori na bel isi i go long ol lain i ritim dispela buk Kamapim Tok Hait. Ol lain i harim tok long dispela buk ol i stap lain bilong sios bilong God– ol i kisim blesing bilong God bikos ol i harim na bihainim tok bilong God (KTH 1:3). Ensel bilong God i tok olsem ol i wokman bilong God. Ol lain i kisim mak bilong God i lain tru bilong God (Israel tru), na ol i save bihainim tru dispela Pikinini Sipsip bilong God.
Dispela 144,000 i tok piksa bilong olgeta manmeri bilong God. God i save long olgeta dispela manmeri na long nem bilong ol tu. God i save tru long lain bilong em, na God i no inap larim ol i kisim bagarap long taim bilong ol bikpela hevi.
Yumi no inap sanap long strong bilong yumi yet. Salvesen bilong yumi i no samting bilong yumi yet. Tasol God i makim yumi, em i singautim yumi, em i adoptim yumi olsem pikinini bilong em yet, na han bilong em bai karim yumi i go. Aleluya!
SAMPELA TINGTING
Yu yet i bin pilim dispela “han bilong God” i karim yu long taim bilong hevi, o nogat?
Ritim: Kamapim Tok Hait 6:12-17
Na ol i singaut long olgeta maunten na ston olsem, “Yupela i mas karamapim mipela, na haitim mipela long pes bilong Man i sindaun long sia king bilong en, na bai Pikinini Sipsip i no ken kam wantaim bikpela belhat bilong en na mekim save long mipela.
— Kamapim Tok Hait 6:16 Long dispela teks yumi ritim wanpela piksa bilong bikpela de bilong belhat bilong God, na em i no
naispela piksa.
Dispela de bilong belhat bilong God em i no kam yet. Yumi stap laip yet long graun na planti ol lain i no klia olgeta olsem Jisas em i Bikpela. Sampela manmeri i givim hona na glori long Krais, tasol ol i kisim bagarap long dispela as; planti narapela i givim baksait long Jisas, na ol i kisim ol gutpela samting. Tarangu, i luk olsem Jisas em i no Bikpela.
Tasol, bikos bikpela de bilong belhat bilong God i no kam yet, de bilong marimari i stap yet. Sapos san i stap yet, na planti manmeri i stap laip yet, na ol sios long graun i wok long opim dua bilong ol long wan wan Sande, yu stap yet long de bilong marimari bilong God. Han bilong God i go aut yet long olgeta manmeri, na God i singaut yet, “Kam long mi.”
Tasol, wanpela de, Pikinini Sipsip tu bai tok, “Em inap.” Belhat bilong God em i holi, na wanpela de dispela Man i sindaun long Sia king bai no inap pasim belhat bilong em. Graun bai guria, sta bilong skai bai pundaun long graun, skai bai i go pinis, na mun bai kamap olsem blut.
Na long dispela taim, olgeta manmeri bai i ran i go olsem ol animal i pret tru. Olsem ol anis ol bai i wok long hait long kain kain liklik hul. Em i de bilong bikpela belhat bilong Pikinini Sipsip.
Taim yumi tok, “belhat bilong Pikinini Sipsip,” nogut yumi i paul - ol pikinini sipsip i no animal bilong belhat. Tasol yumi mas klia – dispela Pikinini Sipsip em i dispela Laion bilong Juda tu. Sampela taim ol lain bilong sios tu i save lus tingting bilong belhat na pasin holi bilong God – em i God bilong stretpela laikim tru, tasol Em i gat bikpela belhat tu.
Tude marimari bilong God i wok yet long skulim yumi long belhat bilong God. Na yumi mas pret long dispela belhat bilong God na tanim bel na bilip long em.
Yumi mas sori long ol lain i no pret long belhat bilong God.
SAMPELA TINGTING
Yu bilip olsem God em i God bilong belhat tu, o nogat?
Ritim: Kamapim Tok Hait 6:1-8
Ol dispela tewel i singaut strong olsem, “Bikpela King bilong olgeta samting, yu save mekim gutpela na stretpela pasin oltaim. Yu stap holi, na pasin bilong yu em i tru olgeta. Hamas taim bai mipela i wet, na bai yu mekim kot long ol manmeri i stap long graun, na yu bekim blut bilong mipela long ol? — Kamapim Tok Hait 6:10
Dispela driman i stori long wanem samting i stap aninit long alta. Ol tewel bilong ol lain i dai pinis i stap long alta, na ol i dai bikos ol i autim tok bilong God. I olsem ol yet i kamap ofa bilong God.
Ol i dai bikos “ol dispela manmeri i bin holim strong tok bilong God, na ol i autim dispela tok na ol birua i kilim ol i dai.” Yumi save long sampela nem bilong ol, bikos yumi ken ritim nem bilong ol long sampela histori buk. Tasol God yet i save long olgeta nem bilong ol – na blut bilong ol tu – olgeta bilong ol, maski ol narapela i no save long ol. Na dispela olgeta manmeri i save olsem em i mobeta long aninit long God na no ken wari long ol samting long dispela graun. Sampela narapela i lusim olgeta samting bilong ol bikos ol i les long bihainim tingting bilong man na ol i les long sakim tok bilong God.
Bikpela krai bilong ol dispela lain i no samting long pen long bodi bilong ol o long hevi bilong ol. Nogat, bikpela krai tru bilong ol i kamap long dispela tok: “Bikpela King bilong olgeta samting, yu save mekim gutpela na stretpela pasin oltaim. Yu stap holi, na pasin bilong yu em i tru olgeta. Hamas taim bai mipela i wet, na bai yu mekim kot long ol manmeri i stap long graun, na yu bekim blut bilong mipela long ol?”
Olgeta samting insait long dispela krai i wok long krai long dispela God bilong inapim ol promis bilong em. God em i Bikpela King bilong olgeta samting, olsem na em inap long mekim olgeta samting – olsem na, bilong wanem em i no mekim kot nau? God em i holi na stretpela na les olgeta long sin, na em i save bihainim ol promis bilong em yet – olsem na yumi gat gutpela helpim tru long taim yumi i stap laip na long taim bilong i dai.
Taim yumi bilip tru long Jisas olsem Bikpela bilong yumi, na yumi stap aninit long em, em i hat tru taim i luk olsem Bikpela i no i stap. Planti lain i tok olsem Bikpela i no i stap. Ol i kilim ol lain i stap tru long God, ol i bagarapim ol na i luk olsem i no gat wanpela bilong mekim save long ol. Sin na Satan i wok long bosim planti lain yet. I luk olsem dispela samting nogut i no inap pinis, maski Jisas i kisim glori bilong em longpela taim i go pinis.
Hamas taim, Bikpela? Hamas taim bai glori bilong yu i stap yet long ples hait? Hamas taim bai blut bilong ol wokboi bilong yu i kapsait yet na ol i dai? Harim ol krai bilong ol tewel i stap long alta. Opim ol dua bilong Heven. Kam long helpim mipela. Larim ol pikinini bilong yu husat skin bilong ol i les tru, i lukim glori bilong Bikpela bilong ol, na amamas tru.
SAMPELA TINGTING
Yu save tok wanem long Bikpela taim yu wetim em i stap?
Ritim: Kamapim Tok Hait 6:1-8
... Ol i givim strong long tupela long tilim olgeta manmeri long 4-pela lain na long kilim i dai wanpela bilong ol dispela lain. Tupela bai i kilim ol manmeri i dai long bainat, na tupela bai i mekim taim bilong bikpela hangre i kamap na kilim ol i dai, na tupela bai i mekim ol bikpela sik i kamap na kilim ol i dai, na tupela bai i salim ol wel abus bilong graun i go kilim ol i dai.
—Kamapim Tok Hait 6:8 Pikinini Sipsip bilong God i rausim olgeta gris kandel i pasim dispela buk. Dispela i min olsem, nau
Jisas i wok long inapim plen bilong God long dispela graun.
Taim em i rausim namba wan i go foa long dispela ol gris kandel i pasim buk, sampela hos i lus. Dispela ol hos i wok long bagarapim dispela graun long bikpela bel hat stret. Sampela lain i tok olsem, dispela man long namba wan hos em i piksa bilong Krais o long gutnius, bikos em i waitpela na em i luk wankain olsem dispela man long wanpela hos long Kamapim Tok Hait 19:11. Tasol taim yumi ritim stori long dispela 4-pela man i sindaun long ol hos, yumi ken tingim ol karis na man i sindaun long hos Sekaraia i lukim long Sekaraia 6. Long dispela driman bilong Sekaraia ol dispela man i olsem soldia bilong God taim em i laik mekim wok olsem jas long dispela graun. Sapos dispela ol 4-pela hos i kain olsem ol hos na karis long Sekaraia, i min olsem dispela waitpela hos long Kamapim Tok Hait 6 em i no piksa bilong gutnius. Taim Kamapim Tok Hait i tok long wanpela waitpela hos dispela kala i no gat bikpela mining bilong em - em i kala bilong em tasol.
Dispela ol hos i raun nabaut long graun na i belhat tru i olsem ol bikpela pait na taim bilong hangre na taim planti bagarap i save kamap long dispela graun. Planti ol man na meri i save guria long dispela, taim ol i harim ol dispela hos i ran nabaut, na sampela i bin pilim stret dispela bikpela belhat bilong ol dispela wel hos.
Yumi i no inap pasim na banisim ol bikpela pait. Taim bilong hangre i bin kamap planti taim long dispela graun, na em bai i kamap yet. Ol dispela man i sindaun long dispela 4-pela hos na mekim planti samting nogut long dispela graun, ol i bagarapim planti lain na ol i dai.
Tasol long hia, long Kamapim Tok Hait, yumi lukim narapela samting: Krais yet i bosim olgeta dispela samting i wok long kamap. I no min olsem em i as bilong olgeta samting nogut long dispela graun, na i no min olsem yumi ken pait na mekim nogut long ol narapela. Tasol em i samting bilong strongim yumi. Long taim bilong pen na hevi na pret, yumi ken klia tru olsem dispela Pikinini Sipsip i stap, na moa yet, em i bosim olgeta samting. Em yet i rausim olgeta gris kandel na opim buk.
Yumi mas bilip olsem Jisas i gat pawa na strong bilong bosim olgeta belhat na pawa bilong olgeta samting nogut.
SAMPELA TINGTING
Taim yu lukim ol samting nogut i wok long kamap long kantri bilong yu, yu yet i bilip olsem Krais i bosim olgeta samting long dispela graun?
Ritim: Kamapim Tok Hait 5:11-14
Na mi harim toktok bilong olgeta kain samting God i bin wokim, em ol samting i stap long heven na i stap long graun na i stap aninit long graun na i stap long solwara. Yes, olgeta samting i stap long olgeta hap, mi harim ol i tok olsem,“Dispela Man i save sindaun long sia king bilong en, na Pikinini Sipsip tu, tupela i ken kisim olgeta tenkyu na biknem na amamas na strong, inap oltaim oltaim. —Kamapim Tok Hait 5:13
Dispela tok Lotuim God, i min olsem yumi mas givim em olgeta samting em inap tru long kisim.
Dispela pasin bilong lotu i save mekim olgeta samting God yet i wokim i bung na wanbel. Bel bilong olgeta manmeri i lotu wantaim bai amamas na bel gut, na ol bai i raunim sia king bilong God. Laip em i samting bilong lotuim God na yumi mas presim em taim yumi i stap laip.
Taim yumi bihainim ol stretpela pasin bilong lotu, bai yumi stap fri olgeta.
Bai yumi go insait long wanpela tok piksa, long kliaim dispela tok bilong kamap fri long lotu: Sapos yu go insait long wanpela stedium na yu lukim wanpela bikpela gem stret long futbol o rugbi. Tasol long dispela taim yu no lukluk long dispela gem ol i pilai i stap. Nogat, yu lukluk long ol manmeri i stap long dispela stadium. Maski ol i no poro bilong narapela narapela, na maski ol i no save long ol narapela narapela, long dispela stedium ol bai i bungim bel na bungim maus na saportim tim bilong ol yet! Ol i no tingting long wari bilong ol yet long dispela taim; nogat – ol i tingim dispela gem tasol. Na liklik taim ol i stap fri long ol narapela samting long dispela graun.
Na em i wankain long yumi long taim yumi lotu. Olgeta samting long dispela graun i mas presim God. Na olgeta samting bai i stap fri taim bel bilong ol i bung na ol i raunim sia king bilong God na lotu long Em.
Long tude, yumi inap lukim sampela samting long dispela fridem na pasin bilong bung wantaim long lotu. Taim yumi presim God long prea bilong yumi, bai yumi stap fri. Taim yumi prea i stap na wok long litimapim nem bilong God, bai yumi lus tingting liklik long ol wari long mani, haus, sik, hevi na sin.
Long dispela taim bai yumi no gat nid long askim God long sampela samting; nogat, yumi givim pres long God tasol – na yumi bai klia olsem God i wokim yumi long lotuim em. Na yumi bai klia olsem God na Pikinini Sipsip inap tru long kisim olgeta pres. Na bel bilong yumi olgeta bai bung wantaim.
SAMPELA TINGTING
Yusim Kamapim Tok Hait siapta 5, lain 12, long lotuim God na tingim dispela bikpela lain i raunim sia king bilong God. Wanbel wantaim ol na lotuim God!
Ritim: Kamapim Tok Hait 5:6-10
Na mi lukim wanpela Pikinini Sipsip i sanap i stap. Em i luk olsem ol i bin kilim em i dai...
—Kamapim Tok Hait 5:6
Jon i tanim na i lukluk long dispela Man inap tru long opim dispela buk i pas. Hetman i bin tok olsem em i wanpela Laion i bin kamap long lain Juda, tasol taim Jon i lukluk, i luk olsem wanpela Pikinini Sipsip.
Em i gutnius tru bilong God: taim ol Israel i wok long painim wanpela strongpela laion bilong kam na bagarapim ol birua bilong em, God i salim wanpela Pikinini Sipsip bilong rausim sin! Taim lain Israel i laik lukim wanpela i kam na kilim i dai ol birua bilong em, orait dispela laion i kamap olsem Pikinini Sipsip, na ol i kilim em yet i dia.
Dispela gutnius i narakain samting stret, na em i hat tru long kisim, olsem na planti ol i les long kisim. Na long dispela as ol lain Israel i givim baksait long King bilong ol, na planti lain bilong tude i les long kisim dispela Saviour tu. Taim yumi lukim dispela Pikinini Sipsip, i luk olsem ol i bin kilim em i dai, i olsem yumi lukim belhat bilong God, na i no gat wanpela i ken hait long em. Sin i doti tru na yumi nidim blut bilong Jisas Krais long kisim bek yumi.
Taim Jon i lukim dispela Man inap long opim dispela buk, em i lukim marimari bilong God; em i lukim Jisas! Dispela Laion husat i kamap olsem Pikinini Sipsip, em i wok long inapim plen bilong God long dispela graun.
Dispela Pikinini Sipsip i sanap i stap namel long sia king na dispela 4-pela samting i stap laip. I min olsem pawa bilong em i bikpela tru na i no gat pinis bilong em. Tasol em i gat bikpela laikim tru wantaim. Dispela Laion em i wanpela Pikinini Sipsip. Na em i bosim olgeta samting long dispela graun.
Pawa na laikim tru bilong Jisas i winim pinis – na em bai i winim yet – olgeta pait bilong God.
Dispela tok i kam long sia king bilong God i olsem Jisas em i Man bilong Kisim Bek yumi! Em i kisim bek yumi ol lain bilong mekim sin, na moa, em i stiaim olgeta samting long dispela graun i kamap long mak bilong em, long dispela laip bilong oltaim oltaim. Em tasol inap kisim na opim dispela buk.
Olsem na, olgeta lain i kisim salvesen pinis long blut bilong em i ken mekim dispela tok, “Pikinini Sipsip em Inap!”
SAMPELA TINGTING
Yu ting olsem sampela lain tude bai i les long dispela tok “Pikinini Sipsip bilong God,” o nogat? Bilong wanem?
Ritim: Kamapim Tok Hait 5:1-5
Mi lukim olsem i no gat wanpela man em inap long opim dispela buk na lukluk insait long en, na mi krai planti. —Kamapim Tok Hait 5:4
Planti man i wok long kisim save long as bilong olgeta samting i bin kamap long dispela graun. Na tu planti i wok long kisim save long wanem samting bai i kamap bihain. Tasol ol i no inap, bikos buk bilong dispela samting em i pas pinis.
I olsem yumi stap long wanpela sip long biksi. Na yumi no klia long wanem hap yumi bai i go i kamap long em, bikos dispela save i stap long wanpela buk i pas tru. Long san na long nait yumi stap long dispela biksi, na wara i kam i go. I no gat man inap opim dispela buk i pas. Olsem na yumi stap yet long sip, na yumi lukim biksi i go i go i go, na yumi no klia bai yumi kamap long wanem hap.
“Mi lukim olsem i no gat wanpela man em inap long opim dispela buk na lukluk insait long en, na mi krai planti.” Planti taim yumi klia olsem i no gat wanpela i save long rot bilong yumi yet.
Em i no wanpela ensel i tokim Jon long pinisim krai bilong em; nogat, em i wanpela hetman. Dispela hetman i olsem piksa long sios bilong God. Ol dispela hetman i klia long ol krai bilong man na long hevi bilong sios, na ol i klia long wok bilong God long dispela graun, bikos ol i save long Krais.
Yumi no ken ting olsem yumi klia tru long plen bilong God long dispela graun. Planti lain i wok long tok olsem ol i save long plen bilong God, na ol i klia long as bilong olgeta samting i wok long kamap. Tasol yumi no ken larim ol i paulim yumi. Ol i wok long paulim ol lain bilong God.
Ol bilip lain bilong God, ol i no save long as bilong olgeta samting i wok long kamap, na ol i no inap bekim olgeta askim. Tasol ol inap tok, “No ken krai. Jisas Krais bai wok long inapim plen bilong God.” Na dispela em inap.
SAMPELA TINGTING
Dispela tok “Jisas Krais bai wok long inapim plen bilong God,” inap helpim yu olsem wanem?
Ritim: Kamapim Tok Hait 4:6-11
Dispela 4-pela samting i stap laip ... Na long san na long nait ... Ol i no save malolo long mekim dispela tok. — Kamapim Tok Hait 4:8
Jon i no inap lukim ai bilong God. Em i lukim bikpela i lait i raunim sia king bilong God – na wanpela renbo i raunim sia king.
Tingim – wanpela renbo! Yu tingim Noa, a? Dispela piksa long sia king bilong God i gat bikpela stori bilong en. God i king bilong dispela graun. Em i Jas, na em i kotim ol sin, wankain olsem em i kotim ol lain long taim bilong Noa na salim wanpela bikpela tait i kam bagarapim ol. Tasol em i gat marimari tu, na renbo em i mak bilong marimari na promis bilong em.
I gat 24 sia i raunim dispela sia king – 12pela long olgeta manmeri bilong olpela kontrak, na 12pela long olgeta manmeri bilong nupela kontrak. Dispela sios bilong olgeta taim i wok wantaim Bikpela bilong em long bosim olgeta samting.
Na dispela 4-pela samting i stap laip. Dispela tok “i stap laip” i min olgeta samting i gat laip, olgeta samting God yet i kamapim na i stap gutpela na naispela olgeta long stat bilong dispela graun.
Na olgeta samting God i wokim i singsing i stap.
Yumi no save harim dispela naispela singsing. I luk olsem olgeta samting i gat laip i no save wanbel wantaim yumi. Planti pisin i save singsing maski yumi i krai. Ol naispela plaua i save kamap long hap we yumi planim ol daiman. Na planti taim i luk olsem olgeta samting long dispela graun i wok long bagarapim yumi – tingim ol tait, bikpela solwara, na san i hat tumas.
Tasol ol dispela samting God i wokim i singsing. Ol i singim ol song long God, em i wokim ol! Harim! Ol i singsing. Bai yumi i singsing wantaim?
Bikpela, yu mas opim ai bilong mipela na dua long mipela olsem mipela inap lukim sia king bilong yu na save olsem yu yet yu stap, olsem God i kamapim dispela graun na kisim bek mipela tu. Opim yau bilong mipela na bel bilong mipela tu. Isi isi yu ken lainim mipela long singsing wantaim olgeta samting yu yet i wokim, bilong litimapim nem bilong yu na lotuim yu.
Taim yumi i lukim sia king bilong God, orait bai yumi harim dispela singsing.
SAMPELA TINGTING
Singim song bilong yu yet long presim God, o yusim tok bilong dispela 4-pela samting i stap laip, bilong lotuim God.
Ritim: Kamapim Tok Hait 4:1-5
Bihain mi lukluk gen na long heven mi lukim wanpela dua i op i stap. ... na long heven mi lukim wanpela sia king i stap, na wanpela Man i sindaun i stap long dispela sia.
— Kamapim Tok Hait 4:1-2 Wanpela narakain samting olgeta long dispela buk, Kamapim Tok Hait, i olsem dispela buk i no save
kolim nem bilong “God.” Nogat. Dispela buk i save tok “Man i sindaun i stap long sia king.”
Dispela tok i gat as bilong en. Em i no nupela tok. Long Olpela Testamen, long Buk Song, planti taim ol i stori long God olsem Man i sindaun long sia king na bosim yumi. Buk Song 97 i tok, “Bikpela i stap king. Graun, yu mas amamas.” Na Buk Song 99 i tok, “Bikpela i stap king. Ol manmeri i save pret na guria.” Na Kamapim Tok Hait i stori long as bilong dispela amamas na guria. Tasol dispela siapta long Kamapim Tok Hait i lukluk long wanpela dua i op i stap na i lukluk long sia king bilong God.
God i sindaun i stap long dispela sia king long heven, dispela sia king i stap antap tru long dispela graun. Antap long olgeta pait, taim bilong drai, taim bilong ol samting nogut, pret bilong man na krai bilong ol pikinini, yumi lukim wanpela sia king. Na dispela Man i sindaun i stap long dispela sia king, em i lukim olgeta pait, na em i harim olgeta krai.
Long tude yumi inap lukim planti samting i kamap nabaut nabaut long dispela graun long fon bilong yumi o long niuspepa. Tasol, planti taim, taim yumi lukim ol nius samting, bai yumi lukim ol hevi na bagarap tasol. Na sampela taim yumi bai paul olgeta na ting olsem dispela graun em i longlong olgeta.
Em tru, planti samting long nius i soim olsem planti lain long dispela graun i paul na i longlong pinis. Tasol wanpela dua i stap op. Lukim! Wanpela sia king i stap, na wanpela Man i sindaun i stap long dispela sia king. God yet i bosim dispela graun long sia king bilong em!
SAMPELA TINGTING
Dispela stori i helpim yu long laip bilong yu olsem wanem?
Ritim: Kamapim Tok Hait 1:17-20
Yu no ken pret. Mi man i stap namba wan tru na i stap bihain tru. Na mi man bilong i stap laip. Bipo mi dai pinis, tasol lukim, nau mi stap laip oltaim oltaim. Na mi holim ol ki bilong Dai na bilong Ples bilong ol man i dai pinis. — Kamapim Tok Hait 1:17-18
God i givim yumi save bilong tingim wanem samting i bin kamap bipo. Yumi inap tingim planti samting, wantu.
Tasol dispela God i givim yumi dispela save long tingim wanem samting i bin kamap bipo, em i no givim yumi save long wanem samting bai i kamap bihain. God em i mekim olsem long apim save bilong em, na em i gutpela long helpim yumi tu.
Yumi no ken longlong na traim long painimaut wanem samting God i pasim yumi long save long em. Planti lain long bipo wantaim planti lain long tude tu, ol i wok long painimaut wanem samting bai i kamap bihain taim ol i lukim wanpela han o ol sta, o taim ol i go long wanpela glasman. Ating God i bel hevi na sori wantaim taim planti million manmeri samting i wok long mekim olsem.
God i laik sapos yumi i wokabaut long bilip long dispela graun. Na Kamapim Tok Hait i no brukim dispela lo bilong God. God i no givim yumi dispela buk bilong soim yumi wanem ol samting bai i kamap bihain, maski sampela i ting dispela buk i mekim olsem. God yet i kam long yumi long dispela buk.
Taim yumi ukim pinis Bikpela bilong yumi long ai bilong Jon, bai yumi inap harim Tok bilong Bikpela bilong givim bel isi long yumi, dispela tok Jon yet i raitim.
“Yu no ken pret,” Krais i tok, “Yu no save wanem samting bai kamap. Yu ting olsem yu bai dai. Tasol no ken pret. Mi save long yu, na yu ken save long mi. Mi winim dai pinis. Bilipim mi. Taim yu dai no ken pret; bilipim mi olgeta. Dai i no pinis bilong yu. Mi yet mi pinis bilong yu.”
Taim sios bilong God i kisim dispela tok, em i singaut long Man i stap namba wan tru na i stap bihain tru: Mipela i save mipela i kam long we; na mipela i save mipela bai i go long we. Mipela i save olgeta samting i kam long we, na olgeta samting i wok long go long we. “God yet i mekim kamap olgeta samting, na em i as bilong olgeta samting. Na olgeta samting i bilong em wanpela tasol. Yumi mas litimapim nem bilong em oltaim oltaim. I tru” (Rom 11:36).
SAMPELA TINGTING
Jisas i winim dai. Dispela i givim bel isi long yu olsem wanem?
Ritim: Kamapim Tok Hait 1:8-16
Na mi lukim wanpela man ... Het wantaim gras bilong en i waitpela tru, olsem gras bilong sipsip, na olsem waitpela klaut. Na ai bilong en i lait olsem paia i lait strong moa. Lek bilong en i lait tru, olsem bras ol i bin kukim long bikpela paia. Na mi harim nek bilong en i pairap olsem bikpela wara i pairap. ..Na wanpela bainat i gat tupela sap na i sap tru, em i kam ausait long maus bilong en. Na pes bilong en i lait tumas, olsem san i lait strong moa.
—Kamapim Tok Hait 1:13-16
Bipo long taim God i soim yumi wanem samting i mas kamap kwiktaim, yumi inap lukim Jisas, em bai i mekim ol dispela samting i kamap. Em i stap wantaim God, na em i gat glori bilong God tu.
Tasol em i Jisas bilong yumi. Em i kamap long dispela graun olsem bebi na em i karim pen, na em i dai. Wanpela taim em i bin sanap long ai bilong Pailat – em i pen, na pes bilong em i pulap long blut, na strong bilong em i laik pinis – na dispela Pailat i tok, “Lukim. Em hia dispela man” (John 19:5). Pailat i ting olsem ol manmeri bai klia olsem Jisas em i man, na em i no mekim pasin nogut. Tasol long dispela de – Gut Fraide – ol i les long sori long Jisas, na ol i nilim em long diwai kros.
Tasol nau, yumi lukim em olsem King! Pes bilong en i lait tumas, olsem san i lait strong moa, na ol poro bilong em wantaim ol birua bilong em bai i pret long lukluk long em. Tok bilong em, i olsem wanpela bainat i gat tupela sap na em bai i hapim dispela graun, em i kam ausait long maus bilong en. Na lek bilong em – yumi no ken lus tingting long lek bilong em bikos ol wokboi bilong king i save brukim skru long lek bilong king. Olgeta nesen na kantri long dispela graun bai brukim skru long lek bilong Jisas Krais. Na lek bilong em i lait tru olsem bras ol i bin kukim long bikpela paia. Em i sanap, em i fri, na em i gat pawa – em i brata na God bilong yumi.
Na long bung bilong ol, ol wokboi bilong God, ol lain bilong bihainim Jisas, i harim dispela man taim em i ritim ol tok long dispela buk. Taim ol i harim ol dispela tok, na taim ai bilong spirit bilong ol i lukim glori bilong dispela King, nek bilong ol bai i guria, na ol i amamas nogut tru: “Ol lain i ritim dispela tok na ol lain i harim dispela tok, ol i ken amamas.”
Na taim dispela bung i pinis, olgeta wokboi bilong God i ken karim dispela tok i go nabaut long dispela graun: King bilong yu i stap hia! Yupela kam na bung long harim dispela tok long dispela buk! Kam na harim wantaim mipela! Jisas i stap long heven, na em i King!
SAMPELA TINGTING
Tingting gut long dispela piksa bilong King bilong yu, Jisas, na brukim skru na lotuim em.
Ritim: Kamapim Tok Hait 22:6-16
God, Bikpela, em i save kirapim spirit bilong ol profet bilong autim tok bilong en, em i bin salim ensel bilong en i kam bilong soim olgeta wokman bilong en long olgeta samting i mas kamap kwiktaim. Na harim. Jisas i tok, ‘Bai mi kam long yupela kwiktaim.’ Ol manmeri i bihainim ol dispela tok profet i stap long dispela buk, ol i ken amamas.
— Kamapim Tok Hait 22:6-7
Stat na pinis bilong Kamapim Tok Hait i wankain. Taim yumi ritim stat na pinis bilong dispela buk, yumi ken klia tru long as bilong ol dispela tok. Yumi bai klia husat i salim dispela toksave na yumi bai klia husat i kisim ol dispela tok tu. Bikpela God i salim dispela tok – dispela wankain God i bin autim tok long maus bilong ol profet long Olpela Testamen. Em i raitim dispela tok long olgeta manmeri husait em i toktok long ol, long stat bilong dispela buk – ol lain bilong nupela kontrak i bung wantaim. Na em i tok olsem ol dispela manmeri i wokboi bilong God. Na as bilong dispela buk i bilong soim sios bilong God olgeta samting i mas kamap kwiktaim.
Na blesing bilong God i kamap ples klia gen: “Ol manmeri i bihainim ol dispela tok profet i stap long dispela buk, ol i ken amamas.” Dispela blesing i go long ol lain i bilipim tok long dispela buk, na i bihainim tok bilong Jisas Krais. Ol dispela lain tasol i ken kisim dispela save long olgeta samting i mas kamap kwiktaim.
Olgeta dispela samting i mas kamap kwiktaim. As bilong dispela tok “mas” i wankain olsem as bilong namba wan taim Krais i kam long dispela graun. Jisas i bin tok, “mi mas go long Jerusalem,” na, “mi mas karim pen na dai na kirap bek.” Na wankain olsem, “olgeta samting i mas kamap kwiktaim.”
I mas kamap bikos Krais i dai, na em i mas pinisim dispela wok bilong em. Nogut sampela i lap long God na daunim em bikos em i no pinisim wok bilong em. Em i mas kamap bikos God bai i bekim olgeta prea bilong ol wokboi bilong em. Em i mas kamap bikos God em i God. Olsem na larim graun i guria long ol dispela samting bai i kamap nau.
Tasol ol lain i harim na bihainim tok bilong God, ol i ken amamas!
SAMPELA TINGTING
Dispela samting i mas kamap kwiktaim, em i wanem samting?
Olgeta Samting i Mas Kamap Kwiktaim
Ritim: Kamapim Tok Hait 1:1-17
Dispela tok em i tok profet i kam long God, na man i ritim dispela tok long ol arapela, em i ken amamas. Na ol manmeri i harim dispela tok na ol manmeri i bihainim dispela tok bilong God mi bin raitim, ol tu i ken amamas, long wanem, taim i laik kamap nau, na ol dispela samting God i tok pinis long mekim, em bai i mekim. —Kamapim Tok Hait 1:3
God tasol i gat pawa bilong givim blesing long wanpela samting o long tok nogutim em. Olgeta samting long dispela graun i nidim blesing bilong God na i pret long tok nogut bilong em. Long dispela teks yumi ritim wanpela naispela blesing stret i kam long God.
Na dispela blesing i go long ol lain i bihainim Krais, taim ol i bung wantaim ol narapela lain bilong bilip insait long sios. Wanpela man i sanap na ritim dispela “Kamapim Tok Hait” long wanpela pepa ol i bin raunim na pasim. Ol narapela i sindaun na i harim. Em i klostu long pinis bilong de – na pinis bilong dispela graun.
Sios bilong God i bung na raunim wanpela buk – Kamapim Tok Hait bilong God. Na God i tok olsem ol lain i stap long dispela sios ol i ken amamas. God i blesim ol pinis. Olgeta lain i ritim dispela tok i ken amamas bikos ol inap ritim. Na ol lain i harim, ol tu i ken amamas, bikos ol inap harim. “Na ol manmeri i harim dispela tok na ol manmeri bihainim dispela tok bilong God, ol tu i ken amamas.” Tok bilong God i stap insait long manmeri bilong God; pasin bilong ol i bihainim wanem samting ol i harim.
Sampela lain i bin tok – na ol i tok yet – olsem yumi mas ritim olgeta buk long Buk Baibel, tasol nogat dispela las buk. Na dispela i bikos planti lain i paul tru long olgeta driman na narakain tok tru insait long Kamapim Tok Hait.
Tasol “taim i laik kamap nau.” Olsem na yumi mas ritim ol dispela tok, na yumi ken amamas taim yumi mekim olsem, bikos yumi bai kisim blesing bilong God. Man i ritim, em i ken amamas, na man i harim na bihainim, em i ken amamas. God bai i blesim em. Dispela tok profet bai putim ples klia wanem samting bai i kamap klostu nau.
Ol lain i ritim dispela i ken amamas. Blesing bilong God bai i kam long yu.
SAMPELA TINGTING
Long dispela mun bai yumi ritim na tingting long planti tok long Kamapim Tok Hait. Tok tenkyu long God long dispela buk, na askim em long blesim yu taim yu ritim dispela buk.
Ritim: Kamapim Tok Hait 22:6-13
...orait mi brukim skru klostu long lek bilong ensel i bin soim ol dispela samting long mi, na mi laik lotu long em. Tasol em i tokim mi, “Yu no ken mekim olsem! Mi tu mi wanwok bilong yu wantaim ol brata bilong yu, em ol profet. Na mi wanwok bilong olgeta man i save bihainim tok bilong dispela buk. Yu mas lotu long God wanpela tasol.”
—Kamapim Tok Hait 22:8-9
Ol ensel i winim yumi bikos ol i save bihainim stret laik bilong God olgeta taim. Jisas i skulim yumi long prea olsem: Mipela mas bihainim laik bilong yu long graun olsem ol i save bihainim long heven.
Tasol ol ensel i no winim yumi tu. Save bilong yumi long God i winim save long ol ensel: Ol ensel i save long glori bilong sia king bilong em, tasol yumi save long mining bilong diwai kros bilong em.
Sapos i gat wanpela pikinini i sik tru, ating dispela pikinini bai lukim bikpela sori na laikim tru bilong papamama bilong em. Na ating wanpela pikinini i no gat sik i no inap lukim dispela kain sori long papamama bilong em. Olsem tasol yumi lukim na pilim bikpela laikim tru i kam long bel bilong Papa bilong yumi long heven, na ol ensel i no bin lukim dispela kain laikim tru.
Ol ensel i save wanbel wantaim Papa bilong yumi taim em i sori tru long ol pikinini bilong em i lus. Maski ol i no inap save tru long bikpela wok bilong God long kisim bek yumi, na long pen na hevi God em i kisim long stiaim yumi, ol ensel i save tingting long yumi na wari long yumi. Taim God i kamapim yumi, ol ensel i bungim maus na singsing. Na taim God i painim pinis wanpela pikinini i lus, ol ensel i amamas tru na singsing.
Jisas Krais i kam pinis, na yumi i mas prea olsem: “Mipela i mas bihainim laik bilong yu long graun olsem ol i bihainim long heven.” Na God i givim ol wok long mekim. God i save salim ol i go bilong helpim ol man em i laik kisim bek ol (Hibru 1:14). Sapos yumi i bihainim laik bilong God long graun, planti manmeri bai wok long bagarapim yumi, tasol ol ensel bai helpim yumi. God i tokim ol long mekim olsem. Ol ensel i helpim pikinini bilong God, Jisas Krais, taim em i bin stap long dispela graun.
Ol ensel i wanbel long yumi long pasin bilong bihainim Bikpela na long pasin bilong lotu. Long Kamapim Tok Hait, John i brukim skru long wanpela ensel. Tasol dispela ensel i tokim em long no ken mekim olsem bikos ol ensel tu i mas brukim skru long God. Namba wan samting stret long dispela graun em i pasin bilong lotu. Long taim bilong lotu, yumi olgeta – ol ensel wantaim – i brukim skru long sia king bilong God.
SAMPELA TINGTING
Litimapim nem bilong God bikos wanpela de yumi bai brukim skru long Bikpela – na ol ensel bai brukim skru wantaim yumi.
Ritim: Rom 7:7-20
Yupela i no ken mangalim haus bilong narapela man. Na yupela i no ken aigris long meri bilong narapela man...o olgeta arapela samting bilong en tu. —Kisim Bek 20:17
Dispela laspela lo bilong dispela Tenpela Lo em i laik toktok long bel bilong yumi. Nupela Testamen i putim dispela ples klia, taim em i stori long dispela lo.
Long dispela lo God i tambuim dispela as bilong olgeta narapela sin – em i dispela laik nogut i stap insait long bel bilong yumi olgeta wan wan. Bel bilong yumi em i as bilong ol sin bilong yumi. Bel nogut bilong yumi olgeta em i as bilong olgeta pasin nogut i stap long dispela graun.
Planti ol save man long dispela graun i tok olsem olgeta laik i stap long bel bilong yumi i save kamapim olgeta pasin bilong yumi. Buk Baibel i tok olsem tu. Na taim yumi i bihainim ol laik nogut bilong yumi yet, orait bai pasin bilong yumi i kamap nogut tru. Tasol God i givim yumi wanpela rot bilong stretim dispela hevi long laip bilong yumi wan wan. Taim yumi lukluk long ol narapela manmeri tasol, bai yumi i mangal na aigris na bai yumi i no amamas long wanem samting yumi kisim pinis. Bai yumi gat laik long kisim sampela moa samting, tasol em bai i no inap tu. Bel bilong yumi bai i no inap i stap isi inap long taim yumi kisim bel isi tru long God.
I no olsem yumi mas pasim olgeta laik bilong yumi. Nogat. Tasol taim bel bilong yumi i hangre, yumi mas tanim i go long God, bikos em yet bai inapim bikpela laik long bel bilong yumi. Em tasol inap long inapim laik tru bilong yumi. Na taim God i pulapim yumi long laikim tru bilong em, dispela bai inap tru long yumi. Bai yumi i bel isi tru na bai laik bilong yumi bai i kamap gutpela na stretpela laik tru.
SAMPELA TINGTING
Bel bilong yu i save stap isi tru, o nogat? Ritim tok bilong Pol long Filipai 1:11-13 long helpim bel bilong yu i stap isi.
Ritim: Jems 3:1-12
Yupela i no ken giaman na kotim nating ol arapela manmeri. —Kisim Bek 20:16
Yumi no ken kilim i dai ol arapela manmeri, yumi no ken mekim pasin pamuk, na yumi no ken stil. Tasol yumi inap bagarapim ol wantok bilong yumi long toktok bilong yumi tu. Olsem God i tok, “Yupela i no ken giaman na kotim nating ol arapela manmeri.”
Dispela lo i stori long pasin bilong kotim ol narapela. Sapos yu sanap long kot na yu giaman, orait nogut bai wanpela man i kisim pe nogut long wanpela samting em i no mekim. Sapos yu stap long kot na wanpela jas i askim yu, “Yu lukim dispela man i stilim dispela ka long ai bilong yu yet, o nogat?” Na sapos yu tok, “Yes, mi lukim em i stilim dispela ka,” tasol yu giaman bikos yu no lukim long ai bilong yu yet, ating jas bai putim dispela man long kalabus. Olsem tasol yumi no ken giaman long taim bilong kot bikos nogut yumi bagarapim wanpela man i no gat asua.
Tasol dispela lo i stori long planti moa samting yet. Em i tokim yumi long no ken giaman; yumi mas laikim tru olgeta samting em i tru tasol, na yumi mas tok tru olgeta taim.
Wanpela kantri bai sanap strong sapos ol man na meri bilong kantri i save tok tru tasol. Tasol planti taim ol man i tok “yes” long mekim sampela samting em bai i no laik mekim. Na sampela taim wanpela man o meri bai tok, “Mi no save,” taim em i save tasol em i les long tokim narapela. Hau bai yumi bilipim tok bilong narapela man o meri? Em i hat tru long lukim wanpela man o wanpela meri i autim tok tru na tok tru tasol.
Na Buk Babel i tok olsem Satan em i papa bilong pasin giaman. Na em i gat planti pikinini bilong em long dispela graun long tude.
Olsem tasol Jems i tok, “Maus em i liklik hap tasol long bodi, tasol em i save humbak moa yet na litimapim nem bilong em yet.” Tok nogut i save bagarapim man, na hevi bilong dispela i winim hevi bilong ol naip na ol gan. Yumi mas lainim pasin bilong tok tru long laikim tru, na yumi mas amamas long tok tru tasol. Na yumi mas was gut long toktok bilong yumi, na skelim gut toktok bilong yumi tu. Em i hat tru, tasol yumi mas wok strong bilong bosim gut yumi yet.
Yumi nidim Holi Spirit i kam bosim yumi, na em bai stiaim yumi long laikim tru ol arapela no tok stret tasol long ol. Dispela nupela pawa i kam long de bilong Pentekos olsem tang bilong paia long ol lain bilong God. Na dispela pawa em i dispela Spirit bilong laikim tru na tok tru.
SAMPELA TINGTING
Yu save bihainim pasin bilong autim tok i tru, o yu wanpela man o meri i save tok giaman? Askim God long helpim yu i bosim gut maus bilong yu yet.
Ritim: Jems 5:1-11
Yupela i no ken stil.
—Kisim Bek 20:15
God i tokim yumi long laikim tru ol wantok bilong yumi: “Yupela i no ken kilim i dai ol narapela manmeri. Laikim ol tru!” Na God i tokim yumi long respektim olgeta man na meri: “Yupela i no ken mekim pasin pamuk. Maski yu marit o yu no marit – stap klin long ai bilong God.”
Na long dispela lo bilong teks bilong tude, God i tokim yumi olsem, “Yupela i no ken stil. Yupela i mas lukautim gut olgeta samting mi yet mi givim yu.”
God i tambuim yumi long stil. Dispela i min yumi no ken stilim sampela samting bilong narapela. Tasol moa, dispela i min olsem yumi no ken giaman long ol samting bilong mani o takis. Yumi no ken sit long skul o long ol exams long skul. Yumi no ken giaman long maket. Yumi no ken stilim taim long bos bilong yumi – yumi no ken les long mekim wok taim bos bilong yumi i wok long baim yumi. God i tok, “Yumi no ken stil.”
Na planti taim ol manmeri bai wok long senisim lo bilong God. Taim planti manmeri i wok long mekim ol kranki pasin, orait bai yumi ting, “Em i orait. Em i no sin.” Sapos olgeta man i wok long giaman long sait bilong mani, orait bai yumi i ting, “Em i oriat. Em i no bikpela samting. Bai mi mekim olsem tu.”
Tasol lo bilong God i no save senis. Yumi no ken wok long senisim lo bilong em. God em i belhat tru bikos em i lukim planti man na meri i save stil, mangal, les long wok, i go i go. Na yu yet yu save belhat long ol dispela pasin tu, o nogat? Em i mobeta long stap rabisman na i no stil na giaman, long stap maniman na mekim pasin bilong stil na giaman.
Yu yet yu stap pikinini bilong God, o nogat? Bai yu lotuim God o mani? Yu stap aninit long God o aninit long mani? Skelim gut laip bilong yu – sapos yu stap aninit long God, laip bilong yu bai narakain olgeta long laip bilong ol man i no bilip long God.
God i no tokim yumi long no ken stil tasol. Long dispela lo em i laik skulim yumi olsem yumi mas lukautim gut wanem samting em i givim yumi, maskim em i bikpela samting o liklik samting. Yumi mas yusim wanem samting em i givim yumi – mani, kago, taim, gutpela save, i go, i go – long mekim wok bilong em!
SAMPELA TINGTING
Dispela lo em i hat long bihainim, o nogat?
Ritim: Stat 2:18-25
Yupela ol marit, yupela i no ken mekim pasin pamuk. —Kisim Bek 20:14
God i kamapim man na meri. God i kamapim Iv long stap olsem poroman bilong helpim em. Dispela i no min olsem Iv i stap olsem meri bilong mekim olgeta wok man em i laikim em long mekim. Nogat. Iv i stap olsem poroman bilong Adam. God i wokim tupela. God em i wokim man na meri bilong tupela i ken pas wantaim, na tupela i kamap wanpela bodi tasol (Stat 2:25).
God yet i kamapim marit taim em i kamapim dispela graun. Maritpasin na marit i stap bipo long taim sin i kam long dispela graun. Na olgeta samting i kam long God i gutpela – pasin bilong marit wantaim. Dispela stori bilong God i kamapim man na meri na tupela i marit, em i tru na tru olgeta. Na tupela i stap long gaden bilong Iden.
Dispela wok bilong God bilong marit na maritpasin wantaim, em i wanpela naispela presen stret God i givim olgeta manmeri. Sapos man na meri i bihainim laik bilong God long marit bilong ol, pasin bilong marit bai givim bikpela amamas long ol. Tasol taim man na meri i no bihainim laik bilong God long marit bilong ol, orait laip bilong tupela bai pulap long sori na hevi stret.
God yet i givim man na meri dispela laik bilong mekim maritpasin; em i naispela presen stret i kam long God yet. Na ol dispela samting God i givim man na meri insait long marit tasol. Na God yet i tok olsem man na meri i no ken brukim marit. Tupela i mas pas wantaim na wanbel. God yet i tok olsem pasin bilong marit i samting bilong wanpela man wantaim wanpela meri. Em tasol. Na God i tokim yumi long was gut na lukautim gut marit bilong yumi.
Taim ol manmeri i wok long bagarapim olgeta gutpela samting God yet i wokim, ol bai bagarapim ol yet. Taim ol manmeri i wok long sakim laik na tingting bilong God, ol bai pilim bikpela hevi tru.
SAMPELA TINGTING
Yu save bihainim laik bilong God long dispela lo long laip bilong yu – maski yu marit o yu no marit?
Ritim: Luk 10:25-37
Yupela i no ken kilim i dai ol arapela manmeri. —Kisim Bek 20:13
Long dispela lo God i wok long lukautim olgeta manmeri. Long dispela lo God em i tambuim yumi long kilim narapela man o meri, na em i tokim yumi long laikim tru ol wantok bilong yumi olsem yumi laikim yumi yet. As bilong dispela lo i kam long taim God i kamapim dispela graun. God i wokim olgeta manmeri, olsem na olgeta manmeri i bilong em. Na dispela em i as bilong dispela lo. Em i wokim olgeta man na meri, na ol i kamap olsem God yet. Olsem tasol, maski ol i mani man o rabisman, blekskin o waitskin, bikman o man nating, olgeta i stap aninit long lukaut bilong God.
God i lukautim olgeta manmeri bikos em i wokim ol, tasol moa, em i laikim ol tu. Satan em i man bilong hetim olgeta manmeri na kilim ol i dai, tasol God em i God bilong laikim tru. Olsem tasol Buk Baibel i tok sapos man i no laikim tru brata bilong en na i bel nogut long em, em i no pikinini bilong God, tasol em i pikinini bilong Satan. Na gutnius bilong Jisas Krais i skulim yumi long dispela lo. Gutnius i soim yumi pasin bilong laikim tru, na pasin bilong wanbel na bung wantaim ol narapela lain i bilip long God. Taim ol lain bilong God i laikim tru narapela narapela, ol i kisim nupela laip pinis – na dispela inapim dispela lo bilong God.
Taim Buk Baibel i stori long laip, em i no stori long pasin bilong pulim win tasol. Na tu pasin bilong “kilim i dai ol narapela manmeri” em i no samting bilong kilim i dai man tasol. Laip em i samting bilong wanbel wantaim God na ol narapela manmeri. Sapos yumi no wanbel olsem, orait yumi i no stap laip. Na olgeta pasin bilong hetim narapela o mangalim narapela i olsem pikinini bilong pasin bilong kilim i dai ol narapela manmeri. Dispela ol pasin i wok long bagarapim sindaun bilong yumi wantaim ol narapela na wantaim God, na Satan yet i planim ol dispela kain pasin long bel bilong yumi. Pasin bilong laikim tru i wok long kamapim ol gutpela pasin bilong wanbel na sindaun gut; tasol pasin bilong hetim narapela narapela em i narapela samting olgeta long laikim tru. Pasin bilong laikim tru i kam long God; pasin bilong hetim ol narapela manmeri i kam long Satan. Na taim Krais i kam bek na olgeta lain bilong em bai bung wantaim long taun bilong em, ol lain i kilim i dai ol narapela manmeri bai stap ausait long dispela taun bilong God (Kamapim Tok Hait 22:15).
God i kamapim man na meri bilong ol i ken bung wantaim na wanbel – na i no bilong kros na bel nogut wantaim, tasol long stap olsem wantok bilong olgeta narapela man na meri. Olsem tasol God i givim dispela lo long yumi, na em i salim Pikinini bilong em long ol i ken kilim em i dai. Na God em i mekim olsem bilong putim ples klia dispela laikim tru bilong em i kam long yumi.
Long Luk 10:25-28, Jisas i stori long man bilong Samaria husat i helpim wanpela Juda. Na taim em i pinisim dispela stori em i tokim dispela saveman bilong lo olsem: “Yu mekim olsem, na bai yu kisim laip.” Yumi mas harim dispela tok tu!
SAMPELA TINGTING
Yu save bihainim dispela lo long laip bilong yu yet, o nogat?
Ritim: Efesus 6:1-9
Yupela i mas aninit long papamana bilong yupela na bihainim tok bilong ol. Sapos yupela i mekim olsem, bai yupela i no inap i dai kwik. Nogat. Bai yupela i ken i stap longtaim long dispela graun mi God, Bikpela bilong yupela mi laik givim yupela.
—Kisim Bek 20:12
Namba wan hap bilong dispela Tenpela Lo i skulim yumi long pasin bilong stap gut wantaim God. Yumi ken sotim ol dispela lo long namba wan hap bilong dispela Tenpela Lo olsem: “Laikim God antap long olgeta narapela samting.” Namba tu hap bilong ol dispela Tenpela Lo i skulim yumi bilong stap gut wantaim ol narapela manmeri. Na yumi ken sotim dispela hap bilong lo olsem: “Laikim wantok bilong yu olsem yu laikim yu yet.”
Tasol dispela namba 5 lo i stap namel long dispela tupela hap bilong dispela Tenpela Lo. I no olsem em i skulim yumi long pasin bilong stap gut wantaim God tasol, na i no olsem em i skulim yumi long pasin bilong stap gut wantaim ol narapela manmeri tasol. Na dispela i bikos papamama bilong yumi ol i stap namel long yumi na Bikpela. Yumi mas bihainim tok bilong papamama bilong yumi bikos God yet i givim namba long ol. Yumi mas bihainim tok bilong ol bikos God yet i putim papamama antap long yumi. Pasin bilong bihainim papamama bilong yumi em i samting bilong litimapim Bikpela.
Yumi mas bihainim tok bilong papamama bilong yumi. Tasol moa, dispela lo i askim yumi long honaim papamama bilong yumi taim yumi i bikpela pinis tu. Na yumi mas honaim papamama bilong yumi olgeta de long laip bilong yumi.
God i tokim ol pikinini long bihainim papamama bilong ol, na em yet i givim namba long ol papamama. Olgeta papamama i mas tokim God long as bilong olgeta pasin ol i mekim bikos God yet i mekim ol i gat namba.
Tasol God i givim namba long kain kain man na meri. Tasol namba bilong ol papamama i namba wan kain namba we ol manmeri i save stap aninit long em. Na namba bilong ol papamama i karamapim planti samting. Em i hat tru long mekim gutpela pasin olsem papamama. Ol papamama i mas skulim gut pikinini bilong ol. Ol i mas lainim ol long ol pasin bilong Bikpela na skulim ol inap long taim ol i bikpela. Na taim ol pikinini i bikpela pinis, bai ol i redi long bihainim tok bilong God na stap gut wantaim ol narapela manmeri tu.
Wok bilong papamama em i bikpela wok tru na em i winim ol narapela wok long dispela graun. Na pe bilong dispela gutpela wok em i bikpela samting tru: Ol papamama na pikinini i ken amamas long lukim dispela pe long taim ol i stap long dispela graun tu.
SAMPELA TINGTING
Yu save honaim papamama bilong yu, o nogat?
Ritim: Luk 6:1-11
Yupela i mas tingim gut de Sabat na makim olsem de bilong mi yet. —Kisim Bek 20:8 Dispela lo i klia tru long ol Israel: i tambu tru long mekim wok long de namba 7, na ol i kolim dispela
de Sabat, na em i de bilong malolo.
Buk Kisim Bek na Buk Lo i givim planti as bilong dispela lo. Bihain long taim God i kamapim dispela graun long de 1 i go 6, God i malolo long de namba 7. Ol animal na ol wokboi i mas malolo long dispela de tu. Na moa, dispela Sabat em i olsem wanpela mak bilong dispela kontrak God i wokim wantaim lain bilong em taim em i givim dispela Tenpela Lo long ol. Ol man i no malolo long de Sabat, ol i putim ol yet ausait long ol lain bilong kontrak. Olsem na ol lain i sakim dispela lo, God i tokim ol long dai.
Tasol em i hat tru liklik long klia gut long mining bilong dispela lo long laip bilong yumi ol lain bilong God i stap long nupela kontrak. Planti ol Kristen i no wanbel long pasin bilong bihainim dispela lo, na dispela Nupela Testamen i no tokaut klia long dispela. Tasol yumi ken klia long dispela: Bihain long taim Jisas i kirap bek long matmant, ol Kristen long Nupela Testamen i wok long bung long lotu long namba wan de long wan wan wik, long Sande. Na yumi ken klia gut bilong wanem ol i mekim olsem. Jisas i kirap bek long Sande na dispela i makim taim laip tru i kirap.
Na yumi olgeta i mas was gut – nogut laip bilong yumi i kamap taim bilong wok tasol. Nogut kantri bilong yumi tu i bihainim pasin bilong wok long olgeta de. Yumi mas makim de Sande long lotuim God na long bihainim pasin bilong lukautim ol narapela, bilong bung wantaim olgeta narapela lain i bilip long God, bilong malolo, na bilong lainim planti moa samting long Bikpela.
Long Sande yumi mas bung long sios bilong God long lotuim em. Em i bikpela samting tru – na em bai helpim yumi long wokabaut wantaim Bikpela long dispela graun. Tru, em i orait long yumi i bung long ol narapela de tu bilong lotuim em, tasol Sande em i de God yet i makim bilong bung wantaim bilong lotuim em – em i De bilong Bikpela.
SAMPELA TINGTING
Yu save bihainim wanem pasin bilong bihainim dispela lo namba 4?
Ritim: Saveman 5:1-7
Yupela i no ken kolim nating nem bilong mi God, Bikpela bilong yupela. Long wanem, bai mi mekim save long ol manmeri i kolim nating nem bilong mi. —Kisim Bek 20:7
Dispela lo i tambuim yumi long yusim nem bilong God long mekim posin, long giaman na mekim tok tru antap wantaim, na long olgeta narapela samting i no gutpela long mekim.
Em i tambu tru long kolim nating nem bilong God. Sapos yumi i laik kolim nem bilong em, yumi mas tingting gut pastaim, na autim gut. I no ol lain i no save long God, tasol, i save kolim nating nem bilong em. Em bai i gutpela sapos yumi olgeta i tingting gut long dispela lo na skelim laip bilong yumi wan wan.
Nogut yumi i mekim posin na kolim nem bilong God long mekim olsem. Na planti lain long gavman bai autim nem bilong God taim ol i mekim sampela tok, tasol ol i no tingting tumas long wai ol i autim nem bilong em. Sampela lain i no bilip long God, tasol ol bai autim nem bilong God long wanpela haus krai o long taim bilong marit o long taim bilong baptais tasol.
Tasol olsem wanem long yumi? Sapos yumi go long lotu na yumi autim nem bilong God tasol yumi no tingting gut taim yumi mekim olsem, orait i olsem yumi kolim nating nem bilong God. Sapos pastor i prea, tasol yumi no harim gut o yumi no tingting gut long taim bilong prea, orait i olsem yumi kolim nating nem bilong God. Saveman 5:1 i tok, “Yu mas tingting gut long pasin bilong yu long taim yu go long haus bilong God. Nogut yu go nating.”
Tasol dispela lo i no tokim yumi long pasim maus na maski long autim nem bilong God. Nogat tru! Laik bilong God i kamap ples klia long Jisas: “Na long nem bilong em bai ol i mas autim tok long olgeta lain manmeri, bai ol i ken tanim bel, na bai God i lusim ol sin bilong ol” (Luk 24:47).
SAMPELA TINGTING
Yu save wok long stretim ol lain i wok long kolim nating nem bilong God, o nogat?
Ritim: Aisaia 40:18-26
Yupela i no ken wokim wanpela giaman god, na yupela i no ken wokim piksa bilong wanpela samting i stap long heven o i stap long graun o insait long wara i stap aninit long graun. Yupela i no ken brukim skru long wanpela giaman god o piksa na lotuim em...
—Kisim Bek 20:4-5
Yumi no inap lukim God. Na sapos yumi no bilip long Jisas Krais, bai yumi no inap save long God tu. Pasin bilong wokim wanpela giaman god em i longlong tru, tasol planti lain i ting ol i mekim wanpela gutpela samting taim ol i mekim olsem. Tasol planti lain i no Kristen na i bin wokim ol giaman god, ol i laik mekim olsem bikos ol yet i laik bosim dispela god bilong ol. Taim ol i wokim wanpela giaman god, ol i ting olsem ol inap kisim pawa bilong dispela god na yusim dispela pawa long laik bilong ol yet.
Taim ol Kristen i kirapim dispela pasin bilong wokim sampela samting olsem ol liklik diwai kros, ol i no tingting olsem dispela liklik samting i gat sampela pawa. Ol i laik yusim ol dispela liklik samting bilong helpim ol Kristen i tingim pawa na laikim tru bilong God. Tasol bihain, dispela pasin i senis na planti lain i wok long lotuim ol dispela kain samting. Na sios bilong Rom i bin bungim planti ol “holi samting” na ol dispela samting i kamap olsem ol giaman god bilong ol, na ol i ting olsem ol dispela samting i gat pawa yet. Tasol long marimari bilong God, bikpela senis i kamap long sios na planti ol Kristen i kisim save olsem dispela pasin i no gutpela o stretpela long ai bilong God. Tasol dispela i no min olsem ol Kristen i no save mekim dispela sin bilong “wokim wanpela giaman god, o wanpela piksa na brukim skru long em” long tude.
Sampela taim ol pastor o hetman long sios bai i wok long larim sios bilong ol i kamap olsem “god” bilong ol, na ol bai i ofaim olgeta samting long laip bilong ol i go long sios tasol. Na planti ol narapela Kristen i gat rot na pasin bilong ol bilong lotuim Bikpela long taim bilong lotu. Dispela em i gutpela, tasol sampela taim dispela rot ol i yusim long lotuim Bikpela i kamap olsem nambawan samting bilong lotuim em, na ol i lus tingting long lotuim Bikpela long bel bilong ol. Sampela taim ol bai i putim haus lotu antap long ol narapela samting, na dispela em i kamap olsem wanpela samting bilong lotuim.
Tasol dispela God husat i putim em yet ples klia olsem Papa bilong Krais, em tasol i makim rot bilong yumi long lotuim em. God i bel hat long pasin bilong wokim ol giaman god o wanpela piksa bilong brukim skru long em– God wanpela em i God bilong yumi, na em i gat laik sapos yumi kamap nupela long Krais Jisas na lotuim em long bel na spirit na bodi na olgeta samting bilong yumi. Yumi yet mas kamap olsem wanpela piksa bilong God bikos ol lain bilong God i bin kamap nupela long Krais Jisas ol i olsem piksa bilong dispela God husat yumi no inap lukim.
SAMPELA TINGTING
I gat sampela giaman god i stap long laip bilong yu, o nogat?
Ritim: Aisaia 40:12-17
Yupela i mas bihainim mi wanpela tasol. Yupela i no ken bihainim ol giaman god.
—Kisim Bek 20:3
God i givim dispela Tenpela Lo long ol lain Israel taim Krais i no bin kam yet long dispela graun. Dispela Tenpela Lo i olsem as bilong olgeta lo God i givim ol lain bilong em long taim em i wokim kontrak wantaim ol long Maunten Sainai.
Krais i no kam long rausim tok bilong lo. Em i kam bilong inapim tru dispela lo. Long laip bilong em na long tok bilong em, Krais i bin putim ples klia laik bilong God olsem lo bilong God i bin soim.
Dispela Tenpela Lo i no kliaim olgeta samting long laik bilong God long laip bilong yumi. Tasol ol i putim ples klia olsem yumi mas aninit long God, laikim em tru na laikim ol wantok bilong yumi tu.
Namba wan lo bilong dispela Tenpela Lo i olsem as bilong olgeta samting bilong laip na bilong lotuim Bikpela. God em i God, na em i mas kisim olgeta hona na pres. Na Bikpela i save olsem yumi man, yumi save gat laik long bihainim ol giaman god na yumi les tru long lotuim God. Olsem tasol em i givim dispela lo long yumi olsem nambawan lo.
I gat planti samting ol man i save lotuim olsem o giaman god: san, mun, ren, wara, graun, pawa, namba, mani, save, tingting, i go i go. Tasol bikpela samting long tingim em i dispela: God em i wanpela. Olgeta narapela samting na olgeta narapela pawa i aninit long God. Na God em i belhat taim yumi les long litimapim nem bilong em bikos yumi i givim pres na hona long narapela man o meri o narapela samting.
Planti ol narapela pawa long tude i wok long pulim yumi longwe long God: pawa bilong laikim tru mani o lotuim graun o tumbuna o sampela narapela samting i wok long pait long God. Ol i wok strong long kisim ples bilong God long laip bilong yumi wan wan.
Krais i kam long dispela graun long soim klia dispela God bilong yumi, dispela God yumi mas lotuim. Na sapos yumi lotuim God, bai yumi bihainim em tu. Laip bilong yumi bai putim ples klia sapos yumi lotuim mani o pasin bilong amamasim skin bilong yumi o sapos yumi i lotuim dispela Papa bilong Krais Jisas. Krais i kam long krungutim olgeta narapela pawa aninit long lek bilong em, na ol bai i kamap olsem wokboi bilong em yet. Olsem na yumi mas givim yumi yet na olgeta samting bilong yumi long mekim wok bilong dispela King bilong olgeta king na Bikpela bilong olgeta bikman.
SAMPELA TINGTING
I gat sampela giaman god i stap long laip bilong yu yet, o nogat? Askim God long helpim yu long lusim ol dispela giaman god na larim em yet i stap namba wan long laip bilong yu.
Ritim: 1 Jon 5:13-21
Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi. Olsem na yumi no save pret long God. Nogat. Yumi save go klostu long em. —1 Jon 5:14
Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi. I no min olsem yumi bai kisim olgeta samting yumi laikim sapos laik bilong yumi i wanbel wantaim laik bilong God. Tasol i gat dispela mining: sapos ol Kristen i bin lainim pinis pasin bilong bihainm laik bilong God long beten bilong ol, orait ol i no ken pret long prea long em. Yumi mas wok long klia gut long laik bilong God.
Ol pikinini i save long laik bilong papamama bilong ol. Sampela taim ol pikinini bai i les long askim papamama bilong ol long sampela samting bikos ol i klia pinis olsem papamama bilong ol i no gat laik long harim dispela askim bilong ol. Dispela tok “bihainim laik bilong God yet na yumi beten,” i min olsem yumi bai askim God long kisim wanem samting God yet i gat laik long givim yumi.
Jisas i autim kain tok olsem long John 15:7: “Sapos yupela i pas long mi, na tok bilong mi em i stap long yupela, orait yupela i ken askim inap long laik bilong yupela, na ol samting bai i kamap olsem yupela i bin tok.” Na dispela tok “yupela i ken askim inap long laik bilong yupela,” i no min ol samting bilong kisim planti mani o kago samting, samting bilong kisim gutpela wok o samting bilong stap orait. Nogat, Jisas i tok, “Sapos yupela i pas long mi, na tok bilong mi em i stap long yupela.” Sapos yumi stap olsem, ol beten bilong yumi bai bihainim laik bilong God na bai yumi i kisim wanem samting yumi i askim God long kisim. Prea em i no samting bilong kisim wanem samting yumi i laik kisim; nogat, prea em i samting bilong kamap olsem man o meri God i laikim. Na laik bilong God long laip bilong yumi em bai helpim yumi i kamap stretpela tru.
Na taim yumi lainim pinis wanem samting em i gutpela long yumi long kisim, na taim yumi stap strong na aninit long nem bilong God, kingdom bilong God, na laik bilong God, bai yumi inap long “bihainim laik bilong God yet na yumi beten na askim em long wanpela samting.” Na yumi no ken pret long mekim olsem. Taim yumi gat laik long apim nem bilong God tasol, taim yumi i hop long kingdom bilong em tasol, na taim yumi gat laik long bihainim laik bilong em tasol, bai yumi no ken pret long go long God na askim em long kisim wanem samting em i promisim long givim yumi. Ol papa long dispela graun i no save givim ol ston long ol pikinini bilong taim ol pikinini i askim ol long kisim sampela bret. Olsem na yumi i ken save tru, Papa bilong yumi husat i stap long heven, em bai amamas long givim ol gutpela samting long ol pikinini bilong em.
God i gat laik sapos yumi i kisim olgeta samting yumi nidim bilong mekim wok long kingdom bilong em. Olsem na yumi mas askim em long kisim wanem samting yumi nidim long mekim wok long kingdom bilong em. Dispela em i laik bilong em. Askim, na bai yu kisim!
SAMPELA TINGTING
Dispela ol tok em bai helpim yu long taim yu beten olsem wanem?
Ritim: Jon 17:9-19
Bipo yu bin salim mi na mi kam mi stap namel long ol manmeri bilong graun. Olsem tasol mi bin salim ol man yu bin givim mi bai ol i go i stap namel long ol manmeri bilong graun.
—Jon 17:18
Dispela tok misin i gat dispela mining: “salim i go.” Wanpela misinari em i wanpela man o meri ol i bin salim em i go long bihainim laik bilong ol. Jisas i mekim wok misin bilong Papa bilong em. Na Jisas i salim yumi i go mekim wok bilong em long dispela graun. Olsem na yumi tu i mas mekim wok misin.
Wanpela mama i bin salim pikinini man bilong em i go long stoa long baim sampela kaikai. Mama i tokim pikinini bilong hariap i go na i kam bek gen. Tasol taim em i wokabaut i go long stoa, em i lukim wanpela poro bilong em na tupela i stori i stap longpela taim. Em i lus tingting long wok misin bilong em!
Na dispela pikinini i olsem tok piksa long yumi ol Kristen. Masta bilong yumi i salim yumi i go. Em i givim yumi wok misin long mekim. Tasol taim yumi i mekim dispela wok, i gat planti samting i wok long pasim yumi. I no olsem ol samting nogut i save wok long pasim yumi olgeta taim, tasol dispela samting i kamap sampela samting nogut taim em i pasim yumi long tingting long wok misin bilong yumi.
Taim yumi i klia long wok misin bilong yumi, bai yumi gat laik long autim tok bilong Jisas Krais long olgeta lain i no save long em. Tasol moa, laip bilong yumi na pasin bilong yumi bai putim ples klia olsem yumi i mekim wok misin bikos Masta bilong yumi i bin salim yumi i go.
Dispela graun em i no ples tru bilong yumi. Yumi stap long dispela rot i go long narapela ples. Yumi i no bilong dispela graun; nogat, God i salim yumi long dispela graun long inapim wok misin bilong em.
Tasol planti ol samting i wok long pulim yumi i go long narapela rot. Ol liklik samting i wok long mekim yumi i lus tingting long wok misin bilong yumi. Taim yumi tingting tumas long mani bilong yumi o kago bilong yumi o namba bilong yumi, em bai yumi lus tingting long wok misin bilong yumi. Maski ol dispela samting i no samting bilong sin, planti taim ol dispela samting i wok long pulim yumi longwe long God. Ating yumi no save tingting tumas long dispela de yumi bai i go lukim Masta bilong yumi na em bai i askim yumi, “Yu bin mekim wok misin olsem mi bin tokim yu long mekim, o nogat?”
I gat wanpela man tasol i bin tok, “Em i pinis!” Na dispela man em i Jisas. Em i tokaut olsem long Golgata. Bikos em i dai, yumi i kisim bel isi pinis. Bikos em i stap laip, em i tokim yumi long mekim wok misin.
SAMPELA TINGTING
Wanem ol samting i save wok long pasim yu long mekim wok misin bilong yu yet?
Ritim: Jon 8:31-36
Olsem na sapos Pikinini i mekim yupela i kamap fri, orait yupela i stap fri tru. —Jon 8:36
Planti lain i les long bilip olsem olgeta man i kisim dispela As Sin i kam long Adam tupela Iv, taim tupela i pundaun long sin long gaden Idin. Tasol, maski ol i no bilipim dispela, ol i klia olsem taim mama bilong yumi i karim yumi, yumi no stap fi tru. Man i no stap fri, na taim yumi lukluk long wanem samting i kamap long dispela graun yumi ken klia olgeta: i olsem olgeta manmeri i stap long wanpela kalabus.
Sapos tupela kalabus man i wokabaut long rot na i stap longwe long yu, i luk olsem tupela i wokabaut na i stap fri. Tasol taim tupela i kamap klostu long yu bai yu lukim dispela sens i pasim han lek bilong tupela. Na em i wankain olsem long laip bilong yumi. Taim yumi lukluk gut long laip bilong yumi long dispela graun, bai yumi i kamap klia olsem ol sens i wok long pasim yumi olgeta tu.
Taim yumi prea long God na tok “Mipela i mas bihainim laik bilong yu,” i olsem yumi i askim God long brukim dispela sens i wok long pasim yumi. Hau bai yumi mi ran, taim lek bilong yumi i pas long sampela sens? Yumi no inap bihainim rot God i makim bilong yumi, sapos i gat sampela pawa i wok long pasim yumi.
Na, em tru, Krais i bin mekim yumi i kamap fri long kalabus bilong sin na yumi inap bihainim laik bilong Papa bilong yumi. Tasol dispela wok bilong mekim yumi i kamap fri i go i go yet. I no pinis yet. I gat sampela bilong dispela sens i strong tru na lait bilong Krais i mas wok strong long kam insait long laip bilong yumi long brukim ol dispela sens isi isi. Sampela taim i gat sampela samting long dispela graun i wok long pulim yumi longwe long Krais, na i wok long pasim yumi long stap olsem gutpela wokman bilong God.
Olsem na yumi mas prea long Pikinini bilong God i ken mekim yumi i kamap fri, na bai laik bilong God i kamap namba wan samting long laip bilong yumi. Taim yumi inap bihainim laik bilong God long bel bilong yumi tru tru, long dispela taim tasol yumi stap fri. Tasol planti taim ol narapela laik i wok long pasim laik bilong God long laip bilong yumi. Tru, yumi wok long bihainim laik bilong God, tasol i gat sampela samting i wok long pasim yumi yet.
Tasol, sapos yumi stap fri long bihainim laik bilong God, bai yumi i amamas tru. Yumi bai laikim tru God na ol narapela, na i no gat wanpela samting bai inap pasim yumi. Bai yumi givim bel na tingting na spirit na bodi bilong yumi olgeta long God. Na bihain bai yumi stap fri olgeta na bihainim laik bilong God long olgeta stretpela pasin tru tasol.
SAMPELA TINGTING
I gat sampela ‘sens’ long laip bilong yu i wok long pasim yu long stap fri na bihainim laik bilong God?
Ritim: Efesus 5:15-33
Yupela i no ken mekim ol kranki pasin. Nogat. Yupela i mas save gut long laik bilong Bikpela...Yupela meri, yupela i mas aninit long ol man bilong yupela...Yupela man, yupela i mas laikim tumas ol meri bilong yupela...Yupela pikinini, yupela i mas bihainim tok bilong papamama bilong yupela... —Efesus 5:17,22,25; 6:1
Olgeta Kristen i mas wok long painimaut laik bilong Bikpela long laip bilong ol. Yumi i no ken pasim ol lain i wok long bihainim laik bilong God long laip bilong ol. Sampela taim God bai askim yumi long mekim sampela samting i narakain o long karim bikpela hevi long bihainim laik bilong em. Na sapos God i askim yumi long mekim olsem, yumi ken amamas long bihaihim laik bilong em. Yumi mekim gutpela samting olgeta taim yumi i redi long bihainim Jisas. Yumi no inap bagarap sapos yumi i bihainim laik bilong Papa bilong yumi long heven.
Na em i tru olsem yumi mas redi long bihainim God taim em i askim yumi long karim bikpela hevi. Tasol yumi mas bihainim laik bilong em long olgeta de long olgeta hap long laip bilong yumi tu. Yumi mas bihainim em long ol bikpela samting na liklik samting wantaim.
God i tokim yumi long bihainim em olgeta taim. Ol man i mas laikim tru meri bilong ol, olsem God i laikim ol long mekim. Ol meri i mas laikim tru man bilong ol na aninit long ol, olsem God i laikim. Ol pikinini i mas bihainim papamama bilong ol olsem God i laikim. Ol wokman i mas mekim wok bilong ol olsem ol i mekim dispela wok long God. Ol bosman i mas bihainim laik bilong Masta bilong ol long heven.
I gat wanpela yangpela man i painim hat tru long kisim save long laik bilong God. Bai em i mas i go long mekim wok misin long narapela kantri, o nogat? Na taim em i prea i stap long askim God long putim ples klia laik bilong em, mama bilong em i askim em long kam helpim em. Bihain liklik, mama bilong em i askim em gen long kam helpim em. Tasol dispela yangpela man i no bihainim laik bilong mama bilong em. Dispela yangpela man i no save olsem maus bilong mama bilong em i maus bilong God yet. Em i laik bilong God long em i mas bihainim tok bilong mama bilong em.
Bikpela i laik skulim yumi long pasin bilong bihainim em long olgeta liklik samting long laip bilong yumi tu. Yumi mas bihainim laik bilong God long haus bilong yumi, long haus kuk bilong yumi, long sios bilong yumi, long bet bilong yumi, long wok bilong yumi na long taim yumi i malolo i stap. Sapos yumi no bihainim laik bilong God long ol liklik samting long laip bilong yumi, hau bai yumi i redi long bihainim em long ol bikpela samting, sapos God i askim yumi long mekim olsem?
I gat planti ol Kristen i no redi long bihainim God long ol bikpela samting bikos ol i no bihainim em long marit bilong em, o long wok bilong em. Taim yumi yangpela, yumi mas redi long harim tok bilong God long ol liklik samting. Sapos nogat, bai yumi no inap long harim God taim em i tokim yumi long bihainim laik bilong em long ol bikpela samting long dispela graun tu.
SAMPELA TINGTING
God i save skulim yu long bihainim em long ol liklik samting tu?
Ritim: Matyu 19:16-22
Na Jisas i tokim em olsem, “Sapos yu laik kamap stretpela olgeta, orait yu go salim olgeta samting bilong yu na dispela mani yu kisim yu mas givim long ol rabisman. Yu mekim olsem, na bai yu gat ol gutpela samting tru long heven. Na yu kam bihainim mi.” —Matyu 19:21
Sapos yu bin stap wanpela Kristen longpela taim pinis, ating yu bin harim dispela stori bipo, a? Ol maniman i save pilim olsem dispela stori i hat tru long harim. Long putim ples klia olsem em i laikim tru Jisas, dispela yangpela man i gat wanpela rot long bihainim tasol – em i mas lusim olgeta samting bilong dispela graun na bihainim em.
Taim ol tisa o pastor i wok long kliaim mining bilong dispela stori planti bai tok olsem, “I no min olsem yu mas lusim olgeta samting long bihainim Jisas. Bel bilong yu tasol i mas redi long lusim olgeta samting long bihainim em.” Na ol manmeri i save amamas long harim dispela bikos ol i ting olsem ol i ken bungim planti mani na kago long dispela graun na bihainim Jisas wantaim. Tasol dispela tok i giamanim yumi.
Planti ol pastor bai tokim yumi olsem yumi inap bihainim Jisas, na wokabaut klostu wankain olsem ol narapela manmeri long dispela graun wantaim. Tasol gutnius bilong God i narapela kain tok olgeta. Nogat wanpela i ken tok olsem God i no askim yumi long mekim bikpela samting long bihainim em. Na nogut wanpela i no klia long dispela bikpela samting God yet bai i givim yumi.
I gat narapela stori i kam bihain long dispela stori. Long bekim askim bilong Pita, Jisas i stori long pasin bilong God long givim planti samting long yumi: “Na olgeta manmeri i bin ting long nem bilong mi na i lusim haus o brata o susa o papa o mama o pikinini o gaden, bai ol i kisim 100 moa, na bai ol i kisim laip i stap gut oltaim oltaim” (Lain 29).
Yumi mas harim tok bilong Krais. Yumi i ken bilipim em. Yumi mas mekim olsem em i tokim yumi long mekim, na bilipim olgeta promis bilong em tu. Jisas em i givim narapela kain tok olgeta long yumi.
SAMPELA TINGTING
Yu i redi long harim na bihainim dispela narapela kain tok bilong Jisas?
Ritim: Matyu 22:34-40
Na Jisas i tokim em olsem, “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.” Dispela lo em i bikpela, na em i namba wan tru. Na namba 2 lo em i wankain olsem dispela. Em i olsem, “Yu mas laikim ol wantok olsem yu laikim yu yet.” —Matyu 22:37-39
Planti taim, ol lain i tok olsem dispela namba wan lo bilong God em i wok long sotim dispela Tenpela Lo bilong God. Nogut dispela i paulim yumi. Em i sotim lo bilong God, em tru. Tasol dispela namba wan lo bilong God i bikpela moa long dispela Tenpela Lo bilong God bikos dispela namba wan lo i autim olgeta samting yumi manmeri i mas mekim.
God i tokim yumi long laikem em antap long olgeta narapela samting, na laikim ol wantok olsem yumi laikim yumi yet. Sapos long tomora olgeta manmeri bilong dispela graun i wok long laikim tru God antap long olgeta narapela samting na laikim ol wantok olsem ol i laikim ol yet, orait em bai min olsem nupela graun i kam pinis; em bai min olsem kingdom bilong God i kam pinis long dispela graun.
Yumi mas laikim God long save, long laik, na long bel bilong yumi. Yumi mas laikim em olgeta long spirit na bodi bilong yumi. Dispela em i gat wanem mining? Em i hat tru long save. Tasol sapos yumi ritim ol stori long Buk Baibel long olgeta narapela man i bilip long God, dispela em bai i helpim yumi. Na yumi mas ritim olgeta stori bilong Jisas bikos em bai skulim yumi gut tru long pasin bilong laikim tru God.
God i tokim yumi long laikim ol wantok bilong yumi olsem yumi laikim yumi yet. I min olsem yumi mas tingting long, na sori long, olgeta manmeri yumi i lukim long hap bilong yumi, wankain olsem yumi i tingting na sori long yumi yet.
Dispela tupela lo i wanbel na i save wok wantaim. Namba 2 lo i “kain olsem” namba wan lo. I min, sapos yumi laikim tru God, orait bai yumi laikim tru ol wantok bilong yumi tu. Na sapos yumi les long laikim tru ol wantok bilong yumi, orait ating yumi no laikim God tu, a?
God i tokim yumi long bihainim pasin bilong laikim tru. Em i no tokim yumi long mekim ol dispela samting tasol: “Go long sios; mekim gut wok bilong yu; no ken giaman; mekim ol gutpela pasim tasol.” Nogat, em i tokim yumi long laikim tru. Em i hat tru long laikim tru God na ol narapela. Yumi inap wok strong long bihainim ol gutpela pasin; tasol, em i hat wok tru long strong long bihainim pasin bilong laikim tru. Yumi inap long laikim tru God na ol narapela – taim Spirit bilong Jisas em i wok long bosim laip bilong yumi olgeta.
SAMPELA TINGTING
Askim Spirit bilong Jisas i ken bosim laip bilong yu na helpim yu long laikim tru God na ol wantok bilong yu tu.
Ritim: Rom 12:1-2
Olsem na bai yupela inap long save tru long laik bilong God. Bai yupela i save long ol pasin i gutpela na long ol pasin God i laikim tumas na long ol pasin inap tru na i stret olgeta.
—Rom 12:2
Taim yumi prea “mipela i mas bihainim laik bilong yu,” yumi askim God long larim olgeta lain long dispela graun i ken bihainim laik bilong em olsem ol i bihainim long heven. Em i olsem: Yumi olgeta, olsem pikinini bilong em, i mas bihainim olgeta laik bilong Papa bilong yumi.
Hau bai yumi klia long wanem samting yumi mas mekim? Hau bai yumi klia long laik bilong God long laip bilong yumi?
Dispela tupela askim em i ol bikpela askim bilong ol Kristen, na i hat tru long bekim. Yumi olgeta i klia long sampela samting long laik bilong God. Tasol hau bai yumi klia long laik bilong God long pasin bilong lotu, long olgeta samting long wok bilong yumi, long ol liklik wan wan samting long laip bilong yumi?
I gat tupela rot ol Kristen i save bihainim long bekim ol dispela askim. I gat sampela Kristen bai i larim ol pasto na hetman i wok long autim laik bilong God long ol. Na i gat sampela ol Kristen i ting olsem God yet i autim laik bilong em long bel bilong ol, na i no gat wanpela i ken agenstim dispela tok God i givim long bel bilong ol.
Tasol yumi stap long dispela Nupela Kontrak. Yumi no olsem ol liklik pikinini bilong bilip nau. Em i olsem yumi i bikpela manmeri bilong bilip. God i givim Buk Baibel long yumi, na em i askim yumi long yusim save bilong yumi long painimaut laik bilong em long laip bilong yumi. “Bai yumi inap long save tru long laik bilong God.”
Yumi no ken tok, “Em i hat tru long save gut long laik bilong God,” na em tasol. Planti manmeri i save mekim olsem.
Yes, em i hat tru! Tasol yumi inap! God i mekim tingting bilong yumi i kamap nupela. Na yumi mas soim olsem yumi i kamap nupela long laip na pasin bilong yumi. Yumi no ken wokabaut wankain olsem ol man bilong dispela graun. Nogat. Yumi mas bihainim laik bilong God.
God em i Papa bilong yumi, olsem na yumi ken klia long laik na save bilong em.
SAMPELA TINGTING
Yu save wok strong long save gut long laik bilong God long laip bilong yu yet?
Ritim: 2 Samuel 12:13-23
Orait Devit i tok, “Mi krai na mi tambu long kaikai taim pikinini i no dai yet, long wanem, mi ting bai Bikpela inap marimari long mi na i no ken larim pikinini i dai.” —2 Samuel 12:22
Dispela prea, “mipela i mas bihainim laik bilong yu,” em i prea bilong bihainim laik bilong God. I no samting bilong askim God long helpim yumi i bilip olsem olgeta samting i kamap long dispela graun i kam long han bilong em. Na em i tru, God yet inapim laik bilong em long dispela graun olgeta taim, na i no gat wanpela samting i abrusim plen bilong God. Tasol dispela prea i samting bilong yumi i mas mekim – yumi mas bihainim laik bilong God.
Tasol, em i tru, yumi mas daunim yumi yet na aninit long laik bilong God – yumi mas redi long bihainim laik na plen bilong God. Tasol yumi ken prea long God long em i ken harim tok bilong yumi.
Tingim dispela tok bilong King Devit. God em i tok olsem, pikinini bilong em bai i dai. Tasol taim dispela bebi i stap laip yet, maskim em i sik nogut tru, Devit i prea i stap. Inap long 7-pela de na 7- pela nait, em i prea strong long God i ken senisim tingting bilong en.
I no olsem laik bilong God i stap long ples hait. Na yumi no ken tok, “Maski. Wanem samting bai kamap, em bai i kamap tasol.” Nogat. God em i tokim yumi long prea strong long em. I no olsem yumi ken sindaun nating na wetim wanem samting bai i kamap.
Na yumi mas lukaut. Nogut yumi wok long pasim narapela long bihainim laik bilong God, na nogut yumi kotim narapela long wok em i laik mekim long bihainim laik bilong God. No ken pasim ol. Ol pren bilong Job, ol pren bilong Jisas, na ol pren bilong Pol, ol i paul long laik bilong God, na ol i laik pasim ol narapela long bihainim laik bilong God.
Na yumi no klia long tingting bilong God. Sampela taim yumi bai askim em long rausim hevi long yumi, na em bai mekim olsem. Tasol sampela narapela taim em bai helpim yumi long daunim yumi yet na aninit long laik bilong em, maski em i givim bikpela hevi long yumi long karim.
Taim pikinini man bilong Devit i dai pinis, orait Devit em i kirap. Em i klia olsem dispela em i laik bilong God – pikinini bilong em i dai pinis. Devit i klia olgeta olsem dispela em i laik bilong God. Na em i aninit long God na bilipim em. Na God em i Papa bilong yumi tu – orait ating yumi ken aninit long em na bilipim em tu, a?
SAMPELA TINGTING
Prea bilong yu i gat bikpela pawa, a? Yu bin lukim dispela pawa bilong prea long laip bilong yu yet?
Ritim: Aposel 21:7-14
Mipela i lukim olsem Pol i strong long i go, olsem na mipela i no traim moa long senisim tingting bilong en. Mipela i tok, “Samting Bikpela i laik bai i kamap, em i ken kamap.”
—Aposel 21:14
Aposel Pol i wokabaut i go long Jerusalem. Em i save olsem em bai i bungim planti hevi long hap, tasol em i no klia olgeta long wanem samting God bai i mekim kamap long laip bilong em. “Orait harim. Nau Holi Spirit tasol i mekim na mi mas i go long Jerusalem. Wanem samting bai i kamap long mi long Jerusalem, em mi no save. Dispela tasol mi save. Long olgeta ples mi go long en, Holi Spirit i save autim tok long mi olsem, kalabus na planti hevi i wetim mi.”
Ol poroman bilong Pol i wok hat tru long senisim tingting bilong em. Tasol nogat. Em i strong long i go. Em i laik i go long Jerusalem bikos em i save olsem dispela em i laik bilong God.
Na ol pren bilong em i tok, “Samting Bikpela i laik bai i kamap, em i ken kamap.” I luk olsem taim Pol i strong moa yet long bihainim laik bilong God, ol frens bilong em i tok, “Maski, larim em i go.”
Tasol Pol i redi olgeta long bihainim laik bilong God. Spirit bilong God i autim tok long em, na strongim em. Na dispela em i ken kirapim tingting long yumi long Masta bilong Pol, Jisas Krais. Ol frens bilong Jisas tu i laik pasim em long go long Jerusalem. Jisas tu em i save long wanem samting bai i kamap long em: “... na ol bai i givim Pikinini bilong Man long han bilong ol bikpris na ol saveman bilong lo. Na bai ol i mekim kot long em na pasim tok long kilim em i dai. Na bai ol i givim em long ol man bilong ol arapela lain. Na ol dispela man bai i tok bilas long em na spetim em na wipim em na kilim em i dai” (Mak 10:33-34). Na dispela wanpela Spirit i tokim Jisas tu long em i mas i go long Jerusalem. Maski ol pren i tanbuim em long go, Jisas, “i pasim tingting strong long em i mas i go long Jerusalem” (Luk 9:52).
Pol i bihainim lek mak bilong Jisas. Em i lainim pasin bilong bihainim laik bilong God long tisa bilong em. Wankain olsem Jisas, Pol i mas redi long daunim laik bilong em yet na aninit long gutpela na stretpela laik bilong God.
Taim ol man o meri i wok long bihainim laik bilong God, ol pren bilong i no ken wok long pasim ol o tambuim ol. Taim yumi klia olsem em i samting bilong bihainim laik bilong God, orait em i taim long prea, “mipela i mas bihainim laik bilong yu.”
SAMPELA TINGTING
Taim yu prea, “mipela i mas bihainim laik bilong yu,” yu i redi olgeta long bihainim laik bilong God?
Ritim: Matyu 26:36-46
“Papa bilong mi, sapos dispela kap i no inap abrusim mi, na mi mas dringim, orait yu ken bihainim laik bilong yu tasol.” —Matyu 26:42
Long Getsamene bel bilong Jisas em i hevi, na em i pilim nogut tru bikos em i hat wok stret long bihainim laik bilong Papa bilong em. Em i karim bikpela pen tru long dispela. Tasol taim em i lusim dispela gaden bilong Getsamene, em i redi olgeta long bihainim laik bilong God long laip bilong em. Em i redi long bihainim laik bilong God, maski em i mas redi long dringim dispela kap God i givim em long dringim.
Long dispela pasin bilong Jisas yumi ken klia olsem em i bikpela samting long prea, “Mipela i mas bihainimlaikbilongyulonggraunolsemolisavebihainimlongheven.” Yuminokenautimnating. Yumi mas redi long bihainim olgeta laik bilong God, na em i no samting long prea olsem, “God, sapos yu no gat laik long bihainim laik bilong mi, orait maski, bihainim laik bilong yu yet.”
Taim yumi lukluk long Getsamene, yumi lainim sampela moa samting tu. Taim yumi prea “mipela i mas bihainim laik bilong yu,” yumi mas wanbel olgeta wantaim laik bilong God. Na bai yumi redi long bihainim laik bilong God maski wanem samting i kamap long laip bilong yumi.
“Mipela i mas bihainim laik bilong yu,” em i prea bilong bihainim laik bilong God olgeta taim. Sampela bai tok ‘yes’ long bihainim laik bilong God, tasol bel bilong ol i les. Sampela narapela bai bikmaus na tok nogat long bihainim laik bilong God. Tasol pasin bilong bihainim laik bilong God em i samting bilong redi olgeta long wanbel long laik bilong God, maski em i no laik bilong yumi.
Yumi mas klia gut long wanem samting yumi beten taim yumi i tok, “Mipela i mas bihainim laik bilong yu.” Planti manmeri bai autim dispela tok nating. Tasol Krais em i bel hevi nogut tru, na em i krai nogut tru taim em i autim dispela prea. Olgeta lain i laik autim dispela prea, ol i mas i stap pinis wantaim God long dispela bikpela pait i stap long dispela graun. Dispela man o meri i wanbel wantaim olgeta narapela lain bilong God, na em i mas redi long givim olgeta samting bilong em na em yet tu long mekim wok bilong God. Taim yumi prea “mipela i mas bihainim laik bilong yu,” i olsem yumi karim diwai kros bilong Bikpela .
Elaija i mekim olsem, na em i tait nogut tru na em i krai bikos em wanpela i stap long mekim wok. Na Jeramaia i karim dispela diwai kros tu, na em i hevi tru na em i givim pen long em. Na Jisas tu i pilim dispela hevi bilong bihainim laik bilong Bikpela, na klostu em i pundaun long dispela gaden bilong Getsamene.
Sapos em i no hat tru long bihainim laik bilong God long laip bilong yumi, na yumi no save karim pen o hevi long dispela rot, orait olsem wanem? Nogut em i no dispela diwai kros bilong Bikpela yumi wok long karim.
SAMPELA TINGTING
Yu save karim dispela ol hevi na pen long bihaihim laik bilong God?
Ritim: Rom 5:12-21
Wanpela man i bin sakim tok, na long dispela pasin bilong em ol manmeri i kamap manmeri bilong mekim sin. Olsem tasol, wanpela man i bihainim tok, na long dispela pasin bilong em ol arapela manmeri bai i kamap stretpela manmeri. —Rom 5:19
Wanpela man i bin sakim tok bilong God na long dispela pasin yumi pundaun long sin; wanpela man i bihainim tok bilong God na long dispela pasin yumi wanbel wantaim God gen. Adam na Krais i stap olsem pesman bilong yumi man bilong dispela graun. Olsem tasol taim Adam i sakim tok, yumi pundaun long sin na kamap manmeri bilong mekim sin. Na tu, taim Krais em dai, ol lain bilong em i kamap stretpela manmeri.
Wok na ol pasin bilong yumi wan wan i no save senisim planti samting long dispela graun. Tasol sapos wanpela hetman bilong kantri i mekim sampela samting long wok bilong em, planti taim dispela samting bai senisim planti samting – maski dispela hetman em i man tasol, bikos em i pesman bilong ol lain bilong kantri bilong em, pasin na wok bilong em bai senisim laip bilong planti narapela manmeri.
Na Adam i stap olsem papa bilong olgeta manmeri bilong dispela graun. Olsem na, taim papa Adam i sakim tok bilong God, dispela samting i senisim laip bilong olgeta lain bilong dispela graun. I no pikinini bilong em tasol i kisim dispela sin bilong em; olgeta lain long dispela graun i kamap manmeri bilong mekim ol pasin nogut. Na dispela samting i kamap bikos Adam i olsem papa, olsem pesman, bilong yumi olgeta.
Na Krais i kamap bihain long Adam, olsem namba tu Adam. Na em i kam olsem pesman bilong yumi, na pasin bilong em i mekim bikpela samting i kamap long ol lain bilong dispela graun: taim em i dai, yumi i dai; taim em i kirap bek, yumi tu i kirap bek; na long pasin bilong em bilong bihainim laik bilong God, yumi i kamap stretplela manmeri.
Yumi mas klia long Krais i kisim bek yumi long pasin bilong bihainim laik bilong God. Dispela pait long Jisas na Satan wantaim i no samting bilong painimaut husat i winim narapela long strong. Nogat, em i wanpela pait long husat bai inap long bihainim laik bilong God. Krais bai i mekim olsem olgeta taim, o nogat?
Krais em i kisim hevi na em i dai long sin bilong yumi. Tasol em i mekim planti moa samting long yumi tu. Ol hevi na dai em i wanpela hap tasol long pasin bilong em long bihainim tru olgeta tok na laik bilong God – em i givim em yet long God, na em i bihainim laik bilong God long olgeta tingting, toktok na pasin bilong em. Tude i gat tupela kain man i stap: wanpela kain man i sakim tok bilong God olsem lain bilong Adam, na ol lain bilong Krais i kisim pasin bilong em bilong bihainim tok bilong God.
SAMPELA TINGTING
Krais em i bihainim tok bilong God long olgeta tingting, toktok na pasin bilong em, bilong kisim bek yu. Tok tenkyu long em!
Ritim: Malakai 1:6-12
Bikpela I Gat Olgeta Strong i tokim ol pris olsem, “Pikinini i save aninit long papa bilong en, na wokman tu i save bihainim tok bilong bosman bilong en. Olsem na yupela harim. Mi papa bilong yupela. Bilong wanem yupela i no save aninit long mi? Mi bos bilong yupela. Olsem wanem na yupela i no save bihainim tok bilong mi?” —Malakai 1:6
Dispela tok Papa em i bikpela tok stret. Ol lain Juda i save kolim ol tisa bilong ol Papa. Na sampela ol sios bai kolim hetman bilong ol Papa tu. Papa i min olsem ol i mas givim biknem (rispektim) long dispela man. Papa em i man bilong respektim na harim.
Tasol i luk olsem dispela pasin i senis nau. Planti taim ol papa long tude i no save stap olsem gutpela papa bilong pikinini bilong ol. Na tu, planti ol pikinini i no save rispektim papa bilong ol; ol bai bikhet long papa bilong ol tasol. Na long planti ol muvi, ol bai lap tasol long ol papa.
Na planti ol papa i bin ranawe na lusim ol pikinini bilong ol. Ol i no stap olsem gutpela papa; ol i les long lukautim pikinini bilong ol. Tude dispela namba bilong ol papa nogut na bikhet pikinini wantaim i wok long kamap bikpela moa yet.
Na bikos planti ol pikinini i no save respektim ol papa bilong ol, na bikos planti ol papa i no save bosim gut pikinini bilong ol, nogut dispela i senisim tingting bilong yumi long Papa bilong yumi long heven. Bikos God em i Papa bilong yumi, i min olsem em i laikim tru yumi. Na moa, bikos em i Papa bilong yumi, yumi mas respektim em na lotuim em.
God em i gat planti ol nem long Buk Baibel. Na olgeta nem bilong em i putim ples klia olsem God em i husat. Na nambawan nem bilong em i Papa. Pikinini bilong em, Jisas Krais, i bin kamapim dispela nem ples klia! Sapos yumi i stap lain bilong Pikinini bilong God, orait yumi ken kolim God Papa bilong yumi. Dispela nem i putim ples klia olsem em i laikim yumi tru. Na moa, dispela nem i soim olsem yumi mas stap aninit long em, respektim em, honaim em, na lotuim em.
God, olsem Papa bilong yumi, i no save senis. Laikim tru bilong em i no inap pinis, na em i stap antap tru long yumi. Taim yumi i lukluk long ol papa bilong dispela graun, nogut yumi i paul long pasin bilong Papa bilong yumi long heven. Olgeta papa long dispela graun i mas lukluk long pasin bilong God long kisim save long pasin bilong ol gutpela papa.
God em i gat laik sapos ol pikinini bilong em i laikim em tru na respektim em na bihainim laik bilong em. Sapos yumi tok olsem God em i Papa bilong yumi, tasol yumi les long bihainim laik bilong em, i olsem yumi i kolim nating nem bilong em.
SAMPELA TINGTING
Taim yu prea long Papa bilong yu long heven, dispela nem i gat wanem mining insait long laip bilong yu?
Ritim: Stat 39:1-10
Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God. —Stat 39:9
I gat planti samting i wankain long Josep tupela Jisas. Tupela wankain i bin lusim haus bilong papa bilong ol; tupela wankain i daunim ol yet na bihainim laik bilong God; tupela wankain i kisim biknem antap tru long sia king; na tupela wankain i kisim bek sampela narapela manmeri.
Dispela i putim ples klia olsem planti samting long Olpela Testamen i lukluk i go long Nupela Testamen. Planti samting long Olpela Testamen i lukluk i go long Jisas. Tasol dispela Nupela Testamen i no autim nem bilong Josep, olsem na nogut yumi mekim planti tok tumas long Josep i wankain long Jisas.
Josep em i no laik mekim sin wantaim meri bilong Potifar. Planti lain long tude bai ting olsem Josep em i longlong pinis. Bilong wanem em i no laik slip wantaim meri bilong Potifar? Planti lain i laik bihainim pasin bilong bodi, na pasin pamuk em i samting long pilai nating.
Sapos yumi no bilip long Bikpela em i hat tru long save long pasin bilong Josep. Tasol Josep em i klia: “Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God.” Ol lain long dispela graun i save paul bikos ol i no klia gut long God bilong Josep.
Planti bilong yumi bai redi long mekim sin sapos i no gat wanpela long dispela graun inap lukim yumi i mekim dispela sin. Na tu i gat planti ol sin yumi no save mekim bikos Satan i no grisim yumi long mekim dispela sin; tasol sapos em i grisim yumi, ating yumi bai pundaun hariap long dispela sin tu, a? Yumi mas save olsem yumi gat bikpela laik long mekim sin, olsem na yumi no ken daunim ol narapela lain i pundaun long sin.
Na taim Josep i bihainim laik bilong God, em i bungim bikpela hevi stret. Ating planti lain long dispela graun bai lap long dispela – em i abrusim sin, tasol em i bungim hevi! Watpo na em i bihainim laik bilong Bikpela. Ol i kalabusim em!
Tasol yumi no ken paul. Taim yumi bihainim laik bilong God, planti taim bai yumi bungim ol hevi. Tasol yumi no ken wari. Taim yumi bungim dispela kain hevi, yumi mas klia – yumi stap long dispela gutpela rot bilong bihainim Bikpela, em dispela rot Jisas tu i bihainim.
SAMPELA TINGTING
Yu yet yu inap long autim dispela tok: “Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God”?
Ritim: Matyu 12:22-29, 43-45
Olsem na em bai i go kisim 7-pela arapela spirit ol i winim em long mekim pasin nogut. Na ol bai i go insait na stap long dispela haus. Pastaim dispela man i stap nogut, tasol nau em bai i stap nogut moa yet. Wankain pasin tasol bai i kamap long ol manmeri nogut bilong dispela taim. —Matyu 12:45
Jisas em i soim klia olsem em i wok bilong em long bagarapim dispela birua bilong em, Satan. Na nau em i autim wanpela tok piksa long ol. Spirit nogut i lusim pinis wanpela man. Tasol dispela spirit i save go nabaut long ples drai bilong painim wanpela hap em i ken malolo long en. Tasol em i no lukim wanpela gutpela hap, na em i go kisim 7-pela arapela spirit ol i winim em long mekim pasin nogut. Na ol i go insait na stap long dispela haus. “Pastaim dispela man i stap nogut, tasol nau em bai i stap nogut moa yet. Wankain pasin tasol bai i kamap long ol manmeri nogut bilong dispela taim,” Krais i tok.
Na tude ol dispela kain samting i wok long kamap long planti ol kantri. Longpela taim ol spirit nogut i wok long holim ol dispela kantri. Na ol spirit nogut i bin lusim sampela bilong dispela ol kantri.
Tasol, taim ol i kamap fri long dispela ol spirit nogut, planti taim ol gutpela spirit i no kam na stap long dispela kantri. Na sapos ol gutpela spirit i no kam pulapim dispela kantri, olsem Spirit bilong God, orait planti moa spirit nogut bai i kam pulapim dispela kantri. Na pastaim dispela kantri i stap nogut, tasol nau em bai i stap nogut moa yet.
Na dispela samting inap long kamap long ol man tu. Kain kain samting i ken wok long bosim man, tasol i no olsem dispela man i ken stap olsem wanpela haus i nogat samting i stap long en. Olgeta man i gat sampela samting i wok long bosim em.
Krais i no kam bilong brukim na bagarapim pawa bilong Satan tasol; em i kam bilong strongim kingdom bilong God. Em i kam long kisim bek yumi long pawa bilong sin na putim yumi aninit long dispela gutpela Masta, Jisas Krais.
Sapos yumi gat laik long klinim haus bilong yumi – na planti ol man i gat laik long lusim sampela samting nogut long laip bilong ol – tasol yumi les long larim Krais i kam bosim yumi, orait bai yumi stap nogut moa yet.
Yumi no ken klinim haus bilong yumi na larim em i stap emti. Bai yumi no inap. Yumi no inap i stap longwe long Satan sapos yumi les long stap long han bilong Bikpela. Taim yumi wok long bihainim Bikpela, orait long dispela taim tasol bai yumi inap lusim pawa bilong Satan.
SAMPELA TINGTING Yu save larim Bikpela i bosim olgeta hap long laip bilong yu, o nogat?
Ritim: Jona 3
Tasol i gat wanpela man i stap namel long yupela, em i winim tru Jona. —Matyu 12:41
Sampela taim, Bikpela bai strong moa yet long tokim ol profet bilong em long bihainim laik bilong em. Jona i sakim tok bilong God. God em i tokim em long go long hap san i kamap, tasol em i go long hap san i go daun. God i tokim em long go long Nineve long autim tok bilong em, tasol em i les na em i kalap long wanpela sip na i go daun insait long hasis bilong sip na i slip i stap.
Jona em i sakim tok bilong God, tasol solwara na win i bihainim laik bilong God. Na pis tu em i bihainim laik bilong God. Na bihain, Jona tu i bihainim tok bilong God, maski em i no amamas long mekim olsem. Na em i autim tok bilong God long Nineve.
I luk olsem laik bilong God bai i lus long dispela taim. Na taim pis i kam daunim Jona, i luk olsem Jona bai i dai na em bai i no inap long bihainim laik bilong God. Tasol God i gat laik long Jona i stap laip na i go long Nineve bilong autim tok bilong em, olsem ol lain bilong Nineve i ken tanim bel na harim tok bilong en tu.
Na tu, i luk olsem wok bilong Jisas i no inap kamap orait tu. God i salim em long bihainim laik bilong God long dispela graun. Tasol em i dai na ol i planim em. I luk olsem em i dai, na em bai i no inap long bihainim laik bilong God na autim tok bilong em. Tasol em i kirap bek long matmat, na gutnius bilong em i wok long go long planti hap long dispela graun, na planti lain manmeri i tanim bel na harim tok bilong en tu.
God em i gat laik long kisim bek dispela siti Nineve. Olsem tasol em i strong moa yet long Jona i mas bihainim tok bilong em. Em i gat laik long kisim bek ol lain long Nineve, na dispela em i olsem as bilong laik bilong em. God em i strong moa yet long Jona i mas bihainim laik bilong em bikos em i sori tru long ol lain long Nineve.
Jisas em i winim Jona. Jisas em i dai bikos em i bihainim laik bilong Papa bilong em, na em i kirap bek bilong kisim planti lain manmeri i kam bihainim laik bilong Bikpela long bilip. Jisas em i winim Jona bikos long bel bilong em i gat bikpela laik long bihainim laik bilong God long kisim bek planti manmeri. Em i redi long dai long bihainim laik bilong God. Na bel bilong Jisas i sori tu long ol lain i no save long Bikpela. Tasol Jona em i les long ol lain bilong Nineve.
God em i strong long yumi i mas bihainim laik bilong em, na em i gat laik long olgeta lain i mas tanim bel na bihainim em. Olsem na em i gat laik long yumi olgeta i redi na amamas long mekim wok bilong em bilong kisim planti manmeri i kam bihainim em long bilip.
SAMPELA TINGTING
Dispela stori bilong Jona i soim yu wanem samting long pasin bilong God? Na yumi mas i gat wanem kain tingting long ol lain i no save long Bikpela?
Ritim: Daniel 3:8-18
Mipela i save lotu long God tru. Sapos yu mekim long mipela olsem yu tok, orait God bilong mipela em inap long helpim mipela... Tasol sapos em i no helpim mipela, maski, mipela i no inap lotu long ol god bilong yu, na tu mipela i no inap brukim skru long dispela piksa gol yu bin sanapim. —Daniel 3:17-18
Taim yumi prea “mipela i mas bihainim laik bilong yu,” yumi prea long bihainim laik bilong God long graun olsem ol i save bihainim long heven.
Dispela tripela man i stap long ples stret ol i kolim Dura, ol i bihainim laik bilong God. Ol i save long God na laik bilong em tu. Ol i save olsem God i gat pawa bilong kisim bek ol long dispela paia. Tasol ol i no klia sapos dispela em i laik bilong God o nogat. Nogut em i laik bilong God long larim ol i kuk long paia. “Tasol sapos em i no helpim mipela, maski, mipela i no inap lotu long ol god bilong yu, na tu mipela i no inap brukim skru long dispela piksa gol yu bin sanapim.”
God em i save olsem yumi man i save gat laik long bihainim pasin bilong ol narapela tasol. Sapos olgeta narapela man i brukim skru taim ol i harim music, em bai i hat tru long putim bilip bilong yu i go long God na sanap tasol, maski ol narapela man i brukim skru. Planti ol yangpela i les tru long stap narakain long ol poro bilong ol. Na ol bikpela man i save pilim olsem em i hat tru long mekim narapela kain pasin long ol narapela man. Yumi no klia long wanem samting bai kamap long yumi sapos yumi bai bihainim laik bilong God.
Dispela tripela man i tok olsem ol bai i bihainim laik bilong Bikpela, maski God i kisim bek ol long dispela paia o nogat.
Pasin bilong bihainim laik bilong God em i nambawan samting. Yumi i no ken bihainim God bikos yumi i gat laik long kisim ol gutpela samting tasol. Pastaim yumi i mas bihainim em. Na trustim em tu.
Wanpela yangpela Kristen i bin stori long taim em i stap long wanpela kalabus nogut long taim bilong bikpela pait. Wanpela lapun man, em i wanpela Kristen, em i bin helpim em planti (na dispela man em i dai long dispela kalabus nogut). Wanpela de dispela yangpela man i bin askim dispela lapun man, “Yu ting dispela pait bai stap longpela taim yet, o em bai pinis hariap?” Dispela lapun man i bin bekim tok olsem: “Yumi no save hamas taim dispela pait bai stap yet, tasol dispela em i no bikpela askim. Bikpela askim i olsem: Bai yumi i stap olsem wanem long dispela pait?”
Yumi no save hamas taim bai yumi stap long dispela pait bilong God long dispela graun. Tasol bikpela askim i olsem: Bai yumi redi long sanap strong long bilip na bihainim laik bilong God, maski ol narapela i brukim skru long wanpela piksa gol?
SAMPELA TINGTING
Yu yet yu redi long sanap na bihainim laik bilong God bilong yu, o yu les?
Ritim: Mak 3:31-35
“Man o meri i save bihainim laik bilong God, em i brata na susa na mama bilong mi.”
—Mak 3:35
Planti taim ol Kristen bai kolim ol narapela Kristen ol brata na susa bilong ol. Na dispela tok em i gat bikpela mining bilong em.
Krais yet i tokim yumi long tingting long dispela komuniti bilong ol bilip lain olsem wanpela famili we God em i Papa na yumi olgeta i brata susa bilong ol narapela narapela. I no olsem Krais i tokim yumi long lusim famili tru bilong yumi. Em i gutpela sapos yumi lukautim ol wanblut bilong yumi. Krais yet i wari long mama bilong em taim em i stap long diwai kros (Jon 19). Tasol tu, Krais i skulim yumi olsem i gat narapela kain famili tu i stap, na dispela famili i no bilong blut. Nogat, dispela famili i kamap famili long Spirit bilong em, na dispela famili i winim ol narapela kain famili, na em bai i stap oltaim oltaim.
Sios bilong God, olsem famili bilong God, i no pas wantaim dispela graun. Nogat, sios i stap bilong bihainim laik bilong God. Em i dispela pasin bilong bihainim laik bilong God i mekim yumi i pas wantaim ol narapela brata na susa insait long famili bilong God.
Taim Krais i kirapim wok bilong em long bungim lain bilong em yet, em i kamapim wanpela nupela komuniti. Na em i putim Nem bilong Papa bilong em long maus bilong ol lain bilong em, na em i lainim ol olsem Papa God em i bosman bilong dispela famili bilong em. Olsem na dispela komuniti bilong Krais i olsem wanpela komunit i wok long bihainim laik bilong God.
Dispela famili bilong God i winim ol narapela famili. I mobeta yumi i lusim ol wanblut bilong yumi, long yumi i lusim ol brata na susa bilong yumi insait long famili bilong Krais. Yumi mas les long pasin bilong olgeta lain husat i sakim tok bilong God, maski yumi bungim hevi na pen long dispela rot.
Olsem na, sios bilong God i mas bung na wanbel long pasin bilong bihainim laik bilong God. Ol narapela samting olsem tok ples, pasin bilong ples, na olgeta arapela kain samting olsem in no inap long givim trupela wanbel long yumi.
Na taim yumi prea “mipela i mas bihainim laik bilong yu long graun olsem ol i save bihainim long heven,” i min olsem yumi gat bikpela laik long kisim planti ol narapela lain i kam insait long sios bilong Krais olsem ol brata na susa bilong yumi.
SAMPELA TINGTING
Yu save amamas long wanbel wantaim ol narapela lain insait long famili bilong God bikos yupela olgeta i gat laik long bihainim laik bilong God, o nogat?
Ritim: John 4:31-38
Na Jisas i tokim ol olsem, “God i bin salim mi na mi kam, na kaikai bilong mi, em long bihainim laik bilong em na long pinisim wok em i bin givim mi.” —Jon 4:34
Sapos wanpela ami i kamap long graun bilong birua bilong ol, ol i no kam long stap nating na malolo. Nogat! Ol i kam bilong mekim wok. Ol i kam long bihainam tok bilong ofisa bilong ol. Ol i mas bihainim tok pastaim, na bihain bai ol i go bek long kem bilong ol yet.
Dispela em i wanpela tok piksa long wok bilong Jisas. Em i kam long dispela graun long bihainim tok bilong God husat i bin salim em i kam. Em i gat wok long mekim, na em no ken surik liklik long dispela wok. Na taim em inapim laik bilong God pinis, orait em bai i go bek long em na tok, “Wok bilong mi em i pinis nau.”
Long taim Jisas em i autim dispela tok long dispela teks bilong tude, em i stap long hul wara bikos em i wokabaut longwe na strong bilong em i pinis. Ol disaipel i bin i go na kisim kaikai, na ol tokim em long kaikai. Tasol Krais i soim klia olsem em i no inap long tingting tumas long kaikai, bikos em i tingting long planti ol narapela samting i bikpela moa olsem kaikai. Em i tingim wok bilong bihainim laik bilong Papa bilong em. Dispela em i bikpela samting tumas.
Dispela kingdom bilong God i wok long kam long Samaria. Krais i bin givim wara bilong laip long wanpela meri nogut. Na taim em i sindaun long dispela hul wara na malolo, na em i tingim ol lain long dispela ples, em i lukim ol olsem i wanpela gaden. Dispela gaden i gat planti kaikai i stap long en, na dispela ol kaikai i ol lain bilong dispela ples husat i redi long bilip long Bikpela. Na Krais i luksave long bikpela wok ol disaipel bilong em i mas mekim long dispela gaden, bikos ol kaikai i redi pinis. Planti lain i redi long harim tok bilong em na bilip long em. Em i tingting long dispela bikpela samting, olsem na em i les long kaikai.
Taim yumi i klia gut long dispela amamas tru bilong Bikpela, bai yumi no inap long wari tumas long olgeta narapela samting olsem olgeta lain long dispela graun i save wari long em. Bai yumi redi long tingting long Krais na wok bilong em bipo yumi tingting long ol narapela samting.
Planti taim yumi i bisi long kaikai na dring bilong yumi. Tasol yumi mas klia long wanem samting i nambawan samting long laip bilong yumi. Na taim yumi putim wok bilong Krais i go pas long olgeta narapela samting long laip bilong yumi, bai yumi i kamap klostu moa long Masta bilong yumi.
Na taim yumi no bin kaikaim dispela gutpela “kaikai” bilong Masta bilong yumi pinis, orait yumi no inap save gut long em tu.
SAMPELA TINGTING
Wanem ol liklik samting i save pulim yu i go longwe long God?
Ritim: Hibru 10:1-7
“Orait nau mi tok olsem, ‘God, mi kam pinis. Olsem bipo ol i raitim tok long mi long buk. Nau mi kam pinis bilong bihainim laik bilong yu.’” —Hibru 10:7
Jisas i autim dispela tok i stap long Hibru 10:7 bipo long taim mama i karim em long Betlehem. Dispela Pikinini bilong God i bin tok tru antap taim em i stap long heven wantaim God triwan, na bipo long taim em i kam long dispela graun.
Dispela Pikinini bilong God husat i stap oltaim, em i lukim graun, na em i lukim yu na mi i pundaun na i gat bikpela hevi. Em i luksave olsem yumi no inap i go long em na mekim wok bilong em. Em i lukim olgeta ofa na lo bilong ofa long Olpela Kontrak na em i save olsem ol dispela samting em i tok piksa tasol long wanem samting bai i kamap bihain. Ol dispela ofa i no inap long bringim ol manmeri i kam long God o helpim ol i stap wanbel wantaim God bilong oltaim oltaim.
Na Krais i lukim dispela na long laik bilong em i tok, “Nau mi kam pinis bilong bihainim laik bilong yu, God bilong mi.” Dispela tok i olsem as bilong laip na dai bilong em. Sapos yu laik klia bilong wanem God i kamap olsem man na bilong wanem Krais i bungim ol hevi na dai long dispela graun, bekim i olsem: Mipela i mas bihainim laik bilong God long graun olsem ol i save bihainim long heven.
Krais i kam long bihainim laik bilong God. Na em i mekim olsem.
Long laik bilong God, Mama Maria i karim em long Betlehem na em i stap long Nasaret, long Jerusalem, long Getsemani na long Golgota. Na em i krai, “Em i pinis nau! Nau mi bihainim pinis laik bilong Papa long graun olsem ol i save bihainim long heven. God na Papa bilong mi, mi bihainim laik bilong yu pinis, olsem bipo ol i raitim tok long mi long buk.”
Krais i kam long bihainim laik bilong God, na em i kam long skulim ol bikhet lain long dispela graun long pasin bilong bihainim laik bilong God.
Taim ol sumatin i les long kisim skul, tisa bilong ol i sori tru, na ol bai amamas sapos wanpela sumatin tasol i kam na senisim tingting bilong olgeta narapela sumatin na dispela klas bai kamap gutpela stret. Na Jisas i wankain olsem dispela kain sumatin. Em i kam long dispela graun na em i wok long senisim bel bilong planti manmeri long dispela graun.
Na nau dispela Pikinini bilong Man i stap long heven, na Spirit bilong God i stap long dispela graun. Ol lain bilong Krais em ol i pikinini bilong bihainim tok bilong God. Ol i kamap fri long Spirit bilong Krais, olsem na ol i ken bihainim laik bilong God long graun olsem ol i save bihainim long heven.
SAMPELA TINGTING
Dispela teks i soim yu wanem samting long ol pasin bilong Krais?
Ritim: Matyu 6:5-15
Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven. —Matyu 6:9-10
Ol Kristen tasol inap long beten dispela prea bilong Bikpela Jisas. Ol narapela lain inap long autim ol tok long dispela prea, tasol ol i no inap long beten dispela prea tru tru. Taim yumi beten, yumi gat sampela laik olsem na yumi i askim. Na yumi i mas mekim wok tu. Taim yumi i mekim wok, dispela i mas soim klia olsem yumi i bel klin taim yumi i beten. Ol Kristen tasol i gat laik long bihainim laik bilong Papa bilong ol. Na pasin bilong ol bai soim klia dispela laik bilong ol.
Dispela tok long Matyu 6:9-10 i gat tripela askim, tasol i olsem ol dispela tripela askim i wanpela askim tasol. Long dispela tripela askim, yumi askim Papa long heven long pinisim wok bilong em bilong kisim bek ol lain bilong em: “Nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” Namba tu askim i kliaim namba wan askim: Taim kingdom bilong God i wok long kam, orait Nem bilong em bai i kisim hona na i stap holi. Na dispela tok long kingdom bilong God i mas i kam, i gat wanem mining? Mipela i mas bihainim laik bilong God long graun olsem ol i save bihainim long heven.
God bai i kisim olgeta hona na glori taim kingdom bilong em i kam pinis. Na kingdom bilong em bai i stap pinis taim olgeta lain i stap laip i bihainim laik bilong God.
Taim ol lain i autim dispela tok nating, i olsem ol i autim nating nem bilong God, na dispela em i samting nogut tru. Taim Bikpela Jisas i tok long pasin bilong mekim prea, em i tokim ol lain bilong em long ol i no ken mekim wankain olsem ol man bilong giaman i save mekim. Ol i autim tok nating. Tasol planti lain long tude i save autim dispela prea bilong Bikpela Jisas wankain olsem ol man bilong giaman i save mekim.
Tasol God i no amamas long dispela. I no laik bilong Krais long yumi i autim dispela wankain beten i go i go. Nogat, em i gat laik sapos yumi yusim dispela prea olsem wanpela eksampel long olgeta prea bilong yumi. Em i gat laik sapos yumi i laikim tru Papa bilong yumi, na bai yumi i bihainim olgeta laik bilong em long prea bilong yumi tu. Em i gat laik sapos yumi askim em long helpim yumi long bihainim laik bilong em long haus bilong yumi, famili bilong yumi, taun bilong yumi, kantri bilong yumi na long sios bilong yumi tu, olsem ol i save bihainim long heven.
SAMPELA TINGTING
Hau bai yumi i yusim dispela prea olsem wanpela samting long yumi i ken bihainim long olgeta prea bilong yumi yet?
Ritim: Lo 34
Olsem na Moses, wokman bilong God, i stap long dispela hap bilong graun Moap na i dai, olsem Bikpela i bin tokim em pinis. —Lo 34:5
Moses i mekim sin na dispela i pasim em long go insait long dispela graun God i promis long givim ol Israel. Dispela stori i stap long Lo 20:2-13. Moses i bel kros, na em i no bihainim tok bilong Bikpela olgeta. God i tokim em long tokim bikpela ston long mekim wara i kamap bilong dring, tasol em i belhat na em i singaut strong long ol manmeri – “Harim. Yupela ol manmeri bilong sakim tok!” Na em i paitim dispela bikpela ston.
Buk Song 106 i stori long dispela olsem: “Ol Israel i stap long wara Meriba na ol i mekim God i kros, na Moses i kisim hevi bilong asua bilong ol. Ol i mekim Moses i bel nogut tru na em i mekim tok i no stret” (lain 32-33).
Sapos Buk Baibel i givim risin wai Moses i mekim dispela sin, nogut yumi i daunim em long sin bilong em. Tasol Moses em i pes man bilong God, na dispela sin i pasim em long go insait long graun Kenan.
Moses em i namelman, na planti taim God i harim tok bilong em. Tasol God em i no harim krai bilong em long go insait long graun Kenan. God i tok: “Pasim maus. Yu no ken askim mi long dispela samting gen” (Lo 3:26).
Long dispela, God i soim olsem em i stretpela olgeta, na i gat wanpela stretpela namelman tasol i stap, em i Krais Jisas.
Dispela longpela wokabaut bilong Israel i pinis nau. Ol i stap long stretpela ples bilong Moap. Moses em i hetman, na em i lapun pinis na em i tokaut gen long kontrak bilong Israel wantaim God bilong ol (Lo 29-31). Moses i givim singsing long ol, na em i blesim wan wan lain bilong Israel (Lo 32-33). Bihain Moses i go antap long Maunten Nebo, na God i soim graun Kenan long em, klostu Israel bai i go insait long en. Na Moses i dai.
I no gat narapela man long Olpela Testamen i winim Moses, na i stap klostu moa long God olsem Moses. Na i no gat narapela man i olsem piksa bilong Jisas Krais, long soim ol tingting bilong God long ol Israel, na long stap olsem namelman bilong ol.
Dispela laip bilong dispela namelman bilong Olpela Testamen i soim yumi olsem tru tru yumi i nidim wanpela namelman. Na dai bilong em i putim ples klia olsem Jisas tasol inap i stap gutpela na trupela Namelman bilong yumi bilong oltaim oltaim.
SAMPELA TINGTING
Yumi ken lainim wanem samting long dai bilong Moses long Olpela Testamen?
Ritim: Namba 21:4-9
Bipo Moses i bin litimapim snek long ples nating, na long wankain pasin ol bai i litimapim Pikinini Bilong Man. Olsem bai olgeta man i bilip long em, ol i ken kisim laip i stap gut oltaim oltaim. —Jon 3:14-15
Taim God i mekim save long ol Israel, ol i sori long pasin bilong ol. Pastaim ol Israel i tok kros long longpela wokabaut ol i mas mekim, na long kaikai God i save givim ol. Bihain ol i tok kros long wok bilong Moses olsem hetman bilong ol, na long God yet. Na bihain ol i tromoi i go ol samting God i givim ol taim ol i belkros nogut tru. I olsem ol i sutim bel bilong God. Tasol taim ol i dai long ol snek nogut God i salim i kam long ol, long dispela taim tasol ol i krai long Moses na askim em long helpim ol na beten long Bikpela long em i ken rausim ol dispela snek nogut long ol. “Mipela i mekim sin pinis long Bikpela taim mipela i kros long Bikpela na long yu.” God i daunim ol stret, na nau ol i singaut long Moses na God long helpim ol.
Bekim bilong God i narapela kain bekim stret. Em i tokim Moses long wokim piksa bilong wanpela snek nogut na hangamapim antap long wanpela longpela pos. Na sapos ol snek nogut i kaikaim ol manmeri, orait ol i ken lukluk long snek bras na bai ol i orait gen.
500 yia samting bihain, ol lain Israel i wok long lotuim dispela snek bras, inap long taim wanpela gutpela king i brukim dispela snek bras (2 King 18:4).
Na sios bilong God i no inap lus tingting long dispela stori long lain Israel, bikos Nupela Testament tu i yusim dispela mak long skulim yumi. Jisas yet i yusim dispela stori long skulim Nikodemus. Pastaim em i daunim dispela hetman bilong lain Juda, na yumi tu, taim em i putim ples klia olsem man i man tasol, na em i no inap long kisim dispela laip God i givim em long strong bilong em yet. Na Jisas i yusim dispela stori long dispela snek bras bilong soim olsem em i samting bilong God long makim olsem wanem ol man bai i kamap orait gen.
“Bipo Moses i bin litimapim snek long ples nating, na long wankain pasin ol bai i litimapim Pikinini Bilong Man. Olsem bai olgeta man i bilip long em, ol i ken kisim laip i stap gut oltaim oltaim.” Dispela tingting i no hat tumas long yumi i ken kisim, tasol em i bikpela tok tru stret.
Yumi olgeta klostu i laik i dai, tasol yumi no gat marasin long oraitim yumi– tasol God i givim yumi Jisas long diwai kros. Yumi i ken lukluk long em na kisim laip.
SAMPELA TINGTING
Lukluk long Jisas olgeta de long taim yu mekim sin na no gat strong, na em bai i helpim yu.
Ritim: Namba 13:25-33
Tasol ol pipel bilong dispela kantri i strong tumas na ol taun bilong ol i bikpela tru na i gat strongpela banis. Na tu, mipela i lukim ol lain tumbuna pikinini bilong ol Anak i stap, ol i traipela man. —Namba 13:28
Klostu long tupela yia bihain long ol lain bilong Israel i lusim Isip, ol i kamap klostu long graun Kenan. Na Moses i makim 12-pela lida long 12-pela lain i go lukstil long dispela graun. Na ol i stap long Kenan inap long 40 de.
Taim ol i kam bek ol i karim i kam sampela naispela samting long dispela graun. Ol i karim niaspela kaikai stret, pikinini bilong diwai fik na pikinini biong diwai pomigranet, na ol bikpela han bilong diwai wain. Tasol 10-pela bilong dispela 12-pela man bilong lukstil i tok, “Ol i strong tumas. Yumi i no inap pait long ol” (lain 31).
Josua na Kalep i no wanbel long tok bilong ol narapela man. Tasol ol manmeri bilong Israel i les long harim tok bilong ol. Ol i bin wokabaut 2-pela yia samting na ol i les. Na ol i singaut nogut na ol i krai i go inap tulait (Namba 14:1).
Ol i bung, na ol i stori planti. Josua na Kalep i laik tokim ol lain olsem ol i ken bilip long God, tasol ol manmeri i les long harim. Ol i belhat nogut tru na klostu ol i laik tromoi ston long hetman bilong ol na kilim ol i dai. Tasol wantu ol manmeri i lukim bikpela lait bilong God i lait antap long haus sel – God i laik toktok wantaim Moses, na Moses i mas toktok wantaim God olsem namelman bilong Israel.
Buk Baibel i tok olsem ol Israel i no inap i go insait long dispela ples malolo bikos ol dispela manmeri i no bilip long God (Hibru 3:19). I no bikos ol lain Kenan i strong tumas o bikos ol man long Kenan i traipela man stret na banis bilong taun bilong ol i strongpela tru. Nogut. Em i bikos ol lain Israel i no bilip.
Na dispela i kamap ples klia long repot bilong tupela lain i go lukstil long Kenan tu. Sampela i bilip, na sampela nogat.
God i tokim sios bilong em long mekim gutpela wok long dispela graun. Sapos yumi no bilip na yumi tingting long mekim dispela wok, orait yumi bai pret na les bikos i luk olsem dispela graun i strong tumas long yumi. Tasol long bilip yumi bai klia olsem olgeta samting na olgeta manmeri bai brukim skru long pawa bilong Bikpela – ol traipela man na strongpela taun tu!
SAMPELA TINGTING
I gat sampela “traipela man” i wok long pretim yu yet na sios bilong God long tude tu?
Ritim: Kisim Bek 32:1-6, 15-20
Harim. Dispela em i god bilong yumi. Em i bin kisim yumi long Isip na bringim yumi i kam.
Kisim Bek 32:4
Taim yumi ritim dispela stori, planti bilong yumi bai i gat dispela askim: Watpo ol i mekim olsem? Nau tasol ol i bin harim strongpela nek bilong God: “Yupela i no ken bihainim ol giaman god.Yupela i no ken wokim wanpela giaman god.” Na ol i bin tok promis, “Mipela bai bihainim stret olgeta tok bilong Bikpela” (Kisim Bek 24:7).
Tasol nau, maski ol i harim pinis God bilong laip, ol i wokim wanpela giaman god. Watpo?
Yumi mas klia olsem, ol Israel, taim ol i lusim Isip, ol i stap longwe tru long lotuim dispela God bilong laip. Ol i no klia tumas long laik bilong God, na longpela taim ol i bin lukim planti pasin nogut long ol haiden lain. Ol i gat bikpela laik stret long lukim wanpela god ol inap lukim long ai bilong ol, na tasim long han bilong ol. Olsem na God i larim ol i stap longpela taim long maunten Sainai. Ol i mas lainim pasin na tingting bilong God, na ol i mas lainim pasin long bung na lotuim em insait long haus sel bilong God.
Na long dispela hap teks, Moses i bin i stap longwe long ol klostu long 6-pela wik samting. Na Aron – long dispela stori – em i no strong tumas, na em i no stiaim ol lain gut. Sampela lain i ritim dispela stori i tok olsem Aron na ol lain Israel i gat laik long lotuim God long dispela pikinini bulmakau ol i wokim long gol, olsem ol i brukim lo namba 2, na nogat lo namba 1. Tasol dispela i no tru – em i sin bilong wokim na lotuim ol giaman god.
Tasol nogut yumi laik daunim ol lain Israel stret. Ol i wokim sin, tasol yumi tu i lain bilong wokim na lotuim ol giaman god. Planti Kristen i tingting long daunim ol lain Israel stret, tasol ol yet i lutium God long Sande, tasol long Mande ol i lutim ol giaman god. Tarangu! Watpo ol i mekim olsem?
Sapos ol Israel i no gat namelman bilong ol, ol bai i lus pinis. Moses em i namelman bilong ol. Na bel bilong em i pulap long laikim tru long Israel, olsem na em i tanim long God. Na bel bilong em i pulap long belhat bilong God taim em i tok strong long ol.
Yumi tu, olsem lain bilong God long Nupela Kontrak, yumi nidim wanpela Namelman bilong yumi tu. Na laikim tru wantaim belhat bilong Jisas i helpim yumi long stap longwe long ol giaman god.
SAMPELA TINGTING
Yu yet i gat wanem kain ol giaman god long laip bilong yu?
Ritim: 1 Korin 11:23-32
Dispela kap wain em i nupela kontrak mi mekim long blut bilong mi yet. Olgeta taim yupela i dring long dispela kap, yupela i mas mekim olsem bilong tingim mi. —1 Korin 11:25
God i strongim dispela nupela kontrak long blut tu. Blut bilong Jisas Krais i kapsait long las alta. Olgeta manmeri bilong em i mas dringim dispela kap wain long strongim bilip bilong ol olsem ol i stap insait long dispela kontrak wantaim God.
Olsem ol lain bilong God long Olpela Kontrak i no kamap wantu long dispela graun God i promisim ol taim God i kisim bek ol long Isip, kain olsem ol lain bilong God long Nupela Kontrak i no lusim dispela graun wantu taim Krais i kisim bek ol. Ol i mas wokabaut long dispela graun yet. Tasol ol i no wokabaut wanpis; ol lain bilong God i marit wantaim em long wanpela kontrak i no gat pinis bilong en, na em bai i stap oltaim oltaim.
Long Kaikai bilong Bikpela yumi save amamas na tingting long dispela kontrak bikos yumi stap wanbel wantaim God. Olsem tupela i marit i mas amamas na wanbel wantaim bilong strongim marit bilong ol, wankain olsem long Kaikai bilong Bikpela yumi ken amamas na wanbel wantaim God bilong strongim laip bilong yumi insait long dispela kontrak.
Yumi no inap kamap long pinis bilong wokabaut bilong yumi long dispela graun, sapos yumi no wanbel wantaim God na em i no strongim yumi olgeta taim. Dispela Kaikai bilong Bikpela – dispela kaikai bilong kontrak – em i wanpela rot Bikpela i yusim long strongim yumi.
Pol em i putim klia olsem Kaikai bilong Bikpela em i bikpela samting stret taim em i toktok long ol Korin i no mekim stretpela pasin long Kaikai bilong Bikpela. Em i tok strong long ol lain i kisim kaikai bilong ol yet hariap, na sampela i save stap hangre (lain 20-22). Pol em i tokim ol olsem, God bai i mekim save long ol, long pasin nogut bilong ol.
I luk olsem ol lain long Nupela Kontrak tu i save mekim pasin nogut tu. Em tru, tasol taim yumi bung long Kaikai bilong Bikpela i no samting bilong putim laikim tru bilong God ples klia tasol; em i taim bilong mekim kontrak i kamap nupela gen. God i soim yumi olsem em yet i kisim bek yumi long kalabus. Na taim yumi kaikai na dring yumi promis gen long bihainim tok bilong God.
SAMPELA TINGTING
God i save strongim yu long Kaikai bilong Bikpela olsem wanem?
Ritim: Kisim Bek 24:1-8
“Dispela blut i strongim kontrak Bikpela i mekim wantaim yupela. Na ol dispela lo i as bilong kontrak.” Kisim Bek 24:8
Long Maunten Sainai, God na ol lain bilong em i bung wantaim na wanbel wantaim – na dispela kain bung i no kamap gen inap long taim Krais i kamap olsem bebi long Betlehem.
God i toktok long ol lain bilong em: “Na yupela i lukim mi bin karim yupela, olsem tarangau i karim nupela pikinini long wing bilong en. Na mi bringim yupela i kam long dispela ples, na nau yupela i stap wantaim mi. Sapos nau yupela i holim strong kontrak bilong mi na bihainim tok bilong mi, orait bai yupela i kamap lain manmeri bilong mi. Olgeta graun na olgeta manmeri i bilong mi, tasol mi bai makim yupela i stap lain manmeri bilong mi stret” (Kisim Bek 19:4-5). God i karim olgeta manmeri i lusim Isip long wara na long ples drai. Na hia, long Maunten Sainai, God i strongim dispela kontrak moa yet.
Moses, olsem namelman bilong kontrak, i stap namel long God na ol lain bilong em. Long “Buk bilong Kontrak” em i ritim tok bilong Bikpela (lain 7). Dispela em i olsem kontrak. Na ol manmeri i mekim promis: “Mipela bai bihainim stret olgeta tok bilong Bikpela.”
Namba tu hap bilong dispela bung i samting bilong tromoi blut i go. Hap blut Moses em i tromoi i go long alta (em i samting bilong God), na namba tu hap blut em i tromoi i go antap long ol manmeri, na em i tok, “Dispela blut i strongim kontrak Bikpela i mekim wantaim yupela” (lain 8).
I olsem tupela (God na ol lain bilong em) i marit pinis long blut bilong kontrak. God i makim Israel olsem lain tru bilong em, na ol manmeri i kisim God olsem Bikpela bilong ol. Nau em i tru olgeta: Israel i stap olsem manmeri bilong God.
God i no hariap na putim ol lain bilong em wantu long dispela graun em i promis long givim ol. Nogat. Em i gat laik olsem ol i mas wokabaut i go yet long ples drai.
Tasol ol i no wokabaut wanpis. Olsem ol manmeri i marit long dispela graun na ol i wokabaut wantaim long dispela laip, wankain olsem ol lain bilong God i wokabaut long dispela laip wantaim God bilong kontrak bilong ol. God i lukautim lain bilong em. Yumi ken bilipim strong bilong em. God em i putim ples klia olsem laikim tru bilong em i strong tru olsem pawa bilong em. Ol lain bilong God i mas bilipim em na bihainim em. God i wanbel wantaim lain bilong em long blut!
Long dispela samting yumi i ken tingim Jisas, em i bringim yumi i kam na bungim Bikpela, long wanem, dispela God bilong Kisim Bek em i Papa tru bilong Jisas.
SAMPELA TINGTING
Yu no stap wanpis, tasol yu wokabaut long dispela laip wantaim God husat i lukautim yu. Dispela i gat wanem mining insait long laip bilong yu?
Ritim: Rom 8:1-4
... Bai stretpela pasin bilong lo i ken kamap long laip bilong yumi, long wanem, nau yumi no save wokabaut long pasin bilong olpela bel. Nogat. Yumi save wokabaut long pasin bilong Holi Spirit. —Rom 8:4
Taim God i kisim bek ol lain bilong em long diwai kros, dispela i winim tru taim em i kisim bek ol lain bilong em long Retsi. Long namba wan taim God i kisim bek ol lain bilong em, God i brukim pawa bilong lain Isip, tasol long dispela namba tu taim God i kisim bek ol lain bilong em, God i brukim pawa bilong sin!
Nau ol lain bilong God inap bihainim lo bilong em. God i kisim bek ol long pawa bilong dispela birua i stap insait long bel bilong ol. Nau, dispela pawa bilong Holi Spirit i winim sin bilong ol, olsem na olgeta manmeri bilong God inap bihainim God bilong ol.
Rom 8:1-4 i putim dispela ples klia. Lo bilong sin na dai em i no bosim yumi moa, bikos lo bilong Holi Spirit i save givim laip long yumi, em i mekim yumi kamap fri. Spirit bilong God i stap insait long bel bilong yumi.
Taim ol lain bilong God long Olpela Testamen i kisim fridom long kalabus bilong Isip, ol i kisim lo bilong God. Em i gutpela samting stret, tasol ol i save sakim lo bilong God na ol i no save bihainim ol lo. Em i samting bilong Israel yet; asua bilong sin bilong ol i stap wantaim ol yet. Tasol God i gat plen bilong em na dispela lo em i i gat wok insait long dispela plen: “Taim ol man i kisim lo, na ol i kalapim lo moa yet. Ol man i mekim planti sin tumas, tasol God i marimari moa yet long ol” (Rom 5:20). Olsem na, God i givim lo long redim rot bilong Jisas Krais i ken i kam.
Ol lain i kisim Jisas Krais, ol i kisim trupela fridom pinis. I no olsem yumi stap fri long dai tasol. Nogat, yumi kisim stia bilong wokabaut gut long dispela laip tu! I no olsem God i lusim sin bilong yumi tasol. Nogat, em i skulim yumi long stap stretpela tu!
Na dispela olgeta em i wok bilong God. Em yet i kisim bek yumi long hevi bilong sin taim em i givim Krais long yumi, na em i givim Spirit long yumi olsem pawa bilong yumi long bihainim em.
Tude yumi stap namel long dispela taim we God i kisim bek yumi na yumi bai i kamap long dispela graun God i promis long givim yumi. Na long dispela taim yumi stap laip bilong litimapim nem bilong God. God i kisim bek yumi long wok bilong Jisas Krais, na em i helpim yumi long bihainim em long wok bilong Holi Spirit.
SAMPELA TINGTING
“Spirit bilong God em i pawa bilong yumi long bihainim God.” Yu save lukim dispela pawa long laip bilong yu yet, o nogat? Olsem wanem?
Ritim: Kisim Bek 20:1-17
“Mi yet mi Bikpela, mi God bilong yupela. Mi bin kisim yupela long Isip, dispela ples bilong wok kalabus, na mi bringim yupela i kam.Yupela i mas bihainim mi wanpela tasol. Yupela i no ken bihainim ol giaman god.” - Kisim Bek 20:1-3
Sapos yumi klia gut long wanem taim God i givim lo bilong em long Israel, yumi bai klia tu long wok bilong dispela lo, long mining bilong dispela lo, na long as bilong dispela lo insait long laip bilong ol lain bilong God.
Dispela lo i gat wok bilong em namel long taim ol i lusim Isip na long taim ol i kamap long dispela graun God i promis long givim ol. Israel i stap long ples drai klostu long maunten Sainai. Ol i lusim Isip pinis. God i kisim bek ol, na ol i stap fri. Marimari na strong bilong God tasol i kisim bek ol. God i sori long ol. I no wok bilong ol yet na ol i kamap orait. Wok bilong God tasol i mekim ol i kamap fri.
Nau ol i stap long ples drai, na ol i mas wokabaut long ples drai long kamap long dispela graun God i promis long givim ol. Na long dispela taim ol i kisim dispela lo, long stiaim ol long laip bilong ol. Dispela lo em i olsem wanpela kontrak wantaim God, i kisim bek ol pinis. Ol lo i kamap insait long dispela kontrak, long helpim ol i stap wanbel wantim God.
Olsem na, em i klia tru olsem dispela lo i no samting bilong kisim bek ol, long givim salvesen long ol. Tasol planti lain i save ting olsem ol i mas bihainim ol dispela lo bilong kisim salvesen.
Ol lain bilong Israel, tu, ol i ting olsem ol i mas bihainim dispela lo bilong kamap stretpela na long kisim salvesen. Olsem na Pol na olgeta lain i autim tok bilong God, ol i mas mekim planti wok long kliaim dispela; ol i mas autim planti tok long putim ples klia olsem dispela lo em i no rot bilong kisim salvesen, tasol tu, Krais i no tromoi dispela lo i go. Nogat, em inapim dispela lo.
God i kisim bek ol lain bilong em. Em i wok bilong God TASOL. Dispela lo i wok long stiaim yumi long bihainim God. Em i putim ples klia olsem wanem ol lain bilong God i mas wokabaut long dispela laip long tok tenkyu tru long God bikos em i kisim bek ol pinis.
Bihain, long Nupela Testamen, mining bilong dispela lo i kamap klia moa yet, na yumi kamap klia olsem wanem Holi Spirit i save stiaim yumi long bihainim dispela lo. Tasol wok bilong dispela lo, mining bilong dispela lo, i no senis: taim ol lain bilong God i bihainim dispela lo, ol i litimapim nem bilong God husat i bin kisim bek ol pinis!
SAMPELA TINGTING
Dispela lo bilong God i save stiaim laip bilong yu, o nogat?
Ritim: 1 Korin 10:1-11
Tasol God i no laikim pasin bilong planti bilong ol dispela lain manmeri. Olsem na ol i bin i dai long ples drai nating, na bodi bilong ol i bin slip nabaut long dispela hap. —1 Korin 10:5
Olgeta bilong yumi husat i kisim baptais long Krais, i lukim wok bilong God bilong kisim bek bilong yumi pinis. Yumi lusim pinis haus bilong kalabus na yumi kamap fri. Olgeta bilong yumi stap long dispela rot i go long dispela graun God i promis long yumi. Na moa, long taim Jisas Krais i kirap bek long matmat, i olsem yumi kamap nupela.
Na nau God i givim sampela strongpela tok long yumi, taim em i tokim yumi long wanem samting i bin kamap long ol tumbuna bilong yumi:
- Olgeta i bin kisim baptais long klaut
- Olgeta i bin kisim baptais long solwara
- Olgeta i bin kisim batpais long Moses
- Olgeta i bin kaikai long dispela kaikai Spirit bilong God i givim ol
- Olgeta i bin dring long dispela wara Spirit bilong God i givim ol
- Tasol, maski, God i no laikim pasin bilong planti bilong ol dispela lain manmeri. Faivpela taim God i tok olsem ol i stap wantaim lain bilong ol, tasol bihain God i tok olsem planti ol i no stap lain bilong em.
- Olgeta gutpela samting yumi kisim long Spirit bilong God, yumi kisim wantaim ol lain bilong God. I no olsem yu yet i wanpela Kristen i stap wanpis. Long kisim salvesen yumi mas bung wantaim Krais na ol lain bilong em tu. Tasol i no olsem yumi kisim salvesen long ol narapela. Nogat, yumi kisim salvesen long Krais tasol. Tasol taim yumi i bihainim em, yumi soim klia olsem yumi kisim dispela salvesen pinis. I no olsem taim yumi bung pinis wantaim Krais na kisim salvesen pinis, orait nau yumi ken i stap nating na malolo. Nogat. Yumi gat wok long bekim dispela gutpela presen nating God i givim yumi pinis.
- Wanpela lek bilong yumi stap pinis long dispela graun God i promis long givim yumi. Tasol nau yumi mas pasim ai gut long taim bilong bihain, na painim kingdom bilong God. Yumi mas les tru olgeta long ol samting nogut, olgeta narapela god tu. Nogut yumi lukim dispela graun God i promisim yumi pinis, tasol yumi lus yet. Nogut yumi kisim bagarap taim dispela graun i kamap klostu long yumi nau.
- Olgeta, olgeta, olgeta -- tasol, yet, God i no laikim pasin bilong planti bilong ol. Na Pol i tok,
“Na dispela olgeta samting i bin kamap olsem piksa, bilong yumi ken lukim na yumi no ken mangal long ol samting nogut, olsem ol i bin mekim” (lain 6). - SAMPELA TINGTING
- Sampela taim yu les, na yu save malolo long mekim wok long dispela salvesen God i givim yu pinis, o nogat?
Ritim: Kamapim Tok Hait 15:1-4
Ol i singim song bilong Moses, em wokman bilong God, na song bilong Pikinini Sipsip. Dispela song i olsem, “Bikpela, yu God I Gat Olgeta Strong, yu save mekim ol narakain strongpela wok, na taim mipela i lukim mipela i save kirap nogut tru...” —Kamapim Tok Hait 15:3
Ol lain i bin winim pait na daunim dispela wel animal i sanap i stap long arere bilong dispela solwara i olsem glas na ol i singim song bilong Moses na song bilong Pikinini Sipsip.
Ol toktok bilong God long Buk Baibel, long wok bilong Jisas long kisim bek, i bung insait long dispela teks long wanpela piksa na wanpela singsing. Dispela singsing i stori long namba wan taim God i kisim bek ol lain bilong em long han bilong Moses na namba tu taim God i kisim bek ol lain bilong em long han bilong Krais. Ol lain bilong God long olpela na nupela kontrak i bungim maus na presim God na i tok, “Bikpela, yu God I Gat Olgeta Strong, yu save mekim ol narakain strongpela wok, na taim mipela i lukim mipela i save kirap nogut tru. King bilong olgeta lain manmeri, ol pasin bilong yu ol i stret na i tru olgeta.”
Yau bilong yumi bai ting olsem singsing bilong Moses, na singsing bilong ol lain bilong Krais, ol i no wankain tru. Taim God i kisim bek ol lain bilong em na ol i stap fri long Retsi, ol manmeri i singsing, “Bikpela em i strongpela soldia tru. Bikpela tasol, em i nem bilong en” (Kisim Bek 15:3). Taim Jisas i kisim bek yumi pinis taim em i baim ol sin bilong yumi, na yumi kamap fri, orait yumi singim, “God em i laikim tru dispela graun....Em i God bilong laikim tru.”
Tasol yumi i singsing long wanpela God tasol, dispela God em i wokim salvesen bikos em i laikim tru yumi na em i mekim wok olsem Jas tu bikos em i stretpela olgeta.
Na birua bilong em i wankain tasol: belhat bilong king bilong Isip, na belhat bilong dispela wel animal - tupela i putim ples klia dispela birua bilong yumi em i husat tru: Satan. Olsem na yumi mas tenkyu tru long God long em i kisim bek yumi, na long laip bilong yumi, yumi mas soim dispela amamas na yumi mas laikim tru Jisas Krais na lain bilong em tu. Tasol ol man nogut i save laikim tru Satan na ol lain bilong em.
Dispela God em i wokim salvesen, em i wankain olgeta taim. Na birua bilong em i wankain tu, na God bai bagarapim em. Na singsing bilong ol lain i kisim salvesen pinis i wankain tu, bikos olgeta mas wokabaut long wara na kisim baptais long paia. Wok bilong God long kisim bek yumi i gat mak bilong em insait long wara tait, Retsi, na tu long holi baptais. Olgeta dispela samting i soim wok bilong God olsem Jas na olsem God bilong kisim bek yumi tu.
Olsem na, taim olgeta pait i pinis, olgeta manmeri bilong God bai presim em olgeta taim, bikos em i bikpela man bilong pait bilong Israel, na yumi bai laikim em tru oltaim oltaim.
SAMPELA TINGTING
Yusim dispela “singsing bilong Moses na Pikinini Sipsip bilong God” long Kamapim Tok Hait 15:3-4 bilong presim em.
Ritim: Kisim Bek 15:1-10
Bikpela yet i save mekim mi strong, na mi singim song bilong litimapim nem bilong en. Em i save kisim bek mi, na mi laik litimapim nem bilong en. Em i God bilong papa bilong mi, olsem na mi laik singim song long biknem bilong en. —Kisim Bek 15:2
Ol manmeri husat i stap fri, ol i save singsing. Na taim God i kisim bek yumi, em i gutpela sapos yumi i singsing. Olsem na ol sios long tude i save singsing planti. Olsem na heven i pulap long ol singsing bilong lotuim Bikpela. “Olsem na em i bringim ol manmeri bilong en i go. Na ol i singsing na amamas i go. Dispela ol manmeri em i makim pinis bilong em yet, ol i singaut na amamas na wokabaut i go” (Buk Song 105:43).
Ol lain Isip i kam long wesen olsem ol pis i dai pinis. Ol karis bilong ol i laik bagarapim ol lain bilong God, tasol nau wara i karamapim ol olgeta. Tasol biksi i karim ol singsing bilong ol lain bilong God i go.
Ating u yet yu no amamas wankain olsem Moses na Miriam, a?. Ating yu ting olsem em i hat tru long singsing taim yu lukim ol lain Isip i dai i stap long wesen, a? Tasol lait bilong God i skulim yumi olsem namba tu taim God i kam bilong kisim bek lain bilong em, long Jisas Krais, em i winim stret dispela namba wan wok bilong kisim bek i kamap pastaim.
Long namba wan taim God i kisim bek ol lain bilong em, em i lukautim laip bilong Israel, pikinini man bilong em, long taim em i kilim ol birua bilong em. Long namba tu taim God i kisim bek ol lain bilong em, God i kisim bek ol birua bilong em long taim em i ofaim laip bilong Pikinini Man bilong em long diwai kros.
Dispela namba tu taim i winim namba wan taim stret. Tasol long tupela wankain, God i stap olsem Jas taim em i kisim bek ol lain bilong em. Salvesen bilong God i gat dai na pen bilong em tu- na dispela i no bikos God em i no pulap long laikim tru. Nogat, em i bikos sin em i nogut stret.
Na taim yumi i kisim salvesen pinis, bikpela samting i olsem: Yumi mas singim ol song bilong litimapim Bikpela, em i kisim bek yumi na yumi stap fri.
SAMPELA TINGTING
Beten long God long presim em bikos em i kisim bek yu na yu i stap fri.
Ritim: Kisim Bek 14:21-31
Long dispela de Bikpela i kisim bek ol Israel long han bilong ol Isip, na ol Israel i lukim ol bodi bilong ol Isip i slip i stap long nambis. Ol i lukim dispela bikpela wok Bikpela i bin mekim bilong winim ol Isip. Na ol manmeri bilong Israel i pret na i stap aninit long Bikpela...”
—Kisim Bek 14:30-31
Tupela taim long dispela lain yumi ritim “ol i lukim.” Ol ai bilong Israel i bin lukim planti ol samting nogut tru. Ol i lukim pinis ol lain bilong ol i kisim bikpela bagarap long ol bosman bilong Isip. Ai wara bilong ol i pundaun na ol i lukim ol liklik pikinini man bilong ol i dring wara na i dai long wara Nail. Taim ol i harim ol tok bilong Moses, ai bilong ol i lukim ol bikpela hevi moa tasol i kam long ol long han bilong ol wokboi bilong king bilong Isip. Ol i karim planti pen tru na ai bilong ol i les long lukim.
Tasol nau lek bilong ol i sanap long wesan na ol i lukim ol Isip. Ol i lukim bodi bilong ol Isip i slip i stap long nambis. Wara bilong tais God i wokim i bagarapim ol lain nogut, na ol Israel i stap laip yet na ol i lukim. Ol i lukim han bilong God, Bikpela bilong Israel, em i Bikpela bilong Isip tu. Dispela Man bilong Kisim Bek i mekim bikpela wok stret. Bipo ol Israel i bin lukim na pilim pawa nogut bilong king bilong Isip. Tasol nau ol i lukim “bikpela pawa bilong Bikpela i bagarapim ol Isip.”
Tasol Bikpela i laik soim bikpela strong bilong em long ol. Olsem na em i kisim bek ol na ol i no bagarap,
olsem em i bin promis long ol. Em i tok strong long solwara Retsi na solwara i kamap olsem graun i drai. Olsem na em i bringim ol manmeri i gona ol i brukim dispela solwara olsem man i wokabaut long graun i drai. Em i kisim bek ol long han bilong ol man i birua long ol. Em i helpim ol na ol birua i no bagarapim ol. Bikpela i mekim olsem, na ol manmeri bilong en ol i bilipim ol promis bilong en, na ol i litimapim nem bilong en
long ol song bilong ol. Buk Song 106:8-10, 12
Planti taim long laip bilong yumi tu, yumi lukim han bilong God – sampela taim yumi lukim pawa bilong God long oraitim sik o pawa bilong em long bagarapim birua bilong em o long tanim bel bilong ol sinlain.
Tasol planti taim yumi bilip tasol. Long save bilong em, na long laik bilong em, sampela taim God i askim yumi long wetim em, na wetim em moa yet. Na taim God em i kirap, em bai bagarapim ol birua bilong em na bilong yumi tu. Na Saion bai singim song bilong em – yumi i stap fri! Fri olgeta! Tenkyu God!
SAMPELA TINGTING
Yu yet yu lukim pawa bilong han bilong God long laip bilong yu?
Ritim: 1 Tesalonaika 4:13-18
Ol brata, mipela i laik bai yupela i ken save gut long wanem ol samting bai i kamap long ol manmeri i dai pinis... yumi manmeri i gat laip na i stap yet, yumi bai i no inap i go paslain long ol manmeri i dai pinis. Nogat. —1 Tesalonaika 4:13,15
Ol Kristen lain long dispela nupela sios, ol i gat laik sapos Krais i kam bek hariap. Ol i wet i stap; ol i wetim em i kam. Planti taim tingting bilong yumi long tude i no wankain, olsem na yumi save paul long dispela hevi bilong ol dispela lain bilong Tesalonaika.
Ol i ting olsem klostu Jisas bai kam na soim em yet olsem king tru. Tasol ol i hop i stap, na sampela taim bihain sampela bilong ol i dai.
Taim ol Kristen lain long dispela sios long Tesalonaika i planim wanpela bilong ol long matmat, ol i save bel hevi nogut tru long tupela samting. Ol i sori, olsem wanpela bilong ol i dai, tasol tu ol i ting olsem ol lain i dai pinis ol bai i no inap amamas na lukim dispela taim Jisas Krais bai i kam bek. Klostu dispela de bai kam, ol i ting, tasol nau ol lain i go pinis na i dai, ol i no inap lukim dispela naispela samting stret.
Tasol Pol i tokim ol lain long Tesalonaika olsem ol i no ken wari. I no olsem ol lain i stap laip yet taim Krais i kam bek i winim ol lain i dai pastaim long Krais i kam bek. Ol i no inap i go paslain long ol manmeri i dai pinis. Nogat. “Ol man i bilip long Jisas na i dai pinis, ol bai i kirap bek pastaim,” lain 16 i tok.
Tasol i no samting bilong winim narapela. Nogat, ol lain i dai pinis na ol lain i stap laip yet, olgeta wantaim bai i go bungim Bikpela taim Krais i kam bek. Ol bai i bung antap long klaut. Na olgeta bai bung wantaim na i go i stap laip wantaim Bikpela oltaim oltaim.
Em tru, yumi ken i gat laik long lukim Bikpela pastaim long yumi i dai. Tasol, sapos Bikpela i laik olsem yumi mas i dai pastaim, em i orait bikos yumi bai i bung wantaim ol narapela bilip lain long De bilong Bikpela.
SAMPELA TINGTING
Sapos yumi tingting planti long dispela De bilong Bikpela, dispela bai i senisim laip bilong yumi tude olsem wanem?
Ritim: Stat 50:22-26
Olsem na nau Moses i kisim ol bun bilong Josep na karim i go... —Kisim Bek 13:16
Olgeta manmeri bilong God i gat hop. Yumi klia, a? God bai mekim sampela samting bihain, maski yumi i no lukim dispela samting yet! Yumi mas klia tru long dispela, olsem na yumi save wokabaut long dispela rot long dispela hop – yumi wetim sampela samting i bai kamap bihain.
Ol bilip lain long Israel tu i gat hop, maski ol i stap longtaim long Isip. Isip i no kamap olsem ples tru bilong ol.
Josep i save olsem, Isip i no kantri tru bilong em, maski em i bikman tru long Isip. King bilong Isip tasol i stap antap long em. Josep i bosim kantri Isip, na em i wari long Isip, na em i lukautim Isip gut. Sampela i bin tok olsem Josep em i man bilong kisim bek Isip. Tasol yet Josep i tok, “Em i no ples tru bilong em. Mi kisim pinis ol promis bilong God bilong Abraham, bubu bilong mi.”
Josep i no lukim God i kam na inapim olgeta promis bilong em. Nogat, Josep i stap laip na em i dai long hop, na long bilip bilong em i tokim ol pikinini man bilong Israel long kisim ol bun bilong em i go wantaim ol long graun God i bin promisim ol. Em i soim olsem em i bilipim tru tok bilong God.
430 yia samting bihain long taim ol brata bilong em i salim em olsem wokboi long Isip (Kisim Bek 12:40), ol i karim kofin bilong em i lusim Isip na wokabaut i go long dispela graun God i bin promisim em.
Yumi stap lain bilong les long wet. Yumi save gat laik olsem olgeta samting i mas kamap hariap tasol. Tasol tingting bilong God i no wankain. God i lukim yumi olsem liklik hap bilong bodi, na plen bilong em i kirap long wanpela lain manmeri na i go inap long tumbuna bilong ol, i go i go. Na em bai wok long inapim plen bilong em long dispela rot. Olgeta promis bilong em i tru, na tru olgeta.
Olsem na yumi gat hop. Taim yumi wokabaut long dispela laip, yumi no ken tingting long ol samting long graun tasol. Nogat, yumi mas tingting long wanem samting bai kamap bihain. Dispela graun i no graun tru bilong yumi, maski yumi mas mekim gutpela wok long stap gut long dispela graun. God i promisim wanpela nupela graun long yumi. Na dispela promis i mas bosim pasin na laip bilong yumi long tude.
SAMPELA TINGTING
Tok tenkyu long God long dispela hop em i givim yu na olgeta narapela i bilip long em tu.
Ritim: 1 Korin 5:6-8
Olsem na yupela i mas rausim olgeta olpela yis, bai yupela i ken i stap olsem nupela bret i no gat yis. Mi save, yupela i stap pinis olsem bret i no gat yis, long wanem, ol i ofaim pinis Krais, na em i olsem sipsip yumi ofaim long Bikpela De Bilong Tingim De God I Larim Ol Israel I Stap Gut. —1 Korin 5:7
Krais em i olsem Sipsip yumi ofaim long Bikpela De Bilong Tingim De God I Larim Ol Israel I Stap Gut. Em i dai long sin bilong yumi. Blut bilong em i kisim bek laip bilong yumi. Nau yumi stap manmeri bilong God, na yumi stap fri bilong lotuim Bikpela bilong yumi.
Pol i tok olsem ol i mas rausim olgeta olpela yis long ol Kristen lain. Em i tingim wanpela kastam ol lain Juda i bihainim sampela taim: Ol pikinini bilong Juda i save raun long haus long painim olpela yis (ol papamama i save haitim sampela liklik hap olpela bret) klostu long taim bilong Bikpela De Bilong Tingim De God i Larim Ol Israel i Stap Gut.
Pol i tok olsem yumi i bin holim dispela Bikpela De Bilong Tingim De God i Larim Ol Israel i Stap Gut pinis. Em i no min olsem yumi makim dispela de wanpela taim long wan wan yia. I min olsem, Krais i kisim bek yumi long wanpela taim na dispela em inap tru long yumi.
“Olpela yis” – em i sin bilong olpela bel bilong yumi – em i samting bilong dispela taim bipo long Krais i kisim bek yumi. Em i samting bilong ol sin na ol pasin nogut. Em i no samting i ken i stap insait long bung bilong ol manmeri i kisim salvesen pinis long Jisas Krais.
Bikos Krais em i kamap pinis olsem ofa, yumi mas rausim olgeta olpela yis bilong sin long laip bilong yumi. Yumi stap lain bilong God nau, olsem na olgeta samting nogut yumi mas tromoi i go.
Yumi olgeta i save olsem yumi save mekim sin yet, maski Krais i kisim bek yumi pinis. Krais i brukim pinis pawa bilong sin, tasol dispela pawa i wok long bagarapim yumi yet long dispela graun. Tasol dispela i no min olsem yumi ken ting em i no bikpela samting taim ol Kristen i save mekim sin. Em i bikpela samting; Buk Baibel i tok olsem em i bikpela samting stret.
Ol lain i bilip long Krais husat i gat sampela olpela yis insait long laip bilong ol, wantu ol i mas rausim dispela olpela yis. Wanpela Kristen i no wanpela man i bin kamap stretpela tasol. Na sios bilong Krais i no wanpela bung i bin kamap orait tasol. Nogat, ol Kristen na sios wantaim i mas kamap nupela samting olgeta!
Dispela olpela yis em i samting nogut na i no ken i stap insait long bodi bilong Krais. Em i doti samting nogut tru, na em i samting bilong rausim na tromoi i go longwe long yumi.
SAMPELA TINGTING
Skelim laip bilong yu yet. Sampela “olpela yis” i stap yet long laip bilong yu, o nogat? Askim God long helpim yu i rausim dispela olgeta olpela yis.
Ritim: Kisim Bek 12:1-13
Dispela blut yupela i bin penim long haus bilong yupela bai i stap olsem mak. Na taim mi mekim save long ol Isip bai mi lukim dispela blut na bai mi abrusim ol haus bilong yupela na larim yupela i stap gut. —Kisim Bek 12:13
Ol Israel i bin i stap long kalabus bilong Isip inap 400 yia samting taim God i kisim bek ol long dispela kalabus. Long dispela nait ol i kaikai bilong makim de God i larim ol i stap gut. Na ol i mas kaikai kumu i gat pait bilong tingting long kalabus nogut bilong ol. Na taim ol i kaikai dispela bret i no gat yis, ol bai i tingim olsem ol i mas i go hariap na lusim Isip. Olsem tasol tu ol i sanap na kaikai na holim stik bilong wokabaut. Tasol wanpela bikpela samting i olsem dispela kaikai i lukluk i go long dispela Pikinini Sipsip bilong God em bai i kamap bihain. Ol i penim blut bilong sipsip long tupela pos bilong dua bilong haus bilong ol na em i makim dispela blut bilong dispela Pikinini Sipsip bilong God. Na taim ol i kaikai dispela pikinini sipsip long Isip, i olsem ol i wanbel wantaim dispela Pikinini Sipsip bilong God i kisim bek ol.
Na olgeta taim bihain long dispela nait, ol i wok long tingim dispela samting long Bikpela De Bilong Tingim De God i Larim Ol Israel i Stap Gut. Ol i tingim taim God i abrusim ol haus bilong ol na larim ol i stap gut, bikos ol i penim pinis blut bilong pikinini sipsip long tupela pos bilong dua bilong haus bilong ol.
Dispela stori long Olpela Testamen long taim God i kisim bek ol Israel, i lukluk i go long stori bilong Kisim Bek bilong Nupela Testamen. God bai i kam olsem jas, na i no gat wanpela bikpela haus o wanpela liklik haus na God bai abrusim dispela haus. Tasol ol lain bilong God, ol lain i stap long haus bilong God bikos ol i kisim pinis blut bilong Pikinini Sipsip bilong God, God bai abrusim haus bilong ol, na ol bai i stap gut.
Olsem na yumi no ken i stap long sin bilong yumi inap long Bikpela De bilong God. God em i les olgeta long sin, olsem na em i salim Pikinini bilong em yet long dai long diwai kros long baim sin bilong yumi. Olsem na yu mas klia olsem yu yet yu man bilong sin, na God em i les olgeta long sin.
Na moa, yu mas bilip olsem dai bilong Jisas i bilong kisim bek yu yet. Yu mas bilipim tru tok long Olpela Testamen na long Nupela Testamen, olsem tupela wantaim i tokim Jisas olsem: “Lukim. Em i Pikinini Sipsip Bilong God. Em i kam bilong rausim sin bilong olgeta manmeri bilong graun” (Jon 1:29). God em i laikim yumi tru, olsem na em i salim Pikinini bilong em long dai long kisim bek yumi.
Na God i singautim yumi long kam na amamas long dispela Bikpela De Bilong Tingim De God i Larim Ol Israel i Stap Gut: I min olsem yumi ken amamas na wanbel wantaim Jisas Krais na olgeta manmeri bilong em tu. Yumi abrusim kalabus bilong sin na pe bilong sin tu. Yumi kamap fri bilong lotium God bilong yumi, na yumi wokabaut i go long dispela graun God i promisim yumi.
SAMPELA TINGTING
Taim yumi save gut long as bilong dispela Bikpela De Bilong Tingim De God i Larim Ol Israel i Stap Gut, em bai strongim mining long Kaikai bilong Bikpela long tude tu, a?
Ritim: Kamapim Tok Hait 16:1-9
Orait mipela i save pret long Bikpela na i stap aninit long em, olsem na mipela i save wok long kirapim tingting bilong ol man bai ol i bilip long em... Olsem na mipela i kisim maus bilong Krais na autim tok bilong en. I olsem God yet i singaut long olgeta man long maus bilong mipela. —2 Korin 5:11,20
Ol sios na ol lain i save bilip olsem klostu God bai i kam bek long dispela graun olsem jas, ol i save strong tru long autim tok bilong God long ol narapela lain. Ol lain long kain kain ples na kain kain taim ol bai i wok long tok strong long olgeta manmeri long ol i mas “kisim Jisas Krais” olsem rot bilong abrusim dispela kot bilong God i wok long kamap klostu.
Taim yumi klia olsem paia bilong God bai i kam, orait bai yumi no gat taim long les na stap nating long dispela graun.Taim yumi bilip olsem belhat bilong God bai kapsait long dispela graun, na sapos yumi save sori long ol arapela, bai yumi kisim maus bilong Krais na autim tok bilong en.
I no min olsem, yumi mas raun na tokim olgeta manmeri olsem God bai i kam na kukim ol. Tasol sapos God i givim yumi taim bilong stori wantaim ol narapela lain, yumi ken soim ol olsem insait long sios bilong God bai yumi ol Kristen lain i sinduan na bung na stori wantaim, na strongim ol narapela narapela. Yumi mas soim laikim tru long ol pastaim long toktok na pasin bilong yumi long ol lain i stap ausait long sios.
I no olsem wanpela rot tasol i stap bilong autim tok bilong God long ol narapela. Na i no samting bilong toktok tasol. Yumi mas soim laikim tru bilong God long ol narapela long pasin na toktok bilong yumi.
Tasol yumi mas klia – sapos yumi bilip olsem belhat bilong God bai kapsait long ol lain i wok long pasim wok bilong kingdom bilong em, orait pasin bilong yumi i mas senis. God bilong bel isi em i God bilong paia tu. Dispela Bikpela i laikim yumi tru, em i dispela God husat i bin salim dispela namba 10 samting nogut long ol lain bilong Isip tu.
Taim God i singautim Moses long lusim toktok wantaim king bilong Isip, paia na belhat bilong God olsem Jas i stap tasol. Tasol taim bilong marimari i stap yet tude, na olsem pesman bilong Krais, yumi mas mekim wok long autim tok long olgeta lain long dispela graun. Tasol dispela taim bilong marimari bai pinis!
SAMPELA TINGTING
Bilong wanem yumi save pret long autim tok bilong God long ol narapela lain?
Ritim: Kisim Bek 11
Moses i belhat nogut tru na em i lusim king na i go ausait. Bikpela i tokim Moses olsem, “King bai i no inap harim tok bilong yu, olsem na bai mi ken wokim sampela mirakel moa long Isip” — Kisim Bek 11:8-9
Taim God i wok long toktok tasol long King bilong Isip, long mausman bilong em Moses, ol lain bilong em i no kamap fri. Olsem na God i mas mekim wok bilong em olsem jas. Bihain long taim God i salim tenpela samting nogut i kamap long Isip, ol Isip i kamap klia tru long pawa na biknem bilong God bilong Israel. Taim God i salim ol dispela samting nogut long Isip, long dispela taim tasol lain bilong Israel i kamap fri.
Dispela samting i bin kamap long Isip, em i mas kamap long graun bilong yumi tude tu: Ol lain i kisim ol bikpela hevi long han bilong birua bilong ol, i no inap kamap fri inap long taim dispela graun i lukim ol wok bilong God olsem jas. Bel bilong ol bai i pas, God bai i mekim ol i kamap bikhet tru, na God bai i larim ol i stap long sin bilong ol yet. Taim ol i sakim tok bilong God olgeta taim, na God em i les tru long dispela, ol bai i lukim kot bilong God. God em i God. Wanpela de olgeta manmeri bai klia long dispela samting!
Long Kisim Bek 11, Moses em i lusim haus bilong King bilong Isip, we em i wok long tokim king long larim Israel i go. Taim em i lusim king bilong Isip, Moses em i belhat tru. Kam, bai yumi stori moa long dispela belhat bilong Moses. Taim Moses em i yangpela, em i wok long stretim ol hevi long lain Israel long strong bilong em yet. “Na Moses i lukim wanpela man bilong Isip i wok long paitim nogut wanpela Hibru, wanpela wantok bilong em yet...na kwiktaim em i kilim i dai dispela man bilong Isip na karamapim em long wesan” (Kisim Bek 2:11-12). Tasol nau, olsem mausman bilong God, em i belhat bikos em i save olsem God em i belhat long king bilong Isip.
“Moses i belhat nogut tru na em i lusim king na i go ausait.” Mausman bilong God i ken lusim haus bilong King bilong Isip. Toktok em i pinis nau. King bilong Isip i bikhet tumas. Dua bilong bel isi i pas pinis. Kot bilong God bai kam nau. Skin bilong Moses i les olgeta. Olsem na God i toktok long em, na sori long em, na em i givim bel isi long em. God em i tokim Moses olsem em bai bekim dispela prea bilong Moses (em i prea bilong olgeta pikinini bilong God): “Nem bilong yu i mas i stap holi.”
Nambawan samting bilong olgeta samting i kamap long dispela graun i no salvesen bilong yumi; nogat, em i olsem dispela: Nem bilong God i mas kisim olgeta glori. Taim Krais i daunim olgeta birua bilong em pinis, God bai i stap olsem olgeta samting long olgeta samting, na olgeta samting long olgeta manmeri. God em i kisim olgeta glori taim em i kisim bek ol lain bilong em na mekim ol i kamap fri. Na tu Nem bilong em bai kisim glori na kamap holi taim em i mekim save long ol birua bilong em.
SAMPELA TINGTING
Taim Nem bilong God i no kisim glori tude, yu yet yu save belhat long dispela?
Luke 4:16-30
Spirit bilong Bikpela i kam i stap long mi, long wanem, Bikpela yet i kapsaitim wel long het bilong mi bilong makim mi bilong i go bringim gutpela tok bilong en long ol rabisman. Na em i salim mi i kam long tokaut long ol man i stap long kalabus long ol i ken lusim kalabus na i go fri, na long tokaut long ol man i aipas long ol i ken lukluk gen. Em i salim mi i kam long pinisim hevi bilong ol man, ol arapela i wok long daunim na mekim nogut long ol.
—Luke 4:18
Jisas i tok olsem, God i salim em i kam long tokaut long ol man husat i stap long kalabus long ol i ken lusim kalabus na i go fri. Taim em i kam, em i taim bilong ol kalabus lain i ken kamap fri. Dispela tok i kain olsem tok bilong Moses taim em i toktok long King bilong Isip. Tasol Jisas i stap long haus lotu bilong ol long Nazaret, as ples bilong em.
Na ol lain bilong Nazaret i bekim dispela tok bilong Jisas, wankain olsem King bilong Isip i bekim tok bilong Moses.
Olsem na, dispela stori i soim yumi olsem, long Nupela Testamen, ol lain i save kalabusim na givim hevi long ol narapela lain i no lain Isip o lain Rom, na ol lain i stap long kalabus i no kam long wanpela kantri tasol. Ol manmeri bilong God i ol dispela manmeri i wetim kingdom bilong God. Jisas i wanbel wantaim ol na ol i kisim em olsem Saviour bilong ol.
Dispela tok bilong Krais i no samting bilong salvesen bilong yumi tasol. Tru, nambawan samting Jisas i kam long mekim em i bilong kisim bek yumi long sin. Tasol dispela Spirit i stap long Jisas na long ol lain bilong em, em i spirit bilong ol stretpela na gutpela pasin, na spirit bilong laikim tru ol rabislain na ol lain i kisim hevi long birua bilong ol. Em i samting bilong olgeta samting long laip long dispela graun. Krais i kam bilong pinisim hevi bilong ol man taim ol arapela i wok long daunim na mekim nogut long ol.
Taim ol lain bilong God i autim dispela tok, sampela bai wok long tok nogat long dispela tok. Sampela ol Kristen lain bai tok olsem dispela tok long pinisim hevi na kalabus long ol lain taim ol arapela i mekim nogut long ol, em i spiritual samting tasol. Tasol ol i tok olsem bikos i gat sampela narapela lain i no autim nambawan wok bilong Krais bilong kisim bek yumi long ol hevi long sin bilong yumi, na ol save toktok tumas long ol samting bilong politiks na ol kain samting olsem long dispela graun.
Tasol wok bilong Krais bilong kisim bek yumi i stat long taim bilong Moses, na i wok yet long yumi taim yumi i stap olsem pesman long Krais long dispela graun. Gutnius bilong kingdom bilong God i tok nogat long olgeta pasin nogut i wok long daunim, bagarapim, na kalabusim ol gutpela man. Na gutnius bilong kingdom bilong God i wok long sanapim nupela na gutpela pasin long dispela graun.
SAMPELA TINGTING
Beten long ol Kristen i wok long helpim ol rabislain in bungim ol hevi long ol birua bilong ol.
Ritim: Kisim Bek 5:15-6:1
Na ol bosman i tokim tupela olsem, “Bikpela i lukim pinis pasin bilong yutupela, na bai em i ken mekim save long yutupela, long wanem, yutupela i mekim king wantaim ol hetman bilong en i ting mipela i samting nogut tru. Yutupela i wokim rot long king i ken kilim mipela i dai.” —Kisim Bek 5:21
Long taim bilong God stret, Moses i no pret na em i autim tok bilong God, Bikpela bilong em, long King bilong Isip, dispela king i wok long givim hevi long ol manmeri bilong God, olsem: “Bikpela, em God bilong mipela Israel, em i tok olsem, ‘Larim ol manmeri bilong mi i go!’” (Kisim Bek 5:1)
Taim King bilong Isip i harim dispela tok, em i autim strongpela tok bilong em yet. Ol wokboi bilong em i tokim ol Israel olsem: "King i tok, mipela i no ken givim gras moa long yupela...tasol yupela i mas wokim planti brik olsem bipo...” (lain 10). Ol i mas mekim planti ol brik wankain olsem ol i bin mekim bipo, tasol ol yet i mas go nabaut na painim gras.
Taim mausman bilong God i tok, “Bikpela, em God bilong mipela Israel, em i tok,” wantu ol mausman bilong King bilong Isip i tok, “King i tok.”
Tok bilong God i wok long mekim ol lain i kamap fri. Tasol taim ol lain i autim tok bilong God, planti ol i hevi i wok long kamap bikpela moa. Olsem na planti lain bai i tok, “Maski long autim tok bilong God. Nogut yumi mekim ol hevi i kamap. Nogut sampela kros i kamap. Larim.”
Na taim ol lain bilong God i bung, na ol i no pret long autim tok bilong em, ol birua bilong dispela tok bai kirap na givim planti hevi moa long ol. Sapos olgeta bilong yumi no pret long autim tok bilong God na long bihainim tok bilong God olgeta taim na long olgeta hap bilong dispela graun, yumi no ken ting olsem planti lain bai kam wantu long kisim dispela tok bilong God. Yumi mas stap redi long bungim ol hevi, na yumi no ken pret long ol narapela na wanem samting ol narapela bai i mekim long yumi.
Em i olsem Krais i tok, “Nogut yupela i ting mi kam bilong mekim i dai olgeta pait long graun. Nogat. Mi tokim yupela, mi kam bilong brukim ol lain manmeri. Long nau na bihain tu sapos i gat 5-pela bilong wanpela famili i stap long wanpela haus, orait ol bai i bruk tupela lain. Tripela bai i birua long tupela, na tupela bai i birua long tripela” (Luke 12:51-52).
Taim tok bilong God i go aut, hevi bai i kamap. Tasol, “taim ol dispela samting i stat long kamap, orait yupela i mas sanap na litimapim het bilong yupela, long wanem, taim bilong God i kisim bek yupela em i kam klostu pinis.”
SAMPELA TINGTING
Yu save lukim wanem ol hevi i kamap taim tok bilong God i go aut long hap bilong yu yet?
Ritim: Rom 9:14-24
Na buk bilong God i tok long God i bin tokim king bilong Isip olsem, “Mi bin mekim yu i kamap king, bai mi ken soim bikpela strong bilong mi long yu, na bai ol manmeri i ken autim biknem bilong mi long olgeta hap bilong graun.” —Rom 9:17 (Kisim Bek 9:16)
Long dispela pas bilong Pol, em i stori long taim Israel i pasim bel bilong ol yet long harim gutnius bilong marimari bilong God. Dispela gutnius i bin kam long ol Israel paslain, tasol planti bilong ol i givim baksait long dispela gutnius. Bel bilong ol i pas, na ol i bikhet tru. Taim Man bilong Kisim Bek i kam olsem God yet i promis, ol i les long kisim em.
Dispela i min olsem tok bilong God i lus nating? “Nogat,” Pol i tok long lain 6.
Taim yumi sakim tok bilong God o yumi harim tok bilong God, em i samting bilong God. Tru, sapos man em i sakim tok bilong God, asua i stap wantaim man yet. Em i tru olgeta. Tasol ol man i no inap bagarapim ol plen na tingting bilong God.
Ol manmeri i no inap long mekim sampela samting we God em bai i tok, “Olaman. Bai mi mekim wanem long nau? Plen bilong mi i lus pinis bikos ol man i no kisim marimari bilong mi.” Dispela i no inap kamap bikos i no olsem God i sindaun na lukluk tasol long olgeta samting i kamap long dispela graun. Nogat, God em i bosim yumi na olgeta samting wantaim.
Taim God i tokim king bilong Isip, “Larim ol manmeri bilong mi i go,” king bilong Isip i sakim tok bilong God. Olsem na God i yusim king bilong Isip olsem rot bilong autim glori bilong em yet long olgeta lain long graun. Na em i wankain long taim Israel i bikhet na pasim bel bilong ol. Taim Israel i sakim tok bilong God, dispela i no bagarapim tingting na plen bilong God. God i yusim dispela samting olsem rot bilong larim glori bilong em i go aut long olgeta hap long dispela graun. Gutnius i lusim lain Juda na surik i go long ol haiden lain, na long Jerusalem em i go long ol narapela kantri.
Taim God i kirapim rot bilong kisim bek lain bilong em, na taim God i salim pikinini bilong em i kam long kisim bek dispela graun, king bilong Isip na bikhet Israel i no inap long pasim dispela rot bilong salvesen. Nogat, ol bai helpim dispela rot bilong salvesen i go moa yet.
“Olaman! Ol gutpela pasin bilong God na tingting na save bilong en i pulap tru, na i daun tumas olsem solwara! Yumi man i no inap tru long painim as bilong olgeta tingting bilong en. Yumi no inap tru long bihainim olgeta rot bilong en... God yet i mekim kamap olgeta samting, na em i as bilong olgeta samting. Na olgeta samting i bilong em wanpela tasol. Yumi mas litimapim nem bilong em oltaim oltaim. I tru.” Rom 11:33,36
SAMPELA TINGTING
Kisim dispela teks i kam long Rom 11 i stap olsem singsing bilong yu long litimapim nem bilong God.
Ritim: Kisim Bek 5:1-9
Bikpela, em God bilong mipela Israel, em i tok olsem, “Larim ol manmeri bilong mi i go.” Tasol king i tok, “Bikpela em i husat? ....Mi no save long Bikpela, olsem na mi no ken larim yupela i go.” —Kisim Bek 5:1-2
Yumi man yumi inap sakim tok bilong God. Tasol san, mun, biksi, ren, na ol animal i no inap sakim tok bilong God. Ol i save bihainim tok bilong God tasol. Taim God i tok, “san kamap,” em bai i kamap. Taim God i tok, “yu slip,” mun bai i slip. Taim God i tok, “wokim haus bilong yu yet,” ol animal bai mekim olsem. Taim em i tok, “stap isi,” biksi bai i bihainim tok bilong em. Tasol ol man inap long tok nogat long God.
Yumi mas pret tru long tok nogat long God. Em i longlong samting long mekim, na yumi bai kisim hevi sapos yumi sakim tok bilong God i kamapim dispela heven na graun. Na yumi mas pret tru long sakim tok bilong God bikos God bai mekim yumi kamap bikhet tru.
Yumi lukim dispela samting long dispela stori long king bilong Isip. Tasol tu yumi inap lukim dispela samting long ol lain i stap klostu long yumi tu.
I kain olsem ol pikinini i no gat gutpela papa na mama. Ol dispela pikinini bai paul, na ol i no save long tok “yes” o long tok “nogat.” Ol i no save wanem pasin i gutpela long mekim, na wanem pasin i no gutpela long mekim. Ol i no save long pasin bilong harim tok, na ol i no klia tumas long bihainim tok bilong ol bikman. Na wanpela de ol bai bungim polis taim ol i brukim lo bilong kantri, na ol bai i go long kot. Em i hat tru long senisim pasin bilong ol – i olsem ol i bikhet tru pinis!
Na em i wankain long olgeta manmeri i sakim tok bilong God. Bihain bai ol i no inap long bihainim Tok bilong em moa. Pastaim ol i les long bilip, na bihain bai ol i no inap bilip. Sapos yumi no beten long em na i go klostu long em long taim em i stap klostu long yumi, wanpela de bai yumi i no inap lukim em moa.
I no bilong yumi long save sapos wanpela man o meri i no inap long lukim God moa, o sapos God i mekim ol i bikhet tru na nau ol i no inap long kisim salvesen moa – dispela em i samting long God yet. Tasol Buk Baibel i skulim yumi olsem ol lain i sakim tok bilong God i mas lukaut, nogut God i mekim bel bilong ol i pas na bikhet tru. Yumi yet i mas bihainim tok bilong God wantu, wantaim pret na guria!
SAMPELA TINGTING
Satan i wok long tokim yu long sakim tok bilong God, o nogat? Bai yu harim tok bilong Satan, o tok bilong God?
Ritim: Kisim Bek 3:13-17
Na Moses i tokim God olsem, “Taim mi go kamap long ol Israel bai mi tokim ol olsem, ‘God bilong ol tumbuna bilong yumi i salim mi na mi kam long yupela.’ Na sapos ol i askim mi, ‘Wanem nem bilong en?’ orait bai mi bekim wanem tok long ol?” Orait God i tok, “Mi Yet Mi Stap Olsem...” —Kisim Bek 3:13-14
Ol pikinini bilong Jekop (Israel) i bin i stap long Isip inap long 400 yia samting pinis. Na long dispela taim God i tokim Israel olsem kalabus bilong ol bai pinis. Em i kisim ol i go long graun em i bin promis long givim Abraham, bubu papa bilong Jekop.
Tasol ol lain Israel i no bin kisim planti tok hait long Bikpela. Ol i no save gut long God em i husat. Em tru, ol i gat planti ol lo na ol i pret long God, olsem yumi ken lukim long pasin bilong papamama bilong Moses. Tasol ol i no harim maus bilong God planti, na moa ol i no holim Buk Baibel long han bilong ol yet.
Long dispela teks, God i soim em yet long Moses. Moses i mas tokim lain Israel olsem God bilong tumbuna bilong em i autim tok. Na ol bai i klia olsem God yet i no lus tingting long ol promis bilong em. Long dispela taim i go moa yet, ol Israel bai kisim nupela nem bilong God – “Mi Yet Mi Stap Olsem.” I min olsem, “Mi stap,” na “Mi stap laip.”
God i autim dispela nem bilong em long Israel taim em i kisim bek ol long han bilong Isip, olsem na dispela nem bai i stap holi stret. Taim lain bilong God i harim dispela nem, ol bai i klia olsem dispela God i holi, em i laikim ol tru, em i stap redi long helpim ol na em bai inapim tru ol promis bilong dispela kontrak em i bin mekim.
Ol Israel i no klia gut tru long dispela nem bilong God bipo long dispela taim. Tasol taim ol i lukim pinis ol gutpela pasin, olsem em i save bihainim ol tok bilong em yet, na ol i lukim pawa bilong God na em i kisim bek ol pinis; long dispela taim ol i kamap klia olsem God em i “Mi Yet mi Stap Olsem.” Na long yumi tu, nem bilong God i olsem samting nating, sapos yumi i no kisim pinis salvesen bilong em. Taim yumi i save long Krais na yumi kisim pinis Spirit bilong em, bai yumi save long nupela Nem bilong em – Aba, Papa!
SAMPELA TINGTING
Taim yumi save olsem God em i Papa bilong yumi, dispela by senisim pasin bilong yumi long prea olsem wanem?
Ritim: Kisim Bek 3:1-12
Na Bikpela i tokim em olsem, “Mi lukim pinis ol i wok long mekim nogut long ol manmeri bilong mi long Isip. Na ol manmeri bilong mi i wok long singaut long mi long kisim bek ol long han bilong ol bosman nogut. Mi harim pinis dispela singaut na mi save tru long pen na hevi ol i
karim. Olsem na mi kam daun bilong kisim bek ol...” —Kisim Bek 3:7-8
Buk Kisim Bek em i stori bilong “kisim bek” bilong ol manmeri bilong God. God i kisim bek ol long taim em yet i makim.
“Mi lukim pinis ol i wok long mekim nogut long ol manmeri bilong mi long Isip.” Bilong wanem God i lukim dispela samting longpela taim i go pinis, tasol em i wetim longpela taim long kisim bek ol? “Mi harim pinis singaut bilong ol.” Tasol, sapos God i harim ol dispela singaut, watpo nau em i no kam hariap long helpim ol?
Taim God em i wet, dispela samting i traim ol lain bilong em stret. Hevi bilong dispela i winim hevi ol birua bilong ol i givim ol taim ol i mekim nogut long ol. Wanpela pret i winim pret bilong ol birua i bagarapim yumi, na dispela em i pret taim yumi i ting olsem God i lus tingting long yumi.
“Ating bai Bikpela givim baksait long mi oltaim? Ating em i no moa laikim mi? ... Em i no laik sori long mi nau?... Ating God i lus tingting na i no laik marimari long mipela, a?” (Buk Song 77:7-9). Planti lain bilong God i bin pret long dispela na ol i tokaut long dispela pinis. Buk Baibel i gat planti ol singaut olsem.
Yumi i no ken klia long tingting bilong God na long taim bilong em tu. God yet i tok olsem dispela em i samting bilong em yet, na i no bilong yumi i ken save long en. Olsem na ol lain long graun i no ken wok long painimaut tingting bilong God na taim bilong em tu.
“Olsem na mi kam daun bilong kisim bek ol...” God em i kam daun long taim stret bilong em. Na tu, God em i salim pikinini man bilong em i kam “long taim stret em i bin makim” (Galesia 4:4). Long laip bilong em tu, Jisas i save toktok long “taim bilong em.” Planti lain i harim em i tok olsem “taim bilong mi em i no yet.”
Tude yumi i stap aninit long promis bilong God olsem Jisas bai kam bek long kisim yumi i go long em. Em bai i no inap kam bipo long taim stret bilong em, o bihain long taim stret bilong em. Em bai kam bek long taim stret God yet i makim.
Olsem na bikpela askim i stap: Yumi i redi long bungim em? Em bai gut sapos yumi i singaut strong na prea planti: “Kam nau, Jisas, mipela i wetim yu longpela taim!”
Yumi no save wanem taim Jisas bai kam. Tasol yumi save tru tru olsem em bai i kam!
SAMPELA TINGTING
Dispela tok, “tude yumi i stap aninit long promis bilong God olsem Jisas bai kam bek...” i gat wanem mining long laip bilong yu yet?
Ritim: Matyu 2:13-18
Bikpela krai na singsing sori i kamap long taun Rama. Em Resel i krai sori long ol pikinini bilong en i dai pinis. Na em i no laik bai ol manmeri i mekim gut bel bilong en, long wanem, olgeta pikinini bilong en i no moa i stap. —Matyu 2:18
Sampela lain i laik tok olsem, taim Herot i salim ol soldia bilong em i go long Betlehem long kilim olgeta pikinini man i no winim tupela krismas yet, i no gat wanpela liklik pikinini i stap bikos God i no larim ol mama i karim ol pikinini man long Betlehem long dispela taim.
Tasol dispela em i stori tasol, na em i no tru. Matyu em i tingim stori bilong Resel taim dispela samting i kamap long Betlehem. Resel em i wanpela mama i dai long Betlehem taim em i karim wanpela pikinini man (Stat 35:18). Jeramaia tu i bin tingim Resel na krai bilong em taim em i lukim ol birua i rausim olgeta pikinini man bilong Jekop i lusim graun bilong ol na kamap wokboi nating (Jeremaia 31:15).
Tasol long taim bilong krai, ol Israel i mas tingim na harim tok prophet bilong Maika: “Betlehem Efrata, ... wanpela man bilong yu bai i kamap hetman na em bai i bosim ol Israel long nem bilong mi. Long bipo tru namba wan tumbuna bilong en i kamap, na lain bilong en i stap yet” (Maika 5:2).
Pikinini meri bilong Saion i mas bilip olsem Pikinini bilong God bai kisim bek lain Israel. Olgeta pikinini bilong God bai kisim salvesen sapos God i lukautim pikinini bilong em na em i stap laip. Sapos em i stap laip, yumi bai stap laip. Sapos em i no dai, na em i abrusim bainat bilong ol soldia, bai yumi i kamap fri. Sapos em yet i winim Satan, bai yumi winim Satan long wok bilong em.
Em i tru, i gat planti ol krai na pen na hevi long dispela graun. Tasol tok bilong God bai soim klia tru olsem dispela graun i no gat wanpela hevi o krai na heven i no inap oraitim dispela hevi o krai.
Ol krai bilong ol pikinini bilong Israel bai pinis bihain, tasol heven i kam pinis long dispela graun long oraitim yumi. God i wok long inapim Tok bilong em, na dispela stori bilong God i wok i go inap long las de. Taim tudak i wok long karamapim dispela graun, i min olsem dispela nupela de i stap klostu nau.
No ken krai, manmeri bilong God. Tingim – Man bilong kisim bek yumi i stap laip!
SAMPELA TINGTING
“I no gat wanpela hevi o krai na heven i no inap oraitim dispela hevi o krai.” Wanem em ol i hevi na krai bilong yu? Bringim ol dispela i go long God long beten!
Ritim: Kisim Bek 2:1-10
Taim dispela pikinini i kamap bikpela liklik, mama i kisim em i go long pikinini meri bilong king. Na pikinini meri bilong king i mekim dispela pikinini man i kamap olsem pikinini bilong em yet. —Kisim Bek 2:10
I no olsem ol pikinini bilong God i save bel isi na pulap long hop tasol. Sampela taim ol bai i bel hevi stret taim i luk olsem kingdom bilong God i no kam hariap, na i luk olsem Sios bilong God i wok long bagarap. Sampela taim i luk olsem ol Kristen lain i no bikpela tumas long dispela graun, na i luk olsem ol narapela lain i no save harim nek bilong ol, na i luk olsem wok bilong ol i liklik samting tasol long dispela graun.
Sapos tingting, na bel, na olgeta gutpela samting bilong yu stap long kingdom bilong God, em bai yu autim ol wari bilong yu long ol narapela Kristen na long God. Tasol yumi no ken ting olsem kingdom bilong God i no inap long kam. Em bai kam.
Wanpela samting yumi mas tingim i olsem: Em i isi moa long lukim sin olsem long lukim marimari.
Ol pasin nogut na man nogut i save kamap long nius, long niuspepa o long TV. Tasol Matyu 6 i stori olsem yumi mas mekim ol gutpela pasin long ai bilong God tasol, na nogat long ai bilong man. Olsem na ol gutpela pasin ol Kristen lain i save mekim, ol i no save kamap long TV o long niuspepa. Na tu, i min olsem i gat planti ol gutpela pasin i save kamap long laip bilong ol Kristen, tasol yumi no inap lukim ol dispela pasin.
Na moa, God i no save mekim bikpela nois taim em i wok. Em i save wok isi na i no gat bikpela nois. Tasol kingdom bilong Satan i save mekim planti nois tru. Olgeta samting nogut tru i mas mekim planti nois stret. Satan i mas mekim planti nois stret. Sapos nogat, bai yumi i no inap lukim wanpela man o meri i bihainim em. Na planti taim, bikos ol wok bilong Satan i mekim planti nois stret, i luk olsem Satan i gat bikpela pawa tru. Tasol taim Satan i mekim planti nois stret olsem ol stori long ol pasin nogut i kamap long nius na long TV, ol lain bilong God i wok long gro na kamap bikpela isi isi long dispela graun. Taim Satan i raun olsem wanpela laien i singaut strong, yumi yet mas lukaut, tasol yumi no ken pret. Satan i no inap winim pait long bikpela nois em i mekim.
Tingim dispela: Ol soldia bilong King bilong Isip i wok long rausim ol liklik pikininin man, ol bebi tasol, long susu bilong mama bilong ol. Ol mama i krai nogut tru, ol pikinini man i dring wara na dai long wara, na i luk olsem Satan i bihainim laik bilong em yet tasol. Tasol, long wankain taim, long haus bilong King bilong Isip, pikinini meri bilong King bilong Isip i pilai i stap wantaim wanpela liklik boi. King bilong Isip yet i kamap olsem bubu bilong dispela man bilong kisim bek lain Israel!
Satan inap mekim planti nois stret, tasol, “God i sindaun long sia king bilong en long heven, na em i lap” (Buk Song 2:4).
SAMPELA TINGTING
Yu yet yu lukim God i no mekim bikpela nois, tasol em i mekim bikpela wok, o nogat? Tok tenkyu long em.
Ritim: Matyu 2:1-12
King Herot i harim dispela tok, na em i tingting planti. Na olgeta manmeri long Jerusalem ol tu i tingting planti. —Matyu 2: 3
Pasin bilong Herot long kilim ol pikinini i dai i no nupela samting. 13 hundred yia samting bipo long dispela taim, King bilong Isip i mekim kain pasin olsem. Na as bilong dispela tupela pasin nogut tru i Satan. Na tupela pasin wantaim i gat tingting long bagarapim dispela Man bilong kisim bek olgeta manmeri bilong God.
Satan em i save olsem Man bilong Kisim Bek yumi bai i kam. Olsem na em i tokim ol wokman bilong em long kilim ol pikinini man i dai, long wanem, em i laik pasim wok bilong Jisas long kisim bek lain bilong God. King bilong Isip na Herot wantaim i olsem wokboi bilong Satan, maski ol i tingting long apim ol yet.
Matyu 2:3 i tok olsem Herot i tingting planti. Em i wari, nogut em i lusim ples bilong em olsem king. Ol Jerusalem i tingting planti tu. Ol i wari stret. Na Satan tu i wari nogut tru. Em i pret. Em i klia olsem em i gat liklik taim tasol long mekim wok bilong em. Em i save olsem Jisas bai bagarapim em, olsem na em i kirap nogut na pret.
Ol Kristen i no save kirap nogut na pret. Sampela taim ol bai i wari liklik, tasol ol i no save pret na wari nogut tru. Long bilip yumi no inap long mekim olsem. Sapos yumi bilip tru, bai yumi no inap ting olsem olgeta samting i lus tru.
Long bilip yumi save olsem God i stap, maski wanem samting i kamap. Bai em i holim yumi na yumi bai stap strong, maski yumi bungim bikpela hevi stret. Sia king bilong God i stap oltaim. Plen bilong God bilong kisim bek yumi em i tru na tru olgeta, na em i no inap senis. Yes, yumi bai bungim hevi, tasol yumi no inap kirap nogut na pret nogut tru.
King bilong Isip na Herot, tupela i kirap nogut tru na pulap long pret tru tu. Ol wokboi bilong Satan i save mekim olsem taim Man bilong Kisim Bek i kam. I olsem ol i lus long wanpela bikpela hul i no gat pinis bilong em. Tasol olgeta manmeri bilong God i save hop long God, maski bikpela hevi tru i bungim ol. Ol bai i bel isi.
SAMPELA TINGTING
Taim yu bungim ol bikpela hevi long laip bilong yu, bai yu kisim bel isi olsem wanem?
Ritim: Kisim Bek 1:15-22
Orait na bihain king i tokim ol manmeri bilong Isip olsem, “Kisim olgeta nupela pikinini man bilong ol Hibru na tromoi i go long wara Nail, tasol larim ol pikinini meri i stap.”
—Kisim Bek 1:22
King bilong Isip i man bilong mekim pasin nogut tru long ol narapela. Na taim yumi tingim planti ol samting i bin kamap long dispela graun, bai yumi klia olsem, taim Satan i stap insait long bel bilong wanpela man, dispela man inap mekim kain kain pasin nogut tru.
Na i no hat tumas long Satan i kam insait long yumi, bikos yumi olgeta i pulap long sin taim mama bilong yumi i karim yumi. I no olsem yumi kamap olsem lain bilong mekim sin bikos yumi mekim sampela samting nogut. Nogat, yumi save mekim ol samting nogut bikos yumi stap lain bilong mekim sin pinis.
Dispela tok i kam long Buk Baibel, tasol planti lain i no bilipim dispela tok, sampela save man tu. Tasol sapos yumi lukluk long PNG na planti ol pasin nogut tru i save kamap long kantri bilong yumi, i no hat tumas long save olsem yumi i lain bilong mekim sin stret, na Satan i bosim planti man long dispela kantri bilong yumi tu.
Long sampela hap long dispela graun, ol man i save ting olsem ol i no save mekim pasin nogut moa. Tasol, Satan i stap yet. Taim King bilong Isip i tokim ol Isip long kilim ol liklik bebi bilong ol Hibru lain, ol lain Isip i gat ol naispela na gutpela pasin long kantri bilong ol tu.
Tasol ol lain bilong dispela graun i no lainim sampela samting long ol pasin nogut ol i lukim. Maski ol lain bilong yumi long PNG i lukim planti lain i bagarapim ol narapela lain, yumi wok yet long bihainim ol pasin nogut i save kirapim dispela pasin. Maski yumi i lukim mama bilong yumi, o susa bilong yumi, o pikinini bilong yumi i kisim bagarap taim ol lain i pret long sanguma, yumi bai bihainim pasin bilong tumbuna na yumi save hariap i go long glasman taim wanpela bilong yumi i dai.
Ol lain bai i kamap bihain long yumi, ol bai ting wanem taim ol i tingim ol pasin bilong yumi. Nogut ol i bihainim dispela pasin nogut bilong yumi. Em i samting bilong laip na i dai. Em i samting long dispela pait namel long kingdom bilong Satan na kingdom bilong God. Bai yumi i dai long dispela tudak o bai yumi i kamap long tulait?
Krais tasol i wokim dispela senis long yumi yet.
SAMPELA TINGTING
Yu save lukim ol pasin nogut tru? Na yu lainim wanem samting taim yu lukim ol dispela pasin?
Ritim: Kisim Bek 1:8-14
Ol manmeri i laikim tumas long bihainim stretpela pasin, long wankain pasin olsem man i hangre tru na i laikim tumas long kisim kaikai na i dai long wara, em ol i ken amamas. Bai God inapim ol tru. —Matyu 5:6
Ol dispela lain i stap long kalabus bilong King bilong Isip, na God i kisim bek ol, ol i wanem kain lain?
I no Kisim Bek tasol i stori long sampela lain i kisim hevi long ol birua. Long Buk Song i gat man kain olsem i wok long singaut long Bikpela long helpim ol. Na profet Aisaia i autim tok long wanpela helpim bai i kam. No long dispela tok Jisas i autim long maunten, em i blesim ol lain i kisim hevi long ol birua. Na dispela autim tok i putim ples klia olsem ol dispela lain i kisim hevi long ol birua ol i husat tru.
Ol dispela lain tru i no save trustim strong bilong ol yet. Nogat, ol i rabis lain tasol. Ol narapela lain i no mekim stretpela pasin long ol; tasol maski, ol i no wok long paitim ol na bagarapim ol. Ol i no wanbel long ol samting long dispela graun. I olsem ol i lain long narapela kantri, na ol i krai i stap. Ol i sori tru bikos ol i no lukim stretpela pasin long dispela graun, na ol i laikim tru pasin bilong stap isi, marimari, sori, na ol i laikim tumas long bihainim stretpela pasin olsem man i hangre tru na i laikim tumas long kisim kaikai na i dai long wara. Ol i wetim taim Krais bai i kam bek na ol bai i go long nupela graun.
Jisas i kam long givim fridom long dispela kain lain. Em i Mesaia bilong ol. Em yet i wokabaut long rot bilong man i daunim em yet. Em yet i kisim bikpela hevi stret long Satan, tasol em i brukim pawa bilong em long bilip na long taim em i mekim stretpela pasin olgeta.
Jisas, olsem hetman bilong ol lain bilong God i kisim hevi long ol birua, em i tokim ol lain bilong em olsem: “Yu ken amamas na amamas tru olgeta. Bai mi blesim yu olgeta. Mi save olsem yu no sanap long strong bilong yu yet. Yu no save wok long kisim strong long tingting bilong yu, o long mani bilong yu. Yu save hop long God, na bilip long em. Olsem na yu ken amamas! Mi blesim yu pinis. Na sapos yu hangre long lukim stretpela pasin, orait bai mi inapim dispela long yu. Stap tru. Ai bilong yu bai lukim God. Yu bai kisim kingdom bilong em.”
SAMPELA TINGTING
Sapos Jisas i stap wantaim yu tude na toktok long givim “blessing” long yu, yu ting em bai i tok wanem long yu?
Ritim: Kisim Bek 1:8-14
...Olsem na ol Isip i pret tru long ol Israel. Na ol Isip i mekim ol Israel i wok hat nogut tru na sindaun bilong ol i kamap nogut olgeta. Ol Isip i mekim ol Israel i hatwok long wokim brik na wokim haus na mekim wok long gaden... —Kisim Bek 1:12-14
Kisim Bek em i stori long wanpela lain i kisim bikpela hevi tru long ol birua bilong ol, na ol i kamap fri. Olsem na, planti lain i bin bungim bikpela hevi na kalabus, i save ting olsem dispela buk em i naispela stret.
Ol wok boi nating long Afrika i bin singim kain kain song i kam long dispela buk taim ol i bungim bikpela hevi long Amerika. Planti lain i bin wok long ol hap nogut, i bin tok olsem ol i stap wankain olsem lain Israel taim ol stap aninit long kalabus bilong Isip. Na tu, i gat wanpela lain ol i kolim “The Zionist Movement” i tokim planti lain Juda bilong i go i stap long Palestine gen, ol i save stori long taim Israel i stap long kalabus bilong Isip, na ol i kisim hevi long birua bilong ol.
Taim yumi laik ritim dispela buk i gutpela sapos yumi bekim sampela askim pastaim:
- Moses i raitim dispela buk bilong husat i ken ritim?
- Ol lain long kalabus, ol i husat?
- King bilong Isip (Pharaoh) em i husat?
- Husat i kisim bek ol lain Israel, na em i givim ol wanem kain fridom?
- Taim yumi laik bekim ol dispela askim, orait yumi mas skelim olgeta lain, na olgeta siapta, wantaim ol narapela lain na siapta long Buk Baibel. Dispela buk i no stap wanpis long Buk Baibel. Nogat, em i gat ples bilong en wantaim ol narapela buk.
- Kisim Bek em i trupela stori long taim nesen bilong Israel i kirap, na Moses em i gat namba long dispela stori. Tasol dispela stori i kirap long taim ol Israel i stap long wok nogut, long kalabus bilong Satan. King bilong Isip i wok long apim em yet na long strongim kingdom bilong em yet, olsem na em i wok long pasim lain Juda long kamap bikpela na strongpela moa. Tasol God i mekim wok. Em yet i bihainim laik bilong em yet long laip bilong King bilong Isip tu, na em yet i givim fridom long Israel, na em i wokim kontrak wantaim ol.
- Kisim Bek i skulim yumi long kain kain samting, olsem kalabus, kisim hevi long ol birua, na fridom. Tasol taim yumi i lukluk long dispela stori long Kisim Bek, yumi mas tingim bikpela wok bilong God long Buk Baibel, na olsem wanem God yet i kisim bek yumi long kalabus bilong Satan, na Jisas em i gat bikpela namba tru long dispela stori. Dispela God bilong Moses, dispela Papa bilong Jisas, em bai brukim na bagarapim strong bilong Satan na olgeta narapela lain i laik givim hevi long yumi. Dispela strongpela God, em bai i givim fridom long ol pikinini bilong em long Krais, em i pikinini bilong God na Bikpela bilong yumi.
- SAMPELA TINGTING
- Tingting gut long dispela kalabus nogut ol Israel i pesim long planti yia tru long Isip.
Ritim: Hibru 13: 17-25
Bikpela bilong yumi Jisas, em strongpela Wasman bilong ol sipsip, em i bin givim blut bilong em yet bilong strongim dispela kontrak bilong i stap oltaim, olsem na God i bin kirapim em bek long matmat. Na nau God, em i as bilong pasin bilong bel isi, em i ken mekim olgeta gutpela pasin i kamap strong long laip bilong yupela, inap long yupela i ken bihainim tru laik bilong em. Long wok bilong Jisas Krais, em i ken mekim yumi olgeta i kisim olgeta pasin em yet i laikim. Na oltaim oltaim yumi olgeta i ken givim biknem long em. I tru.
—Hibru 13:20-21
Dispela man i raitim dispela pas i mekim wanpela las samting: em i bungim olgeta bikpela samting em i bin skulim ol lain Hibru insait long wanpela prea. Na em i givim dispela prea long yumi tu olsem yumi yet i ken mekim prea wankain olsem. Planti ol Kristen manmeri i save beten taim ol i pinis long ritim sampela liklik hap tok long Buk Baibel. Na dispela em i gutpela pasin, na tu i olsem ol prea bilong yumi i ken kamap olsem bekim long wanem samting yumi i ritim long Buk Baibel.
Sapos Buk Baibel i mekim sampela tok, tasol prea bilong yumi i no wanbel na i mekim narapela ol tok, i olsem yumi no wanbel wantaim God insait long kontrak. Tasol taim tok bilong God i skulim yumi long wanem samting yumi bai prea long em, yumi i lainim pasin bilong wokabaut long rot bilong God.
Pasin bilong ritim tok bilong God na prea wantaim i olsem as bilong stap insait long kontrak bilong God.
Blut na Spirit bilong Krais i opim rot bilong yumi long kamap insait long kontrak bilong God. Blut bilong em i kisim bek yumi, na Spirit bilong em i stiaim yumi long bihainim laik bilong God, inap long taim yumi kamap long dispela siti bai i stap oltaim, we yumi bai wanbel tru wantaim God bilong oltaim oltaim.
Olsem na yumi tu i ken prea:
God, as bilong pasin bilong bel isi, long nem bilong Jisas, wasman bilong mipela husat i bin dai na kirap bek, na blut bilong em i kisim bek mipela, yu mas givim Spirit bilong yu long mipela, olsem mipela inap long bihainim laik bilong yu. I tru.
SAMPELA TINGTING
Prea dispela prea planti taim.
Ritim: Hibru 13:7-17
Olsem na oltaim yumi mas givim biknem long God long nem bilong Jisas, na dispela pasin i mas i stap olsem ofa yumi save givim long God. Yes, oltaim maus bilong yumi i mas litimapim nem bilong en. —Hibru 13:15
I gat tupela kain ofa i stap – ofa bilong rausim sin, na ofa bilong givim pres. Ol ofa bilong rausim sin i samting bilong Olpela Testamen, na Jisas Krais i mekim las ofa long dispela. Em i dai long sin wanpela taim long olgeta lain bilong em. Yumi no nidim wanpela moa ofa bilong rausim sin gen.
Ofa bilong givim pres i samting bilong Olpela Testamen tu, tasol long bikpela wok bilong Jisas Krais yumi lainim gutpela pasin moa yet bilong presim God. Ol ofa bilong pres bilong yumi, bai i wok long go antap long God bilong oltaim oltaim.
“Olsem na oltaim yumi mas givim biknem long God long nem bilong Jisas.” Yumi i ken litimapim nem bilong God long wok bilong Jisas tasol. Long Olpela Testamen i gat planti ol lo bilong ol ofa. Dispela Nupela Kontrak i gat lo tu, na dispela lo i olsem olgeta ofa bilong pres i ken go long God long nem bilong Jisas Krais tasol.
Na maus bilong ol lain i save tru long Krais bai presim God. Sampela lain i no yusim maus bilong ol long presim God. Tasol i no olsem yumi mas presim God long maus bilong yumi tasol. Olgeta hap long laip bilong yumi mas i stap olsem ofa bilong presim God. Na sapos yumi gat laik sapos laip bilong yumi i kamap olsem ofa bilong presim God, orait maus bilong yumi tu bai presim em.
“Olsem na oltaim yumi mas givim biknem long God long nem bilong Jisas, na dispela pasin i mas i stap olsem ofa yumi save givim long God. Yes, oltaim maus bilong yumi i mas litimapim nem bilong en.” Oltaim yumi mas presim God. Pasin bilong givim biknem long God i olsem kaikai God yet i bin planim. God i bin planim planti ol kaikai, na em bai bungim planti kaikai tru. Na biknem bilong God bai kisim olgeta pres oltaim oltaim.
Bikos Krais i givim em yet olsem las ofa bilong sin, em i givim yumi Holi Spirit. Na dispela Spirit i olsem paia i kirapim ol ofa bilong pres.
SAMPELA TINGTING
Tingting long olgeta samting Jisas yet i mekim long yu, olsem yumi i lukim pinis long dispela Buk Hibru. Na presim God!
Ritim: Hibru 13:1-8
“Marit em i gutpela samting tru, na yupela ol marit i mas lukautim gut marit bilong yupela, bai em i stap klin tru long ai bilong God... Yupela i no ken bihainim pasin bilong mangal long mani.” Hibru 13:4-5
Pasin bilong marit na mani ol bai guria na bagarap bihain, na yumi no inap kisim dispela tupela samting i kam wantaim yumi long dispela siti em bai i stap oltaim oltaim. Planti lain tude i tingting tumas long mani na maritpasin. Planti lain tude i ting olsem mani na maritpasin i winim olgeta narapela samting long dispela graun. Ol lain long TV na long ol movie ol i putim mani na maritpasin antap long olgeta samting.
Na em i tru, maritpasin na mani i gutpela samting sapos yumi bihainim gutpela rot long yusim dispela tupela samting. Tasol yumi mekim sin sapos yumi yusim man o meri bilong yumi long mekim maritpasin tasol, na yumi no laikim em tru. Na em i sin long laikim mani tumas na maski long bihainim gutpela pasin long yusim mani. Marit em i gutpela samting sapos yumi i lukautim gut marit na em bai i stap klin tru long ai bilong God, na mani em i gutpela samting sapos em i olsem wokboi bilong yumi, na yumi i wokboi bilong God.
Sapos yumi gat wanpela liklik paia long haus bilong yumi long kukim kaikai em bai gutpela. Tasol sapos dispela paia i kalap i go long haus bilong yumi na kukim olgeta samting long haus, em i no gutpela na em bai i bagarapim haus olgeta. Na em i wankain long maritpasin na mani long laip bilong yumi. Sapos maritpasin na mani i gat gutpela ples bilong ol yet insait long laip bilong yumi, yumi bai amamas long dispela gutpela presen bilong God. Tasol sapos ol i stap long ples nogut, sapos ol i kamap bikpela samting tumas long laip bilong yumi, ol bai bagarapim yumi stret.
God i tok olsem maritpasin i samting bilong marit tasol, na insait long marit em bai naispela samting stret. “Marit em i gutpela samting tru, na yupela ol marit i mas lukautim gut marit bilong yupela.” God yet bai mekim save long ol lain i mekim pasin pamuk, maski ol lain long dispela graun i ting dispela kain pasin i orait.
Na mani tu em i wanpela presen i kam long God, na yumi mas bihainim gutpela pasin bilong yusim dispela presen. Tasol, taim mani i kamap olsem god bilong yumi, orait yumi no inap long singsing moa: “Bikpela i save helpim mi na mi no inap pret. Ol man i no inap mekim wanpela samting long mi” (Lain 6).
SAMPELA TINGTING
Wanem samting i gat namba wan ples tru long laip bilong yu?
Ritim: Hibru 12:18-29
“Dispela kingdom yumi bin kisim, em i no inap guria. Olsem na yumi mas tenkyu long God long em i bin givim dispela kingdom long yumi. Na yumi mas lotu long em long pasin em yet i laikim. Na yumi mas litimapim nem bilong em na pret long em na aninit long
em, long wanem, God bilong yumi em i olsem wanpela hatpela paia i save kukim olgeta samting.” Hibru 12:28-29
Wanpela de dispela graun na skai wantaim bai guria na bruk long ol liklik hap. Na ol samting i no inap long guria, ol dispela samting bai stap orait tasol. Dispela kingdom bilong Jisas Krais i no inap long guria, na yumi bin kisim dispela kingdom pinis. Na dispela kingdom bai i stap oltaim oltaim.
God Antap Tru bilong yumi, em yet bai bagarapim dispela graun long putim ples klia dispela siti bilong em bai i stap oltaim. Na God em i singautim yumi long kam long dispela kantri. Olsem na yumi mas tenkyu long God na lotuim em. Na taim yumi lotuim em, yumi mas klia gut olsem em i holi.
Yumi mas tenkyu long em, tasol tu yumi mas klia gut tru long God em i husat, long wanem, God i olsem wanpela hatpela paia i save kukim olgeta samting. Dispela God i bin autim tok long Maunten Sainai na em i givim las tok bilong em long Jisas Krais, em i olsem paia bilong kukim olgeta samting i no holi long ai bilong em.
God bai kukim olgeta samting i giaman, na olgeta samting bilong dispela graun. Na em bai i kukim olgeta manmeri i wanbel long olgeta giaman samting na ol samting bilong dispela graun.
Laip na wokabaut bilong yumi bai putim ples klia sapos yumi save olsem God i olsem wanpela hatpela paia. Sapos yumi klia olsem olgeta samting i doti na olgeta samting i giaman i no inap i stap long ai bilong em, yumi bai prea na wok long pulap long holi bilong God. Yumi bai askim God long stiaim yumi long dispela graun na long stap strong insait long kingdom bilong Jisas Krais.
Na tu, yumi bai lainim pasin bilong daunim yumi yet na apim God na tokaut long holi bilong em. Planti lain tude i les long stori long God em i olsem hatpela paia, tasol yumi i mas tokaut long dispela. Nogut sampela lain i givim baksait long marimari bilong God bikos ol Kristen lain i save stori long marimari na laikim tru bilong God tasol. Ating sapos ol i harim tok tru long God em i husat, ol bai harim gut na tanim bel.
SAMPELA TINGTING
Laip na wokabaut bilong yu i putim ples klia olsem yu i klia olsem God bilong yu i olsem wanpela hatpela paia i save kukim olgeta samting, o nogat?
Ritim: Hibru 12:5-11
Taim Papa i givim hevi long yumi bilong stretim yumi, yumi no save amamas. Nogat. Bel bilong yumi i pilim hevi tasol. Tasol taim em i stretim yumi pinis, yumi bai kisim gutpela pasin tru. Yumi bai mekim ol stretpela pasin, na bel bilong yumi bai i stap isi. —Hibru 12:11
Taim wanpela papa i larim ol pikinini bilong em i bihainim laik bilong ol yet, em bai i bagarapim ol pikinini bilong em stret. Planti ol pikinini tude i save mekim ol pasin nogut tru bikos ol papamama i larim ol i biahainim laik bilong ol yet. Na, ol papamama husat i no save stretim ol pikinini bilong ol, ol i no laikim tru ol pikinini bilong ol.
God i laikim tru ol pikinini bilong em. Olsem na em i save stretim ol. Taim God i mekim olsem, yumi save pilim hevi, na yumi no save amamas long dispela.
Sampela Kristen lain tude i ting olsem dispela i min, taim yumi i bungim sampela hevi long laip bilong yumi, orait yumi i mas tenkyu long God bikos em i gutpela samting long yumi. Tasol dispela i no tru. Pen em i no samting bilong amamas.
Taim hevi o pen i bungim yumi, planti taim yumi bai tingting long lusim bilip bilong yumi. Olsem na, taim yumi bungim ol hevi o pen, pastaim em bai gutpela sapos yumi pasim maus bilong yumi. Pasin bilong pasim maus em i gutpela samting bilong marimari.
Na moa, taim God i givim hevi long yumi bilong stretim yumi, dispela samting i mas skulim yumi. Em i tingting bilong God – em i gat laik long stretim yumi na long skulim yumi long laikim tru.
Taim God i skulim yumi em i no olsem dispela i kamap nating. Yumi ken i go long skul, tasol i no min olsem yumi bai lainim sampela samting. Yumi mas kisim gut dispela skul na wok long lainim planti samting. Planti ol Kristen i bungim bikpela hevi stret, tasol ol i no lainim planti samting. Tasol sampela narapela Kristen i kisim bikpela skul stret, na lainim planti samting tru, taim God i stretim ol.
Em i hat long save wanem samting yumi wan wan i mas lainim taim God i stretim yumi. Tasol God em i save. Em i Papa bilong yumi na em i save wanem samting yumi i nidim na wanem samting i gutpela long yumi lainim.
Na planti ol pikinini bilong God i save tenkyu long Papa bilong ol long wanem samting ol i lainim long taim bilong pen na hevi na krai.
SAMPELA TINGTING
Taim God i stretim yumi, yumi mas mekim wanem samting?
Ritim: Hibru 12:1-4
Na yumi mas strongim bel na ran strong long dispela resis God i bin makim bilong yumi ran long en. Yumi mas lukluk i go long Jisas, em i as bilong bilip bilong yumi, na bihain em bai inapim tru bilip bilong yumi. Jisas i save, sapos em i bihainim tru tok bilong God, orait bihain em bai i stap gut na amamas moa yet. Na em i tingting long dispela na em i stap strong, na em i karim pen na i dai long diwai kros. Ol manmeri i ting, sapos man i dai long diwai kros em i man nogut tru, na em i kisim bikpela sem long dispela. Tasol Jisas i no wari long sem em bai i kisim, na em i dai. Na nau em i sindaun long han sut bilong sia king bilong God.
— Hibru 12:1-2
Long wokabaut long dispela laip olsem wanpela Kristen, i kain olsem yumi ran long wanpela resis. Long ran gut long dispela resis yumi mas lusim olgeta kain samting i mekim yumi i no inap ran strong, na olgeta sin i save pas long yumi. Na tu, yumi ken kisim strong long dispela manmeri bilong bipo ol i sanap na raunim yumi olsem bikpela klaut. Tasol moa yet, yumi mas lukluk i go long Jisas.
Jisas em i “as bilong bilip bilong yumi, na bihain em bai inapim tru bilip bilong yumi.” Em yet i soim gutpela pasin bilong bilip long yumi. I tru olsem yumi inap kisim sampela liklik strong taim yumi lukim bilip bilong ol narapela lain (olsem ol bilip lain long siapta 11), tasol Jisas em i as bilong bilip, na em yet i ranim dispela resis long stat i go inap long pinis bilong en. Bilip bilong em i stretpela tru na strong olgeta.
Long dispela teks dispela man i raitim Hibru em i stori long pasin bilong bilip bilong Jisas. Sapos yumi yet i laik winim dispela resis, yumi mas lainim pasin bilong bilip na long stap strong long dispela resis, long Jisas. “Jisas i save, sapos em i bihainim tru tok bilong God, orait bihain em bai i stap gut na amamas moa yet. Na em i tingting long dispela na em i stap strong, na em i karim pen na i dai long diwai kros.” Jisas em i no wari long sem em bai i kisim. Nogat, em i karim pen na em i dai. Na bihain em i kisim guptela pe long pasin bilong em – em i sindaun long han sut bilong sia king bilong God.
Laip bilong Jisas i pulap olgeta long bilip long Papa. Em i daunim em yet na em i dai long diwai kros, bikos Papa bilong em i redim dispela rot long em. Long Luk 22:42 em i prea, “Tasol yu no ken bihainim laik bilong mi. Nogat. Yu mas bihainim laik bilong yu tasol.” Na long pen na hevi em i bungim, em i kisim strong long bilip long God.
Dai bilong Jisas i no givim pen long em tasol, em i givim sem long em tu. Taim ol i hangamapim wanpela man long diwai kros em i kisim sem tru. Ol i no inap long hangamapim man bilong Rom long diwai kros bikos em bai givim bikpela sem long ol lain bilong Rom. Tasol Jisas em i no tingim dispela sem, bikos em i tingting long bihainim Papa bilong em tasol na bilong kamap long pinis bilong dispela resis we amamas tasol i stap. Olsem na yumi mas lukluk long Jisas long kisim strong long ran long dispela resis, inap long taim yumi stap long glori wantaim em.
SAMPELA TINGTING
Wanem samting i save helpim yu long lukluk long Jisas tasol?
Ritim: Hibru 11:32-40
Dispela olgeta manmeri i bilip long God, na ol i kisim gutpela nem tru long ai bilong God. Tasol long taim ol i stap long graun ol i no kisim gutpela samting God i bin promis long givim ol, long wanem, bipo yet God i redim wanpela gutpela samting moa yet bilong yumi olgeta...
— Hibru 11:39-40
Yumi bungim han wantaim ol bilip lain long olgeta hap na taim long dispela graun, ol bilip lain long Olpela Testamen tu. Yumi i wankain tasol. Olgeta bilong yumi i mas bekim tok promis bilong God long bilip. Yumi olgeta i ken kisim promis bilong God long han bilong bilip.
Tasol dispela nupela kontrak i gutpela samting moa yet long olpela kontak, long wanem, Jisas Krais inapim olpela promis. Olgeta bilip lain long Olpela Testamen, i stap olsem piksa long lain i bilip tru long God, ol i no kisim wanem samting God i promis taim ol i stap long graun. Tasol yumi i kisim, bikos yumi i save long Jisas olsem Bikpela bilong kisim bek yumi.
Olsem man i raitim dispela pas i tok, yumi i kisim “narapela rot i gutpela tru na i winim lo” (7:19), bikos “dispela kontrak Jisas i mekim, em i gutpela moa na i winim kontrak bilong bipo” (7:22), bikos “ol samting dispela nupela kontrak i promis long givim yumi, ol i winim tru ol samting olpela kontrak i bin promis long givim” (8:6) na ofa yumi i kisim “i gutpela tru na i winim ol dispela ofa bilong abus” (9:23). I tru olsem i gat planti samting i wankain long laip bilong kontrak long lain bilong olpela kontrak na long yumi tude, tasol olgeta samting long tude em i winim olgeta samting long olpela kontrak.
Em i gutpela tru sapos yumi tingting gut long dispela. Yumi stap aninit long promis na wok bilong nupela kontrak. Sampela samting i save wok long pulim yumi i go bek long olpela kontrak – i luk olsem sampela lain i laik stap aninit long lo na i les long stap aninit long marimari. Planti lain i save laikim ol pasin bilong lotu na ol naispela samting long ol tempel. Na tu, sampela hetman long sios i amamas long ting olsem ol lain long sios i nidim skul bilong ol bilong kisim Krais.
Olsem na yumi i mas lukaut. Yumi i mas klia long Krais na marimari bilong em. Long ol dispela las de God i kam long yumi long Pikinini bilong em. Long diwai kros bilong Krais, God i givim las tok long sin bilong yumi. Na long taim Krais i go antap long heven long glori, God i givim tok tru long wanem samting bai kamap long yumi long taim bihain.
SAMPELA TINGTING
Tok tenkyu long God bikos yu i stap aninit long nupela kontrak, em dispela kontrak i gutpela moa long olpela kontrak.
Ritim: Hibru 11:29-38
Ol man i dai pinis ol i kirap bek, na mama bilong ol i kisim ol bek gen. Ol birua i kalabusim sampela man na bagarapim tru bodi bilong ol, inap long ol i dai. Ol birua i tok, sapos ol i givim baksait long God, orait ol bai i lusim ol i go. Tasol ol i sakim tok bilong ol birua, long wanem, ol i ting sapos ol i dai, ol bai i kirap bek long matmat, na bai ol i kisim laip i gutpela moa. —Hibru 11:35
Long bilip yu inap long mekim olgeta samting, long wanem, as bilong dispela bilip i pawa na ol promis bilong God.
Planti lain ol i paul long dispela tok, “long bilip yu inap long mekim olgeta samting.” Sampela lain bai tok, “Sapos yu bilip, bai yu inap long mekim kain kain narakain samting olsem ol mirakel.” Na sampela lain bai pilim sori tru bikos ol i ting olsem bilip bilong ol i no strong tumas, long wanem ol yet i no inap long mekim ol narakain samting tru.
Nau em i no taim long stori long ol mirakel samting. Tasol yumi i ken klia olsem long Buk Baibel dispela tok “long bilip” i gat narapela mining.
Long Buk Baibel yumi ritim ol dispela kain stori: stori long ol man i dai pinis ol i kirap bek, na mama bilong ol i kisim ol bek gen; stori long ol man i kisim bagarap long bodi bikos ol i bilip long God. Sampela lain i stap long kalabus, na narapela lain i kisim bikpela bagarap stret. Ol dispela samting i kamap long ol lain i bilip, na Buk Baibel i autim ol dispela stori bilong yumi yet i ken bilip long God. Sapos yumi bilip long em, bai yumi no inap long pret. Sapos yumi givim baksait long em, orait yumi i mas pret. Olgeta lain i stap laip long bilip, ol i stap laip tru tru.
Dispela em i stori long pawa bilong bilip: God inap long mekim olgeta samting. Long bilip yumi inap long mekim olgeta samting! Tasol nogut yumi paul na bagarapim dispela tok. Sapos yumi gat laik long bihainim laik bilong yumi yet, na tok strong long God i ken inapim ol laik bilong yumi yet, i min olsem yumi bagarapim dispela tok, “long bilip yumi inap long mekim olgeta samting.” Yumi no ken bagarapim tok bilong God.
SAMPELA TINGTING
Long laip bilong yu yet, yu save bilipim God? Olsem wanem?
Ritim: Hibru 11:8-16
Ol dispela manmeri ol i bilip long God i go inap long taim ol i dai. .... Na ol i no sem long tokaut olsem, “Mipela i stap long dispela graun olsem ol manmeri bilong narapela kantri. Mipela i kam i stap liklik taim tasol long dispela graun.” Na sapos yumi harim ol manmeri i mekim dispela kain tok, orait yumi save, ol i laik painim graun tru bilong ol. —Hibru 11:13-14
Dispela man i raitim Buk Hibru i stori long ol manmeri i kisim promis bilong narapela graun. Tasol long taim ol i dai, ol i no lukim dispela graun God i bin promisim ol yet. Tasol ol i bilipim tru dispela promis na ol i putim dispela ples klia long pasin bilong ol long laip bilong ol.
Dispela ol tumbuna bilong bilip, ol i tok olsem ol i stap long dispela graun olsem ol manmeri bilong narapela kantri, na olsem ol i kam i stap liklik taim tasol long dispela graun. Abraham i tok, “Mi man bilong narapela kantri na mi kam sindaun namel long yupela (Stat 23:4). Na sapos yumi harim ol manmeri i mekim dispela kain tok, orait yumi save, ol i laik painim graun tru bilong ol.”
Em tru, ol tumbuna bilong bilip ol i save slip long ol haus sel tasol na ol i no stap long wanpela haus; olsem na i no hat tumas long klia bilong wanem ol i tok olsem ol i man bilong narapela kantri. Tasol as bilong dispela tok i narapela samting tu. Long bilip ol i save, ol i olsem ol manmeri bilong narapela kantri.
Taim yumi stap laip long bilip, i olsem bel bilong yumi bung wantaim sampela samting i no stap hia long dispela graun. Pasin bilong lukim sampela samting na bilipim sampela samting, tupela i no wankain. Planti taim yumi lukim ol samting i no wankain long bilip long yumi, olsem na sampela taim bilip bilong yumi bai i go daun. Tasol long bel bilong yumi, yumi mas holim strong olgeta promis bilong God. Sapos nogat, yumi bai lus.
Em i gutpela olsem planti ol sios long tude ol i klia olsem ol Kristen i no ken i stap wantaim ol Kristen lain tasol. Yumi mas wok long autim dispela gutnius long ol narapela lain tu. Tasol yumi mas wok strong na prea strong long kisim gutpela tingting long hau yumi, dispela lain i wetim nupela graun bai i kam, i mas mekim wok insait long dispela graun bilong tude.
Ol manmeri i bilip long God i olsem ol manmeri long narapela kantri. Dispela graun i no olsem ples tru bilong yumi. Long bilip yumi lukim dispela taun God yet i kirapim plen bilong wokim, na em yet i bin wokim.
SAMPELA TINGTING
“Ol manmeri i bilip long God i olsem ol manmeri long narapela kantri.” Dispela em i tru long laip bilong yu, o nogat?
Ritim: Hibru 11:1-6
Tasol man i no bilip long God, em i no inap bihainim laik bilong God. Long wanem, man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em. —Hibru 11:6
Tude ol man i no save pait long ol liklik samting insait long ol tok (doktrin) bilong Buk Baibel. Nau ol i pait bikos sampela i tok olsem God i no stap!
Sapos yumi tok tru, sampela taim yumi tu i gat tupela bel na tupela tingting long God. Tasol ol lain i givim baksait long God, ol bai i lusim sios, bikos sios em i ples bilong ol lain i bilip long God, dispela God em i autim tok long Abraham na long Moses, na em i givim las tok long em long Jisas Krais.
God yet i tok olsem sapos yumi laik wanbel wantaim em yumi mas kamap klostu long em long bilip tasol. Sapos yumi les, bai yumi no inap kamap klostu long em. Yumi mas bilip olsem God em i stap, na em bai i mekim gut tru long ol lain i gat laik long wanbel wantaim em.
Yumi no inap givim dispela bilip long narapela. Yumi ken tokim ol olsem tasol: “Bilip long God na go long em, na em bai i mekim gut tru long yu.” Yumi inap tok olsem long bilip tasol, na bikos yumi tu i kisim bel isi na amamas long dispela bilip.
Sampela lain i tok olsem God i no i stap. I olsem ol i apim ol yet na ol i les long bilip long God. Tasol em i samting bilong God yet bilong tokaut wanem samting ol manmeri i mas mekim long kamap klostu long em. Em i lo bilong trupela bilip: Yumi no inap go klostu long God, na yumi no inap klia gut tru long dispela God i stap oltaim oltaim, sapos yumi no bilip olsem em i stap. Na sapos yumi laik i go klostu long em, yumi bai amamas tru long lukim em.
Ol Kristen lain i mas daunim ol yet na klia olsem em i hat wok tru long painim God. Na ol i save: ol lain i wok long painim, ol yet bai kisim. Tasol ol bai i kisim na lukim bikos ol i painim yet na ol i wok long painim olgeta taim. Taim yumi i prea na bilip, na wok long painim God na kisim em, bai yumi klia olsem, God yet i painim yumi na kisim yumi pastaim.
SAMPELA TINGTING
Em i tru olsem God yet i painim yumi na kisim yumi pastaim?
Ritim: Hibru 10:32-11:1
Pasin bilong bilip em i olsem. Yumi save gut tru olsem, olgeta gutpela samting God i promis pinis long givim yumi na yumi wet long kisim, em bai yumi kisim tru. Maski ai bilong yumi i no lukim ol dispela samting, yumi save gut tru olsem, dispela olgeta samting i stap.
—Hibru 11:1
Buk Hibru i putim ples klia olsem dispela nupela kontrak i winim stret dispela olpela kontrak. Tasol dispela nupela kontrak em i kontrak tru, na long dispela kontrak yumi ken wanbel wantaim God gen, na as bilong dispela em i tok bilong God. Na tu, yumi i mas bekim dispela kontrak long bilip.
Olsem na, long siapta 11, man i raitim dispela buk i autim ol stori long ol lain i mekim wok long bilip. Ol manmeri i mekim olsem long stat bilong dispela graun inap long taim em i raitim dispela buk. Olgeta taim God i autim tok, ol manmeri bilong em i mas bekim tok bilong em long bilip.
Tude tu yumi save olsem yumi nidim bilip, tasol sampela taim em i hat tru long bilip. Planti taim yumi i laik klia gut tru long sampela samting na bihain orait yumi bai bilip. Tasol planti taim sapos yumi no lukim sampela samting long ai bilong yumi yet, bai yumi pilim olsem em bai i hat tru long bilipim.
Tasol bilip i min olsem yumi mas bilip long God na wanem samting em i tok, na bihainim em. Long dispela siapta (11) yumi harim stori long planti ol man na meri i bilipim olgeta promis bilong God, maski ol i no lukim yet o ol i no gat we long kisim save sapos God bai inapim olgeta promis bilong em o nogat. Tasol ol i bilip, na ol i bihainim tok bilong God na wokabaut long rot bilong laip.
Yumi gat hop bikos yumi bilip. Na maski yumi no inap long lukim sampela samting long ai, long bilip bai yumi lukim long bel bilong yumi. Olsem tasol sampela man na meri i mekim narakain samting tru long bilip, na ol lain i no bilip, ol bai i paul long pasin bilong ol na ting olsem ol i longlong. Tasol ol lain i bilip, ol i save olsem pasin bilong ol i no longlong. Ol i bilipim tok bilong God na long pasin bilong ol dispela samting i kamap ples klia.
Ol lain i no bilip bai i tok, “Soim mi pastaim, na bai mi bilip.” Tasol God i tok, “Bilipim mi pastaim, na bai yu lukim.” I no olsem yumi ken skelim God - Yumi mas bilipim God tasol.
SAMPELA TINGTING
Bilong wanem yu yet i bilip long God?
Ritim: Hibru 10: 23-31
Sapos God bilong i stap oltaim em i laik mekim save long wanpela man na em i holimpas em, orait dispela man i ken pret nogut tru. —Hibru 10:31
I luk olsem wanpela bikpela senis i kamap long dispela hap bilong dispela pas. Yumi ritim pinis planti tok bilong amamas long wok bilong Krais bilong lusim olgeta sin bilong yumi, tasol long hia yumi ken pret nogut tru long pasin bilong God bilong mekim save long wanpela man.
Tasol yumi no ken kirap nogut long dispela tok. Yumi harim las tok bilong God pinis. Laplap i bruk antap i go long daunbilo. Bel bilong God i op pinis. Yumi stap long graun i holi. Heven i op na yumi stap long presens bilong God Antap Tru. Yumi stap long laikim tru bilong God na yumi ken amamas tru na wanbel wantaim em. Tasol sampela bai pundaun.
Planti bilong yumi save olsem marit i ken i stap olsem ples bilong amamas o i ken i stap olsem ples bilong bikpela hevi tru. Insait long laikim tru bilong marit tupela i ken amamas tru, tasol tu sampela taim ol bikpela hevi inap long bungim ol lain i marit.
I olsem God yet i maritim yumi long kontrak bilong em long blut na long Spirit. Olsem na yumi ken amamas tru. Yumi ken bel isi tru. Tasol sampela taim, sapos yumi mekim bikpela sin tru, olsem na yumi no stap wanbel moa wantaim Bikpela, bai yumi i lukim bikpela hevi na pen stret.
Long dispela teks, dispela man i raitim Hibru i stori long bikpela sin tru. I olsem wanpela man em i kisim laikim tru bilong God pinis, tasol bihain em givim baksait long God na tromoi ol presen bilong em i go na bagarapim ol stret. I olsem man em i mekim tok nogut long Holi Spirit.
Ol Kristen i wik liklik ol i no ken wari olsem ol i mekim dispela sin. Pret bilong ol i soim olsem ol i no mekim dispela sin. Tasol, dispela tok i olsem tok lukaut long yumi olgeta. Yumi no ken ting olsem laikim tru bilong God em i samting nating. Yumi mas mekim wok. Tok bilong God long laikim tru yumi long wok bilong Krais i mas kirapim yumi long presim em, long lotuim em, long pret long em na long amamas na hop long em, olgeta taim.
SAMPELA TINGTING
Yu save “pret” long God?
Ritim: Hibru 10:11-22
Ol brata, blut bilong Jisas i lusim sin bilong yumi pinis, olsem na yumi inap i go insait long Rum Tambu Tru bilong haus bilong God na yumi no ken pret. Yumi ken i go insait long dispela rum long dispela nupela rot i gat laip. Dispela rot Jisas yet i bin opim, em i go insait long dispela bikpela laplap i hangamap i stap olsem dua bilong dispela rum. Dispela laplap em i olsem bodi bilong em yet. —Hibru 10:19-20
Yu save long stori long dispela laplap ol i hangamap i stap olsem dua long tempel, a? Dispela laplap i hevi tru na em i naispela stret. Ol i hangamapim dispela laplap long tempel bilong God i ken i stap long narapela hap long lain bilong em. Em i tru olsem dispela tempel i olsem ples we God i kam na bung wantaim lain bilong em. Long tempel olgeta manmeri bilong God i save kam bilong givim ol ofa long God, na long bung na wanbel wantaim God. Long tempel, God i lusim sin bilong ol na ol i kisim nupela strong. Tasol dispela laplap i stap tu. Na dispela laplap i olsem mak bilong putim ples klia olsem God i no wanbel tru wantaim lain bilong em. I min olsem lain bilong God i no inap i go klostu long God. Nogat, ol i mas stap longwe liklik long God.
Hetpris tru tasol inap i go kostu long God – na dispela i kamap wanpela taim long wan wan yia tasol. Dispela het pris i save kam long dispela wanpela taim, na em bai i wasim em yet na putim ol naispela, na klinpela klos tru. Na em i save karim blut wantaim, na em tromoi dispela blut long bokis kontrak long karamapim sin bilong em yet na sin bilong olgeta manmeri bilong God. Na bihain long dispela, em bai i go aut long dispela rum, na dispela laplap i hangamap i stap bai i pasim em long go klostu long God gen.
Tasol, wanpela de, pinga bilong God yet i brukim dispela laplap i hangamap i stap insait long tempel, long antap i go inap long daunbilo bilong en, na i kamap tupela hap. Em i kamap long Gut Fraide, taim Jisas em i dai long diwai kros antap long liklik maunten klostu long Jerusalem. Taim bel bilong Jisas i bruk, dispela laplap long tempel i bruk i go long tupela hap.
Taim laplap i no bruk, em i gat dispela mining: “no ken go insait.” Tasol nau em i bruk, na em i gat dispela mining: “olgeta lain i bilip long Jisas Krais i ken i go insait.” Olsem na nau “blut bilong Jisas i lusim sin bilong yumi pinis, olsem na yumi inap i go insait long Rum Tambu Tru bilong haus bilong God na yumi no ken pret.” Yumi olgeta, rabislain wantaim, i ken i go insait long Rum Tambu Tru – sapos yumi bilip long Jisas. Olgeta lain i bilip long em, ol i kamap klinpela na klos bilong ol i kamap waitpela tru.
Olsem na, nau yumi i no ken pret long kamap klostu long God. God em i kam long yumi long marimari bilong em. Yumi inap i go insait long Rum Tambu Tru na God i kam long yumi olsem, bikos Krais yet em i dispela laplap i bruk.
SAMPELA TINGTING
Dispela laplap em i bruk i min olsem yumi ken i go klostu long God. Brukim skru na tok tenkyu long em.
Ritim: Hibru 9:24-28
Olgeta man i mas i dai wanpela taim tasol, na bihain ol i mas kamap long kot. Olsem tasol wanpela taim tasol Krais i givim em yet long God olsem ofa, bilong karim hevi bilong ol sin bilong planti manmeri. Na bihain em bai i kamap namba 2 taim, tasol dispela taim em i no kam bilong rausim sin. Nogat. Em bai i kam bilong kisim bek tru ol man i wetim em.
— Hibru 9:27-28
Long dispela teks, man i raitim Hibru i laik givim yumi wanpela liklik tok piksa long soim yumi olsem dai bilong Krais i kamap wanpela taim tasol. Yumi klia olsem ol mama i save karim wanpela bebi, na dispela bebi bai i stap laip wanpela taim tasol, na em bai i dai wanpela taim tasol. Na taim em i dai pinis, orait em bai i sanap long kot bilong God long las de. Yumi olgeta i bihainim dispela rot taim yumi kamap long dispela graun.
Taim Pikinini bilong God i kamap olsem man, em tu i mas bihainim dispela rot. Mama Maria i karim em,emistaplaip,nabihainemidai. Eminoinapidaimoa.
Taim Krais i kam bek, em i no samting long mekim sampela wok long sin. Em bai i kam bek long kisim lain bilong em i go long laip i stap oltaim oltaim. Em i lusim olgeta sin bilong yumi pinis long dai bilong em. Yumi no inap i dai tupela taim, na dai bilong Krais tu i kamap wanpela taim tasol.
Dai i olsem pinis bilong laip long dispela graun. Na em tru olsem dai em i no naispela samting. Dispela dai em i las samting i kamap long laip bilong man long dispela graun. Sapos man i laik mekim sampela samting, em i mas mekim olsem long taim em i stap laip. Sapos nogat, em bai i no inap long mekim.
Tasol, taim Buk Baibel i soim yumi olsem dai em i las samting i kamap long man long dispela graun, i no bilong pretim yumi. Nogat, em i bilong givim bel isi long yumi. Dai bilong Krais inapim olgeta promis bilong God long lusim olgeta sin bilong yumi. Yumi no ken pret nau!
Taim Krais i kam bek na yumi bai stap long kot bilong God, Krais bai i mekim wanem samting long yumi? Em bai i tokaut long olgeta sin bilong yumi long olgeta lain long dispela graun? Nogat. Na nogat tru, sapos yumi autim ol sin bilong yumi na tok sori long ol sin bilong yumi taim yumi stap laip long dispela graun. Em i lusim olgeta sin bilong yumi pinis long dai bilong em. Dispela dai i no inap i kamap gen. Em i pinis!
Presim Bikpela!
SAMPELA TINGTING
Long las de, taim yumi sanap long kot bilong God, yu ting olsem God bai i autim olgeta sin bilong yu long yau bilong olgeta narapela lain, o nogat? Bilong wanem?
Ritim: Hibru 9:15-22
Blut bilong Jisas i mekim yumi i kamap klin tru long ai bilong God, olsem na Jisas i stap namelman bilong strongim nupela kontrak. Em i dai pinis bilong baim bek ol manmeri na lusim ol sin ol i bin mekim long taim namba wan kontrak i stap yet. Olsem na olgeta manmeri i harim singaut bilong God na i bihainim, ol i ken kisim dispela laip bipo God i tok long givim long ol pikinini bilong en. Na bai ol i stap gut oltaim oltaim. —Hibru 9:12
Sapos wanpela man i gat planti mani na kago samting, em bai raitim tok long wanpela pepa, long husat bai i kisim ol samting bilong em taim em i dai – na dispela i olsem wanpela kontrak. Na taim em i dai, na lain bilong em i laik tilim ol samting bilong em long laik bilong em, ol i mas klia gut pastaim olsem papa i dai pinis (lain 16).
God yet i wokim dispela kain kontrak. Na God yet i promisim dispela laip i stap oltaim oltaim long ol lain i harim singaut bilong God na bihainim. Na bikpela askim i olsem: yumi yet i stap insait long dispela kontrak? Na “olgeta manmeri i harim singaut bilong God na i bihainim,” ol i husat tru?
Yumi save olsem Abraham i stap insait long kontrak bilong God. God yet i stori long dispela long Abraham. Na Moses tu, na lain bilong Israel, long Olpela Kontrak. Tasol yumi tu i stap insait long dispela kontrak. Em i tok olsem long yumi, “Dispela em i blut bilong strongim dispela kontrak God i tokim yupela long bihainim” (lain 20). Yumi stap insait long kontrak bilong em.
Yumi ken save tru tru olsem dispela kontrak em i bilong yumi tu. Long Olpela Kontrak, Krais i no kam yet. Ol i no lukim pinis wok bilong Krais bilong inapim olgeta promis bilong God. Satan, na lain bilong em, ol i save tokim ol lain bilong God olsem ol i no stap lain tru bilong God, na olsem ol i no inap kisim ol promis bilong em. Tasol, dai bilong Krais i soim klia tru olsem yumi stap long kontrak bilong God. I no gat wanpela man i ken bagarapim dispela kontrak bilong God nau. Kontrak bilong God bai i stap.
Ol lain i harim singaut bilong God na bihainim, ol i ken kisim dispela laip bipo God i tok long givim ol, bilong stap gut oltaim oltaim, long wanem Krais i dai pinis bilong baim bek yumi!
SAMPELA TINGTING
Yu yet yu stap insait long kontrak bilong God, o nogat? Yu yet bai kisim dispela laip bilong i stap oltaim oltaim? Olsem wanem?
Ritim: Hibru 8:8-13
Tasol dispela nupela kontrak mi laik mekim wantaim ol manmeri bilong Israel, em i olsem. Bai mi putim olgeta lo bilong mi long tingting bilong ol, na bai mi raitim tok bilong mi long bel bilong ol... bai mi marimari long ol na lusim sin bilong ol na mi no ken tingim moa.
—Hibru 8:10,12
Nupela Kontrak i kam pinis olsem promis bilong God i tok (dispela tok long dispela teks i kam long Jeramaia 31:31-34). Long taim bilong Jeramaia, God i tok olsem sampela bikpela senis bai i kamap long tingting long lain bilong em. Olgeta taim ol i stap lain i strong long sakim tok bilong God na ol i les long bihainim em. Tasol God i tok, “Wanpela de, taim nupela kontrak i kam, ol lain bilong mi bai bihainim laik bilong mi bikos ol i gat laik long mekim olsem, na nogat bikos mi yet mi tokim ol long mekim olsem - bai mi putim olgeta lo bilong mi long tingting bilong ol, na bai mi raitim tok bilong mi long bel bilong ol.”
Na Holi Spirit bilong God i kam long Nupela Kontrak, na em i mekim dispela senis i kamap. Long Nupela Kontrak, Spirit bilong Krais i stap insait long bel na tingting bilong ol manmeri bilong God. Tasol olsem wanem Spirit bilong God inap i stap insait long ol lain bilong mekim sin? Em inap bikos God yet i klinim bel bilong lain bilong em: “Bai mi marimari long ol na lusim sin bilong ol na mi no ken tingim moa.” Long ofa bilong Krais yet, God i rausim olgeta sin bilong yumi. Na taim yumi kamap klin long blut bilong Krais, Spirit bilong Krais i stap insait long yumi. God i lusim sin bilong ol manmeri bilong em bilong dispela Nupela Nontrak, na ol i kamap nupela.
Olsem na, wanem samting em i nupela long dispela Nupela Kontrak? Na wanem samting em i las tok bilong God long ol dispela las de? God i lusim olgeta sin bilong yumi long blut bilong Jisas Krais na em i givim Holi Spirit long yumi. Em tasol.
God i lusim sin bilong yumi na yumi kamap nupela! Long bilip yumi ken kisim olgeta gutpela samting long dispela Nupela Kontrak. Olgeta tok bilong Buk Baibel em i tok long stap insait long kontrak, long wanem, yumi mas lainim pasin bilong stap wanbel wantaim God. Na Buk Baibel i skulim yumi olsem yumi wok long kamap long nupela de, dispela de we olgeta hevi bilong yumi bai pinis, na bai yumi i stap wanbel tru wantaim God olgeta taim. Long dispela taim tude long Nupela Kontrak yumi kamap klostu moa long dispela de. Yumi no nidim ol ofa long Olpela Kontrak moa na wok bilong planti pris tu. Nogat. Yumi kisim dispela ofa bilong Krais olsem namba wan pris bilong yumi, na wok bilong em inap bilong oltaim oltaim. Na God i putim olgeta lo bilong em long tingting bilong yumi, na em i raitim tok bilong em long bel bilong yumi.
SAMPELA TINGTING
God i lusim sin bilong yu na yu kamap nupela. Tingting gut long dispela bikpela samting na tok tenkyu long God!
Ritim: Hibru 8:1-7
Tingim. Sapos namba wan kontrak i gutpela olgeta, orait God bai i no inap mekim nupela kontrak. —Hibru 8:7
Sapos yumi bungim wanpela man em i laik save long God em i husat, em i gutpela long yumi givim wanpela Baibel long em bilong em i ken ritim. Na sapos em i no klia tumas long Buk Baibel, nogut em i ting olsem Buk Baibel i olsem wanpela buk i givim sampela skul long God tasol. Olsem na em bai gutpela sapos yumi kliaim tingting long em, olsem em i no dispela kain buk, na em i no wanpela buk i stori long wok bilong planti manmeri tu. Nogat, dispela buk em i stori bilong God na pasin bilong em long stap wanbel wantaim ol manmeri bilong em. Man na God i stap wanbel long Stat 1 na 2, tasol long Stat 3 man i kamap longwe long God; em i lus long em. Tasol long pinis bilong Buk Baibel ol i stap wanbel gen, na ol bai i stap olsem oltaim oltaim (Kamapim Tok Hait 21).
Na tu yumi mas tokim dispela man olsem i gat tupela hap long Buk Baibel: Olpela Testamen na Nupela Testamen. Na yumi i ken soim dispela tupela hap long em.
Dispela tok “testamen” i min olsem “kontrak,” na i samting bilong sampela promis bilong God wantaim man.
Dispela olpela kontrak i stori long pasin bilong God long stap wantaim lain bilong em aninit long ol lo ol i kisim long Maunten Sainai. Na dispela nupela kontrak i stori long pasin bilong God long stap wantaim lain bilong em long blut na Spirit bilong Jisas Krais.
Ating dispela man bai wok long paul liklik. Em i hat tru long kliaim gut tru olgeta tok long Buk Baibel. Tasol em bai gutpela sapos yumi skulim man kain olsem dispela man olsem dispela kontrak God i wokim wantaim man i save bungim olgeta hap long Buk Baibel. Long stat bilong dispela graun inap long pinis bilong en, dispela kontrak i stap, na i min olsem God yet i autim tok na ol manmeri bilong em i mas bekim. God i givim ol promis long lain bilong em, na ol yet i mas bilipim em na bihainim em. Na las tok bilong God i kam long yumi long Jisas Krais.
Na taim yumi i kamap long stori bilong Krais, yumi i ken skulim dispela man long dispela tok “Nupela Kontrak.” Na bai yumi i no inap long kliam tok long dispela Nupela Kontrak sapos yumi i no save gut long blut tudia bilong Krais, na pawa tru long Spirit bilong em.
SAMPELA TINGTING
Dispela tok “dispela kontrak God i wokim wantaim man i save bungim olgeta hap long Buk Baibel” i gat wanem mining?
Ritim: Hibru 7:26-8:1
Orait as bilong dispela tok yumi mekim, em i olsem. Yumi gat dispela kain gutpela hetpris i stap, na em i sindaun pinis long han sut bilong sia bilong Namba Wan King long heven.
—Hibru 8:1
Long dispela olpela kontrak i no ol pris tasol inap i stap olsem namel man long God na ol manmeri bilong em. I gat ol profet na king tu i save mekim olsem. Long dispela tripela kain man God i bin wok long toktok long lain bilong em.
Ol profet i save autim tok bilong God long ol lain bilong em. Ol pris i save kisim tok bilong man i go long God long ol ofa na long prea. Na king i save bosim lain bilong God olsem pesman bilong God. Sapos ol profet i no i stap, bai ol manmeri bilong God i no inap save long laik na tingting bilong God. Sapos ol pris i no i stap, bai ol manmeri bilong God i no inap i stap wanbel wantaim God. Na sapos ol king i no i stap, bai ol manmeri bilong God i no inap i stap gut aninit long lukaut bilong God.
Long tude, Jisas yet inapim olgeta dispela wok long manmeri bilong God. Em i soim klia tru laik na tingting bilong God, em i kamap olsem rot bilong yumi ken i go long God, na God i lukautim na bosim yumi gut long em.
Krais em i olsem profet, bikos long ol dispela las de God yet i autim las tok bilong em long Krais. Krais i olsem pris bilong yumi bikos em i kisim yumi i go klostu long God long taim em inapim olgeta ofa taim em i dai long diwai kros. Na Krais em i king bilong yumi, bikos em i sindaun long “han sut bilong sia bilong Namba Wan King long heven.”
Jisas Krais tasol i olsem as bilong olgeta samting yumi mekim long kisim save long God, long mekim wok bilong God, na long lotuim em. Sapos yumi no bilong Krais bai yumi i no inap save long God, yumi no inap amamasim God, na yumi no inap kisim gutpela lukaut bilong God.
Long dispela teks yumi ritim tude, man i raitim dispela buk i laik sapos yumi klia olsem yumi gat hetpris i stap, em i king Jisas. Em i stap long han sut bilong sia bilong Namba Wan King tru. Na em inapim tru ol wok bilong pris long dispela olpela kontrak.
SAMPELA TINGTING
Krais i save mekim wanem ol kain samting long yu olsem profet, pris na king bilong yu?
Ritim: Hibru 7:21-25
Olsem na oltaim em inap tru long kisim bek ol manmeri i kam klostu long God long nem bilong em, long wanem, em i stap laip oltaim, na em i save beten long God long helpim ol.
—Hibru 7:25
Dispela Gutnius i olsem las tok bilong God tu bikos em i autim tok long dispela las pris i mekim dispela las ofa tu. Na dispela pris i stap laip oltaim, long kisim bek oltaim olgeta lain i kam klostu long God long nem bilong em.
Wanpela pris em i wanpela man em i helpim ol manmeri i kam klostu long God. Kain kain kantri na kain kain manmeri i bin yusim ol pris, long kisim manmeri i kam klostu long God long ol ofa, prea na narakain pasin. Olgeta lain man i save olsem wanpela God i stap, na ol i save olsem ol i gat nid long kamap wanbel wantaim God gen.
Man i raitim Hibru i no stori long ol narapela kain lain. Nogat, em i stori long lain Israel tasol. Em i tingim planti ol pikinini man bilong Livai na bilong Aron, na em i soim olsem wok pris bilong ol i no gutpela olgeta; em i wik tru. Tasol wok bilong Jisas Krais em i gutpela na stretpela olgeta, na em inapim tru wok pris bilong ol, na em i las ofa tu!
Ol hetpris bilong bipo ol i gat wok bilong mekim ofa long olgeta de. Smuk i go antap, na blut i kapsait. Bulmakau, meme, na pikinini sipsip. Sampela moa, na sampela moa, tasol olgeta taim ol i sot. Tasol taim Krais i kam, olsem las hetpris, em i mekim las ofa na em i tok, “Em i pinis nau.” Nogat sampela moa krai bilong ol pikinini sipsip bai i kamap olsem ofa, bikos Pikinini Sipsip bilong God i kam pinis, na em i rausim ol sin bilong dispela graun.
Jisas i kamap hetpris oltaim oltaim long yumi. Yumi no nidim narapela hetpris moa. Wok pris long ol lain bilong Livai i pinis olgeta. Krais i stap laip oltaim oltaim long holi ples bilong God long kisim bek ol manmeri i kam klostu long God long nem bilong em. Dispela las pris i olsem pris i stap oltaim oltaim.
I min olsem, olgeta narapela lain i save yusim ol pris tude, ol i paul. Yumi inap kamap klostu long God long wok bilong hetpris bilong yumi, Jisas Krais, tasol!
SAMPELA TINGTING
Jisas i olsem pris i stap oltaim oltaim long yu. Dispela em i givim yu bel isi olsem wanem?
Ritim: Hibru 6:13-20
Bipo God i mekim promis long em bai i mekim gut tru long yumi ol lain bilong Abraham. Na em i laik soim yumi klia tru olsem, em i no inap senisim tingting bilong em, olsem na em i tok tru antap bilong strongim tok bilong em yet. —Hibru 6:17
Sampela ol Kristen i tok olsem yumi no ken tok tru antap taim yumi kamap long kot. Na em i tru, i nogut long tok tru antap long planti ol narapela taim (Sapos yupela i tok “yes” orait “yes” em inap), tasol insait long kot, long ai bilong Jas, em i gutpela samting.
Yumi nidim dispela pasin bilong tok tru antap bikos olgeta manmeri i no tok tru olgeta taim. Yumi i no inap bilipim olgeta tok bilong man. Yumi ol i lain bilong giaman, tasol taim yumi tok tru antap, yumi save olsem yumi sanap long ai bilong God, na em i no inap giaman, na yumi tok, “Mi promis long autim tok tru tasol, na olgeta tok tru, na God i ken helpim mi.”
Tasol long dispela teks God yet i tok tru antap. Olsem wanem? God i no inap long giaman. Olsem na, bilong wanem em i tok tru antap?
God yet i laik helpim yumi, bikos em i save olsem bilip bilong yumi i no strong tumas. Em i laik soim yumi klia tru olsem ol promis bilong em i tru tru. “Olsem na nau i gat tupela tok i stap, em promis bilong God na dispela tok tru antap em i bin mekim. Tupela i no inap senis, na long dispela tupela tok God i no inap tru long giaman” (Lain 18).
Em i wok bilong sios long autim tok bilong God na long wokim ol sakramen. Sapos sios em i bihainim stretpela pasin long dispela tupela samting, em bai i strongim sios na em bai i strongim wok bilong kingdom bilong God. Tupela sakramen (baptais na Holi Kaikai) i no putim sampela samting antap long tok bilong God. Nogat, ol i strongim tok bilong God, dispela tok yumi bilipim pinis.
Tok bilong God na tupela sakramen i olsem ol promis na tok tru antap bilong God. God i banisim yumi long “yes” bilong em na long “amen.” Olsem tasol em i strongim yumi na yumi ken bilipim em tru tru.
SAMPELA TINGTING
Wanem samting i save strongim yu long bilipim tru ol promis bilong God?
Ritim: Hibru 5:8-17
Yupela i kamap Kristen longpela taim pinis, na inap yupela i wok long skulim ol arapela long ol tok bilong God. Tasol nogat. Yupela i sot long tingting, na ol arapela man i mas skulim yupela gen long ol namba wan hap tru bilong tok bilong God. Yupela i no redi yet long kisim strongpela kaikai. Nogat. Yupela i dring susu i stap yet. —Hibru 5:12
Taim man i raitim buk Hibru i laik skulim ol lain long wok bilong Krais olsem hetpris, em i wari long ol, nogut ol i no inap long kisim tok bilong em. Ol i stap Kristen longpela taim, na inap ol i wok long skulim ol arapela long tok bilong God. Tasol ol i no redi yet long kisim strongpela kaikai. Nogat. Ol i dring susa i stap yet.
Na i tru olsem bilip bilong yumi mas kamap olsem bilip bilong ol pikinini sapos yumi laik i go insait long kingdom bilong God. Tasol dispela i no min olsem yumi mas i stap olsem ol pikinini long bilip bilong yumi. Olgeta lain i mas kamap nupela, sapos ol i laik lukim kingdom bilong God. Tasol i no min olsem yumi mas i stap olsem ol bebi tasol long bilip bilong yumi.
Planti taim ol lain long kain kain sios i wok long skulim ol pikinini tasol. Planti ol bikpela manmeri i no save lainim planti samting moa long Buk Baibel, na i olsem ol i save long tok bilong God wankain olsem ol yangpela pikinini i save long en tasol. Inap ol i wok long skulim ol arapela, tasol ol i dring susu i stap yet.
Yumi i gat nid long kisim skul! Sapos ol lain bilong sios i klia tru long tok bilong God, Satan bai i no inap long bagarapim ol doktrin na bilip insait long sios.
Em tru, yumi mas klia long ol nambawan tok long Buk Baibel, tasol yumi i mas wok long kisim save antap long ol dispela tok tu. Yumi mas i go dip insait long tok bilong God, na kisim bikpela save moa. Sapos nogat, yumi mas lukaut. Nogut yumi lusim ol liklik samting yumi holim pinis.
Sios bilong God, na ol lain bilong sios tu, ol i mas wok strong long skulim ol lain long sios. Em tru olsem dispela hevi bilong bilip i no strong tumas i save kamap long kain kain rot olsem sin, les long prea, sindaun wantaim ol lain nogut na i go i go. Tasol namba wan as bilong dispela hevi bilong bilip i no strong tumas, em i taim yumi no klia tru tru long olgeta tok insait long Buk Baibel.
SAMPELA TINGTING
Hau bai yu yet, long laip bilong yu, i wok long kisim sampela moa save long God na Tok bilong em?
Ritim: Hibru 5:1-10
Jisas em i Pikinini Bilong God, tasol em i karim pen, na dispela i skulim em tru long pasin bilong bihainim tok bilong God. Dispela i mekim em i kamap nambawan man tru bilong bihainim tok. Olsem na God i makim em na i tok, “Yu stap hetpris, wankain olsem Melkisedek,” na em i kamap Man bilong helpim na kisim bek olgeta manmeri i bihainim tok bilong em, bai ol i stap gut oltaim oltaim. —Hibru 5:8-10
Taim Buk Baibel i tok olsem Krais i kisim skul “long pasin bilong bihainim tok bilong God,” i no min olsem Krais i mas lainim pasin bilong bihainim tok bilong God. Nogat. I min olsem long olgeta bikpela pen em i karim, em i lainim olsem em i hat tru long bihainim tok bilong God.
I luk olsem dispela teks long buk Hibru i tingim taim bilong bikpela pen bilong Krais long gaden long Getsemani. Long Getsemani em i krai nogut tru na em i kisim save long laik bilong God long laip bilong em, na dispela laik bilong God em i hat tru! Long pen em i karim, em i kamap klia long pasin bilong bihainim tok bilong God.
Na Krais i kamap nambawan man tru bilong bihainim tok. Em i no wokim wanpela sin, tasol long bihainim olgeta tok bilong God, Krais i kamap long mak God i makim bilong en. Em i bihainim tru olgeta tok bilong God long olgeta bikpela traim tru God i givim long em, na taim em i mekim olsem em inapim tru pasin bilong bihainim tok bilong God.
Na “em i kamap Man bilong helpim na kisim bek olgeta manmeri i bihainim tok bilong em, bai ol i stap gut oltaim oltaim.” Wankain olsem Pikinini bilong God i bihainim Papa bilong em, yumi yet i mas bihainim Pikinini bilong God. Dispela salvesen Krais i kisim i kam long yumi taim em i bihainim tok bilong Papa bilong em, i samting bilong ol lain i redi long bihainim em tasol.
Olgeta taim yumi mas tingim olsem Jisas em i man bilong kisim bek yumi. Yumi kisim salvesen bikos em yet i bihainim olgeta tok bilong God, na i no olsem yumi yet i bihainim em gut tru. Tasol, nogut yumi ting yumi no gat nid long bihainim tok bilong God bikos em yet i bihainim olgeta tok bilong God. Yu no ken tok olsem yu bilip long Krais sapos yu les long bihainim em.
Sapos wanpela man i ran i kam insait long haus bilong yu na singaut strong, “Lukaut, haus bilong yu paia, ya. Yu ranawe hariap!” orait, sapos yu bilipim em, bai yu bihainim tok bilong em na ranawe na lusim haus bilong yu. Olsem tasol bilip na pasin bilong bihainim tok bilong God i save pas wantaim. I no gat narapela rot long bilip. Yumi mas bilipim God na bihainim em.
SAMPELA TINGTING
Yu yet yu lainim pasin bilong bilipim God na bihainim em?
Ritim: Hibru 4:11-16
Yumi yet i no gat strong bilong daunim sin. Tasol yumi no ken ting, dispela hetpris bilong yumi em i no inap sori long yumi. Nogat. Olgeta traim i save kamap long yumi, dispela olgeta i bin kamap pinis long em bilong traim em tu. Tasol em i no mekim sin. Olsem na yumi ken i go klostu long God, na yumi no ken pret. Em i man bilong marimari. Yumi go long em, na bai yumi lukim em i sori long yumi. Na sapos yumi gat hevi, orait marimari bilong em bai i helpim yumi. —Hibru 4:15-16
Sampela taim yumi i ting olsem ol narapela i no inap save tru long ol hevi bilong yumi. “Yu no save tru long ol hevi mi yet mi save bungim long laip bilong mi, ya.” Sampela taim yumi bai autim dispela kain tok bikos yumi les long lusim sampela sin bilong yumi, na yumi les long ol narapela i kotim yumi long sin bilong yumi. Tasol sampela narapela taim yumi bai autim dispela kain tok bikos yumi ting tru tru i no gat wanpela i save tru long ol hevi bilong yumi.
Tasol, yumi no inap tok olsem Krais i no save sori long yumi, na em i no save long ol hevi bilong yumi. Olgeta traim i save kamap long yumi, dispela olgeta i bin kamap pinis long em bilong traim em tu. Em i save long olgeta pen na hevi bilong yumi na em i save olsem yumi i no gat strong.
Krais em i kamap man olsem yumi, tasol em i no gat sin. Olsem man em i save long taim bodi bilong yumi i les. Ol narapela man i bin givim pen long em tu. Em i bin pilim planti pen tru, na em i bin pret long dai. Em tu i save long ol traim i wok long kam long man. Tasol em i no wokim sin.
Dispela teks i no tokim yumi olsem Krais bai lusim ol sin bilong yumi hariap bikos em yet i bin bungim ol traim long laip bilong em. Nogat, dispela teks i laik tokim yumi olsem yumi ken i go klostu long God, na yumi no ken pret, bikos em i sori long yumi; em i marimari long yumi bikos em yet i save long ol hevi bilong yumi. Em i save. Na em tasol inap helpim yumi.
Krais i gat bikpela marimari na sori long yumi, tasol moa yet, em i gat bikpela pawa tru. Nau em i sindaun long sia king bilong God. Olsem na yumi no ken pret long go long em. Yumi mas bilip tru na go long em.
Yumi no ken askim Krais long marimari long yumi tasol, yumi ken askim em long helpim yumi tu. Yumi inap askim em long rausim ol hevi bilong yumi long marimari bilong em o long givim strong long yumi bilong wokabaut long ol hevi na traim. Tasol bikpela samting long ol prea bilong yumi i olsem: yumi mas askim Krais long helpim yumi abrusim ol sin taim yumi wokabaut long ol traim, olsem Krais yet i mekim taim em i bungim ol traim long laip bilong em.
SAMPELA TINGTING
Wanem ol hevi na traim i stap long laip bilong yu long tude? Yu save go long God, na no ken pret, long askim em long sori long yu na helpim yu?
Ritim: Hibru 4:1-10
Olsem na yumi save, ol manmeri bilong God bai i gat malolo i stap yet, em i olsem malolo bilong de Sabat. —Hibru 4:9
Yumi wok long kamap long dispela malolo bilong de Sabat. Em i las promis bilong God, na em bai inapim olgeta promis bilong em; na ol lain i harim tok bilong God long nau, ol bai i kisim.
God inapim olgeta wok bilong em long kamapim na wokim dispela graun long siapta 1 long Buk Stat, long de Sabat. Long de Sabat, God na olgeta samting em i wokim i amamas long naispela na gutpela wok stret bilong God. Na wankain olsem, God bai inapim wok bilong em bilong kisim bek yumi, long malolo bilong de Sabat. Long dispela de, God na olgeta lain bilong em bai amamas long gutpela wok stret bilong God.
Malolo em i samting bilong amamas long God na wanem samting em i givim yumi. Dispela malolo bai i kamap bihain, em bai i stap bilong inapim tru olgeta malolo, na amamas long nupela graun bai i naispela olgeta na bai i no inap pinis.
Long Olpela Testamen ol lain bilong God i kisim tok piksa long malolo bilong de Sabat long taim ol i malolo long wan wan wik, na tu long dispela graun em i promis long givim ol. Nem bilong dispela man i go pas long lain Israel taim ol i lusim ples drai na wokabaut i go long dispela graun, em i Josua. Long Tok Grik dispela nem em i Jisas. Dispela Josua (Jisas bilong Olpela Kontrak) inap long kisim lain Israel i go long dispela graun God em promis long givim ol, na dispela graun em i tok piksa tasol long dispela graun God i promis long givim yumi long wok bilong Jisas long Nupela Kontrak. Jisas inapim tru olgeta samting Moses na Josua i mekim. Jisas i wok long kisim ol lain bilong God i go long dispela graun God i promis long givim ol.
Tude God yet i singautim yumi long lainim sampela samting long ol kranki pasin bilong ol Israel. Em i hat tru. Tasol dispela nupela Israel (yumi) i mas lainim sampela samting long olpela Israel (long Olpela Kontrak). Buk Baibel i soim yumi olsem planti bilong ol lain bilong God long Olpela Kontrak i no bin go insait long malolo bilong dispela graun em i promis long givim ol. Ol i pundaun na i dai long ples drai, bikos ol i no bilip tru.
Nau yumi wokabaut long rot long ples drai. Jisas i go pas long yumi. Yumi yet i mas i stap klostu long em na bihainim olgeta tok bilong em. Na tu yumi mas i stap klostu long ol narapela bilip lain. Na taim yumi bungim ol hevi long dispela rot, yumi mas tingting long taim bihain na tok, “Lukluk, graun bilong malolo tru i stap!”
SAMPELA TINGTING
Dispela teks inap long strongim yu taim yu bungim ol hevi long laip bilong yu, o nogat?
Ritim: Hibru 3:7-14
Olgeta de yumi save kolim “Nau” tasol. Olsem na long olgeta de yupela wan wan i mas givim gutpela tok long ol arapela manmeri bilong God, na kirapim tingting bilong ol, nogut pasin bilong sin i giamanim wanpela bilong yupela na em i pasim strong bel bilong en.
—Hibru 3:13
God i givim yumi las tok long ol las de pinis. Na i no gat wanpela samting i bikpela samting moa long yumi olsem yumi harim na bihainim dispela tok. Long Olpela Testamen planti lain i harim tok bilong God, tasol ol i lus yet. Na dispela em i olsem strongpela tok long yumi tu. Yumi mas was gut: “Nogut wanpela brata namel long yupela em i gat tingting nogut long bel bilong en na em i lusim bilip na i givim baksait long God i gat laip” (Lain 12).
Bikos rot bilong yumi i olsem ples nogut, na sin i wok long giamanim na grisim yumi, ol Kristen i mas pas wantaim ol lain bilong sios we ol i save was gut long ol memba bilong sios. Insait long dispela bung, ol Kristen i mas givim gutpela tok long ol narapela. Long wan wan de yumi nidim helpim bilong stap strong long bilip na gutpela pasin. Yumi nidim dispela strong, na yumi mas givim dispela strong long ol narapela tu long laikim tru.
Buk Baibel i skulim olgeta Kristen sios long mekim olsem. Tasol planti lain long kain kain sios long tude i save go long sios long Sande bilong kisim sampela gutpela tok long wanpela Pastor long kisim strong. Tasol long ol narapela de insait long wan wan wik ol i bisi tumas, na ol i lus tingting long givim gutpela tok long ol arapela manmeri bilong God long ol narapela de.
Na sapos yumi les long bung insait long wanpela sios wantaim ol narapela manmeri i bilip long God, i min olsem yumi no bilipim tru las tok bilong God, na yumi no klia tumas long pawa bilong sin long giamanim na grisim yumi.
Buk Baibel i tok, “Olgeta de yumi save kolim ‘Nau’ tasol. Olsem na long olgeta de yupela wan wan i mas givim gutpela tok long ol arapela manmeri bilong God.” Nau em i taim bilong kisim marimari bilong God, dispela taim we God i autim tok long yumi long Jisas Krais. Nogut yumi pasim strong bel bilong yumi, na yumi bihainim giaman tok bilong sin. Pastaim bai yumi no wari tumas long ol sin bilong yumi, na bihain bai yumi no inap harim na bihainim wanpela samting long tok bilong God.
Yumi mas sanap strong tru, na sanap wantaim ol narapela bilip lain. Yumi nidim ol narapela bilip lain long stap strong long bilip. Sapos nogat, Satan bai i painim rot long kam long yumi.
SAMPELA TINGTING
Ol lain long sios bilong yu i save givim gutpela tok long yu, o nogat? Na yu yet yu save strongim ol narapela manmeri bilong God, o nogat?
Ritim: Hibru 3:1-6
Moses em i stap olsem wokman bilong God... Tasol Krais em i Pikinini Bilong God, na em i gat wok bilong bosim ol manmeri i stap olsem haus bilong God. Na em i bihainim tru tok bilong God na i mekim dispela wok. Na sapos oltaim yumi bilip strong na yumi amamas na wetim Bikpela i mekim gut long yumi, orait yumi tu i stap olsem haus bilong God. —Hibru 3:5-6
Dispela pas i go long lain Hibru i save skelim dispela olpela kontrak wantaim dispela nupela kontrak, long putim ples klia olsem dispela nupela i winim dispela olpela.
Dispela teks i skelim Moses, namel man bilong Olpela Kontrak, wantaim Krais, long em yumi kam insait long nupela kontrak. Em i klia – Moses em i gat namba, tasol Krais i winim em na em i gat namba tru!
Tupela wantaim i save bihainim tok bilong God. Moses i olsem wokman bilong God, na Krais i stap olsem Pikinini bilong God. Moses i bihainim tok bilong God insait long haus bilong God; Krais, olsem Pikinini bilong God, i bosim haus bilong God.
Buk Baibel i save kolim Israel “haus bilong God,” na long Nupela Testamen sios bilong God tu i olsem haus bilong God tu. Na em i bikpela samting moa long stap wanpela bilong dispela sios Krais yet i bosim, olsem long stap olsem haus bilong God long taim bilong Moses, dispela wokman bilong God.
Planti Kristen lain i tok olsem ol lain Juda i gat namba bikos ol i stap lain bilong God. Tasol long dispela teks God i skulim yumi olsem haus bilong God long Nupela Testamen i winim tru haus bilong God long Olpela Testamen. Bilong wanem? Bikos Jisas i winim Moses.
Ol Hibru lain i kisim dispela pas, ol i lain Juda, na ol i kamap Kristen long bihainim Jisas. Na man i raitim dispela pas i laik soim ol olsem ol i lusim haus bilong Moses na kamap long sios bilong Krais. Na dispela i gutpela samting bikos sios bilong Krais i winim haus bilong Moses. Na ol bai i stap lain bilong haus bilong God inap oltaim sapos ol i wokabaut insait long dispela fridom na hop God i givim ol long Krais.
Buk Baibel i laik soim yumi olsem em i bikpela na naispela samting tru long stap insait long sios bilong Nupela Testamen. Em i winim wanem samting ol lain bilong Olpela Testamen i bin kisim. Na tu, yumi mas klia gut olsem Krais i bung wantaim haus bilong em, na tupela i save pas wantaim.
SAMPELA TINGTING
Man i raitim buk Hibru i tokim yumi olsem yumi stap olsem haus bilong God. Dispela i gat wanem mining insait long laip bilong yu?
Ritim: Hibru 2:14-18
Ol dispela pikinini Jisas i tok long en, em ol manmeri tasol. Olsem na Jisas tu i kamap man wankain olsem ol, bai em i ken i dai, na long dispela pasin em i ken bagarapim Satan, em dispela man i gat strong bilong mekim ol manmeri i dai. Ol manmeri ol i save pret long dai, na olgeta taim ol i stap long graun, dispela pret bilong ol i mekim ol i stap olsem ol kalabus bilong Satan. Tasol Jisas em i dai bilong lusim ol long dispela kalabus. —Hibru 2:14-15
Yumi manmeri tasol. I min olsem yumi no gat strong na yumi bai dai. Na bikpela samting long ol manmeri i olsem: Ol i laik stap laip, na namba wan pret bilong ol i dai.
Yumi save wok strong long karamapim ol pret bilong yumi, tasol yumi no inap. Dai i save stap klostu long yumi olgeta. Tasol maski em i stap klostu long yumi, yumi no save redi long bungim em. Planti taim yumi no tingting tumas long dai, bikos yumi laik i stap laip tasol.
Tasol yumi no ken wok long olgeta pret bilong yumi. Laik bilong yumi long stap laip, na pret bilong yumi long dai, em i samting bilong ol man na meri tasol. I no olsem yumi mekim sin taim yumi les long dai; nogat, yumi man tasol. Na God i save olsem yumi man tasol.
Dispela pikinini bilong God i stap oltaim oltaim, em i kamap pikinini bilong man, na em i kamap wankain olsem yumi. Olsem na, olsem man tru em i gat laik long stap laip na em i no gat laik long dai.
Tasol long laip na long dai bilong Jisas, bikpela senis i kamap long laip na dai bilong yumi. Jisas i no rausim dai. Olgeta man bai i dai yet. Tasol dai i kamap olsem wokboi bilong Jisas. Long olgeta lain i bilip long em, Krais i rausim pret bilong dai.
Bikos Krais yet i bin i stap laip olsem yumi na em i bin dai wankain olsem yumi bai i dai, senis i kamap. Long dai, Krais em i bagarapim Satan, em i bin holim pawa bilong dai. Em i winim Satan, na laip bilong yumi ol man i kamap narakain. Dai i no olsem kalabus bilong Satan nau. Em i liklik hap rot yumi mas i go long em bilong kamap long Krais.
Tude, Krais i wok long helpim yumi i stap fri long pret, na pulap long bilip. Na taim las de bai i kam, em bai strongim yumi long bilip olsem yumi bai i kamap klostu long em.
SAMPELA TINGTING
Krais i kamap man wankain olsem yu. Dispela i helpim yu long taim bilong dai bilong yu yet olsem wanem?
Ritim: Hibru 2:5-13
Olsem na em (Jisas) i save kolim ol “brata,” na em i no sem long kolim ol olsem.
—Hibru 2:11
Sampela taim wanpela gutpela man bai i gat brata, na dispela brata i man nogut. Na planti taim ol gutpela man bai sem long dispela kain brata.
Tasol, long dispela tok long Hibru 2:11 yumi inap kisim bikpela bel isi: Pikinini bilong God em i no sem long kolim yumi “brata” bilong em.
Dispela pikinini bilong God i bin i stap oltaim oltaim, em i lukim yumi i mekim bikhet pasin long dispela graun. Na em i lukim yu na mi, na em i daunim em yet na kisim pen na bagarap long yumi. Yumi stap long kalabus long sin bilong yumi, na yumi i manmeri nogut olgeta. Na em i tokim papa bilongem:“Papa,olmanyuyetyuwokim,olilusnaolidaiistap. Milaikigonahelpimol. Milaik kamap man olsem ol na stap laip wantaim ol. Na mi laik dai long ol tu. Mi laik kamap olsem brata bilong ol, olsem ol inap kamap pikinini bilong yu.”
Olsem tasol Krais i kam bilong helpim yumi. Em i go pas long yumi, long ples bilong bagarap, long sin na dai na hel, na olsem tasol em i opim rot i go long Papa. Wantaim amamas tru em i sanap long ai bilong Papa bilong em gen na em i tok, “Lukim. Mi stap wantaim ol dispela pikinini God i bin givim long mi” (Lain 13).
Jisas em i no sem long yumi!
Sapos yumi tingting gut long dispela tok i tru, na sapos yumi tingim sampela taim we yumi i sem long Jisas, bai yumi klia olsem yumi i gat bikpela asua tru.
Sapos yumi tingting gut long dispela tok i tru olsem Jisas em i kolim yumi, “brata,” na em i no sem long kolim yumi olsem, hau bai yumi i gat laik long lusim em na i stap wantaim ol maniman na man i gat namba long dispela graun? Nogat. Jisas em i no sem. Em i kisim yumi na pas wantaim yumi, olsem tasol yumi mas amamas tru long wanbel wantaim ol narapela brata na susa bilong em, maski ol i rabisman tru.
Taim yumi klia olsem yumi no mekim wanpela samting na Krais i laikim tru yumi, yumi no inap sem long ol narapela lain bilong em.
SAMPELA TINGTING
Jisas i kolim yu “brata” o “susa” bilong em. Dispela i gat wanem mining long laip bilong yu yet?
Ritim: Aposel 1:1-8
...Pastaim Bikpela yet i bin autim tok long em i laik kisim bek yumi. Na ol man i harim tok bilong em, ol i bin tokim yumi olsem, “Dispela tok em i tru tasol.” Na God i mekim ol kain kain mirakel na olkain strongpela wok, na em i tilim ol presen bilong Holi Spirit long ol manmeri, inap long laik bilong em yet, na long dispela pasin em i soim olsem dispela tok bilong Pikinini bilong en, em i tru olgeta. —Hibru 2:3-4
Ol tok long Nupela Kontrak i olsem las tok bilong God long las de. Tasol yumi i kisim dispela gutnius long Buk Baibel, olsem wanem? Dispela buk i no pundaun nating long heven. Nogat, em i gat stori bilong em yet.
Pastaim BIkpela yet i bin autim dispela tok. Wanem samting Krais i mekim na wanem samting em i tokaut long em, ol dispela em i gutnius bilong God i go long olgeta manmeri bilong em. Gutnius i kamap olsem pastaim.
Tasol Krais i no autim tok na mekim wok bilong em long dispela graun tasol. Nogat, em i wok tu long redim sios long olgeta samting bai i kamap bihaintaim. Em i larim sampela gutpela witness i stap, olsem ol lain i harim tok bilong em na lukim wok bilong em, na ol i tok, “Dispela tok em i tru tasol.” Ol 12-pela aposel i ol dispela man, na ol i bin stap wantaim Krais taim em i mekim wok. Na Krais i bin soim em yet long ol dispela aposel taim em i kirap gen long dai.
Na ol dispela man i autim tok long ol lain long graun. Na God yet i strongim tok bilong em taim em i “mekim ol kain kain mirakel na olkain strongpela wok, na em i tilim ol presen bilong Holi Spirit long ol manmeri.”
I gat planti hap long Buk Baibel we yumi i ritim ol stori long dispela kain samting i bin kamap. Long Aposel 3 yumi ritim olsem wanpela man lek nogut i kalap na wokabaut taim aposel Pita i tokim em long mekim olsem. Na long Aposel 9 yumi i ritim stori long God i kirapim wanpela meri i dai pinis. Olsem tasol God yet i strongim tok bilong ol aposel, olsem ol lain i ken harim na bilipim.
Na bihain ol aposel i dai. Tasol ol bilip lain i wok long bihainim tru ol dispela tok ol aposel i skulim ol long em. Ol i save olsem tok bilong ol aposel i bikpela samting stret. God yet i lukautim dispela tok. Sampela man i raitim ol dispela tok long ol aposel na yumi i kisim long Buk Baibel olsem Nupela Kontrak. Em i las tok bilong God long ol las de. Sapos yumi i holim pas dispela tok, bai yumi no inap lus. Tasol sapos yumi givim baksait long dispela tok, bai yumi bungim dai bilong oltaim oltaim.
SAMPELA TINGTING
God i lukautim gut tru dispela tok bilong yumi i ken kisim. Dispela i soim wanem samting long pasin bilong God?
Ritim: Hibru 2:1-4
Olsem na sapos yumi givim baksait long dispela wok bilong God, olsem wanem na bai yumi ranawe na abrusim pe bilong sin? —Hibru 2:3
Bipo tru, God i autim tok long Maunten Sainai long Moses. God i tokim ol lain bilong em long wanem samting ol i mas mekim; na tu em i tokaut long pe nogut bilong ol lain i sakim tok bilong em. Olgeta sin i gat pe nogut bilong em.
Nupela Kontrak i no wankain olgeta. I no olsem olgeta wan wan sin bilong yumi i gat pe nogut bilong en. Tasol dispela i no min olsem ol lain i sakim Tok Tru bilong God bai abrusim pe nogut bilong sin. Ol lain i givim baksait long Jisas, God bai i mekim save long ol - “Olsem na sapos yumi givim baksait long dispela wok bilong God, olsem wanem na bai yumi ranawe na abrusim pe bilong sin?”
Na sapos ol lain bilong bipo i bin kisim pe nogut inap long pasin nogut ol i bin mekim, olsem wanem bai yumi i ranawe na abrusim pe bilong sin? Yumi yet i stap long las de. Yumi yet i kisim las tok bilong God.
Dispela teks i tok, “Sapos yumi givim baksait long dispela wok bilong God...” I gat sampela lain long tude i wok strong tru long bagarapim God na tok bilong em tu. Na ol bai i kisim pe nogut bilong dispela. Tasol dispela teks i stori long ol lain i givim baksait long dispela wok bilong God. I gat planti lain long tude i givim baksait long God. I no olsem ol i wok long bagarapim tok bilong em olgeta taim. Nogat. Ol i les tasol. Ol i no harim tok. Ol i bihainim laik bilong ol yet.
Buk Baibel i klia olgeta – sapos yumi i givim baksait long dispela wok bilong God, hau bai yumi i ranawe na abrusim pe bilong sin? Bai yumi no inap tru.
SAMPELA TINGTING
Sampela taim yu yet i givim baksait long wok bilong God, o nogat? Askim God long helpim yumi i bihainim tok bilong em olgeta taim.
Ritim: Hibru 1:1-4
Bipo long planti taim na long planti pasin God i bin givim tok long ol tumbuna bilong yumi long maus bilong ol profet. Tasol long dispela taim nau, em long taim bilong las de, God i bin autim tok long yumi long maus bilong Pikinini Man bilong em. —Hibru 1:1,2
Nupela Kontrak i save brukim stori bilong ol samting i bin kamap bipo (olsem histori) long tupela hap – taim bipo long Krais i kam long dispela graun, na taim bihain long Krais i kam long dispela graun.
Long dispela tupela hap wantaim, God i save stori long lain bilong em – ol lain i harim tok bilong em long maus bilong ol man. Tasol rot em i yusim long autim dispela tok bilong em i senis, na i no wankain. Long taim bipo long Krais i kam long dispela graun, God i save yusim maus bilong ol profet long autim tok bilong em long lain bilong em. Dispela tok “profet” i min olgeta lain i autim tok bilong God olsem Moses na Devit na Aisaia wantaim. Tasol nau, long las de, God i autim tok long yumi long maus bilong “Pikinini Man bilong em.”
Yu na mi i stap long las de – na God i autim tok long yumi long maus bilong pikinini bilong em. Dispela pas i go long ol Hibru lain i soim yumi olsem ol tok God i givim yumi long Krais em i las tok bilong em. Olgeta siapta long dispela buk i soim dispela.
Na dispela tok “Las tok bilong God,” i gat wanem mining?
Namba wan samting i olsem: em i las tok bilong God bikos em i olgeta tok bilong em. Em i no tok tru tasol, em i olgeta tok tru bilong God. God i opim bel bilong em olgeta long yumi na i no gat sampela samting i stap yet long ples hait. Sampela lain i pret bikos ol i ting i gat sampela samting bilong God i stap long ples hait, na ol i pret bikos ol i no klia tumas long God. Tasol nogat. God i autim tok pinis long olgeta samting yumi i gat nid long harim, long Krais, pikinini bilong em.
Namba tu samting i olsem: Em i las tok bilong God bikos em i las tok tru. I min olsem yumi no ken wetim sampela narapela tok bilong God. Yumi kisim olgeta tok pinis. Sampela taim bai yumi gat laik long kisim sampela nupela tok i kam long God, sampela tok bai i winim tok yumi kisim pinis. Tasol nogat; yumi kisim las tok bilong God pinis.
Sampela lain bilong tude i laik giamanim yumi olsem ol i kisim sampela nupela tok bilong God. Tasol yumi no ken paul. Sapos yumi klia long wok na tok bilong God i kam long yumi long Krais, i min olsem yumi kisim pinis las tok bilong God bilong ol dispela las de.
SAMPELA TINGTING
Dispela tok, “Las tok bilong God,” i gat wanem mining insait long laip bilong yu yet?
Ritim: Rom 16:25-26
Dispela gutnius i bin i stap hait.. tasol nau God i bin kamapim ples klia. God i save stap oltaim, em i bin tok, na mipela i autim long olgeta lain manmeri dispela tok bipo ol profet i bin raitim... God i bin mekim olsem bai ol manmeri bilong ol dispela lain i ken bilip long em na mekim ol pasin em i laikim. —Rom 16:25-26
Taim Pol i pinisim dispela pas bilong em, em i autim dispela tok long bilip gen, olsem em i bin autim long siapta 1 lain 5: Taim ol manmeri i bilip bai ol i i bihainim tok bilong God. Na em i presim nem bilong God long dispela gutnius, dispela gutnius i bin i stap long ples hait inap long taim God i kamapim ples klia taim Jisas i kam. Na nau dispela gutnius i wok long go aut long olgeta lain manmeri long dispela graun. Na “God i bin mekim olsem bai ol manmeri bilong dispela lain i ken bilip long em na mekim ol pasin em i laikim.”
Olsem na, bilip tasol em i as bilong mekim ol pasin God em i laikim. Na pasin bilong autim tok bilong God em i bikpela samting bikos dispela bai kamapim bilip na bilip bai kamapim ol pasin God em i laikim. Taim ol lain i harim tok, ol bai bilip na bihainim ol pasin God em i laikim. Bilong wanem ol i autim tok bilong God? Olsem ol lain i ken bilip na bihainim tok bilong God.
Dispela gutnius i no wanpela nupela lo. Gutnius i wok long kamapim bilip long Jisas olsem Bikpela bilong yumi. Bilip em i samting bilong harim tok bilong God na bihainim.
Dispela gutnius i no samting bilong harim long yau bilong yumi tasol. Em i samting bilong harim na bihainim wantaim. Tok bilong gutnius i tokim yumi olsem, “Yu kamap nupela long Jisas Krais.” Dispela em i tok yumi mas bilipim. Na em i tok moa: “Orait, nau yu mas wokabaut olsem wanpela nupela man long Jisas Krais.” Em i samting bilong bihainim. Sapos yumi bilipim dispela gutnius, orait yumi bai bihainim tok bilong em tu. Na taim yumi bihainim tok bilong God, em bai putim ples klia olsem yumi bilipim dispela gutnius.
God em i gat laik sapos gutnius bilong em i go aut long olgeta hap long dispela graun. Olsem na em i makim ol wokman bilong em bilong go aut na autim tok bilong em. Em i mekim olsem bikos em i gat laik long olgeta manmeri i bilipim dispela tok na bihainim ol pasin em yet i laikim. Olsem tasol God em i kamapim dispela tok ples klia na olsem tasol em i givim yumi dispela pas Pol em i raitim long Rom.
SAMPELA TINGTING
Ritim dispela las lain long dispela buk bilong tingim bikpela wok bilong God long Jisas Krais, na litimapim nem bilong God long prea bilong yu. “Dispela God, em wanpela tasol i gat save tru. Yumi mas tingting long ol samting em i bin mekim long han bilong Jisas Krais, na yumi mas litimapim nem bilong en oltaim oltaim. I tru.”
Ritim: Rom 16:17-20
Na long liklik taim, God bilong givim gutpela sindaun na bel isi long yumi, em bai i larim
yupela i krungutim Satan aninit long lek bilong yupela. — Rom 16:20
Taim Pol i klostu long pinisim dispela pas bilong em, em i tingim bung bilong ol bilip lain bilong Krais – olsem planti ol man nogut na ol giaman tisa i wok long raunim ol (lain 17-18). Tasol tu, em i strongim ol bilip lain na tokim ol long lukluk long wok bilong God: “Na long liklik taim, God bilong givim gutpela sindaun na bel isi long yumi, em bai i larim yupela i krungutim Satan aninit long lek bilong yupela.”
Planti taim Buk Baibel i wok long stori long God olsem God bilong givim ol samting long yumi, olsem, “God bilong marimari” na “God bilong givim tingting long yumi” na “God bilong mekim isi bel bilong olgeta man i gat hevi.” Bilong wanem? Bilong soim yumi olsem God em i as bilong olgeta gutpela presen em i givim long yumi. Long hia Pol i kolim em “God bilong givim gutpela sindaun na bel isi long yumi.”
Taim yumi kolim God dispela “God bilong givim gutpela sindaun na bel isi long yumi,” i gat bikpela mining. Em tru, i gat dispela mining olsem yumi wanbel wantaim God long wok bilong Jisas Krais. Tasol tu i min olsem God em i God bilong bel isi - bilong shalom.
Dispela tok shalom em i tok Hibru, na em i gat dispela mining: Bel isi na gutpela sindaun, stap orait na stap gut, pasin bilong wanbel na stap isi. Em i bel isi tru bilong kingdom bilong God. Na dispela “God bilong givim gutpela sindaun na bel isi long yumi,” em i kisim dispela kingdom i kam.
God i wok long kisim dispela kingdom i kam, dispela kingdom bai i stap oltaim oltaim, long pasin bilong bagarapim wok bilong Satan. “Em bai i larim yupela i krungutim Satan aninit long lek bilong yupela.” Taim em i autim dispela tok, Pol i tingim tok long Buk Stat 3:15. God inapim dispela promis long Stat.
Satan em i bikpela samting bilong bagarapim gutpela sindaun na bel isi. Taim Satan yet em i bagarap pinis, shalom (bel isi) bai i stap gen. Long wok bilong Jisas Krais.
SAMPELA TINGTING
Sios bilong yu i save wok strong long mekim bel isi i go long olgeta manmeri long dispela graun?
Ritim: Rom 15:14-21
Mi no ken tokaut long narapela samting. Nogat. Mi laik tokaut long dispela wanpela samting tasol. Mi laik stori long wok Krais i bin mekim long han bilong mi. Em i bin helpim toktok bilong mi na mekim ol gutpela wok long han bilong mi. —Rom 15:18
God em i laik yusim yumi long winim ol narapela man long Krais, long kisim ol i kam bihainim em.
Taim dispela samting i kamap, yumi no ken apim nem bilong yumi yet. Sapos yumi laik stori long dispela kain samting, yumi mas toktok wankain olsem Pol: “Mi laik stori long wok Krais i bin mekim long han bilong mi.”
Wok bilong Krais i no pinis long taim em i go antap long heven. Tude Krais i mekim wok long han bilong yumi. Pol i soim olsem wok bilong Krais i go yet: “Mi laik stori long wok Krais i bin mekim long han bilong mi.”
Laip bilong ol Kristen na laip bilong Kristen sios i gat namba bikos God i save givim wok long yumi long mekim. Ol Aposel i autim gutnius, na long buk Rom yumi lukim dispela gutnius i go aut long ol narapela. God i save yusim ol Kirsten long kisim ol narapela manmeri i kam lotuim em.
Yumi i klia – Jisas i stap laip! Yumi i klia tu – Kiras em i mekim wok yet! Tasol bikpela askim i olsem: Ol Kristen i redi long kamap wokman na wokmeri bilong Krais, bilong mekim wok bilong em long salim gutnius i go aut long planti manmeri?
Yu inap stori long wok Krais i mekim long han bilong yu bilong kisim ol narapela man na meri i kam long em? Na long dispela askim yumi ken tingting long sios bilong yumi tu. Wok bilong salim gutnius i go aut (wok misen) i gat planti hap. Em i samting bilong lukautim ol rabisman, em i samting bilong mekim wok insait long gavman, em i samting bilong skulim ol Kristen tisa, em i samting long tainim tok bilong Buk Baibel long ol narapela tok ples, em i samting long salim man i go aut long kain kain hap bilong dispela graun, na planti moa samting tu.
Krais bai i yusim olgeta memba bilong sios bilong em bilong mekim bikpela wok bilong em. “Yupela i mas prea long God i ken helpim mi,” Pol i tok (lain 30). Em i wok bilong yumi tu.
God em i wok long yusim yu long mekim wok bilong em, olsem wanem?
SAMPELA TINGTING
Askim God long helpim yu yet i redi long mekim wok bilong em.
Ritim: Rom 14:13-23
Tasol man i kaikai mit samting long taim em i gat tupela tingting long pasin em i mekim, em i gat asua, long wanem, em i no save, bilip bilong en i orait long dispela pasin, o nogat.
— Rom 14:23
Taim yumi tingting long mekim sampela samting, yumi mas klia pastaim sapos dispela samting em i gutpela samting long ai bilong God o nogat. Na taim yumi gat tupela tingting long dispela pasin yumi laik mekim, orait mobeta yumi no mekim dispela samting.
Planti lain long tude ol i laik tok, “Pasin bilong mi i orait; mi no mekim sampela kranki samting, olsem na yu no ken bisi long pasin bilong mi. Mi bai mekim tasol.” Ol i les long narapela i wok long stretim pasin nogut bilong ol.
Tasol nogat. Yumi mas wokabaut stret insait long dispela fridom God i givim yumi. Jisas Krais em i kisim yumi long pawa bilong sin na pawa bilong lo. Olsem na yumi kamap wanbel wantaim God gen. Nau em i wok bilong yumi long yusim dispela fridom long mekim ol gutpela pasin long stap wanbel wantaim God olgeta taim.
Yes, bikpela lo bilong wokabaut olsem wanpela Kristen, em i samting long bilip. Maski yumi i kaikai o dring, stap laip o i dai, yumi i bilong Bikpela tasol. Na yumi i mas holim strong bilip bilong yumi olgeta taim. Bilip em i bikpela samting. Olsem na Pol i tok (lain 14), “Tasol sapos man i ting wanpela samting i doti, orait long laip bilong dispela man dispela samting i stap doti tru.” Na long lain 22 em i tok, “Bilip bilong yu i kamapim wanem tingting bilong yu yet wantaim God.” Sapos yumi i ting wanpela samting em i gutpela, na bel bilong yumi i no kotim yumi long dispela samting, em i orait. Bilip em i bikpela samting, na yumi mas stap stretpela long ai bilong God.
Buk Baibel i skulim yumi olsem ol lain i gat tupela tingting long pasin ol i mekim, ol i gat asua. Bilong wanem? “Em i no save, bilip bilong en i orait long dispela pasin, o nogat .”
Yumi mas amamas tru long stap wanbel wantaim God, na i no long wanem samting yumi lukim o kaikaim o mekim o baim. Taim relesensip bilong yumi wantaim Bikpela i bruk pinis, orait olgeta narapela samting i bruk tu. Olgeta amamas, olgeta samting yumi i kisim, olgeta de, olgeta samting yumi i no inap tok tenkyu long God long yumi i kisim, em ol i no samting bilong bilip. Em i sin; em i stap namel long yumi na God. Na em i no inap blesim yumi. Taim yumi i gat tupela tingting long pasin yumi i mekim, yumi i gat asua.
Tasol olgeta samting i givim amamas long yumi — bikpela kaikai, presen, sampela samting yumi i baim — na i “kam long bilip,” em i gutpela. Na yumi mas tok tenkyu long God na presim nem bilong em long olgeta dispela gutpela samting, bikos em yet i as bilong ol gutpela blessing yumi i save kisim.
SAMPELA TINGTING
I gat sampela samting long laip bilong yu na yu no inap tok tenkyu long God long dispela samting? Orait, yu mas lusim dispela samting!
Ritim: Rom 14:1-12
Man i save givim bel bilong em long arapela man, em i no save mekim pasin nogut long em. Olsem na man i save givim bel bilong em long ol arapela, em i save bihainim tru lo.
—Rom 14:10
Taim ol pikinini i yangpela tru, papamama bilong ol i save tokim ol long wanem samting ol i ken mekim. Tasol taim ol i kamap bikpela, ol pikinini yet bai makim wanem samting ol bai i mekim. Moa, em i wok bilong ol papamama bilong skulim gut ol pikinini bilong ol yet, long helpim ol i klia long wanem samting ol i ken mekim taim ol i bikpela.
Na em i klostu wankain long ol bilip lain. Long Olpela Testamen, God i mekim kain kain samting long ol Israel i mas bihainim, tasol long Nupela Testamen God i larim yumi yet i makim wanem samting yumi bai mekim. I olsem yumi i bikpela pikinini pinis. God em i mekim yumi i kamap fri, na em i wok bilong yumi long yusim dispela fridom long bihainim em.
Planti lain bilong sios i gat laik sapos ol hetman bilong sios i givim ol lo long ol long wanem samting ol i mas mekim. Na sampela taim ol hetman bai givim ol lo long ol memba long sios, maski God i no makim ol dispela lo long Buk Baibel. Ol Kristen i stap fri, na ol hetman long sios i no inap long tokim ol long mekim ol samting Buk Baibel i no tokim ol long mekim.
Tasol yumi no kamap fri bilong lus tingting long Bikpela. God em i olsem jas bilong yumi. Na yumi no ken lus tingting long dispela. Olgeta pasin bilong yumi i mas kamap gutpela, na yumi mas klia olsem God i amamas long ol pasin bilong yumi. Yumi no ken sakim tok bilong God. Yumi no stap fri long mekim olsem.
Na yumi mas bihainim lo bilong laikim tru insait long dispela fridom. Taim yumi laik kisim save long wanem samting yumi mas mekim o long wanem samting yumi no ken mekim, yumi mas tingting long laik bilong God, na tu long ol narapela manmeri tu. Yumi no ken bagarapim o givim pen long ol narapela long pasin bilong yumi.
Insait long sios bilong God yumi mas redi long strongim ol narapela. Dispela em i bikpela samting tru. Yumi mas redi long daunim yumi yet, na yumi mas redi long lusim sampela samting yumi laikim bikos yumi i laikim tru ol narapela bilip lain long sios. Bilong wanem? Bikos laikim tru ol narapela bilip lain i winim ol laik bilong yumi yet.
Yumi nidim gutpela save sapos yumi laik kamap gutpela na strongpela Kristen i stap gut insait long fridom God i givim yumi. Na yumi i no ken lus tingting long ol dispela samting: God tasol em i jas bilong yumi, na laik bilong em i olsem lo bilong yumi. Yumi no ken bagarapim fridom bilong ol narapela Kristen. Na laikim tru em i nambawan samting.
SAMPELA TINGTING
Yu save yusim dispela fridom God i givim bilong bihainim laik bilong God, o nogat?
Ritim: Rom 13:11-14
Yumi mas wokabaut stret, olsem man i wokabaut long san. —Rom 13:13
God yet i wokim taim bilong san na taim bilong nait. Taim bilong san em i taim bilong mekim wok na ol pilai samting. Taim bilong nait em i taim bilong slip. Ol pikinini i save lainim dispela lo hariap. Taim ol i no slip gut long nait, ol bai i no amamas tumas long moning. Na tu, taim ol bikpela man na meri i no kisim gutpela slip long nait, ol bai i painim hat tru long mekim gutpela wok long taim bilong san.
Olsem na, dispela tok long Rom 13:13 i bihainim dispela lo bilong taim bilong san na taim bilong nait. Tasol, taim Buk Baibel i tokim yumi long wokabaut stret, olsem man i wokabaut long san, em i tokim yumi long kirap na mekim wok bilong Pikinini bilong God.
God yet i makim taim bilong wok bilong Krais long kisim bek yumi. Na dispela taim i makim taim bilong yumi long kirap na mekim wok bilong em.
Ol lain i wokabaut long san, em ol i dispela lain i kisim salvesen long Jisas Krais. Ol i no stap long tudak moa. Ol lain i stap long tudak, ol i no save long Krais. Long pasin bilong ol, ol i putim ples klia olsem ol i no save long Jisas.
I gat wanpela man, nem bilong em Augustine, em i wanpela hetman long sios bilong God i stap planti yia bipo long tude, em i bin i stap long tudak. Em i man bilong mekim ol pasin nogut. Tasol God i yusim dispela teks long Buk Baibel long senisim bel bilong em, na em i kamap olsem wanpela bikpela na gutpela tisa long sios bilong God.
Na dispela teks i tokim yumi tu long stap olsem ol man i wokabaut long taim bilong san. Pasin bilong yumi mas i stap olsem lait, na olgeta lain i ken lukim bikos ol i gutpela pasin stret.
Long namba tu hap long Rom 13:13, Pol i autim tok long ol pasin bilong tudak: pasin bilong hambak nabaut na spak, pasin bilong mekim pasin pamuk na pilai nabaut long pasin doti, pasin bilong kros nabaut na bel nogut long ol arapela man. Ol Kristen i no ken bihainim ol dispela kain pasin nogut. Ol i no pasin bilong laikim tru. Nogat!
Dispela ol pasin nogut, ol lain long Rom i save mekim long taim bilong tudak. Na planti ol dispela pasin i save kamap olsem long kantri bilong yumi tu. Tasol, olsem pikinini bilong God, olsem ol man i wokabaut long taim bilong san, yumi mas stap longwe tru long ol dispela kain pasin nogut.
SAMPELA TINGTING
Em i hat tru long stap olsem ol man i wokabaut long taim bilong san, a? Wanem samting i save pulim yu i go long ol samting bilong tudak?
Ritim: Rom 13:8-10
Man i save givim bel bilong em long arapela man, em i no save mekim pasin nogut long em. Olsem na man i save givim bel bilong em long ol arapela, em i save bihainim tru lo.
— Rom 13:10
Long klia long gutpela pasin bilong laikim tru ol wantok bilong yumi, pastaim yumi mas save gut long laikim tru bilong God i kam long yumi. God em i laikim tru yumi. Dispela laikim tru i kirap long bipo tru, na long dispela laikim tru God i mekim wok long kisim bek yumi. Long Pikinini bilong em, God i putim ples klia bikpela laikim tru bilong em long ol manmeri bilong mekim sin. Na God i soim laikim tru long yumi wan wan long dispela Holi Spirit i stap long bel bilong yumi.
Nau em i wok bilong yumi long givim sampela samting. Wanem samting yumi kisim pastaim, orait dispela samting bai yumi givim long ol narapela. Yumi no inap long bihainim gut pasin bilong laikim tru olsem Buk Baibel i tokim yumi long mekim. Olsem tasol yumi no inap bihainim lo bilong God, bikos lo bilong God i tokim yumi long laikim tru ol narapela. Olsem na yumi i nidim laikim tru bilong God pastaim, na bai yumi inap long laikim tru ol narapela.
“Olsem na man i save givim bel bilong em long ol arapela, em i save bihainim tru lo.” Em i no inap long yumi i no kilim ol narapela o yumi i no hetim ol narapela. Yumi mas inapim dispela lo long laikim tru. Em i no inap long yumi i no stilim sampela samting bilong ol narapela man. Nogat, yumi i mas lainim pasin bilong serim ol samting God i givim yumi. Na yumi mas lainim pasin bilong laikim tru long God. Taim yumi save gut long laikim tru bilong God i kam long yumi long wok bilong Krais, taim yumi kisim dispela laikim tru long wok bilong Spirit bilong God, bai yumi i stat long mekim dispela pasin bilong laikim tru ol narapela. Olsem na yumi no ken apim nem bilong yumi yet. Em i kranki pasin. Wanem samting yumi wok long givim long ol narapela man, yumi i kisim i kam long God pinis.
Sampela lain i paul long dispela skul Buk Baibel i givim yumi long pasin bilong Kristen bilong laikim tru ol narapela. Ol i ting olsem laikim tru i kisim ples bilong lo bilong God. Olsem na, ol i tok, pasin bilong laikim tru i stap pinis long bel bilong yu, na yu mas bihainim dispela bel bilong yu long mekim ol gutpela pasin.
Tasol, lo bilong God na laikim tru i save wok wantaim. Lo bilong God i askim yumi long mekim olgeta samting long laikim tru. Yumi mas kisim nupela laip na laikim tru bilong Jisas Krais pastaim, na bai yumi inap long bihainim lo bilong God.
Taim yumi bilipim gutnius bilong God, bai yumi inap long wok long inapim lo bilong God. Taim yumi save moa long laikim tru bilong God, bai yumi redi moa long bihainim lo bilong God. God yet i mekim kamap olgeta samting, na em i as bilong olgeta samting. Na olgeta samting i bilong em wanpela tasol – pasin bilong yumi long bihainim lo bilong em tu.
SAMPELA TINGTING
Lo bilong God na laikim tru i save wok wantaim. Yu save lukim dispela samting long laip bilong yu?
Ritim: Rom 13:1-7
Olgeta man i mas i stap aninit long ol gavman. Yumi save, i no gat wanpela gavman i kamap nating. Nogat. Olgeta wok bilong gavman i kamap long han bilong God tasol. Na olgeta gavman i stap, God yet i putim ol na ol i stap. — Rom 13:1
Planti ol sumatin i bin wok long lainim planti samting long dispela buk Rom, ol i kirap nogut taim ol i ritim dispela tok long ol gavman long dispela graun insait long dispela buk Rom. Ol i ting olsem dispela buk i stori long dispela nupela laip na dispela nupela graun tasol. Tasol dispela hap long buk Rom i kirapim tingting bilong yumi long pawa bilong God long bosim olgeta samting long dispela graun, taim em i mekim wok bilong em long plen bilong em bilong kisim bek yumi. Na God em i wok long bosim dispela graun long han bilong ol gavman long dispela graun: “Yumi save, i no gat wanpela gavman i kamap nating. Nogat. Olgeta wok bilong gavman i kamap long han bilong God tasol.”
Tude planti lain bai kirap nogut taim ol i harim dispela tok olsem olgeta wok bilong gavman i kamap long han bilong God tasol. Hau bai olgeta wok bilong gavman i kamap long han bilong God tasol? Olsem wanem? Em tru, dispela 7-pela lain long buk Rom i no stori long olgeta samting insait long wok bilong gavman, na long olgeta samting gavman i mas mekim na long olgeta wanem samting i no ken mekim.
Tasol dispela wanpela lo i tru na i tru olgeta: God em i bosim yumi long han bilong gavman bilong yumi. Ol hetman bilong gavman i olsem ol wokman bilong God long lukautim ol lain bilong kantri bilong ol. Ol Kristen i mas bihainim tok bilong gavman bilong ol bikos ol i lotuim Bikpela. Sapos man i no bihainim dispela wanpela lo, bai kantri i bagarap olgeta.
Na dispela komuniti bilong ol Kristen i no inap i gro na kamap strongpela moa long bilip sapos ol i les long honaim Bikpela taim ol i bihainim tok bilong gavman bilong ol. Yumi i mas respektim ol lain bilong gavman taim yumi stori long ol, taim yumi bihainim ol lo bilong kanti, taim yumi i givim takis long gavman, i go i go. Sapos yumi no inap honaim God long olgeta dispela liklik samting, olsem wanem bai God inap yusim yumi long ol bikpela samting tru?
Olsem na dispela em i gutpela lo long tingim: “Olgeta wok bilong gavman i kamap long han bilong God tasol. Na olgeta gavman i stap, God yet i putim ol na ol i stap.” Long bihainim tok bilong Bikpela yumi mas bihainim tok bilong ol gavman tu.
Sapos gavman i askim yumi long mekim sampela samting i sakim o agenstim Tok bilong God, orait yumi no ken bihainim dispela tok bilong gavman. Tasol long olgeta narapela samting yumi mas bihainim tok bilong gavmam. Sapos yumi i sakim tok bilong gavman, i olsem yumi i sakim tok bilong God yet. Na taim yumi ol pikinini bilong God i bihainim tok bilong gavman, orait dispela i soim olsem yumi i respektim God yet na givim glori long em tu.
SAMPELA TINGTING
Yu yet yu wok long respektim gavman bilong yu, o nogat?
Ritim: Rom 12:14-21
Yu no ken larim pasin nogut i winim yu. Nogat. Yu mas mekim gutpela pasin na bai yu daunim pasin nogut. — Rom 12:21
Gutnius i wok long senisim laip bilong yumi, na bai yumi larim God i mekim tingting bilong yumi kamap nupela na bai pasin bilong yumi i kamap nupela tu (lain 1-2). Na insait long dispela nupela komuniti – dispela sios bilong Krais – bai yumi i lainim pasin bilong bihainim Bikpela long dispela nupela laip yumi i kisim (lain 3-13). Na Buk Baibel i skulim yumi, tu, long pasin bilong stap gut wantaim ol narapela lain insait long sios. Na bikpela samting em i tokim yumi long mekim i olsem: Yumi mas laikim tru ol narapela. Tasol moa, long bihainim gutpela pasin bilong stap gut wantaim ol lain i laik bagarapim yumi, yumi mas yusim dispela nupela samting bilong pait, em i laikim tru.
Laip bilong stap Kristen em i kirap long laikim tru na em i pinis long laikim tru – em i samting bilong laikim tru olgeta. Dispela laikim tru i kam long God, na Krais i putim dispela laikim tru ples klia, na yumi kisim dispela laikim tru long Holi Spirit. Em i kam long yumi na i go long ol narapela, na em i putim ples klia olsem yumi stap pikinini bilong God.
Laikim tru bilong ol Kristen i wok long helpim ol narapela. Long dispela graun planti lain i nidim dispela kain laikim tru.
“Yu no ken larim pasin nogut i winim yu. Nogat.” Pasin nogut em i olsem pawa i wok long karamapim olgeta man nogut. Na taim yumi wok long mekim pasin nogut long ol lain i mekim pasin nogut long yumi, i olsem pasin nogut i win olgeta: Pasin nogut i wok long daunim yumi yet na bihain yumi tu i wokim pasin nogut. Taim yumi yusim pasin nogut olsem wanpela samting bilong pait, bilong paitim ol narapela i mekim ol pasin nogut, orait pasin nogut i win stret.
“Yu mas mekim gutpela pasin na bai yu daunim pasin nogut.” Ol Kristen i mas wok long mekim gutpela pasin na daunim pasin nogut. Yumi olgeta i gat laik long bekim ol pasin nogut wantaim sampela moa pasin nogut. Tasol ol Kristen i holim wanpela nupela samting bilong pait, em i pasin laikim tru: olgeta Kristen i mas kisim dispela nupela samting bilong pait bilong daunim ol pasin nogut.
Planti lain bai ting olsem dispela em i kranki pasin; tasol, maski, ol Kristen bai mekim olsem yet. Ol bai yusim dispela nupela samting bilong pait bikos ol i bilip long pawa bilong God.
Tasol sapos pawa bilong ol gutpela pasin i no gat strong long daunim pasin nogut, olsem wanem? Bai yumi les long mekim gutpela pasin long ol lain i mekim ol pasin nogut? Nogat tru! Nogut yumi stap aninit long pawa bilong pasin nogut. Em i mobeta long kisim hevi bikos yumi i mekim ol gutpela pasin. No ken larim pasin nogut i winim yumi!
SAMPELA TINGTING
Yu save lukim pasin nogut i kam long yu? Na yu save yusim dispela nupela samting bilong pait – pasin laikim tru - bilong bekim ol dispela pasin nogut, o nogat?
Ritim: Rom 12:3-13
Olsem tasol yumi tu yumi planti manmeri, tasol long Krais yumi stap olsem wanpela bodi tasol. Na yumi olgeta wan wan yumi stap olsem poroman bilong ol arapela. —Rom 12:5
Long hia Pol i laik stori long ol gutpela pasin insait long sios bilong God (lain 3-13).
I no olsem yumi tasol i kamap nupela. Nogat, yumi mas wokabaut long dispela nupela rot insait long dispela nupela komuniti bilong God i kam long Jisas Krais – dispela sios bilong Krais. Spirit bilong God i givim ol presen long wan wan memba bilong sios, olsem olgeta i ken helpim sios bilong God i kamap strong moa yet.
Planti ol Kristen bilong tude i les long pasin bilong bung long wanpela sios. Tasol, Pol i putim ples klia olsem dispela kain tingting em i kranki olgeta. Sios em i bodi bilong Krais. Na dispela bodi bilong ol Kristen i mas laikim tru na helpim ol narapela Kristen bikos ol i stap wanpela bodi bilong Krais. Wankain olsem ol memba bilong bodi bilong man i nidim ol narapela narapela memba bilong stap laip, ol Kristen tu i nidim ol narapela Kristen long stap laip insait long dispela nupela komuniti – sios bilong Krais.
Nupela Kontrak i soim klia olsem olgeta Kristen i wanpela bodi insait long Krais. Olgeta Kristen i wanpela memba bilong dispela bodi, na olgeta Kristen i mas mekim wok insait long dispela bodi.
Olsem na, maski yumi gat hevi long sampela samting insait long sios, yumi no ken lusim sios. Nogat, yumi mas klia long ol sin na pasin nogut bilong yumi yet, na strong moa yet insait long sios long mekim wok bilong God, wankain long ol presen God em i givim yumi (lain 6).
Planti lain long tude i laik wari long laip bilong ol yet tasol. Tasol ol Kristen i mas klia olsem pasin bilong bung wantaim ol narapela bilip lain insait long wanpela sios em i bikpela samting long dispela nupela laip bilong ol Kristen. Nupela Kontrak i putim dispela samting ples klia. Yumi i kamap nupela long Krais, na yumi i stap insait long dispela nupela komuniti bilong ol bilip lain.
God i save olsem ol memba insait long sios bilong yumi i save mekim sin. Em i save, na save bilong em i winim save long yumi. Em i wok bilong yumi long prea na askim God long helpim yumi i givim yumi yet long ol narapela memba long sios – long strongim dispela komuniti, na long helpim dispela komuniti i ken gro, em dispela komuniti i wetim dispela nupela graun bai i kamap bihain taim Krais i kam bek gen.
SAMPELA TINGTING
Em i gat bikpela mining insait long laip bilong yu, olsem yu stap memba bilong wanpela bodi, wanpela komuniti, bilong Krais, o nogat?
Ritim: Rom 12:1-2
Na yupela i no ken wokabaut wankain olsem ol man bilong dispela graun. Nogat. Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap long save tru long laik bilong God. Bai yupela i save long ol pasin i gutpela na long ol pasin God i laikim tumas na long ol pasin inap tru na i stret olgeta. — Rom 12:2
Nau yumi mas tingting long dispela nupela wokabaut God i singautim ol Kristen long bihainim. Lain 1 i skulim yumi olsem yumi mas givim bodi bilong yumi long God olsem ofa, na bai yumi mekim ol pasin God i laikim.
Taim yumi givim yumi yet long God, pasin bilong yumi mas narakain olgeta long ol narapela manmeri. Yumi i no ken wokabaut wankain olsem ol man bilong dispela graun — ol lain i no stap aninit long Krais, na Holi Spirit i no stap insait long bel bilong ol.
Pol i no stori tumas long pasin bilong ol lain long dispela graun. Yumi save long ol dispela kain pasin. Na yumi no ken bihainim. Ol lain i bihainim dispela kain pasin, ol i laik amamas long tude tasol, na ol i no tingting long dispela laip bai i kamap bihain long dispela laip. God i no wanbel long dispela kain laip, na em i stap longwe long dispela kain laip. Em i laip bilong amamasim skin bilong man tasol, na em i no wari long ol samting bilong God.
Tasol God i singautim yumi long wanpela nupela kain wokabaut long laip bilong yumi. Wokabaut na pasin bilong yumi i mas kamap nupela. Yumi no ken bihainim wankain pasin bilong ol man bilong dispela graun. Nogat, ol Kristen i mas kamap nupela long bel bilong ol, na “yumi i mas larim God i mekim tingting bilong yumi i kamap nupela na bai pasin bilong yumi i kamap nupela tu.”
Bel na tingting bilong yumi i mas senis olgeta. Holi Spirit bai mekim dispela wok insait long bel bilong yumi. Na yumi i kamap nupela. Na bai pasin bilong yumi senis tu, na yumi bai wok long amamasim God long pasin bilong yumi yet.
Na wok bilong kamap nupela i no inap pinis. Em bai i go i go inap long taim Krais i kam bek gen. Tasol yumi mas wok. Yumi mas wok strong long bihainim ol gutpela pasin olsem God em i laikim. Sapos bel bilong yumi senis, orait laip bilong yumi mas senis na kamap nupela tu.
SAMPELA TINGTING
Yu save gat laik long wokabaut wankain olsem ol man bilong dispela graun? O yu kamap nupela pinis, na yu wok long bihainim ol pasin God yet i laikim?
Ritim: Rom 8:31-39
Sapos God i helpim yumi, orait husat bai i birua long yumi?...God i bin makim yumi bilong em yet, olsem na husat bai i kotim yumi? ...I no gat wanpela samting inap pasim dispela laik bilong en (Krais) i kamap long yumi wan wan. —Rom 8:31, 33-35
Rom 8 i save skulim yumi long wok bilong Holi Spirit long laip bilong ol pikinini bilong God. Olsem na em i givim yumi bel isi long dispela tok: “Mi save...Mi bilip tru...” Yumi inap tok olsem long Spirit bilong God tasol.
Maski yumi bilip, yumi bai klia olsem i gat planti samting bai i wok long bagarapim yumi. I gat planti samting i laik pulim yumi longwe long God. Tasol bilip i strongim yumi long dispela taim. Bilip i tok, “Sapos God i helpim yumi, orait husat bai i birua long yumi?” God i helpim yumi! Em i stap klostu long yumi, olsem na yumi no ken pret. Larim ol birua i kam! God i helpim yumi! Orait husat bai i birua long yumi?
Na, husat bai i kotim yumi? Sampela taim Satan bai kotim yumi, tasol sampela taim bel bilong yumi yet bai kotim yumi. Tasol yumi kamap stretpela pinis long ai bilong God long bilip, na long dispela bilip yumi i ken bagaraim ol birua bilong yumi. Maski mi yet, o Satan yet, i wok long kotim mi na daunim mi, mi bai singaut strong long ol: “Mi stap stretpela long ai bilong God!” God yet i save kolim yumi stretpela man! Husat bai i kotim yumi?
I no gat wanpela samting inap pasim laik bilong God, em dispela laik em i givim yumi long Krais Jisas, Bikpela bilong yumi.
Planti taim yumi save daut, na yumi save wari long wanem samting bai i kamap tumora. Yumi save olsem sampela taim yumi bai pesim ol bikpela hevi. I gat planti samting i wok long bagarapim bilip bilong yumi, na sampela taim yumi bai pret.
Tasol, nogat! Tru, Satan i gat pawa, na yumi mas pret long ol dispela kain samting. Tasol yumi save olsem i gat wanpela samting i winim stret strong bilong pawa bilong mani or pawa bilong mangal o pawa bilong pasin pamuk o pawa bilong Satan. Na dispela em i pawa bilong laikim tru bilong God. Na i no gat wanpela samting inap pasim pawa bilong laikim tru bilong God!
SAMPELA TINGTING
Wanem samting i save wok long bagarapim bilip bilong yu na wok long pasim laikim tru bilong God? Na yu bilip olsem olgeta dispela samting i no inap pasim laikim tru bilong God, em dispela laik em i givim yumi long Krais Jisas, Bikpela bilong yumi?
Ritim: Rom 8:28-30
Na dispela ol man bipo em i makim ol, em i singautim ol tu. Na dispela ol man em i singautim ol, em i kolim ol stretpela man. Dispela ol man em i kolim ol stretpela man, em i givim gutpela laip na biknem bilong em yet long ol. —Rom 8:30
Bai yumi stat long dispela tok “em i singautim ol.” God em i save singautim yumi long Tok na Spirit bilong em. God i tokim yumi long tanim bel na bilip long gutnius bilong Jisas Krais.
Ating dispela singaut i bin kam long yu pinis, a? Sapos dispela singaut i kam long yu long maus bilong papamama bilong yu o wanpela pastor o wanpela tisa, yu mas save olsem em i God yet i putim han bilong em long yu na tok, “Yu bilong mi.”
Taim yumi singautim wanpela man o meri, sampela taim bai yumi singautim ol nating. Wanpela de yumi bai mekim sampela tok, na neks de bai yumi lus tingting long dispela tok. Tasol God em i no save mekim olsem. Em i stap wankain oltaim, em i holim strong ol promis bilong em, na yumi ken bilipim em. Em i no save singautim nating ol man o meri.
Dispela singaut bilong God i kam long yumi em i bikpela samting. Em i olsem wanpela hap sen long dispela sen bilong salvesen.
“Ol man bipo em i makim ol, em i singautim ol....em i kolim ol stretpela man...em i givim gutpela laip na biknem long ol yet.” Dispela em i olsem wanpela sen bilong gol. Dispela sen i stat long bipo bipo tru na i go inap oltaim oltaim. Stat bilong dispela sen i long dispela taim God i makim yumi. I min olsem, taim yumi no save long God yet, em i save long yumi. Taim yumi no inap makim God, em yet i makim yumi. Taim yumi no laikim God yet, em yet i laikim yumi. I olsem God i ankaim dispela hap long sen long oltaim oltaim.
Na dispela tupela neks hap sen i kamap long taim yumi i stap laip – God i singautim yumi na em i kolim yumi stretpela man. Em i singautim yumi pastaim, na bihain em i givim yumi laip tru wantaim Krais, na yumi poromanim em long stretpela pasin bilong em.
Na las hap bilong dispela sen em i pas wantaim ol narapela hap sen. Yumi no inap lukim dispela hap sen yet, tasol em i stap tru tru. Em bai i givim gutpela laip na biknem long yumi yet.
Olsem na, dispela singaut bilong gutnius i kam long yu pinis. Em i kam long God yet. God yet i stiaim laip bilong yu yet. I no gat wanpela samting inap bagarapim dispela sen bilong salvesen bilong yu. Em i tru olgeta - God bai kisim yumi i go long em long heven!
SAMPELA TINGTING
Tok tenkyu long God long dispela sen bilong gol long salvesen bilong yu yet!
Ritim: Rom 8:18-27
Nau olgeta samting i stap nogut na i save bagarap... God yet i mekim ol i stap olsem bai ol i wetim gutpela samting God i laik mekim long ol. Long taim God i makim, God bai i pinisim dispela kalabus bilong bagarap nau olgeta samting i stap long en, na bai olgeta samting i stap gutpela tru wantaim yumi ol pikinini bilong God. —Rom 8:20-21
God i wokim yumi bilong stap laip – na i no bilong dai. Na em tru, dai em i bikpela samting long laip bilong yumi olgeta. Tasol God em i no wokim yumi bilong dai.
Olgeta samting long dispela graun i les tru long pasin bilong dai. Olgeta manmeri na animal wantaim i wok long pait long dai, maski ol i kamap klostu long dai bilong ol. I gat wan wan man tasol i laikim pasin bilong dai, tasol dispela kain man i longlong o em i gat hevi na sik i bikpela tumas.
Olgeta lain i stap laip i gat laik long stap laip i go i go. Olgeta man na animal i no save gat laik long dai. Olsem na yumi i wok long hop i stap. Yumi save olsem olgeta lain bai dai, tasol yumi les, na yumi wok long hop i stap yet.
Maski yumi go long planti ol haus krai, stil yumi bai hop olsem wanpela de wanpela nupela graun bai kam. Olgeta samting long dispela graun i gat dispela kain hop. Na dispela i soim klia olsem olgeta samting long dispela graun i stap kalabus bilong bagarap.
Ol Kristen i gat hop. Yumi tu i krai nogut long dispela kalabus bilong bagarap yumi i stap long en, na krai bilong yumi i bikpela moa bikos yumi, olsem ol bilip lain, i save long dispela nupela laip, na dispela nupela graun bai i kam. Tude yumi pilim liklik hap long dispela nupela laip long bel bilong yumi tasol: em i Holi Spirit i stap long bel bilong yumi. I olsem yumi kisim sampela naispela plaua stret long nupela graun pinis, insait long sios bilong Jisas Krais long tude.
Taim ol Kristen i harim olgeta samting long dispela graun i krai olsem meri i laik karim pikinini, taim ol i harim olgeta samting i singim song long hop long God, ol bai i kisim strong long bilip olsem dispela nupela graun bai kam. Yumi wetim God i stap. Na yumi inap tokaut klia long ol narapela lain i krai i stap, long dispela hop i stap long bel bilong yumi.
Ol Kristen i save gut olsem dispela nupela graun bai i kam. Long marimari bilong God, ol i save long wok bilong Holi Spirit, na ol i wetim olgeta gutpela samting God i laik mekim long ol.
SAMPELA TINGTING
Wanem samting i save givim hop long yu na strongim yu long dispela graun?
Ritim: Rom 8:12-17
Na long strong bilong Holi Spirit yumi save singaut long God olsem, “Aba, Papa.” Holi Spirit yet i save helpim spirit bilong yumi na yumi save tokaut ples klia olsem yumi i stap pikinini bilong God. Orait yumi stap pikinini bilong God... orait bihain bai yumi kisim biknem na gutpela sindaun tru wantaim em. —Rom 8:15-17
Yumi save long pasin bilong adoptim ol pikinini. Taim yu adoptim wanpela pikinini, i olsem dispela pikinini i kamap pikinini bilong yu yet. Na dispela em i olsem wanpela tok piksa long yumi ol pikinini bilong Bikpela.
Yumi olgeta i kamap famili bilong God long marimari tasol. I no olsem yumi gat rait long kamap pikinini bilong em. Jisas Krais tasol em i pikinini tru bilong God. Yumi kamap pikinini bilong God long Jisas tasol.
Na tu, yumi mas stap olsem pikinini bilong God long laip bilong yumi. Yumi mas les long bihainim ol pasin nogut. Em i no pasin bilong ol lain bilong famili bilong God. Yumi no ken mekim ol pasin nogut na tok olsem God em i Papa bilong yumi.
Yumi mas lainim pasin bilong bihainim tok bilong God. Yumi mas wok strong long mekim ol gutpela pasin, em i rot bilong ol lain insait long famili bilong God. Taim yumi i wok long laikim tru God moa yet, bai yumi kamap les moa long sin.
Bikpela laikim tru bilong papamama bai helpim ol pikinini ol i adoptim pinis long stap amamas insait long famili bilong ol. Na em i Spirit bilong Papa bilong yumi bai i skulim yumi long bihainim Jisas. Spirit bilong God bai karamapim laip bilong yumi long laikim tru. Na bai yumi wok long lusim sin na bihainim tok bilong God.
Sampela taim em i hat tru long bilip olsem God yet i adoptim yumi long kamap pikinini bilong em. Tasol Spirit bilong God bai strongim bilip bilong yumi, na em bai skulim yumi long tok tenkyu long God, olsem Papa bilong yumi, long olgeta samting em i givim yumi.
Spirit na Tok bilong God i tokim yumi olsem bihain yumi bai kisim biknem na gutpela sindaun tru wantaim em. Bilong wanem? Bikos yumi i stap pikinini bilong God!
SAMPELA TINGTING
God i adoptim yu olsem pikinini bilong em yet. Dispela em i gat wanem mining insait long laip bilong yu? Tingting long dispela na tok tenkyu long God, Papa bilong yu!
Ritim: Rom 8:1-11
Lo i no inap long rausim sin bilong yumi, long wanem, olpela bel bilong yumi i no gat strong bilong bihainim lo. Tasol dispela samting lo i no inap mekim, em God yet i mekim. God i salim Pikinini bilong em yet i kam na em i kamap man olsem yumi man bilong mekim sin. Em i kam bilong rausim sin bilong yumi, na long bodi bilong em yet, God i kotim sin na pinisim strong bilong sin. God i mekim olsem bai stretpela pasin bilong lo i ken kamap long laip bilong yumi, long wanem, nau yumi no save wokabaut long pasin bilong olpela bel. Nogat. Yumi save wokabaut long pasin bilong Holi Spirit. —Rom 8:3-4
Lo bilong God i tokim yumi long laikim tru God antap long ol narapela samting, na yumi i mas laikim ol wantok bilong yumi olsem yumi laikim yumi yet. Tasol yumi i no inap mekim olsem. Maski yumi i save olsem God i tokim yumi long mekim dispela, stil yumi i no inap. Maski yumi save long ol gutpela pasin, yumi i no inap long mekim ol dispela gutpela pasin. Sapos yumi inap raitim dispela lo bilong laikim tru God na laikim ol narapela long ol sainbod na putim long planti hap bilong kantri bilong yumi, orait kantri bilong yumi bai i no inap kamap gutpela long dispela samting tasol. Yumi i no inap bihainim lo bilong God, maski yumi wok hat tru long mekim olsem.
Tasol, long ol lain i pas wantaim Krais, i gat tupela bikpela samting inap long helpim ol. Namba wan, God i no inap kotim ol moa, bikos Krais i kisim ples bilong ol long kot. Namba tu, long Krais Jisas ol i kisim pawa na strong bilong mekim wanem samting ol i no inap long mekim. Ol i wok long bihainim lo bilong God, bikos ol i wok long laikim tru God na ol narapela.
I min olsem, sapos yumi i pas wantaim Krais, orait yumi i bin dai wantaim em na kirap bek wantaim em tu. Long dai bilong Krais, God i kotim yumi. Long bodi bilong Jisas em i kotim ol sin bilong yumi. Dispela samting i kamap pinis. Lo i no inap kotim yumi moa. God i no inap mekim save long yumi gen.
Na dispela namba tu samting i bikpela samting tu. Yumi i kisim pawa bilong Holi Spirit bilong Krais. Olsem na, nau yumi no save wokabaut long pasin bilong olpela bel. Nogat. Yumi save wokabaut long pasin bilong Holi Spirit.
Long Krais yumi no stap moa olsem sinman tasol. Nau Spirit bilong God i pulapim yumi. Nau yumi i kisim strong bilong God Holi Spirit long bihainim laik bilong God.
Olsem na, em i wok bilong yumi long wokabaut long pasin bilong Spirit. Yumi mas bihainim laik bilong God. Em i samting bilong bilip. Em i samting Bikpela bai i helpim yumi long mekim.
SAMPELA TINGTING
Yu bilip olsem Bikpela inap helpim yu long bihainim em?
Ritim: Rom 7:14-25
Mi save, i no gat wanpela gutpela samting i stap insait long mi. Mi tok long olpela bel bilong mi tasol. Tru, mi laik mekim gutpela pasin, tasol mi no inap mekim. —Rom 7:18
Olgeta manmeri i laik bihainim sampela kain bilip. Tasol dispela i no wankain olsem dispela bilip long gutnius.
God wanpela tasol i save hamaspela manmeri i save wok long bihainim kain kain bilip bilong kisim salvesen. Tasol dispela pasin i no inap tru long kisim bek yumi.
I gat sampela bilip i kranki olgeta: Baha’i, wanpela bilip we ol i bihainim ol sta, bilip olsem yu mas lukautim yu yet na kamap bikman stret. Ol i rong olgeta. Tasol pasin bilong bihainim ol narapela gutpela bilip i no inap tu: Sapos yu helpim ol tarangu lain o sapos yu inap autim planti lain long Buk Baibel.
Bilong wanem ol dispela samting i no inap helpim yumi? Bikos yumi i no inap mekim ol gutpela samting tru. God i givim lo long yumi, na yumi i no save bihainim. Nogat, planti taim, taim yumi lainim ol gutpela samting bilong God, bai yumi klia moa yet long ol pasin nogut na sin bilong yumi.
Em i no naispela samting, tasol em i tru. Buk Baibel i tokim yumi olsem em i tru. Planti lain i wari long hel, na ol i laik i go long heven, olsem na ol bai wok long kisim sampela kain bilip long helpim ol. Tasol dispela samting i no inap rausim pen na asua bilong ol.
God wanpela tasol inap long kisim bek wanpela man o meri. God em tasol i salvesen bilong yumi. God em i kam long yumi long Jisas Krais, na God i givim yumi pawa bilong Holi Spirit. Em tasol i givim dispela long yumi.
God – na God tasol – inap long kisim bek yumi. Maski ol lain i wok hat tru long kisim salvesen, ol i no inap. Yumi olgeta i mas klia gut long dispela samting.
SAMPELA TINGTING
Yu save wok long kisim salvesen long strong bilong yu yet? O yu save bilip long God, em wanpela tasol, inap long kisim bek yu? Tok tenkyu long God long wok bilong em long Krais.
Ritim: Rom 7:1-6
Olsem na ol brata bilong mi, yupela i bin pas wantaim bodi bilong Krais, na long dispela pasin yupela i dai pinis, na yupela i no i stap moa aninit long lo. Nau yupela i stap lain bilong narapela man, em dispela Man i bin kirap bek long matmat, bilong yumi ken kamapim ol gutpela pasin God i laikim. —Rom 7:4
Yumi stap fri long pawa bilong sin pinis, olsem Pol i skulim yumi long Rom 6. Na long siapta 7, Pol i skulim yumi olsem yumi stap fri long pawa bilong lo tu.
Long soim dispela, Pol i yusim wanpela tok piksa long ol lo. Em i laik soim yumi tupela bikpela samting: Nau yumi i no pas moa wantaim lo, olsem na yumi i stap fri long pas wantaim Krais.
Em i kliaim dispela tok olsem:
- Ol man inap stap aninit long lo taim em i stap laip tasol. Taim em i dai, em i no aninit long lo moa (lain 1).
- Sapos meri i marit na man bilong em i dai, orait dispela lo i bin pasim em wantaim man, em i no pasim em moa (lain 2).
- Sapos man i stap laip yet na meri i slip wantaim narapela man, em i mekim pasin pamuk. Tasol sapos man bilong mn i dai pinis, orait dispela lo i no pasim em moa (lain 3).
- Taim yumi i dai pinis wantaim Krais (bikos yumi i bin pas wantaim bodi bilong em), yumi i no stap moa aninit long lo. Nau yumi i stap lain bilong Krais (lain 4). Yumi bai pas wantaim Krais long Spirit bilong em. Em i dispela nupela kontrak.
- Long hia, i no olsem Pol i laik skulim yumi long pasin bilong marit. Em i laik yusim pasin bilong marit olsem tok piksa long wanem samting God i mekim long Jisas Krais.
- Pol i tokim yumi olsem, taim yumi stap aninit long lo, laip bilong yumi no inap karim kaikai. Yumi i no inap bihainim wanpela bilong ol dispela lo. Tasol taim yumi i “dai pinis long dispela lo” long Krais, yumi inap kirap long wanpela nupela laip we yumi bai karim planti kaikai long Jisas.
- Planti taim yumi lukim sampela lain i stap Kristen. Ol i klia long wanem samting em i gutpela na wanem samting i no gutpela long mekim. Tasol ol i no bihainim dispela. Ol i save long lo bilong God, tasol ol i no save gut long Krais. Yumi mas wanbel wantaim Krais, long blut na Spirit bilong em yet, na long dispela taim tasol bai yumi inap long karim ol gutepla kaikai.
- SAMPELA TINGTING
- Yu yet i “dai pinis long lo” na kamap wanbel wantaim Krais? Na yu karim ol gutpela kaikai long Krais, o nogat?
Ritim: Rom 6:12-23
Na yupela i no ken larim sin i bosim han lek samting bilong yupela, bai yupela i mekim pasin nogut. Yupela i olsem ol manmeri i kirap bek long matmat na i stap laip, olsem na yupela i mas givim yupela yet long God... —Rom 6:13
Long lain 11, Pol i tokim yumi olsem yumi i win pinis, long Krais. I olsem em i tok, “Em i pinis. Yu bin dai na yu kirap bek pinis.” Tasol long lain 12 em i tokim yumi long pait. Bikos yumi i kirap bek, orait yumi no ken larim sin i bosim yumi moa.
Na dispela em i pasin stret bilong kamap nupela long bilip. Gutnius bilong Krais i tokim yumi olsem salvesen bilong yumi i kam pinis. Yumi pas wantaim Krais, olsem na yumi bin dai wantaim em na yumi kirap bek wantaim em. Em i pinis. Krais i kisim pe bilong sin bilong yumi, na yumi kisim nupela laip pinis long Krais. Sin i no inap bosim yumi moa. Nau yumi mas givim yumi yet long God.
Dispela gutnius em i samting yumi i mas bilipim. Tasol, tu, God i tokim yumi long mekim sampela samting: “No ken larim sin i bosim han lek samting bilong yupela....yupela i mas givim yupela yet long God.” Olgeta hap bilong yumi – bodi, tingting, toktok, pasin – olgeta i mas aninit long nupela masta bilong yumi, na i no aninit long Satan.
Sapos yu bilipim dispela gutnius, yu mas bihainim tok bilong God tu. Na taim yu bihainim tok bilong God, em bai klia olsem yu bilipim dispela gutnius.
Taim gutnius i tokim yumi olsem yumi pas wantaim Krais, bai yumi i stap long wanpela pait. Nau yumi no ken larim Satan i yusim yumi long mekim ol pasin nogut bilong em. Nogat, yumi yet i bilong God; yumi mas givim yumi yet long God.
Dispela em i samting bilong dispela nupela laip yumi kisim pinis. Yumi stap long wanpela pait. Na dispela pait bai soim klia olsem yumi i stap long dispela nupela laip. Sapos yumi no pait, olsem wanem long bilip bilong yumi? Yumi bai winim dispela pait bikos Krais yet i win pinis. Yumi sanap na pait long pawa na strong bilong em yet.
Yumi stap fri, tasol yumi mas redi long pait olgeta taim. Yumi mas prea na lukaut, olgeta taim. Laip bilong yumi mas putim ples klia husat i bosim yumi. Yumi mas bihainim em tasol!
SAMPELA TINGTING
Yu yet yu save pilim olsem yu i stap long wanpela pait?
Ritim: Rom 6:1-11
Olsem tasol yupela tu i mas i gat dispela tingting. Yupela tu i bin i dai na yupela i no i stap moa aninit long strong bilong sin. Nogat. Yupela i bin pas wantaim Krais Jisas na yupela i stap laip wantaim God. —Rom 6:11
Sampela lain i ting olsem yumi i mas pret liklik long dispela doktrin bilong marimari bilong God. Ol i ting, sapos yumi i toktok long marimari bilong God, olsem wanem na long ol wok yumi yet i mas mekim? Rom 5:20 i tok, “Taim ol man i kisim lo, na ol i kalapim lo moa yet. Ol man i mekim planti sin tumas, tasol God i marimari moa yet long ol.” Sapos dispela em i tru, bai yumi i mekim ol gutpela pasin bilong wanem? “Orait nau bai yumi mekim wanem tok? ‘Yumi ken mekim planti sin bai God i ken marimari moa yet long yumi,’ ating yumi ken tok olsem, a?” (Rom 6:1). Ating dispela tok i save mekim sampela lain i kamap les na pundaun long sin, a? (Tok i Tru, Askim 64).
Tasol nogat. Sapos sios i wok long autim tok tru long marimari bilong Krais, dispela samting i no inap kamap. Ol lain bai les na pundaun long sin sapos ol i no klia gut long marimari bilong God o sapos ol i laik kisim marimari bilong Krais tasol ol i les long kisim Krais wantaim.
Krais em i dai long planti manmeri. Tasol taim em i dai long yumi, i olsem yumi i kamap lain tru bilong em. Yumi kamap man na meri bilong Krais. Yumi kamap nupela bodi bilong em na yumi i gat nupela pawa bilong em tu – pawa bilong salvesen na bilong kamap nupela long em.
Yumi i mas poromanim Krais long wanem samting em i mekim. Em i dai, olsem na yumi i mas dai. Em i kirap bek, olsem na yumi i mas kirap bek. Pol i tok, “Yumi bin pas wantaim Krais Jisas na kisim baptais, na long dispela pasin yumi olgeta i bin pas wantaim dai bilong em... Na long bikpela strong bilong em yet, Papa i bin kirapim Krais long matmat. Olsem bai yumi tu i ken wokabaut long nupela laip.”
Olsem na, “Yupela tu i bin i dai na yupela i no i stap moa aninit long strong bilong sin. Nogat. Yupela i bin pas wantaim Krais Jisas na yupela i stap laip wantaim God.” Wokabaut long bilip!
Ol lain i bilip long Krais na i kisim baptais, ol i pas wantaim Krais. Olsem na yumi i dai long sin. Sin i no inap bosim yumi moa. Krais em i dai, a? Na mi i pas wantaim em, a? Orait, nupela laip i kam pinis. Long Krais yumi kirap long nupela laip, na dispela laip i bilong God, na Spirit bilong em i bosim yumi nau. Bilip i olsem as tru bilong dispela nupela laip.
SAMPELA TINGTING
Yu yet i pas wantaim Krais? Dispela i gat wanem mining insait long laip bilong yu?
Ritim: Rom 5:12-21
Adam em i olsem piksa bilong dispela Man i mas kamap bihain. —Rom 5:14 Olsem wanem nau yumi olgeta inap kisim salvesen long dai na kirap bek bilong wanpela man?
Yumi inap klia long dispela, taim yumi i tingting long Jisas Krais, em i kisim ples bilong yumi na mekim wok bilong yumi.
Dispela pasin bilong kisim ples bilong narapela, em i no wanpela nupela samting. Long Olpela Kontrak yumi inap ritim sampela stori long ol king i bin mekim pasin nogut na dispela i bagarapim kantri bilong ol. Adam, taim em i stap olsem pesman bilong olgeta man, em i bin mekim sin. Olsem na em wanpela i mekim sin tasol dispela sin i go long planti. Wanpela i senisim laip bilong planti. Na Krais i bihainim pasin bilong Adam taim em wanpela i senisim laip bilong planti.
Adam i stap olsem as bilong sin. Pol i tok, “Yumi save, wanpela man i bin mekim sin, na long dispela pasin sin i kamap long graun” (Rom 5:12). Adam i olsem wanpela dua na olgeta sin i kam insait long em.
Sin na dai i kam long Adam, tasol em i go long olgeta lain: “Na dai i kisim olgeta man, long wanem, olgeta man i bin mekim sin” (Rom 5:12). Taim Adam i mekim sin, olgeta man i bin mekim sin wantaim em. Bikos Adam i stap olsem pesman bilong yumi, dispela samting em i mekim, i kam long yumi olgeta. Olgeta manmeri i mekim sin na i dai long em.
Na Adam em i olsem piksa long Krais. Adam i olsem dua bilong kisim sin na dai i kam long bagarapim yumi olgeta. Tasol Krais i kam olsem dua bilong kisim marimari na laip i kam long ol lain i bilip long em.
Pol i stori long Adam long helpim yumi klia long wok bilong Jisas. Jisas i kisim ples bilong yumi, na wok bilong em i helpim ol lain bilong em. Ol pasin bilong Jisas tasol i olsem as bilong salvesen bilong yumi.
Yumi i kamap stretpela long ai bilong God, na yumi kisim laip long wok bilong Krais tasol, na i no long wok bilong yumi yet.
SAMPELA TINGTING
Adam i mekim sin, tasol sin i kam long yumi tu. Olsem wanem?
Ritim: Rom 5:6-11
Tasol yumi stap yet olsem ol manmeri bilong mekim sin, na Krais i dai bilong helpim yumi. Long dispela pasin God i bin soim yumi olsem, em i laikim yumi moa yet. —Rom 5:8
Em i gutpela tru sapos yumi klia long ol tising bilong Buk Baibel. Olsem na, em gutpela sapos yumi klia long tok bilong God long pasin bilong kamap stretpela long ai bilong God long bilip. Na yumi mas redi long autim na kliam dispela tok long ol prens bilong yumi tu.
Dispela em i wanpela bikpela doktrin (tising) long Buk Baibel, tasol planti lain ol i paul long dispela tok. Olsem na yumi mas redi long autim tok tru: Long bilip long Krais tasol bai yumi kamap stretpela long ai bilong God. Dispela bilip i olsem as bilong laip bilong yumi!
I gat planti ol man i wok long paulim dispela tok. Olsem na, yumi mas wok long kamap klia long tok tru insait long Buk Baibel, na yumi mas redi long skelim ol kranki tok bilong ol narapela.
Na Satan bai wok long bagarapim yumi taim yumi wok long bihainim ol tok tru, ol gutpela doktrin bilong Buk Baibel. Na sampela taim em bai paulim yumi tu.
Yumi mas lukaut – nogut yumi ting olsem yumi bai kisim salvesen bikos yumi bihainim na autim ol stretpela doktrin bilong Buk Baibel. Nogut yumi ting yumi bai kisim salvesen bikos yumi no wanbel long ol kranki tok bilong ol narapela Kristen. Satan bai wok long paulim yumi olsem. Nogat. Yumi bai kisim salvesen long Krais tasol.
Na tu em i gutpela long ritim dispela teks long Rom 5. Yumi no kisim salvesen bikos yumi klia long olgeta doktrin long kamap stretpela long ai bilong God. Nogat. God i laikim tru yumi. Em tasol i as bilong salvesen bilong yumi. Bikos God em i laikim tru yumi, em i salim Krais long dai long yumi. Taim yumi stap lain bilong mekim sin yet, Krais i kam na dai long yumi, na God i laikim tru yumi.
Em i gutpela long yumi i autim sampela tok tru long diwai kros: husat i dai, bilong wanem em i dai, na husat i kisim salvesen. Tasol em i gutpela tu long pasim maus bilong yumi tu sampela taim – na lukluk long diwai kros tasol, bikos dispela diwai kros em i soim yumi olsem God i laikim yumi tru, taim yumi stap yet olsem ol manmeri bilong mekim sin.
SAMPELA TINGTING
Yu save long ol doktrin long Buk Baibel? Em i gutpela. Na yu inap long pasim maus bilong yu tu, na lukluk long diwai kros bilong Krais tasol?
Ritim: Rom 5:1-5
Orait yumi bilip pinis na God i bin kolim yumi stretpela manmeri. Olsem na Bikpela bilong yumi Jisas Krais i mekim yumi i kamap wanbel wantaim God. —Rom 5:1
Ol lain i wok long apim ol yet, ol i les long kisim dispela gutnius bilong kamap wanbel wantaim God. OlinopretlongGodbikosolinoklialongsinbilongolyet. Oliapimolyet,olsemnaolinosave pret.
Yumi mas wari stret long ol dispela kain lain i no save pret long God, ol lain i no wari long sin bilong ol bikos ol i amamas long ol yet. Tasol ol lain i pret long God ol i gat hop!
Taim ol man na meri i klia olsem ol i pulap long sin, ol i no bel isi. Ol i kamap pret long God. Ol bai klia olsem ol i gat asua long ai bilong God. Na ol i ken klia olsem ol inap kisim Krais na stretpela pasin bilong em tu.
I gat sampela lain bai i wok long daunim ol yet. Ol bai tok olsem ol i nogut stret. Tasol planti taim ol i gat laik long ol narapela i apim ol tasol.
Yumi i no ken mekim olsem. God i tokim yumi long bilip long Jisas Krais. Na sapos yumi bilip long Jisas na long wok bilong em, bai yumi i wanbel wantaim God. Na dispela pasin bilong wanbel i min olsem yumi i stap amamas wantaim God.
Taim yumi bilip long Krais, olgeta pret bilong yumi bai i go pinis. Tru, yumi i stap manmeri bilong mekim sin yet. Tasol Krais em i gutpela. Long rot bilong bilip long Krais, bai yumi i wanbel wantaim God. Taim mi wok long lukluk long Krais, bai mi amamas long laip bilong mi.
Pastaim mi mas wanbel wantaim God, na bihain bai bel bilong mi bai i stap isi tu.
Pasin bilong wanbel wantaim God na bel isi, em i samting bilong bilip long Krais tasol, bikos long wok bilong em tasol yumi kamap stretpela long ai bilong God.
SAMPELA TINGTING
Yu yet yu wanbel wantaim God? Na yu i gat bel isi long laip bilong yu yet?
Ritim: Rom 4:9-12
Taim em (Abraham) i no katim skin yet, em i bilip long God, na God i kolim em stretpela man. Na God i givim em dispela pasin bilong katim skin olsem mak bilong em i stap stretpela man. Olsem na Abraham em i stap namba wan tumbuna bilong olgeta man i no bin katim skin, tasol ol i bilip long God na God i kolim ol stretpela man. —Rom 4:11
Taim ol lain Juda i harim dispela tok Pol i autim long Abraham, ating ol i kirap nogut bikos em i narakain tok olgeta.
Abraham i no kamap stretpela taim em i katim skin. Nogat, Pol i tok, “Em i no katim skin yet na God kolim em stretpela man.” I luk olsem Pol i tok olsem Abraham em i kamap stretpela long ai bilong God taim em i no bilip long God yet. Tasol, nogat, Pol i bihainim tok long Stat 15:6: “Abram i bilipim tok bilong Bikpela. Olsem na Bikpela i kolim em stretpela man.”
Em i katim skin sampela taim bihain long dispela. Yumi ken ritim dispela long Stat 17:24-27. Dispela pasin bilong katim skin i olsem mak bilong ol promis bilong God. Abraham i kamap stretpela long ai bilong God long bilip tasol.
Taim yumi klia long dispela, bai yumi klia tu bilong wanem Abraham i stap namba wan tumbuna bilong olgeta man i no bin katim skin, tasol ol i bilip long God na God i kolim ol stretpela man.
Tasol tu, i no olsem Abraham i namba wan tumbuna bilong ol lain Juda bikos ol i katim skin pinis. Em i tumbuna long ol lain i bilip tasol, long wanem, yumi kamap stretpela long ai bilong God long bilip tasol, na i no bilong pasin bilong katim skin.
Dispela ol tok bilong Pol i helpim ol bilip lain husat i no stap lain bilong Juda. Long dispela rot, God inapim ol promis bilong em long Abraham. Yumi kamap stretpela long ai bilong God long bilip tasol. Bilip tasol, maski yu wanpela Juda o yu kam long ol narapela hap. Em tasol. Abraham na ol pikinini bilong em i stap stretpela long ai bilong God long bilip tasol. Na Abraham i papa tru bilong ol bilip lain tasol.
SAMPELA TINGTING
Yu yet yu stap wanpela pikinini bilong Abraham sapos yu bilip long God. Em i gat wanem mining long laip bilong yu yet?
Ritim: Rom 4:1-8
Tasol sapos wanpela man i laik kamap stretpela man long ai bilong God, orait em i mas mekim wanem? Em i no mas wok strong long mekim ol gutpela pasin, tasol em i mas bilip olsem, God inap long kolim ol man bilong mekim sin ol stretpela man.Na bai God i kolim em stretpela man. —Rom 4:5
Gutnius em i nupela samting. Taim Krais i kam, gutnius i kamap klia tru, na i no bipo long dispela. Em i nupela samting, na dispela i min olsem em inapim olgeta olpela samting – i no olsem God i rausim olgeta olpela samting. Nogat, em inapim olgeta olpela samting. Taim God i kisim nupela kontrak i kam, o taim em i bringim nupela graun i kam, i olsem em inapim dispela olpela kontrak na em inapim dispela olpela graun. Em i kain olsem wanpela pikinini diwai i kamapim naispela diwai stret o olsem wanpela pikinini i kamap wanpela bikpela man o meri.
Olsem na, dispela gutnius i no wanpela nupela samting olgeta long Olpela Kontrak. Nogat, Pol i putim ples klia olsem dispela gutnius i kliaim rot bilong dispela salvesen God i bin autim pinis long Olpela Kontrak.
I no olsem God i bosman tasol bilong Abraham, na Abraham em i wokboi tasol bilong em. Sapos em tru em bai Abraham i gat pe bilong em na ol raits bilong em tu. Nogat, God i go long Abraham na givim promis long em, na Abraham yet i mas bekim dispela promis long bilip. Na em i wankain long yumi. Yumi tu i kisim promis bilong God pinis, na yumi tu i mas bekim dispela promis long bilip.
Long kamap stretpela long ai bilong God, yumi i mas bilip – i no samting bilong wok yumi yet i mekim. Taim God i kolim Abraham stretpela man, i no bikos Abraham i gutpela man stret, o bikos em yet i mekim gutpela wok. Nogat, Abraham i bilipim tok bilong God, olsem na God i kolim em stretpela man.
Olsem tasol yumi kamap stretpela long ai bilong God. Yumi no kamap olsem bikos yumi i gutpela. Olgeta man na meri bilong mekim sin i kamap stretpela long ai bilong God taim ol i bilip long Krais. Ol i kisim stretpela pasin bilong Krais taim ol i bilip, na God inap long kolim ol man bilong mekim sin ol stretpela man.
Em i wok bilong God. God i kolim yumi stretpela man na meri long wok bilong Krais. Em i no stretpela pasin bilong yumi yet; em i stretpela pasin bilong Kais tasol. Mi no inap lukluk long mi yet long kisim save sapos mi yet i stap stretpela long ai bilong God o nogat. Mi mas lukluk long Krais. Long em tasol bai mi kamap stretpela long ai bilong God – long bilip.
SAMPELA TINGTING
Yu yet i stap stretpela long ai bilong God? Dispela i gat wanem mining long laip bilong yu?
Ritim: Rom 3:21-31
Tasol nau pasin God i mekim bilong kolim yumi stretpela manmeri, em i kamap ples klia pinis. Em i no kamap long rot bilong bihainim lo. Nogat. Em i kamap long narapela rot. Na tok i stap long lo bilong Moses na long ol buk bilong ol profet em i autim tok bilong dispela pasin God i mekim. Dispela pasin em i olsem. Olgeta manmeri i bilip long Jisas Krais, God i save kolim ol stretpela manmeri. I no gat narapela rot. Nogat. —Rom 3:21-22
“Tasol nau...”
Long hia yumi kamap long nupela hap long dispela buk. Dispela tok “nau” i min bihain long taim God i mekim wok long Jisas Krais. Salvesen i kamap pinis na olgeta samting i senis nau.
“Pasin God i mekim bilong kolim yumi stretpela manmeri, em i kamap ples klia pinis.” Nau yumi i kamap stretpela long ai bilong God. God yet i mekim dispela samting i kamap ples klia pinis. Na em i no kamap long rot bilong bihainim lo. Em i no samting yumi mekim na bai yumi kamap stretpela long ai bilong God.
Em i gutnius stret. Taim Jisas i kam pinis long dispela graun, dispela samting i stap ples klia: Jisas inapim olgeta lo na tok profet. Dispela Olpela Kontrak i poinim i go long dispela wok bilong Krais. Tasol nau, long taim God yet i makim, pasin God i mekim bilong kolim yumi stretpela manmeri, em i kamap ples klia pinis.
Long kamap stretpela long ai bilong God, yumi mas bilip long Jisas Krais. Krais em i as bilong dispela tok. Em yet i kisim ples bilong yumi yet long kot bilong God. Yumi kisim ol stretpela pasin bilong em yet. Long bilip long em yumi stap stretpela long ai bilong God. Taim yumi bilip, bai yumi lus tingting long mekim wok bilong yumi yet bilong kisim salvesen; nogat, bai yumi kisim wok bilong Krais tasol.
Em tasol. Em i naispela samting stret na narapela samting olgeta. Em i samting bilong olgeta lain i bilip long Krais.
God em i stretpela olgeta, na dispela stretpela pasin bilong em i soim klia olsem olgeta man na meri i mekim sin (lain 23), na tu, dispela stretpela pasin bilong God inapim olgeta samting olgeta manmeri i nidim - long wok bilong Jisas Krais. Long wok Krais Jisas i mekim bilong baim bek yumi, God i save kolim yumi stretpela manmeri (lain 24). Dispela em i gutnius stret. Em i nupela laip!
Yumi olgeta mas bilip long Jisas. Long wok bilong em, God i givim yumi dispela samting bipo yumi no inap kisim. Long Krais, God i kam long yumi taim yumi i les long go long em.
SAMPELA TINGTING
Yumi olgeta i mas redi long autim gutnius long ol narapela. Yu redi?
Ritim: Rom 3:9-20
Olsem na long pasin bilong bihainim lo ‘i no gat wanpela man bai i no gat asua na i stap stret long ai bilong God.’ Nogat. Lo i save soim yumi long ol sin bilong yumi, em tasol.
—Rom 3:20
Long dispela teks Pol em i pinisim ol tok bilong em i bin raitim long namba wan hap bilong Buk Rom: “Lo bilong God i no inap helpim yu long kot bilong God. Yupela ol lain Juda, na yupela olgeta manmeri bilong dispela graun i stap aninit long kot bilong God. Lo bilong God bai kotim yu tasol, bikos long dispela lo bai yu luksave long ol sin na asua bilong yu yet.”
Taim gutnius i stori long sin, em i soim klia olsem yumi olgeta i wankain long mekim sin. Yumi olgeta i stap aninit long kot bilong God. Yumi no ken daunim ol narapela long sin bilong ol, bikos yumi olgeta i pulap long sin. Tru, sampela lain i save mekim planti sin moa long ol narapela lain, tasol olgeta man i man bilong mekim sin long ai bilong God.
Maus bilong yumi i mas pas nau. Yumi olgeta i mekim sin long ai bilong God.
Nau yumi i luksave long dispela sin em i nogut olgeta. Em i no kamapim olgeta pasin nogut tasol. Nogat. Sin em i dispela strong i save holim pas yumi long kalabus: “Sin i karamapim yumi olgeta, yumi Juda na Grik wantaim” (lain 9). Na i no gat wanpela inap lusim dispela kalabus long strong bilong em yet. Na yumi no inap helpim ol narapela long mekim olsem tu.
Planti lain long tude i ting olsem man yet inap wanbel na kamapim bel isi tru long dispela graun. Ol i ting, sapos yumi olgeta i mekim ol naispela pasin tru, orait bai yumi i stap wanbel tru.
Tasol nogat. Taim yumi ritim Rom 3:20, bai yumi i klia tru olsem yumi i lain bilong mekim sin, wankain long ol stilman, pamuk lain na ol narapela man nogut. Yumi olgeta i lain stret bilong mekim sin. Maski yumi i kam long wanem lain stret, maski yumi i bikman o rabisman tru. Yumi olgeta i nidim Krais. Yumi olgeta i nidim wanpela rot bilong lusim dispela kalabus bilong sin. Go long Krais, bai em i ken wasim yu long blut bilong em!
SAMPELA TINGTING
Yu stap aninit long kalabus bilong sin yet, o nogat?
Ritim: Rom 2:12-24
Yupela i save litimapim nem bilong yupela yet na tok, ‘Mipela i save long lo bilong God.” Tasol ating yupela yet i save kalapim lo, na long dispela pasin yupela i bagarapim nem bilong God. — Rom 2:23
Yumi no ken kamap les long harim tok bilong God bilong skulim yumi long sin bilong yumi. Namba wan hap bilong Buk Rom i laik soim yumi olsem dispela gutnius bilong Krais tasol inap long givim hop long yumi na long olgeta narapela manmeri tu. Ol narapela kain hop o helpim i no ken i stap long bel bilong yumi. Yumi mas pasim ol narapela dua. Na sapos yumi mekim olsem bai yumi i kisim strong long Krais, na bai yumi i go insait long dua God yet i opim long yumi.
Tude bai yumi lainim olsem ol lain Juda i stap aninit long kot bilong God.
Planti lain tude i ting olsem Israel i nambawan lain manmeri bilong God yet. Planti ol Kristen i save tok olsem tu. Olsem na em i gutpela long ritim dispela siapta gut tru, bikos em i putim ples klia olsem olgeta lain (ol Juda tu) i nidim gutnius bilong Krais bilong kisim salvesen. Long kisim salvesen, olgeta lain, na yumi olgeta, i mas bilip long Jisas Krais tasol.
Skin bilong yumi i no inap long helpim yumi. Pol yet i tok long dispela long Filipai 3:4-11. Em i kamap klia olsem skin bilong em na wok bilong em na skul bilong em na pasin bilong em long autim tok bilong God i no inap helpim em. Olgeta samting long dispela grun ol i olsem pipia nating long Pol, na em i laik bihainim Krais tasol na bilipim em!
Ol Juda i laik litimapim nem bilong ol yet na tok, “Mipela i save long tok bilong God.” Tasol Pol i tok olsem ol i kalapim lo bilong God.
Ol Juda i ting olsem ol i kisim salvesen pinis bikos ol i holim lo na tok bilong God. Na planti manmeri long tude tu i save ting olsem ol i kisim salvesen pinis bikos ol i holim tok bilong God. Tasol maski. I no samting bilong kisim tok tasol, em i samting bilong bihainim. Em i wok bilong yumi – long bihainim tok bilong God. Gutnius bilong Krais i givim strong long yumi long bihainim tok bilong God.
SAMPELA TINGTING
Olgeta samting bilong graun i olsem pipia nating long yu, na yu i laik bihainim Krais, o nogat?
Ritim: Rom 2:1-11
Yu save sutim tok long ol man i mekim ol dispela kain pasin, tasol yu yet yu save mekim wankain pasin olsem ol. Yu ting God bai i no inap kotim yu tu, a? —Rom 1:16
Long Rom 1 yumi i bin ritim tok long ol manmeri i doti tru, na ol i givim baksait long Tok bilong God, na ol i bihainim ol pasin i nogut olgeta na doti tru. Tasol i no dispela kain manmeri tasol i stap long dispela graun. I gat planti manmeri i save mekim planti ol gutpela pasin. Na dispela siapta, Rom 2, i stori long ol lain i save bihainim ol gutpela pasin, tasol ol i wok long kotim ol man nogut.
Gutnius bilong Krais i givim yumi gutpela save long sin. God em i no wari sapos yu i wanpela man i save mekim ol bikpela sin o sapos yu save mekim ol liklik sin tasol. God em i kotim yu bikos yu mekim sin, maski yu mekim ol bikpela sin o ol liklik sin tasol!
I gat sampela sin i bikpela moa long ol narapela. Sin bilong kisim gun na stilim mani long wanpela benk i bikpela moa long sin bilong tingting bilong mekim olsem tasol. Tasol maski. Tupela man i mekim dispela tupela pasin i mekim sin tasol.
I no olsem taim yumi i stil o aigris o mekim pasin pamuk, orait wantu yumi i kamap man o meri bilong mekim sin. Nogat. Yumi i save mekim ol dispela pasin nogut bikos yumi i stap man na meri bilong mekim sin pinis. As bilong ol dispela samting em i sin, dispela sin i pulap long bel bilong yumi wan wan. Na Buk Baibel i wok long soim yumi olsem yumi olgeta i pulap long sin.
Sin bilong yumi em i pasin bilong laikim ol narapela samting antap long laikim tru God, na pasin bilong laikim yumi yet antap long laikim tru ol wantok bilong yumi. Yumi no save mekim wanem samting God i tokim yumi long mekim, na dispela em i sin.
Klostu olgeta manmeri i klia olsem pasin bilong kilim ol narapela man, o pasin bilong stil, em ol i pasin nogut; em i sin. Tasol taim yumi stap wanpela Kristen, bai yumi i klia olsem pasin bilong mekim ol pasin nogut i no mekim mipela i kamap man na meri bilong mekim sin. Nogat, yumi i save mekim ol pasin nogut bikos yumi i man na meri bilong mekim sin pinis.
Olsem na, gutnius i skulim yumi long harim dispela tok: “Yu save sutim tok long ol man i mekim ol dispela kain pasin, tasol yu yet yu save mekim wankain pasin olsem ol. Yu ting God bai i no inap kotim yu tu, a?” (lain 1)
God i putim ples klia olsem yumi i pulap long sin, na bai yumi i klia olsem yumi i nidim Jisas!
SAMPELA TINGTING
Yu klia olsem yu yet i wanpela man o meri bilong mekim sin? Na yu mas klia gut long dispela samting bilong wanem?
Ritim: Rom 1: 18-28
Olsem na God i lusim ol...Olsem na God i lusim ol...Olsem God i larim ol... —Rom 1:24-28 Yumi no ken kotim ol lain i laik i stap insait long ol doti pasin bilong ol. Ol yet bai tokim yumi long no
ken kotim ol bikos ol i laik bihainim laik bilong ol yet.
Tasol God em i olsem jas bilong ol, em bai kotim ol – na yumi tu. Taim ol lain long dispela graun i lukim ol sta na mun, taim ol i harim klaut i paiarap, na taim ol i lukluk i go dip insait long bel bilong ol, i olsem ol i harim nek bilong God. Yes, ol i harim nek bilong God pinis. Tasol ol i les long harim. Na i no gat man inap tok olsem “mi no gat asua, long wanem, mi no bin save long God” (lain 20), taim God i kotim ol.
Salvesen na pasin bilong stap aninit long belhat bilong God, i no samting long bihain tasol. Nogat. Ol i samting bilong tude tu, maski ol bai kamap bikpela samting moa long bihain. I gat sampela lain i stap pinis aninit long belhat bilong God (lain 18), na sampela narapela lain i kisim pinis dispela pawa bilong gutnius bilong kisim bek ol (lain 16). Stat bilong dispela tupela samting i stap pinis long tude tu.
Taim ol manmeri i wok long pasim yau long tok bilong God insait long bel bilong ol, i olsem ol i stap pinis long dispela rot i go long hel. Taim ol i pasim yau olgeta long tok bilong God, ol bai amamas long harim tok nogut i kam long bel bilong ol, na em bai pulim ol long mekim ol pasin doti. Na bihain, taim ol i wok long lusim tok bilong God na senisim na kisim tok giaman, orait God bai i lusim ol. Na yumi inap lukim dispela kain samting long ai bilong yumi yet.
Long yia 58, taim Pol i raitim dispela pas, na long tude tu, planti manmeri i wok long i go hariap long hel. Ol i wok long pasim tok bilong God, na ol i bihainim ol lo bilong ol yet. Taim ol i bihainim laik nogut bilong ol yet, orait God bai i lusim ol na larim ol i bihainim tingting nogut bilong ol yet.
Pawa bilong gutnius tasol inap long pulim ol manmeri i kam lusim pasin doti na i go long Krais. Marimari bilong God em i bikpela tru long kisim bek ol man i doti stret. Tasol taim Krais i hangamap long diwai kros, em inapim tok bilong God: “God i no bin pasim Pikinini bilong em yet. Nogat. Em i bin salim em i kam bilong helpim yumi” (Rom 8:32).
SAMPELA TINGTING
Yumi i gat wok bilong bringim dispela gutnius i go long o lain i doti tru, o nogat? Bilong wanem?
Ritim: Rom 1: 8-17
Mi no save sem long autim gutnius, long wanem, strong bilong God i stap long gutnius, em strong bilong kisim bek olgeta man i bilip, ol Juda pastaim, na ol manmeri bilong ol arapela lain tu. —Rom 1:16
Long han bilong Pol, God i givim planti ol buk long Nupela Testamen long yumi. Na buk Rom long Buk Baibel i soim klia gutnius bilong God. Pol yet i autim dispela gutnius klia tru long buk Rom.
Pol i raitim dispela buk long yia 58, em i long taim bipo long tude. Long yia 58, dispela siti Rom em i nambawan siti long kingdom bilong Rom. King bilong dispela kingdom i save stap long Rom. Tasol dispela king, na ol narapela bikman long Rom, ol i no save long dispela likilk lain Kristen husat i kisim dispela pas long Pol na i bung long siti bilong ol. Tasol God i makim dispela pas bilong Pol bilong kamap bikpela samting long dispela graun, na dispela pas i winim olgeta wok bilong ol ami bilong Rom.
Na sios bilong Rom i ritim dispela pas na i tok, “Pol bai i kam long Rom, na long dispela pas em i autim gutnius bilong Krais.”
Tasol klostu, dispela liklik sios long Rom i bungim ol bikpela hevi. King bilong Rom na ol narapela bikman long Rom i kam na wok long bagarapim dispela sios. Ol i les bikos sios i wok long lotuim Jisas na i no lotuim king bilong Rom. Bihain ol i tromoi planti ol Kristen long ol laion, olsem ol laion i ken kaikaim ol. Tasol kingdom bilong Rom i no inap winim bilip bilong ol Kristen. Pasin bilong bihainim Krais na Kingdom bilong Krais yet i winim dispela kingdom bilong Rom - bikos pawa bilong gutnius bilong God i save kisim salvesen i kam!
Planti taim long histori bilong sios bilong God, dispela buk Rom i wok long stongim planti Kristen, na taim ol i ritim tok tru long dispela buk gen, sios i wok long kamap strongpela moa long dispela tok. Dispela pas i go long Rom i givim gutpela save long sios, na pawa long sios long autim tok bilong God long ol narapela lain long dispela graun.
Yumi no ken “sem” long ritim na autim dispela tok long Buk Rom. Em i gutnius bilong Krais, em i gat strong bilong kisim bek olgeta man i bilip. Long dispela pas, pawa bilong God bilong kisim bek olgeta man bai i mekim wok long olgeta hap we bilip i stap.
SAMPELA TINGTING
Yu gat sampela askim o sampela tingting long ritim na kisim skul long dispela Buk Rom long dispela mun?
Ritim: Jon 15:1-11
Yupela i mas karim planti kaikai na i stap disaipel bilong mi, na long dispela pasin Papa bilong mi i kisim biknem. —Jon 15:8
Tingting long wanpela gaden i gat ol kain kain prut samting. Papa bilong gaden i kam bilong painim prut bikos em i wok bilong em. Taim gaden i pulap long kaikai, em bai i amamas; i min olsem em i gutpela papa bilong gaden. Taim ol diwai i no karim kaikai, Papa bilong gaden bai rausim ol lip samting bilong en i nogut. Na sapos em i no karim kaikai, orait em bai i rausim planti ol han bilong dispela diwai.
Na ol dispela prut i olsem yumi manmeri. Olsem ol Papa bilong gaden i save wok long gaden bilong em, God yet, olsem Papa bilong yumi i save wok long yumi. God i gat laik olsem em bai i kisim planti kaikai stret. Em i rausim ol lip samting bilong kisim planti moa kaikai yet. Na sapos em i mekim bikpela wok stret, tasol ol manmeri i no karim kaikai, orait long dispela taim God bai i rausim han bilong diwai. Na i min olsem yumi i no stap olsem lain bilong em nau.
Yumi i no inap karim kaikai sapos yumi no stap lain bilong Jisas. Sapos yumi i no pas wantaim Jisas, bai yumi i no inap mekim wanpela samting. Taim yumi i save long marimari bilong God, taim Spirit bilong God i wok long bel bilong yumi, long dispela taim tasol bai yumi inap mekim ol gutpela samting God yet i laikim. Ol dispela gutpela wok i olsem ol prut, ol kaikai samting, God yet i amamas long ol.
Taim yumi i bungim pen na hevi tasol yumi i no bel kros long dispela, bai yumi i karim kaikai. Taim yumi i mekim ol gutpela pasin, tasol yumi i no apim yumi yet; taim yumi i bihainim Bikpela maski em i givim hevi long yumi; taim yumi i autim nem bilong Jisas maski ol lain i les long yumi; taim yumi i bihainim Krais maski yumi i mas wokabaut long rot yumi i les long wokabaut long en; orait long ol dispela taim yumi i karim ol gutpela prut, ol gutpela kaikai stret.
Sapos yumi i no pas wantaim Krais, sapos yumi i stap ausait long Krais, orait yumi i no inap karim kaikai. Tasol sapos yumi i kisim nupela laip long Krais, bai yumi i karim kaikai. Sapos ol Kristen i no karim kaikai i min olsem sampela samting i kranki tru, na ol dispela lain i mas skelim ol yet gut tru.
Wok bilong God bai i karim kaikai. Taim God i salim marimari i gat pawa long senisim laip bilong yumi, God yet bai kisim ol gutpela prut em yet i kamapim long yumi.
Olsem Katekism bilong Heidelberg i tok, “Ol man i save stap memba bilong Krais long trupela bilip, i no inap lusim pasin bilong karim gutpela kaikai bilong dispela bilip.”
SAMPELA TINGTING
God bai i lukim wanem ol prut/kaikai long laip bilong yu?
Ritim: Jon 14:18-24
Na Jisas i bekim tok bilong em olsem, ‘Sapos man i laikim mi tru, em bai i bihainim gut tok bilong mi. Na Papa bilong mi bai i laikim dispela man. Na bai mitupela i kam long em na i stap wantaim em oltaim oltaim.’ —Jon 14:23
Sapos yumi i laikim tru Jisas, i min olsem yumi i bihainim gut tok bilong em. “Sapos man i laikim mi tru, em bai i bihainim gut tok bilong mi.” Pasin bilong laikim tru Krais em i samting bilong wok. I no samting long tok bilong yumi tasol. Pasin bilong yumi i mas wankain long tok bilong yumi.
Sapos wanpela man o meri i pas wantaim Krais na i save laikim em tru na bihainim em wantaim, em bai pilim bikpela marimari tru long laip bilong em. Em bai bilip long marimari bilong God. Na moa, God i stap laip insait long em!
Yumi klia olsem God Triwan i stap: Papa, Pikinini na Holi Spirit. Yumi save tingting olsem God Papa i stap antap long yumi, olsem em i kamapim dispela graun na bosim dispela graun. Yumi save tingting olsem God Pikinini em i mekim wok long yumi olsem namel man. Yumi save tingting olsem God Holi Spirit em i stap insait long yumi.
Na ol dispela samting em i tru, tasol dispela tripela i wanpela, bikos wanpela God tasol i stap. Na em i tru olsem Buk Baibel i skulim yumi olsem God Holi Spirit i kam na stap insait long yumi taim yumi i kisim marimari bilong God. Long dispela teks Jisas i tok, “Na bai mitupela – Papa na mi yet – i kam long em na i stap wantaim em oltaim oltaim.”
Dispela God i stap oltaim oltaim, em i kam na stap wantaim yumi sapos yumi i laikim tru Jisas Krais. Em i bikpela samting tru na em inap long pretim yumi. Dispela God Antap Tru, dispela God i Gat Olgeta Strong, dispela God bipo i stap long wanpela tempel olsem ol lain inap long kam long em, dispela God i kam stap wantaim mi! Em i marimari tru. Na i min olsem yumi i gat bikpela wok. Nau ol lain i mas kam long yumi na lukim God.
Olsem na, taim yumi i bilip long Krais, marimari bilong God bai i kam long yumi na yumi i mas salim em i go long ol narapela.
SAMPELA TINGTING
Dispela God i stap oltaim oltaim, em i kam stap wantaim yumi sapos yumi i laikim tru Jisas Krais. Dispela tok i gat wanem mining long laip bilong yu?
Ritim: Jon 7:37-39
Em i olsem tok i stap long buk bilong God, sapos man i bilip long mi, orait planti wara i gat laip bai i kamap long bel bilong en na i ran i go. —Jon 7:38
Dispela em i promis bilong Jisas, na planti i kisim pinis dispela promis: Taim yu bilip long Jisas bel bilong yu bai pulap, na nek bilong yu i no inap dai long wara nau.
Yumi olgeta, taim mama i karim yumi, yumi i dai long wara. Na taim yumi i wokabaut long dispela laip, yumi save wok long painim rot bilong pinisim dispela dai long wara. Planti lain ol i traim kain kain rot long kisim bel isi. Sampela bai wok long bungim planti mani, sampela i wok long kisim namba, na sampela i wok long mekim pasin pamuk long pinisim dispela dai long wara.
Tasol i no gat wanpela samting o wanpela man o meri i ken pulapim bel bilong yumi na pinisim dispela dai long wara. Ol kago samting, na mani samting i no inap. Man i no inap givim long meri, na meri i no ken helpim man bilong em long pinisim dispela dai long wara. God i kamapim yumi long kisim em. Long God tasol bai yumi kisim wanem samting yumi olgeta i painim.
Jisas i kam long dispela graun long givim yumi dispela wara i gat laip. Ol haiden lain i driman long kisim dispela kain man. Olgeta lain i driman long kisim sampela samting long amamasim ol, long pulapim ol, na long givim bel isi long ol. Ol lain Juda i wetim wanpela man bilong kisim bek ol. Jisas i kam bilong bringim wara bilong laip.
Taim yumi i dringim wanem samting Jisas i givim yumi, i olsem yumi i bilipim em. Olsem tasol yumi i mas daunim yumi yet na dringim dispela wara bilong laip.
Taim yumi mekim olsem bai nek bilong yumi i no drai nau, na yumi i no dai long wara nau, tasol moa yet i olsem yumi i gat laip insait long yumi yet. Bipo, bel bilong yumi i emti — i no gat samting — tasol nau bel bilong yumi i gat pawa. Buk Baibel i tok olsem, “wara i gat laip i kamap long bel bilong en i ran i go.” I min olsem yumi inap long soim dispela wara i gat laip long ol narapela. Ol lain i kisim pinis dispela wara bilong laip inap salim dispela wara i go long ol narapela tu.
Marimari bilong God, o Spirit bilong God, i pulapim bel bilong yumi olgeta. God tasol inap i go dip insait long bel bilong yumi na senisim dispela bel i dai long wara i kamap olsem wel i gat planti wara stret, na dispela wara i kapsait na ran i go. Na God i save usim yumi long givim dispela wara long ol narapela lain i dai long wara tu.
SAMPELA TINGTING
Yu yet yu dai long wara? God i save inapim dispela long laip bilong yu, olsem wanem?
Ritim: Aposel 28:17-24
Em i save autim tok bilong kingdom bilong God, na em i skulim ol manmeri long tok bilong Bikpela Jisas Krais. Em i no pret long autim tok na i no gat wanpela man i tambuim em.
—Aposel 28:31
Long Jerusalem i go long Rom – em i stori long dispela buk Aposel. Em i kirap long Jerusalem, dispela hap we ol i laitim dispela paia bilong gutnius. Na long pinis bilong dispela buk Aposel, dispela paia i wok long kamap bikpela na go long olgeta hap long dispela bikpela taun, Rom.
Namba wan samting i olsem: dispela las tok long dispela buk i soim yumi olsem Pol i stap long Rom tupela yia, na em yet i save givim mani long Papa bilong haus. Tasol yumi ken lainim planti moa samting long ol dispela las tok long dispela buk.
Em i tok klia olsem Pol i bin autim tok bilong kingdom bilong God. Dispela em i bikpela tok save tru. Ol lain Juda i bin wetim dispela kingdom bilong God. Ol lain i daun tru, ol i wetim taim Bikpela i kam long bagarapim ol lain Rom i bosim ol, na sanapim kingdom bilong em yet long dispela graun, olsem stretpela kingdom tru. Ol profet tu i bin autim tok long dispela bikpela hop bilong ol. Na nau Pol i autim tok olsem dispela kingdom i kam pinis long taim Jisas em i kam.
Olsem na dispela teks i tok, “em i save autim tok bilong kingdom bilong God, na em i skulim ol manmeri long tok bilong Bikpela Jisas Krais.” I no olsem dispela kingdom i samting bilong bihain taim tasol. Kingdom bilong God i op pinis, na ol lain i ken i go insait long kingdom taim ol i bilip long Jisas, em i Mesaia, em i Bikpela. Taim yumi i bilip long em, yumi i go insait long kingdom pinis.
Pasin bilong autim tok long dispela kingdom na autim tok long Jisas, em i wankain samting tasol. Taim ol i autim tok long Jisas i olsem ol i stori long kingdom bilong God. Taim ol i tokaut long wok bilong Jisas, kingdom bilong God i op nau.
Namba tu samting i olsem: dispela ol liklik las tok long Buk Aposel i soim yumi olsem tok bilong God i win pinis. Pol, “i no pret long autim tok na i no gat wanpela man i tambuim em.” Tok bilong God i win. Em bai i go na i go moa yet. Em bai winim dispela graun bilong sanapim kingdom bilong God.
Olsem na, tude, namba wan samting long dispela graun i bilong autim tok long wok bilong Bikpela Jisas Krais, na kingdom bilong God.
SAMPELA TINGTING
Beten dispela prea (i kam long Sande 48, Katekisim bilong Heidelberg) :
Long Tok na Spirit bilong Yu, Yu ken bosim mipela, na mipela i ken wok long daunim mipela yet na stap aninit long Yu. Yu ken lukautim sios bilong Yu na mekim i kamap bikpela.Yu ken bagarapim ol wok bilong Satan na olgeta strongpela spirit i save birua long Yu, na olgeta tingting nogut i save birua long Tok bilong Yu. Yu ken mekim olsem inap long taim Kingdom bilong Yu i pulap tru na Yu stap het tru bilong olgeta samting.
Ritim: Aposel 20:28-38
Nau mi putim yupela i stap long han bilong God, na mi laik bai yupela i tingim tok bilong marimari bilong em..... Mi no bin mangal long silva na gol na laplap samting bilong wanpela man. — Aposel 20:32-33
I gat planti ol pastor i bin yusim namba wan hap bilong dispela teks taim ol i lusim sios bilong ol na i go long narapela sios: “Nau mi putim yupela i stap long han bilong God, na mi laik bai yupela i tingim tok marimari bilong em.” Tasol planti ol i no save autim tok long dispela hap teks: “Mi no bin mangal long silva na gol na laplap samting bilong wanpela man. Yupela yet i save, long han bilong mi yet mi bin mekim wok bilong lukautim mi yet, na bilong helpim ol man i stap wantaim mi tu.”
Em i tru olsem sios i mas lukautim pastor bilong ol. Tasol long dispela teks God i laik soim yumi olsem ol lain i autim tok bilong God, na yumi ol Kristen lain tu, yumi i mas mekim ol gutpela pasin. Sapos yumi tokim ol lain olsem God i laikim tru ol, tasol yumi yet i les long laikim tru ol, olsem wanem long dispela tok?
Sampela ol pastor long tude, long TV tu, ol i laik autim ol bikpela tok stret, tasol planti taim pasin bilong ol i nogut, na ol i no laikim tru ol lain bilong God.
Yumi yet i kisim marimari bilong God pinis, na yumi mas serim dispela marimari wantaim ol narapela manmeri. Na em i tru, yumi i no ken singautim ol lain long kam long sios bilong yumi, na tok, “yu kam ya, bikos long dispela sios bai yu lukim ol lain i mekim gutpela pasin tasol.” Yumi no singautim ol lain i kam long sios bikos yumi yet i gutpela tru; nogat, yumi i singautim ol i kam bikos Krais yet i gutpela tru.
Tasol, yumi i mas lukaut. Nogut yumi i kamap olsem ol lain Farisi; Krais i tok olsem ol lain i no ken bihainim pasin bilong ol. Em i tru olsem yumi i man tasol, na yumi i mekim sin na i no stretpela olgeta. Tasol Spirit bilong God i gat pawa na em bai i soim Krais long ol narapela long pasin na wokabaut bilong yumi yet.
Spirit bilong God bai givim marimari tru long yumi, olsem na pasin bilong yumi i mas wanbel long tok bilong yumi.
SAMPELA TINGTING
Yu yet, yu save serim marimari bilong God wantaim ol narapela? Askim God long givim marimari long yumi bilong ol narapela inap long lukim Krais namel long yumi.
Ritim: Aposel 20:17-27
Olsem na mi laik tokaut klia long yupela nau. Sapos wanpela namel long yupela em i lus, dispela em i no asua bilong mi, long wanem, mi no bin surik long autim olgeta tingting bilong God long yupela. —Aposel 20:17- 27
Taim God i tokim wanpela man nogut, “Yu mas i dai,” tasol profet bilong God i no givim tok lukaut long dispela man, bai dispela profet i gat bikpela asua long ai bilong God. “Sapos yu no tokim em, orait bai sin bilong en i stap olsem tasol, na em bai i dai. Tasol long ai bilong mi em i asua bilong yu tasol na em i dai.” Dispela em i tok bilong God long Esekiel 3:18-21.
God em i gat laik olsem ol man nogut i mas tanim bel. Em i no gat laik sapos ol man nogut i dai.
Buk Baibel i soim klia olsem ol man yet i save bihainim pasin nogut na ol i putim ol yet long hel. God i salim pikinini bilong em i kam bilong kisim bek ol man i hetim God. Na God i tokim sios bilong em, lain bilong em, pastor bilong em, olsem em bai i mekim save long ol sapos ol i no tok lukaut long ol lain i lus.
Em i bikpela wok bilong sios bilong God. Sios i mas klia gut olsem God yet bai tok olsem yumi i gat asua sapos yumi no tok lukaut long ol lain i mekim sin. Tru, dispela tok long Esekiel i kam long Olpela Kontrak, tasol yumi tude i no ken lus tingting long dispela. Pol yet, em i no lus tingting long dispela.
“Sapos wanpela namel long yupela em i lus,” em i tok, “dispela em i no asua bilong mi, long wanem, mi no bin surik long autim olgeta tingting bilong God long yupela.” Dispela tok, “olgeta tingting bilong God,” i min olgeta tok God yet i givim long em. Pol em i no senisim tok bilong God, em i no bin daunim sampela tok bilong God o lus tingting long sampela tok bilong God. Em i autim olgeta tok tru long ol. Yumi i no save helpim ol manmeri taim yumi i no autim olgeta tok tru long ol bikos yumi i pret long putim sin bilong ol ples klia.
Sapos i gat sampela lain i gat bikpela sik, olsem kensa, na yu yet i gat marasin bilong oraitim dispela sik, na yu no givim long ol na ol i dai, i olsem yu yet i kilim ol i dai, long wanem, yu yet yu no helpim ol. Maski yu lukautim ol na givim wara long ol na yu sindaun planti wantaim. Yu yet i no bin givim dispela namba wan samting ol i nidim long ol. Yu yet yu pasim rot bilong ol long stap laip.
Em i no isi bilong tok lukaut long sin bilong ol narapela man. Tasol yumi i mas mekim olsem. Ol lain i les long laikim tru bilong God bai bagarap.
SAMPELA TINGTING
Tingting long pasin bilong sios bilong yu bilong tokaut long dispela long ol narapela manmeri. Prea strong tru olsem God i ken helpim yumi i mekim olsem.
Ritim: Aposel 9:36-43
Oltaim em i save mekim ol gutpela pasin na em i save helpim ol manmeri i sot long ol samting. —Aposel 9:36
Olgeta wok insait long sios, maski em i wok long sait bilong spirit o long sait bilong bodi, i wankain long ai bilong God, bikos tupela wantaim i kam long God na i wok long givim glori long God. Olgeta wok insait long sios em i samting bilong spirit, bikos Spirit bilong God i kirapim dispela wok. Wok bilong sios i no samting bilong ol hetman tasol. Olgeta memba bilong sios i stap aninit long marimari bilong God, i gat wok bilong mekim marimari bilong God i ran i go aut.
Ol presen na wok bilong yumi i no wankain. Dorkas em i wanpela meri em i gat presen bilong helpim ol narapela, na em i save mekim bikpela wok long dispela. “Oltaim em i save mekim ol gutpela pasin na em i save helpim ol manmeri i sot long ol samting.” I no olsem wan wan taim tasol em i save helpim ol narapela. Nogat. Em i pulap long gutpela pasin bilong helpim ol narapela.
Dispela meri em i wanpela bikpela blesing long sios bilong em. Planti lain long sios i kisim ol samting em i save samapim. Em i olsem ol ofa bilong em long tok tenkyu long God.
Tude, sios bilong God i save makim Sande olsem bikpela de bilong harim tok bilong God, bilong prea na bung wantaim. Na em i gutpela, tasol bilong wanem yumi i no save makim em olsem de bilong “mekim ol gutpela pasin na helpim ol manmeri i sot” tu? Na dispela wok i no samting bilong Sande tasol, em i samting bilong olgeta de. Tasol nogut yumi lus tingting long mekim dispela wok.
Yumi i ken tok tenkyu long God bikos em i marimari long olgeta manmeri i save daunim ol yet na mekim wok bilong laikim tru na bilong soim marimari long ol narapela. Yumi i ken tok tenkyu long God long dispela marimari yumi inap long lukim long han bilong ol. Na yumi i ken amamas olsem God yet bai kisim ol dispela lain i kam bung wantaim em oltaim oltaim.
SAMPELA TINGTING
I gat sampela lain long sios bilong yu i save mekim ol gutpela pasin na helpim ol manmeri i sot? Tok tenkyu long God long marimari bilong em yumi i lukim long han bilong ol.
Ritim: Aposel 6:1-7
Olsem na ol brata, yupela i mas painim 7-pela man namel long yupela, ol i gat gutpela nem namel long ol manmeri, na Holi Spirit i pulap long ol, na ol i gat gutpela save. Na yumi ken putim ol dispela man bilong lukautim dispela wok. —Aposel 6:3
Bikos ol Kristen i wanbel na i gat wanpela tingting tasol, ol i redi long serim ol samting bilong ol yet. Olgeta memba bilong sios i mas holim wankain bilip na ol i mas bungim maus long singsing. Ol i mas kisim kolekta tu, bikos ol i redi long givim ol samting long ol narapela bikos ol i kamap klin long Spirit bilong God.
Long sios long dispela teks ol i save bungim ol samting bilong ol lain bilong sios, na long wan wan de ol i save tilim dispela long ol lain i nidim. Na ol disaipel i makim 7-pela man long tilim kaikai olsem na i no gat wanpela i sot long en.
Em i no wankain olgeta long sios bilong yumi tude. Tasol tude tu yumi i gat ol lain i sot long sampela samting insait long sios bilong yumi. Olsem na yumi yet i mas bihainim dispela pasin long teks. Long tok bilong God, kingdom bilong heven bai i op. Na long prea, na long pawa bilong God, marimari bilong God bai i kam daun. Na taim yumi givim sampela samting bilong yumi yet long helpim ol narapela, i olsem marimari bilong God i ran long wanpela man na i go long narapela.
Sios bilong God i mas lukaut olsem ol lain bilong ol i pulap long Spirit na save, ol i bisi long larim dispela marimari bilong God i ran i go long narapela narapela. Nogut ol i pasim dispela marimari bilong God.
SAMPELA TINGTING
Sios long hap bilong yu yet i save yusim ol ofa na kolekta bilong lukautim ol lain i sot long sampela samting, o nogat?
Ritim: Aposel 5:1-11
Na Pita i tokim em olsem, ‘Watpo yutupela i pasim tok long traim Spirit bilong Bikpela? Harim. Ol man i planim man bilong yu, ol i wokabaut i kam insait long dua. Na ol bai i karim yu tu i go.’ —Aposel 5:9
Dispela pe nogut long giaman tok em i mas stap olsem wanpela bikpela tok lukaut long yumi ol Kristen lain long tude: sapos yumi stap laip long marimari bilong God, sapos yumi i stap olsem tempel bilong God, yumi i no ken karim i kam sampela doti samting long ai bilong God. Spirit bilong God i was long dispela tempel i bin kamap klin long marimari bilong God.
Long tingting bilong yumi yet, yumi bai tok olsem dispela sin bilong Ananaias na Safaira i no bikpela sin tumas. Ol i givim planti mani pinis (long laik bilong ol yet), tasol ol i giaman olsem ol i bin givim planti moa mani olsem ol i bin givim tru tru. Ol i giaman, na taim ol i mekim olsem, ol i stilim hona bilong God. Dispela man wantaim meri bilong em, tupela i kamapim dispela plen bilong giamanim ol lain, na God yet. Safaira tu, maski em i gat sens long tok tru, em i bihainim dispela tok giaman tu.
Yumi mas laikim tru tok i tru antap long man o meri bilong yumi, na antap long olgeta narapela manmeri. I gat sampela taim bilong tok, “Nogat. Yumi no ken mekim olsem. Yumi i mas bihainim tok i tru.”
Planti lain tumas i save bihainim tingting bilong ol wantok bilong ol, na maski long wari long tok tru. Na ol pikinini i save bihainim dispela kain pasin tu. Tasol God i laik sapos yumi i stap tru moa long tok tru olsem yumi i stap tru long ol famili o poro bilong yumi. Sapos yu laikim tru famili o poro bilong yu, yu bai helpim ol i stap longwe long sin – na long dispela sin bilong giaman tu!
Sampela lain, bikos ol i les long kirapim pait, ol bai “traim Spirit bilong Bikpela” na giaman. No ken mekim olsem! Mobeta sampela pait i kamap long famili bilong yu, olsem yu i pait long Bikpela.
SAMPELA TINGTING
Wanem samting i save kamap taim yu putim ol famili o ol poro bilong yu antap long tok tru?
Ritim: Aposel 4:32-37
Olgeta manmeri i bilip long Jisas, ol i wanbel na ol i gat wanpela tingting tasol. I no gat wanpela man i lukim wanpela samting bilong en na i tok olsem, ‘Dispela samting em i bilong mi stret.’ Nogat. Olgeta samting bilong ol i bilong olgeta wantaim. —Aposel 4:32
God i givim Holi Spirit long yumi taim yumi i bilip long Jisas. Na olgeta gutpela samting bilong Krais – em i lusim sin bilong yumi, yumi i kamap nupela, promis bilong laip i stap oltaim, na laikim tru bilong God yet – olgeta dispela samting bilong marimari i kam long bel bilong yumi taim yumi i kisim Spirit bilong God.
Na dispela marimari i mas go long wanpela man na ran i go long narapela man. Spirit bilong God i save bungim yumi wantaim ol narapela lain bilong Krais, na yumi bai i wanbel, na dispela spirit bai kirapim yumi long serim dispela gutnius wantaim ol lain i no bilong Krais. Spirit yet i wokim dispela long bel bilong yumi.
Ol Kristen long dispela teks, long dispela nupela sios, ol i “wanbel na ol i gat wanpela tingting tasol.” I min olsem ol i kamap nupela tru na ol i wanbel tru.
“I no gat wanpela man i lukim samting bilong en na i tok olsem, ‘Dispela samting em i bilong mi stret.’ Nogat. Olgeta samting bilong ol i bilong olgeta wantaim.” Spirit yet i senisim pasin bilong ol. Bel bilong ol i senis na ol i laik serim olgeta samting bilong ol. I no olsem sampel gavman lain i tok strong long ol i mas mekim olsem. Nogat. Dispela Spirit i stap insait long ol i mekim dispela wok, na ol i kamap nupela long pasin na tingting.
Dispela teks i no min olsem ol lain long tude i no ken holim sampela samting bilong ol yet. I no min olsem olgeta Kristen i mas givim olgeta samting bilong ol yet long ol arapela. Laip bilong yumi i no wankain long tude, na Holi Spirit i save mekim kain kain wok long kain kain ples.
I min olsem Holi Spirit bilong God i mekim wok insait long yumi ol Kristen. Na em i gat pawa. Na taim yumi i kisim Spirit pinis yumi bai kisim nupela tingting tu long sait bilong ol samting bilong yumi long dispela graun. Bai yumi wok long wanbel wantaim ol lain bilong Krais, na dispela bai winim laik bilong yumi bilong kisim ol kago na mani samting bilong dispela graun.
SAMPELA TINGTING
Yu save stap wanbel na i gat wanpela tingting wantaim ol lain bilong Krais?
Ritim: 1 Pita 5:1-5
Na yupela olgeta i mas bihainim pasin bilong daunim yupela yet na i stap aninit long ol arapela manmeri bilong God. Yumi save, “God i save daunim ol man i apim nem bilong ol yet, tasol em i save marimari na mekim gut long ol man i daunim ol yet.” —1 Pita 5:5
Kain olsem wara i save ran i go daun, marimari tu i save ran i go daun. Taim yu daunim yu yet, em bai i kam long yu, tasol sapos yu apim yu yet em i hat tru long kisim.
Planti taim long Buk Baibel yumi save ritim olsem God i tromoi i go ol lain i apim ol yet, na ol lain i bikman na maniman tru, tasol em i save givim kaikai long ol lain i hangre, na em i apim ol lain i daun tru. Yumi mas daunim yumi yet na prea, bilong larim marimari bilong God i kam.
Yumi mas daunim yumi yet long ai bilong God, tasol yumi i mas daunim yumi yet na stap aninit long ol arapela manmeri bilong God tu. “Na yupela olgeta i mas bihainim pasin bilong daunim yupela yet na i stap aninit long ol arapela manmeri bilong God.”
Yumi no ken tingting long daunim yumi yet wan wan taim tasol. Nogat. Yumi i mas daunim yumi yet na stap olsem olgeta taim yumi i stap long dispela graun.
Planti ol man long dispela graun i wok long kalap kalap long narapela – i min olsem ol bai i wok long kisim namba na biknem, maski ol i bagarapim narapela man o meri taim ol i mekim olsem. Tasol ol trupela Kristen i wok long “brukim skru” long ol narapela Kristen. Ol i no mangalim samting bilong ol narapela, ol i no mangalim namba bilong ol narapela; nogat, ol i save amamas wantaim ol narapela tasol.
Na ol Kristen husat i stap hetman bilong sios, ol i no ken tingting long apim ol yet. Ol i stap aninit long Bikpela, na ol i olsem ol wasman aninit long nambawan Wasman, na ol i sipsip bilong em yet. Taim Krais bai i kam bek, ol bai i kisim namba.
Nambawan Wasman yet i kam long dispela graun, na em i dai olsem wanpela wokboi. Em i daunim em yet long bikpela sem bilong yumi yet. Em i mekim wok na daunim em yet olgeta, na orait, bihain long dispela em i kisim bikpela glori. Ol lain bilong God long dispela graun tu i mas mekim wok na bihainim em, inap long taim ol bai i kisim glori tu, taim em i kam bek.
Krais bai i apim ol lain i daun tru, na em bai i givim glori long ol lain i karim diwai kros bilong ol yet. Olsem na, long dispela graun yumi i mas daunim yumi yet, na wokabaut long dispela ples i daun tru, na bai marimari inap long ran i kam daun long yumi.
SAMPELA TINGTING
Yu save wok long “brukim skru” long ol narapela Kristen, o nogat? Olsem wanem?
Ritim: 1 Pita 4:7-11
God i bin marimari long yupela olgeta wan wan na givim ol kain kain presen long yupela. Olsem na yupela wan wan i mas i stap gutpela wokboi bilong God, na yusim ol dispela presen bilong helpim ol arapela manmeri bilong God. —1 Pita 4:10
Long taim bilong Buk Baibel, ol bosboi, o ol wokboi, i stap aninit long masta bilong ol, na dispela masta i askim ol long lukautim gut haus bilong em na olgeta narapela samting bilong em tu. Planti taim ol masta bai makim wanpela bosboi bilong lukautim olgeta samting bilong em bikos em yet i save stap long rot planti taim, na em i no save stap longpela taim long haus. Na sampela taim, taim ol masta i stap long haus tu, ol bai i makim sampela bosboi bilong lukautim ol samting masta bilong ol i nidim. Ol bai i kisim kaikai i kam long haus kaikai bilong masta bilong ol na tilim long ol lain bilong haus bilong masta bilong ol tu. Josep em i gat dispela kain wok long haus bilong Potifar (Gen 39).
Taim Buk Baibel i tok olsem yumi i mas i stap gutpela wokboi bilong God na yusim ol dispela presen bilong helpim ol arapela manmeri bilong God, i min olsem yumi i mas tilim ol presen bilong God long lain long “haus” bilong God. Haus bilong God i olsem sios bilong em. Na ol lain long dispela haus i stap laip long marimari God yet i givim ol. Dispela marimari i lusim sin bilong yumi, em i kisim bek yumi, na em i strongim yumi. Dispela marimari i kam long yumi long Tok bilong God na Spirit bilong em. God i makim ol wokboi bilong em bilong givim ol dispela samting long lain bilong em.
Na em i olsem God i gat bikpela haus bilong putim kain kain presen bilong marimari long en- na em i givim wan wan presen bilong wan wan lain bilong haus bilong em bilong em i mas stap wokboi bilong bosim gut ol dispela presen. I no olsem olgeta lain bilong God i kisim olgeta presen bilong dispela marimari. Nogat, yumi wan wan i mas bosim gut wanem presen God yet i givim yumi, olsem wanpela gutpela wokboi bilong God.
Yumi olgeta i kisim sampela presen bilong God. Tasol bikos yumi i olsem wokboi bilong God, i no olsem ol dispela presen i bilong yumi yet nau. Yumi mas bosim ol dispela presen gut, na God i laik sapos yumi yusim ol dispela presen bilong lukautim na helpim olgeta lain long haus bilong em. Ol dispela presen bilong marimari i mas go aut bilong helpim ol arapela.
SAMPELA TINGTING
Yu bai yusim ol presen God yet i givim yu bilong helpim ol narapela long haus bilong God, olsem wanem?
Ritim: 1 Pita 3:13-17
Sapos yupela i wok strong long bihainim gutpela pasin, orait husat bai i mekim nogut long yupela? — 1 Pita 3:13
Marimari bilong God i save kamapim pasin long stap bel gut na bel isi long laip bilong yumi, tasol em i save mekim yumi i wok strong long bihainim gutpela pasin tu. Marimari bilong God i pasim yumi long apim yumi yet na long tingim strong bilong yumi i inap long yumi. Tasol Spirit bilong God i save strong long kirapim bel bilong yumi long amamas long bihainim ol gutpela pasin na long stap stretpela long ai bilong God.
Ol Kristen lain i mas klia gut long wanem samting i gutpela na wanem samting i no gutpela. Yumi i mas klia olsem dispela pasin bilong bihainim ol gutpela pasin em i bikpela samting tru. God bai i bekim dispela long laip i stap oltaim.
Sapos yu bilip long God, yu no ken pret long bihainim ol gutpela na stretpela pasin tasol. Olgeta samting i gutpela, olgeta samting i stretpela, olgeta samting i trupela, i kam long God tasol. Olsem na pasin bilong wok strong long bihainim ol gutpela na stretpela pasin i kam long God tu. God yet i wokim dispela na dispela samting bai bringim yumi i go long God. Yu pret long wanem samting nau? Yu wokabaut long rot bilong God yet!
Planti lain i no mekim kain ol bikpela pasin nogut we ol polis bai i kam na holim ol. Ol i no save stil, na ol i no save bagarapim narapela man. Tasol, ol i no wok strong long bihainim ol gutpela na stretpela pasin. I olsem ol i no hatpela tru na ol i no kolpela tru (Kamapim Tok Hait 3:16). Ol i wok long mekim wok bilong ol yet, na maski long bisi long ol narapela lain.
Tasol, yumi ol Kristen, i no ken wankain. Yumi i gat wok. God i wok long toktok long yumi. Em i putim han bilong em yet long yumi. Em i putim Spirit bilong em insait long yumi. Taim yumi les long wari sapos ol pasin em i gutpela o nogut, na yumi i no wari tumas sapos sampela samting em i trupela o em i giaman, em i olsem yumi i givim baksait long God.
God i gat laik sapos olgeta lain bilong em i strong long bihainim ol gutpela na stretpela pasin bikos ol i gutpela na stretpela. Na sapos yumi i kisim hevi taim yumi i mekim olsem, i no olsem ol hevi tru. Bikpela hevi bai kam long ol lain i save gat laik long bihainim ol pasin nogut, na long ol lain i les long bihainim strong ol gutpela na stretpela pasin tasol.
SAMPELA TINGTING
Long wok o long skul o long taim yu sindaun wantaim ol poro bilong yu, yu save pret long bihainim ol stretpela na gutpela pasin tasol, o nogat?
Ritim: 1 Pita 3:7-12
Yupela ol maritman, yupela i mas bihainim gutpela tingting na sindaun gut wantaim ol meri bilong yupela...Yupela i mas save olsem, ol meri tu bai i kisim laip bilong i stap oltaim. Sapos yupela i bihainim dispela pasin, orait i no gat wanpela samting bai i pasim ol prea bilong yupela. —1 Pita 3:7
Long stat bilong dispela siapta Pita i stori long ol maritmeri, man bilong ol i no save bihainim tok bilong God. Tasol long dispela hap, em i stori long tupela marit, na tupela wantaim i save bihainim tok bilong God. Man na meri wantaim bai i kisim laip bilong i stap oltaim. Tupela wantaim!
“...Yupela i mas bihainim gutpela tingting na sindaun gut wantaim ol meri bilong yupela.” Pita i laik soim klia olsem ol maritman i mas lukautim gut na laikim tru meri bilong ol. Pita tu i marit.
Na sapos tupela wantaim bai i kisim laip bilong i stap oltaim oltaim, orait tupela i mas beten wantaim tu. Sampela taim ol Kristen man na meri i no save sindaun na beten wantaim. Tarangu! Olgeta maritman na meri i mas sindaun wantaim na beten. Tupela wantaim i stap long dispela rot i go long heven.
Tasol, taim tupela i no sindaun gut, taim tupela i no wanbel, dispela samting bai i pasim ol prea bilong tupela. Pita i no tingting long autim ol narapela hevi i save kamap taim ol maritman i no save sindaun gut wantaim meri bilong ol. Em i autim namba wan hevi stret – em bai pasim marimari bilong God long beten bilong ol.
Yumi mas klia gut long tok bilong Pita. Em i no tok, “Sapos yupela i bungim hevi, orait yutupela i mas sindaun wantaim na prea.” Nogat, em i tok, “No ken kamapim ol hevi long marit laip bilong yupela, bikos sapos yu mekim olsem bai yu no inap long sindaun wantaim na prea.”
Buk Baibel i no tok olsem, prea em i samting bilong stretim ol hevi yumi yet i no inap long stretim. Nogat. Prea em i olsem wanpela dua bilong kisim marimari bilong God i kam long yumi. Na sapos yumi no kisim marimari bilong God pinis, i olsem yumi i no stap laip.
Olsem na ol maritman na maritmeri i mas sindaun gut wantaim olgeta taim, olsem tupela i ken sindaun wantaim na prea.
SAMPELA TINGTING
Dispela tingting bai afektim ol prea bilong yumi olsem wanem? Wanem em i tingting bilong yu long as bilong ol hevi bilong marit?
Ritim: 1 Pita 3:1-6
Yupela i no ken bilasim skin ausait tasol... Mobeta yupela i bilasim insait bilong yupela tu long olkain bilas i no inap long bagarap. Dispela kain bilas em pasin bilong i stap belgut na i stap bel isi. Dispela kain pasin em i gutpela moa yet long ai bilong God. —1 Pita 3:3-4
Pita i tokim ol marit meri, man bilong ol i les long harim tok bilong God, olsem: “No ken toktok planti long ol. Nogat. Soim marimari na belgut long pasin bilong yu.” Man bilong ol i harim pinis ol tok long dispela marimari bilong God, tasol nau ol i mas lukim ol pasin bilong marimari tu.
Marimari bilong God i save mekim wok insait long yumi. Marimari bilong God i save mekim bel bilong yumi i kamap naispela stret. Long marimari bai yumi bilasim insait long yumi. Na taim ol lain i lukim ol gutpela pasin long laip bilong yumi bikos yumi i kisim marimari bilong God pinis, ol yet bai bilip long dispela marimari bilong God tu.
Ol lain bilong tude i laik giamanim yumi long wanem samting bai i mekim yumi i kamap naispela stret. Ol bai tokim yumi long bilasim skin bilong yumi tasol bilong kamap naispela stret. Na yumi mas prea olsem ol pikinini bilong yumi i no bilipim ol dispela tok giaman. Long marimari yumi bai klia olsem em i bikpela samting stret long yumi i bilasim insait long yumi, na maski long bilasim skin ausait long yumi tasol. Long marimari tasol bai yumi kamap naispela stret.
Long soim olsem bel bilong yumi i naispela tru, yumi no ken apim yumi yet. Yumi no ken toktok planti long ol naispela pasin bilong yumi. Tru, yumi i mas toktok long marimari bilong God na tok klia long marimari bilong em. Tasol, planti taim ol narapela bai klia long marimari bilong God taim ol i lukim ol pasin bilong yumi olsem yumi i stap belgut na i stap bel isi. Ol bai lukim dispela kain pasin, na ol bai klia olsem bel bilong yumi i naispela stret.
Tasol, sampela taim, maski bel bilong yumi naispela, na maski yumi i wok long bilasim insait long yumi, ol narapela manmeri bai les long gutnius bilong Krais yet. Tasol Buk Baibel i tok olsem God bai i amamas taim yumi i bilasim bel bilong yumi. Bikpela yet i lukim wok bilong marimari bilong em insait long bel bilong ol lain i bilip, na em i amamas tru. Em bai i tok, “Em i naispela tru!” Na em bai i lukautim ol dispela naispela lain bilong em.
SAMPELA TINGTING
Beten long God na askim em long helpim yu yet long bilasim insait long yu, na maski long bilasim skin ausait tasol.
Ritim: Mak 14:22-25
... na Jisas i kisim wanpela bret, na i tenkyu long God, na i brukim, na i givim long ol disaipel... Na em i kisim wanpela kap wain, na i tenkyu long God, na i givim long ol...
—Mak 14:22-23
Marimari bilong God i kam long yumi long Tok bilong em. Sapos yumi bilip, bai yumi i kisim. Tok bilong God inap bringim marimari i kam long laip bilong yumi bikos pawa bilong Spirit bilong God i save kam wantaim. Spirit bilong God i save kisim dispela tok bilong God yumi i harim long yau bilong yumi i go long bel bilong yumi.
Na moa, God i save strongim bilip bilong yumi long Kaikai bilong Bikpela. Em i helpim yumi long bilipim marimari bilong em long Kaikai bilong Bikpela. Taim yumi i kisim hap bret, Krais i tokim yumi olsem em i givim bodi bilong em long yumi. Em i laik sapos yumi i kaikai dispela pret na bilip olsem em i laikim yumi tumas na em i dai long yumi. Na yumi i dringim wain tu. Na i no olsem yumi i harim Tok bilong God tasol. Nogat, long maus yumi kisim wain, na yumi klia olsem God i lusim sin bilong yumi bikos blut bilong Jisas i kapsait long yumi.
Yumi bilip olsem God i mekim dispela long yumi long wanpela taim tasol. Yumi yet i no ken tingting long baim sin bilong yumi yet, na yumi yet i no inap kisim pe nogut bilong sin bilong yumi. Dispela samting i kamap pinis. I no kamap long Kaikai bilong Bikpela. Nogat, dispela Kaikai bilong Bikpela i strongim bilip bilong yumi olsem Krais i baim sin bilong yumi, na God i lusim sin bilong yumi long wanpela taim, long yumi olgeta, long Golgota. Yumi i ken tingim, yumi i ken bilip, na yumi i ken amamas.
Narapela samting i save kamap long Kaikai bilong Bikpela tu. Yumi kaikai liklik hap bret na yumi dringim liklik hap wain. I olsem yumi bung na kaikai. Yumi save dring na kaikai bilong strongim bodi bilong yumi long mekim wok na stap laip. Tasol long Kaikai bilong Bikpela i olsem Jisas i givim em yet olsem kaikai na dring bilong yumi. Pawa bilong em i kam long yumi long Spirit bilong em. Em i strongim yumi olsem yumi i ken stap laip na mekim olgeta wok em i askim yumi long mekim.
Taim yumi lukim Kaikai bilong Bikpela, yumi tingim wok bilong Krais long Golgota. Na yumi lukluk antap long heven long ples bilong Bikpela, em i save givim yumi olgeta samting yumi nidim. Na yumi i lukim ol narapela sin lain husat Krais i kisim bek, na ol i stap olsem brata na susa bilong yumi. Na yumi tingting long dispela taim bai i kamap bihain: Bikpela i gat laik sapos yumi i bilip olsem yumi i pas wantaim em inap oltaim, na em i wok long redim bikpela na gutpela kaikai tru long yumi long heven.
SAMPELA TINGTING
Kaikai bilong Bikpela i save strongim bilip bilong yu olsem wanem?
Ritim: Matyu 20:1-16
ol man i kamap bihain tru, ol i wok wan aua tasol, na yu givim ol wankain pe olsem pe bilong mipela. Tasol mipela i bin hatwok tru stat long moningtaim tru i kam inap nau, na san i kukim nogut mipela. —Matyu 20:12
Sapos yu wanpela bosman na yu bihainim pasin bilong dispela bosman long dispela teks, ating ol wokboi bilong yu bai krosim yu nogut tru, na yu bai bungim sampela hevi long dispela pasin bilong yu. Dispela bosman em i givim wankain pe long ol wokboi bilong em, maski ol i wok inap long wanpela aua tasol o ol i wok inap long wanpela de.
Tasol long dispela teks, Jisas i no wok long skulim yumi long pasin bilong bosman long dispela graun; em i wok long skulim yumi long sampela samting long kingdom bilong heven (lain 1).
Krais i tokim yumi olsem: planti lain nau ol i stap las, ol bai i stap namba wan long kingdom bilong God. I olsem ol man bilong ol narapela lain i stap las, ol i kisim ples long ol lain Juda i stap namba wan.
Dispela stori bilong Jisas i skulim ol lain i bin mekim wok long kingdom bilong God longpela taim. Planti lain bilong yumi i “bin hatwok tru stat long moningtaim tru i kam inap nau, na san i kukim nogut mipela.” Yumi i bin mekim planti wok. Tru, yumi klia olsem yumi kamap long dispela kingdom long marimari tasol, tasol yumi i klia olsem yumi i mas mekim wok long bihainim tok bilong God. Olsem na yumi i mekim planti wok tru long kingdom bilong God. Ol narapela Kristen i apim yumi. Sampela taim yumi i wok long apim yumi yet tu.
Na wantu, narapela man i kam long dispela kingdom. Em i nupela Kristen na em i kamap nupela. Olsem na em i amamas long mekim wok bilong God. Na yu klia wanem pe em i kisim? Wan kina wan kina. Na yu klia wanem pe yumi, dispela lain i bin mekim planti wok, i kisim? Wan kina wan kina.
Em tru, taim yumi i kisim pinis marimari bilong God, yumi i mas mekim wok na bihainim em, na God bai bekim pe long wok bilong yumi. Tasol long dispela teks Bikpela i laik skulim yumi olsem long kingdom bilong God yumi i stap wankain. Yumi no ken mangalim sampela samting bilong narapela. Yumi no ken apim yumi yet na wok long kisim namba long kingdom bilong God. Yumi olgeta i mas klia tru tru olsem yumi i stap long dispela kingdom long marimari tasol.
Long kamap long kingdom bilong God em i samting bilong marimari tasol, na i no samting bilong wok bilong yumi yet!
SAMPELA TINGTING
Olgeta samting i kam long marimari bilong God. Em i tru long laip bilong yu? Taim yu mekim wok long kingdom bilong God, yu save tingting long gutpela wok bilong yu yet, o yu save tingting long marimari bilong God?
Ritim: Matyu 7:24-29
Orait man i harim dispela tok bilong mi na i bihainim, em i olsem wanpela man i gat gutpela tingting... —Matyu 7:24
Taim Jisas i autim ol dispela tok antap long maunten (Matyu 5-7), em i tokaut long planti samting i no isi long yumi i save gut long en. Long planti yia, sios bilong Krais i no wanbel tumas long as bilong ol dispela tok bilong Jisas. Sampela i tok olsem Jisas i autim ol dispela lo long pretim yumi liklik: Long wanem, taim yumi i klia long asua bilong yumi, yumi bai lukluk long Krais na askim em long marimari bilong em bilong lusim sin bilong yumi.
Sampela narapela lain i tok olsem Jisas i givim ol dispela lo long ol lain i strongpela Kristen tru. Tasol sampela narapela lain i wok long skruim tok bilong Jisas liklik olsem olgeta Kristen inap wok long bihainim ol dispela tok.
Tasol, i luk olsem Jisas i gat narapela tingting. Em i tok olsem i gat tupela kain man i harim dispela tok. Sampela bai harim dispela tok na bihainim, tasol sampela narapela bai harim tok, tasol ol i no bihainim ol dispela tok. Ol man i bihainim dispela tok i olsem man i gat gutpela tingting, tasol ol man i no bihainim dispela tok i longlong.
God i givim marimari long yumi bilong yumi i ken bihainim tok bilong em. Marimari i no min olsem yumi olgeta i stap orait bikos God em i laikim yumi olgeta. Nogat. Marimari i min olsem God i kisim bek yumi. Yumi olgeta i ken i go long em, tasol taim yumi i pas wantaim em, em bai i senisim yumi, na em bai i skulim yumi long bihainim em.
Sampela manmeri bai i tok olsem, “God i laikim yu.” Na taim ol i tok olsem, ol bai i ting olsem ol i ken bihainim laik bilong ol yet bikos God i laikim ol tru. Tasol laikim tru bilong God i no min olsem yumi i ken amamas long stap long sin na bihainim laik bilong yumi yet. Taim yu save long laikim tru bilong God pinis, orait yu bai kamap narakain nau. Laip bilong yu bai senis, na yu bai kamap nupela.
Longlong lain tasol i ting olsem ol i ken harim tok bilong Jisas tasol maski long bihainim. Na ol dispela longlong lain ol i no bilip tru. Olsem na ol i no mekim wok. Tasol ol man i gat gutpela tingting, ol i save pret long God, na ol i bilip long em na bihainim tok bilong em.
SAMPELA TINGTING
Jisas i tokim yumi long harim na bihainim tok bilong em. Yu save mekim olsem long laip bilong yu, o nogat?
Ritim: Matyu 6:16-18
Olsem bai ol man i no ken save yu tambu long kaikai. Papa bilong yu i stap hait, em wanpela tasol i ken save. —Matyu 6:18
Planti lain tude ol i no save tambu long kaikai. Sampela taim sapos ol i gat bikpela hevi ol bai tingting long tambu long kaikai, tasol planti taim nogat.
Long Olpela Kontrak, God yet i makim sampela taim we ol lain bilong em i mas tambu long kaikai. Tasol long Nupela Kontrak yumi no stap moa aninit long ol dispela kain lo. Tasol Jisas yet i tambu long kaikai sampela taim, na sampela ol nupela Kristen long taim sios bilong Nupela Kontrak i nupela yet i save mekim dispela pasin bilong tambu long kaikai. Ol dispela lain i save tambu long kaikai bikos ol i save olsem pasin bilong wanbel wantaim God em i bikpela samting tru.
Pasin bilong tambu long kaikai i samting bilong tambu long sampela samting, bilong givim taim long tingting gut long wokabaut bilong yumi wantaim Bikpela. Tok bilong God i no tok olsem yumi i mas mekim dispela pasin, tasol i orait long yumi i mekim. Tasol sapos yumi apim yumi yet na tokaut long wanem samting yumi i mekim long ol narapela, i olsem dispela samting i samting nating tasol.
I no olsem yumi no ken amamas long olgeta gutpela samting God i givim yumi. Sapos olgeta taim yumi tambu long amamas long ol gutpela samting, i min olsem yumi i no klia long marimari bilong God.
Tasol yumi i mas lukaut long kamap les long mekim wok olsem Kristen. Planti taim yumi save wari long kaikai na dring na klos. Na planti taim yumi i save tingting planti long yumi yet o long ol spot samting bilong yumi o long amamasim skin bilong yumi long kain kain rot. Olsem na yumi mas lukaut. Nogut yumi lus tingting long wokabaut bilong yumi wantaim God. Sampela taim em i gutpela long tambu long kaikai o long tambu long baim nupela klos o long tambu long amamasim skin bilong yumi yet, bilong kamap strong moa yet long bilip, long hop na long laikim tru.
SAMPELA TINGTING
Yu ting wanem long dispela pasin bilong tambu long kaikai (o long sampela narapela samting)? Bai yu tingting long mekim dispela pasin, o nogat? Bilong wanem?
Ritim: Matyu 6:5-15
Tasol taim yu laik mekim prea, yu mas i go insait long rum bilong yu na pasim dua na beten long Papa bilong yu i stap long ples hait. Na Papa bilong yu i save lukim ol samting i stap hait, em bai i bekim pe long yu. —Matyu 6:6
Jisas i tokim yumi long givim ol mani bilong yumi long ol narapela long ples hait, na nau em i skulim yumi long mekim olsem taim yumi i prea. Prea em i samting bilong God wantaim ol lain i beten i stap: “Go insait long rum bilong yu, pasim dua na beten long Papa bilong yu i stap long ples hait. Na em bai i lukim yu.”
Em tru, ol Kristen i save sindaun na prea wantaim ol narapela lain tu, long lotu ol long narapela hap. Buk Baibel i skulim yumi long mekim olsem na em i gutpela long strongim narapela narapela long beten wantaim ol. Tasol ol manmeri i autim prea long yau bilong ol narapela, ol i mas lukaut. Sampela taim ol i wari tumas long ol lain i harim ol long graun, na ol i lus tingting long God long heven i harim ol.
Tasol tu, prea em i samting bilong yu yet, na yu tasol, wantaim God. Long prea, yumi toktok long Papa bilong yumi i stap long ples hait, em i lukim olgeta samting long laip bilong yumi. Sapos yumi i Kristen, bai yumi yet i prea long God long ples hait tu.
Tude, planti samting bilong yumi i no save stap long ples hait. Long TV yumi save harim kain kain stori long kain kain manmeri. Long Facebook tu, yu inap save long planti samting ol arapela i mekim na tingim. Na long sios tu planti manmeri i ting olsem ol i mas save long olgeta samting bilong narapela narapela. Na long haus bilong yumi tu, i luk olsem planti ol narapela i gat laik long save long wanem samting yumi i mekim, na planti taim yumi i wok long kisim save long wanem samting ol narapela i mekim.
Tasol dispela i no gutpela na em bai afektim laip bilong yumi wan wan. Olsem na yumi i mas harim tok bilong Krais. Yumi mas pasim dua na beten long Papa bilong yu i stap long ples hait. Em bai i harim yu!
SAMPELA TINGTING
Yu yet yu save makim taim long wan wan de bilong yu yet, na yu tasol, i sindaun na prea long Papa bilong yu, o nogat? Sapos nogat, orait yu mas wok strong long makim dispela kain taim long wan wan de.
Ritim: Matyu 6:1-4
Olsem na dispela wok marimari yu mekim bai i stap hait. Na Papa bilong yu i save lukim ol samting i stap hait, em bai i bekim pe long yu. —Matyu 6:4
Pasin bilong givim mani long narapela em i bikpela samting ol gutpela manmeri i save mekim. Tasol yumi no ken mekim dispela pasin tasol, yumi i mas bihainim gutpela rot long mekim dispela pasin tu. Bikpela bilong yumi i tokim yumi long helpim ol narapela long ples hait. Pasin bilong givim ol samting long narapela em i samting bilong lotuim Bikpela. Yumi i mas mekim olsem bikos yumi i laikim tru God. Tasol sapos ol lain long graun i lukim dispela gutpela pasin na apim yumi, em i olsem samting bilong graun, bilong apim nem bilong man - i no samting bilong God i ken lukim. Em bai tok, “Yu yet yu mekim dispela gutpela pasin bikos yu i gat laik sapos ol lain i apim nem bilong yu, a? Orait, ol i mekim olsem na em i olsem gutpela pe bilong yu nau.”
Tasol, taim yumi i givim sampela samting na ol narapela i no inap lukim, yumi yet i no ken tingting moa long dispela samting yumi i givim. “Sapos yu helpim ol rabisman, orait han kais bilong yu i no ken save long samting han sut i mekim.” Dispela i min olsem yumi i no ken tingting moa long dispela samting yumi i givim. I min olsem, yumi no ken bihainim dispela pasin bilong givim sampela samting long ol narapela bilong kamap stretpela long ai bilong God. Ol gutpela pasin bilong yumi i no inap baim salvesen bilong yumi. Nogat, em i samting bilong marimari.
Sampela taim yumi bai baim wanpela kakaruk, na yumi no tingting tumas long baim long 30kina samting. Tasol sapos yumi i givim 30 kina long ofa long sios bilong helpim ol narapela, yumi bai ting olsem em i bikpela samting stret. Sapos yumi givim 30 kina long ofa long sios, yumi bai pilim olsem yumi yet i mekim gutpela samting stret. Tasol yumi mas givim mani bilong yumi bikos yumi i laikim tru God, na yumi no ken tingting tumas long dispela samting.
God yet i kirapim dispela marimari bilong givim sampela samting long ol narapela, na em yet i pinis bilong dispela samting tu. Marimari bilong God i kam long yumi, na yumi i kamap olsem paip bilong wara long salim dispela marimari i go long ol narapela taim yumi i givim sampela samting long ol narapela, olsem mani o olsem pasin bilong helpim ol. Na i olsem dispela i go bek long God, olsem ofa i go long em. Taim yumi i givim ol samting long ol narapela lain long laikim tru, em i naispela samting stret.
Taim yumi givim ol mani long ol narapela, i no olsem yumi tromoi dispela mani nating. “Papa bilong yu...em bai i bekim pe long yu.” Olsem na yumi mas bihainim stretpela rot bilong givim ol samting long marimari. Nogut ol narapela i lukim yumi na yumi apim yumi yet long dispela rot. God i no inap bekim pe long yumi taim yumi i mekim olsem. Nogat. Olgeta samting yumi givim long ol arapela i mas i stap olsem ofa i go long God.
SAMPELA TINGTING
Wanem nau long pasin bilong yu long taim yu givim ol mani o ol arapela samting long narapela?
Ritim: 1 Samuel 2:12-17
Hopni na Finias, dispela tupela pikinini man bilong Eli, i man nogut tru. Tupela i pris, tasol tupela i ting olsem, Bikpela i samting nating [Ol i no save tru long God], na tupela i mekim ol kain kain pasin nabaut. —1 Samuel 2:12
Na man i laikim tru ol arapela, em i pikinini bilong God, na em i save tru long God.
—1 Jon 4:7
Dispela tupela pikinini man bilong Eli, i man nogut tru. Planti taim ol manmeri i tok olsem ol man i save mekim ol pasin nogut bikos papa bilong ol i no skulim ol gut. Em i tru, Eli i no skulim pikinini bilong em gut (1 Samuel 3:13), tasol dispela i no as tru bilong pasin nogut bilong tupela. Maski olsem Samuel i skulim ol pikinini man bilong em gut, ol i no wokabaut long rot bilong Bikpela tu (1 Samuel 8:3).
Dispela tupela pikinini man bilong Eli, ol i no save tru long God. Ol i ting olsem Bikpela i samting nating. Taim yumi no save tru long God, i olsem yumi ting olsem em i samting nating. Dispela tupela man i save stilim ol ofa long God na ol i mekim pasin nogut tru long haus bilong God — tupela i no save tru long Bikpela.
Dispela tupela man i bin kisim skul long Bikpela. Tupela i pikinini bilong wanpela hetpris! Sapos tupela i stap laip tude, i olsem ol i go long lotu olgeta Sande, na ol i go long Sande skul, na ol Baibel klas tu. Tasol, ol i no save tru long Bikpela.
Long dispela yumi luksave olsem yumi no inap skulim ol narapela long save tru long Bikpela, bikos dispela “save tru long Bikpela” em i samting long wan wan man na meri yet. Sapos yumi yet i no wanbel wantaim God, yumi i no inap save long em.
Yes, em i tru, long save long Bikpela yumi i mas save long Tok bilong em. Sapos yumi i no save long Tok bilong em, yumi i no inap save tru long em. Tasol em i tru tu, olsem yu inap save pinis long olgeta hap tok bilong Buk Baibel tasol yu yet yu no save tru long Bikpela.
“Na man i laikim tru ol arapela ....em i save tru long God.” Dispela i no min olsem olgeta man i mekim sampela pasin bilong laikim tru, em i save tru long God. Nogat. I min olsem laikim tru bilong God i save stap insait long ol Kristen, na ol bai i laikim tru ol narapela. Yumi save tru long God taim yumi kisim pinis laikim tru bilong em. Na taim yumi i kisim pinis laikim tru bilong em, bai yumi yet i laikim tru ol arapela.
Taim yumi i soim dispela kain laikim tru bilong ol Kristen long laip bilong yumi yet, orait yumi i save tru long God.
SAMPELA TINGTING
Ol narapela inap save tru olsem yu yet yu save tru long Bikpela?
Ritim: Matyu 5:43-48
Tasol mi tokim yupela olsem, yupela i mas laikim ol birua bilong yupela, na yupela i mas beten bai God i marimari long ol man i save mekim pasin nogut long yupela. Olsem bai yupela i stap pikinini bilong Papa bilong yupela em i stap long heven. —Matyu 5:44-45
Taim yumi i laikim tru ol narapela i soim olsem Krais i stap insait long yumi.
Tasol, dispela kain laikim tru Buk Baibel i tok olsem “em i save bihainim tru lo” (Rom 13:10) i wanpela narakain laikim tru, na ol pikinini bilong God i save bihainim dispela laikim tru.
Matyu 5:43-48 i skulim yumi long dispela kain laikim tru. Dispela kain laikim tru i save mekim wankain pasin long olgeta manmeri.
Yumi olgeta i save laikim mama bilong yumi, bikos em i mama bilong yumi. Na yumi i save laikim ol pren bilong yumi bikos ol i pren bilong yumi. Ol dispela laikim tru i kam long God, bikos God em i as bilong ol gutpela pasin. Tasol ol Kristen, na ol lain i no Kristen wankain, ol i save laikim tru ol pren bilong ol na mama bilong ol.
Laikim tru bilong ol Kristen, i narakain samting stret. Em i go insait long yumi na bihain em i go long ol narapela tu. Em i go long ol narapela, maski ol i husat, bikos yumi i stap Kristen. Yumi i no laikim tru ol narapela bikos ol i naispela manmeri, ol i gat namba, ol i gat planti mani, o ol i wantok bilong yumi. Nogat, yumi laikim ol tru bikos yumi yet i stap pikinini bilong Papa long heven. Olsem na yumi ken laikim tru ol birua bilong yumi tu.
God em i bihainim dispela kain pasin bilong laikim tru. I gat planti lain long dispela graun i wok long bagarapim em tru. Tasol God i no mekim ol i paia long tude. Nogat, em i givim kaikai long ol, na em i larim san bilong em i lait long ol. Em i no mekim olsem bikos ol dispela manmeri i gutpela. Nogat, em i mekim olsem bikos em yet i gutpela.
Taim yumi i stap pikinini bilong dispela Papa, orait laikim tru bilong em bai kam insait long yumi na go aut long ol narapela lain. Dispela graun i no inap kamapim dispela kain laikim tru. Nogat, dispela kain laikim tru i kam long heven tasol. Taim olgeta manmeri i lukim ol Kristen, ol i lukim liklik hap piksa long namba bilong dispela Papa bilong laikim tru i stap long heven.
Em i naispela samting stret long kisim marimari bilong God. Tasol em i naispela samting moa yet bilong kamap olsem paip bilong wara long salim dispela marimari i go aut long ol narapela. Em i tingting bilong God: Marimari bilong em i mas go aut, na olgeta lain i mas lukim laikim tru bilong em.
SAMPELA TINGTING
Em i hat tru long laikim tru sampela manmeri i stap klostu long yu, o nogat? Askim God long helpim laikim tru bilong em i kam long yu na i go aut long ol narapela.
Ritim: Galesia 2:15-21
hangamap pinis long diwai kros wantaim Krais na mi dai wantaim em na mi kisim nupela laip. Tasol dispela laip em i no laip bilong mi yet. Nogat. Krais em i stap laip insait long mi.
—Galesia 2:19,20
I tru olsem Krais i kisim bek planti lain long sios bilong yu, tasol tu, yu mas tingting long dispela: salvesen em i samting bilong yu yet tu.
Yumi no inap kisim salvesen taim yumi i gat sampela liklik save long sin na marimari tasol. Yumi yet i mas klia gut long sin na salvesen bilong yumi yet. Yumi mas klia long sin bilong yumi yet na yumi mas save long salvesen bilong yumi yet.
Planti taim Pol i save tok long yumi na mipela taim em i toktok long salvesen. Tasol long dispela teks em i tok long mi na mi yet.
“Mi dai wantaim em,” Pol i tok. Pol em i stori long diwai kros bikos diwai kros em i rot bilong kisim salvesen. “Mi hangamap pinis long diwai kros wantaim Krais.” Long diwai kros olpela pawa i bruk pinis, na Pol i kamap fri long lotuim God.
Em i nupela laip – “Mi kisim nupela laip... Krais em i stap laip insait long mi.” Dispela em i nupela laip taim yumi i kisim salvesen pinis. Krais i stap insait long yumi nau. Dispela i no min olsem yumi yet i go pinis. Nogat. I min olsem laip bilong yumi i senis, na yumi i stap aninit long God, na yumi i bihainim em nau. Krais i stap insait long Pol – “Mi bilip long PIkinini Bilong God em i bin laikim mi tru na em i lusim laip bilong em yet bilong helpim mi.”
Olgeta man na meri i klia long dispela laikim tru bilong Krais, ol bai i tok, “Em i laikim tru mi!” Em tru, em i laikim yu tu, tasol mi laik tok, “Em i laikim mi!” Em i lusim laip bilong em bilong helpim ol sinman; yes, long helpim planti tausen ol sinman, tasol mi yet mi laik tok, “Em i lusim laip bilong em yet bilong helpim mi!”
Krais i bosim laip bilong mi. Em i bosim bel bilong mi. Taim man i laik helpim yu taim yu no save long rot bilong kamap long wanpela ples, em bai stiaim yu na soim rot long yu, tasol bihain em bai lusim yu bilong yu i ken bihainim dispela rot em i soim pinis long yu. Tasol em i no wankain long pasin bilong Krais. Em i kisim bek yumi, na em i mekim yumi i kamap nupela. Em i no lusim yumi. Nogat, em i stap insait long yumi, olsem yumi i ken i go long ol salim dispela marimari i go long ol narapela. Marimari bilong God bai i go moa yet long yumi, long wanem, Krais i stap insait long yumi.
SAMPELA TINGTING
Tingting long dispela: Krais em i laikim yu, em i dai long yu, na em i stap insait long yu. Tok tenkyu long God!
Ritim: Luk 7:36-50
Tasol taim mi lukim ol i no bihainim stret tok tru bilong gutnius... —Galesia 2:14
Tok tru bilong Buk Baibel i tok olsem, yumi olgeta i stap lain bilong mekim sin, na yumi i nidim Krais i kam bilong kisim bek yumi long marimari bilong em. Sapos nogat, yumi bai lus. Taim yumi tingting o yumi toktok olsem yumi i winim ol narapela, i min olsem yumi no klia long dispela tok tru long Buk Baibel.
Aposel Pita i sindaun na kaikai wantaim ol pren bilong em bilong Jerusalem. Ol i amamas long sindaun long tebol bilong ol yet na kaikaim kaikai bilong ol yet. Ol lain Juda i no save amamas tumas long sindaun na kaikai wantaim ol man bilong ol narapela lain. Na tu ol i no amamas tumas long kaikai ol kaikai bilong dispela ol arapela lain tu. Olsem na ol dispela lain Juda i sindaun wantaim ol lain bilong ol yet – ol i no laik mekim sampela samting bai i givim bel hevi long ol.
Tasol Pol i tok strong long Pita bikos em i mekim kranki pasin. Sapos yu bilipim dispela gutnius bilong marimari, yu no inap wok long kamap stretpela long ai bilong God long pasin bilong yu, long kaikai bilong yu, o long bihainim ol lo bilong Olpela Kontrak. Dispela gutnius i tok olsem olgeta lain manmeri i stap wankain long ai bilong God, olsem na yu no ken ting olsem yu winim ol narapela lain long ai bilong God.
Wantu dispela gutnius i putim ples klia olsem yumi olgeta i wankain; yumi olgeta i pulap long sin. Na salvesen i samting bilong marimari tasol. I no gat narapela rot.
Taim yumi stap wantaim ol narapela lain i bilip long God, yumi mas redi long kisim ol na wanbel wantaim ol, maski ol i no wankain olsem yumi long pasin na long tingting. Tasol sapos sampela man o meri i mekim pasin o tok i no wanbel long tok bilong God, long dispela taim yumi mas tokaut long dispela. Dispela ol samting i soim olsem yumi i klia olsem yumi i kisim salvesen long marimari tasol.
Yumi i no inap apim yumi yet. Pasin bilong apim yumi yet i lus pinis. Yumi olgeta i stap aninit long gutnius bilong marimari. Taim yu i wok long ting olsem sampela lain i winim narapela lain, yumi i no bihainim stret tok tru bilong gutnius.
SAMPELA TINGTING
Sampela taim yu save ting olsem wanpela lain i winim narapela lain insait long sios bilong yu yet, o nogat? Olsem wanem?
Ritim: Luk 7:36-50
Olsem na mi tokim yu, yumi lukim dispela meri i laikim mi tru na yumi save, God i lusim pinis ol planti sin bilong en. Tasol man i mekim liklik sin tasol na God i lusim sin bilong en, orait laik bilong en bai i liklik tasol. —Luk 7:47
Taim Jisas i kaikai long haus bilong Saimon, wanpela Farisi, wanpela meri bilong mekim ol kain kain pasin nogut i kam. Em i wokabaut long dispela tebol we ol i sindaun na kaikai, na em i go long Jisas. Na em i krai i stap, na wara bilong ai bilong en i kapsait long lek bilong Jisas. Na dispela meri i mekim drai long gras bilong het bilong em yet, na em i kisim botol ston em i holim, em i gat sanda, na em i welim lek bilong Jisas.
Saimon, em i no krai long Jisas. I gat tupela kain tingting long Jisas insait long dispela rum. Wanpela i krai long Jisas bikos em i amamas long em na tenkyu long em, tasol narapela i no tingting tumas long Jisas, em i no lotuim em. Long dispela graun yumi save lukim dispela tupela tingting i stap.
Jisas i givim wanpela tok piksa long skulim Saimon: “Tupela man i gat dinau long wanpela man. Narapela i gat dinau long 100 kina, na narapela i gat dinau long 10 kina tasol. Tupela i no inap bekim dinau bilong tupela, olsem na dispela man i lusim dinau bilong tupela. Orait yu ting husat bilong tupela bai i laikim em moa?” Na Saimon em i klia olsem dispela man em i lusim bikpela dinau bilong en, em bai i laikim em moa. Na Jisas i tok, “Olsem na mi tokim yu, yumi lukim dispela meri i laikim mi tru na yumi save, God i lusim pinis ol planti sin bilong en. Tasol man i mekim liklik sin tasol na God i lusim sin bilong en, orait laik bilong en bai i liklik tasol.”
Yumi i mas klia. I no olsem Krais i lusim sin bilong em, bikos em i laikim em tru. Nogat. Dispela meri i laikim em tru bikos Krais i lusim sin bilong em. Krais i tokim dispela meri, “Mi lusim pinis ol sin bilong yu.” Em i no tok olsem, “Laikim tru bilong yu i kisim bek yu.” Nogat. Em i soim dispela bikpela laikim tru bilong Jisas bikos Krais i lusim sin bilong em pinis.
Sampela taim planti lain i no tingting tumas long Jisas, na ol i no tenkyu tru long em. Tasol, sapos yumi i klia olsem em i lusim planti sin tru bilong yumi, yumi bai redi long ofaim laip bilong yumi long em long tok tenkyu tru long em!
SAMPELA TINGTING
Yu save soim olsem yu yet yu laikim tru Jisas olsem wanem?
Ritim: Matyu 18:23-35
Mi bin sori long yu. Olsem na watpo yu no sori tu long wanwok bilong yu? —Matyu 18:33 Jisas em i givim yumi wanpela liklik stori long skulim yumi olsem, taim yumi i kisim marimari pinis,
orait yumi i mas givim dispela marimari long ol narapela.
Wanpela man i kisim bikpela dinau stret. Tasol wanpela de king bilong em i tokim ol wokboi i kam stretim dinau wantaim em. Dispela man i gat dinau inap 10 milion kina. Na em i no inap bekim dispela dinau, olsem na em i brukim skru klostu long lek bilong king na askim em long sori long em. Na bikman bilong em i sori long en na i lusim dinau bilong en.
Na dispela man em i amamas tru, na em i go. Na taim em i go em i lukim wanpela wanwok bilong en, husat i gat dinau long em inap 10 kina tasol. Na em i holimpas dispela wanwok na tokim em long bekim olgeta dispela dinau em i kisim long em. Na taim em i no inap long bekim, orait em i putim em long kalabus inap em i bekim dinau.
Na bikman bilong em, em i belhat nogut tru: “Mi bin sori long yu. Olsem na watpo yu no sori tu long wanwok bilong yu?” Na em i putim em long han bilong ol man bilong givim pen long em, inap em i bekim olgeta dinau bilong en.
Sapos yumi i les long lusim rong bilong ol narapela, orait i olsem God i no lusim sin bilong yumi yet. “Harim. Sapos yupela i lusim rong bilong ol arapela manmeri, orait Papa bilong yupela long heven em bai i lusim rong bilong yupela tu. Tasol sapos yupela i no lusim rong bilong ol arapela manmeri, orait Papa bilong yupela em tu bai i no lusim ol rong bilong yupela” (Matyu 6:14-15).
Yumi i no inap kisim na holim marimari bilong God sapos yumi i les long givim long ol narapela. Laikim tru em i giaman samting olgeta sapos yumi i no lukim pasin bilong laikim tru long laip bilong yumi yet.
Dispela bikman i putim dispela man i les long lusim dinau bilong narapela long han bilong ol lain bilong givim pen long em, na Jisas i tok olsem God bai i mekim wankain pasin long yumi sapos yumi i no lusim tru olgeta rong ol brata i mekim long yumi. Em i strongpela tok tru. Tasol yumi no ken lus tingting olsem Jisas i mekim ol dispela tok long ol lain i les long lusim rong bilong ol narapela tasol.
Tok bilong Krais i no ken pretim ol lain i stap aninit long marimari bilong Papa bilong ol. Em i lusim sin bilong yumi. Yumi i no gat asua nau, yumi i no gat dinau tu, na yumi i stap fri long dai.
SAMPELA TINGTING
I gat sampela taim long laip bilong yu we yu i bin lusim rong bilong wanpela brata bilong yu?
Ritim: Galesia 5:1-6
Sapos man i stap long Krais Jisas, orait pasin bilong katim skin em i samting nating, na pasin bilong man i no katim skin, em tu i samting nating. Tasol pasin bilong man i bilip na dispela i kirapim em long laikim tru ol arapela, dispela em i samting tru. —Galesia 5:6
Ol lain bilong Galesia i toktok planti, na ol i no wanbel, long dispela askim: “Mipela i mas mekim wanem long putim ples klia olsem mipela i stap lain tru tru bilong God?”
Sampela lain i ting olsem sapos wanpela man i laik stap wanpela bilong lain bilong God, orait em i mas bihainim ol lo bilong Moses yet na em i mas bihainim pasin bilong katim skin.
Long tude tu, i gat sampela lain i save wari long dispela askim bilong ol lain Galesia tu. Tru, i no gat planti manmeri i tok olsem ol trupela Kristen i mas bihainim olgeta lo bilong Moses. Tasol planti ol bai tok olsem ol trupela Kristen i mas bihainim ol “lo” na toktok bilong ol profet, lida na ol tisa bilong tude.
Yumi i mas lukaut, nogut yumi o pikinini bilong yumi i paul na bihainim ol narapela tok antap long tok bilong God long Buk Baibel. Planti ol lida na tisa bilong tude i wok long bungim ol tok antap long tok bilong God. Olsem na yumi i mas klia gut na tokaut klia long as bilong ol Tok bilong Buk Baibel, na trupela mining long tok bilong God tu. Taim yumi i stap long Krais Jisas, pasin bilong katim skin em i samting nating, na pasin bilong man i no katim skin, em tu i samting nating. Trupela bilip i save kirapim man long laikim tru ol arapela, dispela em i samting tru tasol.
Yumi olgeta i gat sampela tingting na tok bilong ol tumbuna yumi i save bihainim. Na ol lain bilong tude i wok long kamapim sampela nupela pasin long yumi i baihainim. Tasol yumi i mas tingim olsem i gat wanpela samting tasol em i bikpela samting, na em i tru, na em i bilip long Krais Jisas, na dispela i kirapim yumi long bihainim pasin bilong laikim tru.
Bilip em i olsem fanol, na yumi i kisim marimari bilong God long Krais long dispela fanol. Bilip em i olsem han bilong yumi i op na bel bilong yumi i daun na i redi. Taim yumi i kisim marimari pinis, em i save ran i go insait long yumi na yumi i bihainim ol pasin bilong laikim tru. Na long laikim tru, bai yumi i bihainim laik na tingting bilong God. Bilip i olsem fanol, na laikim tru em i wanem samting yumi i kisim na bihain yumi i givim long ol narapela.
Olsem na yumi i mas mekim wanem long putim ples klia olsem yumi i stap lain tru tru bilong God? Yumi i mas bilip long marimari bilong God na bihainim pasin bilong Spirit bilong God, long laikim tru ol narapela!
SAMPELA TINGTING
Beten long God i ken helpim yu long bilip long em na bihainim ol pasin bilong laikim tru.
Ritim: Efesus 2:4-10
Long Krais Jisas God i mekim yumi i kamap ol nupela manmeri, bilong yumi ken wokabaut long rot bilong gutpela pasin bipo yet God i redim pinis bilong yumi ken wokabaut long en.
—Efesus 2:10 Namba wan plen bilong God i no bilong kisim bek yumi long dai na hel. Nogat. God i givim Jisas long
yumi bikos em i gat laik sapos yumi i kisim nupela laip na kamap nupela na mekim ol gutpela pasin.
Taim wanpela man o meri laik wokim nupela gaden, em i no klinim na redim gaden bilong rausim gras nogut tasol. Nogat, em i mekim olsem bikos em i laik planim ol nupela na naispela kaikai.
Olsem na, taim yumi stori long marimari bilong God bilong kisim bek yumi, yumi no ken stori long wok bilong God long rausim ol pen na hevi tasol. Nogat, yumi i mas stori long ol nupela samting i kam pinis tu. God i no kisim bek yumi long paia tasol. Nogat, em i laik senisim yumi olsem yumi ken i stap olsem piksa bilong Krais.
Yumi mas klia olsem God i kisim bek yumi, tasol yumi i mas klia tu olsem wanem God i kisim bek yumi na bilong wanem em i kisim bek yumi.
Laikim tru bilong God i rausim olgeta pipia nating i stap nabout. Dispela i kamap long Golgota. Tasol yumi i lukim pawa bilong marimari bilong God taim em i wokim nupela samting long Krais. Taim Krais i kirap bek long matmat, em i kirapim olgeta nupela na gutpela samting.
Marimari i kisim bek ol man nogut, na senisim ol i kamap nupela manmeri i save mekim ol gutpela pasin. Na dispela em i plen bilong God long marimari bilong em yet. Em i hatwok tru long rausim ol gras nogut long gaden, tasol em i mekim olsem bikos em i gat laik long ol gutpela kaikai i mas kamap.
“Long Krais Jisas, God i mekim yumi i kamap ol nupela manmeri, bilong yumi ken wokabaut long rot bilong gutpela pasin bipo yet God i redim pinis bilong yumi ken wokabaut long en.” God em i wokman, na em i wokim yumi! Na taim em i tingting long wokim yumi, em i klia gut tru bilong wanem em i wokim yumi na mekim yumi i kamap ol nupela manmeri. Em i mekim olsem bilong yumi i ken wokabaut long rot bilong gutpela pasin!
SAMPELA TINGTING
God i wok long senisim yu i kamap nupela? God i save helpim yu i wok long bihainim ol gutpela pasin, nau?
Ritim: Efesus 2:1-7
Yes, long marimari bilong God tasol em i kisim bek yupela. —Efesus 2:5 Yumi i mas klia olsem God i kisim bek yumi, na tu yumi mas klia em i kisim bek yumi olsem wanem.
Taim wanpela i askim yumi, “God i kisim bek yu olsem wanem?” nogut yumi tok, “Mi bungim dispela man o meri na em i skulim mi long tok bilong God,” o, “Mi harim dispela naispela autim tok na mi tanim bel.” Na em i orait long tingim ol dispela gutpela samting i bin kamap long laip bilong yumi, tasol yumi mas klia tru olsem wanem God i kisim bek yumi.
Taim wanpela i askim yumi, “God i kisim bek yu olsem wanem?” mobeta yumi olgeta i tok, “Long marimari tasol.” Em i bikpela bekim na nambawan bekim stret. Em i gutpela long tokaut long dispela long ol autim tok, long ol buk na long ol singsing.
“Long marimari” i min olsem yumi no kisim bek yumi yet. Nogat. God yet i kisim bek yumi long Jisas Krais. Mi yet mi bin dai wantaim Krais, na mi kirap bek tu wantaim em. Em i hau God i kisim bek mi, em i hau God i kisim bek yu. Sapos nogat, orait em i no kisim bek yu.
“Marimari” em i laikim tru bilong God i kam nating long yumi. I no olsem yumi yet i mekim ol gutpela samting, olsem na God i tingting long kisim bek yumi. Nogat tru. Yumi no gat wanpela gutpela samting long givim God bilong em i ken tingting long kisim bek yumi. Pe bilong olgeta sin bilong yumi em i dai tasol.
“Long marimari” i min olsem God i kisim bek yumi nating – yumi no inap baim dispela salvesen. Em i fri! Rot bilong God bilong kisim bek yumi i narakain olgeta, na em i daunim ol lain i tingting long mekim wok long kisim bek ol yet. Long marimari tasol God i kisim bek yumi, long bilip long Krais – sapos nogat, yumi i lus pinis.
Taim yumi i stori long marimari bilong God, olgeta taim yumi save toktok long wok bilong Jisas. Bilong wanem? Bikos laikim tru bilong God i kamap ples klia long wok bilong Jisas Krais bilong kisim bek yumi.
Yumi kisim salvesen pinis bikos Krais i kisim ples bilong yumi long dai na long taim em i kirap bek long matmat. Marimari i rausim sin bilong yumi long Gut Fraide, na marimari bilong God i mekim yumi i stap laip wantaim Krais long taim Krais i kirap long Sande.
SAMPELA TINGTING
Dispela tok, “long marimari God i kisim bek yumi,” i gat wanem mining long laip bilong yu yet?
Ritim: 1 Korin 15:20-28
Long dispela taim bai olgeta samting i pinis. Na bai Krais i pinisim olgeta gavman na olgeta strongpela spirit na olgeta samting i gat strong, na bai em i putim kingdom long han bilong God Papa. Long wanem, Krais i mas i stap king i go inap em i daunim olgeta birua bilong en.
— 1 Korin 15:24-25
Long dispela mun yumi i bin ritim na tingting gut long wok bilong Jisas long heven. Tude yumi bai stori liklik long wok bilong Jisas long heven, olsem em i wok long kamap long pinis long em. Taim dispela taim i kam pinis, em i olsem wok bilong Jisas em bai i pinis tu.
Wok bilong Krais i wok long kisim kingdom bilong God i kam. Long dispela as em i kam long graun, na long dispela as em i wok yet long heven tu. Taim kingdom bilong God i sanap pinis, God Papa bai kisim olgeta glori na ona. Em bai i stap het tru bilong olgeta samting. Na long dispela taim Krais bai pinisim wok bilong em, olsem wanpela het bilong ami i pinisim wok bilong em taim pait i pinis.
Taim Jisas i givim kingdom long Papa bilong em, em i min olsem em bai i bagarapim pinis olgeta narapela kingdom, na olgeta pawa i no bihainim laik na tingting bilong God. Lain 26 i stori long wanpela birua Krais bai i pinisim, em i Dai. Krais bai pinisim pinis dispela las birua bilong em.
Yumi no klia tumas olsem wanem ol dispela pawa long dispela graun i kamap long ol han nogut. Tasol yumi i save olsem olgeta samting nogut bai i go pinis. Jisas i wok long rausim ol samting nogut long taim em i mekim wok long graun, na em i mekim olsem yet long taim em i mekim wok long heven. Krais i wok long sanapim pawa bilong God gen long dispela graun na heven. Na pinis bilong dispela bai i kamap, na Krais bai i tokim Papa bilong em olsem, “Olgeta samting i bilong yu nau. Olgeta samting i stap aninit long yu.”
Na long dispela taim bel isi na malolo bai i stap tasol, na em bai i no gat pinis bilong em. Yumi bai amamas long gutpela pasin bilong God na bai yumi i no inap lukim sin, pen na pait moa. Long dispela taim yumi bai i stap fri olgeta, na yumi bai i gat bel isi na malolo.
Krais i bosim ami inap long taim dispela pait bai i pinis. Olsem na yumi mas i wok long bihainim em na mekim wok bilong em tasol. I no long taim na dispela pait bai i pinis.
SAMPELA TINGTING
Givim pres long God bikos yu wetim dispela taim bai yu i stap fri olgeta, na yu bai bel isi tru.
Ritim: Kamapim Tok Hait 1:9-18
Mi lukim em na mi pundaun klostu long lek bilong en, na mi stap olsem man i dai pinis. Tasol em i putim han sut bilong en long mi, na em i tok olsem, “Yu no ken pret. Mi man i stap namba wan tru na i stap bihain tru. Na mi man bilong i stap laip. Bipo mi dai pinis, tasol lukim, nau mi stap laip oltaim oltaim. Na mi holim ol ki bilong Dai na bilong Ples bilong ol man i dai pinis. —Kamapim Tok Hait 1:17-18
Yumi olgeta bai i dai, sapos Krais i no kam bek pastaim. Maski yumi i les long harim dispela, em i tru.
Dai i save stap wantaim yumi, tasol yumi i save les long em. Dai em i olsem birua bilong yumi (1 Korin 15:26). Tasol yumi i ken stori moa long dai.
Dai em i olsem wanpela blakpela laplap i hangamap namel long wanpela rum, no i no gat man inap long lukluk long narapela hap bilong rum, long wanem blakpela laplap i pasim ai bilong em. Taim yumi kamap lapun, orait yumi i gat planti lain i hait i stap long hapsait bilong dispela laplap, na yumi i no inap lukim ol, na ol i no inap kam bek long yumi.
I gat wanpela man i bin i go hapsait long dispela laplap, na em i kam bek. Em i Jisas. Na em i save kam bungim yumi long laip bilong yumi taim yumi i stap long dispela laip. Na em i bin putim han bilong em long het bilong Jon na tokim em, “Yu no ken pret. Mi man i stap namba wan tru na i stap bihain tru. Na mi man bilong i stap laip. Bipo mi dai pinis, tasol lukim, nau mi stap laip oltaim oltaim. Na mi holim ol ki bilong Dai na bilong ples bilong ol man i dai pinis.”
Jisas inap tok olsem bikos em yet i winim dai. Dai i no inap kisim em gen, tasol em yet i bosim dai. Dispela em i as bilong dispela tok, “Na mi holim ol ki bilong Dai.” Em i bosim ol samting long hapsait bilong dispela blakpela laplap, long hap bilong dai tu.
Olgeta man nogut, na ol lain bilong God wankain, i go hapsait long blakpela laplap taim ol i dai. Tasol ol lain i bin harim tok bilong God na i kisim pinis Spirit bilong Jisas Krais, ol i no ken pret long taim ol bai i go. Taim ol i dai, ol bai harim nek bilong Jisas i tok, “No ken pret. Mi yet i holim ol ki bilong Dai.”
SAMPELA TINGTING
Yu yet i gat wanem tingting long dai? Yu save pret long dai, o nogat? Wanem samting i save givim bel isi long yu?
Ritim: 2 Korin 10:1-6
Olgeta samting bilong pait mipela i holim, ol i no samting bilong dispela graun. Nogat. Ol i gat strong bilong God, na ol inap brukim ol strongpela banis bilong ol birua. Mipela i save daunim olgeta kain tingting na giaman tok i save pasim rot bilong ol man i laik kisim save long God. Na mipela i save kalabusim olgeta tingting bilong ol man, bilong mekim tingting bilong ol i bihainim laik bilong Krais. —2 Korin 10:4-5
Dispela teks i tokaut long pawa bilong pasin bilong autim tok bilong God. Namba wan samting bilong Gutnius i long tokim olgeta lain long tanim bel, na long tokaut long salvesen long Krais. Dispela tok i gat pawa bilong bringim salvesen i kam bikos em i Tok bilong God.
Tasol gutnius i samting moa. Em i gat pawa long bagarapim save bilong man na bilong daunim ol man i wok long apim ol yet. Tok bilong God bai soim klia ol longlong tingting bilong man, na kalabusim olgeta dispela tingting na kisim ol dispela tingting i kam bihainim laik bilong Krais.
Planti taim ol Kristen i no tingting tumas long pawa bilong Gutnius. Ol i ting olsem Gutnius i samting bilong mekim man na God i wanbel gen tasol, na long givim bel isi long man. Na dispela em i tru – Gutnius bilong God i save mekim olsem. Tasol i no samting bilong dispela tasol. Olgeta tingting na save bilong yumi i mas aninit long dispela Gutnius. Tok bilong God i gat wok long skulim ol saveman na ol yunivesiti tu. Em bai bosim tingting bilong yumi long ol samting bilong mani tu. Olgeta samting, olgeta tingting bilong yumi na olgeta lain long dispela graun, i mas stap aninit long Gutnius bilong God. Bilip bilong yumi long Jisas Krais bai senisim tingting bilong yumi, em bai senisim wok bilong yumi olsem papa o mama, na wok mani bilong yumi.
Planti taim, taim yumi tingting long olgeta samting long dispela graun yumi i save tingting long save bilong man tasol, na yumi i lus tingting long pawa bilong Gutnius. Tasol God yet i wok long mekim olgeta samting i kamap nupela, long olgeta samting long dispela graun.
God i kamapim dispela graun long Tok bilong em yet, na Tok bilong em yet i wok long mekim olgeta samting i kamap nupela. Olsem na yumi, lain bilong God, i mas wok long autim dispela Gutnius long olgeta hap long dispela graun, na long olgeta liklik hap long laip bilong yumi tu.
SAMPELA TINGTING
Dispela pawa bilong Gutnius i save mekim wanem long laip bilong yu?
Ritim: Kolosi 1:15-20
Taim olgeta dispela samting i no kamap yet, em i stap. Na em i save mekim olgeta samting i stap gut na i wok gut wantaim. Em i het bilong sios, na sios em i bodi bilong em. Em yet i as bilong laip bilong sios. Em i namba wan man i bin kirap bek long matmat, olsem na em yet i ken i stap het bilong olgeta samting. — Kolosi 1:17-18
Jisas bilong Nazaret em i gat bikpela namba tru. Na taim yumi wok long kisim save long em, yumi save lukluk pastaim long wok bilong em long dispela graun. Na bihain bai yumi klia long wok bilong em long graun na wok bilong em long heven. Dispela Jisas, ol i rausim klos bilong em na nilim em long long diwai kros, em yet i dispela man i brukim pawa bilong olgeta king bilong dispela graun. Yumi mas lainim pasin bilong save long em olsem man i bosim na stap het bilong ami bilong God. Yumi i mas bilip na klia gut olsem em inap givim yumi olgeta samting yumi nidim, na dispela bai winim olgeta samting yumi i laikim na prea long kisim.
Tasol moa yet, yumi mas klia gut tu olsem Jisas i stap bipo long taim em i kam long dispela graun olsem wanpela bebi. “Taim olgeta dispela samting i no kamap yet, em i stap.” Em i stap wantaim God, taim em i no kam long dispela graun yet. Taim Tok bilong God i kamapim dispela graun, Krais i stap na mekim wok. Sapos Krais i no stap, orait olgeta samting long dispela graun bai i bagarap na i no gat mining tu – “Na em i mekim olgeta samting i stap gut na i wok gut wantaim.” Jisas i olsem bel bilong dispela graun, tasol em i het bilong sios wantaim.
Krais, em i God yet, na em i kam long dispela graun taim graun i bagarap. Long wok bilong em long dispela graun, Krais i tok orait long olgeta hevi bilong sin na dai i kalap long em. Long dai bilong em, bikpela senis i kamap, na em i olsem stat bilong olgeta nupela samting. Krais i stiaim dispela graun i go long nupela rot. Taim em i lusim matmat na i go antap long heven, em i olsem tok piksa long dispela nupela laip we Krais i stap het bilong olgeta samting.
Em i no isi long save gut long ol dispela wok bilong Krais, tasol em i bikpela samting stret, na yumi i mas wok long tingting long dispela na presim dispela wok bilong em olgeta taim.
SAMPELA TINGTING
Tingting gut long ol dispela wok bilong Jisas, na presim God!
Ritim: 1 Korin 13
Pasin bilong bilip, na pasin bilong wetim God i mekim gut long yumi, na pasin bilong givim bel bilong yumi long ol arapela, dispela tripela pasin bai i stap oltaim. Tasol namba wan pasin tru, em pasin bilong givim bel bilong yumi long ol arapela. —1 Korin 13:13
Bikpela Jisas i givim planti ol presen long lain bilong em. Ol dispela presen i no wankain, na God i givim ol long yumi. Asde yumi bin stori long ol dispela presen.
Tasol, Holi Spirit i no givim dispela ol kain kain presen tasol long ol lain bilong em. I gat sampela presen, ol bai i stap oltaim, na olgeta wan wan Kristen i kisim ol dispela presen. Dispela ol presen i olsem pasin bilong bilip, pasin bilong wetim God i mekim gut long yumi (olsem hop), na pasin bilong givim bel bilong yumi long ol arapela. Ol dispela presen bai i stap oltaim.
Sapos yumi i no gat ol dispela presen, i min olsem yumi i no stap wanpela Kristen. Olgeta Kristen i gat dispela tripela pasin.
Bilip em i rot bilong yumi long kisim Krais na olgeta gutpela samting bilong em tu. Bilip em i wanpela presen nating i kam long Holi Spirit. Olsem na yumi i mas tenkyu tru na daunim yumi yet long kisim dispela bilip long Krais.
Pasin bilong wetim God i mekim gut long yumi (hop) i min olsem yumi i wetim ol dispela samting bai i kam. Yumi i wetim kingdom bilong God, pinis bilong wok bilong em, bikpela senis, na kam bek bilong Krais yet. Sapos wanpela sios i no gat dispela hop, em i no trupela sios.
“Tasol namba wan pasin tru, em pasin bilong givim bel bilong yumi long ol arapela.” Long bilip yumi i kisim Krais, long hop yumi i wetim Krais i kam, tasol long laikim tru Krais yet i stap wantaim yumi. Taim yumi i givim bel bilong yumi long ol arapela, God yet i stap wantaim yumi na yumi lukim em i stap.
Ol dispela presen i bikpela samting bilong strongim sios bilong God. Laikim tru, pasin bilong givim bel bilong yumi long arapela, em i namba wan pasin bikos em i mekim ol memba i kamap wanbel. Long laikim tru, dispela Spirit bilong Krais i save skulim yumi long stap olsem wokboi bilong em bilong givim glori long God na long helpim ol narapela lain long sios.
Na em i tru, i gat sampela narapela presen tu, tasol pasin bilong bilip, na pasin bilong wetim God i mekim gut long yumi, na pasin bilong givim bel bilong yumi long ol arapela, dispela tripela pasin bai i stap oltaim. Na nambawan pasin tru, em i pasin bilong givim bel bilong yumi long ol arapela.
SAMPELA TINGTING
Tingting long wanpela bilong ol dispela tripela presen, na tingting long mining bilong dispela presen long laip bilong yu olsem wanpela Kristen.
Ritim: Rom 12:3-8
Yumi save, wanpela bodi i gat planti hap bilong en, na olgeta hap i no mekim wankain wok tasol. Olsem tasol yumi tu yumi planti manmeri, tasol long Krais yumi stap olsem wanpela bodi tasol... —Rom 12:4-5
Bikpela Jisas, em i stap antap long heven pinis, em i givim kain kain presen long sios bilong em. Long sampela hap long Buk Baibel yumi i ritim sampela lista long ol dispela presen: tok profet, mekim tok long kain kain tok ples, strong bilong oraitim ol sikman, bilong stap olsem tisa, i go i go. I no olsem ol dispela lista i autim olgeta presen God yet i givim ol nupela Kristen long Nupela Kontrak.
Ol presen bilong Holi Spirit i no wankain. Taim yumi tingim dispela presen bilong mekim ol man i toktok long kain kain tok ples, yu klia olsem em i wok bilong Spirit. Tasol taim yumi tingting long wok bilong pasto o aposel long Efesus 4, yu ting olsem em i strong bilong man. Tasol, yumi mas klia olsem olgeta ol dispela presen in kam long Krais. Ol i kam long heven bikos ol i kam long Bikpela. Em i ol presen long heven na Spirit bilong Bikpela i givim yumi nating, long marimari bilong em.
Olgeta dispela presen i no wankain, tasol ol i gat wankain laik – bilong helpim bodi (sios) bilong Krais. Ol i olsem samting nating sapos ol i no wok long helpim bodi bilong Krais. Yumi i mas yusim ol presen God i givim yumi. Nogut ol i stap nating.
Yumi i no ken apim yumi yet long ol presen yumi i kisim, na tu yumi no ken mangalim ol presen bilong ol narapela. Na yumi no ken apim ol presen yumi i kisim na tok olsem, “Mi yet mi wanpela tisa, tasol yu nogat. Olsem na yu no wanpela trupela Kristen, na yu no stap hap bilong bodi bilong Krais.” God i givim ol dispela presen bilong Holi Spirit long yumi long laik bilong em yet bilong helpim yumi. Yumi no ken stori planti tumas long ol dispela presen bilong Krais. Nogat, yumi mas yusim ol dispela presen long apim nem bilong God na helpim sios bilong em.
Ritim: Rom 8:9-11
Tasol yupela i no wokabaut moa long pasin bilong olpela bel. Nogat. Sapos i tru Spirit bilong God i stap long yupela, orait nau yupela i save wokabaut long pasin bilong Holi Spirit. Na man i no gat Spirit bilong Krais, em i no man bilong Krais. Sin i kilim bodi bilong yupela i dai pinis. Tasol sapos Krais i stap insait long yupela, orait yupela i kamap stretpela man pinis, na spirit bilong yupela i stap laip. —Rom 8:9-10
Nupela Kontrak i skulim yumi olsem sapos yumi i bilong Krais, orait Spirit bilong God i stap long yumi. Ol Kristen i ting olsem ol i mas bilip pastaim na bihain ol bai i kisim Holi Spirit, ol i paul olgeta.
I tru olsem sampela Kristen i stap klostu moa long Krais olsem ol narapela manmeri, na sampela lain i aninit moa long Spirit bilong God olsem ol narapela lain. Tasol, sapos Spirit i givim laip long yumi pinis, i no min olsem yumi i klia gut long pasin bilong wokabaut long Spirit pinis.
Tasol yumi i no inap stap lain bilong Krais sapos yumi i no gat Spirit bilong God. Man i no gat Holi Spirit, em i no inap tok, “Jisas em i Bikpela” (1 Korin 12:3).
Sampela taim Buk Baibel i tok olsem “Spirit bilong God i stap insait long yupela,” na narapela taim i tok olsem “Krais i stap insait long yupela.” Tupela tok i wankain tasol. I min olsem yumi no stap long ples bilong dai. Nogat, yumi i stap laip. Em tru, bodi bilong yumi bai i dai yet, na yumi save mekim sin na yumi save bungim kain kain hevi. Tasol yumi i stap laip. Na dispela nupela laip i kam long yumi long Krais bikos em i dai na em i kirap bek. Yumi i kisim dispela nupela laip long Holi Spirit bikos em i stap insait long yumi.
Olgeta de, olpela bel bilong yumi i mas dai na nupela bel i mas kirap na stap laip, na dispela i min olsem em i hat wok tru bilong stap olsem wanpela Kristen. Tasol yumi wetim ol nupela samting bai i kamap bihain, na dispela bai i winim tru olgeta samting yumi i kisim pinis long Spirit bilong God taim yumi stap long dispela graun. I gat planti ol samting long lainim long dispela graun na yumi mas wok long lusim ol pasin nogut. Yumi mas wok long lusim olpela bel, olsem yumi i ken kisim planti moa samting long God bihain.
Yumi no ken wok long brukim (seperetim) wok bilong Krais long wok bilong Spirit. Pasin bilong stap laip wantaim Krais na pasin bilong wokabaut long Spirit i wankain samting tasol. Na em i bikpela samting tru na em i dia tumas.
SAMPELA TINGTING
“Yumi i wetim ol nupela samting bai i kamap bihain, na dispela bai i winim tru olgeta samting yumi i kisim pinis long Spirit bilong God taim yumi i stap long dispela graun,” i gat wanem mining long laip bilong yu yet?
Ritim: Taitus 2
Yumi save, marimari bilong God em i kamap ples klia pinis...Dispela marimari bilong God em i save skulim yumi long lusim pasin bilong givim baksait long God na long lusim olgeta laik nogut bilong dispela graun, na em i skulim yumi long tingting gut na wokabaut stret.
...na bilip strong na wetim dispela gutpela samting yumi bai amamas tru long lukim.
—Taitus 2:11-13
Yumi i stap namel long taim Krais i kam pinis long marimari, na long taim em bai i kam bek long glori. Dispela tupela bikpela samting bai afektim wokabaut na pasin bilong yumi long dispela graun, long dispela namel taim.
Marimari bilong God long Krais i kamap pinis. Na taim Krais i go antap long heven, i no olsem dispela marimari i go pinis gen. Nogat, marimari i stap yet bilong skulim yumi long stap stretpela long dispela graun. Na glori bilong Krais, dispela glori em bai i kam yet, em i olsem dispela samting yumi i wetim, dispela gutpela samting yumi bai amamas tru long lukim.
Marimari bilong God i skulim yumi long stap long dispela taim long dispela graun. Em i skulim yumi long lusim pasin bilong givim baksait long God, na long lusim olgeta laik nogut bilong dispela graun, na long tingting gut na wokabaut stret.
Lain 2 long Taitus 2 i tok olsem yumi i no ken spak. Yumi i mas tingting stret na bihainim ol gutpela tingting tasol. Yumi i mas tingting gut. Long dispela graun i isi long tingting bilong yumi i paul. I gat planti ol naispela samting long dispela graun i wok long grisim yumi na long paulim tingting bilong yumi. Pasin pamuk, laik bilong kisim namba, laik bilong kisim planti mani na kago, i go i go, ol dispela samting inap long paulim tingting bilong yumi.
Tasol, long marimari bilong God, yumi i mas bihainim ol gutpela tingting tasol. Yumi mas klia gut long dispela rot yumi mas bihainim long taim yumi i bungim ol samting i wok long grisim yumi long dispela graun na long taim yumi i bungim ol hevi tu. Spirit bilong Krais bai tingim yumi: yumi i stap namel long namba wan taim Krais i kam long dispela graun long marimari, na long taim em bai i kam bek long glori.
SAMPELA TINGTING
Yu yet i bihainim ol gutpela tingting long laip bilong yu olsem wanem?
Ritim: 2 Korin 5:1-5
God yet i bin redim yumi bilong kisim dispela laip, na em i bin givim Holi Spirit long yumi. Holi Spirit em i olsem namba wan hap bilong ol gutpela samting God i laik givim long yumi. Na yumi kisim Holi Spirit pinis, olsem na yumi ken save, tru tumas bai yumi kisim olgeta arapela samting tu. —2 Korin 5:5
Spirit i olsem namba wan hap bilong ol gutpela samting God i laik givim long yumi. I olsem God i givim yumi wanpela hap samting bilong wanem samting em bai i givim yumi bihain. I kain olsem yumi i go baim skul fi. Sampela skul bai i larim yu i baim haf skul fi pastaim, na bihain yu bai baim olgeta. Taim yu putim hap moni bilong yu, i olsem yu mekim promis olsem yu bai baim olgeta bihain.
Holi Spirit bilong God i olsem namba wan mak God i givim yumi olsem em bai inapim ol promis bilong em. God bai givim yumi nupela laip na nupela bodi long nupela graun, na ol dispela samting bai i winim olgeta samting yumi i gat long tude. Dispela em i promis bilong em, na em bai i kamap bihain. Tasol em i givim yumi namba wan hap pinis: em Holi Spirit bilong em, olsem na yumi ken save, tru tumas bai yumi kisim olgeta narapela samting tu.
Holi Spirit i olsem wanpela bris namel long dispela laip na dispela laip bai i kam. Em i wanpela presen yumi kisim i kam long taim bihain. Olsem na Spirit bilong God i no stap isi long dispela graun, bikos em i kam long narapela graun. Dispela graun i no ples bilong em. Em i save birua wantaim ol samting bilong graun. Spirit em i wok strong long kisim olgeta tingting bilong yumi na tok bilong yumi na wanem ol samting yumi i mekim, na putim ol dispela samting aninit long Bikpela bilong ol bikpela, King bilong ol king, Jisas Krais.
Long wok bilong Spirit, yumi holim stat bilong wanem samting bai kamap bihain, na Spirit bilong God i redim yumi yet long taim bihain. Taim yumi kamap long nupela graun bilong God, em bai narakain samting olgeta. Tasol wanem samting yumi i kisim pinis long Spirit bilong God, em bai i kam wantaim yumi.
Long nau yumi i mas amamas long kisim Spirit long yumi long dispela graun. Sampela taim yumi bai bel hevi, na yumi bai paul na tok, “kingdom bilong God bai i kam, o nogat?” Sampela taim yumi no lukim wok bilong kingdom bilong God. Tasol yumi i no ken bel hevi. Spirit yet i stap olsem namba wan hap bilong ol gutpela samting God i laik givim long yumi, olsem na yumi ken save, tru tumas bai yumi kisim olgeta arapela samting tu!
SAMPELA TINGTING
Spirit bilong God i wok long redim yu long taim bihain, taim yu kamap long nupela graun bilong God, olsem wanem?
Ritim: 2 Korin 1:18-22
Em i bin putim mak bilong em yet long yumi, na em i givim Holi Spirit bilong i stap long bel bilong yumi. —2 Korin 1:21-22
Yumi no ken givim bel hevi long Holi Spirit, long wanem “God i givim Holi Spirit long yumi olsem mak bilong yumi i stap ol manmeri bilong God” (Efesus 4:30). God em i putim mak long yumi taim em i givim Spirit bilong em long yumi (2 Korin 1:22). Yumi i kisim Holi Spirit olsem mak bilong God.
Dispela mak i min olsem yumi i bilong God. Yumi i ken ritim ol samting bilong dispela kain mak long Kamapim Tok Hait 7. God i putim mak bilong em long dispela 144,000. I min olsem ol i lain bilong God nau. Em i olsem God i putim nem bilong em long ol lain bilong em, olsem na ol i no inap kisim pe bilong sin long las de.
Na tu, taim yumi i kisim baptais long nem bilong God Papa, Pikinini na Holi Spirit, i olsem yumi i kisim mak bilong God, na yumi i stap lain bilong em nau.
Taim God i kisim bek wanpela man, taim em i baim em, em i baim em long dai bilong pikinini bilong em. Em i no baim yumi long gol o long silva. Nogat, em i baim bek yumi long blut bilong Krais, dispela blut em i dia tumas (1 Pita 1:18-19). Bikos God em i baim yumi long blut tudia bilong Krais, em i no gat laik sapos yumi i lus gen. Olsem na em i givim mak bilong yumi long Holi Spirit, olsem em i ken i stap wantaim yumi. Olsem tasol “God i givim Holi Spirit long yumi olsem mak bilong yumi i stap ol manmeri bilong God.”
Planti taim ol nupela Kristen i gat bikpela hangre long bihainim Krais. Tasol sampela taim bihain, ol i save pundaun long sin, na ol bai i pilim olsem em i hat tru long bihainim Krais. Olsem na, ol i nidim pawa bilong God Holi Spirit bilong stap strong. Holi Spirit i save kisim ol lain i go long Krais, tasol em i save strongim ol tu. Spirit bilong God bai i helpim yumi long stap aninit long Krais, Bikpela bilong yumi, na long stap wanbel wantaim Papa bilong yumi long heven. Holi Spirit i no inap givim baksait long yumi. Yumi kisim mak bilong em yet olsem yumi i bilong God, nau na long las de wankain!
SAMPELA TINGTING
Yu luksave long wok bilong Holi Spirit long laip bilong yu, long helpim yu i stap strong long bihainim Bikpela Jisas Krais?
Ritim: Efesus 4:25-32
Yupela i no ken givim bel hevi long Holi Spirit bilong God. God i givim Holi Spirit long yupela olsem mak bilong yupela i stap ol manmeri bilong em stret, na bilong soim yupela olsem em i makim taim bilong kisim bek yupela na mekim yupela i kamap fri tru. — Efesus 4:30
Pasin bilong givim bel hevi long wanpela man o meri i samting bilong givim bikpela pen long bel bilong em. Taim yumi i stap klostu tru long narapela man o meri, olsem poro bilong em, yumi inap givim bikpela bel hevi tru long ol. Wanpela pikinini man inap givim bikpela pen tru long mama bilong em. Man na meri i marit, tupela inap givim amamas tru long narapela, tasol ol inap givim bikpela hevi na pen stret long narapela tu.
Na Holi Spirit i stap klostu tru long yumi olsem namba wan helpim bilong yumi, na dispela i winim pasin bilong poromanim ol man na meri long dispela graun. Olsem na Pol i tokim yumi olsem yumi i no ken givim bel hevi long Holi Spirit.
Yumi inap long givim bel hevi long Spirit, olsem wanem?
Yumi i save givim bel hevi long Holi Spirit olgeta taim yumi i no usim laip bilong yumi yet long givim glori long God. Em i gat laik long yumi i bihainim Jisas olgeta de long laip bilong yumi. Taim yumi i les long mekim olsem, taim yumi i tingting long glori bilong yumi yet na bihainim laik bilong yumi yet, i olsem yumi i givim bel hevi long Spirit bilong God.
Yumi givim bel hevi long Holi Spirit taim yumi i les long ritim o harim Tok bilong God, long wanem em i buk bilong em. Yumi givim bel hevi long Spirit bilong God taim yumi i no wari long sios bilong God na wok bilong en, long wanem sios em i tempel bilong em na wok bilong em yet. Yumi i givim pen long Spirit taim yumi i les long beten, long wanem em i kam bilong skulim yumi long beten “Aba, Papa.”
Olsem na, yumi inap long klia gut long sin em i wanem samting. I no samting bilong brukim lo tasol. Em i samting bilong givim bel hevi long Holi Spirit, na givim pen long Papa bilong yumi long Heven.
Yumi ol manmeri, yumi i save wari tru taim narapela i givim bel hevi na pen long yumi. Tasol mobeta yumi wari long taim yumi givim bel hevi long God Holi Spirit. Na yumi i mas tenkyu tru long God bikos em i save sori long yumi na em i no save rausim Spirit long yumi hariap.
SAMPELA TINGTING
Sapos yu i bin givim bel hevi long Spirit bilong God, orait tok sori long God Papa na askim em long lusim sin bilong yu, na presim em bikos em i save bel sori long yumi.
Ritim: Aposel 9:1-9
“Sol, Sol, bilong wanem yu wok long bagarapim mi?” —Aposel 9:4
Long dispela mun yumi i bin stori planti long “sios” bilong God. Yumi i no ken abrusim dispela tok “sios” taim yumi i tingting long wok bilong Jisas long heven. Dispela Sios bilong God em i olgeta manmeri bilong God we Krais i stap wantaim ol long Tok na Spirit bilong em, bihain long taim em i go antap long heven pinis. Jisas em i laikim tru ol dispela manmeri, na em i wanbel wantaim ol tu.
Bikpela i no tokim Sol, “Bilong wanem yu wok long bagarapim sios bilong mi?” Nogat. Em i tok, “Bilong wanem yu wok long bagarapim mi?” Jisas em i wanbel wantaim sios bilong em. Sapos wanpela i wok long bagarapim sios bilong em, i olsem em i bagarapim Jisas yet.
Sol, dispela man i kisim nem Pol bihain, i ting olsem Jisas em i dai pinis. Em i ting olsem ol disaipel i wok long autim ol samting long Krais, ol i wok long bagarapim bilip long ol Juda. Tasol, Bikpela i stap laip, na i wok long mekim wok bilong em long Spirit long ol lain i bihainim em. Taim Sol i wok long bagarapim ol lain i bihainim Jisas, Bikpela Jisas i pasim em na senisim laip bilong em.
Sapos wanpela man i laikim tru meri bilong em, na narapela i laik bagarapim dispela meri, dispela man bai i belhat tru: “Sapos yu bagarapim meri bilong mi, i olsem yu bagarapim mi yet.” Na laikim tru bilong God long sios bilong em i winim laikim tru bilong man long meri bilong em. Olsem na ol gavman na ol narapela lain bilong graun i tingting long bagarapim sios, ol i mas lukaut. Bikpela bai i lukautim sios bilong em: “Sapos yu bagarapim sios bilong em, i olsem yu bagarapim mi yet!”
Sios i ken kisim bikpela bel isi olsem. Tasol sios i mas lukaut tu! Ol lain i kam klostu long yumi, ol memba bilong bodi bilong Krais, ol i kam long dispela ples we Bikpela i stap laip.
Yumi mas amamas long stap wantaim lain bilong God. Tingting bilong God, em i tingting bilong yumi; laik bilong God em i laik bilong yumi. Yumi i mas bihainim em. Papa bilong Krais em i Papa bilong yumi, ol birua bilong Krais ol i birua bilong yumi, na haus bilong God i olsem haus bilong yumi tu. Yumi i ken wanbel wantaim Krais bikos em i mekim yumi i kamap lain bilong em.
SAMPELA TINGTING
Yu save wanbel wantaim Krais olsem wanem?
Ritim: Aposel 5:1-11
Ananaias i harim dispela tok na em i pundaun na wantu em i dai.... Orait wantu dispela meri i pundaun klostu long lek bilong Pita na em i dai. —Aposel 5:5,10
Pentikos i min olsem God Holi Spirit i kam daun na i stap wantaim olgeta manmeri bilong em. Nau dispela God bilong Israel, Papa bilong Jisas, em i no i stap moa long banis bilong tempel, tasol em i stap namel long sios bilong Jisas Krais. Olgeta manmeri bilong God i olsem tempel bilong God.
Yumi mas klia gut long dispela tok tru. Nogut yumi wok long sanapim ol naispela naispela haus lotu, tasol yumi lus tingting long ol manmeri bilong sios, na ol manmeri bilong sios i wok long bihainim tingting bilong dispela graun. God i stap wantaim ol manmeri bilong em. Yumi i olsem tempel bilong God.
Long Olpela Kontrak, long Malakai 3, God i tok, “Tasol taim Bikpela i kam, husat inap winim kot? Taim em i kamap ples klia, husat bai i no inap lus? Em bai i kam olsem paia i hat tru na i save kukim silva na gol bilong rausim pipia bilong en. Na em i olsem strongpela sop bilong wasim laplap samting i doti tru.”
Taim God i kam i stap wantaim ol lain bilong em, olsem yumi i ritim long buk Aposel, em i no kam bilong soim pawa bilong em bilong oraitim ol sik na hevi tasol. Nogat, em i kam olsem jas tu. Yumi i lukim man lek nogut i wokabaut gen (Aposel 3), tasol yumi i lukim ol man bilong giaman i pundaun na i dai tu (Aposel 5). Taim dispela Holi God i kam pinis, olgeta samting i no holi i mas paia.
Planti taim ol lain bilong sios i laik bai God i soim em yet tude wankain olsem em i soim em yet long taim bilong ol aposel. Planti taim yumi i laik lukim ol dispela kain mirakel, tasol yumi i lus tingting olsem taim God em i soim em yet em i mekim olsem long givim glori long nem bilong em yet. God i save kam olsem jas na man bilong kisim bek ol lain bilong em wantaim.
Yumi ken tok olsem, dispela sin bilong Ananaias na meri bilong em i no “bikpela” sin tumas. Ol i no “mekim tok nogut long Holi Spirit” olsem Matyu 12:31 i toktok long em. Tasol, ol i giaman bikos ol i tingting long nem bilong ol yet. I olsem ol i laik stilim glori bilong God. Nogut yumi i ting olsem dispela em i “liklik” sin tasol. Taim yumi i stap long graun i holi, olgeta sin i mas paia. I no gat wanpela samting i no holi inap kam insait long tempel bilong God. Sapos yumi ting olsem salvesen bilong yumi em i bikpela samting tru, i min olsem ol sin bilong yumi i bikpela tu.
SAMPELA TINGTING
Sampela taim yu yet yu pilim dispela “pret bilong God”?
Ritim: Aposel 3:1-2
Pita na Jon i lukluk strong long em, na Pita i tok, “Yu lukluk long mitupela”...
‘Yupela man bilong Israel, bilong wanem yupela i kirap nogut long dispela samting i bin kamap? Bilong wanem yupela i lukluk strong long mitupela? Ating yupela i ting, mitupela yet i gat bikpela strong o mitupela i stap gut tru long ai bilong God na mitupela i mekim dispela man i wokabaut, a? Nogat tru.’ —Aposel 3:4,12
Planti manmeri i lotu wantaim, ol i save lukluk long narapela narapela. Taim ol i bung wantaim long lotu, planti manmeri i no lukluk long Krais bikos ol i lukluk long narapela narapela manmeri tasol. Planti Kristen manmeri bai i toktok long pasin bilong ol hetman o pasto bilong ol, na maski long toktok long Krais. Ol bai lukluk long narapela narapela. Mobeta sapos yumi i wok long lukluk antap!
Taim Pita i tokim dispela man lek nogut olsem em i “lukluk long mitupela,” em i soim klia olsem em na Jon, tupela i man tasol, man nating tasol. Tupela i gat laik sapos dispela man i save olsem, taim em bai i kisim orait, i no samting bilong Pita tupela Jon. Nogat, em i samting bilong dispela Jisas em i stap laip.
Yumi i save kolim dispela buk bilong Baibel “Aposel.” Tasol i no min olsem em i stori bilong ol Aposel. Dispela buk “Aposel” em i stori bilong Jisas. Nogut, taim yumi i ritim Buk Aposel yumi i tingting olsem, “Em bai naispela sapos yumi i gat ol dispela kain stretpela man olsem Pita na Jon long sios bilong yumi yet.” Mobeta yumi i tingting olsem, “Yumi i gat wankain Bikpela long sios bilong yumi yet, dispela Bikpela Jisas Krais.”
Long bilip, yumi i ken klia olsem “Pikinini bilong God i save bungim, lukautim, na holim bilong em yet wanpela Sios em yet i makim pinis bilong kisim laip i stap oltaim” (Katekism bilong Heidelberg, QA 54). Em i wok bilong Jisas Krais tasol.
Sapos ai bilong yumi i op long wanem samting Bikpela i mekim long sios, bai yumi i bungim maus wantaim dispela man lek nogut bilong presim God. Yumi no ken lukluk long narapela narapela long sios. Mobeta yumi i lukluk antap long Bikpela bilong yumi.
SAMPELA TINGTING
Wanem kain ol samting i save kamap long sios bilong mekim yumi i lukluk long ol narapela narapela man na lus tingting long lukluk long Jisas?
Ritim: Aposel 2:41-47
Ol i save larim ol man i baim ol hap graun na ol samting bilong ol, na ol i kisim mani long dispela, na ol i tilim dispela mani long olgeta man i sot long kaikai samting. —Aposel 2:45
Buk Baibel i skulim yumi olsem em i orait sapos yumi manmeri i bungim sampela samting, olsem kago, bilong yumi yet. Long dispela teks yumi ritim stori bilong ol lain i wok long tilim olgeta mani bilong ol yet long givim long ol man i sot, tasol dispela i no min olsem wan wan man i no ken holim sampela samting bilong em yet. Pita yet i no tok olsem olgeta manmeri i mas givim olgeta samting bilong ol long ol narapela lain – “Yu bin salim dispela graun long laik bilong yu tasol. Na mani yu kisim long en, em samting bilong yu tu, na yu ken mekim wanem samting yu laik mekim long en” (Aposel 5:4).
Tasol sampela ol Kristin i ting olsem ol lain long dispela sios i mekim rong taim ol i tilim olgeta samting bilong ol. Ol i ting olsem em i gutpela olsem ol i laik mekim pasin bilong givim ol samting long ol lain i sot, tasol ol i tok olsem dispela pasin i karim sampela kaikai i no gutpela: long sampela taim bihain sios long Jerusalem i no gat mani na Pol i mas wok long kisim ofa bilong helpim ol.
Na em i tru, sampela taim bihain sios long Jerusalem i sot long mani, tasol i gutpela sapos dispela teks i skulim yumi long gutpela pasin bilong ol Kristen taim ol i pulap long Spirit bilong God. Spirit bilong God i pulapim ol dispela lain long dispela nupela Kristen sios, na ol salim samting bilong ol na tilim long olgeta man i sot long kaikai samting. Na taim ol i mekim olsem, God yet i skulim yumi na olgeta lain long sios long olgeta hap na long olgeta taim olsem, olgeta Kristen i mas redi long givim sampela samting bilong ol yet long ol lain i sot. Olgeta Kristen i mas tingim ol narapela manmeri moa olsem ol i tingting long mani na kago bilong ol yet.
SAMPELA TINGTING
Yu save tingting long ol narapela manmeri antap long ol mani na kago samting bilong yu yet?
Ritim: Aposel 2:37-42
Na ol i askim Pita wantaim ol arapela aposel olsem, ‘Ol brata, bai mipela i mekim wanem nau?’ Na Pita i tokim ol olsem, ‘Yupela olgeta wan wan i mas tanim bel na kisim baptais long nem bilong Jisas Krais, na God bai i lusim ol sin bilong yupela. Yupela i mekim olsem, na bai God i givim Holi Spirit long yupela.’ Aposel 2:37-38
Taim ol manmeri i harim gutnius bilong Jisas Krais, planti ol i tok, “Bai mipela i mekim wanem nau?” Taim singaut bilong gutnius i go dip insait long bel bilong yumi, yumi bai askim, “Mi mas mekim wanem long Krais nau?” Sapos yumi i no gat dispela kain askim, i min olsem yumi i no harim Tok gut.
“Tanim bel!” Long tanim bel yumi mas sori long ol sin bilong yumi pastim. Long tanim bel tru tru, yumi i mas givim baksait long olgeta samting long bipo na long ol samting nogut, na tanim i go long God na Krais.
“Kisim baptais!” Kristen baptais em i soim olsem yumi i stap wantaim Krais nau. Yumi i no klia sapos pikinini bilong ol manmeri long dispela teks i kisim baptais tu bikos Buk Baibel i no tok olsem ol i kisim, tasol ating ol disaipel i no inap pasim ol. Wara bilong baptais i soim olsem Krais yet i lusim olgeta sin bilong ol manmeri i tanim bel na bilip long em. Em i mak bilong putim dispela samting ples klia.
Holi Spirit em i samting bilong olgeta Kristen. Em bai givim nupela laip long ol man bilong sin i tanim bel na i go long Krais. Taim yumi i kisim baptais bilong Krais, yumi i kisim baptais bilong Spirit tu, long wanem, long wanem hap Krais i stap, Holi Spirit i stap tu.
Ol dispela samting, bilong tanim bel na kisim baptais, i samting bilong kamap wanpela memba bilong Sios, na em i wankain long tude tu.
SAMPELA TINGTING
Tingting long ol dispela samting yumi ritim tude, na askim God long helpim yu i tanim bel na bilip long em.
Ritim: Aposel 2:25-36
Olsem na yupela olgeta lain Israel, yupela i mas save gut olsem, dispela Jisas yupela i nilim em long diwai kros, God i makim em i stap Bikpela, na man bilong kisim bek ol manmeri bilong en. —Aposel 2:36
Planti taim yumi i ting olsem Aposel 2, dispela siapta i stori long namba wan Pentikos, em bai skulim yumi long Holi Spirit tasol: em i husat, wok bilong em, na olsem wanem em i mekim wok bilong em tu. Tasol dispela namba wan autim tok long Pentikos, em i stori long Jisas em i husat. Dispela em i soim yumi namba wan wok bilong Spirit: long tokim yumi long Jisas em i husat. Sapos Spirit i no skulim yumi olsem, yumi i no inap save.
Dispela liklik las hap tok bilong autim tok bilong Pita, em i sutim stret bel bilong ol Israel. Pita i singautim “olgeta lain Israel” – ol pris, ol bikman na olgeta manmeri – long apim Jisas. Long wanem, Jisas em i Bikpela, dispela man husat bai i kisim glori bilong God. Na olgeta lain i bilip long em, em bai i kisim bek ol. Jisas em i Krais. Long Tok Hibru “Krais” em i “Mesaia.” Jisas, em i dispela man ol lain tumbuna bilong em i wetim. Tasol ol Israel i agenstim Bikpela bilong ol, na ol i nilim Mesaia bilong ol long diwai kros. Olsem na Pita i sutim stret bel bilong ol taim em i tok, “Yupela i nilim em long diwai Kros.”
Taim Pita i autim dispela tok em i wok long bihainim dispela tok bilong Jisas: “Olsem na yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit” (Matyu 28:19). Em i no pret long autim tok long namba bilong Jisas, na long sutim bel bilong ol lain Israel bikos ol i nilim Jisas long diwai kros. Sampela wik bipo long dispela, Pita yet i bin pret na em i givim baksait long Krais. Tasol nau em i no pret, bikos Spirit bilong God i strongim em, na em i lukim pinis Krais i kirap bek long matmat.
Yumi tu i mas bilipim dispela pawa na wok bilong Spirit. Yumi no ken amamas tumas na tingting tumas long pawa bilong save na pawa bilong mani na pawa bilong man. Nogat. Taim yumi i beten, God yet bai i bekim na givim yumi dispela pawa bilong Spirit! Na Spirit bai strongim bilip bilong yumi long Jisas — em wanpela tasol em i Bikpela. Na taim yumi i bilip olsem, bai yumi no inap pret, na yumi bai amamas long stap aninit long God bikos em bai i bel gut long yumi long Krais Jisas.
SAMPELA TINGTING
Beten long God long kisim pawa bilong Holi Spirit i kam strongim yu.
Ritim: Aposel 2:14-24
Klostu long las de bai mi kapsaitim Spirit bilong mi long olgeta manmeri. —Aposel 2:17 Yumi i stap klostu long las de. Buk Baibel i tok olsem long taim Krais i go antap long heven i go inap
long taim em i kam bek gen, em i “ol las de.”
Na Buk Baibel i skulim yumi olsem i gat tupela samting i makim dispela taim: Olgeta manmeri bilong God bai i kisim bikpela blesing stret, na dispela ol blesing bai i winim ol blesing long bipo taim, na ol manmeri bilong God bai i bungim hevi stret, na dispela ol hevi bai i winim ol hevi bilong bipo taim.
Holi Spirit bilong God i wanpela bikpela blesing stret. Taim God i salim Holi Spirit i kam daun long dispela graun, em inapim ol promis bilong Olpela Kontrak long “ol las de.”
Taim God i tok olsem, “Klostu long las de bai mi kapsaitim Spirit bilong mi long olgeta manmeri,” yumi i mas klia gut long dispela tok “olgeta manmeri.” Dispela tok i no min olsem olgeta manmeri long dispela graun bai i kisim Holi Spirit. Nogat. I min olsem God i no salim Holi Spirit long wanpela wanpela manmeri tasol. Nogat, em i salim Holi Spirit long lain Juda na long ol narapela lain, long man na long meri, na long pikinini man na long pikinini meri.
Bikos Holi Spirit i kam pinis, na God i stap insait long yumi nau, dispela i min olsem yumi i stap klostu tru long God, klostu moa olsem ol lain long bipo. Sapos spirit bilong yumi i no stap orait long tude, asua i stap long yumi tasol. Heven i op pinis na Saviour bilong yumi i bin i go insait. Nau yumi i stap aninit long heven i op, bikos Spirit bilong God i kam pinis long givim yumi bel isi. Sapos yumi i no luksave long dispela, i olsem yumi i aipas. Sapos yumi i no kisim pawa bilong Holi Spirit, i min olsem yumi i no bilip. God i raunim yumi, em i karamapim yumi. Olgeta de long laip bilong yumi, yumi i stap long lait bilong marimari bilong Jisas Krais, long san bilong laikim tru bilong God, na long amamas na wanbel wantaim Holi Spirit.
Olsem na yumi mas i go insait long dispela gutpela ol “las de.” Askim God long helpim yu, na em bai i bekim. Tude, yumi ol Kristen i kisim pawa bilong God pinis.
SAMPELA TINGTING
Yu save pilim olsem God yet i raunim yu na karamapim yu? Olsem wanem? Askim God long givim yu bel isi na pawa bilong Holi Spirit.
Ritim: Aposel 2:1-13
Na Holi Spirit i pulap long olgeta dispela manmeri, na ol i stat long mekim tok long ol kain kain tok ples.... ‘Yumi Juda wantaim ol arapela man i bihainim lotu bilong yumi, na yumi ol lain bilong ailan Krit na distrik Arebia, yumi olgeta i harim ol i autim tok bilong ol strongpela wok bilong God long ol tok ples bilong yumi.’ —Aposel 2:4,11
Taim God Holi Spirit i kam na stap wantaim ol manmeri bilong em, em i larim ol lain i luksave long em bilong soim ol olsem em yet i stap. God em i save olsem yumi man tasol, olsem na em i larim Spirit bilong em i kamap ples klia bilong yumi inap bilip olsem em i stap.
Namba wan mak Holi Spirit i givim, em i wanpela samting long harim long yau – wanpela nois olsem krai bilong strongpela win. Na bihain ol i lukim sampela samting long ai – ol i lukim samting olsem paia i kamap, na i luk olsem planti tang bilong man. Tasol bikpela mak tru olsem Holi Spirit i stap, em i ol toktok bilong ol dispela manmeri. Ol wan wan man na meri i harim ol i toktok long tok ples bilong em stret. Dispela em i stori bilong ol narakain wok bilong God. Olgeta wan wan tok ples i wok long autim biknem bilong Jisas.
Na long tude tu, Spirit i givim planti ol mak long soim olsem em i stap. Spirit yet bai makim wanem mak em i laik yusim. Em i no yusim ol dispela mak long Pentikos gen (olsem nois bilong strongpela win, paia olsem tang bilong man, na narakain toktok). Tasol i gat wanpela mak i stap olgeta taim long putim ples klia sapos Spirit i stap, o nogat: Spirit bilong God i kirapim sios long autim tok long Krais, na long autim olgeta narakain wok bilong God. Dispela em i wanpela bikpela mak olsem Spirit i stap, na em i mak bilong laip.
Taim Holi Spirit i stap, sios bilong God bai autim tok strong tru na klia tru long Bikpela, dispela Man Bilong Kisim Bek bilong em. Tude, planti lain i save presim nem bilong Jisas long olgeta hap long dispela graun. Long olgeta hap graun, Spirit bilong God i save wok long givim laip long ol manmeri na senisim bel bilong ol. Na taim em i mekim olsem, olgeta dispela manmeri bai tokaut long ol narakain wok bilong God. Sapos yumi i kisim Spirit pinis, bai yumi i givim glori long Krais!
SAMPELA TINGTING
Yu inap luksave olsem Spirit bilong God i stap, o nogat?
Ritim: Luk 11:5-13
Yupela i mas i stap long dispela taun inap long taim yupela i kisim dispela strong bilong God. —Luk 24:49
God em i God bilong bihainim stretpela rot long wokim ol samting. Yumi inap lukluk long olgeta samting God i wokim na kamapim long dispela graun. Yumi inap lukluk long sid na bihain liklik plaua i kamap, na bihain bikpela plaua i kamap. Yumi i save olsem i gat taim bilong ren na taim bilong bikpela san long dispela graun, na taim bilong san na taim bilong nait. Long wok bilong Krais bilong kisim bek yumi, yumi inap lukim stretpela rot God i bihainim tu – Krais i kam long graun, em i bungim ol hevi, em i dai, em i kirap bek na em i go antap long heven. Na tu i gat stretpela rot bilong bihainim long kisim ol presen Krais i givim long yumi: Pastaim yumi i mas harim, na bihain yumi mas bilip; yumi i mas kamap nupela man pastaim na bihain bai yumi inap i stap olsem wanpela Kristen i gat gutpela save na gutpela pasin. Na God i tok olsem, “Tasol yupela i mas bihainim stret ol gutpela pasin bilong lotu” (1 Korin 14:40). Na taim bilong ol daiman bilong kirap bek i gat stretpela rot long bihainim tu – “Tasol yumi olgeta bai yumi kirap bek na kisim laip long taim bilong yumi yet. Namba wan em Krais. Na bihain, taim em i kam bek, yumi olgeta lain bilong en bai yumi kirap bek” (1 Korin 15:23).
Na long stretpela rot bilong plen bilong God, em i makim 40 de namel long taim Krais i kirap bek na taim em i go antap long heven. Long dispela 40 de em i redim ol disaipel bilong em bilong mekim wok. Long dispela 40 de Bikpela i soim olsem em i stap laip, na em i skulim ol long kingdom bilong God. Tasol, bilong wanem God i makim 10-pela de namel long taim Krais i go antap long heven na taim Holi Spirit i kam daun long dispela graun?
Krais i tokim ol aposel bilong em long stap long Jerusalem. Aposel 1:14 i tok, “Olgeta dispela man i stap wanbel na ol i save bung na beten.” Long dispela 10-pela de ol i beten i stap. Na bihain long dispela tasol, ol i kisim pawa bilong antap.
Yumi Kristen i save lus tingting olsem God i save givim strong long yumi. Yumi i save bisi long mekim planti samting. Tasol yumi i no gat pawa. Yumi ol Kristen i nidim wanem kain pawa? Yumi i no nidim pawa bilong save o mani o kago o planti pik. Nogat, yumi i nidim pawa bilong heven. Dispela 10-pela de bilong wet i stap, i skulim yumi olsem sapos yumi les long wetim Bikpela, na sapos yumi i les long prea long kisim pawa bilong antap, bai yumi i no inap long mekim wanpela gutpela samting.
SAMPELA TINGTING
Yu save “wetim Bikpela” long laip bilong yu olsem wanem?
Ritim: Jon 1:29-34
Jon i bin baptaisim ol manmeri long wara. Tasol i no planti de nau na bai yupela i kisim baptais long Holi Spirit. —Aposel 1:5
John bilong Baptais i stap namel long tupela samting. Em i stap olsem las profet long Olpela Kontrak: “Olgeta profet, na buk bilong lotu, ol i bin autim tok bilong God inap long taim Jon i kamap” (Matyu 11:13). Olsem las profet bilong olgeta profet em tasol inap long tokaut: “Em i kam. Lukim. Em i Pikinini Sipsip Bilong God.” Em i las bilong olgeta profet husat i bin lukluk i go long Krais, na em yet i lukim taim God inapim ol tok profet.
Taim Jon i stori long ol nupela samting dispela Mesaia i kisim i kam long dispela graun, em i tok olsem Krais bai i kam na baptaisim ol long Holi Spirit. Em i soim yumi wanem wok bilong em yet i wanbel long wok bilong Krais. Baptais long wara i wanpela hap long baptais long Spirit. Yumi i mas rausim ol olpela samting sapos yumi laik kisim ol nupela samting i kam.
Tasol tu, Jon i soim olsem wok bilong em i no inap, long wanem, em inap long baptaisim olgeta lain long wara tasol, na dispela man bai i kam, em bai i baptaisim olgeta lain long Holi Spirit. Sapos yu no kisim nupela samting i kam, hau bai yu rausim olgeta olpela samting? Na sapos God i lusim sin bilong yumi, tasol em i no givim yumi pawa bilong mekim gutpela pasin, hau bai dispela samting i helpim yumi ? Man i sik nogut tru i no inap kamap orait sapos yumi rausim sik tasol. Em i nidim nupela strong gen. Yumi i mas lusim dispela olpela, kranki rot, na moa, yumi nidim pawa bilong wokabaut long nupela rot, long nupela laip.
I no gat man o sampela samting long dispela graun inap long stiaim yumi long nupela rot. Maski yumi i gat gutpela tingting o bikpela save, yumi i no gat strong long wokabaut long nupela laip na oraitim olgeta samting sin i bagarapim pinis.
Krais tasol i gat dispela pawa. Em i kam long stiaim yumi long nupela rot. Em i lusim sin bilong yumi, na em i helpim yumi long mekim ol gutpela pasin tu. Taim em i mekim wok long dispela graun, em i karim ol sin bilong yumi long bodi bilong em. Na taim em i go antap long mekim wok long heven, Krais em i salim Holi Spirit i kam daun. Long Holi Spirit, nupela strong i kam long dispela olpela graun, dispela graun i skin les olgeta. Nau, ol ren i wok long punduan long ples drai.
SAMPELA TINGTING
I tru olsem sampela taim yumi no save tingting tumas long wok bilong Holi Spirit, o nogat? Em i gutpela samting, o nogat? Bilong wanem?
Ritim: Kamapim Tok Hait 21:9-14
Orait na ol i tromoi ston bilong makim husat i mas kisim dispela wok, na ston bilong Matias i kamap. Olsem na ol i putim em wantaim ol 11-pela aposel. —Aposel 1:26
Jisas i go antap long heven pinis na Holi Spirit i no kam daun yet, na ol disaipel i wet i stap long Jerusalem. Long dispela taim ol i makim wanpela aposel bilong kisim ples bilong Judas Iskariot.
Planti lain i tok olsem ol disaipel i mekim rong taim ol i mekim olsem. Planti ol i ting olsem dispela pasin bilong tromoi ston em i no gutpela long painimaut tingting bilong God. Sampela lain i ting olsem God em i no laik olsem Matias i kisim ples bilong Judas, na ol i laik makim Pol bilong kisim ples bilong Judas. Tasol yumi mas klia olsem, Pol yet i no tok olsem em i wanpela bilong ol dispela 12- pela aposel, maski em i stap wanpela aposel (1 Korin 15:5-9). Na Buk Baibel i no tok olsem dispela samting ol disaipel mekim i kranki.
Bikpela bilong ol i lusim ol pinis, na Spirit i no kam yet. Long dispela 10-pela de, ol disaipel i mekim tupela samting: Ol i prea planti, na ol i soim bilip bilong ol taim ol i makim Matias. Ol i bilip olsem Bikpela bai pinisim wok bilong em. Em bai “i stap king bilong ol lain bilong Jekop oltaim” (Luk 1:33). Ol Aposel i bilip olsem Jisas bai i pinisim wok bilong em, na tu ol i save long wok bilong ol yet insait long dispela wok bilong Krais. Ol i save olsem ol i nidim 12-pela aposel, bikos as bilong ol lain bilong God i dispela 12-pela lain bilong Israel. Na olgeta lain bilong God bai i sanap antap long wok bilong dispela 12-pela aposel Krais yet i makim.
Ol aposel i stap redi long kisim dispela man bai i stretim Jerusalem na inapim olgeta promis bilong em.
Long Kamapim Tok Hait 21 yumi i lukim wanpela piksa long taim wok bilong Spirit bilong Krais bai pinis: Jerusalem em i naispela tru. Na dispela 12-pela nem long ol pikinini man bilong Israel i stap long ol dua is stap long banis bilong dispela taun, na dispela banis bilong taun em i gat 12-pela ston bilong strongim as bilong en, na nem bilong ol 12-pela disaipel i stap long ol dispela ston.
Yumi i mas holim wankain bilip olsem ol aposel, na yumi i mas redi long mekim wok long kingdom bilong God. Yumi i mas prea strong olsem: “Bikpela, Man bilong wokim haus, yu mas hariap long mekim wok!”
SAMPELA TINGTING
Dispela tok long 12-pela aposel, na dispela tok long 12-pela ston, na 12-pela dua, na 12-pela nem long Kamapim Tok Hait, i soim yumi wanem samting long Buk Baibel, na pasin bilong God yet?
Ritim: 1 Korin 15:1-11
Bikpela tok tru mi bin givim long yupela, em dispela tok mi yet mi bin kisim bipo. Em i olsem. Krais i bin i dai bilong rausim olgeta sin bilong yumi, olsem tok i stap long buk bilong God.
Na ol i putim em long matmat, na long de namba 3 em i kirap bek, olsem tok i stap long buk bilong God... Tasol maski mi mekim o ol arapela aposel i mekim, mipela olgeta i save autim dispela tok bilong Jisas i dai na i kirap bek. Na yupela i harim na bilipim. —1 Korin 15:3,4,11
Planti taim ol manmeri i ting olsem ol Kristen lain ol i lain bilong bihainim sampela gutpela tingting na save tasol.
Tasol yumi mas save olsem as bilong Kristen bilip em i ol samting i bin kamap bipo: Krais em i dai long sin bilong yumi. Ol i planim em. Em i kirap bek. Planti ol man i lukim em i stap laip. Sapos bilip bilong ol Kristen i samting bilong bihainim gutpela pasin tasol na bilong kisim gutpela tingting na save tasol, bilong wanem ol aposel i no stap olsem ol save man tru na ol i no wok long kisim gutpela skul tru long kain kain bikpela skul?
Nogat. Ol aposel i go long planti hap long dispela graun bilong autim wanem samting i tru, dispela samting ol i lukim: “Mipela i save olsem em i tru, bikos mipela i lukim long ai bilong mipela. Mipela i lukim em i dai long diwai kros. Mipela i lukim matmat bilong en. Mipela i save olsem em i dai, tasol bihain mipela i lukim em i stap laip gen. Mipela i tasim em, mipela i harim nek bilong em. Na mipela ol sin lain, mipela i go wantaim em antap long Maunten Oliv na lukim em i go antap long heven. Mipela i lukim long ai bilong mipela yet. Yupela i bilipim mipela o nogat?”
Em i tru, ol Kristen lain i save givim gutpela skul long pasin bilong laikim tru, na long bihainim olgeta gutpela pasin. Na em i gutpela samting. Tasol olgeta bilip bilong olgeta Kristen i sanap antap long olgeta samting i bin kamap bilong kisim bek yumi: Krais em i kam long graun, em i dai long sin bilong yumi, ol i planim em long matmat, na em i kirap bek. Dispela samting ol Kristen Sios i save autim. Dispela samting i bin kamap tru tru, na i stap olsem as bilong bilip bilong wan wan Kristen.
Sapos yu no bilip olsem ol dispela samting i bin kamap, hau bai yu i stap olsem memba bilong Kristen sios?
SAMPELA TINGTING
Sapos yu stori wantaim wanpela man i no stap wanpela Kristen, bai yu tokaut long as bilong bilip bilong yu olsem wanem?
Ritim: Aposel 1:15-26
Olsem na nau yumi mas makim wanpela man namel long ol man i bin wokabaut wantaim yumi long olgeta taim Bikpela Jisas i bin i go i kam wantaim yumi, stat long taim Jon i wok long baptaisim ol manmeri, na Jisas i kirapim wok bilong en na i kam inap long dispela de God i kisim Jisas na em i lusim yumi na i go antap. Yumi mas makim wanpela man i bin lukim dispela olgeta samting, na em i mas kisim wok wantaim mipela bilong autim tok long Jisas i kirap bek. —Aposel 1:21-22
Long dispela teks Pita i tokaut long ol mak na wok bilong ol aposel. Ol aposel i mas stap olsem wanem? Ol aposel ol i mas klia gut long wok bilong Jisas taim em i stap long dispela graun. Ol i lukim Jisas na kisim skul bilong Jisas. Sapos ol i no stap long graun taim Jisas i stap long graun, ol i no inap stap olsem aposel. Em i wok bilong ol aposel long tokaut klia olsem ol i lukim Krais em i kirap bek long ai bilong ol yet.
Planti manmeri i tok olsem ol narapela lain inap i stap olsem aposel. Tasol nogat. Ol aposel, long ai bilong ol yet, i mas luksave olsem Jisas i kirap bek na i stap laip, na tokaut long dispela. Olsem na, Bikman bilong ol, Jisas, i givim dispela wok long ol, na Nupela Kontrak i putim ples klia olsem ol aposel yet i klia olsem dispela em i wok bilong ol.
Em i tru, yumi olgeta i mas tokaut long pawa bilong God na wok bilong em long kisim bek yumi. Tasol long Buk Baibel i bikpela samting olsem: long taim bilong kot ol i mas kisim i kam sampela man i bin lukim wanem samting i kamap, long autim tok. Ol man i bin lukim long ai bilong ol tasol inap long tokaut klia long wanem samting i bin kamap, na ol i mas tokaut klia na tok tru. Ol man i bin lukim wanem samting i kamap, ol i no inap long autim tok long laik bilong ol yet. Nogat, ol i mas tok tru long wanem samting i bin kamap tasol.
Na i wankain long ol aposel. Ol yet i lukim planti samting, na ol yet i autim wanem samting ol i lukim na harim. Na taim ol i mekim olsem, i olsem ol i wokim as bilong sios, bikos ol i stori long taim Jisas i kirap bek long matmat na dispela samting ol i bin lukim long ai bilong ol yet. Na ol lain i bilipim dispela tok bilong ol aposel, ol yet i stap olsem memba long dispela Kristen Sios i bihainim ol skul bilong ol aposel.
SAMPELA TINGTING
Taim yumi klia olsem ol aposel i autim tok long wanem samting ol i lukim long ai bilong ol yet, dispela i strongim bilip bilong yumi olsem wanem?
Ritim: Hibru 6:13-20
Samting God i tokim yumi long wetim, dispela i stap olsem gutpela strongpela anka bilong laip bilong yumi. Dispela anka i go insait olgeta long Rum Tambu Tru, baksait long bikpela laplap ol i bin hangamapim long tempel. Jisas i go paslain long yumi insait long dispela rum, bilong helpim yumi, long wanem, em i kamap hetpris wankain olsem Melkisedek, na em bai i stap hetpris oltaim oltaim. —Hibru 6:19-20
Wanpela sip i bungim bikpela win long taim em i stap namel long solwara. Ol boskru bilong sip i tromoi anka bilong em i go daun. Taim dispela anka i go daun, ol man long sip i wok long prea strong tru olsem dispela anka bai strong tru daunbilo long ples hait, na holim sip gut.
Em i dispela kain tok piksa yumi kisim long book Hibru. Tasol anka bilong yumi i no go daunbilo long ples hait. Sens bilong anka bilong yumi i go antap tru long ples hait. Ol i go insait olgeta long Rum Tambu Tru, baksait long bikpela laplap ol i bin hangamapim long tempel. I min olsem, sens bilong anka i go long ples God i stap long em, dispela ples Jisas i go insait long em, paslain long yumi. Anka bilong bilip bilong yumi i stap long han bilong Jisas. Bikos Jisas i stap wantaim God Papa, yumi i gat graun bilong holim anka bilong yumi. Wok bilong Jisas em i mekim pinis, na wok bilong em i go yet, dispela samting i olsem strongpela graun i stap olsem as bilong olgeta hop bilong yumi.
Yumi bai i bungim ol “strongpela win” long laip bilong yumi. Yumi bai bungim hevi na dispela win nogut bai tromoi yumi i go long kain kain hevi. Tasol, sapos wok bilong Jisas na namba bilong em tu i stap olsem as bilong hop bilong yumi, orait bai yumi i stap gut — anka bilong yumi bai strongpela tru. Olsem tasol bilip bilong yumi i tru – olgeta samting bai wok long mekim gut long yumi, na yumi bai win tru long las de bikos Krais i stap wantaim Papa bilong em. Em i olsem dispela graun i holim strong anka bilong yumi.
As bilong bilip bilong yu em i husat? Husat i olsem graun i holim anka bilong yu? Planti manmeri long dispela graun i no gat hop, ol i no gat strongpela anka. Tasol sapos Jisas i stap olsem anka bilong yu – wok em i mekim pinis na namba bilong em long nau – yu no inap lus!
SAMPELA TINGTING
Taim yu bungim ol “strongpela win” long laip bilong yu, dispela tingting bai helpim yu olsem wanem?
Ritim: Aposel 1:6-14
Tiofilus, long dispela buk bipo mi raitim, mi raitim tok long olgeta samting Jisas i bin mekim na long olgeta skul em i bin givim long ol manmeri, long pastaim tru na i kam inap long dispela de God i kisim em i go antap... —Aposel 1:1-2
Namba wan buk Luk i raitim yumi save kolim Gutnius bilong Luk. Long dispela namba wan buk bilong em, Luk i raitim tok long olgeta samting Jisas i bin mekim na long olgeta skul em i bin givim long ol manmeri. Long dispela buk Aposel, Luk i wok long stori sampela moa long wok Krais i mekim na long olgeta skul em i givim taim em i go antap long heven pinis.
Namba wan buk bilong em i stori long wok bilong Jisas taim em i stap long dispela graun. Dispela wok i stat long ples bulmakau long Betlehem na i pinis long taim Krais i go antap long heven. Na dispela namba tu buk bilong Luk, Aposel, i stori long wok bilong Jisas taim em i stap long heven. Dispela wok i kirap long taim em i go antap long heven na i go inap long tude taim yumi i ritim ol dispela tok. Olsem na Luk i mekim planti tok liklik long taim Krais i go antap long heven, bikos em i laik stori long wok bilong Krais long heven — na dispela wok i no pinis yet.
Sampela Kristen i ting olsem buk Matyu, Mak, Luk na Jon tasol i stori long ol wok Jisas i mekim na ol skul Jisas i givim. Tasol dispela em i no tru. Ol buk olsem Aposel na ol pas long Nupela Testamen tu i stori long wok bilong Jisas. Sapos yumi i ting olsem ol dispela buk i stori long wok bilong ol Aposel olsem Peter, Jems, John, na Pol tasol, i min olsem yumi i paul long wok Jisas i mekim long heven.
Nupela Kontrak i tok olsem, taim Jisas i pinisim wok bilong em long dispela graun, em i go antap long heven na sindaun long sia king. Na long disepela hap em i wok yet long kisim bek ol lain bilong em. Wok bilong em long heven i no wankain long wok bilong em long graun, tasol Krais i mekim wok yet na em i givim skul tu. Ol wok na ol tok bilong Bikpela i stap long olgeta buk i long Nupela Kontrak. I no Matyu, Mak, Luk na Jon tasol.
Pastaim yumi mas save long Bikpela em i husat tru – wanem samting em i bin mekim na em i wok yet long mekim. Na bihain long dispela bai yumi i klia gut long Buk Baibel em i wanem samting, na long sios em i wanem samting.
SAMPELA TINGTING
Yu save ting olsem buk Aposel em i stori bilong Jisas, o nogat?
Ritim: Luk 24:44-53
Na ol i brukim skru na lotu long em. Na ol i amamas tru na ol i go bek long Jerusalem.
— Luk 24:52
Planti manmeri i save long sampela samting long taim Krais i kam long dispela graun olsem bebi, na ol i save tingim dispela taim long Krismas. Tasol planti manmeri i no klia long taim Krais i go antap long heven. Planti manmeri i no makim wanpela de long tingim taim Krais i go antap long heven. I no gutpela olsem planti lain i no tingim dispela de, na insait long sios em i no gutpela sapos yumi i no tingim dispela de.
Bilong wanem ol Kristen i no save amamas long tingim dispela taim Krais i go antap long heven? Em i taim bilong amamas tru! Taim Krais i kam long dispela graun em i daunim em yet; tasol, taim em i go antap long heven, em i kisim biknem na glori long dispela. Taim Maria i karim Jisas olsem wanpela bebi, dispela samting i kirapim laip bilong em long graun, na dispela laip bilong em i pinis long dai bilong em. Tasol taim Krais i go antap long heven, em i go olsem wanpela king, na em bai i winim olgeta ol birua bilong em. Olsem na, em i gutpela sapos sios i tingim na selebretim taim Krais i go antap long heven!
Yumi man, yumi i save amamas long kirapim sampela wok samting, tasol planti taim yumi i lus tingting long mekim wok na long pinisim wok tu. Tasol yumi i mas klia olsem taim bilong Krais long kam long dispela graun, na taim bilong em long go antap long heven, na taim bilong em bilong kam bek gen, olgeta dispela samting i olsem wan wan hap long wok bilong em na wok bilong God long sanapim kingdom bilong em. Na sapos ol dispela samting i olsem bikpela wok bilong God husait i pulap long laikim tru na pawa na save bilong em, bilong wanem yumi i no save tingting tumas long dispela? Em i bikpela samting stret!
Krais i go antap long heven, na bilip bilong yumi ol Kristen i sanap antap long dispela samting. Em i as bilong hop bilong yumi long dispela gutpela taim bai i kamap bihain. Yu mas amamas! Bikpela em i King!
SAMPELA TINGTING
Tingting gut long dispela de Krais i go antap long heven. Bilong wanem dispela de i mas i stap olsem bikpela de bilong amamas?
Ritim: Jon 20:11-18
Na Jisas i tokim em olsem, “Yu no ken holim mi, long wanem, mi no i go antap yet long Papa bilong mi. Tasol yu mas i go long ol brata bilong mi na tokim ol olsem, mi bai go antap, na mi go long Papa bilong mi na Papa bilong yupela. Na mi go long God bilong mi na God bilong yupela.” —Jon 20:17
Maria bilong taun Makdala (Luk 8:2) i laikim Jisas tumas. Jisas i mekim planti samting long helpim em. Olsem na em i sanap i stap ausait klostu long matmat long lukautim bodi bilong em. Tasol em i lukim matmat i op na bodi bilong Jisas i lus pinis, na em i paul olgeta.
IolsemMariaemiaipaslongbodi–emikraiistapnaaiwaraipasimaibilongem. Naiolsememi aipas long spirit tu – em i no bilip olsem Jisas i kirap bek long matmat. Olsem na, em i no luksave long Jisas, na em i ting Jisas em i man bilong bosim gaden. Tasol taim Jisas i autim nem bilong em olsem, “Maria,” wantu em i luksave long em. Na em i amamas nogut tru long luksave long em, na ating em i bin tromoi em yet long nek bilong em.
Tasol Krais i tokim em, “Yu no ken holim mi.” Maria i no klia olsem sampela senis i bin kamap. Jisas i kamap klostu long namba tu hap long wok bilong em, na dispela bai winim dispela taim long bipo. Jisas em bai i go antap long Papa bilong em.
Maria i no ken holim Jisas, tasol em i mas mekim wok bilong em. Jisas i givim wok long Maria. Long namba tu hap bilong wok bilong Jisas, Krais bai yusim ol lain bilong em long kain kain wok bilong em. Na dispela wok Jisas em i givim Maria i putim ples klia wanem samting i kamap taim Jisas em i dai na kirap bek: ol disaipel i kamap olsem “brata” bilong Jisas. Dispela God bilong Jisas em i dispela God bilong ol disaipel tu, na dispela Papa bilong Jisas em i dispela Papa bilong ol disaipel tu.
Maria i no inap klia long olgeta wok bilong Jisas. Tasol em i save olsem Jisas i stap laip, olsem na em yet i mas mekim wok bilong em.
Maria i no ken wari. Ating em i mas bel hevi liklik bikos em i no inap holim em, tasol Krais i go long wanpela ples we em inap long holim Maria olgeta taim- na em inap long holim olgeta lain i laikim em tru.
SAMPELA TINGTING
Sampela taim yumi i save wok long holim Jisas, olsem Maria i laik holim em?
Ritim: Jon 6:1-11
Tasol mi tok tru long yupela, mi lusim yupela na mi go, em i bilong helpim yupela.
— Jon 16:7
Taim Jisas i tok, “Tasol nau mi go long Papa, em i bin salim mi na mi kam,” ol disaipel i bel hevi. Ol i amamas long stap wantaim Bikman bilong ol, na ol i laikim em tru. Tasol ol i no klia olgeta long as bilong wok bilong em na rot em i mas bihainim long mekim wok bilong em.
Dispela i soim olsem, sapos Holi Spirit i no helpim yumi, yumi bai paul olgeta long tingting na wok bilong God. Taim Holi Spirit i stap wantaim yumi, bai yumi i bihainim tingting bilong God. Taim Pentikos i no kamap yet, ol disaipel i wok long givim hevi long Jisas. Tasol taim Pentikos i kamap pinis, ol i stat long mekim wok bilong God, olsem helpim bilong em. Yumi i no inap mekim wok bilong God sapos Holi Spirit i no stap wantaim yumi.
Olsem na Krais i mas i go long heven, na em i gutpela olsem em i go long heven – em i lusim hap bilong pait na em i go long hap bilong bosim pait. Na taim em i go na stap long han sut bilong God Papa, em inap long salim Spirit bilong em long ol lain bilong em. Sapos yumi i no kisim pawa bilong spirit, i olsem yumi bai i stap nating long dispela graun. Tasol, taim yumi i kisim Holi Spirit pinis, yumi inap mekim wok long bihainim tingting bilong Bikpela.
Krais i mekim wok long dispela graun, na em i mekim wok long heven tu. Taim em i klostu long pinisim wok bilong em long graun, em i redim ol disaipel bilong em long namba tu wok bilong em long heven. Em i save olsem klostu em bai i go na sindaun long sia king long heven. Na em i save olsem em bai i salim i kam Holi Spirit, man bilong givim bel isi, na man bilong lukautim lain bilong God. God i bin makim taim bilong Holi Spirit i kam long dispela graun, na Jisas i mas i go antap long heven pastaim.
Taim Jisas i go antap long heven dispela i makim wanpela nupela taim long wok bilong Jisas long kisim bek ol lain bilong em. Dispela ol Kristen i gat laik long Jisas i stap yet long dispela graun, ol i no klia gut long wok bilong God bilong kisim bek yumi. Laip bilong yumi i winim laip bilong ol lain i stap long graun taim Jisas i stap long graun bikos yumi i kamap klostu moa long las de. Em i gutpela olsem Jisas em i go. Tasol, sapos yumi i no kisim lait bilong Spirit, bai yumi i no inap save olsem taim Jisas em i lusim yumi em i samting bilong helpim yumi na olgeta lain bilong em.
SAMPELA TINGTING
Taim yu tingting long wok bilong Jisas, yu save amamas bikos em i stap long heven?
Ritim: Luk 24:36-48
Na em i helpim ol long tingting gut long as bilong ol tok i stap long buk bilong God.
—Luk 24:45
Long dispela 40 de namel long taim Jisas i kirap bek long matmat na taim em i go antap long heven, em i go bungim ol disaipel bilong em. Ol disaipel i klia olgeta olsem dispela man em i Jisas, wankain olsem ol i save long em bipo long dai bilong em. Jisas i larim ol i lukim ol mak bilong ol nil long han bilong em long helpim bilip bilong ol.
Tasol i no olsem olgeta samting i wankain tasol. Nau, Jisas i no stap wantaim ol olgeta taim. Taim Jisasikamaplongol,olinoklialongwanemhapemikamlongem. Taimemilusimol,olinoklia long wanem hap em i go long em.
Sindaun bilong Krais wantaim ol disaipel bilong em i senis. Tru, laikim tru i stap yet na ol i klia long dispela. Tingim ol tok bilong Jisas: “Bel bilong yupela i ken i stap isi.” Tasol Jisas em i senis na i kamap narakain. Em i gat bikpela strong na glori. Em i dai pinis na kirap gen, na ol disaipel bilong em i luksave long bikpela glori bilong em. Ol i brukim skru na lotu long em.
Tasol long dispela 40 de, ol disaipel i kisim bikpela save tru long Jisas. Long dispela taim em i helpim “ol long tingting gut long as bilong ol tok i stap long buk bilong God.” Em i namba wan taim bilong ol long klia gut long as bilong dai bilong em. Ol i luksave olsem dai bilong Krais i wanpela ofa i go long God, na taim Jisas i kirap bek long matmat God i mekim klia olsem em i amamas long ofa bilong Krais. Taim ol disaipel i harim ol dispela tok, ol i kamap klostu moa long Jisas, na dispela i winim taim em i no dai yet na ol i stap wantaim Jisas long san na long nait.
Yumi no gat nid long wokabaut long rot bilong Jisas long Jerusalem. Yumi i ken kamap klostu long em na wanbel wantaim em, taim em i helpim yumi long tingting gut long as bilong ol tok i stap long Buk bilong God.
SAMPELA TINGTING
Askim Spirit bilong God long helpim yu i klia gut long as bilong ol tok long Buk Baibel taim yu ritim.
Ritim: Aposel 1:1-5
Pastaim em (Jisas) i bin karim pen na i dai, na bihain em i kisim laip gen na i kamap long ol aposel. Na em i mekim planti samting, bilong ol i ken save tru, em i stap laip. Inap long 40 de ol i lukim em, na em i tokim ol long kingdom bilong God. — Aposel 1:3
Jisas Krais i stap laip. Yumi i ken save long dispela bikos ol aposel i lukim em bihain long dai bilong em. Ol i lukim em planti taim insait long dispela 40 de. Ol i toktok wantaim em, tasim em, na ol i kaikai wantaim em. Na moa, Krais i skulim ol long kingdom bilong God.
Yumi save lus tingting long ol man i dai pinis, tasol ol man i stap laip yet yumi inap bung wantaim ol. Na tude, yumi inap long bung wantaim Bikpela bikos Jisas i stap laip. Em i bikpela samting stret long bungim Krais, na yumi no inap lus tingting long em. Krais i stap laip na em i save givim laip. Pasin bilong bung na sindaun wantaim Krais i winim pasin bilong bung na sindaun wantaim ol narapela, na em i naispela tru na em bai i stap oltaim.
Yumi ken save olsem Jisas i stap laip, bikos em i stap laip insait long bel bilong yumi. Taim Krais i givim laip long yumi, yumi bai i klia gut long dispela tok bilong Buk Baibel: “Buk bilong God i tok olsem, ‘Namba wan man, Adam, i bin kisim laip.’ Tasol narapela Adam (Jisas) i kamap bihain tru, em i bin kamap spirit bilong givim laip long man” (1 Korin 15:45). Jisas em i spirit bilong givim laip!
Na yumi ken save olsem Krais i stap laip bikos Jisas em i soim em yet long ol lain i save olsem em i bin dai. Long plen bilong God, em i soim em yet inap long dispela 40 de long ol lain i save olsem em i bin dai, long putim ples klia olsem em i stap laip tru tru. Ol man i lukim dispela na tokaut long laip bilong em, ol i kamap olsem as bilong sios.
Yumi no ken tok olsem yumi bai bilip long Krais taim yumi lukim pawa bilong em pinis. God i tok olsem yumi mas bilip long em pastaim, na bihain bai yumi lukim em. Taim yumi bilipim dispela tok bilong ol man i lukim em i stap laip long dispela 40 de, orait yumi bai klia tru olsem Krais i stap laip.
SAMPELA TINGTING
Yu inap save olsem Krais i stap laip tude olsem wanem?
Buk Song 103:19-22
Yupela olgeta samting Bikpela i bin wokim na i stap long olgeta hap, na em yet i stap king bilong yupela, litimapim nem bilong Bikpela. Na mi tu mi mas litimapim nem bilong em.
—Buk Song 103:22
Sapos famili bilong yu i Kristen, ating yu bin harim dispela tok bipo: Wok bilong yumi em i bilong litimapim nem bilong God. Long wok bilong yu na long taim bilong pilai, yu mas litimapim nem bilong Bikpela. Ol abus, na ol plaua, na gras samting long dispela graun i stap bilong litimapim nem bilong God. Olgeta samting i stap bilong givim glori long God.
Na God i tokim yumi long mekim olsem bikos em i laikim yumi tru. Yumi bai amamas tru taim yumi inap tokaut, “Litimapim nem bilong Bikpela. Mi tu mi mas litimapim nem bilong em.” Bel bilong yumi i pulap long amamas long dispela taim, na yumi tok tenkyu long God.
I gat dispela lo i stap namel long laip bilong yumi ol man: Sapos yumi no kisim amamas bilong yumi i kam long God tasol, orait yumi i no inap amamas. Yumi bai i bel nogut tasol. Planti taim yumi inap lukim ol lain i wok long tok nogut long kain kain samting. Ol i wok long wari long laip bilong ol yet. Tasol taim ol i wok long helpim ol narapela , ol i no amamas tumas. Em tru, sapos yumi wok long amamasim yumi yet, bai yumi i no inap amamas tru.
Yumi stap long dispela graun bilong litimapim nem bilong God. Na taim yumi givim yumi yet long God, bai yumi wok long helpim ol narapela manmeri long dispela graun tu. Olgeta samting na olgeta manmeri long dispela graun i mas litimapim nem bilong Bikpela.
Laip bilong yumi bai pinis long sia king bilong God. Na yumi mas lainim pasin bilong singim dispela singsing bilong presim God taim yumi i wokabaut long dispela rot i go long las de.
SAMPELA TINGTING
Yu yet yu save singim ol song bilong litimapim nem bilong Bikpela taim yu wokabaut long rot i go long Nupela Graun?
Buk Song 103:6-18
Laip bilong yumi manmeri i sotpela tru olsem gras... Tasol Bikpela i save marimari oltaim oltaim long ol manmeri i aninit long en... sapos ol i bihainim kontrak bilong Bikpela.
—Buk Song 103:15, 17-18
Dispela Buk Song i autim ol naispela tok stret long marimari bilong God. Em i gat bikpela laik tru long ol, olsem skai i antap tru long graun. Hap bilong sankamap em i no klostu long hap bilong san i go daun. Em i longwe tru. Olsem tasol God i save rausim sin bilong yumi na sin i stap longwe tumas. Papa i save sori long ol pikinini bilong en. Olsem tasol Bikpela i save sori long olgeta manmeri i pret long em. Na long wok bilong Jisas Krais, marimari bilong em na laikim tru bilong em i kamap ples klia tru. Yumi ken kisim strong wantaim olgeta manmeri bilong God, inap long yumi olgeta i ken save gut long pasin bilong Krais long laikim tru ol arapela, em i bikpela tru, na i go longpela moa, na i go antap tru, na i go daun moa (Efesus 3:18-19).
Man i raitim dispela Buk Song i stori long marimari bilong God i go long ol sin lain olsem yu na mi. Olgeta man i pulap long sin; tasol, ol i no gat strong tu. “Laip bilong yumi manmeri i sotpela tru olsem gras. Yumi stap sotpela taim olsem plaua bilong gras na yumi dai. Win i naisim plaua na em i pundaun na ol man i no moa lukim plaua i stap” (lain 15-16). Yumi no gat strong. Laip bilong yumi i sotpela tru.
Tasol, maski laip bilong yumi i sotpela tru, yumi lukim marimari bilong kontrak bilong God pinis – “Tasol Bikpela i save marimari oltaim oltaim!” (lain 17). Olgeta sotpela laip bilong yumi lain bilong em i aninit long marimari bilong God, na dispela marimari i stap oltaim oltaim. Marimari bilong God i olsem renbo i wok long raunim yumi olgeta taim.
God i wokim wanpela kontrak wantaim yumi na ol pikinini bilong yumi tu. Na yumi i pas wantaim God, dispela God i stap oltaim oltaim, dispela God i marimari long yumi. Olsem na laip bilong yumi i gat mining bilong em. Sapos nogat, orait bai laip bilong yumi i wankain olsem laip bilong gras o plaua bilong gras. Tasol kontrak bilong God i save givim laip long yumi na bai yumi stap aninit long marimari bilong God oltaim oltaim.
Sapos yumi laik kisim laip, yumi mas bihainim kontrak bilong God!
SAMPELA TINGTING
Tok tenkyu long God long kontrak bilong em.
Buk Song 103:1-5
Mi mas litimapim nem bilong Bikpela. Yes, bodi na tingting na olgeta samting i stap insait long mi i mas litimapim gutpela nem bilong Bikpela. —Buk Song 103:1
Yumi mas tokim yumi yet long litimapim nem bilong God bikos em i gutpela samting stret long presim Bikpela. Pasin bilong litimapim Nem bilong God i winim pasin bilong prea. Bikos taim yumi dai, na God i bekim olgeta prea bilong yumi pinis, yumi bai i stap na litimapim Nem bilong God i go i go.
Taim yumi lukluk long Buk Song 103 bai yumi klia tru long pasin bilong God long lukautim yumi, long stap wantaim yumi long olgeta taim. Em i bin mekim ol gutpela samting long yumi. Yumi mas litimapim nem bilong Bikpela. I no samting bilong autim long maus tasol. Nogat. Bodi na tingting na olgeta samting i stap insait long yumi em ol i mas litimapim Nem bilong Bikpela.
Em i save lusim olgeta sin bilong yumi! Long marimari bilong em yet, God i rausim olgeta sin bilong yumi. Nau yumi i ken wanbel wantaim Bikpela gen bikos sin bilong yumi i lus pinis. Yumi kisim laip. Mi mas litimapim nem bilong Bikpela!
Na yumi mas presim God bikos em i save lukautim yumi long dispela graun. Em i save givim olgeta gutpela samting long yumi. Tok tenkyu long God bikos yu stap laip. Tok tenkyu long God taim em i oraitim sik bilong yu. Em i ol presen i kam long God. Em i save strongim yu, na yu stap strong olsem tarangau. God i save strongim yumi. Mi mas litimapim nem bilong Bikpela!
Yumi nidim God. Long strong bilong yumi yet, yumi samting nating tasol. God yet i givim olgeta samting long yumi. God yet i lusim sin bilong yumi na em i lukautim yumi long dispela graun. Em i save marimari na sori moa yet long yumi. Yumi i pulap long sin na pe nogut bilong dispela em i dai na hel, tasol God yet i kisim bek yumi na yumi stap laip. God em i God bilong inapim olgeta tok bilong em. Marimari bilong em i no inap pinis. Mi mas litimapim nem bilong Bikpela
Em i gutpela samting long litimapim nem bilong God. Em i winim pasin bilong askim God long kain kain samting long prea. Tru, yumi mas mekim tupela wantaim. Taim yumi prea na askim God long kisim sampela samting, i olsem han bilong yumi i op na i wetim God i ken kam na pulapim han bilong yumi. Tasol taim yumi tok tenkyu long God na litimapim nem bilong em, yumi givim samting i go bek long God. Yumi givim dispela samting long God bikos em i givim yumi olgeta samting pinis.
SAMPELA TINGTING
Ritim dispela Buk Song na litimapim nem bilong Bikpela!
Buk Song 87
Bai mi tok long Jerusalem olsem, ‘Em i ples bilong olgeta lain manmeri.’ — Buk Song 87:5
Planti lain bilong yumi i ting olsem as ples bilong yumi em i bikpela samting stret. Em i nambawan samting. Yumi save laikim tru ol wantok bilong yumi tasol, na yumi stap sef wantaim ol wantok bilong yumi, maskim wanem samting i kamap. Sapos bikpela pait i kirap, wantu yumi bai bihainim ol wantok bilong yumi na helpim ol long pait, maski ol i mekim kranki pasin o nogat.
Tasol dispela Buk Song i gat sampela narapela tingting long skulim yumi. Long dispela Buk Song, God i autim nem bilong planti lain i save bihainim tok bilong em na ol i kam long kain kain kantri. Em i kaunim ol Isip na Babilon na Filistia na Tair na Itiopia. Na harim! Ol dispela lain i olsem birua tru bilong Israel. Ol i bin birua longpela taim stret long ol manmeri bilong God. Tasol ol dispela lain manmeri bai go insait long dua bilong tempel! Ol bai kamap olsem ol i lain stret bilong Jerusalem, dispela siti bilong God. I olsem ol i kamap as ples bilong Jerusalem stret.
Dispela Buk Song i olsem tok piksa long sios bilong Jisas Krais, dispela sios em i stap long olgeta kantri. Lain bilong planti kantri tru i stap lain tru bilong God.
God yet i kisim yumi i kam insait long Krais, na nau laip bilong yumi i senis olgeta. As ples bilong yumi i no bikpela samting nau. Yumi no stap wanbel wantaim ol wantok bilong yumi tasol. Wantok tru bilong yumi em i ol lain bilong Krais, maski long as ples bilong ol. Maski ol i lain long nambis, long highlands, long Enga, long Simbu, o long narapela kantri olsem Australia o Canada o China. Sapos yumi stap insait long famili bilong God, dispela em i famili tru bilong yumi na ol wantok tru bilong yumi. Yumi gat wanpela Papa tasol i stap, na yumi stap olsem brata na susa bilong wanpela narapela.
Yumi ol lain bilong God i gat wanpela as ples tasol, na yumi wokabaut i go long wanpela nupela ples tasol. Yumi wokabaut i go long Nupela Jerusalem!
SAMPELA TINGTING
Yu yet yu amamas stret long stap insait long sios bilong God, dispela famili i kam long kain kain hap bilong dispela graun?
Buk Song 82
God i stap namba wan long bikpela miting long heven. Ol hetman i bung na God i tokaut long tingting bilong en. —Buk Song 82:1
Ol dispela hetman i olsem ol jas na king na hetman bilong dispela graun. I gat wanpela Hetman tru i stap long bosim dispela graun – em i God bilong yumi. Olgeta man na meri i wankain long ai bilong God. I no gat bikman o rabisman long ai bilong God. Olgeta i wankain tasol. Na i no gat wanpela inap bosim narapela sapos God yet i no givim namba long em.
Olsem na ol papaman, tisa, bosman, na tu ol jas, king, kwin na ol man i raitim ol lo bilong kantri ol i gat namba bikos ol i kisim dispela namba long God. Ol i gat namba inap long bosim liklik lain, tasol God i bosim olgeta lain long dispela graun.
Na ol hetman i mas aninit long God na ol i mas redi long bekim God long olgeta samting ol i bin mekim. God yet bai kotim ol. Yumi harim tingting bilong God long dispela Buk Song: “Yupela i save kot giaman, yupela i save grisim ol man nogut. Yupela i mas helpim ol rabisman na ol manmeri i stap nogut.”
Taim ol hetman i lus tingting long God husait i givim dispela namba long ol, ol bai i mekim kranki pasin na bagarapim ol lain i no gat namba. God i givim dispela pawa long ol, long ol i ken yusim liklik taim tasol bilong mekim wok bilong em. Na ol hetman i mas tokim God long olgeta samting ol i bin mekim long namba bilong ol, dispela namba God yet i givim ol. Spirit bilong God na Tok bilong em i mas stiaim ol hetman.
Olsem na, em i wok bilong sios bilong God long givim strongpela tok long ol hetman i wok long bagarapim dispela namba God i givim ol. Olgeta kantri long dispela graun i mas aninit long God na Tok bilong em. “God, yu mas kam na bosim olgeta manmeri bilong graun. Olgeta lain manmeri i bilong yu tasol” (lain 8).
Em i wok bilong yumi Kristen long aninit long ol hetman God yet i givim yumi. Yumi mas bihainim tok bilong ol, bikos God yet i givim namba long ol. Na yumi no ken pret long tokim ol long bihainim tok bilong God taim ol i mekim wok bilong ol olsem hetman. Ol i mas helpim ol tarangu lain na ol pikinini, papa bilong ol i dai pinis. Na ol man i karim hevi na i no stap gut, ol i mas mekim gut long ol. Na ol manmeri i stap nogut, ol i mas kisim bek ol long han bilong ol man nogut.
SAMPELA TINGTING
Hau bai yumi inap strongim ol hetman bilong kantri bilong yumi long aninit long tok bilong God?
Buk Song 72:1-11
Na taim em i stap yet ol manmeri i ken bihainim stretpela pasin tasol. Taim mun i lait yet, planti gutpela samting i ken kamap. —Buk Song 72:7
Long dispela prea, yumi askim God long larim kingdom bilong Jisas Krais i kam. Dispela em i kingdom bilong gutpela sindaun na bel isi. Jisas yet em i king bilong kamapim gutpela sindaun na bel isi.
Dispela Buk Song i autim tok bilong “stretpela pasin” na “gutpela samting i ken kamap” wantaim. Dispela tupela samting i save kamap wantaim. Long mekim stretpela pasin long ol lain i gat ol hevi, sampela taim ol man nogut i mas kisim bagarap. Ol rabisman i nidim helpim bilong God, na bai bel isi i kamap. Ol gutpela samting i no inap kamap sapos stretpela pasin i no stap.
Sampela Kristen i ting olsem, kingdom bilong Bikpela Jisas em i samting bilong wokabaut bilong yumi long spirit tasol. Dispela em i no tru. Kingdom bilong Krais em i samting bilong dispela graun tu. Long dispela graun tu, yumi mas wok long mekim ol stretpela pasin, olsem na ol gutpela samting i ken kamap.
Yumi olgeta i mas bihainim Jisas Krais, em i king bilong yumi, dispela king bilong gutpela sindaun na bel isi. Olsem na, yumi mas wok long bihainim em long olgeta de. Dispela i min olsem yumi no ken pait wantaim meri bilong yumi sapos yumi laik stap bel isi wantaim God. Na yumi no inap poromanim God long stretpela pasin bilong em sapos yumi wok long mekim nogut long ol rabisman o yumi wok long grisim ol man nogut. Sapos yumi laik wanbel wantaim Krais, yumi mas bihainim olgeta laik bilong em.
Dispela nupela taim bai kam. Krais bai kam bek na yumi mas prea long dispela taim i ken kamap hariap. Tasol pasin bilong yumi mas soim klia olsem yumi wetim Krais.
Long Krais yumi i win pinis. Tasol yumi mas wok long pait yet long bel bilong yumi long olgeta hap bilong dispela graun. Yumi mas autim tok bilong God long haus bilong yumi na long ol taun bilong yumi tu. Jisas Kais bai i kam bek.
SAMPELA TINGTING
Askim God long helpim yu long autim tok bilong em long haus bilong yu, na long wok bilong yu, na long olgeta narapela hap yu save go long en.
Buk Song 68:15-20
God i bin i go antap long maunten i antap moa, na em i kisim bikpela lain kalabus i go wantaim em. Em i bin kisim ol presen bilong ol bikhetman i bin pait long em.
— Buk Song 68:18 God i go antap tru, na em i kisim bikpela lain kalabus i go wantaim em. Na em i givim ol
presen long ol man. — Efesus 4:8
I olsem yumi i lukim wanpela bikpela man bilong pait, em i kam bek long haus bilong em taim em i winim wanpela bikpela pait pinis. Em i kisim bikpela lain kalabus i kam wantaim em, na em i soim ol presen em i kisim pinis long ol lain bilong em long kantri bilong em. Na ol lain bilong em i amamas stret.
Long dispela Buk Song yumi harim stori bilong God taim em i winim ol birua bilong em long Olpela na Nupela Kontrak wantaim. Buk Song 68 i stori long wok bilong Bikpela bilong bagarapim ol nesen i bikhet long em. God i rausim ol na kisim ol presen bilong ol bikhetman i bin pait wantaim em.
Tasol long Nupela Kontrak, yumi harim stori bilong Jisas, em i win, na em i go antap long heven. Pait i pinis nau, na em i go bek long Papa bilong em. Em i soim pawa na glori bilong em taim em i go antap long heven. Em i winim ol samting nogut; em i winim Satan. Yes, ol spirit nogut i stap yet, tasol i olsem ol i stap long kalabus. Ol i kamap lain kalabus bilong Jisas: “God i go antap tru, na em i kisim bikpela lain kalabus i go wantaim em.”
Na dispela lain long Buk Efesus i no tok olsem dispela man bilong winim pait i kisim ol presen long ol narapela; nogat, em i givim ol presen long ol man. Bikos Krais em i win pinis, em i gat pawa bilong helpim ol lain bilong em i stap namel long pait yet. “Em i givim ol presen long ol man.”
Nambawan presen Krais i givim ol lain bilong em em i Holi Spirit bilong em, taim em i winim pait pinis. Long Spirit bilong em, em i givim strong na pawa long sios bilong em.
Na ol dispela presen i wok long strongim yumi. Yumi ken bilip olsem em bai i strongim yumi inap long taim dispela pait i pinis olgeta. Taim yumi lukluk long ol narapela memba long sios bilong Krais, bai yumi wari liklik. Planti taim ol lain bilong sios i no wanbel, na planti taim yumi i sakim tok bilong God. Tasol strong bilong yumi i kam long antap, long Krais. Krais i gat olgeta klos pait bilong givim yumi. Na em bai i givim ol presen long yumi na bai yumi inap long stap strong long dispela pait. Yumi bai win!
SAMPELA TINGTING
God i givim yu wanem ol presen bilong yusim long mekim wok bilong em?
Buk Song 67
God, yu ken marimari long mipela na mekim gut long mipela...Olsem na olgeta manmeri i ken save long pasin bilong yu. — Buk Song 67:1-2
Taim yumi prea, yumi save askim God long blesim yumi o long blesim narapela man o narapela samting. Yumi askim God long blesim gaden bilong yumi, famili bilong yumi, kaikai bilong yumi, pastor bilong yumi, kantri bilong yumi, na i go i go.
Tasol yumi save gut long mining bilong dispela tok “blesim,” o nogat? Ating planti bilong yumi em bai nogat.
Em i gutpela long askim God long blesim olgeta dispela samting, bikos yumi nidim blesing bilong Bikpela. Blesing bilong God i olsem God i mekim gut long yumi. Taim God i blesim wanpela man o wanpela samting, em i marimari long dispela man o dispela samting. Na sapos God i blesim yumi, laip bilong yumi bai gutpela tru. Ol lain God i no blesim, ol bai i lus. Sapos God i no blesim graun, bai kaikai i no inap kamap long dispela graun.
Dispela Buk Song i askim God long blesim Israel: “God, yu ken marimari long mipela na mekim gut long mipela.” Na bilong wanem dispela man i askim God long blesim Israel? “Olsem na olgeta manmeri i ken save long pasin bilong yu.” Sapos Israel i kisim blesing bilong God, sapos God i marimari long Israel na mekim gut long em, olgeta lain bilong graun bai i tok, “Litimapim nem bilong God bilong Israel.”
Glori bilong God em i nambawan samting. Dispela man i raitim dispela Buk Song, i no askim God long kisim ol blesing bikos ol i naispela samting bilong kisim tasol. Nogat, em i askim God long blesim Israel bilong nem bilong God i ken kisim olgeta glori na pres: “God, mi laik bai olgeta manmeri i ken amamas long yu na litimapim nem bilong yu.”
Bikpela, yu ken blesim olgeta manmeri bilong yu; blesim olgeta man o meri i ritim dispela buk. Blesim ol marit, blesim ol pikinini. Yu ken blesim ol lain i no marit tu. Blesim ol famili bilong mipela. Olsem na olgeta manmeri i ken save long pasin bilong God na litimapim nem bilong Yu!
SAMPELA TINGTING
Prea na askim God long blesim yu na famili bilong yu olsem na nem bilong em i ken kisim olgeta glori.
Buk Song 62
Mi save bilip strong long God wanpela tasol. Em wanpela tasol i save kisim bek mi na mi stap laip. — Buk Song 62:1
Devit i bilip tru long God. Em i wet long God wanpela tasol i helpim em (lain 5). Devit i bungim planti ol hevi, na em yet i mekim planti pasin nogut tu. Tasol em i go long God long kisim bel isi. Na em i gat laik long yumi olgeta i stap isi wantaim God.
Olsem na em i tok, “Yupela i mas autim olgeta hevi na olgeta tingting bilong yupela long em” (lain 8). Em i gat laik long yumi olgeta i prea long God. Em i no tokim yumi long prea hariap. Nogat, em i tokim yumi long “autim OLGETA hevi na OLGETA tingting bilong yumi long em,” na stap isi wantaim God. Sapos bel bilong yu i pulap long ol hevi na wari, yu mas autim olgeta dispela samting long God long kisim bel isi.
Yumi inap kisim bel isi long God, Devit i tok, bikos God wanpela tasol i save kisim bek yumi, na em wanpela tasol em i wasman bilong yumi. Yumi ken bilipim em. Taim yumi autim ol hevi bilong yumi long em, God bai i lukautim yumi. Bilipim Bikpela. No ken wok long kisim bel isi long ol manmeri bilong dispela graun, maski ol i man nating o bikman stret. Ol i man tasol. God tasol em i wasman bilong yumi, na em yet i save lukautim yumi.
Tasol planti taim yumi i bisi tru na yumi lus tingting long prea. Yumi ran long wanpela hap na hariap tru, yumi ran i go long narapela hap. Yumi stori long wanpela bikman na yumi stori long ol man nating. Yumi mekim wok i go i go. Planti taim insait long sios bilong yumi tu, pasin bilong yumi i kamap olsem Marta, dispela meri i bin tingting planti long wok, tasol em i lus tingting long harim tok bilong God. Yumi mas bihainim pasin bilong Maria, dispela meri i bin sindaun klostu long lek bilong Bikpela na harim toktok bilong em.
Pasin bilong prea na stap isi wantaim God, i mas kamap olsem bikpela samting insait long laip bilong yumi wan wan. Na dispela pasin bilong stap isi wantaim God i no tambuim yumi long mekim planti wok. Nogat, yumi mas mekim planti wok. Tasol long wok na long wokabaut bilong yumi long dispela graun, i mas kamap klia olsem yumi stap isi wantaim God.
Helpim bilong yumi i kam long wanem hap? Pasin bilong yumi mas soim ples klia olsem helpim bilong yumi i kam long God!
SAMPELA TINGTING
Yu save autim olgeta hevi na wari long yu long God? Na yu save stap isi wantaim God na harim tok bilong em long Buk Baibel?
Buk Song 46
God em i ples hait bilong yumi, na em i save strongim yumi oltaim. Em i stap klostu na i redi long helpim yumi long taim bilong bikpela hevi. — Buk Song 46:1
Dispela em i singsing bilong bilip. Man i raitim dispela song em i bilip long God, dispela God i stap bipo tru, i stap nau na bai i stap bihain taim tu. Bipo tru em i kamapim olgeta samting long dispela graun (lain 2-3). Olsem na yumi no ken pret long wanem samting i kamap olsem graun guria, o sapos maunten i pundaun namel long solwara, o biksi i pairap strong moa, kalap nabaut na sakim ol maunten. Dispela graun i bilong God; God i wokim dispela graun.
Na dispela God i bin stap wantaim ol lain bilong em long bipo (lain 4-7). Olsem na ol taun i no inap bagarap. Maski wanem ol hevi i wok long bagarapim sios, God bai strongim dispela sios. God i save stap wantaim sios bilong em; olsem na sios i no inap bagarap.
Na dispela God bai i kam bek. Ol bikpela pait bai i kamap. “Tasol Bikpela i Gat Olgeta Strong em i stap wantaim yumi.” Ol dispela hevi i olsem lek mak bilong God, soim olsem em bai i kam bek.
God em i strong bilong yumi! God yet em i ples hait bilong yumi! Em tasol i stap klostu long yumi, na em i redi long helpim yumi long taim bilong bikpela hevi.
Planti ol save man long tude i bilip olsem dispela graun bai bagarap bikos graun i wok long kamap hatpela tru, na ol i ting olsem bikpela tais bai i kamap bihain. Na yumi yet inap lukim ol guria na bikpela win na ol tais na ol narapela samting tu. Tasol yumi ken bilip long God. Em i stap. Em yet i bin kamapim dispela graun.
Na sios bilong God tu i gat planti hevi. Satan i laik daunim sios bilong God. Wanpela wokman bilong God, Martin Luther, i bin raitim dispela: “Sapos yumi bilipim strong bilong yumi yet, bai yumi i lus tru.” Tasol God em i strong bilong sios bilong em.
Na taim yumi tingting long wanem samting bai i kamap bihain, i luk olsem planti ol samting nogut i wok long kamap klostu klostu. Na yumi save wari liklik, tasol yumi mas bel isi tu. Maski olgeta man long dispela graun i ranawe long yumi, yumi no ken pret. God bai i kam. Klostu nau ol pait bai pinis. God yet bai rausim ol birua bilong em. “Yupela i no ken pait moa. Yupela i mas save gut long mi, mi God tru.” Stap isi. God em i God.
SAMPELA TINGTING
Yu yet yu bilipim dispela God i Gat Olgeta Strong?
Buk Song 44:17-26
Mipela i stap manmeri bilong yu, olsem na long olgeta taim ol i save kilim mipela i dai. Ol i lukim mipela i olsem sipsip bilong kilim i dai tasol — Buk Song 44:22; Rom 8:36
Ol lain bilong God i mas karim diwai kros bilong ol inap long taim ol i kamap nupela long nupela graun. Long Olpela Kontrak ol i save mekim olsem tu. Na ol i bel hevi stret bikos i luk olsem ol man nogut i winim ol, na ol yet i karim bikpela hevi tasol.
I gat sampela pastor bai i tok olsem: “Yu kisim ol hevi bikos yu yet yu mekim sin.” Tasol taim ol poroman bilong Job i mekim dispela kain tok long em, Job i agenstim tok bilong ol. Na man i raitim dispela Buk Song i no bilipim dispela tok tru: “God, mipela i no lus tingting long yu na mipela i no sakim tok bilong kontak bilong yu.”
“Nogat.” ol i tok, “Mipela i no bin mekim sin. God i slip i stap! Bikpela, yu kirap. Bilong wanem yu slip? Yu kirap. Yu no ken givim baksait oltaim long mipela.”
Nau yumi stap long Nupela Kontrak, na em i narakain taim olsem taim bilong Olpela Kontrak. Taim yumi harim dispela tok long Bikpela i slip i stap, bai yumi tingim stori bilong Luk 8, we Bikpela Jisas i slip insait long sip taim wanpela bikpela win i kamap long raunwara. Na ol disaipel i pret nogut tru na ol i go kirapim Jisas na tok, “Bikman, bikman, yumi laik lus nau.” I no olsem Krais i slip bikos em i no laikim tru ol disaipel. Nogat, em i slip long strongim bilip bilong ol.
Yumi save olsem Bikpela i stap na em i no save slip. Na yumi stap aninit long diwai kros bilong Krais. Sapos yumi laik kirap bek wantaim Krais, yumi mas redi long wanbel wantaim em na poromanim em long ol hevi tu. “Ol i lukim mipela i olsem sipsip bilong kilim i dai tasol.” Planti taim yumi save pilim dispela kain hevi tu. Tasol yumi klia tu olsem, “Maski wanem kain samting i kamap long yumi, oltaim em i save mekim yumi i win tru” (Rom 8:37).
God i stap olgeta taim, na em i no save slip. Yumi mas karim diwai kros bilong yumi, tasol yumi i win pinis – long wok bilong Krais em i bin givim bel bilong en long yumi.
Yumi mas wetim Krais, kain olsem ol tumbuna long bipo i bin wetim em. Yumi mas singaut strong: “Kam Bikpela! Yu Kam!”
SAMPELA TINGTING
Yu save singaut strong, “Kam Bikpela! Yu kam!” o nogat?
Buk Song 43
Olsem na bai mi go long alta bilong yu, God. Long wanem, yu save mekim mi i belgut na amamas. — Buk Song 43:4
I olsem Buk Song 42 na 43 i wanpela song tasol. Ating man i raitim dispela tupela song, em i stap longwe long ples bilong em yet bikos ol i rausim em long kantri bilong em. Em i stap long graun bilong birua bilong em, em i no inap bung wantaim lain bilong em, na em i no inap lotuim God long tempel.
Tasol dispela man i laikim God tru! Em i dai long wanbel wantim God. Dispela pasin bilong bilip long God i no liklik samting long laip bilong em. Nogat. Dispela pasin bilong bilip long God i olsem as bilong olgeta narapela samting long laip bilong em; bilip em i as tru bilong laip bilong em.
Em i no isi long ritim Buk Baibel. Ol stori long Buk Baibel i kam long narapela ples na narapela taim, olsem na ol i narakain stori. Tasol tu, em i no isi long ritim Buk Baibel bikos em i pulap long ol manmeri i amamas tru long God. Ol i tingting planti long God, na bel bilong ol i pulap long amamas long God. Planti taim, taim yumi ritim ol stori long ol dispela kain man, bai yumi les liklik. Yumi les bikos yumi no save lukim dispela kain man tumas long tude.
Tasol planti manmeri long tude ol i paul stret. Ol i laik kisim God na putim em insait long laip na plen bilong ol yet. Ol i laik bosim God. Tasol i no olsem. God mas i stap olsem as bilong laip na plen bilong yumi. Em yet i mas stiaim olgeta samting long laip bilong yumi. Sapos God i no stap olsem as tru bilong laip bilong yumi, yumi mas tanim bel, na larim laip bilong yumi i kamap nupela tru.
Yumi no inap save long God na amamas tru long em sapos em i no stap namba wan long laip bilong yumi. Sapos God i no namba wan samting long laip bilong yumi, orait bihain bai yumi no gat wanpela samting.
God em i nambawan amamas stret bilong ol man i raitim ol Buk Song. Yumi mas wanbel wantaim ol na lotuim God, laikim em tru na amamas tru long em. Sapos yumi i wanbel wantaim God, bai yumi i belgut tru. Tasol sapos God i no stap insait long laip bilong yu, i olsem yu dai pinis.
Na ol lain bilong God bai i tok olsem: “Olsem na bai mi go long alta bilong yu, God. Long wanem, yu save mekim mi i belgut na amamas.”
SAMPELA TINGTING
God i stap namba wan long laip bilong yu yet?
Buk Song 42
Bilong wanem mi bel hevi oltaim? Bilong wanem bel bilong mi i kirap nogut? Mi mas bilip long God na wetim em i helpim mi. —Buk Song 42:11
Long stap tru olsem bilip lain long dispela graun, yumi mas wok long skelim laip bilong yumi yet na stretim yumi yet tu. Yumi mas autim dispela kain tok long yumi yet: “Bilong wanem mi bel hevi oltaim? Bilong wanem bel bilong mi i kirap nogut? Mi mas bilip long God na wetim em i helpim mi.”
I no longlong pasin long toktok long bel bilong yu yet. I olsem tupela man i wok long birua insait long bel bilong yumi olgeta. Wanpela i tok, “mi laik kisim,” na narapela i tok, “mi no ken.” Wanpela i bilip, na narapela i pulap long daut. Maski yu bin i stap olsem Kristen longpela taim pinis, bai dispela tupela man i wok yet long pait insait long bel bilong yu. Olsem na yumi mas stretim yumi yet.
Yumi mas skulim bel bilong yumi long wokabaut long bilip. Sapos yu laik autim tok bilong God long ol arapela, orait pastaim yu mas askim God long givim strong long yu long bosim gut laip bilong yu yet na bilong stap belgut pastaim. Yumi no ken kotim ol lain long dispela graun bikos ol i sakim tok bilong God, sapos yumi i no kotim pinis yumi yet long ol dispela kain pasin i stap insait long bel bilong yumi .
Yumi mas mekim planti wok tru bilong stretim bel bilong yumi yet. Yumi mas wok strong long skulim bel bilong yumi yet tu long tok bilong God bikos planti taim yumi no luksave long dispela tok.
Yumi mas skulim yumi yet long bilip. God i singautim yumi long stap lain bilong em. Em yet i givim yumi planti ol gutpela samting bilong Krais. Bilong wanem yumi save lus tingting long Tok bilong En? Yu mas tokim bel bilong yu yet olsem, “Bel bilong mi, yu mas pas strong wantaim God!”
God em i save lukautim ol liklik pisin. I no gat wanpela bilong ol bai i pundaun nating. Ating em bai lukautim yumi gut tu, a? Bilong wanem yumi save wari tru na bel hevi tru?
Toktok long bel bilong yu yet!
Bilip long God! Em bai givim yumi olgeta samting yumi nidim long dispela laip na long taim bilong i dai tu. Em i save givim kaikai long yumi na, moa, em i kisim bek yumi!
SAMPELA TINGTING
Bai yu stretim bel bilong yu olsem wanem long tude?
Buk Song 40:1-8
Orait nau mi tok olsem, “God, mi kam pinis, olsem bipo ol i raitim tok long mi long buk. God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.” —Buk Song 40:7-8
Dispela em i tok bilong King Devit taim em i kamap olsem king bilong Israel. Em i namba tu king bilong Israel. God i rausim pinis namba wan king, Sol. Sol i tingting olsem, “Sapos mi mekim ofa long God, mi inap sakim tok bilong God.” Tasol God i tok olsem, “Pasin bilong bihainim tok bilong mi, em i nambawan pasin tru. Na pasin bilong ofaim ol gutpela abus long mi, em i namba 2 tasol” (1 Sam 15:22).
Tasol taim Devit i kamap king, em i tok, “Ol ofa...yu no save laikim...God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.”
I luk olsem Devit i paul liklik long tok bilong em. God i no bin tok olsem em i no laikim ol ofa. Tasol God i soim klia olsem em i les long ol ofa ol man i mekim taim ol i les long bihainim Tok bilong em. Taim man em i mekim dispela kain pasin, God em i belhat tru.
Tasol dispela tok bilong Devit i olsem tok profet. Narapela King i kamap bihain long Devit, na em inapim ol dispela tok profet. Taim dispela King – Jisas – i kam long dispela graun, em i tok, “Yu no laik bai ol i kilim abus na mekim ofa....Orait nau mi tok olsem, God, mi kam pinis...bilong bihainim laik bilong yu” (Hibru 10:6-7).
Dispela tok i putim ples klia olsem Devit i tok stret: God i les long ol ofa taim man i les long bihainim laik bilong em. Tasol moa, tok bilong Jisas i putim ples klia olsem God na man i no inap kamap wanbel long pasin bilong ol dispela kain ofa. Dai bilong Jisas tasol inap mekim olsem. Olgeta narapela ofa i no inap; dai bilong Jisas inap tru olgeta.
Krais em i man bilong bihainim laik bilong God. Long bihainim laik bilong God, Krais em i ofaim em yet long God. Ofa bilong em yet i samting bilong bihainim God. Na bikos long wok bilong Krais yumi yet i ken mekim wok bilong God long laip bilong yumi wan wan. Yumi tu i mas bihainim laik bilong God: “Lo bilong yu i stap insait long bel bilong mi.” Olsem tasol bai yumi daunim yumi yet aninit long God, na dispela em i olsem ofa bilong yumi i go long God.
SAMPELA TINGTING
Yu yet yu inap autim dispela tok tu, “Lo bilong yu i stap insait long bel bilong mi, a?”
Buk Song 32
Bikpela i tok olsem, “Mi laik skulim yu gut na soim yu long rot yu mas wokabaut long en. Bai mi skulim yu na lainim yu.” —Buk Song 32:8
Sios bilong Krais i laikim tru dispela Buk Song. Taim Devit i raitim dispela Buk Song, Krais i no bin kamap yet long dispela graun, na ol lain bilong God i no klia olgeta long pasin bilong kamap stretpela long ai bilong God long wok bilong Jisas. Tasol maski Jisas i no bin dai yet, dispela buk song i autim tok bilong pasin bilong God bilong rausim sin bilong yumi. Pol tu em i laikim tru dispela Buk Song (Rom 4:6-8).
Buk Song 32 i soim klia olsem God i save rausim sin bilong yumi long marimari tasol. Na tu i soim olsem yumi mas autim ol sin bilong yumi. Taim Jisas i no kamap yet long dispela graun, ol dispela tok tru i stap pinis.
Long laspela hap bilong dispela song, wanpela tisa i toktok. Yumi no save sapos em i wanpela papa, mama, hetman o pastor, tasol dispela man o meri i autim tok bilong God yet. God em i save yusim ol manmeri olsem mausman bilong autim tok bilong em yet. Na dispela tisa i tok olsem: “Mi laik skulim yu gut na soim yu long rot yu mas wokabaut long en. Bai mi skulim yu na lainim yu.” Yu autim ol sin bilong yu pinis, na God i rausim sin bilong yu, olsem na yu mas lainim pasin bilong bihainim Tok bilong mi long laip bilong yu: “Bai mi skulim yu na lainim yu.”
Dispela skul em i no samting bilong kisim save tasol; em i samting bilong lainim pasin bilong bihainim Bikpela long dispela graun: “Bai mi soim yu long rot yu mas wokabaut long en.”
Yumi mas redi long harim tok bilong God. Em i rausim sin bilong yumi, olsem na yumi mas harim Tok bilong em. Na God i gat laik long skulim yumi long taim yumi go long sios, long haus lotu. Em i wanpela bikpela rot we God i save skulim yumi na lainim yumi. Olsem na yumi mas strong long go long lotu, bilong harim Tok bilong em.
God i rausim sin bilong yumi, na yumi olgeta i nidim skul. Husat i tisa bilong yu yet?
SAMPELA TINGTING
Bai yu askim God long skulim yu long wanem ol samting?
Buk Song 27
Yu tokim mi olsem, ‘Yu kam long mi.’ Orait Bikpela, bai mi go long yu. Yu no ken haitim yu yet long mi. — Buk Song 27:8-9
I luk olsem dispela Buk Song i gat tupela hap. Namba wan hap i pulap long bilip, na namba tu hap i autim ol wari na hevi na daut. Sampela lain i ting olsem pastaim dispela song i olsem tupela song, na bihain ol i bungim dispela tupela song i kamap wanpela song tasol. Tasol maski; dispela tupela kain samting i save kamap long laip bilong ol Kristen. Bilip na daut i save kamap klostu klostu long laip bilong ol manmeri i bilip long God. Pasin bilong litimapim nem bilong God na pasin bilong pret tu, i save kamap klostu klostu long laip bilong ol Kristen.
Taim yumi wok long go long God long taim bilong hevi, taim yumi wok long askim God long strongim bilip long yumi, bai yumi klia olsem God yet em i helpim na lait bilong yumi. Na dispela man i raitim dispela Buk Song i bin mekim olsem. Em inap autim bilip bilong em long namba wan hap long dispela Buk Song bikos em i wok long go long God long taim em i gat ol hevi na wari. Ol lain bilong God i mas save gut long pasin bilong daunim ol yet aninit long God, bilong kisim strong bilong em na bilong sanap strong long bilip.
God i tokim dispela man, “Yu kam long mi.” Na dispela man i autim wankain tok i go bek long Bikpela, “Orait, Bikpela, bai mi go long yu.”
Prea em i samting bilong bekim tok bilong God. Prea em i no samting nating. I no olsem taim yumi prea, ol prea bilong yumi i kamap olsem win na flai i go. Nogat, long prea yumi i save bekim tok bilong God, na God i harim.
God i tok, “Yu kam long mi.” Bekim i olsem: “Orait, Bikpela, bai mi go long yu.” Tasol bihain long taim dispela man i autim dispela tok, wantu em i autim dispela narapela tok: “Yu no ken haitim yu yet long mi.” Man i raitim dispela song, em i save olsem God em i gat rait long haitim em yet long em. Em i save olsem em i man bilong mekim sin. Tasol God i strongim em taim em i autim dispela tok, “Yu kam long mi.” Na bikos God i tokim dispela man long painim em, em i wok long painim, na em i tokim God long no ken haitim em yet long em. Long go klostu long God, yumi gat wok long painim em.
“Bai mi go long yu.” Yumi no prea bilong kisim liklik samting long God. Nogat. Yumi prea bilong kisim God yet!
SAMPELA TINGTING
Yu save wok long painim God long laip bilong yu yet?
Buk Song 25:1-7
God, yu no ken tingting moa long sin na pasin nogut mi mekim taim mi yangpela yet. Yu God bilong sori na yu gutpela oltaim. Yu ken tingting long mi na marimari long mi.
—Buk Song 25:7 Ol dispela Buk Song i olsem ol prea tu. Taim yumi ritim ol Buk Song, God i skulim yumi long pasin
bilong lotu na prea.
Long lain 1 i go 7 long Buk Song 25 i olsem wanpela naispela prea stret long yumi ken bihainim. Pastaim dispela man i raitim dispela song i askim God long kisim bek em long han bilong ol birua bilong em: “Yu no ken larim ol birua i daunim mi na ol i amamas.” Na bihain em i askim God long stiaim em: “God, yu mas skulim mi long gutpela pasin bilong yu, na soim mi long rot bilong yu.” Na bihain long dispela em i askim God long rausim sin bilong em: “God, yu no ken tingting moa long sin na pasin nogut mi mekim taim mi yangpela yet.”
Dispela man i raitim dispela Buk Song i save tru olsem em i pulap long sin. Em i no wok long haitim sin bilong em long God o long em yet. “Ol pasin nogut mi mekim taim mi yangpela yet” — ol dispela sin i isi tru long mekim. Taim man i yangpela yet, em i no tingting tumas taim em i mekim sampela samting. Tasol pasin bilong yumi long mekim sin em bai i go inap long taim yumi dai.
Planti lain bilong yumi no save tru long ol sin bilong yumi. Sampela taim yumi wok long haitim ol sin bilong yumi yet tu. Tasol yumi no ken mekim olsem. Yumi mas redi long onest long sin bilong yumi, na autim ol sin bilong yumi long God.
“No ken tingting moa long sin bilong mi,” man i raitim dispela song i tok. Na bihain em i tok, “Yu ken tingting long mi.” Em i save olsem God bai mekim olsem long em, bikos, “Bikpela i gutpela.”
“Yu God bilong sori... yu ken tingting long mi.” Dispela man nogut ol i bin hagamapim wantaim Jisas long diwai kros, em i autim tok i klostu wankain long dispela tok: “Jisas... yu ken tingting long mi.” Na Jisas i harim tok bilong em.
Na yumi tu, yumi mas bilipim God na prea strong tru long em. Yumi mas askim em long lusim sin bilong yumi na long tingting long yumi. Jisas i dai long yumi na em i kirap bek. Olsem na yumi mas askim God long lusim sin bilong yumi na marimari long yumi tu. Olsem na yumi save askim ol samting long beten “long nem bilong Jisas.”
SAMPELA TINGTING
Autim lain 1 i go 7 bilong dispela Buk Song olsem prea bilong yu yet.
Buk Song 24
Yupela dua, yupela op. Yupela dua bilong bipo tru, yupela op bikpela, bai nambawan king i ken i go insait. — Buk Song 24:7
Long namba wan hap bilong dispela Buk Song, i olsem olgeta samting long dispela graun i stap na wetim masta bilong ol. Na long namba tu hap bilong dispela Buk Song, dispela askim i kamap: “Husat inap i go antap long maunten bilong God? Husat inap i go insait long haus bilong God yet?” Na long namba tri hap i olsem yumi harim ol manmeri i singsing strong bikos dispela “nambawan king” i go insait long haus bilong en.
Yumi no inap klia wanem taim dispela man i raitim dispela Buk Song, na yumi no inap klia bilong wanem em i raitim dispela Buk Song, na yumi no inap klia long tingting bilong ol manmeri taim ol i autim dispela song tu. Tasol yumi ol Kristen lain, taim yumi i ritim dispela Buk Song yumi bai tingting long taim Bikpela Jisas i go antap long heven.
Em i go antap long heven. Namba wan hap bilong wok bilong em i pinis. Em yet i dispela man “i no mekim pasin nogut, na bel bilong en i klin” (Buk Song 24:4). Na em yet i go insait long haus bilong God. Na em i mekim olsem bilong helpim yumi. Yumi save, na yumi bilip olsem, em yet i win. Em i winim sin, na yumi no stap wokbai bilong sin moa. Dai i no inap bagarapim yumi moa. Jisas bilong yumi em i Bikpela. Em i stap long sia king bilong God, na God Papa i kisim em, na ol ensel i lotuim em, na ol manmeri bilong em i laikim em tru. “Yupela dua, yupela op. Yupela dua bilong bipo tru, yupela op bikpela, bai nambawan king i ken i go insait.”
Buk Song 24 em i olsem pati bilong selebretim dispela taim we Jisas i go antap long heven. Dispela Jisas em i laikim yumi tru, na em i bosim yumi tu. Jisas i stap long sia king. Marimari na strong na pawa i bung wantaim. Tasol Jisas, na laikim tru na pawa bilong em, i winim stret olgeta narapela samting.
Em i taim bilong namba tu hap bilong wok bilong Jisas nau, em olsem wok bilong em long heven. Heven na graun i wok long bung. Krais i stap long heven; Spirit bilong em i stap long dispela graun.
Yupela dua, yupela op! Bel bilong yumi mas op tu! Olgeta samting long dispela graun bai lukim glori bilong Bikpela.
SAMPELA TINGTING
Jisas i stap long sia king bilong em long heven. Dispela i gat wanem mining insait long laip bilong yu tude?
Buk Song 23
Bikpela em i wasman bilong mi. Olsem na mi no inap sot long wanpela samting.
— Buk Song 23:1
Long planti yia i go pinis i kam inap long tude, dispela Buk Song i winim olgeta wok bilong olgeta dokta bilong rausim pen bilong ol manmeri, na i winim olgeta save bilong dispela graun long givim bel isi long ol manmeri.
Devit i raitim dispela Buk Song, na pastaim em yet i stap olsem wanpela wasman. Taim em i bin lukautim ol sipsip bilong em, Devit em i kisim save olsem em yet i gat wanpela wasman i stap tu. Olsem na em i raitim dispela lain long kirapim dispela song: “Bikpela em i wasman bilong mi.” Bikos Bikpela i nambawan wasman tru, Devit i raitim dispela samting tu: “Olsem na mi no inap sot long wanpela samting.”
Na dispela tok long wanpela wasman, em i kamap planti taim moa long Buk Baibel, na dispela tok piksa bilong wasman em i naispela tok piksa stret.
Jisas yet i yusim dispela tok piksa tu. Em i autim dispela stori long wanpela sipsip i lus, na wasman bilong sipsip i bin karim em i go bek long haus bilong en. Na moa, Jisas i tok, “Mi yet mi gutpela wasman bilong ol sipsip.” Olsem na em i soim klia olsem em yet i wasman bilong yumi olgeta.
Na dispela tok piksa long wasman bilong sipsip i kamap bikpela moa yet long Kamapim Tok Hait 7. Long hia i olsem wasman bilong sipsip i kamap olsem pikinini sipsip yet: “Pikinini Sipsip i stap namel tru long sia king, em bai i stap wasman bilong ol” (Kamapim Tok Hait 7:17). Em yet i bin wokabaut long ples nogut na bikpela tudak (Buk Song 23:4). Na dispela tok, “olsem na mi no inap sot long wanpela samting,” i gat bikpela mining moa tu: “Ol bai i no hangre moa, na nek bilong ol bai i no drai gen. San bai i no inap boinim skin bilong ol, na i no gat wanpela samting bai i mekim skin bilong ol i hat nogut tru” (Kamapim Tok Hait 7:16).
Olsem na yumi bai amamas long singim dispela Buk Song 23, na yumi bai bilipim tok insait long dispela Buk Song, inap long taim olgeta sipsip bilong God ol i tait tru, ol i stap pinis long malalo bilong Bikpela.
SAMPELA TINGTING
Yu save amamas bikos Bikpela em i wasman bilong yu? Yu bilipim tok bilong God long dispela Buk Song?
Buk Song 22:22-31
Bai mi autim tok long ol brata bilong mi long strongpela wok yu bin mekim. Taim ol i bung bilong lotu bai mi go namel long ol na litimapim nem bilong yu.
— Buk Song 22:22 (Hibru 2:12) Buk Song 22 em i olsem song bilong Jisas. Namba wan hap em i olsem krai bilong em long diwai
kros, na namba tu hap i olsem singsing bilong em long Ista moning.
Long taim san i kamap long Ista moning, ol lain bilong God i krai i stap. “Pastaim mipela i bin bilip olsem, Jisas em dispela man God i makim bilong kisim bek ol manmeri bilong Israel” (Luk 24:21). Pastaim mipela i bilip... dispela em i kain tok yumi save autim taim bilip bilong yumi i bagarap. Ol disaipel i ting olsem God yet i givim baksait long Jisas. Ol i ting olsem birua bilong ol win. Na moa, ol i ting olsem dai i win tu.
Tasol Jisas i stap laip! God i kirapim em. I luk olsem olgeta samting i lus pinis, tasol nogat, ol lain bilong God i winim planti samting pinis. Sin na dai i no win; Jisas yet i winim ol. God i senisim ol krai i go kamap olsem lap. God bai inapim olgeta promis bilong em olgeta taim. Em i tru olgeta, na yumi lukim dispela long dai bilong Jisas na long taim em i kirap bek long matmat.
Long Ista Sande, klostu long tudak, Jisas i go kamap namel long ol disaipel bilong em. Em i skulim yumi long wanpela nupela singsing. Dispela nupela singsing inapim Buk Song 22. “Olgeta samting bipo ol i raitim long mi long....Buk Song, dispela olgeta samting i mas kamap tru” (Luke 24:44). Buk Song 22 em i naispela song stret taim yumi i singim bihain long Ista.
Long Ista Sande, Jisas i kirapim wok bilong em bilong bungim ol lain bilong God. Na long Tok na Spirit bilong em i wok long mekim olsem olgeta de inap i kam long tude. “Olgeta manmeri bilong graun bai ol i tingting long God, na bai ol i kam bek long em. Olgeta lain manmeri bai i lotu long em. Long wanem, Bikpela i stap king na em i bosim olgeta lain manmeri” (Buk Song 22:27-28).
Jisas i sanap strong long ol hevi em i bungim inap long dai bilong em. Long dispela pasin em inapim namba wan hap bilong Buk Song 22. Tasol nau em i wok long bungim ol lain bilong em. As bilong dispela em i kirap bek bilong em yet. Na taim em i mekim olsem, em i wok long inapim namba tu hap bilong dispela Buk Song tu.
SAMPELA TINGTING
Ritim lain 22-31 gen olsem prea bilong yu long wok bilong Jisas.
Buk Song 22:1-11
God bilong mi, God bilong mi, bilong wanem yu lusim mi? — Buk Song 22:1
Dispela em i krai bilong wanpela stretpela man. Em i bilipim God, taim mama i karim em na i kam inap long nau. Tasol nau em i pilim olsem God i lusim em. God i no harim em. Planti birua i ranim em na ol i laik bagarapim em. Ol i olsem ol bulmakau man na ol laion na ol dok na ol wel bulmakau.
Dispela em i bikpela hevi stret na i winim ol narapela hevi ol Kristen lain i save bungim. Ol i bilipim God. Ol i mekim ol stretpela pasin. Na ol i tok, “Mi bilip long God.” Tasol i luk olsem dispela God i no inap helpim ol.
Na wanpela bikpela hevi bilong ol em i dispela pasin bilong ol birua bilong tok bilas na sutim tang long ol. Ol birua i lap na i ol tok, “Yu save bilip long God. Bilong wanem em i no helpim yu na kisim bek yu?” Long dispela tok dispela man i krai, “God bilong mi, God bilong mi, bilong wanem yu lusim me?”
Jisas em i wanpela stretpela man olgeta. Em i bilipim God, na em i holim strong God long olgeta de. Taim em i gat 12 krismas tasol em i tok, “Mi mas i stap long haus bilong Papa bilong mi.” Na taim em i bikpela moa liklik em i tok, “Kaikai bilong mi, em long bihainim laik bilong God.” Jisas em i go long diwai kros bikos em i laik bihainim laik bilong God tasol.
Taim Jisas i hangamap long diwai kros em i tingim Buk Song 22. I olsem dispela Buk Song i kamap olsem song bilong em yet. God i larim ol birua i bagarapim em, na ol i tok bilas long em na sutim tang long em: “Em i bilip long God...Orait, sapos God i laikim em, God i ken helpim em nau” (Matyu 27:43). Taim tudak i karamapim graun, Krais i singaut strong na em i krai, “God bilong mi, God bilong mi, bilong wanem yu lusim mi?”
Tasol, taim Krais i autim dispela krai pinis, ol hevi bilong em (na bilong yumi) i klostu pinis. Long wanem, dispela krai bilong Jisas em i bekim olgeta krai bilong yumi yet. God i bekim ol krai bilong olgeta lain bilong em, long diwai kros, long dispela dai bilong Jisas.
SAMPELA TINGTING
Sampela taim yu save pilim olsem God yet i lusim yu? Wanem samting i save helpim yu long kain taim olsem?
Buk Song 16
You yet bai yu soim mi rot bilong kisim laip. Yu stap klostu long mi na mi save amamas moa yet. Yu save helpim mi na bel bilong mi i amamas oltaim oltaim. — Buk Song 16:11
Planti ol gutpela papamama na pastor bai i tokim ol yangpela Kristen olsem ol Kristen lain i save bungim ol hevi tu. Laip bilong ol Kristen i no samting bilong amamas olgeta taim. Yumi mas daunim yumi yet, na yumi bai kisim pen. Em i no isi long stap olsem wanpela Kristen, na yumi mas bihainim tok bilong God, na i no isi long mekim olsem.
Em i gutpela long harim dispela tok lukaut. Em i gutpela bikos planti lain i gat laik long amamasim ol yet, na ol i no tingting tumas long kisim hevi taim ol i kamap Kristen. Na nogut ol pastor i tokim ol Kristen olsem ol bai i stap amamas olgeta taim.
Tasol nogut yumi harim toktok long ol hevi yumi bai bungim bikos yumi stap olsem wanpela Kristen tasol.
Krais em i save givim amamas long yumi. Na God em i amamasim yumi tu. Devit em i save olsem, “Yu Bikpela bilong mi. Olgeta gutpela samting mi holim, i kam long han bilong yu tasol.”
Buk Song 16 em i gat ol naispela tok stret. Na taim yumi save long wok bilong Jisas long Nupela Kontrak, dispela tok em i naispela moa yet! Jisas i save givim dispela amamas long yumi. Dispela tok i stori long kirap bek bilong Jisas: “Bai yu no larim mi i go i stap long ples bilong ol man i dai pinis. Na bai yu no larim man bilong yu yet i sting long matmat” (Lain 10). Jisas em i rot bilong laip – dispela rot em i go long amamas bilong God Papa (Aposel 2:25-31).
Olsem na, Buk Song 16 i soim yumi olsem Jisas yet bai i givim amamas long yumi. Yumi mas klia long dispela. Jisas em i rot i go long laip. Em i rot bilong amamas. Dispela em i laip tru. Stap wantaim Krais i olsem laip tru. Olsem na bel bilong yumi ken amamas moa yet.
Em i tru olgeta: dispela laip i pulap long amamas, na bihain long dispela laip, dispela amamas bilong yumi bai i go antap moa yet.
SAMPELA TINGTING
Yu pilim dispela amamas bilong stap wantaim Krais long laip bilong yu?
Buk Song 14
Ol longlong man i save tok long ol yet olsem, ‘I no gat God i stap’...I no gat wanpela bilong ol i save mekim gutpela pasin. Nogat tru. — Buk Song 14:1,3
Ol longlong man ol i no save tingting long God. Ol i tok, “I no gat God i stap.” Bel bilong ol i paul olgeta. Ol i pulap long sin; ol i save mekim kain kain pasin nogut. Kain olsem bilip i gat ol gutpela kaikai bilong en, ol lain i no bilip i save kamapim ol kaikai nogut. Taim man i no pas wantaim God, em bai i mekim ol pasin nogut. Na em i tru, sampela lain i no bilip ol bai i mekim sampela ol gutpela samting tu, tasol yumi ken tok olsem, taim ol manmeri i wok long stap longwe tru long God, pasin nogut bilong dispela lain bai i kamap bikpela moa, na tumbuna bilong ol bai mekim planti moa pasin nogut, ol pasin God yet i no laikim.
I luk olsem dispela Buk Song i wok long tok nogut long ol lain i no bilip. “Bikpela i stap long heven na i lukluk i go daun long ol manmeri. Em i laik painim sampela man i gat gutpela save na ol i wok long painim God. Tasol nogat.” I olsem King Bilong heven na graun i lukluk i go daun long ol lain i no bilip.
Tasol yumi mas ritim sampela moa tok long dispela Buk Song. God em i lukluk long yumi tu: “Olgeta i lusim gutpela rot pinis. Olgeta i wankain tasol, ol i man nogut tru. I no gat wanpela bilong ol i save mekim gutpela pasin. Nogat tru.” Man i raitim dispela Buk Song i soim yumi olsem, long ai bilong God olgeta manmeri i pulap long sin.
Na Pol, long Rom 3, i gat dispela kain tingting tu. Em i autim dispela Buk Song long putim ples klia olsem olgeta manmeri long dispela graun i pulap long sin, na olgeta i nidim gutnius bilong Jisas Krais. Yumi olgeta i sin lain stret!
Yumi no ken amamas long belhat bilong God long ol longlong man i no bilip, bikos yumi olgeta i no save mekim gutpela pasin. Olsem na, man i raitim dispela Buk Song i tok, “Mi laikim tumas bai God i salim wanpela man bilong Saion i kam bilong kisim bek ol Israel.”
Olsem na Matyu 1:21 i tok, “Bai em i karim pikinini man, na yu mas kolim nem bilong en Jisas, long wanem, em bai i lusim sin bilong ol manmeri bilong en na kisim bek ol.” Olgeta manmeri bilong dispela graun i nidim Jisas long kisim bek ol long sin bilong ol. Olgeta!
SAMPELA TINGTING
Tingting long ol sin bilong yu yet, na tok tenkyu long God bikos em i salim Jisas long kisim bek ol manmeri bilong em.
Buk Song 13
Bikpela, wanem taim bai yu tingim mi gen? Ating yu lus tingting long mi inap oltaim, oltaim, a?...Tasol mi bilip bai yu marimari long mi oltaim. — Buk Song 13:1,5
Fopela taim Devit i autim dispela tok long God: “Wanem taim?” Em i autim dispela tok bikos em i ting olsem God yet i lus tingting long em. I olsem God i haitim pes bilong em yet long Devit. Em i no rausim pen bilong Devit, na em i larim Devit i stap aninit long ol birua bilong em. “Wanem taim, Bikpela?”
Ating yu yet yu bin autim dispela tok long God, “Wanem taim?” Sapos nogat, nogut yu no klia long ol promis bilong God. God yet i tok olsem em yet bai harim olgeta krai bilong yumi. Em i promisim yumi olsem em bai apim ol lain bilong em; taim yumi paitim dua em bai opim long yumi; taim yumi wok long painim samting, yumi bai lukim. Kingdom bilong God i kamap klostu nau. Wanem taim?
Pasin bilong wet, em i bikpela samting long laip bilong ol Kristen. Em i no wankain olsem taim yumi i wetim dokta long haus sik o taim yumi wetim bas long taun. Nogat, yumi wetim God. Yumi mekim wok long dispela graun bikos yumi wetim em, bikos yumi bilip olsem em bai inapim olgeta promis bilong em.
Taim yumi i krai, “Wanem taim?” i olsem yumi les long wet. Na nogut sampela daut i stap long bel bilong yumi tu: God em i sori yet long yumi, o nogat? God em i harim ol krai bilong yumi, o nogat? Em bai i kam, o nogat?
Dispela pasin bilong daut i bin i stap longpela taim – taim Devit i raitim dispela Buk Song, daut i stap tu. Olgeta bilip lain i bin dautim promis bilong God sampela taim.
Em i orait long yumi i autim dispela daut, tasol wantu yumi mas wok long bekim dispela daut. Wantaim bilip yumi mas bekim dispela daut. Bilip i wok long paitim daut. Bilip bait ok, “Mi trustim God olgeta taim, long taim bilong tudak tu. Sapos em i no kam hariap, em olsem em i mekim sampela gutpela samting moa long mi.”
Em i tru olsem planti ol Kristen lain i gat sampela daut, tasol pasin bilong dautim God em i longlong tru. I gat planti ol liklik sik long dispela graun olsem liklik kus, tasol maski olsem planti lain i save kisim kus, em i wanpela sik yet. Kain olsem, pasin bilong daut em i sin, maski olgeta Kristen lain i savemekim olsem, na yumi mas wok strong long rauism dispela daut long bel bilong yumi. Dispela Buk Song tu i pinis long bilip: “Tasol mi bilip bai yu marimari long mi oltaim.”
SAMPELA TINGTING
Yu gat sampela daut long bel bilong yu? Wanem samting i save strongim yu?
Buk Song 12
Olgeta man i save giaman long ol arapela man. Ol i save tok gris long ol na trikim ol...Tok bilong God i tru olgeta. — Buk Song 12:2,6
Planti tok bilong yumi ol man em i tok nogut, na God i belhat long ol dispela tok. Dispela Buk Song i stori long kain kain tok nogut—giaman, dispela tok i no tru, na tok gris, dispela tok i wok long grisim ol narapela man, maski em i tru o nogat.
Tok giaman i wok long bosim olgeta lain long dispela graun. Tok giaman i wok long bagarapim yumi na yumi i no inap wanbel wantaim ol narapela. Yumi no inap bilipim ol narapela.
Pasin bilong bagarapim tok i bin kamapim planti hevi long taim bilong Devit. Tasol long tude, hevi bilong dispela sin i wok long kamap bikpela moa yet. Planti tok i save raunim yumi, tasol planti bilong ol dispela tok i tok giaman tasol. Long internet, long niuspepa, long radio, na long tv yumi save harim ol giaman tok. God i makim pasin bilong toktok olsem rot yumi ken yusim bilong helpim yumi i stori wantaim ol narapela, tasol ol man i wok long bagarapim toktok. Ol i wok long tok giaman, long grisim ol man long tok bilong ol, long apim nem bilong ol yet. Gavman i wok long mekim olsem, ol jas i wok long mekim olsem, ol sumatin i wok long mekim olsem, ol tisa i wok long mekim olsem na ol polis tu i wok long mekim olsem. Tarangu, iven sampela pastor i mekim olsem tu.
Jems 3:8 i tok, “Tasol i no gat wanpela man inap long bosim maus bilong em yet. Nogat. Oltaim maus i save kirap nabaut na mekim tok nogut. I olsem marasin bilong kilim man i dai i pulap long maus bilong yumi.” Em i hat tru long ol Kristen lain long bosim gut maus na tok bilong ol tu. Tasol yumi mas tok “yes” na “nogat” tasol. Em inap. Ol lain bilong God i mas les long tok giaman!
Maski ol lain bilong dispela graun i wok long tok giaman na tok gris, yumi yet i ken kisim gutpela save long pasin bilong God bikos tok bilong God em i tru na tru olgeta!
SAMPELA TINGTING
Em i hat long bosim gut maus bilong yu yet, o nogat? Yu save les long tok giaman o nogat?
Buk Song 9:11-20
Bikpela, yu mas mekim ol i pret nogut. Yu mas mekim ol lain manmeri i pilim olsem ol i samting nating tasol. — Buk Song 9:20
Sapos ol man bilong dispela graun i laik i stap bel isi na sindaun gut, ol i mas bihainim stret ol gutpela pasin. Na bikpela samting insait long ol dispela gutpela pasin i olsem: Ol i mas save olsem God yet i bosim ol na em i antap tru, na ol yet i aninit long em. “Bikpela, yu mas mekim ol i pret nogut. Yu mas mekim ol lain manmeri i pilim olsem ol i samting nating tasol.”
Dispela tok em i olsem prea long kisim gutpela sindaun na bel isi i kam long dispela graun. Gutpela taim o bel isi i save kamap taim man i binhaimim stret ol gutpela pasin tasol. “God i save mekim stret olgeta wok bilong em. Em i no save mekim ol samting i paul nabaut” (1 Korin 14:33).
Dispela kingdom bilong dispela Mesaia em i kingdom bilong kisim gutpela taim na stap bel isi. Tasol God i makim dispela taim olsem taim bilong lotuim God, na long laikim tru ol narapela. Na no ken lotuim ol narapela samting – ol dispela samting i stap bilong yusim tasol, na i no bilong lotuim. Dispela em i pasin bilong bihainim stret ol gutpela pasin; dispela em i pasin bilong kisim gutpela sindaun na stap bel isi.
Yumi no inap kisim dispela sindaun gut o stap bel isi tru inap long taim olgeta lain bilong dispela graun i wok long bihainim stret ol gutpela pasin God yet i makim. Olgeta manmeri long dispela graun i mas klia olsem ol i man tasol, na God em i God!
Pasin bilong litimapim nem bilong yumi yet na pasin bikhet em i save kamapim planti sin. Sapos yumi les long brukim skru long God na aninit long em, i olsem yumi i bikhet stret. Maski yu save mekim gutpela pasin, sapos yu no brukim skru long God i olsem yu bikhet na yu bai i go long hel. Yumi man, yumi i samting nating tasol.
Tasol pasin bilong daunim yumi yet na aninit long Bikpela em i narakain samting olgeta. Em i olsem dua i op i go long God. Olsem na sampela taim ol yangpela pikinini inap long painim God na lukim em, tasol ol bikman nogat.
Tasol God i wok long daunim olgeta lain bilong dispela graun bilong ol i ken aninit long em. Em i wok bilong God yet. Na em i narakain wok stret: Man i pundaun long sin bikos em i gat laik long kamap wankain olsem God. Na bihain God i kam long yumi na kisim bek yumi long wok bilong Krais – taim God yet i kamap olsem man long dispela graun. Na rot bilong kisim bel isi na gutpela taim stret, em i rot i go long wanpela bebi – dispela bebi long Betlehem – Jisas Krais! Olgeta lain bilong dispela graun, em ol i wok long litimapim nem bilong ol yet, em ol i mas kam long dispela bebi na brukim skru long em na lotuim em. Long dispela rot tasol bai yumi kisim bel isi stret insait long kingdom bilong God
SAMPELA TINGTING
Askim God long helpim yu daunim yu yet na aninit long em tasol.
Buk Song 8
Mipela man i wanem samting na yu save tingting long mipela? Mipela i samting nating...yu putim mipela i stap aninit long yu wanpela tasol. — Buk Song 8:4-5
Wanpela man i holim kamera na em i stap antap long wanpela bikpela maunten stret. Yu yet yu wokabaut daunbilo tru long ples bilong yu, longwe tru long em. Na sapos em i kisim piksa long yu, yu bai luk olsem wanpela liklik anis tasol. Tasol sapos yu yet yu sanap klostu long em antap long dispela maunten na em i kisim piksa long yu, bai i luk olsem yu bikpela stret na bikpela moa long ol liklik samting daunbilo tru long maunten. Olsem na, long namba wan piksa i luk olsem yu liklik tru, na long namba tu piksa i luk olsem yu bikpela tru.
Na dispela em i kain olsem yumi ol man, taim Buk Baibel i stori long yumi: Ol man i liklik tru – tasol ol i bikpela tru tu. Taim yu tingting long wanem samting i stap antap long man, i olsem man em i liklik tasol. Tasol God i putim olgeta samting i stap aninit long man. Taim yumi tingting long wanem samting God i putim aninit long man, i olsem man em i bikpela stret.
Olsem na, taim yumi harim wanpela man i apim nem bilong em yet, yumi mas tingting long wanem samting i stap antap long em. Yumi mas tingting long glori bilong God o long skai em i bikpela tru, na yumi bai klia olsem dispela man em i liklik tasol. Na yumi mas les long dispela pasin. Man em i samting nating – bilong wanem na em i apim nem bilong em yet?
Tasol taim yumi lukim ol man i lotuim ol samting bilong dispela graun – olsem mani, o kago, o biknem bilong ol yet – yumi mas les long dispela pasin tu. Man em i bikpela. God yet i putim em aninit long em yet tasol. Tasol taim ol man i lotuim ol narapela samting, na ol i no lotuim God, em i olsem ol i wokboi nating long ol samting bilong dispela graun, na yumi mas sori long ol.
Olsem na yumi mas wok long bihainim rot Buk Baibel i bihainim taim yumi tingting long man em i husat. Na yumi mas wok long bihainim tok bilong God taim yumi mekim wok long dispela graun.
Yumi stap aninit long dispela God em i holi na em i gat olgeta strong. Olsem na yumi i liklik tasol. Yumi stap laip long marimari bilong em tasol, na em yet i givim olgeta samting long yumi. Yumi no gat rait long kamapim ol lo bilong yumi yet. Yumi nidim Holi Spirit bilong bihainim ol lo bilong God. Na tu, ol lain bilong Bikpela, ol i bikpela samting stret. Ol i pikinini bilong God yet, olsem na ol i no ken kamap olsem wokboi nating bilong ol samting i stap long dispela graun.
SAMPELA TINGTING
Ritim lain 4 na 5 long dispela Buk Song gen, na autim dispela tok olsem prea bilong yu i go long God.
Buk Song 6
Ol man i dai pinis, ol i no save tingim yu. Long ples ol i stap long en, ol i no save givim biknem long yu. — Buk Song 6:5
Taim dispela man i raitim Buk Song 6, em i gat bikpela hevi stret; em i pilim olsem klostu em bai dai. Tasol em i askim God long oraitim em bikos long ples bilong dai ol man i no save tingim God o givim biknem long em.
Long dispela prea bilong em, dispela man i soim klia olsem em i save long wanpela samting: yumi stap laip bilong presim God tasol. Glori bilong God em i nambawan samting long laip bilong yumi. Tasol sapos yumi i dai pinis, hau bai yumi autim tok, singsing, na presim God? Olsem na man i raitim dispela buk song, em i laik stap laip yet bilong litimapim nem bilong God.
Nogut yumi tok, “Aiyo, dispela man em i paul olgeta long taim bilong dai.” Pastaim yumi mas save olsem em i tok stret long taim bilong stap laip. Man i raitim dispela Buk Song, em i save olsem pasin bilong stap laip i bilong presim God; olsem na em i les long dai. Ol Kristen lain i no ken lus tingting olsem dai em i birua bilong yumi na birua bilong God tu. I no olsem taim bilong dai tasol i makim taim bilong kirapim ol singsing bilong presim God. Dispela tingting em i paul bikos nau em i taim bilong presim God, taim yumi stap laip yet.
Yumi mas klia, sapos dispela man i raitim Buk Song 6 i harim olsem Jisas yet i kirap bek long matmat long de namba tri, em bai i tok, “Hallelujah! Pasin bilong presim God bai i go i go nau, bikos laip bai i go i go na stap oltaim oltaim.” Tasol em i no save olsem Krais bai i kirap bek long matmat. Tasol yumi save, bikos Jisas i kam pinis na em i wok long strongim sios bilong em i stap. Na Krais i tok olsem em i winim dai, na pawa bilong hel na dai i no inap bagarapim sios bilong em.
Sios bilong God i sanap long dispela wok bilong Krais bilong kirap bek long matmat. Olsem na yumi no ken pret moa long dai, na yumi no ken ting olsem dai bai pinisim ol singsing bilong presim God. Nogat. Pastaim yumi mas save olsem, yumi stap laip bilong presim God. Dispela em i nambawan samting long stap laip long dispela graun. Na taim yumi klia long dispela samting, orait yumi no ken pret long dai!
SAMPELA TINGTING
Sapos yu save olsem klostu bai yu dai, bai yu askim God long larim yu i stap laip yet? Bilong wanem?
Buk Song 2
“Nau bai mi autim tok BIkpela i bin givim mi....’Yu Pikinini bilong mi...Askim mi, na bai mi givim olgeta lain manmeri long yu, na bai yu bosim olgeta hap bilong graun.’”
—Buk Song 2:7-8
Sampela taim yumi i mekim sampela samting i kranki olgeta. Tasol long taim yumi i mekim dispela samting, yumi ting em i gutpela samting long mekim. Tasol sampela yia bihain, taim yumi tingting gen long dispela samting yumi bin mekim pinis, bai yumi klia olsem yumi mekim kranki pasin.
Taim tupela marit i pait i stap, ol narapela lain bai lukim ol na tok, “Watpo na tupela i pait? Tupela i longlong pinis.” Tasol dispela tupela i pait i stap, ol i no ting olsem ol i mekim longlong pasin. Ol i belkros tasol, olsem na ol i pait. Ol narapela tasol i klia olsem dispela em i longlong pasin. Taim yu tingting long taim bipo, o taim yu lukim pasin ol narapela i mekim, em nau olgeta samting i kamap ples klia long tingting bilong yu, na yu bai klia sapos dispela pasin i gutpela o nogat.
Orait sapos yumi man inap lukim sampela samting olsem, ating God tu i klia olgeta long wanem samting ol man na ol meri long dispela graun i wok long mekim, a? Taim em i lukluk i kam daun long ol lain bilong dispela graun, em i save olsem ol i mekim planti longlong pasin: “God i sindaun long sia king bilong en long heven, na em i lap na tok bilas long ol.”
Dispela Buk Song i putim ples klia olsem God bai salim Mesaia bilong em long stretim ol man i bikhet tru. Olsem na, God i tokim ol king bilong dispela graun long aninit long Pikinini bilong em. Sapos nogat, em bai brukim ol i go liklik liklik, olsem man i brukim sospen graun.
Jisas em i dispela Mesaia. Taim mama Maria i karim em long Betlehem, em i no luk olsem wanpela strongpela hetman. Na taim em i dai long diwai kros, em i no luk olsem em inap long bosim ol king bilong dispela graun. Tasol God i tok, “Yu Pikinini bilong mi...Askim mi, na bai mi givim olgeta lain manmeri long yu, na bai yu bosim olgeta hap bilong graun.”
Tude, pawa bilong Jisas i winim pawa bilong ol narapela. Yumi olgeta i stap aninit long em. Sapos yumi givim baksait long em o yumi les long em, i luk olsem yumi i longlong olgeta. Yupela ol lain bilong graun, yupela putim gut yau bilong yupela, na stretim pasin bilong yupela! Yupela ol hetman bilong graun, yupela harim dispela tok na yupela lukaut! Yupela i mas pret long God na aninit long em. Brukim skru long em o bai yu dai!
Olgeta nesen long dispela graun bai brukim skru long God, na God bai i usim gutnius bilong Krais long mekim dispela samting i kamap. Gutnius em i stori bilong laikim tru bilong God. Ol lain i givim baksait long dispela laikim tru bilong God ol bai bungim belhat bilong em. Bai yumi mekim wanem?
Sampela Tingting
Dispela Buk Song i givim wanem kain piksa long God long yumi?
Buk Song 1
Dispela man i olsem diwai ol man i bin planim klostu long wara....Ol man nogut i no olsem. Nogat tru. Ol i olsem skin rais win i save rausim i go. — Buk Song 1:3-4
Ol Buk Song i putim ples klia olsem ol lain i stap stretpela, em ol i ken amamas. Ol lain long dispela graun bai tok, “Ol lain i gat planti mani, em ol i ken amamas, na ol lain i gat bikpela save tru, em ol i ken amamas.” Na sampela Kristen lain bai singim, “Sapos God i kisim bek yu, orait yu yet i ken amamas.” Tasol Buk Song 1 i tok olsem, “God i amamas tru long pasin bilong ol stretpela man.”
Ol lain i bihainim tok bilong God long laip bilong ol, em ol yet bai i amamas tru! Ol i no save “bihainim tok bilong ol man nogut,” na ol i “no save wokabaut long rot bilong ol man bilong mekim sin,” na ol i “no save sindaun wantaim ol man bilong tok bilas long God.” Nogat. Ol i wok long bihainim ol stretpela pasin tasol. Long de na long nait, bel bilong ol i lukluk i go long God, kain olsem wanpela kompas i save poinim i go long not. Ol i no save bihainim ol stretpela pasin bikos God i tokim ol long mekim olsem tasol; nogat, long bel bilong ol stret, ol laikim lo bilong God.
Long stap stretpela long dispela graun, ol man i mas kamap nupela long Spirit bilong God, na blut bilong Krais i mas wasim ol tu!
Yumi inap lainim planti samting long ol tumbuna bilong Olpela Kontrak. I no olsem ol bilip lain bai kisim laip taim ol i go long heven tasol. Na i no olsem ol lain i no bilip bai bungim pe bilong dai long hel tasol. Nogat. Ol tumbuna long Olpela Kontrak i klia olsem: Ol stretpela man i kisim laip long nau, taim ol i stap long dispela graun yet, na ol man nogut i stap olsem daiman long dispela graun. Tupela samting i tru tasol: Man i stap olsem diwai man i bin planim klostu long wara, o man i stap olsem skin rais win i save rausim i go. Em tasol.
“Man i no save wokabaut long rot bilong ol man bilong mekim sin, em ol i ken amamas tru.” Dispela man i stap laip tru! Ol i olsem diwai i gat planti kaikai tru. Tasol ol man nogut i olsem skin rais. Na win bilong God bai i rausim em i go longwe.
SAMPELA TINGTING
Yu pilim olsem yu yet i gat dispela kain amamas olsem dispela man i mekim stretpela pasin, o nogat?
1 Pita 5:6-11
God em i as bilong olgeta marimari. Em i bin singautim yupela long Krais Jisas, bai yupela i ken i stap wantaim em long gutpela lait bilong en i stap oltaim. Olsem na bai yupela i karim pen sotpela taim tasol, na bihain bai em yet i mekim yupela i orait gen, na strongim bilip bilong yupela na mekim yupela i sanap strong oltaim. — 1 Pita 5:10
God i bin singautim yumi long stap wantaim em long gutpela lait bilong en i stap oltaim; em i no singautim yumi long karim pen olgeta taim. Yumi karim pen olsem wanpela rot yumi mas wokabaut long em long kamap long gutpela ples.
Bai yumi karim pen sotpela taim tasol, na bihain bai yumi stap gut oltaim oltaim. Bilong wanem Buk Baibel i tok olsem mipela bai karim pen “sotpela taim tasol”? Namba wan samting i olsem: Laip long dispela nupela graun bai i stap oltaim oltaim, olsem na long dispela graun bilong tude, taim em i sotpela tasol. I kain olsem: taim mama i karim pikinini pinis, wantu em i lus tingting long pen em i karim pinis. Na i kain olsem taim Jekop i wok 7-pela yia bilong kisim Resel, na em i pilim olsem dispela 7-pela yia em i samting nating, olsem tripela o foapela de tasol (Stat 29:20). Na wankain olsem, ol pen yumi bai karim long dispela graun em i sotpela taim tasol, long wanem, yumi wetim dispela laip i stap gutpela tru oltaim oltaim.
Na narapela samting i olsem. Long dispela tok “sotpela taim tasol,” God i laik putim ples klia olsem em bai strongim yumi inap long taim dispela taim i pinis. God i makim pinis taim bilong pinisim dispela taim bilong pen. Wantu dispela pen bai pinis, na yumi bai klia olsem em i sotpela taim tasol.
Na yumi klia, dispela God husait i singautim yumi em i God bilong marimari. Long marimari tasol, em i singautim yumi, na tu, em i marimari long yumi bilong strongim yumi long taim bilong karim pen. Olsem na, yumi inap tok, “God em i as bilong olgeta marimari.” Marimari bilong God bai strongim yumi olgeta taim. God yet bai mekim yumi orait gen, na strongim bilip bilong yumi na mekim yumi sanap strong oltaim. Pita, husait i raitim dispela tok, i save olsem yumi nidim dispela marimari bilong God long stap strong taim yumi harim singaut bilong God long bihainim em na kairim diwai kros bilong yumi.
Dispela rot i go long glori, we yumi bai i stap oltaim wantaim God long gutpela lait bilong en. Yumi no inap save gut long dispela samting. Tasol yumi inap long klia olsem dispela samting bai winim olgeta samting yumi bin lukim long dispela graun. Yumi no inap karim pen moa, na yumi bai stap gut tru wantaim God yet.
Orait, yumi mas karim pen sotpela taim tasol, na bihain bai yumi i lukim dispela glori!
SAMPELA TINGTING
Ritim dispela lain (lain 10) gen na tok ten yu long dispela God bilong olgeta marimari, na litimapim nem bilong em.
Rom 8:18 – 25
Yumi save, olgeta samting God i bin wokim, olgeta i pilim pen olsem meri i laik karim pikinini...Na i no dispela ol samting tasol i krai. Nogat. Yumi tu i save krai. Yumi kisim Holi Spirit pinis, em olsem namba wan presen God i givim yumi. Tasol yumi tu i save pilim pen na i krai... —Rom 8:22-23
Pasin bilong karim pen em i stap long olgeta hap long dispela gruan. Olgeta haus na olgeta manmeri i save pilim pen. Tasol i no man na meri tasol i pilim dispela pen. Nogat. Olgeta samting God i wokim i pilim pen olsem meri i laik karim pikinini.
Ol lain bilong God i mas mekim wok long dispela graun, maski Buk Baibel i tok olsem ol i stap lain manmeri tru bilong dispela nupela graun bai i kamap. Yumi i stap long dispela graun, tasol yumi no lain tru bilong dispela dispela graun.
Yumi kisim Holi Spirit pinis, em olsem namba wan presen God i givim yumi. Tasol planti moa presen bai i kam. Em i olsem liklik hap tasol long olgeta samting yumi bai kisim bihain long dispela nupela graun.
Dispela Holi Spirit yumi kisim pinis i save stap long ol lain bilong God tasol. Na em i olsem wanpela hap samting yumi kisim bilong helpim yumi long save wanem samting yumi bai kisim bihain, long dispela nupela graun.
Pasin bilong karim pen bilong yumi ol Kristen i narakain long pen bilong ol narapela lain long dispela graun. Ol lain i no save long dispela nupela graun bai i kamap, ol i no kisim Holi Spirit pinis, ol i no wari tumas long sin, na planti ol narapela kain samting nogut i no save givim bikpela pen long ol.
Tasol sios bilong God i kisim Spirit bilong God pinis, olsem na ol i kisim liklik hap bilong dispela nupela laip na dispela nupela graun pinis. Olsem na, ol lain bilong sios i no inap amamas tru long dispela graun na laip bilong tude. Olgeta samting i wok long krai, tasol krai bilong yumi i winim krai bilong ol narapela. Olgeta lain long dispela graun i gat laik long kisim ol gutpela samting i kam, na ol Kristen lain tasol i save long dispela gutpela samting tru bai i kamap bihain.
Sios tasol i klia long as bilong ol dispela pen olgeta samting long dispela graun i save pilim olsem mama i karim pikinini. Ol Kristen tasol i save olsem dispela pen i kamap bikos dispela nupela graun i wok long kam. Sios bilong God inap autim dispela tok: Maski dispela pen i bikpela stret, dispela nupela laip bai i kam. Dispela pen i soim yumi olsem dispela nupela de i kamap klostu nau.
SAMPELA TINGTING
Dispela teks long Buk Baibel inap helpim yu long taim bilong karim pen, o nogat?
Rom 8:12-17
Sapos nau yumi karim pen olsem em i bin karim, orait bihain bai yumi kisim biknem na gutpela sindaun tru wantaim em. — Rom 8:17
Sapos yumi no tingting long karim pen olsem Krais i bin karim, yumi mas senisim kranki tingting bilong yumi hariap. Long hia Buk Baibel i tok olsem yumi ol Kristen i mas karim pen pastaim, na bihain bai yumi kisim biknem na gutpela sindaun tru wantaim Krais.
Yumi no ken lus tingting long dispela tok, “Karim pen olsem em i bin karim.” I no olsem long wok bilong yumi yet bai yumi kisim dispela laip i stap oltaim oltaim. Nogat. Diwai kros bilong Krais tasol i kisim bek yumi. Tasol sapos yumi laik stap wantaim Krais oltaim oltaim, yumi mas karim pen wantaim Krais tu.
Em i narakain samting tru olsem dispela King bilong Israel i kam olsem wokboi nating long dispela graun na em i dai long wanpela diwai kros. Dispela pikinini bilong God i daunim em yet aninit long ol lo bilong Papa bilong em. Em i no bihain sotkat rot Satan i soim em. Na em i no bihainim rot ol pren bilong em i makim bilong bihainim. Em i no abrusim ol pen na hevi. Nogat, em i bihainim rot Papa God yet i makim bilong em i mas bihainim.
Na olgeta man o meri i laik pas wantaim Krais i mas bihainim dispela rot tu: Diwai kros pastaim na hat bilong king bihain. Na nau sios bilong Krais i stap long dispela taim bilong diwai kros.
I no olsem Spirit i kam pinis long sios olsem na ol pen na hevi i no stap moa. Nogat. Spirit i no kam bilong rausim diwai kros bilong yumi. Em i kam bilong givim strong long yumi long karim diwai kros bilong yumi.
Na i no olsem sios em i samting bilong kisim yumi i go long heven. Nogat tru. Sios em i ples we ol lain bilong Jisas Krais i save bung. Ol i stap laip wantaim Krais. Taim ol i wokim plen, ol i mekim olsem wantaim Krais; wanem samting ol i mekim, ol i mekim olsem wantaim Krais. Sapos ol i stap laip, orait ol i stap wantaim Krais. Na sapos ol i dai, orait ol bai i kisim gutpela samting tru. Ol i karim pen wantaim Krais, na bihain ol bai i kisim biknem na gutpela sindaun tru wantaim em tu.
SAMPELA TINGTING
Yu yet save karim pen Krais yet i karim?
Kolosi 1:24
Nau mi amamas long karim pen bilong helpim yupela. Na mi laik helpim sios bilong Krais, em bodi bilong em yet. Pen Krais i karim bilong helpim sios, em i no pinis yet. Na long pen mi karim long bodi bilong mi yet, mi laik inapim dispela pen bilong Krais. — Kolosi 1:24
Kingdom bilong God i wok long kam. Dispela em i wanpela bikpela samting tumas, na yumi i gat hap wok long mekim bilong mekim dispela samting i kamap.
Em i tru, King tasol inap kisim dispela kingdom i kam. Tasol em bai i yusim yumi long mekim olsem tu. Na em i tru olsem Krais i karim pen long yumi. Tasol em i save yusim yumi long inapim dispela pen em i karim tu.
Taim yumi karim dispela pen, i no olsem yumi wok long kisim bek yumi yet. Nogat tru! Jisas i tok, “Em i pinis nau,” taim em i dai long diwai kros. Na as bilong laip bilong yumi em i dispela wok Krais yet i pinisim. Tasol Krais i givim narapela wok long yumi long mekim, wok bilong autim tok bilong Krais.
Na Krais bai helpim yumi long mekim dispela wok. Taim yumi no gat strong, em yet bai strongim yumi, na em bai bagarapim ol birua bilong yumi. Na em i save usim ol samting bilong yumi tu, olsem maus na han na mani bilong yumi. Long han bilong yumi, em yet bai tasim ol narapela manmeri. Bel bilong em i stap insait long sios bilong em. Spirit bilong em i kapsait long sios na i go long ol arapela. Na pen bilong Krais i save pulap long bel bilong ol Kristen tu.
Wok i stap bilong bagarapim strong bilong Satan. Long pawa bilong Spirit bilong God, dispela samting bai kamap, tasol dispela wok bai givim bikpela pen long ol Kristen. Ol Kristeni mas mekim bikpela wok stret, na ai wara bilong ol bai pundaun taim ol i mekim wok long autim tok bilong God. Ol Kristen i mas karim pen na givim bel long ol arapela, bai ol arapela i ken bihainim Bikpela tu.
Na ol Kristen i mas karim dispela pen bipo long taim dispela kingdom bilong God inap long kam. I olsem ol Kristen i mas karim olgeta pen God i makim pinis bilong ol i mas karim, na taim ol inapim dispela mak pinis, orait kingdom bilong God bai i kam.
I no gat wanpela amamas i winim dispela amamas bilong inapim dispela pasin bilong karim pen bilong Krais. Na i no gat wanpela samting i winim dispela wok tu. Krais bai i usim laip na idai bilong ol disaipel bilong em bilong kamapim kingdom bilong en. Na bihain, em bai tok namba tu taim, “Em i pinis nau!”
SAMPELA TINGTING
“I no gat wanpela amamas i winim dispela amamas bilong inapim dispela pasin bilong karim pen bilong Krais. Na i no gat wanpela samting i winim dispela wok tu.” Dispela em i tru insait long laip bilong yu yet, a?
Filipai 3:3-11
Mi laik save tru long Krais...Krais i bin kirap bek long matmat, na em i gat bikpela strong, na mi laik save tru long dispela strong bilong em. Mi laik poromanim em long pasin bilong karim pen. — Filipai 3:10
Em i narakain samting tru, a, long save tru long Krais, na long save tru long strong bilong em, na long poromanim em long pasin bilong karim pen? Ating sapos yumi gat strong bilong Krais long laip bilong yumi, orait bai pen na hevi bilong yumi i pinis, a, na yumi bai i gat laip tru na amamas tasol, a?
Nogat tru. Taim yumi yet i kirap long matmat bai yumi i kisim laip tru na amamas tasol oltaim oltaim. Tasol, Pol i tok, dispela samting i no kamap yet long yumi.
Olgeta Kristen i mas wok strong long save tru long Krais. Yumi bai save moa long em taim yumi wanbel wantaim em long bilip. Na yumi poromanim em long dai bilong em na long kirap bek long matmat bilong em tu. Long dai bilong Jisas em i kisim bek yumi long hevi bilong sin, na long taim em i kirap bek long matmat, em i givim nupela laip long yumi long pawa bilong Holi Spirit.
Taim yumi kisim dispela nupela laip pinis, orait wantu bai yumi poromanim Krais long karim pen tu. Pen bilong em i no wankain olsem pen bilong ol lain i no bilip long em. Nogat. Em i narakain pen –ol lain bilong Krais tasol i save karim dispela pen.
Taim yumi no save tru long Krais, yumi no save wari tumas long pasin bilong ol narapela. Tasol nau yumi save olsem i gat wanpela rot i go long laip tasol, na olgeta narapela rot bai i go long hel. Taim yumi no save tru long Krais, ol narapela samting i save givim amamas long yumi. Nau, dispela ol samting i no save kirapim bel bilong yumi.
Na tu, ol lain i no save long Krais, ol i gat ol narapela kain hevi olsem yumi. Nau yumi lusim pinis planti ol hevi na wari ol narapela lain i save gat. Tasol nau yumi, ol lain husait i save tru long Krais, yumi kisim ol nupela hevi na pen pinis, na ol lain i no bilip long Krais, ol i no klia long ol dispela hevi na pen bilong yumi.
Taim yumi kisim tok bilong Bikpela, bai yumi mekim wok bilong em tu. Em i naispela samting tru long kisim strong bilong Krais long laip bilong yu. Tasol yu mas poromanim Krais long pasin bilong karim pen tu!
SAMPELA TINGTING
Wanem ol hevi i lus pinis bikos yu save tru long Krais? Na wanem ol nupela hevi i save kam long yu bikos yu pas wantaim Krais?
Rom 9:1-5
Oltaim mi save bel sori tru, na mi save wari na tingting planti. — Rom 9:2
Pol tu i autim dispela kain sori bilong God na Krais taim em i tok, “Oltaim mi save bel sori tru, na mi save wari na tingting planti.” I luk olsem Pol i no tok stret – hau na em bai i bel sori tru OLTAIM? Tasol long lain wan em i putim ples klia olsem em i tok tru long nem bilong Krais. Em i no giaman. Holi Spirit i mekim tingting bilong em i klia, na long bel bilong en, em i save olsem dispela tok bilong em em i tru. Na em i tokaut long as bilong sori na wari bilong em: ol brata na susa bilong em i givim baksait long Jisas Krais!
Yumi klia, taim Krais i singautim yumi long bihainim em, na yumi bekim, orait bai yumi bungim ol hevi na sori. Tasol tu, amamas bilong yumi bai winim olgeta narapela kain amamas long dispela graun. Long dispela nupela amamas bai yumi bungim narapela kain hevi na sori tu.
I gat planti ol as bilong sori bilong yumi. Tasol as bilong ol dispela sori em i dispela samting: Yumi kisim dispela sori bilong God taim yumi kisim dispela laikim tru bilong God.
Olgeta laikim tru i save kisim pen i kam wantaim. Ol lain i les long bungim pen, ol i mas wok long abrusim laikim tru. Sapos yu laikim tru meri bilong yu, pen bilong em yet bai kam long bel bilong yu tu. Na sapos yu kisim pinis laikim tru bilong God, orait bai yu pilim hevi na sori bilong God taim yu lukim sin o wanpela man i mekim sin.
I no olsem laikim tru bilong God i stap longwe long yumi. Sapos God yet i kam long bel na lewa bilong yumi, orait God i stap klostu tru long yumi. “God i givim pinis Holi Spirit long yumi, na pasin bilong God bilong laikim tru ol man, em Holi Spirit i bin kapsaitim long bel bilong yumi” (Rom 5:5).
Taim Bikpela i kam insait long bel bilong yumi pinis, bai yumi wanbel wantaim em: Wanem samting em i les long em, bai yumi tu les long em; na wanem samting em yet i laikim tru, em bai yumi laikim tru tu.
SAMPELA TINGTING
Yu yet yu bin pilim dispela sori bilong God?
Matyu 23:37-39
Jerusalem, Jerusalem...Planti taim moa mi laik bungim ol pikinini bilong yu, olsem kakaruk meri i save bungim ol pikinini bilong en aninit long wing bilong en. Tasol yupela i no laik.
—Matyu 23:37 Sori bilong God long ol pikinini i bin ranawe long en em i bikpela tru, olsem na em i kam long painim
ol na long kisim ol i kam bek long em.
God i kam long yumi long Jisas Krais. Jisas em i no olsem wanpela man i bin kam bilong makim rot bilong yumi long kamap long God tasol. Nogat, Jisas i kam long God na em yet i dispela rot.
Long Jisas Krais, God i kam long painim na kisim bek wanem samting em i lus. Na pastaim God i wok long painim pikinini bilong em, Israel, bikos em i bin mekim bikpela wok long lukautim na laikim tru Israel.
God i singautim Israel, na em i wok strong tru long painim em na kisim em i kam bek. Olsem na Jisas i autim dispela tok, “Jerusalem, Jerusalem...Planti taim moa mi laik bungim ol pikinini bilong yu, olsem kakaruk meri i save bungim ol pikinini bilong en aninit long wing bilong en. Tasol yupela i no laik.” Tasol ol manmeri i paul long tok bilong Krais. Ol i no klia long tok bilong em.
Maski olgeta manmeri i paul, long tude tu, sori bilong God i klia tru long Tok bilong em. Long tok bilong Jisas na long pasin na wok bilong en, sori bilong God i kamap klia tru. Em i krai long yumi, tasol planti i no bekim.
Dispela em i sori bilong laikim tru. Ol lain i no gat laikim tru long bel bilong ol, i no gat sori tu.
Ol papamama i klia long dispela kain sori. Ol pikinini i no inap kamap klia long dispela sori bilong papamama inap long taim ol yet i gat pikinini bilong ol yet. Sori tru i kamap long laikim tru – dispela em i pasin bilong ol Kristen. Dispela kain sori i wanbel wantaim laikim tru na sori bilong God na Jisas Krais.
Ol Kristen papamama i gat wanpela hevi i winim olgeta narapela hevi: Taim pikinini bilong ol i lusim God! Maski pikinini bilong ol i kisim bikpela namba na i kamap bikman stret – papamama bai i gat bikpela pen tru sapos dispela pikinini i lusim God. Na tu, ol Kristen papamama i gat wanpela amamas i winim stret olgeta narapela amamas: Taim pikinini bilong ol i wokabaut wantaim Bikpela! I no gat wanpela samting i orait sapos yumi i no wanbel wantaim God. Na olgeta samting bai kamap orait sapos yumi holim strong God.
SAMPELA TINGTING
Yu bin tingting long dispela sori bilong God na Krais bipo? Sampela taim, long laip bilong yu, yu gat dispela kain sori?
Buksong 81:6-16
Na mi laik bai ol Israel i bihainim laik bilong mi oltaim. —Buk Song 81:13 Long dispela graun i gat planti pen, hevi na traim. Hevi i stap long olgeta hap na i go long olgeta
man.
I gat hevi na pen bilong bodi na bilong spirit tu. I gat sampela hevi yumi inap long rausim, na i gat sampela ol sori yumi no inap long rausim bikos em i samting bilong yumi man bilong dispela graun. I gat sampela hevi yumi i givim long yumi yet bikos long pasin nogut bilong yumi. Sampela taim yumi no tingting gut taim yumi mekim sampela samting o yumi i mekim sin na hevi i kamap long dispela. Na i gat sampela bikpela hevi i kamap long dispela graun na yumi no inap abrusim o stopim dispela ol hevi.
Yumi klia: maski wanem kain hevi i save kamap long dispela graun na long yumi, dispela graun i pulap long hevi, na olgeta manmeri i krai long dispela ol hevi. Bipo long taim yumi i kamap long dispela graun, ol hevi na sori i stap pinis.
Buk Baibel i stori long wanpela sori, tasol planti taim yumi no tingting long dispela sori bikos yumi wari long hevi na sori bilong yumi yet. Na dispela em i sori bilong God. God em i sori na em i krai, “na mi laik bai ol Israel i bihainim laik bilong mi oltaim.”
Buk Baibel i stori bilong God em i wok long painim yumi, tasol yumi wok long hait long em. God em i tok, “Adam, yu stap we?” Tasol Adam i hait namel long ol diwai. I olsem stori bilong wanpela Papa em i lukluk long rot na wetim pikinini bilong em i kam bek, na em i krai, “Pikinini bilong mi, wanem taim bai yu kam bek long haus bilong mi?”
Na dispela sori bilong God i soim klia bilong wanem yumi yet i gat hevi. As bilong ol dispela pen na hevi i bikos yumi lusim God pinis. Yumi no gat strong long stap gut sapos yumi i no go bek long God. Taim yumi lusim God pinis, i olsem yumi i lusim pinis as ples tru bilong yumi.
Wanpela hop tasol bilong yumi i stap – yumi mas wanbel wantaim God gen. Taim heven na graun i wanbel gen, orait as bilong ol hevi na sori bilong yumi bai pinis tu. Na yumi bai stap gut tru na bel isi tru. Na God bai mekim drai wara i stap long ai bilong olgeta manmeri bilong em.
SAMPELA TINGTING
Yu yet yu save tingting long dispela sori bilong God?
Aposel 14:19-23
Yumi laik i go insait long kingdom bilong God, tasol pastaim yumi mas wokabaut long rot i gat planti hevi i stap long en. —Aposel 14:22
Taim ol misinari long bipo i wok long mekim ol disaipel long ol taun, ol i bin tokim ol yangpela Kristen olsem: “Yumi laik i go insait long kingdom bilong God, tasol pastaim yumi mas wokabaut long rot i gat planti hevi i stap long en.” Dispela em i save kamap. I no gat wanpela rot i go long heven i isi long wokabaut long em.
I gat planti manmeri long kain kain hap olsem China na long ol kantri we Islam i stap, na ol i bungim bikpela hevi tru taim ol i kamap disaipel bilong Jisas. Tasol yumi no ken tingting long ol dispela lain tasol taim yumi harim dispela tok long ol hevi ol Kristen lain bai bungim. Yumi tu bai bungim hevi – dispela em i rot bilong salvesen. Yumi no inap abrusim ol dispela hevi, na yumi no ken wok long mekim olsem. Bilong wanem yumi no inap abrusim ol dispela hevi?
- Satan em i makim yumi long bagarapim yumi. Em bai wok strong tru long pulim yumi i go longwe long Krais.
- Yumi mas sanap na autim nem bilong Jisas. Olsem na ol narapela bai lap long yumi na tok bilas long yumi – planti taim ol pren na famili bilong yumi bai mekim olsem.
- Yumi mas daunim yumi yet. Olpela bel bilong yumi i no inap i dai hariap. Tasol em bai i dai, na dispela bai givim pen long yumi.
- Yumi mas lainim pasin bilong laikim tru ol narapela olsem Jisas yet i save mekim. Na pasin bilong laikim tru bai bringim pen na hevi long yumi tu.
Taim yumi klia olsem yumi bai bungim pen na hevi sapos yumi laik kamap long kingdom bilong God, yumi mas lukaut. Nogut yumi wok long senisim tok bilong God bikos yumi i les long harim dispela tok. Na tu, nogut yumi i wok long mekim trabel bikos yumi gat laik long bungim ol bikpela hevi. Nogat! Dispela tasol em i wok bilong yumi long mekim: Yumi mas skelim gut laip bilong yumi yet. Yu yet yu bihainim Krais long laip bilong yu o nogat? Yu yet yu wok long daunim yu yet na apim nem bilong em olgeta taim o nogat?
SAMPELA TINGTING
Yu save bungim sampela hevi bikos yu yet i gat laik long bihainim Jisas?
Aposel 16:25-34
Long biknait Pol tupela Sailas i wok long beten na mekim song long God. Na ol arapela kalabus i harim i stap. — Aposel 16:25
Taim ol i putim Pol tupela Sailas long kalabus i luk olsem ol i wankain olsem ol narapela kalabusman tasol. Klos bilong ol i bruk pinis, na ol i doti tru. Woda em i “pasim strong lek bilong tupela long Plang.”
Tasol, long biknait, i kamap klia tru olsem Pol tupela Sailas i mausman bilong Jisas Krais.
Ol man long kalabus i save tok nogut na autim kain kain tok nating. Na ol narapela man i no save kirap nogut long dispela, bikos ol kalabusman i save mekim olsem. Tasol Pol tupela Sailas i mekim narakain samting olgeta: Tupela i wok long beten na mekim song long God. Em i narakain samting tru!
Long dispela taim, Pol tupela Sailas i no autim tok bilong God; tupela i no wok long stori long pasin bilong tanim bel na pasin bilong bilip. Nogat. Long dispela taim, tupela i autim bilip na amamas bilong ol long beten na long ol singsing. I gat taim bilong autim tok, na i gat taim bilong autim bilip long beten na singsing.
“Na ol arapela kalabus i harim i stap.” Olgeta dispela kalabusman i kirap na harim i stap. I olsem sampela lait i kam insait long dispela ples tudak. Ating ol ensel i bin singsing wantaim. Long taim bilong lotuim God, heven na graun i wanbel tru.
Na wantu God i mekim bikpela samting i kamap: Graun i guria, na i sakim olgeta pos bilong haus kalabus. Ol sens bilong olgeta kalabus i lus na olgeta dua bilong haus kalabus i op.
Tudak i no pinis yet, na woda wantaim famili bilong em i beten long God na singim ol singsing bilong litimapim nem bilong God tu. Ating ol ensel bilong God i singsing bikpela tru long dispela nait.
Hau bai ol Kristen inap amamas na singsing long ol dispela kain hevi? Bikos ol i save long Jisas Krais!
SAMPELA TINGTING
Yu save long wanpela Kristen i bin singsing long taim bilong ol hevi?
Aposel 9:10-20
Bai mi soim em (Sol) olkain pen na hevi em i mas karim long taim em i autim nem bilong mi. — Aposel 9:16
Sol em i orait long dai bilong Stiven bikos em i gat laik long bagarapim ol Kristen lain. Na em i redi long go long Damaskus long kalabusim ol man na meri i bihainim rot bilong Jisas. Em i gat laik long go, na em i askim hetpris long larim em i go na mekim olsem.
Ol Kristen i ranawe na ol i prea, “Bikpela, lukautim mipela long han bilong dispela man nogut, Sol.”
Na bihain, Bikpela i stap Laip i bungim Sol long dispela rot i go long Damaskus. Sol em i no kalabusim wanpela man. Nogat, em yet i go long Damaskus olsem kalabusman bilong Krais!
Em i wok bilong Ananaias bilong autim gutnius bilong marimari bilong God long Sol. Long dispela tok bilong God, Sol i kisim salvesen, na em yet bai i go aut bilong bringim dispela salvesen long planti narapela manmeri tu. God yet i gat plen long laip bilong Sol: “Bai mi soim em olkain pen na hevi em i mas karim long taim em i autim nem bilong mi.”
I luk olsem Bikpela i gat laik long mekim save long Sol: Sol yet i givim planti pen na hevi long ol Kristen manmeri, olsem na, Sol yet bai kisim pen na hevi long Krais nau.
Tasol i no olsem. Nogut yumi lus tingting long pasin bilong God long singautim yumi olgeta (“bihainim mi”) na bilong askim yumi long karim diwai kros bilong yumi yet. Em tru, God i no makim wankain wok long olgeta lain bilong em. Em i givim bikpela wok stret long Pol, olsem na Pol i bungim planti hevi na pen tru.
Sapos yumi stap lain bilong Krais, yumi bai bungim hevi; hevi em i samting bilong olgeta manmeri i bilip long God. Sapos yumi mekim wok bilong Krais, bai yumi bungim hevi. Taim dispela wok yumi mekim long Krais i kamap bikpela moa yet, orait hevi tu bai i kamap bikpela moa yet. Tasol tu, taim yumi kisim ol dispela hevi, amamas bilong yumi bai i kamap bikpela moa yet tu, na yumi bai kamap klostu moa long Jisas tu.
Wok bilong yumi wan wan i no wankain, tasol pasin bilong bihainim Krais em i wankain tasol. Taim yumi stap aninit long Jisas, hevi na glori bilong yumi bai kamap bikpela moa yet.
SAMPELA TINGTING
Yu gat laik long mekim sampela moa wok bilong Bikpela olsem wanem?
Ritim: Matyu 28:16-20
...long nem bilong Papa na bilong Pikinini na bilong Holi Spirit. — Matthew 28:19
Dai bilong Jisas na dai bilong Stiven i klostu wankain liklik. Holi Spirit i stori long dai bilong Stiven long soim pasin bilong ol disaipel bilong bihainim pasin bilong tisa bilong ol. Stiven em i lainim pinis pasin bilong prea, “Bikpela, yu no ken bekim dispela sin long ol.” Na tu, Stiven i lainim pinis gutpela pasin bilong dai: “Bikpela Jisas, yu kisim spirit bilong mi.”
Tasol i gat wanpela bikpela samting i no wankain long las tok bilong Jisas na las tok bilong Stiven. Jisas em i prea long God Papa, “Papa, mi putim spirit bilong mi long han bilong yu.” Tasol Stiven i prea long Krais, “Bikpela Jisas, yu kisim spirit bilong mi.” Jisas i prea long God Papa, tasol Stiven i prea long God Pikinini.
Long hia yumi i lukim bikpela tok hait i stap long Buk Baibel – God em i husat tru?
Long Olpela na Nupela Kontrak, yumi kisim save olsem i gat wanpela God tasol bilong heven na graun. Sampela taim Buk Baibel i autim nem bilong Jisas taim Buk Baibel i stori long dispela wanpela God. Tasol Buk Baibel i klia olgeta: i gat wanpela God tasol i stap!
Yumi no inap save gut long God. Yumi i mas bilip tasol: dispela God Jisas yet i prea long em, na dispela God Stiven yet i prea long em i wanpela – wanpela God tasol i stap! Na Jisas em i God tru na man tru wantaim.
Olgeta manmeri long olgeta taim i no inap save gut tru long dispela tok hait. Planti manmeri i bilip long God i bin wok long autim dispela tok hait long kain kain tok. Na maski i hat tru, na i no gat wanpela tok inap kliaim dispela tok hait olgeta, sios i bin yusim dispela tok long autim dispela tok hait: God Triwan. Wanpela God, tasol tripela: Papa, Pikinini na Holi Spirit. Na God em i wanpela.
Buk Baibel i skulim yumi long dispela; em i no samting man yet i kamapim. Dispela prea bilong Jisas na Stiven i wok long kirapim tingting bilong yumi long God Triwan.
SAMPELA TINGTING
Em i hat tru long save gut tru long dispela bilip: God Triwan. Askim God long helpim yu long bilipim dispela tok bilong Buk Baibel.
Ritim: Luk 23:44-49
Na Jisas i singaut strong moa olsem, “Papa, mi putim spirit bilong mi long han bilong yu.”
—Luk 23:46
Taim ol i wok long tromoi ston long Stiven, Stiven i prea olsem, “Bikpela Jisas, yu kisim spirit bilong mi.” —Aposel 7:59
Long taim bilong slip, sampela pikinini ol i save beten, “Nau mi laik slip, mi prea long Bikpela long em i ken lukautim spirit bilong mi.” Na las tok bilong Jisas long diwai kros i klostu wankain olsem dispela prea.
Na long diwai kros, Jisas Krais i skulim yumi long gutpela pasin long taim bilong i dai. Jisas em i tisa bilong yumi long olgeta samting long wokabaut bilong yumi. Em i skulim yumi long pasin bilong laip, na em bai i skulim yumi long gutpela pasin long taim bilong i dai. Taim yumi i lainim ol gutpela pasin bilong dispela laip, yumi no ken pret long pasin bilong yumi long taim bilong i dai bilong yumi. Tisa bilong yumi bai i stap wantaim yumi.
Wanpela taim wanpela Kristen dokta em i tanim bel na em i kam bek long Bikpela long prea bilong wanpela yangpela mangi. Joni em i gat 6-pela krismas tasol, em i sik nogut tru, tasol em i no save olsem em i sik nogut tru. Na dispela dokta na wanpela nes i kam long em, na ol i laik wok strong tru long oraitim em gen. Olsem na ol i laik kisim em na operatim em, olsem na ol i slipim em long wanpela bet na ol i tokim em olsem, “Bai mi givim sampela marasin long yu, na bai yu slip.”
“Bai mi slip?” Joni i askim em.
“Yes, bai yu slip,” dokta i tok.
“Orait, sapos mi bai slip, pastaim mi laik beten.”
Na dispela liklik mangi i brukim skru, pasim ai na han bilong em. Na long yau bilong God, na dispela dokta na ol nes tu, em i beten, “Nau bai mi slip, mi askim yu Bikpela long lukatuim spirit bilong mi.” Tasol Joni em i no kirap gen taim ol i slipim em. Em i dai long taim ol i operatim em. Tasol dispela dokta em i lukim dispela na em yet i beten long Papa bilong em: “Papa, mi putim laip bilong mi long han bilong yu tasol!”
SAMPELA TINGTING
Wanem samting i save givim bel isi long yu long taim bilong laip na long taim bilong i dai?
Ritim: Aposel 7:51-60
Na em i brukim skru na i singaut strong moa, “Bikpela, yu no ken bekim dispela sin long ol.” —Aposel 7:60
I gat planti stori bilong ol man i bin bungim dai bikos ol i bihainim Jisas Krais. Planti yia bipo long tude, planti manmeri i gat laik long ritim ol stori long dispela kain man. Tasol tude planti lain i gat bikpela laik long ritim ol stori bilong ol man nogut, na maski long ritim ol stori long ol Kristen lain i dai long han bilong ol birua bilong Jisas Krais. Tasol planti ol sios i laik ritim ol dispela stori yet.
Buk Baibel i gat sampela stori tu long ol man i bungim dai bikos ol i bihainim Jisas. Tasol Buk Baibel i no autim bikpela stori tru long ol dispela kain man. Stori bilong dai bilong Jems (Aposel 12:2) em i liklik tru, na Buk Baibel i no tokim yumi long ples we Pol na Pita i bungim dai o long wanem rot ol i dai.
Tasol stori bilong dai bilong Stiven, dispela namba wan man i bungim dai bikos em i bihainim Jisas, em i no liklik. Sapos yumi ritim gut dispela stori, bai yumi luksave olsem dai bilong Stiven i kain olsem dai bilong Jisas. Olsem na yumi ken klia gut bilong wanem Holi Spirit i givim dispela stori long yumi. Dai bilong Stiven i putim ples klia olsem, “Sumatin i no winim tisa bilong en... Sapos sumatin i kamap wankain olsem tisa bilong en, em inap. Na sapos wokboi i kamap wankain olsem bikman bilong en, em tu inap” (Matyu 10:24-25). Tok bilong Jisas i tru taim em i tok, “Na man i no karim diwai kros bilong en na bihainim mi, em i no inap i stap pren bilong mi” (Matyu 10:38).
Ol i givim hevi long Stiven, kain olsem ol i givim hevi long Jisas. Na prea bilong wokboi (Stiven) i wankain olsem prea bilong masta bilong em (Jisas). Ol disaipel bilong Jisas i ken amamas long mekim wankain pasin olsem tisa (masta) bilong ol.
Ol gutpela lida i save skulim yumi long kamap ol gutpela disaipel tru. Na Jisas i makim rot bilong yumi long bihainim. Olsem na yumi mas givim olgeta glori long em, long dai bilong yumi tu.
SAMPELA TINGTING
Spirit bilong God i skulim yu long wanem samting long dispela stori?
Ritim: Luk 23:32-38
Papa, yu ken lusim sin bilong ol. Ol i no save long dispela samting ol i mekim. —Luk 23:34
Jisas i hangamap long diwai kros na em i pilim bikpela pen stret. Ol i nilim han bilong em long diwai, na bodi bilong em i guria long pen. Diwai kros em i samting bilong bagarapim, givim pen, na kilim i dai wanpela man. Taim Jisas i stap long diwai kros, em i beten.
“Papa,” em i beten bikos bilip bilong em i no pundaun. Sampela bilong yumi i save bilip long Papa God taim yumi i amamas na yumi i stap bel isi. Taim sampela samting nogut i kamap long yumi o yumi bungim sampela hevi na pen, yumi bai ting, Papa bilong mi i stap we? Tasol, namel long bikpela hevi na traim stret, Jisas i tok, “Papa...”
Jisas i askim Papa bilong em long lusim sin bilong ol man i wok long kilim em i dai. Em i no singaut long kisim sampela helpim. Yumi bai singaut long ol pen na traim, a? Jisas em i no wok long mekim save long ol birua bilong em. Yumi bai tingting long bekim nogut pasin bilong ol birua bilong yumi, a? Nogat. Jisas i mekim narapela kain pasin. Em i askim Papa bilong em long lusim sin bilong ol birua bilong em i wok long kilim em i dai.
“Papa, yu ken lusim sin bilong ol. Ol i no save long dispela samting ol i mekim.” Ol i no save – i no min olsem ol i no gat asua long dispela sin ol i mekim. Na planti lain bilong tude i wankain olsem ol dispela soldia bilong Rom; ol i no save. Ol i no save olsem, em i sin bilong yumi i hangamapim Jisas long diwai kros. Yumi yet i hangamapim Jisas.
Nau yumi mas beten. Yumi i mas askim God long lusim sin bilong ol man i no save wanem samting ol i bin mekim – long God, long Jisas. Na yumi mas prea strong tru na askim Papa bilong yumi long skulim yumi long helpim ol lain i no gat save long wok bilong God, long kisim save long wok bilong em – na long Jisas, na long diwai kros.
Long dispela ples bilong pen na hevi, long dispela holi ples, dispela diwai kros bilong Jisas, olgeta manmeri i mas brukim skru na kamap fri, na kisim save long wanem samting ol yet i mekim.
SAMPELA TINGTING
Beten long Papa bilong yu long helpim yu i kisim save long wanem samting yu yet yu mekim, na brukim skru long diwai kros bilong Jisas.
Ritim: 1 Pita 4:12-19
Ol brata tru, wanpela traim olsem paia i wok long kamap long yupela. Tasol yupela i no ken kirap nogut na ting em i narakain samting tru i kamap long yupela. Nogat. —1 Pita 4:12
Yumi no ken kirap nogut na ting em i narakain samting tru taim ol traim i kam long ol lain bilong God. Nogat. Yumi mas kirap nogut taim sios i stap isi tasol na i no bungim ol traim olsem paia.
Sapos Kristen wokabaut bilong yumi i no bungim ol lain i les long yumi, yumi mas tingting gut na skelim laip na wokabaut bilong yumi. Krais i bungim planti bel kros na hevi, na yumi i lain bilong bihainim em.
Buk Baibel i tok olsem ol lain bilong God bai bungim pen na hevi. Yumi i gat laik long stap isi, tasol em bai nogat. Krais i no promisim yumi long stap isi long dispela graun. Sapos yumi stap isi, orait em i narakain samting stret. Na sapos yumi stap isi, yumi mas mekim hat wok stret long yusim dispela fridom long autim tok bilong God. Yumi i mas tingting gut na prea strong, nogut yumi i laik stap isi tasol na i no redi long pesim ol pen na hevi.
Pita i tok olsem, ol traim olsem paia bai kamap long lain bilong God. Na i gat tripela as bilong dispela. Namba wan as Pol i givim yumi i olsem: Yumi i mas skelim gut olgeta samting long painimaut em i trupela na em inap stap strong oltaim. Olsem na yumi mas skelim na traim olgeta Kristen bilip long paia.
Namba tu samting, Krais i skulim yumi olsem i gat wanpela rot tasol long kamap long glori bilong kingdom bilong em. Dispela em i rot bilong bihainim tok bilong em na bilong daunim yu yet. Olsem na ol Kristen bai bungim ol hevi na traim long bel bilong ol yet na ol hevi na traim i kam long ol narapela.
Namba tri samting, sapos yumi laik wanbel wantaim Krais long tude, yumi mas poromanim em long hevi na pen bilong em tu. Sapos yu bungim ol hevi long nem bilong Krais, orait you ken amamas – na dispela amamas em i narakain stret na ol lain bilong dispela graun bai paul long dispela amamas.
Ol lain i bungim ol hevi na pen long nem bilong Krais long tude, ol bai i pilim wanbel wantaim Krais, em i dai long diwai kros long yumi.
SAMPELA TINGTING
Yu save bungim ol hevi na pen long nem bilong Krais, o nogat?
Ritim: 1 Pita 2:18-25
God i singautim yupela pinis bilong bihainim dispela kain pasin, long wanem, Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim. — 1 Pita 2:21
Wanpela taim bipo, Pita i bin kamap olsem mausman bilong Satan taim em i wok long pasim Jisas long go long diwai kros. Tasol long dispela namba wan pas bilong Pita, em i kamap olsem wokboi bilong Holi Spirit, na em i stori long pen na hevi bilong Jisas, na em i skulim yumi olgeta long pasin bilong wokabaut long dispela rot bilong Bikpela bilong yumi.
Ol hevi na pen bilong Jisas i gat tupela hap. Pita i stori long dispela tupela samting: Krais i bin karim pen bilong helpim yupela na em i soim yupela pinis dispela pasin bilong em, bai yupela i ken bihainim.
“Long yupela” i min olsem em i kisim ples bilong yumi na em i bungim hevi na pen. Dispela hevi na pen i pinis nau na i no inap kamap gen. Em i karim hevi na pen long sin bilong yumi olgeta, na long oltaim oltaim.
Tasol, dispela narapela hap bilong pen na hevi bilong Jisas, em i olsem: Yumi i mas pormomanim Jisas long karim pen na hevi sapos yumi laik bihainim em. Em i soim yumi pinis dispela pasin bilong em, bai yumi ken bihainim. Em i rot yumi mas wokabaut long en. Yumi i mas bihainim wokabaut bilong Jisas.
I no gat wanpela bilong yumi inap wokabaut long rot bilong yumi yet, na stap wanpis na mekim olsem. Yumi i lain bilong bihainim – bihainim Jisas. Yumi olgeta i gat laik long bihainim kain kain samting. Ol yangpela lain i amamas long bihainim ol man bilong pilai spot. Yumi i gat laik long amamasim ol arapela lain. O sampela taim bai yumi lukim sampela samting long TV na yumi gat laik long bihainim pasin yumi lukim.
Tasol Krais i kam long olgeta lain long olgeta kantri na em i givim yumi wanpela nupela narakain rot long bihainim. Long laikim tru, em i strong long tokim olgeta manmeri, “Bihainim mi.” Em i no laik sapos yumi bihainim ol pasin bilong ol narapela tasol long dispela graun. Em i gat laik sapos yumi tingting gut na harim tok bilong em. Na yumi mas beten: “Skulim mi, Bikpela, long bihainim laik na tingting bilong yu!”
Krais i karim pen na hevi long yumi. Na em i soim yumi pinis dispela pasin bilong em, bai yumi ken bihainim.
SAMPELA TINGTING
“Em (Krais) i no gat laik sapos yumi bihainim ol pasin bilong ol narapela tasol long dispela graun.” Olsem wanem long yu? Yu save gat laik long bihainim ol pasin bilong ol narapela tasol long dispela graun, o nogat?
Ritim: Jon 21:15-19
Na bihain em (Jisas) i tokim Pita olsem, “Yu bihainim mi.” —Jon 21:19
Taim Jisas i dai, Pita i bel hevi tru. I olsem em i lusim masta bilong em tupela taim – wanpela taim long dai bilong em, na narapela taim, taim em i tok olsem em i no save long Jisas. “Tru antap, mi no save long dispela man yupela i tok long en,” Pita i bin tok olsem.
Tasol Krais i wok long kisim Pita i kam wanbel wantaim em gen. Pastaim, ensel i tokim ol meri, “Yupela i mas i go givim dispela tok long ol disaipel bilong en, na long Pita tu...” (Mak 16:7). I min olsem: “Pita, dispela gutnius em i samting bilong yu, tu. Yu bilong mi yet!”
Namba tu samting i kamap taim Jisas i soim em yet long Pita. Yumi i no save, Jisas tupela Pita i stori long wanem samting long dispela taim. Em i samting bilong tupela yet. Tasol yumi save olsem dispela samting i bin kamap (Luk 24:34; 1 Korin 15:5).
Na namba tri samting i soim klia olsem Pita i wanbel tru wantaim Jisas gen i olsem: Em i taim bilong tudak gen, na wanpela paia i stap gen tu – kain olsem long dispela nait taim Jisas i stap long kaunsel. Tripela askim i kamap na Pita i mas bekim tripela taim – “Saimon, pikinini bilong Jon, yu laikim mi, o nogat?”
Na Pita i bekim olsem, “Yes, Bikpela, yu save, mi laikim yu.” Tasol long namba tri taim Pita i bel hevi long Jisas i askim em namba 3 taim “Yu laikim mi, o nogat.”
Na pinis bilong dispela i kamap olsem wanem? Em i pinis long dispela tok bilong bipo: “Yu bihainim mi.” Tasol nau dispela tok i gat bikpela mining moa long laip bilong Pita. Namba wan taim em i bin kisim dispela tok em i bin redi long mekim wok bilong Krais hariap. Tasol bihain em i bin givim baksait long Jisas, na nau em i wanbel gen wantaim Jisas – long pret, na bilip na long pasin bilong tanim bel. “Bikpela, yu save long olgeta samting. Yu save, mi laikim yu.”
Olgeta man o meri i bihainim Krais i bin bungim dispela kain tingting olsem Pita. Em i rot bilong lainim planti samting, bilong bilip long Krais na bilong daunim yumi yet. Dispela rot bilong bihainim Jisas i no isi, tasol marimari bilong Jisas i pulim yumi i kam bihainim em olgeta taim. Taim yumi lukluk long Jisas, na yumi i les na paul na yumi wari stret, em bai i tokim yumi, “Bihainim mi.”
SAMPELA TINGTING
Larim Spirit bilong God i ken stiaim yu long autim ol sin bilong yu long God na askim em long helpim yu i wanbel wantaim em long singaut bilong em: “Bihainim mi.”
Ritim: Mak 14:66-72
Na em i lukim Pita i hatim skin bilong en i stap. Na dispela wokmeri i lukluk stret long em, na i tok, “Yu tu yu bin i stap wantaim Jisas bilong Nasaret.” Tasol Pita i tok nogat olsem, “Mi no save tru long dispela tok yu mekim.” —Mak 14:67-68
Pita em i man bilong bihainim Jisas, tasol long wanpela taim em i no inap bihainim em moa. Em tru, em i laikim em tumas. Long gaden Getsamini, taim ol i kam na putim han long Jisas long holimpas em, Pita i kisim bainat bilong en na i paitim wokboi bilong hetpris, na bainat i katim yau bilong en na yau i pundaun. Yes, Pita i laikim Jisas tumas. Tasol Jisas i tokim Pita olsem em i no ken mekim olsem, na em i stretim yau bilong dispela man.
Tasol nau Pita i stap daunbilo long banis bilong haus. Em inap lukim Jisas taim em i stap long kaunsel. Blut i stap long pes bilong Jisas, em i no toktok, na ol i daunim em nogut tru. Jisas i luk olsem wanpela pikinini sipsip ol bai i kilim i dai.
Na bel bilong Pita i paul stret. Olsem wanem dispela king i stap olsem nau? Hau bai em i bihainim dispela man i karim planti hevi na pen tru, tasol em i no pait. Nogat, Jisas i daunim em yet na em i karim ol dispela pen.
Wanpela wokmeri i lukim em na i tok, “Yu tu yu bin i stap wantaim Jisas bilong Nasaret.” Tasol Pita i tok, “Mi no save tru long dispela tok yu mekim.” Na em i go ausait klostu long dua bilong haus. Na wanpela kakaruk i krai. Na dispela wokmeri i lukim em gen, na em i tokim ol man i sanap klostu long em olsem, “Dispela man hia em i man bilong lain bilong ol.” Tasol em i tok gen, “Nogat.”
Bihain liklik, ol man i sanap i stap klostu long em, ol i tok gen long Pita olsem, “Tru tumas, yu man bilong lain bilong ol. Yu man bilong Galili tasol.” Orait nau Pita i tok strong moa yet olsem, “Tru antap, mi no save long dispela man yupela i tok long en. Sapos mi no tok tru, orait God i ken bagarapim mi.”
Em i tok pinis, na wantu kakaruk i krai namba 2 taim.
Em i stat bilong Gut Fraide. Dispela King i kamap olsem pikinini sipsip. Na Pita i sanap na i krai moa yet.
Tasol long krai bilong em sampela hop i stap. Taim ol Kristen i pundaun long sin, na taim ol i lus tingting long bihainim Jisas o i pret long autim nem bilong em, ol i ken tanim bel na kam bek long God long diwai kros bilong Jisas.
SAMPELA TINGTING
Sampela taim yu yet yu pret long autim nem bilong Jisas tu?
Ritim: Mak 1:14-20
Na Jisas i tokim tupela olsem, “Yutupela kam bihainim mi, na bai mi lainim yutupela long pasin bilong kisim ol manmeri. — Mak 1:17
Long dispela de papa bilong Saimon na Andru i lusim tupela pikinini man bilong em i go long Jisas. Na tupela pikinini man bilong papa Sebedi, Jems na Jon, tupela i lusim wok bilong painim pis na tupela i go bihainim Jisas. Tasol em i naispela rot stret bilong lusim ol pikinini bilong yu!
Wanem samting i save kirapim ol man long bihainim Jisas?
Olsem wanem Abraham i lusim kantri bilong em na i go long Kenan? Dispela tok “kam bihainim mi” i bikpela samting. Tasol dispela tok i sampela samting moa yet bikos planti lain i save harim dispela tok, “kam bihainim mi.” Tasol sampela bai harim tru dispela tok na sampela narapela bai nogat.
Ol lain i bilip long Jisas tasol bai harim tru dispela tok.
Ol lain i bihainim Jisas, i bilip olsem Krais em i rot, na em i trupela rot, na i no gat narapela rot. Ol lain i bihainim em, ol i save olsem ol i mas harim singaut bilong em. Sapos nogat, ol bai i lus. Sapos yu bilip long Jisas, orait yu bai harim singaut bilong em, “kam bihainim mi.”
Em i wankain long dispela bisnisman i save salim ol naispela bis. Wanpela de em i lukim wanpela bis i gutpela tru na em i laik kisim. Olsem na em i go salim olgeta samting bilong en bilong kisim dispela gutpela bis (Matyu 13:46).
Na aposel Pol i tokim yumi olsem, “Wanem kain laip yumi bin i stap long en long taim God i singautim yumi, orait yumi mas i stap yet long dispela kain laip”(1 Korin 7:20, 24). Na planti manmeri i paul taim God i singautim ol, na ol i ting olsem ol i mas hariap na mekim nupela kain wok olsem kamap pastor o narapela wok kain olsem. Nogat. Tasol, sapos laip bilong yu i no senis long taim Jisas i singautim yumi long bihainim em, orait, i olsem yu no bin harim tok bilong em. Pasin bilong yumi mas senis olgeta; wok bilong yumi nogat! Yumi mas senisim pasin bilong yumi na mekim wok bilong em insait long dispela laip em i givim yumi pinis.
Bipo tingting bilong yumi i pulap long kain kain samting, tasol Krais i kisim bek yumi long ol dispela samting. Nau, laip bilong yumi i mas pulap long Krais. Sampela taim rot bilong yumi bai i hat tru, na yumi bai bungim ol hevi na pen. Tasol, maski, bai yumi bilip!
“Pikinini Sipsip bilong God – mi kam!”
SAMPELA TINGTING
Yumi mas bekim singaut bilong Jisas olsem: “Pikinini Sipsip bilong God – mi kam, mi kam!”
Ritim: Mak 8:27-38
Olsem tasol Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri. —Matyu 20:28
Long taim bilong bikpela pait (World War II) long England, Winston Churchill, olsem Praim Minista bilong dispela kantri i tokim ol man olsem, “Mi inap givim yu blut, na krai na hat wok stret tasol.” Em i save olsem em bai i hat wok stret long winim dispela pait; na ol lain long kantri i bilipim em na bihainim em bikos ol i save i no gat narapela rot bilong winim pait.
Taim Krais i singautim yumi long bihainim em, em i askim yumi long daunim yumi yet na karim diwai kros bilong yumi – em i “blut, na krai na hat wok stret.” Yumi i mas bilipim em na bihainim tok bilong em bikos i no gat narapela rot bilong winim pait. Ol narapela rot bai stiaim yumi i go lusim pait.
Ol man bilong bihainim Jisas i mas daunim ol yet na karim diwai kros bilong ol tu. Long klia gut long dispela, yumi mas lukluk long Krais yet, em i bihainim rot bilong laikim tru na bilong bihainim tok bilong God.
Pasin bilong daunim yumi yet na karim diwai kros bilong yumi i no samting bilong tok nogat long sampela liklik naispela samting tasol. Sampela lain i ting olsem ol i daunim ol yet taim ol i tok nogat long sampela naispela kaikai. Na sampela lain i ting olsem ol i karim diwai kros bilong ol taim ol i bungim sampela hevi planti lain long dispela graun i save bungim – na i no ol hevi ol lain bilong Krais tasol i save bungim.
Nogat. Em i hat tru long klia long mining bilong dispela tok, “pasin bilong daunim yumi yet na bilong karim diwai kros bilong yumi.” Em i samting bilong i dai na i stap laip wantaim. Yumi no inap lainim dispela samting hariap. Taim yumi stap long dispela graun, yumi i mas wok strong long lainim ol gutpela pasin bilong bihainim Jisas. Yumi no ken tok olsem yumi i save pinis long daunim yumi yet na long karim diwai kros bilong yumi!
SAMPELA TINGTING
Askim God long helpim yu long daunim yu yet na karim diwai kros bilong yu tu.
Ritim: Matyu 20:20-28
Olsem tasol Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri. —Matyu 20:28
Laip bilong Jisas i pulap long pasin bilong helpim ol arapela, na long dai bilong em i givim em yet long helpim ol arapela. Na dispela pasin, bilong givim yu yet long helpim ol arapela, em i samting yumi yet i mas bihainim. Em i dai long helpim yumi i kamap redi long mekim olsem.
Long dai bilong em yet, Jisas i baim bek yumi. Dispela tok “kisim bek” i olsem dispela tok bilong “ransom” taim wanpela man nogut i stilim (kidnapim) arapela man, na toktok long kisim sampela bikpela mani stret bipo em bai larim dispela man i go bek long famili bilong em. I olsem dispela namba tu man i kamap long kalabus bilong man nogut, na planti taim em bai dai long kalabus long dispela man. Tasol sapos narapela i baim bek (ransom) dispela man long kalabus, orait em bai i kisim laip na stap fri.
Bikos Krais i givim laip bilong em long baim bek ol lain i bilip long em, orait yumi no stap moa aninit long pawa bilong man nogut. Yumi i gat nupela Bosman bilong yumi. Nau yumi ken i stap long haus bilong Papa bilong yumi. Tasol yumi mas bihainim ol lo bilong dispela haus, na bihainim pasin bilong Krais, em i no bin kam bilong ol man i ken mekim wok bilong helpim em. Nogat. Em i kam bilong helpim ol.
Jisas i tok olsem em i givim laip bilong em bilong baim bek planti manmeri. Dispela tok “planti” i no min olgeta manmeri. Em i dai long lain bilong em yet tasol. Tasol taim Krais i tok “bilong baim bek planti manmeri,” em laik soim olsem em wanpela i bin dai long planti ol arapela manmeri. Dispela em i bikpela samting!
I gat planti ol stori bilong ol bikpela pait. Na yumi no ken ting olsem ol pait i gutpela samting, tasol i gat sampela stori insait long ol dispela stori bilong pait i naispela tru. Sampela taim yumi ken ritim stori long wanpela solidia insait long wanpela pait i bin tromoi em yet long wanpela bom o wanpela grenade samting long lukautim ol narapela soldia. Em i dai, na ol narapela i stap laip. Dispela kain stori i putim ples klia dispela tok, “wanpela i dai long planti manmeri.”
Laip bilong Jisas i soim yumi wanem kain pasin yumi mas bihainim – pasin bilong helpim ol narapela. Long dai bilong em yet, em i mekim yumi i stap fri bilong mekim olsem!
SAMPELA TINGTING
Ating sapos wanpela soldia i givim laip bilong em yet long lukautim laip bilong yu yet, yu bai amamas tru na tenk yu tru. Olsem wanem nau long wok bilong Krais bilong baim bek yu yet?
Ritim: John 13:12-20
Olsem tasol Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri. — Matyu 20:28
Tude, sapos yu wokboi long wanpela kampani bai yu kisim pe long wok bilong yu. Tasol long taim bilong Buk Baibel, sapos yu stap olsem wokboi, i min olsem yu no save kisim pe long wok bilong yu.
Olsem na ol lain long Juda i save paul taim ol i tok olsem wanpela king em i wanpela wokboi wantaim. Ol wokboi i save mekim wok bilong ol wokboi, tasol wanpela king em i gat bikpela namba na ol narapela lain i save brukim skru long ol king.
Olsem na, taim dispela King i tok, “mi no bin i kam bilong ol man i ken mekim wok bilong helpim mi. Nogat. Mi i kam bilong helpim ol,” ol lain Juda i paul tru. Na sapos yumi tingting gut long dispela ating yumi bai kirap nogut tu. Yumi mas wok long klia gut long Jisas em i husat, olsem Buk Baibel i skulim yumi. Nogut tingting bilong yumi paul long Jisas em i husat.
Dispela Jisas i kam long helpim ol narapela, em i singautim olgeta manmeri long kam bihainim em. Dispela pasin bilong bihainim em i no samting bilong senisim sampela tok bilong yumi o sampela pasin nogut bilong yumi tasol. Nogat. Em i samting bilong senisim tingting na laip bilong yumi olgeta.
Yumi no ken tingting long kisim pe taim yumi stap olsem wokboi bilong Bikpela. Sapos yumi les, orait yumi no bilong Jisas Krais. Tasol, taim yumi daunim yumi yet, na bihainim em tru, bai yumi klia olsem em i gutpela tru long stap lain bilong Jisas Krais.
SAMPELA TINGTING
Yu stap wokboi bilong God olsem wanem?
Ritim: Jems 1:12-21
Na yu no ken larim ol traim i kamap long mipela, tasol yu ken kisim bek mipela long ol samting nogut. — Matyu 6:13
I no gat wanpela Kristen inap abrusim dispela pait. Sapos yumi bilip long Bikpela na autim nem bilong em, orait bai yumi bungim birua bilong yumi. Sapos dispela em i tru, watpo nau Bikpela i skulim yumi long prea olsem, “Na yu no ken larim ol traim i kamap long mipela”? Bikos yumi no ken go hariap long ol traim long strong bilong yumi yet. Krais yet i pret long ol traim!
Ol Kristen i mas prea na askim God long no ken larim ol traim i kamap long ol. Yumi save olsem yumi wik, na yumi no gat strong. Sampela lain i no strong tumas long bilip bilong ol, i olsem ol liklik pikinini i ting olsem ol pait i samting long pilai tasol. Tasol ol strongpela Kristen bai prea olsem: “Na yu no ken larim ol traim i kamap long mipela.” Na tu, ol yet i wok long abrusim ol traim. Ol Kristen i no ken wok long kamap klostu long snek nogut, long Satan. Nogat, ol i mas wok long stap longwe tru long Satan.
God i no save pulim yumi long mekim pasin nogut (Jems 2:13). Satan tasol i save mekim olsem. Tasol God i save stiaim laip bilong yumi. Olsem na long God yumi save beten, “Na yu no ken larim ol traim i kamap long mipela.” Olsem na, maski yumi no gat laik long kamap long pait, sapos God i stiaim yumi i go long pait, bai yumi pait. God i no save stiaim yumi i go long pait bilong kilim yumi; nogat, em i mekim olsem bikos dispela em i rot bilong win na kisim bel isi.
Yumi mas prea long stap longwe long ol bikpela pait, na yumi no ken wok long painim ol pait. Tasol sapos long laik bilong God Papa em i kisim yumi go long ol hevi bilong pait, yumi mas bilip olsem dispela samting bai mekim gut long yumi. Na yumi mas harim dispela tok long Buk Baibel: “Man i save sanap strong na i karim hevi long olgeta traim, em i ken amamas. Sapos em i winim pinis olgeta traim, orait God bai i givim em laip bilong i stap gut oltaim, olsem prais bilong en. God i tok pinis long givim dispela prais long olgeta man i save laikim em tru” (Jems 1:12).
Ol Kristen i save wok long abrusim ol pait wantaim birua bilong ol (Satan): “No ken larim ol traim i kamap long mipela.” Tasol taim ol Kristen i kamap long pait, ol bai kisim strong na pawa bilong stap gut!
SAMPELA TINGTING
Yu save bungim ol traim long bilip bilong yu? Olsem wanem?
Ritim: Efesus 6:10-18
Yupela i mas pasim olgeta klos pait God i save givim long yumi, na bai yupela inap long sanap strong na sakim olgeta kain pasin bilong trik na giaman Satan i save hait na mekim. — Efesus 6:11
Sapos yumi no kisim gutpela skul pastaim, bai yumi no inap kamap olsem soldia o ofisa long ami. Na sapos ami i no gat gutpela skul, na i no gat gutpela ol trening na ol i les long lainim pasin bilong bihainim ol stretpela pasin, hau bai ol soldia i mekim gutpela wok? Na em i wankain long sios bilong God. Yumi nidim gutpela trening na skul!
Tasol planti lain bilong sios tude i save les long kisim skul na trening, na long lainim pasin bilong bihainim ol stretpela pasin.
Taim yumi tingting long skul na trening, yumi save tingting long ol pikinini na yangpela manmeri. Na em i tru, em i gutpela sapos yumi go long skul na kisim trening taim yumi yangpela. Tasol planti manmeri i lus tingting long kisim skul taim ol i kamap bikpela. Olsem na, i olsem sios em i pulap long ol pikinini i no gat gutpela save.
Tasol long sanap strong na pait long Satan, yumi mas i stap man na meri bilong God.
Sapos yu gat wanpela gutpela wok, bai yu wok long kisim trening olgeta taim yu stap insait long dispela wok. Sapos nogat, bai wok bilong yu i pundaun. Na long skul bilong God em i bikpela samting moa. Trening bilong yumi i kirap taim yumi stap wanpela bebi, na i mas i go inap long taim God i singautim yumi long go long heven.
Long ami ol soldia i save lainim pasin bilong bihainim ol stretpela pasin na lo hariap. Na yumi, long dispela pait long Satan, yumi mas lainim dispela pasin hariap tu. Sapos nogat, bai yumi no inap winim dispela pait. Yumi mas klia gut long tok na lo bilong God na hariap long bihainim. Yumi i stap long wanpela bikpela pait!
Krais i bosim yumi na em i gat namba bilong mekim olsem. Tasol planti ol Kristen i no save gut long ol lo na tok bilong Bosman bilong ol. Na taim ol i harim ol dispela lo, planti ol bai wok long abrusim ol dispela lo.
Tasol yumi mas pasim olgeta klos pait God i save givim yumi, ol samting God i givim yumi long lukautim yumi. Sapos nogat, bai yumi no inap sanap strong long “taim nogut” (lain 13). Na dispela taim nogut i kamap pinis.
SAMPELA TINGTING
Yu yet yu stap long trening long sait bilong spiritual wokabaut bilong yu? Na yu i wanpela man o meri bilong bihainim tok na lo bilong God hariap, o nogat?
Ritim: Kamapim Tok Hait 12:1-6,13-17
Dispela snek em i lukim olsem ol i tromoi em i go daun pinis long graun, na em i go ranim dispela meri i bin karim pikinini man. — Kamapim Tok Hait 12:13
Krais i winim dispela pait long Satan pinis, tasol i no min olsem olgeta pait i pinis nau. Dispela pait i stap yet na em i bikpela pait tru! Olsem na, dispela tok olsem Krais i winim pait, i gat wanem mining? Em bai helpim yumi olsem wanem? “Dispela snek (Satan) i lukim olsem ol i tromoi em i go daun pinis long graun.” I min olsem Satan i no go pas long dispela pait; em i no bosman. Tasol Jisas (dispela “pikinini man”) em i lusim graun na i go antap long heven. Em i stap long heven olsem king bilong bosim dispela graun. Em i bosman tru. “Orait kwiktaim ol i kisim pikinini i go antap, na ol i bringim em i go long God na long sia king bilong em” (lain 5)...
Ritim: Matyu 27:32-44
Em i bin helpim ol arapela man, tasol em i no inap helpim em yet. Em i king bilong Israel. Orait em i ken lusim diwai kros na i kam daun, na bai yumi bilip long em. — Matyu 27:42
Jisas i hangamap pinis long diwai kros. Rot bilong bihainim tok bilong God i kisim em i go long dispela rot bilong pen na hevi. Em i kamap long las hap bilong dispela pen na hevi, na em i taim nogut tru.
Satan i wari nogut tru, tasol em i no redi long lus tingting long wok long pasim rot bilong God. Nogat, em i strong long mekim wok bilong em, tasol Holi Spirit i strong moa yet na em i no inap pinis long mekim wok bilong em...
Ritim: Matyu 16:13-23
Na Jisas i tanim na i tokim Pita olsem, “Satan, yu go baksait long mi!” —Matyu 16:23
Ol dimon na spirit nogut tasol inap luksave long Jisas olsem King bilong dispela graun. Sampela taim ol man i luksave long em bikos God yet i helpim ol i mekim ol olsem. Spirit bilong God i helpim Simeon long save olsem bebi Jisas em i King bilong promis (Luk 2:27). Na ol saveman i kam long Betlehem bikos God yet i stiaim ol long go (Matyu 2). Na Pita tu i luksave long Jisas, tasol Papa God i bin tokim em olsem.
Pita i autim dispela tok long Jisas: “Yu dispela man God i bin makim bilong kisim bek ol manmeri bilong en. Yu Pikinini bilong God i gat laip.” Na dispela tok bilong Pita i kamap olsem bikpela tok tru long sios bilong God long olgeta taim...
Ritim: Lo 8:1-8
Tasol Jisas i bekim tok olsem, “Buk bilong God i gat tok olsem, ‘Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.’” —Matyu 4:4
Long Matyu yumi ritim stori long taim Satan i bung wantaim King bilong Israel, Jisas. Pait i kirap nau. Matyu 4:8-9 i tok olsem Satan i tok long givim olgeta strongpela kantri long dispela graun long Jisas. Husat bai bosim dispela graun -Satan o Jisas? Husat bai win?
Tasol, dispela pait i no samting bilong strong na pawa tasol. Nogat. Dispela pait em i samting long bihainim tok bilong God. Kingdom bilong God bai kam taim God inapim laik na plen bilong em. Rot bilong winim Satan em i pasin bilong bihainim tok bilong Papa God...
Ritim: Matyu 2:7-18
Taim Herot i save olsem, ol saveman bilong hap sankamap i bin giamanim em, orait bel bilong en i hat moa. Na em i salim sampela man i go long taun Betlehem na long ol ples i stap klostu long taun, na ol i kilim i dai olgeta pikinini man i no winim tupela krismas yet.
— Matyu 2:16
I no gat wanpela i save gut long pawa tru bilong dispela nupela King – Satan tasol i save long dispela. Em i yusim Herot, olsem wokman bilong em, long inapim plen bilong em bilong kilim dispela nupela king. Tasol God i wok hariap moa.
Satan, “bipo yet i stap man bilong kilim ol man i dai” (Jon 8:44). Planti yia bipo long Herot, wanpela narapela king, king bilong Isip, olsem wokman bilong Satan, i bin kilim ol pikinini man bilong Israel. Na Moses, man bilong kisim bek Israel, i abrusim dispela wok bilong king bilong Isip na em i stap laip. Moa yet, em i kisim ol gutpela samting, olsem kaikai na skul, long haus bilong king bilong Isip yet. God i lap! Na long dispela taim, taim Herot i laik kilim ol pikinini man long Betlehem, Jisas, man bilong kisim bek yumi, em i abrusim dispela plen bilong Satan. Krais i wok long inapim olgeta samting long Olpela Testamen...
Ritim: Buk Song 72:1-11
Nupela pikinini em king bilong ol Juda, em i stap we? —Matyu 2:2
Dispela King bilong Israel, dispela king bilong promis, em i stap olsem wanpela wokboi nating long dispela graun na em i dai olsem wanpela man nogut. Em i narakain samting tru, na sapos yumi tingting gut long dispela, bai yumi kirap nogut. Na tu, dispela gutnius long ol pen na bel hevi bilong dispela king, bai i kliaim sampela samting long laip bilong yumi ol lain i bilip long Jisas Krais. Tude, ol dispela lain bilong dispela king i mas karim bel hevi na pen bilong dispela king tu.
Long helpim yumi klia gut long dispela bikpela samting long gutnius, em bai i gutpela sapos yumi klia gut long ol king bilong bipo tru. Tude, yumi no save gut long pawa na hona bilong ol king bilong bipo. Long bipo ol man ol i stap liklik tru long ai bilong ol king, olsem ol i samting nating tasol. Long taim bipo i olsem ol king i no man tru — ol i olsem wanpela god...
Ritim: Luk 1:26-38
Yu bin bilip olsem Bikpela bai i mekim olsem em i bin tokim yu, olsem na yu ken amamas tru. —Luk 1:45
I gat tupela kain lap i kamap long taim ol lain i tingim taim Jisas Krais i kamap olsem bebi. I gat lap bilong ol lain i no bilip long Krais – na dispela lap i olsem musik nogut. Bai God i ken marimari long ol lain i lap olsem taim ol i harim dispela stori long Mama Maria na bebi bilong em. Tasol i gat narapela kain lap i wok long go aut tu – em i lap bilong amamas bikos God i bin inapim ol promis bilong em.
Dispela kain lap i wankain olsem lap bilong Abraham na meri bilong em, taim tupela i lapun pinis na i lukim liklik bebi bilong ol, Aisak. “Aisak,” tupela i tok, “i olsem lap.” God i mekim kamap wanem samting i no inap kamap...
Ritim: Stat 25:7-11
Tupela pikinini bilong en, Aisak na Ismael i planim em long dispela hul bilong ston ol i kolim Makpela ... Na Aisak wantaim Ismael i planim Abraham long dispela hul bipo Abraham i bin planim meri bilong en, Sara, long en. — Stat 25:9-10
Taim Abraham i lusim Haran em i gat 75 krismas (Stat 12:4). Na em i wokabaut wantaim Bikpela inap long 100 krismas. Na em i dai taim em i gat 175 krismas, na ol i planim em long dispela hul bilong ston ol i kolim Makpela.
Taim yumi planim wanpela man o meri husat i dai pinis, dispela i wok long traim bilip bilong yumi. I olsem dispela dai yumi lukim i no wanbel wantaim bilip bilong yumi. Hau bai yumi lukim dai, na bilip olsem Krais i king bilong olgeta samting? Tasol planti ol Kristen i save tok olsem dai bilong lain bilong ol i wok long strongim bilip bilong ol. Bilip bilong yumi i save strong moa yet long taim bilong hevi, na dispela i winim taim bilong amamas. Taim yumi sori tru long taim bilong i dai bilong wanpela man o meri yumi laikim tru, bai yumi go long Bikpela long kisim sori na bel isi...
Ritim: Hibru 11:17-19
Abraham i tingting olsem, “Sapos Aisak i dai, maski, God em inap long kirapim em bek.” Olsem na tru tumas, yumi inap tok bokis long dispela samting i bin kamap na tok olsem, Abraham i kisim bek pikinini bilong en long matmat. — Hibru 11:19
Taim Abraham i wokabaut i go long Moria em i tingting olsem, “Sapos Aisak i dai, maski, God em inap long kirapim em bek.” Em i no wari long em yet, na tu em i no tingting long Aisak tasol. Nogat, em i tok, “God bilong mi em i husat?” Em i stap wantaim God olgeta taim, na God em i nambawan samting long laip bilong em. Long dispela traim yumi lukim bel isi stret bilong Abraham, na dispela i narakain samting olgeta. Em i dispela kain bel isi bilong wanpela man bel bilong em i bel isi long God tasol...
Ritim: Stat 22:15-19
“Mi Bikpela, mi tok tru tumas long nem bilong mi yet olsem. Yu gat dispela wanpela pikinini tasol na yu no bin pasim em. Olsem na bai mi mekim gut tru long yu.” —Stat 22:16-17
Ol sumatin i save raitim ol eksam long skul bilong painimaut sapos ol i save gut tru long ol samting ol i lainim long skul, o nogat. Na dispela traim God yet i givim Abraham i bilong painimaut sapos Abraham i lainim pinis pasin bilong laikim tru God antap long olgeta narapela samting, o nogat.
Em i hat tru long save long tingting bilong God taim em i givim dispela traim long Abraham. Em i wanpela bikpela na hatpela traim tru; kain olsem ol gutpela sumatin stret i save kisim. Na dispela traim em i las traim bilong Abraham: em i kam klostu long pinis bilong wokabaut bilong Abraham wantaim God...
Ritim: Stat 22:3-14
Tupela i kamap long dispela ples God i bin tok long en, na Abraham i wokim alta na i putim paiawut antap long en. Na em i pasim pikinini bilong en Aisak long rop. Na em i putim em antap long paiawut long alta. Orait Abraham i kisim naip na i laik kilim pikinini.
— Stat 22:9-10
Long nait Abraham em i tingting i stap, na em i kamap redi long bihainim tok bilong God. Em i kirap long moningtaim tru long mekim olsem. Olsem wanem? Ating em i mas les long kirap bikos em i les long bihainim dispela tok bilong God, a? Tasol, nogat. Long moningtaim tru Abraham i kirap (lain 3).
Na long hia Buk Baibel i stori long olgeta samting Abraham i mekim taim em i kirap pinis. Abraham i redim donki, em i kisim Aisak wantaim tupela wokboi bilong em. I kain olsem wanpela muvi we yumi inap lukim olgeta liklik samting i kamap. Na taim Abraham i wokabaut long rot inap 3-pela de (em i longtaim stret sapos em i laik senisim tingting bilong em), orait em i kamap long ples God em i makim pinis. Na gen yumi ritim olgeta samting em i mekim: em i redim paiwut, wokim alta, pasim pikinini Aisak long rop na putim em antap long alta, na em i kisim naip bilong kilim em...
Ritim: Stat 22:1-3
Orait God i tok, “Yu gat wanpela pikinini tasol, Aisak, na yu laikim em tumas. Yu mas kisim dispela pikinini na yu go long hap bilong Moria, na bai mi soim yu wanpela maunten. Na long dispela maunten yu mas givim Aisak long mi olsem ofa bilong paia i kukim olgeta.”
— Stat 22:2
Taim yumi wokabaut wantaim Bikpela, i min olsem yumi mas daunim yumi yet na redi long givim yumi yet long God. Abraham i lusim asples bilong em na papamama bilong em, na tu em i ranawe long Kenan i go long Isip, na em i lusim Lot tu. Na Abraham tupela Sara i mas lus tingting bilong bihainim plen bilong ol yet bilong kisim wanpela bebi. Ol i mas lukim hevi na krai, na ol i mas wet inap long taim Sara i no inap karim pikinini moa. Taim tupela i lapun pinis, orait God inapim promis bilong em. Pastaim tupela i lap taim tupela i no bilip, tasol God i senisim dispela lap i kamap olsem lap bilong amamas bikos tupela i lukim God inapim olgeta promis bilong em...
Ritim: Stat 18:22-23
Na Sara i pret na em i giaman na i tok, “Mi no lap.”
Na Sara i tok olsem, “God i mekim gutpela pasin long mi, na mi amamas na mi lap. Na olgeta
man i harim dispela bai ol i amamas wantaim mi.” — Stat 18:15; 21:6
Taim yumi ritim dispela stori, ating yumi bai i gat dispela kain askim: Bilong wanem Abram tupela Sara i mas wet longpela taim stret long kisim dispela bebi? Bilong wanem God i wet inap long taim Sara i no inap karim pikinini moa, na em i givim wanpela bebi long tupela?
Ritim: Stat 18:22-23
Na Abraham i tok gen, “Bikpela, yu no ken kros. Mi laik mekim wanpela tok moa. Sapos i gat 10-pela gutpela man tasol i stap, orait olsem wanem?” Na Bikpela i tok olsem, “Sapos i gat 10-pela gutpela man i stap, orait bai mi no ken bagarapim taun, na ol dispela gutpela man i no ken lus.” —Stat 18:32
Sampela taim God i autim ol plen bilong em long ol manmeri long dispela graun. Na tu, God i yusim pasin na wok bilong man long inapim ol plen bilong em. God i tokim ol lain bilong em long tingim dispela graun long beten.
Taim ol lain bilong kontrak bilong God i prea long ol hevi i stap long dispela graun, ol i mas strong long prea long em, tasol ol i mas daunim ol yet tu. Ol i ken strong long prea bikos ol i klia long God em i husat. Tingting gut long ol dispela tok: “Ating yu laik bagarapim ol gutpela man wantaim ol man nogut?” (lain 23, 25). “Jas bilong olgeta graun, em i mas bihainim stretpela pasin” (lain 25). Ol bilip lain i ken strong long prea bikos ol i save gut long stretpela pasin bilong God...
Ritim: Stat 18:16-21
Na Bikpela i tingting olsem, “Dispela samting mi laik mekim, em mi no ken haitim long Abraham.” —Stat 18:17
Sapos wanpela man i dai na polis o wanpela arapela man i mas i go tok save long papa o mama bilong em, ating em bai i les tru long tokaut olsem. Bel bilong em bai i hevi tru. Na taim ol lain long haus i lukluk long ai bilong em, sampela taim ol bai i klia hariap olsem em i gat hevi tru long tokim ol.
Na sampela taim tu, God yet i autim tingting na plen bilong em long ol lain bilong graun. God i bin autim gutpela nius long dispela graun, na dispela nius i wok long amamasim yumi olgeta de, na long givim yumi bikpela hop. Tasol God i autim sampela tok long yumi na dispela tok i givim bel hevi long yumi...
Ritim: Stat 18:9-15
Na Bikpela i askim Abraham olsem, “Bilong wanem Sara i lap na tok, ‘Mi lapun pinis na bai mi karim pikinini olsem wanem? Abraham, harim. I no gat wanpela samting Bikpela i no inap long mekim. Long dispela mun long yia bihain, em long taim mi makim pinis, bai mi kam bek, na long dispela taim Sara bai i gat pikinini man.” —Stat 18:13-14
Inap i go 25 yia Abraham na Sara i bin wokabaut long rot wantaim Bikpela. Na long olgeta dispela yia, ol i gat dispela bikpela hevi: Sara i no karim wanpela pikinini.
Buk Baibel i makim 8-pela taim we God i bin autim promis gen long tupela, olsem Sara bai karim wanpela pikinini. Pastaim God i promisim Abraham olsem em bai mekim ol lain tumbuna bilong em i kamap bikpela lain tru (12:3). Na taim Abraham i ting olsem wokman bilong em, Elieser, bai kisim ples bilong em, God i tokim em olsem pikinini tru bilong em bai i kisim ples bilong em...
Ritim: Stat 18:1-8
Mit i tan pinis, orait Abraham i kisim dispela mit wantaim susu na sis ol i bin wokim long susu bilong bulmakau, na em i givim long dispela tripela man. Ol i kaikai i stap, na Abraham i sanap klostu long ol, long as bilong wanpela diwai. — Stat 18:8
Dispela em i narakain samting olgeta. God i sindaun na kaikai long haus bilong Abraham.
God em i Gat Olgeta Strong, olsem na yumi mas brukim skru long em, tasol God yet i kam na sindaun kaikai wantaim Abraham. Na nogut yumi ting dispela em i piksa bilong God tasol, na em i no God tru i kam lukim Abraham. Nogut yumi bagarapim tok bilong God olsem. Sampela taim ol man i ting ol i mas kamap narakain long stap klostu long God. Tasol yumi mas stap olsem man tasol...
Ritim: Stat 17:9-14
Na yupela i mas bihainim dispela mak bilong kontrak bilong mi. Yupela i mas katim skin bilong kok bilong olgeta man long lain bilong yupela. — Stat 17:10
Namba wan samting God i mekim em i olsem: em i givim ol promis long lain bilong em. Em i mekim olsem taim em i singautim Abram (Stat 12). Na bihain, em i strongim dispela tok promis long wanpela kontrak (Stat 15). Na bihain long dispela, em i strongim dispela kontrak bilong em taim em i givim dispela mak bilong dispela kontrak long ol lain bilong em, dispela mak bilong katim skin (Stat 17).
Wanpela tok piksa long dispela kain kontrak i dispela kontrak bilong marit. Man bai givim wanpela promis long meri, na meri bai givim wanpela promis long man. Tupela i wokim wanpela kontrak taim ol i autim tok promis bilong ol yet. Na planti taim ol bai givim ring bilong pinga olsem wanpela mak bilong dispela kontrak. Dispela ring i putim ples klia olsem tupela bai i stap tru long ol promis tupela i mekim pinis...
Ritim: Stat 17:1-7
Abram i gat 99 krismas na Bikpela i kamap long em na i tok olsem, “Mi God I Gat Olgeta Strong. Yu mas aninit long mi oltaim, na mekim ol stretpela pasin tasol long ai bilong mi.”
—Stat 17:1 “Mi God i Gat Olgeta Strong.” Abram em i lapun pinis, na em i amamas long harim dispela tok bilong
God. Em i no askim God planti ol askim. Em i harim tok bilong God tasol.
Taim yumi wokabaut wantaim God em i bikpela samting bikos God inap long mekim olgeta samting. Abram i mas askim em yet, “God bilong mi em i husat?” Na God i tok, “Mi God i Gat Olgeta Strong. Yu mas aninit long mi oltaim, na mekim ol stretpela pasin tasol long ai bilong mi.” I min olsem, pasin bilong ol i mas putim ples klia olsem ol i bilip tru long dispela God i Gat Olgeta Strong...
Ritim: Stat 16:4-9
Tasol mi laik bai Bikpela i ken skelim tok bilong mitupela. —Stat 16:5
Taim tupela Abram na Sarai i pasim tok pinis long bihainim tingting na rot bilong ol yet, ol i bungim kain kain hevi. Sarai i wok long mangal. Hagar i wok long bikhet bikos em i ting olsem em yet i helpim tru famili bilong Abram. Em i apim em yet long ai bilong ol lain bilong Sarai na em i bikhet tru.
Na em i isi long save wanem samting bai i kamap long dispela rot. Em i pasin bilong yumi man. Sarai em i kros nogut tru na em i bel nogut long Abram. Em i kolim nem bilong God long em i ken skelim tupela: “Tasol mi laik bai Bikpela i ken skelim tok bilong mitupela.” Na Abram em i les na em i tokim Sarai olsem, “Harim. Hagar em i wokmeri bilong yu tasol. Yu bos bilong en na yu ken mekim wanem samting yu ting i gutpela long mekim.” Na Sarai i birua long Hagar...
Ritim: Stat 16:1-3
Bikpela i pasim bel bilong mi na mi no inap karim pikinini. —Stat 16:2
Dispela samting Sarai na Abram i mekim long dispela taim em i samting bilong bihainim pasin ol lain i i save mekim. Taim wanpela meri i no inap kisim bel, em bai orait long em i givim wokmeri bilong em long man bilong em, long wokmeri i ken karim pikinini bilong em yet. Em olsem pasin bilong ol long adoptim ol narapela pikinini.
Olsem na long tingting bilong man na long ai bilong lain bilong ol, Abram na Sarai i mekim gutpela pasin. Abram na Sarai i gat bikpela hevi bikos ol i no kisim pikinini yet. Olsem na Sarai i givim wokmeri bilong em long man bilong em...
Ritim: Stat 15:7-18
Long dispela de yet Bikpela i mekim kontrak wantaim Abram... — Stat 15:18 Long dispela teks yumi luksave long kontrak God i wokim wantaim tumbuna bilong dispela nesen
God bai yusim long bringim salvesen long dispela graun.
Planti ol kantri nabaut long Israel i save yusim dispela pasin (katim abus long tupela hap) long wokim wanpela kontrak.
Wanpela kontrak i makim taim we wanpela i givim promis long arapela na askim dispela arapela long mekim sampela samting long inapim dispela kontrak. Taim ol lain i mekim kontrak na katim ol abus long tupela hap i olsem tok lukaut - nogut wanpela i bagarapim o brukim dispela kontrak. Ol i mas stap tru long dispela kontrak bilong ol!
Ritim: Stat 15:1-6
Abram i bilipim tok bilong Bikpela. Olsem na Bikpela i kolim em stretpela man. —Stat 15:6
Taim Krais i kam ol lain bilong Juda i bruk long tupela hap. Wanpela hap bilong ol dispela pikinini bilong Abraham i bilip long Jisas olsem dispela Mesaia bilong promis. Tasol, narapela hap i givim baksait long em. Na dispela tupela lain i pait i stap. Ol i laik save olsem: Husat em i pikinini tru bilong Abraham?
Pol (dispela man pastaim em i givim baksait long Jisas na bihain em i bilip long em) em i save autim dispela tok i kam long Stat 15:1-6 long putim ples klia olsem ol lain i bilip long Krais ol i pikinini tru bilong Abraham. Pol i tok: “Gutnius bilong Krais i askim yumi long bilip, na bilip tasol. Gutnius i no samting bilong bekim ol gutpela samting yu save mekim; gutnius i putim ples klia wok bilong God yet. Na yumi mas bilipim dispela tok. Na bai yu stap stretpela long ai bilong God. God i no akseptim yu bikos yu yet yu gutpela. Nogat. Em I akseptim yu bikos em yet i gutpela. Yu no stap stretpela long ai bilong God bikos yu yet yu mekim planti wok. Nogat. Yu stap stretpela long ai bilong God bikos Krais i mekim olgeta wok. Bilip tasol!
Ritim: Stat 14:13-24
Na Melkisedek, em king bilong Salem na em i pris bilong God Antap Tru, em i bringim bret na wain i kam long Abram. Na Melkisedek i givim blesing long Abram olsem...Na olgeta samting Abram i bin kisim em i tilim long 10-pela hap na i givim wanpela hap long Melkisedek.
—Stat 14:18-20
Taim pait i pinis, bikpela samting i kamap: Abram i kisim blesing long Melkisedek. Yumi i no save planti samting long dispela pris bilong God Antap Tru. Em i no stap insait long lain bilong God (Yumi harim tok long em long Buk Song 110, na tu long Hibru 5 na 7).
Olsem na dispela samting i narakain samting tru. Long wanem, Abram na famili bilong em i gat bikpela namba tru long dispela taim. Tasol hia, hetman bilong nesen bilong God em i bin kisim olgeta promis bilong God, em i brukim skru long dispela man long narapela kantri na dispela man i blesim em. (Hibru 7:7 i tok: “Yumi save gut olsem, man i givim blesing em i bikman. Na man i kisim blesing long em, em i stap aninit.”) Na moa, Abram i save olsem Melkisedek i gat namba bikos em i givim takis long em: “Na olgeta samting Abram i bin kisim em i tilim long 10-pela hap na i givim wanpela hap long Melkisedek.”
Ritim: Stat 13:14-18
Lot i go pinis, na Bikpela i tokim Abram olsem, “Yu sanap hia na yu lukluk i go long olgeta hap... Na em i wokim alta bilong Bikpela long dispela ples.” —Stat 13:14,18
Abram i gat wanem kain tingting taim Lot yet i kisim nambawan gutpela hap graun, na dispela graun i bilong Abram long ol promis bilong God?
Em i hat tru long save gut long tingting bilong ol man taim ol i kisim pen na hevi long han bilong wantok bilong ol. Jisas i tok, “Na sapos wanpela man i laik kotim yu na kisim siot bilong yu, orait yu mas givim longpela klos bilong yu tu long em” (Matyu 5:40). Yumi i amamas long dispela tok na redi long harim? O yumi les long dispela tok?
Ritim: Luk 18:24-30
Na Jisas i tokim ol olsem, “Mi tok tru long yupela, olgeta man i bin ting long kingdom bilong God na i lusim haus na meri na brata na papamama na pikinini, orait taim ol i stap yet long dispela graun God bai i givim ol planti samting tru, i winim ol samting ol i bin i gat bipo. Na long taim i laik kamap bihain, ol bai i kisim laip i stap gut oltaim oltaim.” —Luk 18:29-30
Taim dispela yangpela hetman i les long bihainim Jisas bikos em i les long harim tok bilong en, ol disaipel i laik save wanem samting ol yet bai kisim. Long wanem, ol yet i bin lusim planti samting bilong ol taim ol i bihainim Jisas.
Na bekim bilong Jisas i narakain bekim olgeta. Sampela taim yumi ritim stori long taim Jisas i tok strong long ol disaipel bilong em bikos askim bilong ol i kranki. Na long hia tu, i luk olsem askim bilong ol disaipel i kranki. Ating yumi bai ting olsem Jisas bai bekim askim bilong ol disaipel olsem: “Bihainim mi tasol; maski long pe yu bai kisim.” Tasol, nogat. Jisas i wok long skulim ol long gutpela laip stret ol bai i kisim taim ol i bihainim em...
Ritim: Luk 18:18-23
Na Jisas i tokim em olsem, “Bilong wanem yu kolim mi gutpela? God wanpela tasol em i gutpela.” —Luk 18:19
Taim yumi harim dispela askim bilong Jisas, “Bilong wanem yu kolim mi gutpela?” ating yumi bai i kirap nogut. Sapos yumi no inap long kolim Jisas gutpela, husat bai yumi inap long kolim gutpela?
“God wanpela tasol em i gutpela.” Tasol Jisas em i pikinini tru bilong God oltaim. Na moa, Baibel yet i tok olsem Josep (Luk 23:50) na Barnabas (Aposel 11:24) i “gutpela man.”
Tasol long dispela teks, Jisas i no min olsem em i no gutpela, tasol em i wok long stretim tingting bilong dispela yangpela man i kam lukim em. Dispela yangpela hetman i mas lukaut long hau em i save autim dispela tok “gutpela.” Dispela man i bin skelim ol pasin bilong ol man na “gutpela” pasin bilong ol tu wantaim ol pasin bilong ol arapela manmeri. Na yumi save mekim olsem tu...
Ritim: Luk 18:9-14
God, mi no olsem ol arapela man, olsem na mi tenkyu long yu... — Luk 18:11
Ol man bilong dispela graun i save skelim ol man long ol narapela man. Na tu planti ol Kristen lain tu i save mekim olsem.
Dispela Farisi em i man bilong bilip na em i tok, “God...” Em i toktok long God, tasol em i wok long skelim em yet wantaim ol arapela man: “...mi no olsem ol arapela man, olsem na mi tenkyu long yu.” Em i save skelim pasin bilong em yet wantaim pasin bilong ol arapela. Na planti bilong yumi save mekim olsem. Na dispela Farisi, taim em i skelim pasin bilong em yet wantaim pasin bilong ol arapela man, i luk olsem em i winim ol stret. Em i winim stret man bilong kisim takis long sait bilong tambu long kaikai, na long tilim ol samting bilong em. I luk olsem em i winim stret dispela man bilong kisim takis...
Ritim: Stat 12:10-16
Bihain, taim bilong bikpela hangre i kamap, na i no gat kaikai tru long dispela hap.
—Stat 12:10
Longpela wokabaut bilong Abram wantaim Bikpela em i kirap tasol na wantu Abram i bungim ol hevi. Bikpela hangre i kamap long graun Kenan. Abram em i wari long dispela, olsem na em i go long Isip. Tasol, taim em i kamap klostu long Isip, em i bungim sampela moa hevi. Em i save olsem sampela taim king bilong Isip bai kisim ol naispela meri. Olsem na em i pret bikos em i ting ol bai kilim em, nogut king i gat laik long kisim dispela naispela meri bilong em, Sarai. Olsem na em i tokim Sarai long giaman na tok olsem em i susa bilong em, na em i mekim olsem. Tasol planti moa hevi yet i kamap long dispela tok giaman bilong Abram na Sarai...
Wanpela Alta i Go Long Narapela Alta
Olsem na Abram i wokim alta bilong lotu long Bikpela long dispela hap Bikpela i bin kamap long em... Na Abram i wokim alta long dispela hap (Betel) na em i kolim nem bilong Bikpela na i lotu long em. — Stat 12:7-8
Abram i kisim meri bilong em, Sarai (dispela meri i no bin karim pikinini), na Lot (pikinini bilong brata bilong en) wantaim, na lusim Haran na wokabaut i go long graun Kenan. Em i go long hap not long Kenan inap long hap saut, long taun Betel. Em i bikpela wokabaut stret, tasol Buk Baibel i no stori planti long dispela wokabaut - em i faivpela lain tasol long dispela siapta i stori long dispela bikpela wokabut. Tasol man i raitim Stat, maski em i sotim dispela longpela stori na raitim long faivpela lain tasol, tupela taim em i stori long Abram i wokim alta bilong lotuim Bikpela...
Ritim: Stat 12:1-4
Orait Abram i lusim taun Haran na i go olsem Bikpela i bin tokim em. Stat 12:4
Abram i bilip na em i bihainim tok bilong God: “Orait Abram i lusim taun Haran na i go olsem Bikpela i bin tokim em.” God em i tok, na Abram i bihainim tok bilong em.
Yumi mas lukaut taim yumi ritim dispela stori. Nogut yumi apim Abram tumas na stori long olgeta samting em i lusim taim em i bihainim Bikpela. Planti taim ol lain bai stori long pen Abram i pilim taim em i lusim haus na lain bilong em, o ol bai i stori long bikpela bilip tru bilong Abram. Tasol dispela em i no gutpela tingting...
Ritim: Aposel 7:2-8
Abraham em i namba wan tumbuna bilong yumi olgeta... — Rom 4:16
I gat tripela kain lain i tok olsem Abraham i papa bilong ol. Ol lain Juda, ol Kristen, na ol Muslim lain i
tok olsem ol i tumbuna pikinini bilong Abraham.
Maski wanem lain i tok stret olsem Abraham i Papa bilong ol, i gat wanpela samting em i tok tru. Sapos sampela long ol dispela tripela lain i ting olsem God bai amamas long ol bikos ol i stap olsem tumbuna pikinini bilong Abraham, ol i paul tru. God i no save mekim olsem...
Ritim: Kamapim Tok Hait 21:1-8
Na dispela Man i sindaun long sia king, em i tok olsem, “Harim. Mi mekim olgeta samting i kamap nupela.” —Kamapim Tok Hait 21:5
God i wok long “stretim haus” na mekim olgeta samting em i kirap pinis. Tasol long yumi man i luk olsem dispela wok i no pinis hariap. Tasol yumi no ken lus tingting bilong wanem God em i no pinisim wok bilong stretim haus bilong em hariap. Em i samting long save na marimari bilong em...
Ritim: Matyu 28:16-20
God i givim mi bikpela namba na strong bilong bosim olgeta samting long heven na long graun. Olsem na yupela i mas i go mekim olgeta lain manmeri i kamap disaipel bilong mi…. Harim. Mi save stap wantaim yupela olgeta de, i go inap long dispela taim i pinis. —Matyu 28:18-20
Wok Krais i mekim long dai na kirap bek gen, em i pinis. Olsem na Krais i skulim ol disaipel bilong em long mekim bikpela wok long dispela graun. Em i kisim bikpela namba na strong bilong bosim olgeta samting long heven na long graun. Ol disaipel i mas i go na mekim olgeta lain manmeri i kamap disaipel bilong em. Na em i save stap wantaim ol olgeta de. Dispela hap tok “olgeta” i min olsem i no gat sampela samting i lus. Krais i givim ol disaipel bilong em sampela wok i no gat pinis long em: “mekim olgeta lain manmeri i kamap disaipel bilong mi.” Ol disaipel i mas i go na mekim sampela moa disaipel. Na ol nupela disaipel i mas kisim baptais na lainim pasin bilong bihainim Jisas. Olgeta disaipel na olgeta misinari i gat wok long mekim olgeta lain manmeri i kamap disaipel bilong Jisas Krais...
Ritim: Matyu 8:28-34
Orait tupela i singaut strong olsem, “Yu Pikinini Bilong God, yu laik mekim wanem long mipela? Taim i no yet, na yu kam hia bilong mekim nogut long mipela, a? —Matyu 8:29
Taim yumi ritim Matyu, Mak, Luk na Jon long Nupela Kontrak, yumi bai klia olsem olgeta lain i no save gut long Jisas. Ol man na meri i no klia gut long em. Tasol ol spirit nogut i save gut long Jisas. Ol i gat narakain save olgeta long Jisas, na ol i klia bilong wanem Jisas i kam long dispela graun...
Ritim: Matyu 12:22-29
Tasol sapos Spirit bilong God i helpim mi na mi rausim ol spirit nogut, orait yupela i ken save, kingdom bilong God i kam pinis long yupela. —Matyu 12:28
I gat tupela kingdom: kingdom bilong God na kingdom bilong Satan. Yumi ken i stap long kalabus bilong Satan, o yumi ken i stap fri long kingdom bilong God...
Ritim: Luk 18:1-8
Tasol taim Pikinini Bilong Man i kam, em bai i lukim ol manmeri i stap long graun ol i bilip, o nogat? —Luk 18:8
Sapos kingdom bilong God em i dia tru long yumi na yumi hop long em, yumi mas strong moa yet long prea na long paitim dua bilong heven inap long taim yumi kisim wanem samting yumi prea long kisim...
Ritim: Matyu 25:1-13
Olsem na yupela i mas was gut. Yupela i no save long wanem de na wanem aua Bikpela bilong yupela bai i kamap. —Matyu 25:15
Dispela 10-pela yangpela meri ol i gat wok long lukautim man na meri husat i marit nupela. Ating ol i wetim man i marit nupela long wanpela ples namel long haus bilong man tupela meri. Ol i sindaun, ol i putim ol naispela klos pinis, na ol i holim lam bilong ol, redi bilong bungim man long rot. Ol bai singim ol song bilong amamas na ol bai i go pas long man long ples we dispela marit bai kamap...
Ritim: Matyu 24:45-51
Dispela kain wokboi i ken amamas tru taim bikman bilong en i kam bek na i lukim em i stap mekim wok bilong en. —Matyu 24:46
Em i bikpela samting long Buk Baibel long stap gutpela bosboi, tasol tude yumi no klia tumas long wok bilong ol bosboi. Long taim bilong Buk Baibel, taim wanpela bikman em i go long longpela wokabaut, planti taim em bai i lusim haus bilong em inap long wanpela yia samting. Taim em i stap long rot em bai i makim wanpela bosboi bilong lukautim olgeta samting bilong em. Dispela bosboi em i gat namba bilong bosim haus bilong dispela bikman na bilong baim sampela samting, na ol kain samting olsem. Taim bikman i kam bek long haus, bosboi yet i mas tokaut long wok em yet i mekim. Na planti taim em bai i no save wanem taim bikman bai i kam bek long haus bilong en...
Ritim: Galesia 4:1-7
Tasol long taim stret God i bin makim, em i salim Pikinini bilong en i kam… Galesia 4:4
Planti taim i luk olsem laip bilong dispela graun i olsem wanpela lain i raun olsem wanpela bal o ring. Mama i karim bebi, bebi i kamap bikpela, em i kamap lapun na bihain long dispela em i dai. Na sapos yumi tingting long wanpela yia, wanpela Krismas - Em bai i stat long Jenueri, i go long mun Juli, i go long pinis bilong yia. Na next yia em bai i wankain gen —olsem wanpela lain i raun olsem wanpela bal o ring...
Ritim: Kolisi 1:9-14
Yumi bin i stap aninit long strong bilong tudak, na em i bin kisim bek yumi na putim yumi insait long lain bilong Pikinini bilong en, em dispela Pikinini em i save laikim tru. —Kolosi 1:13
Buk Baibel i tok olsem yumi stap aninit long strong bilong tudak, o sapos nogat, em i bikos God i kisim bek yumi na putim yumi insait long Kingdom bilong Jisas na yumi stap aninit long em. Yumi no ken i stap aninit long tudak na God wantaim. Sampela taim yumi gat laik long stap namel long Satan na kingdom bilong God. Tasol yumi no inap. Yumi stap long tudak yet o yumi stap long kingdom bilong God. Yu bilong Satan o yu bilong Krais. Em tasol...
Ritim: Buk Song 110
Taim yu laik pait long ol birua ol manmeri bilong yu bai i go wantaim yu na helpim yu.
—Buk Song 110:3
Dispela Buk Song i stori long Jisas Krais. Na long Nupela Kontrak planti ol hap tok bilong dispela Buk Song i stap tu. Tasol ol lain Juda, long taim bilong Jisas, ol i save paul long tupela samting long dispela Buk Song. Namba wan samting i olsem: Devit em i raitim dispela Buk Song, na Jisas em i olsem tumbuna pikinini bilong em. Tasol Devit i tok, “Bikpela i tokim Bikpela bilong mi olsem…” Na dispela “Bikpela bilong mi” em i Jisas. Ol lain Juda i paul na ol i tok, “Olsem wanem na dispela tumbuna pikinini bilong Devit (Jisas) inap i stap olsem Bikpela bilong em tu?” (Matyu 22:45 i stori long dispela)...
Ritim: Rom 8:18-25
God i bin kisim bek yumi, na nau yumi bilip na wetim em inapim tru ol gutpela samting em i laik mekim long yumi. Na sapos yumi tok long yumi wetim wanpela samting, orait yumi save, yumi no kisim yet. Sapos man i kisim pinis wanpela samting, orait bilong wanem em bai i wet i stap? —Rom 8:24
Salvesen em i samting bilong nau na samting bilong bihain taim tu. Yumi kisim salvesen pinis, na tu yumi wet i stap bilong kisim salvesen. Krais i lusim sin bilong yumi pinis – olsem na salvesen em i samting bilong nau. “Yu kisim salvesen pinis?” “Yes, mi kisim pinis.” Tasol yumi save bungim ol hevi na pen yet, na sin i save stap wantaim yumi tu. “Yu kisim salvesen pinis?” “Mi wet i stap bilong kisim salvesen.” Salvesen i samting bilong bihain taim tu. Tingim, “Na sapos yumi tok long yumi wetim wanpela samting, orait yumi save, yumi no kisim yet. Sapos man i kisim pinis wanpela samting, orait bilong wanem em bai i wet i stap?”...
Ritim: 1 Timoti 1:12-17
Krais Jisas i bin kam long graun bilong kisim bek yumi manmeri bilong mekim sin. Dispela tok em i tru olgeta na em inap long olgeta man i harim na bilipim. — 1 Timoti 1:15
Taim Pol i raitim namba wan pas i go long Timoti, em i wari tru olsem em i mas lukautim gut olgeta tok tru. Olsem na em i tok: “Timoti, yu mas was gut long dispela wok God i bin givim long yu. Givim baksait long olkain toktok nabaut i no bihainim tingting bilong God” (1 Timoti 6:20)...
Ritim: Jeremaia28:1-11
…orait Hanania … em i sanap long ai bilong ol manmeri na i tok, “Bikpela i tok olsem...”
—Jeremaia 28:10-11
Ol profet i man bilong autim tok bilong God. Taim wanpela profet i opim maus bilong em, em i no autim tok bilong em yet. Nogat. Em i save tok, “Bikpela i tok olsem.” Dispela man, Hanania, em i tok olsem em i autim tok bilong God. Tasol em i giaman. Em i wanpela giaman profet.
Ritim: Buk Song 130
Em bai i kisim bek ol manmeri bilong en, em yumi Israel,na rausim olgeta sin bilong yumi.
—Buk Song 130
…na yu mas kolim nem bilong en Jisas, long wanem, em bai i lusim sin bilong ol manmeri bilong en na kisim bek ol.
— Matyu 1:21
Ol wasman long nait i save wet i stap inap long tulait i kamap. Ai bilong ol bai slip, tasol ol i no ken slip. Ol i mas putim was. Long ol wasman dispela taim bilong tudak em i longpela taim stret na ol bai i wet inap long tulait i kamap. Na dispela man i raitim Buk Song 130 em i tok, “Mi save wet long Bikpela, na mi laikim tumas bai em i helpim mi.”...
Ritim: Aisaia 63:15-64:2
Bikpela, mipela i laik yu mas brukim skai na kam daun. — Aisaia 64:1
Sampela taim i luk olsem yumi nidim wanpela bikpela mirakel. Sapos wanpela man i gat bikpela sik tru, na ol dokta i tok olsem em bai i dai, yumi bai tok, “A, yumi nidim wanpela bikpela mirakel. God yet i mas oraitim em.”...
Ritim: Aposel 13:44-49
Tru, mitupela i mas givim tok bilong God long yupela Juda pastaim. Tasol yupela i givim baksait long dispela tok, na i olsem yupela yet i tok, “Mipela i no inap kisim laip i stap gut oltaim.” Olsem na yupela harim. Nau mitupela i no ken autim tok moa long yupela. Mitupela bai i autim tok long ol arapela lain… —Aposel 13:46
Sapos yu givim baksait long Krais i olsem yu kilim yu yet i dai.
Wok bilong sios em i bikpela samting stret. Em i samting bilong laip na i dai. Planti taim ol sios i no save wari tumas long dispela. Planti ol sios i wari tasol long amamas, na mekim naispela tok long ol lain i save kam bung wantaim. Planti ol sios i wari tasol long kisim planti manmeri i kam insait long dua bilong sios bilong amamasim ol tasol...
Ritim: Aisaia 66:18-24
…bai ol i lukim ol bodi bilong ol lain i bin bikhet na sakim tok bilong mi, ol i dai pinis na i slip nabaut long graun. —Aisaia 66:24
God bai i kisim bek ol lain bilong em, na em bai i mekim save long ol lain i les long em, na long dispela rot em bai i sanapim kingdom bilong em. Dispela tupela samting i save wok wantaim insait long dispela bikpela wok God i mekim. Sios bilong God i mas autim gutnius bilong wok bilong Jisas Krais bilong kisim bek yumi, tasol sios i mas stori long stretpela kot bilong God tu. Maski yumi gat liklik save tasol long pasin bilong God long mekim save long ol lain i sakim tok bilong em long las de, yumi klia olsem dispela de bai i kam. Planti taim yumi no stori tumas long wok bilong Krais long kisim bek yumi bikos yumi no wari tumas long wok bilong God bilong mekim save long ol lain i no stap aninit long Krais...
Ritim: Kamapim Tok Hait 1:9-18
…Na wanpela bainat i gat tupela sap na i sap tru, em i kam ausait long maus bilong en. —Kamapim Tok Hait 1:16
Jisas inapim olgeta tok profet long Olpela Kontrak i tokaut long em. Tasol olgeta samting i kamap i narakain olgeta long olgeta tingting long olgeta manmeri...
Ritim: John 12:23-33
…sapos pikinini wit i no pundaun long graun na i dai, orait em wanpela tasol bai i stap. Tasol sapos em i dai, orait em bai i kamap na karim planti kaikai. — Jon 12:24
Ol lain long Jerusalem i bel nogut. Sampela lain ol i toktok isi olsem Jisas em i man bilong kisim bek ol, olsem ol profet i bin promis. Na taim Jisas i go insait long Jerusalem antap long wanpela donki, ol i singaut strong, “Amamas long God. God i ken mekim gut long dispela man i kam long nem bilong Bikpela. Em i king bilong Israel.”...
Ritim: 1 Korin 2:1-9
Mipela i autim tok long gutpela tingting na save bilong God… Tasol tok bilong dispela rot i bin i stap hait, na i no gat wanpela hetman bilong dispela graun i bin save long en. —1 Korin 2:7-8
Long dispela hap, Pol i no stori long sampela tok hait olsem tok hait bilong ol samting bilong masalai o sanguma. Nogat, dispela tok hait em i gutnius, dispela gutnius bilong Krais. Dispela gutpela tingting na save bilong God em i Krais, em i bin dai long diwai kros bilong kisim bek yumi. Dispela gutpela tingting na save bilong God i stap long ples hait; i no gat wanpela man i bin save long em bipo long taim God yet i soim dispela klia tru. God yet i redim rot bilong salvesen bilong soim bikpela save na gutpela tingting bilong em, na bilong daunim olgeta ol narapela rot bilong kisim salvesen olsem ol giaman lain i stori long ol. I no gat ai i lukim o yau i harim — dispela dai na kirap bek bilong Krais...
Ritim: Matyu 13:3-14
Wanpela man i go tromoi pikinini wit long gaden. — Matyu 13:3
Taim Jisas i autim dispela tok piksa long ol, i gat planti manmeri i no save tru long as bilong dispela tok piksa. Ol lain i gat “yau long harim” na ol lain “God i larim ol i save pinis long as bilong tok hait bilong kingdom bilong heven,” ol dispela lain tasol i save gut long as tru bilong dispela tok piksa bilong Jisas. Bilong wanem ol arapela lain i no klia gut long dispela tok piksa?...
Ritim: Matyu 6:5-15
Taim yupela i no opim maus yet long askim Papa bilong yupela long wanpela samting, em i save pinis long olgeta samting yupela i sot long en. —Matyu 6:8
Yumi mas tokim God long wanem samting yumi sot long en. Tasol, taim yumi opim maus bilong yumi yet long askim Papa bilong yumi long wanpela samting, em i save pinis long olgeta samting yumi sot long en. Em i hatwok stret long yumi yet i save gut tru long wanem samting yumi nidim...
Ritim: Luk 10:38-42
Marta, Marta, yu wok long tingting planti na yu wari long planti samting. Yu mas tingting long wanpela samting tasol. Dispela samting Maria i laik kisim, em i gutpela samting tru, olsem na yumi no ken pasim em long kisim dispela gutpela samting. —Luk 10:41,42
Taim yumi harim dispela stori bilong Marta na Maria yumi no ken ting olsem pasin bilong sindaun nating na malolo em i winim pasin bilong mekim wok. 1 Tesalonaika i stori long wanpela sios we ol i save sindaun tasol na stori long taim Krais bai i kam bek. Pol i tokim ol long kirap na wok. God i no amamas long pasin bilong les long wok...
Ritim: Matyu 9:1-8
Pikinini, bel bilong yu i ken i stap isi. Mi lusim pinis ol sin bilong yu… Yu kirap na kisim bet bilong yu, na yu go long haus bilong yu. — Matyu 9:2,6
Ol profet long Olpela Kontrak i stori long dispela kingdom bai i kam olsem wanpela graun i gat planti gris na kaikai i stap long en. Sampela bai tok olsem dispela em i tok piksa long ol gutpela samting, olsem ol samting bilong amamas na bel isi...
Ritim: Aisaia 11:1-9
…olgeta samting long graun bai i save tru long Bikpela. Dispela save bai inapim olgeta hap graun olsem solwara inapim mak bilong en olgeta. —Aisaia 11:9
Hia, long Aisaia 11, yumi lukim narapela naispela piksa long dispela ples bilong hop na glori. Pastaim yumi ritim long dispela gutpela King husat i bosim dispela kantri. Na dispela nupela kru i kamap long Jesi, dispela as bilong diwai ol i katim pinis, em i Jisas Krais. Na Aisaia i tok olsem, taim Krais i bosim wanpela kantri dispela kantri bai i gat amamas, stretpela kot, na malolo. Dispela King i rausim ol pasin nogut, em i mekim gut long ol rabisman na animal. Bel isi tru i stap na ol lain i amamas na wanbel tasol...
Ritim: Matyu 5:13-16
Yupela i olsem sol bilong graun…Yupela i olsem lait bilong graun… —Matyu 5:13-14
Yumi ol longlong lain bilong God i olsem sol bilong graun. Ol lain bilong graun i no bilipim dispela, na lain bilong God bai bilipim isi isi, tasol God yet, husat i kamapim dispela graun, em i soim dispela long yumi: dispela liklik lain bilong God i gat bikpela pawa long dispela graun...
Ritim: Matyu 5:1-12
Ol manmeri i save, ol i stap rabis tru long ol samting bilong God...Ol manmeri i krai i stap…Ol manmeri i save daunim nem bilong ol yet...Ol manmeri i laikim tumas long bihainim stretpela pasin…Ol manmeri i save marimari long ol arapela…Ol manmeri bel bilong ol i klin…Ol manmeri i save mekim dai ol kros na pait…Ol manmeri i save bihainim stretpela pasin na long dispela as ol i kisim hevi long ol arapela ol i ken amamas. Kingdom bilong heven em i bilong ol. — Matyu 5:3-10
I gat 7 bilien samting manmeri long dispela graun. 1 bilien i olsem 1 tausen milien. Em i bikpela namba tru. Na olgeta dispela manmeri i gat ol hop na ol laik bilong ol yet...
Ritim: Matyu 3:13-17
Long dispela taim Jisas i lusim Galili na i go long wara Jordan. Em i go long Jon, na i laik kisim baptais long han bilong Jon. — Matyu 3:13
Wanpela narakain samting tru i kamap taim Jisas em i wokabaut namel long planti lain na em i go long Jon bilong Baptais bilong kisim baptais long han bilong en. Jisas yet i laik kamap klin!...
Ritim: Matyu 3:1-12
Yupela tanim bel. Kingdom bilong heven em i kam klostu pinis.
— Matyu 3:2
Jon bilong Baptais i tok olsem, “Em i kam.” Klostu God bai kam bilong mekim save long ol lain i no bilip long em na bilong kisim bek ol lain bilong em. Olgeta samting nogut God bai i kukim long paia, na olgeta gutpela samting God bai i bungim bilong stap gut oltaim oltaim...
Ritim: Aisaia 35
Yupela i mas sanap strong na i no ken pret. God bai i kam na kisim bek yupela na mekim save tru long ol birua bilong yupela. —Aisaia 35:4
Olgeta man na meri i gat hop. Sapos wanpela man i nogat hop i min olsem em i dai pinis. Em i wanpela nupela yia, na planti taim long stat bilong wanpela nupela yia ol manmeri bai ting olsem, “Ating long dispela yia planti samting bai i kamap orait long mi.” Tasol yumi mas askim yumi yet – yumi gat wanem kain hop, na as bilong hop bilong yumi em i husat?...
Ritim: Hibru 11:29-12:2
…Ol dispela manmeri bilong bipo ol i sanap na raunim yumi i stap olsem bikpela klaut, na ol i soim yumi pasin bilong bilip. Olsem na yumi mas lusim olgeta kain samting i mekim yumi i no inap ran strong, na olgeta sin i save pas long yumi. Na yumi mas strongim bel na ran strong long dispela resis God i bin makim bilong yumi ran long en. Yumi mas lukluk i go long Jisas, em i as bilong bilip bilong yumi, na bihain em bai inapim tru bilip bilong yumi. —Hibru 12:1-2
I no olsem yumi go insait long dispela nupela yia olsem wanpela hap palang long wara i save surik i go kam long biksi. Nogat. Dispela nupela yia i olsem wanpela resis. Na God i singautim yumi long ran long dispela resis na em i skulim yumi long pasin bilong ran gut long dispela resis tu...